الهوى الغايب حصرياً لمنتديات غرام..روايه وحبرها وردي

[حنان الجرح]

شكراً ولاتكفي
لجميع من يتابع الهوى الغايب بصمت
ممتنه جدا لكم
واليوم هو موعد نزول البارت كونوا على إنتظار

[حنان الجرح]

تبغى تشوف أشجع رجل في حياتك
شفني وانا مقفي على كثر مااغليك



هنا بدأت الحقيقه والواقع يرسمون خطوط واضحه لأحلام راكان وتمادي ساره
من هنا بدأ الجميع يستوعبون إن الحب لوحده عمره ماكان كافي وان الظروف مو دايماً تكون مرحله بس غالباً تكون مصير
.
.

ندى وطلال
وعشق الطفوله المتأخر ..وأحلام المراهقه الجنونيه..وجعها الصامت من فراقه ..
ازدواجيتها الرهيبه ماكانت من فراغ ..كانت مجرد غطا وستر على "جنون العاشقه الصغيره" اللي تحاول بشتى الطرق انها تخفي طلال عن عيون الكل
.
.
لمياء وإبراهيم
و"مهزلة نظرة المجتمع"
بدايه خطأ وحب صآدق
معادله مستحيله في زمان المرجله..على حساب المشاعر
وش استفادت لمياء من لحظات الحب اللي عاشتها بالخطأ..الا قلب مجروح ..وخيانه روحيه لـ"خالد" ..حتى لو نذرت جسدها له ..يبقى القلب وميله

لشخص آخر..جريمه ومهزله تفوق"نظرة المجتمع"
ووش تسوي لو عشقت إنسان ماهو من نصيبك..!؟
.
.
راكان وسآره.
.حب إلزامي..وصار رغم غرورها حب إختياري..ويوم صارت الحياه بعيونهم لحظة لقا..
صار لازم للعذاب يعيد مسلسله ابتداءاً من الحلقه الأخيره...
من يصدق ان ساره لغير ولد عمها .. أي شخص يحاول يقنع المجنون بهالشي وأي دمع اللي يقدر يستوعب فجيعة ساره
وأي "رجل" يقدر يوقف بوجه أبوه من أجل "إمرأه"؟
طبعا لاتستحق كل هذي التضحيه >>"أنثى" مهمله على رفوف المرجله..!
.
.
تولين وأبو سامر
إعجاب يفضي الى حب..والأسس خيانات لأقرب الناس
الأولى لصديقتها
والثاني لزوجته
لكن "مابني على باطل فهو باطل"
بس هل من المعقول تتحول نظرات الإعجاب لعلاقه جاده ..وحب طاهر في مستنقع مثل هذا؟
.
.
ريناد وأحمد
الموت يعني ماعادت الأجساد يم أرواحها
لكن الحب فوق أي أعتبارات دنيويه
وبيضل هالفقد يستنزف شعورها حد التبلد ..وعند اللحظه اللي تقول فيها "قبلت به زوجاً" لشخص ثاني تكون وقتها وصلت لحد التجمد.. بعدها بتعيش

الحياه بالموت..والفرحه بالحزن..والابتسامه بالدمعه..بتتساوى عندها الإختلافات..لتصبح أنثى مجرده من أدنى شعور
.
.
رنا وناصر
حب من طرف واحد .. وتضحيآت مدفوعة الثمن ..
.
.
رغم تاريخ الطعون المنحفر في ظهري
رغم زلات الطريق اللي مشته اقدامي

قمت في كامل شموخي وجيت اقدم عذري
للمبادئ / للحبايب / للشعر / لأحلامي
.

على مدى ثلاث أيام بلياليها كان راكان يحاول ينام ..كان يحلم بلحظة إستستلام واحده ..
بمجرد يحط راسه ع المخده يصحى مفزوع ..ويحسب ان اللي صار كان حلم..لكن يرجع الواقع يصب الحميم على ذكرى ساره المؤجله حتى صدور قرار

تجريد القلب من ذكراها الحزينه
اليوم هو يوم "المصير" كان ابو راكان يتجهز من الصباح ويحاول يقنع ام راكان تروح معاه للشرقيه حتى يتقدمون رسمي لخطبة
"ندى بنت الفواز"
ام راكان: انا ماني براجعه للشرقيه ماصدقت متى طلعت منها
ابو راكان: شوفي يابنت الناس انا خاطب لولدك بنت الفواز هذي مافيها كلام وان كان قصدك بهالحركات انك بتخربين السالفه
ترى الموضوع ماشي فيك ومن دونك
ام راكان: اجل خليه من دوني ..أنا مو راضيه..ولانت ماخذ تبريكي..وروح زوج ولدك اللي تبيها لكن ساره ماراح تاخذ
الا راكان
ابو راكان: هههههههههه اجل ناويتن على شر يا حصيصوه ..تبين تجيبين لها ضره واحنا لسه مازوجناها الولد
ام راكان: انت زوجه الاولى على كيفك..وأنا ازوجه الثانيه على كيفي
ابو راكان : براحتك..انا بكره ماشي روحي صحي الولد وخليه يشوف شغله ويقدم على إجازه
كانت لمياء في المطبخ تسوي حلى عطتها اياه ساره قبل يسافرون وقالت لها تسويه لراكان
لمياء: كيف يعني ملعقتين حليب؟ يقصدون جاف ولا سائل..معقوله بس ملعقتين..بدق على سويره أتأكد..بس لا استحي توني متهاوشه معاها على سالفة

"رنا"..حسبي الله عليك يارنا دنيا وآخره..
(رنا دقت على ساره وأصرت تعطيها رقم لمياء على أساس انهم بالشرقيه جايين سياحه وتبغى تشوفها..وتبيها مفاجأه..لكن ساره قالت ان لمياء ماطلعت رقم

جديد..وحاولت تعرف وش سبب المشاكل اللي بينها وبين لمياء بغرض الإصلاح...لكن هالشي نرفز لمياء واعتبرته لقافه وتهاوشو للمره الثانيه)
راكان: لموي..
لمياء فزت من مكانها:بسم الله الرحمن الرحيم سكنهم مساكنهم..انت من وين طلعت
راكان: اقول بلا هذره قومي سوي لي فطور
لمياء: لاياعيوني انا مانيب ساره تتشرط علي واقول لك من عيوني..!
راكان: اقول الله ياخذك انتي وساره سوا
طلع راكان من المطبخ بتملل وسط ذهول لمياء اللي مو قادره تفسر سلوك راكان الغريب
لمياء:غريبه هذا من البدايه يتكلم عن البنت كذا..اجل اذا تزوجو وش بيصير فيهم..اللهم لاشماته..
رجع راكان للمطبخ بعد ماتذكر ان ماعنده جوال
راكان: اقول لمياء وين جوالك القديم ابغاه
لمياء: حلوه ذي انت تعطي الهديه باليمين وتاخذها بالشمال؟
راكان: اقول بلا هذره زايده جوالي ضايع عطيني شريحتك القديمه والجهاز القديم..
لمياء: شريحتي القديمه مدري وينها
راكان: كيف يعني؟
لمياء: ضاعت احترقت انسرقت ..قلتلك مدري
راكان: طيب ليش معصبه..جاوبي على سؤالي بهدوء <<<شك راكان ان انفعال اخته ماكان طبيعي
لمياء:والجهاز خربان
راكان: جيبيه بصلحه
لمياء: خلاص خذ الجديد ماابيه
راكان بصوت مرتفع: لمياء حركات البزرنه ذي ماتمشي معاي الحين تطلعين تجيبين الجوال القديم مع الشريحه
(كانت لمياء خاااايفه ان راكان يكتشف شي بجهازها القديم ..)
لمياء: طيب وش تبي بجهاز من دون شريحه؟
راكان: بطلع بدل فاقد لشريحتك القديمه
(كانت لمياء شايله بيدها صينية الحلى..وبمجرد ماسمعت ان راكان بيطلع بدل فاقد لـ شريحتها القديمه )
راكان: سم الله عليييييييك
لمياء: آآح دخلت بيدي قزازه
راكان: انكسر الشر..ماعليك فداك
لمياء: مدري شفيني من الصباح احس بدوخه
راكان: نادي الشغاله تجي تنظف المكان ..
لمياء:لا ماعليك انا بنظف
راكان اخذ المكنسه من يد لمياء بقوه ورماها بعيد وحط عينه بعينها:لمياء انا مو غبي..لكن أحاول اني أستغبي..فلا تستغلين مكانتك عندي غلط..الا الخطأ
يالمياء الا الخطأ
لمياء: راكان تعال وين رايح؟
(صفق راكان بباب الفيلا بقوه..وكانت عيونه تقول انه ماراح يترك السالفه تعدي على خير)
طلعت لمياء وجسمها كله يرتعش من الخوف تدور على جوالها بين الشنط اللي لسه مارتبتها رغم ان لهم أكثر من 3 أيام من رجعوا للرياض..لقت الجوال

وراحت على طول ع النت تدور طريقه تقدر تمسح فيها
كل شي من الجوال نهائياً..

.
.
.
في بيت ريناد
ريناد: انت نذل
ابو سامر: ماعليك زود
ريناد:مو معنى ان البنت ماوراها ابو او اخو انك بتاخذ راحتك
ابو سامر: هي شكت لك؟
ريناد:ايه شكت لي وتقول انك مزعجها بالاتصالات
ابو سامر: انتي كذابه
ريناد: وانت حقير..
ريناد:خاف ربك يابن الناس ..البنت وحيده واي شي بيمس سمعتها ..يعني مافيه بنات في الدنيا الا تولين
ابو سامر: ههههههههههههه اقول وش رايك تقلبين وجهك ابي اشوف المباراه
(طلعت ريناد وهي تحس بالخذلان...اتصلت على تولين وهي تحاول تداري خيبتها قدامها)


في بيت تولين

تولين: هااااي
ريناد: هلا تولين أخبارك؟
تولين: رنو حياتي انا تمام وانتي إزايك؟
ريناد: انا بخير اشوف المعنويات ماشاء الله مرتفعه
تولين: ههههههههههه الحريه يارنو الحرييييييييه احس اني طايره في السما لأول مره أتنفس الاكسجين اللي يتنفسونه كل الناس
ريناد: هههههه ليه قبل وش كنتي تتنفسين ثاني اكسيد الكربون؟
تولين: لا..كنت اتنفس "عقول متحجره" و"نفوس مريضه" ..
ريناد: سلامات وش فيك اليوم
تولين: اقول لك شي بس ماتعصبين علي؟
ريناد: قولي
تولين: لايمه ..انتي تخوفين ..مافيك قلب..
ريناد: اجل ليه من الأساس تتكلمين
تولين: كنت احسبك بتتفهميني ..لكن الظاهر انك معقده أكثر من كل رجال السعوديه هههههههه
ريناد: ماتضحك
تولين: عادي مو مشكله ..الحين رنودي..مضطره اقفل وراي مشوار
ريناد: وين على الله؟
تولين: بروح السوق
ريناد: اجل مري خذيني معاك حتى انا والله ناقصتني اشياء ضروريه
تولين: امممم..آسفه ريناد مااقدر ..هذا مشوار خاص جداً
(حست ريناد ان تولين ماعاد هي الاوله وفيها شي تغير..صارت وقحه بعض الشيء ..لكن حاولت تقنع نفسها انها مرحله وبعدها بترجع لعقلها)
ريناد: اوكي خلاص حبيبتي آسفه ع اللقافه
تولين: ههههههه لاتزعلين ياعمري..
ريناد: لا لا ..انا مو كذا..بس ياويلك ان ماعوضتيني هالطلعه
تولين: ابشري من عيوني
.
.
طلعت ريناد لغرفتها وهي تناقز من الفرح وتغني
اليله احسااااااسي غريب
عاشق وانا مالي حبيب
جلست ع التسريحه وهي تتأمل عيونها الذابله من وفاة أبوها
ابتسمت للمرايه حتى بانت غمازاتها ..وفتحت درج التسريحه وطلعت علبة الميك اب
حطت الفاونديشن وبدت ترسم حط الكحل على رموشها بدقه متناهيه ..عززت كثافة رموشها بالماسكار
حطت بلاشر على خدودها وقلوس وردي على شفايفها .. وكالعاده اخذت عدساتها الرماديه <<زهقت من الزرقا
ولبستها ..وبعد ماانتهت تماما من المكياج صارت تناظر لأنعكاسها في المرايا وهي تميل براسها مره على اليمين وترفع راسها عشان تشوف الكحل مضبوط ولا

لا..عطت المرايا بوسه وهي تقول: اهبل سم الله علي..اليوم بتشوف يا"حبيب الريم" من هي تولين..اذا مانسيتك ريم وطوايف ريم ههههه
نادت على ميري تجيب لها عبايتها الحريريه المطرزه بكرستالات من سوارفسكي..
أخذت عطر"دولتشي اند غبانا" وتسبحت فيه مو بس تعطرت..
لبست عباياتها واخذت الطرحه وتلثمت فيها كانت فتنه لكل من يشوفها نزلت وصوت الكعب مع الأرضيه الرخاميه يزيدها أنوثه
.
.
تولين: ميري تعالي معانا
ركبت ميري وتولين مع سواقهم بشير وتوجهو للراشد كانت الساعه تشير الى السابعه مساءاً..وصلو للمجمع بعد نص ساعه وطلبت تولين من بشير ينتظرها

بالسياره
واخذت معاها ميري لداخل السوق
دق جوالها على نغمة تامر حسني (عندي أمل كلي أمل اشوفك تاني بحظني وايه العمل ايه العمل أرجع لي تاني وخذني)
تولين بنعومه مبالغ فيها: هاي
مشعل:فديت الـ"هاي" وصاحب ال"هاي" ها قلبو وصلتي؟
تولين: هههه ايه انا بالمجمع الحين بس ماراح تشوفني الا بشرط
مشعل: تدللي انتي تامرين على روحي يابعد طوايف هلي
تولين:ابي اشوفك انا اول يمكن ماتعجبني
مشعل: هما ذاك اليوم أرسلت لك صورتي وسائط؟
تولين: لا حبيبي ممكن تكون أرسلت لي صورة أي واحد من أصدقائك العب على غيري
مشعل: طيب انتي ليه خايفه تعالي واذا ماعجبتك روحي واوعدك ماازعجك مره ثانيه
تولين: اغبى شي ممكن اسويه اني أصدق وعود واحد مثلك
مشعل: ههههههههههههه بدينا نغلط ياحلوه ..
تولين: لاحبيبي لا غلط ولاشي ..كنت أمزح
مشعل: ياويل حالي منك ..آآآه
تولين: انت وين جالس الحين؟
مشعل: بستار بكس ..أحلى واحد موجود أنا ههههههههه
تولين:هاهاها دمك ثقيل من البدايه
مشعل: لا تكفين ..خلاص ماعاد اتكلم ولا أنكت
(طلعت تولين بخطى متعثره للدور الثاني وكان ينازعها احساسها بالخطا ورغبتها في الانتقام لكن غياب الاهل والوازع الديني خلاها تستمر بالغلط لآخر لحظه)
تولين: ميري روحي اجلسي هناك
ميري: حاظر مدام
(كل الشباب اللي كانو جالسين بستار بكس كانو يناظرون لها وعيونهم بتطلع من محاجرهم ..عطرها كان ينشم على بعد 100 متر..وعيونها الرماديه مع

الطرحه السودا لها فتنه عجيبه الكل كان يتمناها تعطيه نظره والبعض ماانتظرها منها راح لعندها بوقاحه وطلبها الرقم)
تولين: انت قليل أدب خير ان شالله تبي الرقم
؟؟؟: يعني ايش المشكله اذا تعرفنا ياحلو اصلا انتي ماجيتي الا عشان كذا ههههههههه
تولين:انت انسان وقح
طلال:لو سمحت أخوي ممكن تجي معانا شوي
؟؟؟:ومين حظرتك ان شالله
طلال: عضو في اللجنه الأمنيه بالمجمع << طلع بطاقته عشان يتأكد من صحة كلامه
؟؟؟:خلاص اخوي آسفين احنا بنطلع من المجمع كله بس فكنا الله يرحم والديك
تولين:لا ياخوي لازم ياخذ جزاه هالحقير
طلال: لو سمحت تعال معانا بهدوء بدون مشاكل ..او تتأسف لها قدامهم واذا سامحتك تركناك تطلع
؟؟؟:خلاص يااختي آسفين ولعنبو جد اللي يفكر يغازل مره ثانيه تراي متزوج وعندي عيال لاتفضحونا من الناس
تولين: آه يالحقير ومتزوج بعد؟؟
طلال: هاه اختي تسامحينه ولا نحوله للهيئه ياخذون بحقه تعهد
تولين: مو عشان الخسيس هذا بس عشان اهله حرام يعيشون الخزي بسبب واحد حقير مثله
(ترك طلال يد الرجال وانطلق الرجال بسرعه صاروخيه وخرج من المجمع كله..تقدمت تولين تبي تشكر طلال ..لكن ماترك لها مجال على طول مشى)
التفتت تولين لجوالها لقت فيه 7 مكالمات من "حبيب ريوم..مشعل"..
ردت عليه بتأفف: نعم وش تبي
مشعل: وينك حبي انا انتظرك لي ساعه
تولين:عادي انتظرني العمر كله وين المشكله؟
مشعل: هههههههه ياحبي لك والله
تولين: تدري شلون انا راجعه البيت اصلا مالي خلق اشوفك بعد اللي صار
مشعل: خير وش صار؟
تولين: اذا رجعت البيت بقولك ...باي
مشعل: الو الو ..<<<قفلت تولين الخط بوجهه
(رجعت تولين البيت وهي تحس بضيقه مو طبيعيه فكرت تدق على توأم روحها ريناد بس كانت متاكده ان لو ريناد عرفت باللي سوته بتقلب السالفه هواش وصراخ

..وانتهى التفكير بأنها وضعت الجوال في الشاحن ع الصامت ونامت بمكياجها لأول مره..)

.
.
.




في بيت رنا
أم ابراهيم: هلا والله هلا بالغالي هلا بالضنا تو مانورت الرياض ياوليدي >>كانت أم ابراهيم تبكي وهي ترحب بولدها في بيته
أبراهيم: الله يسلمك ويعافيك
رنا: يالله إبراهيم ابغاك تدلنا وين غرفتك بدون مانقول لك
أبراهيم: أشر على غرفته فعلا الكل كان مبسوط ان ابراهيم بدى يسترجع شي من ذاكرته المفقوده
رنا: وااااااااااااااااااااااو تمام عليك هذا اخوي اللي اعرفه اللي لايمكن يستسلم للمرض
(أشرت بعيونها لأمها تسألها اذا شالت كل الهدايا والدفاتر اللي ممكن تذكره بلمياء.. وردت عليها أمها بالأيجاب)
رنا: يالله ابراهيم روح ارتاح بغرفتك اكيد السفر تعبك
ابراهيم: لا والله ابي اجلس معاكم مشتاق لكم حيل
رنا:ماعليك ياخوي بيدفع الثمن اللي حرمنا منك طول الشهر الاسبوعين اللي راحو
ابراهيم: رنا..انتي تعرفين ليش انا كنت رايح للشرقيه
(ارتبكت رنا وبدت تصرف السالفه)
رنا:وانا وش دراني عنك الظاهر كنت مشتهي السمك وتبي تصيد ههههههههه
ابراهيم: سمك؟
رنا: او يمكن مشتاق للبحر
ابراهيم: بحر؟
رنا: ابراهيم وش فيك تردد وراي كنك بغبغاء
ابراهيم: الشرقيه فيها بحر وسمك؟
(تجمعت بعيون رنا دموع كانت تحاول انها ماتطيح قدام اخوها..كانت ماتبي تحسسه انه قاعد يخربط..وفي كل مره تزيد بالأنتقام من لمياء )
رنا: هه مدري ياخوي يقولون بالشرقيه فيه بحر..والأغرب انهم يقولون ان في البحر سمك..!
(قامت رنا لغرفتها ..ورمت نفسها ع السرير وجلست تبكي بحرقه على حال أخوها ووسط دموعها مسكت الجوال وقررت تدق على ساره وتعلمها كل شي

..لكن خافت تخسر صداقة ساره والبنات كلهم عشان وحده سخيفه مثل لمياء..بس مازالت تستعد لليوم اللي تخلي فيه لمياء وصمة عار في أهلها مثل ماخلت

أخوها معاق ذهنيا)
رنا: انا متأكده ان رقمها القديم معاها بس مقفله الجوال..مافي حل الا اني أرسل لها رساله أشرح لها كل الوضع حتى تتعاطف معاه وترد علي وبعدها اوريها

من أنا>>بدأت رنا تكتب الرساله
(وفي نفس الوقت كان راكان توه جاي من الاتصالات مطلع شريحه بدل فاقد لشريحة أخته لمياء وكان راجع البيت ياخذ الجهاز)
.
.
.
لمياء: الو
راكان: هلا لميا شحنتي الجوال
لمياء: ايه شحنته
راكان: ارسلي الشغاله فيه انا عند الباب
لمياء: مابتدخل تتقهوى ؟
راكان: لو ان الحلا ماكبيتيه كان جيت اتقهوى
لمياء: هههههههههه حلاص ثواني وتجيبه الشغاله
(جابت الجوال الشغاله ودخل فيه الشريحه وبدا يتصل على مديره في العمل عشان ياخذ إجازه يومين ..وبعد ماانتهى من مكالمة المدير ..جات للجوال

رسالة وسائط)

جاري جلب الوسائط

راكان: غريبه مين اللي يرسل وسائط..؟

.
.
.
في بيت منى
منى : اقولك قسم بالله العظيم انهم جايين يخطبوني بكره انا نفسي مو مصدقه
نوف: شكلك عجبتي أخته يوم جات عندنا بالكليه
منى: ايه انا لاحظت انها بس تسولف معاي
نوف: آه يالملعونه بتاخذين راكان هاه؟
ندى: ههههههههههههه بصراحه الى الان انا مو مستوعبه
نوف: يحق لك والله ..لو أنا مكانك كان تلاقيني بالاسعاف من الصدمه
ندى:لاعاد مو لهالدرجه ..حتى هو يحمد ربه اني بوافق عليه
نوف: لا ياشيخه لايكون انجلينا جولي واحنا ماندري
ندى: ولايكون هو براد بيت وانا مدري
نوف: هههههههههه والله أحلى شوي
ندى: اما عاد مالها داعي المبالغه هو حليو ووسيم بس مو أحلى مني
نوف: بصراحه انا احسك مناسبه له أكثر من ساره
ندى: وش جاب طاري ساره الحين؟
نوف: هههههههه تغارين؟
ندى: مو سالفة غيره ..لكن أنا مااحب احد يسوي مقارنات بيني وبينها
نوف: تتوقعين كيف بتستقبل الخبر ساره؟
ندى: كيف يعني؟
نوف: تتوقعين بتزعل او بتنصدم او بتفرح..
ندى: عادي بتفرح اصلا بتكون ممتنه لي اني خلصتها منه هي اصلا ماتبيه
نوف: ايه والله انك صادقه..بس تدرين الخوف مو من ساره الخوف من راكان نفسه لايكون يحبها صدق زي ماتقول
ندى: ماعليك من ساره والله انها نصابه..بس تبي تسوي قدام البنات انها معذبة قلوب الرجال..وان راكان يموت عليها ومن هالهياط
نوف: والله انك صادقه..اصلا مو معقوله واحد مثل راكان يكون يحبها بجنون زي ماتقول
ندى: واللي مو صدق أكثر انها هي ماتبيه وتصده
نوف: هههههههههههه بس من حقها ساره تشوف نفسها شوي
ندى: ليه ان شالله؟
نوف:مزيونه حيل سم الله عليها..وشخصيتها احس مختلفه عن البنات
ندى: اقول انكتمي بس
نوف:واااااااااو واللله انك تغارين ههههههههه
ندى: ايه أغار عندك شي؟
نوف: هذا وتو السالفه بأولها صار كذا اجل لاتملكتو وش بيصير؟
ندى: ابخفيه عن عيون العالم كلها
نوف: ياعيني ياعيني ..وينها ساره تسمع الغراميات هذي
ندى: اي غراميتا انتي ووجهك انا بعد طلال حرمت أحب
نوف: انتي من جدك..يابنتي خلاص انسيه ..اصلا تفكيرك فيه يعتبر خيانه لراكان من الحين
ندى: مو بكيفي
نوف: الا بكيفك ونص..انتي متى آخر مره سمعتي عنه
ندى: قبل 7 شهور يمكن..يقولون رجع من أمريكا وصار موظف بالراشد
نوف: وشو سيكيورتي امن او بياع في المحلات؟
ندى: ههههههههههه انتي يالخبله اقولك سافر امريكا يدرس تقولين سيكيورتي
نوف: اجل وشو؟
ندى: مدري
نوف:تبين نصيحتي؟
ندى: سمعينا
نوف: اللي يتركك اتركيه..واللي نساك أنسيه ..واللي بغاك زوجته على سنة الله ورسوله هذا اللي يستحق كل مشاعرك
ندى: أكشخ ياحركات والله وصرنا نعرف ننصح
نوف: شسوي فيكم ماتقدرون مواهبي الدفينه
ندى: عن الهذره الزايده االمطبخ ينتظرني باي
نوف: بايات
.
.
.
وفي سيارة راكان
راكان: مين هذا الرقم؟
الرساله

هذي اخرتها
بعد كل اللي سواه لك تتركينه وتروحين تحبين غيره
لهالدرجه نفسك رخيصه
ابراهيم سوى حادث وهو جاي عندكم الشرقيه فقد فيها ذاكرته وصار مايشوف الا بعين وحده بعد ماكنت انتي عيونه الثنتين اللي يشوف فيها الدنيا
مو حرام عليك اللي تسوينه بعد كل الحب اللي عشتوه بعد مارسمتو لبعض في كل ليله احلامكم
كان ماينام الا اذا سمع صوتك
وماتنامين الا اذا حسيتي بأنفاسه قريبه منك
اذكر في اخر مره طلعتو مع بعض قال لي : انا لايمكن اعيش بدون هذي الانسانه
وانتي اتصلتي وقلتي لي: مدري كيف الحياه كانت قبله
وين راح كل هذا
وين راح
ابهيدك هالقصيده وابيك تقولين لي وش تذكرك فيه
وان كان في جوفك قلب
مارح تتأخرين بالرد

.
.
.
.

[حنان الجرح]

للإستماع للمقطع الصوتي

http://www.swahl.com/up/m104/swahlcom_cf3c.jpg

[حنان الجرح]

أعتذر لكم عن قصر البارت لكن والله ظروف إختباراتي جداً صعبه
أوعدكم بعد الاختبارات ببارتين مع بعض
:)

[زائره 20]

نوف: اللي يتركك اتركيه..واللي نساك أنسيه ..واللي بغاك زوجته على سنة الله ورسوله هذا اللي يستحق كل مشاعرك

والله خطيره هالبنيه
ثانكيووووووووو حنونه ع البارت الحلو بس قصيييييييير ننتظرك البارت الجاي نبيه طويل مره يعوضنا