روايتي الأولى ... قلوب بلآ ملامح .. تشويق تحدي إثاره ورومنسيه..كآمله

ألمـآسـK.S.Aــة · 22-03-2008, 10:32 PM

~)(~ الفصل الخامس ~)(~

[]**[]..آآآه يا دنيتي.. ما تركتيلي إلا عدوي يستحوذ علي..[]**[]

... : الحمدلله الهرجه خلصت وخالد راشد عملو عليه القصاص..
... : غريبه ما انتظرو سامر حتى يكبر..
... : اصلا المسؤول عن القضيه مستهتر.. وصراحه انا خبيت الموضوع عنه.. علشان ينفذ القصاص بسرعه..
... : واهله يا فهد ما تكلمو...؟؟
فهد: لا كان سامر بعيد عن الكل وعمره ست سنين تقريبا.. محد يعرفه ذاك الوقت..!.. لأنو ابوه الله يرحمه مبعده عن الكل ..ومسكنه في المدينه مع جدته من امه المتوفيه إلي محد يعرف بزواجته هناك.. اصلا عصبو كلهم لما عرفو بعد القصاص بسامر.. ع الاقل كانو ياخذون فيه امل لما يكبر..
.
حس سامر بالقهر.. " معقول يخبو عني معلومه زي هاذي.. كيف يبوني اعيش مع ناس.. كانو سبب في قتل ابويا.. (صك عيونه متألم بقهر) خالد راشد.. اووف هذا اخو العم ابو حسام.. وابو طارق إلي هم اخوان مرت عمي فهد إلي ميته من زمان.."
سامر باندفاع للمجلس: وإل متى تبو تخبو عني هذي الحقيقه؟؟؟
فهد باندهاش وبعصبيه: سامــــر إنتا جالس تتصنت..
سامر بغيض: انا ما اتصنت.. سمعت عباره عفويا وانا طالع.. فما قدرت إلا اعرف الموضوع..
فهد بقلق وغضب: ليش سمعت ليــــش؟؟
الرجال الثاني تنهد وبخوف: فهد.. اهوه خلاص عرف.. ما في مفر من الحقيقه..

. . . . . . . !

من يومها وسامر يشكي المر من هذي الحقيقه.. وكل ماله ويزيد كرهه لهم..
((::توضيح:: خالد اخو محمد(ابوحسام) وماهر(ابوطارق) وكمان عندهم اخو (مسافر) من ام ثانيه ابوهم ما جاب منها غير هوا.. طبعا لكبر سنه ذاك الوقت –حتتعرفو عليه بعدين- اسمه سامي.. وامه عايشه ليساعها في جده برضو.. المهم إنو خالد كان دايما مع هواش مع عبدالله (ابوسامر) وفي يوم اتهاوشو بمضاربه كبيــــره وقويـــه استمرت فضلت ايام كثيره وهي تكبر إلا يوم وحصل إنو قتل خالد عبدالله –هذا لانه خالد عصبي مره- المهم محمد وماهر يعرفو طبيعة اخوهم بس ما حذرو عبدالله وهذا لاهمالهم واستهتارهم وعدم حبهم لعبدالله واخوه فهد.. بعد ما حصل كذا.. اهلية عبدالله رفضت الصلح وقام فهد بتخبئة سامر ونفي إنو عبدالله عنده ولد.. لان اصلا عبدالله كان متزوج وحده في المدينه وخلفتله سامر.. ولا جابه لجده عند اهله ولا شي والي يدرون بس فهد وابوه.. المهم بانه قصوه في النهايه وحقدو عليهم اكثر محمد وماهر خاصة بعد ما عرفو إنو عنده ولد عند اهل زوجته المتوفيه في المدينه.. –لانه كان متزوج هناك ومحد يدري غير اهله المقربين-.. اذا بتسألو عن سامي ..ودوره في ذيك الاحداث فاقولكم إنه كان ذاك الوقت صغير عمره تقريبا سبع سنين وسامر ذاك الوقت ست سنين.. ووعد سنه وحده..))
.
.
.
في بيت ماهر (ابو طارق)..
.
كان مهند في غرفته بعد ما عرف إنو ملكة طارق تحددت.. وكان يشعر براحه خاصه بعد ما سار يشوف جنا اكثر حيويه من قبل.. ومبسوطه.. "ااخ بس اوريها البنت هاذي إيش سوالها ياسر الخميس إلي فات علشان تتغير كذا.." .. ((ههههه شكاك الولد))
حرك رجله شويه وهوا جالس ع السرير.. حس شي تحته.. نزل وطالع لقاه دفتر الجامعه حقه.. شاله وفتحه.. لقى اغلبه اشعار وكتابات وتريقات ووو.. بس اكثر شي لفت نظره عباراته عن .. سمر.. سمر بنت عمه.. "آآآه يالقهر ليه ما تحسي فيني ..؟ ليــــه!.. ليه انا انشوي تحت نار حبك وإنتي ولا داريه عني.. لا وتتصرفي وكأني ولا شي عندك.. اخطبك ثلاث مرات وترديني.. آآآه ليه انا اذل نفسي لها.. ليــــــه؟؟,, ليش نفسي رخيصه بحقي لهذي الدرجه.. انا لازم انتقم منها .. لااااازم.. ايوا والله يا سمر لاوقعك في حبي وبعدين اتركك والله.. لاوريكي مين هوا مهند إلي ترفضيه!!.. الخطوه الاولى لازم دفتري هذا يوصل ليدها.. ما في غير جنا.."
.
.

في غرفة جنا..

كانت مبتسمه تقلب في المجله وهي مهي معاها.. تذكر تفاصيل يوم الخميس.. وقت جلستهم.. "ياالله كيف إنتا رائع يا ياسر.. والله إنك نسيتني إنك اعمى.. تعاملت معاك اكنك تشوفني.. صحيح اخذت راحتي اكثر.. بس من جد لما كنت اطلق لحواسي العنان كنت اشعر وكأنك تشوفني.. ياالله.. وربي احس إنو داخلي إحساس رائع.. رائع.. ما حركه إلا ياســـر.."
قطع افكارها الورديه الدق ع الباب..
جنا: ادخل..
مهند: هلا حنا كيفك..؟
جنا: المسأله فيها هلا وكيفك .. فعلا الدنيا مصالح..! (وهي تطالع فيه بنص عين)
مهند: ههههههههه وربي منتي هينه..!
حنا: شفت كفشتك.. ياللا قول .. إيش تبا؟؟
ابتسملها مهند: حبيبتي حنا معليش حتعبك شوي..(ويغمز بعينه) خخخخ يا دلوعتي إنتي..
جنا: متى ان شالله سرت دلوعتك...؟.. قووول ما عليك..
مهند جا وجلس جنبها: جنا.. آآآ إنتي (ويمط شفايفه ويتعدل في جلسته) مقربه لــ (وينشغل بزر في بلوزته) لــ...(ورجع حس بتردد.. "يا ربي كيف حيكون شكلي قدام اختي.. ياااربي"..)..
جنا: ههههههه إيش بك؟؟ خخخخ لايـــــــش..؟؟ .. قووول .. إشبو وجهك كذا رايح لونو؟؟؟
مهند عصب: اهوووو خلاص ما ودي اقوول.. (وقام رايح للباب.. لانه ما حب يكون شكله كذا قدام اخته)
جنا لحقته وصكت الباب قبل ليحرج: خلاص والله تقووول.. عادي يا خي انا اختك..وما راح افهمك غلط..
مهند تشجع: جنا إنتي تعرفي إني .. إني خطبت سـ....(وسكت يشوف ردت فعلها)
جنا بغت تضحك على شكل اخوها المرح إلي دايما تحس إنه ما يستحي ابدا.. وألحين بسبب سمر.. وجهه غيـــــر.. ضارب الوان.. بس ما حبت علشان ما تحرجه ..
جنا بهدوء: سمر.. ايوا اعرف.. واعرف إنك.. تحبــ.. (كانت بتقولها بس حست انو يمكن مهند يعصب) تعزها.. اعرف..
مهند عرف اخته اش كانت بتقول بس سكت عنها ولو إنه عصب شوي..بس ارتاح لهدوئها..
مهند: اهممم.. وعلشان كذا انا جايك ابا خدمه منك..
جنا: ابشر من عيوني ..
مهند: تعالي..(واتجه لغرفته)
جنا راحت وراه مندهشه.. ويوم وصلت شافته ماسك دفتر.. استغربت..
جنا: إيش؟؟؟
مهند: احم اممم.. اباكي.. توصليلها ...هذا الدفتر..
جنا شهقت: هااااي هااااي إيش اوصلها هذا الدفتر.. إنتا مجنون..!!
مهند: جنا إستني إتني ما فهمتيني.. انا قصدي شريف (( أي شريف الله يخليك وإنتا ناوي تنتقم منها وتعذبها ))..
جنا بإستغراب: كيف؟
مهند: توصليلها على انك صديقتها وتحبي اخوكي.. وتتمنين إلي يحبـــ... المهم يا حبيبتي.. بليز ساعديني..
جنا اتفهمت اخوها: طيب طيب.. بس ما فهمت إلين الحين إشمعنى هذا الدفتر..
مهند: لان فيه خواطر عنها..
جنا بصوت عالي: وااااااااااااااو إنتا تكتب..!!
مهند صر على اسنانه: اسكتي يالغبيه.. وياويلك تفتحيه!!
جنا بزعل: ليـــــــــــــش؟؟؟؟؟؟
مهند: مزااااج.. المهم ياللا يا شطوره.. وربي إذا نجح المخطط لك مني هديه..
جنا: مخطط؟؟ هههههههههههههه يا حليلك يا خويا.. ياااارب.. إنها بعدين تسير (وتغمز بعينها) تموووووت عليك.. وعلى ترابك..
مهند ابتسم وقال في قلبه.. "وهذا إلي اتمناه"..
.
.
.
في إحدى النوادي.. وبالاخصيه في ملعب كرة السله..
.
كان الشباب يلعبو بحماس.. ووناسه.. ومبسوطين للآخر.. مر الوقت عليهم سريع وما شعرو إلا والمباراه تنتهي.. وحيلهم مهدود.. تناقشو في المباراه.. وتفلسفو.. إلين ما تهاوشو.. ((عادة الشباب خخخ)) .. المهم بعد كذا.. بدو في الخروج..
عبدالرحمن: يا خي اتعبتني.. جريك سريـــــــع..
بشار: قول ما شاالله لا تطق صاحبي بعين..! ..(كانو يقصدو سامر..)
اكرم: احلى يالي يدافع عن صاحبه..! (وبحونشيه) تعجبنِـــي..
بشار: ههههه (ويلتفت لسامر) ما شالله عليك طول عمرك سريع..!
سامر : وإنتا يا خي وربي تغيرت.. سرت تلعب بحرافه..
بشار : هههههههه وربي البركه فيك يا سامر.. وفـ غيبتك..
سامر: ايوا قالولي الشباب من يوم ما اختفت اخباري وإنتا في الملعب..
بشار: شفت كيف محبتي لك..
سامر: ههههههههههه ربي لا يحرمني منك..
بشار: ولا منك يا سامر..
اكرم: احم احم.. المغازلات مو هنا!!
عبدالرحمن: خخخخخخخخ
سامر: اقووول بس اقلبو وجيهم..
بشار: احد قاللكم دمكم خفيف!!
اكرم وعبدالرحمن: هههههههههههههههههههههههه
عبدالرحمن يلتفت لاكرم: اكنهم غيرانين..
اكرم: إلا غيرانين ونص!!
بشار: اوووف ..
سامر: اقووول فكونا!!
اكرم يلتفت لعبدالرحمن: طرده؟؟
عبدالرحمن يكمل: للأسف
ابتسملهم سامر: ههههه افا لا والله .. قدركم كبير..
بشار: خخخخخ لا يصدقو!!
ضحكو الشباب وهيصو شوي.. وبعدها طلع اكرم وعبدالرحمن..
.
نقدم سامر للكوره شالها ورماها على بشار..
وهوا يطالع فـ بشار بتمعن بعدين قال: بشار لازم تعرف شي..
بشار عقد حواجبه وهوا يرمي الكوره في السله: إيش؟..(وألتفت لسامر)
سامر تأمل الكوره وهي تصيب الهدف وراح واخذها وقام ضربها هدف حلو..
بشار: يا احلى..!.. اقوووول سامر قووول إيش إلي لازم اعرفه؟؟
سامر مسك الكوره يتأمل فيها وهو يقول بصوت راخي: بعد اسبوع تقريبا لازم اسافر..
بشار بصدمه: إيــــــــش؟؟؟؟؟
سامر: بشار لازم تفهمني ورايا شغله مهمه فامريكا..
بشار بعصبيه: وتختفي مره ثانيه.. شكلك ناويها!!
سامر: بشار ويمين بالله ما انوي إلا اسوي الشغله وارجع..
بشار: وإل متى ان شالله هاذي الشغله حتخلص؟!!
سامر: يمكن شهر..
بشار راح وجلس على طرف الملعب وقال وهوا منزل راسه وصاك على اسنانه: ويمكن يتحول هاذا الشهر لسنه او سنتين او حتى (ورفع حاجبه الايسر) خمس سنين!!!!؟
سامر رمى الكوره وراح جلس جنبه: بشار.. الشغله لازم اسويها..
بشار سكت عنه ولف الجهة الثانيه وقال: اتوقع إنك منتا مبسوط معانا.. عشان كذا ودك تتركنا..!!
سامر: بشار .. أنا ما عندي أهل إلا إنتو.. صدقني.. خاصة انتا طول عمري واعتبرك اقرب إنسان ليا.. حتى لما سافرت.. كنت دايما على بالي.. وامنيتي اشوفك.. بس صدقني.. وربي اني رايح لشغله مهمه..
بشار نزل نظرته تحت وقال: طيب تقدر تقولها لي علشان ع الاقل اطمن..
سامر تنهد وسكت شوي.. طول عمره ما قال لاحد شي يسويه.. دايما ما يحب يدخل احد في شؤونه.. ويشوف إنو حتى لو قال شي يسويه إنه يخرق خصوصيته.. بس.. هذا بشار.. بشار إلي حق من حقوقه عليه إنو يقوله اسراره.. صك عيونه وحس إنه يحتاج شخص مثل بشار.. يتعدى الحدود الحمرا في صداقته...
سامر طالع في بشار شوي وبعدين نزل نظره..
بشار: سامر.. تكلم .. يعني ما تثق فيني..
سامر: لا تقول هاذا الكلام.. الشي إلي رايح له شي عادي.. ممم بس تعرفني ما احب اقوول شي اسويه.. بس ما دامك إنتا بشار فتستاهل اخرق الحدود الحمره معاك .. (وابتسم) بشار إلي ما تعرفه إنو عمي الوحيد راح يعيش بامريكا هوا وبنته من خمس سنين.. المهم إنه بعد هذي المده مات (وصك عيونه وتنهد) الله يرحمه.. المهم وبنته اتصلت عليا.. فرجعتها جده ولازم ارجع لامريكا اجمع اوراق مشاريع عمي كلها ونتاجها من الممتلكات.. ضروري مره..
بشار بدهشه: عمك.. مـــــات..!
سامر هز راسه وظل ساكت: ....
بشار: عظم الله اجرك.. هم السابقون ونحن اللاحقون..
سامر: اجرنا واجرك.. و الله يرحمه..
بشار: طيب سامر بنت عمك ألحين فين؟؟
سامر: في بيت خالها..
بشار عقد حواجبه: صحيح ما عندها عم ثاني.. ممم ..
سامر: تبغاني ادورلها شقه تسكن فيها..
تفاجيء بشار: وليــــــه..؟؟
سامر سكت... وبعدين قال: اشياء طويــله لو حكيتها لك ما نخلص..
بشار سكت شوي.. بعدين قال فجأة: سامر صراحه كذا ولا تزعل مني إنتا مخطيء تماما..
سامر عقد حواجبه: وليــش إن شالله؟؟؟
بشار: المفروض ما تخليها تتمرمر كذا.. هذي بنت عمك ومالها غيرك..
سامر: وايش المطلوب؟
بشار: .. تتزوجها..
سامر وكأن واحد صب عليه مويه بارده.. سكت مبلم على بشار..: ..!!!
بشار: سامر.. هذا الواقع لا تتفاجيء.. وأعيد واقولك.. هـــاذي بنت عمــــك.. ومالها غيـــــرك..!
سامر كان مصدوم.. والعباره تتردد عليه..
هـــاذي بنت عمــــك.. ومالها غيـــــرك..!
هـــاذي بنت عمــــك.. ومالها غيـــــرك..!
هـــاذي بنت عمــــك.. ومالها غيـــــرك..!
هـــاذي بنت عمــــك.. ومالها غيـــــرك..!
بشار: إنتا فكر في الموضوع..و
قاطعه سامر: لا لا .. مستحيل اتزوجها..
بشار متفاجيء: وليـــــــــش؟؟
سامر: ما ابا وبس.. وبعدين انا اصلا مني مفكر اتزوج ابدا.. ليش ياخي صاحي انا اتزوج..
بشار: يا خي المسأله هنا غير.. واعرفك ما تطيق شي اسمه بنات..
سامر بضيق وبعصبيه: يا خي قفل السالفه..
بشار: بس..
سامر بعصبيه اكثر: لا بس ولا شي.. إن كنت تحبني صح فلا تتكلم بالموضوع هذا بتاتا..
بشار كان مصدوم مره بردة فعل سامر إلي ما توقعها.. وحس إنو في الموضوع إنا..
.
.
.
ترن ترن ترن

... : اشبك مفجوعه جايه انا خلاص
باب المدخل ينفتح.. ويطلع وجهها مبتسم.. 
... : خخخخخخخ اشبك يالمطفوقه..
... : لا بس منتي شايفه شكلك..
... : (بصوت مستغرب) ايش فيه يا حنا قولي..
جنا: ههههههههه شكلك مضاربه مع احد..؟
سمر اتفجعت: يووووه نسيت ما ارتب شعري بعد مضاربتي مع ذاك الــ...(وماكملت تعبير عن شدة الغضب)
جنا: ههههههههههه اكيد مع سمير..
سمر وهي ترتب شعرها قدام مراية المدخل: اعوذ بالله لا تنطقين اسمه قدامي.. عله وربي علـــــه..
جنا: ههههههههههه
سمر: خليه ينقلع.. إلا كيفك؟؟
جنا: تمام الحمدلله..وإنتي كيفك؟
سمر: طيبه الحمدلله.. تفضلي ..
جنا وهي ماشيه معاها باتجاه الصاله: كيف وعد؟؟.. وربي وحشتني..
سمر: اسكتي بس..
جنا متفاجأة: ليـــش؟؟
سمر سكتت شوي وبعدين قالت: مدري ايش اقولك..
جنا بخوف: أيش حصل؟؟.. خوفتيني..!
سمر نزلت راسها وقالت: امي ما نعتني اجلس معاها!
جنا بقهر: توقعت إنهم تغيرت معاملتهم معاها..
سمر: هه.. إلا سارت اسوأ..
جنا: المغروض يحنو عليها.. خاصة بعد موتت ابوها الله يرحمه..
سمر: الله يرحمه..
... : مين هذا إلي تترحمو عليه؟؟
سمر ارتعبت من امها: ها لا هذا ابو وحده من صحباتنا القدامى.. مات !
ام حسام: الله يرحمه.. مكتوب علينا كلنا نموت..
هزو البنات روسهم بصمت..
ام حسام ابتسمت: الله يحيكي بنتي جنا كيفك..؟
قربت منها جنا وسلمت عليها وهي تجاوب: الحمدلله بخير يا خالتي..
ام حسام: وكيف امك وابوكي واخوانك..؟
جنا: الحمدلله كلهم طيبين..
ام حسام : الحمدلله..
قعدو يهرجو كلهم.. إلين ما مرت ساعه.. وساعتين..
ام حسام: استئذنكم.. بروح شوي وراجعه..
جنا: إذنك معاكي يا خالتي..
بعد ما راحت ألتفت جنا لـ سمر بتساؤل فهمتها سمر..
سمر ابتسمت: عارفه إنك مستغربه اول مره امي تجلس معانا كذا وما تتركنا.. تعرفي ليش؟؟
جنا اكنها حست وبخوف سألت: ليش؟؟
سمر: ااه .. لانها ما تبانا نطلع لوعد..
جنا بأسف وبقهر: بس كذا حرااااام .. حرام البنت تجلس وحيده طول اليوم..
هزت سمر كتوفها والضيق واضح عليها..
.
.
وفوق في غرفة زايده نقلو وعد لها.. علشان تسير وحيده اكثر..
.
"آآآه.. أكثر شي يألم الوحده.. للوحده ألم فظيع.. ألم ينخر العظام.. ويصدي القلوب.. آآه يا زمن.. وش باقي تسوي فيني.. فرق بين إني أتعرض لمصايب الدنيا.. وبين إني ابقى وحيـــــده.. وحيده بلا اب يكفكف دموعي.. وبلا ام تواسيني بحضنها.. وبلا اخ ولا اخت.. يشاركوني الوحده.. وبلا عم عمه خال خاله.. او ابناء أحد منهم...!!"
كانت وعد تعبانه مره.. تحس بالوحده تاكلها اكل.. وما تبقي من احاسيسها شي.. تموت ببطء..
..
من أمس وانا خوي الهم ونكاده
عتبي ع ناساً غدة تتبع مصالحها
النفس دايم على مايات معتاده
نفساً مريحه ونفس الضيق ذابحها
لاهنت ياجرح قلبي وين ضمّاده
كل ماتشافة جروحي ثار جارحها
تصعب عليّه هموم الغير وضهاده
وانا همومي ثجيله وين رايحها
أن كان هذا من الله ربنا راده
حكمه مقدرّ عسى ذنوبي يسامحها
آشوف ناساً على الزلات منحاده
وعيوب ناساً كبيره ما تبارحها !!
والناس دنيا على العيبات هداده
ولا الضماير تهيب أرسان جامحها
ولا الصراحه لها تفنيد وسياده
كلن يمثل حياته في مسارحها
جاملة هذا بدون أعراف ..وحياده!
وهذاك لنه على الدنيا ومصالحها!
ولي وحيداً يموت بنار .. وقّاده
لامن سمع له ولا شكواه طارحها!!
مسكين حاله مثل ماتقول (ميّاده(
أتشوفة الناس من دنياه رابحها
[ .... الشاعر نديم العين ]

كانت منقهره.. إنو سامر طنشها.. "ولا يمكن قاعد يدور ألحين.. ايوا اكيد.. مو معقول يقولي إنه يدورلي وبعدين.. يطنشني.. الحمدلله على كل حال..ع الاقل انا عندي احد استنجد فيه.. ولو إنه إنسان متكبر وشايف حاله.."
.
.
.
... : ياللا استئذن ياخالتي.. إنتي وسمر.. الوقت تأخر..
ام حسام: على راحتك يا بنتي..
سمر بوزت: بدري..!
جنا ابتسمتلها: ياللا عاد روقينا شوفي الساعه كم..!
وكانو باتجاه الباب رايحين الثنتين..
سمر: إلا حكيني اش صار مع ... ( وغمزت بعينها)
جنا استحت: اقووول فكينا..
سمر: حكيني حكيني..
جنا بهمس: عادي على يوم الخميس ما كلمته ولا كلمني..
سمر: وربي إنكم تقهرو..
جنا: خخخخخخخخ إلا اقوول..
سمر: إيش..؟؟
جنا بتردد: بأديكي شي..
سمر بتسأؤل: طيب اشبك متردده.. لا يكون شي غلط..!
جنا ضحكت: ههههه يعني..
سمر عقدت حواجبها بتساؤل: ...؟؟؟؟
جنا مدت لها بدفتر وحطته في إيدها..
سمر اتفاجأت: إيش! .. دفتر مين هذا؟؟
جنا: شوفي انا اخذته بالسر.. عاد انتي شوفي واحكمي..
سمر: حق مين (وهي تفتح الصفحه الاولى وشهقت وبهمس) مــ مــ مهــ ــنــ ــد؟؟
جنا بصوت راخي: إيوا.. يومين وباخذه منك.. ترا محد يدري حتى مهند نفسه ما يدري..
سمر بخوف : وليش تعطيني هوا..؟؟؟؟
جنا: أباكي تشوفي حقيقة مهند..!
سمر: إيش؟؟؟... بس بس
جنا: ياللا مع السلامه
سمر: هاي هاي استني..
جنا طلعت وطنشتها..
وسمر قعدت خايفه ومتردده تشيله معاها غرفتها...
.
.
.

عند باب شقة سامر.. كان سامر تعبان وهلكان من الدوران عن شقه تصلح لبنت عمه.. والحمدلله رجع بيته وهوا حاصد الثمره.. لقى شقه مناسبه وتمام لها..
دخل وراح على طول اتسدح على سريره
كان مقهــــــــــــــــووور مره من كلام بشار.. وكانت كلماته كلها ترن في عقله..
تتزوجها..
تتزوجها..
تتزوجها..
تتزوجها..
هذي بنت عمك ومالها غيرك..
هذي بنت عمك ومالها غيرك..
هذي بنت عمك ومالها غيرك..
هذي بنت عمك ومالها غيرك..
مالها غيرك..
مالها غيرك..
مـــــــــــــالهــــــــا.... غيــــــــــرك!!

ما كان يتصور بيوم من الايام.. إنه يجي وقت ويتزوج, وتكون له زوجه..!! من يومه وهوا يحس إنه بدري ليسع على إنه يفكر بالزواج.. كان مطنش الفكره تماما..
وعد.. وعد اش تعني له.. ولا شي.. وعد بالنسباله ولا ذره نمله تمر من عنده.. بنت تقهره.. هي الوحيده في البنات إلي مرو عليه ما تخاف منو.. لا ودايما تعانده وتقهره.. لسانــــــها طويــــــل.. وغرورهـــــا ما قيد مر عليه.. تنرفــــــزه مـــــــره.. "ايش يقول بشار.. قال إيش قال اتزوجها قال.. انا تسير عندي زوجه بذا الوقت لا وكمان وعد.. ما باقي إلا اتزوج وعد كمان.. وجع !!"
.
.
.

حوالي الساعه 8 الصباح كانت وعد صاحيه في غرفتها وزهقانه ومتنرفزه من كل إلي حواليها..
سمعت رنين جوالها.. ألتفت بهدوء وراحتله ..
تفاجأت.. [ سامر يتصل بك ] .. ابتسمت بمكر وردت..
وعد وهي تقلده بثقه: نعــم..!
سامر بسخريه: خير إن شالله.. كذا الناس يردو؟؟
وعد بسخريه اكثر: والله اسأل نفسك اول!!
سامر ببرود: اقووول بس اسكتي..
وعد: هااااي إنتا ما تسكتني..!
سامر بعصبيه: وعد انا ما اتصلت علشان اتهاوش معاكي..
وعد سكتت: ...
سامر: لقيتلك الشقه..
وعد بفرحه: بالله!
سامر: اجل اكذب!!؟
وعد: خلاص اوكي.. قولي بس وينها وانا اخذلي تاكسي..
سامر: وليه إن شالله تاكسي وين رحت انا..؟؟
وعد بخوف: بس.. لو شافنا خالي حيفهم غلط!!
سامر عقد حواجبه.. "صحيح ذاك المطفوق.. ما راح يسيبها لنا.. بس خليه ينقلع" : ما عليكي منه.. يقول إلي يقول..
وعد: بس..
سامر قاطعها: خلاص الساعه 12 الظهر كوني جاهزه.. ياللا مع السلامه..
وما تركلها فرصه.. صك السماعه في وجههأ,, وهي انقهـــــــرت منه!!!
بس ع العموم كانت مرتاحه نسبيا إنها حتطلع من جحيم النبذ..!!
.
.

سمر في غرفتها تسترجع احداث امس.. اول ما خرجت جنا..
كانت خايفه مره..
راحت لغرفتها بشويش وهي تطالع حولينها اكنها مسويه جريمه..
ما قدرت تفتح الدفتر.. مرت نص ساعه وهي تتأمله.. كان دفتر جامعه.. بس وينه ووين الدراسه.. كله خواطر.. وعبارات .. وو..
وبعدها فتحته بإيد مرتجفه.. فتحته من النص..
شافت كلام صدمها..
.
اضحك ومالي بالضحك مكان..
اسامر الناس وقلبي يشكي الهم..
ليه يا عالم تقسو على قلبن ضعيفن مثلي..
وجعان يا ناس.. والوجع بين ضلوعي..
هنا.. قلبن يشكي تعبه..
تعب!!.. تعب من تجاهل حبيبه..
آآآه لو بس تعبرني بنظره.. بكلمه..
تريح فؤادي..
.
هزتها الكلمات.. "يالله.. وأنا إلي أتهزء فيه واقول إنه إنسان فاضي ما عنده هموم.. ما عنده غير التفاهة.. اااخ معقول.. قصده علي.. معقـــــول!!"
بدت تفتح في الصفحات.. تقلب هنا وهناك.. كثير شافت إسمها مزخلف وبخط شكله تعبان عشان يطلعه كذا.. كانت ترتجف.. ومتوتره لدرجه كبيره..
طالعت في إحدى الصفحات..
.
لو بيدي.. أذبح عمري..
عشان أراضيك..
أكبر ألم للواحد التجاهل..
الحقران.. تستحقرني..
ومدري ليه..؟؟
.
معذب ورجولتي إنهزت..!
أنا إنتهيت..!!
ثلاث مرات اجري وراها..
ولكن..
ما تعبرني..!!!
.
أرتجفت سمر كثير ودموعها بدت تنزل ما تدري ليه.. "معقول أكون سبب في عذاب إنسان"
بغا يغمى عليها لما وصلت لصفحه مكتوب فيها وبخط حلو كبير..
أحبك يا samar
Why are you not see me??
يؤسفني إني لا شيء عندك..
بل يميتني..
ويقهرني..
ويذبح إنسانيتي..
.
قعدت سمر طول الليل تبكي ما تدري حست إلي شافته صدمه..
صدمه إنك تحس إنو إنسان يعتبرك الدنيا كلها.. وإنتا متجاهله ولا كأنه شي..!
حست بالذنب إلي بيذبحها.. "ياربي مدري إيش اسوي!!.. إني بمووت وأنا اشوف وعد وحيده تتألم.. وكمان هذا المهند.. وربي ما كنت احس.."
.
وقفت قدام مرايتها تتأمل في نفسها.. وتحس إنها ولا شي.. ليه ترفضه ثلاث مرات.. ليه.. حرام عليها.. ؟؟ "بس.. بس.. بس كنت متأمله.. متأمله إنو الانسان إلي حبيته من زمان وأنا طفله يحس فيني.. وكنت اتأمل إنه ينتبه لي.. ياالله وربي إني غبيه.. هو احسه من يومه يعاملني اكني طفله.. شخص ما يكلف نفسه حتى نظره.. من يوم وإحنا صغار,, ياربي.. إيش هذا الكلام.. وربي إني مغفله.. استغفر الله استغفر الله.. أحب واحد وأخوه يحبني..!! إيش إلي يصير لي.. اووف..! لازم لازم انساه لازم مهما كان.. هه.. من غبائي.. اتمسكت بوهم.. ألحين عندي واحد يموت فيني وما فيه عيوب.. غير عيوب بإمكاني اغيرها إذا عشت معاه.. الاستهتار إلي يملكه ما يعني إنه عيب كبير يستوجب مني ارفضه واكيد بيتغير بعد الزواج خاصة لما يشعر بالمسؤولية.. اما انه قصير.. فيشفعله الـ 2سم إلي هوا اطول مني فيه (وضحكت) ههه ع العموم هوا خطبني ثلاث مرات.. وجنا جابتلي الدفتر وهذا يدل إنها تشعر بأن اخوها ليساعه يبغاني.. يعني خلاص.. بإذن الله او ل ما يخطبني مره ثانيه اوه ههه اقصد مره رابعه ان شالله اوافق..!"
وابتسمت على افكارها.. كانت تحس إنها صعبه يخطبها بعد الثلاث مرات.. بس تمنت.. تمنت تاخذه علشان ينسيها اخوه.. إلي ظلت طول عمرها تحبه.. رغم انه دايما يعاملها اكنها اخته الصغيره.. أنبسطت كثير لما شعرت بأنو مهند يعطيها هذي الاهميه في حياته.. حضنت دفتره بلا شعور..
.
.
.
... : طيب أيش بتسوي ألحين؟؟
... : امنيتي ازوجها لولد عمها وابعدهم الاثنين عني..
ابوطارق: كيف طيب..؟؟
ابوحسام: ممممم نفسي اعرف كيف؟؟
ابوطارق: سامر مو هين ترا..!
ابوحسام: تعلمني يا ماهر تعلمني.. وربي مأذيني بنظراته.. حتى لما يجي يصلي عندنا في المسجد .. لان شكله شقته قريبه من هنا.. فأشوفه.. اوووف وربي نفسي اوريه شغله..
ابوطارق: كفايه إنه ولد عبدالله..
ابوحسام: إيوا والله .. الله يفكنا منه..!
ابوطارق: هوا وبنت عمه يارب..
.
.
عالساعه 12.. كانت وعد مرتبه نفسها تماما..وشنطتها معاها تسحبها ..وصلت للدرج تفاجأت برجال.. ورمت الطرحه على وجهها بسرعه..
... : عفوا يا وعد ليه الشنطه؟؟
عقدت وعد حواجبها وعصبت: ومين إنتا علشان تسألني؟؟
... : انا حسام!!
وعد ارتجفت بصمت وخافت "وربي ما عرفته.."
وعد: اسفه ما عرفتك..
حسام: لا عادي.. بس مستغرب شايله الشنطه مع هذي الظهريه..

... : إيش تسوون؟؟
تفاجؤو بصوت حاد .. كان صوت مرت خالها حصه..
حسام: ما في شي يا امي..
ام حسام بغيض: وليه واقفين كذا!! وانتي ليه خارجه من غرفتك من غير ما تكلمي احد؟؟ ما تعرفي إنو في البيت رجال؟؟
وعد سكتت بقهر وبعدين ردت بصوتها الواثق: خالتي جزاكم الله خير على استضافتكم ليّا .. انا خارجه اسكن في شقه بره..
حسام رفع حواجبه: لوحدك.. !!!
ام حسام ما راعت مشاعر وعد ابدا وقالت بإستحقار: فكه..
حسام عصب: امي اشبك البنت مالها غيرنا.. إحنا اهلها!!
ام حسام: حسام اطلع غرفتك ومالك خص في البنت..
حسام: بس يا امي..
قاطعته ام حسام: لا بس ولا شي قولتلك اش دخلك في البنت انتا؟
وعد تدخلت وهي تنزل وتسحب شنطتها: خلاص ياخالتي ابشرك إني طالعه وبلاشي تتهاوشون بسببي..
ام حسام: خير تسوين .. وإنتي الصادقه ليه نتهاوش بسببك..!
حسام كان مره مقهور من امه وبنفس الوقت حزن كثير على وعد حب طفولته..
حسام: استني يا وعد ع الاقل نعرف مين يوديكي؟؟
وعد وقيدها وصلت لاخر الدرج..
وعد خافت يفهمو غلط.. بس ضغطت على نفسها وقالت وهي صاكه اسنانها: لو سمحتم من هذي اللحظه مالكم تسألون عن شي عني!
حسام بعصبيه: ترانا ليسع ما تبرينا منك..
وعد ألتفت بقهر: من يوم ما اتولدت وعايلتكم متبريه مني..
ولفت راحت بسرعه للباب بدون ما تشوف ردة فعلهم.. وهي من جد قصدت كلامها لانها بنظرها كرههم لها من يوم وهي صغيره كان بمثابة إنهم تبرو منها.. كرههم وحقدهم على ابوها وعمها.. انعكس عليها هي وسامر..
وصلت للباب.. وكانت توها واصله سيارة سامر..

، ،

جنا وياسر.. والسعاده إلي ترفرف بينهم.. هل ستبقى على هذا.. ادعوو معي..
وسمر.... وحقيقة حبها الطفولي.. هي قالت أخو مهند يعني هل تقصد طارق؟؟ وهل حنينها هذي المره صادق مع مهند.. وهل حيستمر إلين ما يخطبها او هو حينفذ مخططه وما يخطبها.. ويعلقها فيه.. وبعدين يعذبها؟؟
وهو وضياعه هل حيستمر على هذا؟؟
ووعد وإلي اقدمت على فعل جريء وتركت بيت خالها لتعيش وحيده.. هل حتجني عليها فعلتها ولا حيمر الموضوع بسهوله..؟؟
ومشاعرها إلي ما فهمتها.. يا ترى حتكون لصالها ولا حتنكد عليها؟؟
وسامر.. وحقيقه شخصيته الغامضة مع وعد.. هل حتوضح ولا حيستمر تحت قناع الغموض؟؟
وخالها ابو حسام.. هل حيسوي شي.. بعد ما سوت فعلتها وتركت بيته؟؟
تناقضات وشخصيات متقلبه.. هل حتستمر الاقنعة ولا تنكشف!.. تابعو معي..

..::[]::[]::[]::[]::[]::[]::[]::[]::..

ملاك الأحساس · 22-03-2008, 10:32 PM

إلى من بدات بنقش حروفها ،،

وسطرت كـلماتهـا ،،

ونقشت حروفهـا بكل فخر ،،

هل لي بسؤال ،،

متى بتنزلي بااارت ،،

عشان أرد رد مفصل لجميع الشخصيـات ،،

تحياتي

ملاكـ الأحساس

ملاك الأحساس · 22-03-2008, 10:34 PM

وااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااي

في بااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااارت

وناااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا ااااااااااااااااااااااسهـ

ألمـآسـK.S.Aــة · 22-03-2008, 10:41 PM

~)(~ الفصل السادس ~)(~

[]**[]..على وحدتي وكثرت همومي.. ما شكيت الحال..[]**[]

وصلت للباب.. وكانت توها واصله سيارة سامر..

مشيت لها بسرعه لما وصلت للباب خرج سامر وشال الشنطه حقتها حطها في شنطة السياره.. وطلع بصمت ورا الدركسون..
برضو وعد طلعت بصمت في المقعد إلي وراه.. وما اهتم سامر إنها جلست ورا ولا كلمها تركها على راحتها..
طول الطريق كانو ساكتين... محد فيهم كان يبا يفتح هرجه مع الثاني.. ولا بدقه اكثر.. كان الجو بين وعد وسامر دايما متوتر.. يا يتهاوشون يا يسكتون.. مافي حل وسط,,

كانت تتأمل الطرق وعينها تدمع هي ألحين اش بتسوي.. خلااص قررت وطلعت تعيش فـ شقه لحالها.. بس الوحده مره.. بس ما تقدر إلا تسوي كذا.. كانت تحس بالألم أفتكرت سامي.. خالها سامي.. كانت تتمناه بذي اللحظه معاها.. "وينك يا سامي وينك تشوف إيش حصلي!!"

تفاجأت بصوت سامر: احد شافك وإنتي تخرجي؟؟
وعد بتوتر: خالتي حصة وولدها حسام؟؟
ما يدري ليه سامر حس بالضيق توه يحس إنها كانت تعيش معاهم ببيت واحد وامديه حسام شافها كم مره.. وبدون شعور قال بعصبيه: وقالولك شي؟؟
وعد تفاجأت عصبيته بس تحس إنها ودها تفضفض تعبت انها تكتم من داخلها تحس بضعف .. ضعـــف كبيـــــر.. نزلت راسها وعينها تدمع بس قالت بقهر: قالت خالتي فكه..
سامر كأن احد عصر قلبه حتى ولو تبقى وعد بنت عمه الوحيده ما يرضى عليها: الكلبه.. اخصريكي منها.. ولا تهتمي بإلي قالته.. اصلنها طول عمرها إنسانه ما تراعي إلي تقوله..
سكتت وعد.. وهي تحس براحه شوي إن احد شاركها همومها..
سامر بقلق: وخالك؟؟
وعد بصوت قلقان اكثر: ما شفته.. بس احس إنه لو درى..
سامر قاطعها: حيكسر الدنيا عليكي.. صح؟
وعد بهمس: يمكن
سامر: إذا جاكي حاولي تقنعيه.. عاد هذا راجعلك.. بس مالي مسؤوليه إذا رجعك لبيته
وعد انقهرت منه: لا تقلق

وقف سامر عند عماره قريبه من الحي حق خالها..
ونزل.. وشافته راح ينزل الشنطه.. ففهمت إنه هنا الشقه.. نزلت وراحت وراه..
بعد ما وصلو الدور الثالث..
أشر سامر لوحده من الشقق..: هاذي شقتك..
فرحت وعد ومشيت للشقه ورا سامر إلي فتحها لها وحط لها الشنطه جوا..
وعد: حلوه..
سامر: اهم شي تكفي الغرض..
بوزت وعد.. "اوووف منه هذا بس يحب يحبط" .. وراحت تتفرج ع الغرف.. وسمعت صوته وهوا عند الباب بيخرج: أي شي تحتاجينه دقي علي..
وعد: اوكي جزاك الله خير..
وعد في نفسها مره كانت تشكر الله على ولد عمها صحيح هيّ تحقد عليه.. بس مهما كان ساعدها كثير ويستحق الشكر.. ولوإنه ما راح يهتم بتشكره ولا لا..
بعد عشر دقايق تقريبا.. سمعت الباب يندق.. اتفجعت.. توها جايه.. يعني يكون مين!!
راحت للباب ووقفت عنده: مين؟
... : انا..
وعد في قلبها.. " خخخ هذا سامر.. لو بس كنت اعرف كان قهرته وفتحت الباب على طوول من دون ما أسأل"..
تغطت وعد وفتحت الباب .. شافته يدخل اكياس..وهوا يقول بسخريه: كويس في تقدم.. صرتي تسألي مين.؟؟
وعد انقهرت: لو كنت ادري إنه انتا كان والله ما سألت!
سامر طالع فيها شوي بنظره بارده وقال وهوا رافع حواجبه: هيّا سويها مره ثانيه كان ذبحتك..!
وعد باستهزاء: خوفتني ياخي..
سامر طنشها وجا بيخرج إلا هي سألته..: أيش هاذي الاكياس؟؟
سامر طنشها ولا كأنها سألت وراح.. وقبل لا تصك الباب قالها: بعد يومين بجيكي اخذ منك كل الاوراق إلي تخص مشاريع ابوكي..
وعد تفاجأت وسألت: وليـــــش..؟
سامر وهوا رايح: بعدين اقولك
وعد صكت الباب بقهر واتجهت للاكياس.. فتحتها لقيت.. لبن وزبادي وعيش.. وعصير.. ومويه.. وبعض الحلويات
وعد: مممم والله وطلعت واحد قدها يا سامر خخخخخ (وبغيض) بس تقهرني تقهرنـــــــــــي!!
في هذي اللحظه نزلت دمعه من عين وعد.. ما تدري ليه.. كانت تحس بمشاعرها بتناقض.. واحاسيسها تتضارب.. تحس إنها تحتاج سامر مره وخايفه تفقده.. خاصه وإنه باين عليه ما يطيقها.. وصحيح هيّا تبين كمان إنها ما تطيقه.. بس هيّا بداخلها تشعر باشياء عجيبه ومتناقضه.. واهم فكره سيطرت عليها ألحين.. إنها خايفه تفقد سامر..
وامنيتها إنه يعاملها بأكثر احترام.. والاكثر إلي لفت نظرها إنه من تصرفاته باين حنون..
جيته معاها في الرحله إلي من امريكا للسعوديه ،، واصراره إنها تتغدى في المطار ،، ومساعدته لها ودورها الشقه ،، واهوا جابها وما رضي يجيبها تاكسي ،، وجلب لها إلي تحتاجه ألحين. ،، وعصبيته لما يعرف معاملتهم السيئه لها.. كلها توضح إنه إنسان يشعر ويحس.. والاهــم حنوون.. "بس ليـــــش كلامه ما يبين.. ليــــــش يغطي تصرفاته بتريقته ونرفزته وعصبيته عليا.. ليـــش ودي اعرف؟!!"
.
.
.

... : (بصدمه) إيـــــش؟؟؟.. ومين وداها..؟؟
... : والله ما قالت يا ابو حسام؟؟
ابو حسام بعصبيه: لوحدها!!
ام حسام بضيق: الظاهر كذا..
ابو حسام بحمق: ما في غيره.. اكيد الحقير سامر..
ام حسام وهي مستغربه: وايش دخله هوا؟؟
ابو حسام وهو يصر اسنانه: اكيد هوا إلي حط الفكره في راسها..
ام حسام: ممم يمكن..
ابو حسام وعينه يطلع منها الشرر: بنت وتسكن لحالها.. طيب اوريكي يا وعد إنتي وولد عمك..
ام حسام: وليه ان شالله بتردها هنا!!؟
ابو حسام ابتسم بغموض: لا ما عليكي.. إنتي بس استني علي.. وبتشوفي ايش بسوي!
ام حسام طالعت عليه شوي وعقدت حواجبها: ناوي على شي..
هز ابو حسام راسه : يعني.. وتصدقي.. سمعت إنو ابوها ملك اشياء كثيره بمشاريعه فامريكا..
ام حسام بضيق: اقولك ابعد عنهم.. خلاص مالنا علاقه فيهم..
ابوحسام ما حب يقولها وقال بضجر: اوكي اوكي خلاص
ام حسام بشك: محمد.. البنت وبعدت عننا وسامر وهوا بعيد من يومه خلاص خلينا ننساهم..
ابوحسام بصراخ: خلااااص طيب رجيتينا..
سكتت ام حسام عنه بقهر..

ابو حسام كان مره مقهوور.. واكيد الغيرة ارتفعت نيرانها عنده مهما كان هذي بنت اخته ومستحيل يتركها تسكن لحالها.. هي بنت.. ومهما تكون عرضه وشرفه.. كان وده يرجعها على طول.. بس قال لنفسه إنه يتركها شوي.. لحد ما تصفى افكاره..
.
.
.

وفي احدى البيوت الفاخرة.. في المدينة المنورة..
كان في إجتماع لعيال جابر

معاذ وهو عاقد حواجبه: طيب يا احمد ألحين إنت ما كلمت سامر..؟؟
احمد بضيق: كلمته بس يقول إنو عنده مشاغل هذي الاسبوعين.. وبعدها ان شالله يجينا إذا فضي..
مرام بملل: من متى نستناه.. الله يصلحه
ربى بحماس: ما عرفتو إيش إلي شاغله؟؟
احمد بهدوء: سألته يقول عمه فهد توفى وتارك وراه بنته.. ولازم يبقى معاها هذي اليومين خاصة مو مطمن لخالها..
معاذ بشك: بس!
احمد: لا في كمان ممتلكات عمه فامريكا وهو ليسع ما جابها..
ربى وهي تغمز بعينها: اهاا.. طيب لا يكووون في شي ثااني خخخ
مرام دقتها بكوعها وضحكت: إنتي وراسك اسكتي..
معاذ: شوفو خلاص لاجل سامر.. نستنى كمان.. بس قوله يا احمد لا يطول..
احمد ابتسم: إن شالله
ربى بحماس: وبعدها نتقاسم الورث ان شالله..
معاذ بمزح: لا إنتي خلااص ما راح نديكي شي..
احمد: ايوا لأنك صغيره ليسع ما وصلتي للثلاثين
ربى: هي هي هي
مرام: خخخخخخخخ تستاهلين
... : سلااااااااام
الكل رد السلام
احمد: هلاااا عبدالله وينك ياخي تأخرت!!؟
ربى وهي متكيه على مرام: مو شي غريب عليه دااايما يتأخر!!
مرام ضحكت: هههه خلاص متعودين فلا تعيدو الموالات عليه دايما
احمد وهو يطالع فـ عبدالله: اجلس يا عبدالله
جلس عبدالله وهو يحك دقنه: ها شبااب وزعتو الورث؟؟
ربى: خخخ هذا إلي هامك
مرام: لاء سامر ما جا
عبدالله طالع بتساؤل على احمد:.. ؟؟؟
احمد: اووه يعني اشرح لكل واحد.. ممم خلااص هم يشرحولك..
وقعدو الجميع يشرحووله..
عبدالله: اهاااا .. يعني هذا خاله هو محمد راشد
معاذ: ايوا
عبدالله: اعوووذ بالله.. وربي ما انساه.. ولا يمكن انساه
مرام: بليز لا تتكلموو ما نبغى نكسب اثام ألحين بسبب واحد مثله
معاذ: صادقه وربي..
ربى بحسره: يا حسرتي على سامر.. يعني ألحين هوا إلي شايل على راسه هم بنت عمه
احمد: وربي شايل همها بقوه.. بس مو راضي يعترف..
عبدالله: إنتو تعرفونه كويس.. ما يحب يظهر حنانه واهتمامه لاحد..
مرام: وهذا الطبع مو حلو فيه..
معاذ: هوا مو حلو.. لأن إلي فـ قلبه عكس إلي فـ ظاهره.. بالمره والكل يفهمه غلط
احمد: احسه يحتاج أحد يتقرب منه بقلب صافي.. ويساعده يخرج كل إلي فـ قلبه.. ويطلع على سجيته إلي ربي خلقه عليها..
مرام بحزن: يا ما تقربنا منه.. يا ما.. بس للأسف هو يرفض يخرج أي شي بداخله..
عبدالله وهو شابك اصابعه ومتكي عليهم بدقنه: سامر يحتاج شخص يفهمه من قبل ما يتكلم.. بس متى يطلع هالشخص .. مدري!!

((::توضيح:: اكيد بتسألون هذولي مين.. أنا اقولكم هذولي خيلان سامر .. عيال سعد ونهله.. وهم .. ام سامر فوزيه إلي توفت اول ما ولدته لأنها جاتلها حصبه شديده.. وبعدها معاذ عمره 36 متزوج وعنده ثلاث بنات وولدين وبعده مرام 34 متزوجة وعندها خمس بنات وحامل في الشهر الثامن وبعدها احمد 30 سنه متزوج وعنده ولد وبنت وبعده عبدالله 27 إلي متزوج له ست شهور وزوجته ألحين حامل في الشهر الثاني.. وبعده ربى 23 ومهي متزوجه,, وطبعا لهم تقريبا سنتين متوفي ابوهم وألحين يبغون يوزعو الورث.. وطبعا لازم سامر.. اولا لأنه ورث الورث حق امه.. وهو إلي بياخذه.. وثانيا لأنه محامي فخلوه محامي لهم وإلي بيوزع الورث..))
.
.
.

في بيت ابو طارق..

كانو قاعدين يتغدون..
احمد: ابويا ابغى دراجه..
بندر: وانا ابغى دباب..
احمد: إيش إيش.. اجل حتى انا ابغى دباب..
بندر: قلووووود..
ابو طارق: اوووف إنتو بس طلبات..
ام طارق: وإيش فيها عيالك ويدلعو عليك..
ابو طارق اتأفف.. وبعدين ألتفت لطارق: إلا وين اخوك الصايع هذا؟؟
طارق: رايح مع اصحابه يكشت في البر..
ام طارق: شفت يا ماهر.. يروح ولا يعلم أحد..
طارق وهوا يكذب ما يباهم يعصبو على اخوه: امي تراه علمني وقالي اقولك إنتي وابويا.. بس انا نسيت..
ابو طارق: انتا بس تدافع عنو.. طيب ع الاقل علمو الصح من الغلط.. إذا كنت خايف عليه من جد..
طارق: يا بويا صدقني كلها رحله يومين ويرجع..
ام طارق بإستغراب: يومين..!!
ابو طارق: غريبه..
جنا إلي من يوم الخميس وضحكاتها زادت وسارت من قلبها: ههههههههه(وهيّا فهمت إنو ما يبا يتأخر علشان يعرف ردة فعل سمر) العاده اقل شي اسبوع!!!
الاء بغيره: اوووهووو إنتو ما عندكم سيره إلا مهند!!!
طارق وهو يغمز لها: ههههههه غرتي يعني..
جنا: اوووف ههههههه ألو إنتي مره غياره..
ام طارق: وي هذا اخوكي تغاري منو؟؟
الاء بحسره: ااهااا بدت محامية مهند.. إلا اقوول ماما إنتي متى حتلتفتيلي.. لو مره بس عبريني بليـــــــز!!!!
الكل ضحك.. وظلو يناحسونها إلين ما خلصو الغدا.. وكل واحد اتجه لغرفته..
.
في غرفة جنا..

جنا كانت تتمنا ياسر يزورها مره ثانيه.. حتى اتصال ما اتصل عليها.. وكانت تستحي تاخذ رقمه وتتصل .. خاصه إنو ما عندها رقمه.. فإذا سألت ابوها.. حيستغرب ليه هوا ما يتصل عليها.. وهيّا إلي توها تسأل عنو.. وتبى تتصل!!!!!
انسدحت على سريرها.. وتذكرت سمر وفطست ضخك عليها كثير.." خخخخ ما تدرين يا سمر إنه مهند هوا إلي مدبر هذا الشي.. خخخ يا عمري عليه.. يضرب الحب وسنينه شو بيذل خخخخ خليني اتصل عليها ألحين اشوف احوالها خخخخ"
انتظرت شوي إلين ما جاها صوت سمر.. حست إنه غريب ومتغير..
سمر: هلا جنا..
جنا: اهلين حبيبتي سمر. إيش بك؟؟
سمر: عادي إيش في يعني..
جنا: صوتك متغير..
سمر اتحمحمت: احم.. لا ما عليكي.. يمكن شوية برد..
جنا: خخخخخخخخخ شوية برد ولا ؟
سمر: ولا ولا ..! عمى اقوول انقلعي إنتي وافكارك..
جنا ضحكت ضحكة صمت اذاني سمر: هههههههههههههههههههاااي
سمر: وجع صميتي اذانيي.. إشبك متشققه كذا.. (وقالت وهي تتمهزل فيها) اكيد من حبيب القلب.. متصل فيكي تووه..!
جنا حست بضيقه: ها لا لا عادي بس يعني حرام اضحك؟
سمر حست بجنا تغيرت فجأة: جنا اشبك.. صار شي بينك وبين ياسر؟
جنا: يااااليت,,!
سمر انفجعت: إيش؟؟؟
جنا: هذا إلي يقهرني.. حتى مكالمات مافي!!
سمر: يعني كيف؟
جنا: يعني ما يتصل فيني ابدا!
سمر سكتت شوي وبعدين قالت: جنا راعي ظروفه..
جنا: انا مراعيه ظروفه.. بس الاتصال ما يكلف عليه.. الحمدلله هوا يسمع كويس..
سمر: مدري والله مدري.. إلا اقول ما عرفتي..
جنا: إيش؟؟
سمر: وعد راحت شقه لحالها..
جنا: بااللـــــه عليــــــكي؟؟؟
سمر: والله العظيم..
جنا: وليــــــش؟؟
سمر: جنا إنتي عارفه بوضعها هنا.. اكيد حست نفسها مو مرغوب فيها.. وإنتي تعرفي وعد عزيزة نفس..
جنا: وبقووووه كمانه.. الله يعينها ويكون في عونها..
سمر: امييين يااارب.. من جد نفسي نفســــي اسويلها شي..
جنا: عاد إيش تسوين (وكأنها تذكرت شي) إلا اقول ليش اهلنا يكرهونها..
سمر بغصه: يكرهونها هيّا وولد عمها..
جنا: بس .. ليـــش؟
سمر: أنا زيك مثل ما تعرفين أنا اعرف..
جنا: آآآآه يا ربي بس لو اعرف.. إيش سر الحقد هذا..!
بعد صمت شوي..
جنا: إلا ابسألك..؟
سمر: إيش؟
جنا: إيش سويتي (وبهمس)بدفـ ــتر اخويا؟
سمر حست بإحراج وبخجل شديد خاصه لما حست إنو جنا تعرف كل شي.. : ....
جنا: اعترفي..
سمر: مع السلامه جنا ألحين مشغوله أنا..
جنا: هههه بتشردي هاه؟
سمر: مع السلااامه.. (وسكت السماعه وهي ميته خجل وترتجف)..

جنا ضحكت بقوه بعد ما صكت السماعه.. وابتسمت وتمنت إن سمر تتزوج مهند..
قعدت تحلم وتفكر شوي إلا فجأة يدق عليها رقم غريب تستغرب.. وترد
جنا بتردد: الو
... : هلا بهالصوت.. السلام عليكم
جنا وقلبه يخفق من الصوت وبهمس: وعليكم السلام
... : افااا ما عرفتيني؟؟
جنا عقدت حواجبها وبهمس: يـ ياسر!
ياسر وبصوت حنون: ههه اشبك حبيبتي تقوليها بتردد إيوا انا ياسر .. لازم تحفظي صوتي!
جنا ابتسمت ومشاعرها تنبض: ياسر اهلين فيك كيف حالك؟؟
ياسر ابتسم وكلامه يدق الوتر في قلب جنا: انا الحمدلله طيب ما دامني اسمع صوتك.. جنو وحشتيني
جنا بهمس: وإنتا اكثر
ياسر: وينك عني وربي كل ما يمر يوم ويزداد شوقي لكِ
جنا وهي مستحيه: ربي لا يحرمني منك
.
.
.

في شقة وعد..

كانت فرحانه من جد فيها.. ع الاقل ألحين تحس إنها حره.. طليقه.. كانت تدور في الشقه إلين ما سمعت جوالها يرن.. راحتله بسرعه وانصدمت..[خالي محمد يتصل بك]
وعد في نفسها.. "غريبه من متى وخالي يدور علي.. طول عمره ولا يسأل عني ولا يسلم علي.. صحيح ما كان شديد علي.. بس برضو نظراته افهمها انو ما يبغاني.. طول جلستي في بيتهم.. ولا مره سلم علي.. ولا حتى سأل عني.. بس لحظه يمكن ألحين يتصل علشان يهاوشني على خرجتي.."
شافت الرنين يسكت وبعدين خالها عاود الاتصال..
ردت على طول..
ابو حسام: الو..
وعد: هلا خالي..
ابو حسام: اشفيكي ما رديتي بسرعه.. من اول اتصل..
وعد: اسفه خالي..كنت بعيده عن الجوال..
ابو حسام: همم طيب كيف حالك؟
وعد: الحمدلله تمام.. وإنتا كيفك خالي؟
ابو حسام طنش سؤالها وقال بعصبيه: ليش طلعتي من البيت كذا بدون حتى ما تستأذنيني؟؟
وعد بجرأه: والله يا خالي.. ما شفتك مهتم أناموجوده او لا..!
ابوحسام: ما شالله والله وصرتي تقلين ادبك معايا!
وعد بحرج: اسفه خالي ما قصدت..
ابو حسام: ما ابغى اسفك خليه لكِ.. وبعدين اكيد ولد عمك هو إلي مأثر عليكِ..
وعد تفاجأت من تفكير خالها: أنا محد له تأثير عليّا!!
ابوحسام: اوكي لا ترجيني ألحين.. إلا بسألك مين جابك للشقه..؟
وعد بتردد: سامر..
ابو حسام: منا قلت.. طيب ومن فين لك الفلوس..؟ لا تقولي سامر كمان..
وعد اغتاضت: خالي هاذي فلوس ابويا..
ابوحسام بتردد: اخذتي كل فلوسه ؟؟
وعد تفاجأت من سؤاله وتردده واحتارت إيش تجاوبه..
ابو حسام: أسألك انا..
وعد بتسأؤل: ما فهمتك يا خالي..؟
ابو حسام: اقوول يعني فلوسه وممتلكاته كلها اخذتيها ..
وعد تفاجأت اكثر وتوها تفهم كل شي كانت ذكيه وما يخيب عليها ذا الموضوع.. سامر طلب منها كل اوراق مشاريع ابوها فامريكا.. وهي تحس بالثقه له.. اما خالها فبعده عن الثقه بعد المشرق عن المغرب.. اكيد ناوي عليها.. واهوه يسألها عن الاوراق.. مو لله متصل..
وعد بمكر والضحكه في قلبها: اهاا.. ايوا كلها اخدتها وكتبتها بإسمي..
انقهر منها مره خالها خاصة باسلوبها في الكلام..
ابوحسام بقهر: طب بس حبيت اسأل عنك .. ياللا مع السلامه.. (وصك السماعه)
وعد رمت الجوال وهيّا تضحك وتقول في نفسها.. "ههههههههههههههههااي وين وين تسأل عني.. لا يا خالي لا .. إنتا جاي تسأل عن الفلوس.. هه طمعان فيها.. صحيح انا ما احب الفلوس.. بس حأحبها ألحين بس عشان امنعك توصلها هه.."
.
.
.
في بيت ابو طارق..
.
مهند توه جاي من رحلته مع الشباب.. طلع على طول لغرفة جنا..

طق طق طق..

... : مين؟
مهند: انا مهند.. يا جنا..
جنا: يا هلا (وفتحت له الباب)
مهند ابتسم لها..
وهي كركرت عليه.. راح وهوا يضحك يضربها بخفيف..
جنا: اقووووول ليه جيت بذيا السرعه..؟؟؟
مهند: هي هي هي .. ياللا قولي..(وهوا يدخل غرفتها..)
جنا ببلاهة مصطنعة: إيش؟
مهند: اهوووو بدأت البلاهة.. اقوول مو علينا.. ياللا قولي؟
جنا: اقووول إيش؟؟
مهند سكت شوي وهوا مقهور من اخته.. بس تنهد وقال بإستسلام..: اعطيتي سمر الدفتر..
جنا: إيوا..
ألتفت لها وهوا ساكت وملامحه ما تعبر عن شي إلا عن التساؤل: ..؟؟
جنا فهمته بس سكتت..: ..
مهند: جنا قولي إيش صار بعدين؟؟
جنا بصوت واطي: حسيتها تغيرت..!
مهند ما صدق.. "بهذي السرعه وربي ما كنت احلم بكذا " : بالله..
جنا ابتسمت له: والله..
ابتسم مهند بنصر وسألها: كيف؟
جنا: كيف كيف؟؟
مهند: يعني كيف تغيرت؟؟
جنا: مدري حسيتها تغيرت مره وصوتها سار خجول ..
مهند: ههههههه واو
جنا: مهنــــــــــد اكيد حتخطبها مره ثانيه صح؟
مهند: قصدك مره رابعه!
جنا: المهم حتخطبها..
مهند: إيوا حأخبطها... خخخخخخ
جنا: مهنــــــد قول من جد!!
مهند: إن شالله..
جنا ابتسمت لأخوها ودعت له في قلبها كل خير..

((::توضيح:: ما وصفت لكم جنا سوري تأخرت عليكم.. المهم جنا بنت عاديه.. بس لها جاذبيه كبيره.. ولما تبتسم كل وجهها ينور ويخلي الواحد بس وده يطالع فيها .. فعلا تجذب الواحد رغم بساطة ملامحها.. تجملها روحها لانها طيبه مره.. وعقلها اكبر من سنها.. عمرها 20 سنه.. وجسمها نحيف بس حلو و متناسق وهيّا مهي طويله ولا قصيره..))

قعدت تطالع على اخوها وهو طالع ابتسم.. "ربي يسعدك يا خوي.." بعد ما راح نزلت تحت شافت بندر واحمد يلعبو سوني كالعاده..
جنا بصراخ: ابغـــــــــى ألعب..
ودفت احمد وجلست بداله وهي تاخذ اليد حقت السوني..
احمد بصراخ: هااااااااااااي إنتي يالهبلــــــــــــه قووووومي.. خبله خبله..
بندر ببرود: خلااص روح اختك وودها تلعب..
وهنا جنا طالعت فيه ورفعت له حاجبها الايسر وهي مبتسمه بحركة تقهر.. ((وربي انا ونا اتخيلها انقهـــــــر اجل كيف احمد خخخخخخ))
احمد يهجم عليها وياخذ اليد وبصراخ: هاااااااتيه يا دووبه.. وإنتا يالخبل.. لو كنت بدالي.. كان طيرت الدنيا..
بندر وهو يلعب مع جنا شريط تكن فور: هـــــــي فووزت
وهنا احمد انغاااااااض..
جنا بزعل: لااا تفوووز علي.. إيييييي..
بعد ما طفش احمد خرج يلعب بالدراجه بره مع اصحابه..
وجنا قعدت تلعب مع بندر إلين ما طفشت وطبعا كله بندر يفوز عليها..
وفجأة سكت السوني في وسط اللعبه..
بندر بعصبيه والنيران تجمعت فـ وجهه: هـــــــــــي إنتي هبله..
جنا برطمت: هي هي هي.. إنتا كل شوي إنتا واخوك الثاني هبله خبله هبله خبله.. سكتلكم كفايه..
بندر بصراخ: طــــــب انقلعي محد يلعب معاكي.. مو يعني خسرتي يعني تصكين اللعبه وحنا نلعب.. يلا انقلعي..
وراح يبعدها بقووه واخذ منها اليد ونادى احمد.. يلعب معاه.. طبعا احمد اتنذلبه إلين ما ترجاه يلعب معاه.. وبعدها جلس بظفر وهو يشمق لجنا..
وجنا إنقهرت.. وتركتهم إلين ما بدؤو اللعبه وتحمسو فيها.. وبعدها مشيت تسوي نفسها مهي داريه.. وسحبت السلك معاها برجلها وهي تسوي نفسهــــــا بريــــــئه ومهي داريه..
وهنا.. اسألو عن بندر واحمد وعصبيتهم إلي قاامو كلهم على جنا وهم يضربوها إلين ما شردت وهي تضحك عليهم من جواها وتحس بغيضها انشفى..
.
.
.

في بيت ابو حسام..
.
في غرفة حسام...
... : زي ما اتفقنا ملكتك مع ملكة طارق ولد عمك ..
حسام بهدوء: اوكي يا امي..
ام حسام: جهز نفسك.. هي بعد شهر..
حسام بضيق: امي.. ترا كل شي جاهز.. مني حرمه..
ام حسام بضجر: اوكي خلاص يؤ اشبك عصبت..
حسام: ما عصبت ولا شي بس كل شوي وتقولي بعد شهر بعد ثلاث اسابيع بعد اسبوعين اسف يا امي بس كذا توشوشيني..
ام حسام بحسرة: الله يسامحك يا ولدي انا اوشوشك..
حسام مسك يد امه بحنية: معلـــيش وربي ما قصدت.. ما عرفت اطلع الكلمه الصح..
ام حسام ابتسمت: طيب طيب خلاص..
.
.
سمر كانت تتفرج ع التلفزيون وطفشاااانه مره.. شافت سمير يدخل..
سمير: هاي سمر جهزي الشاهي .. لاربعه انفار..
سمر: ليش..؟
سمير وهوا يفك البلاستيشن ويشيله ويمشي باتجاه المجلس: وايش لك؟ سوي إلي قولتلك عليه وإنتي ساكته..
سمر: هاااي إنتا .. احترمني كأخت اكبر منك ع الاقل..!!
سمير كان مطنشها وهوا ماشي للمجلس..
سمر: والله ما اسويله الشاهي.. ينقلع.. (وطلعت لغرفتها..)
دخلت غرفتها وراحت مسكت مجله تتصفح فيها.. طفشت ورمتها,, ((::توضيح:: شخصية سمر.. كانت مغروره.. شوي.. وهذا إلي خلاها ترفض مهند كم مره.. لأنها ما تشوفه الرجال التمام إلي يناسبها.. بس بنفس الوقت عاطفيه مره.. يعني علشان كذا اتعاطفت كثير معاه لما شافت دفتره..))
راح نظرها على انحاء الغرفه إلين ما وقع على الدفتر.. إتجهت له.. ومسكته ابتسمت وبدت تطالع فيه.. وتتخيل شخصية مهند.. "إذا كان بهذي العاطفيه وقلبه يملك هذا الحب.. أكيد هوا إلي بيسعدني.."
.
.
.

... : خلاص نروح لها..
... : اوكي نتوكل..
ابو طارق: كلمت صاحبك ابو ياسر..
ابو حسام: اكيـــــد هوا المحامي.. حيكون ورانا بسيارته..
ابو طارق: اوكي باخذ معايا بنتي جنا.. يمكن تفيدنا إذا احتاج الموضوع لاقناعها..
ابو حسام: مممم ياللا طيب..
ابو طارق: دقيقه إنتا من فين عرفت مكان شقتها؟؟
ابو حسام: من مصادري الخاصه..
ابو طارق: يعني مو منها..!!
ابو حسام: لا .. وإلي يسأل ما يتوه..
ابو طارق: اوكي ياللا مع السلامه
ابو حسام: مع السلامه
.
.
.
ي ي تــــوك..!

كان هذا صوت باب شقة سامر.. وهوا يصك الباب.. نزل من الدرج بسرعه واتجه لسيارته..
ومشي على طوول.. على شقة وعد.. دق على جوالها علشان يديها خبر..
وعد: الو..
سامر: السلام عليكم
وعد: وعليكم السلام..
سامر: انا جايك ألحين باخذ الاوراق إلي طلبتها منك..
وعد: ممكن اعرف اش حتسوي بيها..
سامر حس إنه من حقها تعرف: اوكي بسافر امريكا وبجمع كل ممتلكات ابوكي من مشارعيو إلي سواها هناك.. بجيبها وبكتبها كلها باسمك..
وعد: طيب لازم تعرف شي..
سامر عقد حواجبه: إيش..؟
وعد: خالي محمد سألني هل اخذت كل فلوس ابويا وممتلكاته من امريكا,,!
سامر بسخريه: اخس الاخ طمعان.. وان شالله إنتي قولتيله إنك ليسع ما اخذتيها؟
وعد بثقه: ليه إن شالله فاكرني مدمغه.. وربي ما يذوق ريال من فلوس ابويا..
سامر اعجبه ردها.. بس قال ببرود: اوكي وصلت لشقتك يالله مع السلامه..
وعد بغرور: مع السلامه..
طلع للعماره.. وصل للشقه .. وقبل ما يدق الجرس..
لحظه.. وتظهر مفاجأة .. بل الصدمه..
... : إنتا إيش تسوي هنا؟؟
ألتفت متفاجيء ومتوتر.. شاف ابو حسام.. وابو طارق ونيران تشعلل فـ وجيههم.. وواحد ما عرفو إلي هوا ابو ياسر.. يطلعو الدرج.. وآخر الدرج واقفه بنت مغطيه..!!!!
كان هذا صوت ابو طارق.. إلي ألتفت على طول لابو حسام يبغا تبرير.. وهو معصب
وابو ياسر واقف وراهم متفاجيء وقال: محمد قلتلنا إنو بنت اختك لوحدها اجل اش جاب هذا الرجال عندها..
وكانت جنا في اخر الدرج متفاجئه مثلهم.. وهي ما تعرف مين هذا إلي واقف على باب شقة وعد..
ابوحسام وهو اعصابه بتفلت.. وعيونه بتطلع من محاجرها على سامر.... " وعد شرفي وعرضي.. اش جابك يا سامر عندها... واش تسوي لها .. آآه ياااربي اش المصيبه هاذي!" حس إنو بيدوخ.. "معقوله مني مصدق وعد تواعد ولد عمها هنا.. ولا إيش,, إيش الحكاية.. لاازم ادارك الموقف لااازم" .. دقيقتين وهو يبادل سامر المتوتر.. النظرات.. وبعدها رفع راسه وحاول يرسم ابتسامه باهته ومكتئبه على وجهه..
ابوحسام وهو يطالع في سامر: ما تعرفون؟؟ (وهوا يتقدم لباب الشقه ويوقف جنب سامر)
سامر عقد حواحبه وحس إنو مصيبه حيقولها هذا الحقير..!
ابو طارق عقد حواجبه: إيش.. قوول إيش يسوي سامر هنا؟؟
ابو ياسر ظل يطالع فيه.. متسائل..
ابتسم ابو حسام: سامر إلي قدامكم مملك على بنت عمه ويحق له يجيها لشقتها.. لأن زواجهم قريب..

، ،

مصيبة ووقعت على راس سامر ووعد.. إيش بيصير لهم بعد إلي قاله محمد؟؟
وإيش بتكوون ردة فعلهم الاثنين؟؟
وسمر والمشاعر إلي بدت تنمو داخلها هل حيكتمل نموها ولا حيصير تأثير عليه؟؟
وجنا وياسر.. إيش مصيرهم السعاده إلي واضحه قولو ان شالله..!
أحداث جديده ما تتخيلوها .. تابعو معــــي...!

..::[]::[]::[]::[]::[]::[]::[]::[]::..

ألمـآسـK.S.Aــة · 22-03-2008, 10:45 PM

ههههههههههههههههههههه

بارتين لعيووونك يا عـ،،،ــــل

ههههههههه وربي ضحكتيني ربي يفرح قلبك

انتظر ردك المفصل بشووووق

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري