اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 31
قديم(ـة) 08-04-2008, 06:43 PM
صورة الماسه و تحب الوناسه الرمزية
الماسه و تحب الوناسه الماسه و تحب الوناسه غير متصل
©؛°¨غرامي مشارك¨°؛©
 
الافتراضي رد : ياسنين عمري كفايه حزني ياسنيني .. خلاص راح الذي يستاهل أحزاني


مل الصبر منا جااااري الانتظااااار


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 32
قديم(ـة) 15-04-2008, 03:58 PM
صورة HaCkeR ksa الرمزية
HaCkeR ksa HaCkeR ksa غير متصل
©؛°¨غرامي جديد¨°؛©
 
B10 رد : ياسنين عمري كفايه حزني ياسنيني .. خلاص راح الذي يستاهل أحزاني


البارت الرابع ..

في الاستراحة ..
الساعة 9:00 ..
أم عبد الله : هلا والله هلا يا حيا الله من جانا !!
أم يوسف : الله يحيك ..
أم فيصل : وش أخبارك يا أم عبد الله إن شاء الله بخير ..
أم عبد الله : الحمد لله كيفك أنتي ..
أم فيصل : الحمد لله ... كيفك يا أم ريان ؟؟
سارة ووجهها صار أحمر من الحياء : الحمد لله بخير يا خالتي ..
كانت أم سامي اللي هي خالة سارة أي جدة ريان قاعدة جنب حفيدها وتداعبه ..
دخلوا البنات .. جمانه و العنود .. يقدمون الحلى والقهوة ..
أم فيصل : يا هلا والله بعروساتنا .. ما شاء الله كل هالزين عندك يا أم عبد الله و مخبيته عننا ؟؟
البنات استحوا وبين عليهم ..
أم عبد الله : الله يسلمك عيونك الحلوة يا أم فيصل والله ..
قامت رغد تساعدهم مع عهود أما ريناد كان عندها اختبار ولا جت ..
جلسوا الحريم جوا المجلس الواسع الفخم اما البنات فطلعوا برا في الحديقة الأكثر من رائعة اللي تحلى بأحلى نافورة مضيئة بأنوار شفافة وهادئة ..
جلسوا البنات على الكراسي اللي كانت مصنوعة من الخيزران اللماع ..
جات جمانه و معاها كاسات العصير ..
جمانه : الظاهر إنكم تحشون فيني والا كان ماسكتوا يوم جيت ..
رغد : أيـــــــــه نحش في أي مانع ؟؟
جمانه : أيا قوية الوجه لكي عين تواجهينني بعد اللي سويتيه فيني الشهر اللي فات ..
رغد : ههههههههه تكفين لا تذكريني .. تدرين عاد من بعدها وسلمان مسكين عايف الحريم مررررررره ..
العنود بفضول : ههههههه وش عندكم ؟؟ رغد انتي وشو مسويه ببنت خالتي حبيبتي ..
جمانه : اووووه وشو ذا المحبة اللي توها تنزل ..
العنود : حررام عليك .. تنكرين يا جمانه كل العشرة و المحبة اللي أعطيك اياها يوووميا ..
جمانه : ياااااااااااا بعد طوايفي انتي والله ..
وقامت وضمتها ..
جمانه : لا والله ما انكر ( وهي تشدد على الكلمة ) واللي بينكر اقص لسانه بعد ..
الكل : ههههههههه ...
عهود : الا ما قلتي وشو عندكم ؟؟
جمانة : هذاك اليوم الله يسلمك كنت ببيت عمي بنام وطفشانين مرررررررررررره وكنا بأخر الليل يعني وثقنا إن الكل نايم قالت لي رغدوووووه وشو رايك أزينك وامكيجك ..
قلت لها اوكي ..
رغد تقاطعها وهي مبوزة : كذااااااابة والله ما وافقتي إلا يوم طلعت عيوني وانذليت بعد ..
الكل : ههههههههههههه ..
جمانه : انثبري احسن لك قبل لا يجي الكاس براسك ..
رغد : أفااااااااا يا ذا العلم .. ما بقى الا ذي بعد .. بزر وتسكتني .. هذا الناقص ..
جمانه وهي تأشر لها تسكت بس .. : المهم قلت يلا على حد علمي أنها تضبط الماكياج وسلمت روحي ونفسي لها ..
وقامت أختنا في الله وتطلع علب الماكياج وتلون في وجهي كأنه كراسه .. والله إني أشوفها تغرف بذا الألوان وتحط بس قلت يلا يمكن هذا الخبير و سواياه ..
وصارت تحط الأحمر
والأسود
والأزرق ..
صراحة شكيت أنها ترسم طبيعة ..
المهم خلصت وجيت بشوف المراية .... و الأخت قامت تحلف والله ما تشوفينها ولا تقربين لها .. الا اذا سويت شعرك .. قلت يلا ما ودي أعذبها مسكينة تصوم 3 ايام عشان مراية .. و قامت تطلع الجل والموس والسبريت وكلشي والله ما بقى الا المقص بس حتى الصبغة المؤقتة طلعتها ..
وصارت تصلح فيني ..
.
.
(( جمانه سكتت وهي تبتسم ))
العنود : ايييه كملـــــــــــــــــــــــي ..
جمانه : ههههههه ههههههه والله لو تشوفون وجيهكم كأنكم تشوفون فلم رعب .. ههههههههههههههههههه ......
الكل : يوووووووووووووووووووووه رايقه ..
جمانه : الموهيم .. قالت بجعد شعرك وبصبغ أطرافه ....الخ
طبعا انا حنينه .. قلت يلا ما فيه مشكله أهم شي إن الصبغة بتنغسل ..
المهم قامت تجعد وتحط وتخلي لين خلصت من الحوسه اللي مسويتها ..
شفتها تضحك بس سويت نفسي غبيه وتبيقرت يعني كأني ما فهمت .. جابت المرايه و قالت غمضي عيونك .. غمضتها وحطت المراية قدامي .. قالت لي بعد لين 3 وافتحي عيونك طيب ..
عدت الاخت ..
1
.
2
.
3
.
وفتحت عيوني ويا ليتني ما فتحتها شفت الهوايل صراحة ما صدقت أنها أنا ..
كااااااااان شكلي فظيع لدرجة إني ما تحملت المظهر ..
كانت حطه فوق عيوني احمر حوسسسسسسه مع ازرق على الجفن والأسود حطته تحت عيوني تخيلوا
.. بعدين جابت الكحل ولونت شفايفي ..
أما شعري حاله أخرى كأنه احد مروعني في أخر الليل قدام كهف داخله 100 سورسار . ونملتين ..وبعوضة ..
التفت أدورها مالقيتها العمة هجت لبرا البيت (السور) والله لو أنها جنبي فصلت رأسها عن جسمها بس للأسف .. طبعا انا ما يفوتني شي نطيت ألحقها اجل كل هذا تسويه وأخليها ؟؟ لاااا والله وانأ بنت أبوي .. قعدت ألحقها بالسور ويوم وصلت باب الشارع وقفت بس أنا ماصدقت توقف توني بنقض عليها الا الباب ينفتح .. وقفت مكاني من الروعة .. دخل أخونا سليمانوه وجلس يطالع فيني .. ما أدري إذا شبهني على إبليس وإلا على ولد عمه ؟؟ بس مسكين كانت حالته مزرية بعد ما شافني ..
رغد : ياااااااااااااااااا حليلك جااه صداع أسبوع وتباطؤ في عدد نبضات القلب وارتفاع في الضغط و أصفرار في لون البشرة وغيرها الكثير أيضا ..
الكل :ههههههههههههههههههههههههههه
مر الوقت والبنات عليشين جو ثاني ..
تعشوا وخلصوا ورجعوا للسوالف طبعا حريم ما عندهم شي غير الكلام ( الله يعين اللسان احس انه يتعب المسكين ) << محد طلب رايك ..
مرت ساعات ..
وبدت دقايق الفراق تقترب ..

.................................................. .........................................

كانت جالسه بغرفتها منسدحه على السرير وتطالع بالسقف ..
رجعت فيها ذاكرتها لسنين ولت ومضت كان تحس و كأنها طير حر لما كانت طفله تمرح في كل أرجاء الدنيا كانت ما تفكر الا في اليوم وش راح تلعب ومين تنادي يلعبون معها ..؟؟
.. أنقلبت على جنبها الايمن وطاحت دمعه مليانه هموم وحزن ..
تذكرت لما كانت تلعب ويلحقونها الأولاد تركض وتحتمي بحضن أمها الدافي ..
تذكرت إذا جت تنام ما تنام الا بين ابوها و امها وبنص السرير بعد ..
بدت دموعها تنهمر بعذوبه وبراءة ..
وين رحتوا و خليتوني لوحدي في هالعالم ؟؟
طيب ليش .. معقوله معد صرتوا تبغوني ؟؟
بس .. أمي نورة قالت ان هذا الشي مقدر لكم .. !!
وبدى صوت بكاءها يرتفع شوي ..
يا رب ارحمني .. يـــــــــــــــا ربي صبرني ..
وبعد ثواني أصبح النوم يسيطر عليها بالكامل ..
أغمضت أجفانها وهي تحلم بغد ومستقبل لينسيها ما هي فيه الآن ..

.
.
دخلت الجدة تبي تناديها للعشى .. لقتها منسدحة على السرير فعرفت أنها نايمة ..
قربت منها وطبعت على جبهتها قبله تحمل كل معاني الأمومة .. غطتها بلحافها الأحمر
وقصرت على النور حتى أصبحت الغرفة شبه مظلمة ..
ألتفتت عليها قبل لا تسكر الباب وقالت : الله يحفظك يا بنيتي ويرزقك بولد الحلال اللي يسعدك طول العمر ..

وسكرت الباب ..

.................................................. .................................................. ........................
10:30 مساء ..

...... : سلمااااااااااااااااااااان ..
سلمان : خــير .. فضحتنا عند خلق الله ..
هشام .. : تعااال شف خويك وش مسوي !!
سلمان : لاااااااا حول الله .. والله اني داري انه راعي مشاكل ..
.
.
سلمان وهشام وهم يتجهون لعند فواز والعسكري ..
سلمان : السلام عليكم ورحمة الله وبركاته ..
هشام وهو فيه الضحكة من الرزانه اللي نزلت على سلمان فجأة ..
سلمان وهو يخز فواز بنظرات حارقه : عفوا يالاخ وش مشكلة هذا الرجال ..
العسكري : أي رجال الله يهديك .. هذا الله لا يوريك أذى حوالى 15 بنت في المجمع وتسميه رجال ؟؟
.. وبعدين انتوا وشو دخلكم السوق من دون عوائل ؟؟
هشام وهو على باله بيتدارك الموضوع : لااااااا إحنا عندنا محرم ..بس دخلت محل وكله حريم فقلنا نستناها ألما تطلع ..
العسكري كاتم الضحكه من ذا الدلخ اللي قدامه : !!
سلمان وهو معد بقى في وجهه قطرة موية ..(( معد بقى الا ذي .. السحالي يصيرون محارم لنا )) : عفوا اخوي ممكن نرجع لموضوع الاخ ..
العسكري : لا عفوا هذا يطلع برا المجمع ..
سلمان : يكون أحسن .. (( سلمان كان يتوقع ان السالفة توصل للهيئة بس الله ستر ))
وطلع العسكري فواز برا المجمع ولحقوه ربعه بعد ما أخذ تهزية منهم محترمه وحاف انه ما يجي معهم السوق إلا بعد أن يتعدل )) ..

.................................................. .................................................. ...................................


في الاستراحة ظلت السهرة حتى الساعة 30 :11 لان طبعا فيه مدارس بكرة ..

العنود وهي تكلم بدر بالجوال : بدور الله يخليك تعال خذني ..
بدر : وليش ان شاء الله بس اضيع وقتي .. عندك السواق
العنود : بدير بلا نذالة تعاااااااااال وخذني .. وبسرعة بعد ..
بدر : هه لا تموتين بس .. والله ان فيني النوم ومالي خلقك ..
العنود : بدروووووووووووووووه وبعدين معك تعال وجع ..
بدر : وجع بعد ؟؟ اجل فحطي كان جيتك ..
العنود : لاا بدر اســـ
طوط طوط طوطــــــ قفل الخط ..
العنود وهي نفسها تكسر الجوال : أوووووووووووووووووووف ذا الغبي والله لاوريه شغله .. أوف ..
جمانه : هههه وش فيك ؟؟
العنود : ما هوب أي يأخذني ..
جمانة : مين ؟؟
العنود : من غيره يعني ..بدر
جمانة : تصدين احسبه السواق هههه
العنود : ترى مالي خلقك أنتي بعد .. ودقت على السواق يجي يأخذها ..
.................................................. .................................................. ...........................
وصلت العنود البيت بعد نص ساعة تقريبا ..
نزلت من السياره وهي حدها نفسها .. فتحت باب السور ودخلت وطبعا لقت البيت هادي مثل كل يوم ..
وصلت لباب البيت .. وفتحت بقوة من الضيقه دخلت ولقت بدر منسدح على الكنبه يطالع فلم ..
ومن الروعة مسكين ارتاع ..
بدر : افاا وش في عنودتي الحلوة زعلانه ..
العنود مرت ولا كأنها سمعته .. مرت بسرعه وهي مو طايقته .. اتجهت نحوا الدرج ورقت فوق وصلت باب الغرفه وفتحت الباب بس قبل لا تسكره طرت على بالها فكره يمكن تقهر فيها بدر وخصوصا انه مايحب ينام الا بغرفته .. رمت شنطتها واغراضها على السرير وطلت من باب الغرفة تشوف اذا جاء والا لأ .. مشت بخفة لحد ما وصلت لغرفته .. فتحت الباب ودورت المفتاح حق باب غرفته ولقته مرمي علر الطاوله المتوسطه في جانب الغرفة خذته وطلعت وقفلت الباب وراها ..
دخلت غرفتها وقفلت الباب وخبت المفتاح تحت المخده ودخلت الحمام تاخذ شور سريع ..
.................................................. .................................................. ..........................

في بيت ابو عبد الله ..
رجعت جمانة وهي منهدة درجة أولــى ..
دخلت غرفتها وطاحت على سريرها حتى من دون ما تغير ملابسها ..
ألتفتت على جوالها تشوفه ولقت جنبه كيس(( ام اند امز )).. طبعا هذا الشوكليت عشقها وماقدرت تقاومه مع انها شبعانه .. مدت يدها له واخذت كيسين وكلتهم بسرعة ونامت ..

.................................................. ...........................................

في بيت ابو فيصل ..

عهود دخلت للبيت وهي تسولف مع أمها عن العزيمه ..
....... وهي تصارخ : يلا مافيه أحد ينااااااااام الا لما تقولون لي السالفه من طقطق الى بيباي ..
عهود وهي مرتاعة من اللي نط بوجهها .. : وشو فيك يالمهبوله أصبري علينا شوي خلينا ناخذ نفس ..
وبعدين ماراح نقول سي محد قال لك ما تروحين ..؟؟
ريناد : لااااااااااااااااااااااااااااااااااا مافيه لازم تقولون لي .. رايت مامي ..
ام فيصل : ههه اصبري علينا طيب شوي .. ..
ريناد : تيب بس بسرعة

وجلست تستناهم ..
.................................................. .................................................. .............

أما في الخارج كان الوقت 4:30 عصرا ..

كان فهد يكلم مشعل بالتلفون : يلا عاد تعال تغداء معي ..
مشعل : شوف انا ما عندي أي مشكلة بس أهم شي مو انت اللي طبخته ..
فهد : ههههه لا يا عمي مو انا اللي طابخه شريته من برا عشان عيونك السود .. و إلا أنا مو عادتي ..
مشعل : هذا وجهي كانها مو عادتك انت حتى يوم طبخت ما ذقته بالعكس وكلتني اياه كأني فأر تجارب !!
فهد : هههههههههه احمد ربك بعد ذوقتك طبخ يدي .. المهم اخلص بتجي والا اطبخ ؟؟
مشعل : فهد .. و أنا من متى أردك ؟؟ طبعا بجي 10 دقايق وانا عند باب بيتك ..
فهد : استناك ..
وسكر منه .. كان فهد يحب المطعم الصيني والايطالي وبالذات السباقيتي كانت عشقه ..
راح يحطهم بالمكرويف عشان لين وصل مشعل يكونون حارين مره ..
وبالضبط بعد 10 دقائق كان مشعل واصل مع 2 بيق بيبسي .. دخل مشعل وهو يبتسم .
فهد : هلااااااااا والله ومرحبا تو ما نور البيت ..
مشعل : ادري لاني شفت الانوار مطفيه قبل لا اطلع لك .. وبعدين أي قصر تتكلم عنه ترى كله شقه 4امتار×4 ..
فهد : هذا حقي قاعد ارحب فيك ... قالوها الشباب انه ما يستاهل ترحيب بس ما صدقت ..
مشعل : هههههه ..
جلسوا يتغدون و فالينها ضحك وأفلام وكأنها سهرة ..
.................................................. .................................................. ...........................

بدأت خيوط الشمس الذهبية تشع في أنحاء المملكه وخصيصا مدينه الرياض ..
استيقظت العصافير والطيور لتغني لأجمل أيام تطل عليها نسمات الشتاء المائلة للبرودة ..
كانت اغلب أبراج هذه المدينه تغطي بعض هذه الاشعة لتظهر و كأنها نجوم على مسارح الحياة ..
نعود ألى أحد الاحياء التي تتميز بفخامتها وجمال أخلاق سكانها ..
.
.
بيت أبو بدر .. الساعة 5:06 صباحا ..
.
في غرفة العنود ..
فتحت عيونها على صوت منبه الجوال اللي كان مزعج لدرجه فظيعة جدا .. لان نوم العنود طبعا ثقيل يعني لو ينط على سريرها فيل يمكن ما تحس !!
.
فتحت عيونها اللي كان النوم مجتاحها لأنها ما نامت إلا الساعة 2 تماما .. طبعا كانت ترتب دروسها وتحوس وشو تلبس بكره إكسسوارات .. وأي شنطة تأخذ ؟؟.......الخ طبعا حركات الثانوي ..
.
قامت وغسلت وجهها خذت شاور للمرة الثانية .. طلعت وصلت الفجر ومسكت الاستشوار وجلست تعدل شعرها ..بعد ربع ساعة .. راحت للمراية وسوت بوف بعدين ربطت شعرها .. وحطت وردة لونها زهر بين البوف والربطه كان شكلها مره نعوم .. لبست البلوزة و التنوره و الإكسسوار..((طبعا الاكسسوار ناعم مره بس أكثره اساور )) .. صارت كأنها بنت في الابتدائي ..خذت شنطتها ونزلت تفطر تحت ..
أما بدر فكان نايم بالصاله وما بعد قام لان جواله فوق والشغالات ما قوموه .. نزلت العنود و شافته كسر خاطرها بس يستاهل .. ولو كان بيده خلته نايم إلى الساعة 9 عشان يعرف يسمع كلامها ثانية .. نطلت شنطتها على الكنبة اللي جنبه وجلست تفطر .. أتفتت عليه وطلعت المفتاح من جيبها لانها كانت ناويه تأخذه معاها للمدرسة .. ابتسمت ورمته عليه ..
راحت العنود للمطبخ وقالت للخدامة تصحيه بعد ما تطلع من البيت عشان لا يصيدها .. لبست عبايها وركبت مع السواق وراحت ..
.
.
.................................................. .................................................. .................................

6:00 صباحا ..
أما في بيت أبو عبد الله
كان الكل صاحي إلا عاشقة النوم ..(( جمانة ))
.
.
جمانة : يمــــــه الله يخليك ابي أنووووم ....
أم عبد الله : أقول اخلصي بس ما عاد فيه وقت بسرعة قومي ..
كانت جمانه حايسه نفسها في فراشها لدرجه أن حتى خصلة من شعرها ما تبين ..
جمانه : الله يدخلت الجنة يمه تكفين ما أبي أروح المدرســــــــــــة ..
أم عبد الله : ما فيه بتروحين غصب .. ماعندنا بنات يغيبون الا لين صاروا تعبانين بــــــــس ..
جمانة : طيب أنا تعبانه ..!!
أم عبد الله كاتمه ضحكتها على بنتها وشكلها : جمانوه قووووووووومي ..
جمانه : طيب بس أنتي اطلعي أول ..
أم عبد الله : أنا بطلع بس إن جيت و أنتي ما قمتي بوريك اللي ماشفتيه فاهمة .. قامت وطقتها على ظهرها بخفيف ..

أما جمانه خلاص ما صدقت تسمع إن أمها بتطلع معد سمعت شي بعدها ... وكملت نومها ..
..
.................................................. .................................................. .....

بيت أبو فيصل ..
قام فيصل بعد نومه دامت 11 ساعه لأن طويل العمر نايم من 8 العشاء ..
فتح عيونه والنشاط ذابحه عكس الكل .. نزل يدور العائلة ما لقى غير ريناد اللي راية عشان خاطر الاختبار ..
ريناد : صباح الخير مستر فيصل كان ما قمت وخففت علينا مصاريف الفطور ..؟؟
فيصل : و الله لو صارت مصاريف الأكل عليك تعالي تكلمي ..
ريناد : فيصل .. يا أخي استح على وجهك .. كبر جدتي وما بعد تزوجت .. ؟؟
فيصل ابتسم ابتسامة جانبية وبصوت منخفض : قريب ان شاء الله ..
ريناد : وشو ما سمعتك وش قلت ؟؟
فيصل : مالك شغل !!
ريناد : شكرا .. الله يجزاك خير .. << تبي تكسر خاطره ..

فيصل وهو يجلس على طاولة الفطور : الا رنوده وين الاهل ما اشوفهم ؟؟
ريناد وهي مبوزه : كلهم مو رايحين للمدارس مافيه إلا أنا اللي بروح ..
فيصل : حتى امي ؟؟
ريناد : ايه
فيصل : اجل ليش انتي تروحين؟؟ غيبي ؟؟
ريناد : عندي اختبار ..! .. فيصل ؟؟
فيصل : همم !!.. << كان يأكل
ريناد وهي تناظره : وش رايك تجي تاخذني الساعة 9 أكون خلصت الاختبار ..؟؟
^
هذي الاختبارات مو نهائية بس يعني ..مدري شلون بس يعني كل اسبوعين أختبار !!
.
فيصل : ههه احلمي ..
ريناد : اوف سخيف ..
فيصل : " لارد"..
وقام ركب سيارته وانطلق للشغل ..
.................................................. .................................................. ....

نرجع لجمانة اللي توها هي و أمها ما بعد وصلوا لحل ..
جمانة : خلاص يمه قمت ..
قامت و قعدت تسحب رجولها إلى ما توصل الحمام ..
...... : يمــــــــــــــــــــــ..ـه ..
أم عبد الله : نعـــم ..
نواف : يمه ويــــــــــــــــن حطيتوا الفطور فيه ؟؟ << الأخ تو النوم لاعب فيه ..
أم عبد الله : هههه وشو ذا السؤال ؟!
أبطلع أشوف أخوك وبرجع فاهمة برجعع ..
قبل لا تدخل جمانه الحمام ألتفتت تشوف وين أمها وطبعا أم عبد الله غير موجودة حاليا في الغرفة ..
وررركض على السرير قبل لا يطير النوم ...
.
.
بعد دقايق رجعت وطبعا جمانه مطفيه الأنوار و موخره كل شي بإمكانه أن ينكب عليها ..
أم عبد الله : حسبي الله على بليسك يا جمانوه كانك هبلتي فيني !!
وطلعت لأنها عرفت أن بنتها ما فيه أمل تقوم ..
.................................................. .................................................. .....................

الساعة 6:30 صباحا ..
في مدرسة الــ ....... الأهلية للبنات ..

دخلت العنود وهي حدها طفشانه فسخت عبايتها في السور ودخلت كانوا البنات يتمشون وسوالف وكل من مر سلااااااااااااااام عنوده وش الاخبار ..
العنود : تمام ..
هلااااااااا والله بالعنود تو ما نورت المدرسه ..
العنود : الله يسلمك يا بعد قليبي انتي ..
وصلت الفصل ورمت شنطتها وجلست .. ألتفتت تدور جمانه ما لقتها استغربت من العادة جمانه تفتح المدرسة بدال الفراش وينها اليوم ؟؟
....... : يا هلا والله ومرحبا بالغالية صديقة الغالية والله إني اشتقت لك ...
العنود وهي تبتسم : ياربي ذا المصلح جيه ..
البتول : هههه حررااام عليك ألحين أناااااا مصلح جيه ..
العنود : ههههه أجل وش نازل عليك جايه ترحبين فيني كذا ؟؟
البتول : مالت علي وعلى اللي يرحب فيك بعد ..
العنود : والله أنا ما طلبت منك ترحبين أنتي اللي جيتيني ..
البتول : أيـــــــــــه هذا وجهي كان رحبت فيك والا كلمتك مرة ثانية أنتي ووجهك ..
وراحت عنها ..
العنود : البتول تعااااااالي أمزح معك ..
ألتفتت عليها البتول وهي رافعة حواجبها يعني (( بعد أيش )) تمزح معها ..
العنود : بكيفك ..
وقفت عشان تروح تعدل شعرها بعد العبايه ..
العنود : هديل هديل ..!!
هديل : لبـــيــــه أمري ..
كان الكل يحب العنود بسبب أخلاقها المميزة مع الكل بس البنات اللي ما يعرفونها يقولون مغرورة ..
العنود : مايامر عليك عدو .. ابي أسألك شفتي جمانة ...؟؟
هديل : لأ .. أظنها بتغيب لاني دقيت عليها أمس وتقول منهد حيلها ..
العنود وهي مستغربة : بنت اللذين ما قالت لي شي ؟؟
هديل : ههههه ..
.
.
.................................................. .................................................. .....
7:50 دقيقة (صباحا) ..
أما في الجامعة ..
كانت رغد في الكافتيريا جالسه مع صديقاتها يسولفون ..
ندى : والله تو أمس رحت السوق مافيه ولا شي .. وبصراحة من الطفش رحت المطاعم وشريت كل أنواع الوجبات والحلويات وطلعت ..
الكل : هههههه
رغد : والله كنت متوقعة .. مدري ليش أحس أنتي ما تعيشين من دون أكل ..
رانيا : بس ما أدري وين يروح اللي تاكلينه يا ندى ؟!
الجوهرة : بنات بنات .. تدرون أمس وشو صار ؟!!
الكل : وشو ؟!
الجوهرة :جاء ولد عمي يااااااي ياناس يازينه ..
ندى : هههه الظاهر انك فرشتي الفرشة و جبتي ألشاهي وكشتتي عند مجلس الرجال ..
الجوهرة : والله لا تلوموني لو سويتها ..
رغد : شف ذا الخبلة ناوية تسويها ؟!!
الجوهرة : عشان عيونه أسوي كل شي ..
رانيا : تصدقين حمستيني .. ودي أشوفة !!
الجوهرة : بعد عشان تاخذينه مني ..
الكل : هههههههه
ندى وهي تقرب من أذن رغد : رغد شوفي الطاولة اللي هناك من دخلت الكفتيريا وهي تطالع فيك ؟؟
رغد : ويـــن هاذيك ؟؟
ندى : يس .. الظاهر وحدة من معجباتك ..
رغد : ههه انثبري ..
رانيا : وش عندكم تتساسرون من الصبح ؟؟
رغد : نتكلم فيك ؟؟
رانيا وهي مرتاعة : وشو لا يكون شعري محيوس والا الكحل سايل هاه قولوا ؟؟
رغد : لأ .. بس بلوزتك وسخه ..
رانيا : لاااااااااااااااا
وراحت لدورات المياه ..
الكل : هههههه
الجوهرة : هالبنت موسوسة بطريقة غريبة ..
ندى : الا صدق مين عليه اليوم يروح يشتري ؟؟
رغد + الجوهرة : وهاذا كل همها !!
الكل : هههههههه
.................................................. .................................................. ..................
8:00 دقيقة (صباحا)

بيت أبو بدر ..

كان بدر يركض بالبيت لعل وعسى يلحق على المحاضر ..
بدر : حسبي الله على عدوينك يا عنوودوه ..
لبس الثوب وسحب شماغة وراح ركض للسيارة ركبها و شغلها و بأسرع من الضوء كان في الطريق المكتض من سيارات المتأخرين ..
كان بدر ماسك المقود بيد أما باليد الثانية كان يمسح فيها على شعرة المبلل بقطرات الماء العذبة ..رن جواله ..مسك جواله و رد..
تركي : بدر الله يهديك وينك ؟؟ ألحين بتبدأ المحاضرة !!
بدر : تركي واللي يرحم والديك ترى ادري إني متأخر بس ما أأكد لك إني بوصل بعد شوي ..
تركي : والحل ..
بدر : ههه مدري هون علي إلى أن أصل !!
تركي : هههه والله رايق يلا بس بروح ادخل للقاعة .. مع السلامة حتى الوصول ..
بدر : يلا باي ..
..
.................................................. .................................................. ..............................
11:00 ظهرا ..

كانت الدقايق تمر على العنود مثل السنين من الطفش الزايد عن حده .. كانت حصة القواعد (المسمى العامي : أم السخافة والطفش )
طلعت من شنطتها الفوشيه المزينة بكثير من السلاسل المتنوعة في الأشكال والأحجام نوته متوسطة الحجم كان لونها وردي لماع .. فتحتها وجلست تكتب وترسم كل الكلمات اللي قرتهم وعجبتها ..
مرت الساعات والعنود على حالتها ما تغيرت ..
........ : ليش الحلوة زعلانة .. ؟؟
العنود وهي مبتسمة لان صاحبة الصوت قالت أنها ما راح تكلمها : عشان صديقتي الحلوة قالت أنها ما راح تكلمني !!
البتول : مين هالغبية اللي ما تكلم برنسيسة هالدنيا كله قولي بس اسمها و أنا اوريك فيها ..
العنود : هههه وحدة الله يستر عليها ..
البتول : الظاهر انك خايفة عليها مني لا أساويها مع الأرض صح ؟؟
العنود : هههه صح ..
...... : العنوووووووووود تعااااااااااااالي شوي ..
العنود : أوكــــــــــــــــــــــــــي
والتفتت على البتول .. : ممكن اروح ؟؟
البتول : امممم ... تيب بس لا تتأخري ..
جلست البتول مكان العنود وجلست تقلب بصفحات النوته ..
بعزتي ..
أسوى ملوك وسلاطين
أنثى ..
و أمثل في شموخي قبايل ..
.................................................. ....................
وفتحت على الصفحة اللي بعدها طبعا كل صفحة كانت مزينه بنقشات وزخارف من أيدين العنود ..

ما ينحني راسي ودوم مرفوع ..
وإلى انحنى راسي برجلي وطيته ..
الحر ما يحتاج له يحني ضلوع ..
والجمر لين احرق يديني كليته ..
.................................................. ......................................

..... : وشووووو قاعدة تسوووووووووين ..
نطت البتول من الروعة : عمى في عين العدو .. وش صار لك أنتي انهبلتي .. روعتيني !!
العنود : لا يا شيخة .. قولي والله مو انتي اللي قلتي لا تتأخرين .. وبعدين وش قاعدة تسوين في اغراضي الشخصية !!
البتول : مثل ما تشوفين بس قاعدة أقرأ !!
العنود : لااااااااا بس .. ما شاء الله ..
البتول وهي تنحاش : إيه .. يلا بااااااااااي ..
العنود : هههههه ...

.................................................. .................................................. ........................

بعد مشوار طويل مع زحمة السيارات كانت العنود كالمتفرج على أشكال الرايح و الجاي ..
لفت نظرها شاب كان لابس نظارات من ماركة شانيل .. كان شعرة كثيف كان شكله مرة كووووول .. قعدت تطالع فيه وهي مسرحه بشكل فارس أحلامها ..
هل راح يصير أحلى من هذا الزين اللي قدامها ؟؟
أممم .. بالنسبه لي ما يهم إذا كان غني أو لأ ولا يهم إذا كانت تسكن بقصر أو شقه في أفقر أحياء الرياض ..
كل اللي يهمني يكون يحبني من كل قلبه .. يتقاسم معي أفراحه وأحزانه أسراره و أخباره ..
نقاسم حياتنا كلها مع بعض حتى فتات الخبز أتمنى لو نتقاسمه ..
آآآآه يارب وشو ينتظرني في المستقبل ..
استيقظت من احلامها بعد سماع صوت اصطدام بين السيارات كانت طول الوقت ما شالت عيونها عنه وكل هذا من دون قصد لكن استغربت ان هذا الشاب يطالع فيها من مده ماهي بقصيرة ويبتسم لها .. انحرجت العنود و توردة خدودها من شدة الخجل .. لفت على الجهة لانها بصراحة خلاص ماتقدر تطالع فيه زيادة على كذا ..



البارت لم ينتهي .. ترقبوا اخر التطورات والمفاجأت .......


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 33
قديم(ـة) 15-04-2008, 06:10 PM
صورة Light of.. the.. night الرمزية
Light of.. the.. night Light of.. the.. night غير متصل
©؛°¨غرامي فعال ¨°؛©
 
الافتراضي رد : ياسنين عمري كفايه حزني ياسنيني .. خلاص راح الذي يستاهل أحزاني


يسلمووووو
ننتظركـ لا تطولين علينا


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 34
قديم(ـة) 15-04-2008, 06:15 PM
(< أمــ ي ــره >) (< أمــ ي ــره >) غير متصل
©؛°¨غرامي جديد¨°؛©
 
الافتراضي رد : ياسنين عمري كفايه حزني ياسنيني .. خلاص راح الذي يستاهل أحزاني


مرحبااا يالغلا بصراحه الروايه قليله عليها كلمة روعه
نحن في انتظارك غاليتي ( لاتطولين تكفين)
(< أمــ ي ــره >)


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 35
قديم(ـة) 15-04-2008, 06:30 PM
صورة الحربي505 الرمزية
الحربي505 الحربي505 غير متصل
©؛°¨غرامي مشارك¨°؛©
 
الافتراضي رد : ياسنين عمري كفايه حزني ياسنيني .. خلاص راح الذي يستاهل أحزاني


روعه موت بس تكفين لاتطولين


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 36
قديم(ـة) 15-04-2008, 07:52 PM
صورة حلاي جننهم الرمزية
حلاي جننهم حلاي جننهم غير متصل
©؛°¨غرامي جديد¨°؛©
 
الافتراضي رد : ياسنين عمري كفايه حزني ياسنيني .. خلاص راح الذي يستاهل أحزاني


مرحبا ياحلوه

حبيبتي الروايا في قمة الروعه (تـــوب)

اتمني منك تكملينها بسرعه وقت ممكن يادلبي

تحياتي لك


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 37
قديم(ـة) 16-04-2008, 12:45 AM
صورة غريبة الاماكن الرمزية
غريبة الاماكن غريبة الاماكن غير متصل
©؛°¨غرامي متألق ¨°؛©
 
الافتراضي رد : ياسنين عمري كفايه حزني ياسنيني .. خلاص راح الذي يستاهل أحزاني


هااااي
البارت جونان
انتظر البارت الجاي
وتكفين لاتطولين



  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 38
قديم(ـة) 16-04-2008, 04:17 AM
صورة حلاي جننهم الرمزية
حلاي جننهم حلاي جننهم غير متصل
©؛°¨غرامي جديد¨°؛©
 
رد : ياسنين عمري كفايه حزني ياسنيني .. خلاص راح الذي يستاهل أحزاني


حبيبتي كانك طولتيها بلييييييييييييييز بسرعه مره تحمست

يلا عاد لا تشوقينا اكثر من كذا يالغاليه

وبليز ابي البارت الجاري يكون طويلللللللللللللللل مره

وبعدين بسالك ياعيوني باقي علي القصه شي كثير؟؟؟؟؟؟؟


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 39
قديم(ـة) 19-04-2008, 06:14 PM
صورة HaCkeR ksa الرمزية
HaCkeR ksa HaCkeR ksa غير متصل
©؛°¨غرامي جديد¨°؛©
 
رد : ياسنين عمري كفايه حزني ياسنيني .. خلاص راح الذي يستاهل أحزاني


ألى أعز واغلى من قرأ حروف سطوري ..
في وقت الغروب ستتم كتابة نهاية هذه الروايه ..
أهم الاحداث لم تبدأ بعد ..
الحزن الحب الخوف العذاب الهم الفرح الفراق و اللقاء .. هذه محتوايتها
روايتي انسان يعيش في داخلي يتحكم فيما اكتبه
أشعر به ولا استطيع ان اراه .. !!
أحبائي أعذروني ان اطلت عليكم لكن أعدكم بالاروع والافضل في كل بارت ..





سبحان الله والحمد لله ولا اله الا الله والله أكبر ..


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 40
قديم(ـة) 22-04-2008, 01:33 AM
صورة حلاي جننهم الرمزية
حلاي جننهم حلاي جننهم غير متصل
©؛°¨غرامي جديد¨°؛©
 
الافتراضي رد : ياسنين عمري كفايه حزني ياسنيني .. خلاص راح الذي يستاهل أحزاني


يلا حبيبتي وين التكمله

اذا تتغلي ترى والله غاليه

تحياتي لك ياحلوتي


Powered by vBulletin® Version 3.8.7
Copyright ©2000 - 2014, vBulletin Solutions, Inc.
SEO by vBSEO 3.6.1
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم