القصيده : انتي ولاشيّ
والله وصرتي تستهينين فيني
وانا الذي سويت لك قدر بيديّ
تدرين وش كنتي قبل تعرفيني ؟
ان قلت لك كنتي ولا حاجة شويّ
انا الذي فرشت لك رمش عيني
وعملت منك شي وانتي ولا شيّ
جيت اعشقك ما جيتك لك تحقريني
جيت اسكنك بسمة ما هو بسكنك غيّ
لا صرت عامل لك قدر قدريني
ترا الكرامة صفحة ما لها طيّ
ما دام ما جيتي غلا لا تجيني
نار الجفا عندي ولا الذل بالفيّ
والله لاهجرك قبل لا تهجريني
اجل تبيعيني واجيلك برجليّ
يا تتركين الكبر يا تتركيني
لأن المحبة شي والمهزله شيّ
إن كانت الدعوة غلاي وحنيني
يمكن يزول الحقد ويشعشع الضيّ
لكن حكاية ينحني لك جبيني
في ذمتي ما ينحني لك وانا حيّ
القصيده : نار وبارود
حنا اليامنا وعدنا وفينا
واليا عطينا نعرف الجود ونجود
وما نذبح البسمه ليا من حكينا
وما نفرض الغلطة على البيض والسود
من طبعنا لا من عطينا عطينا
جود من الموجود والجود موجود
بعنا المذلة للضعيف وشرينا
عزة نفوس وجد واخلاص وعهود
نضرب خطانا بالعصا لاخطينا
حتى ولوكان الخطا غير مقصود
ومانزعل اصحاب الجمايل علينا
هذا وحنا نجزي الجود بالجود
يكبر غضبنا لاتعزوي حدينا
نرضيه لو نبذل على ارضاه مجهود
واليا انتخن المترفات اعتزينا
نفزع ولا نرضى على البنت منقود
نزعل ونغضب وان زعلنا نوينا
كن الهدب والعين نار وبارود
نرضى نموت ومدنا في يدينا
ولانعيش بمجد ضايع ومفقود
نعم خضعنا روسنا وانحنينا
لله ولا غيره مع الناس معبود
مثل الغصون اليا انثنت انثنينا
وقلوبنا خشاع ركاع وسجود
نتبع ونأمن وبالرسل واقتدينا
بمحمد وعيسى وموسى وداود
خفنا من اسباب الضياع ان قرينا
باهل الجحيم وقصة اصحاب الاخدود
نمشي على كف التراب وروينا
من قلب مزن مرعد يرعد ارعود
يكفي فخرنا بأصلنا لا انتخينا
حنا عرب من واقع جدود لجدود
ماقد تعلمنا الخطا واعتدينا
ولا قف في صفنا شخص مضهود
الصبر فينا مبتلي وابتلينا
نصبر ولا نرجي من الوقت مردود
لو يشكي منا التعب ماشكينا
ولا تخلفنا ولا نخلف وعود
حنا ليا منا وعدنا وفينا
واليا نوينا قد الافعال وقدود
غير القلوب الخاشعة مارجينا
والدمعه اللي تجرح اوجان وخدود
لا الكره قايدنا ولا الحقد فينا
ماحنا من اللي يجزي الطيب بجحود
هذي عوايد طبعنا واكتفينا
الله خلقنا ازهود ونفني له ازهود
اقولها والله وكيل علينا
بسم العلم لاصار عالي ومرصود
اقولها اقولها وانتهينا
حنا الكويت قيادة وشعب وجنود
القصيده : جابر الخير
من ربوع الفخر والعز والظل الظليل
من زلال الحرف بالقاف للحرف الزلال
من اصالة جد من جد من جد أصيل
من وصال الشعب للشعب لأسباب الوصال
للوفا للجود للفخر للقلب الدليل
للأمير اللي جمع كل ذربات الخصال
من سنة سبعة وسبعين والعمر الطويل
لي سنة سبعه وتسعين حكم بالعدال
ميزك رب السماوات بالفعل الجميل
وخصنا رب السماوات في حب الجمال
المهابة والفخر منك يالسيف الصقيل
والشموخ بعزتك فوق هامات الجبال
ماتميل بعزتك يوم لوغيرك يميل
كامل ياسيد الشعب ولله الكمال
منزلك بقلوبنا فوق ماعينك تخيل
ومنزلتنا عندك تفوق توصيف الخيال
انت عشق الشعب للشعب ياخيل الخليل
وأنت شمس عاشت الوقت لعناد الزوال
وانت نور الشمس للناس وظلال النخيل
والنخيل ان ظلل الناس مايلقى ظلال
زهد ما تلتفت للكثير وللقليل
حاكم للشعب عشرين عام باعتدال
مايعادل جودكم لاكريم ولا بخيل
في كلامك لو تجادلت مامثله جدال
بسم شعب مارضى غير حكامه بديل
لو تثور اعداه وتصبح فتنه من شمال
مايقابل جابر الخير قداح الفتيل
والرجال ان رادت الموت تفداها رجال
والقياده والولا للاصيل بن الأصيل
والغلا بقلوبنا يفتح لجابر مجال
من سنة سبعة وسبعين والعمر الطويل
لي سنة سبعة وتسعين حكم بالعدال
ماتميل بعزتك يوم لو غيرك يميل
كامل ٍ ياسيد الشعب ولله الكمال
القصيده :لا قبلك ولا بعدك سعد
أمسحوا دمعات الأعيان وارموا بالورود
وأزرعوا بسمات الاشواق بأطفال المهد
وأبشروا واستبشروا واستمروا بالصعود
وابتدوا مرة جديدة على نفس العهد
واستعدوا للقا حين غايبنا يعود
يوم شرفنا بعد طول غيباته سعد
اسفرت لك وأنورت وستهلت بالرعود
وامطرت لك من حشا المزن هتان وبرد
ياولي العهد ياشيخ يانبع الصمود
ياحكيم المعرفة ياسناد وياسند
لايقربك المرض للخمول وللركود
ولايزعزع قلبك الصلب حساد حسد
المرض يب ينجلي يوم يالقلب الزهود
قدرة من خالق الكون والفرد الصمد
مالنا عن قدرة الله وافعالة صعود
مؤمنين ولم يكن للولي كفوا أحد
داعين ربنا بالركوع وبالسجود
مشغلين اقلوبنا بالوعيد وبالوعد
مستخيرين العمر فيك وافين العهود
مرخصين بعزمنا لجلك روح وجسد
بالرخا شعب على حق وبالشدة جنود
وبالعطا حنا على الطيب للطالب مدد
ما وطينا روسنا للجبان وللرشود
ومايهز شعورنا لابريق ولا رعد
حاميين ابلادنا من الحدود الى الحدود
ولو يزيدون العدا بالعتاد وبالعدد
تحت ظل الي عن الشعب وبطاله يزود
قايد الفرسان للمجد ربان البلد
الأمير اللي على الحق والعزه يقود
جابر اللي لآخر المجد والهامة صعد
وصرخة تملي لك الكون لأطراف الوجود
وصرخة من قلب شايب وصرخة من ولد
اشهد انك ياسعد قد ماقلت وقدود
ولا سعد قبلك ولا فيه من بعدك سعد
القصيده : الملحمه الوطنيه
الله اكبر والخطا المقصود ما يدمح بتوبه
والمشاكل دوم تاقف للبنادم عند بابه
والبنادم تحت رحمة واحد يغفر ذنوبه
والبشر كل بقدر عبادته يلقى ثوابه
ما خلقنا الله نعيشك يالزمن عيشه كذوبه
ولا خلقنا لليدين الخاينه ننهب نهابه
انظلمنا في نهار عيبنا نجهل غيوبه
والرجل لو انه آمن ما يصدق ما جرابه
ما حصل بثنين اغسطس من شروقه لي غروبه
يوم يبقى للعروبه جرح ما يبرى صوابه
الخطا اللي ما تغفره بالحساب اكبر عقوبه
ما سعينا في لقاه ولا سلمنا من عذابه
ابتلينا والقدر غلاب والنفس امغلوبه
في سفيه ما يعرف من العمار الا خرابه
ارتدى ثوب الجهاد وقاد للظلما شعوبه
يوم عجل في لقانا عجل الله في ذهابه
بالردى خرب بلاده فوق ما هيب امخروبه
زود صدور الخلايق مع كآبتها كآبه
مجرم من خيبته يحصد نجاحه في رسوبه
كن ما بالحقد درب للقلوب الا مشابه
ادعى فرض الحموة والمروة في حروبه
يحسب ان الناس تخشي زمرته والظن خابه
من يقول ان الشجاعة فالرجل تمحي عيوبه
والله ان الغدر ما زاد الشجاع الاعيابه
الجهل بالحرب يحني هامة المذلول صوبه
مثل ما يحني سبيب الصاهله قوس الربابة
والبلاد اللي تبات وتصبح الصبح امحروبه
ماتبنت فعل كاذب لجل تتحمل عقابه
ديرة ولها سيادة شعب ما هيب امغصوبه
تحتمل غلطه سفاهة حكم من حضرة جنابه
الوطن دونه رجال للعدا صارت عقوبه
ما تعرف من التفادي والخطر كود إرتكابه
كا من حاول لقاهم ما اتقاهم عزروبه
وان تلاهم وابتلاهم يسحبونه من ثيابه
دمنا لا خضب تراب الوطن زاده خصوبه
ودمعنا لا لامس القاع الوجل طهر ترابه
وطبعنا لا ثارت الهيجا وشق السلم ثوبه
من نصانا مرحبا به مرحبا به مرحبا به
اجتمعنا والبحر قدام وايقنا ركوبه
والليالي ما تثمن طعنة الرجل وصوابه
كا مازدنا صلابه ضدها زادت صعوبه
وكل ما زادت صعوبه
وقتها ما نعرف امن الامتحان الا وثوبه
نبتلا وضلوع شجعان العرب تحطب حطابه
اتجهنا للكويت ولا عرضنا عن دروبه
والعمر عيا يساوي عندنا جنح الذيابه
اتحدنا للعمار جيوش لجيوش امعقوبه
وانطلقنا من ربوع المملكة عز ومهابه
ما ذخر عنا زعيم المملكة لو ربع طوبه
بيض الله وجه ابو فيصل ولا فيها غرابه
عادة الرجل الخليجي لا انظلم شبت شبوبه
والتكاتف ما يزيد المسلمين الا قرابه
تذكرون بيوم تحرير الوطن من من سطوبه
كيف يمطرن الهمايل والوطن تروي هضابه
دوبه يغسل القبور الطهر من الدم دوبه
دمع عينين الكويت اللي تحدر من سحابه
لا تكف الدمع عينك كل ما زود صبوبه
البكا ما زاد حسنك بالعيون الا ذرابه
يالقلوب الممحلة لا رحم ابو منتي قلوبه
يا عداة المسلمين ولعنة الدين وكتابه
يا لكلاب اللي تنابح بالشهر عشرين نوبه
واقلعوا عنا غثاكم لعنبوا منتم كلابه
الكويت... ولا بدال بلاد اخو مريم رحوبه
من بعد ما صار مالا يحسب المسلم حسابه
جنة الله في ثرانا صاغها الخالق عجوبه
فتنة عيون البنادم كل ما طول غيابه
درة البحر الخليجي من شماله لي جنوبه
شجرة تكبر ويكبر ظلها عطف ورحابه
وش يغيض الا هنوف تنذبح يوم الخطوبه
ردها عقب الله..اللي لا انتهض للحق جابه
جابر ولا غير جابر حاكم شعبه رضوبه
الزعيم اللي يهاب الموت منه ولا يهابه
قايد لنهضة ثبات الشعب نبراس العروبه
جامع حكمه شداد الرأي واعراف الصحابه
عقله اركد من ثبات طويق واخطاه امحسوبه
كن نصف العقل ثقل ونصفه الثاني لبابه
دامه الله قايد محبوب ف...بلاد امحبوبه
وعزه الله عزوة للشعب من يوم اعتزابه
والرواسي ما تهاب الريح لا هبت هبوبه
والمزايا عند حكام البلد جات اتشابه
يا سعد... يا سعد من خلاك حكمه تنوبه
خصك الله ياطويل العمر في حسن الانابه
انت ما تفخر بنسبك للكرام وانته جيوبه
الكرم نفسه هو اللي يفتخر بك بانتسابه
يا ولي العهد يا زبن الرجال اليا انتخوبه
يا ذراع الشيخ جابر بالسلام وبالحرابه
شعبكم رهن الاشاره سمع وعيون إمعصوبه
كلنا يوم الملاقي لا به من دون لا به
والولا لإخوان مريم بالفدا يفرض وجوبه
مثل ما تفرض زكاة المال لا كمل نصابه
ويالكويت الله يديمك طول الايام مهيوبه
ويا عساها من شفاهي للسما دعوة مجابه
قلتها والشعر كني تارك دوبي ودوبه
يحرث قلوب الخلايق وازرع بذور الكتابه
شاعر مالد شوفه للقريب وقال توبه
التفت لا قصى طموحه وانطلق باول شبابه
والشعر مااحدن يعيبه لو يطول وبه
عذوبه
كلمة من وقت قيلت وامست سنين امحجوبه
جيت ابنطقها عن لسان الخلايق بالنيابه
بالعرب سبة ضياع العالم النامي شعوبه
والتكاتف ما يزيد المسلمين الا قرابه
القصيده :الأسرى
دار الزمان وجت ازمان وازمان
ساعه بعد ساعه وحين بعد حين
عشنا الحياه افراح وجراح واحزان
حتى نهايت عام تسعه وتسعين
كل تحرى عام الالفين شفقان
متلهف للقرن واحد وعشرين
يمكن تعبنا ظلم وهموم واشجان
ويمكن قلبنا بالظروف الموازين
صرنا انتناسى همنا قدر الامكان
نسعى ورا جمع الذهب والملايين
نستقبل الغلطة من كفوف غلطان
ونتاجر بدمعه قلوب الضعيفين
ماهمنا غير الدعاية والاعلان
ماكننا شفنا القهر شوف بالعين
ماكننا نفقد من الشعب شجعان
وانا لنا اسرى في سجون الحقيرين
ساعه وقفنا للخديعه بالايمان
واستضعفونا من بعدها كثيرين
عشرة سنين وانقضت دون نقصان
من ليلة الغزو العراقي لي هالحين
وحنا وقف شعارنا تحت عنوان
متى على الله يطلقون المساجين
ضاع العمر والناس رابح وخسران
وضاع الامل ما بين باكر وبعدين
عشنا نقص لسان ونجامل لسان
نضحك وتطعنا ثمانين سكين
ونضيع حقوق العروبة بنكرران
مابين عقال العرب والمجانين
وان كانت الجيرة تجافي وتنهان
ملعون ابو جيرة بيوت الحقودين
للظلم ميدان وللعدل ميدان
وللحق ناس وللعروبة قوانين
وصدام عاش العمر مذنب وخوان
ومعاهداته مع وجيه كريهين
لايعرف اخلاق ولا يعرف احسان
وما مسح كفوفه على راس مسكين
ساق التعالي للتواضيع بحقران
من دمر ايدينه بدم البريين
إستعبد شعوبه على نهج علمان
من يفصل الدولة عن الشرع والدين
شيطان لا ماينوصف وصف شيطان
ماكنه إلا من عباد الشياطين
وما سادت الغلطة على كل الاحيان
مادام لظروف المواقف براهين
وان كانت الدعوه حكومات واوطان
حنا لنا حكم من اسنين وسنين
لنا شيوخ تعقل الانس والجان
ماهي علوم المقبلين والمقفين
للحق طلابة وللشرك عدوان
وللجود جود وللعطا مستعدين
وللصد صد وللوصل حبل شريان
وللخير درب وللمكارم كريمين
وللسلم حلاله وبالحرب فرسان
وللضيم درع وللزعامه سلاطين
يا أم الاسير استبشري بالعرب كان
باقي على عرش العروبة عريبين
مثلك نذوق الحزن بأشكال الوان
وصرنا نعاني مثل ما انتي تعانين
ومادام قالو لامس الجرح وجدان
لازم يجي يوم وتتفجر براكين
يا أم الاسير الناس للناس خلان
وقت الشدايد كلبونا قريبين
حنا عيالك كلبونا له اخوان
واكثر من اخوان قراب عزيزين
لاتفقدين ادنى امل لجل حرمان
وان قالها الله ابيرد وتشوفين
وتجين ولهانه اذا جاك ولهان
ساعة تضمينه بصدرك وتبكين
ويقولك يمه اذا قلتي فلان
وتصير فرحة في جميع الميادين
بحق من نزل من المزن هتان
قولي معاي آمين وآمين وآمين
هذيك والله فرحة انسان بنسان
ماهي بفرحة قرن واحد وعشرين
القصيده :أول الغيث
بسم الله اكبر واول الغيث فرسان
جادت غيومه وانبنى السور من طين
كن الثرى ينبت مباني وجدران
وكن السمى تمطر شيوخ وسلاطين
نوِِ سكبه الله على قصر دسمان
وامطرت ياغيث الضعاف المساكين
ياشيخ جابر ياسلايل كحيلان
انشهد ان اللي سواتك قليلين
اقولها كلمه ولانيب ندمان
لاعودت يم الرجال الميامين
سافرت بلدان وتعديت بلدان
ومروا على عيني نشاما كثيرين
على كثر ماشفت بالناس شجعان
ماشفت مثل الشيخ جابر لي هالحين
الله جمع طيبة هل الارض بإنسان
قرمٍ فطره الله على العقل والدين
سلطان كنه مهو بأي سلطان
واحد ويسوى في نظرنا ملايين
ياشيخ طيبك يرهق عقول واذهان
نظرة طموحك تتعب العقل والعين
مدة يدينك طالت الانس والجان
واعمال خيرك شيبت بالشياطين
من شبه اسياد العرب فيك غلطان
انت الوحيد اللي قلبت الموازين
والله لو امدح طيبة فلان وفلان
فزعتك وين.وفزعة ربيعهم وين
الفرق واضح والرجاجيل شتان
والناس صارت تعرف الزين والشين
لو عند حكام العرب كثرك ايمان
ماكان ضاعت من يدينا فلسطين
يادرعنا اللي ما تزعزع ولا لان
ياسيف عدل سله الوقت لسنين
يافزعة المبلي ليا جاك منهان
ياشوق تلعات الرقاب المزايين
من لا نظر في وجهك السمح مازان
ومن لا دعالك ماعرف قيمتك زين
ومن لا تشرف بالحكي معك خسران
ومن لا وصلك وقبل ايديك مسكين
لولاك ما كنا ولا مجدنا كان
ومن غير عدلك ماتدوم القوانين
المدح في غيرك من الناس نقصان
والخير منغيرك مثل مدة الدين
ياكويت تفداك الخرايط والاوطان
وتهون لمجادك تواريخ وسنيسن
وترخص على شانك توابيت واكفان
ويحلى على رملك نزيف الشرايين
ياكويت حنا للشدايد والاحزان
جينا عشان نموت وانتي تعيشين
كرامتك تبقى وتحفظ وتنصان
وان ضاعت نفوس العرب ماتضيعين
الله خلقنا للعداوات عدوان
وصدورنا تبرى بطعن السكاكين
ولو ضرب حسادك يزعزع بالابدان
حنا بضربه نقسم الجمع نصين
وان كانهم وسط الميادين قشران
حنا القشر فينا بليا ميادين
واذا الحميا فيهم حمية اخوان
حنا حميتنا حمية مجانين
للهرج ميدان وللافعال ميدان
وللمجد درب وللشهامه عناوين
وللفخر ناس وللتواريخ بيبان
وللموت سوق وللتجارب عناوين
يابو مبارك والله انك كحيلان
وانشهد ان اللي سواتك قليلين
مرت علي الطيبه اشكال والوان
وقابلت حكام وملوك وسلاطين
على كثر ماشفت حكام شجعان
ماشفت مثل الشيخ جابر لي هالحين
القصيده :خطاك السو
لأن الدمع ما يسخي عطاه إلا على الأحباب
ترى ما للهدب دمع صدوق إلا مع أحبابه
ومدام أن الدموع أصدق تعابير الحزن بأهداب
حرام أن الدموع تجف طليلة فترة غيابه
هذاك اللي شعل شمعة ضوت كل الدروب وذاب
فقد رمل الوطن دوسة قدمه وعطر ترحابه
فقده من الثرى ضيق وتراحيب وسهل وهضاب
فقده من الوطن حتى عذوبة ماه واعشابه
يغيبه المرض عنا وكنه بيننا ما غاب
بعيد وشعبه الوافي عليه أقرب من ثيابه
سكن باهدابنا حتى يلامس رعشة الأعصاب
فرش بدروبنا قلبه ولف الشعب بأهدابه
تضيق ابنا الدروب ونرتجي في وجهه الترحاب
حشا كن الشوارع ماتمر إلا على بابه
من أول ما حكم وأسس ومسس للثبات أطناب
سجد قلبه على ملة رسول الله وكتابه
غرس فينا الوفا نبته مثل ماتنبت الأعشاب
وقال إن الثرى له حق نشقى له ونشقى به
وطن ما به وطن غيره....ولا غير التراب تراب
مادام الله خلق دون البلاد سباع وذيابه
عرفت أنه يهاب أنه يهاب وما يعرف يهاب
يحفظ الدار يوم الجار ثار وكشر انيابه
وقف للعالم بأسره وقوف الفاقد الطلاب
خطب خطبة شجاع وفزز التأييد بخطابه
عتق دمعة فرح تلبس لميعاد الرجوع ثياب
حشا كن الدموع تعرف علم الغيب واسبابه
خطاك السو وعيون الحسود وهرجة الكذاب
وتعدتك المنايا يا ظلال الشعب وحجابه
فبعدك يا طويل العمر يبقون القراب أغراب
وترى يا شيخ ما كل القلوب البيض تتشابه
يقولون الغلا واحد وأنا قايل: شجاب لجاب؟
هذاك الشيخ جابر غير..ذاك الشيخه أولى به
هذاك اللي فقد لذة منامه لأصغر الأسباب
هذاك يموت ما خيب هقاوي من تهقوا به
هذاك إن لد للعذرا تغطرف له ولع وإعجاب
هذاك اللي أسر عشق القلوب بطرف سبابه
هذاك اللي من أفعاله عجز في مثله الا نجاب
كأن الله منع بعده يجي شخص يتحلى به
هو اللي شتت جموع الضياع وولف الأحزاب
هو اللي جفف دموع اليتيم ويتم صوابه
هو أول من حما شعبه من طعون الزمن وأ نصاب
هو اول من نذر نفسه يرد الحق لاصحابه
كأن الله خلق بينه وبين المستحيل أحجاب
فلا يعرف محال إلا يكون أسهل من صعابه
أبو مبارك تطامن له خشوم وتفتديه رقاب
عريب إن ما زها بالمجد كان المجد يزهابه
ودام الله خلق فينا جماعات وأمم وأنساب
أبي هو بالجود انساب خلق أكرم من أنسابه؟
تحلى بالصبر يا شعب......لا تحزن ولا ترتاب
ترى شعب الكويت أكبر من ان الشك ينتابه
وعساكم أن تحبوا شيء كرها يا ألو الألباب
وعسى أن تكرهوا شيء وهو خير لطلابه
نبي نصبر على كربه ولو أن الصبر غلاب
عزانا للبلاد أنه بيحيا له ويحيا به
ومثل ما قد سجد بأرضه لوجه الباري التواب
بعون الله بيرجع له وبيسجد على ترابه
وتطير من الفرح بسم السلام من الحمام أسراب
بعدها تكتمل فرحة رجوع الشيخ الأحبابه
وعسى رب السما يفتح لدعوات القلوب أبواب
وتكون أصدق دعاوى شعبه ملباه ومجابه
ولأن الدمع ما يسخي عطاه إلا على الأحباب
حرام أن الدموع تجف طليلة فترة غيابه
القصيده :المملكه عندنا غير
يا طير غرد وازهري يا نواوير
يا شمس طلي وانزحي يا غمامه
ويا نفس زفي للوجيه التباشير
ويا جفن كف من البكى والندامه
من هالدقيقه ما للأحزان تبرير
برجوع ابو خالد لنا بالسلامه
مادام سلطان الكرم حي وبخير
معاد ننشد لو تقوم القيامه
بشت يذري عن عجاج المعاصير
ووجه يرد ارواحنا بإبتسامه
وكف يجود بلا حدود ومعايير
وشهامة ما بعدها من شهامه
اكرم من اللي ماخذ الجود تبذير
واصدق من عتاب الخوي في خصامه
واشد من ظرب السيوف الشواطير
واجل من وصف يحدد مقامه
سلطان ياقرم يقود الطوابير
ياسيد الجيش السعودي وإمامه
ياشوق تلعات الرقاب الغنادير
يا منبر الدين الحنيف وحسامه
جيتك وفي صدري وطن من تعابير
وبخافقي حب الكويت وغرامه
لان الرفيق يحن ويحس ويغير
والصف الاوحد مستحيل انقسامه
شعب الكويت يكن لك كل تقدير
ويبلغ الشعب السعودي سلامه
ويعاهدك مهما تدور المقدير
نبقى لكم مثل الفشق في حزامه
لأن قدر المملكه عندنا غير
المحترم يفرض عليك احترامه
واللي يوفي بألتزامه مع الغير
عيب علينا ما نحفظ التزامه
ياجارنا اللي ما حصل منه تقصير
يا كبر دروع اهل الجزيره ظخامه
ارض الحرم .مهد الكرم.منبع الخير
طهر الظبا.ستر العبي واللثامه
يا قصة الكوثر ويا زمزم البير
ويا موقع اقدام الخليل ومقامه
اغلى ثرى تاطابه الرجل وتسير
واكثر عباد الله ورع واستقامه
ان كبروا هز الفضا صوت تكبير
ولسجودهم في ناصيتهم علامه
طول اللحا لوقارهم زود توقير
وقصر الثياب ابهم جمال ووسامه
اصحاب نهج ودينهم دين تذكير
وآمالهم تبني وطن من عدامه
لأن العمل يجمع شعوب وجماهير
عمر الجهل ما عز للدين قامه
ومن يدعي الاصلاح لأغراض تدمير
ماظن للرحمه صله بأهتمامه
الموعضه تيسير ماهيب تعزير
وحنا نميز بالحلال وحرامه
ما للهدف من قتل الاطفال تفسير
وصبر على فعل الجرايم غشامه
اكثر من اللي صار وشعاد بيصير
المسأله وصلت حدود الكرامه
مالله خلقنا في سمانا عصافير
والحمد لله مالنا بالرخامه
جهالنا عند المواجه مغاوير
وافعالنا صبر وثبات وجزامه
يوم الظعيف ببالشديده معيثير
حنا ليا ضاقت نطش العمامه
نفزع بوجه المدفع بسيف وبعير
ولا عاش فينا من يرد بكلامه
يامير ما يلحقكم الشك يامير
ولا غيركم يا اهل الزعامه زعامه
الله مدبر فيكم العدل تدبير
ومعكم يسود امن البلاد ونظامه
وإن كان للفتنه على الشعب تأثير
يمكن تزود وحدته والتحامه
الحكم حكم الله ولا فيه تغيير
ودوامكم ياسيدي من دوامه
والله لا عنتر ولا سالم الزير
يقدر يزعزع بأرض الاسلام هامه
دام الفهد طيب وابو متعب بخير
والنايب الثاني رجع بالسلامه
هلت على الشعب السعودي تباشير
وقامت على حزب الضلال القيامه
القصيده :سمو المجد
جيت أسلم لابقلبي لاطموح ولاتمني
الوكاد إني عنيت مودع تراب الكويت
ويشهد الله يوم جيتك ياطويل العمر كني
زاير الشعب السعودي في محله بيت بيت
قبل أشوفك من وصوفك غير فكرك مافتني
وبوجودك مثل جودك لاسمعت ولارأيت
جيت أبطويلك مسافات الدروب اللي طوني
ماعنيت إلا لوجهك بس كني ماعنيت
خطوتين من الكويت لي بحر جده وجمعني
مع سموك ياسمو المجد يافيصل وجيت
والقصيد إن مارهنته تحت كفينك رهني
لأن لو للطيب مبدأ فأنت أول من بديت
أنخلق لله وجودي وانخلق لرضاك فني
لوتحب أكتب كتبت ولو تحب أمحي محيت
وشبغيت أمر تمنى لايغرك صغر سني
شايف أنجوم الثريا جبتها لك لو بغيت
لو بعيش أعطي كفوفك مثل ماكفوفك عطني
لاتحسب أني بوفي لو عطيت ولوعطيت
أشهدني ماوفيت ولو وفيت أنشهدني
قلت عن نفسي مقصرواشهدني ماوفيت
لأنك أغلى من عروقي والوريد اللي سكني
واعتزازك تاج يبقى فوق راسي ماحييت
لأختلف فيك شخص لازم أخلف فيه ضني
وأن رويت الماي بروى مثل ماأضمى لاضميت
وأنزعلت أزعل وأبرضى لارضى قلبك لأني
واجب أزعل لازعلت وواجب أرضى لارضيت
انت مثل البحر تعطي والعطى ثقل وتأني
بس هو يعطي وياخذ وأنت ماعمرك خذيت
محتفظ بأسمى صفاتك ومتبنيها تبني
وأمتداد الملك خالد معدن وصوره وصيت
كن الارض تقول يوم أقدام خلق الله وطني
بعد رسله والصحابه أنت خير اللي وطيت
ياطويل العمر لولا المستحى لتمل مني
وقالوا إن لم تستح من شي ففعل ماشتهيت
ولا أنا لولا الملامه والنصيب اللي حضني
كان مسري من محلك لين أشوفك سريت
لو ينال المرء بأدراك المطالب بالتمني
كان أجل هموم قلبي تنتهي لو قلت ليت
مغترب جيت متعني لك ولاني بمتعني
وقتها كني رحلت من الكويت الى الكويت
بس والله يوم جيتك ياطويل العمر كني
زاير الشعب السعودي في محله بيت بيت
القصيده :فخر الامجاد
ياطيب شوف مروتك مع هل الطيب
كانك تبي تعرف اصول المروه
طالع فلاح وتقطع الشك والريب
خلك معه واللي يسويه سوه
إذا المراجل عندك تحظر وتغيب
تغيب عندك وتحظر مع سموه
هذاك ماتحسن به الظن وتخيب
راعي جميل وخوته غير خوه
اسلوب طيبه غير كل الاساليب
حموته ماهي مجرد حموه
فعله لحاله طلع براسي الشيب
بأسبوع جدد نظرتي للإخوه
تسمع سكوته تحسب ان الحكي عيب
تسمع كلامه ماتحسد المفوه
ان كانها بالمرجله والمواجيب
أعز من شبت على الارض ضوه
فلاح شوق المترفات الرعابيب
تفخر به امجاد العلا من علوه
واثق بخلانه ثقة عالم الغيب
ويوفي بميعاده ولو مع عدوه
النو يسرق من يديه التراحيب
ومكارمه تسرق من الغيث نوه
واغلا صفاته جابها بالتجاريب
وطهر سماته من سمات النبوه
ان جيت له بالطيب بيجيك بالطيب
ومن جاه بالقوه يجيله بقوه
اصلا حلاة الآدمي سهل وصعيب
مثل البحر يخفي غضبه بهدوه
مدح بغير عيال زايد عذاريب
الطيب نابع من حنان الابوه
ياطيب لو كثرو عليك المعازيب
واحترت بين مزبنين الجلوه
طالع فلاح ويطلع براسك الشيب
خلك معه واللي يسويه سوه
إذا المراجل عندك تحظر وتغيب
تغيب عندك وتحظر مع سموه
مجنونة حآمد زيد .gif "Graaam (269)")
.gif "Graaam (46)")
رد : مجنونة حآمد زيد 
رد : مجنونة حآمد زيد 
العرض العادي
