لا ردّك الله... صوتية للشاعر محمد بو رحيمه
للإستماع: http://aluae.net/uploader/uploads/laa.rm لاردّك الله لا ولا أطلب تردين
أدعي عليك بعثرةٍ فـي صلاتي
عثره تشلّك ما بعدها تقومين
يللي نقضتي عهودنا الماضياتي
خدّان لك بالقلب كانت بساتين
وريضان وغصونٍ بها يانعاتي
كانت تروح الروح ساعة تروحين
وتعاف نفسي شربها والمقاتي
وكنتي مناة القلب والروح والعين
واليوم عينك يعلها ما تباتي
كنت أحسبك للعهد والحب توفين
قلتي الغدر بالحب ماهو سواتي
وبان الغدر سمٍ جرى بالشرايين
الله عسى يسجيك سم الفعاتي
كلّي سقيتك حب واليوم تنسين
تقولين حلم ايام واليوم فاتي
وخذتي الهوى لعبه على ما تحبين
إلين عصفت بالهوى عاصفاتـي
وصرتي بشعري في العذاري تباهين
تقولين أنا شمس العصر في حلاتي
وبالشعر صوّرتك خزام ورياحين
وأثرك هضاب وشوك ما به هداتي
بالشعر أغليتك على كل غاليين
واثرك دنيّه تتبعين الدناتي
رسمتك سحابه خير قطرٍ تنفين
فزّت لك الصحراء زهور ونباتـي
رسمتك مهاةٍ للجميله تقودين
واثرك خروف مضيّعته الرعاتي
توسّلت لك على حب عامين
عامين لكن في حسابي مئاتــي
ناديت لكن لي ابد ما تسمعين
عمري وروحي والفكر في شتاتي
خنتي وبعتي كل عهدٍ وأيامين
ما عاد يفرق بين ماضي وآتي
وصرتي مثل غيرك برخصٍ تبيعين
يا مرخصتني ما بقى لك غلاتي
تحسبين انك بالمهافات ترقين
كيف الصعود يكون للهاوياتي
والنوق من تخرس فلا يفيد تمرين
ما يفيدها قرصٍ وضرب العصاتي
ويا ناقةٍ خرسا تكلفة سنتين
فلا لانت بشده ولا بالهداتي
أسبوع في دوامي ولا أيي غير يومين
ويوم أوصل الدار أتصل وأحاتي
صبري نفذ واليوم ثارت براكين
مظلوم أنا وباكر تحل ادعواتي
سمعي عسى من بعدها ما تسمعين
سمعي دعاء من صار قلبه حصاتي
عساك عوقٍ منه ما عاد تبرين
عوقٍ تشافق له قلوب العداتي
أدعي عسى من ناظرك ما تشوفين
وتطحن بك الايام طحن الرحاتي
يالله عسى يحتار فيك المداوين
تبين الممات ولا يجيك المماتي
ويالله عسى كف الندامه تعضين
تندمين يوم انه يفوت الفواتي
وتبكين دم يسيل من مقلة العين
ويحتار قلبك من عناك وتعاتي
وعسى ما تلاقين منه القلب تهدين
وان هو حصل ادعي عساك الشتاتي
يا بلوة اللي وسط بيته تعيشين
غافي وحوله شب جمر الغضاتي
عسى بعمرك ساعةٍ ما تهنّين
وتمضي حياتك بين هم وشقاتي
يا بنت قلبي وين مثله تلاقين
قلبٍ عطاك الحب ما قال هاتي
جيتك وروحي شلتها لك بكفين
وفي التاليه رمح الخيانه جزاتي
يالله عساك النار يا أم وجهين
كله انكشف لا ما تفيد العباتي
ويالله عسى تلبسك جن وشياطين
وتكونين مدعاة الحكي والشماتي
والله ماني منتظر قلبك يلين
والمجبلات اكثر من الفالتاتي
وما عادتي أتبع ضعون المقفّين
ريحٍ تشل ضعونك المقفياتي
يا ليلةٍ ظلما على الله تزولين
تاتي ليالي سعدنا مشرقاتي
يا حيةٍ رقطا تقود الثعابين
باكر تحل أيامك المعتماتي
يا ظالمه نفسك ترى الدهر يومين
يوم النجاة ويوم ما به نجاتي
بيني وبينك تحكم أيام وسنين
وأنا شاهدي قلبٍ من الغدر ماتي
لو كان عذرك في كفوف الموازين
لا كان ربح كل غدر البناتي
ويا دمعة التمساح لالا تذرفين
العيون رغم دموعها كاذباتي
لا ما عرفتي الحب لا ما تحسين
وغدرك تعدّى غدر ذيب الفلاتي
الذيب يعوي قبل يغدر بمسكين
وانتي غدرتي خافقي في سباتي
انتي السبب سقتي على القلب جرحين
غدر الغرام وموجع الذكرياتي
وانتي السبب واليوم لا لا تلومين
وان ياك باكر شوفي شلون ياتي
والله لأكتب وأفضحك في دواوين
وأرزف وأغني يوم خبر الوفاتي
وأرسم لأهل العشق قلبٍ وسهمين
وقصة خيانه ما روتها الرواتي
يمين لأنشر فوق إسمك عناوين
وأشهرك من قاصي اليمن للفراتي
ومن غرب هالدنيا إلى قاصي الصين
ديوان غدرٍ فيه كل اللغاتي
والبادي أظلم سنّة العين بالعين
وإلاّ فهذي لا عادتي ولا صفاتي
ويا شبه إنسانه برأسٍ ورجلين
أعوذ بالرحمن منك بصلاتي
لا ردّك الله... صوتية للشاعر محمد بو رحيمه 
رد: لا ردّك الله... صوتية للشاعر محمد بو رحيمه 
العرض العادي
