اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 19-12-2008, 04:31 PM
صورة خيال عابر الرمزية
خيال عابر خيال عابر غير متصل
©؛°¨غرامي مشارك¨°؛©
 
الافتراضي قلوب دافئة / بقلم سعود2001 ، كاملة


اقتباس:
السلام عليكم و رحمة الله و بركاته

احب اقدم اول قصة من تاليفي ... مع امنياتي انها تعجبكم

و عكس باقي الكتاب .. اذا لم اجد ردودا سأستمر في اكمالها

لان اللي ما راح تعجبكم راح تردون عليها و توقفونها عن النشر

استعدوا
حبيت ابداء بكلام الكاتب
القصه روعه قليل في حقها خاصة ان الكاتب متمكن ومبدع وعد انه سوف يكملها

اترككم مع اول فصل



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 19-12-2008, 04:32 PM
صورة خيال عابر الرمزية
خيال عابر خيال عابر غير متصل
©؛°¨غرامي مشارك¨°؛©
 
الافتراضي رد: قلوب دافئة بــــــ قلم سعود2001


تخيل يا قارئي العزيز انك تشاهد الكرة الارضيه من مشارف قوقل ايرث
و من ثم اعمل اسقاط على جزيرة العرب و تحديدا على نجد و ملحاقاتها...
و تحديدا اكثر على مدينة الرياض الحبيبه و ركز الاسقاط على شوارع مدينة الرياض
و تحديدا حي الملز خلف مكتبة جرير و في بيت من البيوت العامرة :

( عبد العزيز)

كنت جاي من الشركة و تعبان و اسمع صجة العيال و صراخهم
و اتلفت ادوّر امهم لاهيتن عني و عنهم ما دري وين هي فيه
لا استقبال لا ابتسامه لا منظر حلو لا ترتيب و لا عيال يعرفون السنع
البيت منخبص فوق تحت كن مرمية فيه قنبله من قنابل الاربي جي
و المشكله اني انسان احب الوناسه و الفرفشه و الوجه الحسن
و المدام تحب الصمت الرهيب و عدم التعليق دايم على السايلنت
على أي موضوع و دايم اشوف فيها نظرات غريبه بعض الاحيان
يتصور لي انها تكرهني و مجبوره على حياتها معي ...
هذي باختصار زوجتي ( منيرة ) ام محمد و فارس وتركي و مها
مدري شلون مشت ايامي معها ورزقني الله منها بالعيال ...
المهم شفت البيت مزعج خذت شماغي ولا حتى تغديت و طلعت لبيت الوالد بجنبي
و ادخل على الصاله و اسمع الحوار اللي يدور بين اختي و امي :
حصة : والله يا يمه يمدحون نوره بنت آل ******و يقولون انها سنعه و مزيونه بس انها مطلقة
الام : انتي عارفه صالح يا حصة يبي وحده زينه عقب بنت عمه اللي ما حبها
و اذا على الطلاق هو بعد مطلق و عنده بنت .
حصة : تتوقعين يوافقون عليه و يزوجونه اياه !!
الام : الله يكتب اللي فيه الخير و من كلامك عنها انها بنت اجواد و امها ما عليها حرمتن صالحه
حصة : اجل خذي الرقم و اتصلي عليهم ******4
قبل لا ادخل مدري ليش سجلت الرقم و حفظته <<<<< تدري بس تسوي نفسك بريء ههههههه
دخلت على ام عبد العزيز و اختي حصة :
مساكم الله بالخير ...
امي : مساك الرضا و العافية و شلونك يا بوي
حصة : هلا باخوي و شلون صحتك
انا : بخير الله يسلمكم ... الا يمه وين ابوي و صالح و فهد !!!
امي : ابوك توه متغدي و راح لغرفته بيقيل قبل الصلاة
واخوانك ما تغدوا معنا صالح يقول انا نايم لحد يزعجني
و فهد يقول معزوم على الغداء !!!!
سولفنا و شفت فلان و شفت علان و من سوالف الحريم المشوقه
المهم قامت امي و قالت : بطلع فوق اريح شوي
مسكت اختي حصة و قلت لها : من هالبنت اللي بتخطبونها لصالح !!!
قالت : بسم الله وش دراك و الا رامي اذنك قبل لا تدخل !!
قلت لها : لا يكثر ... تكفين يا حصة انا معرس معرس بس مابي اطب بوحدتن ما اعرفها
حصة : حرام عليك منيرة طيبه و اجوديه ليش تعرس عليها
قلت : ما قلنا في منيرة شي بس انا مو مرتاح ابي مرتن ثانيه و الله مغنيني و معافيني وش المانع !!
حصة : شف يا عبد العزيز ترا مالي دخل بحياتك و انا ما عطيتك الرقم و لا تسببت في عرسك و انت حر

ناظرتها و قلت بنفسي و ليش استنى تعلمني انا عارف بنت مين و و و و و الباقي بسويه





::::::::::::::::::::::::::::::::::::::::::::


( نورة )




مدري وش هالحظ عندي ...!! الله يكتب لي ما فيه الخير
المشكله اني انسانه مسالمه و عمري ما سويت شي غلط و لا اخبر اني غلطت على احد
حتى يصير حظي كذا ... انا مؤمنه انه اختبار لي من رب العالمين
اصبر و احتسب و انال رضا ربي او اعترض و الاعتراض بيدمرني و يسخط ربي علي ....
بس ما اقول الا الحمد لله على قضاء الله و قدره ....
اخوي سلمان بدا يشتغل علي الظاهر خلصت مشاكله مع زوجته
و لف علي الا تتزوجين ( عبد العزيز الفلاني ) يا ربي وش اسوي
اتزوج واحد عنده زوجه و عيال !!! يا ناس افهموني
ابعيش حياتي بكمل دراستي بشوف لنفسي ......على طول
ترموني لاي واحد يطق الباب !!! بس لاني مطلقة !!!
يا رب ان تستخير لي الخيره المباركه يا رب تفرجها لي
آآآآآه بس لو تدرون وش جواتي من الالم و الحرقة بس ما اقول الا الحمد لله
عشان تكونون معي في الصورة بقول لكم عن اهلي .....امي الله يحفظها لي
و اللي توفى ابوي و انا بطنها يعني محدثتكم يتيمه من قبل لا تشوف النور
ذقت حزن امي على ابوي و مرارة الفقد و انا ببطنها ...
اخوي سلمان متزوج و عنده زوجة ( فوزيه ) ما تحب شي في هالدنيا كثر ما تحب المشاكل
و عيالهم اربع بنتين و ولدين ... بعدين بعلمكم باسمائهم مالي نفس اقول من ضيقة الصدر
و اخوي نهار متزوج ( هيفاء ) و برضه هي من النوع اللي ما ندري عنها
هي في ارض هي في سما ينطبق عليها وصف وصف التليفونات لا ارسال و لا استقبال
و عندهم بنت وحده عمرها ست سنين ( غادة ) احبها و دايما اعضض خدودها تجنن
و انا نوره عمري 22 سنه تزوجت واحد عنده مشاكل و ما ارتحت له و طلبت طلاقي
و بعد سنتين طلقني .. طبعا كنت ادرس اللغه الانجليزيه في الكليه و انقطعت عنها بسبب
الزواج و الطلاق اللي انعكس على نفسيتي و الحين باقي لي سنه و اتخرج ان شاء الله
سمعت الباب يطق و انا بغرفتي .. فتحت الباب الا سلمان و هو مبتسم
سلمان : شلون العروسه !!! قلت : تفضل ... و جلس على كرسي التسريحه
و انا جلست على طرف السرير و متكيه يديني على السرير و عيوني منزلتها في الارض ...
سلمان: نوره و انا اخوك ترا الرجال ينشرى و انا اضمنه لك
و عنده شركه و ابوه غني و عمره في 45 و متزوج و عنده اربع عيال و بيحطك في بيت لحالك
واللي تامرين عليه بيسويه لك ... (يمكن بعضكم يعجب بحال الخاطب الجديد
بس انا لا .. انا مابي اخرب بيت و اخذ واحد من عياله و زوجته
مو مثالية مني بس اشوفها على نفسي لو كنت مكان زوجته اكيد بنجن )
قلت لسلمان : طيب عطني مهله اسبوع افكر و ارد لك !!
سلمان : بعد بكره ( الجمعه ) بيجي يشوفك ... و ان وافق عليك بتكون الملكه الخميس الجاي ..
قلت : و يا دام انه منتهي الموضوع ليش تشاور قل لي انك رتبت اموري من غير ما تشاورني
سلمان : شوفي يا نوره انتي مطلقه و انا عارف سبب طلاقك مو لسوء فيك ولكن امر مكتوب
و عبد العزيز رجال و كفو لا يغرك عمره لو تشوفينه بتقولين اصغر مني
و فيه سبب ثاني و مهم جدا ا نت عارفه امي تعبانه و التعب ما يخليها
وانا فهمتها الموضوع وهي مقتنعه فيه و تبي تتطمن عليك و تشوف عيالك ...
قلت : الله يكون في العون ... يا سلمان على الاقل بصلي استخارة
و ان كان قلبي يقول لا للموضوع ارجوك انك ما تغصبني ترا ضربتين في الراس بتوجع
و انا ابي اكمل دراستي و اشتغل و ارفع نفسي بنفسي .. ارجوك يا سلمان( و خنقتني العبره )
قام من الكرسي اللي بغرفتي و قال : نوره ترا انا اخوك و اخاف عليك
و لاني غاشك و لا تفكرين اني مليت من قعادك عندنا
بس الرجال ما ينتفوت و لو الجوهرة بنتي في سن الزواج
و الله لاعطيه بنتي ... استخيري و انا اخوك و مافي الكون بيكون ..
و طلع من عندي و عيوني امتلت دموع و تمددت على السرير و انا افكر بكلامه ...



::::::::::::::::::::::::::::::::::::::::::






( عبد العزيز )






خلاص خطبت البنت و كلمت اخوها سلمان
العيله محترمه و تناسب وضعي الاجتماعي ...
انا ما قلت لكم عن نفسي انا جامعي و تخصصي ادارة اعمال
و الوالد الله يطول بعمره مسكني وحده من شركاته الثلاث
و لقيت نفسي في عالم رجال الاعمال مع اني صغير هههههه
تزوجت و عمري 28 سنه من منيرة و هي تقرب للوالده بس من بعيد
انا ما انكر انها اعجبتني في البدايه بس كنت احس انها تجاملني
تناظرني ببرود .... بعض الاحيان اذا شفت نظرات اختي حصة لزوجها
عبد الرحمن اقول يا ليت اللي عندي تناظرني نصها !!!
مشت الايام و رزقني منها ربي باربعه مها (15 سنه ) و محمد ( 13 )
فارس ( 10 ) و تركي ( 7 ) الله يخليهم لي احبهم و مابي اضايقهم
بس امهم اللي صارت باردة معي اكثر من الاول كل طفل تجيبه تبعد
اكثر و اكثر صارت ما تهتم ما تسال ليش تاخرت او تبي عشا اي سؤال
ما تسال السفر ما تبي نسافر لحالنا لازم نروح كلنا حتى لو يومين
حتى طلعات المطعم ما تبي تطلع بس تروح لاهلها تقريبا كل يوم
و تجلس مع امها و خواتها و انا بصراحه ما افقدها في شي
تدرون اني لو بسولف معها تلهت بشي بجوال او بفيلم تتابعه
كنت اقول يمكن انها مغصوبه علي او ان هذي طبيعتها
مع اني بكلام الجميع انسان مقبول و محافظ على جسمي
و طويل و احب البس الغتره البيضا اكثر من الشماغ
عموما شكلي الخارجي مقبول جدا بس منيره هذي عمرها ما ناظرتني نظرة اعجاب
و لا حتى تقول كلمات تحسسني فيها انها تحبني و تغار علي
كل حياتها جمود في جمود ... عشان كذا فكرت بالزوجه الثانيه
منيرة عند عيالها معززه مكرمه و انا بالتفت لنفسي و اتزوج
على الاقل احد يحس بي او يمكن الاخت منيره تعدل نفسها
ادعو لي تتسهل اموري .. و اخذ نوره اللي مدحتها اختي حصه





::::::::::::::::::::::::::::::::




( حصة )





بعد ما سألني عبد العزيز عن نوره وانه يبي يخطبها
و انا ضايق صدري اقول لامي عن مشروع عبد العزيز !!
و الا اسكت المشكله عطيتها الرقم اكيد بتتصل و تطلبها لصالح
و يمكن عبد العزيز اتصل عليهم .. ابكلم امي اتأكد اشوف ...
مسكت التلفون و على امي على طول :
الو ... هلا يمه و شلونك اليوم
امي : الحمد لله .. كن رجيلاتي احسن اليوم عقب الدهون
اللي جبتيه لي ..الله ينفع به
قلت : الحمد لله .. الا يمه وش صار على موضوع صالح
امي : وش فيه صالح ... آآآه البنت اللي ذكرتيها
قلت : ايه .. كلمتيهم و الا لا
امي : لا ما بعد كلمتهم يوم اكلمهم و انتي عندي مشغول و دخل عبد العزيز
علينا و قلت العشاء بكلمهم ...و نسيت ..
قلت : اشوا انك ما كلمتيهم .. لان عبد العزيز قال لي انه بيخطبها
امي: وش يخطب !! يخطبها لنفسه !!
قلت : ايه يقول اني مو مرتاح مع منيره و بشوف لنفسي ...
امي : ما بقا غيرها بعد هذا اللي ماهوب صاير لو ايش ماهو
يبي يعرس على منيره !!! و ش يدوّر حرمتن عقل و ثقل و جابت له عيال و بنت حمولتن طيبين
سكري التلفون باكلمه الحين ...
طووط طووط طووووط ...... حتى من قبل لا اقول فمان الله الله يهديك يا يمه
و الحين وش اسوي عسى ما يضيق علي عبد العزيز و يقول انتي حرشتي امي علي
بصراحه منيرة مرته كويسه بس احس فيها العقل الزايد اللي موب على سنع
يعني لا تناظر لنفسها و لا تحاول تغير من ذوقها في اللبس
كنها خالتي موب مرت اخوي مع ان ما بيني و بينها الا 3 سنين
انا اصغر منها ... احسها مهملة نفسها و حتى عيالها
ما تعلمهم الذوق و الذرابه ... و الله مدري عنك يا عزوز
انت شايف اللي اشوفه و عشان كذا مو مرتاح و الا بس تبي تعرس وبس
و الله ما ادري عنكم يالرجال ما فيه حال يعجبكم ...
قمت من مكاني و رحت لجناحي وتروشت و لبست بيجي عبد الرحمن من العمل و انا
ما غيرت بيجامتي ... وعيالي تغدوا وراحوا يلعبون في البيسمنت ....


:::::::::::::::::::::::::::::::::::



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 19-12-2008, 04:33 PM
صورة خيال عابر الرمزية
خيال عابر خيال عابر غير متصل
©؛°¨غرامي مشارك¨°؛©
 
الافتراضي رد: قلوب دافئة بقلم سعود2001


أم عبد العزيز )


مهوب صاحي عبد العزيز الله العالم انه فيه بلى !!!
و انا ليش اقعد اهوجس باكلمه و اخليه يعلمني بالهرجة الثابته ..
دقيت على بيته و ابطوا ما ردوا علي .. يا دافع البلى مافيه احد يرد
عقبين ردت مها : الو..... رديت عليها : هلا مهاوي و شلونك يا امي
مها : طيبه ...ماصبرت قلت لها : ابوك وينه !!!
مها : في الشركه ..... قلت : و امك وينها !!
مها : مدري عنها بعد.... بس يمكن انها عند امي سلمى
قلت : وش تسوي عند خوالك هالوقت !!!
قلت بنفسي ما وراها زوج و لا بيت و لا عيال !!
شكل الاحوال يا عبد العزيز في البيت ماهي مضبوطه
قلت لمها : دقي على ابوك في الشركه و قولي له امك تبيك ضروري
صكيت السماعه ... جلست شوي و يدق تلفون البيت ...
: الو .... عبد العزيز : هلا بها الصوت وش لونك يمه
رديت : هلا بالمعرس ... عبد العزيز : هههههههههه
اجل جتك العلوم ... و الله اني خابر حصه ما تعلّم
رديت : ماشاء الله عليك علومك عند اختك و امك تغبي عنها
وش تبي بالعرس يا وليدي و انت مرتك و عيالك من احسن ما يكون
تحسب العرس لعب و وناسه .. تراك بتحاسب عليه لو ما تعدل بين الثنتين
عبد العزيز : يمه انا بجي اتقهوى عندكم اليوم العصر ان شاء الله
و بفهمك الموضوع كله ..زين
رديت : اصبر لا تسكر ... مرتك داريتن عنك
عبد العزيز : لا ... بقولها اذا اعجبتني البنت ما ابي اسبق الاحداث
رديت : و الله يا وليدي ما ابي لك الا السعاده بس تراك بتتورط بالمشاكل
عبد العزيز : الله يسهل الامور و يكتب لنا اللي فيه الخير يالله يا ام عزوز
تامرين على شي عندي اجتماع الحين
رديت : الله يحفظك و ياقاك شر الناس ما تشوف شر يابوي فمان الله
سكرت السماعه و انا قلبي منقبض ... وجلست افكر بمنيره
المره ما شفنا منها لا خير و لا شر في حالها و لا ندري عنها
و بيتها جنب البيت ما تمر علينا تروح لاهلها مرتين في البوم
و حنا ما نشوفها الا كل جمعه ... و انا بعد ماقول لها شي
مخليتها على راحتها ا ن جت او راحت ...
و عبد العزيز ما قد قالي كلمه فيها او حتى اشتكى منها
ايييييييييييه اليوم بنشوف وش سالفة بيته الله يهديه .....






( عبد العزيز )


خلصت من الاجتماع و قلت لحسن ( السكرتير ) لا يحول أي مكالمه
لحد ما اقول له و طلبت قهوة تركيه ...
دقيت على أختي حصه : ها حصوص اشوف الخبر انتشر !!!
حصه : عبد العزيز لا تفهمني غلط .. امي الرقم معها و بتدق على اهل نوره
على اساس انها بتخطبها لصالح ... و انت كلمتهم و تخيل الموقف
قلت بخبر امي قبل لا تدق عليهم .. بس و الله مو عشان افضح سرك
رديت عليها : انا يا حصه جازم على العرس و بمجرد ما اشوف البنت
و تعجبني راح اخبر منيره اذا هي تبي تستمر معاي في بيتها و عند عيالها
و الا تختار الطريق اللي تبي ... اسمعي اليوم بعد العصر بتقهوى عند الوالد و الوالده
ما ودك نشوفك هناك ,,, حصه : بشوف عبد الرحمن و ان قدرت جيتكم ان شاء الله
قلت : يالله اختي العزيزه تامرين على شي .. حصه : سلامتك يالغالي الله يحفظك
سكرت السماعه ... وانا حاس بصداع .... محتاج تركيز على الوضع الجديد
اللي راح اقدم عليه ... يا ترا وش ردة فعلك يا منيره !!
عندي احساس يقول انها بتناظرني و تقول على راحتك !!
سمعت ضرب الباب و قلت : تفضل .... الا ابو محمد و شايل القهوة
مد لي اياها : القهوة يا طويل العمر ... خذتها منه و قلت : تسلم يابو محمد
شربت منها رشفتين ... أحس بتشتت من الاجتماع و مكالمة الوالده و حصه
و موقف منيره ,,, الصراحه انا احبها بس اسلوبها غلط معي
انا صليت استخاره مرتين و الله يكتب اللي فيه الخير
لكن ... تبون الصراحه أنا مرتاح لهالبنت احس فيها شي يجذبني
تونا بدري يا عبد العزيز انت شفها بالاول بعدين قل ارتحت و ما ارتحت
الله يجيبك يا الجمعه على خير ... كملت فنجان القهوة
قمت من المكتب و طلعت من غرفتي و قلت لحسن انا بطلع البيت الحين
أي اتصال من برا حوله على تليفون الجوال و الفاكسات ارسلها لي بالايميل
حسن : ابشر طال عمرك .. رديت : يعطيك العافيه
نزلت من الاصنصير على مواقف السيارات و شغلتها و حطيت
سي دي فيروز و الرحابنه ... على شط اللوزيه ....

آآآآآآآآخ من جد تعبان و مرهق الله يعيني على الاهل
اكيد متضايقين من قراري الجديد ... كلن يدور على راحته و انا ابي راحتي
متاكد ان الزواج بالثانيه راحه يا عزيز !!!



( نوره )

اليوم الخميس .. و نزلت تحت بفطر مع امي كالعاده و تفاجات
شفت مرت اخوي سلمان ( فوزيه ) جالسه مع امي يتقهون ماهي عادتها
خير اللهم اجعله خيرررررررر :
السلاااااااااااااام عليكم ... ردو علي : و عليكم السلام
امي : صبحها بالخير .. قلت : صباحك الورد يا احلى ام
فوزيه : انا اقول يا نوره لو تخلين هالدراسه ابرك لك
وانتي عارفه لا وظيفه و لا شي بس بتقعدين في البيت
و تشوفين لرجلك !!! ....
غريبه على طول استلمتني وش جاب الطاري !!!
رديت عليها : الوظيفه رزق من الله و لا انا راده رزق ربي
و اللي بيتزوجني لازم يعرف اني بتوظف بعد التخرج
قالت امي : يا بنيتي الكفو ما ينرد ... و عساني اشوف عيالتس
قلت : عسى عمرك طويل يمه و بتشوفين عيالي و عيالهم باذن الله
فوزيه : و الله الواحد ما تكمل فرحته الا اذا صار ببيت لحاله
و ما عنده الاعياله .... طالعتها و اقول بنفسي شلون بتزوج و بترك امي مع هالخبله
رديت عليها : اللي يبي الناس الناس تبيه و اللي ما يبيهم محد يطق بابه
صبيت لي قهوه و سويت لي ساندويتش و جلست انا و امي نسولف
عن امور عاديه .. و قامت فوزيه و طلعت فوق ...
قلت لامي : وش السالفه موصيها سلمان تكلمك !!!
امي : تقول ان سلمان يبي لاخته الزين و ان الرجال كفو و ما يعيبه شي
قلت لامي : و انتي يمه وش رايك !!
امي : انا يا بنيتي ابي لك السعاده و ما اقول الا الله يكتب لك ما فيه الخير
غصبناك على الاول و ما كتب الله فيه خير و الحين انتي بهواك
اخوك يمدح الرجال و يقول انه عاقل و لا هو راعي خرابيط مثل الاول ...
سالت امي : و سلمان ما ساله ليش بيتزوج على زوجته !!
امي : يقول سالته و قال لي انا ما اكرهها بس هي من النوع اللي ما تهتم بزوجها
و لا بعيالها و يمكن لو تدري اني تزوجت ما تفرق معها ابد ,,
: معقوله يمه فيه وحده ما تفرق معها اذا زوجها بيتزوج عليها !!!
امي : انتي شوفي بكرا وش يصير يمكن يجوز لك و تنشبين فينا ما ابي الا هو
ههههههههههههه قلت لها : عسى دوم هالضحكه يا اغلى الناس
بس اللي مضايقني اسلوب سلمان معي يقول غصب تتزوجينه
و اذا جزتي له الملكه الاسبوع الجاي !! يمه كني خروف
بيدخلني على الطباخ !!! ضحكت امي و قالت : لا بس هذي طريقته
و لو يكتب الله شي يبي لك فستان للملكه و روحات و جيات للسوق
موب الدعوى خذوه فغلوه ... بس هو الله يحفظه اذا تحمس للموضوع
يبي كل شي بسرعه .. لا تهتمين يا امي انا بكلمه و الله يدبر لك الصالح
: و الله يا يمه ما ودي ادخل على جاره و اطفال فيه بنات مطلقين و خذو ناس مثلهم
و بدون اطفال و استمرت حياتهم و انا توني صغيره يمه يمكن لو نصبر يجيني
الرجل اللي يناسبني ... امي : مدري يا بنيتي سلمان يقول لو واحد ثاني ما اعطيه اختي
بس عبد العزيز ينشرى رجال و النعم فيه دين و دنيا و اخلاق ,,
: الله اعلم ... سلمان نظرته ماديه و اعرفه زين ..
امي : يا بنيتي ما تدرين وش ربي كاتب لك عسى ان تكرهوا شيئا و هو خير لكم
: امين الله يكتب لي اللي فيه الخير .. ... و انت يا عبد العزيز الثاني
وشلون عرفت باب بيتنا !!! ... بكره الشوفه و الله يسترررر


























( عبد العزيز )
طلعت من الشركه بدري لانه يوم خميس و دوامنا يخلص 1 الظهر
دخلت البيت لقيته هادي
: منيره .... ما احد يرد علي !!!! مهااااااااااااااا
مهااااااااااااااااااااوي نزلت مها من الدرج : اهلين بابا
: وين امك اناديها و ما ترد علي !!!
مها : امي عند خوالي من الصبح قالت بروح لماما سلمى ...
قلت : طيب حبيبتي خليهم يحطون لي الغدا وش رايك تتغدون معي
مها : حاضر بابا ... لا انا و اخواني لسا مخلصين فطور
قلت لها : انا طالع ببدل ملابسي و خليهم يجيبون الغداء فوق
طلعت لغرفتي ,, و دخلت الله يجلكم دورة المياه و خذت لي شور سريع
و لبست لي ترنق ربيعي و رحت للجلسه تبع جناحي و تغديت
و شوي يرن التلفون : الو هلا يمه .... ام عبد العزبز : هلا بابوي
ما مريت علينا .. قلت لها : توني جاي من الشركه و تغديت بدري
بعد الصلاة بجيكم ان شاء الله ..
قالت : شف يا ولدي انا و ابوك تكلمنا في موضوعك و هو يقول
عبد العزيز ابخص بنفسه و يعرف مصلحته و انا يا ولدي ما ابي لك
الا السعاده .. قلت لها : يمه انتي تعرفيني انا ما اخذ القرار الا و انا مقتنع فيه
قالت : ترا هذي حياة يا عبد العزيز و بيجيك عيال من هذي و هذيك
و الجنه تبي و النار تبي و اذا تفرقوا عيالك مو من صالحك
قلت لها : الحين بدال ما تهونين علي تزيديني يمه
انتم وش دراكم بحياتي مع منيره !!! لا يغركم سكوتي عنها و صبري عليها
ترا مليت منها و من تصرفاتها معي .. مكرمها و منفذ لها طلباتها
و لا عمرها قالت لي من دخلت علي الله يخليك لنا يا عبد العزيز
بس تطالعني بعيونها و كأنه اجباري اجيب لها اللي تبي !!!
يمه تكفين مابي احد يناقشني في هالموضوع خلاص انا قررت و كلمت اخو البنت
قالت : و متى بتشوفها !!! قلت : بكره الجمعه ان شاء الله و اذا اعجبتني قلت لمنيره
و بتفاهم معها على كل شي ... سكرت السماعه و من امي
ورحت للسرير بتمدد شوي قبل الصلاة ... حتى الغرفه ما لي فيها
ذكريات مع منيره .. دايم مشغوله عني ما اشوفها الا اذا جت تنام ..
و الله يستر من نوره بعد اذا ما طلعت نسخه ثانيه من منيره ..











:::::::::::::::::::::::::::::::::::



المرة الجايه شخصيات جديده تتحدث عن نفسها في قلوووب دافئه



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 19-12-2008, 11:23 PM
صورة VEN!CE الرمزية
VEN!CE VEN!CE غير متصل
يـآرب مآلـي ســـوآكـﮯ
 
الافتراضي رد: قلوب دافئة بقلم سعود2001


’,


هلآ وغلآ منوره القسم
والله يعطيك العافيه

بتمني ان نوره ماتكون زي منيره :(

موفقه آن شاء الله


,’


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 20-12-2008, 05:18 AM
صورة الزعيـ A.8K ـمه الرمزية
الزعيـ A.8K ـمه الزعيـ A.8K ـمه غير متصل
δЯέαмş
مستشــ¸.·* غرام *·.¸ـــاري
 
الافتراضي رد: قلوب دافئة بقلم سعود2001


,’


بســم الله


يعطيك العــآفية
موفقة بـ نقلك إن شـــآء الله




,’



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 20-12-2008, 09:51 AM
مس لوول مس لوول غير متصل
©؛°¨غرامي مشارك¨°؛©
 
الافتراضي رد: قلوب دافئة بقلم سعود2001


روعه
آحب الروايات لاصار الكاتب رجل
لان الروايه تصير واقعيه ومافيها خيال مره ..
وننتظر .. . . لاتتاخري علينا


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 20-12-2008, 03:07 PM
صورة سجينة حب الرمزية
سجينة حب سجينة حب غير متصل
©؛°¨غرامي فضي¨°؛©
 
الافتراضي رد: قلوب دافئة بقلم سعود2001


.
.

وعليكم آلسلآم ورحمة آلله وبركآته

يآهلآ فيك عزيزتي
موفقه بآذن آلله
منوره آلقسم ^،^

لكِ وللجميع لآهنتم
قوانين قسم الروايات / تحديث جديد 23 / 1 / 2009 ~ الإطلاع هام و الإلتزام ضروري ~

.
.


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 20-12-2008, 05:49 PM
صورة خيال عابر الرمزية
خيال عابر خيال عابر غير متصل
©؛°¨غرامي مشارك¨°؛©
 
الافتراضي رد: قلوب دافئة بقلم سعود2001


لاتحرموني من مشاركاتكم
علشان ادري ان القصة معجبتكم واكمل

ولعيونكم هذا بارت جديد
القصه روووووووووووووووعه قليل في حقها



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 20-12-2008, 05:51 PM
صورة خيال عابر الرمزية
خيال عابر خيال عابر غير متصل
©؛°¨غرامي مشارك¨°؛©
 
الافتراضي رد: قلوب دافئة بقلم سعود2001


( منيرة )


معليش تأخرت عليكم في الظهور .... اقروني و افهموني
قمت من النوم و انا متضايقه حلمت حلم غريب
اشوف عبد العزيز و هو رايح من بيتنا على بيت جديد
و حلووو و ابيض و فيه نخلتين حلوات و اقول له لا ترووح اجلس عندنا
طالعني و قال : انتم ما تبوني هذا يبتي الجديد
قمت و انا اتصبب عرق مع ان الجو بارد .. يا ترى وش تفسير هالحلم !!!
شفت الساعه عشر الصباح قمت و صليت الفجر
امس سهرانه في عزيمه عند اهلي خواتي و صديقاتهم
و ما صدقت اجي و احط راسي .... لبست قميص بيت
و طلعت بافطر عند امي ,, وصلت بيت اهلي و انا افكر بالحلم ....
خلوني اقول لكم عن نفسي شوي ... تخرجت من الثانوي
و تزوجت على طول بعبد العزيز اللي من الاساس انا ما حبيته
ايه ما حبيته هو شكله ما فيه شي شين و اخلاقه كويسه
لكن موده حتى ما اشعر فيها تجاهه ... و احس انه هو و زوجة خالي حرموني من السعاده
و لولا اصرار امي اني اخذه و الا ما خذته ... عبد العزيز يمثل عند
امي الجاه و العز .. و اهله من الناس الهاي و احنا في نظرهم عاديين
و هالنظره بحد ذاتها تقهرني و دايم احس انه اذا جاب لي هديه او شي من برا
احس و كانه يقول ما يقدرون اهلك يجيبون لك اللي اجيبه ,,, طبعا
ما احد صرح لي بها اللي احس فيه بس انا تفكيري كذا !!!
و فيه سر صغير بعد يمكن ما يعجبكم بس واقع و مو انا لحالي افكر فيه
كنت اقارن عبد العزيز بعبد الله صحيح عبد الله اقل مستوى لكن غيرررر عن عبد العزيز
عبد الله ولد خالي تربينا مع بعض درسنا مع بعض انا ادبي و هو علمي
و جينا بثالث ثانوي و طلبني للخطبه لكن امه رفضت الله ياخذها فرقت بيني و بينه
و تقدم عبد العزيز و اقنعتني امي و وافقت عليه ... بس قلبي ما فيه الاعبد الله
للمعلوميه عبد الله الى الان مو متزوج ... تتوقعون ليش !!! و لا يروح فكركم بعيد
انا ما احاول اتصل فيه او اقابله حتى عند خالي اذا شفته سلمت وبس
و في كل مره عبد العزيز يتقرب لي انا ابعد عنه و اللي انا مستغربه عليه
انه ما يحس بنفوري منه و من اهله ... انا من النوع اللي ما اتكلم كثير
بس برضه اللبيب بالاشارة يفهم ... انجبت اطفال منه و مع ذلك
كنت اتمنى اني ما وافقت عليه ... للامانه هو ما يرفض لي طلب
و لا عمره قصر معانا بشي ... و مع ذلك ما قدرت اسلم له مفاتبح قلبي
نرجع لحلمي اليوم انا حاسه بصير شي ...
و شي كايد مو بسهل و الله يستر من عواقب هالحلم ...
نزلت لبيت اهلي ودخلت الصاله فبها امي و خواتي منى و منال
و جلسنا نسولف عن حفلة البارح و انا قلبي يجيب و يودي ...
اذن الظهر و صلينا و جلسنا نسولف .... و اشوف الساعه الا 1و نصف
كلمت بيتنا وقلت لمها تجي هنا هي و اخوانها عند اهلي
ما فيني حيل اروح اخذهم و ارجع مرة ثانيه .....



:::::::::::::::::::::::::::::::::::::::::::::::::: :::::






( عبد العزيز )



صحيت و هو يقيم الصلاة بسرعه لبست ثوبي
و نزلت ازرر الثوب و غترتي على كتفي و عقالي بيدي
شفت وحده من الشغالات و سالتها عن العيال قالت : راحوا بيت ماما سلمى
هزيت راسي أففففف ....... اللهم طولك يا رووووح
يعني انا جالس طرطور بالبيت !!!
لا تشاورني و لا حتى تحط عندي خبر !!
تقولون حاول معها !!! انا اعترف اني حبيتها اول ما تزوجنا
و يمكن ما اهتميت بعيوبها لحد ما سمعت اختي حصه تمدح نوره
هنا انا انتبهت فيه أشياء ناقصتني كرجل و زوج ..
كنت اتمنى منيرة تسالني وينك تاخرت علينا يعني اشوف قلقها علي
احس اني أمثل لها شي بحياتها .. العكس هو الصحيح
انا صرت ما اشوفها .... 16 سنه زواج و كانه دوام رسمي
و الله الدوام افضل على الاقل يعطونك راتب هههههههه
هنا انا اللي اعطيها و اجيب لها من اغلى الهدايا اذا سافرت
الشنط ماركات اتوقع تفكرها كلها مثل اللي بالبطحاء هي اصلا ما تعرف
وش احسن الماركات او الموضه حتى ...
مرة جبت لها شنطة برادا سوداء و كبيره تدرون وش قالت !!!!
قالت : وش ذي ميب زينه لو جبت لي من اسواق طيبه بتلقى ازين !!!!!!!!!!!!
قلت : مو معجبتك اختي حصة اكيد بتعجبها .... قالت : لا ما اعجبتني
عطها حصة .. اشوف ما عندها شناط زينه !!!!!!!!!
قلت : حصة ما عندها !!! انتي و الله ما عندك ما عند جدتي
خلك ربع حصة و لا عليك خلاف .....
هذا غيض من فيض الظاهر لا انا و لا اهلي معجبينها
اقول لكم نظراتها لي بعض الاحيان
تضايقني و اذا قلت لها وش فيك قالت معي غثيان !!!
طبعا ما ارد عليها و اصلا يجيني الغثيان اذا قالت لي هالكلام
انا فضفضت لكم حتى تعذروني و ما تقولون ليتك حاولت معها
ما يفهمني الا عاشق قصص و بس هو اللي شايف و عارف
المهم وصلت المسجد و شفت ابوي و اخواني صالح و فهد
و صلينا و بعد الصلاة صرنا نمشي راجعين للبيت
قلت لصالح : ترا دعيت لك يا صالح ...
قال صالح : الله يتقبل ههههههه و بايش دعيت
قلت : الله يرزقك بزوجة طيبه تضفك هههههههه
طالعني الوالد و هو يبتسم ابتسامة الغضبان : كان ربي بيرزقه
بس مافي نصيب !!! .. قلت : يا يبه البنات كثار و صالح كل يتمناه
صالح : ما تلاحظون انكم مجمديني و انا المدعي له
فهد : صالح ياخوي موقفك افضل من موقفي انا مثل الاطرش
ما اقول الا امين ... و متى بيجي دوري يا عبد العزيز في الدعوه !!
قلت : مافي عندنا الصغير يعرس قبل الكبير عييييب
اصبر لين يعرس ابو هياء و بيجيك الدور ان شاء الله
صالح : الا على طاري هيون مشتاق لها
بقول امي تكلم امها ترسلها لبيتنا ...
الوالد : صالح عساك ترسل مصروف البنت كل شهر !!!
صالح : وش دعوى طال عمرك هذي بنتي مو بنت احد ثاني !!!
دخلنا البيت و جا عثمان : عمي فهد فيه واحد يستناك في الديوان
فهد :عن اذنكم هذا واحد من الشباب بيشوف المبارة عندي..
صالح : بجي معك المبارة بين أي سي ميلان و انتر ميلان !!!
فهد : ايه بتنقلها الجزيرة الرياضيه .. تجي عندنا ...
راح صالح و فهد للديوان و كملنا انا و ابوي
و رحنا للبيت و دخلنا الصالة و اشوف امي
و حصة واقفه تسلم عليها عبايتها ..: سلامون عليكم
امي و حصه : و عليكم السلام ..
حصة : هلا يبه و راحت حبت راسه و جت لمي
و سلمت عليها ... هلا بالفتانه
حصة: ههههههههههه وش دعوى عزيز خلاص تفاهمنا
الوالد : عبد العزيز يا ولدي انت رجال و تقدر تفتح اربع
بيوت و مع ذلك يا ولدي فكر قبل لا تتخذ القرار
قلت : القابله بقرر ان شاء الله ....بعد الشوفه
الوالده : انا يا عبد العزيز خايفتن عليك ترا منيره مهيب سهله
اخاف تسوي لك شي و الا تنتقم منك ...
: خلها تسوي اللي تسويه انا بفهمها و هي حره تختار اللي يناسبها
حصة : منيره ما يدري الواحد وش جواتها و السكوت منه تموت
الوالده : بسم الله على وليدي فالك ما قبلناه
الوالد : الله يدبرك على اللي فيه خير لك و للي بتاخذها
حصة : يمه فيه وحده ذكرت لي بنت لصالح اخوي
بس بقول لك اذا طلع ابوي و عزيز
الجميع : ههههههههههههههههههههههههههههههههه
الوالد : تخافين علي يا حصة اعرس على امك !!!
حصه : هذا الاسد من ذاك الشبل ههههههههههه
الجميع : ههههههههههههههههههههههههههههههههه
وقفت و قلت يالله استاذن بروح عندي شغل
الوالده : موفق يا بوي ... الله يسعدك يا رب و يحفظك
الوالد : اذا جازت لك البنت وين بتسكنها !!!
قلت : اكيد بدور مؤقت و الا فله صغيره
الوالد : ورا ما تجيبها عندنا معنا في البيت اقرب لك و اونس لها
قلت : بسأل البنت و بشوف وش رايها
يالله تامرون على شي ..... الجميع : سلامتك
و رحت للبيت ... بكرا الموعد ان شاء الله
دعواتكم لي بالتوفيق ... كني اعرس اول مرة
اذا انا مرتبك و قلبي يرجف من الحماس
اجل وشلون البنت وش تلقونها الحين !!!!!!




::::::::::::::::::::::::::::::::::::::::::::







( نوره )





اليوم الجمعه .... جاك الموت يا تارك الصلاة
الله يكتب لي اللي فيه الخير .. الليله بعد صلاة المغرب
بشوف الاستاذ عبد العزيز .. طيب و اذا ما عجبني !!!
و الله ما اخذه ... يكفي اللي سواه معي سلمان عشان اخذ
اللي ما يتسمى ... هل المرة اذا ما ارتحت له
لو ايش ما يكون .. ما راح اتزوج حتى لو أعنس
رحت لغرفتي قبل صلاة المغرب بشوي و خذت لي شور
و نشفت شعري و استشورته و لفيت اطرافه تحت
لانه طويل يوصل الى خصري.. و حطيت مكياج خفيف
قلوس و كحل و ضربتين بلشر ...
و لبست طقم حلو من تنوره فستان وردي و عليه
جيليه ابيض و صندل ابيض واطي ...
اذن المغرب و صليت و جلست ادعي ربي
و انا قلبي بيوقف من التوتر .. هذي التجربه الثانيه
و الله يستر من نهايتها ...
دق الباب في غرفتي ... رحت و فتحت الا الجوهره بنت سلمان
: عمتي يقول لك بابا يالله تعالي تحت جوو الضيوف
بلعت ريقي و قلت لها : يالله حبيبتي انا نازله معاكي
نزلت تحت بالصاله و ما شفت امي ... اكيد بغرفتها
و طلع لي سلمان و شافني و ابتسم : وش هالزين
بتطيرين عقل الرجال ... دنقت راسي و انا مستحيه
: تبي اجيب القهوة و الشاهي ... سلمان : الا تعالي
و ادخلي بها على المعرس .. استحييييت مرررررررره
: اخاف تطيح من يدي و الا اكب القهوة على ثيابه
سلمان : تعالي بس و جيبي القهوة .. انا بسبقك جوا
غمضت عيوني و بقوة ..... و قلت : اشهد ان لا اله الا الله
اخاف يوقف قلبي و اموت الا انا متشهده ..
و رحت للمجلس ... و دخلت و انا مطمنه راسي بالارض ...



:::::::::::::::::::::::::::::::::::::::::::::



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 20-12-2008, 05:53 PM
صورة خيال عابر الرمزية
خيال عابر خيال عابر غير متصل
©؛°¨غرامي مشارك¨°؛©
 
الافتراضي رد: قلوب دافئة بقلم سعود2001


( أم عبد العزيز )

اليوم الجمعه .. جونا عيال عبد العزيز ولدي
يسلمون علينا مثل عادتهم ... الله ينبتهم و يصلحهم
و يخلي لهم والديهم ... و العصر جت منيره
و سلمت علينا انا و ابو عبد العزيز ,,قالت : الا ما اشوف
عبد العزيز قلت موب عندنا و بلقاه عندكم
رديت : لا و الله من غير شر على وليدي جاب العيال بعد صلاة الجمعه
و طلع يصلي العصر و ما رجع من غير شر
و جلسنا نحكي في سوالف عاديه و قام ابو عبد العزيز
قال : جاني رجال خليهم يجيبون القهوة للديوان
دقيت على الشغالات و قلت لهم صلحوا القهوة و حطوا معها تمر و حلى
و ارسلوه للديوان بيجي ابو عبد العزيزضيوف ..
و جلست انا و منيره لحالنا ... تحسبونها تسولف و الا تحكي من اسبوع ما شفتها
بس ساكته ان ما سالتها و الا ماهي متكلمه يا شين هالطبيعه
ترا باوصيكم يا بنيات ترا البنت احلى ما فيها سناعتها
و حركتها و سوالفها .... البنت الحركه تراها توسع صدر اللي حوالينها
و لا الجامده اللي يمل الواحد اذا جلس معها و انتم شوفوها بانفسكم
اذا جلستوا مع بنات يتنهمشون تستانسون و الا اذا جلستوا مع بنات ساكتات يجيبون الهم
المهم لا تشرهون علي ترا عذرت ابوي و قلبي عبد العزيز على عرسه
الله يجعل هاللي بياخذها توسع صدره بالعافية و يوفقهم ....











( عبد العزيز )



رحت لمشوار عصر الجمعه . و رجعت البيت ما لقيت احد
شكلهم الى الان في لبيت الوالد .. طلعت فوق و تروشت
و قلت للشغالات يسوون لي بخور .,, و تبخرت بعود
على فكره انا من الناس الي احب اهتم بمظهري و ريحتي
كل العطور الرجالية الجديده بتلقونها عندي و دهن الورد و العود الاصلي
تجذبني هذي الروايح ... لبست و رحت اصلي المغرب في المسجد
و دقيت سلف على بيت العروسه استقبلني سلمان و تحفى مني
و جلسنا نسولف شوي و قام استئذن بيطلع .....
جلست و قعدت ادقق ببيتهم و الله اثاثهم حلو و مرتب و انيق
و طالعت ثريتهم شكلها من الموديل الجديد ...دقايق و رجع سلمان
و دخلت نوره بعده !!!!!!!!!!!!!!!!!!!!!!!!!!!
و قمت وقفت وش أشوف ياناس اشوف حوريه مو انسانه !!!!
وش هالجمال من جد يا ناس الصراحه انبهرت
حسيت بقلبي يرجف و بصراحه كني ما شفت مزين ابد ههههههههههه
و دخلت و قالت : السلام عليكم و بصوت واطي و عيونها بالارض
و حطت صينية القهوه و قال لها سلمان أجلسي هنا ...
و أشر لها قبال الكرسي اللي انا جالس عليه ..
قلت : كيفك يا نوره و كيف الدراسه ..
رفعت راسها و طالعتني و شعرها يتحرك مع حركتها : الحمد لله تمام
سمعت صوتها حتى صوتها مو طبيعي ... كله عذوبه و رقه
قعدت أفكر باي كلام اقوله لها حتى ما تسكت اندفعت و
قلت لها : تبين تكملين دراستك ان شاء الله بعد الزواج !!
طالعتني و قالت بعيون كلها حيا : اكيد طبعا
قلت لها : اللي تامرين عليها يا بنت عبد المحسن
دنقت راسها ....... يا حبي لها ... و قامت و قالت : عن أذنكم
طالعتها لحد ما طلعت من الباب .... و شرقت و سلمان يقول :
عسى جازت لك يا بو محمد .!!! قلت : ورا ما تجوز
و هي بنت عبد المحسن و اخوها سلمان ....
قال سلمان : الحمد لله بقا البنت بسالها و برد لك ان شاء الله
و هو يتكلم و العشاء يذن فوقفت و قلت : بكلمك بكره ان شاء الله
و اخذ الرد منك تعرف لازم اخبر ام محمد و احطها امام الامر الواقع
سلمان : انا من رايي انك تخبرها اذا املكت و بقى على العرس كم يوم
رديت : يكون خير ان شاء الله ..أستاذن الحين جا وقت الصلاة
سلمان :اصبر اجل بروح انا و اياك للمسجد اللي عندنا ,, قلت : يالله
طلعنا و صلينا و ركبت سيارتي و مشيت متجه للبيت ,,, و انا بالطريق
افكر بالنور يالله كيف تركها زوجها الاول !!! شلون قدر يفرط فيها !!!
تتوقعون انها من النوع اللي من برا هالله الله و من جوا يعلم الله
على قولة اخوانا المصريين !!!!
لكن واضح ان البنت رقيقه و ناعمه و ما اتوقع تطلع منها حركات
بصراحه البنت ملكت قلبي و جعلها تسوي نون و ما يعلمون انا قابل فيها
تذكرت منيره ... وشلون بفاتحها بالموضوع ...
أخذها على مطعم !!!!!! اصلن هي ما تبي تروح معي
و ان طلعنا برا ما أضمن ردة فعلها ...شكلي الليله
بحط النقط على الحروف ... أنا مو خايف منها و هي ما هي ميتة علي
كم مره سافرت برا و طولت بالغيبه ما تدق علي مشتاقه
انا اللي ادق عليها و اسمعها كلام حلو و هي ما فيه ردة فعل
المهم اني بفاتحها الليله ان شاء الله ....






( منيره )



مدري ما تعودت اجي العصر عند بيت اهل عبد العزيز
و لا القاه العاده مرتز يسولف مع امه او حصة اذا كانت موجوده
و هالمره ما شفته لا تحسبوني ولهانه بس غريبه منه
و بصراحه اكثر جا على بالي حلمي فيه ...
المهم صليت المغرب و رجعت لبيتي من الطفش ما فيه احد يسولف
خالتي ساكته و الا معها تلفون .. و انا من النوع اللي ما تكلم الا اذا احد سالني
مو تكبر و لا غروور بس ماله داعي اوزع علومي و اخباري بالمجااان
كلمت أمي و قعدنا نسولف الا بدخلة عبد العزيز طالعني و قال اذا خلصتي
مكالمتك اطلعي لي فوق ابيك بموضوع ....
قلت لامي بكلمك بعدين ابشوف وش يبي عزيز
طلعت وراه .. قلت : خير أن شاء الله
قال : اجلسي منيره فيه موضوع بكلمك فيه
جلست و انا مبعده عنه ,,, و قال : انا وش معتبرتني عندك !!!!
قلت : ابو العيال وش اعتبرك بعد !!! .. قال : بس !!!!!
قلت و انا عارفه انه يبيني اقوله كلام يرضي غروره
: أكيد ابو عيالي وش تبي بعد أكثر من كذا ...
قال : طيب أجل أبو عيالك بيحط عندك خبر قبل لا تدرين من الناس
أنه بيتزوج عليك و لك مطلق الحريه في اختيار مصيرك و على فكره
اللي بتقررينه هو اللي بيصير ... تبين تجلسين في بيتك و على عزك
او تبين تروحين لاهلك و تخلين العيال عندي لاني ما اظنك بتفقدينهم
و عندهم شغالاتهم هم اللي ينتبهون لهم ,,,,
بققت عيوني و كان احد صادمني بالسياره !!!!!!!!!!!!
شلوووون هالحقير يتزوج علي انااااااااااااااا اناااااااااااااااااااا
من زينك و زين اهلك ... اهلك !!!!! اكيد امك او اختك اللي مقنعينك
تماسكت و قلت له و انا اطالعه ببرود : و أهلك يدرون انك بتتزوج ...
قال : لا ما يدرون انتي اللي لازم اخبرك قبلهم لان المسأله تمسك شخصيا
ضحكت بصوت عالي ( خفت من نفسي ) : تمسني شخصيا !!!!!!!
ههههههااااااااااااي ضحكتني عزيز أنت كلك على بعضك ما تهز فيني شعره
تزوج يا حياة امك تزوج أنا ما راح تفرق معي ....
طالعني وهو عاقد حواجبه : الظاهر اني تأخرت في الزواج عليك !!!
كنت فاهم ان تملكين ذرة معزة لي على الاقل بتصيحين او تدمع عيونك
لكن للاسف توني اعرف قدري عندك ... تبين طلاقك قرري الحين
قلت : ايه طبعا ابي طلاقي الان ... انت عارف انك سبقتني
كنت ابطلب الطلاق منك بس ما جت الفرصه ...
و الحين اطلع من الغرفه بضف اغراضي و اطلع من هالسجن
و عيالك خلهم عندك ان راحوا و جوا مردهم لامهم ..
طلع من عندي و انا اللي انهااار و جلست ابكي
رحت للحمام و فتحت الحنفيات ما ابيه يسمع صياحي
الحقييييير طلعت بوجهك الحقيقي يا حيوااان ...
أنا ليش أصيح و ابكي قلعته من حبي له ..
بس لازم اسوي شي و اقهره مثل ما تجرا و قهرني
يحمد ربه ليل و نهار اني متحملته و جايبه عيال له
هيييييييييين يا عزيّز بتشوف وش لون انتقم ,,,







( نوره )


طلعت من المجلس و انا قلبي يضرب بقوة
و يديني معرقه من الارتباك .... الصراحه اعجبني عبد العزيز
و احلى شي ابتسامته اللي تدوخ و اللي اعجبني اكثر
وقفته لي لما دخلت ... حسيت انه جنتلمان و عنده ذوووق
شكلي اعجبته لانه سالني عن الدراسه و كلامه عن ابوي
مدري حسيت بفرق عن شوفة زوجي الاول الله لا يذكره بالخير
طلعت و اطالع الا امي بوجهي ... : ها يا نوره وش رايك فيه !!!
قلت : تذكرين كلامك يمه بنشب فيكم ههههههههه
امي : ههههههههههه اللي يجعل هالضحكه دووووم و يوفقك يا بنيتي
قلت : الصراحه ارتحت له مهتم بنفسه و عنده ذوق و كلامه ذرب
يعني بصراحه رجّال يملى العين .... امي : اجل اقول لسلمان انك موافقه
طالعت امي و قلت : اللي تشوفونه يمه بس ترا شرطي الدراسه و الوظيفه
ان حصلت ...قالت امي : الله يكتب اللي فيه الخير و الوظيفه ان حصلت
و الا بلاها عبد العزيز مقتدر و بيجيب لك اللي تبين ...
قلت : يمه موعشانه غني بقعد اتطلب منه !! ان جاب من نفسه
و الا ماراح اطلب منه شي ... و الوظيفه يا يمه فيها استقلال لي
انا اصرف فلوسي على نفسي .... مو استنى احد يعطيني حتى لو كان زوجي
امي : مدري عنك هذا رايي و بقول لاخوتس سلمان يتفاهم معه .....
قلت : يمه وين فوزيه و عيالها ما اشوفهم !!!!
امي : طلعت بهم فووق تقول بروش العيال و ننومهم المدارس بكرا !!!
قلت : ما شاء الله صارت تعرف في الاصول و الواجبات !!!
الله يبارك في خطبة عبد العزيز اللي طلعت لها قلللب و خافت على سلمان
امي : الله المستعان يا بنيتي ما يتحسف الا فاعل السوء
طلعت لغرفتي و بدلت ثيابي و لبست بيجامة و انسدحت على سريري
و جلست افكر بعزوزي هههههههههه ادري بتضحكون و تقولون بدري
بس من جد حبيته و اتوقع هو بعد حبني ايه حببببببببببببب .... لا تستغربوون
هذا اللي يقصده عاشق قصص و هو مسمي قصتنا قلوب دافئه
من جد حسيت بحراره تشع مني كلما تذكرت نظرته لي و ابتسامته
كيف هالمنيره فرطت فيه كييييييف !!!!!! اخاف يكون اقشر
و المظهر غير المخبر الله يستر عاد ضربتين في الراس توجع
الله يوفقني انا و اياه و يبعد عنا المشاكل ... دعواتكم بنات
طلعت لي مذكره من المواد اللي ادرسها و ما اشوف شي الا وجه عبد العزيز
قعدت اقلب يمكن يجي نص ساعه لحد ما طق الباب سلمان
و دخل علي و قال لي : ها وش رايك في عبد العزيز !!!!
قلت : رايك هو رايي اللي تشوفه سوه بس شرطين اكمل دراستي و الوظيفة
رد علي: الوظيفه تفاهمي انتي و اياه عليها اذا ملكتوا ان شاء الله
يالله تصبحين على خيرررر...... و طلع و قعدت اطالع المكان اللي طلع منه
وش فيه هذ منهبل كأنه خايف ما يتقدم لي ... احسن انام و ما في الكون بيكون






( عبد العزيز )



شفتوا تصرفها ..!! شفتوا شلووون انا غالي عندها الوقحه !!!!!
و الله اني كنت حاس اني ما امثل لها شي ... الحقيره هذا رد ترده علي
و لاني ما انزل مستواي لها فما رديت عليها ...
طلعت من عندها و سحبت غترتي و عقالي لبيت الوالد
شفت اخواني جالسين بالديوان يا زين حياة العزابية
ههههههههههه عقب16 سنه مخدوع في انسانه ما تحمل
مثقال ذرة محبه لي و انا اللي اقول حتتغير بمكن تستحي تعبر
عن مشاعرها و ادور لها اعذار تمشيها معي
انا ما اهز شعره فيها !!!!!!!!!!!!!!!!!
تمنيت اني انسان بدائي و اسطرها كف على وجهها الحقيره
فعلا فيه ناس كرّمهم و ناس كرّم نفسك عنهم
توجهت للصاله اللي تجلس امي فيها و شفتها و عندها حصة
يا حبي لها الثنتين من جد احس اني ارتاح اذا شفتهم
على طول بمجرد ما شفتهم قالت الوالده : خبرت منيره عن عرسك !!!
قلت : أيه و بطلقها .. حصه شهقت : عزيز لا تتهور
قلت : هي اللي اختارت و انا ما اجبرها تعيش معي
لو ايش ما يكون ما تقعد عندي .... الوالده : و عيالك !!!
: عيالي في بيتهم و عزهم و خدمهم و حشمهم و كلهم كبار و يدرسون
حصة : لا تتهور يا خوي ترا الانسان و هو منفعل يتخذ قرارات
يندم عليها بعدين ... هزيت راسي : اندم عليها !!! انا ندمان كيف عشت معها
و كيف كانت عيوني معمية عنها و عن تقصيرها معي
هذي المفروض ما تعرس و لا هي بكفو حتى تجيب عيال !!!
حصة : هدي اعصابك عزيز ... لا تتضايق و قلنا عن العروسه
اعجبتك و الا لا تراني شايفتها من قبل ... رديت و انا اضحك
حتى طاريها يوسع صدري : أي و الله اعجبتني الله يعوض صالح اخوي باحسن منها
البنت حلوة و مزيونه و تستحي و تواجه بنفس الوقت
و هذا اللي اعجبني في شخصيتها ... حصة : يعني وافقت عليك
: بكرا ان شاء الله باتصل على اخوها و اخذ الرد
مع اني متاكد لانها ترد على كلامي و كانه خلاص بنتزوج ...
الوالده : الله يوفقك يا و ليدي و يكتب لك الصالح ....
شوي و اسمع رزعة الباب بقوة الا و هاللي مقبلة علينا ,,,



الرد باقتباس
إضافة رد
الإشارات المرجعية

قلوب دافئة / بقلم سعود2001 ، كاملة

الوسوم
سعود2001 , قلوب دافئة بقلم سعود 2001 روعه لا تفوتكم
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
صحيحي البخاري ومسلم كاملة لجوالك jerrar برامج الجوال - ثيمات - نغمات 10 24-02-2011 04:05 PM
لعبة النمر الوردى .. كاملة و حصريا mrtawfik العاب - مسابقات 6 04-02-2011 10:46 AM
قلوب دافئة / مميزة كاملة أســـ بحر الأماني ـــيرة ارشيف غرام 4 25-01-2009 12:39 AM
قصيدة الأطلال كاملة كما كتبها صاجبها إبراهيم ناجي بن لحكوم ارشيف غرام 3 19-11-2008 11:27 AM

الساعة الآن +3: 05:45 AM.
Powered by vBulletin® Version 3.8.7
Copyright ©2000 - 2014, vBulletin Solutions, Inc.
SEO by vBSEO 3.6.1
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم