خوف من الحب.. قصة رائعه

[نـزفـ الـقـلم]

وراح عبدالعزيز عشان يجيب لها الايس كريم ... واول ما بعد على طول تقوم سارا وتدخل المحل .. بعد ما وصل عبدالعزيز لباسكن روبنز تذكر انه ما سال سارا ايش تبي .. ولان المحل مو بعيد مره رجع لها .. شاف الكرسى مافيه احد ..ولا لقى لسارا اثر.. انشغل ما اسرع تحركت وانا ايش وصيتها ..وهي تقول انها تعبانه ايش قومها ...
سارا الي دخلت المحل وقعدت تتفرج ولاهي داريه عن عزيز شي... شافت طقم حلو مره عباره عن بوك وقلم ... عجبها مره ..وقررت تشتريه .. وهي تحاسب لفت نظرها كبك مرره حلوه .. فشرته لاخوها محمد لانه تعرفه يحب الاثواب الي بكبك ... وتذكرت خوانها عبدالله وسلمان..هي ما شرت لهم الا عطور..قامت شرت لكل واحد منهم قلم بعد ... بعدين شافت هديه عبدالعزيز شوي قليله قامت شرت له طلبت من البياع يكنسل الطقم الاول ..واختارت له طقم افخم بواجد وفيه كبك زياده على القلم والبوك ... بعد ما حاسبت بالماستر كارد طلعت من المحل وهي تدعى ربها ان عزيز ما يكون رجع لانها تاخرت شوي.... حمدت ربها يوم ما شافته ...وجلست على الكرسى .. انتظرته وهو تاخر... غريبه باسكن روبنز ماكان بعيد ليه تاخر ... بعد حول ربع ساعه من الانتظار وكان قلبي يعورها حاسه ان في شي صاير .. وبدت تخاف من جد يكون صار شي لعزيز ..ما توقعت انه جا ولا شافها ....بعد هالربع ساعه جا عزيز ... اول ما شافته عرفت انه معصب ... بس ليه ليكون احد تحرش فيه ...

عبدالعزيز الي كان يدورها وما بقى مكان ما دورها فيه قرر انه يرجع يمكن تكون هي بعد رجعت .. الافكار كانت تجيه ..وتذكر الي صار لهم بلندن يوم تطلع سارا من غير شوره ..وهذا هي عادتها مره ثانيه.. بس يمكن ما عادتها يمكن احد خطفها ...من جد كان صدره ضايق .. اول ما شافها جالسه وبكل هدوء مع انه لمح الخوف في عيونها .. حس انه بينفجر .. كان وده يكفخها.. ياخذها ويهزها لين تتصاقع اسنانها ببعض... تملك اعصابه

عبدالعزيز: وينك؟؟؟؟؟
سارا: انت الي وينك خفت عليك واجد...
كان صوت سارا من جد فيه لمست خوف .. خافت انه يكون فيه شي بس مو واضح انه تضارب او شب.. ليكون كان يدور علي.. كانت خايفه من ردت فعله .. يمكن يزعل ويسوى لى مثل لندن .. ياربي ايش اسوى
عبدالعزيز يحاول يتماسك ويكلمها بهدوء: رحت ادورك...
تحققت شكوك سارا ..ياويلي منه اكيد مععصب..اصلا واضح عليه ..
سارا: ايه انا دخلت هالمحل ..
واشرت على ديبون ..
سارا: رحت اشترى لخوانى شي,,
عبدالعزيز: طيب ليه ماقلتى لى
سارا: ماشفته الا بعد ما رحت
عبدالعزيز: اصلاانا رجعت على طول... سارا ..
وسكت
سارا كانت ميته خوف..
سارا: اسفه بس كنت افكر انى برجع قبل لا تجي
عبدالعزيز سحب نفس طويل عشان يهدى: حصل خير بس لا تعيدينها ..تراك خوفتينى ..وفرنسا بلد مو امان ..
سارا: انشالله
عبدالعزيز: يالله نمشى...

وتوهم ماشين ..والا تشهق سارا ...
عبدالعزيز: اايش فيك ...
سارا: ما شريت هديه لابوي كلهم شريت لهم الا هو ...
عبدالعزيز: خلاص نشترى له بعدين حتى انا ما شريت لابوي ولا عمر
سارا: متى بعدين وحنا بنروح عن باريس بكره..
عبدالعززيز: انا تعبان الحين نص ساعه وانا ادور ادوك اذا رحنا للمطار نشترى لهم من هناك ..
سارا حست بالذنب ..من جد تعبته ..مسكين ولا هاوشها ولا شي.. هو اصلا تغير ... وانا احبه..ايه من جد الحين اقدر اصرخ للعالم كله و اقول لهم انى احبه ... بس هو يحبينى او لا.. اكيد يحبي والا ماكان عاملنى كذا .. صح انه عمره ماقال لى هالكلمه او أي كلمه تدل على الحب .. الا طبعا اليوم يوم قال عيونى .. بس هذي مو شرط يقولها الحبيب لحبيبته... لالا اكيد يحبنى ويقصدها لانى انا بعد احبه ...وابتسمت ..
عبدالعزيز: ليه تبتسمين..؟؟؟
سارا: هاه ولا شي
عبدالعزيز رفع حواجبه ولا رد .. كان لين الحين متضايق شوي ..بس خلاص مو لازم يبين لها كل الي يحسه .. من جد قاعده تفور دمه هالبنت احيانا .. بس يالله صغيره ما الومها ... مين يصدق ان عبدالعزيز كذا يتعامل ..شلون مافار في وجهها ..من جد هالبنت بتغيرنى .. وانا مابي اتغير مابي
...................................

زعل سلمان من لمى بطول او لا؟؟
وهل بتنفع مساعده محمد..؟؟
والاهم سارا وعبدالعزيز هل صحيح سارا بدت تتملك قلب عبدالعزيز مثل ما هو خلاص تملك قلبها؟؟

___

[نور القمر]

مشكووووووره اختي

ويالله بسرعه كمليها لاني متشوقه لها


تحياتي...
نور القمر

[نـزفـ الـقـلم]

نور القمر

تسلمين يالغلا

متابعتك تسعدني كثير

[نـزفـ الـقـلم]

الفصل الخامس

الجزء الثانى

قررت فوزيه تكلم اليوم عمر عن البنت الي قالت عنها نورا ... بعد ما رجع عمر من الشركه .. نادته امه وقالت له يلحقها غرفتها ..عمر الي استغرب من امه ..ايش تبي منه لدرجه انها ما تبي تكلمه عند احد ...
عمر: خير يا يمه ..ابوي فيه شي
ام عمر: لا سلامته ... ابوك مافيه الا العافيه ... بس بغيتك في موضوع يخصك انت..
عمر: سمي ..امرى يالغاليه
ام عمر: يا ولدي انا حالك مو عاجبنى ابد ..
عمر: ليه وايش فيه حالى ..
عمر: ما تشوف طول يومك بالشركه ..ترجع على نهايه العصر تجلس معنا شوي بعدين تطلع .. والله كانك عازب ...
عمر: يمه الله يهادك وانا ايش الحين .. مو عازب
ام عمر: وهذا غلط مين .؟؟
عمر: اتوقع انى ما شكيت من حياتى ... ليكون يايمه بتفتحين لى سالفتك المعهوده..انتى تعرفين رايي فالموضوع؟؟
ام عمر: لا الحين غير الحين اخوك تزوج ..والمفروض تلحقه..
عمر: بس انا خلاص تزوجت قبله وعندي بنت والا مو ماليه عينك..
ام عمر: بس انا ابي يكون عندك ولد يشيل اسمك...
عمر: ليه مي مين ابوها مو انا ...مو هي شايله اسمى
ام عمر: مي بنت
عمر: والا بنت .... يمه ما اتوقع ان عقلك من عقول اهل الجاهليه .. بنت او ولد ما يفرق
ام عمر: الا يفرق .. الولد يشيل اسمك وعياله وعيال عياله كلهم يشيلون اسمك .. بس البنت غير..
عمر: والله كلام غريب هذا وانتى يايمه المراءه الفاهمه الدارسه تقولين كذا
ام عمر: وليه ما اقول... عمر فرحت بعبدالعزيز خلنى افرح فيك
عمر: اذكر انك فرحتى لي مره ..مو كافيه
ام عمر: لا مو كافيه .. عشانى .. عشان ترضينى تزوج ..نورا اختك تعرف وحده تقول تهبل .. بنت ناس اجاويد والنعم فيهم..
عمر: يمه تكفين ... مابي اسمع بهالسالفه مره ثانيه...ونورا هذي اعرف شلون اسكتها مشتغله لنا خطابه..
ام عمر: اختك ما تبي الا مصلحتك عيب تقول عنها كذا...
عمر:مصلحتى انا ادري فيها .. وهالموضوع منتهين منه ... واذا عن الاسم مثل ما تقولين عندكم عزيز هذا هو تزوج وانشالله يجونه عيال يشيلون اسمه واسم العيله
ام عمر: مو بس مساله اسم ... انت تحتاج يا عمر.. لازم عندك احد يهتم فيك..
عمر: اتوقع انى اعرف اهتم بنفسى ...
ام عمر: طيب بنتك ..مي.. ماتبي احد يهتم فيها .. مي كبرت يا عمر ..وتحتاج احد يداريها ويشوف مصالحها..
عمر: اشوفها مثقله عليكم..
ام عمر: لا ياعمر ازعل منك كذا ... مي بعيونى مثل منت بعيونى .. بس انت ادري انا كبرت ومو قادره على التربيه مثل اول ..التربيه يبي لها شده ...وانا قلبي مع الايام يحن لعيالكم ولا اقدر اشد عليهم .. وخواتك بيتزوجون وكل وحده بتروح لبيت رجلها...
عمر: انا موجود ...
ام عمر: انت رجال .. وهي تحتاج لمراءه تاثر عليها مو رجل...
عمر: مستحيل اجيب وحده تحل محل فاطمه ... وتصير مرت ابو على بنتى ..وانا ايش عرفنى انها بتحن عليها...؟؟؟
ام عمر: هالسوالف يا ولدي ما تشوفها الا بالمسلسلات والافلام ... والبنت الي اكلمك عليها والنعم فيها ...
عمر: يمه... لو تسمحين عشانى لا عاد تكلمينى بهالموضع ...
ام عمر: بس ما يصير...
عمر: شوفي يمه متى ما حسيت انى ابي اتزوج صدقينى بقول لك ...بس الحين مابي.. وكافي عزيز نفرح فيه ..ايه صح ما قلت لك ..تراه يوم الاثنين بيجون ...على الساعه 10الصبح...
ام عمر: عزيز ما قال لى ليه
عمر: ابوي توه قايل لي بالشغل .. يقول بالاول ماكان الحجز اكيد...
ام عمر: اجل لازم نسوي لهم عزيمه كبيره...
عمر: والله هذا شغلكم مو شغلى .. يالله عن اذنك يمه ...
ام عمر: ايه عرفت تغير الموضوع .. بس لا تنسى على وعدك؟؟
عمر باستغراب : أي وعد ..؟؟
ام عمر: مو تقول انك اول ما تبي تتزوج بتقول لي...
عمر: هههههههه... ابشري يالغاليه...
وطلع عمر ..امه مو راضيه تنسى هالموضوع وهالمحادثه يمكن انعادت10 مرات قبل ذي... وكل مره يرد عليها نفس الرد ... فرح يوم تزوج اخوه على اساس ان موضوعه خلاص ... بس هذا عزيز مارجع من شهر العسل والموضوع انعاد .....راح لغرفته عشان يريح بعد الشغل .. وراه طلعه ..واعد اليوم مي ياخذها لتويز ار اص......................


.....................................


يـــــتـــبـــع..

[نـزفـ الـقـلم]

نرجع لفرنسا .... عبدالعزيز حجز لهم في ديزنى هوتيل لمده يومين وليله ... كانت سارا مره مبسوطه ... طبعا اودعوا العفش في امانات الفندق على اساس انهم راجعين باريس عشان المطار... اول ما وصلوا ديزني على الظهر ... ريحوا بالغرفه شوي بعدين نزلوا يتمشون ... كان الجو مرره حلو ... والدنيا ربشه وزحمه ...
عبدالعزيز: ها سارا مبسوطه.؟؟؟
سارا: ايه مشكور عزيز مره ... الحين ايش نسوى؟؟
عبدالعزيز: تسالينى انا ... اليوم انتى الاميره انتى بس اشرى وانا اروح المكان الي تبينه ...
احمر وجهه سارا ... هذا هو مره ثانيه يغازلنى... لا يحبنى اكيد يحبنى...
سارا:مادري انا اول مره اجي... وينه الكتيب حقها...
عبدالعزيز: قبل لا نروح أي مكان انا جايع .. خل ندور على مطعم بالاول..

طلعوا من ديزنى لاند... وراحوا لديزي فيلج ...كان في مطعم كبيييييييير مره وفخم وجنبه سنيما ...راحوا لهذا المطعم وتغدوا... بعد ما خلصوا غدا .. رجعوا مره ثانيه للملاهي لان ديزي فليج مافيها الا مطاعم واسواق وسنيما... ركبوا السفينه الي تنمشى بالبحيره ... كان الوضع مضايق عبدالعزيز شوي بس عشان سارا يالله مشي الامور... بعد ما نزلوا ... وهم يمشون والايس كريم بايد سارا ... كان في طفل صغير يركض واخوه وراه ..وهو مسرع يصدم بسارا يطيح الايس كريم على ملابسها ...سارا شهقت ووقفت جامده مو عارفه ايش تسوي... الولد ارتبك وقام يتكلم كلام مو مفهوم ..وعيونه خلاص شوي ويصيح ... عبدالعزيز الي شاف الي صار جا عند الولد وحط ايده على راسه وابتسم
عبدالعزيز: it is ok
اخو الولد يوم شاف الموقف نادى ابوه ... جا الاب وهم يبتسم ابتسامه اعتذار اول ما شافه الولد الصغير طار له ..ولصق فيه ...
الاب: oooh…. I'm so sorry…. He was playing with his brother …
عبدالعزيز: no no its ok….. don't worry
الابو لف لولده وقال له شي بلغته ..واضح انه اوربي بس مو انجليزي ولا فرنسي.. كان قاعد يهزئه... الولد راح لسارا وبايده منديل اخذه من ابوه .. وقال لها شي مو مفهوم ..سارا اخذت المنديل وهو تبتسم ...
الاب: it is my false …I shouldn't lets my sun running here….
عبدالعزيز: every things are alright…he just a kid
الاب: thank you so much .. he will not doing this again
ولف على ولده وقاله شي وفيها كلمه sorry .... الولد لف لسارا وعزيز
الولد: sorry
سارا: its fine
ابتسم الاب واخذ ولده وراحوا...
سارا: مساكين انحرجوا مره..
عبدالعزيز: هههههههه..وانت شوفي ملابسك ..كيف الايس كريم سايح عليها ... الله يعينك هذا ايش يوخره
سارا: ايه تشمت مو انا الي منكبه..بس استاهل محد قال لي اكل ايس كريم..
عبدالعزيز: تونا مارين على حمام ..روحي له الفندق بعيد ..اذا ما قدرتى تغسلينه زين نروح للفندق..
سارا: لا ايش الحمام...ابي اغير ملابسى ... نرجع للفندق عادي....
عبدالعزيز: طيب يالله ...
ورجعوا للفندق ... دخلت سارا للحمام واخذت شور ... عبدالعزيز راح للتليفون ودق على الحجوزات عشان يتاكد اذا في حجز ابكر من الطياره الي حجزه...مايبي يوصل السعوديه بالصبح ..ويضيع عليهم النهار كلهم لانهم بيكونون تعبانين....لقى مقعدين بالطياره على الساعه 7 الليل...ويوصلون للدمام الساعه 12 الليل يعنى 2 بتوقيت السعوديه ..... احسن من عشر الصبح .... اكد عبدالعزيز الحجز وسكر التليفون... دق على اخوه عمر ...عشان يقول له الموعد حق الوصول ومره وحده يسولف معه لانه ما كلمه غير ذيك المره....
عمر: لا ما اصدق ....وينك ياخوي...لا تسال ولا شي
عبدالعزيز: ههههههههههه ... ايش ما اسال بس انشغلت
عمر: الله دنيا تنشغل عنى..لو ادري ان الزواج بياخذك منى ما وقفت مع ابوي واجلست اقنع فيك..
عبدالعزيز: افا يابو مي معقوله انشغل عنك ... بس انت تدرى بالوضع اكثر منى ..
عمر: ههههههههههههههههههههه والله وسوتها بنت الشيوخ..
عبدالعزيز: ايش سوت..؟؟؟!!!!
عمر: لا سلامتك ماسوت شي...سمعنا انكم واصلين بعد بكره انشالله؟؟
عبدالعزيز: هذا اول عشان كذا داق عليك ابي اقول لك غيرنا الحجز...
عمر: ايه قول من اول ..وانا على بالي مشتاق...ليكون ناوي تطول الجلسه بعد ..ترى الاهل يتحرونكم وما ظنتى بيعجب رهف ما تجي سارا حفلتها...
عبدالعزيز: لا بكرنا شوي..ولا تخاف رهيف سارا متحمسه للحفل اكثر منها ضيعنا شهر العسل على فستانها...
عمر: ههههههه...لاحق على عوار الراس العدل...طيب متى انشالله بتجون..
عبدالعزيز: شوف طيارتنا الساعه 7 العصر يعنى 2 بالليل بنكون انشالله عندكم...
عمر: يوه ليه ..مو حلو توصلون بنص الليل...
عبدالعزيز: لا احسن تدري نوصل تعبانين ونبي ننام لو وصلنا 10 الصبح ...الاهل يوبنا نجلس معهم واكيد سارا تبي تروح لاهلها ...وصراحه مااظن بيكون لنا خلق لكل هذا ..... نجي بالليل ونريح بعدين نسلم على الاهل....
عمر: خلاص ولا يهمك انا بكون بالمطار بكره على الوقت...
عبدالعزيز: ولا تقول لامي عشان ما تحاتينا... بعدين اذا وصلنا يعرفون..
عمر: بيكونون نايمين...
عبدالعزيز: احسن ..كذا باخذ راحتى بالنوم ...
عمر: الي تبيه ... بس انت بشر عن احوالك انت وزوجتك ...
عبدالعزيز: انا وسارا الحمد لله تمام ...
عمر: مبسوط؟؟
عبدالعزيز: متقبل الوضع...
عمر: شلون متقبل الوضع ... واضح انك تميل للبنت هذا اذا ماكان سهم الحب اصابك..؟؟؟
عبدالعزيز: لا يا شيخ أي حب أي خرابيط ... حنا ما عندنا هالسوالف... قول تقبلت حقيقه ان عندي زوجه لها حقوق لازم اعطيها لها...
عمر: يعنى ما تحس بشي تجاها غير الواجب...
عبدالعزيز: اكيد والا ايش يكون اكثر من الواجب ... ياخي انا مو راعي حب ولا عمري بحب..خصوصا سارا
عمر: الله يهديك ..وليه هالخصوص...
عبدالعزيز: انت ما تعرف سارا ... هي من الاشخاص الي اذا كنت بتحبهم بتفنى حياتك عشانهم ..وانا مابي احبها عشان حياتى ما تكون معلقه فيها...
عمر: والله انك مجنون وماعندك سالفه وسخيف..... بعد ايش هالكلام الفاضي...
عبدالعزيز: انت الي تقول هالكلام ..اشوفك رضخت لطلبات امي وتزوجت بعد المرحومه..
عمر: انا وضعي غير ..والمفروض ما تربط نفسك فينى ...
عبدالعزيز: ماعلينا يالله ما اطول ولا تنسى الموعد الي قلت لك عليه ؟؟
عمر: اكيد... عزيز؟
عبدالعزيز: هلا....
عمر: ما اوصيك ..هل هل بهالبنت ..لا تنسى هي بنت مين وتنسى غلاة ابوها بالنسبه لابوي
عبدالعزيز: اكيد ..ايش دعوه
عمر: يعنى الكلام الحلو زين حتى لو كنت ما تقصده ...تراها تحتاج له
عبدالعزيز: ايه تكلم يالخبير
عمر: ايه ماقلت لك اليوم بعد فاتحتنى الوالده على سيرتها المعهوده
عبدالعزيز: ههههههههههههههههههههههههههههههه
عمر: هيه..ايش عندك ..ليه تضحك؟
عبدالعزيز: مو انت تقول انها بتتركك اول ما اتزوج انا ... هذا وانا مابعد ارجع من شهر العسل وهي رجعت عالموضوع ..الله يعينك يا اخوي..
عمر: اقول انقلع بس... روح لزوجتك وغثها ..مالي خلق لك...
عبدالعزيز: هههههههههههه... خلاص ولا يهمك ماراح اغثك بس لا تنسى الموعد؟
عمر: اكيد... تامر بشي ثانى ؟
عبدالعزيز: لا سلامتك ..وسلم على الاهل ..بس لا تعلمهم
عمر: لا تحاتى ..يالله فمان الله
عبدالعزيز: فمانه الكريم...


يـــــتـــبـــع..