منتديات غرام

منتديات غرام (/)
-   أرشيف الروايات المغلقة - لعدم إكتمالها (http://forums.graaam.com/157/)
-   -   مر الزمان و جيت تحسبني ابغاك! ياكيف يطيقك قلب شخص قتلته (http://forums.graaam.com/216052.html)

داهيه بس طيبه 22-07-2009 12:34 AM

رد: مر الزمان و جيت تحسبني ابغاك! ياكيف يطيقك قلب شخص قتلته
 
تسلمين الغلا على مرورج ^^،

داهيه بس طيبه 23-07-2009 12:07 AM

رد: مر الزمان و جيت تحسبني ابغاك! ياكيف يطيقك قلب شخص قتلته
 
~_~ شكلي مابكمل القصه هنيه

وايد اللي يشوفون الموضوع بدون ردود !!!

بنت زماني 23-07-2009 02:46 AM

رد: مر الزمان و جيت تحسبني ابغاك! ياكيف يطيقك قلب شخص قتلته
 
بانتضارج لا تطولين علينا

داهيه بس طيبه 23-07-2009 11:09 PM

رد: مر الزمان و جيت تحسبني ابغاك! ياكيف يطيقك قلب شخص قتلته
 
عمر : يا ريال مالي خلق اجابله اكيد خايس ويلوع بالجبد
ذياب : يا حبيبي انا براويك شو بسوي .؟ استحمل ترا النتيجه بتكون شييي
عمر : ههههههههه اسميك انت داهيه ويا هالويه
ذياب : هههههههه فديت ويهي انا هذا اللي ييب رزق
عمر : انزين الحين كيف بتتعرف عليه
ذياب : تحيد سيفوه اللي كان ويانا في الثانويه ؟
عمر : هيييه هذاك الخريش ؟
ذياب : هيه هو ... هذا يستوي ولد عم مايد
عمر : شدراك انته ؟
ذياب : اللي يدور مايضيع
عمر : ماشاءالله علييييك
ذياب : لحظه بتصل الحين في منصور اكيد يالسين وياه وبنسير لهم هناك
عمر : انزين
ذياب : الوووو
منصور : هلا هلا بالداهيه .. وينك يا ريال ؟
ذياب : انا هنه ياي صوبكم . الا انتو في كوفي ,,, .؟
منصور : هناك تعرف مانغيره ههههه ..
ذياب : هااه منصووروه اللي تخبرتك عنه هنيه ؟
منصور : هيييه طال عمرك وياب الهديه بعد
ذياب : ههههههههههاي اسميك انت يا بو التشفيرات
منصور : ههههه يالله لاتتحير عاد اخاف تسير لغيرك
ذياب : يالله في الدرب بس عطني خمس دقايق
منصور : نترياك
وبند عنه ذياب
عمر : جيه منصور يدري بعد ؟
ذياب : اكيد يدري .. تعرف منصور بنستفيد منه و مصدر موثوق يعني مابيخبر حد
عمر : يالله ابا اشوفه هالمايد
ذياب :ههههه هيد لا تستعيل على رزقك .. ويسرع لين وصلو مكان الكوفي ونزلو
طبعا الشباب كلهم صدو عشان الازعاج اللي مسونه ذياب بسيارته ويشوفون سيارته الكشخه اللي نزل منها وطبعا يشوفون وسامته اللي تلفت الكل




ذياب و عمر : السلااااام عليكم شباب
الشباب : وعليكم السلام .. وطبعا تخاشمو و خذو اخبار بعض
مايد يالس يشوف عمر و هو يحس انه شايفنه بس مايدري وين
وذياب طول الوقت يراقب مايد .. ,, اخر شي قام ويلس حذال مايد والشباب مستغربين لانه ذياب خقاق دوم الشباب اللي يتعرفون عليه

يلسو الشباب يرمسون جنهم يعرفون بعض من زماااان .. و خذو على بعض وايد .. بعدين ذياب طلب رقم مايد وخذه من عنده قبل لايترخص مايد ..

سيف : ها ذياب اشوفك استانست على ولد عمي
ذياب بخبث : ماشاءالله عليه سوالفه ماتنمل
منصور يغمز له : هاه ذياب جيه و سوالفنا نحن ممله
ذياب يضحك : هههههههههههه الله يقطع بليسك يا منصور
عمر : هههههه والله انته يا ذياب
واحد من الشباب اسمه فهد : انا من زمان اقوللكم ذياب شي شي
ذياب يبتسم لهم بغرور : ليش في حد مب مصدق ؟
سيف : يمكن ليش لا ههههه
ذياب وحليله يحاول يستخف دمه هه : لا ابويه اتأكد
سيف : يالله يا ذياب من يومك خقاق وماتنزاد
ذياب : من حقي ولا لا يا سيف ولا لا الظاهر اني مب عايبنك << يحاول يتجرب منه عشان مايد ولا جان دفنه في مكانه خخ
سيف : افاااا يا ذياب الا اسولف وياك
ذياب : قم نتشمى احسن
فهد بغى يموت من الغيره لانه من زمان يحاول يتقرب من ذياب و ماقدر والحين سيف ايي بدون اي محاولات بعد !
سيف : قمنا .. شباب حد بيخاوينا ؟
احمد ربيع سيف : انزين شو رايكم نترايس
ذياب : أوكي
عادل : لا لا دخيلكم ماكفتكم الجلبات القبليه وملاحق الدوريه فكونا من الصدعه عاد
فهد : ياخي انت تم مكانك ونحن بنسير .. يالله قومو << عشان يركب ويا ذياب
سيف و فهد ركبو ويا ذياب أما احمد و عبدالرحمن و عمر ركبو مع بعض
كانو يترايسون واكيد انه ذياب اللي سابقنهم عشان سيارته السبورتيه وفجأه سمعو صوت الدوريه
احمد اتصرقع و على طول شرد اما ذياب ماعليه تم مكمل لين حدته الدوريه و وقف
ذياب معصب : خير ؟
الشرطي : الخير بويهك .. شحقه مسرع ؟ هذا مب شارع عام
ذياب : يوم بيكون الشارع بإسمك تعال ارمس .. يالله لا تضيع وقتي
الشرطي متنرفز من اسلوبه : هات الليسن و الملكيه يالله
ذياب : ان مافنشتك يا هذا ... انت ماتشوف السياره و الرقم ؟ لعنبوك عمي ماتشوف
الشرطي : لو سمحت بلا هالالفاظ واحترمني شوي على الاقل ... يالله هات الليسن
ذياب : شوف الليسن في المركز يا حلو .. ريوس ذياب بالسياره و طار عن الشرطي
الشرطي يقول حق الثاني : اول مره اشوف واحد وقح جيه .. انا بسجل عليه مخالفات هذا مب مخالفه
الشرطي 2 : يا عبيد انا قلتلك هذا ماينحط راسك براسه .. ولد عز ماتشوف رقمه انت ؟ ولا سيارته ؟ هذا بيكسر المركز كله فوق روسنا وبيزلزلنا بعد
الشرطي 1 : يهبي مسود الويه .. قم نلحقه يالله حرك
الشرطي 2 : امرنا لله
وسارو في نفس الدرب اللي سار منه ذياب بس مالقوه .. اكيد على هالسرعه وين بيشوفونه ؟

في السياره سيف كان متفاجئ من تصرفات ذياب ويا الشرطه !!
سيف : انت كيف رمست الشرطي جيه ؟ بيشتكي عليك
ذياب : ياحبيبي يوم بيسير يرفع الشكوى .. بتشوف ان ماتراقل في مكانه بس يشوف الاسم عدل
سيف : هههههه ايواااااا عاش الذيييب .. ثرك مب هين واسطات في كل مكان
فهد نط : هيه اكيد واسطات هذا ذياب ولد ,,,, ينحسب له الف حساب
سيف : والنعم والله
ذياب تم يسولف ويا سيف عشان يتعمق شوي في العلاقه اكثر واكثر اما فهد ف كان معصب لانه ذياب مايعطيه ويه وطول الوقت يرمس سيف



اتفقن الحريم على الملجه اللي بتكون عقب اسبوعين من الحين
ام شما : مبروك غناتي
شما ببرود : الله يبارك فيج امايه
فاطمه : يعل ربي يوفقكن يا بناتي واشوف عيالكن يارب
عويش شقت الحلج : آميييين
شما ابتسمت
دانه : شميييم بتشترين فستان جاهز ولا بتفصلين ؟
شما : مافي وقت حق التصميم اصلا .,,, بسير اخذ واحد جاهز
عويش : هييه مادري ليش الملجه تكون بسرعه .. ياخي نبا نفصل على كيفنا
فاطمه : اخر وحده ترمسين انتي مسودة الويه .. من قلنالها العرس اشتطت
ام سعيد : يالله ياميه لو تشوفينها ماتقولين بنيه
فاطمه : تخبريني عنها انتي ؟ ادلها كيف ملغوثه على العرس و حـ
عويش : بس بس قطعتني والله مايسوى عليه
ام سعيد : ههههه سيري البيت زهبي العشا ريلج بيي اليوم
عويش بوزت : ماروم اطبخ ياامايه
فاطمه تضربها : قومي بسرعه ماتبين تطبخين حق ولدي .؟ اذلفي المطبخ بسرعه ولا بكسر ظهرج .. ماعندنا نحنا هالبزا اونه ماروم اطبخ .. قومي واقطعيها هالرمسه يالله
عويش : امااااااااااااااايه خليهن يساعدني
دانه : جيه ريلنا وانا مادري ؟
عويش : وولد خالكن بعد لاتنسن
فاطمه : قومن فازعنها غربلات ابليسكن من بنيات .. يالله دهديه
دانه : امايه خلينا نتيلس وياكن بس طشوونه
ام شما : لا طشونه ولا هم يحزنون .. هزن طولكن و انجلعن.. وانتي شما تعلمي حق ريلج بعد
دانه : ههههههه وانا اتعلم حق منو ؟
فاطمه : وااااايه تغربلتي يالملغوثه الثانيه اذلفي لا اشوه ويهج
دانه : حشى دينصور مب امايه
فاطمه : شووه ؟ امنو نصوور هذا بعد ؟؟ هااه يا مسودة الويه
شما تسحبها : خلاص نحن بنلحق عوييش وطلعن البنات كلهن
ام سعيد : يا موزه مب جنج وايد استعيلتي في ملجة بنتج ؟
ام شما : لا ياختيه ... الولد مستعيل .. يبا يكمل دراسته خاري عسب جذه مستعيلين
فاطمه : يالله ماودي هالبنت تفارقنا حرام تسير بعيد
ام سعيد : هيييه لو سعيد خذها جان ماسارت بعيد
ام شما : ماعليه كل شي قسمه و نصيب .. ودام انهم يحسون عمارهم اخوان .. ترا هذا لانهم رابين مع بعض
ام سعيد : الله كريم
فاطمه : انزين وينه سعيد مايبين من يوم ملجت عويش ... ويهه معفوس دووم
ام سعيد : مادله يا امايه .. والله هالولد مغربلني استوا نكدي و ماينطاق .. من تقوليله كلمه جنج سبيتيه يقوم يرد بعصبيه و يظهر بسرعه مادله مسحور ولا شو
فاطمه : اقري عليه ولا وديه عند مطوع
ام شما : لا مب مسحور .. انا اعرف شو عوقه
فاطمه : شو ؟
ام شما : لا امايه هو قالي ماخبر حد
فاطمه : يالله الحين نحنا استوينا حد ؟؟ امبوني يدته وهذي امه شو هالعوق اللي مايبانا نعرفه
ام شما : خلنه هو يقوللكن ..
فاطمه : انزين يا موييز وشخبارها بنت عم نعيمه ؟
ويلسن الحريم يحشن

في المطبخ عند البنات

عويش : اففففف والله ذلني هالعيايز .. مايسوى عليه هالعرس
دانه : ههههههه شميم اسمعي الرمسه انتي بس ؟ الحين انتي اللي بتموتين على العرس تقولين جذه
شما : ههههههه عويش لا تجذبين علينا نعرفج زين
عويش : صخي انتي .. يالله تعلمي الطبخ حق مايد .. هناك محد بيطبخلكم خخخخ
شما عفست ويهها : افففففف لازم تذكريني يعني .. والله خايفه .. اول شي بعرس و عقب اسافر برع
دانه : ويييه غيرج يتمنون يعيشون خاري .. كفايه انه دارس هناك ويعرف كل شي عن الدوله وفوق كل ها انتو مابتطولون الا هي سنه او سنه ونص
شما : ولو .. انا مب متعوده اودر هلي .. بعدين مابشوف امايه ويدتيه وانتن بعد
عويش : هيه مب حلو جيه .. بس اذا كنتي ويا واحد تعرفينه وتحبينه من قبل هيه هههههههههه
شما تألمت على هالطاري : شو نسوي يا عواشه .. انا الود ودي مااخذه .. بس شو اسوي
دانه : ليش انتي مغصوبه ؟
شما بسرعه : لالا ماقصدت جيه .. اممم يعني كيف اقولج .. انا اصلا مابا اعرس فهمتي ؟ بس المشكله في يدوه .. عيب الحرمه اتم بليا معرس يعني لو ماخذت مايد باخذ غيره
عويش : أهااااااااا .. انزين تراج بتحبينه و بيحبج خخخخ
شما هه اي حب يا عويش وهو بياخذني غصب ... كله بسبتك يا حمدان ! اللي اعاني منه و يعاني منه مايد بسببك انته و الله يعين باجي ضحاياك
دانه : ههههه الظاهر شموه يالسه تفكر في ريل المستقبل
شما : جب جب يالله قطعي السلطه وانتي ساكته
عويش : اشتغلن يعلني افداكن
شما و دانه : هيه حق المصلحه
عويش : يالله تغربلهن ... الحين ابا اعرف شو يعيبكن انتن ؟ سبيتكن و مانفع وتفديتكن بعد مانفع وياكن .. خبرني شو تبن يعلكن بغربال ماعقبه غربال
شما : خيييييييييييبه !! بسم الله الرحمن الرحيم ... بالعه راديو انتي ولا شو
عويش : ولا شو يالمستخفه ؟ انا ابا افهم شي واحد .. امايه جيه ماطرشت البشاكير يفازعني احسن عنكن انتن .. الا يالسات ترمسن بيوصل الريال وانتن مازهبتن شي
دانه : والله هو ريلج وانتي الملزومه فيه .. نحن علينا نساعد بس
شما : عويش اتعلمي روحج .. حميد مايحب وايد ايادي تلمس الاكل اللي بياكله .. تحيدينه كيف يتدلع على امايه فاطمه
عويش : هييه والله واذا درا عنكن مابياكل الاكل .. اييييه بس عاد شو ساحر هو يعرف
شما : ماعليج انا اعرفه اكثر منج .. ماياكل يعني ماياكل
عويش : اوهوو خلاص انقلعن عيل
شما : ههههههههههههههههههه
دانه : هههههههههههه يحليلج يا عواشه بتطبخين هالاكل كله روحج ؟
عويش شوي و تصيح : دخيلكن ماقدر ساعدني يعلني بلاكن يالملتعنات
شما : خلاص يالله انا بسوي البشاميل
دانه : اممم وانا بسوي السويت هيهي
عويش : اف زين بعد بيطلع منج شي .. اشتغلن يالله
ويلسن البنات يطبخن شوي و شوي يستهبلن على عويش لوول


بيت بو مايد

سلامه : ميوود
مايد : هلا
سلامه : صدق الحين انت تبا تسافر ؟
مايد : هييه صدق
سلامه : ليييييييش والله حرام .. نبا انتم وياكم شوي
مايد يبتسم : صدقيني هذا احسن شي حقنا .. بعدين لا تنسين شما .. اكيد هالشي شوي بيريحها يوم مابتحصل غيري
سلامه : امممم مادري والله بس حرااام
مايد : هيه لازم حرام عشان تبين اتمين ويا ربيعتج ولا انا طاااف
سلامه : ههههههه لا والله
مايد : هيه هيه اعرفج انا .. بس حرمتي حقي بروحي
سلامه ترفع حياتها : هااه ميوود بدينا من الحين حبيتها
مايد : هيه اكيد حرمتيه وبحبها حرام بعد ؟
سلامه : لا مب حرام
مايد : الا تعالي وينها حمدوه مانزلت اليوم حق الغدا ؟
سلامه : اوووووه يوم دقيت عليها الباب كلتني بقشوري .. ماتطيع تظهر هالايام .. تدري ترا في نفس هالفتره توفى المرحوم
مايد بحزن على اخته : الله يرحمك يا هزاع
سلامه تتنهد : والله من زمان ماسولفنا وياها .. تحيدها قبل كيف كانت ؟ مااتصك حلجها و دوم مقالبها العبيطه تعصببنا .. لكن الحين ماتسمع منها الا صراخ و صياح
مايد : الله يعينها و يصبرها ويعطيها واحد شرات هزاع و احسن
سلامه : آمين

لعلمكم ترا حمده مخطوبه من ايام الثانويه و يوم دخلت الكليه سنه ثانيه كانت ملجتها ... وكانو متفقين على انه يكون العرس نفس يوم التخرج .. المهم تخرجت حمده وكانت فرحانه وايد لانها بتجتمع اخيرا ويا حبيب قلبها وولد عمها .. بس للأسف في نفس هذا اليوم توفى وهو راد من بوظبي ومن درت حمده اللي كانت تحب ولد عمها من ايام الطفوله انهارت وطاحت في غيبوبه ماقامت منها الا عقب شهر ومن يومها ماقامت تيلس ويا اهلها ولا ترمسهم وكله تصارخ وجيه .. وخواتها دوم يعصبن عليها

روضه نزلت : سلااااااامي متى بنشتري فساتين ؟ مابجى الا اسبوعين نبا نكشخ
سلامه : مادري متى نسير ؟ انا ابا اسير ويا شمامي
روضه : عاد منو بيودينا ؟ مابتطيع تسير ويا مايد و نحن مابنسير ويا ولد خالتها
مايد : ليش هي بتسير ويا ولد خالتها ؟
سلامه : هيه تراه شرات اخوها .. وهي ماعندها غيره يوديها واييبها
مايد : انزين ليش ما تسير ويا الدريول؟
سلامه : يالغبي بتسير ويا الدريول دبي بروحها ؟
مايد : اوه شدراني
روضه : شكله بدا يغار
سلامه : ترا ولد خالتها ربيعكم اللي اسمه سعيد
مايد قلبه قبضه من طاري سعيد : اها
سلامه : حشى لو انا بدالك بنط من الفرحه مابقول اها << وهي تقلده
روضه : الحين تقارنين عمرج بميووووود يالله هنااك
مايد : عنبو .. ريال طول و عرض و لحيه و شنب .. شو تبين بعد ؟ قولي ماااااااايد مااااايد
روضه : ها يزاي اني ادافع عنك يالهرم
مايد : محد طلب منج
روضه قاففففطه ههههههه
سلامه : وييييييييو وتسويلها حره ..
مايد : اشووو هذا بعد ؟ عيوز اطالعي كم كبرج وبعد اتظهرين هاللسان
سلامه : محد عيوز الا اللي بتاخذها
مايد : يعني ربيعتج
روضه : اوه وصلو حق الحرمه الحين .. خلو البنت مالكم خص فيها
مايد : اوب يعني حرمتي مطلوبه من كل صوب .. شكلي بدفعكم بيزات بس عشان تشوفونها
سلامه : جب جب خذها واشبع منها مانباها نحن
مايد : احسن اصلا انا مابعطيكم اياها
روضه : حشى مب جنها بنيه .. اللي يسمعكم يقول يرمسون عن لعبه و لا شي
مايد : اطربينا بسكوتج يا حضرة الهبله
روضه : اوهووووووووو مايد شو بلاك عليه اليوم ؟ مقطعني
مايد : يزاج
سلامه : اطالعو هاي الغبيه كيف تغني <<< شغلت التلفزيون عشان يسكتون
وبالفعل الكل اندمج و صار يعلق على الفيديو كليب لول



...........: بووووووووووو
شما : اماااااااااااااااااااااااااااااااااااااااااااه
حط ايده ع ثمها عشان تسكت
شما من الخوف قامت تصيح تذكرت حمدان .. حاولت تخلص عمرها منه بس ماقدرت




علاقة ذياب بمايد صارت قويه و حتى انه قام يلتهي عن حمدان وايد مع انه ماكان يودره ابدا .. حمدان كان يستغرب منه كيف انه تأقلم بسرعه ويا هالذياب اللي طلع فجأه مابخبي عليكم حمدان كان يحس بالغيره من ذياب وخاصه يوم عرف انه عايش روحه بسبب انه اهله توفو وورث ابوه اللي كان تاجر كبير

حمدان : ههههه بس عاد بطني يعورني
مايد : ياريال والله اني ضحكت ضحك ... يعني هو غبي ليش يسير يتفلسف
حمدان : ههههههههههههههه زين مازقرتله الشرطه
مايد : خخخخخخ شو تبا بالشرطه هي روحها كفايه .. عاد لو شفته يوم انضرب كيف استوا ويهه هههههههههههههه وحليله غمضني .. بس انا اقوللهم البنت ماكانت ميوده التلفون يعني متى بتطرشله بلوتوث ههههههههههه غبي والله غبي
حمدان : ههههههههههه غربلات بليسك والله ضحكتني
مايد : هيه هيه اضحك شو عليك .. لو كنت مكانه جان ماطلعت سنه كامله من البيت
حمدان : حشى عاد سنه ؟ قول شهر شهرين ؟
مايد : ههههههههه من الفشله ياخي لا بعــ ... ورن تلفونه
مايد : لحظه حمدان ... ألووو
ذياب : مرحبا بالغالي
مايد : مرحبتين كبار شحالك ياريال؟
ذياب : يسرك حالي .. وينك يالحبيب اليوم مابينت ؟
مايد : والله اسمحلي يالس ويا ولد عمي عشان جذه مامريتكم
ذياب : أفاا انزين تعال وهات ولد عمك وياك ...
مايد : لا هو مايقدر اييكم
ذياب : عشانه مشلول ؟؟؟؟؟ عادي شوفيها ؟ كلنا نسوي حوادث يالله يالله تعالو
مايد : اممم مادري بتخبره اول وبرد عليك خبر
ذياب : برايك انزين بس لاتتحير
مايد : انشاءالله فديتك ..

مايد : هاه حمدان بتي ميلس ذياب ؟
حمدان نزل راسه : لا
مايد : ياريال والله وناسه .. بنغير جو
حمدان : برايك سير انته
مايد : لا مب ساير بدونك
حمدان : ماايد قلتلك مب ساير
مايد : انزين ليش؟
حمدان : بس انا هذا ذياب مالك مااطيقه
مايد : اوه يا حمدان انت ماجابلته الا مره وبعد دقايق بس .. تعال ايلس وياه وبتشوف كيف هو حبوب وطيوب والله ريال ماعليه زود
حمدان : اوووووف مايد اذلف بروحك وفكني من شرك
مايد يتنهد : هيييه الحين انا اللي افكك من شري ؟ ولا انت ؟ ماتحيد عمرك شو سببتلي من مشاكل ؟ عمري ماقلتلك كلمه ! وفوق كل ها فرقت بيني وبين سعيد وخليتني اتزوج وحده انت ... افف ؟؟؟؟ ها كله وافكك من شري .؟ اوكي برايك بفكك من شري وظهر بسرعه
حمدان يرد راسه على ورا ويغمض عيونه .. آه انا ماانكر ماانكر شو سويتلك يا مايد بسسسسس ذياب هذا خبيث .. نظراته ماتطمن مادري كيف والله مادري ... الله يبعده عن طريجك يا مايد ويسلمك من شره ... هيييه يا شما والله تعودت على صوتج .. مع انج كنتي قاسيه و جافه ويايه بس كنتي عسل على قلبي ... الله يهنيج ويا مايد وانشاءالله تسامحيني وتنسين اللي سويته فيج

دشت مي : حمدان
حمدان نقز لانه كان يرمس بصوت عالي شوي وخاصه يوم يرمس عن شما : هاه
مي : أأ اميه تقولك تعال تعشى ويانا
حمدان معصب : مابا عشى ويلا اذلفي
مي زايغه : خلاص بسير بس انت هد نفسك
سيف ياي يربع : بلاه حمدان
مي تسكر الباب : معصب .. معصب وايد .. لاتحدر احسن لك
سيف : لاحول ولا قوة الا بالله
سيف كان يرمس مي .. بس هي كانت في عالم ثاني تفكر في شماا وشو علاقتها بحمدان و مايد ....؟ كانت تفكر انها هي نفسها خطيبة مايد بس استبعدت هالشي
وسارو الصاله

ام عبدالله : هاه وينه حمدان ؟
مي : معصب ومايبا عشى
ام عبدالله : الله يهديه انشاءالله جنه ياهل
بو عبدالله : ماعليج بيهدى وبيي ياكل روحه
عبيد : وينه عبوود
سيف : ظاهر من العصر ومارد
عبيد يتثاوب : اها
مي : خيبه يتثاوب وهو توه ناش من الرقاد
عبيد : خيبه خيبت عدوج من بنت الحين بتصكيني بعين
سيف : تدري عبيد ... اانا مستغرب من ذياب الـ..... تخيل رابع منو ؟
عبيد : منو ؟
سيف : مايد ولد عمي
عبيد غص : كح كح كح شووه ؟
ام عبدالله : بسم الله عليك وشوفيها لو رابع مايد ربعكم على الاقل انعرف اذا عندكم ربع زينين
عبيد مبقق عيونه : من صدقك انته ؟ لالا شكلك تتمصخر ؟ ولا اكيد ذياب ياه شي
بو عبدالله : اكيد هذا واحد مب زين
سيف : لا ابويه .. شوف هذا واحد خقاااااااااااااااق لو يشوف حد يعرفه مابيسلم الا اذا سلمت عليه .. مطنش الكل ومايتعرف على اي حد الا اذا هو يا يتعرف عليه .. وشوووو يذل الشباب ذذذذذل خاصه هاذيلا اللي متخبلين عليه و على كشخته
ام عبدالله : حشى مب ولد هذا .. بطران
بو عبدالله : امف عليه وشحقه ها كله
عبيد : لانه راهي و مزيووووون .. ابويه ها ولد المليونير حمد الـ.....
بو عبدالله : والله ؟ ولده هذا ؟؟؟؟؟؟
سيف : هيه... هو تغير من هله توفو ..
ام عبدالله : حليله الدنيا لعبتبه
عبيد : انزين سواف هذا اكيد يبا شي من مايد !
سيف : بالله عليك من متى تحيده يطلب شي من الشباب .. بس يمكن عشان مايد شخصيته حلوه و طيووب
عبيد : هيه ليكون مايد وياه الحين ؟
سيف : اكيد الصراحه مايتفارقون
ام عبدالله : يالله بسكم سوالف العشى زهب
والكل قام يتعشى وهو ساكت.. عبيد يفكر شو سالفة ذياب و مي تفكر في رمسة حمدان عن شما و مايد


منو هذا اللي مسك شماا ؟؟؟

ذياب بيفرق بين مايد و حمدان ؟؟؟

شما بتسافر ويا مايد ولا بتفكر فالموضوع ؟؟؟

مي بتعرف سالفة شما وسر زواجها من مايد و لا ؟؟؟

اترقب ردودكم الغاويه ...

بنت زماني 23-07-2009 11:33 PM

رد: مر الزمان و جيت تحسبني ابغاك! ياكيف يطيقك قلب شخص قتلته
 
يعطيج العافيه انا اتوقع انه ذياب يفرق بين شما ومايد

وهمن راح يقدر يفرق بين حمدان ومايد

داهيه بس طيبه 23-07-2009 11:56 PM

رد: مر الزمان و جيت تحسبني ابغاك! ياكيف يطيقك قلب شخص قتلته
 
تسلمين فديتج على تواجدج الدايم ويايه ^^

داهيه بس طيبه 26-07-2009 12:38 AM

رد: مر الزمان و جيت تحسبني ابغاك! ياكيف يطيقك قلب شخص قتلته
 
O_o

وين ردودكم يا اعضاء !!!

بنت زماني 27-07-2009 12:10 AM

رد: مر الزمان و جيت تحسبني ابغاك! ياكيف يطيقك قلب شخص قتلته
 
العفو وبانتضارج لا تتأخرين علينا


الساعة الآن +3: 12:37 PM.

Powered by vBulletin® Version 3.8.7
Copyright ©2000 - 2014, vBulletin Solutions, Inc.
SEO by vBSEO 3.6.1
موقع غرام موقع سعودي خليجي عربي يحترم كافة الطوائف والأديان ومختلف الجنسيات