اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 13-12-2009, 06:00 PM
صورة sĩмőη الرمزية
sĩмőη sĩмőη غير متصل
©؛°¨غرامي مشارك¨°؛©
 
رواية نور / للكاتبة : وديمة العطا ، كاملة


السـلام عليـكم و رحمة الله و بـركاته

مرحبـاً جميـعـآ

كيف حـالكم ؟

أتمنى أن تكونـوا بخيـــر ^^

اليوم بإذن الله سأضع لكم القصة الجديدة للكاتبة وديمة العطـا


أترككم مع كلمات الكاتبة المبدعة ^^


. . . . . . .


مرحبا قرائي الاعزاء هاهو اللقاء يتجدد بنا من جديد مع قصه جديده ارجو ان تنال اعجابكم
مع محبتي
وديمه العطا

"نــــــــــــــــــــــــــــــــــــــور"

الجزء الاول
على الشارع الطويل الممتد على شاطئ الراحه كان ايسوق سيارته وابتسامته اداعب شفايفه...اخيرا
الحلم اصبح حقيقه...وقدرت يا زايد تدخل انتخابات مجلس الشعب
حلم كان يطمح فيه من زمان .....من ساعه والتيلفون ماوقف من تهنئتة
ابتسم زايد وهو يتذكر اشكال خصومه في المجلس اي لذه حسبها وهو ايشوف علامات الخيبه على ويوههم
زايد"خلهم ايموتون حسره وعدهم ما شافو شي والله لا اخليهم يندمون على اليوم الي حطونيه فيه خصم الهم...وقاعديليه في السوق مثل العظم في البلعوم
برويكم عاده زايد شو عليه قادر"
هذا هو زايد من اغنى رجال الاعمال سلطه ومال وعلى ابواب دخوله عالم الانتخبات
وامساكه كرسي في مجلس الشعب
وزايد يتيم الابوين ماعنده لا اخو ولا اخت عاش وحيد اول شي مع ابوه الي كان ريال شرس
في السوق علم زايد كيف يكون خصم قوي لغيره ورباه على انه احسن من غيره وبعدها مات وتركه بعمر السبعتعشر سنه
لاكنه اول ما وعى على الدنيا كانت له سياسته وطموحه انه يوصل لاعلى المراتب
اجتهد في دراسته ومسك شركة ابوه الي ورثها وقدر ايديرها احسن ايداره ويوسع من فروعها في كل مكان
متميز دائما وله هيبه تطقي على المكان المتواجد فيه ونظرته لنفسه انه يستحق الافضل دائما وهذا الشي خلاه يكتسب صفة الغرور والتكبر بنظر الاخرين
كان يملك فله قريبه من انها تكون قصر في روعتها وكبر المساحه الموجود فيها
يملك الكثير من الخدم وعزايمه شغاله دائما لكثرة معارفه والناس الكباريه الي ايكون دايمن
على اتصال ابهم...وهو كثير السفر....ومايقصر دايمن في اهله من ناحية جدته....يزورهم في الاسبوع مره او مرتين اذا قدر
وطبعا عند زيارته لاهله اهل البيت يرتبشوون ويقدمون له الافضل اتم مرة خاله اتحوس في المطبخ اطلع احسن المواعين الي عندها وتطلب الحلويات
وتسوي كل الي تقدر عليه عشان تبيض الويه جدامه وبيت الخال هذا
عايشه فيه اليده الي اهيه ام ام زايد ومعاها ولدها راشد خال زايد وعنده من العيال فهـــد الي يدرس ثاني جامعه وعبدالله في اعدادي و
روضه ثنويه عامه ومي اول ثنوي ....اما خاله عبدالله فهو ميت وترك بنت عايشه حاليا عند خالتها
اما اخوال زايد الثانيين فهم اخوان راشد من الاب وكانو عيال الحرمه الثانيه واحد مات مخلف وراه عايله صغيره
عايشه حاليا مع جدتهم والخال الثاني خليفه شاب بعمر زايد عايش بروحه في بيت وهو خاطب
بنت خالته الي متفق معاها ان الزواج ايكون بعد انتهائها من الكورس الاخير في الجامعه وكان دائما ايفكر اييب عيال اخوه ويخليهم
عنده لاكن المشكله انهم صغار ومحتاجين حد يعتني ابهم طلب ايعجل بالزواج لاكن الخطيبه رفضت عى اساس اتخلص دراستها اولا
بدر صديق زايد من ايام الدراسه ومحاميه الشخصي كان قاعد معاه في السياره
بدر:شووووه اشوف الابتسامه شاقه الويه
زايد:هههه مستااااااانس والله مستانس...اخيرا صار الي احلم به
بدر:ياله شد حيلك للفوز
زايد:لااا ابشرك من الحين بالفوز ان شالله
بدر:مشالله عليك يازايد مادري كيف ثقتك بنفسك هذي؟
زايد:لوما ثقتيه بنفسيه ماشفتنيه وصلت لين اهنيه...انا استاهل يابدر...انا زاااااايد وانا الي بمسك المجلس باذن الله
وبفوز
هز بدر راسه:خطير والله
زايد:عيال الصقور ماتبور
اتصل خليفه خال زايد عليه
خليفه:مبرووووووك مبروووووك يا ولد الاخت شفت عاده واسطت خالك
زايد:هههههه هلا بالخال هاااه ترا غدانا عندك
خليفه:اررررحب حياك فديتك
زايد:يالله مسافة الطريق
سكر خليفه وياه اتصال من حرمة خاله
مرة الخال:مبرووووك مبروووك يا زايد....لحووووه ياعمتيه اصبري ببارك له
ضحك زايد:ههههه يدوووه هاتيها
الجده:سلااام عليكم...خوووزي منه انا قايلتلج اتصلي عليه وقبضينيه السماعه ماقلت رمسييه
زايد:هههه يدوووه
الجده:هااه بلاك انته بعد
زايد:ههههههه انا بلانيه علووومج انتي
الجده:هييه صدق مبروك فديتك ...عاده شو هالعله الي فزت فيها
زايد:يدووه ارفعي راسج فووووق ...ان شالله باخذ الكرسي في مجلس الشعب
الجده:وااااايه غير هم كراسيهم سر عند انور خان الكراسي عنده رخاص
زايد:ههه ههههه اسمع يدوه شو تقول تقول روح عند انور خان
ايخسي انور خان اييب كرسيه من عنده...يدووه ولدج بيصير باذن الله في مجلس الشعب
وبتشوفين عاده زايد شو بيسوي عقب
الجده:ياولديه والله ماعرف انته شو قاعد اتقول.......ودام ان العرب كلها تتصل عليه اتباركليه قلت بتصل ابارك لك فديتك
زايد:فدييييت روحج انا
سكرت الجده والتفتت لمرة ولدها وبنتها
الجده:هاا كرسي شوووه؟
روضه:لحووووووه ساعه يايدوه اقولج اظاهر مافي فايده لهيام قرب
الجده:قربت خيبتج يامسودة الويه....فارجي اشوف
روضه:زيين زين.....عاده انتي بروحج نافخ راسج ولد بنتج باجر الله يعين لو ياخذ الكرسي شو بتسويبنا
الجده:الخلا



اتصل زايد على خليفه قبل لايروحله على الغدا وكلمه خليفه وهو محتشر
زايد:شبلاااك؟
خليفه:ماشي فديتك اداعمت مع واحد ريال بس الحمدلله ما صار شي جرح بسيط وقاعدين ايخيطونه اليه
زايد بخوف:شوووه وين انته
خليفه:في الجزيره
زايد:يالله احنا يياينك
خليفه:ياريال مافي داعي روحو البيت انتو الغدا زاهب اهناك وانا بييكو
زايد:احنا يايينك ولحمار الي داعمنك وين
خليفه:اييي دريت حق شوه تبا تي اقلعه يازايد لاتنسى انك الحين على ويه انتخابات
وصل زايد وبدر للمستشفي واتوجهو داخل وكانت سيارة الاسعاف توها واصله بريال حالته خطيره كانو الدكاتره يتراكضون في كل مكان
دخلو زايد وبدر على خليفه واطمنو عليه وراحو عقب ينتظرونه برا عند الكراسي لين ايخلص من لخياط
بدر:سبحان الله جنه البارحه يوم انييب مروان عقب ما طلعناه من تحت السياره ماجن مر على الحادث سنتين
زايد كان يسمع بدر يتكلم وايحس انه منزعج من صريخ بنات وراه ايصيحن على ابوهن الي يابوه قبل اشوي
وحده منهن كانت اتصارخ بطريقه فضيعه ما حس زايد بنفسه يوم قام ومسك عقاله وصرخ عليها بجـــــــــــــــــــــــب
مسكه بدر ويره
بدر:ياريال اقلعهن شلك خص فيهن
زايد:عنلاااتهن ماتسمعهن كيف ايصارخن ماشي مستحى
بدر:ياريال اقلعهن ابوهن تعبان ولازم بيتمن ايصارخن
زايد:قومهن ما وراهن ريال يصلبهن ....مستشفي ابوهن هن عشان ايصارخن بكيفهن ماشي ريايل تتخطف عدالهن
بدر:لحووووه تعال تعال خلنا انروح عند خليفه
وبعد الموت قدر بدر يقنع زايد انهم ايروحون



في اليوم الثاني اقام زايد حفله عووووده على شرف فوزه في النخبه الاخيره المرشحه للكرسي
ودعا فيها كبار الشخصيات والتجار وكل من له سلطه وكل الاهل والاقارب والاصدقاء
وكانت حفله على مستوء عالي الكل هناه فيها وتمنى له التوفيق والفوز
ومن ضمن المعازيم كانت ناس حاقده على زايد ومقهورين امنه
خميس:اتصدق احس انيه بطر ثيابيه من القهر ....طالع كيف مصدق عمره وضامن الفوز
سلمان:ماعليك امنه انا جندت جيش ايدوروليه هفوات عليه عشان اخليه يخسر في الانتخابات
خميس:ياريال من وين بتيبها هذي الهفوات ايقولولك يتيم ماعنده هل تقدر اتعايره بمشاكلهم ولا شي
سلمان:لا عنده خواله لازم بنلاقي عند حد منهم مصيبه
خميس:خل الكلام عقب هذي يبالها سهره وترتيب



مرت الايام واجتهد خلالها زايد استعداداته للانتخابات وملت صوره كل الشوارع وفي كل الجرائد
المحليه والعالميه.....غير الصحافه الي تلاحقه في كل مكان وايدورون اي معلومه عنه
كان خليفه خال زايد راجع من دوامه يوم ياه خبر وفاة جدة عيال اخوه على طول اتوجه لبيتها وحضر العزا وبعدها على اخر الليل طلب عيال اخوه وخذهم معاه
كانو ولدين وثلاث بنات ولد عمره اثنعشر سنه والبنت الكبيره عشر سنوات وبعدها ولد والبنتين عقب واصغر بنت عمرها سنتين
لاحظ خليفه علامات الحزن على ويوههم ومربهم بوبايز وخذلهم وجبات وبعدها راح لبيت خالته وطلب من خطيبته تهتم ابهم الليله
كانت اميره وهيه خطيبة خليفه قاعده معاه في الميلس ومعاهم اليهال
اميره:خليفه شو بتسوي الحين؟
خليفه:شو بسوي يعني؟
اميره:اليهال وين بيعيشون؟
خليفه:عنديه طبعا
اميره:هذولا صغار ياخليفه يبالهم عنايه كيف بتخليهم عندك
خليفه:شفتي شكثر انا محتاجنج؟
اميره:خليفه انته تبا تتزوجنيه لك ولا حق عيال اخوك
خليفه:اميره انتي تدرين انيه من زمان اقولج خلينا نتزوج
اميره:علشان السبب نفسه
خليفه:لحووووه انتي ليش جذيه....لازم يعني تخلطين المواضيع
وقفت اميره:خليفه انا من حقيه مثل كل بنت انيه اعيش حياتيه مرتاحه وابدا اسرتيه بروحيه مش ابدا حياتيه باسره ثانيه
خليفه:هذولا عيال اخويه مب عياليه
اميره:ادري بس هم يهال ويبالهم عنايه انا انا مب مستعده اربيهم
وقف خليفه معصب
خليفه:وانا ماقلت تعالي ربيهم....خلج مع دراستج تصبحين على خير واظن بعد مالج بارض
اتخلينهم عندج لين باجر
اميره:خليييفه حرام عليك ليش اتقول جذيه احنا لازم نتفاهم ...مب اتعصب جذيه
خليفه:ماعليه خليهم عندج لين باجر وعقب بنتفاهم ....ترانيه والله تعبان من همهم...انا مهتم منهم من
قبل وين الحين راسيه بينفجر وانا مش عارف شو اسوي الهم
اميره:ليش ماتيب بنت اخوك الي عند خالتها اطالعهم؟
خليفه:ياسلام عليج وتتحسبين يدتها بطيع اتخليها تي اطالع عيال ولد ظرتها...ماظن؟
اميره:انتو بعد مادري كيف تفكيرهم هلك؟
خليفه:اذا انتي ماتنزلتي اتربينهم بطيع بنيه عمرها ثمنتعشر اطالعهم بروحها اهيه تبالها منو ايطالعها
اميره:ياسلام اظن مافي فرق بينيه وبينها الا ثلاث سنوات
خليفه:المهم خلي بالج منهم لين باجر
طلع خليفه وخاطره متضايق من موضوع عيال اخوه
اما في بيت جدة عيال اخوه الي توفت كانت بعض الحريم والصديقات عند نوره بنت العيوز الي مادرا عنها خليفه
قعدت نوره من بعد ماكانت منهاره من موت امها وراحت ادور عيال اختها مثل المينونه
نوره:ويينهم وين راحو؟؟؟ وين فطامي ودانووه ويييينهم
قالتلها وحده من صديقاتها ان عمهم يا وخذهم
نوره تمت واقفه منصدمه:خذهــــــــــــــم....خذهم جذيه بدون مايشاورنيه وانا انا منو عنديه منو بيتم عنديه انا ماليه حد في هذي الدنيا لييييش ليش ياخذهم
مش كفااااايه اميه راحت ايرد اهو بعد ياخذهم عنيه ليش مايخليهم ايردون روحيه
على الاقل احس ان في حد بقا اليه
قعدت عقبها نوره اتصيح وقطعت قلوب الموجودات
نوره :ارجوج يام احمد ارجوج خلي حد اييب اليه رقمه انا لازم اكلمه ولاترانيه والله ايين
ام احمد:ماعليه يابنتيه بخلي احمد ولديه يشوف رقمه



في مكان ثاني في الصحرا كانت ثلاث سيارات تلاحق الطير الي فجوله ورا الارنب
ومن ضمن السيارات كانت سيارة مروان الي كان مظهر نصف جسمه من الدريشه ويصرخ على الطير وهو يظرب على زجاج السياره
مروان:حووووووووووه يعنيه افااااااارقه من طير بذبحه اليوم...طالع طالع الارنب في وادي وهو في وادي
حووووووووه شقراااااااااااان بذبحك ياشقران
وقف وقف السياره
قفز مروان من السياره اول ماوقفت وركض للطير الي ضيع الارنب وحل على الشيره الصغيره
كان مروان منقهر امنه وركضله وهجم عليه ومسكه وقام ماسك الحبل المربوط في ريل الطير ويشل الطير ويظرب به على الارض
واحد من ربعه:مرواااان استهدا بالله هذا طير شفهمه
مروان:انا بفهمه الثور عيل الارنب جدام عينه ويحل على الشيره
احمد:ياريال خله اترك الطير عنك ذبحته
كان صوت الطير عالي وهوينظرب كل شوي على الارض...تركه مروان وعقب تم ايطبه بالتراب
معصب عليه فووووول.....كل ربعه كانو واقفين ايطالعونه وهو يدفن الطير وخلا راسه طالع وقف وتفل عليه قبل لايروح سيارته
قعد على الكرسي الجدامي يلهث من التعب ومسك دبة ماي وصبها على ويهه
اما ربعه فحفرو عن الطير وطلعوه وهم يتضاحكون...هذا حال مروان الي بسرعه يعصب على الطير اذا خيب ظنه
قرب امنه ربيعه علي
علي:مرواااان وين الي ياي يبا يستانس يعصببك طير
مروان:هذا طير اتسميه عور مايشوف الارنب جدامه جاننا من الصبح واحنا نتبعها وفي الاخير ايضيعها فارقته
علي:ههههههه ماعليه هذا القنص مره تصيب ومره تخيب
مروان :ايخسي انا مادربته كل المده الي فاتت عشان يحل اليه في الشيره بدال لايصيد الارنب
علي:هههههه...افا عليك هذا شقران له صولات وجولات في المقناص...ولا انته نسيت العام شو كان ايسوي
مروان:هييه كان فرخ توه الحين اتقول شيبة زمانه
علي:هههههه



في اليوم الثاني زار زايد يدته واستقبلوه اهل البيت باستقبال حافل..الخاله كله تقووم وتقعد وماخلت شي ماقدمته
زايدوهو قاعد عدال يدته وحاضن يدها يقبلها
اليده:اشووو عاده كرسيه هذا؟
زايد:يايدوووه اتركيج من سالفة الكرسي...عقب بتعرفين سالفته...قوليليه انتي علومج شوووه؟
اليده:زينه علوميه...انته علومك متى بتعرس؟
هز زايد راسه لان يدته قاذيتنه بسالفة العرس هذا رفع نظره لروضه الي كانت قاعده معاهم يستنجد ابها
لاكنه ماردت عليه
اليده:شوووه معطنيه بولباس اشوف
زايد:لا والله بس بتخبرج يدوه ...انتي شفتي في حياتج وحده تصلح تكون حرم زايدبن محمد...هالزين
الي جدامج في وحده تستاهله
زايد كان يمتلك عيوون تذبح الي يشوفها عيون قريبه من العيون الناعسه وكان وايد مغرور ابهن
غير الخشم الطويل الي معطي زايد شكل رهيب
روضه:موجووووده
طالعها زايد بنظره غيض
روضه:شيخه يايدوووه شيخه الكل يتمنى اشاره منها
اليده:منيه شويخ هذي؟
روضه:لا يايدووه مش اسمها شيخه اقصد الي يشوفهاا ايقول عنها شيخه شو جمال وشو ادب واخلاق
اتقول للقمر قم وتقعد مكانه
اليده:غااوييه
روضه:اقولج اتقول للقمر قم
اليده:منيييه هذي
روضه:مب الاول ايوافق ولد بنتج
اليد:هو ماعنده شووور قوليليه منيه؟
روضه:هوايعرفها
زايد باستنكار:اعرفها منيه هذي الي مضويتنها اليه؟
روضه:طالع جدامك زيين وبتعرفها
زايد:منيييه؟؟
روضه وهيه ترفع نفسها واتاشر على نفسها:احم احم
زايد عرف منو تقصد:فاااارقت ويهج...هب ناقصنيه عاده الا انتي
روضه:انته ماتقول انك تبا حرمه شيخه تليق بمقامك
زايد:اصوم اصوم وافطر اليه على بصله
روضه:ياااااله عااده الي يسمعك عاده يتحسبنيه ميته عليك...انا اصلا ما اتنزل اخذليه واحد حضيييري
انا ابا واحد بدوي وعنده كروزل يقحص ابيه ويلااات في النقيان
اليده:حسبي الله عليج بنيه قويه قومي ياله قومي انقلعي داخل
زايد وهو يضحك:هههه يدووه خليها تراها طماشه
روضه:والله انا طماشه....زيين باجر بسويلك سالفه في النت وبخلي الكل يرفض ايصوت لك
عصب زايد:والله لا اذبحج مااااااالج خص في التصويييت وياله انقلعي داخل
قامت روضه متروعه من اسلوبه الي انجلب وركضت داخل
روضه:بسسسسم الله انته اصلا محد يقدر يمزح معاك
زايد:انقلعي
دخلت ام فهد مرت خاله:حسبي الله عليج يارويض
زايد:هههههه تعالي مرت الخال ماعليج منها الا وين ميمي فديتها تولهت عليها؟
ام فهد:هذي ذابحه عمرها بالدراسه مره ما نشوفها اتقول اهيه الي عليها ثنويه هب هاي الي ما تمسك الكتاب دقيقه
زايد:وليش ميمي تغربل عمرها بالدراسه ترانيه قلتلج بيب الها عشر مدرسات جانها تبا
ام فهد:يعل ربيه ايزيد خيرك يا ولديه بس اهيه ماتبا اتقول بروحيه بدرس
زايد:فديييتها خلي حد يزقرها اليه
قامت ام فهد وقالت للخدامه تروح تزقر مي ومي بنت خال زايد لاكنه ايموووت فيها لانه متعلق فيها من يوم اهيه صغيره دائما
ايوديها الدكان وفي الفتره الي كان يدرس فيها زايد وبدر في مصر كان خاله عنده دوره ثلاث شهور
وكانت مي في هذاك الوقت عمرها ست سنوات وكان كل وقت بدر وزايد معاها بيموتووون عليها
دخلت مي واول ما شافت زايد ركضت ناحيته وفتح يده وخذها بالحضن
زايد:فديييييت انا ميمي
ابتسمت مي بخجل وسلمت عليه بالخشم عقب
ام فهد:ياولديه لبنيه غدت حرمه عاده الحين مايوز سلامكم هذا
زايد وهو يمسك مي من ويهها:ان شالله تبينها تودر موايهيه؟
ام فهد:عاده ياولديه مايوز حراام
زايد:حرااام هذي بنتيه ماعليه من حد شوفي ميمي تحملي حد يضحك عليج وايقولج ودري اموايهه
ابتسمت مي واهيه اتهز راسها باوكيه
ومي بنت نعومه وهاااديه وعلى نياتها في الشور دائمن عكس روضه الي لسانها متبري منها
تم زايد يهمس لمي بروحهم ومحد يسمعهم ومي مستانسه....لان زايد من غلاتها عنده مب مقصر معاها باي شي دائمن لازم توصلها اول ما يوصل من السفر
بوكسات مترسه من كل شي هدايا الها...تموووت روضه من القهر وتاخذ نص الاغراض واهيه تقول لمي ان هالاغراض ماتصلح الها
ومي تحت الشور

.................................................. ..........
كان فهـد قاعد في ميلس واحد من رباعته وكانت شله قاعده عدالهم ايطالعون تيلفوناتهم ويتضاحكون
واحد منهم:فهووود طالع فديتك الصوره هذي
وفر عليه التيلفون واول ماشاف فهد الصوره تغير لونه وحس ربيعه الي قاعد عداله انه انتفخ من اغيض
قام فهد بسرعه من عندهم وهو يلعن ويشعن
وركب سيارته وربعه كلهم لحقوووه ايحاولون ايوقفونه عن لا يسوي شي
كانت ثلاث سياير الي تتلاحق ورا سيارة فهد الي كان ايسووق بسرعه جنونيه متجه لمدرسة البنات الثانويه
حمدان:مجتووووم الحق فديتك فهووود معصب فول ورايح لمدرسة البنات مادري شو عنده الريال فهم السالفه غلط الحق فديتك
مجتوم كان صديق فهد الروح بالروح
ترك فهد سيارته مفتوح بابها ودخل بسرعه لمدرسة الثانويه واول مادخل الاداره صرخ في المدرسات
الحين ايبن له بنت عمه اليازي وحتى انه كان ناوي ايروح الها لصفها لاكن الاخصائيه منعته
تم واقف متحرقص يرقبها واول مايبوها له
وهيه كانت مستغربه شو السالفه التفت الها فهد ومسكها جارنها وراه لخارج المدرسه بدون عباه ولا شنطه
حاولت معاه المدرسات يترك البنت لاكنه ماتركها وقعد يصارخ عليهن
ركبها السياره وركب
اليازي:شوووصاير؟
لاكنه مارد عليها الا بكف وكلمة جــــــــــب
فهد:جــــــــــــــــــــــــــب جب ولا كلمه تتحسبين انج مهمله وانتي قاعده عند خالتج ماوراج ريايل ياحمارة الروء
اليازي:انته شو تقوووول؟
فهد:جب اقول
##
##
##
هذي البدايه لقصة بعض ابطال قصة نــــــــــــــــــــــور
ارجو ان تنال اعجابكم
ودمتم وديمه العطا



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 13-12-2009, 10:04 PM
صورة عوبة حبيبها الرمزية
عوبة حبيبها عوبة حبيبها غير متصل
©؛°¨غرامي جديد¨°؛©
 
الافتراضي رد: روآية ][ نور ][ للكاتبة وديمة العطآ .. مميزة


بدايه حلوه موفقه بأذن الله وانا بعد اكتب قصه وعنوانها ( أيامي من غير عدولتي) وأتمنى انج تكونين من المشتركين وأشوف ردج على قصتي


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 13-12-2009, 10:11 PM
صورة آليـاقوتَ الرمزية
آليـاقوتَ آليـاقوتَ غير متصل
H2O
 
الافتراضي رد: روآية ][ نور ][ للكاتبة وديمة العطآ .. مميزة






يـآ مرحبتينْ ~
بدأإيـهِ حلوهـّ آويّ آويّ =$
موفقهِ خيتيّ "
يعطيجّ ألـفْ عاإفييهِ ..








..



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 13-12-2009, 10:37 PM
صورة الملك السابع الرمزية
الملك السابع الملك السابع غير متصل
©؛°¨غرامي مشارك¨°؛©
 
الافتراضي رد: روآية ][ نور ][ للكاتبة وديمة العطآ .. مميزة


sĩмőη

رووووووووووعه وبداع جميل
واسلوب رائع

وارجو تقبل مروري


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 14-12-2009, 05:21 PM
Malame7 Malame7 غير متصل
©؛°¨غرامي جديد¨°؛©
 
الافتراضي رد: روآية ][ نور ][ للكاتبة وديمة العطآ .. مميزة


يااااه حلو انا نشوف لها رواية جديدة .. مبدعة وديمة العطا بقووة ،، بس وين التكملة ؟؟

ياريت تكملين المسيرة لان الكاتبة معروفة بتنزيلها المنتظم ،، اتمنى ما تتأخرين بالنقل علينا

وشكراااا على حسن الاختيار


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 14-12-2009, 11:51 PM
صورة sĩмőη الرمزية
sĩмőη sĩмőη غير متصل
©؛°¨غرامي مشارك¨°؛©
 
الافتراضي رد: روآية ][ نور ][ للكاتبة وديمة العطآ .. مميزة


السـلام عليـكم و رحمة الله و بـركاته

مرحباً بكن جميعاً

و أعتذر على التأخيـر

سأضع التكملة حــالاً ^^


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 14-12-2009, 11:53 PM
صورة sĩмőη الرمزية
sĩмőη sĩмőη غير متصل
©؛°¨غرامي مشارك¨°؛©
 
الافتراضي رد: روآية ][ نور ][ للكاتبة وديمة العطآ .. مميزة



حبايبي والله خاطريه اعلق على كل ردودكم الحلوه والي استانست عليها لاكن والله شارده شرده البيت متروس وانا
على عجله احاول ارسل ياله ماينقطع الارسال لا عدنيه بكتب قصه عن مغامراتيه في تنزيل الاجزاء
الجزء الثاني
"نـــــــــــــــور"
اول ماوصل فهد بيتهم سحب اليازي لداخل البيت وما ان عدابها الدروازه انهال عليها بالضرب واتكفيخ
وعلى صريخ البنت والكل داخل البيت طلعو ايشوفون شو السالفه
كان يرفسها بريوله وهو ايرويها الصوره
فهد:ناشره صورج بالبلوتوث ياحماره هااه تتحسبين محد وراج...ولا تتحسبين محد بيعرفج
اليازي واهيه تصارخ:حرااااام عليك بطلنيه
واخيرا قدر زايد يبعده عنها لانه كان عند يدته وسمع الصراخ برا....ثبت زايد فهد على الجدار وعطاه كف على ويهه
زايد:صك اقولك
فهد:ماتدري شو مسويه الكلبه ماتدري طالع طالع مافي ريال مانتشرت صورتها عنده
زايد فتح عيونه على وسعهن لان الي كان هامنه ساعتها سمعته في الانتخابات سحب التيلفون من يده
وتم واقف ايشوف الصوره التفت لليازي
زايد:انتي هذي؟
طلع حينها فهد برا البيت وتلقاله مجتوم ربيعه ومن وراه ربعه الباقيين
مجتوم:فهووود شو الي سويته؟
فهد:الكلبه قاعده عند خالتها هذي الي كل يوم تصبح في بقعه ولاعبه لعوبها الصور هذي لازم تنمسح من عند الكل
مجتوم:اي صور؟
فهد:صورها الخايسه
مجتوم:ان شالله تقصد هذي؟
طالع فهد للصوره وانحرقت اعصابه اكثر
فهد:وانته بعد عندك الصوره؟
مسك مجتوم فهد من رقبته وقرب الصوره اكثر لويهه
مجتوم:طالع الصوره طالع الصوره زيين من متى هالممثله الهنديه بنت عمك
فتح فهد عيونه ايريد يستوعب:شوووه؟
مجتوم:فهووود بلاك وين راح عقلك...الحين هذي هيه بنت عمك...طالعها زيين
ثبت فهد عيونه اكثر على الصوره...واتذكر انه يعرف هالممثله زين ويذكر انه مره قال في خاطره انها تشبه اليازي لاكن كيف
صار الي صار وشاف ان الي في الصوره هيه اليازي بعينها
مجتوم:هاااه استوعبت ولا عدك؟
فهد وكل جسمه ايحسبه ولع نار من الي سووواه في بنت عمه والظرب الي ياهاا امنه معقوله انا
الي سويته؟
التفت فهد لباب بيتهم واشارلمجتوم انه ينتظره شوي
وبخطى ثقيله رجع وعدا عتبة الباب وشاف امه ويدته وخواته قاعدات عدالها وهيه طايحه على الارض تتالم من الظرب الي ياها
شنقه حينها زايد مره ثانيه
زايد:تعال اهنيه...انته ناوي تفضحنيه ..........سمعنيه زين يافهيييد...قسم بالله ان ماوقفت هالمشاكل انيه ارويك شي ماشفته في حياتك
ترا محد بيب اليه الطاري الغلط الا انته صك صك لين اتخلص هالانتخابات وعقبها بالعنتين انته وبنت عمك
تركه عقبها زايد وطلع
تم فهد ايطالع امه وهيه اتحاول اتوقف اليازي الي كان متاكد ان ظربه الها مابيخليها تقدر اتقوم
حس انه متلوم وبعدها طلع وخلاهم وهو رايح لسيارته
ساعدن البنات اليازي للدخول لداخل البيت واليده اتغوث وتتهندق على فهد والي سواه فيها
الجده اتوجه كلامها لام فهد:هذا ولدج الي ماعرفتي اتربينه طالعي شو سوا بالمسكينه بروحها يتيمه
بروحها يتيمه ومالها حد.... يتفرص فيها لحمار ماعليه وين بيروح عنيه والله انيه وراه
وانيه ارخه بذاالعريا على راسه مسود الويه
كان زايد يسوق سيارته بسرعه وهو متضايق من سالفه فهد واول ماوصل لشركته حصل بتان واقفين جدام البوابه
زايد:ييييييه هذولا بعد من وين طالعين اليه
نزل زايد وهو يرفع طرف سفرته على فوق وفي عيونه نظرات غيض
زايد موجه كلامه للبتان:شوووه شو موقفنكم اهنيه؟
البتاني:بابا انا والله مسكين فقير ...هدا مسؤل قووول لازم سوي فنش
حس زايد بالدم ايفور فيه وصرخ على البتاني:منو مسؤل مال انته؟
البتاني:عبد الرزاق
زايد:زييين هالي قاصرنيه عبد الرزاق ماعرف ايصفي العمال الا الحين ماعليه ارويه الكلب
عقبها التفت للبتاني:شوووف ترا ان شفتك انته ولا واحد غيرك مره ثانيه جدام الشركه سفرتكم بلادكم
مب بس طرد من الشركه ياله فارج انته وربعك
البتاني:باباه انا والله مسكين
زايد:توك اتقول مسكين وانته لاعب بالنعمه من زمان ومهمل شغلك ياله فارج
رجع زايد لسيارته ولسانه مابطل شتم على المسؤل والعمال الوقت كان عنده محرج لهذي المشاكل الي يشوفها قامت تطلع له مره وحده
في المكتب ماوقف صريخه على المسؤلين والموضفين لين مادخل عليه بدر وقعد ايهديه
بدر:خلااااص يازايد خلاااص
زايد:هذولا هب ناوين اليه على خير
بدر:هد اعصابك يا اخي انته بس متوتر من الانتخابات
اي انتخابات والزفت فهووود طالعليه بمشاكل شرف وصور بنت عمه وهو مسطل مايعرف بنت عمه من ممثله شاف صورتها
مسوليه فيها مريله دابغ لبنيه في المدرسه جدام الي يسوا والي مايسوا ...الحين هالسالفه لوتوصل
هل الفضايح جان فضحونيه فيها والكلب عبدالرزاق ماعرف ايصفي العمال الاالحين
بدر:خلاص انزين خلاص انته اهدا وكل شي بنحله ماعليك
قعد زايد على كرسيه وهو يزفر بغيض



خليفه كان توه طالع لدومه يوم ياه اتصال
خليفه:الو مرحبا
نوره:حرام عليك الي سويته فيه
خليفه:عفوا منو معايه؟
نوره:لييييش ليش اتشلهم عنيه انته تدري ان ماليه حد في الدنيا غيرهم ...شو اسوي عقبهم يعني؟
خليفه وبعده منصدم من هالاتصال:عفوا يا اختي...انتي الظاهر مغلطه
نوره وصوتها باين فيه الصياح:مب انته عم عيال المرحوم خلف
خليفه:هيه نعم
نوره:انا انا نوره خالة لعيال
خليفه وتوه بدا يستوعب السالفه:عظم الله اجرج اختي في الوالده
نوره:محد تم اليه عقبها غير لعيال وانته خذتهم منيه
خليفه:هذولا عيال اخويه والمفروض من زمان ماخذنهم لاكن عشان خاطر يدتهم خليتهم واظن الحين
محد الهم غيريه.....اسمحيليه اختي الله ايعوضج عقب الوالده وانا مظطر اسكر لانيه تاخرت على الدوام
سكر خليفه عنها وانبطت نوره اتصيح مش عارفه شو تسوي هذا ليش مش راضي يفهم بس شو تفهمه؟
ولان نوره مالها حد طلبت منها صديقتها غاليه اتي وتقعد عندها ورضت نوره مظطره
خليفه بعد الدوام راح لبيت خالته يسال عن لعيال
وحصل موزه اخت اميره الي اهيه اهتمت ابهم اكثر من اميره
خليفه:اخبارهم ياموزه؟
موزه:شو بقولك يا خليفه البنتين الصغار تمن طول الليل ايصيحن يادوبهن الفجر رقدن عقب المووت واختهن هاذي الياهل اتحسبها متلومه فينا
طول الليل شاله اختها على ظهرها اما لعيال ماطاعو يدخلون داخل يرقدون تمو في الميلس
خليفه حس بهم كبير يجثو على صدره
خليفه:والحل يعني ....انا شو بسويبهم اذا وديتهم بيتيه؟ طلبت اليوم خدامتين بين على الليل
موزه:الله ايعينك والله
خليفه:كلمي اميره توافق على العرس بسرعه انا محتاج الها
موزه:وربك تتحسبها قد المسؤليه.....هذي حطت راسها من المغرب ولا درت ابهم
خليفه:سيري ماعليج امر هاتي اليه اليهال بوديهم البيت
موزه:خلهم كم يوم وعقب بيتعودون على المكان
خليفه:لالا ...لا اوديهم بيتيه يتعودون عليه احسن وانا بتم معاهم ان شالله اخذ اجازه


عقب ماعرف ابو فهد راشد بعملة ولده في بنت اخوه واقع فهد وهدده مايتعرض الها مره ثانيه ولزمت الجده انهم لازم ايبونها عندها
اتعيش جدام عينها عن الافكار السودا الي حاطنها فهد في راسه
اليازي عارضت في البدايه لاكن عمها قال الها انه مستحيل ايخليها ترجع اتعيش عند خالتها عقب ماعرف من فهد ان الخاله
حرمه راعية سيرات ورغده لكل الاعراس الي تصير في لبلاد
طول اليومين واليازي مب راضيه تطلع من الغرفه بسبب ان الكدمات عدها معلمه في ويهها اما فهد فكان يقضي يومه كله برا البيت ويحاول انه مايتصادم معاها وطبعا مافكر انه يعتذر
دخلت روضه على اليازي الي فضلت تقعد مع مي في غرفتها
روضه:اخبارها بنت العم اليوم
ابتسمت اليازي:زيين مانشكي باس
روضه:احم ا ا ا اقول يزوي خالتج كانت اهنيه
اليازي:صدق...عدها اهنيه ولا راحت؟
روضه:لا راحت ....بصراحه لاتزعلين منيه ....خالتج عقت كلام هب عدل على يدووه
اليازي نزلت راسها تحت لانها تعرف طريقة خالتها..عقبها رفعت راسها:ويدوه زعلت؟
روضه:لا لا يدوه عطتها الذن الصمخا....بس صدق اليازي انتي ليش قعدتي عندهم ماييتي عندنا
اليازي:لان خالتيه قالت اتم عندهم عشان ادرس مع هيه بنتها يعني انتم مع بعض دوم
روضه:وكنتي مرتاحه عندهم؟
اليازي:عاادي
روضه:فديتج يا يزوي والله من زمان واحنا نباج تين تقعدين عندنا..بتستانسين عندنا اكثر
ووووو بخصوص فهوود انسي السالفه هذا مخه تنك الي مايعرف ايفرق بينج وبين الممثله...اتخسي عاده اهيه تي عند زينج
ابتسمت اليازي وتنهدت بالم


ياب خليفه خدامتين طرشهن زايد من فلته عقب ما قاله خليفه عن لعيال
ورتب امورهن مع اليهال لاكنه ماقدر يطلع ويخليهم وتم طول اليوم معاهم لاكنه لاحظ انهم ما طاعو ياكلون والبنت طول الوقت لاصقه في اختها العوده
اذا العوده محتاجه لعنايه كيف ايخليها تعتني بالصغيره
خليفه:هند...تعالي حبيبتي
هند:نعم
خليفه:حبيبتي لاتمين طول الوقت شالتنها...ظهرج بينكسر
هند:عاد اهيه تصيح
خليفه:انتي عودتيها ..انتي اهناك دوم اتشلينها
هند:لا اهيه اهناك ماتصيح بس اهنيه اهيه تبا خالوه نوره
خليفه:هااه خالوه نوره؟ هييه صدق انا نسيت سالفتها
هند:خالوه بعد ماتت؟
ونزلت دمعة هند الي اول مره ايشوفها خليفه
خليفه:لااااا منو قال انها ماتت؟
هند:هيه طاحت وماقامت وشلوهاا وودوها داخل مثل ما شلو يدووه
اخذت عقب هند اتصيح
مسكها خليفه ولوا عليها وزاد صياحها وصاحو الباقين معاها الا ناصر الكبير كان ايطالعهم بعيون حزينه
خليفه:لا لا لا ماماتت والله العظيم ماماتت
هند:انريد انشوفها اذا صدق ماماتت
خليفه:حبيبتي الحين ليل وباجر باذن الله اوديكم صوبها
ناصر:عند منو اهيه الحين؟
خليفه:هااه عند منو!!!؟....مادري مب في البيت
ناصر ودموعه بدت تتجمع:يدووه ماتت هيه منو عندها؟
خليفه:ناصر حبيبي الصياح مب للريايل وانته ريال امسح دموعك فديتك
مسح ناصر دمعته:اكيد صديقاتها بيروحن عنها ويدوه ماتت منو عندها؟
خليفه:انته مستهم عليها فديتك ...لا تخاف اكيد حد من هلها عندها
ناصر:محد محد
خليفه:كيف محد...ماعندها عمومه وخوال
ناصر:لا
خليفه:انته اكيد ماشفتهم...وهم اكيد موجودين البيت يوم العزا كان متروس بس انتم ماتعرفونهم
فديييت انا الي مستهم على خالته....باجر ان شالله بوديكم صوبها اوكيه
هز ناصر راسه بنعم
خليفه:ياله حبيبي كلولكم لقمه...ماكلتو شي من ييتو
دانه ام اربع سنوات:احنا منريييد ناكل هذا ...هذا يعور في البطن انريييد عيش ودهنه ورووب
خليفه:بس ....ماطلبتي طال عمرج الحين انسوي العيش والدهنه والروب
خليفه:وانتي فطامي شو تبين
فطامي:غناقن
خليفه:شوووه؟!!!!!ّ
ضحكت هند وناصرابتسم
طالعهم خليفه:ممكن مترجم؟
هند:نقانق هههههه
خليفه:ااااااا نقانق ....وليش تاكلين نقانق فديتج؟
هند:لان خالوه اتحب النقانق وهيه تاكل معاها
خليفه:زين زين انييب الغناغن ههههه
التفت لاحمد:وانته يا احمد باشا شو طلباتك
احمد:اريد خالوه
خليفه:احنا شو قلنا باجر بنروح صوبها
قام خليفه ووصى الخدامه بالطلبات اليديده وطلب من الثانيه اتروح اتسبحهم
لاكن الوضع اتصعب اكثر بالليل اول مابدت فطامي اتصيح وهند كانت راقده عنها والخدامه تعبت من كثر
ماتحوط ابها في البيت قرب خليفه منهن وقال للخدامه تعطيه اياها لاكنها اول ما مديده الها قعدت اتصارخ رافضه اتروح صوبه
خليفه:خلاص حبيبتي خلاص....شو فيها هيه ماكلت؟
الخدامه:كلش مافي اكل
خليفه:ليييش ترا يبنالهم الي يريدونه
الخدامه:مافي معلوم.بس هو يشوف اكل بعدين ايروح داخل غرفه نوم
خليفه:لاحول ولا قوة الا بالله......والحل يعني.....انزين يمكن تريد تشرب رضاعه
ماحاولتي معاها...هذا رضاعه
واشار الها
كانت الخدامه ضاجره من صياح فطامي وهزت راسها وعقب مشت عنه واهيه اتهز البنت بقو
خليفه:تعالي تعالي نزليها وفارقي
خذ خليفه البنت الي كانت ميته من الصياح عارضت اول شي وعقب استسلمت للنوم على كتفه
ارتاح خليفه يوم رقدت وكل ماحاول يحطها في لفراش قامت وخذله ساعه ايهديها لين مارضت ترقد في فراشها
لاكن المشقه ما انتهت لان دانه قعدت وتمت اتصيح
خليفه:لاااايادانوه انتي عوده ليش اتصيحين ...حاول ايسكتها خليفه لاكنه ماعرف بعدها سكتت دانه واهيه اطالعه باحراج
خليفه:شبلاج.....؟....
نزل خليفه عينه لتحت وشاف انها سوتها
خليفه:لااااااااا...ايوالله البلشه....ليش حبيبتي ليش ماقلتيليه اوديج الحمام
كثير من اليهال تيهم فاليل حالات صياح الاهل مايعرفون شو فيهم واتحصل الاكثريه يتزقرهم ويصرخ عليهم اذا ماعرفو سبب الصياح
والسبب انهم ايريدون ايروحون الحمام بس مش قادرين يتحركون من اماكنهم
اتصل خليفه على زايد في هالوقت المتاخر
زايد:الووو
خليفه:الحق على خاااااالك خلاص وقفت عنديه
قام زايد فزعاان وصرخ:شبلاااااك؟
خليفه:عيال خلف اخويه يننونيه
زايد:الله ايخس ابليس موعنيه بس عشان جذيه....وين الخدمات؟
خليفه:مب قهرات اليهال
زايد:ايخسن باجريتسفرن
خليفه:لا ياريال ماريدهن ايسون الحاجه مب من خاطرهن....اليهال الصراحه هدو حيلنا اليوم ماعرف شو يرضيهم
زايد:اقوول الخال انا ورايه اجتماع مهم باجر....اتصل على الخطيبه واشتكلها الحال يمكن اتحن واطيع اتعرسون بسرعه
خليفه:ماعليه بتردك الحايه


بعد مارجع مروان وربعه من القنص مر مروان على يدة زايد الي ساكنه عدال بيتهم
وكان لابس شورت بلون الجيش وفانيله زيتونيه وكانت واقفه مع دريولها برا البيت
مروان:هاااه عذووب اخبارج
اليده:انته ييت يالهرم وينك من زمان؟
مروان :اقنص
اليده:هيييه خلصت غنميه وسرت تقنص مكان ثاني
مروان:هههههه مصره انيه انا الي اسرق غنمج
اليده:شااااايفتنك بعويناتيه
مروان:عاده هذي سالفه جديمه ذليتينيه ابها
االيده:امس مسروووقه وحده منهن
مروان:لحوووووه سيري سيري ولا ترانيه اليوم كلهن بحملهن في المازدا
لوحت اليده بعصاها اتريد تضربه لاكنه شرد عنها
اليده:الخلا انته ولبسك هذا الي تقول جنك بنغالي
ركض مروان لداخل بيته وهو يضحك وكان بدر اخوه توه طالع
مروان:هاااه ابو الشباب على وين
بدر:بسير لزايد هاليوميين مره الذبابه ماتخطف عند خشمه...اقول انته متى بداوم
مروان:الله ايخليك لاتيب اليه طاري الدوااام...باروووح احط راسيه وارقد
بدر:هههه وراك وراك


حاولت روضه في اليازي عشان تسرح المدرسه لاكنها رفضت بعد الي صار الها
اليازي واهيه اتغطي راسها :ماااااريد....ماليه ويه اصلا اروح وانا مسحوبه من المدرسه وشنطتيه وعباتيه في الصف
روضه:وشو المشكله اذا فهمتيهن السالفه وقلتيلهن ان الموضوع كان فيه لبس
تمت اليازي ساكته ومي ادق روضه عشان تتركها
طلعن برا الغرفه
مي:تراج قذيتيها خلاص ماتبا اتروح ...صدقها انا لوكنت مكانها مادري شو بسوي
روضه:هذي اخر سنه الها تبينها اتضيعها
مر عدالهن فهد
فهد:اصبحن شبلاكن
روضه بنظرات متضايقه:كله منك.....ماتعرف تتفاهم مره الحين السنه بتضيع عليها والسبه انته
فهد:منيه هذي؟
روضه:اليازي هب راضيه اتروح المدرسه من عقب اليوم هذاك
سكت فهد وتم ايطالعها
روضه:لبنيه مفتشله من ربيعاتها والاداره
فهد:وليش ماتروح واتفهمهم السالفه
روضه:ماطاعت
فهد:برايها ....بتم فتره وعقب بتروح
طلع فهد وركب سيارته واتوجه لكليته وهو ايطالع صورة الممثله الي فكرها اليازي
"صدق انيه متنح ولا هذي وين وهذيج وين انا اصلا ماتذكر شكل اليازي زين احس ويهها يوم احاول اتذكره مش مفهوم بس ليش
ربطتها بالممثله هذي..هيه لو تطلع بس واشوفها يمكن اتاكد اذا كانت اتشابهها ولا لا"

عدا اليوم وخليفه نسى وعده لليهال انه ياخذهم لخالتهم واخر الليل اتذكر اول مابدت المعاناه مره ثانيه
خليفه:ياربي انا بس لو اسال خالتهم كيف ترقد هالبنت جان زين
سال الخدامه اذا كلو شي وقالت انهم بس كلو بطاطس مقليه وحلويات الدكان
خليفه:انزين والعيش ماكلوه؟
الخادمه:لا
اتصل خليفه لاميره وقعد يشتكيلها الحال
اميره:خليفه حتى انا تعبانه من موضوع عيال اخوك
خليفه:يعني كيف تعبانه اتحاتينهم
اميره:انته مب فاهمنيه....اسمع انا مستحيل اتزوجك قبل لاتلاقي الهم حل
خليفه:يعني شووه يا اميره تبينيه اعقهم في دار الايتام
اميره:ماقلتلك عقهم في دار الايتام...لاكن خليفه افهمنيه....انا اريد ابدا حياتيه معاك من الصفر بدون مانكون مرتبطين بحد حتى انته اريد
كل ابوتك وحنانك لعيالنا باجر يوم بنييب عيال انك مكتفي من تربيتهم
خليفه:اميره اسمحيليه بسكر... كلامج يرفع الضغط بصراحه
سكر عنها وتم ايحاول ايسيطر على الرعشه الي بدت تتملكه من القهر الي يحس به
قام خليفه وطلع من غرفته:وين بلقاها ولا وين بلقاها
رن تيلفونه:الووو
زايد:تعال اليه الحيييييين مصيبه مصييييبه وطلعت اليه
خليفه:شعندك؟
زايد وهو ايحس انه بياكل نفسه:اقولك مصييييبه....الكرسي بيضيع خلاااااااص
خليفه:هد اعصابك يابويه مايسوا علينا هالكرسي
زايد:بموووووووت الحق عليه ولاتراك بتحصلنيه ميت

##
##
##
ودمتم وديمه العطا



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 14-12-2009, 11:57 PM
صورة sĩмőη الرمزية
sĩмőη sĩмőη غير متصل
©؛°¨غرامي مشارك¨°؛©
 
الافتراضي رد: روآية ][ نور ][ للكاتبة وديمة العطآ .. مميزة


"نــــــــــــــــــــــــــــــــور"
الجزء الثالث
ركب خليفه سيارته بعد ماوصى الخدمات على اليهال وعطاهن رقمه اذا صار اي شي واتوجه لبيت زايد
اول مره يسمع زايد يستنجد به عمــــــــره ماسوااها ولاتخيل انه في يوم بيسويها اظاهر ان كرسي الشعب
يننه
في الطريق رن تيلفونه
خليفه:الوووو
نوره بصوت مثقل بالالم:اخبااارهم
خليفه هز راسه ايحس انه متشتت:منو معايه؟
نوره:اخبار لعيال طمنيه عليهم
خليفه:اااه انتي الخاله
نوره:قووول لي هم بخير؟
خليفه:بخير بخير ...اسمحيليه انا بسكر
نوره:ليش انته دوم تصدنيه انا ماريد غير انيه اطمن عليهم
خليفه:لا...لالالا لاتفهمينيه غلط انا صدق اقولج عنديه ظرف صعب الحين وبكلمج عقب المره الي فاتت ماخزنت رقمج
لاكن اوعدج المره هذي بسويلج...حتى انا محتاج اكلمج شويه بخصوص لعيال
نوره:هم بخير وانته شبلاك شي صاير لحد منهم؟
خليفه:لا لا هم بخير والله بس انا عنديه عنديه ظرف مظطر اسكر واوعدج اسويلج الليله واذا نسيت سويليه عقب ساعتين على الاقل
نوره:زيين بنتظرك
خليفه:يالله فمان الله
سكرت عنه نوره وتمت تمسح دموعها...فرقى امها واليهال صعبه عليها وخصوصا انها لقت نفسها
عاله على بيت اهل صديقتها
وصل خليفه فلة زايد وراح داخل بعد ما فتحو له البوابه الرئيسيه وقف سيارته جدام الباب الكبير ونزل
وهناك حصل بدر في طريقه وسلم عليه وعينه على الي قاعد عند الكراسي ووحده من ايديه مطوايه بشاش
خليفه:شبلااه؟
كانت عيون خليفه زايغه من منظر زايد
بدر:تعال تعال لاتيه الحين ماهقينا انهديه ياليت انه هدا اصلا
خليفه:شو السالفه شبلاها يده؟
بدر:من الغيظ والقهر كسر الدنيا علينا...زين انك مالحقت عليه قبل اشوي
صريخه وصل العرش...وعندك نصف العمال فنشو اليوم
واخرتها ظرب بيده على الطاوله كسرها ويرح يده
خليفه:شعنده شقاهرنه....خلنيه اروح اشوفه هو قاليه تعال...هذا كله من كرسي الشعب الي بيخبلبه
بدر:خله شوي وتعال بفهمك السالفه
قبل يومين وصل زايد اتصال رفع ضغطه وتم ايصارخ على الي متصلله ويقوله ان كل الكلام الي
يقوله اشعات عشان يخسر الانتخبات وسكر في ويهه
لاكن الاتصال ياه مره ثانيه وقاله ان عنده ادله تثبت صحة الكلام ونفس الشي زايد ماصدقه وسكر التيلفون في ويهه
كان زايد حينها في المكتب عقب ماسكر التيلفون والتفت على بدر
زايد:شفت شفت الحقد الي في قلوبهم قايمين ايطلعون اشعات مالها صحه وماتدخل العقل
بدر:شو السالفه؟
زايد:انا داري ابهم من وين ايبون هالكلام اصلا كيف خطرت الهم الفكره
بدر:مابتقول اليه
زايد:كلام فارق ماريد اعور راسك فيه
لاكن الاتصال رجع مره ثانيه والريال قال كلام خلا زايد يعيد التفكير فيه وعلى طول طرش ناس تتاكد من صحة الكلام بس عشان مايخلي الهم
حجج عليه
لاكن الداهيه ان الكلام كله طلع صح وحينها انهار زايد مش راضي يصدق هالكلام
خليفه فتح عيونه منصدم من كلام بدر:اكيد هالكلام
بدر:ابو درويش ريال ثقه وبروحه راح وتاكد وشاف الاوراق
خليفه:يمكن كله تزوير
بدر:مادريت ان طيارتيه باجر الصبح عشان اروح اتاكد واييب الاوراق له يشوفهن بعينه
خليفه:كيييف ووين احنا كل هالسنين مادرينا؟ او درا اهو على الاقل
بدر وهو ياخذ نفس من حال صديقه:مااادري؟
خليفه:انا خونت اروح اكلمه
بدر:هههه والله لو يشوفنا نضحك انها تحل السلطه علينا
خليفه:اااااه الله يعيننا
قام عقب خليفه وراح لزايد الي كان مثل الاسد الي يزائر
قعد خليفه عداله وشاف ان باله بعيد عنه...اول مره خليفه ايشوف زايد بالمنظر هذا فاصخ الكندوره وشعره منكوش مع نزول بعض الخصايل على يبهته
خليفه:زاايد......زاااايد
التفت زايد لخليفه وكانه يحاول يستوعب منو الي قاعد ايكلمه
خليفه:زايــــــــد يابويه هونها وتهون
وقف زايد وكان بكلمة خليفه اتذكر السالفه وبدا يصارخ
زايد:اي اهونها واتهوووون هذي مصيبه مصيبه....انا داري من وين ظاهرتليه
هذي السالفه لو تدريبها الصحافه باجر انفضحت وكلت تبن احصل الكرسي .......انا انا زاااااااااااايد بن حمد الراشد
الي طاريه في كل مكان .....وقريب اخذ الكرسي ....انا الي طوووول عمريه رافع راسيه فوووق ولا عليه من حد
ادوووس الكل ولا اخاف حد يدوسنيه.....يستويليه جذيه........اناااااا انا ياخااااال تطلع اليه بنت عم امها باكستانيه
انااااا اتخسي اتخسي اتكون بنت عميه ......انا بعرف كيف ارويهم الحيوانات الي مرتبين هالسالفه
برووووويهم برويهم زايد على شوووه يقدر
يتحسبون انيه بستسلم الهم ايخسووون
خليفه:زايد زايد يابابا هد اعصابك السالفه ماتستاهل
زايد:كيييييف ماتستاهل اقولك بنت باكسسسسستاااااانيه...انا بنت عميه باكستانيه اتهبي
خليفه:لحووووه انزين يابويه هد اعصابك لين نتاكد
زايد:بعدمهاااااا من الوجود لو تطلع السالفه صدق
طالع خليفه وبدر بعض بنظرات
خليفه:استغفر الله ان شالله جذب بس انته اهدا ماينفع هالكلام...مايسوا عليك
الشيوخ الي هم شيوخ ياخذونهن من كل ديره شو مستوي عليك انته
زايد:باجر بتعرف شو مستوي عليه
قام عنهم زايد واتوجه للسلم لفوق لاكنه قبل لايطلع فوق التفت لبدر
زايد:لاتنسى باجر اتروح وتتاكد اليه بنفسك..والله ما اعديها على الي مرتب هالموضوع
ورجع زايد يخطي كم خطوه لخليفه وهو ياشر لنفسه
زايد:انا ...انا ياخال بنت عميه باكستانيه هاه باكستانيه ويقولك عايشه طول حياتها في باكستان
انا اليوم بينسبون هالبنت اليه والله بيبطون مانزلت الهم راسيه
خليفه:انته يا زايد مكبر الموضوع وطلعت بنت عمك شو المشكله
صرخ زايد:اقوووولك بتبطي بتبطي والله لا اخليهم يندمون على كل هذا...لا تنسى يابدر
بدر:ان شالله
راح زايد وزفر خليفه زفرة بقل الحيله
رجع خليفه لفلته وحصل اليهال كلهم قعود
خليفه:ليييش واعيين
هند:دانه اتزوع وفطامي اتصيح
خليفه:اتزوووع ليش؟
ناصر:كلت حلاوا وايد
خليفه:لحوووووه ...زين ناصر انته تعال معايه بنوديها المستشفي ولا اقولك خلك عند خواتك بوديها انا
وشل خليفه البنت ووداها المستشفي خلااااااص انهد حيله نفسه بالشبريه ايحط راسه ويرقد خذ
الدوا ورجع وحصل الخدامه واعيه عطاها البنت وراح فوق بعد ماتاكد ان الكل رقد
حط راسه ويادوب الرقاد ساحبنه اتصلت نوره
خليفه بلا اراده:الوووووو
نوره:اسفه علازعااج بس انته ماتصلت
خليفه:لاااااا عاااادي
نوره:انته راقد
خليفه:ماااااادري
ابتسمت نوره لان صوته ايقول انه راقد
نوره:طيب انا اسفه ازعجتك
خليفه:لا والله صوتج حلو
فتحت نوره عيونها:ا ا اانته راقد صح
خليفه:انا تعباااااااان..والله تعبااان
نوره:سلامتك ا االيهال تعبوك
خليفه:اليهااال .....وزااااااااااايد ......وصوووووتج
نوره:احم...بلاه صوتيه؟
خليفه:عذااااااااب
احمر ويه نوره وسكرت التيلفون في ويهه
كان قلبها ايدق بسرعه
نوره:هذا هب صاحي...ان شالله ايكون راقد ومايحس بالي ايقوله
اول ماقام خليفه شاف اتصال نوره الي كان متاخر
خليفه:انا متى كلمتها والله ماذكر يييه لايكون خرت معاها في الكلام
اتصل خليفه عليها وياه صوتها نعسااان
نوره:الووو
خليفه:احم الاخت نوره معايه؟
اعتدلت نوره وزادت دقات قلبها وهيه اتشوف الرقم ماكانت تعرف اسمه فتعمدت تساله
نوره:منو معايه؟
خليفه:انا خليفه....عم عيال خلف الله يرحمه انتي ماعرفتينيه؟
نوره :هيه هيه اسمحليه
خليفه:اظاهر انيه وعيتج من الرقاد
نوره:اااحم لاواعيه
خليفه:ا انتي سويتيليه البارحه تيلفون؟
نوره:هاااه هيه ...سويت ويوم شفت انيه وعيتك من الرقاد قلتلك بكلمك باجر
خليفه:ايواااا اا اسف البارحه نسيت اسويلج
نوره: ماعليه...طمني على اليهال
خليفه:شو بقولج هم بخير بس ماياكلون....كله عيشتهم من الدكان
نوره:ليييش ليش تيبلهم من الدكان تراه ايسد نفسهم عن العيشه
خليفه:مااادري انا تارس الهم الثلاجه.....واكل البيت مارضو ياكلونه اتقول دانوه ايعور في البطن
نوره:فدييييت الدانه...تولهت عليها والله....وفطامي اخبارها
خليفه:ام الغناقن سرج حالها
نوره:هههههه فدييييتها....اريد اشوفهم
وشهقت نوره وهيه تصيييح
خليفه:هاه هاه هاه لاتصيحيييين الحين اطرش الدريول ايبج صوبهم
نوره:خلهم ايونيه
خليفه:على راحتج بقول للخدامه اتلبسهم وتجهزهم وبعطي الدريول رقمج عشان ادلينه على البيت
حتى هم متولهين عليج
نوره:مشكوووور وماتقصر....اهم شي اشوفهم
خليفه:زيين عيل باروح ابشرهم
نوره:مشكوووور
كانت تمسح دموعها وتحاول تمنع الصيحه ترجع الها
لاكن خليفه حصل دانه مصخنه واتواقع مع الخدامه الي ما اعطتها الدوا
ونسى سالفة نوره الي تمت على اعصابها تنتظر وتنتظر بدون فايده



في باكستان وفي احدى المناطق الجبليه الي كانت البيوت مبنايه على الجبال والي يشوفها من بعيد مايشوف
للجبل اي اثر غير منظر البيوت وهيه مبنايه عدال بعض وفوق بعض واسفل الجبال الوديان المبهره للي يشوفها وكان بيت
نـــــــــــــــــور احد البيوت الموجوده على الجبل كانت تمشي وفي يدها عصاتها الي تهش فيها
عيال الجواميس الصغار
وعلى راسها العباه المعروفه عندهم مخرمه عند العيون نازله لين نصف ريولها ومن تحت العباه لبس البنجاب
صروال وسيع وقميص نازل لين وسط ريولها وكانت ايديها متروسه بالحيووول
وفي ريلها الخلخال
دخلت من الباب وانتبهت للريالين الي واقفين مع احد قرايب جدتها وهيه عايشه عنده حاليا
صرخ الريال الباكستاني وكانت هذي طريقتهم في الكلام بصوت عالي ايكلم نور ويطلب منها اتروح تيب الاوراق الي عندها
ردت عليه نور بنفس اسلوبه الصوت العالي وركضت لفوق عن طريق سلم خشبي في نصف الحوش وكان البيت
مفتوح من فوق
بدر تم عيووون وفكر ان زايد لو يشوفها اكيد انه بينتحر وتم يدعو ان الاوراق اتكون كذب لانه حسب ما قاله الريال
ان عم زايد ياهم من زمان في رحلة قنص
وانه انصاب في القنص برصاصه وساعده جد نورواسعفه وقضى عندهم فتره اتعرف حينها بام نور وطلب الزواج منها
وبعد سنه وكم شهر بعد ماولدت ام نور بنور
رجع على اساس انه يرجع واييب زوجته معاه لاكن حصل انه توفى قبل ما يعلم اخوه ابو زايد بموضوع زواجه
والاوراق الي طلبها الريال هيه اوراق الملجه وشهادة الميلاد وصورة جواز ابو نور وبعض الصور له مع زوجته الي توفت وعمر نور سبع سنوات
الاتصالات الي كانت تي زايد كانت من الريال الي عايشه عنده نور ونور اهيه الي طلبت امنه يتصل عليه بعد ماشافت صوره في الجرايد وشافت تشابه الاسما
كان يوم عيد عندها واهيه اتروي صديقاتها صور ولد عمها واتقول ان الها عايله ولازم ترجع لموطنها الاصلي
قربت نور منهم وفي ايديها الاوراق والصور وماكان ظاهر منها شي
كان بدر وابو درويش الي يعرف يتكلم باكستاني واقفين ينتظرون عطاهم الريال الاوراق ووقف بدر ايطالعهن وايحس بماي بارد ينصب عليه
الموضوع صح يعني الحين كيف ايقول لزايد
اتصل بدر لخليفه وقاله ايروح عند زايد عشان ايهديه اذا قاله
كان زايد في ميلسه ينتظر اتصال بدر الي تاخر عليه فقرر يتصل اهو بنفسه وكان على اعصابه
بدر انصدم من المتصل ولازم ايرد
بدر:الوو..هلا زايد
كانت نور ملتفته للجهه الثانيه واول ماسمعت صوت بدر التفتت له تريد تسمع شو يقول وشو هالهجه الي يتكلم ابها
بدر:زااايد الموضوع طلع جد والي يكلمك من كم يوم موجود اهنيه ايقول ان بنت عمك اهيه الي طلبت امنه
وقف زايد وهو ثاير:اتعمعمت في خصف....الله يلعنــ......استغفر الله....انته متاكد من الي تقوله
بدر:هذيييه الصور بطرشلك اياهن على المسج مادري اذا اهو عمك بس يشبهك واييد
زايد:ماعرف الاباكستانيه شووووه قلت الحريم
بدر:مافيها شي يا اخي
زايد بصريخ:لاتبط جبديه انته الثاني
بدر:زين زين هدي اعصابك
زايد:قله بعطيه الي يريده بس مايتكلم ابها ولا ييب طاريها لحد مستعد ادفعله مليووون
بدر:مايصير الكلام هذا انته شوووه تبا تفتح عيونه على شي مب منتبه له
زايد:لااا والله وشو فتح عيونه عيل الحين الا يوم شاف...انا شولينه وصلت
بدر:بنت عمك اهيه الي طلبت امنه ايكلمك
زايد:لاتقووول بنت عمك...اتخسي
بدر:لحوووووه....انزين لبنيه تريد اتروح الامارات
زايد:شو شوسمعنيه شو قلت ......لين اهنيه واتوقف اللعبه هذي خلها منثبره اهناك وياويلها ان شبرت الدار اهنيه
كل الاوراق والصور الي عندها خذها...وقلهم كل الي يبونه ياخذونه بس ينكتموووووون
بدر:ماعليه بحاول
زايد:لاتحاول نفذ بالغصب لازم ايوافقون
اخبر بدر ابو درويش بطلباتهم وتكلم معاهم ابو درويش بالباكستاني
حينها سحبت نـــــور الاوراق من ايديهم وركضت لفوق وهيه تقول بعض الكلمات الغير مفهومه
بدر:شبلاااها؟
ابو درويش:رافضه الي نقووله...ماتبغي...تقول لازم تروح الامارات
بدر:هب على كيفها خبر الريال هذا اننا مستعدين ندفع له الي يباه بس ماييب طاري انها بنت عم زايد
التفت ابو درويش للريال وقاله ضحك حينها الريال وقاله انه مش طمعان في لفلوس وان لفلوس وسخ الدنيا
وقاله انه الامر بيد نـــــــــور بس
بدر:لحوووه شو يعني هذولا كيف بيفهمون السالفه....هذي لو تسافر اهناك ذبحها زايد وفك عمره
خليفه حس براسه ايعوره من كثر ما زايد كان يصارخ ويتحلف ويتوعد بعد مارد عليه بدر برد نــــــــــور
خليفه:خلاص يابوي خلاص هذا امر مقضي فيه انته مابتقدر اتغير فيه شي
زايد:الا اقدر واقدر اسوي اكثر مماتتخيل.....ارويها بنت الباكستانيه....تبا تحط راسها في راسيه
خليفه:ياخي ليش تاخذ الموضوع بتحدي انته كل حياتك تحدي في تحدي....يمكن لبنيه نيتها
شي ثاني تبا اتشوف بلاد ابوها بلدها الاصلي
زايد:يعل مالها بلد قل امين........انا ماهمتنيه ياخوفيه بس العلل الي اهنيه يدرون ابها
خليفه:شو هامنك انته في الدنيا غير نفسك
زايد:هييه من شو بهتم غير من نفسيه...متى قد اهتميت انا بحد اصلا.اااووووف



شل فهد كل كتبه ومن كثرتهن كانن مغطيات الطريق جدامه لاكنه يعرف طريقه زين
عند اخر السلم بعد مانزل اصطدم بشخص وطاح اهو والشخص والكتب فوقهم
حطت اليازي يدها على يبهتها بعد ماظربها واحد من الكتب على راسها واتفاجئت بالي طاح بحضنها فجئه
اتصنمو في ثنينه وعيونهم في بعض..كان ويه فهد قريب منها وهو ايطالعها"يخخخخخخخرب بيتك يافهووود وين هذي ووين هذيج
فرق الليل من النهار
اليازي:احمم ممكن
اعتدل بسرعه فهد وقام عنها
فهد:ااحمم....كنت كنت شاال الكتب ماشفتج
نزلت اليازي راسها تحت وتعدته رايحه فووق وعيوون فهد تتبعها حس حينها بضيقه من الي سوااه
يعني اهوه من البدايه مااعتذر منها يعتذر منها الحين مايصير
##
##
##


وديمه العطا



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 15-12-2009, 01:49 AM
قلب الأحزان قلب الأحزان غير متصل
©؛°¨غرامي جديد¨°؛©
 
الافتراضي رد: روآية ][ نور ][ للكاتبة وديمة العطآ .. مميزة


رائعة وديمة العطا ومتميزة في كتاباتك ... والشكر لناقلة القصة على مجهوداتها في النقل ..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 15-12-2009, 03:32 AM
صورة الزعيـ A.8K ـمه الرمزية
الزعيـ A.8K ـمه الزعيـ A.8K ـمه غير متصل
δЯέαмş
مستشــ¸.·* غرام *·.¸ـــاري
 
الافتراضي رد: رواية نور / للكاتبة : وديمة العطا


,’



بسم الله
و عليكم السلآم و الرحمـــة


يعطيك العــآفية
زيــآرة هذآ القســم بـ تفيدك
شرح خصائص المنتدى الإدارية

موفقة إن شــآء الله

القوانين ، تحديث جديد ؛


,’



الرد باقتباس
إضافة رد
الإشارات المرجعية

رواية نور / للكاتبة : وديمة العطا ، كاملة

الوسوم
مميزة , للكاتبة , لـ تحميل الروآإيـــة كآآآآآآآملــــة على صفــ70ــحة // حنووو ^_^ .. , العطل , احلى شي مي و مروان , روآية , صفحة 14 , ودخلت
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
رواية الموت ما هو من الفرقى و طاريها .. الموت لا طاحت عيوني من عيوني / الكاتبة : أحلى بدوية ، كاملة رايقه بقوه روايات كامله - يتم نقل الرواية هنا بعد اكتمالها 259 19-07-2013 12:42 PM
رواية قلوب محطمة بأحضان المجهول / للكاتبة : غدير الحربي ، كاملة رووح الجوري روايات كامله - يتم نقل الرواية هنا بعد اكتمالها 1461 05-03-2013 06:15 AM
رواية متى ستعرف كم أهواك / للكاتبة : bintaboha ، كاملة عبير طوق الياسمين روايات كامله - يتم نقل الرواية هنا بعد اكتمالها 112 11-10-2012 12:54 PM
دنياك دنياي / الكاتبة : لح ـظة وفا ، كاملة ↙ツ آًﻤـيـﯜﯢڒهےツ ↘ روايات كامله - يتم نقل الرواية هنا بعد اكتمالها 237 29-04-2012 04:56 AM
رواية وينك ياراحة / للكاتبة اقوى من الزمان كاملة ~ آًمْنِيَــــآتْ ارشيف غرام 2 11-07-2009 01:48 AM

الساعة الآن +3: 06:42 PM.
Powered by vBulletin® Version 3.8.7
Copyright ©2000 - 2014, vBulletin Solutions, Inc.
SEO by vBSEO 3.6.1
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم