اوراق معلمه مستجده.....

[هواجس]

طبعا انا حبيت اطرح موضوعي لانه يذكرني بأحلى مرحله درست او علمت فيها .....اول سنه يعني سنه اولى تدريس

بعد ما اجتزت المقابله وكان ترتيبي الرابعه والحمدلله كتب الله لي ان اعمل في مدرسة للتعليم الأساسي ولكن ...(بنين).....من 10 الى 11 سنه

اول ماجيت طبعا رحبوا فيني المعلمات القدامى وكانت كلماتهم صدمه بالنسبة لي : الله يعينك ..الله يهون عليك ...يحليلها بتطفش ومن هذا الكلام اللي يخوف..

انا وبما ان شخصيتي مرحه ومنطلقه جدا..فقلت في خاطري انا اعرف كيف اسيطر عليهم بعتبرهم اخواني....وبكون بسيطه معاهم...

وكانت الحصه الاولى ... كان قلبي يخفق دخلت عليهم ...يالله جمالهم اخاذ حلويين ....وكانت معاي معلمتهم ...طبعا ماسوولها سالفه وبدا الازعاج وانقلبوا الى شياطين بأجساد صغيره ....

هذا الصف الاول اما الصف الثاني كان هادئ نسبيا تفاءلت ..وقلت يالله يا هجوسه قدرتي اتسيطرين عليهم...

ودخلت الصف الثالث كان الصف اشبه بحلبة مصارعه بل بملعب كرة قدم..

لم استطع ان ارجع ولو ولد واحد الى مكانه اصلا ماكانوا عارفين انا مين....


ورجعت الى البيت دمعتي على خدي ...اتصلت بأختي ذات الخبرة في التعامل مع الصبيان... ضحكت وهنا تدخل زوجها المدرب الرياضي في احد النوادي (يدرب اولاد صغار) وقال ياعزيزتي نزلي نفسك لهم وكوني صديقتهم وكلميهم عن الكوره...

في هذا اليوم قعدت على القناة الرياضيه وعرفت نتائج بعض المباريات والتي اصلا لاتهمني...

في اليوم الثاني كنت اقعدهم واقولهم شفتوا مباراة البارحه ويلا انا فتحت الموضوع مني وتعالوا شوفوا الاولاد مني... كل واحد يكلم زميله ويمثله بالحركات...وحاله...انهرت خلاص شو الطريقه معاهم...

جاتني نصيحه وهي اني اقولهم اني ما احب البنات لانهم دلوعات ومايعات عشان جذي انا اخترتكم...هالكلام عشان اكبر في عينهم ...

والله انا بمجرد اني قلت لهم ها الكلام وبدون مبالغه ...
قاموا وقلدوا البنات ...واحد يمشي مثلهم والثاني يمثل انه ماسك

مرايا وقاعد يحط روووج واللي يمثل انه يبكي ويمسح دموعه بمياعه وكانت الكارثه الولد اللي قام يسشور شعره... الصراحه فطست من الضحك

وما اعرف الدموع اللي نزلت من الضحك ولا من القهر....وعلى فكره كانوا مايسون اعتبار حق حد الا المديره ليش ما اعرف...

وبعد ما غلب حماري...وفي اول الاسبوع الثاني وقفت في الطابور عند الصف الاكثر شغبا في المدرسه...وكان وقت التمارين الرياضيه...


وانا كنت لما يبدون امسك نفسي لااضحك شكلهم يهبل حلوين...

وبس انتهت التمارين وجت المديره...والكل ساكت وينتفض...

وجت وبدون سبب الى اطول واعرض ولد في الصف...وطاخ طاخ طاخ.. وقالت له انت ليش ماتلعب مع الاولاد مع انه كان يلعب وحليله...وماوعيت الا

كل الاولاد المدرسه معتدلين في وقفتهم ومتأدبين...واخيرا عرفت السر اللي المعلمات بالرغم من قدمهم... ماعرفوه....

ودخلت الصف اللي كان فيه هذا الولد ...وكنت عليهم الحصه الاولى ...وطبعا كالعاده ماعبروني...واروح عند الولد وطاخ طوخ طيخ

علىكتفه حرام ماضربته قوو ...استغرب ...وهنيه زمجرت كالاسد وقلت مافي أي احترام للمعلمه اللي قدامكم ...وساد الصمت اخيرا...سلمت ردوا السلام ...فرحت وااايد...

واستعملت هالاسلوب مع الصفوف الثانيه اضرب المربوط يخاف المفتلت...

وكانوا كالألف ...بس بعد ماقدرت اسيطر عليهم حبيتهم والله حبيتهم وكانت حصتي هي متنفسي الوحيد ...اقعد معاهم اكلمهم واشرح لهم

باسلوبي وكانوا يحبون حصتي الى ان جاء اليوم اللي جاني فيه ولد وقالي مشكلته وقبل لا يطلع من مكتبي قال كلمه ما انساها: ابله انا احبك انتي مثل امي....

والولد الطويل جاسم كانت امنية حياته انه يحصل على شهادة تقدير وهديه آخر السنه ووعدته انه اذا جاب درجه مشرفه بعطيه وفعلا جــا هو وامه واعطيته الشهاده وكان فرحان وقال هذي اول شهاده آخذها في حياتي......

موضوعي ما انتهى لي تكمله معاكم في نفس الموضوع انشاء الله
في يوميات معلمه مستجده.... وفيه مقالب الاولاد مع باقي المعلمات والمشاكل اللي واجهتني مع بعض الطلاب ....

والطريقه اللي اتبعتها بعيدا عن الضرب ...التفاهم بين المعلم والتلميذ كيف ومن اين يأتي؟؟..الثقه المتبادله بينهم...طلابي حبايبي وين وكيف صاروااا
دمتم بود

[عش العنكبوت]

ياليت تبيني الأخطاء بين المعلمه وطالبتها

وكيف بعض أدارة المدارس يفصل بينها وبين الطالبات شبك حديدي يقفل عن بعض هجوم الطالبات على المعلمات ؟؟! فهل هذا صحيح ويعقل ؟


وياليت توضحي أكثر بما أنك معلمه ..


ومشكوووره أستاذتي على الموضوع::think:

[المواعيد]

ما شاء الله عليج وعلى أسلوبج الحلو يا هـواجس ..
عسى الله ايحفظج وايريحج دنيا وآخره ..
فمثلك نااادر .. أكثر مدرسات هالايام همهم بس تعال اشرح وروح واللي ما فهم يعله ما يفهم طول عمره ..!!!
ما أتخيل عمري في يوم من الايام أدرس طلاب .. شكلي بشد شعري وبستخف من شطانتهم ..

وبــانتظار باجي سوالفج ويا الطلاب ..

[ابوجواهر]

دائما ذكريات سنوات التعليم تكون جميله

لكن ودي اهمس في اذنك همسه صغيره ولا يسمعها احد رجاءا ولا تزعلين











الا وهي كثرت الاخطاء الاملائية عندك وانتي معلمه ارجو
ان تكوني اكثر دقه


وشكرا على الذكريات الجميله واعانك الله على حمل الامانه

[هواجس]

ابو جواهر والله من السرعه بالطباعه ما الحق ادقق في الأخطاء الإملائيه ,,,,,وبعدين انا كاتبتنه بالعامي ...

ياسيدي مادؤش خخخ

ولك كل الشكر على مرورك