أكبر موسوعة للحصول على الحواجب المثالية [ تنسيقي ]

«حــآلمـهـ ❀ · 03:47 PM

السلام عليكم

حبيت اسوي موضوع كامل عن الحواجب وكل شي عنهم
لسببين
1- كثير بنات يشتكون من حواجبهم من ناحية الشكل او الرسمة او غيره..
2- ابيكم تستغنون عن شي اسمه صالونات او مشاغل لان بصراحة كثير يلعبون ومايسوون اللي يناسب كل وجه
ونادر تلقين واحدة عارفة ايش اللي يناسب وايش اللي
ما يناسب وايش اللي موضة قديمة

اول شي بتكلم عن اهمية الحواجب الصحيحة او المثالية
كثير بنات "مستهترات" بهالموضوع وبالنسبة لها اخر اهتماماتها
بس احب اقولها ترا الحواجب الغلط ممكن تخليك ..
زعلانه - حزينة -عيونك متباعدة-خشمك كبير
يعني ممكن تغير حتى بالملامح..
و هي "ايطآر الوجه" حتى قصة عينك تتغير 100% لما تعرفين
رسمة حواجبك المثالية..

اول شي ../

- لازم تقررين ايش يناسب شكل عيونك وبنتكلم عن هالشي بعدين بالتفصيل..
-بعدين قرري كيف بتضبطين حواجبك ..

بس في نقاط لاحظتها بالتشقير الحواجب:

-كثير بنات سمر يشقرون حواجبهم ..طيب انتي سمرا لما تشقرينها بتطلع حواجب شقرا بس!
يعني ما استفدتي شي.. لازم تشقرينه لما يتوحد مع لون بشرتك مو لازم يكون فاتح..

-بنات حنطيات تقلب حواجبهم برتقالي!! نفس الشي انتبهوا لمدة التشقير ونوعيته..

-بنات حواجبهم كثيفة مررا لدرجة التشقير يقلبها اخضر.. انتبهي لمدة التشقير ونوعية وحاولي تمشطينهم بجل الحواجب
علشان يطلع شكلهم انعم ..

-كثير ينسون شعر مابين الحاجبين اللي هو بالنص ويطلع حاجبها متصل!! مظهر قبيح جداً ..

وجبتلكم فيديو كيف تشقرين بالبيت ..(طبعا خليه لمده اطول لما يتوحد مع لون بشرتك)

لاول مرة انصحك عالاقل تروحين صالون معروف بشغلهم الحلو و تشوفين كيف تسويلك عالاقل مرة واحدة

بعدين طبقي بالبيت ..

ملاحظة احب اقولها /

يا بنات يا عالم لا تسوون حواجبكم تاتوو

موضة الحواجب التاتوو اول شي انتهت لان الحين موضة الحواجب الطبيعية اكثر

- شرعا ما تجوز
- هي مضرة لك ..لازم كل فترة وفترة تضبطينه وتعيدين رسمه عند المتخصصة
- يلزمك برسمة واحدة مدى الحياة .
- بعض الناس ما ناسبهم او طلعت الرسمة غير متساوية حاجب غير والثاني مختلف تماما وتوهقوا
-كثرة التاتو على البشرة وكثرة تصحيحه بين فترة وفترة تخررب الحواجب والبشرة
- واللي يصبغون شعرهم مرة اشقر مرة اسود مرة بني..لازم كل فترة وفترة تغيرين لونه!!
- اغلبية التاتو يكون حواجب غااامقة بزيادة حتى لو الوان غير الاسود وتطلع تلمع So fake - الحين طايحين باللي تسوي الحواجب
ترسمها شعرة شعرة
يطلع كانه طبيعي مثل ديانا كرزون..بس الشكل النهائي يطلع كان شعر حواجبك اجعد كيرلي كانه اجعد اجعد..
-غير كذا ترا التاتو يحررق شعر حواجبك الاصلي وانا اعرف شخصيا بنات صارت حواجبهم مافيها شعر
تلمعع!! وشكل ابدا مو حلوو وصارو مجبرين يجددون هالتاتو لان لو شالته مافي بحواجبها شعر
-ترا تصحيح التاتو انها توشم بنفس لون الجلد وتصحح شكل الحواجب يعني مو تحسبينه شي ولا بينشال تماما!

وجبتلكم اضراره الصحية./

فإن عمليات وشم التجميل الدائم أو وشم المكياج، تتضمن حقن صبغات في الطبقات العميقة من الجلد تحت البشرة،
التي تُسمى بطبقة الأدمة.
والمعلوم أن طبقة البشرة هي طبقة الجلد التي نراها عادة. وهي طبقة خارجية يتم سلخها باستمرار كي يتم تجديدها.
أما طبقة الأدمة فهي أعمق وتبقى ثابتة،
ولذا فإن أي صبغ لها لا يزول.
وعمليات الوشم المكياجي تطال إيصال الصبغات إلى هذه الأعماق في الجلد حتى لا تزول مطلقاً. والسبب في زوال صبغات
الحناء مقارنة بالصبغ بالوشم،
هو أن الحناء لا تصل مطلقاً،
في حال سلامة الجلد، إلي طبقة الأدمة، بل تظل في طبقات خلايا البشرة الخارجية. ولذا تزول الحناء مع مرور الوقت.

ويقول الباحثون من مايو كلينك إن الوشم، أو التاتو، هو شكل أو علامة ثابتة تُصنع في الجلد عبر إدخال صبغات من خلال
وخز عميق فوق الجلد.
وخلال العملية يتم تكرار وخز الجلد بإبرة أنبوبية تحتوي بداخلها مادة الحبر الملونة، كي تُدخل قطراتها عميقاً في طبقات الجلد.
وتتسبب هذه العملية،
التي قد تستغرق دقائق أو ساعات حسب مساحة النقش،
بقليل من نزف الدم وبدرجات متفاوتة من الإحساس بالألم الموضعي

اتوقع غيرتو رايكم صح؟؟

هذي الـثلاث نقآط بتساعدك كثير لما ترسمين حواجبك ولما تحددين شكلها

من خلالها بتعرفين تساوين بين الحاجبين

رآس الحاجب لازم يكون على نفس استقامة مدمع العين ..هذا الشكل الصحيح وهو المقياس الثابت

نهاية الحاجب مع خط مستقيم مائل مع زاوية الانف مثل الصورة

ومنتصف الحاجب اختياري حسب شكل عينك واللي يناسب واللي تبينه

من النآس اللي انشهرو بحوآجب بيرفكت .. ديآنآ كرزون لان ملامحها ناعمة

ومدى عينها واسع يسمحلها تسوي حواجب عريضة وثقيلة تناسب لون شعرها الاسود الحالك

طبعا حواجبها تاتو وانا ما انصح ابدا فيه .. وباين بفيديوكليب لها مدري ايش اسمه ان حواجبها كانها حواجب شعر اجعد بس هي مسوية التاتو
اللي يكون شعرة شعرة
على اساس انه طبيعي بس بالعكس يبين كانه حواجب لواحدة شعرها اجعد..

منى امرشا من الناس النادرين اللي من جد الرسمة الحواجب ضبطت معهم لان مدى عينها واسع بعد

وعلى فكرة ما اتوقع منى امرشا مسوية حواجبها تاتوو لان كل مرة رسمة ولون حواجبها مختلفة تماما

يعني رسم مو تاتوو..حتى اخر لقاء لها بعيد الاضحى بكلام نواعم كانت حواجبها مثل الصورة اللي على اليمين بس راسمة عليهم
و باين انه في شعر

هالانسانه سيرين عبدالنور حواجبها بيرفكت

هيا عبدالسلام حواجبها طبيعية وحتى مو راسمتها ثقيل مرا

بس مناسبة ملامح وجهها وحسيتها تنفع كمثال للحواجب المثالية

طبعا ترسمين حواجبك في اكثر من طريقة

1- القلم السائل.. يكون مثل الألوان السحرية لكنه قلم مخصص للحواجب وفيه راسين راس عريض حاد وراس مدبب صغير..
يعطي شكل مثل الحواجب التاتو فيه لمعه..
بعض البنات يحبون هذا اللوك ويبون اللمعة ننصحكم فيه..

2- الفرشاة المشطوفة او الحادة..تستخدم لرسم الحاجب طبعا بشكل حاد وبتشوفون بعدين شرح موضح لاستخدامها..

3-بودرة الحواجب..هي تكون للي ما يبون حواجبهم تكون غاامقة او مطموسة ..يصير بس يثقل شوي من لونها لكن يحافظ
على شكلها الطبيعي
وهو اللي يستخدمونه مثل كيم كرداشيان وخواتها..

4- القلم العادي..وهو اسهل وافضل الطرق لانه بس يحتاج تبرينه ويكون راسه حاد وسهل الاستخدام

وما يتاثر بعوامل الطقس من حر وغيره مستحيل ينمسح او يسيح ..

*لاحظو كثرة المسافة بين الحاجبين تكبر الخشم وغير كذا تعطي شكل ان
العيون متباعدين و يطلع الشكل غلط!

brb

«حــآلمـهـ ❀ · 03-05-2011, 04:44 AM

جبتلكم هالفيديوهآآت مفيدة/

- فيديو اخفاء الحواجب تماما بواسطة المكياج فقط (بدون صبغ ولا غيره)

اوكي الحين قررتي ايش بتستخدمين وعرفتي الادوات اللي تحتاجينها
جآ الدور الاهم وزبدة الكلام... شكل رسمة الحاجب ...اللي هي اهم شي بموضوعنا كله

كل عين لها رسمة حواجب تناسبها..انا جبت اكثر الامثلة اللي دارجة وبشرحلكم كل واحد
الحين الصور اللي بتشوفونها مرقمة كلهم حواجبهم غلط!! وبنتكلم بالتفصيل!!

1-الحواجب المتباعدة اللي يخلون المسافة بين الحاجبين كبيرة مثل ماذكرت تكبر الانف وتعطي مظهر Nerd لوجهك دايم احس

2-اللي فاهمين الحواجب الطبيعية غلط..اوكي قلنا حلوو الطبيعي بس مو لهالدرجة ضبطيهم مشطيهم

3- لاحظوا ان حواجبها مرتفعة بزيادة عن عينها..يعني بعض البنات يسوون هالحركة تحسب ان بيعطي عينها مدى اوسع
بس هي غلطانه بيطلع الشكل ان حواجبها طايرة وما يطلع مريح للعين لانه مو طبيعي..خليك على نفس شكل ومكان حواجبك الاصلي
لا تحاولين تعللينه او تنزلينه علشان ما يطلع شكل حواجبك غلط.

4-اتوقع الكل اتفقوا ان موضتها انتهت اللي هي الحواجب الشيطان او التشاينيز ..مرا مو حلوة وتعطي شكل انك زعلانه
اساسا من زمان رايحة موضتها بس بعضهم معلقين عليها ..

5-الحواجب اللي يكون منتصفها عالي مقارنه مع راسها.. يعطي شكل لعينك انك زعلانه او معصبة..شكل قاسي للعين ويظلمها

6- الحواجب المتلاصقة موضة شعبية و محد يسويها..

هذي قوالب للحواجب ..بعض البنات مايعرفون يرسمون او يحددون الشكل فممكن تستخدم
هالقوالب تحطها على حواجبها و تبدا تعببي داخل القالب وتشيله يطلع شكل الحواجب متساوي ومضبوط..
القوالب رخييصة جدا وموجودة بكل محلات التجميل العادية..

فيديو لطريقة الاستخدام/

هذي صورة تاوضح
كيف ان الجزء الاعلى من الحاجب والجزء السفلي منه تغير تماما من شكل الحاجب
نادر بنات ينتبهون لهالنقطة وحبيت انبههم لها وهم يرسمون حواجبهم..

هذي طريقة لرسم الحواجب بطريقة الفرشاة ../
الطريقة التقليدية..

شي بعد احب اقوله ..ان موضة الحواجب العريضة انتهت بعد

انتشرت سنة 2009 و 2010 موضة الحواجب العريضة او حواجب الثمانينات والكل استانس طبعا
ومشى عليها.بس الحين رجعوا للحواجب العادية والناعمة وانتهت هالموضة بسلام..

شوفوا شكلها صار انعم بكثير بعد ما نعممت الحواجب وخففتهم
وعطى شكل افضل للعين..

لاحظوا الرسمات الغلط والالوان الغلط كيف تؤثر وتقبح العين!

فيديوهات مفيدة لرسم الحواجب/
-استفيدو من تقنياتهم وانسو رسمات حواجبهم لان اغلبيتهم غلط -

بعد ما حددنا الشكل اللي يناسبنا وايش بنستخدم
يجي دور آخر و نقطة مهمة ومرا تفرق

لون الحواجب..

اقبح شي ممكن اشوفه شعر اسود وحواجب بنية او شعر اشقر وحواجب غامقة!
شكل قبيح جداً للعين والشعر..

مثال لوجين العمران شعرها اسود حالك ومصرة ترسم حواجبها بقلم بني فاتح !! مراا شكل قبيح
والمثال الثاني سيينا ميلر صابغة شعرها وناسية حواجبها..مرا شكل قبيح بعد

افضل حل يكون لون حواجبك مثل لون شعرك..

نقطة مهمة نادر احد ينتبه لها..:

-كثير بنات شعرهم مثلا بني رمادي وترسم حواجبها بقلم بني على احمر!!

-او شعرها اشقر وترسم حواجبها بني غامق! او اسود!

انتبهي لدرجة اللون مو كل بني بني ومو كل اسود اسود والخ..

بمعنى ../شعرك اسود باهت مثلا لا ترسمين حواجب غاااامقة بقلم اسود..حاولي ترسمينها ببودرة الحواجب تعطي شكل اخفف ويمشي مع شعرك..
حواجبك بنية على رمادي استخدمي بني على رمادي مو بني على برتقالي او بني على احمر!

انتبهي لدرجة اللون و بعد بالضبط يميل لايش.. ممكن يكون اغمق بدرجة او افتح من شعرك
بس اكثر من كذا لا تسوين.. لازم لازم لون شعرك يتماشى مع حواجبك..

فيديو توضيح طريقة تفتيح الحواجب السودا/

طبعا اللي يفتحون لون حواجبهم ..لازم كل اسبوعين تجددين اللون..لان شعر الحواجب
ينمو بسرعه..مو مثل الشعر..

لاحظوا ان خبراء التجميل المحترفين يهتمون بهالنقطة اللي ذكرتها

ميريام فارس شعرها بني على احمر و رسموا حواجبها بنفس الدرجة من البني!!
دينا حايك شعرها اسود باهت رسموها بنفس اللون..
كورتني شعرها اسود لكن حبت تثقل حواجبها خفيف ما طمستهم مثل دينا حايك..
انالين مدري ايش اسمها.. رسمتهم بنفس درجة شعرها الذهبي الاشقر بس غامق شوي بالضبط

امثلة ثآنية .. كل واحدة مسوية حواجبها نفس لون شعرها بالضبط وهذا اللون المثالي والصحيح
وجبتلكم كل الامثلة اسود -بني -احمر -اشقر

*مثآل ان الحواجب الناعمة والنحيفة رجعت موضتها..

اخر واهم نقطة بتكلم عنها هي الحواجب الغير متماثلة..:
كلنا الله خلقنا باحسن صورة بس معلومة انا سمعتها من زمان ان كل الناس عندهم
الجزء اليمين غير عن الجزء اليسار بمعنى../ ان مثلا حاجب مرتفع اكثر من الثاني ..

احنا مو photoshop نسوي كوبي فعشان كذا بعض هالاشياء مثل الاختلافات اللي الله خلقك فيها
حاولي توازينها وتضبطينها بالميك اب وهي متواجدة عند الكل مو عندك بس..
لان كثير بنات يفكرون ان هم بس عندهم هالمشكلة بس 90% من الناس صفاتهم بالجزء الايسر لا تساوي الجزء الايمن 100% .
.تلقين اختلاف بسيط ما يبين الا لما تركزين مرا..

وبالنهاية اتمنى تكونون استفدتو من كلامي
و شرحي كان واضح وخفيف ومختصر

حآلمه

ريوف.. · 03-05-2011, 05:01 AM

يعطيك الف الف عااااااااااافية..

بجد معلومات قيمة ومفيدة ..

ودي

ألـفَجـّرْ البَـعّـيِـدْ · 03-05-2011, 11:28 AM

..,

وعليكُمْ السلآمَ والرحَمهْ

تحمستَ مع الموضُوع حيلَ
من جد طرح رائع ومُتكآملَ .

ربي يعطيكَ العافيةَ .
شاكرهـ لكَ هـ المجهُود والتنسيقَ الأكثر من حلوُ .

..,