اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 11-03-2012, 04:17 AM
صورة ساره... الرمزية
ساره... ساره... غير متصل
©؛°¨غرامي مشارك¨°؛©
 
11302798202 أنا أميرة وهذي قصة حياتي / للكاتبة :سارة الدوسري



السلام عليكم
اخباركم جميعا
طبعا هالروايه انا ناقلتها من صديقه لي وعزيزه على قلبي
هي ما رضت انشرها بس انا اصريت انشرها لما شفتها كاتبه مبدعه قلت حرام تظل عايشه في الظلام
اتمنى من كل قلبي تعجبكم روايتها مثل ما عجبتني
واذا عجبتكم شجعوها لانها لحد الحين مو مقتنعه بتنزيلي لروايتها
يله بسم الله


______________________________________


لحظات واوقات كثير نشعر فيها بالحقد
نشعر فيها بالكره لانفسنا ولكل من جرحنا
لكل من ابتسم في اوقات ذرفنا لدموع القهر
لكل من جعل السواد يزحف الى قلوبنا
انا فتاه عشقت الخيال وفضلته على الواقع في اوقات كثيره
عشقت الابتسامات التي ترسمها لي مخيلتي واستبدلت دموع قهري بابتسامات مخيلاتي البريئه
ساطرح في روايتي كل ما شعرت به واوصله عن طريق شخصياتي
احاسيس شخصياتي طلعت من نابع قلبي وارجوا ان تصل الى قلوبكم
وساكون خلف الستار وخلف لقب يمثل ما اشعر به في الخفاء
لا احلل لاي احد نقل روايتي بدون ذكر اسمي عليها(سارة الدوسري)
ارجوا ان ينال اعجابكم ما خطته يداي
_______________________

(انا اميره وهذي قصة حياتي )
البارت الاول
_____________________________

وقفت وهي لابسه اسود ووجها مبين عليه التعب:لا يا عمي انا واخواني ما راح نطلع من بيتنا
العم:بس انتي شايفه الحال ابوك ما ترك الا الديون كيف بتصرفين عليهم هذا غير الديانه اللي يطالبون ابوك
طالعته وبإصرار وكبرياء:بندبر نفسنا
العم اللي طالع البيت وكأنه يقول كيف
لفت وجهها وبإصرار اكثر:جزاك الله خير يا عمي بس انا واخواني نعرف نصرف امورنا
العم طلع من جيبه فلوس ومد يده
طالعت يده وباستغراب:وش هذا
العم وهو يمسك يدها ويحط الفلوس فيها:اخذي هذي مساعده لك ولاخوانك
مدت الفلوس وبكبرياء:ابوي ما رباني اخذ حسنه من احد وانا قلت بدبر اموري انا واخواني
العم مشى وتركها مكانها ولا اهتم لكلامها بس التفت عليها لما سمع صوت الفلوس وهي تقطعها لنصفين
طالعها وسمعها تقول ببرود:قلت لك ما احب الحسنات وفمان الله يا عمي
العم هز راسه بياس ومشى طالع من المكان وهي مشت وجلست على الكنب البسيط اللي عباره عن كنبتين وحطت راسها بين يديها وبهمس:يارب عيني يارب اكون دائما قويه وتظل كرامتي مرفوعه وكرامة ابوي وما امد يدي لاحد ابد ما ادري وش اسوي يا يبه ما ادري .....
(الحدث اللي قريتوه كان من 6 سنوات اخر مره شفت فيها عمي في هالست سنوات صارت اشياء كثيره بعد وفاة ابوي وامي
كثير ناس قالوا عني كلام وكثير ناس طلعوا عني اشاعات
في منهم من قال:عانس ليه لاني وصلت الـ27 وما تزوجت
وفي منهم من قال اني اصرف على اخواني من حرام وفي منهم من قال اني اعرف شباب
وكلام كثير لو اعده راح يشيب الراس
في البدايه كنت اتضايق واحيانا توصل معي اني ابكي من القهر بس واقعي قساني واجبرني اكون قويه ما انهز ولا اتاثر واكون فولاذيه
واقعي علمني ان وقت الشده اكون حجر علمني اني ما اضعف وعلمني اني اتعايش في هالعالم بكل ما فيه وما اعتمد الا على نفسي ولا اثق الا بنفسي
من انا ؟ انا اميره )
:اميره تسمعيني
لفت لها وبتعب:نعم وش تبغين يا حلا
حلا اللي لابسه مريولها:وش فيك من ساعه وانا اناديك وانتي ما تردين
اميره وهي تمسح وجهها بيدها:ما سمعتك يا قلبي كنت سرحانه
حلا:ترى بيجي الباص بعد شوي
اميره وهي تطالع الساعه وتطالع حلا وتوها تستوعب ان حلا لابسه مريولها وقفت وبصربعه:ما سويت لكم شي تاكلونه قبل لا تروحون المدرسه
طلعت من الصاله وهي مسرعه للمطبخ
وبعد ثواني
دخلت عليها اختها الثانيه وهي تمشط شعرها:صباح الخير
اميره وهي تسخن الحليب:صباح النور
شافت اختها مبين عليها التعب والارهاق تنهدت وهي عارفه انها ما نامت طول الليل همست وهي تشوف اختها تجهز الفطور:لا تسوين شي اصلا ما يمدي
اميره اللي طالعتها وهي تلوم نفسها:والله ما انتبهت على الوقت يا ياسمين
ياسمين وهي تبتسم:مو مشكله انتي سوي شندويش جبن على السريع وبناخذهم المدرسه وبنفطر على الفسحه
اميره وهي تبتسم ابتسامه باهته:ماشي
بدت اميره تسوي السندويشات وتلفهم
دخلت عليهم وهي تتأفف وضربت كتف ياسمين:يا حماره وين الشباصه حقتي
ياسمين اللي انفجعت وحطت يدها على كتفها:وش فيك خوفتيني يا هويدا
هويدا بقرف:لا تكفين يا رقيقه ترى مو ضابط رقه وفقر ما يجتمعون
اميره اللي عصبها اسلوب هويدا:انتي هيه الناس من الصباح تقول يالله صباح خير وانتي جايه ولسانك وش طوله
هويدا وهي تتخصر:يالله صباح خير ها قلناها ...كملت وهي تلتفت على ياسمين:يا بقره وين شباصتي
ياسمين :والله ما اخذتها
هويدا بتحذير:لو اشوفك يا حيوانه ماخذه شي من اغراضي بوريك
مشت وهي تتحلطم وتسب واخر الكلمات اللي طلعت منها:فقر في فقر لا واذا قلنا شي قالت اصرف عليكم من زي الشغل عاد ....
اميره اللي حست ان اختها زودتها ولسانها طال ولا صارت تحترم احد مشت بتلحق هويدا الا ياسمين وقفتها:تكفين يا اميره لا تروحين لها
اميره بعصبيه:خليني اروح واربيها شكلها ما تربت زين
ياسمين:الله يخليك خليها تولي ولا تهتمين للكلام اللي تقوله
اميره سكتت وهي تحس انها لحد الحين خاطرها تعطي هويدا كم كف علشان تتعدل
ياسمين:علشان خاطري طنشيها
اميره طالعت ياسمين وتعوذت من الشيطان وزفرت وهي تحاول تهدي اعصابها
دخل عليهم وهو في يده بدلة الرياضه:اميره شوفي
ياسمين:عثومه قول صباح الخير بعدين قل اميره شوفي
عثمان:صح نسيت صباح الخير
اميره اللي حست انها بتضحك على عثمان اللي على نياته :صباح النور
عثمان وهو يمد تيشيرت البدله:شوفي مشقوقه كيف البسها
اميره وهي تتنهد:مو اخر مره خيطتها لك
عثمان:الا بس التيشرت صار قديم كم مره تخيطينه
اميره وهي تطالع التيشرت اللي مبين عليه قديم وحالته حاله:معاك حق
ياسمين:طيب وش بتسوي الحين
عثمان وهو يهز اكتافه:ما ادري ...طالع اميره وكأنه يقولها وش الحل
اميره وهي تفكر طرت على بالها منقذتها:لحظه شوي وراجعه
عثمان وياسمين:طيب
طلعت من المطبخ وراحت للصاله ومسكت التلفون واتصلت على الرقم الوحيد اللي حافظته وهي تدعي في قلبها انها ترد:الو
اميره:صباح الخير
ردت عليها بابتسامه:يا صباح الفل والياسمين اخبارك يا بطه
اميره بابتسامه:انا الحمد لله بخير وانتي
:انا الحمد لله تمام
اميره بإحراج:اقول نجلاء انا داخله على الله ثم عليك مو عارفه وش اسوي
نجلاء:افا وش صاير
اميره:ابد عثمان تيشيرته انشق وعنده اليوم حصة رياضه ومو عارفه وش اسوي قلت اتصل عليك يمكن يكون عندك حل
نجلاء وهي تفكر:صدق مشكله بس لحظه شوي
اميره:طيب
ثواني ورجعت نجلاء:اقولك عندي تيشيرت لاخوي حسان هو صحيح قديم بس هذا اللي عندي
اميره:مو مشكله اهم شي يلقى شي يروح به لحد ما اشتري له واحد جديد
نجلاء:خلاص برسله مع حسان عليكم
اميره:دائما تنقذيني في اصعب المواقف
نجلاء:هههههههههه ولا يهمك احنا خوات
اميره:اكيد الحين انا بصكر ووقت ثاني اتصل عليك
نجلاء:ماشي فمان الله
اميره:بحفظ الله
صكرت السماعه وهي تتنهد براحه لانها لقت شي يمشي عثمان به اموره لحد ما توفر فلوس بدله جديده له
رفعت يديها وهي تحسب احتمال سعر البدله الرياضيه وبهمس:65 مقدور عليها مو صعبه
لحظات ودخلت عليها ياسمين وهي لابسه عبايتها:اميره ترى الباص جاء
قامت اميره ولبست عبايتها على السريع وبرقعها
ووقفت لخواتها عند الباب علشان تتطمن انهم ركبوا الباص
طلعت اول وحده حلا باستها وودعتها وراحت للباص اللي يوقف في بداية الشارع لان شارع بيتهم ضيق
مرت هويدا ولا عبرة اميره اللي قعدت تتعوذ من الشيطان لا تمد يدها عليها
اخر وحده كانت ياسمين وقبل لا تطلع:اميره لا تنسين الاغراض اللي قلت لك نبغاها انا وحلا علشان مادة الفنيه
اميره اللي ما طرت على بالها الاغراض ردت بكذب:لا تخافين ما نسيت
باستها ياسمين وراحت وراء خواتها تلحق على الباص وقبل لا تصك اميره باب بيتهم شافت حسان جاي جهتهم وعطاها الكيس:هذا من نجلاء
خذت اميره الكيس ودخلت وصكت الباب وعطته لعثمان اللي بان على وجهه عدم الرضا بس رجع ابتسم لما وعدته تشتري له بدله جديده وهي بينها وبين نفسها تحسب كم ممكن تكون سعر كل الاغراض اللي تفكر تشتريها لعثمان ولخواتها




آخر من قام بالتعديل وردة الزيزفون; بتاريخ 13-08-2012 الساعة 12:55 AM.
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 11-03-2012, 04:20 AM
صورة ساره... الرمزية
ساره... ساره... غير متصل
©؛°¨غرامي مشارك¨°؛©
 
الافتراضي رد: انا اميره وهذي قصة حياتي>>لنيران القهر



تـــــــــــــــــــابـــع

في مكان يختلف 180 درجه
جالسين والخدم يصبون الشاهي
جالسه مع زوجها وتفطر وبهدوء:اقول ابراهيم
ابراهيم:نعم
شربت من الشاهي شوي وبعدها كملت:وش فيك على الولد
طالعها وباستغراب:أي ولد فيهم تقصدين يا منيره
منيره:في غيره اقصد راشد
ابراهيم اللي تعكر مزاجه:لا تعكرين مزاجي من صباح الله خير
منيره:وليه الولد وش مسوي لك
ابراهيم:قولي وش ما سوى
منيره:الولود صار رجال وعمره 22 سنه يعني ما يصر اللي تسويه معاه
ابراهيم وهو يطالعها من طرف عينه:ووش مسوي انا
منيره:ما يصير تاخذ مفتاح السياره وجواله وبطاقة الصراف منه
ابراهيم وهو يوقف:يصير ونص هذا كله من حلالي
منيره توها بتتكلم الا قاطعها ابراهيم:منيره لا تعورين راسي وراسك انا عارف انك بتقولين رجع له كل شي اخذته منه وانا اقولك لا واغسلي يديك انتي وهو ...كمل وهو ياخذ شنطته:ما له شي عندي وخله يصرف على نفسه ويجيب سياره من عرق جبينه وبسه عاد جلسه في البيت كأنه بنت
طلع ابراهيم وهو يحس ان طاري راشد فعلا عكر له مزاجه
منيره بتافف:اوووووف كل كلمه والثانيه بنت وبنت اوووف صدق انك رجال تملل
كملت فطورها وهي تفكر كيف ترجع لراشد حبيب قلبها كل شي اخذه منه ابوه

_____________________

نزلت من التاكسي وهي تحمد ربها انها وصلت في كل مره تركب فيه تاكسي تحس بالخوف لا يصير فيها مثل ما يصير للناس اللي تسمع قصصهم مع اصحاب التكاسي
دخلت مكان شغلها وصعدت الدرج واول ماوصلت دخلت الغرفه للعاملات وفسخت عبايتها وحطت ابريق الشاهي على النار وبعد ما تسخن صبته في كاسات صغيره وحطته في صينيه وبدت تمر على موظفات البنك
دخلت على غرفته تحتوي على ثلاث مكاتب:السلام
الموظفات:وعليكم السلام
حطت الشاهي وهي تسمع الموظفات يسولفون
الموظفه الاولى :والله هالرجال كرهني في عيشتي ما ادري لمتى بصبر عليه
الموظفه الثانيه:ليه وش مسوي هالمره
الموظفه الاولى:يسهر ولا يرجع الا متاخر صايره العيشه معاه ما تنطاق
طلعت من الغرفه وبخاطرها:العيشه معاه ماتنطاق لانه يسهر هههه المسكينه ما تدري انه منحاش منها الله لا يبلانا
بعد ما خلصت توزيع الشاهي على الموظفات رجعت غرفة العاملات وخذت الممسحه وبدت تمسح الارضيه وبخاطرها:لو كملت دراسه كان انا وراء مكتب من هالمكاتب وكان مكاني وحده ثانيه .... كملت وهي تتنهد اااااه الحمد لله على كل حال الكلام في الماضي ما يغير شي
وقفت مسح وهي ترجع للماضي:
(:بس انا احبك ليه رفضتيني ليه يا اميره
تلفتت تتاكد ان ما في احد موجود وشدت عبايتها على نفسها:روح لاحد يشوفني واقفه معاك بعدين يألف علي كلام ولا يفهم غلط
طالعها وبقهر:انا ما يهمني الحين غير اعرف ليه رفضتيني
اميره وهي تلف وجهها:اااابغى اكمل دراستي وانا توني صغيره على الزواج
طالعها وبسخريه:هذا مو عذر انا قلت بخليك تسوين كل اللي في خاطرك و بحقق لك كل شي تتمنينه
اميره وهي تطالعه:بس انا ما ابغى
طالعها وباصرار:يعني مو سبب الرفض الدراسه
اميره بغرور وقسوه :اصلا لو انت تفهم كان فهمت من البدايه وما خطبتني مره ثانيه كان فهمت من اول مره رفضتك فيها اني ما ابغاك خلاص عاد اوووف
مشت من قدامه تاركته جسد بدون روح تاركته محطم تاركته يشوقف حلم وحب طفولته يتلاشي قدام عيونه)
رجعت لحاضرها:يا ترى انت الحين حي ولا ميت .... ابتسمت بخفه وهي تكمل:خسرت والسبب غروري يا ليت الندم ينفع اااااه ..رجعت تطالع الممسحه:اكمل شغل احسن لي

_____________________

في المدرسه نزلت من درج السطح وهي تعدل ازرار مريولها ولفت على البويا اللي وراها ومدت يدها:يله هاتي فلوسي
البويا وهي تطلع الفلوس من جيب مريولها وتحطها في يدها:اخذي يا عسل بس بكره مثل كذا يا حياتي
طالعتها وبوقاحه:انتي جهزي فلوسك وبعدها تعالي تكلمي
قبل لا تمشي مسكت يدها وبهمس:الفلوس بكره بتكون موجوده بس اهم شي انتي....كملت وهي تغمز:تكونين موجوده
بعدت يدها وبرفعة حاجب:مدام الفلوس موجوده انا موجوده
مشت وهي تحط الفلوس في جيبها وقابلتها سهام
سهام بهمس:ها خذيتي المقسوم
هويدا وهي تطلع الفلوس من جيبها:ايه
سعام وهي تشوف الفلوس اللي طلعتها هويدا:اوووف انتي اليوم مع مين
هويدا وهي تبتسم:حنان
سهام وهي تطالعها بتفاجا:قصدك اللي مسميه نفسها وليد
نجوي:يب
سهام:يا حظك طحتي على تجوري
هويدا:ههههه اكيد اطيح على تجوري انا هويدا مو حيا الله
سهام:حظك يكسر الصخر
هويدا وهي تشوف رقبة سهام ومبينه حمراء:ههههههههه انتي مع مين اللي مسوي فيك كذا
سهام اللي تعدل ياقة مريولها:اسكتي مع دحوم صدق حمار اقصد حماره
هويدا:ههههههههههههه عسى على هالالوان بس خذيتي شي يستاهل
سهام:خذيت شي مو بطال
هويدا:حلو
سمعوا الجرس يرن
هويدا:اوووووف الحين علينا هالعله ابلة الحديث
سهام:وش رايك نسحب عليها
هويدا:ليه لا نسحب عليها وعلى اللي خلفوها بعد
سهام وهي تمسك يدها:يله
هويدا:يله
مشوا وسحبوا على حصة الحديث وفرحانين بالكم قرش اللي يكسبونه بعد ما يغضبون ربهم

_________________________

نزل من الدرج ولقى امه جالسه:سلام
منيره:وعليكم السلام
شاف امه سرحانه:يمه وش فيك
منيره:وش فيني يعني يا سيف قاعده افكر
سيف بشك:باخوي ناصر
منيره:ايه افكر برجعته
سيف:تتوقعين ليه بيرجع الحين
منيره:ليه انت ما تبغى اخوك يرجع
سيف:لا يالغاليه اكيد ابغاه يرجع بس مستغرب من 6 سنين وهو مسافر وفجاه قرر يرجع
منيره:من يوم تزوج وهو مسافر وحارق قلوبنا ويا ليت على سبب يقنع
سيف اللي ما يحب امه تتكلم بفوقيه عن الناس:يمه ما يصلح تتكلمين عن الناس كذا
منيره بعصبيه :اذا مو عاجبك كلامي ارجع لغرفتك ...كملت منيره بقهر:حسبي الله عليها حرقت قلبي وقلب ولدي الله يزيد عليها اللي هي فيه ان شاء الله
سيف اللي حس انه تضايق من كلام امه ودعاويها قام من مكانه ورجع يصعد الدرج راجع لغرفته تارك منيره اللي تكمل دعائها:حوبتنا ما تتعداك ان شاء الله يا بنت الفقر

___________________________

انتهى البارت
_____________________________________

اشكر صديقتي ورفيقة دربي على تنزيل روايتي مع اني ما زلت مصره على ان تبقى في الخفاء

__________________________

اتمنى من صميم قلبي ان ما خطته يداي ينال رقي اذواقكم



  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 11-03-2012, 04:42 AM
صورة ♫ معزوفة حنين ♫ الرمزية
♫ معزوفة حنين ♫ ♫ معزوفة حنين ♫ غير متصل
©؛°¨غرامي فضي¨°؛©
 
الافتراضي رد: انا اميره وهذي قصة حياتي / للكاتبة : نيران القهر





حياك الله آنتي وصديقتك ..

الاطلاع على القوانين مهم جدا =) ..
القوانين / الإطلاع هام و الإلتزام ضروري

وموضوع القضايا بيفيدك في تلافي أغلاط غيرك ..
قضايا

بالتوفيق في نقلك ..





  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 11-03-2012, 05:05 AM
صورة وردة الزيزفون الرمزية
وردة الزيزفون وردة الزيزفون غير متصل
مشـ© القصص والروايات©ـرفة
 
الافتراضي رد: انا اميره وهذي قصة حياتي / للكاتبة : نيران القهر


صباح الخير .......بداية جميلة جدا ... قصة اميرة مؤثرة بنت بعمر الورد تثابر وتجتهد علشان تصرف على اخوانها وضحت بدراستها وعمرها علشان تصون كرامتهم وشرفهم
بس في المقابل اختها هويدا الي اكيد مثل بنات جيلها تتمنى اشياء وتحلم بأشياء بسبب الحرمان بس طريقها مقزز علشان تحصل كم فلس واذا استمرت بهالطريق ماراح تطلع منه الا بمرض خبيث لانها فضلت غضب ربها على الصحة

واعتقد ناصر هو نفسه الي كان يبي يتزوج اميرة الي لو تزوجته وشرطت وجود خواتها معاها كان وفرت لهم حياة افضل وماانحرف بعضهم والله يستر عليهم لاتتطور الحالة واعتقد رجوع ناصر بيغير اشياء كثيرة بحياة اميرة وخواتها ..

في انتظار التكملة


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 11-03-2012, 05:15 AM
صورة ساره... الرمزية
ساره... ساره... غير متصل
©؛°¨غرامي مشارك¨°؛©
 
الافتراضي رد: انا اميره وهذي قصة حياتي / للكاتبة : نيران القهر


اقتباس:
المشاركة الأساسية كتبها ♫ معزوفة حنين ♫ مشاهدة المشاركة



حياك الله آنتي وصديقتك ..

الاطلاع على القوانين مهم جدا =) ..
القوانين / الإطلاع هام و الإلتزام ضروري

وموضوع القضايا بيفيدك في تلافي أغلاط غيرك ..
قضايا

بالتوفيق في نقلك ..


اهلين
تسلمين والله وان شاء الله بطلع على الموضوع وبخليها هي بعد تطلع عليه
مشكوره حبيبتي
منوره

اقتباس:
المشاركة الأساسية كتبها وردة الزيزفون مشاهدة المشاركة
صباح الخير .......بداية جميلة جدا ... قصة اميرة مؤثرة بنت بعمر الورد تثابر وتجتهد علشان تصرف على اخوانها وضحت بدراستها وعمرها علشان تصون كرامتهم وشرفهم
بس في المقابل اختها هويدا الي اكيد مثل بنات جيلها تتمنى اشياء وتحلم بأشياء بسبب الحرمان بس طريقها مقزز علشان تحصل كم فلس واذا استمرت بهالطريق ماراح تطلع منه الا بمرض خبيث لانها فضلت غضب ربها على الصحة

واعتقد ناصر هو نفسه الي كان يبي يتزوج اميرة الي لو تزوجته وشرطت وجود خواتها معاها كان وفرت لهم حياة افضل وماانحرف بعضهم والله يستر عليهم لاتتطور الحالة واعتقد رجوع ناصر بيغير اشياء كثيرة بحياة اميرة وخواتها ..

في انتظار التكملة
صباح النور والسرور
انبسطت كثير ان البدايه عجبتك على الاقل تقتنع صاحبتها
فرحتني كثير بعليقك وتوقعاتك اللي اتمنى من كل قلبي انها تكون صحيحه
وانا ما اقدر اقول اذا صحيحه ولا لا لان حتى انا ما ادري وما اقرا البارت الا اذا جيت انزله >>ما ترضى تعلمني شي قهر ههههه
ان شاء الله ما اتاخر بالتنزيل
نورتيني يا عسل



  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 11-03-2012, 09:20 AM
صورة دمعة الحزن الرمزية
دمعة الحزن دمعة الحزن غير متصل
©؛°¨غرامي فعال ¨°؛©
 
الافتراضي رد: انا اميره وهذي قصة حياتي / للكاتبة : نيران القهر


الرواية من بدايتها روعة مشكورة


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 11-03-2012, 09:23 AM
صورة جود الدنيا الرمزية
جود الدنيا جود الدنيا غير متصل
©؛°¨غرامي فضي¨°؛©
 
الافتراضي رد: انا اميره وهذي قصة حياتي / للكاتبة : نيران القهر


بداية موفقة

بانتظار البارت القادم


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 11-03-2012, 09:10 PM
صورة ساره... الرمزية
ساره... ساره... غير متصل
©؛°¨غرامي مشارك¨°؛©
 
الافتراضي رد: انا اميره وهذي قصة حياتي / للكاتبة : نيران القهر


اقتباس:
المشاركة الأساسية كتبها دمعة الحزن مشاهدة المشاركة
الرواية من بدايتها روعة مشكورة
اهلين
تسلمين والحمد لله ان البدايه عحبتك عقبال الباقي يارب
منوره


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 11-03-2012, 09:11 PM
صورة ساره... الرمزية
ساره... ساره... غير متصل
©؛°¨غرامي مشارك¨°؛©
 
الافتراضي رد: انا اميره وهذي قصة حياتي / للكاتبة : نيران القهر


اقتباس:
المشاركة الأساسية كتبها جود الدنيا مشاهدة المشاركة
بداية موفقة

بانتظار البارت القادم
تسلمين وان شاء الله ما اتاخر
منوره


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 12-03-2012, 03:17 AM
صورة قلب امي وروحها الرمزية
قلب امي وروحها قلب امي وروحها غير متصل
©؛°¨غرامي مجتهد¨°؛©
 
الافتراضي رد: أنا أميرة وهذي قصة حياتي / للكاتبة : نيران القهر


بدايه جميله جدا
هويدا هذي ما حبيتها من البدايه واحسها بتجيب المصايب
انتظر البارت القادم بحماس
تقبلي مروري



الإشارات المرجعية

أنا أميرة وهذي قصة حياتي / للكاتبة :سارة الدوسري

الوسوم
بـ10صـ21 , بـ11صـ24 , بـ2 صـ2 , بـ3صـ3 , بـ4صـ5 , بـ5صـ7 , بـ6صـ9 , بـ7صـ12 , بـ8صـ16 , بـ9صـ18
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
حياتي عذاب / الكاتبة : تكفيني العبرة ، كاملة sandybill روايات كامله - يتم نقل الرواية هنا بعد اكتمالها 58 24-11-2013 04:37 PM
بين الألم و الأمل / بقلمي ~ اعقل مجنونه ~ أرشيف الروايات المغلقة - لعدم إكتمالها 10 19-06-2013 01:25 AM
رواية إنت لمين ؟ / بقلمي قلب يآآسر أرشيف الروايات المغلقة - لعدم إكتمالها 8 31-07-2010 09:35 AM
حياتي عذاب روايه سعوديه ™ S ς ό η ارشيف غرام 8 01-07-2008 01:30 AM
موسوعة اشعار اغاني راشد الماجد ..,,!! (TXT) عزت ابو عوف ارشيف غرام 1 26-08-2007 06:44 PM

الساعة الآن +3: 10:05 AM.
Powered by vBulletin® Version 3.8.7
Copyright ©2000 - 2014, vBulletin Solutions, Inc.
SEO by vBSEO 3.6.1
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم