اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 51
قديم(ـة) 03-09-2012, 03:22 PM
بَغيت اَنساك ماقدرت بَغيت اَنساك ماقدرت غير متصل
©؛°¨غرامي مشارك¨°؛©
 
الافتراضي رد: من أجلك فقط / بقلمي


ننتظررك حبيبتي ^ــ^


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 52
قديم(ـة) 03-09-2012, 11:23 PM
Rehana 333 Rehana 333 غير متصل
©؛°¨غرامي متألق ¨°؛©
 
11302798202 رد: من أجلك فقط / بقلمي


الجـــــــــــــــــــزء
الســـــــــــــادس ^..^



لم اعد طفلة..
لم اعد صغيرة......... لقد كبرت.. حقا لقد كبرت..
لم اعد انظر لهذه الحياة وكأنها لعبة جميلة العبها..
بل اراها كالدوامة التي لا استطيع الفرار منها..
ليس وحدي.. بل الكثير الذين يعيشون معي في
ها..
لقد ادركت.. ادركــــــــــــــــــــــــــــــــــــتك.. ايتها الحياة

**********************..


في بيت ابو جنان..
دخل البيت معصب.. وصفع باالباب.. دخل للصالة ورمى شماغه على الكنبة وقعد.. طلعت صفاء من حجرتها ودموعها اربع اربع: ها حصلتها.. قول اليي..
سالم: بنتج هذي هربت ما ادري وين راحت.. سألت عنها عند كل الي اعرفهم بس ما حصلتها.. حتى رحت الى بنت اختج.. وفتشت البيت فوق و تحت بس ما حصلتها..
صفاء طاحت على الارض وقامت تبجي: يا ربي بنتي الحين وين راحت ويييين..
طلعت جنات من غرفتها وشافت امها وراحت اليها: بس ماما بس.. اكيد بترجع يعني وين بتروح..
صفاء بدموعها: اخاف صار اليها شي يا بنتي.. اني من دونج انتين واختج ما اقدر اعيش ما اقدر.. آآآه ياربي سآعدني..
سالم اتضايق من صراخها.. وصياحها.. وقام دخل حجرته
..سارة: ها حصلتها..
سالم: لا ما حصلتها.. ما ادري وين راحت الي ما تستحي على وجهها..
سارة: يا ربي.. هالرجال بضيع من ايدك يا سالم.. انته ضروري تحصلها وتزوجها اياه اليوم قبل باجر..
سالم عصب: انزين خلني احصلها انا له.. اااخ بس لو اعرف وينها اااخ..
***********************************..
في بيت نيرمين..
جنان ابتسمت اليها: قومي بس قومي.. وأخذي هالصندق معاج.. ودوري على عمج علشان توصلين الوصية..
نيرمين: خلني بروح اغسل وجهي بالاول تالي بآخذل الصندوق..
وراحت طلعت من الحجرة.. جنان قامت اخذت الرسايل وقامت تلقي عليهم نظرة وفجاة قالت: انزين ابوها يعرف يكتب!!.. اكيد خله واحد يكتب اليه اذا ما يعرف..
وواخذت باقي الرسايل تطالعهم.. كانوا كلهم مفتوحين.. الا وحدة كانت مصكوكة: يوه.. شكلها ما فتحتها.. نست المسكينة..
طالعتها: افتحها لو لا.. لا لا ما يصير افتحها.. بس فيني فضول.. يعني شنو بكون فيها اكيد توصيات عادية..
راحت وفتحت الرسالة وقامت تقراها بكل تمعن.. ولما وصلت نص الرسالة شهقت: معقولللللللللللللللللللة...
كملت وهي متشوقة.. قرأت الرسالة كامل وهي كل شوي تشهق.. كملتها.. وصكتها على طووول: لا لا لا .. ما اصدق والله ما اصدق.. معقولة معقولة.. يا ربي.. اذا درت نيرمين ويش بتسوي.. شلون بتستحمل.. كفاية انه صدمة موت ابوها قدرت تتحملها.. الحين تتحمل هالشي..... اني اقول ما تعرف ولا هم يحزنون.. يعني مو الحين تعرف.. خلها تمر ليها بعد كم شهر..
طوت الرسالة وحطتها في مخباها.. يت نيرمين: شنو تسوين؟؟..
جنان: ولا شي.. طالعت الرسايل..
نيرمين تنهدت: يلا ساعديني بشيلهم..
جنان تطالعها وهي متضايقة: ولا يهمج.. بس داخل الصندوق فيه صندوق اصغر بعد..
نيرمين: اي اذكره هالصندوق.. فيه بيزات.. ابوي قال اللي من قبل انه بجمع اليي في هالصندوق.. بس ما كنت مهتمة اليه.. بس تدرين يمكن يفيدني..
*******************************..
في الليل.. بيت ابو جنان..
كان سالم واقف في حجرته وهو يتكلم في تلفونه: اي ما عليه ما عليه..
الرجال: انزين يعني اباجر اجي و وياي الشيخ؟؟..
سالم: اي باجر تعال والشيخ وياك.. انا مو مستغني عنك.. انته تستاهل..
سارة تأشر الى سالم بايدها بمعنى زين تسوي..سالم هز راسه اليها بنعم..الرجال: ما تقصر يا ابو جنان.. باجر انا عدكم انشاء الله.. بس مثل ما قلت اليك.. انا واحد متزوج.. وعندي اولاد بعد.. انا ما راح اتزوج اي وحدة اذا مو راضية..
سالم: لا تخاف انا بنتي تعرف هالشي.. وبتتزوجك وراضية..
الرجال: اذا جذي.. عجل اسلم عليك.. وباجر اشوفك انشاء الله.. مع السلامة..
سالم: الله يسلمك..
صك التلفون وقعد تحت سارة..سارة: والحين ويش بتسوي هاااا.. بتك دورت عليها في المستشفيات و المراكز وما حصلتها.. وين بتكون راحت.. واذا ما حصلناها من الحين الى باجر في الليل شنو بصير لك ها ..
سالم وكأنه في باله شي: صبري.. انا الحين اخلي جنان تجي من دون ما اتعب روحي بعد..

سارة مستغربه وشاكة: ويش بتسوي؟؟!!!!!!..
سالم قام وطلع من الحجرة وراح لحجرة مرته وبناته.. بطل الباب..
كانوا صفاء وجنات قاعدين على السرير.. وتفاجؤا من سالم.. سالم طالعهم وعيونه تدل على الشر و القساوة.. وانه مو ناوي على خير.. تقدم لداخل الحجرة خطوة وحدة.. وطالع جنات بنظرة ما فهمتها.. وفجاة تكلم: اسمعوا انتون.. ثنتينكم انتون.. اذا دريت انكم تدرون وين جنان.. لا تلومون الا نفسكم والله.. والله فهمتون..
جنات ودمعة في عيونها: ابوي لو ندري كان ما قعدنا نحاتيها الى الحين..
سالم صرخ: وانتين سكتيييييي.. شوفييي.. اذا باجر اختج الى العصر وماجت.. راح تكونين انتين مكانها..
جنات انـــــصـــــدمــــــت..وصفاء رفعت راسها وطالعتها مستغربه
..سالم: يعني بتكونين انتين العروس فاااااااااااااااهمة..
وطلع وصك الباب بقوة وخلاهم منصدمين..جنات طالعت امها وفي عينها دمووع: ماما..
صفاء قاطعتها: اسمعي يا بنتي.. ابوج مو ناوي على خير.. ف صبري والله يعيين...

في بيت نيرمين..
كانت واقفة في الصالة ولابسة عباتها.. وقاعدة تلبس حجابها.. طلعت جنان من المطبخ وهي تتحلطم: اوووف.. الثلاجة ما فيها شي.. اني وحدة جوعانة بصراحة..
افترت اليها نيرمين: وانتين همج بس بطنج.. ما تفكر الا في بطنها..
جنان: الحين وين بتروحين؟؟..
نيرمين بعد ما كملت: بروح اشتري خبز له.. شلون بناكل البيض
جنان: اي صح.. وانتين طول هالشهرين جذي..
نيرمين تهز راسها بنعم: يلا بروح.. قعدي لا تخافين.. وببند الليت لا احد يشك..
جنان: اي ما عليه بقعد في الظلمة ولا احد يقول الى ابوي اني اهني..
نيرمين: اوكي..
طلعت من البيت وهي تطالع المكان.. كانت تتاكد اذا احد يراقب او لا.. مشت وهي تحس روحها خايفة.. بس مرة ثانية حاولت تتحاشى هالخوف.. وترد ثقتها بنفسها وتمشي من دون اي خوف او توتر..
********************************..
الصبح.. في بيت ابو جنان..
تقربت جنات من الغرفة.. خايفة تطق الباب.. ومرتبة في نفس الوقت.. مو قادرة تطق.. بس قربت ايدها من الباب وهي تحاول تضغط على روحها.. وفجاة حست انها طقت الباب.. مو قادرة تصدق هي طقت الباب.. وما بين هي خايفة و متفاجأة في نفس الوقت.. انفتح الباب..الا تشوف وجه ابوها واقف وهو معصب.. كان لابس شماغه وثوبه.. كان بروح الى الشغل..طالعته وهي خايفة: ابوي ابي اروح الى نيرمين..
طالعها وهو مستغرب: الحين؟؟.. تدرين الساعة كم؟؟...
جنات: اي.. بس امبي اروح اليها.. عشان يمكن تكون اختي عندها..
سالم بتفكير خبيث: تدرين عجل.. انا بروح وياج.. وانتين ادخلي عندهم وكان انج رايحة لهم بروحج..واذا كانت هي هناك.. اطلعي وقولي اليي وانا بدش اخذها..
جنات طالعت ابوها وهي مستغربة.. مو قادرة تستوعب ابوها يسوي في اختها جذي.. معقولة هي تخون اختها التوأم الي من روحها ودمها و تخليها تتزوج واحد ما تباه.. حتى لو هي تتزوجه ولا انها تخون اختها.. تراجعت على الوراء وهي تحرك راسها بالنفي.. وتعني انها مو قادرة تفهم او تستوعب ابوها.. ورجعت دخلت حجرتها وصكت الباب..
كانت الام قاعدة على سريرها ودموعها ما نشفت..طالعتها جنات: ما خلاني..
صفاء وهي تصيح: ادري.. ما بخليج..
جنات قعدت تحت امها: يمه بس اكيد بترجع.. اني حاسة انها عند نيرمين..
صفاء: جيفه عند نيرمين جيفه.. مو ابوش مفتش البيت عدل لو هي اهناك جان جافها.. اتمنى تكون بخير.. وانه ابوش ما يحصلها.. وفي نفس الوقت اتمنى ترجع عشان اشوفها.. وعشان ما تكونين انتين الضحية.. لكن بتكون هي الضحية..
زادت دموعها: ااااااااه.. والله ما ادري شنو اسوي.. احس ايادي مربطين.. اضحي بج لو بختج ما ادري.. ثنتينكم بناتي وما اقدر اضحي بكم.. شنو اسوي يا ربي ساعدني يا ربي..
قامت تبجي وجنات تهدأ فيها ودموعها ما قدرت تتحمل وهي تشوف امها تبجي قامت دموعها تنزل وكانها تواسي دموع امها..
************************************..
العصر.. في بيت نيرمين..
جنان: يعني بتروحين؟؟..
نيرمين وهي مترددة: والله ما ادري.. بس خلني اروح عشان ابوج ما يشك في شي.. وبسوي روحي ما ادري بشي.. وبطمن اختج وامج..
جنان خايفة ومترددة: لا لا .. والا تدرين.. قولي انزين.. تدرين لاتقولين.. لا تقولين.. او قولي.. تدرين اني ما ادري.. سوي الي بتسوين..
نيرمين: هههه.. كل هذا خوف.. انزين خلني البس عشان اروح..
جنان: اوكي..
راحت نيرمين حجرتها واخذ تاليها جلابية سوداء.. ولبستها.. ويوم خلصت ولبست دفتها وحجابها طلعت من البيت وراحت بيت خالتها.. وصلت وطقت الباب..
مهلت تقريبا شوي بس.. الا الباب مفتوح.. طلع سالم وهو يطالعها مستغرب: ويش تبين؟؟..
نيرمين تطالعها وكلها ثقة: بدش.. بشوف خالتي وبناتها..
سالم تباعد عن الباب ونيرمين دشت.. شافت صفاء وجنات واقفين.. كانهم كانوا ينتظرون احد.. او كانوا متوقعين ان جنان جت ما ادري.. راحت الى خالتها: سلام خالة..
صفاء بصوت مبوح: هلا بنتي..
سلمت على جنات: شخبارج جنات..
جنات وهي متضايقة: بخير..
صفاء دشت الحجرة.. ونيرمين تطالعها" مسكينة يا خالتي اكيد زعلانة على جنان" .. طالعت جنات وحبت تسوي روحها ما تدري بشي: وين جنان؟؟..
جنات تضايقت "يعني جنان مو عندش.. ااه جنان وين بتروحين.. اهم شي انش بخير.. اهم شي": امشي داخل اقول اليش..
دخلت جنات ونيرمين الحجرة وصكوا الباب.. وسالم راح دخل حجرته وكانه تاكد انه بنته مو عند نيرمين..
في حجرة البنات..
نيرمين تطالع صفاء.. كانت تبى تقول اليها بس ما قدرت " يمكن ابوهم قاعد يتصوخ علينا.. اني ويش ضمني.. خلني ساكته الين ما تنتهي هالليلة وتخلص السالفة".. جنات: جنان شردت من البيت.. لان ابوج يبى يزوجها واحد اكبر منها..
نيرمين تسوي روحها منصدمة: شردت!!..
جنات: اي.. ومن اول امس احنا ما ندري عنها..
صفاء وكانها تبى تفضفض: المشكلة ابوها يقول اذا ما جت جنان بزوج الرجال الى جنات.. والله يا بنتي خايفة عليهم.. شنو اسوي.. شنوو الحل بس شنوو..
وقامت تبجي <<< مسكينة.. نيرمين انصدمت من كلام خالتها وفي نفس الوقت حست بخالتها الي قامت تبجي.. قامت اليها وراحت حضنتها.. وهي تفكر ومترددة تقول اليها او لا" يا ربي اخاف اقول اليها.. و هي تتحير تضحي بجنان او جنات.. واخاف ما اقول اليها وجنات تروح فيها.. يا ميسر يا الله يسر الامور يا رب"..
قطع كل هالتفكير صوت الباب ينطق.. قامت جنات ومسحت دموعها الي نزلت وهي تطالع امها.. وراحت فتحت الباب.. ونيرمين تباعدت عن صفاء وهي تقول: انشاء الله هي بخير..
صفاء هزت راسها بنعم ومسحت دموعها..
وقفت جنات تطالع ابوها الي واقف: يلا الحين بتتجهزين.. انتين فاهمة!!!..
جنات انصدمت: يعني شنووؤ؟؟..
سالم بعصبية: يعني شنوؤ بعد!!.. يعني الرجال بياخذج انتين فاهمة انتين.. يلااااااااا
جنات وهي خايفة من صراخ ابوها: انزين اني ما امبيه..
سالم مد ايده وعطاها كف..خلت جنات تنزل دموعها بشكل لا ارادي.. التفت نيرمين وصفاء يطالعون جنات لما سمعوا صوت الكف.. صفاء يوم شافت انها ما تقدر تسوي شي لبنتها.. قامت ونزلت دموعها وكانها ما عدها حل ثاني..
نيرمين طالعتهم وقامت وقفت وراحت عند الباب وطالعت سالم بكل استحقار.. وباعدت جنات عن الباب و وقفت مكانها: اسمعني عدل.. اني ما ادري انته ما عندك ضمير.. يعني ما تحس ولا عندك قلب او مشاعر.. يا رجال هذي بنتك بنتك.. مو عدوتك.. تبى تزوجها واحد اكبر منها وغنـــ..
قطعت كلامها لانها كانت بتقول غني.. بس هي ما تدري على حسب الي قالوه اليها فغيرت الكلام وكملت: وشلون يعني تزوجها وهي مو راضية.. هي تحدد حياتها انته مو على كيفك..
سالم ضحك ضحكة سخرية: الحين انتين جاية تعلميني شلون ازوج بناتي.. لا يكون حاطينج محامية عليهم وانا ما ادري.. اسمعي حبيبتي.. قصي السانج لا انا اقصه لج فاااااااهمة..
نيرمين طالعته وهي منقهرة وبكل حقارة: انته صدق واحد ما عنده ضمير ولا يخاف من ربه..
وطالعت خالتها وجنات: مع السلامة..
وطلعت من البيت بسرعة وهي تحس روحها متضايقة حدها.. مو قادرة تستوعب هالابو الي عدهم.. راحت تتمشى بخطوات ثقيلة الى البيت الين ما شافت روحها عند باب البيت.. وقفت عند الباب وهي مترددة تدخل لو لا.. و ويش تقول الى جنان.. ابوج بزوج اختج بدالج.. وقفت وهي محتارة..
***********************..
في الليل.. في بيت ابو جنان..
في الصالة وما بين الكل قاعد.. جنات الي قاعدة وهي وعليها عبآتهاا وشالها الي مغطية به وجهها.. ومن تحت الغطاء كانت دموعها على خدها.. مو قادرة تصدق الي قاعد يصير..اما صفاء وسارة فكانوا قاعدين تحتها.. وقبالهم قاعد الشيخ وسالم والرجال << الي بيزوجها.. ورجالين << للشهود طبعا..
فتح الشيخ دفتر كان عنده.. واخذ البطاقات من سالم ومن الرجال.. وبس سجل الاسماء قال: يا بنتي يا جنات سالم ال..... تقبلين تتزوجين من عقيل كريم ال..... << اكيد عرفتونه.. ((عقيل رجل زينب))..
جنات راحت في صدمة خلتها مو عارفة شنوؤ تقول" اقول اليه مواقفة واهدم حياتي.. لو اقول اليه مو مواقفة.. بس اذا قلت اليه مو موافقة شنوؤ بسوي ابوي فيي.. يا رب.. شنوو الحل شنوؤؤ..".. الشيخ يطالعها وينتظر منها الجواب: يا بنتي انا انتظرج.. موافقة تتزوجين من عقيل كريم..
جنات مو قادرة تنطق ولا شي.. طالعت امهاوامه جودت ايدها وكأنها تحاول تهديها..جنات طالعت ابوها..سالم وهو مو عارف ويش يسوي.. طالعها وهو يخزر فيها: يلا يا بنتي.. لا تستحين.. جاوبي.. ما عليه شيخنا البنية تستحي.. هه
الشيخ: لا تستحين.. قولي الي يا بتي انتين موافقة لو لا؟؟..
جنات ساكتة وما تبى تجاوب..عقيل طالع سالم و حرك اليه راسه بمعني ويش فيها.. سالم ابتسم اليه وطالع جنات: يلا جنات..
جنات ضغطت على ايد امها الي قامت تصيح من دون صوت.. جنات طالعت ابوها وهي تقول: اني.. ا.. اني..
جنات" لالالالالالا.. ما امبي اوافق ما امبي.. لالالالالالالا": اني.. مــــــــــــــ

**********************..
في بيت نيرمين..
طلعت نيرمين من الحمام.. وراحت لبست اليها ثياب من بعد ما خلصت هالشاور .. طلعت من الحجرة وهي تنشف شعرها: جنااان.. سويتين الاكل.. والله ما اشتم ريحه.. هههه
دشت المطبخ بس ما شافتها: وين هي؟؟..

طلعت ودورت في كل البيت.. بس ما حصلتها: اااااه اكيد راحت بيتهم.. لا يا ربي هذي مجنونة ويش بتسوي بروحها.. اففففف.. اني الغبية قلت اليها.. خلني اروح البس عباتي والحقها..


انتظر ردوودكم عشان بنزل الجزء السابع..^

--------------------------------------------------------------------------------



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 53
قديم(ـة) 04-09-2012, 02:06 AM
YAqeen YAqeen غير متصل
©؛°¨غرامي نشيط¨°؛©
 
الافتراضي رد: من أجلك فقط / بقلمي


روآآآآآآآآآآآآيةةة حححدههها رووووعةة..
تسلمييين ع هالإـإبدآآآع ..
و آهم شيء انها بححرآآآنيةة ..

-اممم اتوقع انه جنان رااححت ليهم و بتقول انهم مو موافقين و ابوها بعصب و بطلق امها و بروحون يعيشون عند نيرمين ..

بإنتظآرش ..



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 54
قديم(ـة) 04-09-2012, 10:58 AM
Rehana 333 Rehana 333 غير متصل
©؛°¨غرامي متألق ¨°؛©
 
11302798202 رد: من أجلك فقط / بقلمي


اقتباس:
المشاركة الأساسية كتبها YAqeen مشاهدة المشاركة
روآآآآآآآآآآآآيةةة حححدههها رووووعةة..
تسلمييين ع هالإـإبدآآآع ..
و آهم شيء انها بححرآآآنيةة ..

-اممم اتوقع انه جنان رااححت ليهم و بتقول انهم مو موافقين و ابوها بعصب و بطلق امها و بروحون يعيشون عند نيرمين ..

بإنتظآرش ..

انتي الأروع ياروحي
و مشكوؤة ع التوقاعات الحلوة يابعدي
سجلتك من متابعيني
تحيآتي



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 55
قديم(ـة) 04-09-2012, 10:59 AM
Rehana 333 Rehana 333 غير متصل
©؛°¨غرامي متألق ¨°؛©
 
الافتراضي رد: من أجلك فقط / بقلمي


بنآت رح أنزل البآرت الليلة أنتظروني ^..^

تحيآتي > <



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 56
قديم(ـة) 04-09-2012, 05:33 PM
YAqeen YAqeen غير متصل
©؛°¨غرامي نشيط¨°؛©
 
الافتراضي رد: من أجلك فقط / بقلمي


بإنتظآآآرش خلف جبددي :*


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 57
قديم(ـة) 04-09-2012, 09:38 PM
Rehana 333 Rehana 333 غير متصل
©؛°¨غرامي متألق ¨°؛©
 
الافتراضي رد: من أجلك فقط / بقلمي


بنآت يمكن أنزله بكرا لأنه البآرت محفوؤظ بالاب مالي والاب مالي عند بنت خالتي
سوري من جد آسفة أول مرة أأجله وأنشاء الله آخر مرة -__-


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 58
قديم(ـة) 04-09-2012, 10:10 PM
متى.Aنلتقي.~ متى.Aنلتقي.~ غير متصل
©؛°¨غرامي فعال ¨°؛©
 
11302798202 رد: من أجلك فقط / بقلمي


اقتباس:
المشاركة الأساسية كتبها مجنونہ العذآبے مشاهدة المشاركة
بنآت يمكن أنزله بكرا لأنه البآرت محفوؤظ بالاب مالي والاب مالي عند بنت خالتي
سوري من جد آسفة أول مرة أأجله وأنشاء الله آخر مرة -__-

أممم بنآت آسفةع تأخر الكاتبة بس لابها عندي ورح يكون عندي لأسبوعين فرح أنزل البآرتآت لكم بدالها ^^.
بالمانسبة رح أنزل البآرت بعد شوي
أنتظروني
تحياتي




آخر من قام بالتعديل متى.Aنلتقي.~; بتاريخ 04-09-2012 الساعة 11:08 PM.
الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 59
قديم(ـة) 04-09-2012, 11:14 PM
متى.Aنلتقي.~ متى.Aنلتقي.~ غير متصل
©؛°¨غرامي فعال ¨°؛©
 
11302798202 رد: من أجلك فقط / بقلمي



الجـــــــــــــــــــــــــــــــزء
الســـــــــابع..


احيانا.. ننصدم باشياء.. لابد ان تكون موجودة في هذه الحياة..
لا نستطيع تغيرها ابدا.. فالقدر و القضاء مكتوب على الجميع..
وهذا هو قضائي وقدري..

********************************.
.

في بيت ابو جنان..

جنات" لالالالالالا.. ما امبي اوافق ما امبي.. لالالالالالالا": اني.. مــــــــــــــ

قطع كلامها صوت الجرس.. سالم" هذا وقته": بقوم اشوف انا..

جنات تنهدت بصوت خفيف" اشوه اشوه.. الحمدالله اني ما وافقت.. بس الحين بيجي ابوي وبوافق غصبا عني.. ااااه"..

سالم بطل الباب.. وتفاجأ بالي قدامه..كانت جنان واقفة.. طالعت وهي تقول: تزوجت جنات لو لا؟؟..

سالم مستغرب: لا..

دخلت البيت وهي دازه ابوها عن الباب.. وراحت وهي تطالعهم.. والكل كان يطالعها.. جنات" لااااااااا جنان شنو يابج جنان اختي.. لاااا"..صفاء اول ما شافتها شهقت.. قامت اليها وحضنتها: الحمد الله انج بخير.. الحمد الله..

جنان نزلت دموعها وهي في حضن امها..و سارة تطالعهم وهي تتأفأف بصوت خفيف..اما جنان باعدت امها عنها وطالعت الشيخ وقالت بكل ثقة: اني الي بتزوج.. مو جنات.. واني مواقفة.. يلا بسرعة سجل..>> هع هع تعجبني القوية

سالم راح قعد واشر اليها انها تيي تقعد جمبه ..راحت وقعدت: يلا ابوي اعطه بطاقتي.. اني موافقة..

سالم وهو يتنهد ويكلمها بصوت خفيف: فشلتيناااا..>> أنت يفشلونك بس أنت تفشل بنآت عادي ^..^

طلع البطاقة وعطاها الشيخ وهو منحرج: ما عليه.. سامحنا يا شيخ..

الشيخ وكأنه مو فاهم السالفة اخذ البطاقة وسجل اسمها وقال: يا بنتي يا جنان سالم.. تقبليــــــــــــ

جنان قاطعته: لو سمحت اني مواقفة.. ما يحتاج تسالني.. خلصنا بسرعة..

***********************************..

في الطريق..
طلعت نيرمين من بيتها وراحت تركض بسرعة الى بيت خالتها....... وصلت البيت وقامت تطق الجرس بقوة... فجأة انفتح الباب.. كان سالم قدامها: هاا نعم شتبين شنو جاية تسوين هني؟؟..

نيرمين: تباعد مزاج عشان أكلمك ..

سالم تباعد ونيرمين دشت.. سالم بإستهزاء: هه ترى بنت خالتج تزوجت ما تقدرين تسوين اليها شي ..

طالعته وهي منصدمة ومعصبة في نفس الوقت.. وراحت طقت الباب على غرفة البنات.. أنفتح الباب وكانت جنات واقفة: نيرمين!!.. هلا حياج تفضلي الغرفة غرفتج..

نيرمين تطالع جنات وتطالع صفاء وكانها تبى تعرف شنوؤ صار.. جنات: مو أني.. جنان هي الي تزوجته..

نيرمين: ليييييش؟؟..

جنات تنهدت وقعدت على السرير: ضحت عشاني.. هه واني ما قدرت اضحي عشانها.. لو موافقة من الاول كان هي ما تزوجت الحين واحد ما تحبه..

صفاء مسحت على شعر جنات : حبيبتي لا تقولين جدي.. يمكن هالزواج يكون اليها خير مو شر..

نيرمين: الحين هي وين؟؟..

صفاء: في المجلس ويا الرجال..

في المجلس..

كانت جنان جالسة بعيد عن عقيل.. وكانت قاعدة بعباتها وحجابها.. وكان السكوت سيد الموقف إلين ما تكلم عقيل: انا عمري 40 سنة.. و.. و اشتغل في شركتي..

جنان" واني ويش دخلني فيييك.. اففف"
..عقيل يكمل كلامه: و طبعا بتعيشين وياي و ويا زوجتي و اولادي..

جنان رفعت راسها تطالعه و كانها مو مستوعبة الي قاعد يقوله: شنوؤؤ شنووؤ.. عييييد كلامك ابي اسمع مرة ثانية.. قول لي شنوؤ قلت..

عقيل يطالعها ومستغرب: شنو فيج؟؟..

جنان قامت وقفت وطلعت بره المجلس وشافت ابوها في الصالة.. راحت اليه وهي تصرخ: اننت.. ياللي ما تخاااااف ربك.. يا الي ما عندك احساااااس و لا ضمير.. شلوووووون ابي أفهم.. شلووووون تسووووووي جذي فيني.. انطق.. اتكلم اتكلم ابي اعرف ليش.. صرت اشك اني مو بنتك.. يمكن ياايبني من الشارع اني واختي.. وتبنيتوناا.. الله ينتقم منك مثل ما حرقت قلبي.. الله ينتقم مننك..

راحت ركض لغرفتها وقفلت الباب.. وكان الكل داخل الغرفة يطالعها ومستغرب.. نيرمين: شنو صاير بررره؟؟.. من الي يصررررخ؟؟..


*************************..

في بيت ابو حسن.. بعد ساعة..

دخل البيت وهو يتنهد.. راح يركب الدرج وهو يفكر" معقولة الي سويته صح؟؟.. انا تزوجت على زينب.. اااااه يا زينب اااه.. ليش ليش ليش.. ابي اعرف السبب بس ليش سويتين جذي.. انتين الي جنيتين على روحج.. وانا لازم اطفي النار الي في قلبي.. فهالزواج بخليني انسى و انسى اليوم الي تزوجتج فيه.. لكن الاولاد.. شنو بصير فيهم.. انا ما اقدر اعيش من دونهم ما اقدر.."

وصل الغرفة وفتح الباب ودخل وصك الباب على شوي شوي.. نظر وراه وشاف زينب نايمة .. طالعها و عيونه كلها عتاب وفي نفس الوقت كلها حب وشوق وتأنيب ضمير.. قام يتمشى بخطوات خفيفة عشان ما تحس.. طالعها وفجاة تغير كل شي" انتين انتين الي سويتين جذي انتين.. الي صار احسن.. عشان تعرفين اني مو لعبة في ايدج"..

فتحت عيونها وقعدت من النوم.. طالعته وهو يطالعها..ومجرد ما تلاقت نظراتهم بعد عنها وفتح الكبت ياخذ اليه ثياب..قامت وجلست ع السرير وهي تطالعه: توك ياي؟؟..

عقيل من غير نفس: اي..

زينب: كل هذا شغل.. ليش اليوم مطولين الاجتماع.. انتظرتك بس ما ييت.. فقلت خلني انام افضل لي.. << ما تدري بشي.. هه

عقيل: ما كان فيه داعي تنتظرين..

***************************..
الصبح يوم السبت.. في بيت نيرمين..

كانت جالسة تطالع التلفزيون.. وما بين هي قاعدة تطالع اتذكرت شي.. وقامت تفكر" عميي.. شلون اوصل اليه.. شلون يا ربي شلون.. لازم اوصل وصية ابوي لازم.. بس شلون اوصل الى عمي شلون.. ابوي قال اليي مرة انه اسم عمي حسين .. انزين اسم عمي وعرفته بس وين عايش.. معقولة يكون عايش في بيت جدي.. لو اخذ اليه بيت ثاني.. يا ربي ويش اسوي.. ما في الا اني ادور على رقمه في الدليل".. قامت وراحت اخذت كتاب الدليل وفتحته. وهي تدور: حاء حاء حاء..

حصلت حرف الحاء قامت تدور على الاسامي: وايد اسامي حسين لكن راح يكون اسمه حسين محمد علي المسرور..

دورت وفجاة حصلت الاسم: اووف معقولة يكون هو؟؟.. ما اصدق.. بس اليه عدة اراقام.. خلني اتصل عليهم كلهم الين ما احصله..

حملت الكتاب وراحت الى تلفون البيت: لكن ويش اقول اليه.. امممم بقول اليه ابي اقابلك.. وبوصل رسالة ابوي وافتك من كل هالهم..

ضربت الرقم وحطت السماعة على اذونها.. حارست شوي الا ترد عليها صوت مرأة: الو..

نيرمين" هذي من بعد؟؟": الو سلام..

المرأة: عليكم السلام..

نيرمين: هذا مو تلفون حسين محمد علي المسرور؟؟..

المرأة: اي نعم.. ويش بغيتين منه؟؟..

نيرمين: ابي اكلمه لو سمحتين..

المرأة: سامحيني يا بتي الرجال تعبان حده.. وما يقدر الحين يتكلم..

نيرمين" عمييي.. تعبااان؟؟.. ويش فيييييه؟؟": عفوا يصير اعرف ويش فيه؟..

المرأة: من انتين؟؟..

نيرمين: اني؟؟.. امم لو سمحتين اعطيني عنوان بيتكم.. واني بجي ازوره وبقول اليه الموضوع.. لان الموضوع ما ينقال في التلفون.. وانشاء الله اذا جيت بتعرفيني..

المرأة: اممم.. اوكي تفضلي العنوان (------)..

سجلت نيرمين العنوان: اها عرفته.. مشكورة ما تقصرين.. يلا مع السلامة..

المرأة: الله يسلمش..

صكت التلفون وهي تفكر" افف.. اني ليش مشغول بالي.. يعني يمكن تعبان عادي.. ليش مكبرة اني الموضوع.. يمكن مريض عادي"..
********************..

في الليل.. في بيت ابو جنان..

في حجرة البنات..

كانوا جنان وجنات مسلقين على سرير واحد.. وكل وحدة مقابلة الثانية.. جنان: اني ما ابي اصير مثل سارة تصدقين..

جنات طالعت اختها وهي متضايقة: جناان.. سامحيييني الله يخليج.. لو اني وافقت على الرجال كــ..

قاطعتها اختها:جب يلا ولاكلمة.. انتين ما لج خص او اي ذنب..

جنات: امبلا اني لو وافقت كان انتين الحين بتكونين مرتاحة.. وما بتتدمر حياتج..

جنان: لا شلون ما بتدمر حياتي واني اشوف اختي تصير مكاني.. انتين مجرد وسيلة الي خلتني اتزوجه.. والا لو ابوي ما كان بزوجج لو اني ماشردت..

جنات دمعت عيونها وقامت تبجي.. و جنان يوم شافتها ما قدرت تتحمل وحضنتها وقامت تبجي معاها ..

*******************..

الصبح يوم الاحد.. في بيت نيرمين..

قعدت من نومها والشمس تضرب في عيونها.. حست بالضوء المزعج.. فقامت من نومها وهي متنشطة.. تحس روحها نشيطة ومتحمسة بس ما تدري على شنوؤ..

راحت دخلت الحمام واخذ تاليها شاور.. وطلعت لبست جذي





ونشفت شعرها المبلل و الطويل الناعم و ورفعته على فوق.. راحت المطبخ بتسوي اليها فطور بس وقفها شي.. صوت الجــــــرس..

نيرمين" بسم الله.. من ياي في هذي الساعة.. الساعة 6:30.. الله يستر يا ربي.. كان مو في خالتي او بناتها شي"
.. راحت اخذت اليها حجاب وركضت فتحت الباب.. شافت جنات واقفة وحاملة في ايدها جيس.. نيرمين خافت: شنوؤ صاير جنااات؟؟.. خالتي فيها شي؟؟.. والا جنان.. او انتين.. شنوؤ صاير؟؟..

جنات: ههه.. لا الحمد الله احنا ما فينا شي.. بس امي قالت اللي اجيب اليش هالاكل.. تتفطرين ابه.. بس ترى من دون ابوي ما يدري.. ويعني انتين بتتعبين كل يوم تسوين لج الفطور فخلتني اجيب لج شوي..

نيرمين تنهدت: ااه..خرعتيني فكرة في شي.. يلا ييبيه.. وقولي الى خالتي مشكورة والله لا يحرمني منج..

جنات: ههههه يوصل انشاء الله..

نيرمين: رايحة للباص عشان المدرسة؟؟..

جنات: اي..

نيرمين: الا جنان وينها؟؟..

جنات: ما تبى تروح المدرسة.. تقول تعبانة وما اليها خلق..

نيرمين تضايقت: مسكينة.. الله يساعدها..

جنات تنهدت: يا الله الحين بروح.. تبين شي؟؟..

نيرمين: لا روحي.. الله يحفظج..

جنات وهي رايحة : مع السلامة..

نيرمين وهي صاكة الباب: الله يسلمج..

اكلت وبعد ماكملت غسلت الآواني.. و نظفت البيت ورتبته.. و طالعت شوي التلفزيون وبعدين قرات قران شوي.. الين ما صارت الساعة 9:00..
كانت قاعدة تقرا القران.. وفجأة لفت انتباهها الساعة الى صارت تسع.. قامت وصكت القران وحبته.. وراحت حجرتها واخذت اليها فلوس وحطتهم في شنطتها.. ولبست عبآتها وحجابها وطلعت من البيت.. وقفلت الباب.. طالعت سيارة ابوها المغبرة ونزلت دمعة من عيونها: لو انته في هذي الدنيا كان انته الى وصلتني.. لكن الحين اضطر اروح بتكسي ابوي.. لكن ما عليه بتدرب سياقة اذا صار عندي فلوس و بسوق بسيارتك..
مسحت دمعتها وقامت تتمشى الين ما وصلت الى الشارع.. وقفت تنتظر تكسي .. الين ما مر تكسي من صوبها: تفضلي اختي..

نيرمين فتحت الباب الي وراء ودخلت.. وعطت السايق الورقة: الى هالعنوان لو سمحت..

السايق: انشاء الله..

مشى السايق وطول الطريق نيرمين تفكر جيفه راح تقابل عمها.. بتجي تقول اليه اني بنت الي اخذت منه الورث.. الي حرمته الورث وظلمته.. وعلى ظلمك هو مسامحنك لانه يحبك ولانه من دمك.. شنو بتقول اليه.. افكار توديها وتجيبها .. خايفة انها تقابل عمها وانه يطردها من بيته.. وخايفة انه ما يرحب فيها .. ويسوي اليها مثل ما سوى الى ابوها.. وخايفة بعد انها تكون حنت الى عمها لانها الى حد الان هي خايفة وتفكر ويش الي في عمها..

وفجاة وصل السايق الى البيت المطلوب وقف: تفضلي يا انسة..

نيرمين قعدت من تفكريها وعطت السايق فلوسه وقامت طلعت من التكسي.. افترت الا تنبهر بالي قاعدة تشوفه.. مو قادرة تستوعب.. وكأن احد عاطنها كــــــــــف..

نيرمين: هذا بيت عمييييييييييييي......

*************************..
في بيت ابو جنان..
في الصالة..

كانت سارة قاعدة وهي تطالع التلفزيون..طلعت جنان من الحجرة والا تشوفها.. انقهرت منها بس ما اليها خلق تهاوشها وراحت بتدش المطبخ..بس وقفها صوت سارة: هلو انتين.. لا سلام ولا كلام.. لييييش مو مالية عيونج اني؟؟..

افترت اليها جنان وهي منبطة جبدها: اسمعي ساروو.. اني ما امبي اتهاوش وياج.. فسكتي لان واصلة وياي الى اهني <<< وهي تاشر على جبهتها.... فيعني سكتي احسن لج..

سارة بسخرية: هه يمااا خوفتيني الحين عاد..

جنان: انتين صدق... ما تسحتين على وجهج..

سارة انقهرت وصرخت: هييييييييييييه انتين احترمي نفسسسج اقووووول..

جنان منقهرة ومعصبة: لا مو محترمة نفسيييي شنو راييييج؟؟..

سارة: اي طبعا ما راح تحترمين نفسج.. لانه التربية الي متربيتها تربيييية فاااااشلة..

جت جنان بترد عليها..بس سكتها صوت من وراها: انتين الي احترمييي نفسج.. ترااااج زوتينهااااا.. زوجي وماخذتنه منيييي.. و بنتي وبتبعدينها عني.. لكن ما اسمح الييييش انج تغلطين على تربيتي.. ترى تربيتي تسواج وتسوى اهلج كلهم..

في بيت عم نيرمين (حسين) ..

نيرمين: هذا بيت عمييييييييييييي......

طالعت نيرمين.. كان كبير وكأنه فله.. واسع حده.. فيه حديقه من قدامه ومحاوط البيت سور دار مدارته.. ليه طابقين.. وديكورة عجيييييب حده..

وقفت مصدومة شوي.. لكنها حاولت تستوعب شوي.. راحت الى الباب الكبير.. تقريبا حق تدش فيه السيارات.. جت بتدخل الا تشوف حراس واقفين.. " ما اصدق مو قادرة استوعب يا ربي.. ابوي قال اليي انا عائلته غنية بس يعني اول مرة اشوف جذي".. دخلت من الباب الصغير الي تحت الباب الكبير.. وكانوا الحراس يطالعونها مستغربين.. جه اليها حارس من الحراس: عفوا.. بغيتين احد؟؟..

نيرمين ارتبكت: هاا.. اي.. يعني.. بغيت.. ح.. حسين.. حسين محمد علي..

الحارس: اها تفضلي وياي بوصلج.. العم داخل..

نيرمين مشت وراه وهي تطالع في الحديقة والسيارات المصفوفة.. وكل شي باهرها في هالبيت.. <<< عايشة في فقر وين تحصل هالشي.. ههههه..

نيرمين وصلت الى باب البيت.. راح الحارس طق الجرس.. وهي واقفة قبال الباب تقريبا.. فجاة تبطل الباب وكانت وحدة خدامة واقفت: نئم.. <<< نعم..

الحارس: وين العمة نجيبة..

نيرمين" منوا ذي نجيبة.. الحين نشوف ليش اني مستعجلة"..

الخدامة: لحدة سوي.. <<< لحظة شوي..

حارسوا شوي الا في مراة طالعة وعليها حجابها.. كانت كبيرة بالسن تقريبا يعني ام.. و سمراء شوي.. وعليها جلابية جميلة حدها.. ولا كانها قاعدة في بيتها كانها بتطلع لحفلة.. <<< طبعا هذا بالنسبة الى نيرمين..
نجيبة وهي تطالع نيرمين: اهلا..

الحارس: انا استاذن يا عمة..

نجيبة تطالع الحارس: اوكي..

ردت طالعت نيرمين وهي مستغربة.. نيرمين" يمكن تكون مرت عمي.. ما ادري" : ا.. ا.. س..سلام..

نجيبة: عليكم السلام يا هلا.. تفضلي يا بتي من بغيتين؟؟..

نيرمين مرتبكة شوي: ا.. اني امس.. اتصلت.. و .. و ردت عليي مراة بس ما ادري منهي.. وقلت اليها امبي اكلم عمي حسين.. وعطتني هالعنوان وجيت..

نجيبة وكانها تذكرت: اي اي صح.. اني الي كلمتج.. هلا يا بنتي تفضلي..

نيرمين دخلت وهي تقول" خايفة يا ربي جان اذا عرفت اني بنت صالح شنو بتسوي فيني.. يا الله بس بقول الوصية واروح ياااااا رب..".. دخلت وهي مبتسمة.. رفعت راسها وانبهرت ازيد بديكور البيت.. شافت انه قدامها الدرج.. وعلى يمينها صالة وعلى يسارها بعد.. نجيبة: تفضلي هني..

راحت وراها الى الصالة الي على يمينها.. وكان ديكور الكنبات ولون الصالة عجييب حده.. والبيت نظيف ومرتب وريحته روعععة.. نجيبة: قعدي حياش..

نيرمين ابتسمت اليها وقعدت.. ونجيبة قعدت قبالها: اني مرت حسين.. الي كلمتج امس..

نيرمين مبتسمة: اها.. اهلا تشرفنا..

نجيبة: الا انتين من وين تعرفين ابو علي..

نيرمين مستغربة: من ابو علي؟؟..

نجيبة ضحكت: ههههه.. قصدي حسين.. اسمه ابو علي..

نيرمين" اها عجل اسمه بعد ابو علي": هه.. بصراحة اني اعرفه من زمان.. و ..

ما قدرت تكمل خايفة من مرت عمها.. ويش بتسوي فيها..

نجيبة مستغربة: امم.. كملي..

توقعاتكم؟؟
شنو رح تكون ردة فعل زينب وأولادها إذا عرفت عقيل تزوج عليها؟؟
شنو رح يصير مع نرمين؟؟
وجنآت وأمها شنو رح يصير معاهم إذا رآحت جنآن عنهم ؟؟
شنو صآير مع عم نرمين ؟؟

ووووو...بس
أنتظروني تحيآتي



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 60
قديم(ـة) 05-09-2012, 12:45 AM
YAqeen YAqeen غير متصل
©؛°¨غرامي نشيط¨°؛©
 
الافتراضي رد: من أجلك فقط / بقلمي


روووووعةةة ..
تسلمييين ع هالإـإبدآآع ..

شنو رح تكون ردة فعل زينب وأولادها إذا عرفت عقيل تزوج عليها؟؟
امممم اتوقع انه تروح تتفآهم ويةة جنان و جنان بتقول ليها بالحقيقةة ..

شنو رح يصير مع نرمين؟؟
بتعيش في بيت عمها ..

وجنآت وأمها شنو رح يصير معاهم إذا رآحت جنآن عنهم ؟؟
اممم بتنقلب حيآتهم فووق تححت ..

شنو صآير مع عم نرمين ؟؟
اممم اتوقع انه اغتم ما يقدر يتككلم ..

بإنتظآرش ..



الرد باقتباس
إضافة رد
الإشارات المرجعية

من أجلك فقط / بقلمي ، كاملة

الوسوم
اجلك
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الأولى : أبي أنام بحضنك و أصحيك بنص الليل و أقول ما كفاني حضنك ضمني لك حيل / كاملة ازهار الليل روايات كامله - يتم نقل الرواية هنا بعد اكتمالها 6653 الأمس 07:14 AM
وكان أسمها صبح / بقلمي , كاملة مغرومه بلا حد روايات كامله - يتم نقل الرواية هنا بعد اكتمالها 23 23-03-2014 06:42 PM
مجلس الروايات للإستفسارات و الطلبات فقط [ الإقتراحات ممنوعة ] ؛ وردة الزيزفون روايات - طويلة 18339 04-08-2013 11:40 AM
مجلس الروايات للإستفسارات و الطلبات ؛ !! أنـثـى الـ خ ـيـآلـ !! روايات - طويلة 3973 07-10-2010 01:10 PM
مجلس الروايات للإستفسارات و الطلبات ؛ الزعيـ A.8K ـمه روايات - طويلة 2042 24-02-2010 04:37 AM

الساعة الآن +3: 04:59 PM.
Powered by vBulletin® Version 3.8.7
Copyright ©2000 - 2014, vBulletin Solutions, Inc.
SEO by vBSEO 3.6.1
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم