بوقـت مـن البطـا وبليـل تتراقـص شياطينـه
بعد شفت الضيا ينزع مـن ثيـاب المسـا ثلثيـن
تحايلـت المنـام اللـي مثـل بيـتـك تمريـنـه
وأنا اللي مـن تفارقنـا وأنـا ماغمضتلـي عيـن
غريبه!!..كـل حلـم يمـر برقـادي تزوريـنـه
والأغرب كيف أحلم الحلم وأرجع أحلمه بعدين؟!
قبل يومين شفتـك باالمنـام وقمـت مـن حينـه
ونمت امس ورجع نفس المنام اللـي قبـل يوميـن
أنا اللي قبل أسافـر شلـت قلبـي مـن شراينـه
تركته في يـدك مثـل الأمانـه واحفظيهـا زيـن
ترى(حفـظ الامانـه دين)..مجـبـورة ترديـنـه
أجل مافي أحد قد قالك:حفـظ الامانـه ديـن؟!
مـرد المقـفـي بيقفي..ويستـوفـي وتوفيـنـه
بــعــد ليله،ثلاثة،أربعة،شهـر،شـهـريـن
إذا إنتـي ماأنتـي بقـد الكـلام اللـي تقولينـه
حرام أستأمنك حاجه وإذا جيت أطلبـك تنسيـن
تخونين وتبيـن أرضى!..وأحـد يرضـى تخونينـه
أنا لاجيت أخونـك مـع حبيبـه ثانية،ترضيـن؟؟
من أول مارجعت من السفـر ماشفتلـك بينـه؟!
وانا اللي كنت أحسبك قبل أدوس أرض المطار..تجين
تكونين إنتي أول شخـص عينـي تحتضـن عينـه
وكنت أتخيلك من زود فرحـة رجعتـي تبكيـن..
واشوف بدمعتك حكيك واعرفـه قبـل تحكينـه
واجيب احلى من اللي بتحكينه واتركـك تحكيـن
تقولين:الوطـن نور..واقول:بـنـور مضويـنـه
تقوليلي:غديت احلى ..واقول:عيونـك الحلويـن
كـلام نـام بشفاهك..وخفـتـي لا تصحيـنـه
ذخرتيـه لغـرام اللـي ينام..ويتركـك تصحيـن
تغانمـتـي غيابي..لـيـن رجحـتـي موازيـنـه
تعلم من يـدك لمـس الكفوف..وعلمـك تجفيـن
وليتـك لاقيـه بـه شـي فيـنـي ماتلاقيـنـه
مهو بغرور..لكـن خابـرك مالـك أمـل تلقيـن
تغافلـك بغـلا..ولا حـلا ماهـوب مـن زينـه
تزينه الصور..بس الصحيح إبـن الحـلال زويـن
وانـا مانـي بناقـص عنـه يـوم انـك تبدينـه
نصيبي..هو نصيبي لـو يسددهـا مـن الصوبيـن
قنـوع بمظهري..والـسـم مايقـتـل ثعابيـنـه
على قول المثل(مانـي حلو..لكـن مانـي شيـن)
إذا اهـداك الزهر..فانـا اهديـتـك بساتيـنـه
واذا الهاك بفرح ليله،فانـا تهـت لبكـاك سنيـن
واذا استضعفتـك املاكه...وشتـتـك ملايـنـه
انا حتى فتـات الخبـزة اقسمهـا معـك نصفيـن
طموحي ..بس اجـي واظفـر بشـي تستحقينـه
تدينته،تسلفته،سرقتـه،مـومـهـم مـنـيــن
كأني مـن كثـر ماارضـى بكـل اللـي تمنينـه
لوانـك تطلبيـن الله يعنيـنـي ..بقول:آمـيـن
(أنا ملعب على الحبلين)..وقت الطيـش وسنينـه
تبين الحين يوم اني كبرت..(ألعب علـى الحبليـن)
ترى عند البدو باالـذات عيـب اللـي تسوينـه
حلاتـك لاعشقتي..تعشقينـي لـيـوم الـديـن
غـرام نسكـن ضلوعه...حشيمـه مـن مجانينـه
جفـا يجمـع معزتنا..ولاعشـق يـذل اثنـيـن
كـثـار الـلـي تحـدونـي وقالولي:تحبـيـنـه
أمانه..لاتخلينـي صغـيـر بعيونـهـم تكفـيـن
لأنــي كــل ماقالو:(تخون)..أقول:مسكيـنـه
عليك الله وامانـه علميهـم مـن هـو المسكيـن
أنا خايف(ليـا طـاح الجمـل تكثـر سكاكينـه)
وانا ماعـدت ضلوعـي تحمـل طعنـه السكيـن
مثـل ماقالو:المكتـوب واضـح مـن عناويـنـه
لو ارحل منك للغربه..بسافر من ظلامك ويـن؟!؟
كفايـه...كـل حـلـم بـرقـادي تزوريـنـه
كفايه...مـن تفارقنا..وانـا ماغمضتلـي عـيـن
قبـل يوميـن شفتـك باالمنـام وقمـت منحينـه
ونمت امس ورجع نفس المنام اللـي قبـل يوميـن
الحلم لحامد زيد 
العرض العادي
