,, العاشق المملوح..
طاري طرا ياحمام الدوح
في وادي ماانحدر سيله
مايفضح السد غير البوح
اليا بدا في الهوى ميله
حمامة سدها مفضوح
لاخانها الحظ تلعي له
قولي لخلّي يرد الروح
ياورق تكفين قولي له
ماشاقه العاشق المملوح!
اللي على يديه تدليله
بنيت له فالغرام صروح
آخذ من العمر وابني له
ليا حضر خاطري مشروح
واليا سرا ليلتي ليله !
في ساعة دمعها مسفوح
ازري عن الهم وآشيله
ماعاد له بالجفا مصلوح
ولاعاد لي بالصبر حيله
اما يجي لليال فروح
والسعد وياه تكميله
اويجحد الخافق المجروح
والموت نشرب فناجيله
,, حلو العتب ,,
من صافي الود للغالي
ندهت له يابعد حييً
قلت الهوى مارحم حالي
ابيك بالوصل وتعييً
ترى المشاعر لها والي
تحيا ليا جيتها محييً
حتى ابسط الوصل مرسالي
ماترسله يابعد بييً
واسكت على عذرك البالي
لين الهوى زاد في طييً
وان كان غصن الهوى مالي
مافيه مثلي ولا زييً
وانته ليا جوك عذالي
اتصدق الكذب والسييً
واقول ياقلبه الخالي
واثره تصبَر على كييً
واقبل وانا اسجل اقوالي
قال: الزهر يسمح ب..رَييً
الصبح جرَ الك موالي
والليل ناداك ياضييً
لازلت حلًي وترحالي
ولا زلت لي شمسي وفييً
(حلو العتب منك يحلالي)
من يوم جفت محانييً
يابعد الاول مع التالي
وارخا وسلَم على يدييً
,, صافيات المشاريب ,,
يامن تشوف الذل عقب الشجاعه
ان كنت ولد الذيب لاتاكل الذيب
اللي نزل بالقاع صعب ارتفاعه
لو ارتفع هبت عليه اللواهيب
وان كان ضاق الكون عقب اتساعه
لاتتبع المقفي بدار الاجانيب
حبل الوصل عيّا عليك انقطاعه
ياجاهلٍ بالغيب ماتعلم الغيب
ان عشت في عمرك ولو ربع ساعه
لابد ماتمضي عليك التجاريب
خلك على الشدّات سمعٍ وطاعه
ياللي تسدّ بمعضلات المواجيب
الفضل خلِّه في يدينك بضاعه
ان كان شفت العيب في شقة الجيب
ياللي على الصكات مالك شفاعه
سقم العدو اللي يدِك الصواعيب
تكرم عن اللي حشمته في متاعه
هرجٍ بلا فعلٍ كثير العذاريب
الليل لاتامن ضوراي سباعه
تلقى بها شكٍ وتلقى بها ريب
وان جا نهارٍ فيه ضيم ومجاعه
اهل النقا تاقف على منبع الطيب
وحنّا ترانا كلبونا جماعه
ماينكر الخَطار بيت المعازيب
اقضب عضيل الهم واكسر ذراعه
حتى تعلّك صافيات المشاريب
,, هبوب البرادي ,,
البارحه هبّت هبوب البرادي
ذعذاعها فالقلب برد وعواصيف
وبل المطر سيّل على كل وادي
ياحيلة الله ياعظيم التصاريف
يا (****) يابادي على ضلع بادي
ياراقيٍ بالجود روس المشاريف
اخذ الخبر واعطه مناي ومرادي
الصاحب اللي كيف مايعدل الكيف
اخذت منه الودّ طيب وعنادي
واخذ على قلبي عهود ومحاليف
عامين ماشفته يزاور بلادي
عامين مازاور بلادي ولاشيف
عليه يحداني من الشوق حادي
اليّا طرا ذكره مع اهل السواليف
انا على رجواه سلم وجهادي
ماوالله ألحق في غرامه تحاسيف
لو ضيّع المقفي دروب الرشادي
مجبور ياكسر القلوب المواليف
ان كان مايذكر ليالي ودادي
هو ليه يتعبني بكثر التكاليف
الجرح مايبرى بليّا ضمادي
ان كان ماتبريه بعض المواقيف
اما يلبّسها ثياب الحدادي
والا يوفّيها عهود ومحاليف
,, ماكل مخلوقن خذا ماتمنا ,,
ان شرًقت دنياي حظٌي يغرًب
وان غرًبت بالحظ ونيت ونًا
لاقلت باكر بالسعاده يقرًب
شمس السعاده غرٌبت عن وطنٌا
أبسأل الدكتور وأسأل مجرًب
وشلون خلُي في منامه تهنًا
مشاعري له غصب عني تقرًب
اصدًها وتجيه منٌا ومنُا
حبه بروحي والضماير تسرًب
حيث الهوا راعيه دايم معنًا
حتى الشعر من دون مااحس طرَب
قلته وقلبي في قوافيه غنًا
الشوق في دمي بحبه تشرًب
والا الحظوظ القاسيات ابعدنا
من بعد قلبي في غرامه تكًرًب
ياليت منهو في دياره دفنُا
عزاه يادمع (ن) بعيني تهرًب
ماكل مخلوقن خذا ماتمنا
,, اسر ياساري ,,
اسر ياساري وردّ العلم عنّا
انت لامبدا ولاهم يحزنوني
كم حفرنا فالسراب وكم دفنّا
وكم لقينا عقب مضمانا مزوني
ماحسبتك تبعد الهقوات منّا
لين شفت اللي على بالي يهوني
يوم سقت العهد للكف المحنّا
ماحسبت حساب لو تطلب عيوني
انت لو تبدي على مرقب وطنّا
كان شفت اللي وقف دونك ودوني
كان همّك في عقاب وفي مهنّا
تبطي العذال في حسد وغبوني
حين شدّوا عن مواطنا نزلنّا
لاتعذّر بالطروق وباللّحوني
كل ماهبت هبوب اخلفت ظنّا
من يبيع الحب لايمكن يصوني
مير لاتطري مفارقنا وحنّا
بين ريضان المشاعر والغصوني
التوالي من رباع اليا مثنّا
والبقا في راس سدّادّ الديوني
هيه ياقلب المعنّا لاتعنّا
ماحمل راس الشقا غير المتوني
والمبادي خلها لاتمتحنّا
انت لامبدا ولاهم يحزنوني
للشاعره ,,ملاك الشعر,,
رد : اشعار أعجبتني للشاعره ملاك الشعر . 
العرض العادي
