مهما تعددت النساء، حبيبتي
فالأصل أنتي...
مهما اللغات تعددت ...
والمفردات تعددت...
فأهم مافي مفردات الشعر أنت..
مهما تنوعت المدائن، والخرائط..
والمرافئ، والدروب،،
فمرفأي الابدي أنت...
مهما السماء تجهمت أو أبرقت..
أو أرعدت..
فالشمس أنت..
ما كان حرفاً في غيابك ممكناً
وتكونت كل الثقافة،
يوم كنت..
ولقد أحبك، في زمان قادم
فاهم مما قد اتى..
ما سوف ياتي..
هل تكتبين معي القصيده ياترى؟
أم أنت جزء من فمي؟
أم انت صوتي؟
كيف الرحيل على فضاء آخر؟
من بعد ماعمرت في نهديك،
بيتي؟..
أني أحبك طالما أحيا،
و أرجو أن أحبك كالفراعنة القدامى
بعد موتي،،،
..نزار قباني..
الجزء الخامس........
طلع فيصل وهو يحس بألم فضيع.. وثقل واحاسيس غريبه وغير مفهوم بالنسبه له.. ماكان يتوقع فيوم من الايام انه راح يضطر يواجه حنين بهالطريقه وبهالموضوع.. وما كان متوقع ان نهايته مع حنين راح تكون بهالشكل..طلع من البيت مشياً على الاقدام..ومع طول المسافه من البيت حتى شارع الشانزليزيه..ماكان فيصل حاس باي تعب..كان يمشي بدون هدف..وبدون اي احساس بالوقت والمكان.. او بالناس الي يطالعونه بستغراب من طريقه مشيته وبكاءه وشهقاته الي تطلع بستمرار.. وكان نار بصدره تبغى تحرر وتطلع
وماكانت حنين افضل حال منه كانت مو متخيله ان فيصل يقدر يخونها.. حتى لما جاء فذاك اليوم وقالها عن البنت والتهديد.. حست ان في الموضوع شيء..حست ان فيه شيء كبير لكن ماتوقعت انه بيكون قاسي عليها هالكثر.. تضايقه حنين اكثر لما حست ان فيصل ما كان يبي يقول لها شيء.. وكأنه يبي يستمر بخداعها الى ماله نهايه.. حست انها غبيه وان ثقتها فيه كانت في غير محلها..
وبالوقت الي كان فيه فيصل يدور بالشارع بدون هدف كانت حنين تندب حظها وثقتها العمياء فيه وبنفس المكان الي تركها فيه
حنين بقهر وهي تقوم: من الغبيه الي تثق برجال
حاولت حنين تعدل في عمرها قبل لا تطلع تتطمن على العيال، لانه ماتبي تضايقهم ولا تخرب اجازتهم، مع انها كانت تتمنى لو تشاركهم شوي من فضايح ابوهم، طالعت حنين الساعه وتفاجات انه مر عليها وهي بهالوضع خمس ساعات بدون ماتحس ومع كل التعديلات الي حاولت تضيفها لوجهها لتخفي اثار البكاء من مكياج وغيره الا انها ماقدرت.
فكرت حنين تروح تكمل قراءة المذكرات لانها ممكن تلاقي فضايحه الثانيه لكنه تراجعت عن الفكره لم تخيلت شكل فيصل لو دخل عليها وشافها وهي ماسكتهم، لكنها حاولت تفكر بشيء عشان تغيضه اليوم ومالقت الا انها تطلع العيال من السرداب وتكسر كلامه، لانها عارفه انه اكره شيء عنده في الوجود ان كلامه يتكسر او احد يراجعه بقرار من قراراته، وما خذت وقت في التفكير لانها على طول نزلت وفتحت الباب لهم، كان نواف نايم، ووليد وهشام كانوا يلعبون بلعبه صغيره الكترونيه تشتغل بالبطاريه وبما انهم كانوا متعودين ان محد ينزل نهائياً اذا كان فيه احد محبوس الا في اوقات الوجبات يعطونه الاكل وخلاص.. فكانت المفاجئه قويه وماعرفوا وين يخبون اللعبه، فماكان قدامهم الا انهم يحطونها وراهم، ومانتبهوا ان جزء منها طالع من الخلف
حنين وهي تطالع وجيهم وخوفهم: وش فيكم؟
وليد: باقي على العشاء ساعه؟
حنين وهي تنتبه لسلك الواضح من خلفهم: ليش ودكم تتعشون هنا؟
هشام: يعني بنطلع نتعشى معكم؟
ونواف وهو يفتح عيونه بينما كان متمدد على الفراش: وانت تحسب الدعوه سهله.. بتطلع وتدخل على كيفك
حنين: يعني مو مصدقين.. يالله اطلعوا قدامي.. انا مراح اتعشى اليوم الا وانتوا معي..
نواف وهو يقمز من السرير: بجد
حنين بمرح: بعد لعشره اذا ما طلعتوا بعتبر عرضي مرفوض
وماكملت كلمته الا نواف وهشام طايرين مع الباب اما وليد كان يحس بخوف لان امه بتشوف اللعبه ويمكن تقول لابوه الي راح يقلب الدنيا فوق راسه لان ابوه مانع اي شيء مسلي يدخل معهم السرداب مهما كان، ويمكن يعاقب تركي الي جايبها لهم بالسر
حنين: اعتبرني ماشفتها وقوم خبها باي مكان بسرعه.. وتراني بعد الحين لعشره واذا ماطلعت بتنحبس لحالك
قام وليد بفرح ودس اللعبه تحت السرير وباس ايدها: شكراً ياأحلى ام فالدنيا
وجلسوا فوق يسولفون وينتضرون تركي الي كان رايح لمهرجان الرسم السنوي المنظم من قبل لجنه اصدقاء الفن مع اصدقاءه والي كانوا مخططين يروحون له سوى الا ان الي سووه حرمهم، وبعد ماجاء تركي بشوي وقالهم وش شاف في المهرجان وزيارتهم لمتحف اللوفر وقص عليهم المواقف الي صارت لهم، طلبت حنين من ماريتا تجهز الاكل وعلى طاولة الطعام
نواف: يمه ابوي ليش مابيتعشى معنا؟
حنين وهي تذكر الموضوع وكدره غريبه تجتاح وجهها: عنده شغل
تركي: يمه وش فيك??... متضايقه من شيء؟
حنين: لا حبيبي مافيه شيء
وليد: ابوي اجل مايدري يمه انك طلعتينا؟
حنين بنفاذ صبر: لا، وماله داعي يدري
نواف وهو يغص وشهقة خوف تطلع منه: عطوني مويه
حنين صبت له مويه من الجيك الي عندها: وش فيك ملحوق؟
نواف بخوف وعيونه مثبته على امه: وش بيسوي اذا شافنا؟؟
حنين بغرور: قوله امي طلعتنا ومابيقدر يقول شيء
هشام وليد وهم يصفقون: الله على القوه
حنين بمكر اكبر: وش رايكم اليوم نسهر مع بعض ونخليها سهره ماصرت الين الفجر؟
تركي باستغراب: بجد يمه؟
حنين: وانت شايفني امزح؟
وليد وهو فاتح عيونه: الله وينك من زمان عنا؟
نواف: لا انا بصراحه معاد اقدر اتحمل..كل امنياتي الي حلمت فيها تحت بالسرداب تتحقق.. اشكرك ياربي
حنين وهو تقوم: يالله خلصوا ولحقوني، وجيبوا الورقه ابي اليوم اهزمكم بطريقتي..
وفي دقايق كان الكل في الصاله وهات ياللعب، وعالساعه 2 وعلى دخله فيصل للبيت استغرب من الانوار الي مشغله في الطابق الاول، كان يتوقع انه راح يلقى البيت نايم وخاصه حنين ولما دخل الصاله تفاجئ اكثر كان الكل صاحي وحنين معهم، وخاصه لما لقى وليد ونواف وهشام معهم،" وش طلعم هذولي اكيد حنين تبي تقهرني"، والكل بالصاله كان متجمد حتى حنين الي خافت انه يهزءها وياهم، وخاصه انه مايحب كلامه ينزل الارض ابداً،لكن تفاجئت بردت فعل فيصل البارده وكانه خايف منها
فيصل وهو يطالع فيهم وبعجز: تصبحون على خير
حنين بقوه استغربتها: وانت من اهله
نواف وهو يمسح عيونه: ماصدق..
تركي الي فاتح فمه: هذا ابوي؟
هشام: وينك عنا من زمان ياخالتي؟
الكل: هههههههههههههههههههه
وفوق كان فيصل متوجه للغرفه وهو مو مستوعب الي تسويه حنين تحت، وماحب شكله كذا وهو ضعيف قدام العيال، فتح الغرفه ولقاها مقفله، رجع يفتحها مره ثانيه، مقفله، نزل فيصل وهو قلق من رده فعل حنين وخاصه ان الاولاد فيه ومايبيهم يحسون باي شيء، واول مادخل فيصل الصاله رجع الخوف للجميع مره ثانيه
فيصل: حنين تعالي ابيك شوي؟
حنين ببرود: ضروري؟؟؟
فيصل: ايه، ضروري
طلعت حنين وسحبها فيصل باكبر قدر ممكن عن الاولاد وبجنب لوحه كبيره مقلده للعشاء الاخير لدفنشي، الي تعطي الموقف جو من الخوف والرهبه
فيصل: ليش قافله الباب.. وين انام انا يعني؟
حنين بحزم وهي تروح عنه: بالغرفه الي بنهايه الممر الي بجنب غرفه تركي
لحقها فيصل ووقف بوجها وبرجاء: العيال وش بيقولون.. خليها لما يروحون
حنين وهي تزيحه بهدوء عن وجهها: انا قلت لماريتا تنقل ملابسك واي شيء لك للغرفه..واذا ماتبيها.. الغرف كثيره نق الي تبي ..
فيصل بهمس: ارجوك حنين.. لاتصعبين الموقف علي اكثر ..اليوم وبس
حنين وعيونها تلمع بشي غريب لدرجه ان فيصل تمنى انه سكت وماناقش: فيصل اذا كنت خايف على مشاعر عيالك يشوفونك مطرود من الغرفه، انا ماعندي مانع اقولهم، لان مصيرهم يدرون، لان هذي مو خيانه وبس، هذي فيها بنت
فيصل بخوف ومع انه مايتوقع انها تسويها: لا.. خلاص..اللي تشوفينه
حنين: انا مو فاضيه الحين اناقشك باي شيء، عن اذنك
راقب فيصل حنين بعيونه وهي تدخل الصاله وتكمل لعبها معاهم وكان مافيه اي شيء، صعد فيصل للغرفه الي كانت بارده جداً وبعد ماشغل التدفئه والنور حس بالوحشه، اول مره ينامون بغرف منفصله ويمكن للابد، ارتمى على السرير بملابسه، وهو يفكر بالي صار اليوم، كل شيء صار بسرعه غريبه، لما عرفه حنين.. لما طلع من البيت، شكله الغريب والمثير للشفقه وهو يمشي في الشارع، دعى بهاللحظه ان مايكون احد يعرفها شافه وخاصه احد من الوضفين ..غرق فيصل بفكاره وهمومه لحد ماغط بنوم عميق..من التعب والاجهاد.. وبعد يوم متعب شاق..
وبعد صلاه الفجر مرت حنين غرف العيال وتاكدت ان الكل نام، وهي طالعه من غرفة تركي الي باخر الممر لفت نظرها النور الي مشغل بالغرفه الي نايم فيها فيصل
حنين بحيره: "معقوله للحين مانام وهو قايم امس مبكر ولا نام العصر.. اكيد يفكر، ومو بعيده بعد يفكر في حبيبة قلبه"كملت حنين الجمله الاخيره وهي تحس بالم فضيع وحرقه
مشت حنين لغرفتها لكن فضولها اجبرها ترجع تتلصص على الباب، وسمعت صوت شخير متقطع وعرفه ان فيصل نايم، فتحت الباب بشويش علشان مايحس فيها، ومن فتحت الباب الصغيره شافت فيصل مستلقي على السرير بكامل ملابسه حتى بدون مايفصخ جزمته، وبهاللحظه تبخر كل الغل الي بقلب حنين، كان شكله يكسر الخاطر مره وخاصة انه مايشاخر بالنوم الا اذا كان تعبان حيل قربت حنين منه وحاولت تفك له جزمته بدون مايحس، وطبعاً فيصل الي كان غرقان بالنوم مو جايب خبرها، وبعد ماطلعت حنين رجعت تعيد حسابتها من جديد، كان الالم يعتصرها على هالوضع الي صاروا فيه، كانت عارفه انها ماتقدر تطلب الطلاق منه لانها مستحيل تقدر تعيش من دونه،كانت تحبه بشده لدرجها انها استغربت من نفسها هالضعف، هي عارفه انه طعنها بقسوه واذاء مشاعرها، وكذب عليها، ويمكن للحين وهو يخونها، ماتقدر تثق فيه بعد اليوم، لكن ماتقدر تهجره وتبعد عنه لانها لوسوت هالشيء هي الوحيده الي بتخسر اكثر من اي شخص ثاني، تضايقت بشده من فكره ان هالخبر يوصل لأهلها، وخاصة ابوها لانه مستحيل يخليها تجلس معه يوم واحد، وفكرت بعيالها لو عرفوا وشلون بتكون نظرتهم للموضوع؟..فكرت بالناس وحست ان الكل بيتشمت فيها
حنين ودموعها تنزل لا ارادياً: له بنت عمرها 12 سنه وانا الحين توني ادري
كانت حنين حايره ومضطربه وقلقانه وشلون بتتصرف؟ ومن بتشكيله؟، فكرت بسعود وعزمت انها تكلمه باقرب فرصه وتقوله وتاخذ رايه، وبعد هالقرار حست براحه وقررت انها تقوم تنام حتى تودع عيالها الصبح قبل لايروحون لمدرستهم..
----------------
الدمام
مر السبوع على سليمان مثل الكابوس، كان الفراغ قاتل لا عمل لاوضيقه لا اصدقاء..وبحكم الفتره القصيره نسبياً الي قضاها في الدمام فكانت معظم صداقاته سطحيه، وكان البيت مثل مكان مهجور تركوه اهله.. كل شيء فيه فاضي.. لاصوت لاحس ولاحتى هوء..وكان سليمان من البيت للمسجد ومن المسجد للبيت.. واذا حس بملل راح للكورنيش يشم هوء البحر.. فكر انه يكلم فيصل.. لعله يساعده..وتراجع، لكنه بعد فتره حزم امره وتوجه لاقرب كبينه.. لانه لو مافضفض لاحد يمكن ينفجر، اتصل على المكتب لانه يبي يكلمه وهو بروحه حتى ياخذون راحتهم بالكلام
مادلين: بون جور، شركه إتحاد الصناعات الوطنيه،اي خدمه
سليمان ماكان فاهم ولا كلمه من الي تقول لانه مايتكلم فرنسي:
can you speek Einglish?
مادلين: وي.. وعادة له الكلام بالانجليزيه
سليمان: يمكن اتكلم مع فيصل؟
مادلين: فيه موعد؟
سليمان: لا..بس قولي له اخوه
مادلين: لحظه
كلمه فيصل، وفلحظات حولة المكالمه له في المكتب، طلب منها فيصل ماتقطع عليه الاتصال لاي سبب حتى ينتهي من المكالمه
فيصل بفرح: هلا وغلا.. وينك تعبتني وانا ادور عليك؟
سليمان: ليه عسى ماشر؟
فيصل: لازم يكون فيه شيء شين علشان ادورك؟
سليمان: لا.. بس ضروفي.. انت عارف
فيصل: وشلونك انت الحين؟ وشلون العيال؟
سليمان بضيق: زفت.......
فيصل: خوفتني قولي وش فيه؟
سليمان: ماكان ودي اضايقك بمشاكلي بس انت عارف انك الوحيد الي ارتاح له ويمكن اقوله كل شيء
فيصل: بلا مقدمات بسرعه قول اسمع
قال سليمان لفيصل السالفه كامله
فيصل بدهشه: راحت مع ابوهاااا؟
سليمان: تخيل؟
فيصل بعصبيه: وعمك ذا ماكانه اخو ابونا ابد، وشلون يسوي كذا؟
سليمان: بنته..يمكن معه حق
فيصل: وسعود؟؟؟
سليمان: ماقصر بس مافي يده شيء
فيصل: تبي رايي؟
سليمان: اكيد.. ولا ليش متصل عليك؟
فيصل بقهر: تزوج عليها
سليمان بصدمه من كلامه: مجنون انت.. مستحيل
فيصل: خايف من عمي، وش بيسوي اكثر من الي سواه؟
سليمان: مو مساله عمي..
فيصل: لاتقولي احبها ومادري ايش؟
سليمان: آخ.. بس ..آخ
فيصل: طيب وليش خليت العيال يروحون معها دامك تبيها ترجع؟
سليمان: ماقدرت احرمهم من امهم.. ماراح اقدر مهما سويت اعوضهم عنها
فيصل وهو بدء يهدء: تتوقع ليش راحت؟
سليمان:......عمي قالها اذا جلست لانتي بنتي ولا اعرفك
فيصل حس بنقباض تذكر سالفته مع حنين: عمي هذا مافهمه ابد..
سليمان: مايبله فهم كل الموضوع ان عمي يحب عياله لدرجه انه مايتخيل ان فيه احد يمكن ياخذهم منه.. او يكون مسؤل عنهم الا هو
فيصل بدء يقلق: يعني لو رحت تاخذ زوجتك بيرفض؟
سليمان: قالي اذا تحسن وضعي
فيصل حب يغير الموضوع لانه حس بخوف مايبي اخوه يحس فيه مع انه كان وده يصارح سليمان بالموضع علشان يعرف يتصرف مع عمه لو درى لكن الي مطمنه ان حنين ماجابه طاري ابوها طول السبوع الي فات،" وشلون تجيب طاريه وهي ماكلمتني طول هالمده وتعاملني زي اي تحفه في البيت"
سليمان: وش فيك وينك؟ مشغول؟
فيصل: لا.. جالس افكر في موضوعك.. لازم تسوي شيء يحسسهم انهم غلطانين..
سليمان: زي ايش مثلاً
فيصل: خلنا نتكلم بصراحه.. وظيفتك هذي ماتناسبك
سليمان: استقلت
فيصل: اوكي خبر حلو
سليمان: وش الحلو فيه؟ اقولك عاطل عن العمل
فيصل: وش مخططاتك الحين؟
سليمان:...انا مفكر في شيء بس متردد...
فيصل بترقب: وشو؟؟؟؟؟
سليمان: انت عارف انا معي شهاده جامعيه اداره اعمال من هارفود..ويمكن يقبلوني معيد مثلاً.. او اي شيء
فيصل : من جدك؟
سليمان: ليش؟؟؟
فيصل: انس الموضوع.. انت عارفك انك منت وجه تدريس
سليمان: عندك حل ثاني
فيصل: تقريباً
سليمان: وشو؟؟؟
فيصل: احنا جالسين ندرس مشروع في الخليج، يعني شركه ومحتاجين شخص يمسكها ويكون عنده خبره
سليمان بحزن: وللحين عندك امل فيني؟ولا تبي تجرب الخساره
فيصل: لاتقلل من قيمتك.. انت عارف ان ماعندي احد اثق فيه ورتاح لشغله الا انت
سليمان: اسمح لي يافيصل ما اقدر
فيصل بقهر: احس احياناً انك فيك عقده.. وبصراحه احس ان عمي عنده حق فيك.. مالومه
سليمان بحزن: الله يسامحك
ماتوقع فيصل ان سليمان بينجرح من كلامه بس يمكن لحساسيته بالفتره الاخيره
فيصل: انا مو قايلك بتصدق عليك، انا ابي منك خدمه،انا محتاج لك بجد
سليمان: فيصل احنا فاهمين بعض لاتحاول.. انت مو مجبور انك تساعدني.. بهالطريقه انت راح تخصر ملايين.. شركتك بحاجتها اكثر مني
فيصل: والله المشروع هذا كان يختمر في راسي من سنتين..بس ماراح اكذب عليه ماكانت فكرته في السعوديه..بس من مده جاني اقتراح عن مشروع كبير وحنا الحين بصدد انهائه يعني نهايه السبوع الجاي..
سليمان: فيصل اسمعني..
فيصل كان يتكلم بحماس: انت الي اسمعني، وحنا الحين نبي منك خدمه ثانيه
سليمان: آمر
فيصل: نبي اسم شركتك.. لاننا بصراحه مستعجلين والأجراءت بتطول
سليمان: انت عارف انها شركه ابوي ومن حقك
فيصل حس بخيبه امل من رده فعل اخوه: ليش ماخذ الموضوع كذا؟
سليمان: فيصل انا مو مقتع
فيصل استرسل في الكلام وكانه بيحطه قدام الامر الواقع: انا ابيك تدور لي مبنى ينفع كبدايه وكيفك مو مهم المكان بالشرقيه بالجبيل بكيفك
سليمان: لا تحرجني
فيصل: انت الي لا تحرجني.. انا هالمشروع صارف عليه دم قلبي وماابي اخسره
سليمان: وانا مو الشخص المناسب
فيصل وهو ناوي هالمره يخليها في الصميم: مو مشكله عندك احد يقدر يساعدني؟
سليمان: عندي كذا شخص يمكن اسميهم لك
فيصل: تثق فيهم؟
انصدم سليمان من هالسؤال: اعرف ان سمعتهم طيبه
فيصل: مو كفايه، حتى صالح كانت سمعته طيبه، وانت انخدعت فيه
سليمان بالم : تتشمت فيني يافيصل؟
فيصل: انا كل الي ابي اتوصل له اني ما اثق فاحد.. مثلك بالضبط..
سليمان وهو يحس انه انهزم: فيصل.. انا احس اني غبي، وماتوقع ان احد يمكن يتعامل معي بعد الي صار
فيصل: غبي؟؟؟؟.. وش لون تقول على نفسك كذا؟.. انت عارف انك مسكت الشركه مع ابوي وبعد مماته وكانت سمعتها قويه.. وحتى المشروع الي خسرته بسبب الكلب صالح .. ماكان بسبب خلل في دراسه المشروع ..او ادارتك لشركه.. وانت عارف هالشيء زين..
سليمان:....
فيصل: لاتحاول تخلي حقير مثل هذا يحطمك..خسرت شغلك.. خسرت زوجتك.. خسرت عيالك..خسرت بيتك.. وخسرت اصدقاءك اهلك ..كل شيء خسرته.. وش باقي لك
كانت هالقسوه من فيصل متعمده لعلها تاثر فيه
سليمان وهو يحاول يمسك دموعه: لاتزودها علي يافيصل الي فيني يكفيني..
فيصل: تصدق معك حق الحين عرفة انك غبي..مو كل يوم بتجيك فرصه مثل هذي.. وانت محتاج تثبت نفسك ولكل الي تخلو عنك انك قوي مهما ماخسرت وكل الي كانت محتاجه شويه وقت
سليمان: حتى لو مسكتها تتوقع ثقه الناس بترجع.. تتوقع احد بيثق فيني بعد الي صار، عملائنا بيرجعون.. راح تخسر انت قبل اي احد، وانت قلتها ماعندي شيء اخسره، كل شيء راح.
فيصل: لا فيه شيء مابعد خسرته.. نفسك
سليمان: وش تتوقع اقدر اسوي لك؟
فيصل بفرح وحس انه بدء يقتنع: انت عليك حالياً خلال هالسبوع تستاجر مقر للشركه..وتعلن عن حاجه لموضفين عندهم خبره.. ويكون افضل لو كانوا من شركتك يعني عارف مقدراتهم.. وكل ماكان الموضفين اقل واكثر كفاءه كل ماكان افضل
سليمان: تتوقع يجون يشتغلون خاصه بعد ماتقطعت ارزاقكم والبهذله الي جتهم والمكان بيكون بعيد..
فيصل: الي يبي حياه الله والي مايبي كيفه، وياليت لو يكون معك ابو عمر
سليمان وكأن عدوى حماس فيصل انتقله: والله لما اذكره يضيق صدري احسه اكثر واحد تاثر ، كان مع ابوي دايم في شغله، وعنده خبره، وبيفيدنا
فيصل: واي موضف تحسه بيفيد الشركه ومتردد لبعد المكان اوالماده، قدمه له عرض يناسبه، او راتب مغري، اهم شيء يكون طاقم الشركه ممتاز ونهايه هالسبوع بيجي موظف من شركتنا يناقشك بالتفاصيل
سليمان: وش بيكون نشاطها؟
فيصل: في الوقت الحاضر بيكون نفس نشاط شركتك السابقه لفتره معينه..ولما نتظم امور الشركه راح يبدء الدمج.. ويمكن ندمج مع شركه المانيه
سليمان بتردد: مادري وش اقولك يافيصل.. بس انا عن جد خايف اخذلك
فيصل: خل ثقه بنفسك اكبر..
سليمان: بس..
فيصل وهو يبي يقطع كلامه حتى مايرجعون لنفس الموال: ابي رقمك؟
سليمان: ماعندي تلفون بالبيت؟
فيصل: شخص قريب منك.. جيرانك.. وشلون بتواصل معك
سليمان: انا بكلمك؟
فيصل: ماينفع هالكلام.. طيب عطني عنوانك.. لان الموضف يمكن راح يجيك خلال الاسبوع الجاي لازم يكون معه عنوان.. او رقم
عطاه سليمان العنوان وتفقو ان سليمان يكلمه خلال اليومين الجايه علشان الحواله الي بيستاجر بها المبنى، والتنظيمات الثانيه..
مكان يتخيل سليمان انه بهالمكالمه بيرجع للحياة مره ثانيه، بيرجع بكل حماس بترجع الدنيا تضحك له بعد ماكشرت بوجهه، مع انه باتصاله بفيصل ماكان يبي اي مساعده، لكنه حب هالفكره الي بتخلي عمه يحس بغلطه في حقه، وبيخلي هيله تندم انها تركته....
-----------
كان سامي بهالوقت مجتمع مع عياله يقولهم المفاجاءه الي صار له ايام مخفيها لانه حب يتاكد من فيصل قبل يعطيهم امل بعدين يخلف وعده، وفي الصاله كان الاجتماع..
ناديه: بسرعه تراك ذليتنا
سامي: لحظه انا مابيكم تنصدمون ابي امهد لكم
عصام: والله جالسين على اعصابنا
سامي: اوكي.. الموضوع ياجماعه.. عطوني اجازه.. سبوعين..وانا قررت تكون عند اهلنا بالرياض.. وش رايكم؟
ناديه بفرح: بجد
عصام: متى؟
هشام: انا ماذكر الرياض ابد، ودي اشوفها
دنيا وهي تتذكر امها : الله فرحانه مره
سامي بفرح وهو يطلع شيء من مخباته: وهذي هي التذاكر، يوم الخميس الجاي
ناديه ودموعها تنزل غصباً عنها: خمس سنين عن اخر مره والله زمان
سامي وهو يطالع ناديه: احنا قلنا بنفرح ماقلنا بنصيح
ناديه وهي تبتسم: ماتوقعت ان هذي المفاجأه بس تجنن
هشام: والرياض تشبه لفرنسا؟
سامي: احلى..
حس سامي بالتقصير لما شاف هشام مو عارف شيء عن بلاده، صح كان اخر مره راحوا من خمس سنين وهو عمره ثلاث سنوات بس المفروض تكون فيه شوي وطنيه بالبيت، كان المفروض يربطهم فيها يحسسهم بمعنى الوطن واهميته لكل انسان على وجه الارض وان الانتماء لوطن مثل بلدنا المملكه العربيه السعوديه شيء يدعو للفخر..
وبالنسبه لعلاقه ناديه وسامي خذت مجريين من ناحيه التعامل كان اكثر احترام وتفاهم اما من ناحيه العلاقه العامه فصارت اكثر سطحيه، مع راحه من قبل سامي وقلق من قبل ناديه، لكن ناديه حست ان سامي اكثر راحه واكثر حريه بالبيت من قبل وتمنت ان الوقت يكون كفيل بتغير مشاعر سامي تجاهها.
----------------
رد : قصة صراع الحب ( للكونتيسة الناعمة )