مكالمة ليلية!!!!

[buterfly]

اسعد الله اوقاتكم ... اليوم رح اكتبلكم قصة وانشاء الله تعجبكم

القصة بتحكي عن شاب اجته مكالمة ليلية وبقول...
هذا انا اجتني مكالمة باليل ...كنت نايم وبعالم الاحلام هايم وما بعرف في شو كنت احلم وكان الجو بارد وفجأة...رن التليفون..
وعلى سيرة التليفون ابوي مش مخلي الا 3ارقام الواحد والتسعة والثمانية يعني ما بقدر احكي الا مع الشرطة او الدفاع المدني..
المهمانا رفعت السماعة وقلت الو ولا اجاني هذاك الصوت صوت ما توقعته ... ولا في خيالي تخيلته صوت...صوت بنت بتقول الو...واخوكم اذا سمع صوت بنت على التليفون ما بيعرف شو يعمل
ورديت وقلت ال ال الال ال الوووووو
سألتني مين معي؟
قلت من اللخمة: معاك انا!!
وبلشت تضحك،وبعدين سألتني سوسو موجودة؟
قلتلها:ما بينفع حوحو؟
ضحكت مرة تانية وقالت:شكلي غلطانة انا اسفة!!
قلتلها:لا شكر على واجب(الصراحة دايماً بسمع هالكلمة وبستنى الفرصة اني اقولها) وسكرت السماعة
تصدقوا مش عارف شو صارلي...حسيت بقشعريرة بجسمي وصار نفسي اكتب قصيدة غزل(لا يكون هذا هو الكب اللي الناس بتحكي عنه)؟
ينعن ابو الحب ...ما هو القصة انو انا مش متعود على البنات لأنه ما شاء الله احنا 14زلمة في البيت اللي همة انا واخواني وابوي يعني انا واخواني مش متعودين على البنات وهذا اللي سبب عندنا عقدة اسمها عقدة البنات
...المهم قررت اكس هاي العقدة بس في مشكلة وحدة اللي هيا انو انا ما عندي اسلوب في الحكي ما لقيت قدامي غير صاحبي عبود ...وعبود بتنطبق عليه اغنية (كل البنات بتحبك)
اخذت مفتاح السيارة ورحت لعند عبود وشرحتله قصتي في الحياة وحكيتلو عن رغبتي في فك عقدتي..
فقال لي عبود:الموضوع بسيط اذا اعجبت بنت حسسها انها احسن وحدة في العالم...
قلتله يعني كيف:اقلها انتي احسن من رونلدينو؟
راح رد علي عبود معصب:شو دخل رونلدينو يا غبي!!!
انا قصدي انك تحسسها بانوثتها وانو ما في بنت غيرها في العالم
قلت برضو ما فهمت بدك اياني اذبح كل البنات واخليها لحالها؟
عبود بلش يلطم ... وقال لي شوف انت مش رح تفهم هيك انت ما بتفهم الا بالدروس العملية...وفجأة طلع موبايلو وضرب رقم وحكالي شوف كيف رح احكي معها وتعلم
قلتله طيب!!!
شكلها ردت عليه وبلش يحكي ...كيفك حياتي كيفك عمري انا حبيبك ومجنونك وبلش يحكي... بحبك وبموت فيك انا من دونك مثل البيت من دون حارة ومثل التليفون من غير حرارة ومثل السواق من غير سيارة انا البنزين وانتي الشرارة انا الشارع وانتي الاناره انا الرومانسية وانتي الاثارة ................الى اخره
بصراحة انا اندهشت بكلامه ...المهم انه خاص من المكالمة وصار يطلع علي وحكالي يلا دورك باعطيك رقم بنت وبتحكي معها...واحكيلها نفس الملام اللي سمعته..............................بعد هيك راح عبود ضرب الرقم وحكالي يللا احكي
حكيت الو.........



لحظة ما سمعت صوتها ضاعت دروسي ونسيت كل كلامي وقلتلها: بابا فين؟!!!
وما حسيت الا بكندرة عبود على وجهي وهمسلي قول نفس الكلام اللي قلته انا
رحت قلتلها...كيفك حياتي..كيفك عمري
ردت علي وقالت:طيب بعدين!
قلتلها:انا بدونك مثل الكيبورد بدون ماوس..مثل التقاطع من دون اشارة ..مثل الحمار بدون حمارة ..مثل السلطة بدون خيارة انا الولاعة وانتي السيجارة..انا..
طوووووط طوووووووووط طوووووووووط سكرت الخط بوجهي
سألني عبود مالك سكتت؟
قلتله:لا ولا اسي بس يمكن الخط مشغول؟!!!
وفجأة ما صحيت على حالي الا وعبود خابطني على وجهي
المهم رجعت على البيت وجهي مطبش من ورا راس عبود لدرجة اللي بيشوفني ما بيعرفني دخلت البيت شوي شوي عشان ما حدا يشوفني، وطلعت على غرفتي وسكرت الباب ونمت وصرت بعالم الاحلام هايمما بعرف في شو كنت احلم وكان الجو بارد وفجأة رن التليفون...رديت وقلت الو الا وهو صوت..............بنت
..
..
..
..
وانتو بتعرفوا بقية القصة
مع تحياتي buterfly

[دلع فلسطين]

ههههههههههههههه
يسلمووووووووو يا قمر على القصة الحلوة