من بغى الفرقى لقاله عذر وأسباب ودليــــل
خل عنك العذر والاسباب دام الحب ضــــــــاع
كان ودك بالفراق أبشر عسى عمرك طويــــــل
لاتردد وإنت لك كلمه ولك أمر مطــــاع
لي عليك إنك تبت بكلمة تشفي الغليــــــل
ولك علي أني لوقف وقفة الرجل الشجــــاع
لاتجاملني مخافة قال مدري خوف قيــــل
عمر هرج الناس مايسمن ولا يغني جيــــاع
كان قصدك سر حبك أوعدك لأصبح بخيــــل
وأحمل أسرارك معي للموت قدر المستطــــاع
بس قلها قل ماحبك وأبشر بصبر جميــــل
لاتحسب إني مثل من طبعهم لوي الــــذراع
صاحبك ماهو بكذا ياصاحب القد النحيــــل
صاحبك طبعه غريب وغربته غربة طبــــاع
بالهوى مايقبل الحل الوسط ولا القليــــل
مثل ماهو لا شرى يشري ليا من باع بــاع
ثابت لو هي تميل الأرض حدره مايميــــل
يدري إن الفقر ماهو عيب والدنيا متــاع
ماعشق لذة حياته كثر عشق المستحيــــل
ولا كره حتى مماته كثر كره الإنصيــــاع
كنت أعلم من سحاب الصيف وش معنى الحصيــــل
وكنت أعلم من ليالي البرد وش معنى الضيــــاع
وكنت أعلم من شديد البدو وش معنى الرحيــــل
وكنت أعلم من غروب الشمس وش معنى الــــوداع
إيه أنا هذا طريقي موحش وصعب وطويــــل
وإنت لامنك تعبت العالم فجوجه وســــاع
إعتبرني في بداية سكتك _عابر سبيــــل
ورح وأنا قلبي معك من وجهت الــشــــــــراع
رد : سجل حضورك اليومي بهمس الـقوافي ببيتين شعر 
العرض العادي
