خلك بعيد وخل الوله في قلبي يزيد ..دامك اخترت البعاد لا تنتظر مني الوصال ".,‘
نشيت ع الساعه خمس الفير .. قمت و احس بعمري نشيطه بس شي بداخلي غريب ما اعرف شو هو و انا اصلا ما فكرت او حاولت اكتشف شو ها الشي ..دشيت حمامي اتغسلت و توضيت و طلعت و احس باصابع ريولي بتجمد.. لبست زلاغي .. و صليت الفير قريت لي قران .. خلصت سورة البقره ..كنت متعوده اني اقرا سورة البقره كل يوم بعد صلاة الفير .. جفت الساعه ست الا ربع.. فتحت حجرة عمور جفت الفراش شرات ما هو يعني حضرته للحين ما شرف البيت .. شو هالانسان ما يحاتي اخته عفانا الله .. طلعت من الصاله الصغيره و رحت الصاله العوده اتفاجات بـ عمور راقد ع الكنبه و التلفزيون شغال.. فديته ظلمته .. اتجربت منه .. بسته ع راسه.. و يلست العب بشعره.. شعره وايد ناعم.. الا سايح عكس شعري يحليلي بنت البطه السوده .. همست ابا اقومه عمور عمور ماشي رد.. الريال بساااااااابع نومه ..عمور نش .. روح ارقد في حجرتك..بطل عيونه طالعني .. بس اشك انه يحس بعمره.. ورجع غمض عيونه .. طالعته و ابتسمت.. نومه ثجيل .. عمور عكسي تماما ...رحت حجرته و يبت برنوصه و لحفته ..سرت الصاله الصغيرونه الثانيه و كانت فيها غرفة جلوس صغيرونه و مجابلنها مطبخ ..تذكرون المطبخ البارحه فـ ليل رمستكم عنه.. المهم و الاهم .. دشيت سويت لي فطور كالعاده نـص كافيه و قرص بيض ..بعد ما تفطرت..جفت الساعه ست بالضبط اممممممم باجي نص ساعه ع دوامي يا ترا انا شو كنت اسوي ..بها الوقت هي تذكرت.. روايتي الرومانسيه ما كملتها.. رحت حجرتي ..و ضبطت المنبه ع الساعه سبع عشان ما انسى الدوام و اندمج بروايتي ...يلست اقرا و اقرا.. لي ما دقت الساعه .. نقزت ابمكاني ..حق شو بعد اتعب روحي و اضبطت ساعة المنبه.. ترا ها السوري وقته ينش من الرقاد يبا حليب .. اندوكم اسمعوا صياحه واصل اخر راس الخيمه ...فتحت دريشه حجرتيه ..حسيت بالهوا يضرب ويهي أأأأأأأأأأأأه روعه .. الدنيا حلوه صج حلوه ... لبست ثيابي .. و عبايتي و شيلتي .. و شليت سويج سيارتي .. و شنطتي اهم شي ..طالعت عمري فـ المنظره قبل لا اظهر من الحجرة ما يحتاي واثقه من جمالي ..طلعت من حجرتي و من الشقه خليت عمور راقد ابمكانه يا بخته اجازه عشان جي ماخذ راحته الحبيب سهر اخر الليل و راااااااااقد لي اذان المغرب .. حياته فاضيه و فراغ كبير ع العموم ما بقى شي ع اجازته ...حركت سيارتي ..رايحه الدوام و ابدا يوم يديد بـ قص الكروت ..اليوم كان زحمة و ابوييييييييييييييه كل شويه اطالع ساعتي متى يخلص دواامي ابااااا ارتاح ..اتذكرت عمور ..الدب راقد و مرتاح و انا هني اكرف ..دوااي محد قالي اخذ اجازتي قبل يالله شنسوي نبا بيزات و انعيش لازم نتحمل ...لمحت ريال شيبه يتجرب مني غمضني شكله.. لانه شكله مب رايم يمشي حراام استغربت وين اهله !!وين عياله وين احفاده ..يا حرااام جفته ياي صوبي ..
الشيبه: السلام عليكم..
عليكم السلام وين بغيت ابويه ..
الشيبه: ابا قسم العيون ..
نوره: وين بطاقتك ابويه ..
الشيبه: هذي ..اتفضلي يبه..
ياني فضول اقرا اسمه يمكن اعرف عايلته ..سالم احمد ال........ لا لا ما قد مر علي هالاسم..
سالته: عندك موعد اليوم..
الشيبه: لا و الله البارحه يا بنتي حسيت بـ غشاوه ع عيوني ما رمت اجوف منها " و ياشر ع عينه اليسار" قلت ايي اليوم اكشف عليهااا..
رديت عليه و هو غامضني حالته كنت اراااقبه يوم يرمس احب الشواااب وايد يمكن عندي يد جي عمره من صوب ابوي و يمكن ابوي يكون جي عمره ..معقوله ابوي بها السن !! يمكن مااات و يمكن حي !!؟؟مدري و ليش اتفاول ع الريال الله يسامحه المهم ها مب موضوعناااا
نورة: ابويه انا ما اقدر ادخلك داخل لان ما عندك موعد لازم تاخذ موعد من قبل ..
الشيبه: و انا شدراني بهاي السوالف
و بداا يعلي صوته و ابويه عصب الشيبه اكيد هاي نوبات يا العصبيه او التخريف..
و كمل كلامه: و منو بياخذ لي موعد اصلا منو يدري عن حالتي ..
حسيت ويهي يحترق من الفضيح .. الكل يطالعني شو ارد عليه شو اقوله هاه ابصراحه فاجئني ..حطمني فجر قنبله ابويهي جي انا اصغر عياله يرمسني جي..لالالا نوره حرام مهما يكون ها شيبه له احترامه و العمر له احكامه..احم اوني عاد مب قافطه..
ابتسمت: ابويه تقدر اتروح الطب الوقائي و اتييب ورقه عشان ادخلك ..و تكشف ع عيونك..
الشيبه معاند: وين بعد الطب الوقائي انا يالله حصلت لي تكسي يوصلني لـ باب المستشفى ..يالله دخليني ما ابا اتاخر
ايوااا خلنا كده حلوين ارمس بهدوء و عن الفضايح لو عمور هني جان تجلب ع الارض من كثر ما يضحك ع هالمواقف المهم .. خلني امشيه لااه .بس هالمره شدرااهم هم.. و بعدين حرام شيبه محد له ...و الحبيب شكله امعاند وااااايد ..مب راضي يتحرك من مكانه و الناس بدت تتيمع تبا اتخلص شغلها ..
مديت ايدي: عطني كرتك
الشيبه: بارك الله فيج ..
شخطت ع البطاقه تاريخ اليوم ..و زقرت حسين يدور ملفه..و رديت له البطاقه..
اتفضل ابويه..
الشيبه مستانس: مشكوره بنتي الله يوفقج ما قصرتي الا وين قسم العيون..
يا هي مصيبه.. خلاص خلاص مشي الموضوع ما اقدر اتافف ولا اقوله شي.. طلبت من حسين يوصله قسم العيون و ياخذ ملفه بالمره ...اتنهدت تنهيده راااحه يوم جفت حسين قابضنه من ايده و ماخذنه صوب قسم العيون ...اندمجت بشغلي و خلصت لـ درجة اني ما جفت الشيبه يوم خلص من علاجه ..بعد ما ياني مره ثانيه يتنشد عن الصيدليه .. الحمدلله طلعت حساسيه.. و انا ليش شايله همه اعرفه اصلا يمكن لانه شيبه و محتاج حراام محد عنده .. المهم ..وقعت ع اني خلاص ظاهره من الدوام ع الساعه هنتين وربع...ركبت سيارتي خطرت ع بالي خوله .. طلعت موبايلي و فكرت اتصل بها لانها وحشتني ...وايد..خوله هذي اخر سنه لها و تتخرج من معهد التمريض و بتشتغل ممرضه.. زين فكرت اتكمل دراستها بعد زواجها الفاشل ..
نقزت يوم سمعت صوتها ..
خوله: السلام عليكم..؟
نوره: عليكم السلام شحالج و اخبارج
خوله: الحمدلله انتي شو اخبارج ...؟؟ ان شاء الله ابخير ..
نوره: الحمدلله قوم خالي و خالتي شحالهم ..
خوله: كلنا ابخير .. وينج ما ييتنا من فتره..
نوره: افكر امر عليكم بعد باجر ..
خوله: الخميس
نوره: يس
خوله: شو بغيتي انزين..
نوره: انتي صج ويهج لوح..
خوله: هههههههه مشتاقه لـ جسومي ابا اجوفه فديته..
نوره: فديت روحه تغايضيني يعني ..
خوله: هههههههه
نوره: وين انتي ...؟؟
خوله: ع الشارع رايحه البيت..
نوره: خساره كنت بمر عليج نروح المنار نتغدا هناك مع اني تعبانه بس مشتاقه لج..
خوله: بس جذا.. سليم .افتر صوب المنار ..
نوره: ههههههههههههه ويه فقر..
خوله: طالعه عليج..يالله روحي نتلاقى هناك..
نوره: زين زين.. يا حافظ عليج..
خوله: هههههههههه صوب الركن الفرنسي هاه.
نوره: اوكيك فيمان الله..
خوله: مع السلامه ..
حولت طريجي صوب المنار اممممم اليوم الثلاثاء .. يعني ماشي زحمة ..زين بكون المنار فاضي ..لان نص اهل راس الخيمه يداومون برع رااك.. و الاغلبيه فـ بوظبي عشان جي ما اتجوفون الزحمة الا نهاية الاسبوع عشان جي ما احب اروح المنار نهاية الاسبوع الا اذا كانت عندي شغله اخلصها ابسرعه.. ها وصلت شرات ما قلت و توقعت ماشي زحمة ..بركنت سيارتي .. و و لبست نظارتي الشمسيه.. اخ الي يجوفوني يقول هذي بنت شيخ.. ههههههههه خلونا نحلم.. شليت شنطتي بعد ما حطيت الموبايل داخلها..و نزلت من السياره.. دخلت داخل..صوب المطاعم.. رحت صوب الركن الفرنسي.. خساره الطاوله الي دوم تعودنا نيلس عليها انا و خوله عليها ناس يالله ما بخسر شي بيلس ع الطاوله المجابله..دقايق وصلت خوله .. لمحتني ع طول ..ما تنلام عيون صقر ..شراات اخوها فارس ..فارس !!!!! شو الي ذكرني فيه الحينه خليه يولي .يلست مجابلتني
نوره: متعشيه وايااج ولا متغديه معااج عشان ما اتسلمين..
خوله: هههههه توني مرمستنج .. و الحينه بتغدا معاج شو تبين بعد..
نوره: اونج انتي متى بتكبرين..
خوله: ما خبرت اهلي اني بكون هني معاج بجتلوني..
نوره ابتسمت لها: انا مرتاحه ما عندي حد يحاسبني
خوله: الحمدلله انج وحده عاقل ..
نوره: شو قصدج..
خوله: ههههههه ولا شي ..طوفي طلبي لنا غداا ما تستحين اميلستني لي الحين ..
نوره: زين زين عنبوه ..اهلج ميوعينج شو .."وقفت" انتي عرستي تطلقتي ما تتغيرين بتمين خووله.
خوله: انجلعي لافرج بهاي الشنطه..
نوره: هههههههههههههههه
ضحكت من خاطري احب اغايض بها الانسانه حبوبه خوله..جابر صج انك حمار ما عرفت جيمة بنت خالوه مريم ..لو كنت اتعرفها كنت فكرت لو تنطبق السما ع الارض ما تودرها ..أأأأأأأأأأه يا يالله سالفه و انتهت مب لازم نطريها و نرجع صفحات الماضي بس الي اتسبب لنا ألم ..عشان انفكر بمستقبلنا زين ما زين ..و البركه بـ عمور بخطبها له خخخخخخخخخخخخ
شليت صينية الغداا ..ورديت ويه رياااال يالس مع خوله منوه هاه ؟؟ اعرف خوله زين ما زين مب من هالنوعية من البنااااات ..يالله انا مب يوعانه لهاك الزود ..بس سويت كل ها علشان اجوف خولة يعني ما بخسر الغداا لو فريته ع راس ها الي قاعد يتحرش بـ خوله... خخخخخخخخخ يتحرش بـ خوله عيل ها صايع مؤدب..
خوله: تعالي نوره ..
نوره: خليــــــــــــــــــفه !!!!!
خليفه: هلا و الله ...شحالج نوره ..شو يايبه لنا غداا
نوره ضحكت من خاطري ..اشتقت لعيال خالتي و لـ حياتي معاهم ..ولايامنا الحلوه الي جمعتنا بحلوها و مرهاا
نوره: يالله ها الغداا يسدنا و جان تبون اييب لكم زياده ما عندي مانع..
خوله: لا يلسي ...تراني انا متصله ابخليفه يلحقني هني عشان يردني البيت..
خليفه: ما اتسوي شي لويه الله
نوره: انت بتخبرني عنها ..اقول خليفه ماشي لي مكان في دوامكم
خليفه شووو ...حتى لو شي لا اتفكرين مكان دوامي
نوره: ليش ابا اغير دوامي مليت منه
خليفه: ماشي تفضحيناا انتي بعدين بيقولون هاي تقرب لـ خليفه ال.....
نوره: شفيها زين..
خليفه: يالله منااااااااااك بعد مب ناقص الا تفضحونا
خوله: عيل باجر انا بتخرج من معهد التمريض و بستوي ممرضه في المستشفى ما بتيي تتعالج فـ المستشفى الي انا فيها..
خليفه: لا طبعاا واذا اشتغلتي لا اتقولين اسمج عن حد يعرفني تفضحيني بعد..
نوره: و انت ما اتخاف الا من الفضايح ..شو سوينا جريمه نحن ..
خليفه: انتو من صغركن ريا و سكينه نسيتوا ..هي صح ع طاري دواامي خوله جفت جابر اليوم ..
خوله: و شو يعني ..
خليفه: ما تبين اتعرفين شو قال لي
نوره: ليش انت سلمت عليه..
خليفه: السلام لله هو يااه و سلم علي ..
نوره: لو انا منك ابصراحه اتفل ع ويهه ها حثاله..
طالعني خليفه بنظرات مستغرب جنه ما توقع تطلع مني ها الرمسه..سكت متلومه بس صج يوم اتذكر هالانسان اكره حياتي عيل خوله الي تاذت منه شو يستوي فيهااا
خليفه: هدي اعصابج نوره ..ما يحتاي كل هالعصبيه ..
نوره: جوف خوله امحرجه اكثر عني بس ما تبا اتقول او اتبين لنا لكن انا ويهي لوووح كاااااش بالويه..
خليفه: ول ول ول بسم الله حشى مب بنيه ..
خوله: يوعااااانه ..غيروا الموضوع ..و ارمسوا بموضوع يرزا لو سمحتوا ..
خليفه: خلاص زين انا اسف ..انا الغلطان..الا بسالج نوره ما انخطبتي
نوره: انت شو سالفتك اليوم..
خوله: هههههههههههههه تدرين ليش سالج هالسؤال ...
نوره: ليش !!؟؟
خوله: ترا خليفه خطب..
نوره: احلفوا.. و ليش ما اتقولي هاه ...
خليفه: انتي عطيتيني فرصه ما اروم ارمس بـ موضوع الا احتشرتي..
خوله: هههههه ليش انت ما اتعرف طبعها هذي هي نوره..
نوره: زين محد طلب منكم اتحللون شخصيتي بس خبروني من الي الله بلاها ..
خليفه: اتهبين الا انتي الا لها الفخر تاخذ واحد شراتي انا الشيخ
خوله: الله اكبر .
نوره: زين منوووووووو لا يكون نهله بنت خالوه عايشه..
خليفه: الله يسامحج نوره ..
نوره +خوله = ههههههههههههههههههههه
خليفه: ايه وطوواا صوتكن فضحتونا ..
نوره: زين زين منو تطلع خطيبه اخوي خليفه..
خوله: شيما بنت عمي عبدالله
نوره: فديتهاااااااا زين ما اخترت انسانه خجوله و حبوبه..حظك فيها
خليفه: و الله بطير من الوناسه..بس اتصدقين كنت خايف يرفضوني
نوره: لا و الله ليش انت ولد عمها و اولى فيها ..
خليفه هي ندري بس لا تنسين جابر ولد خالها ..امايه فـ البدايه ما رضت تخطبها لي عشان جابر من اهلها
نوره: انزين هي شو ذنبها و بعدين موضوعك ماله علاقه بموضوع خوله..
خوله: انا اقنعت امايه عشان جي وافقت و تدري ابوي ما بيقول لا لانه بنت اخوه
نوره: زين بالبركه ..بالبركه..و متى الملجة..
خليفه: ما تحدد كل شي المهم بيكون عندج خبر ..
نوره: طبعااا يالله مبروك خليفه تستاهل و الله يوفجكم
خليفه: الله يبارك فيج عقبالج..
طالعت خوله و جني ابا افهمها قصدي بس الظاهر ما فهمتي يوم قلت
_ان شاء الله بس بعد ما يعرس عمور اخوي ..
تغدينا و خلصنا و سولفنا و مر علينا الوقت من غير ما انحس باعمارنا لي ما اتصل فيني عمور ..ناش من الرقااد ..
نوره:صح النووووووووووووووووم ..
عمور: هههههههه وين انتي ما رجعتي البيت..
نوره: قصدك الشقه ..المهم غريبه انك تنشد عني ..الاهم انا مع قوم خالتي
عمور: منوه نهله
نوره: لالالالالالا منوه طراا نهله انا مع خوله و خليفه ..كنا نتغدا فـ المنار و الحينه رايحين البيت ..
عمور: هاااا ع بالي نهله جي هي مب بنت خالتج بعد..
نوره: ما نعترف..
عمور: امبونج حقوده و غيوره..
نوره: ايه اذا اتفكر ابشي من صوب قوم خالتك عايشه من احينه اقولك شيل هالافكار من راسك ..انا بخطبك لـ رفيجتي ..
عمور: اقولج ..جلبي ويهج ..و ييبي لي غدااا
نوره: عفانا الله فسااااااااااد كل شي انا بسويه لك..
عمور: هي يالله اختي العزيزه لا تنسين الغدا بقوم اسبح ..مع السلامه..
نوره: الله يسلمك حجي..فيمان الله
وقفت عشان اخبرهم اني بروح كان المتصل عمور .. ودعت خليفه و خوله.. و سرت صوب شقتي و كانت جريب من مركز المنار ما يفصل بينا غير الجسر و البحر ..دخلت الشقه و حطيت جيس الغدا ع الطاوله الي كانت عند باب الشقه..
نوره: عمور عمور ..
طالع من الصاله الصغيرونه و كان شايل فوده صغيرونه ينشف شعره.
عمر: اصغر عيالج..
نوره: يالله بالستر من عرفتك و انا ازقرك عمور شواالي تغير الحينه..
عمر: ابتسم لي: وايد اشيااا
اتجدمت و يلست ع اجرب كنبه..
كنت بقوله لازم يوم طلع فارس بـ حياتك مره ثانيه. كانت فيني رغبه اساله اكثر و اكثر عن فارس بس فضلت اني اسكت ..فر عمور فودته ع الكنبه
نوره: حطي لي غدا لي ماااااامشط شعري
نوره: احط لك الغداا
عمر: هي ..
نوره: تعال قبل لا اتروح داخل شييل فودتك و عن الطفاسه..
عمور: اووه
دش الحجرة..امطنشني
نوره: حافظ عليك مدري طالع ع منوه انت ..
شليت الفوده و فريتها داخل الحمام ..و بعدها سرت المطبخ ازهب له الغدااا ..مدري منو يتغدا الساعه 4 العصر ..شليت الصفره و الصحن و قبلها حطيت الغوري ع النار عشان اسوي لي كااافية ..
عمور: تعالي يلسي معاي ما احب اكل ابروحي..
نوره: زين بييب الكافييه ع النار ..
طلعت من المطبخ جفت عمور قاعد ياكل
نوره: و الله انا حق شو يايبه لك الصحن .. مب عشان اجب العيش داخله..
عمور: اووه اختصر الطريج..
يلست اشرب الكافييه: انت شو حياتك لازم اترتب نفسك ووقتك باجر بتعرس
عمور: انتي شو سالفتج ع العرس
نوره: خليفه اصغر عنك خطب و باجر بيعرس انت شو تتريا..
عمور: عيل انتي خلود اصغر عنج عندها ولد .. و خوله ابعمرج عرست و طلقت و انتي بعدج..
نوره: كل شي نصيب
عمور: عيل يوم تعرفين لا تتفلسفين ..خليفه خطب منوه ..؟؟
نوره: شيما بنت عمه ..
عمر: زين بالبركه..
نوره: و انت متى بتخطب؟؟
عمر: ما افكر نوره بعدني انا..بعدين لازم انتي تعرسين قبل ما اقدر اهدج جي..تدرين نحن مالنا غير بعض
نوره: خلاص عيل اخطب خوله بنت خالوه مريم..
عمر: شوه تبين اخطب خوله..
نوره: و ليش منصدم ما فيها شي..
عمر: ما ابا امطلقه..
نوره:شو فيها المطلقه اذا كل واحد يفكر شراتك كل المطلقات ما بيعرس مره ثانيه..
عمر: انا مالي شغل فيهن و بعدين انتي ليش محرجه هذي حياتي الشخصيه ..
نوره: مب كفيك .. انت اتعرف خوله وايد و محد شراتها بطيبتها و اخلاقها ..
عمر: انتي ليش محرجه انا الي بعرس ولا انتي ...؟؟
تنهدت ما عرفت شو ارد عليه صج حسيت اني محرجه ..حرام عليهم و الله ..شو ذنبها اذا كانت مطلقه ماهي عايشه حياتها و كل الناس اتعرف منوه جابر ولد امه..الله يسامحك خالي احمد يوم جبرت البنيه ع واحد ما تبااه ..هذي نهايه زواج كل شي بالغصب
عمر: يمكن تظهر لي دوره برع البلاد..
نوره: اللـــــــــــــه وين ..؟؟
عمر: بريطانيا..
تقزت صوبه و جني انا الي بسافر ..
نوره: متى ..
عمر: شفيج هههههههههه عن تحترقين بالقهوه..
نوره: متى بتروح..
عمر: مدري ..بس يايتنا ورقه فيها اسامي الي بيرحون الدوره و من ضمنهم انا ..
نوره: يعني انا بروح لندن..
عمر: و انتي شلج رازه بويهج..لا ابوي انتي بتروحين بيت خالوه مريم..
نوره: نعم نعم شو قلت ما بروح ..اسفه ...؟؟و بعدين جم بتم هناك
عمر: ما ادري بعدهم ما قالوا ..و انتي منو بتم معاج هني ..مستحيل اتمين ابروحج..
نوره: انزين انزين كيف تباني اروح بعد ما تغيرت ظروفنا شو بقولهم استحي ابصراحه..امممممممممم
عمر: شو ...؟؟
نوره: تزوج خوله و خلها اتعيش معاي..
عمر: بس نوره لوعتي بجبدي قلنالج انا خوله ما اريدها احس انها شرات اختي..
نوره: قصدك عشان مطلقه ما تباها
عمر: للا حوول خليني اتغدا و لا اتغثيني و بعدين ..حتى لو ما كانت مطلقه انا ما اريدها..
نوره: ليش ليش انزين شو عيبها ..هي احسن عني و عنك..
عمر: ادري ادري انها احسن عني و عنج بس قلنالج اعتبرها شرات اختي ..
سكت مضايجه ..كنت اتمنى ان عمور يتزوج خوله جفته يوم نش من ع الصفره من غير ما يكمل اكله غثيته سوري عمور بس انا كان ودي ازوجك خوله بس كل شي نصيب و انا مالي حق اجبرك..يلس ع الكنبه بعد ما غسل ايدينه
عمر: شفيج مضايجه..
نوره: من شو اتضايج بس كنت اتمنى اجوفك مرتبط بـ خوله بس مب من حقي افكر و اقرر حياتك و حياة خوله..
عمر: نوره انا ما افكر بالزواج الحين.. قلتلج عندي دوره بالخارج..و بعدين اذا رديت يصير خير
نوره: بتخطب خوله .."ابتسمت و استانست من الخاطر بس فأجاني رده"
عمر: لا بخطب نهله بنت خالوه عايشه..
حسيت بالبروده ابكل جسمي لحظه لحظه انا صح وقت المغرب احس اني بردانه و مثلجه بس الحينه العصر يعني مب برداااااانه انا شو اخربط أي برد و أي حر .. انا قاعده اسمع كلام من عمر كلام انسان مب صاحي ..عمر: شفيج وين سرحتي..
نوره: انت ترمس من صجك..
عمر:هي شو فيج..
نوره: انت نسيت شو صار زمان .ما اظن شي يتنسى..
عمر: نهله مالها ذنب..و بعدين كانت صغيره
نوره"صرخت عليه" عمر لا تستهبل شو مالها ذنب....البارحه من سمعت اسم فارس حسيت بتصير مصيبه الا مصايب هالانسان ما وراه الا المصايب..
عمر: لا ترمسين عن فارس جذا..و فارس شو يخصه الحينه
نوره: ليش ليش انت نسيت شو سوا..اانت اصلا كيف قدرت اتفكر انك ترتبط بانسانه انسانه
سكت مب عارفه شو اعبر ..
عمر: قلتلج نهله مالها ذنب..
نوره: عمر لا تتخبل .. و يكون بعلمك انا ما بروح بيت خالوه مريم .. تفهم ولا لاء ... و اذا تزوجت نهله انسى ان لك اخت ..
عمر: لا اتسوين لي فلم هندي ..نوروووه اثجلي
صرخت عليه : اكررررررررهك و اكره نهله و اكره فارس اكرهكم من كل خاطري ..
دشيت حجرتي و انا ميته من الصياح قفلت علي الباب لا تزوج خوله برايك بس نهله لا ... انا ما ادري عمور كيف يفكر.. اكيد فارس لعب براسه ...سمعت دقت الباب و عمور كان يزقرني يباني افتح له الباب بس طنشته علهم الحرق نهله و فارس .. هم خربوا حياتنا هم فرقونا عن قوم خالتي مريم.. بسببك فااااااارس طلعنا من بيت خالتي ...من سمعت اسمك البارحه عرفت ما ورااك خير و المشاكل بتيينا من كل صوب ... عمر مدري ليش متعلق فيه ....اكرهك فارس اكررررررررررررررررهك ..و بتريا اليوم الي بسمع فيه خبر موتك عشان ارتاح و افتـك منك ..
Xxx
رد : ابوي ابوي لو صد عني ما ترجيته >>>>> 
العرض العادي
