:: الجزء السـابع ::
ديمه : شفيه ابوي ليش ماراح يجي ؟
مشعل : مافيه الا العافيه بس متمشكل مع المترجمه ومايقدر يخلي اهلج لحالهم
ديمه : والحل ؟
مشعل : اقولج انا بوديج شفيج !
ديمه : بس انت موملزوم اتوصلني انت سويت اللي عليك واكثر يعني ابوي مايقدر يخلي اهلي بس يخليني عادي صح ؟؟؟؟
مشعل : لا مو صح لوتشوفينه شلون متضايق وشلون خايف عليج ماكان قلتي هالكلام
ديمه : لوخايف علي صج جان جاني وخلاهم على الاقل هم مستقرين موانا
مشعل : وشالفرق بيني وبين ابوج ؟
ديمه : هو المسؤول عني
مشعل : وانا ؟
ديمه : انت سويت اللي عليك واكثر
مشعل : يعني ماتبيني اوصلج ؟
ديمه : انت وراك نادي ولعب ودوري مو مشكلتك دام اهلي مو مهتمين فيني
مشعل : بس انا المسؤول عنج اللحين والمفروض تسمعين كلامي صح؟
ديمه : ليش ماتفهمني يااخي ؟
مشعل : اللي فاهمه انج عادتني غريب ومو من حقي اكون مسؤول عنج واوصلج لأهلج واذا انتِ حاطه ببالج انج ثقل علي او معطلتني ..فحبيت اقولج انج غلطانه .. انا عندي اجازه هاليومين ورفيجي بالمستشفى وماعندي احد ..
ديمه : يعني افرض انك مو موجود بيخليني ابوي لحالي هني ؟
مشعل : هذا لو انا مو موجود بس انا كاني قدامج بعرضي وطولي مو مالي عينج ؟
ديمه قعدت تطالعه طول بعرض
ديمه : ماشاء الله عليك اذا على العرض والطول تراك مومقصر من العمالقه
مشعل : لاوالله اي صكيني بعين بعد
ديمه : ههههههههه ماشاء الله
مشعل : انزين يا ام راس يابس شفيج واقفه ببلعومي ماتروحين فوق تودين جياسج
ديمه : بس احنا ماخلصنا من سالفه هالسفره
مشعل : لا والله هي بعد فيها نقاش؟
ديمه : ماتوقعت اني رخيصه عند اهلي
مشعل : رخيصه لانج معاي ؟؟؟
ديمه : ها لا مو عن بس المفروض مايخلوني جذي
مشعل قاطعها : لا! اوكي مشكوره يجي منج اكثـر
راح مشعل فوق غرفته معصب وخلاها باللوبي تحت
قعدت ديمه على الكرسي وحطت الجياس على الارض باحباط
" ياربي مو وقته يعصب علي انا ماكنت اقصد اللي افهمه هو .. اففففف هذي حـاله اللحين !! جيت بكحلها عميتها "
صعدت غرفتهـا المؤقته وحطت جياسها داخل الكبت .. والدنيا خلاص صكت بوجهها هي ماعندها اللحين الا مشعـل وهو عصب وراح غرفته .. وتندمت على كل كلمه قالتهـا ولو اهو ما يستـاهل جـزاه مهتم فيـها وبيوصلهـا لأهـلها ..!
قعدت حـوالي نص ساعه بالغرفه لين خلاص حست انها بتختنق .. لازم تروح اتكلمه لانها لو قعدت اكثر بتستخف من هالافكـار اللي تحسسها بالذنب .. انزين اذا مشعل طنشها الحين منو بيوديها لأهلها !!
رفعت السمـاعه ودقت على غرفته 521 ويرنّ يرّن محد يرد .. خـافت
" لالامو معقوله طلع وخلاني .. لا ما يسويها .. شلون يخليني بروحي ويدري اني اخاف حتى من ظلالي .. ؟ معقوله بيعاقبني؟ ياربي ماطلع يارب انـا استـاهل ليش خليته يعصب !! "
خلت فوفو بالغرفه ونزلت عند الرسبشن تسألهم عنه وقالولها ماطـلع .. ارتاحت نوعـا ما بس قعدت تحاتي ليش مايرد على التليفون ؟؟ يمكن نايم ! صعدت فوق وكانت بتدش غرفتها بس شافت غرفته وردلها شعورها بالذنب و ماحست بنفسها الا وهي تطق الباب .. طقت مره مرتين ثلاث مايرد ! بس كـان قصدها تتطمن عليه لا اقل ولا اكثر .. وبعد ما يأست توها بتروح غرفتها الا فتح مشعـل بابه ..
استانست ديمه وراحت بتكلمه الا يفتح بابه على الاخر ويدخل داخل !!
" امممممم لالحين معصب .. الله يستـر انا ماعندي أي خلفيه للتفاهم مع الرجال !! شلون بتفاهم معاه واخليه يرضى ؟"
دخل مشعـل داخل الغرفه بعد ما بطلّ الباب وخلاه مفتوح وقعد على القنفه ومسك الريموت متجـاهلها على الاخـر ومع هذا ماقدر يخفي علامات الغضب على وجهه .. لان اللي بيقرب بالمكـان اللي هو فيـه بيحس بحراره عجيبه صـادره منه هو او بالاحرى من قفصه الصدري !
ظلت ديمه عند الباب ... وخليط من مشاعر الندم والاسف باينه على وجهها .. وهو كل اللي سواه عطـاها نظره فوق تحت بعتب.. ورد يشوف التلفزيون ..
ديمه : آآآ مشعل
عينه ماتحركت من التلفزيون بـس فكره وبـاله مع الموجات الصوتيه اللي جايه من هالخـلوقه اللي واقفه قـدامه بخـوف !
مشعل بدون لا يطالعها : نعم ؟
ديمه : انت معـصب علي ؟
مشعـل طالعها بإستهزاء : هه ليش اعصب ؟ انتِ سويتي شي !
ديمـه : امبلا معصب علي لانك خليتني تحت ورحت فوق
مشعـل : تعبـان وبريح ماعتقد فيها شي وانتِ أظنّ تدلين الطريج وتعرفين رقم غرفتج
ديمـه : مشعل الله يخليك لاتعاملني جذي .. خلاص انـا اسفه
مشعـل : على شنو!
ديمـه : على كل اللي قلته لك
مشعـل : والمطلوب مني اللحين ؟
ديمـه خلاص مو قادره تستحمل اسلوبه معاها والعبره غاصتها
ديمه : ولاشي جايه اتطمن عليك
مشعـل : ليش يهمج تطمنين علي ؟
ديمه : اكيد يهمني
مشعل : ليش؟
ديمه : أنت ماقصرت معاي ومهتم فيني طول ما اهلي غايبين .. وليش ما اتطمن وانت اللي بتسفرني ؟
مشعـل: ومن قـال بسفرج ؟
ديمه : شلوون ؟ مراح توديني لأهلي ؟
مشعـل: أنتِ تبين ابوج يجيج ؟ خلاص انطري يوم يومين على مايحل مشكلته ويجي مو ملزومه تروحين مع واحد غريب !
ديمـه : انت شتقول ؟
مشعـل : ماقول شي جديد هذا كلامج على ما اعتقد !
ديمه : ليش اتفسر كل شي على كيفك والله ماكنت اقصد ؟
مشعـل: يعني تبيني اوديج ؟
ديمه : أي ماعندي مانع بس كنت متضايقه لان ابوي يبدّي حلّ مشكلته مع المترجمه على مشكلتي
مشعـل : ابوج متطمن انج معـاي عشان جذي انا حلفت له انه مايجيج ومايحاتيج وانا الي بوصلج لهم وهو يحل مشكلته على راحته ..
ديمـه : اهـا قول جذي من الاول
مشعـل : مادري عنج هبيتي بوجهي
ديمه: لا انت اللي كنت منفعل
مشعل : لاتلوميني من النطره المحترمه اللي حضرتج نطرتينياها تحت المظله
ديمه : هههههههههه سوووري
مشعـل مبتسم : يلا ماعلينا .. روحي ارتاحي اللحين وانا برتاح ساعه بس
ديمـه: اوكي ..
وصلها مشعل لي الباب وكان بيوصلها لي غرفتها بعد بس هي قالتله ماله داعي كلها خطوتين ونص وابتسم وصك الباب وراها وحس براحه ..
" ياالله شلون كنت معصب عليها كنت اذا شفتها مادري شكنت بسوي اقهرتني ؟ اجل هي رخيصه اللحين يوم اهلها نسوها وصارت تحت مسؤوليتي ؟ قهرتني ماقول ما اقهرتني بس من شفت وجهها باين انها متندمه قد شعر راسها .. ماقدرت اشد عليها والا انا مابغيت ارضى بسهوله لانها جرحتني .. بس خلاص من شفت الابتسامه شاقه وجهها ماقدرت اقاوم شعوري بالسعاده والراحه كفايه انها معاي وتحت مسؤوليتي .. رضيت عليها .. اصلا من قال اني اقدر ازعل عليها .. آه ياديمه شسويتي فيني ! "
الساعه وحده ونص .. حط راسه بعد ساعه بيقوم عشان يروحون يتغدون ..
------
ديمه بغرفتها فكرت انها خلاص دام مابقى على سفرتها الا جم ساعه لازم ما تناشب مشعل على صغيره وكبيره خلاص هو بالنهايه بيوصلها لأهلهـا خلها على الاقل تعطيه الانطباع الزين عنها .. عشان ماياخذ فكره انها عنيده ورااسها يابس .. ولو تراه طيب المفروض تعامله احسن من جذي .. بس ماقدرت تنام شعور بالسعاده انها بتروح لأهلها وتفكيرها فيهم نساها النوم تبي تشوفهم بس موعارفه شلون راحت صوب الكاميرا وعادت الشريط لي النص .. وحطت على تصوير حديقه الفندق يوم لعبت كره قدم ويوم بطوا لها عينها .. قعدت تضحك على عمرها وهي معصبه حتى الولد اللي يصور من الخوف قام يهزّ الكاميرا .. وما تثبتت الصوره .. مالومه صراخها خرعهم هم متعودين على الهدوء .. وحطت على ميشوو وهي تلعب مع الفرنسي تقوله شسمك؟ مايرد عليها لانه موفاهم لها وتجي تطقه وتاخذ الطين اللي تلعب فيه اهي وياه وتحطه بوجهه لين بجى وهي تضحك تقوله وييييييييك خواف .. اشتاقت ديمه لميشوو وشطانتها .. ودها بجمعت خوانها .. محمد على انه مرات يفرض شخصيته لكنها محتاجته الحين اكثر من أي وقت .. "انواروو ام السوالف والقرقه وينها ؟ اتركت فراغ .. يا الله وامي وحضنها وابوي وصوته اللي مالي علي المكان والله مافي شي يسواكم لو الف هالكون كله والمجرات اللي جنبها .. ماراح القى ربعكم .."
خلاص بعد ما روت عطش شوقها لهم من شوفتهم ولو انها ورى القزاز.. صكت الكاميرا وردت شحنتها .. وحطت راسها على السرير بس مانامت .. وصورة كل واحد من عايلتها ببالها .. " آآه يالخونه ليش تروحون وتخلوني !! "
بعد حوالي سـاعه .. كانت ديمه لابسه وخالصه وماصدقت على الله عدت هالساعه البطيئه .. وهي مقرره انها تكون متسامحه مع مشعل باللي تقدرعليه دامها جم ساعه وتفكه منها .. راحت له الغرفه وطقت عليه .. واذته بالجرس .. لين بالاخير فتح لها الباب وهو لابس بجامته وشكله نايم حتى عيونه مو مبطلها كلها وشعره معتفس وجاي على وجهه واول مافتح الباب طالعها وفرك عيونه وابتسم
مشعل : سوري أخرتج ؟
ديمه تفشلت : لا اذا بتنام كمل نومتك بس مادري لانك قلتلي بعد ساعه بنروح قلت اقومك
مشعل : خلاص اوكي بلبس وبطلع انتي جهزي اغراضج
ديمه : ليش انت قلت بنتغدى
مشعل : بنتغدى وبنطلع سيدا على المترو
ديمه : اهااا اوكي
راحت ديمه لغرفتها وانصدمت من منظر الجياس المصففه اللحين وين اتحطهم؟ جنطتها هذي ماتكفي شي !
" ياربي شلون مافكرت فيهم !! "
وقعدت تحوس بالغرفه تدور على حل بس ماكو حل الجياس واجد والجنطه صغيره جدا ..
طلعت للمنقذ مشعل وطقت عليه الباب ..
مشعل : هاخير شفيج ؟
ديمه : الأغراض اللي شريتهم واجد والجنطه صغيره ماتكفي عندك جنطه فاضيه ؟
مشعل : جان دورتي بغرفتي اكيد بتلقين من هالجناط الرياضيه
ديمه : مادري وينهم
مشعل : اجل تعالي معاي
ورحوا غرفتها .. وهو لالحين مالبس عليه بجامته ودشوا الغرفه وراح فج الكبت من فوق وطلع جناطه اللي مفضيهم وعطاها جنطه رياضيه ..
ديمه : اللحين افضي الجياس فيهم والا ادخلهم مع الجياس
مشعل : شنو هنديه انتِ !! هههههههههه لا اكيد فضيهم عشان يستوعبون اكثر
ديمه انحرجت : اوكي
وقعدت تفضي كل الجياس على الأرض وصارت حوسه ملالالابس وأغراض
مشعل طالعها بشفقه
مشعل : هذول كلهم بتسفطينهم ؟ يمديج ؟
ديمه : عاد الله والتسفيط اخذ وقط
مشعل : لا جذي ماراح تكفي والا اقولج انا بساعدج
ديمه : لالا ماله داعي
مشعل : انزين اسمعي ماله داعي نسفطهم انا بحطهم لج كلهم داخل الجنطه بطريقه زينه
ديمه : اوكي اذا تقدر نوفر وقت
مشعل : خلاص انتِ اخذي جنطتج الصغيره واخذي فوفو وانطريني باللوبي تحت انا بروح البس وبسوي الجنطه ..
ديمه : اوكي مشكور
راح غرفته وكمل لبسه وخلص وردّ غرفتها و هو يرتب الجنطه طاحت ايده على بلوزتها اللي شراها لها مغفله من محل الهدايا ..
" ياربي الحمدلله انها ماسفطتهم يلا تشوفها بالكويت احسن !"
واخذها ولفها مع باقي الملابس وبالاخير استوعبت الجنطة كل الاغراض وخذاها ونزل تحت .. لقاها قاعده تلعب فوفو .. وشكلها مستانسه
" مو بتردّ لأهلها هذا اللي تبيه .. وانا اللي باكلها وبنحرم من شوفتها .. الله يعين بس "
بالتاكسي مشعل قدام وديمه ورى السايق
مشعل : ها ديمه وين نروح ؟
ديمه : الصراحه مشتهيه لازانيا
مشعل : يمىى جنج حاسه فيني قلت اخاف زهقتي من مطاعم البيتزا
ديمه : لا بالعكس احلا شي هني البيتزا
مشعل : تمام
وكلم التاكسي يوديهم مطعم بيتزا على مستوى
وصلوا المطعم وهم داخل السياره شافت ديمه المطعم وانصدمت .. مثل ما انصدم مشعل
كانت في سطرت جلابه بوليسيه على الباب تقريبا خمس وحاطين لهم بوادي فيها اكل وياكلون .. ومربوطين بسلاسل ..
ديمه : ان شاء الله بتدخلني هالمطعم ؟
مشعل : هههههههههههههههه في احلى من هالمطعم جلابه بوليسيه تنطرج عند الباب ونِعمَ الاستقباال
ديمه : لالا الله يخيلك خله يحرك
مشعل : ديمه صلي على النبي اقري الافته ممنوع اصحاب الكِلاب.. يعني هم رابطينهم برى لانهم مايقدرون يدشون فيهم
ديمه : بس انت ليش ماتحس فيني ماقدر والله ماقدر امرّ صوبهم اموت من الخوف
مشعل : انزين ليش منفعله ولايهمج نغير المطعم
ديمه : سوري بس صج ماقدر
مشعل : حصل خير
وطلعوا وراحوا مطعم احلى من الاول ..
ديمه : انّزل الجناط ؟
مشعل : بتفضحينا
ديمه : اخليهم بالتاكسي
مشعل : لا مشكله انه بيروح خلاص اوكي خلنا ننزلهم
ديمه :عادي نخشهم تحت الطاوله
مشعل : عشان يجكون فينا يقولون هذول اكيد مخدرات هههههههههه
ديمه : الله وناسه ويقطونك بالسجن
مشعل : لاولله وإنتِ معاي بعد
ديمه : لالا انا مالي دخل بقولهم هذي جنطته
مشعل : ااااياالخيااااااانه
ديمه : هههههههههه ان كيدهن عظيم
وقعدوا بالطاوله مشعل ماسك جنطه حطها وراح شوي وردّ وديمه ماسكه جنطتها الصغيره مع فوفو
مشعل : ترى طلبت لج
ديمه : ليش تو الناس ماشفت المنيو ؟
مشعل : ادري شتطلبين لازانيا من زود الثقافه بتقرين المنيو بالفرنسي !
ديمه : ههههههههههههههههههههه
وقبل لا يوصل الطلب زهقوا من السكوت
ديمه : قولي عنك انت وعمي مبارك قبل وين كنتوا تطلعون وشتسوون ؟
مشعل : ديمه ليش تحبين تعيشين بالماضي ؟ ترى اللي يعيش الماضي ومتمسك فيه عمره ماراح يعدي الحاضر عشان يوصل للمستقبل
ديمه : بس الماضي يعني لي كل شي .. كفايه اني لا تضايقت فجيت ارشيف ذكرياتي وتذكرت
احلاها .. عشان اصبر نفسي ..
مشعل : بس هذا مو حل للي انتِ فيه اللحين انتِ تبين تطلعين من ازمتج اللي تمرين فيها المفروض تقطعين شي اسمه عمج مبارك وساره خلاص لازم تنسينهم واذا ماقدرتي متى ما طروا على بالج لهّي عمرج بأي شي ..
ديمه : بس هم كانوا شي سعيد بحياتي ليش تبيني انساهم ؟ دامني انحرمت من شوفتهم مابي انحرم من ذكراهم
مشعل : انتِ مؤمنه بقضاء الله وقدره وتدرين ان هذي سنه الحياه ناس تنولد وناس تموت .. وكلنا بالاخير مندفنين بالتراب ليش انعذب روحنا بروحنا واحنا بإيدنا العلاج ؟
ديمه : بإيدنا ؟
مشعل : أي طبعـا شوفي ربي قال بكتابه " إن الله لا يغير ما بقوم حتى يغيروا ما بأنفسهم" صدق الله العظيم
يعني الشي اذا انتِ من داخلج غيرتيه ربي بيساعدج وتتخطين هالمشكله .. واذا انتِ عبالج ان عمج مبارك هو الوحيد اللي يطلعج من ازمتج فأنتِ غلطانه امس طلعج عمج اليوم منو بيطلعج ؟ كوني على ثقه انج مو وحيده دام عندج رب فوقج .. معاج بكل وقت .. تقربي منه وهو خير معين
ديمه : كلامك يطمن .. وانا بسوي اللي تقولي عليه وربك كريم
مشعل : نبيج ديمه القويه .. مانبي أي شي يهزجّ
ديمه : تطمن ربي معاي
مشعل : والنعم بالله
جاهم الطلب حاااااارّ وخلوه يبرد الا يرنّ التلفون
مشعل شاف الرقم الا نفس الرقم اللي كلمه منه بومحمد
مشعل : ابوووج
ديمه بفرحه : احلللللللللف
اشر له انها توطي صوتها بيتكلم
مشعل : الووووو هلالالالا والله بومحمد
بومحمد : هلالالا فيك ها شخباركم ؟
مشعل : ابد بخير الله يسلمك انتوا شلونكم ؟
بومحمد : اسكت بس تهاوشت مع الفندق
مشعل : افااا ليش ؟
بومحمد : رحت اشتكيت على المترجمه مالتهم وهم واقفين معاها وتبي الصراحه انا اصلا بغير الفندق كفايه دقتهم فيني بباريس حجزت اسبوعين بعد اسبوع قالوا خلص الحجز واللحين نفس فندقهم بروما وهقوني مع المترجمه !! مالي قعده عندهم انا اللي يمشي معاي مضبوط امشي معاه سيدا ..
مشعل : والعمل ؟
بومحمد : بروح ادور لي فندق ثاني مالي قعده بهالفندق ولا يوم
مشعل : شلون اللحين احنا بنجيكم اليوم
بومحمد : لالا خلني ادور لي فندق واستقر بعدين تعالوا .. اليوم بسكن بفندق ثاني بس المهم ديمه تقدر تمددلها يوم واحد
مشعل : هااا ايييي عااادي
بومحمد : خلاص زين هي وينها اللحين بكلمها
مشعل : اوكي اخذها
خذت ديمه السماعه بسرررعه
ديمه : هلالالالالا يبى بعد عمري
بومحمد : هلالالالالالالالا فيييييييييييييج ديوم والله اني احاتيج اجل هذي دقه اللي سويتيها فينا تردين الفندق ولا تقولين لي ؟
ديمه : يبى خلاص اللي صار صار انتوا شلونكم اللحين ؟
بومحمد : ابد والله الحمدلله بس ناقصنا انتِ
ديمه : حلووووه روما ؟
بومحمد : روعـه ماتتطوف ..
ديمه : يلا لاحقين عليها ان شاء الله وين امي وخواني
بومحمد : كلهم فوق بالفندق انا طالع بدور لهم فندق ثاني
ديمه : ليييييييش؟
بومحمد : سالفه طويله المهم انتِ مرتاحه اللحين ؟
ديمه : أي يبى الحمدلله
بومحمد : اليوم اذا حصلت فندق اوكي .. بدق عليكم وبعطيكم العنوان عشان تجون باجر
ديمه : باجر؟ ليش يبى؟
بومحمد : أي باجر بستقر بفندق سنع اليوم وباجر تجون مو تقولين انج مرتاحه ؟
ديمه : اييي يبى لاتحاتيني انا مرتااااحه بس عشاني جهزت جنطتي وكنا بنطلع بعد شوي بس انصدمت
بومحمد : اهاااا كلها يوم باجر انتِ عندنا ان شاء الله الا تعالي الفيزا عندج؟
ديمه : ايييي
بومحمد: اي اشوى خليها معاج اكيد بتحتاجينها
ديمه : يبى مشعل ماقصر ماخلاني احتاج شي !
بومحمد : ربي يحبج لونج الحالج جان الله واعلم وين كنتي جان اللحين ضايعه بشوارعهم
ديمه : هههههههههه أي والله الحمدلله عدت على خير
بومحمد : انا اكلمج من كبينه بروح الحق على الفنادق يمكن القى شي سنع
ديمه : يبى اذا لقيت على النهريكون احلى
بومحمد : نص شوارعهم انهار
ديمه : ههههههههه واوو ونااااااااسه متى يجي باجر
بومحمد : بيجي ان شاء الله يلا ديوم يبى ديربالج على روحج
ديمه : اوكي يبى لا توصي
بومحمد : فمان الله
بعد ما صكت التلفون
ديمه باحباط: اليوم بنقعد بباريس
مشعل : لاتطالعيني جذي مالي دخل ابوج اللي قال
ديمه : اوكي يوم ويعدي ان شاء الله شكله بيمر علي دهر
مشعل : كل تأخيره وفيها خيره ليش ما تاكلين
ديمه : اوكي بسم الله
قعدوا ياكلون وديمه منقهره تبي تشوف اهلها مشتاقتلهم .. ومالها خلق اترد مره ثانيه الفندق وغرفه مشعل .. بس هو يوم والله العالم شلون عدى عليها كفايه الأحراج ..
ديمه : مشعل
مشعل : هلا
ديمه : انت قلت لأبوي اني قاعده بغرفتك ؟
مشعل : لآ
ديمه : ليش؟
مشعل طالعها باستغراب : المهم انج لقيتي غرفه ترتاحين فيها هاليومين .. بعد ليش اقوله كل شي ! ماشوف له داعي ..
ديمه : اهاا
مشعل رغم سكوته وهدوءه من بعد اتصال بومحمد الا ان فرحته مو مخليته يتكلم فا التزم الهدوء .. حس براحه غريبه .. وسرح بأكله
ديمه : متى بيطلع رفيجك؟
مشعل : هلا مادري يمكن باجر الا ذكرتيني بروح ازوره دامنا ماراح نسافر
ديمه : متى
مشعل: بعد مانطلع بروح الفندق اجيبله اغراضه واروح له المستشفى
سكتت ديمه .. هذا اللي ناقصها تروح المستشفى مره ثانيه !!
بعد ما خلصوا طلعوا برى يدورون تاكسي.. بس ماحصلوا مع ان اليوم بالذات زحمه ناس رايحه وراده ..
ديمه : شسالفه اليوم زحمه !
مشعل : مادري شفيهم
ديمه : ليش اليوم أي يوم؟
مشعل : الاحد اييييي اليوم عطلتهم
ديمه : اها يمكن عشان جذي
مشعل : ماكو الا انرد بالميترو او باص
وقعد يدور باص منطقتهم بس مو محصل اهم باصهم 47 ومالقاه قعد يحوس شوي لين لقى الميترو .. بعيد شوي من المطعم .. وراحوا له مشي.. ونزلوا السرداب .. وقصوا تذكره واركبوا .. كان الميتروا زحمـــــه النفس بالنفس ونظامه كل خمس دقايق يوقف بمحطه .. فا اول ماركبوا مالقوا مكان الا مقعد واحد ونص الناس واقفين ماسكين العامود
مشعل : ديمه اقعدي
ديمه شافت المقعد الفاضي كان جنبها واحد متييييين اسمرر ولابس نظرات قلبها طاح ببطنها من شافته " لا والله يبيني اقعد عند هذا ؟ "
ديمه : لالا انت اقعد فيه
مشعل عرف انها ماتبي تقعد مع هذا بس هي مالها شغل هو بكرسي وهي بكرسي .. بعد مافي مكان عشان نتشرط !! نص العالم واقفه عل رجولهم .. زين لقينا كرسي !
مشعل : يعني بتوقفين ربع ساعه ؟
ديمه : عادي اوقف مع الناس
قعد مشعل بالكرسي .. وهي قدامه واقفه وماسكه العامود .. وكان حرّّ المترو تحت الارض .. وزحمه وكل شوي يوقف ويطلعون ناس بس تركب ناس جديده اكثر .. وهذا حالهم .. وكان كئيب كفايه انه تحت الارض وسرداب ولونه رماااادي يقت القلب
مشعل شاف الخريطه اللي مرسومه على الطوفه
مشعل : عدي معاي خمس محطات وننزل
ديمه : حرّ
مشعل طالعها وكسرت خاطره واقفه على رجولها وريحه خايسه وزحمه وماكو هوا ..
مشعل : شوي ونوصل انتِ اول ما يوقف بالمحطه الجايه أي احد يطلع اقعدي مكانه
ديمه: مو عن الوقفه احس اني بختنق
مشعل: هذا كله من الزحمه يلا استحملي شوي وننزل
ديمه بالاساس ماتحب السراديب .. ولا الاماكن الضيقه مافيها هواء .. لان فيها ضيق تنفس .. وتحس يضيع نفسها بسرعه بس سكتت شوي وتوصل ..
اول محطه وقفوا عندها قام الاسمر اللي عند مشعل وقعدت بداله وحده شقرا طويله ولابسه قصيرورفعت نظارتها فوق شعرها وابتسمت لمشعل
الفرنسيه : بونجوغني ميسوو ( قود افتر نون)
مشعل طالعها وابتسم ماعرف شيقولها ..
وانحرج من نظرات ديمه له كانت تطالعها وتطالعه .. بنظرات غريبه ..
مشعل قام
مشعل : اقعدي مكاني
ديمه تطالعها: لا خلك مكانك شكلك مرتاح
مشعل : يلا عاد تراج طول اليوم واقفه ماعندج عذر اللحين وحده قاعده جنبج
ديمه : اممم اوكي
قعدت ديمه مكانه وتم هو واقف بس معطيهم ظهره
الفرنسيه طالعتهم وكلمت ديمه: تو فيان دو ؟
ديمه : دو كويت
وابتسمت لها الفرنسيه بترحيب .. ومشعل لف على ديمه وطالعها باستغراب وهذيج لبست نظارتها وقفت مستعده بتنزل بالمحطه هذي ..
واشترت لها بإيدها ..
الفرنسيه : سلووو (باي)
ديمه :سلووو
ونزلت ديمه اشرت لها بإيدها نفس الطريقه ..
وقعدت عجوز مكان الطويله ومسكت عمرها ديمه حاسه انها بتصارخ اذا طولت اكثر " ياربي وين الهواء بختنق ! "
ديمه : باقي جم محطه؟
مشعل يقرا المخطط المرسوم : خلاص الجاي بننزل فيه
ونزلوا وخذت نفس عميـــق ومشوا شوي لين وصلوا الفندق .. وبالفندق ..
ديمه : انا بقعد بالفندق
مشعل : ليش
ديمه : بس ماله داعي اروح
مشعل : بس جذي بقعد احاتي
ديمه : لا تطمن ماراح اطلع من غرفتي
مشعل : اوكي كلها ساعه زمان وراد
ديمه : لاعادي لاتعطل اشغالك عشاني
مشعل : ساعه وراد اوكي؟
ديمه : اوكي
مشعل خذا اغراض ناصر وطلع وراح الشارع الرئيسي الشانزلزي وراح يدور تاكسي ..
بالغرفه ديمه .. ردت جناطها وخلت جنطة الاغراض الجديده مافجتها لانها شكلها متروسه مالها خلق تقايسهم لان ان طلعتهم ماراح تقدر اتردهم .. ولقت على الطاوله اوراق فاضيه محطوط تحتها شعار الفندق .. ولقت قلم عند الاوراق .. خذتهم وقعدت تشخبط وترسم .. واشتاقت لقسم الخواطر والشعر اللي كانت مشرفه عليه .. واشتاقت للقلم والورقه .. وهي بين ايدها .. وقعدت تكتب على الاقل تكتب كل اللي بقلبها .. وبالاخير الورقه مقطوطه بالزباله .. منو بيشوفها ؟
" إلى همي ومعاناتي مع التحـيه ..
اشكركم .. على ما امضيتموه بخدمتي طيلة السنون التي مضت .. واشكر لكم حسن تواصلكم معي .. قد كفيتم ووفيتم .. أمـا تعبتم ؟ من السـهر على راحتي المزعومه.. امـا كفاكم ؟ مرافقتي طيلة تلك السنون والأعوام ؟؟ والأيام الكئيبه التي قضيتموها بقربي .. ماذا تريدون مني ؟؟
حزن ! قد ارتويت منه حتى الثماله
بكاء! ليتكم رأيتم الأنهار والسيول التي تخلفها محاجر عيناي على وسادتي كل ليله..
الألم ! وما اشد اعصاره على قلبي حين اتذكر الماضي الجميل الذي كان
سهر ! اسهر الدهر كله ولكن ارجعوا احبتي إلي ّ !
..
إلى معـاناتي أمـا شبعتي من تعذيبي ؟ بتذكيركِ لي بمن فقدت في أوقات ضعفي .. ؟ بسلبكِ حتى من حريتي للشكـوى ! ليتكِ تقدمين لي تقاعدكِ حتى ترتاحي من الاستمرار في سلك طريقكِ نحوي فأنا في أشد الحاجه لبعدكِ عني .. ولكِ اريحكِ من عناء مرافقتي للسنون القادمه المتبقيه من عمر هذا الزمنّ المـرّ ..!!
..
كفاك يا همي عناءاً..
كفاك ياقلبي شقاءا..ً
كفاكِ ياعيني بكاءاً..
كفاك يازمني جراحاً ..
كفاك ياحظي عناداً ..
قد مضى عمري هباءاً ..
قد همى الدمع انسكاباً ..
قد زاد الأمل كفاحاً ..
وارتسمت البسمة خداعاً ..!! "
..
وقفت وقعد تتأمل الجوو .. بدا يطق مطر رذاذ خفيف .. والجوو كل ماله ويحلوو .. الساعه تقريبا .. اربع ونص
مسكت القلم مره ثانيه وحاسه براحه .. طلعت اللي بقلبها
" عندما تشرق الشمس وتتفتح الزهور .. ويقبل فصل الربيع بكـل رونق وجمـال حيث يمتطي الفارس صهوة حصانة وينتشلني من العالم الزائف ليرحل بي إلى عالمٌ آخر .. حيث الفرح والسعـادة والأمل وحيث تحقيق الأحلام .. ووملاقاة الاحبه .. وأجمل الذكريات .. حيث الضحك والمرح والانس .. آه وما اجمله من عالم .. بشرٌ ولكنهم لا يعرفون للحزن طريق .. أُ نـاسٌ ولكنهم لا يعرفون معنى الألم .. فحياتهم فرح بفرح .. فالسؤال الذي يراودني الآن أين هذا الفارس؟ "
"رأيته نعم فهو فارسي الذي احلم به بليلي ونهاري .. هو الذي سينتشلني من دوامة همومي وأعاصير ذكرياتي .. هو هو بعينه رأيته ورأني .. وشكيت له وواساني .. آه ما احلى قربه وماأقسى جفاه .. دخل حياتي من باب الصدف .. وغير مجرياتها للأفضل .. آه ليته يبقى .. لا اعلم ما سرّ تيقنّي بأنه هو وهو بذاته من سيقتلعني من جذور عالمي الكئيب .. إلى العالم الآخر الذي كنت احلم فيه .. وجدته ولكن أأمل أن لا تكون رؤيته حلم جميل ينتهي عند استيقاظي ويكون كل الذي رأيته خيال بخـيال!"
تركت القلم وحست انها مرتاحه طلعت اللي بقلبها على الاقل وشغلت التلفزيون .. الا الجرس يطق تخرعت منو ممكن يكون ؟ مشعل توه طالع ما يمديه يردّ !! بعدين اهو حذرني ما افتح الباب لأحد لازم اسأل ..
وراحت للباب ..
ديمه : منو ؟
مشعل : انااا مشعل
فجت الباب
ديمه : مامداك رحت ؟
مشعل : وانا بالشارع شفت عمر رفيجنا بيزور ناصر عطيته الاغراض واتصلت على ناصر وتطمنت
ديمه : ليش مارحت معاه ؟
مشعل : الاغراض وبتوصله وتطمنت عليه مايحتاج اروح امس انا عنده
ديمه : بس اهو تعبان ومحتاجك
مشعل : مافيه الا العافيه ويحنّ علي يقولي قولهم خلهم يطلعوني يبي يلعب
ديمه : يلا الحمدلله على سلامته
مشعل : الله يسلمج .. الجو برى مايتطوف اذا تبين تروحين معاي الحديقه انا بعد شوي بطلع بس بروح ابدل واصلي
ديمه : مطر ومامعاي مظله
مشعل : انا عندي مظله وباخذ مظله ناصر لاتتعذرين الجو ما يتطوف وانتِ كيفج
ديمه : خلاص خلنا نصلي اول مع اني مصدعه بس الجو يشجع الصراحه
مشعل : انتِ من الغدا ماكليتي شي؟
ديمه : صداعي مو من جوع لا من زمان يجيني من فتره لي فتره
مشعل : انزين شلون يروح ؟
ديمه: مثل ما جاء يروح بكيفه
مشعل: يطوول ؟
ديمه : لا مو اكثر من اسبوع
مشعل : اوف واجد
ديمه : عادي تعودنا يلا بنصلي بعدين ننزل اوكي ؟
مشعل : اوكي عن اذنج
صج انه شاف عمر بطريجه وعطاه الاغراض واتصل بناصر وتطمن عليه بس مو عشانه شايف ناصر امس لا.. السبب الرئيسي انه مايبي يخليها لحالها .. ويقعد يحاتيها ..
فالحديقه .. شافوا جهال يلعبون .. نفس الفريق اللي شافتهم ديمه قبل ..
ديمه : مالت عليهم
مشعل : ليش؟ شسووا
ديمه : امس لعبت معاهم وبطوا عيني
مشعل : صج والله ؟ لا يمكن ما يقصدون
ديمه : شنو ما يقصدون؟؟ لحظه بوريك بالصوت والصوره
وعادت له من بدايه المباره وشاف شلون جاتها الطقه وقعد يضحك .. وخاصه وهي تسبهم وهم موفاهمينها
ديمه : تضحك ؟
مشعل : لا ولايهمج اللحين بروح وامصخرهم لج..
ديمه : يلا بنشوف
دخل مشعل وشاركهم اللعب وخاصه وان هوسه الكرة مسك الكرة وسوى فيها كذا حركه وعدى لاعبين الفريق وقفوا اللي بالحديقه يطالعونه وتحمس الفريق وصاروا كلهم ضده وهو لحاله بفريق .. ويحطها براسها ويلعب فيها .. يمين ويسار .. وبدوا الناس يتجمعون والكل يصفق وشارك ثلاث شباب من عمر مشعل متحمسين الا يغلبونه .. شاركوا ضده وكانت الكره معاه محد قدر ياخذها منه واهالي العيال مستانسين واللي يصور واللي يصفق و ديمه تطالع المباره وودها مشعل يفوز بس عشان تنتقم منهم بعد ما بطوا عينها وحطت فوفو على الكرسي وطلعت الكاميرا وصورت المباراه .. على اخر المباراه صار الكل يشجعونه لأنه كان لاعب متمكن .. وتعاونوا ثنين شباب عليه الا ياخذون الكره .. ويبي يشوت الاول الكره بكل قوته شات على رجل مشعل .. صرخ مشعل صرخه الكل تخرع .. وقفوا اللعب .. ديمه من بعيد شافت ضجه وجمعه ناس .. وصكت الكاميرا وراحت لهم .. وشافت واحد قاعد يفرقهم .. وتنادي بصوت عالي .. مشعل مشعل .. ماتسمع صوته زحمه على شنو ماتدري !
مشعل لو بمباره رسميه كان هانت عليه الضربه لانه بيكون لابس كساره على ساقه اما اللحين الضربه كلها على ساقه عورته ..
تعاونوا ثنين شباب وشالوا مشعل قعدوه على الكراسي .. وشافته ديمه وانصدمت ..
ديمه : مشعل شفيــك!!؟
مشعل كاتم الألم : مافيني شي شفيج مخترعه ؟
ديمه : شفيها رجلك ؟ منو طقك
مشعل : لا طحت بالمباراه
ديمه : بطوا عيني وكسروا رجلك ؟
مشعل : مايقصدون
ديمه : لا تقهرني شنو مايقصدون .. والله متعمدينها شافوك احسن منهم حطوا حرتهم فيك
مشعل : ماعليج منهم جهال
ديمه : لالحين يعورك ؟
مشعل يغمض عيونه من الألم : لا خف
ديمه : ليش اتقص علي ترى ماراح اخاف بس قولي اذا يعورك اخليهم يودونك المستشفى
مشعل : وانتِ منو يقعد معاج ؟
ديمه : عادي اروح معاك
مشعل : لا انا مافيني شي متعود على الاصابات
ديمه : لاتقهرني باجر ورانا سفره روح على الاقل بس تطمن على رجلك
مشعل بعصبيه : بس خلاص ماراح اروح مكـان ارتحتي !!؟
سكتت منصدمه .. بعدين قعدت على كرسي ثاني ..
ديمه تطالع الحديقه : على العموم انا اسفه انا السبب انا اللي خليتك تلعب معاهم
مشعل يطالع رجله : لا هذا قضاء وقدر محد له دخل فيه
ديمه : انزين ليش معصب علي ؟
مشعل صرخ: ديمه اسكتــــي !!
ديمه حزت بخاطرها سكتت وخذت فوفو وجنطتها
ديمه : انا بروح الفندق ..
نطرت تبي تسمع جواب بس ماجاوبها .. وانقهرت زياده .. راحت الفندق .. وصعدت غرفتها وحطت راسها على السرير وقعدت تبجي ..
" اصلا من قالي اطلع معاه !! خلاص باجر اذا قال بنسافر باخذ اغراضي وبخليه يوصلني وبس.. ماراح اروح معاه مكان .. عشان افكه من شري .. يعني لوني قاعده بالفندق ماكان راح الحديقه ولعب معاهم ..وتكسر مثل اللحين !!"
زاد عليها الصدااع .. ماقدرت تقاومه فجت الثلاجه مالقت فيها بنادول ولا شي .. وماحست بروحها الاوهي نـايمه ..
مشعل كان يحس بألم معنوي وجسدي .. رجله تعوره وقلبه يعوره ..
" كنت بقمه الالم بس المفروض ماصارخت عليها .. مالها ذنب .. بس قهرتني يوم قالت انها السبب باللي صارلي اللحين انا اللي العب وهي السبب !! .. والله مادري شقلت كنت بحزتها موحاس بروحي .. يارب ماتكون زعلت .. حرام اخر يوم ينتهي بهالموقف السخيف .. !! "
وبعد ما حس نفسه انه يقدر يتحرك والالم خف .. مشى شوي شوي لين وصل الفندق وصعد .. غرفته وصلى و درى انها بتكون نايمه ماله داعي يزعجها باجر بيتفاهم معاها وحط راسه ونام ..
على ثاني يوم قام مشعل مصحصح .. وشاف ساعته الا 10 انصدم كل هذا نوم .. و صلى ولبس وطلع من الغرفة .. وما تجرأ يطق عليها الباب خلاص متى ما قامت تنزل كيفها ..
ديمه قامت الساعه 10.30 والصداع زااااااد .. وبعد ما لبست وخلصت خذت جناطها وفوفو ونزلت تحت .. بتنزل تنطره متى ما قام ينزل يشوفها ويوديها لأهلها خلاص .. ماتبي تكون عاله عليه اكثر من جذي .. دامه مو متحمل منها ولا كلمه .. !!
نزلت وشافته قاعد على قنفه وماسك جريدة هي شافته ووقفت .. وهو وقف ومشى صوبها بس كانت مشيته شوي مو سويه كان يخفف على الدوس برجله اليسرى .. مسك جنطتها الكبيره بهدوء وطلع من الفندق
ديمه : خلها عنك انا اقدر اشيلها .. انت تعبان
سكت مشعل ولا عطاها الجنطه وكمل طريقه .. واضطرت تتبعه لين وصلوا للتاكسي .. ووقف عند مخبز وخذا فطاير و عصير وعطاها بالسياره بهدوء
مشعل : تريقي لين نوصل المترو
ديمه كل مالها وتنقهر من اسلوبه .. بس شتسوي ؟؟ تهاوشه فرضا .. خلاص تسكت اكرم لها
وبعد ماوصلوا المترو ..
قصوا تذاكر ونزلوا السرداب .. وركبوا الجناط .. وكان احسن من المتروا حق المدينه .. هذا فيه مكيف .. و فيه خدمه .. طول الرحله 5 ساعات متواصله .. بس ماكان زحمه مثل المره اللي طافت .. لا المترو مليان ناس .. بس الكل قاعد بكرسيه .. ماكو احد واقف ..
قعدت ديمه على الدريشه ومشعل قاعد قبالها بس من جهه اليمين .. يعني مو مباشره وقاعده جنبها وحده عجوز عمرها فوق 40
حطت ديمه فوفو بالأرض .. ومشعل مسك تلفونه ودق رقم وشوي الا يكلم ابوها
وكان مجمل المكالمه
مشعل : ( هلا بومحمد صبحك الله بالخير ، أي احنا اللحين بالمترو ، زين الحمدلله لقيتوا ، اوكي عطني ، لحظه بكتبه ، أي أي سجلته ، اوكي بينا اتصال ، عزيز وغالي هلا والله )
ديمه ودها تكلم ابوها بس تكلمه شتقوله بتصيح اكيد ! خلها بمكانها احسن لها ..
طالعت ديمه مشعل وشافته يتعبث بتلفونه
" ياه اللحين اكيد مرتاح كلها ساعات ويفتك مني .. بترتاح ان شاء الله بس انا منو بيريحني ؟!! "
كان مشعل كل شوي يسرق نظره لها ويتطمن عليها والجو هادئ ولا احد تكلم شوي وغمض عيونه بس يحس باللي حوله .. مع حركه المترو بدا صداعها يزيد .. وبدا نفسها يضيق .. كفايه انها تحت الارض !! بدت تمسك صدرها وتتنهد يمكن تحصل على الهواء الضايع .. وتوجه المكيف عليها .. بس شي كاتم على صدرها .. تحس كل ماله ويضيع النفس والصداع يزيد .. ولين بالاخير ماقدرت تتحمل قعدت تتنفس بصوت عالي العجوز اللي صوبها انتبهت وقعدت ديمه تأشر لها على خشمها وتقولها ماكو هواء .. وتطلّ من الدريشه بس هي تحت الأرض ويزيد الاختناق
مشعل بطل عيونه وشاف وجهها ازرق .. البنت مختنقه .. وقرب صوبها بخوف
مشعل : ديمه شفيج؟؟؟؟؟
ديمه ماقدرت تردّ عليه ماطلعت منها الا كلمه وحده
ديمه : بختنق
مشعل: اخذي نفس عميييييق
ديمه تأشر له انها ماتقدرررررر
ارتبك ماعرف شيسوي .. ! خاااااف عليهااا وقال للعجور
مشعل : بليززززز هيلب مي
راحت العجوز للموظفين وقالت لهم تبي جهاز اوكسجين وعطوها وجوها ركض وحطوا لها الاوكسجين وقعدت تستنشقه .. واخيرا ردت لها الحياه .. حست ان الهواء سر الحياه محد يقدر يعيش بدونه .. مشعل سألهم هي شفيها .. قالوله اكيد ضيق تنفس .. و حطوا عندها الجهاز وماتشيله الابعد ربع ساعه .. وبعد تقريبا نص ساعه
مشعل : ها ديمه شلونج الحين ؟
ديمه : راسي يعورني
مشعل : بروح اجيب لج منهم بندول
ديمه :لا اقعد رجلك تعورك اذا جاء ياخذ الاوكسجين بقوله يعطيني بندول
مشعل : انا بودي الاوكسجين وانا بجيب البندول وخلي منج العناد
وخذا الجهاز وراح جاب لها بندول ..
وبعد ما كلت البندول بعد عشر دقايق خف الصداع شوي ..
ديمه : الحمدلله خف الصداع
مشعل : أنتِ تو الحين شصارلج ؟
ديمه : ضيق تنفس
مشعل : شلون يجيج؟
ديمه : بس بالسراديب والاماكن الضيقه يضيع مني الهواء
مشعل : وليش ما قلتي لي من قبل عشان ما اركبج مترو
ديمه : يعني نرد بطياره فرضا ؟
مشعل : بأي شي المهم مايصير فيج مثل قبل شوي بغيتي تموتين
ديمه : يوم ركبت المترو امس جاتني مثل الحاله بس اشوى ان احنا ماطولنا والا كان جاني مثل اليوم
مشعل: امس؟ وليش ماقلتيلي؟
ديمه : قلتلك بختنق قلتلي من الزحمه
مشعل : بس شدراني ان فيج ضيق تنفس !
ديمه : يلا عادي عدت على خير
مشعل : يلا الحمدلله لحقنا عليج قبل لا تروحين وطي
ديمه ابتسمت : الحمدلله
بعد حوالي ثلاث ساعات .. تغدوا .. الساعه 2 تقريبا .. وبعد ماخلصوا العجوز كسرت خاطرها ديمه فا خلتها تنام على كتفها .. وبعد ساعه قامت .. وتطالع الدريشه صعد الميترو من تحت الارض الى الارض وبينت المزارع والبيوت الريفيه .. وديمه مستمتعه بالمنظر .. كانت امنيتها تعيش بحياة الريف .. وكانت كلا تقرى قصص عن حيـاتهم البسيطه .. وتذكرت القصه اللي كانت خاشتها بجنطتها الصغيره .. وقعدت تفتش تدورها .. لين طاحت بيدها صور ستيكر لها ولأخوانها بالأكواربارك .. وكانت الصوره تجنن كلهم يضحكون .. " والله العظيم اني مشتااااااااقتلكم موووووت ماصدق اني بشوفكم اليوم .. "
وتذكرت انها تبي قصه .. ودورتها ولقتها مسفوطه داخل السحاب .. وطلعتها وقعدت تقرى
مشعل : شتقرين ؟
ديمه : قصه
مشعل : تحبين القصص؟
ديمه : حيل
مشعل : أي نوع منها ؟
ديمه : الرومانسيه القديمه
مشعل : قديمه ؟
ديمه : أي ايام العصور الوسطى
مشعل : شمعنى القديمه !
ديمه : بالله عليك اليوم في حب ؟ كله خرابيط .. احس قبل صج كانت الرومانسيه ينكتب فيها القصص مو اللحين
مشعل : ليش؟ الحب موجود بكل العصور مو القديم وبس
ديمه : انا عندي ان الحب هالايام صار حبر على ورق تجرد من كل الاحاسيس ..
مشعل : اللحين كل الناس جذابين مايحبون ؟ لا اصابع ايدج مو سوى
ديمه : بس كلهم من طينه وحده
مشعل : صدقيني بيجيج يوم تقتنعين بكلامي
ديمه : يصير خير
وقعدت تقرى .. الاشياء اللي فاتتها هالاسبوعين كلهم ما قرت ..
وبعد ساعه الا وهم واصلين ..
مشعل : انتِ اخذي فووفو والجنطه الصغيره
ديمه : يلا ننزل ؟
مشعل : اصبري هذي مو محطتنا المحطه الثانيه احنا
وشوي الا وصلوا محطتهم ..
وديمه تحس بفرحه غريبه .. مابقى شي وتشوف اهلها ..
مشعل كان لابس نظاراته عشان يخفي الحزن اللي بعيونه.. خلاص مابقى شي وتختفي " ديمه " من حياته !
رد : رحلة عمر رواية رومانسية مثيرة 
العرض العادي
