:: الجــزء الحـادي عشــر ::
وصلوا عايله بومحمد مطار الكويت الدولي الساعه 11.30 بالليل .. وسووا الاجراءات وخذوا الجناط .. وهم يمشون بالمطار .. شاف بومحمد وجه مو غريب عليه ..
بومحمد : جراح !
وكأن اللي نادى عليه ما انتبه له .. وعلا صوته بومحمد شوي لينالتفت اهو عليه .. وتأكد بومحمد ان هذا هو جراح ولد اخوه
جراح : هلا والله عمييي .. الحمدلله على السلامه ..
بومحمد : الله يسلمك .. شلونك انت وشلون ابوي ؟
جراح : كلهم تمام يسلمون عليك .. وينطرونك
كان جراح مع ربعه وتركهم وجاء سلم على عمه .. لكن ديمه وانوار ومحمد وميشوو كلهم كانوا واقفين مع ابوهم ..
جراح شافهم : هذول عيالك ؟
بومحمد : ليش ماتعرفهم ؟
جراح : وين اشوفهم عمي واحنا مانشوفكم الا بالعيد ماعرف منهم الا حمود !
بومحمد : اسأل امك ليش مانجي الا بالعيد
جراح تنهد: ماشاء الله عندك بنات كبار (ويبتسم ) هاه عمي تزوجنا !!
بومحمد وهو يضحك : انت اصغر منهم كلهم الا اذا تبي ميشو .. لكن سوري بنتي مخطوبه
جراح : افاااا راحت بنت العم .. !!
وقعدوا يضحكون
بومحمد : الا انت وين رايح ؟
جراح : على لندن بلتحق بعايله هناك لين ما اهلي يجون .. ونرد مع بعض
بومحمد : ماقالي محسن انه بيسافر !! وبعدين مابقى شي على الدوامات والدراسه ؟
جراح : هههههه لا عمي لاتحاتي انا مضبط روحي من ناحيه الدراسه وبعدين ابوي تجاره حره وامي بتاخذ اجازه من دوامها
بومحمد : وشلون ابوك خلاك تسافر لحالك مع ربعك ؟
جراح : عمي ترى عمري 16 يعني اعرف ادبر روحي .. وربعي ماشاء الله ابوي يعرفهم كلهم .. مايحتاج يخاف علي ..
بومحمد : شايف هذا .. (يأشر على محمد ولده ) ما يسافر لحاله لو تم عمره عشرين ..
جراح : هههههههههههه يووو ه الله يعينه اجل ..
وابتعدوا البنات عنهم ورد محمد وسلم على ولد عمه وقعدوا يسولفون لين تأكدوا ان كل جناطهم وصلت وبالاخير
انحرج جراح من بنات عمه كانوا واقفين بعيد وشكلهم يتأففون واستئذن منهم وراح ..
جراح كان الوحيد من عيال محسن الطيب المسالم .. بس حيل شايل ايده من العايله لانه يدري انها كلا مشاكل .. فا مريح روحه بالسفر وعايش حياته مع ربعه .. ولكن أي احد من اهله يحتاجه يجيه من اخر الدنيا ويساعده .. البنات تعرفوا على فرد جديد من عايلتهم ..
طلعوا من المطار وكان السايق ينطرهم عند الباب .. وربكوا السوبر على ما ركبوا اغراضهم وجناطهم .. وهم بالطريج ..
انوار : ياحلو حرّ الكويت ياناااااااااس
ديمه : أي حرّ !! قولي رطووووووبه موت
انوار : نار بلادي ولا جنتهم
ديمه : هههههههههههههه يلا هاتي من الاخر اذا في شعر ارتجالي قوليه
انوار تقصر صوتها عشان ابوها مايسمع : جبي انتِ بس طايحه فيني تطنز .. !
وتلتفت انوار على سايقهم راجوا
انوار : راجوا في احد دق علي بالبيت ؟
راجوا يهز راسه : انا مايعرف
انوار قعدت تتحلطم: وهذا اللي انت فاالح فيه انا مايعرف انا مايدري !! وانا مايدري وانا مايعرف !!!
بو محمد : مابي احد ينزل وايده فاضيه الكل ينزل شايل شي والكلام موجه لج ياجاره
ويلتفت على انوار
انوار : يبا عااااااد انا عندي اولويات .. اهم من الجناط
ديمه : خلاص يبا خلها لأولوياتها انا بشيل عنها
بومحمد : لا دام السالفه جذي .. محد منكم يشيل شي كل الاغراض تنزلها انوار .. سمعت راجوا لاتنزل شي ..
انوار فتحت عيونها بصدمه .. والكل ضحك
بعد ما وصلوا وريحوا بعد ساعه تقريبا .. الكل تجمع بالصاله ..
بومحمد : يلا اللحين راح وقت الضحك والسفر والتمشي والوناسه .. جاء وقت الجد .. الحمدلله سافرنا وغيرنا جو .. واستانسنا .. اللي علي سويته .. اللحين ابيكم تجازوني .. وابي مثل ماعطيتكم تعطوني
الكل مستغرب ! يطالعون بعض
بومحمد : يعني مثل مافرحتكم بهالسفره ابيكم اتفرحوني بالنتايج الحلوه ابي تشدون حيلكم .. عشان نسافر بالعطله الجايه احسن من هالسفره بعد
انوار : لالا يبا مانبي نسافر خلاص
ديمه : لا والله ؟؟
انوار : يبا خلاص انا عرفت نفسي اكثر من اسبوعين ما استحمل برى الكويت
ديمه : كيفج انتِ نقطج فبيت خالتي .. احنا نبي نستانس ..
بومحمد استانس يوم شاف ردت فعل ديمه من السفره .. تقبلتها .. وارتاحت منها .. وتغيرت فيها .. وهذا الاهم ..
بومحمد : اللي تبونه بيصير بس لاحد يعصب انا جامعكم مو عشان اقولكم هالكلام .. باجر جدكم مسوي غدا لنا .. ولازم تروحون كلكم تسلمون عليه .. وتسلمون على عمانكم
الكل جاه احباط من سمع هالخبر .. وتغيرت ملامح وجيهم .. مايحبون بيت عمانهم .. لانه ملتقى الاحقاد الدفينه بين العايله .. كانوا يزورون هذاك البيت من عيد لي عيد كواجب .. مع انهم يحبون جدهم حيل .. بس جدهم دايما بمزرعته نادرا ما ينوجد بالبيت واذا كان بالبيت دايما بالدوانيه مع اعياله .. وعمهم محسن ساكن بنفس البيت .. هذا اللي مكرههم بالبيت نفسه ..
ديمه : بس يبا ....
سكتت ديمه مالقت عذر لتجنبها الروحه هذي ..
بومحمد : هذا جدكم وتراه مشتاقلكم من زمان ماشفتوه .. ولازم تسلمون على عمانكم .. يلا انا بروح انام .. تصبحون على خير ..
راح ابوهم وضلوا كلهم مع امهم
محمد : افف الله يعيني باجر
ام محمد : ماراح تخسرون شي اذا زرتوا عمانكم .. تغدوا وردوا
ديمه : بس يما اذا انتِ مو معانا ماتدرين شلون يعاملونا
ام محمد : مايخالف ديوم حبيبتي استحملي هذول اهلج وبعدين كلها غدا وتردون
محمد : مشكله.... الوحيد اللي استصيغه منهم جراح .. والحين سافر اففف بس
ميشو : انا ابي البس اللي شريته من ديزني واقهر نوره الخايسه
ام محمد ماتت من الضحك : شوفي لازم تاخذين لها هديه .. وعطيها عروسه من جنطتج الكبيره
ميشو : لالالالالا والله ؟ اعطيها وهي دايما تطقني وتخليني ابجي ؟؟ لالا انا بقهرها وبوريها عروستي .. واقول لها انتِ ماعندج مثلها حررررره
ديمه : هههههههه حتى الجهال تعلموا المجاور !
انوار : عاد انا اللي مشتهيه هالروحه من زماااااااااااااان .. وابي مها مرت عمي تكون موجوده
الكل التفت عليها .. باستغراب
ام محمد: ليش؟؟ شناويه عيه ؟
انوار : خلوها علي .. وبس
ام محمد : أي عشان ايقولون امكم ماعرفت اتربيكم !!
انوار : تنقص لسانه اللي بيجيب سيرتج جدامي بالشينه
ديمه قامت تعبت من سيره عمانها ومشاكلهم كل روحه لهم لازم ينولد قبلها التذمر .. ! راحت غرفتها وصكت عليها الباب .. وابتسمت غصباً عنها .. لازم تمنع نفسها من التفكير بأي شي بيتعسها .. اهي اصلا مو هامها روحه بيت عمانها من الاساس .. لان مشاكلهم كلها ماهمتها ابدا .. احقاد دفينه مستعمره قلوب سوده .. اهي مالها أي علاقه .. لكن خوفها ينفتح الجرح مره ثانيه .. وتتذكر عمها مبارك .. خصوصا انها كل ما زارتهم تقعد فتره طويله بغرفته .. وهي الوحيده اللي تملك مفتاح غرفته من بعد مامات .. واطلبت منهم ما يغيرون أي شي بغرفته وكأنه موجود فيها .. فالسنوات الاخيره كان بيت عمانها بالنسبه لها الملجأ الوحيد اللي تفكر فيه اذا حست بتعب او ضيقه .. تلجأ لاقرب الناس لها عمها .. لكن راح عمها .. وانتهى دوره بحياتها .. غصبٍ عنها عاشت صدمه غيابه لفتره طويله .. لكن اليوم .. كل اللي تعلمته من هالسفره .. ماراح يبين مفعوله ولا راح اتعرف انها تغيرت الا لين تدخل غرفه عمها ... هل بتنهار مثل كل مره تدخلها ؟ وتشم فيها ريحت ملابسه وتقلب البوم الصور اللي تحمل اروع الذكريات .. !! هالشي الوحيد اللي معيشها بقلق .. لكن .. رغم كل هالافكار ابتسمت وحاولت تغير مجريات اهتمامها .. وراحت شغلت الكمبيوتر .. وشبكت عالنت .. ودخلت ايميلاتها .. وكانوا فوق 30 ايميل .. وقرتهم كلهم وحذفت اللي ماتبيه .. ودخلت المنتدى .. وردت لقسمها وتذكرت انها ابتعدت عن الخواطر حيل بهالفتره .. ولو انها كانت بحاجه لها .. وكتبت بقسم الترحيب موضوع بعودتها .. والكل رحب فيها وخصوصا انها عضوه الكل يحب وجودها .. ماكانت اتخلي موضوع صغير او كبير الا وتعطيه اهميته .. وبعد مرورها على اغلب الاقسام لفت انتباها قسم الرياضه والشباب .. وافتحته .. وكان المووضوع المثبت عن الدوري المقام بفرنسا واخبار الاعبين .. ابتسمت اول ما شافته .. يعني من هني بتعرف اخباااااره !! وابتسمت بفرح ورجعت بكرسيها لي ورى وكانت حاطه ايدها على وجهها .. مو مصدقه ! انها تقدر اتعرف اخبار الدوري على الاقل .. وتطمن عليه .. لانهم يحطون كل مباراه وتفاصيلها والالعبين اللي انصابوا واللي خذوا كروت حمراء او صفراء .. وكان الموضوع مدعم بالصور .. ادخلت على طول على الموضوع .. وكان محطوط نتيجه اول مباراتين بالدوري .. وشافت ان فريق مشعل تعادل مع الفريق الثاني ... اارتاحت على الاقل ما خسر .. لانه اخر الايام ماكان بالتدريب .. وتذكرت رفيج مشعل ناصر اللي تعب بالفتره اللي كانت اهي بالفندق .. وشافت ان فريقه فاز بنتيجه 1/0 وفرحت له .. شافت انها بدايه حيل ممتازه للفريقين .. لفريق ناصر ومشعل .. وكان ودها تروح وتشوف معنوياته .. ودها توقف معاه بهالوقت مثل ما وقف معاها .. لكن اكتفت بمتابعه اخباره عن بعد .. وكان في عضو منتقد لعب المنتخب .. ويقول مو هذا مستواه .. وان كابتن الفريق كان من الممكن يعطي احسن من جذي .. وكان معصب على الاخر ويقول دام من اول مباراره تعادل ننسى الكاس .. ومن هالكلام .. الغريب ان ديمه هي اللي تكفلت انها اترد عليه .. واستغربت من طريقتها بالرد .. كأنها تدافع عن شي ملكها .. خصوصا وهو كان شاد حيله بالكلام على مشعل لانه اهو كابتن الفريق ..و لانه معروف عنه وحش الكره .. الكل يخاف منه .. بس بهالمباره سوى اداء حلو .. لكن مو هذا هو لعب مشعل الاصلي .. كأنه يمهد لشي .. ودها تقول للعضو .. الا هاللاعب لا تقول عنه شي .. لكن ردت عليه بمنطقيه اكثر .. بعد ماسكرت المنتدى وسكرت الجهاز .. نزلت تحت شافت انوار اتكلم مريم بنت خالتها .. وشافت محمد يساعد ميشو على تركيب بيت الباربي .. وكانت نازله مع فوفو ..
ديمه : شوفوا انا بحط فوفو بالصاله .. وبخلي الخدامه تأكله وتشربه .. مابي احد يرده لي غرفتي ..
ميشو : حمود اسمع ديوم شتقول !!؟ امش امش خلنا ناخذه ونلعب فيه بالحديقه
ديمه : لا ياماما انا قلت بالصاله يعني اذا بتلعبون العبوا هني ..
محمد : احمدي ربج خلتج تلعبين فيه ..
ديمه : يلا تصبحون على خير ..
ردت غرفتها من بعد ما فقدت الامل بأنوار عشان تصك التلفون وتقعد معاها .. راحت ديمه غرفتها ونامت وانهت هاليوم اللي مرّ عليها طـويل .. ابتدى بروما وانتهى بالكويت .. على ثاني يوم الصبح .. الساعه 10
انوار : انتِ ما تشبعين من النوم ؟؟
ديمه : خليني اطلعي وصكي الباب
انوار : الساعه عشر قومي متى يمدينا نلبس ونروح لعماني ؟؟
ديمه : اففففففف مايصير تعفوني من هالروحه ؟
انوار : قومي تراني مشتاقه حق هالروحه من زمان
ديمه وهي تشيل البطانيه عنها وتقوم : ليش بتشوفين قيس بن الملوح !؟
انوار : ليش انا اعرف عيالهم عشان اروح لقيس ! ههههههههههه
ديمه : خلاص انوار روحي خلي ريتا تجهز الريوق على ما اتسبح
انوار : انتِ هيه خلصينا شكلج بتطولين علينا مابي ابوي يعصب
ديمه : انتوا تبوني اروح خلاص بروح بس فارقي عني
انوار : ههههههههههههه اتعب على النفسيه من اولها
ديمه تبتسم بعبط : انوار روحي دام النفس طيبه
انوار : زين بس ابيج تلبيس من بدلات باريس عشان نقهر مرت عمي وبناتها
ديمه : لا بدلات باريس كلهم بالجناط وانا لالحين مافجيتهم .. بلبس من اللي بالكبت
انوار : مالت عليج ماتشجعين
ديمه : ترى اقصااها بيت عماني
انوار : انزين اف منج خلصي انا بروح احط مكياج
ديمه : لا وصيج زيدي الجيله
انوار : هههههههههههههه انا بطبق اللي تعلمته هناك من قناه فاشن
ديمه : طبقي وخبصي لا وصيج
طلعت انوار من الغرفه وهي متحمسه تحب حركات الجوار وتحب تقهر الناس اللي مايحبونها .. وهالشي كله بتشوفه اليوم .. وهذا اللي هي تبيه
بعد مرور نص ساعه .. تواجدوا كلهم بالصـاله ينطرون ابوهم ..
انوار : هاه شرايج ؟
ديمه : حلو لون الشدو هادي ان الا هاللون ماعرف اضبطه
انوار : يعني مرتب ؟
ديمه : أي والله توقعتج بتخبصين !
انوار : لا شدعوه ههههههههه
ديمه : وينها ريتا سنه تسوي ريوق
انوار : يما عمرها طويل كاهي وصلت ..
قعدت ديمه تتريق .. عصير برتقال وكرواسون .. ونزل ابوهم من غرفته .. لابس دشداشته وغتره وعقال وكاشخ وريحة العطر غطت المكان
محمد : وااااااو يبا واخيرا عدنا للدشداشه ..
بومحمد : ههههههههههه مشتاق لها اسبوعين كلا بناطيل وخرابيط
محمد : أي بعد تغيير
بومحمد قعد : هاه جاهزين ؟
ويلتفت الا يشوف انوار
بومحمد : اوووووه شهالقمر اللي قاعد عندي ؟؟
انوار : يبا لا تمدح ترى اقط نفسي بالدريشه
بومحمد : ماشاء الله مدري احس انج متغيره ؟؟ والا يتراولي
ديمه : أي يبا حاطه مكياج
بومحمد : وانا اقول بنتي محلوه
انوار : الله يجبر بخاطرك
بومحمد : ديمه وانتِ ليش ماسويتي مثلها بتروحين زياره لعمانج لازم تكشخين ..
ديمه : ماحب هالخرابيط .. احب كل شي على طبيعته
بومحمد : كيفج لا تنقهرين لي قالوا بنات عمج ان انوار احلى منج
ديمه : لا تكفى اذا قالوها بموت
انوار : ههههههههههههههههه حمستوني بروح قبل لا تخرب الكشخه
بومحمد : قوموا لا يسيح الصبغ على وجهها
انوار عصبت : يبااااااااااااا
وقعد يضحك عليها ابوها يحب يقهرها .. ويستفزها .. بس الصحيح ان مكياجها حيل ناعم .. حق زياره عاديه ..
وقبل لايطلعون نادت ديمه ريتا خدامتهم وقالت لها تطلع كل الملابس الجديده من الجنطه البيضاء الصغيره والجنطه الكبيره وتصففهم بالكبت وترتبهم ..
بعد ما وصلوا بيت جدهم ..
دخل ابوهم الدوانيه مع محمد .. وانوار وديمه وميشو راحوا صوب باب الحريم .. وشوي الا فتحت الباب الخدامه .. ودخلتهم صاله الضيوف .. وشافوا مها مرت عمهم مع شيخه مرت عمهم يوسف (اللي اصغر من ابوهم) وبناتهم .. وقاموا وسلموا على البنات وبعد حوالي نص ساعه دخل جدهم بو محسن وسلموا عليه وقعدوا معاه .. وراحت شيخه ومها الصاله الثانيه يسولفون وخلوا البنات مع جدهم وابوهم لحالهم ..
بومحسن قعد يسولف مع ولده منصور براحه لان الدوانيه كانت عامره .. وماقدروا ياخذون راحتهم..
بومحسن : ماقلت لي شلون سفرتكم ؟
بومحمد : والله ابشرك زينه ( وطالع ديمه) ومشت الامور تمام
بومحسن : ها يابنات ان شاء الله مستانسين ؟
ديمه : أي والله يبا السفره اتهبل لولا اني خربت على اهلي وضعت
بومحسن : افا شلون ضعتي ؟
ديمه : ههههههه تخيل يبا ولدك سافر روما وخلاني !
بومحسن لف على ولده : صحيح هالكلام ؟
بومحمد : هههههههه أي.. بس ماتصدق من اللي وصلها لنا !
بومحسن : منو ؟
بومحمد : مشعل ولد بو عبدالرحمن
بومحسن : بوعبدالرحمن جارنا !!
التفت ديمه عليهم وقلبها يدق بقوه
بومحمد : ايه
بعدين سكت جدهم .. وشكله سرح شوي .. وعيونه تسترجع قصص شكلها ذكريات الجيره اللي بينهم .. وابتسم
بومحسن : اممم مشعل !! هو رفيج مبارك !؟
بومحمد : أي عليك نور
بومحسن : شفته مع اهله ؟
بومحمد : لا لحاله رايح عنده دوري كره قدم
بومحسن : ماشاء الله .... والله كبرت يا مشعل .. خبري فيه هو مبارك يلعبون بالفريج .. أي صح كان يحب الكره من صغره ... الله يخليه لاهله
وسكت بومحسن .. بعد ما مرّ طيف ولده مبـارك جدام عينه ..
بومحسن غير ّ الموضوع عشان يبعد طيف ضناه من عيونه .. مايبي يحرق قلبه لي تذكر ولده اللي راح بعز شبابه بحادث لنج نتيجه سرعه ورعونه الشباب الطايش اللي ادعموه ..
بومحسن : منو استقبلكم بالمطـارّ ؟
بومحمد : راجوا بعد منو غيره !
بومحسن : والله اني قلت لاَخوانك بس محد منهم فاضي الكل وراه بيت وعيال ومسؤليات
بومحسن كان يبرر تصرف عياله وهو عارف انهم على غلط بس ما يبي يشوه صورتهم جدام احفاده
ديـمه : بس لو كان عمي مبـارك عايش جان استقبلنـا احلى استقـبال
الكل طالعها وسكت ! استغربوا من ردها ..
بومحمد : اصلا ما له داعي احد يستقبلنا .. كنا بحاجه السياره وجابها راجوا ..
بومحسن : يلا الحمدلله المهم استانستوا بهالسفره ..
شوي وراح بومحسن مع ولده الدوانيه .. واصعدت ديمه الطابق العلوي .. وراحت لغرفه كانت دايما تدخلها وتبث فيها همومها .. وعمرها مادخلت البيت هذا الا وهي قاصده تدخل هالغرفه .. واليوم طبعا ماراح تطوف هالفرصه .. وتحس انها مشتاقتلها حيل .. فتره طويله ماشافتها .. من قبل السفر بمده طويله فوق الشهر ..
طلعت من جنطتها مفتاح الغرفه .. ودخلتها .. وكانت ظلماء وشعاع نور بسيط مبين من تحت الدريشه .. فتحت الستاير .. وقفلت الباب وراها .. وخذت نظره على الغرفه من غياب دام عنها اكثر من شهر .. مسكت نفسها .. واقعدت على سريره .. واتحس انها قاعده على شوك .. من كثر ماتحس بإن الجرح مازال ينزف .. بتكون اكبر جذابه بالكره الارضيه اذا نست عمها .. بس الفتره اللي طافت كانت مرحله تغيير تخللتها تناسي للذكريات الحزينه .. لكن هو لا يمكن تنساه .. وخانتها ايدها وفتحت درج الكومندينه .. وطلعت البوم الصور .. وشافت صورته بالثانويه مع ربعه وصوره بكليه الضباط .. وصوره مع ابوه بالمزرعه .. وبالاخير وقفت عند صوره وطولت وهي تتأملها .. كانت صورته وهو يسوق وكانت ملامحه تدل على انه متفاجأ ! ومومتوقع الصوره .. وردت فيها ذاكرتها لهذا اليوم كانت ماسكه الكاميرا وخاشتها بجنطتها .. ومرّ عليهم البيت وسلم على اخوه وقعد وسولف معاهم وقالهم انه بياخذها الجمعيه عشان اخوانها مايقلبونها مناحه وخذا ديمه يمشيها وكانت مو راضيه تطلع مكان .. وكان هو مصر على انه يسوي اللي فباله .. وطلع وداها السينما و شرالها هديه التخرج من الثانويه .. وقبل لا ينزلها البيت قالت له عمي بوريك شي بس لاتتخرع .. وطلعت الكاميرا بسرعه وصورته وهو منصدم.. وكانت احلى صوره .. كان رافع حواجبه ووجهه مندهش .. صكت الالبوم وتحس في شي قاعد ينغرس بصدرها .. ماتبي تتذكر .. اكثر .. ورجعت الالبوم مكانه وهي مازالت متماسكه .. بس يوم راحت لعلاق الملابس .. شافت جم دشداشه معلقه .. وشافت الكاب حق بدله الضباط .. ماقدرت تستحمل اكثر جرت الدشداشه وحطتها على السرير ودفنت فيها وجهها وقعدت تصيح .. خلاص لازم تفرغ كل اللي بقلبها اليوم .. عشان ترتاح .. عشان تدخل مره ثانيه هالغرفه وتطلع بدون دموع .. لازم تصفي حسابها مع ذكرياتها .. لازم تقضي على شعور الضعف عشان تجابه جيوش الذكريات بقوه .. شمت ريحت عطره .. وتلتفت يمين ويسار وكأنها تدور على شي .. اتحس انه بيطلع لها من الحمام والا من غرفه التبديل .. مو معقوله يكون مات ريحه عطره غرفته ملابسه اغراضه سريره صوره كلها حاضره وين صاحبها !! صعبه تتعلق بإنسان لمده 6 سنين بالاخير يروح منك بلمح البصر بفاجعه .. وتقعد انت تقلب ذكرياتك معاه وانت فمكانه .. وتذكرت هالسفره اللي كانت المفروض تنسياها اياه طلعت صدمه لها لانها حبت انسان كان الاقرب لعمها وكان يتشابه معاه بالصفات بعد ماطلعت ديمه كل اللي فقلبها وحست انها بدت ترتاح طق الباب كذا مره .. لكن ماكانت تجاوب خافت تكون مرت عمها ماتبيها تشوفها بهالحاله .. بس بالاخير كانت انوار ..
ديمه : شتبين ؟
انوار :عفيه فجي الباب بسرررعه
ديمه : تعالي بعدين الحين ماقدر
انوار : بسررررررعه مو قته انتِ فجي
ديمه : افف زين
دشت انوار الغرفه وتفاجأت بشكل ديمه .. شكلها باجيه ومطلعه كل اللي بقلبها ..
انوار : رحتي وخليتيني مع رهف وابتسام !!
ديمه : مو انتِ مشتاقتلهم ؟
انوار : يخسون اشتاقلهم .. ماتشوفين كل وحده منهم ماده بوزها .. جني بايقه حلالهم !!
ديمه بضعف : انوار انا تعبانه أجلي كل مناقشاتج الحين انتِ شتبين !
انوار شافت شكل اختها وكسرت خاطرها ماتبي ديمه تخرب كل الي سوته بالفتره الاخيره ..
انوار : انتِ ليش بتخربين كل اللي سويتيه ؟
ديمه : آه يا انوار خليني اطلع اللي بقلبي يمكن هذي اخر مره ..
انوار : ليش تبجين !
ديمه : انوار لو تحسين بالعذاب اللي انا فيه ماتكلمتي
انوار : شنو ؟؟ بليز تكلمي
ديمه : يوم جيت بنساه تعلقت فيه لكن بصوره ثانيه
انوار : يعني !! وضحي !!
وبجت ديمه بصوت اعلى
انوار : مشعل !؟
ديمه : محتاجته يا انوار ابي وقفته معاي ... انوار مابي اقص عليج واقولج نسييته ماقدر مشتاقتله والله ... هو الوحيد الي حاس فيني .. لانه هو اللي عاش معاه .. وحاس بمعاناتي ...... انوار انا احبه (وتبجي ) مو بيدي والله مو بيدي ...
انوار : اوكي مومشكله اذا انتِ موقادره تنسينه خليه هو على صوب .. الاهم انج تصلحين وضعج الحين مو معقوله بتمين متعلقه بطيف انسان مات
ديمه : اهو مو أي انسان
انوار : حتى لو منو ماكان .. لازم تتخطين هالمرحله
ديمه تلتفت : انوار روحي شوفي غرفه التبديل يمكن قاعد فيها ومنخش عنا طول هالفتره !
انوار : صلي على النبي لالالا ياديمه مابيج ترجعين لذيج الايام
ديمه : ولا انا ابي ارجعلها ... بس قلبي يعورني .... كل اللي احبهم راحوا .... راحوا عني
انوار : انتِ قويه وبتتخطين هالمرحله صح! (وتهز اختها ) صح ؟ اوعديني !
ديمه تبتسم والدموع تصب من عيونها : بتخطاها اوعدج
انوار : ايييي هذي اختي ديوم
ديمه غمضت لين حست براحه خلاص من هني لازم تبدي تخطي اول خطوه للتغير .. لازم من هالمكان تنهي الصراع اللي عاشته مده طويله ..
انوار : خلاص ديمه روحي غسلي وجهج ..
قامت ديمه ودخلت الحمام ... وكانت انوار قاعده على السرير .. وشوي سمعت الباب ينطق مع انه مفتوح ودخل واحد طويل شوي واسمر وملامحه حاده وكلشي فيه ينطق بالغرور ..!
مشاري : السلام عليكم
لفت عليه انوار وردت السلام وشافته باستغراب يعني ليش داخل الغرفه ! مع انه كان على الباب
مشاري : انا استغربت شفت غرفة عمي مبارك مفتوحه ! فا جيت اشوف منو داخل
انوار : ااها
مشاري : انتِ من بنات عمي منصور ؟
انوار : أي
مشاري : ماشاء الله مادري ان عنده بنات كبار
انوار : أي من الوصل
مشاري استغرب من عفويتها لانها قطت هالكلمه لاارادياً
مشاري بنظره فوق تحت : انتِ ديمه !؟
انوار : لا اختها
مشاري : أي صح انتوا توكم جايين من باريس وروما ها شلون سفرتكم ؟
انوار : ليش ماتدري ان اليوم فبيتكم في غدا لنا !!؟
مشاري : مادري انا توني قايم من النوم بعد شوي بطلع
انوار : خوش وعمك اللي ماشفته من اسبوعين ؟
مشاري : عادي امر عليه اسلم بس شغلي ما يتأجل
انوار : امممم
دخلت عليهم ديمه وشافت مشاري وسلمت عليه
مشاري : ها ديمه شلون السفره ؟
انوار : ديمه تعبانه شوي تقدر تروح لشغلك اللي ما يتأجل !
انقهر من حركتها .. وطالعها فوق تحت
مشاري : لا افا عليج كل شي لعيون بنات عمي يتأجل
ديمه : انزل تحت عندكم ناس بالدوانيه
مشاري : انا انزل متى ما ابي عادي اليبت بيتي
انوار : عشتوووا
مشاري انقهر: الا ماقلتيلي انتِ شسمج ؟
ديمه : اسمها انوار
مشاري باستفزاز: عاشت الاسامي ! الاماقلتوا لي شخبار امكم ماجات معاكم !!
سأل هالسؤال وكانت نظرته خبيثه .. وكأنه يتطنز انه هو وامه قدروا ينبذون امهم من البيت
انوار : اتعرف امي توها جايه من السفر ومغيره جوو .. ونصحها الدكتور ما تطلع لان الميكروبات منتشره بالجوو .. اتعرف اهم ماعلى الانسان صحته .. فا نصحناها تقعد بالبيت عشان ما تتأزم حالتها
مشاري طالعها والشرار يطير من عيونه ..
مشاري : ميكروبات هاه !!!
ديمه كانت تنظف الغرفه وهم يتكلمون .. وبعد ماخلصت
ديمه : لو سمحتوا ممكن تطلعون لاني بقفل الغرفه وانزل تحت
مشاري : وبعدين انتِ تعالي من عطاج الحق تاخذين مفتاح الغرفه ؟؟
ديمه : نعم !!
مشاري : انا هالغرفه ابيها بهدمها على غرفتي عشان تتوسع ..
انوار : ههههههههههه
طلعتهم ديمه بسرعه وقفلت الباب وهي متنرفزه من هالمشاري اللي على باله انه الكل بالكل بالبيت !
ديمه : يصير خير ....... يصير خير
نزل مشاري تحت وسيدا ركب سيارته وطلع .. اما البنات نزلوا تحت وتغدوا .. وبعد الغدا قعدوا كلهم بالصاله ..
مها تكلم ديمه وانوار : بنات ماشفتوا مشاري ؟ فوق ؟
ديمه : أي خالتي فوق سلم علينا ونزل
مها : وين راح ماشفته اليوم ولا سلم علي
انوار : يقول عنده شغل ضروري ما يتأجل حتى ابوي ماسلم عليه !
مها : بعد عمري ولدي ماعنده عزايم وخرابيط مواضب بشغله ..
انوار : بس الاصول اصول
مها : شقصدج ان ولدي مايعرف الاصول ؟!
انوار : والله اللي شاف حركته اليوم بيجاوبج على السؤال
مها : حبيبتي محد بيرز هالعايله الا ولدي .. وبيجي اليوم اللي انتوا بتتعلمون منه الاصول
انوار : هههههههههه كُـلي شوق لهاليوم
ديمه : خالتي صج مشاري بياخذ غرفه عمي مبارك ؟
مها : ليش اهو قال هالكلام ؟
ديمه : أي
مها : اجل خلاص دام خاطره فيها خله ياخذها
ديمه : لا ماياخذها ... هالغرفه مو من حقه
مها : الحي ابقى من الميت
ديمه : عمي مات والا حيا هالغرفه بتضل مكانها وما يتحرك منها شي
مها : اهو بيتج عشان تتحكمين فيه ؟
ديمه : أي بيت جدي
مها : انا ماشرهه عليج أنتِ انسانه معقـده نفسيــا ً !
ديمه : لي الشرف ..
مها : اعوذ بالله كل وحده لسانها اطول منها .. بعد شقول تربيه حصه !
انوار : شوفي لا تغلطين .. لولا احترامنا لهالمجلس اللي احنا فيه جان ردينا عليج .. فا احسن لج احترمي على الاقل هالمكان اللي انتِ فيه
مها : اففف امشي شيخه خلينا نصعد فوق احس بكتمه على صدري
راحت شيخه معاها .. وقعدوا البنات وهم خلاص واصله معاهم ودهم يروحون البيت .. بس شوي الا دخلوا عليهم عمانهم يوسف ومحسن وجدهم مع ابوهم سلموا عليهم البنات وقعدوا
يوسف : ماشاء الله اشوف بناتك يامنصور محلوين بعد السفره
ديمه تقرص انوار وتهمس لها : بين مفعول التخبيص اللي بوجهج
انوار ترد عليها: هههههههههه زين الحمدلله طلعت منهم كلمه حلوه تجبر خواطرنا
ديمه : تسلم عمي كلك نظر
محسن كان قاعد وله هيبه غريبه .. واللي يقعد بالمكان اللي هو فيه غصبن عنه يقعد عدل ويحاسب على اللي يقوله .. وتقاطيب وجهه كانت مثل مشاري ولده بالضبط .. فيه نوع من الغرور .. او خلنا نقول الثقه الزايده ..
منصور يكلم محسن : وين عيالك ؟
محسن : الصغير مسافر والكبير مادري وين ذالف ..
انوار : سلم علينا وطلع قال وراه شغل ضروري
محسن : آيا الهيس يعني جنه مايدري ان في غدا !!
انوار : لاعمي يدري بس يقول بسلم على عمي بأي وقت لكن شغلي ما يتأجل
محسن : انا شايل ايدي منه تصرفاته تنرفزني .... امه هي اللي متكفله فيه
منصور يهدي الوضع : معذور يمكن الولد صاج وراه شغل .. وبعدين ماني غريب انا عمه وكل يوم انا عندكم بالدوانيه ... بيشوفني ..
محسن : ماعلينا ... منصور لا تنسى باجر تمرني بالشركه .. ترى عندي مناقصتين خاشهم لشركتك .. لاني عارف انها بتطير منك وانت مسافر فا تكفلت انا فيها .. باجر مّر اخذهم
منصور : لا زين اشوى ... وانا قلت شكل السوق راكد ..
محسن: هو راكد مافي كلام لكن اخوك ماسك السوق من اوله لي اخره ..
منصور : مايبيلها كلام ..
محسن راعي شركات تجاريه .. وكان له اسم كبيرر بالسوق ... وكلمته لها هيبه ... وكان من كبار التجار ... والمناقصات اول ماترسي ترسي على شركته ... وكان مضبط شغله مع الكل وبما ان اخوه منصور مستغل بشركه بروحه ومكون نفسه بنفسه .. كانت له شركه متوسطه .. لكن فيها شغل .. وبادي بالسوق من جم سنه .. لكن كان محسن له دور كبير بنجاحه ... واستند على اسمه بالسوق ..
بومحسن : يا منصور بناتك ابيهم كل خميس عندي
ديمه : يبا اصلا انا ماراح اجيكم بعد اليوم
بومحسن : افااااااا ليش ؟
ديمه : مشاري ناوي يهدم غرفه عمي مبارك ويفتحها على غرفته
بومحسن : يخسي الا هو محد يمد ايده على غرفة ولدي وانا حي
ديمه : صج يبا؟
بومحسن : أي يابنتي و مشاري هذا ماعليج منه ... بس يحب يرز عمره بكل مكان (وطالع محسن) ويبيله من يكسر خشمه
انوار : ههههههههه أي والله
منصور طالع انوار معصب .. وهي سكتت
بعد فتره طلعوا من بيت جدهم .. بعد ماوعدوه ان الخميس الجاي بيكونون عنده .. ولو ان ديمه وانوار ماودهم بهالشي .. لكن بالاخير ابوهم اقنعهم لان بهاليوم ماراح يكون في احد بالبيت .. مها وبناتها بتكون عند اهلها .. وشيخه مرت يوسف وبناتها ماتجي الخميس لان الخميس زوارت اهلها .. فا ارتاحوا البنات من هالناحيه .. ووافقوا .. اهم شي جدهم بيجون يسلمون عليه
بعد ثلاث ايام ..
كانت ديمه قاعده على النت ... وكالعاده اول شي تدخل قسمها قسم الشعر والخواطر الادبيه .. ولفت انتباها موضوع جديد .. كان مرثيه بنت اخت طلال الرشيد بخالها ..
لا اعلم من ارثي00
أرثي طلال الشاعر
أرثي طلال الانسان
أرثي طلال الامير
أرثي طلال الخال
أم ارثي الدنيا ومن عليها00
وهل للدنيا طعم عقب فراقك؟
رحلت صائما معتمرا معتكفا في ارض الله الطاهره0
رحلت وتركت الناس يبكون ويجزعون00
رحت والناس تبكي
رحلت والشعر يحكي
عن شجاعتك وفروسيتك وعظمتك ونبلك وشهامتك وعظمتك0
خالي طلال00
الـحـروف عـقـام والـكـلـمـات سـٌقـام فـي رثـائـك
النفـوس مـفـجـوعـه والـقـلـوب مـوجـوعه في بكـائـك
خالي طلال00
برحيك رحلت انا
ولم يبقى مني الا ذكرياتي معك0
خالي طلال00
أجـيئك مدججا بكل ابجديات الرثاء
التي سودت مراثينا00
أجيئك بكل لغات الكون جماده وحيوانه وانسانه
ابكي على موتك كل البكاء
ابكيك كقبله عطر مامست جبين احد مثلك
قبلك ولا بعدك00
أجيئك يافيئي ويامطري
باكيا منشدا00
لمن تتبرج ساعات افراحنا؟
ياكل افراحنا وانسنا
ولمن نبتاع الدنيا
بعد رحيلك عنا؟
ولمن نكتب الشعر والقوافي
ياقائل الشعر فنا؟
أنبكيك00ام فيك
نبكي انفسنا؟
بغيابك النهائي
تغيب شموس نهارنا
واقمار ليلنا
وندى ثرانا
وخصب اوقاتنا
وبغيابك00
تغلق الطرقات منافذها
وتفيض مياه انهارنا
وينهزم الصوت في صوتنا
برحيلك00
ترحل البسمه
وتاتي الدمعه
ترحل العذوبه والنقاء والصفاء
وتحتوينا ملوحه الزمن المر
برحيلك00
ترحل كل قوامس الحياه والبهجه
ويبقى لنا بؤس الحياه00
لقد كبرنا على ذلك النداء الخالد "خالي"
هذه المفرده التي تربينا عليها منذالطفوله
لمن نقولها اليوم؟
غابت بغيابك
ورحلت برحيلك.
لقد كنت فاصله بيضاء وطاهره في حياتنا0
يادمعتي ارثي طلال برحيله000وارجي له الغفران من عند مـولاه
يارب من غيرك برتجي له000في رحمه اللـي ماتحملـت فرقـاه
من موتته يارب نفسي عليله000راضي لكن حكم الاقـدار iiماقسـاه
اخفي هموم القلب لو هي ثقيله000ياقوي صبر القلب عليـه ياقـواه
ياناس كن الكبد فيها مليله000من واحـد فـي ايـام العيـد iiفقدنـاه
ياناس راح اليوم راعي الجميله000الله يعين القلب على كبر iiبلـواه
ياعل روحه في جنانك نزيله000ياخالقـي تكـرم مقامـه iiومثـوااه
اللي زرع دروب الفضيله000وعلمني ارضي خالق الكون iiواخشااه
وعلمني امشي في الدروب النبيله000وخلاني اتبع في حياتي سجاياه
دايم عيوني في خياله تخيله000في كل نظره وين مـااروح iiالقـااااه
ابكيه انا وتبكيه كل القبيله000وجاره ومن قام يعرفـه قـام iiينعـاااه
كم شيخ صارت دموعه هميله000ويجاوب الونات من حر iiماجـااه
ومن جا يعزيني بفرقا خليله000ربي عساه من الصواديـف iiتاقـااه
مرحوم ياشيخ يمينه طويله000ليت القدر خذانـي بدالـه iiوخـلاااه
الموت حق وكلنا نستـوي له00ولابـد مـن يـوم تجينـاا iiمطايـاه
يالله طلبتك يامنجي دخيله0000انـك تخلـي جنـه الخلـد iiمـااوااه
يالله طلبتك يامنجي دخيله0000انك تخلي جنه الخلد مااوااه
من بعد ماقرت ديمه المرثيه غصبن عنها بجت وحست ان الدموع حـــاره على خدها ... حست بإن اللي كاتبه المرثيه قاعده تعيش معاناتها اللي استمرت جم شهر ... شافت ان مو بس اهي اللي يعيش هالصدمه .. الكل تصير معاه .... الكل يفقد الغالي فجأه .. بفاجعه ... خلاص عادي هذي الدنيا لازم نتحملها بمرارتها وبحلاوتها ... بس اللي ريحها ان البنت طلعت كل اللي بقلبها بالشعر بهالقصيده المرثيه .. ااما هي شعندها ترثي عمها ؟ بدموعها .. والا بخواطرها الي توئد عند ميلادها .. مسحت دموعها وردت على المرثيه وطلبت له الرحمه ... وبعد ما صكت قسمها راحت قسم الرياضه والشباب .. وفتحت الموضوع المثبت عن الدوري المقام بفرنسا ... كانت مشتاقه تسمع اخباره الايام اللي طافت ماكانت عنده أي مباراه .. امس كانت مباراته .. ودخلت بتشوف النتيجه .. طلعت 3/1 لفريق مشعل .. استااااانست من قلب .. يعني رجع مشعل الاولي ... مشعل اللي مصخر فريق كامل وهو يلعب معاهم بحديقه الفندق ... اهي شافت لعبه ... كان موهوب ومحترف .... فا هذا اللي خلاها ترد على اللي كان منتقد لعب مشعل ... وردت عليه وقالت هذا هو منتخبنا مباراته الاولى كانت الهدوء قبل العاصفه ... و كانت تحس بفرحه كبيره ... وبعد ما صكت النت .. انزلت تحت شافت انوار ماسكه التلفون وشكل عندها سالفه خطيره .. كانت تقشر حب ومشغله التلفزيون وتقرق على التلفون ... ديمه اللي سوته انها قعدت معاها تشوف التلفزيون ..
انوار تكلم : صج والله ؟ يعني خلاص اسبوع وتبدى الدوامات !
انفال : خلاص وبعدين ابي اشوفج اول يوم الدوام بوريج شييييي عجيييييييييب
انوار : انفاااااالوا والله اذبحج تدرين انا طفارتي الفضول .. لا تقهريني قولي شنو ؟
انفــال : تذكرين المطرب عويشق اللي اقولج عنه راعي سمرات
انوار : اممممم أي واحد ؟
انفـال : يوه اللي مأذيتج فيه انا .. اللي ينزل اغانيه مع منوعات مع مطربين كبار وهو اللي ينتج البوماته
انوار : اييييي اللي تقوليلي ودج تشوفين شكله !
انفال : عليييييييييج نور ... شفتـــــــــه
انوار : جذابه ؟ شلون هو ماينزل صوره بألبومات
انفــال : اسكتي انا دايما اعطي اخوي اهو اللي يشتري لي اشرطته انزين فا ذاك اليوم داش مستانس يقولي عندي لج خبر يونسج .. طلع الاخو رايح وحده من سمراته ومصوره بلوتوث مع مطرب معروف وهو يدق العووووووووووود ... والله ماتخيلته جذي .. تخيلته طووووووويل وابيض بس طلع العكس اسمر ومو ذاك الطول بس ملامحه حلوووه ..
انوار : جذاااااااابه هذا الي ذابحتني عليه ابي اشووفه تكفين
انفــال : مو عشان جذي ابي اشوفج اول يوم دوام عشان اوريج اياه
انوار : واو وناسه مره سمعتيني اغنيه له عجيبه ..
انفـال: اسكتي انا متحطمه بصوته .. اخوي المسكين كل ماعرف عنه شي يجي يقولي حاس فيني ههههههههه
انوار : يدري فيج انج عاهه
انفـال: انزين لاتنسين تجيبين هديتي معاج مالت باريس
انوار : هههههههههههههه حسافه كنت ابيج تنسين عشان اخذها لي
انفال : ههههههههه لاوالله ماانسى انا
انوار : لو باريس يبيعون اشرطه عويشق جان جبته لج
انفال : ههههههههههه لامشكوره بس هو مالت عليه لو عنده حفلات جان رحت له
انوار : اسكتي انا شفت حفله محمد عبده كنت بحن بروح لها بس ادري انهم ماراح يرضون
انفـال: نفس المصير انا جتني فكره اتنكر والبس غتره واتلثم فيها واروح مع اخوي سمرات عويشق ..
انوار : ههههههههههههههههههه يخرب بيتج اقول خلي منج هالافكار لاتودينا بداهيه
انفـال : هههههههههه لا تخافين ماتنفذت .. اسمعي خالتي اللحين بتجي يلا تشاو
انوار : تشاوات نلتقي بالجامعه
انفال: أي اكييييد يلا فمان الله
وصكت التلفون .. وانوار مستانسه انها خلاص بتبدا الدراسه .. وبتبدا سنه جديده .. ومرحله جديده .. الجامعه ... ومستانسه ان معظم رفيجاتها معاها ...
ديمه : خلاص شبعتي هذره ؟؟
انوار : أي
ديمه : منو هذا عويشق !؟
انوار : هذا مطرب راعي سمرات انفال مأذيتني عليه
ديمه : اممم انزين مريوم ماراح تجينا !؟
انوار : أي ذكرتيني مادقيت عليها
ديمه : اففففففففف انتِ وبعدين مع هالتلفون .. !
انوار : بعد عطله .. شسوي
ديمه : انا زهقانه !
انوار صكت التلفون .. : لقيتها
ديمه : شنو؟
انوار : نشغل شريط باريس
ديمه الفرحه على وجهها : عندج واير الكاميرا ؟
انوار : افا عليييييييج عندي وانا ام هندي
راحت ديمه ركض تجيب الشريط .. وراحت انوار تجيب الواير .. وشغلوا الشريط وقعدوا يتابعون ..
بعد فتره .. انضمت لهم ميشوو .. وقعدت تطالع براءه .. وتحس كل هالاشياء شافتهم بس ماتدري وين !
ميشو : مشـــــــــأأأأأأأأأأل حبيبي
انوار : ههههههههههههه أي والله كاهو مشعل طلع
ديمه : عيدي عيدي
انوار : الشريط طويل وين اعيد خلي اذا خلصنا نعيده
ديمه : عفيه الله يعافيج عيدي
انوار بعد توسل ديمه عادت لقطه مشعل .. كان شايل ميشوو وهي تبجي .. من بعد ما صكرت ديمه عليها الباب وكان موديها محل العاب .. واللي مصورهم محمد .. واللقطه الثانيه كانت ميشوو متعلقه بمشعل وتلعب بشعره وهو متأذي منها وكل شوي ينزل ايدها من شعره .. لانها كانت تحوس بشعره لين صار شكله يضحك وهذا اللي خلا محمد يصوره ..
وطول ما كانوا يطالعون كانت ديمه مبتسمه ... اهي كانت بسعاده اهي مو حاسه فيها .. اهي كانت مع مشعل .. اهي كانت تحب مشعل بس اهي مو حاسه .. ما اكتشفت هالشي الا مؤخرا ..
انوار طفت الفيديوا بعد ماخلص الشريط ..
انوار : تعالي انتِ مصوره بتلفونج .. صح !
ديمه : أي ذكرتيني .. بنزلهم على الكمبيوتر .. تعالي تجين معاي !
انوار : افا عليج اجي قبلج
وراحوا كلهم ديمه تنزل كل الصور اللي مصورتها بتلفونها على الجهاز .. وخلت انوار تنقي لها احلى الصور عشان تنزلها .. واختاروا احسن عشرين صوره .. ورفعتهم ديمه على موقع المنتدى ونزلتهم
انوار : واو امانه اذا ردوا عليج قوليلي ..
ديمه : اوكي انزين تعالي اليوم لازم نروح لبيت عماني !
انوار : اففف لاتجيبن هالطاري اتنرفز
ديمه : احنا اهم شي عندنا جدي والباقي بطقاق
انوار : اف زين خلاص بعد صلاه المغرب البسي .. بنخلي ابوي يقطنا
ديمه : اوكي
بهالوقت فباريس .. كان مشعل قاعد بغرفته والجو ممطر .. وفاتح الدريشه ..ويشوف الجو وباله ابدا مو معاه ... كان يفكر فيها .. اتركت فراغ كبير بحياته .. حاول ضغط على نفسه يستحمل غيابها لكن اليوم ماقدر ماقدر حاس انه وده يصرخ بصوت عالي في شي بصدره مكبوت ... يبي يتطمن عليها .. يبي يعـرف احوالها ... بروحه بعيد عن اهله .. وحس اللحين انه بعيد من روحه ... بعيد عن قلبه ...... ديمه راحت واسلبت قلبه معاه ... حس بتعب فضيع ... بغربه ... وده يحجز اقرب رحله ويطير الكويت .. على الاقل ايحس انها بهالمكان بهالديره .. موجوده يتطمن عليها .. بس اهو جاي هني يكمل حلمه ... يبي يوصل للعالميه ... يبي يرفع راس ديرته .... بيسوي كل اللي عليه ... وقعد على الكرسي اللي قبال الدريشه .. وفتح الورقه .. وقراها من جديد ... قرى الخواطر ... وفتح تلفونه وشاف صور ميشوو وحمود وابوها .. وابتسم وهو يتذكرهم .. حس انه خلاص مايقدر يكمل حياته بدونهم .. وبالاخص بدونها ... فرحه فوزه امس ماقدرت تطغي على حزنه بفراقها .. وكانت المباراه اللي امس اكبر دافع له انه يكمل اللي بداه .. بمستوى عالي .. عشان يخلص من عذابه ويرد ديرته هانت كلها اسبوع واحد بس...
البنات فبيت عمانهم .. دخلهم ابوهم الصاله وراح ينادي ابوه بالدوانيه ..
انوار : ياحلو البيت هدوء
ديمه : اسكتي مالي خلق اشوف النسره
انوار : هههههههه عادي عندي وجودها والعدم واحد
ديمه : ليتني مثلج
شوي الا سمعوا صوت واحد طالع من المطبخ وكان يغني اغنيه مو معروفه .. ولفوا عليه لقوه مشاري .. كان لابس جينز وتي شيرت ..وكاب وكاشخ ..
مشاري : حي الله بنات عمي
ديمه : الله يحيك
مشاري : شلونكم شخبار كم ؟
ديمه : الحمدلله بخير انت شلونك ؟
مشاري : بخير ونعمه .. ( قالها وهو يقلب سويج سيارته الجاكور )
انوار : عسى دوم هالنعمه
مشاري : اوه اوه هذي انوار
حاط نفسه ماشافها .. يبي يستفزها .. لانه يكرهها اهي الوحيده القويه منهم وترد عليه
انوار : أي نعم
مشاري : والله يابنات عمي الكرام ودي اقعد معاكم بس تعرفون البزنس مايخلي احد
انوار : لامشكور مانبي احد يقعد معانا توكل
الا ابوهم وجدهم داخلين الصاله ..
اضطر مشاري انه يقعد عشان جده وعمه بعدين رنّ تلفونه وارتبك وطلع من الصاله يكلم ..
بومحسن : الحين الساعه جم ؟
منصور : 7 ليش يبا ؟
بومحسن : باكل حبوب السكر
منصور : انوار روحي جيبي لجدج ماي
انوار : شمعنى انوار ليش مو ديمه
بومحسن ضحك :اصغر القوم خادمهم
انوار : دام الماي لجدي الحبيب اروح اخر الدنيا اجيب له
منصور : هالبنت عليها كلك !
ديمه : هههههههههههه
راحت انوار تطلع قلاص وفجت الثلاجه وصبت ماي وتوها بتطلع الا تسمع صوت مشاري يتكلم تلفون .. ماقدرت تكبح جماح فضولها .. وسمعت جزء من المكالمه .. بس كان يكلم واحد
مشاري مجمل المكالمه كانت : ( اوكي انا سحبت من رصيد الوالد 8 الاف دينار .. أي أي قلتله بجدد سيارتي .. ابيع هذي واحط عليها هالمبلغ ماعليك بيكفي .. خلاص نلتقي ببنيدر بيومها .. لا تنسى جيبهم معاك بسمعهم ..اوكي يلا تسلم فحفظ الله )
استغربت انوار .. وطلعت من المطبخ بهدوء .. وراحت عطت جدها الماي .. وقعدت تفكر ..
"شهالشغل اللي ببنيدر ؟ وليش بيبع سيارته وقاص على ابوه !! جيبهم معاك بسمعهم !!! شيسمع ! اما امره غريب هالولد !! "
-------------
رد : رحلة عمر رواية رومانسية مثيرة 
