السلام علكيم ورحمة الله وبركاته
حروف متواضعه واتمنى ان ترتقي لذائقتكم الجميله
.
.
.
قالوا جفاك وقلت يجفى بكيفه=انا اتلذذ في المحبه بجفواه
قالوا ذبحك بطعنة الهجر سيفه=قلت اتركوه احيا بطعنات يمناه
ربيع عمري عايشه في خريفه=وعن الشتا تدفى ضلوعي بطرياه
واخيل برق الغيم في عز صيفه=واسقي جذور الحب لاهلّ من ماه
املا نظر عيني ليا حل طيفه=واروي ظما القلب المعنى بذكراه
والله لو قلبي تزايد نزيفه=لسقيه دم عروق قلبي ويفداه
عمرٍ مضى واللي بقى له حليفه=يرخص لجل عينه وفدوه لماطاه
القلب بيت الحب والزين ضيفه=باقصى معاليقي من سنين مركاه
يشب ناره بالضلوع النحيفه=الشوق زنده والاحاسيس تحماه
عيون قلبي في العذارى كفيفه=والله ماشافت مع الناس حلياه
زين البشر قد راح منه النصيفه=مع النبي يوسف وهذي بقاياه
بدر السما لا شع نوره وصيفه=لا والله الا فارق في مزاياه
دلع وخلق وكل ميزه شريفه=من لامني جعل المنايا توطاه
اللي خلق فيه الطبوع العفيفه=اطلب منه جعل المنايا تعداه
ياعاذلين القلب والله ماعيفه=هذا حياة الروح ولقلبي دواه
قالو جفاك وقلت خلوووه كيفه=حلفت باللي زين الكون مانساه
وسلامت قلوبكم
اخوكم
بدر بن تركي العتيبي
بـ قلمي
والله لو قلبي تزايد نزيفه لسقيه دم عروق قلبي ويفداه 
العرض العادي
