السلحفاه والشابوره والوقت المستقطع

[abu_nayef]

السلام عليكم و رحمة الله و بركاته .,.



طبعا هذهـ أول خطوهـ لي بالكتاابهـ هنا في غراامـ .,.


فعزيزي القارئ أنا في هذا الموضوع لا امارس الكتابة الساخرة
ولا استجدي الضحكات لكني اعبر عن شعوري و افكاري الخاصة .,.
لذا إن كنت ترى في أي من هذه الآراء
أي تعدي على الإطار العام لحرية التعبير إطلع برا لو سمحت :(
و إن كنت لا ترى ذلك فالسبب على الأرجح انه انا و انت نشترك
في صفة واحدة .,. فاضين .,.

لكن أولاً شكراً لك على قرائتك للموضوع و تفضلك بالرد .,.
وثانياا جد اذا تعبت نفسك و كملت قراءة الموضوع
بعد هالسطر فانت فاضي فعلاً .,.

اليوم حبيت اغير لون الخط اللي اكتب فيه دايم و اللي مدري وش اسمه بالضبط كل اللي اعرفه انه درجة من درجات الرمااديـ .,.
لكني متأكد ان له اسم متكلف و متعوب عليه
و جلست افكر في لون جديد استخدمه و أنا افكر إكتشفت.,.
انه مو انا بس اللي فاضي بس إلا في ناس فاضية من جد

لدرجة انهم من الفضاوة عينوهم
خبراء ألوان عشان يطلعون اسماء جديدة
للألوان الجديدة اللي غزت العالم و تخيلوا.,.
الأزرق صار له مليون درجة و مليون اسم
و الاخضر و الأصفر و الأحمر كلها صارت درجات و الدرجات صارت درجات الدرجات .,.

أذكر ان زميلي في العمل قبل أسافر
سألني وش تقترح علي أصبغ الإطار الخارجي اللي جاي فوق السور
حق البيت.,.؟.,.
لأنه كان يبني و كان جايب معه كتالوج ألوان
أول ما شفته قلت في نفسي .,.
عشت يا عبدالله لين صار للألوان كتالوج .,.!!,.
الله يرحم يوم كانت 7 ألوان الطيف و ما نقدر نجاوب عليها كاملة في حصة العلوم كله بسبب لون غبي
بين الازرق و البنفسجي دايم انسى اسمه >> اللي يعرفه يذكرني

المهم وراني لون ما عجبني و قلت ما ينفع اصفر >> على باله عنده ذوق .,.
حسيت انه انصدم من رأيي و فكرت انه انصدم عشان اللون ما عجبني
قلت له جد ما عجبني >> يكررها بعد مع وجهه
قال لي هذا مو اصفر ..!
اخذت الكتالوج ادقق .. شكيت ان عندي عمى ألوان و انا ما ادري ..
اللون لاهو أحمر .. ولا برتقالي ..
و الأكيد الأكيد انه مو أزرق ..!
عشان كذا أصريت ..

- إلا اصفر يابووعابد >> احلف
- عبدالله أقول لك مو أصفر .. هذا اللون اسمه "كناري"
- لا تقووول ..!
- جد اكلمك
- بذمتك ..! >> فاهي
- و هذا اللي في الصفحة الثانية اسمه "اصفر ليموني" و اللي هنا هذا "شعاع الشمس"
- إحلف ...! طيب و هذا اللي تحت .. اكيد اسمه "اسنان مدخن"؟
- لا لا .. هذا "صفار بيض" >> مدري ليه حسيت الأقرع يستهبل

لكن وقتها طلعت من هالحوار و أنا مكتئب .. حسيت ان الدنيا معقدة فوق ما تصورت .,.

اللي دعاني لكتابة الموضوع اليوم هو إن واحد ماخذ مقلب فيني .,.
سألني ليش ما نشوفك تشارك قلت لما "أفضى" ان شاء الله .,.
و أجلت الكتابة إلى أن حسيت اني "فاضي"
اليوم و قررت اكتب هالموضوع و المشكلة انه ما كان في بالي
اي فكرة و يمكن لحد الآن مافي بالي أي فكرة لكني اكتب على أمل ان الفكرة تجي و انا اكتب و جا على بالي كذا فكرة بس كل ما قررت ابدأ الكتابة انسى عناصرها .,.

و بصراحة قبل أكتب طلبت رأي كذا واحد من العباقرة
اللي معي عالمسنجر و بدون ذكر أسماء منعاً للفضائح لكن شكلهم ما صدقوا اطلب منهم و كل واحد بدأ يقدم اقتراح. بعد ما سمعت الإقتراحات حمدت ربي إني رجعت لعقلي و إن الغيبوبة المؤقتة اللي خلتني اطلب منهم راحت بعد أول اقتراحين و الحمد لله لإني إكتشفت ان عندي مجموعة من أذكى الأذكياء عالمسنجر

و احد يقول لي اكتب عن العنصرية!

وش عنده الزنجي؟
يعني لو اللي مقترح هالكلام خال كان ممكن اتقبل لكن مقدم الاقتراح غطى على مايكل في البياض مؤخراً

واحد ثاني يقول لي اكتب عن السلاحف!

سلاحف؟ لو قبقب ولا هامور ممكن .. بس سلحفاة .. ما اظن .. مبادئي ما تسمح ..
وش المميز في السلاحف عشان اكتب عنها؟ و من اللي مررره بيتحمس يقرا موضوع عن السلاحف؟
السلاحف مملة هذا أولاً .. و مخلوق يجيب لك النوم لما تشوفه و بالكاد يبدي أي علامة من علامات الحياة إلا إذا كنت تسمي اللحظات القليلة اللي تحرك السلحفاة راسها فيها "حياة" اللي اعرفه عن السلاحف انها تتكي على الشاطئ بدون حركة و الشي الوحيد المميز فيها انها احياناً تسبح >> 10% بالمية من وقتها سباحة و الباقي لا حياة لمن تنادي

و لأني مؤمن بالقضاء و القدر سلمت أمري لله في من استشرت من اللي معي عالمسنجر و قلت لهم اني خلاص اخترت الموضوع عشان بس ما يوصلني اقتراح يقضي علي لأن ضغطي بدأ يرتفع من درجة الغباء اللي ممكن نوصلها أحياناً

عالعموم في النهاية اخذت ورقة و قلم و رحت اجلس عند الطاولة افكر في فكرة موضوع جديد .. و من فضل ربي جتني فكرة

اني لازم أشتري طاولة جديدة ..!

أو على الأقل أصلح رجلها لانه شي مزعج كل ما حطيت يدي عالطاولة مالت على جنب .. مأساة

أذكر اني كنت في مركز الأبحاث اسوي تجربة كيميائية و مرررره مركز مع التفاعل عشان اسجل ملاحظاتي أول بأول ..
و ماشي خطوة بخطوة و وصلت لمرحلة اكتشفت انه ناقصني مركب كيميائي مش موجود في الخزانة اللي عندي بالمعمل لكن موجود في معمل ثاني ..
و انا رايح المعمل الثاني (مسافة 20 متر فقط) صادفني زميلي و سألني اذا كنت اعرف كيف يقدر يسوي استرجاع لإيميل سبق و ارسله
لأن شكله جاب العيد .. يبي يرسل ايميل استهبال لخويه و ارسله بالغلط للسوبرفايزر ..!

شرحت له و ما فهم كالعادة فأجلت شغلي عشانه و رحنا مكتبه و سوينا الإستعادة .. لما طلعت من مكتبه .. نسيت انا وين كنت بروح .. و ليه !!
بعد تفكير لمدة خمس دقائق تذكرت اني كنت اسوي تجربة فقررت ارجع و اكملها .. و لما دخلت المعمل تذكرت اني ما قدرت اكمل عشان المركب الناقص ..
فقررت اروح المعمل الثاني اجيبه .. لما وصلت هناك وقفت 10 ثواني افكر .. انا وش جابني هنا؟
لكن الحمد لله "أبو طلال" زميلي و يعرف حالة "التوهــان" اللي تجيني من وقت للثاني .. قال لي اكيد ناسي ^_^
قلت امممممم ايه >> بتنكر بعد؟
قال انت كنت في معمل الخصائص الفيزيائية تسوي تجربة .. انا مريت عليك و انت هناك ..
قلت الله يذكرك بالشهادة .. صح .. و جاي هنا ابي بتروليوم إيثر ..
قال طيب ليش ما تشوف طبيب بخصوص هالحالة؟
حسيت انه يستهبل في البداية لكنه طلع جاد و بقدرة قادر أقنعني و ثاني يوم أنا في المستشفى >> تحمس
أعطاني الدكتور علاج ..

طبعاً ما نفع .,.

مو لأن العلاج تعبان .. لكن لأنه كان لازم استخدمه 4 مرات في اليوم و بصراحة كان كل ما جاء موعد العلاج و انا مشغول بشي ثاني اقول بعد شوي .. بعد شوي و أؤجل لين يجي الموعد الثاني و هكذا ..
في اغلب الاحيان استخدمه مره كل 3 أيام ..! و في النهاية قررت استسلم للواقع و اتركه ..

القصة هذي حصلت لي من سنتين تقريباً و يومها قررت اكتب موضوع عن النسيان و عن التسويف و تأجيل الأمور و أن كلمة بعدين مفروض نشيلها من قاموسنا ..
كتب بدايته لكن ما كملته .. أجلته و قلت أكمله بعدين ..

أمور كثيرة أجلتها في حياتي .. و ما سويتها للحين ..
مدري شئ جيد ان أجلتها .. ولا شئ سئ .. لكن الشئ الأكيد اني للحين عايش و مبسوط ..!

و نصيحة إذا كنت تبي تتابع برنامج في قناة معينة اضغط رقم القناة و انتقل لها مباشرة لأنك اذا فكرت تمر على القنوات اللي بين القناة اللي تتابعها الآن و القناة اللي تبي توصل لها مراح توصل إلا بعد ما يخلص البرنامج
القنوات المفتوحة حالياً فوق 700 قناة قابلة للزيادة و أكيد بتمر على شئ يعجبك و يؤخرك عن قناتك .. احياناً اسأل نفسي متى صارت هالأمور ..!
و أنا صغير كنت فرحان .,.
و ما كان عندنا ريموت ..! عشان كذا انسى انك تغير القناة إلا إذا انت مرررة مرررررره تكره المذيع اللي طلع في الشاشة .,.

بس في ذاك الوقت كنا أبسط و كان من السهل الواحد يرفه عن نفسه لدرجة انه كنا نشوف أي شي في التلفزيون و يعجبنا .
.برامج الاطفال الغبية كانت تعجبنا و المصارعة كان الكل يتجمع يتابعها .. و الدعايااااات ..
نسنتر عندها نص ساعة .. ساعة .. عادي و مااالووه .. حتى الأفلام بعضها كان غبي لكن كنا نستمتع فيه . اذكر فيلم كان فيه حصان يتكلم ..! اقطع يدي لو احد يشوف فيلم الحين فيه حصان يتكلم .,.

الحياة في ذاك الوقت كانت بطيئة و كل شي كان ياخذ وقته ..
1 كان بعضها 5 دقائق .. من فيكم شاف دعاية لكزس اول ما طلعت؟ كانت نص ساعة إذا مو أكثر ..!
و دعاية السفن أب هذاك اللي مررره مبسووط و فرحااااان .,.
هذاك كان مبسوط بشكل غير طبيعي .,.
والله كنت افرح من قلبي عشانه .. الله يوفقه .. مدري وين راح الحين
لدرجة اني كنت اشتري السفن اب و اشرب .. اشرب .,.
لكن ما حسيت اني مبسوط مثله .. في الاخير قررت اتظاهر اني مبسوط ولا كان صرت مشبع بالسفن أب >> ماخذ الحجم العائلي

لكن على فكرة للحين و اللي يطلعون في الدعايات إغلبهم مبسوطين .. بس المشكلة ان مشاعرهم صارت مضغوطة أكثر و لازم يكونون مبسوطين في 20 ثانية
ما عدا بعض الدعايات اللي بالقوة تخليك تشك في نفسك .. "هل تعاني من الضغوط أو الإكتئاب أو النشاط المفرط؟"

أكيد أعاني ..! لأني حي الله يجزاك خير ..!

من اللي ما عنده ضغوط؟ عادي كوب شاي و انتهى الموضوع ما نحتاج حبوب و أدوية

الشئ الوحيد الإيجابي في التلفزيون هالأيام هو النشرة الجوية ..
خصوصاً لما يطلع لك هذاك الاقرع و يقول لك سيكون الطقس جميلاً جداً في شرق و شمال الجزيرة العربية و كذلك في المنتصف مع بعض السحب الخفيفة في منتصف الليل ..
ولازم تشوف النشرة الجوية بعد الأخبار اللي مليانه دم هالأيام الله يكفينا الشر .. عالأقل تاخذ شحنة ايجابية معك قبل تطلع برا البيت و تروح تقضي مشاويرك ..
خصوصاً ان إيقاع العصر صار سريع جداً بدرجة كبيرة تخليك تحت ضغوط دايمة و المشكلة انك مراح تلاحظ تحت هذا الضغط ان الجو حلو مع هالإيقاع السريع للحياة اللي صرنا نحتاج مساعدة عشان نقدر نجاريه و ينصحونا الأطباء بالإسترخاء عشان نواجه هالضغوط اليومية ..

و أنا بصراحة احب استرخي كل يوم لكن مشكلتي مع الاسترخاء
مشكلة لأني اكون في قمة الهدوء و مسترخي و أبي ابعد كل الافكار السلبية من راسي .. و فجأة .,.

"في قريتنا حب وأمان .. في قريتنا ..
كل منا يعرف اسمه .. في قريتنا ..
و جميع الاطفال لهم بيت .. في قريتنا .,.
و يحب الآباء الأبناء .. في قريتنا ..

الحب مسرّة .. مسرّة .. نعم نعم ..
و الشر مضرّة .. مضرّة .. نعم نعم ..

لكن الصدق الصدق .. الصدق مسرة ..
من اجل الناس الناس الناس الناس ..
من أجل الخير الخير .. لكل الناس .." >> بسمة و عبدو :43:

ودي اطرد هالاغنية من مخي ماني قادر .,.

بصراحة الهدوء التام اختفى نهائياً و صارت الدنيا كلها صجة و ضجة و لجة و الناس كلها تتكلم في نفس الوقت و مع كل هالكلام ما في أحد فعلاً "يسمع" شئ من اللي يقال. حتى لما نقول "كيف حالك" ما نقصد نسأل كيف حالك فعلاً ولا نهتم بحالك هي مجرد كلمة على لساننا و مجاملة و كل اللي نقصده انك ترد علينا بأي كلمة ثانية و روح في طريقك ولا ترد بنفس السؤال تكفى "تمام .. انت كيف حالك؟" .. لأننا مشغولين مررره ..

تعلمنا في هالوقت اننا ما ندخل في محادثة كاملة طبيعية زي ما كان الناس قبلنا يتخاطبون

و السبب؟

أول ما تبدا تكلم واحد يرن جواله ..
و واجب عليك تنتظر لين يخلص و مفروض خلال هالوقت ما ينقطع حبل افكارك ..
و لما تكمل المحادثة مره ثانية يرن جوالك انت

و حتى لما نتكلم بالجوال .. تطلع لنا مشكلة في الارسال احياناً و دايم المشكلة من عندك اما اللي تكلمه ما عنده اي مشكلة و تلقاه مروووح في السالفة و يتكلم و يتكلم وانت حاط اصبعك في اذنك الثانية .. و تأشر للي معك "اششش" .. و تلزق في الشباك ..
بس حلو لما يجلس الإرسال يقطع عالأقل يعطيك إنذار إن الإتصال بينقطع أحسن من تجلس تهذر الله اعلم كم دقيقة بعدين تكتشف انك كنت تكلم نفسك .. و الغريب انه لما تصير لك هالسالفة مررة تجيك عقدة نفسيه ما تحس فيها هالعقدة تخليك لما تكلم
احد مرة ثانية مدة طويلة كل شوي تسأله

- "كانت طلعة حلوة ودي لو انك حضرت .. معي؟
- و بعدين صار كذا و كذا .. فلان تسمع؟
- بعدين رحنا المكان الفلاني .. يوصلك كلامي؟"

و كأنه ما يكفينا مقاطعات صارت خدمة الإنتظار بعد تقاطعنا في نص الكلام ..
الخدمة اللي اخترعوها عشان تريحنا اكثر ..

تلقاك تكلم واحد انت تعتبره أحسن صديق عندك و شوي يسمع "توت" يعني في مكالمة تنتظر شوي يقول لك لحظة و ارجع لك ..
و تجلس انت مثل الاهبل تنتظره و شوي يرجع لك يقول لك معليش لازم آخذ المكالمة الثانية و بكلمك لما اخلص ..
تدري وش معنى كلامه؟ معناه انه قال للثاني "لحظة أصرف الغبي اللي معي و أرجع لك"

مافي داعي ترد على المكالمة اللي تنتظر ولا في داعي لخدمة الإنتظار ولا ليش في شي اسمه البريد الصوتي .. وظيفته يحفظ لك المسجات و الاتصالات اللي ما ترد عليها
و احلى شي في البريد الصوتي لما تحط رسالتك للمتصلين .. مدري وش يجينا لما نسجل هالرسالة يخلينا نتكلم بشكل آلي أكثر من الرجل الآلي نفسه

بديت احس ان الأسلاك انقرضت من عالمنا .. كل شي وايرلس هالأيام .. حتى التلفون الثابت .,.
الله يرحم يوم كان في البيوت بس تلفون واحد و السلك عشرين متر عشان تقدر تسحبه الدور الثاني ولا الحوش .. وناسه وربي

ذيك الأيام لما كان الواحد يقول انا على التلفون .. كان يقصد فعلاً انه على التلفون .. ما كان في شي اسمه سبيكرز ولا تحط الجوال في الجيب و السماعه في اذنك ..
لما تطور التلفون الثابت صار سلك السماعة طويل مررره و ينمغط مررررره مو زي القديم حق الهاتف السعودي .. هذاك السلك حقه اقسى من العجرا ..
عاد لما تجيك مكالمة و ترد كنت تقدر تمشي بعيد شوي عن التلفون و تمغط السلك وراك و هو يدبر نفسه و لما تخلص و ترجع السماعة مكانها تلقاه يا عيني محتاس
الرهيب في الموضوع لما تمسك السماعة من الطرف و تخليها تبترم في الهواء و بعدين ترجع في الإتجاه المعاكس عشان يرجع السلك زي ما كان .. أيام حلوه ..

فقدنا هالمتع البسيطة مع الوقت و السبب اننا نبي نسوي أشياء اكثر .. نكلم جوال و احنا نشتغل .. و نسينا انك لما تحط يدك في شغلة .. تحتاج دماغك بعد ..!
البركة في التكنولوجيا ما قصرت صار لكل شي ازرار .. الإتصال السريع .. إعادة الإتصال .. و كلها خدمات عشان ما تحتاج تتذكر الأرقام و اللي تكتشف فعلاً انك صرت ما تحفظها ..
لأن الرقم اللي ما تستخدمه تفقده و احنا جالسين نفقد كل يوم شي بدون ما نحس .. انا صرت أنسى كثير و البركة في الأزرار اللي تتذكر كل شي لي

أذكر مرة احتجت اتصل في الوالدة في البيت من العمل و كنت ناسي الجوال و اكتشفت اني ما اعرف رقم بيتنا .. ولا رقم بيت عمي .. ولا أي رقم من ارقام خوالي ..
ما عدا رقم خالي الكبير لأن هالرقم عنده من كنت في المتوسط .. اتصلت عليه و بعد التحية و السلام سالته عن رقم بيتنا .. مات ضحك ..
يفكر إني أستهبل و أنا من جدي .. و لما فكرت في الموضوع حسيت انه من حقه ..

اكيد جربت الكلام يضيع منك و هو على طرف لسانك و شوي تسأل اللي معاك "وش كنت أقول؟" و تخليه فجأة بالقوة إلا يشاركك افكارك
عاد يبدا هو يطرح عليك اقتراحات غبية على باله يساعدك و هو في الواقع يزيدك توهان و يشتت تركيزك أكثر:

* امممم كنت تتكلم عن سامي الجابر :)
- لا لا بعد هالسالفة
* كنت تبي كاتشاب بعدين هونت
- لا اي كاتشاب يرحم والديك ..
عاد تعطيه نظرة حقد و هو يرمممم في البرجر و تقول في نفسك يا رب تغص!!

و على فكره اذا كنت بتقول شي و أجلته تنساه لكن الأسوأ مو إنك تنسى "وش كنت بتقول" لكن إنك تنسى "وش أنت قاعد تقول الحين" في نص كلامك ..
ما سبق و واحد منكم حضر نقاش جاد مررره مررره في الجامعة أو في العمل أو ممكن مع الأهل احياناً أو مع مجموعة من الناس اللي تفكر صح و قلت في نفسك وش جابني هنا؟
و تلقاهم طول هالفترة يتناقشون و كلام و أخذ و عطى و انت ساكت و تلقاهم و انت ساكت يتسائلون يا ترى هاللي ساكت وش كمية الذكاء اللي عنده؟ شكله عنده كلام عبقري ولا ما سكت كل هالمدة ..
و فجأة تحس انك فهمت وش جالسين يتكلمون عنه أخيراً و تحس انه عندك فكرة تبي تقولها عشان تثبت انك فاهم و فجأة يشتغل عرق اللقافة و تنط في وسط السالفة

"اممممم صحيح صحيح .. لكن أنا عندي راي مختلف"

و لما يسمعون كلمة مختلف كلهم يلتفتون عليك و في عيونهم نظرات إستغراب و إعجاب .. و تحس بنظراتهم كلها اعجاب و شوق و انتظار لكلماتك ..
و تنبسط عاد و تتبسم .. تحس انك كسبت اعجابهم و انك طلعت اذكى مما تتصور و تبدا تهني نفسك بهالإنجاز و من فرحتك يالذكي تنسى النقطة اللي كنت بتقولها ...!
لكنك ما توقف عن الكلام على أمل انك بتتذكر بعد شوي .. و تلقاهم يطالعونك زي اللي كأنهم مو فاهمين انت وش قاعد تقول .. و انت نفس الشي مو فاهم انت وش قاعد تقول بس ما ودك انهم يدرون ..
بس اي كلام لين تتذكر النقطة اللي كنت بتقولها .. و ما تتذكرها كالعادة ..
و تبدأ ترتبك لأنك لما تنسى النقطة اللي كنت بتقولها مع الوقت تنسى الموضوع كله من الأساس .. و لما تكتشف هالحقيقة ترتبك أكثر .. و يطبك العرق و ترتفع حرارتك شوي ..
و تقرر انك تفك عمرك من السالفة و تختم كلامك بجملة غبية على بالك بتصرف

صرنا كسالى لأنه صار لكل شي زر .. حتى باب الكراج .,.
أذكر كنت انزل من سيارة خالي و امشي لين باب الكراج و افتحه عشان يدخل سيارته و بعدين انط لأني كنت صغير و ما اطوله لما يرتفع و اتعلق فيه لين ينزل ..
الحين صار خالي يفتح باب الكراج و يسكره بريموت .. و صرت ما أقدر انط ..

و اذا تبي تعرف لأي درجة من الكسل وصلنا .. تذكرون اقراص فيتامين سي اللي كنا نذوبها ..
الحين صرنا ناخذ حلاوة تذوب من نفسها في الفم .. حتى اللسان صرنا عاجز عن الحركة بدل ما نحركه عشان تذوب الحلاوة .. لا انت بس حطها في فمك و هي تذوب ..

لهالدرجة كانت الحلاوة المص تاخذ وقت و مجهود.,.؟.,.
عشان يخترعون اللي تذوب من حالها؟

- هلا و غلا أبوووخالد .,.
- و الله ودي اطلع معكم لكن مافي وقت توني حاط حلاوة مص في لساني و خبرك تاخذ وقت لين تذوب .,.
- حظكم و الله بتتمشون و انا مرتبط بهالحلاوة ..
- ياليت و الله اقدر .. هذي النوع العريض شوي يعني تاخذ وقت اطول بعد ..
- مشكور يا بعدي عالاتصال ..

وين ما تروح هالايام حتى لو تروح أصغر قرية تلقى الف مطعم ..
مطعم في كل ركن في كل شارع في كل حارة .. جد نحتاج كل هالأكل .,.؟.,.
ما خبرت إننا دببة و ورانا بيات شتوي .,.

المكان الوحيد اللي ما أحس فيه بالذنب لما آكل شي زايد عن حده هو السينما ..
لما تجيب فشار في حضنك و كوكاكولا و تقعده بينك و بين اللي جنبك و تخليه ما يقدر يتكي من النذالة اللي فيك

عاد و انت تشتري قبل تدخل صالة العرض مدري ليه تحس انك فعلاً جايع ..

- هذا أكبر حجم فشار عندك .,.؟.,.
- ما عندك برميل ولا شي زي كذا؟

و بعد كل هالزحمة اللي تطلبها .. تشتري كوكا دايت على بالك صحة ..

السينما حلوة .. أحبها جد ..
مدري السبب هو الظلام.,.؟.,.
لانك تحس كل شي رهيب لما تدخل الصالة و يطفون النور .,.
لأن من جد لهالدرجة الفشار رهيب لدرجة انك تملا يدك و تاخذ "قبضة" مليانه و تسد فيها فمك؟
مدري ليه نحب نسوي كذا في السينما .,.؟.,.
عاد اسمع الاصوات و الناس تاكل فشار

بس المزعج فيها لما تروح مع واحد من النوع اللي يحب يتكلم وسط الفيلم ..
و المشكلة انك ما تدري لين تروح معه و كل شوي يسألك كأنك انت المخرج ..

* وين راحوا؟
* أفا .. ليش سوا كذا؟
* مات جد ولا بيرجع آخر الفيلم؟
_ ما أدري وش رايك نتفرج انا و انت عشان نعرف؟ ممكن؟

أو يجيك واحد يجلس وراك عنده حالة نفسيه كل خمس دقايق يغير جلسته .. و يهز رجله و يحركها و كل شي يضرب الكرسي حقك من ورا .. و انت مطنش .,.
بعدين يحط رجل على رجل .
بعدين يحط الرجل الثانية على الأولى .,. و انت تنسى أبو الفيلم و تجلس بس تفكر شلون تنط من كرسيك و تقول له تكفى ارحمنا يابو الشباب
لكنك ما تسويها لإنك حريص على مشاعر الناس .. و تجلس تفكر شلون توصل له الرسالة بدون ما تكلمه .. تلقاك تلتفت بشويش على ورا ..
ولسوء حظك ما يفهم .. رغم إن حركة الراس هذي إشارة عالمية متفق عليها معناها تراك أزعجتنا ..

أو يجيك مجموعة يبون يمرون من قدامك لكراسيهم في الجهة الثانية رغم ان الجهة الثانية فاضية يعني لو جو من هناك كان ريحو انفسهم و ريحوك ..
و تلقاك ترجع الكرسي حقك عشان يمرون .. و يعصرونك في كرسيك .. و مافي آسف .. ولا ممكن لو سمحت .. يجونك و يمرون بكل ثقة ..

مدري ليه ما نتأسف هالأيام لما نسبب إزعاج أو مضايقة للناس ..
صار الإحترام مفقود بيننا مع الأسف ..

تلقاك رايح دائرة حكومية تراجع و تدخل من الباب و تحس ان وراك واحد بيدخل و تمسك له الباب .. يمر الأخ ولا يلتفت عليك ..
ما في شكراً .. مافي السلام عليكم .. مافي صباح الخير .. كأنك بواب عند حضرة المحترم

ما تلقى رد إلا انك تقول له .. حياك الله طال عمرك ..!
لو عندي خبر انك جاي كان فرشت سجادة حمراء .. و آسف ما امدانا نجيب ورد عشان ننثره لك ..!

أحياناً ابي الحق المصعد و يكون فيه واحد و يشوفك تجري تبي تلحق .. و مافي تجاوب ..
ما يمسك الباب ولا شي .. الأمر باختصار ما يعنيه .. و انت بحريقه تلحق ما تلحق كيفك

و انت تجري تحط عينك بعينه كنوع من التواصل البشري يعني احجز الباب ثواني تلقاه يصد يطالع الازرار ولا المرايه داخل المصعد زي اللي ما وده انك تطلع معه ..!
اذا شفت احد يبي يلحق المصعد باحاول احجزه له بيدي او ادور الزر اللي يخلي الباب مفتوح و ان ما قدرت او ما لقيت الزر بسرعة عالأقل بيشوفني احاول .. بيرتاح نفسياً حتى لو ما لحق ..
لكن الظاهر نبي نكون لحالنا داخل المصعد هذا هو السبب .,.

أحياناً لما تركب مع احد ما تعرفه في المصعد تحس ان ودك تسولف معه عشان تكسر الصمت اللي حولكم .,.
و تجلس تفكر وش اقول له .. ما اعرفه.,.؟.,.
و تطلع لك افكار و اشياء تضحك و تجلس تضحك رغم انك ما قلتها له بس مجرد الفكرة يضحكك .. و تلقاه يشك في الوضع و يسأل نفسه وش فيه يضحك
المصعد رهيب و احسن ما فيه انه ريح الشياب
لكن السلم الكهربائي مأساة ..
لما تفكر بهالأشياء اللي صارت توفر علينا الوقت
و تنقلك من مكان لمكان بسرعة تظن اننا قدرنا نوفر وقت
فعلاً و انا دايم بنوصل قبل الموعد ..
لكن لحد الآن في ناس توصل متأخرة دائماً .,.
و مو مشكلة تتأخر مرة لكنهم دائماً يتأخرون .. و عذرهم "الزحمة" ..
كأن الزحمة لهم بس و انت وصلت الدوام أو الموعد بهليكوبتر ..!

و لما تسأله ليش التأخير .. يقول لك آآآآآآآآآآسف طيب ..!
آسف مو معناها آسف لما تنقال بهالطريقة .. مو لما تمغطها كذا

لكن شي حلو انك تقول آسف .,.

بس من المفروض يقول آسف .,.؟.,.
المفروض يقولها أكثر شي حقين التغليف .,.
و بتقولون وش دخل حقين التغليف .,.

حاول تفتح هذي .. و بتعرف
سماعات ..!
علبه السماعاات البلاستييك .,.

لكن اللي غلفها قسم بالله مجرم و اللي يغلفون هالأشياء ناس ما تمزح و شكلها قافله معهم 24 ساعة .,.

و يكتب لك "إفتح هنا" .. يستهبل يعني ولا شلون؟ ولا يبي يقهرك و يتحداك إنك ما تقدر؟

المشكلة يغلفونها بنوع من البلاستك عمري ما شفت مثله مقاوم للرصاص و ضد الحريق و سميك بدرجة عجيبة و اتحدى تلقى مثله في الاسواق لإنه مخصص لأعمال حربية مو للإستخدام المدني و مستحيل يكون بلاستك طبيعي .,.

و اللي ما افهمه ليش يغلفونه كذا؟ ما أظنها فواكه معلبه عشان يخافون عليها تفسد ..
و تجلس تبي تفتحها تجيبها يمين تجيبها يسار ما تنفك ..
لين تجيب كل ما اخترعه بنو آدم من أدوات الجريمة و تجربها ..
سكين .. منشار .. مبرد أظافر .. أو مقص ..

حتى المقص إذا شريته تلقاه كذا .. يبي لك مقص عشان تفتح علبة المقص ..!
و اذا كان هذا أول مقص تشتريه .. شلون تفتح العلبة طيب؟

البطاريات يغلفونها كأنه ما ودها تطلع للعالم الخارجي .. بلاستيك سميك و من الخلف ورق مقوى ..
و تروح تشتري لمبة اللي مصنوعة من زجاج .. يحطونها لك في علبة من كرتون خفييف و العلبة مفتوحة من الطرفين ..!
الزجاج بيسلم من الضربات و الطيحه .. لكن البطاريات لا يا حرااااام ما تتحمل

وربي يستهبلون هالجماعه .. بس اللي أجرم منهم اللي يعبون المربى .,.

أكيد مرت عليكم .. تجلس في المطبخ تحوووس تبي تفتح علبة المربى ما تقدر شوي تنتبه إلا في واحد عاجبه الوضع و يجيك يتبرع يفتح العلبة عنك ..
أخوك أو اختك .. و سبحان الله من فرة واحدة تفتح العلبة معه .. عاد تبي تصرفها تقول اصلاً كانت شوي و تفتح .,.

لكن الشهادة لله اللي يغلفون هالأشياء و اللي يعبون المربى ناس عندهم ذمة .. مو مثل حقين بطاطس الشيبس ..
هذولاك ذمتهم ولا بربع ريال .. الكيس أكبر من راسك .,.
و مافيه إلا ست .,.
واحد الله يذكره بالخير كان دايم يقول "الناس تغيروا" ..
و أنا اقول بعد الأشياء تغيرت كثير و المشكلة.,.
هالتغير ما حصل في قرن لأن الفرق بيني وبين اخوي 9 سنوات لكن احس اني من عصر و هو من عصر ثاني .,. :32:
حتى الوضوء صرنا ما نعرف نتوضأ و البركة في الحنفيات الذكية
و اللي هي بكيفها تقرر وش كمية المياه اللي تحتاجها .,.
و تقعد انت تحت رحمتها و تقول يارب ما تقطع المويه الحين.,.
و تحس انك تحت رحمة حنفيه و انها تبتزك و انت تتوضأ ..!
و اذا قررت بكيفها انك خلاص اخذت كفايتك تقطع عنك المويه
و تضطر انت تسحب يدك و ترجعها مرة ثانية عشان تقنعها انك واحد ثاني .,.
و صارت منتشرة في كل مكان .. في المساجد و المطارات و المطاعم ..
تروح تغسل يدك في المطعم و تاخذ لك نص ساعة بسببها و لما ترجع الطاولة مع الشباب تحس بالإحراج إذا تأخرت .. لا يفكرون شي ثاني . :43: :43:

لأننا صايرين نهتم كثير براي الناس فينا لدرجة انك تخفي مشاعرك احياناً ..

عمرك أشرت لواحد من بعيد و في الأخير طلع مو هو؟ ليش تحس ان وجهك طاح؟
وش المشكلة انك تغلط ماني فاهم .,.

أو العكس تشوف واحد يسلم عليك من بعيد و انت ما تعرفه و تدري انه غلطان بس منعاً للأحراج ترد و انت ماشي في طريقك .. هلا هلا ..
بعدين تكتشف انه كان يقصد واحد وراك .. ليه تحس وقتها بإحراج .,.؟.,.

تطلع من بيتكم كاشخ يا رايح الدوام ولا رايح الجامعة ولا طالع مشوار ولا تمشى.,.
و انت مبسوط من نفسك و كاشخ صح بالشماغ مثلاً و فجأة يا تعثر في طرف سجادة ولا درج و تخرب السكبـه .. ليه كل الثقة بالنفس اللي كانت فيك تروح منك ذيك اللحظة؟

طالع مع اخوياك مطعم و بعد العشاء و انتوا طالعين تضرب ركبتك في الطاولة و تحس ان رجلك بتنفصل و تلقاهم يضحكون عالموقف .,.
ما تشوف أنت.,. هههههههههههههههههههههه
.. و تلقاك تضحك وياهم .. و انت باقي لك شوي و تصيح .,.
وش فيها لو جلست تتألم .. مو من حقك؟ ولا بيحقدون عليك؟

ولو انه من حقك احياناً تخاف من نظرة الناس حولك ..

واحد اعرفه .. يحب يسمع كاظم الساهر ..
و لما اركب معه سيارته يفتح الشنطة و يجيب حافظة
سي ديز خاصة بس لكاظم ..
و لما سألته ليه ما تخليها جنبك؟ يقول الشباب يتريقون علي ..!
و اذا شغلته يقولون يا عمي انت جبت لنا النوم
تعقد المسكين .,.

شبابنا صاير رجج مؤخراً إلا قليل منهم ..
مافي حياتهم مجال ولو بسيط للهدوء و التفكير برواقه ..
كل شي بسرعة و كل شي صايرين يعرفونه و كلهم ما شاء الله سواقين محترفين عشان كذا ما شاء الله كثرت الحوادث ..

قبل سنوات ما كنت تشوف هالغضب اللي منتشر في الشوارع الحين .. الناس كانت تسوق بعقل و راكدة ..
الحين صرنا نسوي الف شغلة و احنا نسوق .. نكلم و نغير من إذاعة لإذاعة
أما في الصباح تشوف عجائب الدنيا .. ناس تفطر في السيارة ..
و اللي يغير ملابسه و هو يسوق >> شفتها بعيني

و صايرين نسوي كل هالأمور ليه .,.؟.,.

عشان نوفر وقت .. رغم انه ماني شايف انا فعلاً وفرنا اي وقت ..
دايم مضغوطين و دايم ما عندنا وقت حتى للزيارة بين الأقارب ..

و لو قدرنا نوفر من وقتنا الحين جزء كبير و خليناه للمستقبل .. يا ترى وش بنسوي فيه؟
ولا شئ .,.!!.,.

عشان كذا الأهم هو الحاضر .. مو المستقبل ..
و عشان كذا شئ حلو إنك تؤجل أحياناً بعض الأمور .,.

التأجيل مو مشكلة .. بالعكس حل .,.
و هو وسيلة للتعبير عشان تقول لنفسك لحظة تراك ماشي بسرعة .. هدي لو سمحت ..!
و دايماً افطر فطور رايق .. و اترك عنك الشابورة .. لأنها مراح توفر لك وقت .,.!!.,.

و إذا وصلت لهذا السطر تذكر شئ واحد .,.
أجل كل مشاغلكـ .. الحين الحين .. و لا تأجيل التأجيل .,.
و إستمتع بوقتكـ مع اللي تحبه .,.






بكل معاني الود والمحبهـ .,.



تحيـــــــــــــاتي .,.

[عين مهاجر]

ما أطول نفسك في الكتابه تكتب وكأن لياليك وأيامك كلها كتابه

[ورده كويتية]

يعطيك العافيه على هذا الموضوع الجميل والفاضي بس على فكره كلامك واقعي مية بالمية وكل انسان عايش هذه المواقف التي ذكرتها ، وعااشت ايدك على هذا الطرح الجميل والطويل ، ولا تحرمنا من مواضيعك الحلوة .
بس على فكرة الموضووع عجبني واايد لأنه واقعي .
شكــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــرا .

[abu_nayef]

المشاركة الأصلية كتبت بواسطة عين مهاجر

ما أطول نفسك في الكتابه تكتب وكأن لياليك وأيامك كلها كتابه

يااهلا بك وهلا بحضورك ونوورك .,.
شرفتني بذووقك العاليـ :)

بكل معاني الود .,.


تحيــــاتي .,.

[abu_nayef]

المشاركة الأصلية كتبت بواسطة ورده كويتية

يعطيك العافيه على هذا الموضوع الجميل والفاضي بس على فكره كلامك واقعي مية بالمية وكل انسان عايش هذه المواقف التي ذكرتها ، وعااشت ايدك على هذا الطرح الجميل والطويل ، ولا تحرمنا من مواضيعك الحلوة .
بس على فكرة الموضووع عجبني واايد لأنه واقعي .
شكــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــرا .

يااهلا بهالحضوور والنور .,.
شرفني حضوورك يالغاليهـ .,.

لكي من الورد مااشئيـ .,.

بكل معاني الود والمبحهـ .,.


تحيــــــــــــاتي .,.