اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 24-01-2008, 02:47 AM
صورة عذبة التجريح الرمزية
عذبة التجريح عذبة التجريح غير متصل
©؛°¨غرامي مشارك¨°؛©
 
ترويض المتمردة




تـرويــــض المتمـــــردة
للكاتبة: عذبة التجريح




أحبتي في الله
اضع اليوم بين ايديكم أول باكورة أفكاري.. استلهمتها من الواقع الذي نعيشه.. ترجمتها لكم برواية.. تدور احداثها بالمجتمع وقد سلطت الضوء على حياة شخصين هما محور الرواية.. وبقية الأفراد لم أسلط الضوء الكبير على شخصياتهم وحياتهم.. ربما لأنها تكون أول رواية اصيغ كتابتها.. ولم اجد الجرأة في نفسي لتشتيت افكاري مابين الشخصيات..


جميع شخصيات من وحي الخيال.. ولكني عرفت العديد من الأشخاص الذين يعيشون حياتهم ومأساتهم بنفس ماوردته بالقصة..
والشخصيات جميعها لاتمت بأي صلة لأي عائلة لدينا بالكويت.. ولقد أخترت الأسماء عشوائيا وليس إلا.. وإن صدف إسم بالقصة مطابق لإسم بالحقيقة.. فهذا من باب الصدف وليس بالمقصود..
مع إحترامي لجميع العوائل بالكويت والخليج العربي..




لنتعرف على موجز مبسط للرواية.. والشخصيات المهمه
وملامحها..


عائلتا أحمد فهد... ومحمد فهد
من العوائل الكبيرة والثرية بالكويت.. تمتلك أكبر الشركات التجارية
لديها عدة شركات عقارية، والكترونية..
وأغلب أبناء العائلة يعملون في هذه الشركات..
وهي من العوائل المترابطة والمتلاحمة التي تقدس رابط النسب والأخوة..
وهم جميعهم يد واحدة في الشدة والرخاء..


أحمد فهد ( بوفهد ):

متوفي..
متزوج من منيرة ( أم فهد ): ولديها ولدين وهي وضعيفة البنية

ولهذا لم تستطع إنجاب غيرهما ولكنها أرضعت اثنين من أبناء محمد فهد


( رضعت طلال مع ولدها فهد ) وكما ( رضعت مشاري مع ولدها خالد )..

وهي قمة في الطيبة والحنان..

1- فهد: 38 سنة دكتور جراح ذات خبرة طويلة بالجراحة العامة.. تغرب عن الكويت وأهله 20 سنة درس من خلالها.. وأشتغل بأكبر المستشفيات الأمريكية وبذلك حصل على خبرة ممتازة وكفائة عالية في مجال الطب والجراحة.. عاد للبلاد مؤخراً وافتتح مستشفى يحتوي على عدة أقسام.. ( مركز شهد الطبي ).. طويل القامة 195 سم.. بشرة داكنة سمراء جميلة اللون.. عينان لوزيتان واسعتان سوداء اللون كظلمة الليل حادة النظر.. جسم رياضي رشيق متناسق.. أنف طويل سليل.. شفتان قاسيتان يرتسم عليها ابتسامة كسولة تعلوها شارب متناسق مع لحية محددة تبرز فكه العريض لتعطي وجهه مزيدا من الوسامة.. ملامح رجولية طاغية مهيبة ملفتة للنظر.. وكتفان عريضان.. يتسم بالثقة والغرور العجيب..

2- خالد ( بو أحمد ): 35 سنة.. متزوج من بنت عمه محمد ( منى ) ولديه 4 أبناء..



محمد فهد ( بو خليفة ): متزوج من أثنتين

الزوجة الأولى
طيبة ( أم خليفة ): وعندها من بوخليفة 7 أولاد وبنت


1- خليفة ( بو حمد ): 45 سنة.. ماسك شركات العائلة مع أخوانه.. متزوج من
عائشة ( أم حمد ).. وهي من خارج العائلة وأم حنونه وطيبة..


حمد: 26 سنة.. متزوج من بنت خاله عبدالله ( خولة ).. وعنده ولد وبنت..

خليفة:6 سنوات
طيبة: 3 سنوات

مريم: 23 سنة.. متزوجة من ولد عمها سعود ( ناصر ).. وعندهم بنتين توأم..
لولوة ودانة: سنة ونصف
سالم : 22 سنة.. خريج كلية التجارة..
جاسم: 19 سنة.. يدرس بالخارج..
مشاعل: 17 سنة.. ثالثة ثانوي ( علمي )..


2- سعود ( بوناصر ): 44 سنة.. ماسك إدار جميع شركات أبوه ومتزوج من بنت عمته سارة ( هيا ) وعندهم من العيال 4 ..
ناصر: 24 سنة.. متزوج من بنت عمه خليفة ( مريم )..
محمد: 22 سنة.. متزوج من خارج العائلة ( عواطف )..
فيصل: 20 سنة.. ثانية حقوق..
نورة: 18 سنة.. ثانوية عامة ( علمي )..


3- صقر ( بو ضاري ): 40 سنة.. مشارك أخوانه في الشركات.. متزوج من خارج العائلة.. ( لطيفة ) وعندهم من العيال 2 ..
ضاري: 15 سنة
سلمان: 10 سنين


4- طلال ( بو فهد ): 38 سنة.. متزوج من خارج العائلة ( سارة ) وعندهم ولد وبنت..
( فهو أخ لأبناء عمه أحمد بالرضاعة.. حيث رضع مع فهد )
فهد: 8 سنوات.. وهو حبيب قلب عمته شهد
فاطمة: 3 سنوات ونصف


5- سلمان: أستشهد خلال الغزو على الكويت..

6- منى ( أم أحمد ): 30 سنة.. متزوجة من ولد عمها أحمد ( خالد : 35 سنة ).. وعندهم ولدين وبنتين..

أحمد: 10 سنوات
منيرة: 8 سنوات
مشاري: 5 سنوات
نورة: سنتين


7- شاهين: 27 سنة.. مهندس كمبيوتر وسيم وشبيه بأبن عمه فهد..

8- عبدالله: 25 سنة..


الزوجة الثانية..
نورة( أم مشاري ): توفت بحادث سيارة وعندها من بوخليفة ولد وبنت..


1- مشاري: توفى بالحريق أثناء تأدية واجبه.. حيث كان يعمل إطفائياً قبل 10 سنوات..( فهو أخ لأبناء عمه أحمد بالرضاعة.. حيث رضع مع خالد )

2- شهد: 28 سنة.. مهندسة كهربائية متقاعدة تقاعد طبي.. ( سنعرف لاحقاً سبب التقاعد ) .. ذات ملامح جميلة.. عيونها شهلا تضرب على العسلي والأخضر على حسب تغير مزاجها.. لوزية الشكل كبيرة.. ورموش كثيفة وطويلة.. الأنف دقيق وصغير.. والشفايف صغيرة ممتلئة.. والوجه شكل قلب.. ممشوقة القوام تميل للنحافة أكثر طويلة 170 سم.. الشعر حقاً ملفت للنظر طويل يغطي كل الظهر وكثيف وناعم ومخصل كستنائي اللون وملتف عند أطرافه .. وقاصة مدرج على طولة ومعطية حركة رهيبة.. بيضاء عاجية اللون.. وبشرتها حريرية شفافة..





  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 24-01-2008, 02:52 AM
صورة عذبة التجريح الرمزية
عذبة التجريح عذبة التجريح غير متصل
©؛°¨غرامي مشارك¨°؛©
 
رد : ترويــــــــــــــــــض المتمــــــــــــــــــــردة





الجـزء الأولـ 1 ـ





قبل أربع أعوام وعندما كانت شهد عائدة من المستشفى لأجراء بقية الفحوصات لوالدتها وأخذ

النتائج النهائية.. وبطريق العودة مع والدتها وعلى الطريق العام بعد جسر ميناء الشويخ حيث

أن الشاحنات في أوج نشاطها.. وإذا بأحدى الشاحنات الكبيرة كانت محملة بالخيول وهي تسير

بسرعة جنونية أمام الجيب الذي تقوده شهد.. وفجأة بدون سابق انذار.. وبكل قوة ضغط

السائق على الكابح ليوقف الشاحنة.. فأنفتحت بوابت مقطورة الحديدية.. ولم تستطع شهد

تفادي الاصطدام وبقوة بالشاحنة.. فدخلت البوابة الحديدية عبر زجاج السيارة الجيب الأمامي..

وحدث مالم يكن بالحسبان حيث أنغرس الحديد بجسم أمها الطاهر فسلمت الروح بلحظتها

لبارئها.. ومما زاد الطين بلة.. أن الخيول فزعت وارتبكت.. وبدأت تخرج من البوابة

وتتراكض على حطام السيارة المنكوبة تفر من خوفها.. وبهذه الأثناء فقدت شهد الوعي.. وتم

محاوات إنقاذ مايمكن إنقاذه.. وأخرج رجال الإنقاذ شهد ووالدتها من السيارة بعد عناء طويل

وجهود مكثفه.. وأدخلت للمستشفى في الحال.. حيث أصيبت بكسور بالضلوع مما أدى إلى

نزيف بالرئة.. وكسر بساعد اليد اليمنى.. وبأثناء العميلة الجراحية حدث خطأ طبي فادح حيث

بتر الجراح اليد اليمنى من الكوع.. ودخلت في الغيبوبة لمدة شهرين تقريباً.. أستفاقت بعدها

بفقدان جزئي للذاكرة.. والمتعلقة بـ.... (((الحادثة ووفاة والدتها)))..

:: ::
:: ::
:: ::
:: ::



أم خليفة : يللا ياعبدالله زتك حط الأغراض بالسيارة.. أبوك سندرنا من الحنة
اللحين تلقى كل إخوانك وصلوا للمزرعة واحنا بعدنا ماسرينا..

عبدالله : إن شاء الله يُمه.. كلها دقايق وأنا مخلص كل شي.. بس استعيلي شهود
خل تجهز جنطتها عشان أحطها بالدبه مع بقية الأغراض..


شهد : وشفيها شهود عبادي.. كاهي شحليلاتها من الصبح جاهزة.. وجنطتها قبلها داشة السيارة.. بس إنت الله يهديك قاعدلي من القايلة وتتأمر علينا وتتهمنا بإنا إحنا المبطين.. والله صدق أبوي يوم يتكلم.. بس المشكلة مايت الحنه إلا على راس أمي بعد عمري (( شهد تسمي أم خليفة مرت أبوها أمي.. وطبعاً هذا لإن أم خليفة طيبة وحنونة وتموت على شهد حتى أيام أمها الله يرحمها كانت أخت مو ضرة لأم خليفة ))..


وبعد ماطلعوا من البيت طبعاً بو خليفة مثل كل الشياب لي ساقوا فيهم الشباب لازم الحنة والمعايا
كأن محد يعرف يسوق غيرهم.. ههههههه شياب بعد شنقول..

بوخليفة : لاتسرع ياعبيد.. علامك طاير جنك راكب صاروخ ويَهَدْ..

عبدالله : ههههه.. يُبه الله يطولي بعمرك والله أنا سايق على الأمية ومو طاير.. وترى حتى جذي ماراح نوصل إلا باجر..

بوخليفة : أقول كل تبن.. وسوق على مهلك..

شهد : ههههه.. والله فشله عبادي طول وعرض والزفه ابيزه عليك..

عبدالله : ههههههه.. يللاه مايخالف ماي ورد من أبوي.. والشيبه يحمق بعد..

شهد : أقول يُمه.. صج فهد ولد عمي أحمد بيي ويانا المزرعة..؟

بوخليفة : إيه يُبه بيي وبيقعد ويانا شهر بعد..... (( سكت شوي )) وسأل مرته : إلا أقول طيبة.. لايكون فتحت الموضوع اللي خبرتج عنه أولت أمس..؟؟

أم خليفة : لا هو شقالولك قناة الجزيرة أنشر الأخبار...!!!

بوخليفة : إي حسبت بعد.. لإنه إنتوا الحريم مايتم بحلجكم شي إلا ونشرتوه.. بخور السوق..

أم خليفة اسكتت وطنشت وما ردت عليه.. لإنها تدري بطبع ريلها الناري..

شهد : شسالفة..!!! أشوف قمنا انحجي بالألغاز..!!

بوخليفة : ماكو سالفة ولا والفة.. وكل شي بوقته حلو.. إلا شاهين متى بيلحقنا..

يحليلة يعني بيضيع الصقلة.. ردت أم خليفة : قال بيخلص بعض أوراق بالشركة حق ناصر وبيي على طول..

عائلة بوخليفة من عقب الحادثة كل من يتحسب بمعاملته وكلامة مع شهد.. بحكم ماجرى لها
من بعد الحادث.. ونتج عنه دمار نفسي ومعنوي لشهد وللجميع.. وشهد من يوم ما ابتروا ايدها بالخطأ وهي متعقدة وتموت خوف وتكره شي إسمه دكتور أو طبيب.. وقامت تسمي جميع الدكاترة بالقصابين ( جزارين ).. وبنظرها كل الدكاترة الأطباء معدومين الظمير والإنسانية والإحساس.. ومن يوم الحادث وهي تخاف من الخيول.. وكانت تصيبها بفترات متباعدة حالات تتشنج فيها.. ويختل النظام العصبي عندها.. لما تمر بمواقف معينة.. مثل لما تشوف الدم أو الخيول.. والأطباء والمراكز الطبية..

شهد كانت مملوجة على ولد خالتها (نورية) عصام قبل الحادث.. وبعد اللي صار لها تخلى عنها وانفصلوا.. ومن بعدها صارت تكره انها تختلط مع الغرب غير أخوانها وأهلها المقربين.. وصارت تميل للأنطوائية أكثر وتحاول تخبي عاهتها دوم بشال هندي طويل تلفه عليها..

وشهد كل من عرفها من قبل الحادث.. كانت شعلة من المرح والنشاط والشطانة والشقاوة البريئة.. بس عقب صارت عصبية وحساسة لأبعد الحدود ودمعتها جاهزة بأي لحظه تطلبها.. وأخوانها وحريمهم وعيالهم يحبونها موت.. ودوم يعذرونها ويراعون شعورها ونفسيتها حتى لو كانت غلطانة.. طبعاً ومن يقدر يلومها على شي.. وهي اللي حصل لها شي لايغتفر.. مع إن القضية اللي رفعها أبوها وأخوانها على إهمال الفريق الطبي.. قاموا بفصل الدكتور وطرده فقط.. وهذا الشي مافاد بعد مافقدت عضو مهم جدا بجسمها وعن طريق الخطأ............. آآآخخخ لام الله من لامج ياشهد..
نسيت أقول لكم إن شهد ماتدري عن ولد عمها فهد بإنه دكتور.. ولا جراح بعد.. لإن اهلها
مخبرينها بأن فهد دكتور فلسفة يدرس بالجامعة..

وبالنسبة لفهد هم مايدري عن الأحداث اللي حصلت لبيت عمه طول ماكان في الغربة..
ولا يدري باللي حصل لبنت عمه شهوده.. واللي كان يتذكرها أيام زمان أيام ماكانت شيطانة
وكانت تلاحقه وتلاحق أخوها طلال.. وهما يلعوزونها ويطفرونها.. وعقب ماتصيح كان يطيب خاطرها بأن ياخذها وياه بجولة على ظهر الخيل.. وكان يحطها جدامه ويمسكها الرسن.. وهو محاوطها بذراعه عشان ماتطيح.. كان يعشقها ويعشق كل شي فيها..
يعشق برائتها وطيبتها..
يعشق عنفوانها وعصبيتها..
يعشق حتى سلاطة لسانها ولدغتها..
ويعشق ويموت بعيونها ونظرتها..
يعشق كل حركة وكل همسة تصدر من ملامحها وشفتها..
يعشق غرورها وكبريائها وأعتدادها بنفسها وبثقتها..
يعشق قلبها الطاهر اللي مايعرف الحقد ويعشق ضحكتها..
شهد بنظر فهد فراشة جميلة هشه عايشة بشرنقتها..
طفلة صغيرة عشقها مايوم زلزل الوقت قيمتها..



وبعد هالمعلومات تهقون شراح يصير بالمزرعة........؟؟

واشلون راح يكون اللقاء العائلي.........؟؟

بنتظار ردوكم وانتقاداتكم

وإذا مافي ردود ماراح اكمل

ولكم خالص حبي وتقديري

أختكم


عذبة التجريح





  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 24-01-2008, 11:44 PM
صورة عذبة التجريح الرمزية
عذبة التجريح عذبة التجريح غير متصل
©؛°¨غرامي مشارك¨°؛©
 
رد : ترويض المتمردة





الجـزء الثانـ 2 ـي





يوم الخميس
22 / 1 / 2004




وصلوا بيت بوخليفة المزرعة ونزلوا الخدم الأغراض.. وشهد صعدت غرفتها عشان ترتاح
وتنتظر البقية على مايوصلون.. وخدامتها نور ترتب أغراضها وثيابها وبس خلصت استئذنت وطلعت.. وانسدحت شهد شوية تريح على مايأذن الظهر عشان تصلي..

:
:

وبها الأثناء وصل بقية أفراد العائلة وكلن مع لأسرته..
والدكتور فهد وصل مع أخوه خالد..
وكلن راح لغرفته يعدل اللي يبيه ويرتبه..
ينتظرون لين يتيمعون كلهم حق الغدا..
:
:
:
:

الجو بشهرين يناير وفبراير روعة وجميل جداً عندنا بالكويت.. يكون بارد ومنعش والرياح تصير ناعمة تلامس البشرة وتكسبها بروده محببة.. وساعات تنزل الأمطار.. وأيام تشرق الشمس الدافئة.. وعند الفجر نشوف الندى يبلل أوراق الورود والأشجار.. فهذا كان حال الجو بمزرعة الـ....... وهي ملك لبوخليفة وبو فهد الله يرحمه.. كبيرة جداً وجميلة ومنسقة.. فيها اصطبل للخيول واللي عيال بيت فهد الـ...... يعشقون الخيل وركوبه.. والأصطبل بعيد شوي عن بيت المزرعة..
وبالواجه الخلفية للمبنى حمام سباحة كبير.. ومن أمام المبنى حديقة كبيرة جدا مقسمة على عدة جلسات.. فيها ركن مبني فيه تنور وشواية كبيرة للحفلات.. وثلاث طاولات كبار مع الكراسي محطوطين على الشكل حرف لـا.. وتحتوي على مظلات كبيرة.. وركن ثاني فيه جلسات مكونة من كراسي الطويلة وزوجين من مقاعد المتمرجحة.. وبالوسط نافورة كبيرة جميلة تسمع فيها خرير الماي وهو ينساب من إناء النافورة ويصب بالحوض.. والورود بألوانها وأنواعها تنتشر بجميع أرجاء المكان..
وهناك ملاعب للتنس والطائرة والسلة.. وطبعاً مضمار طويل على الجانب البعيد من بيت المزرعة للخيول..
والأجمل القعد الخلفية للمبنى واللي يحتوي على فرندة كبيرة وتنزل منها على مساحة من السيراميك الجميل والمصفوف عليه كراسي البحر الطويلة للأسترخاء.. حوالين بركة السباحة الكبيرة واللي فيها مستويات من العمق.. ومن الجانب الثاني حوض حمام سباحة أصغر وقليل العمق للأطفال.. والفرندة فيها قعدة حميمة جميلة جداً.. وفيها تعريشة من الياسمين المتسلق يلقي الظلال على الموجودين فترة النهار.. وعبق عجييييب وجمييل من ريحة الياسمين والجوري وبعض أنواع الورود الأخرى المزروع بالأحواض الكبيرة حوالين الفرندة..
وكما توجد حديقة جانبية أصغر بشوي من الحديقة الأمامية للواجهة مزروع فيها الثيل.. وعلى الجانب منها ألعاب للأطفال مثل المراجيح والزلاقيات والنطاطية الكبيرة.. وبالجانب الثاني خيمة شعر منصوبة ومفروشة بالجلسات العربية السدو.. ومن أمام الخيمة دووة الفحم الكبيرة.. وهذا شرح مبسط للمزرعة..



الساعة 2:30 قبل العصر

طق طق طق..
شهد : منو..؟

فهد ولد طلال : أنا حبيب القلب ياحبيبتي..

شهد : ههههههههههههههههه.. أيا النزغة ومنو حبيب قلبي هذا المتفرغ واللي ياي الحين..؟؟

فهد الصغير : حبيبج فهودي ونظر عينج بعد..!!

شهد وهي تفتح الباب على غفلة.. وتنط على فهد ولد أخوها طلال وتمسكة وتلمه : هاااااااا.. مسكتك يالجمبازي أنت.. ههههههههههههههههه.. ولا بعد واثق من نفسه الأخ يقول حبيبي ونظر عيني..!!

فهد الصغير : طبعاً عمة.. أول شي أنا الوحيد اللي حضرتي ولادتي.. وبعدين أنا الوحيد اللي أشبه يدي.. وانا الوحيد اللي تربا على ايد أحلى عمة بالعالم كله.. وأنتي بعدين مو كله تقولين فهودي حبيبي ونظر عيني..؟؟!!
بس تدرين عميمة انا ماراح اهدج.. لأني صج والله تراني أحبج واااااااااايد واااايد.. ولما أكبر راح أتزوجج..

شهد تضحك على كلام ولد أخوها طلال.. وهي تنزل معاه لتحت وتكمل : هههههههههههههههههههههههههههههههههههههههههههههههههه ههههههههه.. إنما إنت صج نكتة.. اعنبو دارك أنا عمتك يالهيس.. وتقول بتزوجني..؟؟ وشلون يصير..؟؟

وسمعها أخوها خليفة وهي تتكلم وقال : هــاااااااااااااا من هذا طالب القرب فبنتي..؟؟
وخليفة دوم يقول حق شهد إنتي بنتي ويموت عليها.. وهي بعد تحب أخوها خليفة وتحترمه وايد.. ونفس الشي مع أخوانها سعود وصقر.. لأنهم يعاملونها معاملة أبوية أكثر منها أخوية بسبب فارق السن اللي بينهم وبينها..

وشهد من سمعت بوحمد ابتسمت له.. وسيده راحت له وباسته على راسه.. وهي تقول :
فهودي حياتي طالب القرب مني.. وتكمل وهي تلف راسها على فهد ولد أخوها وتقوله : مو صح فهود.. أنت حبيبي وأنا حبيبتك..؟؟

وسمعت فجأة صوت ثاني كبير رجولي يرد عليها : طبعاً وعندج شك..؟؟!! وبعدين غصبن عليج.. لأن هالشي متفقين عليه من زمان واحنا يهال.. وما من خذول من ناحيتي.. وأنا مازلت عند كلمتي يابنت عمي..!! (( افتحت شهد عيونها تطالع أخوها بوحمد وهي منصدمه.. )) وكمل فهد كلامه : وكاهم كلهم يثبتون هالحجي عمي وعيال عمي شاهدين..

أهني شهد شهقت بقوة.. ولفت جسمها ووجاهت صاحب الصوت وهي امبطله عيونها عالحد وتناظر.. من هذا اللي تجرأ وقال هالحجي..؟؟!!.. وشافت واحد طوله فارع.. واسمر وملامحة حادة.. وابتسامة على اشفاته..!!

ولاشعوريا ردت عليه بحدة بس بصوت واطي ولكن مسموع : جَــــبْ..

وبعدها اسمعت أصوات الضحك من الكل.. لأنهم متوقعين هالرد منها.. واهي انحرجت المسكينة وسيده انحاشت ودخلت المطبخ عشان تواري احراجها..

وبالمطبخ شافت أم خليفة مع جناينها ( كناتها ، حريم أولادها ).. وسلمت عالجميع..
وسألت أم خليفة : يُمه متى الغدا ترى متنا من اليوع..؟؟

أم خليفة : يلله يُمه هذا الغدا طاح.. روحي الصالة مع أخوانج وتغدي معاهم.. أدري فيج يوعانة.. وانتي حتى الريوق ماتريقتي.. وعلى لحم بطنج من أمس الغدا..!!

شهد : انزين يمه يايبين المعبوج ( الفلفل الحار ) وياكم..؟؟ والااااااااا أخلى عبادي يحدر اليوم ييب لي..؟؟!!

أم حمد : لاتخافين شهوده أنا مسويتلج إنتي وحمد كمية كبيرة.. لإني أدري فيكم ماتنزل اللقمة من بلاعيمكم من دون الفلفل.. هههههههه جنكم هنود..!!

شهد : ههههههههههه.. حرام عليج أم حمد..!!
وانتي تدرين أمي اليوم شطابخة.. أحلى وألذ طبق بالوجود مطبق زبيدي.. ومايحلى إلا مع المعبوج والأجار..

أم خليفة : يالله يُمه روحي لحقي عالغدا قبل لايخلصونه عنج..

شهد وهي منحرجة : يُـــمه نجبولي هني باكل وياكم وماني رايحه هناك..!!

أم خليفة : هَـوْ ليش يُمه..!! أنا خبري إنج دوم تحبين تاكلين مع أخوانج..!!

شهد : لاااا يُمــه بــسـ......

وفجأة يقطع عليها الكلام أخوها طلال.. ويكمل وهو يقلد صوتها : يُـمه أنا أستحي من فهد.. ههههههههههههههه.. (( وكمل بصوته وهو لامها من كتوفها يدزها جدامه )) : يللا شهود تعالي ناطرينج عالغدا.. وأبوي يقول مايطيح الغدا إلا بييت شهوده من قدج بعد..

(( سحبها معاه واهيه منحرجة وقعدها يمه عالطاولة بينه وبين شاهين.. وفهد كان بنفس سطرتها يعني ماتشوفه.. لأن بينهم أخوانها طلال وصقر.. بعدين فهد يم أبوها عند راس الطاولة.. ))..

شهد وهي تقعد بين أخوانها سلمت على الحاضرين بصوت واطي وهي منزله راسها..

وهني فهد رد عليها السلام بصوت عالي.. يعني بيطفرها وبيحرجها شوي ويسألها بصوت الواثق من نفسه : شلونج شهود..؟؟ هااااا بردتـــي ويهـج بالمــاي..؟؟!!

أضحكوا أخوانها على التعليق..........

بس شهد طنشته.. وماقالت شي وتمت منزله راسها عالصحن الفاضي جدامها.. وقام طلال وبإبتسامته خذا الصحن اللي جدامها ونجب لها فيه من الغدا.. وترسه لها من المطبق الزبيدي واللي الكل يدرون عنها إنها تعشق أكل البحر بجميع أنواعه..
ومن حط طلال الصحن جدامها.. وهني طلعت عينها وقالتله بصوت واطي بس مسموع : حرام عليك طلال اشايفني..!! حوت أبلع كل هذا..؟؟.. الله يخليك رجع ثلاث أرباع اللي بالصحن وعطنياه..

بوخليفة : ليش يُبه..!! أنتي من أمس على لحم بطنج ماكلتي شي.!!
أقول حمد.. عط عمتك من الفلفل اللي معاك.. والا ماتهنالها اللقمة من غير الفلفل..

وهني ضحكوا عليها أخوانها.. وقال فهد : وراك عمي انا ماخبرت مربي عندك بالبيت هنود..؟؟

وشهد هني استثقلت دم فهد.. وردت حميتها القديمة على مداحر ومناجر فهد.. وقالت بس بصوت واطي لكن مسموع : والله الهنود أبرك من الخنازير اللي أنت عشت واندمجت وياهم.. والفلفل وجميع الأكلات الهندية.. أطيب وأنظف من أكلهم.. اللي ياأما يكون معلبات أو جنغ فود..

وأنبهت الكل برد شهد على فهد.. وشلون بدت ترد لطبعها القديم لما تتناجر مع فهد وهيه صغيرة.. بس بعد الحادثة وبما أن فهد غاب عنها عقدين من الزمن.. فما كانت ترادد بالحجي إلا أهلها القراب حيل منها فقط.. واللي تاخذ وتعطي معاهم بكل حريتها.. والحين وبعد ماسمعوا ردها هذا دلالة على إن شهد قام ترجع لشخصيتها القديمة اللي أهجرتها.. ولو كان عن طريق المناجر والهواش.. آآآآآه ه ه ه اشكثر أهلها ولهانين عليها.. وودهم ترد لهم شهد القديمة الشقية..

سعود بوناصر والإبتسامة على وجهه : أشوف المعركة جنها بتبدي.. من عقب غيابك سنين يافهد..؟؟

فهد طبعاً ماكان يدري عن اللي صار لشهد.. بس كان على باله إن شهد ردت لطبعها القديم وهيه صغيرة وقال : والله يابوناصر.. جنها شهد اشتاقت للمناجر.. وانت تدري ماينوخذ عليها لأنها مينونة ومصرقعة من صغرتها..!!


واهني شهد ولعت نار وقامت اوقفت وهيه تطالعه وتقول بصوت عالي لــكن مو بصراخ : والله محد مينون ومصرقع غيرك يالطنطل..

هني الضحك عم على الجميع.. وكأن خلاص العقدة أنفجت ورجعت شهد بعودة فهد..!!

ورد فهد يناجرها ويقول للجميع وهو مستغرب من ردة فعلهم : شفتوا هذي العصبية كله من أكل الفلفل.. والمينونة بعد لابسه هالشال الهندي.. واشوي تكسر براسها وتهزه نفس الهنود.. وعقب بتاكل بــان مثلهم.. ووييييععع لوعتي جبدي.. والله يستر شبيطلع منها بعد..!!

بوخليفة وهو يحاول يهدي بنته : عاد حدك فهد عن بنتي.. جني عطيتك ويهه وايد..!! كل شي والا شهود حشاشة يوفي.. وكل شي تسويه حلو..

بس شهد كانت خلاص مفوره وماتستحمل أي كلمة زايده.. وقامت عن صحنها وهي ماكلت منه شي.. ومشت بعيد عن الطاولة وكملت لين وصلت لأخر الصالة.. ووقفت تكلم فهد بصوت فيه رجفة : أنت المينون.. والا في حد ياخذ دكتوراه بالفلسفة غير المعقدين..؟؟!!!
وطلعت ركض من الصالة وراحت غرفتها..

فهد من سمع دكتوراه بالفلسفة وهو متعجب..!!
شفيها هالخبلة..!! سوتني من دكتور جراح لمن دكتور فلسفة...!!!!!!!!

وهني طلال طالع فهد.. وعرف شللي يدور فباله وقاله بعدين أفهمك.. وكملوا غداهم بدون شهد.. لأنهم يدرون فيها بس تتنرفز أو تعصب تنسد نفسها.. ومحد يقدر يغير رايها ويردها للأكل..!!

:
:

شهد من صعدت غرفتها وهي متنرفزه من فهد.. وبروحها يوعانه ولاكلت شي.. من حرتها قامت طلعت من عندها كيس بطاط تشيبس صغير وبطلته.. بس شمت ريحته انسدت نفسها أكثر من قبل.. تركت البطاط وقامت تيددت لصلاة العصر.. وعقب الصلاة بنص ساعة انزلت تحت عشان تقعد مع عيال أخوانها شوي يمكن ترفه عن نفسها..

وطلعت شهد على الساحة الخلفية للمبنى من صوب بركة السباحة.. وقعدت عالكراسي اللي تحت الفرندة.. بس الشمس ماكانت توصلها والجو كان بارد شوي.. راحت وقعدت على الكرسي الطويل لبركة السباحة.. وتمددت عالكرسي علشان تتدفى بالشمس.. وترخي جسمها بكسل وهي تنطر أي أحد من عيال أخوانها اييها ويقعد وياها.. وعلى هالحال غفت عيونها الشفافة.. وما حست بالوقت ولابالظل اللي غطاها......!!!

:
:

غطاها ظل عملاق أسمر.. قام يطالعها ويتمقل بتقاسيمها الفاتنة والمثيرة اللي صارت عليها وجمالها الأخاذ اللي يسلب العقل.. وقعد صاحب الظل العملاق على الكرسي القريب منها وهو يتأملها.. وعلى شفايفه ابتسامة ساحرة.. وبعيونه لمعة غريبة ونظرة تذوب الصخر.. وقام يكلم نفسه..
: آآآه ما شاء الله وتبارك الله عليج ياشهد.. كل مالج تحلوين أكثر وأكثر.. وياما تمنيتج زوجة لي من قبل بس كنتي صغيرة.. وهذا اللي خلاني أبعد ولا أرد.. وعقب خذيتي هالخبل عصاموه وطيرتي عقلي مني.. وخليتيني اقطع الأهل واتم بالغربة.. وخذيت نيكول عشان أنساج وأنسى همي بفقدج.. ولكن الحين ماراح أتردد بالزواج منج وعمي مع أبوي كانوا مخططين لها الشي من قبل..... بس صبرج علي يا شهود.. لازم أروضج شوي لأنج مازلتي مُهره برية متوحشة.....
وخطرت على باله قصيدت الأمير خالد الفيصل


ياغـالي الأثمـان غلـوك بالحيـل
مـن يـوم سمـوك جميـل المحيا
شخص تمنيتـه على العـدل والميل
والحمـد للـه يـوم خـلي تهيـا
أشبهـه باللـي عسيـف من الخيل
تلـعب وأنا حبـل الرسـن في يديا
اورق غرامه مثل غرس عـلى سيل
مشهـات قـلبي يوم جـاني شهيـا
اعـن له عنـة هـل الكيـف للهيـل
ماذاق راعـي الكيـف ذقتـه هنيـا
حبـه سرى بي سرية الغيـم باللـيل
نسيـم ليلـة قـال للشـوق هيــا





وعلى هالحال تم فهد يناظر الجمال الملائكي النايم..
وهو إلى الآن موعارف بالمصاب اللي دمرها..

:
:
:
:

ياهل ترى شراح يكون ردة فعل فهد من يعرف بالحادث اللي صار لشهد..؟؟؟

وهل يحقق فهد مطلبه بالزواج من شهد..؟؟

بنتظار ردودكم وانتقاداتكم..!!

تقبلوا خالص تحيتي واحترامي..

أختكم المحبة..





عذبة التجريح





  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 25-01-2008, 05:11 AM
صورة زهرة التوليب الرمزية
زهرة التوليب زهرة التوليب غير متصل
نْفُوس نَحَبهَآ لِيْه آوجَعَتْنَآ ..
مستشــ¸.·* غرام *·.¸ـــاري
 
الافتراضي رد : ترويض المتمردة


روعة روعة

انسجمت مع الأحداث

رغم ان فيه اشياء تقهر

شهد أعجبتني شخصيتها ...


ننتظر الباقي

الله يعافيك يارب



  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 25-01-2008, 11:57 PM
صورة LEVIS الرمزية
LEVIS LEVIS غير متصل
©؛°¨غرامي جديد¨°؛©
 
الافتراضي رد : ترويض المتمردة


والله القصة تجننننننننننننننننننننننننننننن

مششششششششششششششكوورة


الا تطولين علينا بليييييييييييز


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 26-01-2008, 01:44 AM
صورة عذبة التجريح الرمزية
عذبة التجريح عذبة التجريح غير متصل
©؛°¨غرامي مشارك¨°؛©
 
الافتراضي رد : ترويض المتمردة


اقتباس:
المشاركة الأساسية كتبها زهرة التوليب مشاهدة المشاركة
روعة روعة

انسجمت مع الأحداث

رغم ان فيه اشياء تقهر

شهد أعجبتني شخصيتها ...


ننتظر الباقي

الله يعافيك يارب




الروعة حضورك ومرورك الكريم أختي زهرة التوليب الحبيبة

وشكراً لك يالغالية على تعقيبك الجميل وكلماتك العطرة

وبارك الله فيك يالغالية

أختك المحبة


عذبة التجريح






  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 26-01-2008, 01:52 AM
صورة عذبة التجريح الرمزية
عذبة التجريح عذبة التجريح غير متصل
©؛°¨غرامي مشارك¨°؛©
 
الافتراضي رد : ترويض المتمردة


اقتباس:
المشاركة الأساسية كتبها LEVIS مشاهدة المشاركة
والله القصة تجننننننننننننننننننننننننننننن

مششششششششششششششكوورة


الا تطولين علينا بليييييييييييز



تسلمين يالغالية على مرورك وتعليقك الجميل أختي الحبيبة

ولك خالص المحبة والتقدير

لاحرمني الله من تواصلك وطلتك البهية


أختك المحبة


عذبة التجريح






  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 26-01-2008, 01:59 AM
صورة عذبة التجريح الرمزية
عذبة التجريح عذبة التجريح غير متصل
©؛°¨غرامي مشارك¨°؛©
 
رد : ترويض المتمردة





الجـزء الثالـ 3 ـث






شهد وهي غافية على الكرسي الطويل اللي يم بركة السباحة.. ومن غطاها الظل لفترة من الزمن وحجب عنها أشعة الشمس الدافية وهي حست بقشعريرة برد تسري بجسمها..!! وفتحت عينها وهي مو مستوعبه.. وتناظر العيون الوسيعة الساحرة ذات السواد الحالك وهي مابين اليقظة والحلم.. ورمشت بعيونها الشهلا الشخص الأسمراني الوسيم الجذاب.. واللي على وجهه ابتسامة ساحرة.. ومن أستوعبت فتحت عينها على كبرها.. وفهد خفق قلبه للعيون الزجاجية الشفافة..

شهد وبنبرة فيها خوف ودهشه : يالمينون من متى وأنت هني..؟؟!!

فهد وابتسامة ماكرة على وجهه : من يوم دشيت بجنتج يالحورية..

شهد ارفعت راسها وقعدت على حيلها وبنبرة حادة : ابليس ماله مكان بجنتي..

فهد وضحكة ساحرة وجذابة وببرود رد : هههههههههههههههههههههههههههههه.. مقبوله منج يالقطوة..

شهد ماتواطن هالعلوقة.. واللي يقول عنها قطوة تتحول لنمر لأنها ماتواطن القطاوة ولاتحبهم.. وبالأساس محد طلع عليها هالعلوقة غير فهد..!!

شهد ردت بحدة وعصبية : القطوة مرتك يالعتوي..

فهد وبنفس النبرة : ههههههههههههههههههههههههههههههههه.. صــاااااااجة وماجذبتي.. ومرتي قطوة وأحــــــلى قطوة.. ههههههههههههههههههههههههههههههههههههههههههههههاااا ااي..

شهد مندهشة من رد فهد وتقول بنفسها : ...........!!!!!!!
هَـوْ هذا شفيه..!! تخبل الحمد لله والشكر..!!

قام فهد من على الكرسي اللي مجابلها تركها وراح للجهة الثانية من المزرعة.. وقامت شهد من مكانها اهي الثانية ودخلت داخل البيت وراحت تدور على بقية الأهل وين قاعدين..!!

وتشوف عيال أخوانها قاعدين من الجهة الثانية للمزرعة صوب الحديقة.. واليهال كانوا يلعبون على الدوارف.. وشافت أختها منى قاعدة مع بنتها منيرة.. ومن شافت منيرة خالتها شهد مجبلة صوبهم.. هدت أمها وراحت تركض عند الدوارف تلعب مع بقية اليهال..

مشت صوبهم شهد وهي تسأل منى : وينج اليوم ماشفتج..؟؟!!

منى وهي تقوم وتسلم على شهد : أبد كنت أنوم نواري.. بروحها مستعسرة ومادري شعلامها..!!

شهد : يمكن شي يعورها..!! أو يمكن بطنها ماغصها..!! جان سويتيلها شوية ينسون مع حبة حلوة أو كراوية..!!

منى : لاااا اماظنتي بطنها..!! وشكلها جنها بتمرض علي والله يستر.. وهي بروحها من غير شي حنّانّة والوصواصة تشتغل..!!

شهد : هههههههههههه.. فديتها حياتي نواري.. يكفي إنها تشبه أمي طيبة.. بس بالحنة طالعة يا عليج أو على خالد..!! وخالد ماخبرته وصواصة وبجاي.. و طول عمره هادي وحنون وعمره ما لعوز أو أذى حد..!!

منى : عيل أكيد طالعة علي.. ههههههههههههههههههههههههههههههههههههه.. تعالي صج إلا بقول لج.. شصار على الغدا بينج وبين فهد..؟؟!!.. خالد ياني وميت من الضحك ويقول.. حرب البسوس اللي خمدت من سنين.. ردت قامت بينج وبين فهد.. ويقول شهد شكلها اشعلت فتيل الحرب اليوم..؟؟!!

شهد ترد بقرف وبتذمر : أأأأأأوووووففففففف.. والله هالفهد السخيف.. تعرفينه من عمره وهو كله يتحرش فيني ويناجرني..!! جني ماكله حلاله أو ذابحه أحد من اهله..!!!

وسمعوا صوت فهد اييهم من ورى شهد : أول شي ياأم لسانين.. أنا محد يقدر ياكل حلالي.. أو يقرب صوبه.. وبعدين السخيف اللي تتكلمين عنه.. راااااااحـ.......
وسكت شوي يسوي نفسه يفكر ورد كمل : وإلا أقولج.. بعدين بتعرفين شراح يسوي فيج..
(( وقال الجملة الأخيرة وهو مدنق راسه وكان قريب من وجهه شهد وغمزلها )) وقال لها وكأنه يساسرها : السخيف راح يروضج ويكسر راسج يالقطوة..

شهد وبكل عصبية وبصوت عالي : القطوة مرتك يالعتوي.. قلت لك لاتقول عني قطوة مره ثانية..

وهني منى انبهرت من رد شهد..!! وافقعت من الضحك وهي تقول لفهد : هههههههههههههه ههههههههههههههههههههههههههههههههههههههههههه.. حط بالك لاتقلب عليك وتتحول من قطوة لين أسد..

فهد رد بتحدي فيه البرود والغرور : أحــــلى.. علشان أتلذذ وانا أكسر راسها.. واوريها الشغل العدل.... نـعـــــــــم احنا ماعندنا حريم يصارخون ويعلون اصواتهم على رياييلهم..

انقزت شهد من اسمعت هالكلام وصرخت بويهه فهد : اتخـــسي.. آنـــــا أصـــير حرمتك..؟؟!!
روح روح رووووووح.. روووووح أغسل إيدك بالصابون وشم إيدك..!! نيوم ( نجوم ) السما أقرب لك مني يــــادكتور المعقد..

وقامت شهد تبي تطلع من المكان اللي قاعدة فيه وبتدش داخل.. ولكن فهد سد عليها الدرب وقال لها بكل برود واهو رافع حاجبه : على وين..؟؟!!.. أنا ماخلصت كلامي وياج..
وكان فارد جسمه وصالب طوله جدامها ويبين كأنه عملاق وساد عليها الدرب..

قامت شهد وكل شياطين العالم تناقز جدامها.. وهي تصرخ بويهه فهد وتدزه من جدامها : أنا ماأحاجي المخابيل اللي مثلك.. وخر عن دربي لا ييك شي ماشفته طول عمرك..!!

ودزته شهد بكل قوتها وهي تركض وتدش داخل.. وفهد ومنى واقفين يطالعونها وميتين عليها من الضحك.. ومنى قام تدمع عينها من الضحك.. ومن الصدمة والفرح بردت أختها..!!

وصلت شهد غرفتها وهي تشهاق بقوة وبعصبية.. وهالشي خلاها تفقد السيطرة على أعصابها
وقامت ترجف من القهر والحره اللي فيها.. حاولت تهدي روحها عشان لاتتأزم صحتها.. وحست بدوخة لفت راسها.. فنسدحت على السرير عشان تهدي.. وتمت على هالحال ليمن أسترخت شوي وريحت.. وسمعت صوت أذان المغرب على موبايلها وقامت راحت تيددت وصلت المغرب..

:
:
:
:

الرياييل صلوا المغرب جماعة وكان يأمهم بوخليفة كالعادة لما يكونون في المزرعة.. ومن اخلصوا من الصلاة وتسننوا.. طلع فهد مع صديق عمره طلال يتمشون بالمزرعة صوب الأصطبلات.. بعيد عن البقية..


فهد : إلا بسألك طلال أمي نورة شلون توفت..؟؟!!.. أنا ياني الخبر عقب فترة بس ماقالولي شالسالفة بالضبط......!!!

وهني تنهد طلال بقوة وحس كأن الحادث أستوى توه.. وردت عليه جميع الذكريات المره والحزينة.. على فقد أمه نورة واللي اهيه مرت أبوه وأم شهد.. وتم فترة ساكت كان يحاول
يرتب أفكاره ويستجمع الصور المؤلمة.. علشان يخبر فهد بكل شي صار وياخذ رأيه بحالة شهد الصحية..!!

طلال : يافهد.. أنا أول شي ماأدري شنو قالك خالد بخصوص الحادث..!! وكل الأمور اللي أستوت.!!

فهد : بصراحة أنا ياني الخبر مو من خالد.. أنا سمعته من جماعة كويتيين كانوا ياييبين أبوهم امريكا علشان يتعالج.. وسمعت منهم الأخبار..

طلال : إيــــه.... يمكن قروه بالجرايد لأن الحادث إنذكر بالجرايد من بشاعته وقوته.. والله حفظ شهد وطلعها من الحادث حية ولله الحمد..

وهني انصعق فهد من سمع إن شهد كانت مع أمها بالحادث : شهد كانت مع أمها بيوم الحادث...؟؟؟

في شي حبيت اوضحه لكم وهو.. حركة الشاحنات عندنا حزة الظهيرة لايحتمل .. يكون كل سايق شاحنة قاطر معاه يمكن 10 حاويات.. واحسبوا كل حاوية يطلع جمن طن فيها..!!؟؟ وسواق الشاحنات عندنا هني حسبي الله عليهم تقول قاعدين يسوقون فيراري مو شاحنة..!!


طلال : إيـــه.. وكانت راده من المشتشفى مع أمي نورة.. وبالطريق وأنت تعرف مستشفى الـ...... وهو يم مينا الشويخ.. من قبل أربع سنين وقبل جسر الري.. وعلى حسب كلام الشهود اللي شافوا الحادث.. كانت جدام الجيب اللي تسوقه شهد شاحنة.. وفجأة السايق لزم بريك قوي ( ضغط على كابح لوقف الشاحنة ).. وأنفتحت بوابة الحماية الحديدية للمقطورة.. وشهد دعمت بالشاحنة وانعدمت السيارة.. وأمي نورة...............
(( شهق طلال ودمعت عيونه وكأن الحادث حصل للتو ويتذكر يوم شاف جثتها الله يرحمها.. ماتعرف عليها إلا من الخاتم اللي كانت لابسته لأنها تشوهت بالكامل من الحديد الزجاج السيارة.. ))
وكمل وقال بحرقة : أمي نورة توفت بلحظتها.. وشهد كانت تنزف من الجروح والكسور اللي بجسمها.. وانقلوها للمستشفى وهناك بغرفة العمليات.. وعلى ايد دكتور الله لايوفجه ولايبارك فيه.. أرتكب أبشع جريمة بحق شهد..

فهد شخصت عينه على طلال وهو مبهت.. وحس وكأن أطرافه انشلت وتجمدت وقال : شـ.. أشـ.. اشلــون..؟؟!!!

طلال وبصوت مجروح ودموعه ماوقفت : شهد كانت تعاني من كسور بضلوعها ونزيف بالرئة.. وكسر بإيدها اليمين يحتاج للتجبير فقط.. قام الحيوان وارتكب خطأ فادح أثناء العملية.. وحب يستر خطأه والجريمة فبتر لها أيدها اليمين من الكوع..

فهد شهق شهقة قوية وحس كأن الدنيا ظلمت بعينة.. وانعدم الأكسجين من الجو حوالينه..
وقام يصارخ على طلال وهو يهزه بكل قوته وكأن يحط حرة الجراح فيه : لاااااااااااااااءءء..!! واشلون جــذي..!! مايصــير حـرااااااام عليكم..!! واشلون خليتوه يبتر إيدها ووافقتوا على هالشي....؟؟؟!!!!

طلال اللي كان يبكي بحرقه قال مباشره لفهد : الحيوان بتر ايدها بدون أخذ الموافقه منا وبدون مايرجع لنا عشان يخبي خطأه.. وقام زور بالتقرير على كيفه.. وكتب إن ايدها كانت معطوبه بالكامل وصار فيها تسمم.. بس الله افضحه بواحد من المعاونين.. قال إن الجراح تلف العصب اللي بإيدها والشريان فصار معاها نزيف قوي.. وقام بتر لها إيدها عشان يخش جريمته..

فهد والصدمة جمدت مخه وشلته عن التفكير بالخبر الصاعقة.. وقال بكل حسرة وألم : حسبي الله ونعم الوكيل.. حسبي الله ونعم الوكيل.. حسبي الله ونعم الوكيل......

وقام يرجف من الغيض والحزن.. وحس بالنار تسعر في يوفه.. وماكان عارف شيسوي أو شيقول.. لحظات توقف العقل وجميع المدارك تعطلت للحظة.. حسها فهد كأنها دهر مرت عليه..
وصار مثل الأسد الهايج والجريح اللي يفتر رايح وراد بالمكان وهو مقيد ومو عارف شيسوي..

وفجأة قال لطلال : أنا بروح لشهد لازم اشوفها وأتكلم معاها....

وقطعه طلال بكل قوة.. ومسكه من كتوفة وقاله : لا يافهد واشتبي تقول لها..!! وشهد اللي فيها مكفيها.. ويكفي إنها فاقدة جزء من ذاكرتها.. وهي تتحسب إن أمها توفت أيام الغزو لأن أيامها مرضت وايد.. وبالنسبة للحادثة ماتتذكر أي شي عنه..................

فهد تم ساكت من توالي الصدمات بالأخبار السيئة واهو يسمع كلام طلال..!!!!!!!

وكمل طلال بعد فترة سكوت : ........ الأدهى والأمر إن شهد عرفت إنها تعرضت لحادث.. وأن الجراح بتر يدها بالخطأ عقب.. وهذا الشيء خلاها تعيش بمعاناة طويلة وحالتها النفسية كانت بالحضيض.. وكرهت وأحتقرت كل شي بالعالم إسمه دكتور طبيب أو جراح.. وبنظرها جميع أطباء العالم جزارين ومعدومين الأحساس والضمير.......
سكت طلال برهة وبعدين كمل : وعلشان جذيه خبرناها بإنك دكتور فلسفة تدرس الطلبة بالجامعة فقط ومالك علاقة بالطب نهائي.. وإلا كان ارفضت تشوفك أو تسمع صوتك........

فهد وبتنهيدت ألم طويييييييلة ودموعه سايلة على وجهه : آآآآآآآآآآآآآآآآآآآآآآآآ ه ه ه ه ه ه لاحول ولاقوة إلا بالله.. أقسم بالله إن هالخبر أشد علي من خبر وفاة أبوي.. هذا الخبر أكره وأقسى خبر سمعته بحياتي.. الله يكون بعونج يا شهد ويكون بعون الجميع..

طلال : الحمد لله على كل حال.. قدر الله ما شاء فعل.. وهذا الشي مكتوب في لوحها عند الله سبحانه.. ومنو احنا اللي بنكون أرحم أو أفهم من الله سبحانه.. كل شي له حكمه فيه.. والإنسان مايقول عند المصاب إلا الحمد لله الذي لايحمد على مكروه سواه.. اللهم آجرنا في مصيبتنا وأخلف لنا خيراً منها يارب العالمين.. اللهم آمين..

فهد : لاحول ولاقوة إلا بالله.. لاحول ولاقوة إلا بالله.. حسبنا الله ونعم الوكيل..
اللهم آجرها في مصيبتها وأخلف لها بالخير.. يارب العالمين..


وبعد صمت دام أكثر من نصف ساعة مابين فهد وطلال.. وكان فهد يفكر فيها بعمق باللي استوى على حبيبة عمره وبنت عمه..

فهد بهدوء : أنا لازم أتحرك وأسوي شي بسرعة..!!

طلال رفع راسه يناظر فهد ويقول : شــــــــي..؟؟!! مثل شنو تقصد..؟؟؟

فهد : انا بكلم عمي الليلة..
وسكت شوي وكأن الفكرة تبلورت براسه عدل وكمل وقال : إيــــــه... انا بكلم عمي الليلة.. وأخليه يزوجني شهد بأقرب وقت ممكن..

طلال : أنت شتقول يافهد.. أنت نسيت إن شهد ماتواطن الدكاترة وتخاف منهم...؟؟!!
وفوق كل هذا نجرتك وياها اربع وعشرين ساعة..
وهواشكم اليوم أكبر دليل على أنها ماراح تقبل فيك..

فهد بوثوق تام : أول شي ماراح تدري إني جراح.. وثانياً من قالك إني بنتظر موافقتها...!!
لاااااا.. اهي راح تتزوجني غصباً عنها.. ليش إنت ناسي إنها لي وعلى وصية أبوي الله يرحمه..؟؟ والغلطة القديمة لما زوجتوها لعصاموه ماراح أخليكم تكررونها.. انت سامع ماراح أخليكم تكررونها..

طلال : أذكر الله يافهد.. وأبوي يوم زوج شهد من عصام كان بموافقتها واهي اللي اصرت على هالزواج بعد.. وابوي حزتها كان ناسي الأتفاق مع عمي الله يرحمه.. وبعدين المآسي اللي توالت علينا من الغزو اللي يانا.. واستشهاد سلمان رحمت الله عليه.. وبعدها بثلاث سنوات استشهد مشاري الله يرحمه.. هالأشياء خلت أبوي ينكسر.. ومع اصرار شهد وخالتها نورية.. ابوي وافق على الملجة.. والا صدقني يافهد أبوي مايتمنى شهد لغيرك ليومك هذا..

فهد وبتنهيدة حسرة وألم على مافات : أنت تدري أنا شكثر تعبت نفسيتي بالغربة ياطلال.. وأنت عارف إن شهد حلم حياتي بس كانت لحظتها صغيرة.. ويوم سافرت كان عمرها يمكن سبع أو ثمان أسنين.. وبعدين بالنسبة لنيكول أنا تزوجتها عقب ماياني خبر ملجة شهد على عصام ولد خالتها بس علشان أنساها.. ونيكول طلقتها من زمان وما بيني وبينها أي شي....
وسكت برهة وكمل بصوت محروق وبتحدي : بس تدري شهد راح اتزوجها غصبن عنها.. عيل انا يالقطوة تفضلين علي عصاموه الرقلة..!!
وأنا بكلم عمي الليلة بالموضوع.. وآخذ برأيه..!!

طلال : هههههههه.. إن ييت على أبوي فموافق ووده من زمان بهالشي لإنه كان يحاتيك ووايد خايف عليك.. خصوصاً آخر سبع سنين من قبل رجوعك من أمريكا لأنك قاطعتنا حتى بالأتصال.. يعني أبوي وبقية أخواني أضمنهم بالموافقة.. بس الركة على العنودية أم راس يابس قطوتك يالعتوي.. اللي راح تطّلع عينك ومستعدة تذبحك.. لأنها بعد مافل عصام أرتباطهم واهيه عايفة الدنيا من اللي شافته وسمعته..

فهد : أحسن قلعتها.. علشان تعرف إني انا بس اللي راح يتزوجها.. والا عصاموووه يخسي ياخذها.. والحمد لله انهم انفصلوا.. وبالنسبة لشهد أنا حطيتها حافز جدامي لتحديها هالشرسة.. وبتشوف بالقريب إذا ماخذيتها حتى لو بالحيلة ماكون أنا فهـد الــ.......

طلال : هـيْ هـيْ هـيْ.. إنته شفيك..؟؟!! جنك نسيت اللي قاعد اتكلم عنها أختي..!! ويالله من الحين أقولك ماكو زواج ويالله فارج وعطني مقفاك..

فهد : ههههههههه.. متأكد حضرتك..!! وأنت الوحيد اللي داري بالجدر يالملاس..

طلال : الحين أنا الملاس يالجدر.. ههههههههههههههههههههههههههه.. والله أيام كانت.. وليتها تعود وأنسي شهود كل الهم والغم اللي شافته.. بس تصدق إنها اليوم ردت شهد الأولية النجرية.. حسيت فيها طلعت من قوقعتها شوي..!! وماشفت أبوي واشلون دمعت عينه من الفرحة بردة شهد لطبيعتها...!!!

فهد : وأنا أقول اشفيكم اليوم على هالنجرة ومستانسين..!! قلت يمكن تخبلتوا أو شي ثاني هههههههههه..!! مادري..
وردت شهد لعادتها القديمة.. طبعاً وهذا كله بسبت الفارس المغوار فهد الـ...... واللي شهوده تموت عليه من وهي صغيرة.. مع إنها تكابر وتعاند القطوة..!!

طلال : يعني كلش الحبيب ماجنك ميت عليها.. وتخبي هالشي بمغايضها ونرفزتها علشان بس تناجرك وتتصارع وياك.. وكنت أنا اللي آكلها من أبوي لما تنقهر وتروح تبجي عنده واتشكى..!!
:
:
وبعد ماعرف فهد بالحادث اللي استوى على بنت عمه.. والمصايب اللي حصلت لها من بتر ايدها اليمين.. وفقدانها لجزء من ذاكرتها.. صمم إنه يكلم عمه بموضوع زواجه من شهد..
:
:
بعد العشاء فاتح فهد عمه بوخليفه مع بوحمد وبوناصر وبو ضاري بالموضوع.. ووافقوا على هالشي وفرح بوخليفة لإنه فهد أختصر عليه نصف المشوار.. واللي فيه مصلحت شهد وبيشوفون طريقة علشان يقنعون فيها شهد بالموافقه..!!

هههههههههههه.. مسكينه شهوده ماتدري على اللي يطبخونه من وراها..!! بس طبعا كله لمصلحتها.. ولإنها العزيزة والحبيبة على قلوبهم..

:: ::
:: ::
:: ::
:: ::

باليوم الثاني قامت شهد على صلاة الفجر وتيددت وخلصت الصلاة والأذكار اليومية.. مع إنها ملتزمة بجميع فروضها وطاعاتها والسنن والنوافل.. إلا إنها مومتحجبة بس محتشمة بلبسها..

وبحكم إنها انعزلت وايد عن الغرب وعن المجتمع فما قامت تطلع بره البيت.. يعني كل اللي معاها ويشوفونها أغلبهم هم محارم لها.. وبصراحة هم لأنها ماكانت تقدر على تسريح شعرها وربطه ولبس الحجاب وتثبيته بالدبوس أمر صعب جداً عليها.. فالعملية كانت شاقة جداً عملها بيد وحده عليها.. واهي إلى الآن ماتأقلمت على وضعها اليديد.. يعني من عقب ماكانت تتحرك وتسوي كل شي بإيدينها الثنتين.. وفجأة تشوف نفسها مربوطة ولاتقدر تسوي أبسط الأشياء اللي كانت دوم متعوده تسويها طول عمرها.. وايدها اليمين اللي تعمل فيها كل شي.. الحين حتى الكتابة ماتقدر تكتب بخط مفهوم بإيدها اليسار..
صارت الحياة بالنسبة لها صعبة ماتنطاق.. لأنها ملزومة تطلب من الغير على تقضية أمورها الشخصية.. هل تتصورون وشلون صعبة على الإنسان هذه الأمور..!!
فمن ياترى يقدر يلوم شهد لما تتنرفز أو تزعل لما تشوف نفسها عاجزة عن عمل أمر بسيط حتى الطفل يقدر يسويه..!!
:
:
وعلى الساعة 6:30 الصبح.. وبما أن الفجر يأذن على الخمس والخمس ونصف بالكويت بهالوقت خلصت شهد من صلاتها وأذكارها.. ونزلت تحت للمطبخ وحطت لها ماي بالغلاية علشان.. تسوي لها كوب نسكافيه بدون سكر لإنها حست باليوع قارصها عدل.. وخصوصاً إنها ماكلت شي من أول أمس الغدا.. وعلى العشا البارحة تعذرت بالصداع ونامت بعد صلاة العشا..

طلعت شهد تتمشى بالحديقة وكانت لافه جسمها كالمعتاد بالشال الهندي الكشميري الطويل.. وشعرها الناعم الغجري مفلول ومتمرد على طول ظهرها وكتوفها.. وبعض الخصلات طايحة على وجها الملائكي.. وهي تحبه مفلول كطبيعتها ماتحب التقيد.. تحب الحرية والإنطلاق والتمرد بكل شيء وعلى أي شيء.. وهذا طبعها من صغرتها..
قعدت على كرسي الطويل بالحديقة مجابلة النافورة وهي سرحانه.. والشمس أرتفعت بالسما وكانت باردة.. وبإيدها كوب النيسكافيه ترشف منه.. وتتنطع بطعم مرارته كمرارة أيامها وقسوة سنينها.. وتفكر بعمرها اللي قام يعدي ويركض.. وبعد ثلاثة أشهر بيصير عمرها 29 سنة وهي بدنيتها وحيدة.. ومن تقاعدت حتى صديقاتها اهجرتهم بسبت حالتها النفسية.. واللي محد كان يستحملها غير أهلها اللي عارفين بمقدار الألم والغربة اللي تحس فيها..!!

وخرجت تنهيدة الآآآآآآه والألم من جوفها.. ودمعة شارده اهربت من عينها.. انزلت وسالت على خدها الحرير.. وكان منظرها لوحة فنيه حزينة ورائعة بنفس الوقت واسحرت قلب اللي قاعد يناظرها بدون علمها..!! ورجفت عضلة قلبه وزاد النبض فيه.. وصرخت جوارحه كلها بحب وعشق بنت عمه.. تقرب منها وهيه موحاسة فيه.. وقعد على يسارها بالكرسي الطويل وقريب منها..
وقال بصوت هامس حنون يوصل لها : الدنيا ماتسوى نذبح نفسنا عليها ياشهد.. وربج يعطي كلن رزقه بهالدنيا.. والإنسان ماعليه إلا انه يحمد ربه بالشدة والرخاء.. وبالصحة والمرض ويتوكل عليه.. ولاييأس من رحمته سبحانه..!!

شهد وهي سرحانه وسمعت كلامه تنهدت.. وبعدين استوعبت من اللي قاعد يمها ويكلمها..
لفت راسها عليه وهي تقول بهمس مسموع : الحمد لله على كل حال..
وبلحظة انقلب مزاجها المتمرد وقالت بصوت أعلى شوي : أنت ماتعرف تخلي الواحد يقعد بروحه..!! يعني لازم تلاحقني بكل مكان وتناجرني...؟؟!!

فهد : بُــــلْ.. توج شحليلاتج أمداج قلبتي يالقطوه..!!

وطبعا فهد أنسحر بتغير لون عيونها بلحظة.. بحسب مزاجها من الأصفر العسلي الفاتح إلى لون غريب وجميل يدخل معاه اللون الأخضر.. وضحك حتى يغيضها وكمل : ههههههههههههه.. وصج من سميتج القطوه.. حتى عيونج تقولب بلونها نفس القطاوه..!! (( وقام قلد صوت القطوه بس عشان يغيضها )) مِـيَــــاووووْ وهو يقولها كان يطل بويهها.. ويضحك عليها..

شهد بكل ترفع وغرور ردت : الحمد لله والشكر.. الطول طول نخلة.. والعقل عقلـ......

وقبل لا تكمل كلامها فهد فتح عينه عليها بنظرة تهديد.. ومسكها من ايدها وقال : حطي بالج زين.. وقرب وجهه من وجهها وهو يقول لها بالهمس وبتهديد : تأدبي وأنتي تحاجين ريليج
يالقطوه المتوحشة.. وإلا ترى لسانج بقصه لج يالحلوه..

شهد منصدمة بكلام ولد عمها.. وتحاول تسحب ايدها من ايده بس طبعا وهو شدد عليها.. وتم ماسكها وهو مقرب من وجهها.. ويطالع كل مايختلج بعينها وبكيانها من غضب وخوف واحراج.. وكان نبضها يسابق الخيول بهاللحظة.. وبدت تحس بالدوخه والدوار.. لأنها مو ماكله شي من أول أمس.. وزاد عليه الأضطراب من قرب فهد لها.. والحمد لله إن كوب القهوه اللي بإيدها كان فيه شوية قهوة وبردت.. طاح الكوب من إيدها وهي توقف على حيلها وتناثرت القهوة على ثيابها.. وزادت عليها الدوخه وترنحت بوقفتها مسكها فهد بسرعة وسندها عشان ماتطيح.. وقام شالها بسرعة ودخلها داخل وسدحها على الجلسة اللي بالصالة الكبيرة.. ومسك إيدها من الرسغ عشان يشوف نبضها.. وكان حاط عينه على حركة صدرها عشان يشوف تنفسها.. وطبعا كل هالأشياء ماانتبهت عليها شهد.. وعرف انه عندها هبوط وضعف عام من الرجفه.. وعدم الأكل لأكثر من 24 ساعة.. وقام المطبخ بسرعة يجيب لها أي نوع من العصاير علشان لايغمى عليها.. وبالمطبخ صادف منى وقالها تطلعله أي شيء حالي.. حتى لو قطعة كاكاو حق شهد وعطته الكاكاو.. مع بطل الماي ورجع لشهد.. وخلاها تاكله وشربها الماي..

وبعد ربع ساعة صارت أحسن.. قامت بتطلع غرفتها مسكها فهد من إيدها وقال لها بحزم : وين رايحة..؟؟!! خلج الحين منى بتييب الريوق وقعدي تريقي عدل.. وبعدين أنحاشي وين ماتبين..!!

سكتت عنه شهد وماردت عليه لين حطت أختها منى الريوق.. ومع إنها مو من أنصار الريوق من فير الله.. بس من شمت ريحة الخبز المحمص ومعدتها قامت تحن وتعزف الألحان من اليوع.. ومن سمع فهد صوت معدتها وهو ومنى أنفجروا بالضحك عليها.. وطبعاً شهد صار وجهها طماطة من الفشيلة والأحراج.. بس اليوع مايرحم.. أكلت لمن أشبعت واحمدت الله وشكرت اختها منى وقامت بتطلع فوق..

وفهد يتحلطم بصوت عالي : الحين أنا المتعني اللي شلتها ووكلتها وشربتها.. حتى كلمت مشكور مافيه...!!!
يالله معليه كله يهون في سبيل العيون الذباحة..!!

طنشته شهد وكملت لين غرفتها.. وانسدحت ونامت مرة ثانية..

:
:
:
:

ياهل ترى هل يستطيع فهد الزواج من حبيبة المشاكسة من أيام الطفولة........؟؟

بنتظار توقعاتكم وردودكم..!!

أختكم المحبة





عذبة التجريح





  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 26-01-2008, 10:56 AM
صورة LEVIS الرمزية
LEVIS LEVIS غير متصل
©؛°¨غرامي جديد¨°؛©
 
الافتراضي رد : ترويض المتمردة


ياااااااااااااااااااااااااااااااااي يجنن يجنن يجنن

والله تحفة

مشششششششششششككورة


بانتظارك


  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 26-01-2008, 12:47 PM
صورة الزعيـ A.8K ـمه الرمزية
الزعيـ A.8K ـمه الزعيـ A.8K ـمه غير متصل
δЯέαмş
مستشــ¸.·* غرام *·.¸ـــاري
 
الافتراضي رد : ترويض المتمردة


× * ×

بسم الله

عذبة التجريح .. منورهـ القسم

؛؛

عوافي على النقل وبالتوفيق لك فيها

* × *



Powered by vBulletin® Version 3.8.7
Copyright ©2000 - 2014, vBulletin Solutions, Inc.
SEO by vBSEO 3.6.1
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم