سخرية فكرية

[وهم عمري]

عالمنا عالم غريب عجيب ..
يسير بالعكس ..
الكرة الأرضية تدور من اليمين للشمال
طيب الناس كيف يدورون
أنا قسمتهم لفئات



1- فئة بسيطة وهم الدراويش يدورون بنفس دوران الارض
مايقدرون يغيرون مسارهم لأنه اسلم حل لهم
ممنوع يتكلمون
ممنوع يناقشون
ممنوع يبدون آرئهم



2- فئة سلبيه او محلك سر
هذولا واقفين في محلهم مايدورون
لا اسمع
لا أرى
لا أتكلم



3- قسم ثالث يدور هو بالأرض على كيفه
يمين
شمال
حسب مزاجه
اسميهم هنا
( المفتريين)
أو بعبارة اكثر لطفا
( الأرستقراطيين )


سؤال
ليه دائما الطبقة الضعيفة تحقد على الطبقة المخملية
وتحس أنهم سبب تعاستهم


الفئة الرابعة
واللي أعتبر نفسي منهم
هم المغامرين
أو
اللي ما عندهم شيء يخسرونه
يسيرون عكس اتجاه الأرض

وبعلمكم شوي من فنونهم الجهنمية



أولا ( قلب الطاولة )

بدل ما يكون هو المخطي يصير هو الضحية


وهنا نصائح لمن يريد تعلم فن قلب الطاولة
1- ( ابدأ من العثرات)
بداية ناظر الموضوع بعمق ودور العثرات ومن خلال العثرات أبدا أنت بنقضها ..

مثلا .. أنت مزعل خويك او انتي مزعلة صديقتك
هو الحين بيجي يلومك ويسدر راسك
شف أنت سبب الزعل وخل تزعيلك له سببه انه هو قبل مزعلك
2- الحين انت خليته هو المخطي المفروض تزعل منه
وهو اكيد بيجي يتعذر منك لا ترضى خلك
زعلان وأكثر من التشره والغمز والتلميح

3- آخر شي
سو نفسك كريم وحبيب وسامحه وعلمه انك مسامحة من طيب نفسك ولأنك أصلا ما تشيل على أحد

كذا بتصير أنت أحسن منه

شفت وشلون بدل ما تصير مجرم صرت ضحية





( الصمت عند تكلم الناس والكلام عند صمتهم )
سبحان الله عندهم قدرة عجيبة على اختيار الوقت المناسب للحديث
أنا أعتبرهم قنابل موقوته

في الوقت اللي الناس كلهم يحترفون الصمت
بسبب الخوف
تلقاهم هم اللي يتجرؤون ويتكلمون
عشان تكون الأضواء مسلطة عليهم
وكأنه يحركون الموية الراكدة
نصايح لتعلم فن ( الصمت والكلام)

أولا: الوقت اللي يكون فيه كل الناس يتكلمون ويناقشون
أنت اسكت لأن صوتك بيضيع مع زحمة الناس
خلك بعيد تراقب بصمت
صمتك يمكن يثيرهم أكثر من كلامك
لأنك تسوي شيء عكس الناس
وبكذا تلفت الأنظار لك
طيب لو كان فيه حدث او مشكلة
والناس كلهم صامتين محد يتجرأ يتكلم
هنا يجي دورك يابطل
لا تسكت
لأن صمتك بيضيع مع صمتهم
هنا تكلم بصوت عالي
وقل آرائك
وناقش بقوة
الكل بيلتفت لك ولوجودك
وبتكون سويت شيء يثري مسيرتك




هذي تقسيمات المجتمع حسب تفكيري وحسب وجهة نظري



أنت
وأنتِ

الخيار لكم

كيف تريدون أن تسيرو
مع الأرض
عكس الأرض
التوقف عن السير


بقلمي
وهم عمري

[غلاي إنت]

يعطيك العافية ع الطرح الرائع والمميز


الف شكر

[الحوفزان]

شكراً...

فالجدل وقود السفسطائيين, والحوار مداد المتكلمين

وهو طريقة منطقية لتقوية أخطاء الآخرين....

أما ا لسير فأنا من أنصار أبي العلاء المعري حيث يقول:


سر ان اسطعت في الهواء رويداُ....لا اختيالاً على رفات العباد ِ

صاح هذي قبورنا تملأ الأرض........فأين القبور من عهد عـاد ِ

وتقبل سيري ولك خالص ودي....

[قالب ثلج]

في الوقت اللي الناس كلهم يحترفون الصمت
بسبب الخوف
تلقاهم هم اللي يتجرؤون ويتكلمون
عشان تكون الأضواء مسلطة عليهم
وكأنه يحركون الموية الراكدة
نصايح لتعلم فن ( الصمت والكلام)

" خــــير الـــكـــلام ما قل ودل "

[مكنوز]

:

سؤال
ليه دائما الطبقة الضعيفة تحقد على الطبقة المخملية
وتحس أنهم سبب تعاستهم

خلينا نغير كلمه وحده من صيغة السؤال
ليه دائما الطبقة المسحوقة تحقد على الطبقة المخملية
^-^

اللي ما عندهم شيء يخسرونه
يسيرون عكس اتجاه الأرض

وبعلمكم شوي من فنونهم الجهنمية

أولا ( قلب الطاولة )

بالعكس !
اسلوب قلب الطاوله ، منهج من يريد الربح دائماً ولديه الكثير ما يخاف عليه من الخسارة

بدل ما يكون هو المخطي يصير هو الضحية

أعلم أنها سخرية فكرية
ولكنها حقيقة الواقع المحبط :(

طيب لو كان فيه حدث او مشكلة
والناس كلهم صامتين محد يتجرأ يتكلم
هنا يجي دورك يابطل
لا تسكت

غالباً الابطال يختفون بعد هذا المشهد : )

:

وهم عمري
موضوع رائع وشيق وساخر
ممتع بحق ، سلمتِ وسلم رقي وتميز قلمك

: