[همسي لحبيبي]

الجزء السادس عشر...(((هنا وقفت)))))







بعد ما طلع عبدالله عن رفيعه .. يلس يفكر ويراجع نفسه بالي ناوي يسويه .. طلع من البيت واتصل تيلفون بشيخه .. ردت عليه اليازي وطلب منها يكلم شيخه ..
حست اليازي من صوت عبدالله .. ان عبدالله فيه شي .. والظاهر انه يبى يكلم شيخه بشي مهم ..

وقفت اليازي حذال اختها وهي تسمعها تكلم عبدالله ..
شيخه : هلا عبدالله .. لحقت تتوله عليه ..
عبدالله : هلا فديتج .. اكيد اني اتوله عليج و كل لحضه ودقيقه بعد .. بس انا عندي شي ابى ارمسج فيه ..
شيخه بهتمام : خير عبدالله .. امر الغالي ..
عبدالله : شيخه .. انا رمست رفيعه عقب ماسكرت عنج ..والظاهر ان بينها وبين سهيل شي صاير وفي كلام دار مابينهم وسبب لرفيعه الضيقه ..
شيخه : مته صار هالكلام ..؟
عبدالله : يوم سرنا شمال ..
شيخه : وهذا يعني الي مضايق رفيعه ..؟
عبدالله : هي ياشيخه .. وبعد رفيعه ماتبى سهيل مثل ماقلتيلي .. رفيعه متضايقه من سهيل يوم هي كانت تباركله بالخطوبه .. هو رد عليها بكلام جارح وغلط عليها بالرمسه ..
شيخه وهي مستغربه هالكلام : كيف صار هالشي .. و معقوله سهيل يغلط على رفيعه .. معقوله يكون حاقد عليها لين اليوم ..!! ؟
عبدالله : مادري ياشيخه .. على العموم الموضوع يخصهم .. واحنا ماله داعي نطريه ..
شيخه : صحيح .. بس هم في يوم من الايام كان بينهم حب .. وصار الي صار وتركو بعض .. ولابد يدور بينهم كلام وعتاب ..
عبدالله : انا ماالوم سهيل .. اكيد انه تأذى من رفيعه يوم رفضته عقب الحادث .. وفي نفس الوقت انا ماالوم رفيعه على قرارها ..وانحن مانقدر نجبرها انها تاخذه وهي تنفر منه وماتباه ولو انه ولد خالتنا ..
شيخه وهي حست ان كلام عبدالله عن اخوها يجرحها : بس ياعبدالله رفيعه غلطانه .. وسهيل فديته ريال ومايعيبه شي وحالته الها علاج وهو الحين بخير واحسن مني ومنك ..
عبدالله بضيقه : لو هو بخير ماعفد عالبنت يتهزبها وهي يايه تبارك له ومافي نفسها شي عليه .. سهيل مب صاحي ..وهالشي هو الي ماسكني عنه ومخلني ماارمسه في الشي الي سواه في رفيعه ..

شيخه ماعجبها كلام عبدالله عن اخوها .. سهيل مافيه شي وبعدين هم مايعرفون شو الي دار بين سهيل ورفيعه .. فليش عبدالله متحامل على سهيل هالقد ..

شيخه : عبدالله اسمحلي .. انته تغلط على سهيل وهالكلام ماارضاه على اخويه ..
عبدالله : ماقلت شي عن اخوج غلط .. وانتو مسكوه عالجوه ولاتفجونه على الخلق يتهزب بناتهم ..
ماعرفت شيخه شو ترد على عبدالله .. سكتت ومابغت تخوض في نقاشات ومشاكل ..

وفي نفس الوقت .. شيخه انصدمت من اسلوب عبدالله حست ان عبدالله شخص ثاني .. صوته تغير .. اسلوبه لهجته .. الغضب الي في صوته ..
عبدالله : اسمحيلي شيخه .. بس لاتزعلين من الحق ..
شيخه ماتحملت انها تسكت على كلام عبدالله وهو يغلط على سهيل ..
شيخه وهي تدافع عن اخوها : محد يزعل من الحق .. بس سهيل ما تعدا على حد وماكد في حياته غلط على انسان .. واختك من الاصل رافسه النعمه بريولها .. والحين يايه تعق عمرها على سهيل عقب مافكر في غيرها وتجاهلها هيه ..
عبدالله بعصبيه : رفيعه مابتعق عمرها على واحد بنص عقله .. وسهيل مايسوى علشان نسوي هالمشاكل كلها على سبته ..

من قال عبدالله هالكلام .. شيخه حست ان اخر خيط من الاحترام الي بينها وبين عبدالله انتها .. والغلطه هذي من عبدالله نزلت على رفيعه مثل الماي البارد وسببت رجفه لشيخه من الداخل.. وتمت محتاره ومب عارفه ليش عبدالله طلع بهالصوره .. واستغربت كيف عبدالله مايكن الها ولا لاهلها اي احترام ..
سكتت شيخه وحست ان عبدالله قام ينسى حبه الها بس من مجرد اختلافهم في الراي ..

شيخه بهدوء : يخساره ياعبدالله .. ماكنت اتوقع انك تشوفنا بهالصوره .. وتشوف سهيل مايسوى رفيعه .. لعنبوه على الاقل قول ولد خالتيه ولحمي ودمي .. مب تتسمع رمسة الحريم فيه وتصدقها ..
عبدالله : الحريم هيلا .. اهليه وانا ملزوم منهن ومن رعايتهن ..
شيخه : وانا .. ؟ شو بالنسبه لك ..
عبدالله : انتي بتكونين حرمتيه وبيكون حالج حالهن ..
شيخه وفي تستهزء برمسة عبدالله : حرمتك وانته تغلط عليه بهالطريقه وتعاير اخويه ..!!
عبدالله : شيخه المفروض انتي تعتذرين بسبب غلط سهيل علينا وتخلين اخوج يعتذر .. مب تطلعيني انا واختي الغلطانين ..
شيخه بقهر : يوم تعرف انته الغلط وين .. فينا والا فيكم قولنا عليه .. و بنشوف احنا عمارنا .. ويوم بنحس اننا غلطنا عليكم .. ذيج الساعه بنيكم وبنعتذر منكم ..

حس عبدالله ان شيخه بدت تعاند معاه .. وهو مش متعود منها هالشي .. كانت الحمل الوديع المطيع .. ماتعود منها الا الحب واللطف ..وماتوقع انها ماتوقف معاه .. وما يكون رايها من رايه .. وحس ان المفروض منها انها تغلط اخوها وتطلب منه يعتذر منهم .. وماتوقف مع اخوها ضده وضد اخته ..
حس عبدالله ان الموضوع موضوع عناد .. ومارضى ان شيخه تخالفه ..
عبدالله وصبره نفذ : اوكي شيخه .. بخليج انا لين تحسون بغلطكم .. واسمحيلي على كل شي .. شي في خاطرج ..
قال عبدالله كلامه وهو ناوي يسكر عنها .. شيخه حست ان عبدالله شل في خاطره وايد عليها ورغم هذا ماتقدر ترجع عن موقفها عسب ترضيه .. لان رجوعها عن رايها بيعتبر انها هي واخوها سهيل غلطانين ..

شيخه : سلامتك ..
ماتريا عبدالله ان شيخه تسكر السماعه او تقوله شي غير .. على طول سمعت شيخه الخط بينهم ينقطع .. وخذت السماعه ونزلتها بحسره وادموعها تغرغر في عيونها .. ومب عارفه كيف وليش تصير هالمشكله بينها وبين عبدالله ..

كل هذا صار واليازي واقفه وتسمع الي يدور من بينهم وتفرح كل ماتسمع كلام شيخه وهي تدافع عن اخوها ..
اليازي بهتمام : شيخه .. ندمانه على الي سويتيه وقلتيه ..
طالعتها شيخه بحزن : لا .. بس خايفه من ردة فعل عبدالله .. وماابى المشاكل تصير بيني وبينه ..
اليازي : لا فديتج لا تخافين .. بس تصدقين .. انا اول مره اشوفج بهالقوه عند عبدالله .. عمرج ماحسستينا ان اهلج واخوانج اغلى من عبدالله عندج .. بس صدق ان امي وابويا عرفو يربونا .. وانتي مهما يكون مابترضين على خوانج الاهانه وتسكتين ..

لوت شيخه على اليازي وهي تحس بتئييد اختها الها وخففت عليها شوي من خوفها ..
شيخه : انا خايفه ان عبدالله مايسامحني على تصرفي هذا .. اليازي .. انا مااتحمل زعل عبدالله عليه ..
اليازي : ماعليه حبيبي .. هو بيزعل منج وعقب بيحس هو بغلطه وبيرجع يعتذر منج .. مب كله هم صح واحنا غلط .. والله ذلونا ..
شيخه : صدقج .. خله يعرف قدرنا ويسويلنا اعتبار ..


هالوقت كان سهيل يرمس اخته الريم ويتخبر عنها وعن صحة البيبي .. ومتوله عليها ..
الريم : اذا متوله عليه تعال عندي وشلني صوبكم .. والا تتريوني بس انا من اشتاقلكم اييكم اربع ورازه بعمري ههههههههههه
سهيل : ماحيدج تقطعين عنا .. كل يوم والثاني وانتي ناطه عندنا .. والريل حليله مسويتله طاف ههههههههههه
الريم : لااا خلاص خبرك عتيج .. الحين من يبت الهم هزاع وهم حاطين عليه العين الحمرا .. ماروم احترك من البيت .. كله يحاتون ولدهم ومايبوني اسيربه عنهم ههههههههه
سهيل : صدقهم .. ولدهم وين تبين تربعيبه عنهم ههههههههه قري في البيت وانحن بنيي صوبج يوم نباج هههههههههه
الريم : زين تم .. بشوف عاد منو منكم بيي صوبي .. اظني ببطي اتريا ولا خبر عنكم ..
سهيل : افا .. مايطيعون الرياييل .. باجر مره انا عندج ..
الريم : خلاص اترياااااك ..
سهيل : ههههههههههه شكلي ورط عمري وانا مادري ..
الريم : هههههههههه الله يعيني انته جي عزابي وماتجارب باجر يوم بتعرس اكيد اننا مول مابنشوفك ..
سهيل : الله يسمع منج يارب .. واعرس ..
الريم : ههههههههه حشه مستقطع عالعرس اشوفك ...

سهيل : لاتلوميني فديتج .. القلب مب قادر عليه هههههههه
الريم : الله يعينك .. بس بعدهم العرب ماردو عليكم والا شوه ..؟
سهيل : لا الغاليه نترياهم .. وهم قالو باجر بيردون علينا ..
الريم : من اليوم لباجر شو بيصبرك ..!!هههههههههه
سهيل : شكلي مابرقد الليله بيلس اهويس ابهم واترياا باجر ايي ..
الريم : لا فديتك .. ريح عمرك والي فيه الخير ربك بيجدمه ..
سهيل وبدا صوته يتغير : خايف ياالريم..
الريم : من شو فديتك ..؟
سهيل : مااتحمل اني اسمع رفضهم .. وانا خاطريه في البنت .. احس انها بتكون نهايتيه لو رفضوني ..
الريم : لاتيلس تفكر جي فديتج .. لو البنت فيها خير لك ربك بينولك اياها .. واذا ربك كاتبلك شي احسن عنها .. لاتحزن عليها وارضى بقسمة ربك لك ..
سهيل : ونعم بالله .. بس الحب ماشي يعوضني بعده .. يمكن اكمل حياتي مع غيرها .. بس عمره قلبي مابيحب غيرها ..
الريم : يارب تكون من نصيبك واشوفك مرتاح وسعيد وياها ..

كانت ليله طويله بالنسبه لسهيل .. ماقدر يرقد ولا قدر يفكر في شي غير منال .. حط ايده عقلبه وقعد يدعا ان الله مايرده في طلبه ويوافقون هل منال ومنال عليه ..

ومنال كانت تراجع نفسها على قرارها الي بتعطيه لحمد باجر .. في الفتره الي فاتت حمد سأل عن سهيل وتخبر ..وشاف انه ريال ومن عرب وماوراه مشاكل والكل كان يمدح فيه ..

بس منال لين هاللحضه وهي مب عارفه شو تقرر .. وكانت تبى حد يساعدها على اتخاذ هالقرار المصيري .. مالقت جدامها حد ينصحها ويعطيها الراي الا امها نوره .. اقرب انسانه الها .. وتفهمها وتخاف عليها ..

نشت منال من شبريتها وقلبها ترتجف دقاته وهي تحس انها مقبله على خطوه كبيره في حياتها .. لبست شيلتها ونزلت تحت صوب غرفة امها نوره ..
دقت الباب وتريت تسمع من امها الاذن علشان تدخل .. وبعدين دخلت منال وسارت صوب امها الي كانت يالسه وتجلب في البومات الصور ..
وقفت منال وفي عيونها حنين لذيج الايام وعيونها على البومات الصور الي جدام امها ..
نوره : تعالي حبيبي .. ليش واقفه جي ..!!
منال برعشه : ليش مارقدتي امي ..؟
نوره : ماياني رقاد .. و ..
منال : وحنيتي للمرحوم ..
تمت نوره ساكته وعقب رفعت راسها لمنال وزقرتها تي حذالها ..
مشت منال صوب امها ويلست حذالها .. ضمتها نوره بيدها ويلسن يطالعن الصور ..
فيصل وحمد وهم صغار .. صورهم مع الخيل .. صورهم في الحديقه ويلعبون بالماي .. صورهم وهم برا البلاد .. وبعدين صور منال معاهم .. ولعبهم وحركاتهم وشقاوتهم ..
تذكرة منال ذيج الايام .. احلى ايام .. اشتاقت الهن موت وحست بدموعها تنزل من اعيونها .. وهي مشتاقه لفيصل اكثر من اي شي في الدنيا ..

نوره : منال ..
منال : لبيه الغاليه ..
نوره : من زمان وان خاطريه ارمسج بشي .. لكني كنت دوم ااجله .. والحين احس انه الوقت المناسب الي ارمسج فيه ..
منال : خير الغاليه .. شو هالشي ..!!
نوره وهي تطالع منال بكل حب : ابى اعتذر منج ..
منال بستغراب : تعتذرين مني .. ليش اماااه ..!!

نوره : من يوم ماخذتج عن اهلج .. ويبتج عندنا وانا ظلمتج بهالشي .. حرمتج من امج وابوج واخوانج .. عرضتج لحياه يديده وخليتج تتعلقينها .. واخر شي تميتي وحيده .. لا انتي محصله اهلج .. امج وابوج واخوانج .. ولا انتي محصله الحياه عندي بعد ماراح فيصل عنا ..

منال بحزن : بس انا راضيه بهالشي .. وانتي عندي بالدنيا كلها .. وعقب فيصل انا ماابى الحياه ومايهمني شي فيها .. ولا الها لاذوق ولاطعم عندي ..
نوره : وهذا الي الوم نفسي عليه .. اباج تعيشين حياتج مثل البنات .. درسن واستانسن وعرسن ويابن اعيال .. وانتي ليما الحين تعانين من الي حطيتج فيه ..

منال ودموعها تنزل وهي مش مستحمله لوم نوره لنفسها في منال ..
منال : امي نوره .. دخيلج لاتلومين نفسج على شي .. الي صار كله من عند الله .. وانا راضيه بقسمة الله اليه ..
نوره ودموعها تنزل من عيونها : مااعرف شو اسوي علشان اعوضج الي فاتج ..

منال وهي تبتسم لامها وتحاول تطلعها من هاللوم ..
منال : امي فديتج اباج تعرفين اني لو ارجع لورا .. ويخيروني بين اني اعيش عندج والا عند اهلي .. وانا عارفه الي بيصيرلي عقب وهو حالي هذا .. ماكنت بختار الا الي الله اختاره لي .. وهو اني اعيش عندج وبين عيالج .. وماارضى بقسمه غير قسمة فيصل الله يرحمه ..
ماباج تلومين عمرج .. و انتي مالج يد بالي صار ..

نوره وهي تمسح عشعر منال وتطالع عيونها ..
نوره : فديتج .. انشالله ربي يعوضج عن الي فاتج .. وتلقين السعاده جدامج انشالله ..
ابتسمت منال لامها واعيون نوره تبشرها بالخير ..
نوره : فكرتي بالخطبه ..؟
منال وهي محتاره : مب قارده افكر بشي .. وييتج ابا الشور منج ..
نوره : تبين رايي انا ..؟
منال وهي حاسه ان نوره حزينه وصعب انها تقرر عنها ..
منال : ياليت .. لاني مابسوي شي .. الا اذا كان من شورج ورايج ..
نوره وهي تبتسم لمنال : ماشي ام في الدنيا ماتبى تفرح ببنتها .. وانا مااباج تنحرمين من هالشي .. بس اهم شي عندي ان الريال يكون يستاهلج ..
منال : وشو رايج فيه ..؟
نوره : ماسمعنا عنه الا كل خير .. بس مانبى نتسرع ونوافق على اول حد ايي ويخطبج .. مهما يكون لازم يكون ريال زين علشان نزوجه ..
منال : وكيف بتعرفونه عدل .. الناس ماتنعرف الا من المعاشره .. وهذا غريب عنا لانعرفه ولا يعرفنا ..
نوره : بنسوي خطبه .. وخلال هالخطبه بنتعرف عليهم اكثر .. وانتي صلي صلاة استخاره وتوكلي على الله .. ولاتنسين انحن لين الحين ماشفنا الريال وماانقدر نحكم عليه .. ولا نعرف اهله ولا اي شي عنهم .. واحنا مانبى نفرج جي على العرب .. وانحن مانعرفهم ..

منال وهي تفكر : امي نوره .. هو الريال شو اسمه ..؟
طالعتها نوره وهي تحس ان منال بدت تهتم بالموضوع وتسأل فيه ..
نوره : اسمه سهيل .. ولد عبيد بن غانم ..
رفعت منال اعيونها لامها ..
منال : امي خلوني اشوفه قبل مااوافق على الخطبه .. يمكن يطلع شين وارفضه واوفر علينا هالتعب والتفكير ههههههههههه
نوره وهي تبتسم لبنتها : لا فديتج .. ظنج خاب .. والريال انا احيده مزيون وماعليه قصيره ..
منال مستغربه : توج تقولين ماشفتيه وماتعرفينه .. شقى الحين تقولين تحيدينه ..!!
نوره : ههههههههههههه انا شفته مره وحده بس .. واتذكرت شكله يوم خبرني عنه حمد ..
منال : يعني خلاص تدبسنا .. وبنوافق على الخطوبه ههههههههههه
نوره : هههههههه هي .. وانشالله يطلعون عرب طيبين ونيوزج اياهم ..
منال وهي تمازح امها : حشه ثركم تبون الفكه مني وانا مادري ..
نوره : فديت روحج .. نبى نيوزج بس ومانبى الفكه منج ..

حست منال بالراحه واستقرار النفس عقب ما يلست مع امها نوره وتكلمن في هالمواضيع الي دخلت نفس منال وريحتها من كل الجوانب ..

طلعت منال عن امها رايحه غرفتها بترقد .. وشاله صورتها هي وحمد وفيصل .. صوره جماعيه تجمعهم وهم في اسعد لحضات حياتهم ..

بالباجر المغرب ظهر سهيل مع اخوه سعيد وابوهم سايرين صوب حمد وهله علشان ياخذون منهم الخبر بعد ماخلوهم اسبوع يتشاورون ويتخبرون عنهم ..

حمد خذ قرار امه ومنال وكان راضي عنه .. وسار بلغ به ضيوفه وبشرهم به ..
الفرحه تملكت سهيل من سمع الخبر وماكان مصدق الي يسمعه ..
وبدون مايفكرون يلسو يبون يحددون مع حمد موعد للملجه والعرس ..

حمد : لاتستعيلون طولي بعماركم .. انحن بلغناكم بالقرار البنت وقرارنا .. وبو ناصر خبرناه بالموضوع ورايه من راي بنته .. والحين نباكم تونا عالغدا باجر وبو ناصر بيكون موجود وبتتفقون وياه على كل شي ..

بالباجر كانت عايلة بو سهيل معزومه في بيت نوره .. الرياييل في الميلس وعندهم حمد وابو ناصر .. والحرمات .. ام سهيل واختها ام عفرا .. والريم .. وشيخه ..كانن عند الحرمات داخل ..

منال كانت جاهزه علشان تطلع للعرب وتسلم عليهم .. ماكانت مرتبكه ولاكانت خايفه من شي .. بس كانت تلوم نفسها على تجاهلها لفيصل ومشاعرها الي مازالت حيه وتحبه ..
وطاوعت الدنيا والظروف ومشت معاهاااا ..

منال عكست انطباع بالرضى عند ام سهيل وخواته .. عجبتهن منال بكل اماا فيها .. لكنهن خافن يكون هدوءها وحذرها وشرودها الي كان يحسسها بالوم على ماضيها .. هو تكبر من منال .. وماعرفن كيف بتكون منال عندهم .. بتندمج معاهم او لاء ..!! ؟ لكن الاهم عندهن ان ولدهن سهيل يحصل الي يبااه وهو هالبنت .. ويرتاح وياها ..

نشت منال عن الحرمات ومعاها اختها فاطمه بيأمرن على الغدا ويشوفن ترتيبه كيف ..
كانت مريم ربيعة نوره وبنتها اسما من الموجودين ..
لحقتهن اسما وهي تقود ولدها بتوديه عند خدامته ..

اسما : ههههههههه منول الف مبروك حبيبي ..
باست اسما منال وهي تحضنها وتضحك وفرحانه لمنال من كل قلبها ..
منال : فديت روحج .. الله يباركلج ..
اسما : حشا مابغيتي تعرسين .. هههههههههه الحمدلله ان الخطيب ياااا قبل مااتهور وازوجج ريلي ..
فاطمه : هههههههههه اتخيلكن عدايل .. بتلبسن الريل بتتعاونن عليه المسكين وبيطفر منكن ..
اسما : لا الحمدلله سلم منا ..
منال : والحمدلله بعد تقولين .. ثرج خايفه عليه ومب هاين عليج يالدبه هههههههههه
اسما : بصراحه عاد .. ريلي فديته وابااه ومابا شريك فيه هههههههههه
منال : ههههههههههه الي يسمعج عاد ميتين عريلج ونباااه .. الا افتكينا منه ..
اسما : هي صح .. مول مايتشاهد ترا ريلي هههههههه
فاطمه : تبعد العين عنه ههههههههههه

اسما وهي تطالع من الدريشه وترمس فاطمه ومنال ..
اسما : شوفن المزايين .. خساره راحت علينا مانروم نقنصلنا واحد منهم ههههههههه

طالعن منال وفاطمه خاري وشافن حمد مع سهيل وسعيد طالعين من الميلس ويسلمون على الرياييل الي يايين برا وتمو واقفين يرمسون وياهم ..

فاطمه : توج تمدحين ريلج والحين متحسفه عليه وتبين غيره ههههههههه والي تشوفينه هالمزيون هذا ترا ريلي فديته هههههههههه ..

كانن اسما وفاطمه يسولفن ويتغايضن ومنال واقفه تشوف هالمزايين الي تطريهم اسما واعيونها على واحد منهم مب قادره تشل عينها عنه ..
هالويه مب غريب عليه .. طوله .. جسمه .. هيئته وملامحه .. وين شايفتنه من قبل ياربي ..!!
.. احس اني اعرفه .. بس مش متذكره وين شايفتنه ..

منال لين اليوم ماتعرف شي عن الخطيب الي وافقة عليه .. غير اسمه .. وماكان يعنيلها شي .. ولكن بعد الخطبه وبعد ماشافت هالمزايين .. اهتمت انها تسأل وتعرف عن خطيبها اكثر ..

منال : منو تتوقعن يكون هالمزيون الطويل الي بين حمد والريال الثاني ..؟
اسما : يمكن يكون سعيد الحظ خطيبج ..
فاطمه : ويمكن يكون حد من هله ..
طالعن فاطمه واسما منال وفيهن فضول ونظراتهن فيها تعجب ..
اسما : وانتي ليش اهتميتي فيه وسألتي عنه هو بالذات ..؟
فاطمه : منال .. لاتحطينه في بالج وتحلميبه .. يمكن مايطلع هو خطيبج وتصيبج خيبة امل بعد ماعيبج ههههههههههه

منال وهي تطالعهن وهي مب بالعه سوالفهن ..
منال : يالله عاد .. من زينه احلمبه .. مالقيت مونه .. وبعدين انتن مايخصكن التهن برياييلكن وخلني انا اتنقى عكيفي ههههههههههه
اسما : لا بالله .. طحتي طيحه وبتتنقين بعد هههههههه
فاطمه : الحمدلله يوم الله عقلج .. وانفتحت نفسج عالعرس ..
طالعت منال من الدريشه صوب الرياييل وبالها مب مهتم بكلامهن ..
ابتسمت منال : لاتفرحن وايد .. يمكن اتم عجبودكن ومااعرس .. وهالي تشوفنه بس فترة تعارف وعقب كل واحد يروح في حاله ..


إنقضى اليوم وسارو سهيل واهله .. وتمت منال واهلها يالسين ويسولفون عن العرب الي يوهم وانطباعاتهم عنهم ..
مبدئا منال واهلها ارتاحولهم وخاصه حمد امبونه مرتاح لسهيل وداش خاطره .. والحين تعرفو عليهم اكثر وبيصيرون اهل ..

في بيت سهيل كان سهيل وهله يالسين يهنون سهيل على الخطبه وفرحانيله ان الله نوله مراده واخيرا قدر يحصل على محبوبته والي تمناها قلبه ..
بس شيخه كانت يالسه بينهم وفي ويها وقلبها الفرحه لسهيل اخوها الغالي .. وفي عيونها حزن على الوضع الي وصلوله هي وعبدالله ..
ومن ذاك اليوم وعبدالله ماله لاحس ولا خبر .. ولايتصل ولا يسأل عن شيخه مول ..
وشيخه نفس الشي ماكانت تقدر تتنازل وتتصل لعبدالله وترمسه وهو ماافتكر ابها ..

طلعت شيخه غرفتها بعد مااستسمحت من اهلها وباركت لاخوها ..
كانت متضايقه وحزينه .. والي دار بينها وبين عبدالله محد درابه غيرها هيه واليازي بس ..

طلعت شيخه فوق واتصلت بعفرا بنت خالتها تيلفون تشكيلها حالها وهمها ..
عفرا : وليش تعاندون في بعض .. واحد منكم يتنازل لثاني ويتصل يراضي ربيعه ..
شيخه : انا مستحيل اتصله .. المفروض هو الي يتصل ويتعذر ويستسمح منا .. وانحن مب غلطانين علشان نعتذر ونراضي ..
عفرا : الله يهديكم .. يعني المسأله مسألة عناد ..
شيخه : عفرا انا احبه .. ومااصبر عنه .. بس ليته هو ولو مره وحده يتنازل ويتسامح ويحسسني اني مااهون عليه .. كيف يزعلني ويخليني هالكثر ..
عفرا : الرياييل صعب انهم يتنازلون ويستسمحون من الحرمه .. وانتي بتكونين حرمته يعني من الحين يفهمج انه حمش ومش مال مراااضا ودلع ..
شيخه : شو شو شو .. ووين الحب عيل الي معيشني عليه طول هالسنين ..!! كيف بيعبر عنه يوم هو بيسويبي جي ..!!
عفرا : الحب بيكون متبادل .. يعني مثل ماتسويله بيسويلج ..
شيخه : اوكي .. خليه يراضيني الحين مثل ماانا كل مره كنت اراضيه ..
عفرا : هالمره السبب قوي والعايله الها يد فيه ..
شيخه : يعني شو ..؟
عفرا : مادريبكم .. اذا تميتو تعاندون بعض جي معناتها بتمون على هالحاله وايد ..
شيخه وبقهر : اوكي .. مب مشكله .. خله جي وبنشوف منو الي بيتنازل للثاني ..

سكرت شيخه عن عفرا وهي حاطه في خاطرها على عبدالله وايد ومب عارفه شو نهاية هالعناد .. وإلا مته عبدالله بيحن عليها وبيتنازل وبيرمسها ..!!


الجزء السابع عشر








نشت منال من نومها متملله وتحس بصداع .. الظاهر اني بزجم ..
اااف هالجو بيتعبنا كل يوم وهو له حالة في اليوم الواحد نمر باربع فصول ..
قبضت منال الحاف وخوزته عنها ونشت خذت فوطتها ودخلت الحمام تتسبح ..
هالوقت كانت نوره الصغيره وعلايا يدقن عليها باب غرفتها ويزقرنها .. يبن يدخلن عندها ..
يتهن امهن نوره وشافتهن يبن يدخلن عند منال ..

نوره : ها حبايبي شو تسوون ..؟
نوره الصغيره : اماه .. نبى نيلس عند .. عند خالوه منال ..
نوره : منال نايمه الحين تعالن عندي بنسير نتريق ..
مسكت نوره يدين البنات ونزلت معاهن ..
وبعد ماخلصت منال نزلت تتريق مع امها تحت .. وهي ماسكه راسها من الالم ..

منال : صباح الخير الوالده ..
نوره : صباح النور حبيبي ..
منال راحت يلست على طرف .. وينها البنات يبن ييلسن حذالها ..
منال : فديت الحلوين يلبي .. يلسو بعيد عني مااروم ابوسكن ..
نوره : خير منال .. عسى ماشر ..
منال : خير الوالده .. بس جنه الزجام بادني ..
نوره : هذا فايح الحين حمد بعد اليوم نش تعبان ومزجوم ..
منال : الله يعينه ..
نوره : منال ..
منال : لبيه الغاليه ..
نشت نوره وسارت يلست حذال منال ..
نوره وهي تبتسم : سهيل وامه يسلمون عليج ..
منال وهي مستغربه الاسم لانه يديد عليها وماتعودة عليه : الله يسلمهم من الشر ..
نوره : رمسوني البارحه ويبون يسوون حفلة خطوبه .. شو رايج ..؟
منال وهي محتاره : مادري امي .. كيفكم ..
نوره وهي تمسك ايد منال : من رايي نسوي حفله صغيره للاهل بس ونخلي الحفله الكبيره للعرس ..
منال : زين امي رتبي انتي وياهم انا ماعندي اعتراض على اي شي بتتفقون عليه ..

نوره : بارك الله فيج .. هم يبون الخطوبه بالاسبوع الياي .. يعني بنلحق نفصل ونرتب والا شو رايج ..؟
منال وهي ماتروم ترمس في الموضوع اكثر لانها كانت تعبانه : بنلحق امي ..

كانت منال تحس ان كل شي يصير بسرعه .. امها نوره مهتمه بخطوبتها وعرسها ومن كل خاطرها بعد
وكل يوم منال تشوف الفرحه على ويه اهلها وكأن الموضوع منتهين منه وسهيل بيكون ريل منال المنتظر رغم ان منال كانت تتوقع ان هالفتره فترة تعارف بس ..

عـ العصر نش حمد بيظهر بيسر العياده وبياخذ منال معاه ..
حمد : فاطمه قومي شوفي منال وخليها تتجهز علشان نظهر ..
فاطمه : انشالله حمد انته اسبقنا تحت وانا بخبر منال تنزل ..

نزل حمد ولقا امه وبناته يالسين في الصاله ويلس وياهم يسولف ..
دخلت فاطمه عـ منال ولقتها طايحه في فراشها وتعبانه ..
منال زادة عليها الحمى وتمت ترجع كل الاكل الي تاكله ولا فادة مخفضات الحراره انها تخفض حرارتها ..

فاطمه : منال حبيبي يالله نشي حمد بيوديج العياده ..
منال فجت اعيونها بتعب ورجعت سكرتهن : ماروم انش تعبانه .. و ماريد اسير العياده ..
فاطمه تقربت من منال وحطة يدها عراسها ولقت حرارتها مرتفعه وايد ..
فاطمه : كيف ماتبين تسيرين وانتي تعبانه هالقد حتى حرارتج مرتفعه وايد ..
منال : فاطمه مااروم ان تحركت برجع احس بطني يعورني ..
فاطمه : يمكن فيج فايروس لازم تاخذين علاج يالله حبيبي نشي ..

نشت منال عقب اصرار فاطمه .. وعقب مالبست نزلت مع فاطمه تحت وفاطمه تقودها ..

نش حمد وامه نوره من يت منال وخافت نوره من شافت منال ويها مصفر وماتروم تمشي ..
نوره والخوف في صوتها : شو تحسين حبيبي .. ليش جي مصفره ..
فاطمه : عموه .. منال ترجع والحمى وايد مرتفعه عندها ..
نوره : انزين يالله عيل بنوديها المستشفى احسن .. حمد ودها السياره ونا بسير اييب عبادتي بروح وياكم ..
منال وهي تعبانه : امي ماله داعي فديتج الا بنوصل بناخذ علاج وبنرد لاتتعبين عمرج انتي ..
نوره : لالا ماروم اخليج تظهرين جي بروحج .. لازم حد يسير وياج ..
منال : ترا حمد عندي ..
فاطمه : خلاص عموه انا بسير وياهم وارتاحي انتي ..
حمد : خلاص امي اذا فاطمه بتسير بتسد ..

سارو حمد ومنال وفاطمه وياهم ومن شاف الدكتور منال قالهم انها لازم تنحط تحت المغذي لانها فقدة وايد من اثر الترجيع والحمى ..وعندها الضغط نازل ..
تمت منال تحت المغذي وتمو حمد وفاطمه عندها ..

بعد مامرن ساعتين على المغذي وبدا الدوا يطلع مفعوله على منال حست منال بتحسن وبدت تتكلم مع حمد وفاطمه ..
منال : مب خلاص ..!! نبى نظهر ..
حمد : بيرجع الدكتور علينا وبيشوفج وبنشوفه شو بيقول .. لاتستعيلين ..
منال : تعبتكم ويايه باليلسه وانا مايحتاج اني اتم هالقد الا زجام ترااه مايباله مغذي ورقاد عندهم ..
فاطمه : لو زجام عادي جان ظهروج فديتج بس انتي جسمج ضعيف وتميتي ترجعين الاكل واثر على صحتج .. وبعدين لاتتلومين منا انحن ماعلينا من اليلسه ..
حمد : المهم صحتج الغلا لاتحاتينا انحن ماورانا شي ..

هاللحظه دق الدكتور الباب بيدخل علشان يشوف منال وعدلت منال شيلتها وتغشت فاطمه ..
الدكتور : سلامو عليكم ..
حمد : مرحبا دكتور حياك ..
الدكتور : كيف صحة الانسه الحين .. انشالله احسن ..؟
حمد : والله العلم عندك .. شوفها وخبرنا ..
تقرب الدكتور وهو يبتسم ويطالع منال ..
الدكتور : لا ماشاء الله باين انها دلوئتي احسن ..

فحص الدكتور منال وقاست السستر ضغطها ..
الدكتور : خلاص هيا تاخد مغزي تاني وبعدين تئدرو تمشو بس لازم تستنو ساعتين كمان معانا ..
حمد : مب مشكله دكتور انتو مته ماتشوفونها بخير انحن بنظهر ..
منال : دكتور ماله داعي المغذي انا احس عمري احسن ..
الدكتور يمزح مع منال : هو انتي دكتوره ..؟
منال مفتشله : لا دكتور .. بس انا ادرى بعمري ..
الدكتور : هههههههههه طب انتي الظاهر مليتي مننا وعوزه تمشي ..
منال : اااه مليت .. ياليت تطلعني يادكتور ..
حمد : ههههههه بتعايي منو يادكتور .. مابتروملها ..
الدكتور : طب هه حنشوف يانا ياهيه .. مافيش خروج الليادي الا بعد مانخلص المغزي ..
حمد : ههههههههه خلاص منال طيعي الشور وخلينا نظهر بلا مشاكل ..

يلست منال ساكته وتطالعهم بنفاذ صبر وفاطمه يالسه ساكته .. من ظهر الدكتور ..
منال : حشه اول مره اشوف دكتور يغايض ..
فاطمه : ههههههههههه مصري لازم ..
حمد : وانتي لازم تغايضين حتى الدكاتره بيتعايون وياج ..هههههه
منال : الله يغربله .. انته ماشفته يوم يتمصخر عليه .. اوين انتي دكتوره ..؟ والله قهرني تفشلت ..
فاطمه : صدقه .. هو يقولج بيعطيج مغذي وانتي تعايينه ماتبين .. ترا كله لصحتج هو اشعليه منج ..
حمد : وحليله والله طيب هالدكتور ..

رن تلفون حمد ومن شاف حمد الرقم نش وظهر في الممر وقعد يرمس ..
تمت فاطمه يالسه تفكر .. منو هالي اتصل لحمد وطلع حمد عطول برا يرمسه بعيد عنهن .. وليش طلع ..!! لو واحد من ربعه مابيظهر عنا ترا دوم يرمسهم جدامها .. خافت فاطمه وبدت تشك بحمد ..
منال وهي تطالع فاطمه بفضول : شو بلاج فطيم ..؟
فاطمه : ماشي ..
منال : وانا مااعرفج ..!! شو بلاج تغير ويهج ويلستي تفكرين من ظهر حمد ..؟
فاطمه : منو تتوقعين داق لحمد ..؟
منال : منو بعد بيكون الا واحد من ربعه ..
فاطمه : بس ليش يظهر يكلمه برا ..
اول مره يسويها ..

منال : يمكن بينهم شي ومايبى يرمسبه جدامنا ..
فاطمه : وليش ماتكون وحده وظهر يرمسها برا ..
منال : لالا انتي شو تقولين .. حمد مش مال هالسوالف ..
فاطمه : قلبي ناغزني مادري ليش ..
منال : اذا انتي شاكه بشي رمسي حمد فيه ..
فاطمه : مااقدر .. انحن بينا ثقه ومااريد اخربها ..
منال : عيل لازم تكون ثقتج اكبر من جي وما تخلين ظنونج تلعبج ..
فاطمه : هاي مش اول مره حمد يسويها .. الحين كم مره استوت هالسالفه .. وها الي يخليني اشك ..
منال : من رايي ترمسينه .. علشان تعرفين منه هو ليش سوا جي ولا تتمين تشكين فيه .. ترا شكج بيخرب بيتج ..
فاطمه : صح كلامج منال .. انا لازم ارمسه ..

بعد ماسكر حمد التلفون رد ودخل عند منال وفاطمه ..
تمت فاطمه هاديه ومارامت تشل عينها في حمد خوف من ان حمد يقرا الي في بالها من عيونها ..
وتم حمد يطالعهن ويشوف ويوهن متغيره ونظراتهن ..

حمد : منال .. توني رمست سهيل ويسلم عليج وبيي الحين صوبنا ..
منال فجت اعيونها متفاجأه .. شو اييبه عندهم .. شو يبى ..!!؟
منال : ليش ايي ..؟
حمد : عرف انج تعبانه وقال بيي يسلم عليج ويطمن ..
منال بستغراب : وهو اش له ..؟
حمد وهو مستغرب ردة فعل منال : شو وهو وش له ..؟؟ّّ ترا خطيبج وياي يطمن على خطيبته الي هيه انتي ..
منال : بس احنا بعدنا الا تونا ..
حمد : انزين .. شو يعني ماتبينه ايي يطمن عليج ..؟
منال : لا ..
حمد : والله انتي امرج عجيب .. مب مشكله هو مابيحدر عندج لاتخافين بس بيسلم من الباب وبيسير ..

منال : لا مب لازم يسلم عليه خلاص سلامه وصل ..
فاطمه : منال بسم الله شو بلاج .. الريال ياي يطمن عليج وانتي تردينه عنج ..
منال : انا ..
تمت منال محتاره ومب عارفه شو تقولهم وشو سبب رفضها ان سهيل يحدر يسلم عليها ..
منال : هاي اول مره يشوفي وتبوني اجابله جي ..
حمد : هههههههههه قولي جي من الصبح .. زيغتيني قلت غيرتي رايج وماتبين الريل ..
فاطمه : حد بيي وياه والا روحه ..
حمد : لا بيي روحه اظني ..

بعد ربع ساعه رن تلفون حمد وانه سهيل يخبره انه في المستشفى وياي صوبهم .. ظهر له حمد وسلم عليه ..
وطول الوقت وقلب منال يدق وفيها حفوز من طاري سهيل من عرفة انه وصل المستشفى ..

ياهن حمد ودق الباب وحدر يخبرهن ان سهيل بيسلم على منال .. تغشت فاطمه واعتدلة منال على فراشها وتغشت ..
دخل سهيل : السلام عليكم ..
منال وفاطمه : وعليكم السلام والرحمه ..
سهيل : شحالج منال ..؟
منال وصوتها مب قادره تظهره من كثر ماهي متوتره : بخير الحمدلله ..
سهيل : ماتشوفين شر الغاليه اجر واعافيه ..
منال : الله يعافيك ياربي ..
سهيل : شحالج ام نوره انشالله الا بخير ..؟
فاطمه : بخير ربي يسلمج .. شحالك انته وشحال الوالده والاهل ..؟
حمد : كلهم بخير ومايشجون باس طال عمرج ..

فاطمه : يعلهم دوم انشالله ..
سهيل : وياكم والجميع انشالله ..

سهيل وهو يطالع منال ومستغرب ليش متغشيه منه : رب ماازعجناكم بهالييه ..
حمد : لا بالعكس .. ودنا بشوفك الغالي ..
سهيل : تسلم فديت روحك .. اسمحلي من رخصتكن حرمات .. وسامحونا عـ المغثه ..
منال وفاطمه : بالحل الشيخ ..

ظهر سهيل عنهن وحمد وياااه وتمو يسولفون في الممر وعقب وصل حمد سهيل خاري المستشفى ورجع عقب عند منال وفاطمه ..

رد حمد متغير ويفكر عقب ماشاف سيارة سهيل وتذكرها وشاف رقمها وعرف انها نفس السياره الي كانت موقفه برا بيتهم ذاك اليوم ..
فكر حمد بالسالفه وبسهيل وشو الي بيوقفه عند بيتهم ذاك اليوم .. هل معقوله ان سهيل كان موجود علشان منال .. والي يابه بيتهم ذاك اليوم وخطبته لمنال هو بس لانه يعرفها ..!!

بعد ماسار سهيل عنهم بفتره يت السستر ويايبه معاها عامل وشال باقة ورد كبيره بيديه ودخلها عليهم ورجع مره ثانيه بباقات ورد غيرها ..
استغربة منال من شافت هالورد وسار حمد شل البطاقه الي عالورد وقراها ..وسار عطاها لمنال ..
كان الورد من عند سهيل ويتحمد لمنال بالسلامه ..

اثر هالشي في نفس منال واهتمام سهيل ابها ..
وبعد اشوي كانت السستر يايه ويايبه معاها عامل ثاني وكان ياييب الهم عشا .. وتوقعو ان سهيل يكون طالبلهم هالعشا ومطرش المطعم به ..
تلومو حمد ومنال وفاطمه من سهيل والي يسوييه ..
اتصل حمد لسهيل وقعد يعاتبه على الي يسويه وانه ماله لزوم ..

سهيل : افا عليك ياحمد انا ماسويت شي ها الواجب ..
حمد : لا يسهيل هذا اكثر من الواجب .. ومابغينا نتعبك ويانا ..
سهيل : ماسويت شي يستاهل فديت روحك .. وان بيغتو اي شي غير خبروني وانشالله تلقونه عندكم ..
حمد : طولي بعمرك الغالي مانبى الا سلامتك فديتك ..

سكر حمد عن سهيل والتفت لمنال يرمسها ..
حمد : سهيل مب عارف شو يسوي علشان مايقصر وياج .. اسميه معبل على عمره ..
فاطمه : مسكين والله عبل على عمره .. وماقصر في شي .. ومنال تراها تستاهل ..
منال : قلتلكم بنظهر ماطعتوني .. الحين لو طلعنا من المستشفى ماكان الريال بيدري ولا بيتلوم فينا ..
فاطمه : انزين ودرا .. مافيها شي على الاقل فرصه نشوف كيف بيكون اهتمامه بج ومعزتج عنده ..
منال بمستحى : بدري على هالسوالف ..

بعد ماشاف الدكتور منال وسمحلها انها تظهر .. طلعو من المستشفى على الساعه 11 فليل وكانت نوره تترياهم في البيت مب طايعه ترقد لين ماترد منال وتطمن عليهم ..
وكان سهيل على اتصال بحمد ويسأل على منال وصحتها اول بول ..
وكان سهيل مستهم على منال وايد ويحاتيها ..

بالباجر تحسنت منال وكانت احسن وماتمت ترجع الاكل وحرارتها اعتدلت .. اتصلو هل سهيل تلفون وكلمو نوره وتطمنو على منال .. ورمستهم منال وحسو كلهم من بعد هالحادثه ان العلاقات بينهم اقوى ومرض منال قرب العايلتين اكثر ..

نوره : وحليلها ام سهيل تحاتي منال جنها بنتها وتتصلي مرتين وثلاث مرات في اليوم عسب ترمس منال ..
فاطمه : وسهيل ياعموه ماعرف شو يسوي ليسوي علشان منال .. ماخلى ورد في المحل الا وطرشه و العشا وتلفوناته ماوقفت لين ماظهرنا من الستشفى وحتى من يينا البيت وهو وهله يتصلون ..

منال : يالفضيحه .. والله اني مفتشله من الي يسوونه ..
نوره : هههههههه ليش تفتشلين .. المرض ياج من الله .. وهم فيهم الخير يوم يسئلون عنج ..
منال : بس مش بهالصوره ..
فاطمه : انا احسبهم شارينج ويبون يتقربون منج اكثر واكثر ..

رن لتلفون وكانت ام سهيل ويلست ترمس نوره ..
ام سهيل : شحالها منال .. ربها بخير ..؟
نوره : بخير الحمدلله هذي جدامي ومابها شي ..
ام سهيل : فديت روحها يربي اسميها همتنا .. وسهيل فديته كل يوم يقولي اتصلي وتخبري عنها ..
نوره : ههههههههه فديت روحه .. لالا طمنيه وقوليله ان منال بخير وتترقص ..
ام سهيل : هههههههه هذو سهيل حذالي يبى يرمسها جانها عندج بيسلم عليها ..
نوره : زين عطيني اياه بسلم عليه وعقب بعطيه منال ..
سلمت نوره عسهيل ورمسته وعقب عطت السماعه لمنال .. ومنال طول الوقت تطالعها وتترجاها بعيونها علشان ماتبى ترمسه ..
بس ماقدرة تسوي شي ..
حطة نوره منال جدام الامر الواقع وماعرفت منال كيف تتهرب من هالموقف وهي ماتعرف كيف ترمس سهيل والا شو بيقولون ..

منال وبرتباك : مرحبا سهيل ..
سهيل وهو ذايب من صوت منال : مرحبا الساع .. شحالج الغلا ؟..
منال : الحمدلله بخير .. شحالك انته ..؟
سهيل : انا بخير يوم انتي بخير .. وعساج انشالله دوم في خير ..
منال : تسلم الغالي .. واسمحلنا غثيناكم وتعبناك ويانا ..
سهيل : لا فديتج لا غثيتينا ولا شي .. وتعبج راحه ..
منال : مشكور الغالي عالورد وعساه انشالله على الافاراح ..
سهيل : امين يارب .. والعفو فديتج انا ماسويت شي يستاهل ..

حست منال بالارتباك طول ماكانت تكلم سهيل وحست بعيون اختها فاطمه وهي تطالعها وتضحك الها .. وبامها نوره الي كانت منزله عيونها تحت عنها وتحاول تلتهي ببنات ولدها عن لاتحرج منال بهالموقف ..

اما سهيل فكان طاير من الفرح وهو يرمس منال ولا عليه من الي حذاله من امه وخواته ..وارتاح من سمع صوتها ورمسها ..
وصار ماعنده صبر علشان يتريا الخطوبه الرسميه وكان وده يختصرها بالعرس عطول ..

****


يوم الخطوبه لبست منال فستان بيج فاتح ولمة شعرها الاسود بتسريحه ورفعته عن اعيونها ونزلت خصل بسيطه على الاطراف
مكياجها كان هادي والعيون مجحلينها بالاسود وبارز صفاء
عيونها ولونهن الاسود ..

منال كانت مرتبكه اليوم لان فاطمه قالت الها ان سهيل بيدخ يشوفها ويلبسها خاتم الخطوبه بنفسه
الخطوبه بتكون عائليه يعني الموجودين بس اهل سهيل واهل منال ومريم وبنتها اسما

دخلت نوره غرفة منال ولقتها يالسه على الكرسي وحذالها اسما ..
نوره : ماشالله .. بسم الله عليج من العين ..
نشت منال لامها نوره ويت نوره مسكت يديها .. حست بيدين منال بارده وفيها رجفه خفيفه ..
نوره : فديت روحج اليوم انتي عروسنا ونبى نفرحبج ابتسمي وشلي عنج هالخوف ..
منال وصوتها ظاهر خفيف : امي وين حمد ..؟
نوره : حمد في الميلس عند الرياييل ..
منال : ابى حمد ينزل ويايه تحت ..
اسما : منول حياتي محد بياكلج تحت لاتخافين .. وانا وخالوه نوره بننزل وياج ..
طالعت منال اسما ونزلت عيونها تحت وردت يلست على الكرسي ..
كانت منال خايفه ومرتبكه ..
نوره وهي تراعي شعور منال وخوفها : انا بتصل لحمد واخليه يحدر سهيل تحت عند الحرمات وعقب ايي عندنا وينزلج ها شو رايج ..؟
منال رفعت ويها لامها وابتسمت الها بين ارتباكها الي متملكنها ..
يلست نوره واتصلت لحمد ..

نوره : حمد الغالي .. منال تباك تنزلها تحت ومستحيه تنزل بروحها ..
حمد : ماحيدها بنتج تستحي من العرب .. دومها تستقبل وتيلس وتسولف اشمعنا هالمره ..!!
نوره : وهي هالمره مثل كل مره ..!!؟ اليوم الحرمه خطبتها ومستحيه تظهر جدام العرب والناس ..
حمد : ههههههههههه جي السالفه .. خلاص مايهمكن انا ياينكن الحين ..
سكر حمد عن امه والتفت لسهيل الي يالس حذاله ..
حمد : سهيل ..
سهيل : لبيه ..
حمد : يبونك تحدر الحين شو رايك ..؟
سهيل حاس انه في حلم ومب مصدق انه اموره تمشي بهالسرعه وان حلم عمره منال بيكون ملكه ..
سهيل وهو يبتسم : مايبالها راي الغالي ..

نشو حمد وسهيل وسارو صوب البيت وحدرو في الميلس عند الحرمات ..تغشن الحرمات كلهن ودخل حمد سهيل وسلمو على الحرمات وسار حمد فوق عند امه ومنال ..

حمد : ها منال .. جاهزه ...؟
منال شلت اعيونها في حمد وحست بالاطمئنان من شافته .. وزال عنها الخوف ..
منال : هي جاهزه ..
حمد حب انه يفرفش الجو عليهم علشان يبعد ارتباك منال ويضحكها شوي ..
حمد : شو اليوم محلوين العرب .. منال اهنيه وفطيم تحت ماخلن شي من الزين اليوم ..
نوره : هيه فطيم ومنال مدحتهن وعيوزك نسيتها اشوف ههههههههه
حمد : ههههههههه منو عيوز ؟؟ ماعندنا انحن عيايز الي اشوفهن كلهن شابات وكل وحده منهن تقول الزود عندي ..
نوره : ههههههههه الظاهر ان عند ضعف نظر الغالي ..
حمد : لا سمحيلي فديتج عليه يمين ان الزين الي عندج محد شله لا بنات ولا حرمات قبلج ولا عقبج ..
منال : هههه وانا اشهد على هالشي ..

نزلت منال وامها نوره على يمينها وحمد على يسارها واسما وراهم ودخلو الميلس .. من دخلت منال وشل سهيل عيونه فيها ماحس بالي حواليه من ناس .. عيونه تسمرت على منال والزين الي يشوفه جدامه وتم يالس ويطالعها .. وهي دخلت مستحيه وعيونها تحت مب قادره تشلهن في الناس .. مسك حمد ايدها ومشاها لين اخر الميلس وين يالس سهيل وامه ..
نش سهيل من شافها يايه صوبه ولز عطرف وهو يطالعها ويبتسم .. علشان يسويلها مكان تيلس حذاله .. وقفت منال قباله وسلم عليها سهيل وهو فرحان ابها ..
شلت هيه عينها تطالعه .. بس من شلت نظرها صوبه انعقد السانها وماقدرة تقول شي وطارت الابتسامه الي كانت تنور ويها .. !! هاللحضه منال عرفت منو خيطيبها .. عرفت منو سهيل .. تذكرته وتذكرت ذاك اليوم في المستشفى ..
سهيل كان يبتسم ويرمس منال وهي مب قادره ترد عليه بشي ..
منال .. هذا انا اعرفه .. هذا هو نفسه الي شفته في المستشفى يوم تربي فطيم ..
معقوله الي يصيرلي .. معقوله هو نفسه يخطبني .. ليش يطلع هوه ..!! عقد هالموقف لسان منال وماقدرة تقول شي .. التفتت ويلست وين اشرلها سهيل بكل هدوء ..
يلس سهيل حذالها وكان مبتسم بس ماقدر يرمس منال لانها ماترد عليه بشي من الصدمه الي يتها ..


لبس سهيل منال خاتم الخطوبه والعقد والساعه .. منال حاولت تهدي نفسها وتعدي هالموقف الي صارلها بعقل ..
منال تنرفزت في داخلها من ان سهيل يكون نفسه الشخص الي صادفته في المستشفى ..
وفي نفس الوقت استغربة اصراره في رغبته فيها لدرجة انه يخطبها رسمي ..
بس سهيل من خطب منال ماشافت منه الا كل خير ونيه سليمه ..وهذا يدل على صدق نيته ومشاعره ناحيتها ..
فليش انا اعصب منه واتضايق ..!! هالشعور عذب منال .. وماعرفت ليش هيه صعب عليها تتقبل سهيل في حياتها .. وشو هو هالشبب الي يمنعها عن سهيل ..

فيصل مازال في نفس منال وقلبها .. ومب قادره تدخل في قلبها بديل له .. ولكن هالشي كان يباله وقت لين منال تعرف سهيل اكثر ويغلى عندها وتبدا تحبه ..

بعد الخطوبه كانت ام سهيل وام منال يرتبن للعرس ويحددون له موعد مناسب .. كان سهيل يطلب يرمس منال كل قتره والثانيه ويسلم عليها من امها نوره ..
وصارت مثل العاده عنده مايقدر ييلس فتره طويله من غير مايتصل بمنال ويسمع صوتها .. منال مع الايام تعودة على سهيل وتقبلة اهتمامه ابها ولكن كانت تحس ببعض تأنيب الضمير ناحية حبها الاول .. ولكنها كانت تطاوع الوقت وتمشى معاهم بالي يبونه ..

كانت منال يالسه مع امها وفاطمه اختها وحمد يناقشون موعد العرس مته بيكون .. و رن تلفون حمد ونش حمد برا وقعد يرمس في التلفون .. فاطمه بدا ويها يتغير وكان هالموقف يتعبها ويعذبها .. ماقدرة فاطمه تستحمل تصرفات حمد وشكوكها فيه الي تمت تعذبها طول هالفتره ..
نشت فاطمه واستسمحت من عمتها ومنال وطلعت غرفتها وهي تقاوم دموعها الي ملت عيونها وتحاول تهدي نفسها المجروحه من خيانة حمد الها الي باتت تأرقها وتتعبها كل ما رن تلفون حمد ..

رد حمد للميلس وطالعهن وماشاف فطيم عندهن .. وقالن له انها استسمحت منهن فجأه و طلعت غرفتهاا وهي متضايقه ومايعرفن شو بلاها .. استهم حمد عـ فاطمه وترخص من امه ومنال وطلع فوق عندها علشان يشوف شو فيها ..

دق حمد الباب عـ فاطمه وكانت قافله وتصيح .. حاولت تمسح دموعها بسرعه وتخلي عمرها طبيعيه ونشت فجت الباب لحمد ..
دخل حمد مستغرب شكلها وليش فاطمه كانت تصيح ..!! تقرب حمد من فاطمه وهم عالباب ومسك يدها بكل اهتمام وهو يطالع عيونها وخايف عليها ..
حمد : فطيم حبيبي شو بلاج ..؟
فاطمه وهي تحاول تسحب يدها من ايد حمد : ولا شي ..
حمد بإصرار وهو ماسك ايدها مب راضي يفجها : لا .. فيج شي وكنتي تصيحين .. شو بلاج حبيبي ..

فطيم وبكل قهر صرخت وسحبت يدها من ايد حمد وتمت تصيح ومب رايمه ترمس ..
حمد خاف على فاطمه وماعرف كيف يهديها وهو مش عارف شو بلاها ..

حمد : فطيم هدي اعصابج ورمسي .. قولي شو بلاج ..؟

فاطمه وبين دموعها : حمد خلاص تصرفاتك صارت مفضوحه .. وانا مااقدر اتحمل خيانتك لي ..
حمد وبذهول : فاطمه .. بسم الله عليج .. انتي شو تقولين ..؟
فاطمه يلست على الكرسي وهي تحاول ماتصيح وتبى تتناقش مع حمد بهدوء ..

فاطمه : حمد انحن بينا ثقه كبيره صح ..؟
حمد : اكيد وعقب الثقه بينا حب وعيال ..
فاطمه : والي يخون الثقه .. شو يكون ..؟
حمد : يكون خوااان وماله امان .. ولا يستحق الثقه ..
فاطمه وقلبها يعتصر حزن : ليش تخوني ياحمد ..؟ في شو قصرت وياك علشان تجازيني بالخيانه .. هذي نهاية الثقه الي بينا ..؟

حمد وفي عيونه علامة تعجب كبيره وحاس بالاهانه من فاطمه : فاطمه هالكلام كبير .. وانتي تجرحيني بكلامج هذا ..
فاطمه : وانتي جرحتني بافعالك ..
وردت فاطمه تمسح دموعها بكل اسى على حالها مع حمد .. وهو ينكر ومب طايع يعترف ..
حمد وصوته متغير : فاطمه ماكنت اظن ان الثقه بينا معدومه .. كيف تتهميني بالخيانه .. شو الي بدا مني .. وخلاج تشكين فيني بهالصوره وتخونيني ..؟

فاطمه : حمد انته ماتحس بتصرافاتك .. اتصالاتك .. وتهربك مني يوم حد يتصلك .. شرودك وتفكيرك .. حمد كل هذا يدل على خيانتك لي .. صح انا ماوصلت للي تكلمها علشان اتأكد .. لاني عازه نفسي اني انزل لمستواهن وارمسهن .. وانا اعلى من هالشي ..
بس انا اسألك انته علشان تقولي كل شي .. وصدقني اقل شي بيصير بينا هو اني اخليك تعيش حياتك عراحتك ومالي علاقه بك .. وبتم انا يالسه عندك علشان بناتي وهن الشي الي يربطنا ببعض بس .. بس مابيكون بيني وبينك شي .. ومااريد اعذب عموه نوره معانا ..

يلس حمد على الكرسي بعيد عن فاطمه ومسك راسه بيديه ونزل راسه يفكر ومتـأثر من كلام فاطمه وقرارها ..

فاطمه وهي تعبانه من تبدل الحياه عليهم فجأه وحاسه ان الشخص الي كان يمثل الحياه بالنسبه الها والمستقبل .. صار شخص انعدمة الثقه فيه ونزل من مكانه العالي وصار ولا شي بالنسبه لفاطمه ..
خساره ياحمد قضيت على حبي لك وحياتنا وبتعبني وبتتعب بناتك معانا .. ليش .. ليش ياحمد سويت فيني جي ..؟

نزلت فاطمه راسه وتمت تصيح وحمد رفع راسه وماهانت عليه فاطمه ودموعها الي تعذبه .. بس في نفس الوقت حمد انجرح من كلام فاطمه ورايها وظنها فيه رغم ان حمد ماكان يخون فاطمه ولا عمره فكر انه يخونها .. ولكنه كان مشغول بموضوع يخص شخص غالي عليهم وهي منال ..

حمد وهو يمسح عشعر فاطمه : حبيبي .. ام نواري .. تتوقعين ان حبيبج وابو بنات اييه يوم ويخونج !!؟.. لعنبوه انا لو خنتج بحس اني خاين الدنيا كلها .. انتي وامي ومنال وبناتنا .. كيف تتصورين ان ممكن حد ياخذ اهتمامي وحبي غيركم ..
ها يافاطمه .!!؟..
تم حمد يرمس فاطمه وهو يبتسم الها ويحاول يحنن قلبها عليه ..
رفعت فاطمه عيونها فيه والدموع بين اهدابها ..
فاطمه : ليتك صدق ماتكون خنتني .. لاني مااقدر اتقبل هالفكره .. ولا اقدر احكم علينا بالبعد .. انا احبك .. ومااقدر اصبر يوم واحد بدونك ..

حمد : فطامي .. اذا انتي ماتقدرين تصبرين عني يوم .. انا دقيقه مااقدر اعيشها بدونج .. انتي عمري وروحي وكل شي احبه في هالدنيا ..
فاطمه : حمد لاتضحك عليه يهالكلام .. مااقدر اصدقك بعد الي سويته ..
حمد : فاطمه اباج تعرفين انج جرحتيني بافكارج عني .. والي ماعندج عليهن اي دليل .. ولكني بطمنج وبريحج من هالظنون ..
رفعت فاطمه عيونها في حمد وبكل ريبه : بتحاول تألفلي جذبه علشان اصدقها ..

حمد : لالا .. لا يافاطمه .. مابتوصل للجذب .. خلي على الاقل قليل من الثقه تكون بينا اذا الثقه الكامله انعدمت في داخلج ..
فاطمه وهي تلوم نفسها على كلامها في حمد : اسفه حمد .. انا اسمعك تقدر تدافع عن عمرك وانا بصدقك ..

حمد : فاطمه .. الي اقدر اقوله لج هو ان الاتصالات الي انتي تشكين فيهن .. مش من بنات .. وانا ماخنتج ولا فكرة اني اخونج في يوم من الايام .. وهالاتصالات من ريال بيني وبينه موضوع هام يخصنا كلنا وبالاخص يخص منال ..

سكت حمد وهو يتريا راي فاطمه في الموضوع والرمسه الي سمعتها .
فاطمه : شو هالموضوع الي يخص منال وما كنت تبانا نسمعه ..؟
حمد : مااقدر اقولج عليه الحين .. لين مااتأكد من هالكلام وعقب منال بتعرفه وهي كيفها اذا بغت تخبركم والا لا ..

فاطمه : حمد مااقدر اصدقك .. الا اذا عرفت الموضوع كامل .. يمكن تكون تتهرب مني وتلفق اي كلام علشان تنقذ نفسك ..

حس حمد بالاهانه من كلام فاطمه وماعرف شو يقولها .. لان الكلام عانده واحساسه المجروح فضل انه يسكت عن فاطمه ومايناقشها علشان ماتزيد علية الجرح وتعذبه اكثر بظنونها وشكوكها ..
نش حمد عن فاطمه و خلالها الحجره وظهر وهو يجر معاها خيوط الثقه المفقوده ..