حلمي وحبيبتي اللي كنت لها الاخو اللي تشكي له والام اللي تحن عليها والاب اللي يلبي طلباتها واغلى شي بحياتي من بعد امي.....
تزوجت 3 ايام وانا في عداد الميتين وعيوني مفتوحه وتدمع وساكت ما اشوف الا امي اللي تقرء علي وتمسحني بزيت مقرئ وجدتي ما اسمع منها الا قولها: هي بنت وبدالها الف بنت وانت صغير على الزواج....؟!!
" ذاك الوقت ما اقدر اتكلم لاني كنت تعبان او للاصح حزين ولا اعرف السبب وامي تقول الله يسامحك يمه شوفي وين وصليته وتقول بين دموعها الله يسامحك يمه ولدي بيموت يمه مالي الا هو""
وتروح جدتي تاركه امي بحزنها على ولدها الوحيد وتاركتني بصدمتي والالامي 3 ايام وانا في كل يوم احتضر...... لحد ما دخلت بدريه بطلتها الحلوه بصوتها الحنون ولمستها الشافيه وطاحت عند راسي وهي منهاره تبكي تكفى يا ياسر لاتعذبني اكثر من ما انا متعذبه واخذت الزيت من امي وصارت تمسح على شعري وجبيني واحسها المويه تطفي نار قلبي ناظرتها وعيوني تدمع: بدريه!!
بدريه وهي تشهق من البكاء ومتجاهله وجود امي اللي منهاره مثلها: ياعيون بدريه
: انتي اصبحتي لغيري وضربت صدري ضربه قهر وقلت آآآآآآآآآآآآآآآآآآآآآآه
بدريه:يا ياسر انت رجال وتقدر تتحمل اجل انا وش اقول اللي انغصبت على زواجه ما ابغاها وانهارت تبكي
وراحت للحضن اللي ياما بكت عليه واحن عليها حضن امي وصارت تبكي وتقول يمه جدتي ضيعتني وضيعت ياسر
قمت من على السرير بتعب: يمه جهزي اغراضك ماعاد لي قعده بهالبيت وانتي امي انا ملزوم بك
امي :ياسر صل على النبي وين نروح يمه وانت تدرس وانا ماعندي الا راتب ابوك التقاعد ويالله يالله يكفي احتياجاتنا
: انا رجال يمه ولاتخافين انتظرك بسياره يمه اخذي كل اغارضك
امي: ياسر
: اذا تبغين امك اقعدي معها وانا من اليوم ماراح تشوفون وجهي
بدريه: فراقنا مهو نهاية العالم
ناظرتها بعتب: وش تقولين يا بدريه في هلكم يوم غسل مخك نايف خلاص نسيتني وحبيتي نايف انتم يالحريم مالكم امان
مسحت دموعها وراحت تركض بيتها ركبت سيارتي ورغم محاولات خالي ان اجلس معهم لاحد اتخرج اما جدتي كنها كانت تنتظر هاللحظه تمت بغرفتها لحد ماطلعنا من البيت
ركبت امي: هاه ياسر وين بنروح
سكتت وركزت على الطريق وقفت عند عماره سكنيه
امي منصدمه: بنسكن مع المقيمين هنا؟!!
تنهدت: احسن من العيشه مع وحده ماكلفت نفسها انها تحاول تردني عن قراري اللي من سابع المستحيلات ارجع عنه..
امي: تعوذ من ابليس ياوليدي وخلنا نرجع لحد ماتتوظف ونطلع
: خلاص يمه طلعت ومستحيل ارجع وانتي كلها كم يوم وبأجر لنا بيت لحد ماتتحسن الامور وايكون عندي واشتري بيت
امي: وشلون تتحسن لايكون ناوي تفصل من الجامعه
: لا يا يمه بدرس وبشتغل مثل هالناس
امي وهي تبكي: منت قد هالتعب يمه
ضربت صدري: قدها وقدوووووود انا رجال عمري 23 سنه
نزلت امي رغم انها ما حبت المكان مرت الايام ورحت ((لعمي سالم اخو ابوي الصغير)) وقلت له يدور لي وظيفه وبحكم اني ماعندي شهاده قال لقيت لك وظيفة امين مخازن باحد شركات البترول لاحد ما اتخرج وراتبها كويس وكان دوامي 9 ساعات من 6 الى 3 الفجر كنت اخاف على امي واتصل عليها وقت دوامي 5 الى 6 مرات بعد ما أجرت بيت وصارتجلس فيه لحالها لانها رافضه الخادمه خايفه علي منها ^_^ القرد بعين امه غزال
وقتها ماكنت انام الا 6 ساعات واروح للكليه لحد مامرت سنه وتخرجت وطبعا ترقيت في عملي بفضل الله ثم بفضل عمي سالم واشتغلت بالاسهم الاسلاميه وقدرت اشتري البيت اللي ساكنين فيه لان امي حبت جارتها ذيك الايام ماكان طيف بدريه يفارقني لكن كرامتي فوق كل شي برغم حبها اللي ساكن في كل مكان فيني ما كنت ارضى امي تجيب لي طاري أي احد من عائلتها واذا كانو بالبيت اروح لصحابي لحد مايروحون واحيانا اضطر انام برى البيت اذا نامت ام امي(جدتي) خلاص كل شي بينها انتهى بعد ماغدرت فيني لحد اليوم اللي دخلت البيت راجع من العمل وكانت الساعه 6 المغرب لقيت امي فرحانه
حبيتها على راسها:خير يمه فرحيني معك
قالت الخبر اللي زلزل الارض من تحتي وحسيته سكين انغرزت بقلبي:بدريه جابت بنت اليوم الفجر يلا يمه وصلني لها بالمستشفى
عطيت امي ظهري راح لغرفتي ابدل ملابس العمل وحاط ايدي على قلبي: تامرين امر تجهزي لحد ما اتروش والبس
سكرت الباب وانا احس اني انتهيت رن جوالي وحطيت القهر فيه رميته من غير مادري من متصل على الجدار لاحد ما صار في كل مكان جزء منه تروشت ولبست ثوب اسود وشماغ تعطرت ناظرت وجهي السكسوكه امس مزبطها وقلت بقلبي وانا اناظر شكلي بالمرايه
(( شوفي يابدريه اللي خسرتيه))
طلعت لقيت امي لابسه عبايتها : تاخرت عليك
امي: لا واشرت على كيس شيله فيه عشاء خل اوديه لها من امس ماكلت شي وامها مهي عايشه ولاحد يهتم الا في بنته
شلت الكيس وناظرت امي: هذا انتي اهتميتي فيها وهي مهي بنتك
امي: بنت اختي الوحيده والله العالم انها مثل بنتي
: طول عمرك حنونه وطيبه
اسكتت ركبت معي وصلتها لحد المستشفى قبل تنزل: اذا خلصتي اتصلي فيني
امي: منت نازل تسلم على بنت خالتك اللي طالعه من موت
: لا يمه مواعد واحد من الشباب بيزعل اذا ماجيته وسلمي عليها وتحمدي لها بالسلامه
نزلت امي وانا وقبل امشي واحد ضرب النافذه نزلت : خالي؟!!!
حضني خالي: وينك وانا ابوك سنه ماشفتك
: مشاغل ياخالي
خالي: الا قول انك ماتبي تشوفنا
طلال ولد خالي عمره 14 سنه: هلا ياسر وينك يارجال ما نشوفك
بنت خالي من ورى خالي: شخبارك ياسر
ابتسمت: هلا ساره ابشرك بخير
ساره: وربي مشتاقين لك
:تشتاق لك العافيه
خالي:خلاص بكرى غداءك عندنا
:اسمح لي والله مداوم ولا اطلع الا 6
خالي: خلاص عشاك
: لا والله مشغول
ساره: قول انك ماتبغى تشوف جدتي وخلاص
خالي: سااااااااااااره
: لاتسكتها ماقالت الا الصدق
خالي: هذي جدتك
: اللي سوته فيني تسويه جده بحفيدها
ساره: وهي صادقه بدريه بدالها الف بنت
ناظرتها بحده: لاتتكلمين عن شي ماتعرفينه
ناظرت خالي: استاذن مواعد واحد
طلال: وعشاك
:بكرى بمرك وباخذك معي وبعشيك برى اذا سمح خالي
ساره: اعزمنا كلنا ولا بس العزيمه لطلال
طلال طلع جواله: عطني رقمك خاف تشرد من العزيمه بكرى
:هههههههههه وتذكرت يوووووووووووه جوالي منكسر خلاص بمر محل واخذ واحد
طلال: تهرب تهرب من العزيمه
: والله اني رميته بالجدار وانكسر
عطيته رقمي واستاذنت ركبت السياره وساره ونظرات ساره ماغابت عن بالي مشيت بشوارع الرياض بليا هدف وقفت سيارتي عند محل جوال واخذت لي جهاز ورحت للبيت خذيت شريحتي حتى صاحبي استاذنت منه لان مالي مزاج اقابله وقفت عند مقهى وجلست طلبت شيشه وقهوه وناظرت المباره
رن جوالي وكانت امي
: مرحبا
امي: وينك ياياسر
:قريب هاه خلصتي