السلام عليكم ورحمة الله وبركاته...
وهاي هي التكلملة...من اجل عيون المشاهدين
ــــــــــــــــــــــــــــــــــــــــــــــــــ ـــــــــــــــــــــــــــــــــ
فاطمه: و يوم بيلحقج الشيخه و بيشوووف رقم السياره هاذيج الساعه شوه بتسوين ؟؟؟؟
ضبابه: ياختي حشا انتن متعقدااااات..لا تكبرن السالفه و هيه ما ترزا!!!
لطيفه: و الله انا اشوف انه السالفه ترزا ...ولا شوفيه شوه يالس ايسوي وراج الحينه؟؟؟؟
فاطمه: دخيييييييييييييييلكن الشرده ...اللهم اني بريئه...وين بنطس و بنشرد عنه الحينه؟؟
لطيفه و عيونها فيها لمحت خبث: اييكن الشور...تبعني
ضبابه: يالله لطفين انتي و من وراج الطوفان..
لطيفه اتموووت على المغايض...و يوم ايعدي على لطوف يوم من دون لا تسوي شي غريب ولا اتشاكس فيه معناها لطيفه اتكون مب صاحيه فيه...مب طبيعيه ..
++ الخام وين يبا يلحقنا...ولا بعد بصراحه نستاهل بنات ارواحهن فالمحل و حضرت الاميره ضبابه كاشفه عن ويها جدامه عيل ما ينلام يلصق فينا...بس شوه فيها و الله انا حشام و مستورات ولا يبين علينا انا رواعي حركات و السوق تقريبا فاضي خاصه انه اليوم الخميس و الساعه الحينه تقريبا 12 الظهر ...بس و الله يا يرويه ..تمت لطوف كل شوي اتروح مكان تبا تتأكد اذا هوه بالفعل يلحقهن ولا لا ...بعد حرام نظلم الريال جاد عنده حايه وياي يقضيها...طبعا القافله كلها ورا لطفين ...بس بالفعل طلع الريال مب ناوي ايفارج ..اوكي اوكي دواك عندي بشوف شوه بسوي...
سارت لطيفه بالبنات صوب قسم الملابس الداخليه ..شوووفوو المكر انتو...
ضبابه: ااااايه لطوووف غربلات عدوج وين تبين ....يالفضييييحه
لطيفه و هيه ترفع وحده من القطع اللي موجوده فالقسم حق فاطمه و ضبابه...طبعا الريال من شافهن في هاذا القسم بصراحه احترم حاله و استحا على ويهه و فارج
لطيفه: شوه رايكن حلو الاسود لاه؟
ضبابه و ويها طمامه: لطفين عاد قلنا بتتصرفين بس مب جيه ...فضحج الله نزليه و لا و الله تراني يا سير عنكن الحينه
فاطمه: اشكر فنننج و الله قفططططططط....سر سر ألقط ويهك هااكووه متناثر على الارض
لطيفه: ما تبيهم غير العين الحمرا
حاسبن البنات و طلعن ....ركبن السياره و اول ما تحركت السياره...مرت عدالهم سياره مرسيدس كوبيه عنابي و عليه عاكس رقم ثنائي أخضر..بالاحرى شخطه عدالهن ووووويل ألين ما غبرت سيارتهن عدل و عقب روح
لطيفه: يعلها طرشتك
فاطمه: ههههههههههههه...حشا من الضيقه حليله ارتفع الضغط عنده
ضبابه: حرام عليكن و الله انه حليو
فاطمه: هو نفسه اللي كان فالمحل؟
ضبابه: هيه
فاطمه: شدراج؟؟؟
ضبابه: شفته منزل الدريشه
لطيفه: ضبوب جنج قمتي تخووورين...وين سلطان عنج
فاطمه: امررره ما عليج التقرير اليوم بيوصله
ضبابه و قدها بتدمع عينها: بس عااااد حرام عليكن..و الله اني ما قصدت فديتكن ما تيبله طاري
فاطمه: هههههههههههههه..مستحيل و اخيرا لقينا شي انهددج به
لطيفه: تيكي ما عندي مانع بس اتخطفيني على البيتزا هت و على حسابج
ضبابه: ما عليه ما عليه بس سلطان مايوصله شي
لطيفه: بفكر ...بشاور عمريه
ضبابه: يعلللللللللللللللللني ما احلمكن قوولن امين لطفين و يههههههههد....حرام عليج
لطيفه: انزين شوي شوي على عمرج شوي و بتموتين ..امره قيس وليلي ..خلاص مابقوله بس اصطلبي ولا تيلسين اتبصبصين مره ثانيه ولا تراه و الله بزوالج
ضبابه: من اليوم مشتغله عليه حماه
لطيفه: بغيتي حياج ما بغيتي اتعرفيهن عراقيب الجبيب ( احدى المناطق) سيري خمسي ويلات فيهن لين مايدور راسج
++ انتهي هاذا اليوم و اخيرا ..عدى على خير..حشا و الله اني قلت انه حد داعي علينا من ظهرنا و نحن ما نسير بزياده..من مشكله ألين ثانيه...بس الصراحه كان يوم حلووووووو، يعيبني اليوم اللي اتكون فيه مخالفات وايد مادري جيه استانس من الخاطر ..اهم شي الصيفي و خلصناه وعقبال النتيجه ان شالله ...انا مادري احس اني بنجح لاني دووم ما ادرس بس الله يوفقنيه ...اكيد الوالده داعيتلي...اما المصيبه هناك عند فطوم ياخوفي ترسب امرررره مالها خص هالبنت فالدراسه و مادري ليش معزره اندش الجامعه..يالله تنجح و تفكنيه لاني مستحيل اخذ اي مساق فالجامعه من دوونها...حتا افكر ادش كليه و تخصص ادبي عشان ما نتفارق..ظاهريا فاطمه هيه اللي ما تقدر تصبر عني...بس اللي ما يعرفه الكل انه انا اللي ماقدر اصبر عنها...علاقتيه بأهليه فالبيت محدوده...يعني سعيد اخويه العود هوه الوحيد اللي علاقتيه به وايد قويه بعد ابويه طبعا..بس ابويه الله يهديه طول السنه ما نشوف زوله فالشتا مقناص و الصيف سفر ويا الشيوخ...و اخويه خليفه طول فترت مراهقتيه ما شفته طبعا مب لانه مختفي... بس لاني انا اللي ما اقر فالبيت يا اكون في سويحان عند يدتيه و عمي مبارك او اكون في بيت عموه بخيته و عقب ما انتهت فترت مراهقتيه الذهبيه سافر الاخ الي نوتنجهام-بريطانيا دراسه...اما عايشه اختيه هاذي كائن فطري يعني ايعيش على النت بس ... الله يسلمكم تدرس فالتقنيه و حياتها كله سوالف اعجاب ما اعجاب و فلانه سوت و علانه انخطبت...طبعا سوالف بنات التقنيه معروفه!! يعني حش في حش عشان جيه اتجنبها ..اما وضحوووووووه..فديت الوضيحي انا جاني ما صبر عنها ...وضحه صف خامس بتروح سادس...دلع في دلع...الكل يحبها و الكل ايدلعها..طبعا ماروم انسا اختيه العوده شمسه اللي هي عقب سعيد اخويه حبوبه العايله معرسه ماخذنها عمير ولد عمتيه بخيته و عندها ولد واحد بس و هو سيف و ان اشا الله الحينه هيه حامل الله يوفقها و الله اني احاتيها هالانسانه بسيطه و ماخذه الدنيا كلها ايزي ...و اخيرا سلطان اخويه و الله بصراحه شوه اقولكم...ابدووووووووووووي....يعني الريال راعي عزب ورجاب و مراكيض...هيه صح و عشق بعد .... العالم كله اتعرف باللي بينه وبين ضبابه..حتا البشاكير ...و الكل مسمنهم العقيلي و ميا...اغلب الوقت ما شوفه بس الفتره الاخيره شاد حيله لانه وراه ثانويه عامه السنه اليايه....الشيخ راسب سنه اول ثانوي..يعني اكبر عن ضبابه بسنه..هيه صح فييه انسانه نسيتها...اصلا شي طبيعي انساها ...أمايه ( عفرا) ... مادري ايام احسبها اتحبنيه انا اكثر وحده من خواني و اتحن عليه بشكل غريب و احيانا احسبها بعيده عني ولو انها لحظات نادره...مادري بتقولون اصلا ما فيه ام تكره عيالها بس والله انها هاي الحقيقه مرات احسبها انها بعيده عني...بس ماشي من دووون سبب؟؟؟ اكيد فيه سبب ...اكيد
""""الجـــزء الثاني""""
أحبــــــــــك ليه انا مادري ..ليه اهواك انا مادري..لو مرت علي ذكراك..يفز النبض في صدري..
عاد هاذا الاسبووووووع مر بسرررعه....طبعا البنات كل يوم فالسوق عشان ايخلصن مستلزمات السفر..يعني نعال عشان العمره ..يشترن قطع عشان الاحرامات و ايفصلهن..شيل ..عبايا مسكره..يعني اتعرفون مستلزمات البنات وايد ما تخلص
++ أول مره بنسير من دون أخويه سعيد، فديته مادري ليش مكنسل كل ما نسأله ايقول بس.. المهم انه ابويه و سلطان اخويه بيوديكم، عاد هاذا بو عسكور اخويه له معزة خاصه في قلبي..مادري جيه دوم ايدافع عني و احسبه وايد يحن عليه من دون كل خواتيه، ليش مادري؟؟!! المهم تجهيزات السفر جاريه على قدم وساق...
في المطبخ التحضيري...دشت لطيفه و حبت راس امها
لطيفه: شمسيتي..بنت راشد؟
عفرا ( ام لطيفه) : بخير و نعمه...تعالي لطوف هاتي الجدر اللي هناك
لطيفه: و شعنه شوه تبينه؟؟
عفرا: بنشله ...في شوه بنطبخ فالعمره عيل؟؟؟
لطيفه: خليه امايه هالجدر عوود ما بيدش فالشنطه ...برايه بنشتري مناك.. هناك الاسواق وايد.
عفرا:هزرج؟؟؟
لطيفه: هيه ..عيل تبين ابويه و سلطان ايسحبون هالشنط اللي هالكبر فالمطارات؟؟؟...مافيه بويه على التسحيب
عفرا: عيل اقولج هاتي دلتين من الستور وحده حق القهوه و الثانيه حق الحليب
لطيفه: ان شالله
و دشت في هاللحظه عليهن عايشه.....محتشره
عايشه: امااااااايه؟؟؟؟ وين اللي بيوديني السوق؟؟؟؟
عفرا: خيبه اتخيب العدو ...نسيت ..عاد الحينه شوه بيفججني من حشرتها هاي....انزين انتي شوه تبين من السوق عنبوج البارحه يايه؟؟
عايشه: امايه تراني قلتلج شوه ابا... كم مره عاد بعيد؟؟؟
عفرا: انزين انا الحينه هب متفجيه لج ...سيري خلي سلطان ايوديج.
عايشه: سلطان محد ..
عفرا: و ابويه عليج انتي..الحنيه شايفه سيارته فالكراج
لطيفه: الخنفسانه اللي فالكراج...سلطان ساير ايودي سيارته النيسان الصناعيه
عفرا: في ذمتج؟؟؟؟ يا ويليه من هالولد محد بــيــــبليه الضغط غيره..اكيد انه ساير ايركبلها مكينه
عايشه: عاد هاذا سليطين يربع ورا الموت بريوله
لطيفه: عويش لمي ثمج...هب اتمين اتحطين الضو في فواد أمايه
عفرا: ادريبه يبا ايسير يسابقبها في العراقيب...شوه يباه مرعي هاذا كم مره قلتله انا لا تسيرعنده.. محد غيره مخرب الشباب مرعي هاذا يبا حد ايبلغ عليه الشرطه؟؟
لطيفه: ههههههه أمايه لا لا ...مررررررررعب ... مسابقة تل مرررررعب يعني عرقووب يتسابقون عليه الشباب و اللي يوصل سيارته فوق هوه اللي يفوز
عفرا: و ااااابووووويه...
عايشه: هيه امايه و اللي ما توصل سيارته فوق اتردبه نكس و الله يعلم عااااد وين ايوقع بها
عفرا و هيه حاطه ايدها على صدرها: في ذمتج؟
عايشه: و الله هاذا اللي انشوفه فالتلفزيون
عفرا: لطوووف..اربعي هاتي تيلفونيه من الحجره بسويله هاذا مسود الويه ..يبا اينفد عمره بعد
عايشه: شووووه امايه بتوديني ولا لا ؟؟
عفرا: يا من عاف حياته من هالبنات ...جنكن امرررره ماعندكن شي ..و الكباته اتزووع من الثياب سيري سوي حق مجيد خليه اييب السياره
عايشه: مجيد و السياره برا انا مسويتلهم من قبل
عفرا: ياااااي هااا جانكن ترامن ..سيري هاتي عباتيه و البوك
عايشه : يالله ....هب تبطين لاحقه عليه القشار.. ولا أقول خلي لطيفه اتحطه
دش عليهن سعيد في هاللحظه...
سعيد: و عنبوووه لطيفه بشكارتج تأمرين عليها....و الله اللي بيقول حق لطيفه شي بزواله
عايشه: و شوه مستوي عليها الاميره لطيفه ....
سعيد: جب جب عن هالرمسه اللي ما لها معنى و لطوف هب خادمتج ولا عبدتج تهبينها و تسندينها
طلعت عايشه متضيقه كالمعتاد...اي نقاش تكون فيه لطيفه لازم سعيد ايدافع عنها
عفرا: هلا الغالي فديتك متا ييت من بوظبي؟
سعيد: من شوي؟ عيل وينها حمده و العيال؟؟؟
عفرا: و الله يابويه حمده عند اهلها شله هيه ما قالتلك؟؟!!!
سعيد: مادري
عفرا: ابويه ...شي يعورك ؟؟ اشوفك و الله انك؟؟!!!
سعيد: لا لا ما شي بس راسيه يعورنيه ...
عفرا: فديتك يا بو عسكور...شي بلاها حمده؟؟ شي مستوي بينكم؟؟؟
سعيد: لاحوووووووووول...ردينا على طير يلللي...أميه فكيني من الصدعه الله يخليج
عفرا: فديتك يا بويه ... و الله اني ابا مصلحتك ..يا بوي هاي حرمتك و ام عيالك مب زين جيه ..كل يوم شاله العيال و رابعتبهم بيت اهلها...
سعيد: ذلفتها
عفرا: يابويه لا تقول جيه...لا تقطعليه فوادي
سعيد: اميه اميه ....ياي من بوظبي و تعبان و داير راسي و من هبطت استلمتيني... عنبوها حياة
و نش سعيد مضيق...شغل السياره و طلع من البيت...سعيد البجر في عايلت حمد..هذا بعد قصته قصه...
حكايه عمرها اعوام انا ما ودي اذكرها..ولا ودي ليالي الجرح ترجع لي و اسهرها
++ من خمس سنوات بعد...الله يغربل هذاك العام اللي نزلت فيه البلاوي علينا وحده ورا الثانيه...انا و سعيد اخويه انصدمنا بصدمات قويه ..دمرتنا ..هزت كيانا...و بالاحرى كرهنا فيها حياتنا...انا كنت صغيره و اي ضربه في حياتي ممكن انساها بسهوووووله ... بس اللي اكتشفته دمر حياتي ..غير مجرى حياتي..و خلاني اجتل احلام وايد كنت راسمتنها في خيالي..بس اتم القضيه اني بنت ..في حين انه سعيد اخويه ريال و اذا دمرت حيات ريال المفروض انه يوقف من يديد و ينسا...بس سعيد ما وقف بالعكس كل سنه عن سنه يطيح اكثر..و السبب بنت!!!!
من خمس سنوات تقريبا..سعيد اخويه كان شاب موقـــّف عن الدراسه لانه مب فالح فيها ..وصل ألين الثانويه العامه بس ما قدر يطلع منها عادها سنتين بس بعدين طبها...على قولته و في شوه بتفيدني الدراسه يعني..تراني عايش بها ولا بلاها و الحمدلله انا مب ناقصني شي...بس الشي اللي ما كان يعرفه انه هوه ناقص في عيون الناس..لانه لا درس ولا اشتغل يعني كان بطالي بعد..و سعيد في هاذيج الفتره مشاكله كانت وايد توصل مراكز الشرطه مرات..بس هاذا مب معناه انه انسان مجرم..يعني كان صايع اوكي...بس مب هاذيج المشاكل ..يعني مشاكل اي ولد ممكن ايسويها في سنه..
سعيد كان يحب مريم بنت عمي مبارك...و هاذا الشي كان واضح وضوح الشمس..ياليته لو كان حب عادي..شوه يوصفونه حب اسطوري ولا خرافي..مادري ...انا استغربت انه في ولد من عايلتنا اللي هي عوايل محافظه و قبايل ما قبايل ممكن ايحب بهالطريقه..يعني حب بجراءه..حب علني..و حب عذري..حب جلب المشاكل وراه..مشاكل لا لها اول ولا لها تالي..
في هاذيج الفتره كان اخويه سعيد يبات في بيت عمي مبارك لانه مطر ولد عمي تقريبا من نفس السن..بالاحرى كان بيت عمي هوه بيت سعيد اخويه.. ما كنا انشوفه ابدن فالعين من تيي الاجازه سيده سويحان..سعيد كان ييلس مع مريم بدون اي اعتبار للعادات و التقاليد..مادري كيف اهليه و عمي تغاضوا عن هالشي..يمكن كانو يعرفون انه مريم من نصيب سعيد و سعيد من نصيب مريم..كانوا عادي يسهرون ألين الصبح ايشوفون افلام طبعا مطر ولد عمي معاهم..يطلعون مشاوير مع بعض و كنت انا الرزه وياهم...لانه من سابع المستحيلات ايخلونهم يطلعون رواحهم..
أذكر مره كنت صغيره و شلنا انا و مريم بوظبي ايحوطنا..مشانا شوي على الكورنيش و شوي في شوارع بوظبي و بعدين خذنا عشا اتعشينا على الكاسر و ردينا..اي عشا الله يخليكم المغرب اتقولون دياي.. ذاك اليوم كنت ادعي ربيه انه يعدي على خير..مادري كيف ما فيهم مخوخ هالاثنينه و ايسوون سواياهم..ردينا ذاك اليوم و الله ستر انه محد فالبيت عمي وحرمته سايرين عزا عند ناس فالعين..و مطر كان ايودي سيارته الكراج ايصلحونها..ردينا البيت و كان فاضي..
لطيفه: الحمدلله الحمدلله محد فالبيت ...فديتك يا ربي لي نجيتنا
مريم: هههههههههههه..اسميج يا لطووف ديايه
لطيفه: ديايه ولا ديج...اتخيلي لو دروبنا ...ياويلي بيجتلونا
مريم: ههههههههههههههههههه...خليهم يدرون يعني انتي طالعه مع اخوج و جيه خايفه عيل انا شوه اقول؟؟
لطيفه: مريووووم بس عاد من هالطلعات خلاص انتي حرمه و سعيد ريال شوه بيقولون عنكم العرب بينقدوونكم
مريم: خلي اللي يدري يدري ..و اللي ما يدري ايوطي راسه..ولدي عميه يعني شوه فيها..و بعدين ..
لطيفه: و بعدين؟؟؟ شوه
مريم: ماشي ما شي انتي صغيره على هالسوالف ..سمعي لطوف ان حد تخبرج و ين سرنا قوليلهم عند موزه بنت سالم اوكي؟
لطيفه: لا و الله تبيني اجذب...المعلمه اتقولنا الجذب حرام
مريم: ما عليه لا تجذبين ...انتي قولي انا سرت ويا مريووم و انا بتصرف
لطيفه: يعني انتي بتجذبين
مريم: اووهوووو... ياربي من هالبنت ..ماماتي لطوف نحن ماسوينا شي غلط..رحنا اتكشتنا و ردينا صح ولا لا؟
لطيفه: صح ...بس و الله اني اخاف من اخوج مطوور..
مريم: ماعليج منه انتي لاترمسين اوكي؟
لطيفه: انزين مريم
مريم: يا هي حاله شوه شكلنا اليوم ما بنخلص
لطيفه : انزين اخر سؤال؟
مريم: سألي
لطيفه: ليش سعيد اخويه ما يخاف
مريم: اممممم...سأليه شوه اللي في قلبه؟؟ و بتعرفين ليش ما يخاف
لطيفه: شوه في قلبه بعد دم احمر وشريان الارررررطططررري
مريم: شوه هاذا الاررطرري بعد؟؟
لطيفه: مادري درسونا في العلوم
مريم: خلاص ...انسير نيلس فالصاله انشوف اي شي
لطيفه: يالله
يعني انا كنت مقصه بينهم...او بالاصح شاهد حب..مادري...الطلعات و اليلسات بينهم كانت خطا في خطا..بس وربي الشاهد انه ما بدت زله منهم ...ولا كلمه ...ولا حركه..ولاغلطه..ألين ما صار ذاك اليوم...طلعو سعيد و مريم العزبه رواحهم...و ردوا العصر من دون لا يشلوووني معاهم..و يوم درا مطر عصب ...يالله الشرار يظهر من عيونه ...هـــــــــــدّ على مريم ...الا غسلها غسال...و حرم عليها الطلعات ويا سعيد تحريم..و منعها حتا اذا يا سعيد البيت عندهم انها تطلعله...بصراحه ما ينلام يعني شاب بو 22 سنه يطلع مع وحده19 سنه وين الصح اللي فيها...غلط في غلط..حتا لو ما صار شي بينهم..حتا لو عيال عم ..حتا لو لو لو لو لو ..اتم العادات و التقاليد سيدت الموقف!!!!
مطر: و الله و الله يا مريم ان شفتج ويا سعيد مره ثانيه لا تلومين الا عمرج..و ان يا لا تظهريله
مريم: انزين نحن ما سوينا شي غلط شوه فيها سرنا العزبه بس
مطر: جااااااااااااااب ولا كلمه....نصخج ماريد اسمعه
مريم: شوه هالحااااله...
مطر: مريم...لمثي ثمج دام النفس راضيه...و الرمسه اسمعيها و لا ترا الله بتشوفين شي ما شفتيه
ظهر مطر معصب و رقع الباب و راه و يلست مريم اتصيح.
بعد ما مر كمن يوم اتكلم مطر مع سعيد و لمحله على اللي صار
سعيد: ثرنا شوه سوينا نحن...مطر هاي بنت عميه و اللي ما يرضيكم ما بيرضيني انا قبل ...
مطر: ندريبك انك ريال ...ولا انه في خاطرك شي من صوبها بس يا سعيد ما فينا على رمسات الناس
سعيد: و ليش الناس ترمس اصلا.؟
مطر: بو عسكور العرب اتدور سبب على الرمسه و انته ما يرضيك انه حد يرمس في شرف مريم
سعيد: يخسون الا هم ...
مطر: المهم ...ظهرات مالها معنى طبها...و مريم بنت عمك و العالم كلها اتعرف انها من نصيبك.و انته شله مستعيل ؟؟
++ انتها الوضع بين مريم و سعيد على هالحاله..بعد هالرمسه سعيد ماحب انه يحط مريم في مواقف محرجه مع اهلها ولا حب انه الناس تتكلم على شعره من مريم..فحب انه يبتعد..وسيله الاتصال بينهم كنت انا...تخيلوا كنت مرسال الحب بينهم..مريم تمووت على شي اسمه أصيل ابو بكر و تموت على اغانيه فكانت اتسجل اغاني اصيل على شريط و تعطيني اياهن على اساس اوصلهن لسعيد..و اذكر مره نسيت الشريط اللي عاطتني اياه مريم لسعيد و كانت غنيت اصيل ( أحبك ليه انا مدري) جلسه بصوت اصيل.. و اول ما سألني سعيد و قلتله نسيت ..حشرني حشره و هزبني هزاب..و فهمته انه الاغنيه موجوده فالسوق روح و اشتر الشريط يعني لازم ايكون الشريط من أيد الشيخه مريم؟؟؟!!!! و طرشني بشريط ( ردي الزياره) جلسه بصوت اصيل.. و استمر الوضع على هالحال..رغم كل الظروف رغم كل البعاد تم الحب بينهم صامد ...بالعكس يمكن اقوى..و مادري بصراحه كيف كل واحد كان ايصبر عمره عن شوفت الثاني..مريم كانت اتقولي انها كل عيد تترياه ايي و تترشاني اني اقوله انه يروح سويحان حتا لو ما يكلمون بعض المهم انها اتشوفه..بس سعيد كان يرفض و كان ايقول انه عطا مطر رمسه و هوه ما بيرد فيها...
دارت الايام بسرعه و بعد مرور شهر ... طرشو اهل محمد بن سالم اللي هم اهل أم مريم..على شمسه بنت حمد اللي هيه اخت سعيد...كانوا يبون يخطبون شمسه حق اخو ام مريم( يعني خال مريم)..ماشالله ريال دارس برا و دكتور...شي غريب فالعايله انه يطلع منها دكتور..العيب الوحيد اللي في عبيد خال مريم انه شوي كبير فالسن على شمسه يعني شمسه كان عمرها 19 و عبيد كان عمره 34 ..بس عبيد ريال و ما ينعاب..ريال دارس و بشاهدته و يشتغل في احسن المستشفيات..بالفعل الكل استانس من الخطوبه و كانوا يبون ايشاورون البنت على اساس ياخذون موافقتها و خصوصا عقب ما عرفت انه اكبر عنها ... شمسه رفضت و حاولت منيه مناك بس ما شي فايده حمد ابوها عنيد و اصر انه يوزها رغم كل محاولاتها... و البنت عندها عيال عمه و مايصير ايوزونها من دون لا ياخذون مشورتهم...فالبدايه شمسه كانت راافضه لانه اكبر عنها بوايد..و شمسه البنت العوده اللي في عايلت حمد و شي طبيعي اتحس بالخوف لانها اول وحده بتعرس من خواتها...
حمد: السلام عليكم
بخيته: و عليكم السلااااام ..مرحبا مرحبا ببو سعيد..
حمد: امررحب لاهان ...و شحالج؟
بخيته: بخير الله يعافيك .. و شحالك بو سعيد؟
حمد: بخير و نعمه ...وين اشوفج يالسه اروحج؟؟ و ين البنات عنج عيل؟
بخيته: و الله ميلسه اروحي اجلب هالتلفزيون..و البنات يدرسن عليهن امتحانات ..
و قامت و حطت الدله و ملت الرطب جدام اخوها
بخيته: ها هبش من هالرطب خنيزي اليوم خارفنه عبدالحق من المزرعه
حمد: سلمتي...الله يغربل هالمدراس ما واحن توهن فاتحات و الحينه امتحانات و الله انها نشبه و البنات عقن عمارهن فيها
بخيته: ياخويه شوه بيسون يلوس فالبيت..خلهن يظهرن و يدرسن جاد الشهاده تنفعهن عقب
حمد: لا لا لا ما عندنا بنات يشتغلن يبن الدراسه ما عليه اما الشغل امررره ما بنخليهن..الوحده من اييها نصيبها بيوزها
بخيته: و حليلهن يا خويه بتفرصهن و هن بعدهن صغار؟؟
حمد: شوه بعد نفرصهن...هاي الحياه عيل بتحرسنهن انتي و عفرا طول عماركن...وين عيل عمير و أحمد؟
بخيته: أحمد ساير السوق..و عمير توه هنيه ألحينه بيي؟؟ خير بو سعيد عسا ما شر؟؟
حمد: ما شي شر الحمدلله...ألا شمسه بنتيه طرشو عليها قوم محمد بن سالم يبونها حق ولدهم عبيد..و ما يصير انيوز البنت قبل لا انشاوركم...انتو اهلها و ابدا بها ...جانكم مرخصينها بنيوزها و جان حد من عيالج يباها بنتعذر منهم...هاه شوه قلتي يا ختيه؟؟
بخيته: و الله يا خويه شوه اقولك..دام البنت يا نصيبها نحن ما بنوقف في طريجها
حمد: لا لا ...نحن العرب ألين الحينه ماردينا عليهم شوفي عمرج انتي وعيالج جانكم تبونها ترا أنتو اولى بها و جانكم مرخصينها تراه ....نصيبها ؟؟ شاوري عيالج و ردي علينا ولا تبطين تراه العرب يتريون..
و دش عليهم عمير في هاللحظه ...
عمير: السلااااام عليكم
حمد: و عليكم اسلاااام و رحمة الله ....و توايهو
عمير: شحالك خاليه؟؟؟ عساك بخير؟
حمد: بخير ما نشكي باس...و شحالك
عمير: بخيرو نعمه
حمد: عنبوه وين انتو امررره مالكم شووف ...من كبرتو غديتو ثيران..ماتقولون بنخطف و بنسلم؟؟
عمير: و الله يا خاليه الدوام تراه متا انتفجج منه ...هاذوه من تيينا الاجازه يالله يالله نقضي اشغالنا اللي هنيه
حمد: هييييييه..زين يا بويه و انته متا بتخلص هالكليه..كم باجي عليك؟
عمير: و الله يا خالي هاي اخر سنه...
حمد: هيه زين يا بويه الله يوفجك...و شوه بيخرجونكم
عمير: ان شالله ضباط..
حمد: ابويه ...تراه شمسه بنتيه طرشوا عليها عرب خطاطيب...و أنته ولديه شرات ما شمسه بنتيه..و الريال و نعم جان اتشوف عمرك انته و خوك مرخصينها ترانا بنقرببهم و جانكم تبونها انتو عيال عمتها و اولى بها..شوه الراي؟؟؟ و هالماضووع امره ما فيه زعل ..
عمير: و منوه هم العرب
حمد: محمد بن سالم ال......
عمير: اللي في سويحان
حمد: هيه نعم..شاور عمرك انته و خوك و امك و ردو علينا..و انا يا بويه ما جبركم على البنت ...بس احيده ابوكم سيف الله يرحمه دووم ايقول شمسه هب مرخصينها امرره يباها حقك ولا حق احمد..
استنااااااااااااا ردودكم ياحلوين