[الغيمه اليليه]

00000الجزء الســـــادس0000

عمـــــــري ما فكرت فيك و ما خطر فالبال حبك..لين قلبي قال ابيك ابيك و قالت اعيوني احبك

++دشينا اللفت كلنا على دفعات..الدفعه الثانيه كنا نحن البنات انا و ضبابه و فاطمه و عايشه و يدتيه ضبابه..و طبعا عمران الياهل اللي ما يفارق البنات
فاطمه: اقول ضبابه يبتيها مجله فواصل؟
ضبابه: لا نسيتها تحت فاللوبي؟
فاطمه و بعصبيه: شووووووووو
ضبابه: شوه تبينها بعد..تراج قريتها؟
فاطمه: و انتي شوه يخصج..انتي اصلا ما حد يعطيج شي امانه
ضبابه: خيبه الا مجله و سميتيها امانه..ما ترزا بشتريلج غيرها
فاطمه و هيه تفتح باب اللفت: ترزا ولا ما ترزا .... غاليه عندي هالمجله
لطيفه: ايه فطيم وين بتسيرين
فاطمه: سبقوني انا بسير اييب المجله و بلحقكم..
طلعت فاطمه بسرعه..قلبها كان ايدق بسرعه و كأنها فاقده شي عزيز عليها..عزيز؟؟ هيه و الله احس ان هالمجله تعنيلي اكثر من مجموعة اوراق..مجله جمعتني بشخص مادري ليش يفز قلبي كل من ذكرته!!
++ دشيت اللوبي..كان فاظي تقريبا ما فيه حد الا عامل الريسبشن..كنت احس بعمري مثل المينونه ادور عليها..بس ما لقيتها..رحت المكان اللي كانت يالسه فيه ضبابه دورتها..بس ما كانت موجوده..مستحيل انها تختفي في لمح البصر..ما صارلنا خمس دقايق من طلعنا من هاذا المكان؟؟ احسن شي اسأل عامل الريسبشن
فاطمه: اقول لو سمحت ما شفت مجله فواصل كانت محطوطه على هاذاك الكرسي؟
العامل: عفوا؟؟ ما فهمت عليكي اختي
فاطمه: كانت اختيه قاعده على ذاك الكرسي و نست مجلة فواصل عليه انته ما شفتها؟؟
العامل: لا و الله يا ختي..ما شفتها.. اصلا ما في حد دش الفندق غير عائلتكم في ذي الحزه..سألي الرجال اللي معاكم من شوي يمكن شافها؟
فاطمه: اوكي ..شكرا
العامل: لا شكر على واجب
++ ما في امل ... ادري انها مجرد مجله..بس..ماعرف احس بغصه..و اريد اصيح..الله يسامحج يا ضبابه وانا طالعه صوب اللفت
---: اختيه اتدورين المجله؟
فز قلبي..ألتفتت..اعرفه هالصوت..اعرفه هوه ما غيره ريحانة فواديه..مادري في لحظه حسيت بقلبي وقف بس بعدين رد الدم و ضخ في كل جسمي بقوه..بس يا فاطمه تراج مصختيها..صديت شوي شوي براسي...هو >علي< نفسه بشمحه و لحمه جدامي..بصراحه انربط لساني
فاطمه: هاه...شو؟
علي و هو ايمد ايده بالمجله: كنتي تتخبرين عن مجله فواصل...انا شفتها معقوقه على الكرسي شليتها و قريتها
فاطمه و بصوتها اللي فيه دلع بالفطره: انزين خلاص
علي: شوه خلاص..ما تبين المجله
فاطمه: لا لا لا ( البنت تهمس همس....اصلا فالطبيعه صوتها ما يطلع ..عيل كيف و علي جدامها؟؟!!!)
علي و هو يضحك : شوه لا ..لا تبينها ...ولا ما تبينها
فاطمه: مادري برايك شلها
علي: اصلا انا شارنها حقج
فاطمه: شوه
علي: المجله من صوبج..
مديت ايدي بسرعه و شليت المجله و ركضت صوب اللفت..ارتجف..صوتي يرتجف..و قلبي ينتفض..شارنها حقج!! مادري مادري شعوووور غريب قلبي قلبي...اوووف يا علي شوه اتسوي فيني
وانا اتريا باب اللفت يفتح..اول ما فتح
فاطمه: بسم الله انتي شوه اتسوين اهنيه
لطيفه: ادورج يا نصي الثاني
فاطمه: يالله يالله بسرعه خلينا اندش
لطيفه: لقيتيها عاد المجله؟
دشن البنات اللفت و سكر الباب..فاطمه و هيه متسانده على طرف اللفت و حاطه المجله على صدرها
فاطمه: لا
لطيفه: شوفو اللواته انتو عيني عينك...عيل شوه هاذي
فاطمه: شفته....خلاص يا لطيفه خلاص...شل قلبي ولا رده
لطيفه: منو خنفسانة فوادج؟
فاطمه و بهمس: الله يسامحج..عشان حبيته..اتقولين جيه
لطيفه: حبوبه فاطمه...و الله اني امزح..انتي ما تشوفين عمرج و ملامح ويهج كيف غاديه؟؟!!انا ماريدج تتعذبين..اتحبين شخص في يوم!!! ما يصير..شوه يعني ما تعرفين الحب و بلاويه..لا تنسين صدمه خليفه..انتي انسانه حساسه .. و بسرعه تتأثرين... و انا شفته علي.. انسان كبير فالسن يعني ما بتمشي عليه حركاتنا نحن!!
فاطمه: ادري و الله اني ادري...بس لطيفه..حسيبي مادري مادري و الله اني ما قدر اسيطر على عمري من اشوفه..اتخيلي شفته تحت...لقيت المجله عنده
لطيفه: حلفي
فاطمه: و الله
لطيفه: و عطاج اياها
هزت فاطمه راسها.: قالي انه شارنها حقي
لطيفه: فاطمه ممكن اطلب منج طلب؟
فاطمه: شو
لطيفه: انسي كل شي...عالاقل هاليومين ..اذا صار بينكم اي موقف ثاني فكري بالموضوع مره ثانيه..
فاطمه:تتوقعين اني لازم اسوي جيه......على العموم ان شالله...بحاول و الله بحاول

قمت افز لشوفتك و اتحرا لجتيك..انتظر حبـــــــــــــــــــي الجديد بعدما فكرت فيك

طلعن البنات الشقه اللي فوق..اتوضن و نزلت العايله كلها مره وحده..و نحن طالعين من اللفت..كان احمد و سلطان عند الريسبشن..
حمد { بو سعيد}: هاه بويه احمد شوه بلاكم وقوف اهنيه؟؟
احمد: ماشي خالي..سيرو انتو الحرم سبقونا و انا بلحقكم
حمد: شعنه شي مستوي؟
سلطان: لا بويه ...بس ما حصلنا غير شقه وحده و فيها اربع حجر بس
حمد: ليش عنبوه مره ماشي ...قولهم ايدورون اكيد انه شي
احمد: لا امررره الفندق كله فول ..هاي غلطتنا ما حجزنا من البلاد.بس اربع حجر بيسدنكم..حجرتين حق البنات..و حجره حقكم انتو و حجره حق امايه و يدتيه
حمد: و انتو شوه بتسووون
احمد: بندبرها ان شالله ...سر سلطان مع اهلك الحنيه طوفو وانا بدبر الموضوع و بلحقكم
حمد: شقايل يا بويه انسير و انخليك
احمد: عنبوه يا خالي بضيع ثرني انا؟؟....بينا التيلفون..دام سلطان عندكم ما عليكم
سلطان: يالله حرمات زاهبات ولا
اليده: يالله انقفضوا الليل هاذا..من ايحل المسا العالم كلها بتظهر اطووف..و بيدهسونا
حمد: هههههههه يا اميه...وين يدهسووونكم مب الحي هاذا
اليده: يالله انزين ما عليه...وينه احمد ما شوفه
حمد: الولد سار ايخلص الاوراق مال الفندق انسير بيلحقنا خلاف
اليده: لا و الله ما دبرت و احمد مب عندنا...عنبوه بتخلوونه اهنيه رويحته
بخيته: يا امايه احمد مب ياهل..بيخلص الاجراءات و بيلحقنا
اليده و هيه تيلس على الكرسي: بنت بوووويه...تبوني اسير و اخليه ...ما بظهر منه الفندق لين ما يقبضني بايدي
عفرا: عمتيه...انسير الليل هاذا!!
اليده: وابوويه شعايلنج انتي؟
عفرا: عمتيه مب انتي اتقولين بطينا
اليده: لا لا بعده العصر هاذا...احمد بويه يالله انرووح
احمد و هو يتقرب من يدته و يعدل احرامه: شوه الغاليه شوه بلاج شاله الدنيا بحسج..؟
اليده: يالله بويه انسير الحرم
احمد: يدتيه...سيرو انتو و انا بلحقكم
اليده: شوووو ...لا لا يالله بويه انسير رباعه
احمد: يدتيه شوي اوراق ماخلصناهن ..و ادور حجز مالقيت حجره.
اليده: وابوويه و الحجر اللي فوق ....اربع ( وهيه ترفع صبوعها الصغار) ان ما شلنك فواديه ايشلك( و حطت ايدها على قلبها)
احمد ضحك....و مسك صبوع يدته..و باسهن: يعلني ما خلا منج ام حمد...يدتيه عشاني انا و سلطان لو سرنا عندكم ما بيرتاحن البنات
اليده: يعل ما تم بنت فالدار... جانهن بيخلنك متـــلــّــته ( ضايع) و هن بيستحرزن الحجر
احمد: هههههههههههههههههههه...لا تدعين عليهن..منين بنيب عيال عقب؟؟...و رفع راسه لا اراديا صوب لطيفه..

لا تعجب من غلاي..مثلك احســــــــــاسي تعجب و انته في يدك هواي..مهتني ولا معذب

++ اسلوب احمد فالتعامل مع يدتيه..اسلوب حلو و مرح..يدتيه وايد اتحب احمد..بصوره مب طبيعيه..بس من طاحت عيني بعينه و هو ايقول هالجمله...مادري حسيت بغصه..ادري انه في يوم من الايام بيعرس احمد و بييب عيال..هاي سنت الحياه...بس هل الحياه بتعيش فيني ألين ذاك اليوم..هل بقدر اشوفه معرس؟؟ هل بقدر اشوف يهال يركضون وراه و ايقولون له باباه؟؟ ماظن ماظن ...احس بغصه..و احس بالغصه اكثر يوم اتذكر انه في يوم من الايام رفض اني اكون انا ام عياله؟؟!!!
احمد و هو يحب راس يدتيه: يالله ام حمد سيرو بسرعه لا يأذن عليكم العشا و يزدحم الحرم..بخلص و بلحقكم
اليده: بويه...هب تبطي ولا تراه والله ماسير
احمد: هههههه..ان شالله ان اشالله
++ طلعنا صوب الحرم..العايله كلها بإستثناء احمد..دشينا..احساس غريب..احساس ماقدر اوصفه..انك اتشوف بيت الله جدامك.. تشعر بأنك صغير جدام عظمة الله..اتحس بانك ولا شي في هالكون.. رغم انا كل سنه انزوره..الا ان النظره الاولى صوب هالبيت في كل سنه كأني اشوفه اول مره..رعشه في جسمي كله..ريولي ترتجف..خانقتني العبره..عيوني تدمع..الانوار كانت مب طبيعيه..احس كاني اناظر الشمس..ايقولون الدعاء عند النظره الاولي للكعبه مستجاب..كل الادعيه اختلطت في راسي..ما تذكر منو اللي قالي ادعيلي..و ما تذكر شوه كنت بالاساس مخططه اقول..بس فز قلبي بدعاء ما قدرت ارده..حطيت ايدي على ويهي و دعيت من خاطر معذب من دون لا احس : " يارب انك اتوفق احمد في حياته و ترزقه ببنت الحلال اللي تسعده دنيا و اخره..ياربي تبعد عنه كل حاسد..يا ربي تغفر للمرحومه..و تسكنها فسيح جناتك..يا ربي اجمعني بها في جنات الخلد" ..و نزلت دمعه من عيني على خدي و طاحت على ايد كانت ماسكتني!!

يا عساني ما انحرم انته يا اجـــــــــــــــمل اسم..لاهجر الدنيا و اجيك بعدما فكرت فيك

حمد: بنتيه لطيفه...شوه بلاج؟
لطيفه: هاه ....بويه شوه قلت؟
حمد: بنتيه ...دمعتج خرت على ايدي..و دمعتج حاره.؟؟
لطيفه: ابويه ما تدري انه الدعاء مستجاب عند النظره الاولي؟؟
سلطان: حلفي؟؟؟
لطيفه: و الله...ادعيت انته؟؟
سلطان: لا ...بس في خاطريه دعاء..اقولج لطووف ادعيليه... انتي امرره دعوتج قويه
لطيفه: لا و الله كل حد ايسد عمره
سلطان و هو واقف عدال لطيفه يصاصرها و ايأشر على ضبابه الصغيره اللي كانت ماسكه يدتيه ( ضبابه العوده) : ادعيلي انه الله يزقني بهاذيج..و اتكون من نصيبي..فديتج لطوف..ادعيلي بموووت ان خذت غيري
لطيفه: وابويه عليك ..ريال بلحيتك و هاي علومك؟
سلطان: لطوف ضبابه الروح اللي فجسمي اتعرفين ولا لا ؟؟ ادعيلي انجح السنه و اسوي عرسي و حفلة نجاحي مره وحده
++ سلطان كان يتكلم بطريقه غريبه..اول مره يتكلم بهمس..كأنه يتكلم من قلبه مب من لسانه..اول مره يتكلم و ما يتطنز او يسب!!! و الله و لعبك الحب يا بوميد
لطيفه: يارافع السماوات من غير عمد..ترزق اخويه سلطان بن حمد ببنت الحلال .. و اتسهل عليه و ينجح
سلطان: قولي بالاسم قولي يا رب ترزقه بضبابه
لطيفه: ما بقول
سلطان: لطفين...يالخامه..بتقولين ولا احيس لج ايدج
حمد: سلطان شعندك على ختك؟؟
لطيفه: ابويه سلطان يباني ادعيله ياخذ وحده من ربيعاته اللي يرمسهن .. اتشوف بصايره
عفرا: سلطان؟؟؟ صدق هالرمسه
سلطان: ياهي نشبه..الله يسامحج يا لطوف شوه بيفججني من حلج امايه الحين؟
عفرا: خل عنك هالرمسه ..و توجه صوب ربك و ادع انه يهديك..المسيد امره ما تعرفه..يالله بالهدايه

++ كلم سلطان اخويه واحد من المطوفين الموجودين على اساس انه يتحرك جدامنا و يدعي بنا..مشيناو طفنا..طبعا الكلام اللي قلته خلا ضبابه الصغيره تزعل..و يا شين زعلتها..حشا مب حب ايحبون بعض..بس الله يهنيهم..طول الطواف الناس تدعي بالجنه و حسن الخاتمه..و حضرت الشيخ سلطان يالس ايراضي الشيخه ضبابه..سلطان ماسك يدتيه من اليمين و ضبابه الصغيره من اليسار..و طول الوقت وهو مجابل ويه ضبابه و يسولف و يتمصخر يحاول يراضيها..و يحليلها يدتيه ضايعه فالطووووشه بينهم..لا خلوها تسمع المطوف ولا خلوها تدعي من خاطرها!!
فاطمه: اقول لطيفه؟
لطيفه: فطيم..خليني ادعي ربي لا تقاطعيني
فاطمه: دخيلج لا يفوتج المشهد..شوفي شوفي سلطان شقايل ذال عمره حق ضبوب
لطيفه: ههههههه..هاذيلا باجر لو ياخذون بعض الله يعلم اذا بيرمسون بعض ولا لا ..اتغار عليه حتا من الذبابه
فاطمه: ههههههههه..صدق انه الطيور على اشكالها تقع..بس بصراحه ضبابه طلعت شي..قدرت اطيح سليطين

++ خلصنا الطواف..و توجهنا صوب الصفا و المروه..طبعا خذنا ساعه نقنع يدتيه انها تركب الكرسي المتحرك لانها ما تروم تقطع سبعه اشواط..بس الله يهديها ما تنرام..و ضرابه الين ما اقنعناها..طبعا عموه بخيته ركبت كرسي مضطره لانها اصلا ركبتها اتعورها و المشي ايتعبها..
سلطان: يدتيه اركبي على هالكرسي و امره ما بتحسيبه الدرب
اليده: وااابويه..مشلله مشلله اتشوفني يا مسود الويه تبا اتركبني هالكرسي؟
سلطان: لا حوووووول...يدتيه شوفي ها كل العيايز يركبنه عشان ما يتعبن
اليده: شوه اتشوفني عيوز انا ماروم امشي..لول نربع فالهيران ( الاوديه) ما نعوّل
سلطان: هاذاك لول...الحينه بتهلكين علينا اروحج انتي ما فيج هبه
اليده: يااااي هااااا...غصب هو ..
لطيفه: يدتيه...الكرسي زين حقج..عشان ما يتذرعن ريولج..اركبي عشان ما تتعبين و عقب اترومين اتحولين حق الصلاه
اليده: هزرج؟
لطيفه: هيه يدتيه ..مب معناها اللي يركب مايروم او متشلل..بس الانسان ايريح عمره..و هاذي عمتيه بخيته بتركب بعد
اليده: شووووفي شوووووفي شوووه ايسوووووبهن؟؟
و في نفس اللحظه كان واحد من جماعه غير يحرك الكرسي عدالنا ...و كان مسرع لدرجه و هو محول طاحت الحرمه اللي كانت راكبه من على الكرسي
اليده: شفتتتتتو.....بينفدنيه ...مابا مابا بمشي
لطيفه: لا لا يدتيه هاذا اللي يسوق بها ريال ما يفهم انتي سلطان بيسوقبج
سلطان شوي عيونه بيظهرن من محجرهن...
سلطان: يعلني بلا شويراتج يا لطوف
اليده: شوه قلت سلطان؟
سلطان: اقول يدتيه شور لطيفه احسن شور اركبي و انا بسوقبج
اليده: لا تسرعبي
سلطان: امره ما عليه بمشيج تحت التجربه
حمد: يالله امايه توكلي سلطان بيسيربج
سلطان و هو يمشي الكرسي جدامه
اليده: سلطان يالهرم
سلطان: شوووو
اليده: يايبلي هالكرسي...هاذا توايره خربانه تبا اطيحبي انته؟
سلطان و هو ايحرك الكرسي جدام و ورا: لا حوووووول شوفي شوفي هاذو ما بلاه شي
اليده: هات غيره
سلطان: اللهم طولج يا روح
ضبابه الصغيره: بدّله هالكرسي...ما تشوفه مكسور..كله ولا يدوه ضبابه
سلطان من سمع صوت ضبابه فز: امرررره ما طلبتي
++ و اخيرا و اخيرا اقتنعت الملكه و ركبت..يعني لو تكلمت روح قلب سلطان من قبل جان من زمان خلصنا..المهم مشينا..عدينا ثلاث اشواط..بس حسيت بتعب..مادري يمكن لاني ما رقدت البارحه..و الجو حار ما يساعد
فاطمه: لطيفه شي يعورج اشووفج ما ترومين تمشين؟؟
لطيفه: لا لا ما شي
فاطمه: اقولج لا تسرعين…امشي على راحتج..و انا بمشي وياج
لطيفه: لا ياختي حاسه بخنقه
فاطمه: اقولج وقفي و شربي ماي زمزم…انا بسير اشوف امايه تزقرني وبرد عليج..بس حاولي تمشين شوي لاني اشوفهم بدو يبتعدون
لطيفه: ما عليه انتي سيري و انا بلحقج
++ وقفت عدال واحد من خزانات ماي زمزم ..حاسه بدوخه..مسكت شوي ماي فإيدي..و مسحت به ويهي..و شربت شوي ماي..و ترست كوب ..بشله معايه بشربه فالدرب..لاني بصراحه اخاف اضيعهم وايد ابتعدوا..مشيت..بالاحرى سحبت ريولي سحاب..ماعليه بتحمل..فجأأأأأأأة...بسم الله شوه اللي صار؟؟؟…
ما حسيت الا بحد حاط ايده على جتفي..كأنه يضمني..يالله يالله..شوه بسوي وين اهليه؟؟..ماعرف كنت حاسه انه حيلي انهد..اول ما ألتفت صوب الريال اللي واقف عدالي؟؟؟….لقيت نفس نظرة الحيره في عيونه..احمــــــــــــــــد..على طول شل ايده..كأنه حط ايده فالنار…حزت وايد في خاطريه هالحركه..ادري انه مغلط..ادري انه شي طبيعي انه ايشل ايده عني..بس مب بهالطريقه..مب بهالنظره..لهدرجه تحتقرني؟؟!!

+++أحمد..لطيفه!!!....معقوله غلطت بين لطيفه و فاطمه..مادري اول ما حطيت ايدي على جتفها و شفت نظرة عينها المتفاجئه..حسيت بشعور غريب..شعور خايس..ما بغيت اشل ايدي عنها..الله يغربل ابليس..كل اللي بغيته في هاذيج اللحظه انه الشعور بالشوق اللي في عيوني صوبها اتكون ما شافته..ما بغيتها اتحس برجفت ايدي على جتفها و برجفت قلبي من شفت عينها..اه اه شوه هالحاله لطيفه جدامي من يوم هيه ياهل ..شمعنا الحين؟ شمعنا ما فز قلبي لها من زمان..لازم اصلح غلطتيه معاها..

ك نت اشوفك من قريب مع جميع الناس عادي..ما تخيلتك حبيب رايح بقلبـــــــــي و غادي

أحمد و بعصبيه مالها لازم: و انتي لازم تلبسين شرات فاطمه..بتموتن يعني اذا ما لبستن نفس العبايا و الشيل؟؟!!
+++احمد..ادري اني قسيت عليها..بس لازم امسح اي فكره ممكن اتكونها عني..ماريدها اتعرف بشعوري اليديد تجاهها..يديد؟؟ و الله انه يديد..عمري ما حسيت بشي صوب لطوف بنت خالي..كنت اشوفها مثل فطيم..يعني مثل اختيه ..بس اليوم غير غير..و الله مادري كل ما شفتها احسن انه قلبي ينقز من مكانه..ابتعدت بسرعه عنها حاولت اسبقها..بس هيه ما غلطت ..ليش اعاقبها على شي مالها خص فيه..مالها ذنب انها تثير فيك هالشعور ؟؟ مالها ذنب انك اتفكر فيها بصوره مب طبيعيه من اسبوع؟؟!!!! اوف منها حاله..ابطأت من سرعتيه فالمشي..و ألتفتت صوب لطيفه اشوفها وين..كانت موخيه..نظره حزن..اخ ياللوم..بترياها و بنمشي مع بعض ألين ما نوصلهم..
~~~~~~~~~~~~~~~~
++لطيفه.. ليش كل هالنفور مني..لهدرجه يكرهني..و انا شوه سويت..ذنبي في هالحياه اني ييت الدنيا غلط!!..اوف يا احمد من فتره مسحتك من قلبي..ما في داعي انك تدشه مره ثانيه..كفايه اللي ياني منك!! بس احمد كان متوتر..و العرق ايصب من يبهته..ادري انه مغلط..لانه اصلا متأخر..و كان يبا يلحقنا بسرعه و يخلص معانا و عشان جيه شبـــّه علي بالغلط..
أحمد و هو ملتفت صوب لطيفه و صوته متقطع: عيل وين يدتيه؟؟
لطيفه: سلطان حطها على الكرسي...اتشوفهم الحين بيون فالشوط المعاكس
أحمد و عشان يكسر التوتر اللي بينهم: حووووووو....حسبي الله علي بليسك يا سليطين ايشلبها تايريين؟؟؟ بينفدها....سلااااااامي عليج يا ضبابه.. البرقع من بعد ميل يلمع..هههه


+++ احمد..حاولت اكسر الصمت..حاولت اضحكها بس ما شي فايده..البنت حطت في خاطرها..ابتسمت بس نزلت راسها مره ثانيه..
++لطيفه.. ادري انه ايغير الموضوع..ادري انه متلوم..ادري انه يكرهني..بس يا احمد شوه اسوي..للاسف اكتشفت انك بعدك عايش في قلبي!!!
لطيفه و بهمس: أحمد
ألتفت احمد بسرعه صوب لطيفه: لبيه
لطيفه و هي اتمد كوب الماي صوب احمد: ما تبا ماي..اشوفك تعبان؟؟
+++احمد ماشل عينه عن عيون لطيفه..ياربي شوه اللي احسبه صوبها..طول حياتي ما حسيت بشي عدا انها بنت خالي لا اكثر ولا اقل..بس اليوم غيرو الله غير..اوف كيف انقبض قلبي يوم زقرت اسمي بحزن..تميت اشوفها و اشوف الكوب اللي اتمده صوبي..ترددت..هل بقدر اني احط ايدي بايدها..ماظني..اكيد بتحس اني متنرفز و متوتر من لمستها
لطيفه و هي تهز راسها بحزن: ادري انك ما بتشرب من كوبي...اتجزني ( تحس بالقرف) صح؟؟؟ ما لومك...دامني مب من لحمك و دمك..هزت لطيفه راسها بأسف و الدمعه تلمع في عينها و سارت بسرعه مخليه احمد وراها!!

+++شووووووو...شوه يالسه اتخرف هاي؟؟؟!!! خطر على بالي امسكها من حلجها و اعطيها كف ألين ايدور راسها على هالرمسه..الخبله ما تدري انه غلاها في قلبي ماله قياس!!!! ما تدري انه قلبي متقطع تقطيع من نظره الحزن اللي في عيونها؟؟!!!

صرت اغلا شي و اغلا من نفسي علي..مالك بقلــــــــــبي شريك بعدما فكرت فيك

00000الجزء الســـــابع000000
أنتي و انا ما همنا غدر الازمان..ترا الوفا اللي داخلك من طباعي..اذا زعلتي لو رضا كل زعلان..ما حس قلبي للرضا به داعي 000000

خلصنا المناسك كلها و ردينا الفندق مدوخين على الاخير...على طول اتعشينا من العشا اللي اشتراه سلطان و احمد..اي عشا الله يخليكم سندويجات..المهم شي احسن عن لا شي...بصراحه حاسه بتعب و ارهاق..و تعذيب نفسي..نظرته..آآآه من نظرته..أحمد...بس تراني و الله اني تعبت من اللي يصير..ادري انه ما بينا شي..ادري بشوه اتحس صوبي..ادري و ادري و ادري بوايد اشياء..بس كل ما شوفك تجدد دافع الاشواق فيه..ياناس ما شي دوا...ما شي علاج ايفكني من اللي فقلبي صوبه؟؟!!!
طبعا كالعاده اول يوم لازم انش من صباح الله خير..ياناس غير عن العالم كلهم رقود الا انا..واعيه و يالسه فالصاله اتأمل اللي ساير و اللي ياي من الدريشه..مليت.. فطيم في سابع نومه..و ضبابه و عايشه في نفس الغرفه و ما فتحن الباب الين الحينه..شوه اسوي؟؟..البارحه اشترالي اخويه سلطان بطاقة تيلفون..بطرش مسج حق شمسه اختيه بالرقم اليديد عشان اتكلمني..بعدين الحينه الساعه تسع اهنيه يعني عشر بتوقيت الامارات..اكيد شمسه واعيه..طرشت الرقم و عقب عشر دقايق لقيت الرد...فديت شموووووووس
شمسه: السلام عليكم
لطيفه: و عليييييييييييييييييييييكم السلاااااااااااااام...فديت شماسي...تولهت عليج
شمسه: لووووووتيه...امبين الوله عنبوه البارحه انتريا تيلفون اطمنونا ما حد سوالنا..عالعموم عمره مقبوله
لطيفه: تقبل منا و منج صالح الاعمال..شحالج شمسه و شحال عمير و شحال السيافي و شحال الحليان و شحال كشميرا و شحال ..
شمسه: بس بس بس...ما شالله عليج...اتحاتين العالم كلها...كلنا بخير و سهاله و عن الهذره الفاتوره بتيي علي انا مب انتي
لطيفه: حشاااا يالبخل...ما حيد عمير ايقصر عليج بشي...تعالي اسمع سيفووووه ايصيح شوه سويتيبه؟
شمسه: انا اسوي بالشيخ سيف شي.؟؟؟ ليش انا اتأجرأ امدي ايدي عليه عشان ايقصووونها من الكوع..البزا كله من البزا...طلب كورن فيلكس يبناله، قال لا ابا بني يبناله بني ،قال لا ابا اسود...الله يعيني عليه
لطيفه: وااااااايه فديت هالحس...طلبيله خليهم ايبووووله السوبرماركت كامل و قوليلهم على حسابي يا بويه هاذا سيف بن عمير اول حفيد لحمد ال...... يعني اول حفيد فالعايله تفهمين ولا لا ؟؟
شمسه: ايوااا هاذا الخراب انتو تخربووون و انا اللي اعاني...الله يعيني على تربيته..محد مساعدني عليه غير احمد...مخلنه يمشي على الصراط المستقيم..
لطيفه: ليش في حد ايروم ايقول حق احمد لا ....العالم كلها تمشي على الصراط المستقيم من اتشووووفه.. عطيني غناة الروح برمسه
++ حست لطيفه انه في صوت وراها..الباب انفتح و اتسكر..طبعا نحن مب قافلين الباب..عشان ما يدقون جرس و ما يوعون يدتيه..يعني كان شوي مفتوح..بما اني واقفه على الدريشه قدرت اشوف الانعكاس على الزجاج خاصه انه اللي دش لابس كندوره بيضا و طاقيه بس.كان احمد.هذا بعد شوه موعنــــّه من صباح الله خير؟؟ طنشته..و يلست اكلم سيف..و كأني ما شفته ولا حسيت به
لطيفه و بصوت رقيق: هلا هلا بالغالي..هلا ملايين ولا يسدن
سيف: كالوه..انتي وين؟
لطيفه: هلا حبيبي شوه ما تولهت عليه...شوه تباني اييبلك من اهنيه؟
سيف: كالوه
لطيفه: لبيه
سيف: اريد فليكس اسود
++ مثل ما لعبي من اسبوع انا بلعب عليه نفس اللعبه..بخليه ايشك..و بشوف شوه بيسوي
لطيفه: بس ما طلبت..عيوني عيوني لو تباهن..حبيبي؟
سيف: شو
لطيفه: اسميه فكركم دوم على بالي...ليتني ما سافرت عشان ما تغيب عن عيوني و ما يغيب صوتك عني ولا دقيقه..بس بينا التيلفون لا تقطعني توكي ( اوكي بلغه سيف الخاصه)؟؟ اتعرف اني ما صبر عنك
سيف: توكي ..باي
لطيفه: بحفظ الله الشيخ ..فداعت الرحمن
+++أحمد..ما شاالله عليها هالسكنيه..واعيه..و تقرقر فالتيلفون..لطيفه مب من النوع اللي يمسك التيلفون وايد..لاحظت عندها موبايل بس ما تستخدمه وايد..بصراحه ما ياني الرقاد من التعب احس بريولي ايعورني..و ما بت البارحه من التفكير..متلوم فيها..

و مادام عينك راضيه هان ما كان لو تزعل الدنيا لها ما براعي..يا صابره و الصبر للناس ميزان لي خان صبري ثبتيلي شراعي

بس ما شالله عليها اليوم شكلها عال العال اكيد نست..لطيفه لابسه بيجامه قطعتين لونهن ابيض و وردي ولابسه شيلت صلاه فوقهن..بس و الله شكلها بيبي..بريئه..كانت اقرب للملاك من شخصيه لطوف الخريش اللي اعرفها..بصراحه بغيتها تلتفت ابا شووف تقاطيع ويهها و هي لابسه هالبجامه..اكيد ياهل..اول ما دشيت سمعتها تقول غناة الروح..و الحين يالسه تتفدا..و لبيه ..و الصوت ناعم..هاي منوه اترمس على الصبح..منوه اترمس بهالطريقه..ما في بنت اترمس ربيعتها او اي بنت ثانيه بهالاسلوب و بهالالفاظ..يلست بقو على الكرسي و حطيت ريولي على الطاوله بقو بعد الين ما حست اني موجود..التفتت..و طالعتني بنظره من فوق الين تحت..جنها اتقولي انته شوه اتسوي اهنيه..عنلاتها!!!
احمد و الشرر يتطاير من عيونه: ايه انتي... منوه اترمسين ؟؟؟؟
++ لطيفه..هههههههههههههه..احسن هاذا اللي اريد اوصله..التفتت صوبه و كملت و كأن شيئا لم يكن
لطيفه: حبيبي...يالله ما بتأخر ..
احمد: ارمممممسج انا؟؟؟ منوه اترمسين
لطيفه: سيف
احمد: منوه سيف؟
لطيفه: سيف سيف...منوه سيف يعني البنقالي.؟؟؟؟ السيافي ولد شمسه
++ انقهر .. عصب..فوّل..احس اني لو كنت جدامه عادي يقبضني من شعريه..كالمعتاد..احمد شراني و عوف اذا حد استفزه..و انا ما قصرت..نظرته كانت قاسيه ..احتقار..او شوه اسميها..مادري..شك..بس ما اعتقد غيره..ولو انه هاذا اللي حسيتبه فالبدايه..
لطيفه: تبا اترمسه؟؟
ألتفت احمد الصوب الثاني و كأني ما قلت شي..حطيت على السبيكر..عشان اريحه و ارتاح..مب ناقصه شكوك احمد
لطيفه: السيافي حبيبي؟
سيف: كالوووووه...عندنا سبيس توون انتو ما عندكم
لطيفه: و الله؟ نحن عندنا مكه...سيف قول شحالك عمي احمد؟
سيف: وين عمي احمد..راح داخل تياره
لطيفه: انزين قوله شحالك؟
سيف: شحالك؟؟
++ بس احمد نحس ما رد عليه و خلا عمره يلعب بموبايله..برايه يصطفل اهم شي عرف اني ما اغازل..حشا مب تفكير عليه..يعني الحرم جدامي و انا بغازل على صباح الله؟؟!!! و الله هالانسان غريب..دشت علينا يدتيه في هاللحظه..سلم عليها احمد و سلمت انا عليها عقبه..
أحمد: شصبحتي يدتيه؟
اليده: بخير و عافيه...و انته بويه وين رقدتو البارحه؟
أحمد: نحن يدتيه الا تحتكم..ما حصلنا حجز..سكنا عند علي بن حارب..حجره و صاله لكن ما عليه اتشلنا
اليده: هيه اهله هنيه هم؟
احمد: لا اهله فالفندق اللي عدالنا..حتا هو ما لقا حجز اول ما وصلوا ..
لطيفه: يدتيه اطلبلج ريوق من تحت؟؟
اليده: ايهبووون اكل من اكلهم ...ما دري شوه ايحطون فيه..ما حد ياب خبز ولا عسل؟
لطيفه و هي اتطالع احمد: لا و الله يدتيه ... محد غيرنا واعي..تبين بنسير نيبلج من السوبرماكت
اليده: حصلتيه انتي الشامبر مالج اللي حاشره عليه الدنيا؟
لطيفه: لا يدتيه عادي استخدمت الشامبو مال فاطمه
اليده: هيه زين...بويه احمد شل لطوف و سيرو الدكان..هاتو ريوق و خبز هاذا البني لطوف تعرفه..و خلها تشتري شامبر
احمد: شووووو...يدتيه ما عرف انا شوه تبون؟
اليده: انزين شل لطوف وياك..هيه تعرف..
احمد: لا لا ما فيني..برايه انا بسير اتشرالكم
اليده: وابويه عليك...البنت ناسيه قشارها فالبلاد شلها خلها تقضي حايتها
لطيفه: لا برايه يدتيه..بطرش سلطان اييبلي اياه
+++احمد.. لا حوووووول...لومتني فيها مره ثانيه..
احمد: سيري هاتي عباتج...و هب تبطين بسير اييب البوك و برد
لطيفه: برايك احمد جان بتسير..برايه حاياتي بييبهن عقب
احمد و بعصبيه....ألين الحين مب قادر انسا موقفها البارحي: يالله اقوووولج..كم بعيد الرمسه انا..بعدين مب شالنج انا عشان سواد عيونج..بشلج تشترين ريوق حق يدتيه..بسرعه بترياج عند اللفت
++ الخااااام...و الله ما عطاني فرصه ارد عليه..مب عشان سواد عيونج؟؟؟ اصلا انا عيوني مب سود..شوه ماتذكر؟؟ مابسير ما بسير...يصطفل و ايدق راسه فاليدار
اليده: يالله لطوف هبابج تلحقينه
لطيفه: ما بسير...سمعتيه شقايل ايرمسنيه..جني بشكارته
اليده: هههههه...امبونه هاذا احمد جيه امرره ملبق..ظاهر على حياة المرحوم يدج
لطيفه: برايه خليه يرتز تحت يترياني الين ما يخيس
اليده: لطوووف بنتيه عيل شقايل باخذ دوا السكري اذا ما تريقت
++ اه و الله نظرة يدتيه تكسر الخاطر..هالعيوز اتقولون عصفووور...صغيره...فالحجم..و كبير غلاها فقلوبنا كلنا
لطيفه: الا عشان خاطرج..و لا هالهيز والله ما سرت وياه
اليده: وابوووويه..شعندج اتهندقين عليه..هاذا باجر لو بياخذج شوه بتسوون؟؟
لطيفه: لا ووووووووووووووالله...يدتيه لو ما تم ريال غيره ما باخذه
اليده: سيري سيري انتي ...
++ قصوري ماخذه احمدووه..لو تنطبق السما على الارض ما خذته..عشان اعيش حياتي هموم و كدر..يا رب اول مايرد يخطب و افتك منه..قولو امين..!! لبست عباتي و يبت النقاب و طلعت..لقيته يترياني جدام اللفت..اول ما دشينا اللفت..صديت صوب المنظره عشان اعدل النقاب
احمد: بتخبرج شوه اتسوين انتي؟؟
++ طنشته
احمد: و الله ما تلبسينه عقيه يالله اقولج..و تغشي و الله ما دبرين معايه و انتي جيه .
وصلنا تحت فتح اللفت..ظهر احمد بس انا ما ظهرت..انا النقاب ما بشله..و هو حلف اني ما البسه اوكي خلاص ايسير اروحه.
احمد: يالله شو اتريين
لطيفه: روح انته انا ما بسير...الا منقبه
احمد: همباة بتيين ولا لا ؟؟؟
++ اوووف ...همباة؟؟؟..حسيت جنه حد طعني في قلبي..من متا هالاسم ما زقرني به؟؟!! معناها صدق معصب
لطيفه: لا ...الله يحفظك..لا تنسا يدتيه اتحب الخبز الاسمر
+++ احمد..حسبي الله على عدووها الف شيطان راكبني الحين..عادي اصفعها..ما تظهر القواة الا جدامي..اوكي..مسكتها من ايدها و سحبتها برا اللفت
احمد: يالله جدامي ...فاضلج انا
++لطيفه..يا ناس اتلووووومووني اذا قلتلكم اكرهه...ودي ازغده من حلجه..و اعصره شرات الحَـلَـجَه..طلعت امري لله ..ماسكني من ايدي شوه اسوي يعني؟؟!!! استسلمت للامر الواقع حطيت النقاب داخل الشنطه و اتغشيت الشيله خفيفه و الويه كله امبين كيفه..مب هو للي زن على جيه !! طلعنا مشا جدامي و انا وراه..عنلاته بشكارته ايشوفني جدامه..اوكي بتأخر بشوفه يفتقدني..لقيت وحده من الصوماليات فارشه اغراض جدامها و اتبيع..عيبتني الاشياء اللي عندها..وخيت شوي ويلست اتنقا و نسيت انه احمد معايه..مرت عشر دقايق يلست اكاسر الصوماليه على السعر..كانت اتبيع بيجامات..و كنت ابا اشتري حق الخدامات..كنت محتاره بين الوردي و الازرق..عاد كشميرا سيلانيه .. شوه اخذلها

و انتي معي يبقىالزمن كله احسان..للعز يدعيني من الوقت داعي..و ان غاب زولك يا عسا ما به شر بان ألقا الزمن يلقا وجوده بضياعي000000



احمد و بكل هدوء: انتي اهنيه و انا جالب الدنيا ادورج
++ احلا مثل في حياتي سمعته " طنش تعش"
احمد و بعد فترة صمت: الورديه احلا
++ لطيفه..اوب اوب اوب..شكله راق و هدا...و يعطي رايه بعد..سبحان مغير الاحوال حاسبت و نشيت..مشينا صوب اسواق بن داوود بس هالمره....مع بعض يعني عداله مب وراه ....انقرص شكله...خخخخ
دشينا و تمينا نشتري..ما فارقني ثانيه..حتا و انا اشتري الشامبو واقف عدالي..بس ما نطق ولا بكلمه..تحركت بس ما تحرك..كان ماسك شامبو..و يالس يقرا شوه مكتوب عليه..استنيت واستنيت..بس شكله مندمج..اول ما التفت احمد
احمد: اقولج لطفين شوه احسن الاخضر ولا الازرق؟؟
++ لا تعليق..
لطيفه: انته شوه نوع شعرك؟
احمد و هو ايحرك ايده في شعره من ورا..بصراحه خبلتبي هالحركه..و ذكرتني بوايد اشياء: جاف اظني
لطيفه: خلاص خذ الازرق للشعر الجاف..و الاخضر للشعر الدهني
احمد: يالله خلصتي؟؟
لطيفه: لا بس باقي الخبز
احمد: يالله انزين..انسير عند الخبز..ولا اقولج سبقيني انتي وانا بسير اشتري جرايد..بس مب اتغيبين و تخليني ادورج بلا حاسيه شرات مساعه؟
++ لطيفه..ادورج بلا حاسيه؟؟ سمعتو اللي سمعته..اعتقد انه يمزح..سار احمد..و انا سرت وقفت عدال الخبز..بس اللي لاحظته انه في واحد ما طاع ايفارج..اممم يمكن يشتري بعد هالريال..ياويلي من احمدوووه..رحت للجانب الثاني من الرف..لحقني...ياخراب بيتي..شوه اسوي الحين؟؟ رحت حطيت الخبز بسرعه بس هوه اتقرب مني..يااااوووووووووويلي...شكلي بنفد اليوم..وقف عدالي و حط ورقه صغير على الرف اللي جدامي و اصطفل.. ما مسكتها لانه احمد شاف كل شي..مسك احمد الورقه و قطعها..فيها رقم .. ما قال ولا كلمه..بس عيونه قالت كلام وايد..كلام قاسي..رحنا للكاشير انحاسب..طلعت الفلوس..و طلع احمد فلوس في نفس الوقت بس هو شكله ما صرف و انا عندي فلوس سعوديه قلت خلاص انا اللي بدفع
العامل: ما في فلوس سعودي؟
احمد: لا
جدمت انا ايدي بالفلوس..طالعني احمد بنفس نظره الاحتقار
احمد: شوه ما تشوووفني ريال جدامج

يا اعز و اغلا ما خلق ربي انسان..لو غض جفني خافقي بك واعي..لجلك ذراعي صارعت كل ثعبان..و اقطع عصبها لو تقصر ذراعي

++ انطميت و بلعت لساني..ليش اروم اقول شي عقب اللي قاله؟؟!!!!شليت الاكياس و طلعنا..حرام عليه ما شل ولا كيس..و بصراحه الاكياس كانت وايد ثقيله..بس انا مستحيل اني اترشا احمد و اطلب منه انه ايشلهن عني..اذا هو من خاطره ما شلهن..اصلا هو معصب..غريبه ما قال ولا كلمه..ما علق..!!طلعنا من السوبرماركت..و سرنا صوب الفندق..عاد هو خفيف و خطوته عن عشر خطوات..و انا متغشيه و شاله الاكياس في ايدي الثنتين..بس الحمدلله وصلنا..الله رحمني..ركبنا السلم اللي جدام باب الفندق..هانت يالله هانت..بس فجأه..
دست على طرف العباه...و طرباااااااااااااااااااخ..على ويهي..الله لا يرويكم طحت طيحه على ركبيه..حسيت انهن خلاص انسحقن..طاحت الاكياس بس الحمدلله كل شي موجود داخلهن ما ظهر شي منهن..مادري اول مارفعت راسي..ما حسيت بالدنيا..الم الم الم..و طنين في اذني..بس بعد شوي عقب ما رفعت راسي زين و بديت استوعب..اكتشفت انه العالم كلها اتشووووفني بما فيهم احمدووووه..و بصراحه النظره اللي كانت في عيونه نستني كل آلامي..فديته خاف عليه!!!!
أحمد و هو موخي عليه: لطووووووف...ايه لطووووف..شي عورج؟؟
لطيفه: لا الحمدلله سليمه...بس الفشلللللله حارقه ويهي
نش احمد و نقققققققققققققققققققققققققققققققققققققع من الضحك و ألتقت الصووووب الثاني مب قادر يمسك عمره..اتشوووووفوون..يوم اقولكم اكرهه محد صدقني..ياربي اشوف فيك يوم يالديج..طالعو اول مره اشووفه يضحك جيه..اوكي اوكي اتغشيت طبعا عشان الناس ما اتم اتبحلق فيني و نظره الشفقه في عيوونهم..دشيت الفندق بسرعه ..و الله حتا العامل في الريسبشن الخام كان يضحك..الله يغربل الريااييل كلهم من طينه وحده!! التفتت صوب العامل وانا ادق اللفت.
لطيفه: و انته شووه ايضحك بعد؟؟ ضحكت بلا ضروس قول امين
دشيت اللفت و خليت احمدوووه اييب الاكياس كلهن..امحق اتيكيت احيد الريال ايسوي حق الحرمه كل شي..بس الديج كل شي عنده بالعكس!! لحق علي احمد و هو مخلي واحد من عمال الفندق ايشل الاكياس..بعد ما يحق ايشل..طول الوقت ما حد نطق فاللفت..وصلنا الشقه..حسيت انه احمد يبا ايقولي شي..بس ما عطيته فرصه دشينا على طول..الباب كان مفتوح و الكل كان واعي..و يالس فالصاله..يالله الحين اكيد بيقولهم و بيفشلني كالمعتاد..ما عطيته فرصه على طول دشيت و حاطه في بالي اني بسير الغرفه..اصلا احس انه ريولي تنزف..
لطيفه + احمد : السلااااام عليكم
اليده: مرحبا مرحبا..يالله يعلني اشوووفكم معاريس
++ ما قدرت اخلي هالموقف ايعدي على خير خاصه انه احمد ما علق..
لطيفه: يدتيه...لا إن شاء الله لا تدعين بهالدعوه..اخاف على خطفت ملك و الله يستجيب
++ دشيت على طول الغرفه .. بصراحه الدمعه كانت على طرف عيني..بس انا حالفه انه عيني ما تدمع بسبب احمد..
فاطمه: بسم الله شوه سويتبها انته
عفرا:شوه بيسويبها يعني؟؟امبونها لطيفه ما تنرام،و لا في حد يرمس برمستها اسميها الا ضيعت المذهب هالبنت
حمد: لا اله الا الله..شوه بلاكم عالبنت
احمد: ما بلاها شي..بس جنها امدووخه من الحر..مشينا وايد تحت الشمس..فطيم؟
فاطمه: هلا
احمد: تعالي شوي
سار احمد صوب المطبخ و مسك فاطمه من جتفها
احمد: اقولج..تراه لطيفه طاحت على الدري و اخاف شي عورها..
قاطعته فاطمه: شووووه؟؟؟
احمد: عنبوه انزين خليني اخلص رمستيه.. اقولج انا لاحظت انها تعري..فديتج سيري طالعيها..و ان عورها شي و تبا دوا خبريني انا بييبلها من الصيدليه
فاطمه: لا و الله من متا لطفين اتهمك
احمد: و الله انه فوادي عندها
فاطمه: لا و الله من متا ؟ فديتك احمد خبرني انا أختك و بسعالك بالخير
احمد: جب انتي..شوه ايخصج سوي اللي قلتلج اياه و بس
فاطمه: ان شالله

اخوض بحر يرسل للموج طوفان لجلك تزايد في المحيط اندفاعي..ولا زبنت بلجة البحر شطآن يعجبني اوفي في مسارك صراعي000000