نجمة بحر ©؛°¨غرامي فعال ¨°؛©

.:. السلام عليكم ورحمة الله وبركاته .:.

القصة منقوله بموافقة من الكاتبة Łσяeлa . لورينا قطر
وممنوع النقل لأي سبب من الأسباب .


.:. بالبدايه يمكن ما اتكون هناك احداث او قصة من الاساس بس مع مرور الحلقات راح اتبين الاحداث تدريجيا .. وبالنهاية اتمنى ان القصه تنال اعجابكم .:.

.:. تحياتي .:.


.:. اخر كتاباتي .:. قصتي .:. اسيرة البدر .:.
.:. الحلقة 1 .:.

.:. في سكون الليل وظلمت الدار .. مافي غير الابجوره مفتوحه .. كان بدر منسدح على السرير وهو ماسك موبايله ويقرا مسج غريب اوصله من ثلاثة ايام .:.

.:. انا حبيتك شلون لا تسال .:.

.:. اسيرة البدر .:.

.:. كان المسج من مجهول وماكو رقم يظهر بالموبايل .:.

.:. زادت حيرة البدر وتم يقرا المسج كذا مره ليمن تعب واستسلم للنوم .:.

.:. وباليوم التالي .:.

.:. دخلت عليه الدار وكانت الساعة 8 الصبح .:.

قربت من سريره وهمست : يالله قووم

.:. كان هو خبر خير وبسامع نومه .. مو حاس بشي .:.

وبعدها قامت وسحبت اللحاف منه وهي تضحك : بسك نووم يا الفيل ويالله قووم !!

.:. وفجاه .:.

سمعت صوت صرخه يايه من وراها : سلووه انتي شتسوين هني ؟؟

.:. التفتت لمصدر الصوت وكان ريل امها .:.

قربت منه وسالته : خير عمي ؟؟ عسى ما سويت شي جايد ؟؟

رد بوبدر بعصبيه : متلصقه ببدر .. يعني داخله بدار ريال وتساليني اذا سويتي شي جايد !!

ابتسمت سلوى : بس هالريال اللي قاعد تتكلم عنه هو ولدك يا عمي .. وانت ريل امي وانا اعتبر بدر مثل اخوي نايف بالضبط .. ولو سمحت يا عمي لا يروح فكرك بعيد

بوبدر : بس الدين ما حلل هالشي .. وبيظل بدر غريب عليج .. ومو من حقج انج تدخلين داره وتنفردين فيه !!
سلوى : بس يا عمي

وبعدها قاطعها بوبدر وهو معصب : لا بس ولا شي ويالله جدامي اطلعي لدارج يالله !!

.:. استغربت سلوى من موقف بوبدر العصبي .. واللي زاد استغرابها ان لما بوبدر يشوف اختها امنه تدخل الدار على بدر ما يعصب وما يقول شي .:.

.:. طلعت سلوى من دار بدر رايحه لدارها .. واما عن بدر كان بسابع نومه مو داري بشي .:.

.:. بدر طالب بالجامعه باخر سنه .. توفت امه بمرض لعين بعد ما انجبت بدر 23 سنه وغدير 19 سنه .:.

.:. اما بالنسبه لسلوى عمرها 20 سنه .. خذت الشهاده الثانويه وتمت بالبيت .:.

.:. نايف وامنه اخوان سلوى .. نايف 22 سنه واخذ الشهاده الثانويه واشتغل بالبنك .. وامنه 18 سنه بثانويه عامه تخصص فرنسي .:.

.:. سلوى وامنه ونايف ابوهم طلق امهم وهالشي خله داليا اللي هي امهم تتزوج من بوبدر .. وكلهم هذول عايشين ابيت واحد بعد ما رفضوا سلوى وامنه ونايف انهم يعيشون مع ابوهم اللي تزوج وعايش مع مرته اليديده .:.

.:. دخلت سلوى دارها وهي متضايقه من موقف بوبدر .. انسدحت على السرير وحطت راسها على المخده وشافت السقف .. وبعدها دخلت عليها امنه اختها اللي تشاركها بنفس الدار .:.

قربت امنه من سلوى وهي تبتسم : شو حاصل لك انتي ؟؟

ضحكت سلوى : انتي ما تتعبين من كثر ما تسولفين معانا لبناني ؟؟

امنه : يا عيب الشوم .. في شخص بيمل من لغتوو ؟؟
سلوى : انتي شفيج ؟؟ ليكون عبالج انج لبنانيه ؟
امنه : ماي مام از ليبانون .. يعني انا بين الجنسيتين القطريه واللبنانيه
سلوى : سلامتج حبيبتي انتي قطريه وامي هي اللبنانيه
امنه : قطريه او لبنانيه ما بتفرء معي .. كلوو واحد
سلوى : كلوو واحد او كلو بطيخ انتي قطريه ودمج قطري

.:. وبعدها قامت من السرير بتطلع من الدار رايحه المطبخ تسويلها ريوق .. دخلت المطبخ وشافت غدير بنت بوبدر اتسويلها بيض وطماط وهي تغني بندماج .:.

غدير ( وهي تقلب البيض بالطابي ) : انت منتا انسان اكثر .. قلبي مو من قلبك اصغر .. ومثل ما تشعر تاكد اني اشعر .. فيني منك فيك مني .. غصب عنك غصب عني .. التقينا والقى قسمه مقدر

وبعدها قربت سلوى من غدير : هاا .. شعندها الحلوه اللي اتغني اغاني حب ؟؟

التفتت غدير لسلوى وضحكت : ماكو شي بس ما ادري شفيني مستطربه هاليومين وخصوصا ان اليوم ويك اند

.:. وفجاه دخلت عليهم امنه .:.

امنه ( وهي تلتفت يمين ويسار بالمطبخ ) : صبايا .. ما شفتوا الماما ؟؟

سكتت سلوى وردت غدير وهي تبتسم : شعندها اللبنانيه ؟؟

امنه : مافي شي بس بدي الماما

.:. ضحكت غدير على طريقه امون وهي تسولف باللبناني وحست شلون امنه ميته بالكلام اللبناني .:.

غدير ( وهي ليما الحين تضحك ) : الماما بالدار

.:. وبعدها طلعت امنه من المطبخ ودخل بدر .:.

بدر ( وهو يتثاوب ) : صباح الخير
غدير & سلوى : صباح النور

.:. وبعدها قعد بدر عالكرسي اللي بالمطبخ وحط راسه عالطاوله وغمض عيونه .:.

شافته سلوى وضحكت عليه : بدور .. انت من صجك الحين تبي تعود تنام ؟؟ اعنبوو توك قايم ..والمشكله كنت اقومك من شويه وما تقوم

رد بدر اللي ليما الحين مغمض عيونه : انا اصلا ما شبعت نوم وياي المطبخ شارد من الوالد .. يقوليبسك نوم

ضحكت سلوى : مو قلتلك مساعه انك فيل ؟

.:. وفجاه دخل عليهم بوبدر .:.

.:. ابتسمت غدير وما علقت سلوى بشي ومثل بدر دور الشاب النشيط .. كانت نظرات بوبدر لسلوى اللي استغربت من هالنظرات .:.

بوبدر ( وهو يشوف سلوى ) : انا ابي نسكافيه

ابتسمت غدير : انشالله يبه من عيوني

رد بوبدر : تسلملي عيونج حبيبتي بس انا ابي سلوى اهي اللي تسويلي النسكافيه

.:. ما استغربت سلوى من طلبه لان هو دوم يطلب منها هالشي .:.

التفتت سلوى لبوبدر وابتسمت : انشالله عمي
***************ماما حياتي من شاني بلييز

التلك يا امنه ما بينفع هلا

.:. ما عجبها امنه هالكلام وقعدت اتحن على راس امها .:.

امنه ( معانده ) : وانا اليت بدي اروح السينما !!
داليا : شوو انتي ما بتفهمي ؟؟ التليك ما بينفع هلا

.:. عصبت امنه بالقطري .. نست نفسها وقعدت تتكلم قطري .:.

امنه : يعني شنو اللي ما بينفع الحين ؟ انا يا يمه ما قلت هلا يعني الحين .. انا قلت هلا يعني بالليل .. وبعدين اليوم اجازه وشنواللي ما بينفع ؟؟

ردت داليا : عمك بوبدر بدو ياخدني لبيت اهلوا ولهيدا السبب ما بينفع باليوم هيدا

وبعدها قعدت امون تتذمر : وليكوون احنا هم لازم نروح معاكم ؟

داليا : هيدا الشي مفروغ منو

اعتفس ويه امنه : شنو هيدا الشي مفروغ منو ؟؟ اسمعي يمه سواء مفروغ منو او متروس منو انا مو رايحه معاكم .. واذا تبين الصراحه انا وايد اتملل وانا هناك .. واذا تبين الصراحه اكثر صبيانهم قليلين ادب من قلب .. وخاصه فوازو .. هذاك اليوم يقولي عطيني بوسه

ضحكت داليا : بس فواز عمرو 15 سنه .. هيدا الصبي صغير وانتي بل 18 سنه .. يعني بتفرء كتير

امنه ( اللي ما عجبها الكلام ) : سلامتج يمه .. هو بالفعل عمره صغير بس ما شفتي تفكيره وعقليته الوصخه

.:. وبالمطبخ .:.

.:. قربت سلوى من بوبدر ومدت ايدها تعطيه فنجان النسكافيه .:.

مد بوبدر ايده وهو يبتسم : تسلم ايدج يا سلوى

ابتسمت سلوى بالمثل : الله يسلمك عمي

وبعدها سال بدر : وانا يا سلوى ؟ مالي نصيب بالنسكافيه ؟

.:. توها سلوى تبي اترد عليه بس قاطعها بوبدر وهو يشوف بدر بعصبيه .:.

بوبدر : من بدال ما اتفكر بالنسكافيه فكر بدراستك بالجامعه افودلك وابركلك يا فالح !!

.:. استغربت سلوى من عصبيه بوبدر الفجائيه .. وهم نفس الشي لغدير اللي استغربت من هالموقف اللي كلش ما يستاهل هالعصبيه .:.

.:. اما بالنسبه لبدر كان مستغرب ومو مستوعب تصرف ابوه .:.

بدر ( وهو يطالع ابوه مستفهم ) : شالسالفه يبه ؟؟ انا شقلت الحين عشان اتشب فيني جذي مثل الجبريت ؟ كل هذا عشان النسكافيه بس ؟

.:. مارد عليه ابوه وكتفى بالنظرات العصبيه .:.

.:. استغرب بدر اكثر من هالموقف الغريب وبعدها قام من الكرسي وطلع بره المطبخ وهو متضايق .. ما اهتم بوبدر وقعد يشرب النسكافيه .. اما عن سلوى وغدير اكتفوا بالصمت .:.

.:. دخل داره وهو متضايق وهم متنرفز من موقف الوالد اللي ما فهم منه شي .. قط نفسه على السرير يبي يرجع يكمل نومه .. وتوه حاط راسه عالمخده الا بنغمة مسج موبايله .:.

مسك الموبايل وفتح المسج وقراه : تدري من انا ؟؟
انا اللي بشوق انتظرك
وبكل لحظه ابي قربك
انا اللي بصدق احتاجك
واشتاق لصدق احساسك
انا اللي بصدق حبيتك
حياتي انا سميتك
عرفت من انا ؟؟
هذا انا اللي على ناسي بديتك

اسيرت البدر

.:. استغرب وهم ما فهم شي .. هذي ثاني مره توصله مسجات من اسيرت البدر وبدون رقم مكتوب .. ما عطى الامر اهميه وحط موبايله سايلنت ونام .:.
***************

الوو .. هلا لولو سوري خيتوو مو شايفتك بالسينما اليوم
لولوه ( صديقة امنه ) : وليش يعني ؟ انتي ما قلتي حق امج ؟؟
امنه : بلا التلا بس عنا مشوار اليوم لبيت عمو بوبدر
لولوه : اممم .. السالفه جذي يعني ؟؟ يا خساره يا اموون كنت ابي اشوفج بالسينما اليوم
امنه : خيرها بغيرها انشالله

***************

.:. كان حاط ريل على ريل وبيده كوب النسكافيه ويشربه .:.

بوبدر : على فكره ترى كلنا اليوم رايحين لبيت الوالد

التفتت سلوى صوب بوبدر وسالت : وهم انا وامنه اختي رايحين ؟؟

بويدر : شي اكيد

وبعدها قام بوبدر من الكرسي بيطلع بره المطبخ بس قبلها التفت لسلوى وقال بابتسامه : وعشان هالروحه ابيج اتسوين لنا كم اكله من ايدينج الحلوه

ابتسمت سلوى : انشالله عمي

.:. وبعدها طلع بره .:.

استغربت غدير : ليش ابوي كله يطلب منج وما يطلب مني ؟ ليكون يحبج اكثر مني ؟

ضحكت سلوى : شدعوه يحب بنت مرته اكثر من بنته !!

غدير : وليش لا .. كل شي جايز بالزمن هذا

.:. وفجاه دخل نايف اخو سلوى المطبخ .:.

نايف ( وهو يتمغط ) : انا يوعان

ضحكت غدير وردت سلوى : الناس لما يدخلون يقولون السلام عليكم او صباح الخير وصباح النور وموانا يوعاان

رد نايف اللي ليما الحين يتمغط : انزين شاسوي عاد انا يوعان .. ويالله وحده منكم اتشد حيلهاوتسويلي ريوق محترم

.:. كانت غدير تضحك على اسلوبه اما سلوى ما عطته ويه وطلعت بره المطبخ .:.

.:. وبعدها .:.

نايف ( وهو يصوت ) : سلووه ياللي ما فيج خير وين رايحه ؟ تعالي سويلي ريوق .. انا ميت من اليوع

قربت غدير منه وسالت بابتسامه : وانا وين رحت يعني ؟؟

رد نايف وهو يبتسم بالمثل : عيل سويلي بيض وطماط

غدير : من عيوني
***************

.:. على الساعه سبع بالليل كانوت كلهم مجتمعين في بيت والد بوبدر .:.

.:. كانت سلوى وغدير قاعدين ضحك وسوالف مع لميا بنت عمة غدير .. اما عن امنه كانت لاصقه بامها وهي لايعه جبدها من فواز اللي بالدقيقه يغمز لها وعيونه بتطلع من كثرة القز .:.

ارتفع ضغط امنه من حركات فواز المايعه وقالت بعصبيه : شوو ياا ؟؟ شايفتك بتبصبص عالصبايا ؟؟

وبعدها ما استحملت وقالت : او بالاحرى قاعد اتبصبص علي اناا !!

الزعيـ A.8K ـمه ©؛°¨غرامي ماسي ¨°؛©

× * ×


بسم الله


بدايتها حلوهـ


يعطيك العــافية على النقـــل



؛؛


دانة الحمادي ©؛°¨غرامي نشيط¨°؛©

بدايه موفقه اختي العزيزه

اتمنى للقصه النجاح.. ولك التوفيق

مع تحياتي


مغروره بس حبوبة ©؛°¨غرامي مشارك¨°؛©

حلووووووووووووووووووووووووووووووووووووووووووووووة مرررررررررررررررررررررررررة



وياليتى تكملينها



( مغروره بس حبوبة )*


حلا خالد ©؛°¨غرامي جديد¨°؛©

يسلمووو بداية حلوة ...

شكرا لك على النقل ...


نجمة بحر ©؛°¨غرامي فعال ¨°؛©

:. الحلقة 2 .:.

ارتفع ضغط امنه من حركات فواز المايعه وقالت بعصبيه : شوو ياا ؟؟ شايفتك بتبصبص عالصبايا ؟؟
وبعدها ما استحملت وقالت : او بالاحرى قاعد اتبصبص علي اناا !!
تدخلت امها داليا بالوقت المناسب : شو هيدا الحكي يا امون ؟
ردت امنه بشمئزاز : يعني بذمتج ما اتشوفينه من مساعه يقز ويغمز ويسوي حركات ؟؟
وبعدها غمز فواز : الواحد ما يتغشمر يعني ؟؟
امنه : في فرق كبير بين الغشمره وقلت الادب
فواز : تقصدين اتقولين اني قليلل ادب ؟
وفجاه تدخلت ام فواز وهي معصبه : هذا اللي ناقص بعد .. اتقولين عن ولدي قليلل ادب !!
امنه ( بنفعال ) : تبين الصراحه يا خالتي وما تزعلين ؟؟ بهالتصرفات اللي يسويها ولدج اي نعم قليل ادب
ام فواز : اعنبوو اي تصرفات اللي تتكلمين عنها ؟ الولد توه صغير ما كمل ال 15 سنه وانتي اتقولينعنه قليلل ادب ؟؟
هزت امنه راسها بعناد : اي نعم .. قليلل ادب .. وبعدين الشخص مو بعمره تحكمين عليه الا يتصرفاته وحركاته ولو كان عمره خمس سنين بعد !!

.:. تنرفزت ام فواز من هالكلام وحاولت اتبط جبد امنه .:.

ام فواز : معاج حق لما قلتي ان الشخص مو بعمره تحكمين عليه مثلج انتي الحين عمرج كبير وعقلج صغير ولسانج طويل والصراحه ما تستحين !!
عصبت امنه من هالكلام : عقلي صغير والساني طويل وهم ما استحي ؟؟
هزت ام فواز راسها : اي نعم ما تستحين
وفجاه تدخلت لميا بنت بوفواز : يمه وامون شفيكم ؟؟ صلوا على النبي
وبعدها التفتت حق اخوها فواز وقالت بعصبيه : وانت شمقعدك مع الحريم ؟؟ ليش مو بالميلس مع الريايل ؟؟
ردت ام فواز : وانتي هم شفيج على الشيخ فواز ؟؟ هذا وهو اخوج وتقولينله جذي ؟
تليقفت امنه : امحق شيخ !!
سالت ام فواز بعصبيه : خير انسه امنه !! شقلتي ؟؟
ردت امنه بعناد : قلت امحق ....
وقاطعها فواز عشان يبتعد عن المشاكل : امحق مكيف هذا اللي بالبيت
والتفت لامه يسال : اقول يمه ليش بيت يدي جذي حر ؟؟
***************

.:. اما بميلس الريايل شلون كانت تجري الامور !! كانوا الشباب مجتمعين .. بدر ونايف كانوا يلعبون ورقه .. بوبدر كان قاعد يسولف مع الوالد ومع اخوانه بوفواز .. بوخليفه .. بودانه .. عنده ثلاث اخوان من نفس الام .:.

.:. اما عن باقي الشباب كانوا خليفه وخالد وهذول الاثنين اخوان .:.
.:. خليفه عمره 25 سنه ومتخرج ويشتغل .. وخالد 22 سنه يدرس بالجامعه وشكله بيصيف فيها .:.
.:. خليفه كان يشوف التليفزيون وخالد كان يهذر بالتليفون .:.

قط الورقه الاخيره وقال : واخيرا فزت عليك
انبطت جبد بدر : وانت يا نيوف كله اتفوز ؟ ما تعطيني فرصه للفوز كلش ؟؟
ضحك نايف : هذا هو لعب المحترفين ولا بلاش

.:. وفجاه رن موبايل بدر نغمة المسج .:.

مسك موبايله وقرا المسج : اسيرت البدر تسال يا ترى البدر شيسوي الحين ؟؟

.:. استغرب بدر من هالمسج وتسائل منو اتكون اسيرت البدر !! والمحير بالموضوع ان الرقم ما ابين وكان المسج واصله من مكان مجهول .:.
.:. تعجب نايف من نظرات الاستفهام اللي بعيون بدر .. وما حب يكون متطفل لكنه ما استحمل هاللقافه وسال .:.

نايف : بدور عسى ما شر ؟ شفيها عيونك شيرت عالموبايل ؟ منو دازلك مسج ؟؟
التفت له بدر اللي ليما الحين مستغرب من هالمسجات : ما شر بس هذي كيوتل دازتلي الفاتوره
ضحك نايف : وانا اقول ليش عيونك شارت جذي ؟ اكييد فاتورتك جايده ؟؟
ابتسم بدر : تقريبا

يالله عاد دوري .. ما تشبعين انتي من النت ؟؟
.:. كانت سلوى مندمجه مع النت اتشوف مواقع الحمام والطيور وما عبرت امنه اللي اتحن عليها عشان تطلع .:.

تنرفزت امنه : تتصيمخين حظرتج ؟ يعني مو كفايه النت اللي عندنا بالبيت ؟؟ هم هني يايه وداخله النت ؟؟ قومي انا ابي الطابعه .. طابعتنا بالبيت ما تطبع .. قومي !!

.:. وبعدها .:.
.:. سكرت سلوى صفحات الانترنت وقامت من على الكرسي .:.

سلوى : الحين وبعد ما خلصت شغلي تقدرين تستخدمين النت
امنه ( بسخريه ) : امحق شغل
***************

مسكينه دانه مهما اتسوي في نفسها هم مو حلوه وتخرع .. ماكو شي حلو فيها غير اسمها وصوتها والباقي الحمدلله والشكر
لا اتعيبين على البنت يا نجلا .. ترى الله بعدين بيبليج
نجلا : اللهم لا شماته
.:. نجلا ونور خوات خليفه وخالد .. ابوهم هو بوخليفه اخو بوبدر .:.

.:. نجلا 18 سنه بثانويه عامه .. ونور 20 سنه بالجامعه .:.

.:. كانوا قاعدين بالصاله يحشون في بنت عمهم دانه وهي البنت الوحيده ما عندها لا خوات ولا حتى اخوان .:.

.:. المسكينه كانت كلش مو حلوه وما تعرف اتعدل نفسها .. عمرها 20 سنه .. ما يابت مجموع يدخلها الجامعه فتمت بالبيت لين ما اتحصل على شغل .:.

.:. كانت دانه قاعده بزاويه بروحها وتحس بالضيق .. كانت تدري ان نجلا ونور يتكلمون عنها .:.

دانه ( بحزن باين على العيون ) : يمه انا ابي اروح البيت
سالت ام دانه مستفهمه : ليش بعد ؟؟ شفيج ؟؟
دانه ( بضيق ) : ماكو شي بس حاسه نفسي تعبانه شوي

.:. ومن صوب ثاني .:.
نجلا ( وهي اتكلم نور بشويش ) : ابيه .. شوفي ملامح دانوه .. الظاهر حست ان احنا كنا نتكلم عنها !!
ردت نور بدون اهتمام : ما اعتقد
***************

.:. عالساعه 9 ونص بالليل في بيت والد بوبدر .:.

.:. كانوا الشباب يتعشون بالميلس والحريم بالصاله .. طلع بوبدر من الميلس وقرب صوب الصاله ينادي سلوى .:.

بوبدر ( وهو ياشر على سلوى ) : تعالي يا سلوى شويه
قامت سلوى وقربت منه : هلا عمي .. بغيت شي ؟
ابتسم بوبدر : ابي اذوق الطبق اللي سويتيه
سلوى : الطبق موجود عندكم بالميلس يا عمي
ضحك بوبدر : اخاف خلصوه بالميلس وانا ما ادري عنه
وبعدها مسك ايدها بحنيه : تسلم ايدج حبيبتي
تضايقت سلوى من لمست ايده ليدها وحست بالخنقه وهم من نظراته اللي ابد ما عجبتها وما ارتاحت منها .. وبسرعه شلت ايدها من ايده وهي حاسه بالربكه .:.
سلوى ( بتلعثم ) : ا الله الله يسلمك ع عمي
.:. وبعدها رجع بوبدر الميلس ورجعت سلوى الصاله عشان تتعشى .:.

غدير ( وهي تبلع اللقمه ) : ابوي شكان يبي منج ؟
ردت سلوى بضيق : طبق الباستا اللي سويته
غدير ( تسال ) : مو كانه هالطبق عند الشباب بالميلس ؟؟
سلوى : اي بالميلس بس ابوج شكله مضيع
ضحكت غدير : المسكين مو منه .. من اليوع
***************

بعد ما تعشوا وخلصوا .:.
.:. عالساعه 11 بالليل .:.

.:. كان بوبدر يصوت على مرته داليا عشان يرجعون البيت .:.

.:. وعند باب الصاله .:.

سلوى : ما اوصيج عاد .. لازم تحظرين عيدميلادي يوم الخميس هذا انشالله
اعتفس ويه دانه : ما اظن اني اقدر
سلوى ( تسال ) : وليش ما اتظنين ؟ وبعدين مو على كيفج ولازم تحظرين .. صديقاتي كلهم بيحظرون وهم بنات عمج نجلا ونور ولميا
حست دانه بالضيق : انا بطرش لج هدية عيدميلادج بس اني احظر صدقيني صعبه .. اسمحيلي يا سلوى
استغربت سلوى : ومنو قالج اني ابي هديه ؟ انا ابيج انتي .. وبعدين ليش صعبه انج تحظرين ؟؟

.:. ما جاوبتها دانه وكانت شوي وبتصيح ... وحست سلوى ان بالسالفه شي بس ما حبت تضغط عليها اكثر .:.

سلوى ( بابتسامه ) : على العموم براحتج حبيبتي .. بس صدقيني مكانج بيبين

.:. حست دانه بالراحه ليش ان سلوى ما ضغطت عليها .. وبالوقت نفسه كانت تحس بالضيق والحزن لان سبب رفضها لحظور العيدميلاد هو عدم ثقتها بنفسها وخوفها من ان البنات يتمسخرون عليها ليش انها مو حلوه .:.

.:. سلمت سلوى على دانه وبعدها ركبت سيارة بوبدر مع امها وغدير وامنه راجعين للبيت .:.
***************

ممكن اعرف ليش رفضتي عزيمة بنت داليا ؟؟
.:. ما ردت دانه بشي واكتفت بالصمت الحزين .:.
سالت امها مره ثانيه : ما تقولين لي ليش رفضتي عزيمة بنت داليا ؟؟
ردت دانه بضيق : بس جذي مالي خلق اعياد ميلاد
ام دانه : وانتي اصلا من متى لج خلق شي ؟ من مساعه اتحنين تبين ترجعين البيت .. ممكن اعرف انتي ليش معقده عمرج جذي ؟ مو معناته اذا انتي كنتي مو حلوه ان الدنيا بتتوقف خلاص .. يعني خلي عنج هالعقد وعيشي حياتج وهم احمدي ربج .. غيرج اتحصلينه مشوه او فاقد له عين وانتي والحمدلله ما فيج شي !!
.:. تضايقت دانه من هالكلام ومن الحقيقه اللي دوم تحاول تشرد منها وهي انها بنت مو حلوه .:.
ردت على امها ودمعتها على خدها : شلون تبيني اعيش حياتي وغيري احسن مني بواايد ؟
ام دانه : لو قعدتي اتشوفين اللي احسن منج بتتعبين وايد
وبعدها سالت دانه بنهيار : وشاسوي في اللي يتكلمون من وراي ويتشمتون فيني ؟ قوليلي شاسوي ؟؟
ام دانه : خلي ثقتج بنفسج كبيره وما عليج منهم وتجاهليهم
دانه ( بسخريه ) : اي ثقه هذي اللي تتكلمين عنها يا يمه ؟ ثقة الجمال والجسم الرشيق ؟؟
عصبت ام دانه : انتي عبالج ان بس الجميلات اللي يكونون واثقين من نفسهم ؟ انتي هم لو كنتي تبين تثقين بنفسج جان سويتي هالشي من زمان .. بس الكلام معاج ما منه فايده ويالله البسي عباتج بنرجع البيت

.:. ما استحملت الدانه اكثر وانزلت دموعها غصبا عنها .:.

دانه ( تسال ) : يمه انتي ليش مو راضيه تفهميني ؟
ام دانه : انتي بالاول افهمي نفسج عشان اقدر انا افهمج
.:. وبعدها راحت امها عنها وقعدت دانه تفكر بحزن بالكلام اللي انقال .:.

.:. باليوم التالي .:.
.:. في بيت بوبدر .:.

.:. على الساعه 1 الظهر كانت امنه قاعده بالصاله وتتذمر .:.

امنه ( وهي عافسه الوي ) : مستحييل .. ما اصدق ان باجر دوام ؟؟ كابوس مرير .. ما ابي اروح المدرسه باجر .. بسوي المستحيل عشان اغيب
وبعدها قربت غدير من امنه تسال : شفيج قاعده وتتحلطمين ؟
ردت امنه بتذمر : يعني ما تدرين ان باجر دوام ؟
ضحكت غدير : امبله ادري .. بس مو انتي الوحيده اللي باجر عندها دوام
وبعدها قامت امنه من الكرسي محبطه : انا مريضه .. بلاعيمي اتعورني .. وشكلي بغيب باجر
غمزة غدير : يا العياره .. مريضه او تتميرضين ؟؟
امنه ( تسال ) : وليش اتمريض ؟
غدير : سمعتج مساعه اتقولين بسوي المستحييل عشان اتغيبين باجر
.:. توهقت امنه وحبت اتغير السالفه .:.

امنه ( تسال ) : اخوج بدور ليما الحين نايم ؟
غدير : اي ليما الحين نايم .. وشكله اذا قام بيعيش نفس كابوسج المرير
امنه ( وهي تضحك ) : نسيت انه يكره الجامعه كره العمى

.:. وفجاه .:.

انتوا الثنتين اتحشون فيني ؟ شتقولون ؟؟

امنه : بسم الله الرحمن الرحيم .. بدور انت متى قمت ؟؟
بدر : توني قايم من شوي وبعدين شنو بدور ؟ ماكو احترام للاكبر منج ؟
ضحكت امنه : اوبس اوبس .. اسفين مسيو بدر .. اقصد الشيخ بدر
بدر ( بغرور ) : عبالي بعد
وبعدها تليقفت غدير : امون انتي من صجج ؟؟ شنو الشيخ بدر ؟ تبينه يشوف نفسه علينا اكثر من ما هو شايفها يعني ؟

.:. وفجاه .:.
.:. نغمة موبايل البدر .:.

فتح المسج وقرا المكتوب وبعدها قال بتذمر : هم هالبنت اللي امسميه نفسها اسيرتي !! انا شكلي بغير رقمي من هالسنداره

سكر ومن شافها يسكر ©؛°¨غرامي ذهبي¨°؛©

شكرا على البارت وننتظر البارت الجاي

نجمة بحر ©؛°¨غرامي فعال ¨°؛©

الحلقة 3 .:.

فتح المسج وقرا المكتوب وبعدها قال بتذمر : هم هالبنت اللي امسميه نفسها اسيرتي !! انا شكلي بغير رقمي من هالسنداره
وسالت امنه : شسالفه بدر ؟ ومنو هذي اسيرتك ؟؟
رد بدر وهو متنرفز من هالمسجات : سلامتج ماكو سالفه

.:. وبعدها طلع من الصاله .:.

استغربت امنه : اشفيه اخوج عصب جذي فجاه ؟
غدير ( وهي الثانيه مستغربه ) : والله ما ادري عنه .. صاير متقلب هاليومين
***************

.:. طلع بدر وراح الحوش وباله مشغول يهالمسجات اليوميه اللي توصله من اسيرت البدر .. يبي يعرف من اتكون هالبنت اللي اتعرف اسمه ؟ والمشكله هو ماله سوالف بنات !! وهالشي اللي زاد من حيرته .:.

.:. كان قاعد بكرسي موجود بالحوش .. رفع راسه وشاف سلوى واقفه عند قفص الحمام تعطيهم اكل .. ابتسم وقام قرب صوبها .:.

بدر ( بابتسامه ) : شكلج وايد اتحبين الحمام ؟
تخرعت سلوى من هالصوت الفجائي اللي يه من وراها : بدر !!
بدر : اي نعم هذا انا بدر .. شفيج تخرعتي ؟
ابتسمت سلوى : سلامتك بس كنت مندمجه مع الحمام وفجاه سمعت صوت من وراي وخفت
ابتسم بدر بالمثل : ما جاوبتيني اتحبين الحمام ؟
ردت سلوى وهي ماسكه حمامه صغيره : شي اكيد احبه .. ما اتشوفني دوم عند قفص الحمام ؟
بدر : وما تملين منهم ؟
سلوى : بالعكس .. اتونس وانا معاهم .. ولو ما مريتهم يوم امل

.:. وفجاه .:.

السلام عليكم
التفوا الاثنين لمصدر الصوت : وعليكم السلام

.:. كانت واقفه جدامهم ومنزله راسها للارض .:.

ما عرفها بدر بس انتبهت لها سلوى : الدانه ؟
ردت بصوت خفيف وهي ليما الحين منزله راسها : هلا سلوى
استفهم بدر : منو الدانه ؟
ابتسمت سلوى : هذي الدانه بنت عمك جاسم

.:. وبعدها قعد يدقق على ملامح الدانه اللي ما شاف منها شي .:.

وسال : ليش يا الدانه منزله راسج ؟
.:. ارتبكت دانه لما سال بدر هالسؤال .. ما عرفت شلون اترد عليه واكتفت بالصمت وراسها كان يناظر الارض .:.

.:. استغرب بدر وحست سلوى ان بالسالفه شي .. وقامت ومسكت ايد دانه عشان يدخلون الصاله .:.

سلوى ( بابتسامه ) : تعالي يا دانه انسولف داخل
ارفعت راسها بدون قصد : اوكي

.:. طاحت عيونها بعيون بدر .. انصدم لما شافها كانت ابد مو حلوه بس حس بشعور الربكه وانحرجت دانه وقعدت اتلوم نفسها شلون ارفعت راسها بالغلط !! وبعدها دخلت الصاله مع سلوى وهي متضايقه من نظرات بدر اللي حستها نظرات شفقه .:.

.:. كان بدر واقف بالحوش وما تحرك من مكانه .:.
وكلم نفسه بتعجب : لكون الدانه بنت عمي جاسم الوحيده الا اني اول مره اشوفها من سنين طويله .. والحين لما شفتها جدامي انصدمت من شكلها .. بس انشالله مالاحظت الدهشه اللي بعيوني .. يمكن يكون موقف محرج بالنسبه لها

.:. وبالصاله .:.

سلوى ( تسال ) : تبينا نقعد بالصاله او انسولف بالدار ؟
ردت دانه وهي تلتفت يمين ويسار : الدار بتكون افضل
ابتسمت سلوى : اللي تشوفينه

.:. وتوها سلوى تبي تمشي الا امسك الدانه ايدها .:.

التفتت سلوى تسال : خير يا دانه ؟
دانه ( تسال بضيق ) : في احد بيكون معانا بالدار ؟
سلوى : يمكن امون اختي لانها تشاركني بنفس الدار بس ليش ؟
دانه ( بتردد ) : عيل شرايج انتم بالصاله مو احسن ؟
استغربت سلوى : اللي يريحج

.:. وبعدها سمعوا صوت بدر يسولف بالحوش مع نايف اللي توه راجع من بره .:.

.:. وفجاه .:.

ارتبكت دانه : ابيه .. اسمع اصوات ريايل .. منو هذول ؟
سلوى : هذا اكيد بدر يسولف مع اخوي نايف
حست دانه بالخنقه : عيل شرايج نروح الدار ؟ او اقولج خل نروح الميلس احسن .. محد بيكون موجود هناك
زاد استغراب سلوى وسالت : انتي يا دانه ليش اتخافين من الناس ؟
.:. انصدمت دانه من هالسؤال اللي كلش ما توقعته وحست ان دمعتها بتنزل على خدها .:.
دانه ( بنبرة حزينه ) : انا انا مو اني اخاف من النااس .. بس انا .. انا
.:. وسكتت فجاه واكتفت بالدموع .:.

.:. تخرعت سلوى وما فهمت شي ومسكت ايدها ودخلتها الميلس وسكرت الباب .. كانت دانه قاعده عالكرسي وحاطه ايدينها على ويهها واما عن سلوى كانت مجابلتها .:.

امسكت علبة الكلينكس ومدت ايدها لدانه : تفضلي يا الدانه .. امسحي دموعج وفهميني شسالفه ؟

.:. امسكت دانه علبة الكلينكس وارفعت راسها .:.

دانه ( بحزن كبير ) : شتبين اتعرفين بالضبط ؟ ليش انا يايه بيتكم ؟ او ليش من شويه صحت ؟
سالت سلوى : والييت بيتنا هم سالفه ثانيه ؟
دانه ( بتردد ) : انا يايه عشان افتح لج قلبي واقولج عن اللي يدور بداخلي من حزن .. انا وايد ارتحت لج وحسيت انج ممكن تفهميني واتعرفين شنو هو سبب رفضي لدعوتج لعيد ميلادج .. لهسبب انا ابيج تسمعيني وتخففين عني وهم تساعديني .. انا يا سلوى محتاجه لشخص يفهمني واذا تبين الصراحه امي مو راضيه تفهمني .. فما لقيت غيرج انتي

.:. وبعدها .:.

.:. قامت سلوى من الكرسي وقربت من دانه وامسكت ايدها بحنيه .:.

سلوى ( بابتسامه ) : تكلمني .. قولي اللي بقلبج وتاكدي اني مستحييل اخذلج
.:. استانست دانه وارتاحت وايد من هالكلام .. وتطمنت لانها عرفت تختار الشخص المناسب عشان اتقوله كل شي .:.

دانه : كنت متاكده انج انسانه طيبه وتتفهمين مشاعر الناس ومشاعري انا بالذات
سلوى : تسلمين والله على هالكلام اللي احسه وايد بحقي .. والحين قوليلي انتي شفيج ؟ وليش عيونج ذبلانه بالحزن ؟
تنهدت دانه وبعدها قالت : مساعه سالتيني انتي ليش اتخافين من الناس ؟ كنت بجاوبج بس ما قدرت وانزلت ادموعي غصبا عني .. انا مو اني اخاف من الناس .. انا اخاف من كلام الناس وشماتتهم فيني .. وادري بتساليني أي شماته واي كلام ؟ يا سلوى انا ادري ان الناس يحشون فيني ويتمسخرون علي ليش اني مو حلوه .. وحتى كلمة مقبوله كبيره بحقي .. اذا بنات عمي يتمسخرون علي فشلون الغرب لو شافوني ؟ شبيقولون ؟ وللسبب هذا بس انا رفضت دعوتج لعيد ميلادج .. انا مهما اتعدل واسوي بنفسي هم اتم مو حلوه ومبهدله بنظر الناس .. ماكو شي حلو فيني غير اسمي ويقولون صوتي .. صج ان الحلو ما يكمل .. وانا وبكل صراحه كرهت الدنيا وهم نفسي .. امي اتقولي خلج واثقه من نفسج وانا اقول اثق بشنو يا حسره ؟ بجمالي الاخاذ او بجسمي الرشيق ؟ نظرات الناس صارت ما ترحم وكفايه اخر نظره كانت لي من بدر .. حسيته يقول بقلبه شنو هالجيكره ؟ حتى لما كنت بالاعداديه وهم الثانويه ما سلمت من السان البنات .. كنت اغار لما اشوف بنت حلوه تمشي بالساحه بكل ثقه جدامي .. وكنت انحرج لما اشوف نظرات الشماته في عيونهم .. عشان هالسبب انا معزوله عن العالم اللي ماهمه غير المظاهر .. يا سلوى انا ما عندي اخو او اخت عشان افضفض له اللي بقلبي .. وما عندي غيرج انتي اللي اعتبرج اختي .. قوليلي يا سلوى شاسوي ؟ شلون اتخلص من عقدتي ؟
انزلت دموع سلوى غصبا عنها : لهدرجه انتي مهمومه ومحد داري فيج ؟

.:. هزت دانه راسها بحزن .:.

سلوى : بس يا الدانه انتي من حقج اتعيشين حياتج وخلي ثقتج بنفسج كبيره .. وحتى لو كنتي مو حلوه مو مهم .. المهم انج حلوه من داخلج
دانه : هم انتي يا سلوى اتكررين نفس كلام امي .. بالله عليج قوليلي اي ثقه هذي اللي قاعده تتكلمين عنها ؟
سلوى : مو انتي قلتي ان الحلو ما يكمل ؟ الله سبحانه يعطينا اشيا وياخذ منا اشيا .. مثلج انتي عطاج الصوت العذب الحلو واخذ منج الجمال
تضايقت دانه : ياليت الناس بس يسمعون صوتي وما يشوفوني كلش
حست سلوى بالحزن: ليش يا الدانه ؟ ليش مصره اتعقدين نفسج بالطريقه هذي ؟
وبعدها سالت : مو تبيني اساعدج عشان تتخلصين من هالهم هذا ؟
.:. هزت دانه راسها ايجابيا .:.

سلوى : ماكو غير انج تتشجعين وتحظرين عيدميلادي يوم الخميس واتواجهين البنات بكل ثقه
قامت دانه من الكرسي مصدومه : مستحيييل !!

ما قلت لي يا البدر ما تبي تتزوج ؟
ضحك البدر بصوت عالي : خوش نكته والله .. عيدها مره ثانيه تـكفى !!
بدور اشفيك ؟؟ انا اسالك من صجي
رد بدر : انا هم يا نيوف اكلمك من صجي
نايف : شتقصد يعني ؟ ما تبي تتزوج ؟؟
بدر : لين تزوجت انت انشالله انا بفكر اتزوج
ضحك نايف : هالنكته احلى من القبليه ممكن اتعيدها ؟

.:. وبعدها ضحك بدر .:.
***************

سالت سلوى وهي تشوف الدانه بحزن : ليش مستحييل ؟ ماكو شي عندي اسمه مستحيل ..وتعوذي من ابليس وقولي تم وتعالي الحفله
ردت دانه بضيق : ما اقدر يا سلوى .. والله العظيم ما اقدر
سلوى ( باصرار ) : امبله يا دانه تقدرين بس انتي ما تبين اتحاولين

.:. وبعدها ما ردت دانه وتمت بضيقتها ساكته .:.

كررت سلوى : بتحظرين لعيدميلادي .. قولي تم
.:. ترددت الدانه وايد اذا اترد على سلوى او تسكت بس اصرار سلوى اتعب الدانه واستسلمت للامر .:.

دانه ( بتردد ) : تم
***************

.:. كانت اتخاف اتغمض عيونها وتفتحها عشان ما اتمر الايام بسرعه ويقرب موعد العيدميلاد .. لكن وبدون ما اتحس بمرور الوقت والايام سمعت امها تسالها سؤال ما خطر على البال .:.

ام دانه : عالساعه كم بتروحين حفلة بنت داليا ؟؟
انصدمت الدانه : اليوم الخميس !!
ام دانه : وانا شقاعده اقولج من الصبح ؟؟ اي اليوم الخميس
تضايقت دانه وحست بالخنقه : عالساعه 7 بالكثير لازم اكون هناك
.:. حست الدانه ان هاليوم بيكون تعيس بقدر ما هو تعيس بنظرها الحين .. بس اهي اوعدت سلوى بالحظور .. يعني ما باليد حيله .:.
***************
.:. كانت قاعده بدارها تتعدل حق عيدميلادها .. اما بالنسبه لامنه البست وخلصت وانزلت تحت .:.

.:. وبعدها .:.

طق الباب يسال : ممكن ادخل ؟
سمعت الصوت وعرفت من يكون : تفضل عمي
.:. دخل بوبدر الدار وسكر الباب وراه .:.

بوبدر ( وهو يشوف سلوى بانبهار ) : هذي سلوى اللي اشوفها الحين او القمر نازل من السما ؟
ضحكت سلوى : شدعوه عمي عاد ! قمر مره وحده ؟
قرب بوبدر منها : واحلى من القمر
وقال بقلبه : واحلى من امج بعد
.:. حست سلوى بقرب بوبدر منها وتضايقت وقامت من الكرسي .:.

سلوى ( تسال ) : بغيت شي عمي ؟
قرب بوبدر خطوتين وقال : بلاها كلمة عمي
ما استوعبت سلوى : شنوو ؟؟
.:. وفجاه .:.

فتحت امنه الباب وبقوه : سلوه يالله تعالي تحت .. ساندرا وشيخه والجود اوصلوا
***************

.:. كانوا صديقات سلوى .. ساندرا وشيخه والجود قاعدين بالميلس .. يمكن يكون اسم ساندرا غريب من بينهم .. ساندرا صديقه سلوى وهي لبنانيه مسيحيه .. وتعرفت عليها بالطياره وهم راجعين من لبنان .:.

.:. كانت ساندرا اطل من دريشة الميلس للحوش .:.

استغربت شيخه وسالت : اقول ساندرا شعندج اطلين بالحوش ؟
ردت ساندرا بدون ما تلتفت : هيدا البدر يا محلاه
استفهمت شيخه : اي بدر ؟ تونا هلال ؟
.:. ما ردت ساندرا وتمت اتشوف البدر .:.

ضحكت الجود : شيخوو يا الغبيه هي تقصد بدر ولد بوبدر ومو البدر اللي بالسما
.:. وبعدها دخلت سلوى ومعاها امنه .:.

سلوى ( بابتسامه ) : يا هلا والله بمن يانا .. توه ما نور البيت
شيخه & الجود : بوجودج يا الغلا
.:. الوحيده اللي ما ردت هي ساندرا .:.

انتبهت لها امنه وسالت : ساندرا .. شو بتعملي عندك هونيك ؟
ردت شيخه من بدالها : قاعده اتشوف البدر حبيب القلب
ضحكت امنه : يا هيدا البدر اللي مجننك هيدك
وسالت سلوى : ليكون اتحبين بدر يا ساندرا ؟
التفتت ساندر لسلوى وقالت : ابحبوا اي .. بس لهلا ما بعرف شو نوع هيدا الحب

.:. سكتت سلوى وما علقت بشي .. وبعد اقل من دقيقه دخلت غدير بنت بوبدر الميلس ومعاها بنات عمها لميا .. نجلا ونور .:.

.:. سلمت سلوى عليهم وعرفتهم على صديقاتها .:.
وبعدها سالت : عيل وين الدانه ؟
سالت غدير : وليش الدانه قالت بتيي ؟
سلوى : الدانه اكدت لي انها بتيي انشالله

.:. ما توقعت غدير ان الدانه ممكن تحظر وخاصه انها منعزله عن الناس .. اما عن نجلا ونور تعجبوا لما دروا ان دانه بتحظر العيدميلاد .:.

.:. وبالحوش .:.
.:. توها داخله من باب الحوش الا بدر يطلع لها فجاه .. خافت وارتبكت وبسرعه حطت ايدها على ويهها .:.

.:. تعجب بدر من تصرفها بس ما علق بشي .:.

دانه ( وهي منزله راسها ) : اسمحلي يا ولد عمي طلعت ابويهك بدون ما اقصد
سال بدر : انتي اللي اسمحيلي بس انتي منو من بنات عمي ؟

نجمة بحر ©؛°¨غرامي فعال ¨°؛©

الحلقة 4 .:.

سال بدر : انتي اللي اسمحيلي بس من انتي من بنات عمي ؟
ردت الدانه بصوت خفيف : انا الدانه بنت عمك جاسم

.:. انصدم للمره الثانيه .. هذي ثاني مره يشوفها وما يعرفها .. وحس نفسه بموقف سخيف .:.

بدر : هلا والله بالدانه .. تفضلي حياج .. الكل قاعد ينتظرج بالميلس
ابتسمت وهي مازلت منزله راسها : هلا فيك وزاد فضلك
***************

بنات تعالوا شوفوا ماني مصدقه .. هذي الدانه بنت عمي جاسم يايه
ما ستوعبت نور : الدانه الدانه ما غيرها ؟
ردت نجلا : اي نعم .. الدانه بلحمها وشحمها
استفهمت ساندرا : ومنو هيدي الدانه اللي بتحكوا عنها ؟
وبعدها قاطعنهم سلوى : اتعرفين تسكتين انتي وياها ؟ كاهي الدانه قربت وابيكم كلكم تبتسمون لها .. فاهمين ؟؟

.:. استغربت ساندرا ليش كل هالاهتمام بالدانه !! لهدرجه يعني هي شخصيه مهمه ؟ او جميله مثلا ؟ ساندرا من النوع اللي يحب يكشخ ويتعدل واهم شي عندها ان الشخص يكون حلو عشان الناس تحترمه وهذا هو تفكيرها بالدنيا ومفهوم الجمال عندها .:.

.:. وبعدها .:.
.:. دخلت دانه الميلس بتردد كبير وهي حاسه بالخوف من نظرات البنات لها .:.

.:. وفجاه .:.

ضحكت ساندرا بستخفاف : هيدي هيا الدانه اللي بتحكوا عنها ؟
وبعدها سالت بوقاحه : شو هو الشي الحلو فيها ؟ بدي شي واحد بس حلو !!

.:. حست الدانه بالعجز وما عرفت اترد او شتقول بالضبط .. اما عن سلوى عصبت على موقف ساندرا السخيف واللي ما كان له داعي كلش .:.

سلوى ( بعصبيه ) : ساندرا !! ممكن تعتذرين عالكلام اللي قلتيه بحق الدانه ؟
استنكرت ساندرا هالطلب : وليش بالله ؟ شو عملت انا ؟
سلوى : انتي اتعرفين عدل شقلتي وماكو داعي اعييد .. يعني اعتذري للبنت يا ساندرا

.:. وفجاه تدخلت دانه .:.

دانه ( بصوت حزين ) : ماكو داعي تعتذر .. يمكن يكون هذا رايها فيني وانا احترمه

.:. نجلا ونور كانوا يحشون بشويش .:.

نجلا : ما اتشوفين دانوه شلون اتسوي نفسها طيبه ؟
نور : اي والله .. بس تبين الصراحه ؟ زين سوت فيها ساندرا .. والله محد قالها تتفلسف وتحظرالعيدميلاد وهي تعرف عدل انها مو قد هالعزايم .. واذا تبين الصراحه انا اتفشل منها والحين تفشلت زياده لما صديقات سلوى دروا ان هالجيكره بنت عمي
.:. كانت دانه شوي وتصيح بس على قدر المستطاع كانت اتحاول تخفي دموعها وتتمالك نفسها .:.

دانه ( تسال بابتسامه ) : ما عرفتيني على صديقاتج يا سلوى ؟
.:. ابتسمت سلوى وقامت عرفت الدانه على شيخه والجود .:.

ابتسمت شيخه : هلا والله بدانه
وكملت الجود : تشرفت بمعرفتج يا دانه
.:. استانست الدانه وحست بالراحه وان الدنيا ليما الحين فيها ناس قلبهم ابيض وطيب .:.

وبعدها التفتت سلوى لبنات عم الدانه : وهذول انتي عارفتهم .. غدير .. لميا .. نور ونجلا بنات عمامج وهم اتعرفين امون اختي

.:. وفجاه .:.

تنرفزت ساندرا : شو سلوى ! انسيتي اني موجوده هون ؟ ما بشوفك عرفتيني عالبنت !!
.:. كانت سلوى متضايقه شوي من موقف ساندرا لدانه بس حبت تنسى السالفه وخاصه انها تعرف ساندرا عدل .. انسانه انانيه ومغروره وما همها غير الجمال الخارجي وبس .:.

ردت سلوى : بالعكس ما نسيتج بس انتي اللي شكلج نسيتي انج اول وحده رحبتي بدانه باسلوبج المو حلو
.:. ما عجبها ساندرا هالكلام وحست بالحقد على دانه المسكينه اللي مالها ذنب بشي .:.

.:. وبعدها .:.

سالت غدير متعمده : اقول دانه شلون اقتنعتي اتين العيدميلاد ؟ مع انج ما اتحبين تختلطين بالناس ؟
.:. تضايقت دانه من هالسؤال وحست ان غدير متعمده تساله بس كانت مجبره اترد عليه .:.

دانه ( وهي تتذكر كلام سلوى عن الثقه ) : من اليوم ورايح بكون اجتماعيه انشالله
.:. استغربت غدير من رد الدانه وهي اتعرف عدل ان دانه مستحييل اترد بثقه واستانست سلوى من هالرد اللي ما توقعته .:.

سلوى ( بشويش ) : عفيه عليج يا دانه .. ابيج جذي قويه وما يهمج شي
.:. ابتسمت دانه بس سرعان ما اختفت الابتسامه لما شافت ساندرا تقرب منها بكل غرور وثقه .:.

ساندرا ( تسال وهي تلعب بشعرها ) : شفتي مس ليبانون بالتي في هاليومين ؟؟
اعتفس ويه دانه : لا ما شفتها
ساندرا : عن جد بتجنن .. حتى انا اللي بشوف نفسي حلوا اكتيير بشوفها احلى مني بمليون مره
دانه ( بضيق ) : طيب وانا شكو يعني بمس ليبانون ؟
.:. حست سلوى ان ساندرا بتغلط بشي وبسرعه غيرت السالفه .:.

سلوى ( بابتسامه ) : ما تبون ترقصون يا بنات ؟؟
.:. ما حبت ساندرا تسكت هالمره وحبت اترجع السالفه عناد في سلوى لتغيرها الموضوع .:.

ساندا ( بوقاحه ) : سلامتك يا دانا .. انا بس كونيت بادي اتشوفي الجمال واللي يستحقوا الاحترام ومو حي الله بنت بشعه ما بتعرف شي عن الاناقه والجمال
انصدمت دانه : انتي شتقصدين بكلامج هذا ؟؟ منو تعنين فيه ؟
ساندا ( بابتسامه خبيثه ) : انتي
دانه ( اشويه وتصيح ) : انا !!
ساندا : اي انتي .. وفي احد بشع غيرك معنا هلا ؟؟

.:. وفجاه .:.

صرخت سلوى : ساندرا !! بسج عااد !!
اندرا ( بدون مبالاه ) : ما بظن اني غلطيت بشي
سلوى : كل هذا الكلام وتقولين ما اتظنين ؟؟

.:. ما استحملت دانه كل هالاهانات وخاصه انها تفشلت جدام البنات والمشكله ما كانت عندها الجراءه الكامله عشان اترد على ساندرا .:.

.:. وقفت ساندرا معصبه وكل صفات الغرور الزمتها بهالحظه .:.

ساندرا : انتي شو فاكره حالك ؟ اصلا ما فيه وجه موأرنه بيني وبينيك .. وانت شوو ؟؟ بادي اشوف شي واحد حلو فيكي بس ما في
وفجاه صرخت دانه مو مستحمله : بس خلاص كفايه .. بسج ما شبعتي اهانات ؟ ادري انج حلوه واتهبلين وقمر بعد .. هذا اللي تبين تسمعينه من الناس ؟ اكاهو سمعتيه مني .. شبعتي غرورج الحين ؟ بس هذا مو معناته انج اتغلطين علي واتزيدين بالغلط وانا اتم ساكته .. ادري عدل اني مو حلوه بس اتصور عندي شي انتي ما تملكينه .. الطيبه والتواضع وحب الناس ومو الانانيه والحقد والغرور وحب التملك .. بس اتوقع اني غلبتج بجمالي الداخلي .. والدلليل موقفج مني .. باين انج غيرانه مني ..
انفجرت ساندرا من الضحك : انااا ابغاار منك انتي ؟ شو هيدي الفزورا الجديده ؟ بتسدئي ضجكتيني وانا ما بادي اضحك ..

.:. وبعدها سكتت دانه وما قالت شي .. وتدخلت سلوى اللي كانت معصبه من موقف ساندرا .:.

سلوى : ساندرا .. انتي شفيج ؟ شنو مشكلتج ؟ يعني ما كان له داعي انج تحرجين ضيفتي !!
سالت ساندرا بدون مبالاه : وانا مو بضيفتك ولا شوو ؟
سلوى : اكيد ضيفتي .. وعلى عيني وراسي .. لكن دانه ما غلطت بشي .. انتي اللي غلطتي عليها وتماديتي بالغلط !!
عصبت ساندرا : انا ما غلطيت ابشي !!
سلوى ( باصرار ) : امبله غلطتي وكل هالبنات شاهدات على اللي صار توه
كررت ساندرا : التلك انا ما غلطيت ابشي

.:. وبعدها تدخلت نجلا بنت عم دانه .:.

نجلا ( بخبث ) : هو انا صحيح بنت عمج يا الدانه .. بس اذا تبين الصراحه ساندرا ما اغلطت بشي .. يعني احنا الناس لما انشوف وحده حلوه انقول جدامها ومن وراها والله ان هالبنت قمر واتينن .. وهم نفس الشي عن البيت الجيكره .. انقول بسم الله الرحمن الرحيم .. اللهم لا شماته .. هالبنت مو حلوه كلش واتخرع .. الله يعينها على نفسها .. والله لا يبلينا بما ابتلت فيه ان شالله .. يعني ساندرا الصراحه ما اغلطت ..

.:. بهاللحظه حست دانه ان السانها ثقل وما اقدرت اتقول شي .. وحست ان دموعها بتنزل غصب .. اذا نجلا بنت عمها اتقول هالكلام فشلون ساندرا !! حست سلوى بشعور الدانه وهم حست انها السبب بالشي اللي استوه لما الحت على الدانه انها تحظر لعيد ميلادها .:.

.:. حطت الدانه ايدينها الثنتين على عيونها اللي انزلت ادموعها قبل ما تستأذن .. وبسرعه وبدون شعور اطلعت بره الميلس .:.
***************

. كان بدر قاعد بداره ويتحلطم .. ليش ان البيت اليوم مليان بالبنات وما يقدر ياخذ راحته ويتنقل من مكان لمكان .:.

وبعدها قال : ماكو غير داري .. اهي المكان الوحيد اللي برتاح فيه اليوم بدون ما احد يدخل علي ويلعوزني

.:. وفجاه .:.
.:. فتحت باب الدار وادخلت عليه وسكرت الباب بقوه واستندت عليه وهي ميته بجي .:.

تخرع بدر المسكين : بسم الله الرحمن الرحيم .. اشصاير ؟؟ البنات اوصلوا لداري !! عيل انا وين اروح ؟

.:. ما ردتت عليه وكملت بجيها .:.

استغرب بدر واستفهم : منو انتي ؟ وشسالفه ؟ وليش تبجين ؟

.:. وهم ما ردتت عليه وبجت اكثر من قبل .:.

سال بدر بستهبال : في احد طقج ؟ تبيني اروح اطقه ؟
رفعت الدانه راسها معصبه : عن العبط وهذا مو وقت استهبالك الحين !!
استغرب بدر : الدانه !!
.:. ما ردتت عليه وامسحت ادموعها وفتحت باب الدار بتطلع .:.

ناداها البدر : لحظه شويه .. تعالي وين رايحه ؟ وما قلتيلي ليش تبجين ؟
.:. وهم ما ردتت ومشت واهي حاسه بحزن كبير وشافتها سلوى .:.

سلوى ( تسال ) : الدانه .. واخيرا لقيتج .. انتي وين رحتي ؟
ردتت دانه بهدوء : اكاني جدامج
قربت سلوى يم دانه ومسكت ايدها مبتسمه : يالله تعالي انرد للبنات
سحبت الدانه ايدها بقوه : اسمحيلي انا راده البيت !!
تضايقت سلوى : ليش ؟ ليكون عشان سالفـ ..
قاطعتها دانه بعصبيه : ايه .. عشان سالفة هالساندرا .. واذا انتي ترضين على نفسج انج تنهانين جدام اللي يسوا واللي ما يسوا فانا ما ارضى !!

.:. وبسرعه مشت بدون ما تعطيها فرصه تتكلم او اتقول شي .. راده البيت .. سكتت سلوى وما قالت شي .. وبدر كان واقف بالممر وسمع كل شي .:.

قرب بدر من سلوى وسال : عشان هالسبب كانت بنت عمي اتصيح ؟
.:. هزت سلوى راسها ايجابيا .:.
سال بدر : اهو شصار بالضبط ؟ ومنو هالساندرا ؟
***************

.:. كانوا البنات قاعدين بالميلس وكل وحده اتسولف مع الثانيه متناسين الشي اللي صار .. كانت ساندرا تضحك ومستانسه متجاهله تماما الغلط اللي سوته .:.

قربت نجلا من ساندرا تسال : انتي من وين يبتي كل هالثقه والجراءه اللي فيج ؟ الصراحه عجبتيني
ساندرا وهي رافعه خشمها غرور : هيدا الشي مولود معاي .. وانتي لهلا ما شفتي شي
نجلا : وهم في اشيا ثانيه مدفونه بداخلج وما طلعتيها ليما الحين ؟
ساندرا ( بغرور ) : we we
نجلا ( اللي ما فهمت شي ) : شنو تقصدين بوي وي !!
ضحكت ساندرا بمسخره : وليك ما بتعرفي فرانسي !! يعني yes بالانجليزي .. لا تؤلي ما بتعرفي انجليزي هلا ؟
ردتت نجلا من الفشيله : افكورس اعرف انجليزي .. يعني مو لهدرجه .. اما الفرنسي وشعرفني فيه !! صعب ومعقد

.:. ومن صوب ثاني بالميلس كانت غدير اخت بدر اتسولف مع امنه اخت سلوى .:.

غدير : امون روحي شوفي اختج سلووه وينها فيه ؟ صيفت من يوم اطلعت !!
امنه : اكيد قاعده تقنع بنت عمج الدانه ترد للميلس
غدير : ما اظن الدانه بترد بعد اللي سمعته من ساندرا
امنه : الصراحه انا ما ادري شلون ساندرا تجرات وقالت هالحجي !!
غدير : امبين ان هالساندرا ابنيه مغروره وشخصيتها قويه
امنه : معاج حق !! انا ما ادري شلون سلوى مصادقتها !! كل وحده شخصيتها مختلفه عن الثانيه
***************

وهذي الساندرا بالله عليها ما تستحي ؟ اشفاكره نفسها ! مارلين مونرو ؟ مالها حق اتغلط عالدانه بهالطريقه !!
تنهدت سلوى : اللي صار صار وانا السبب
استفهم بدر : شكو انتي السبب ؟؟
سلوى ( بضيق ) : انا اللي الحيت واصريت عليها عشان تحظر اليوم .. انا اللي حطيتها بهالموقف المحرج هذا .. انا السبب
بدر : انتي مالج ذنب باللي صار .. الذنب ذنب هالمغروره اللي اسمها ساندرا
.:. وبعدها .:.

سمعوا صوت معصب ياي من وراهم : انتوا الاثنين شتسون مندعسين بالممرر !!
والتفت على سلوى يسال : وانتي يا الشيخه .. اشله امخليه صديقاتج ومندعستلي بالممر سوالف مع الشيخ بدر !!
.:. استغربوا الاثنين من موقف بوبدر المعصب عليهم وبدون سبب .:.

سال بدر : عسى ما شر يبا ؟
وسالت سلوى : اشفيك عمي ؟ ليش شاب علينا ضو ؟ وشتقصد بكلمة مندعسين ؟ وبعدين انا ما خليت صديقاتي .. انا بس كنت اسولف مع بدر عن شغله .. واكاني راجعتلهم الحين
سال بوبدر بستخفاف : وبالله عليج شنو هالشغله الخطييره الا ما اطلعت الا بهالوقت وبالممر يم غرفة بدور ؟؟
.:. تنرفزت سلوى على موقف بوبدر اللي ابد ما كان له داعي .:.

وقالت لنفسها : انا مو مجبوره اني ارد عليه واهو مو ولي امري .. ماله حق علي .. وما دامه اخوي نايف موجود هو شدخله فيني !!

.:. ما ردتت عليه ومشت من يمه رايحه للميلس .:.

تنرفز بو بدر : انسه سلوى اعتقد اني سالتج سؤال ! ومو حلوه انج اطنشيني وتمشين
.:. ما ردتت عليه وكملت مشيتها .:.

بوبدر وهو ماسك اعصابه : انتي ما تسمعيني او تتصيمخين يعني ؟ اكلمج انا !! اوقفي
.:. وهم ما ردتت .:.

. حس بدر ان بيصير شي من هالعناد .:.
صرخ بوبدر معصب : قلت لج اوقفي !!

LeftOver Soul ©؛°¨غرامي فعال ¨°؛©

الاجزاء روعه

بدر<< اممم اتوقع يدافع عن دانه ويمكن يحبها ,,

سلوى << ابو بدر مايبي بدر يقرب من سلو لانهٌ هو
يحبهااا o_O ,,

الدانه << بترجع بها ثقتها بنفسهاآآ , وتدافع عن نفسها من بنات
عمها ومن هالساندرا

أنتظر البااااارت القادم ,,


أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1