منتديات غرام منتديات إدارية - يُمنع طرح اقتراحات ارشيف غرام مذكرات بنت الطب.. حبيت لكن خسرتهم الاتنين.. قصتي الشخصية والأحداث حقيقية
Delicious Kiss ©؛°¨غرامي متألق ¨°؛©

السلام عليكم ورحمة الله وبركاته
أولا حابة أقلكم إنو هدا تاني موضوع ليا فأتمنى إني أشوف ردودكم وتفاعلكم معايا وكمان أبغاكم تعرفو إنو قصتي هدي حقيقية وأنا مريت بيها شخصيا...
(الجزء الأول)
أنا بنت من مكة من أسرة محافظة عندها عادات وتقاليد زي أغلب أهل السعودية.. كنت عايشة حياتي بشكل عادي زي كل الناس.. أنا والحمد لله جميلة ورشيقة ومرحة وأحب الحياة ودايما الابتسامة ما تفارق وجهي.. مجتهدة في دراستي وشاطرة في المدرسة ودايما من الأوائل.. كان كل اهتمامي بدراستي عشان حلمي إني أدخل الطب وأسير دكتورة.. ولأني أصغر إخوتي كنت المدلعة عند مامي فكانت تخاف عليا حتى من الهوا الله يخليلي ياها وما يحرمني منها قولو آمين.. كانت معايا في الثانوية قريبتي من جهة مامتي اسمها (خ) وكانت طيبة أو هدا الي كنت أعتقدو وكانت تتمنى نكون صحبات ودايما تقول للبنات إنها تشبهني وإنو شكلها زيي أنا كنت أعتقد إنها مسكينة بس ما أدركت إنها تغار مني.. المهم اتخرجت من الثانوية وقدمت على كلية الطب وهيا قدمت معايا لأني كنت أروح مع أبوها عشان نسوي أوراق الجامعة.. جاني القبول في الكلية في قسم الطب والجراحة أما هيا فقبلوا في قسم العلوم الطبية فسارت تقلي ليش انتي دخلتي الطب وأنا العلوم الطبية مع إننا قدمنا مع بعض واختبرنا جنب بعضنا كنت أقلها كل شي قسمة ونصيب وهدا الي ربنا رائدو بعدين أنا أصلا أشطر منها بكتييييييييييير يعني مافي مجال للمقارنة.. طبعا بما إني اجتماعية وأحب الصداقات أتعرفت على صديقات جدد في الجامعة وسارو أقرب صديقاتي (د) و(ر) اتعرفت عليهم من الطب , و(خ) قريبتي , و(س) صديقتي من الثانوية ودخلت معايا الطب , يعني هدولا الأربعة ساروا أقرب صديقاتي.. بس (د) و(س) و(ر) هما الي أقعد معهم أكتر ومضت الأيام وقويت صداقتي معاهم وكنا ماناكل إلا مع بعض ونحضر المحاضرات ونجلس جنب بعضنا وإذا وحدة فينا ماحضرت كلنا نقعد معاها وأحيانا كنا نغيب عن المحاضرات ونخرج من الجامعة نروح بيت وحدة من البنات أو نتمشى بالسيارة بس عمرنا ماسوينا شي غلط لأني أنا أصلا ماأرضى إنو وحدة فيهم تقابل صاحبها أو حبيبها معايا لأني ماأحب الشبهات مع إني كنت أسمعلهم لمشاكلهم وأحاول أساعدهم وأحذرهم من الشباب الي يعرفوهم.. بس عمري مافكرت أني أحب لأني كنت أعتبر الحب ضعف وأنا ماأرضى بإني أكون ضعيفة أو مهزومة.. مضت شهرين على الدراسة وفي الشهر التالت: في يوم من الأيام ووكالعادة جالسة أنا وصحباتي التلاتة (د) و(س) و(ر) في كفتيريا الجامعة وكانت (د) بتكلم ولد اسمه (ج) من ضمن الأولاااااد الكتير الي تعرفهم (يا لطيف ياربي) وهو سنة أولى طب زينا والبنتين التانين كانو كمان يعرفو ولدين أولى طب أصحاب هدا الولد فكانو من قبل هدا اليوم يقولولي أتعرفي انتي كمان على واحد يساعدك إذا تبغي شي في الدراسة وإذا أحتجتي مذكرات أو أوراق أطلبيه وإذا منتي فاهمة شي يشرحلك هوا يعني حاولو يوسوسو زي الشياطين.. المهم وقتها ماأعرف لش قلتلها والولد عالخط: قوليلو أبغى أتعرف على واحد من أصحابو فقالتلي خدي كلميه بنفسك.. أخدت الجوال منها وكلمتو بس أصلا أنا ماكنت آخده الموضوع جد.. قلتلو ألو سلام عليكم كيف حالك قلي وعليكم السلام الحمد لله فقلتلو أبغى أتعرف على واحد من الطب سنة أولى زينا وعشان أعجزو ولأني أصلا ماكنت أبغى علاقة بس كنت أمزح قلتلو عندي مواصفات ماأبغى أي واحد أبغاه يكون شكلو حلو وطويل ونحيف وسيارتو حلوة ولقبو حلو (يعني من عيلة معروفة) واسمو فني زي اسم كاظم الساهر حتى كنت بأمزح معاه وبأضحك بصوت عالي وأنا معروفة بخفة دمي ومرحي وقلتلو أهم شي يكون جوالو شغال على طول يعني ماينفصل أبدا يعني يسدد الفاتورة أول بأول ويتصل عليا كتير ومايحوجني إني أتصل عليه حتى كان يضحك وقلي ليش انتي تبغي تتزوجيه مو تصاحبيه الي يسمعك يقول تبغيه عريس.. وعشان طلباتي قلي أعطيني وقت عبال ماألاقيلك واحد بالمواصفات الي تبغيها ومضى أسبوع عالمكالمة وبعد أسبوع كلمتو وقلي والله فكرت في كم واحد ودورتلك بس مني لاقي بالمواصفات الي تبغيها وأنا معاه عالخط فكر شويه وقلي هاااا لقيتو كيف راح عن بالي خلاص هوا دا الي ينفع فقلتلو فيه كل المواصفات الي أبغاها قلي إيوه بس خليني أكلمو أول وأشوف حيرضى يكلمك وإلا لأ (يمزح) , فقلتلو ياشيخ روح بالله بلا مايرضى يحمد ربو إنو أنا (...) أتنازلت وقلت أبغى أكلمو المهم دحين كلمو وردلي بسرعة مو انت معاه في الجامعة دحين قلي إيوه بس هوا عندو اختبار دوبو راح القاعة لما يخلص أكلمو ويمكن أكلمو إذا رجعت البيت يعني بعد نهاية الدوام وقلي إذا رضي حأعطيلو رقمك وخدي هدا رقمو عشان إذا اتصل عليكي تعرفي إنو هوا (لأني ماكنت أرد على أرقام غريبة) وكان رقمو مرة مميز حتى إني حفظتو غيب.. المهم قفلت منو وخلصت محاضراتي ورجعت البيت..

نغـــم.com ©؛°¨غرامي متألق ¨°؛©

ننتظر البقية

ننتظر بفارغ الصبر

زوايا حزن ©؛°¨غرامي جديد¨°؛©

كمليييييييي بللللللللللللز بسرعه
احب حرااااكاااات الكشن

Delicious Kiss ©؛°¨غرامي متألق ¨°؛©

هااااااااااي جميعا..
الصراحة دخلت عالمنتدى وكنت متحمسة وأبغى أكمل القصة لكن مالقيت ردود كتيرة عشان كدا حماسي قل شوية يعني ماحسيت إنو في حماس عالموضوع.. ماعدا نغم.com و زوايا حزن وso cute هدولا التلاتة هما الي أعطوني الأمل لأنهم الوحيدين الي ردو عليا وأشكرهم عالرد وإن شالله إذا زاد حماس القراء حأكمل القصة.. wait for me soon

آلشقرآ .~ ©؛°¨غرامي ذهبي¨°؛©

؛؛

موفــقه يالغاليــه


؛؛

Delicious Kiss ©؛°¨غرامي متألق ¨°؛©

(الجزء التاني)
رجعت البيت تقريبا اتنين ظهر كان يوم الأربعاء ونمت وخليت الجوال جنبي حتى إني حطيتو تحت المخدة عشان إذا اتصل أصحى على اتصالو.. وبالفعل اتصل وأنا نايمة ووالله تخيلو صحيت من عز نومي عالاتصال مع إنو نومي مرة تقيل لكن.. المهم اتصل وعلى طول خرجت الجوال من تحت راسي وطالعت فيه شفت رقمو وعرفت إنو هوا لأني زي ماقلتلكم حفظت رقمو في قلبي قبل ماأحفظو في الجوال.. كانت الساعة تقريبا أربعة عصر المهم رديت عليه
هو: ألو سلام عليكم
أنا: وعليكم السلام
هو: كيف حالك
أنا: الحمد لله بخير
هو: انتي (.....) -يعني اسمي-
أنا: إيوه
هو: انتي نايمة
أنا: إيوه
هو: طيب خلاص بعدين أكلمك
أنا: طيب إن شالله
وجا يقفل إلا قلتلو.. ألو انت (محمود) قلي إيوه فقلتلو مع السلامة وقلي مع السلامة..
المهم رجعت نمت بس كان في بالي وأنا نايمة لكني ماحبيت أبينلو إني متلهفة ومتسرعة في العلاقة فكملت نومي وصحيت الساعة تسعة في الليل واتصلت عليه لكنو ما رد فأرسلتلو رسالة وأستنيتو تقريبا ساعة لكنو مااتصل فرجعت نمت.. اتصل من جوالو ومن جوال صاحبو وأنا نايمة فمارديت عليه وأرسلي رسالة (إذا صحيتي أعطيني رنة).. ماصحيت إلا الساعة تلاتة فجر وعلى طول طالعت في الجوال وشفت الاتصالات تقريبا كانت كتيرة بس ماأذكر كم اتصال.. اتصلت عليه مارد وعلى طول رجع اتصل عليا عشان لايخسرني مكالمة.. رديت عليه واتكلمنا مع بعض وهوا كان عارف من قبل من صاحبو اسمي ولقبي وحتى أنا عارفة اسمو ولقبو.. اتعرفنا على بعض أكتر وكانت خفة دمو ملفتة وكلامو كان مرة حلو اتكلمنا عن الدراسة وسألني إذا محتاجة مساعدة أو محاضرات لأنو كمان الاختبارات قربت وأنا كنت مرة حايسة والي عجبني فيه إنو كان زيي ذكي بس من النوع الي يحب أحب يدفعو ويساعدو زيي تماما.. كانت الأسبوع التاني اختبارات المعامل فقلي إيش رايك أعطيكي الملخصات الخاصة فيا الي أنا أكتبها في دفتري فقلتلو طيب.. قلي وهدي فرصة إننا نتقابل وأشوفك وإيش رايك أجي عند البيت قلتلو ماأدري خليني أكلم أختي عشان تساعدني لأنو مامي شديدة ومحافظة وماترضى بهدا الكلام حتى لو عشان الدراسة.. حتى أخواتي شديدات ومايحبو العلاقات ومايرضو بالغلط لكن حأقلها عشان الدراسة وهيا بطريقتها تقنع مامي.. المهم طولنا وجلسنا نتكلم لحد بعد الفجر (يوم الخميس) وصلينا ورجعنا نتكلم لحد ماتعبنا.. أخدنا على بعضنا من أول اتصال.. كنا مرة متوافقين فكريا وروحيا.. وبعد ماقفلت منو نمت على أساس إنو لما أصحى أكلم أختي وأشوف كيف نتقابل وآخد الأوراق وبصراحة كنت أتمنى أشوفو بس ماكنت متسرعة مرة وقلت كل شي يجي في وقتو.. ويوم الخميس بعد ماخلصت نومي صحيت عالظهر على اتصالو..

للبوح حكايه~ ©؛°¨غرامي متألق ¨°؛©

متشووقه اعرف التكلمه
يلا ياعسوله انتظر البقيه
تصدقي عندي اامتحان من الفضاوه خلصت الجزئين
ان شاء الله ع بكره تكوني منزله جزء

Delicious Kiss ©؛°¨غرامي متألق ¨°؛©

(الجزء التالت)
بعد ماقفلت منو في الصباح تقريبا الساعة ستة نمت ولما صحيت من النوم لقيتو أرسلي على جوالي تلاتة أو أربعة رسائل يعني كلام حلو بس ماقلي إنو يحبني لكن بينلي في الرسائل إنو يعزني ويحترمني.. وأصلا من البداية الي عجبو فيا إني ماقد كلمت شباب يعني هوا كان أول واحد في حياتي وهدا أكتر شي حمسو إنو يكلمني.. المهم يوم الخميس بتاريخ (27/11/426هـ) صحيت بعد ماخلصت نومي في الظهر على اتصالو.. رديت عليه وجلسنا نتكلم
هو: ألو سلام عليكم
أنا: وعليكم السلام
هو: كيف حالك
أنا: الحمد لله بخير وانت كيف حالك
هو: الحمد بخير
أنا: ها نمت زي الناس
هو: لا والله مانمت بسرعة جلست أفكر مع إني كنت مرة تعبان وكنت أبغى اتصل بس قلت أكيد نايمة
أنا: إيوه والله نمت ومادريت عن نفسي لكن خليت الجوال جنبي عشان من يوم ماتتصل أرد عليك
هو: طيب وكيف حتآخدي الأوراق مني أجي عند بيتكم وإلا إيش؟
أنا: خليني أكلم أختي وأرجع اتصل تاني أوكي
هو: أوكي بس لاتطولي باي
أنا: باي
ورحت كلمت أختي وقلتلها إنو في واحد من الطب أبغى آخد منو أوراق عشان الاختبارات بس ماحأقد أقول لمامي فقالتلي من فين عرفتيه وكيف ووو فقلتلها إني أخدت رقمو من الجامعة وإنو علاقتنا بس زمالة دراسة وماحتتعدى أكتر من كدا.. المهم قلتلها ينفع يجي عند البيت يعطيني الأوراق قالتلي لأ عشان مامي وعشان كلام الناس يعني الجيران لو شافوه إيش يقولو وبعدين إحنا معروفين وكل الناس الي حوليننا يعرفو أخلاقنا واحترامنا.. فقالتلي خليه يحط الأوراق في مكان ونروح نآخدها حتى إنها قالتلي ماتقابليه بس يحطها ويروح وإحنا نروح نآخدها بعدين.. قلتلها أكلمو وأقلو إيش قلتيلي وأصلا هوا كان بيتصل وأنا بأكلم أختي ماشالله ماهدأ الجوال من اتصالااااااااااااااتو.. خرجت من عند أختي وهوا كان بيتصل ورديت عليه وقتها كان على آدان العصر.. المهم
هو:ها كلمتي أختك إيش قالت
أنا: والله قالت حطها في مكان ونجينآخدها حتى ماحأكون لوحدي هيا حتكون معايا
هو: يالله يعني ماحقدر أشوفك
أنا: إلا إن شالله بس من بعيد
هو: طيب المهم إني أشوفك ترى مررررة نفسي أشوفك بسرعة
أنا: ليش متحمس قد كدا يمكن إذا شفتني تنصدم
هو: لا الصوت هدا وخفة الدم هدي أكييييد حلوة
أنا:هههههه بس بشرط إنك تقلي رأيك فيا بصراحة لأني أنا صريحة وماأحب المجاملة فأبغاك تقلي رأيك بصراحة ووالله ماحأزعل
هو: طيب فين أحطها؟
أنا: ماأدري في أي مكتبة
هو: فكر شوية وقلي إيش رايك في مكتبة (النخبة) في العزيزية وأصلا هيا قريبة من بيتي
-(وهدي المكتبة أصلا إحنا نشتري منها بعض مذكرات الطب)..
أنا: قلتلو طيب خلا ص أحسن وأنا أعرف مكان المكتبة
هو: أروح دحين
أنا: لااا إشبك مستعجل لسه أصلا مدري متى حأخرج لأنو مني خارجة لوحدي على حسب أختي
هو: طيب خلاص بعد المغرب أنا حأروح هناك وأستناكي أوكي
أنا: أوكي إذا جيت خارجة من البيت أكلمك
المهم قفلت منو ورحت جلست مع أختي لحد مايجي وقت خروجنا عشان أكلمو لكن طبعا ماقدر يصبر ورجع اتصل تاني وتالت وعاشر المهم.. راح من أدان المغرب عالمكتبة وأعطى الأوراق للرجال الي يبيع وجلس عند المكتبة يستناني.. خرجت من البيت بعد صلاة المغرب وقبل العشا ومن البيت لحد ماخرجت وركبت السيارة وهوا معايا عالخط وإذا قفلت منو يرجع يتصل وانشغلت معاه أربعة وعشرين ساعة بمكالماتو.. كل شوية يسألني خرجتي من البيت.. وبعدين فينك.. فين وصلتي.. لكن عشان الطريق يعني شوية آخد وقت عبال ماأوصل وكمان أختي كان عندها مشوار راحت عليه قبل مانروح عالمكتبة لأنها تحسب إنو حط الأوراق وراح وماتدري إنو بيستناني ويبغى يشوفني وماكنت أقدر أٌقلها.. المهم مرررررررة اتأخرت عبال ماأوصل عالمكتبة وطول الوقت مسكين قاعد يتصل.. رديت عليه كم مرة لكن مرررة كانت اتصالاتو كتيرة فأختي قالتلي ليش قد كدا خلاص قوليلو دحين نروح نآخدها وكمان لأنها كانت جالسة جنبي ماقدرت آخد راحتي بالكلام معاه فسار يكلمني بالرسايل.. قلي وقت ماتوصلي عالعزيزية أرسليلي رسالة وقوليلي إنك وصلتي لكن المشكلة أختي كانت جنبي ومني قادرة أكتبلو رسالة لأنها حتشوف إيش أكتب يعني حتى لو وصلت ماأقدر أكلمو بسرعة عشان ماحأقدر أتأخر في المكتبة لأنو أختي حتشك وكمان لأنو هيا على بالها إنو حط الأوراق وراح من غير مانتقابل فكان لازم أرسلو رسالة قبل ماأوصل عشان أقدر أشوفو.. المهم لما وصلت عند المكتبة أرسلتلو رسالة كول مي وكانت الساعة تقريبا تسعة أو عشرة ليل.. ونزلت عالمكتبة أنا وأختي التانية وأختي هدي هينة شوية ممكن تتفهم الوضع فقلتلها إنو يبغى يشوفني.. كلمت البياع وطلبتو الأوراق وكان (محمود) حاططها بدون اسم وبس كاتب عليها اسمي في طرف الورقة بخط صغييير عشان لحد يشوف اسمي (غيرة يعني).. المهم أخدت الأوراق من الرجال وأستنيتو ودقيت عليه فمارد عليا وبعد مامشيت من هناك وركبت السيارة ومضت نص ساعة تقريبا ماأرسلتلو ولا قلتلو إني أخدت الأوراق وهوا مسكين قاعد يستنى.. بعد شوية اتصل رديت عليه قلي وهوا مبسوط انتي فين ها جيتي عند المكتبة مني شايفك قلتلو ليش انت فين قلي أنا أهو هنا فينك قلتلو أنا مشيت فانصدم وقلي ليش أنا من أول بأستناكي وأبغى أشوفك ليش رحتي وماخليتيني أشوفك ومرة زعل ووقتها أختي تقلي ليش اتصل مو خلاص أخدتي الأوراق إيش بقي كمان قلتلها لا بس يبغى يطمن إني أخدتها وطبعا ماأقدر أقلها الحقيقة فقالتلي أبغى أكلمو لأنو مرة يتصل كتير بشكل مو طبيعي أعطيني أبغى أتفاهم معاه ماقدريت أرفض وأعطيتها تكلمو.. المهم كلمتو وقالتلو حتى لو إنك تساعدها عشان الدراسة بس كدا ماينفع والاتصالات الكتيرة هدي مالها داعي.. رجعت البيت وأول ماوصلت اتصل عليا رديت عليه وجلسنا نتكلم وكان مررررة زعلان لأنو ماشافني حتى قلي أنا مني زعلان لأني جلست أستناكي مع إني قعدت أستنى من تقريبا الساعة ستة لحد الساعة عشرة وشوية لكن عشانك عادي كل شي يهون أصلا أنا طول الوقت جلست في السيارة عند المكتبة ومني راضي اتحرك عشان أخاف تجي في أي لحظة وماأشوفك وكمان كان عندي موعد مع أصحابي على أساس أنزل جدة معاهم وعشانك مارحت وماهمني ودا كلو مازعلت إلا لأني ماشفتك لأنو أهم شي كنت أبغى أشوفك فشرحتلو الوضع وقلتلو إنو ماكان بيدي وغصبا عني وإني أنا كمان كنت أبغى أشوفو فرضي على طول.. جات أختي وهوا معايا عالخط وسألتني بتكلمي مين والصراحة ماأعرف أخبي قلتلها إنو (محمود) فقالتلتي ليش قلتلها بيكلمني عشان بيقلي إنو نزلت المكافآت وهوا من جد قلي عن المكافآت لأنو مسكين كان يبغى يقلي عن كل شي أول بأول لكن طبعا مو هوا هدا الموضوع الأساسي.. بس بعدين قفلت منو ونمت واليوم التاني أرسلي رسايل وكلمني كالعادة.. وكان بعد يوم أظن بداية السنة الميلادية فأرسلتلو في الليل رسالة كتبت فيها (happy new year my love) وعلى طول أرسلي رسالة كتب فيها
(I love you too) قريتها وفرحت بصراحة لكن ماعلقت عليها ولا سألتو ليش كتب كدا مع إننا مرة مااتكلمنا عن مشاعرنا تجاه بعض خارج حدود الصداقة.. كان في اليوم الواحد أو بالأصح في الساعة الوحدة والله ورا بعض رسااااااااااايل واتصالات وإذا ماقدرت اتكلم عشان أهلي نتكلم بالرسايل يعني طول الوقت وإحنا مع بعض وأحلى شي إنو يتصل كتير.. be connected>>>>>>>>

انا الورد ©؛°¨غرامي جديد¨°؛©

هلا
تابعي روايتك
يعجبني صراحتك في الرواية
كملي انا بتابعك
وياليت بدل رموز في اسماء البنات اكتبي اسماء وهمية
بدل الحروف
انتظرك
وياليت مع كل كتابة انجليزي ترجمي لاني مو كل الكتابات اعرف اترجمها
واسمك ايش يعني
( (((( اسفة طولت عليك بس بجد حبيتك كثيييييير ، وكمان انا احب الطب بس ما حصلت على نسبة)))))

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1