غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 11
قديم(ـة) 15-09-2008, 09:33 PM
دلوعه والدلع طبعي دلوعه والدلع طبعي غير متصل
©؛°¨غرامي جديد¨°؛©
 
الافتراضي رد: كنت ابيها بس القدر كان اقوى


كملي بسرعة ياسويت القصة مرررررررررررررررررره روعه انتظرك

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 12
قديم(ـة) 21-11-2008, 06:32 PM
دلوعه والدلع طبعي دلوعه والدلع طبعي غير متصل
©؛°¨غرامي جديد¨°؛©
 
الافتراضي رد: كنت ابيها بس القدر كان اقوى


(الجزء الرابع)
في الوقت هذا فيصل قام يتسبح وملاك ولينا دخلوا ع بالهم مافيه إلا فيصل نايم
المهم لينا شافت عبدالرحمن برا وراحت عنده أما ملاك دخلت الشقه
ملاك: واااااو وش هالحوسه حشا مو صاله زباله
دخلت الغرفه لقيت تركي نايم حسبالها فيصل لأنه كان مغطي كل جسمه
ملاك: فيصل ...... فيصل
تركي صحي على صوتها وكان يقول في نفسه : يارب ماتجي يارب تروح
ملاك: فيصل قوم عاد مايصير كل هذا نوم
تركي وده يتكلم بس ماقدر
جت ملاك وقربت منه وفتحت عنه الشرشف وتفاجئت
ملاك: تركي
تركي : ........
قعدوا يناظروا بعض للمره الثانيه وهم مقربين
ملاك ع طول قامت بس تركي مسك يدها
تركي: صدقيني أحبك... وفك يدها
ملاك خرجت مصدومه يمكن من الفرحه إللي فيها
كان سعادتها لاتوصف
وتقول لنفسها: ياملاك إصحي تركي يحبك وانتي بعد تحبيه ليش مخبيه عنه هالشي
دخلت الصاله وقاعده تحاول تصدق الموقف بس مو قادره لكنها تأكدت إن تركي يحبها
والدليل لمى مسك يدها وبعدها دخلت الغرفه والبسمه واضحه على وجهها
روان: يارب دوم هالبسمه بس وش سببها
ملاك: عادي قاعده ابتسم مافي سبب
روان: راويه مو كأن ملاك متغيره هاليومين
ملاك: مو متغيره ولا شيئ
راويه: إيه صح أمس كنتي متضايقه ومالكي خلق لأي أحد واليوم مسرع تغيرتي
ملاك: قولوا عني اللي تبون أنا بروح آخذ شاور سي يو
روان: سبحان الله مغير الأحوال
اللي يشوفها ما يقول ملاك اللي أمس لايكون البنت تحب
راويه: والله نفس تفكيري !
روان: تجي نسألها
راويه: لا يالخبله ملاك لو عندها شي بتخبرنا
روان: إيه والله أصلن مو من عادتها تخبي عنا شي
راويه: أو إنه تغير عليها الجو
روان:ههههههههه يمكن ليش لأ
++++++++++++
+ + + + +
في الوقت هذا خرج فيصل من الحمام(الله يعزكم) وشاف تركي
مسرح وباله مو معه قرب منه وجى من وراه عشان يخوفه
فيصل بأعلى صوته: تركيييييييي
تركي: لعن بو بليسك وش فيك انت صاحي؟
فيصل: ههههههههههه روح شوف شعرك وشلون وقف
تركي: ههههههههههه يالله صباح خير
فيصل: أي صباح؟شوف الساعه كم صايره
تركي شاف الساعه وشاف المكالمات اللي جته من عمه وعمته وساره وقام ركض ع البيت
* * * * *
** ** **
أم فيصل: لينا صحيتوا فيصل
لينا: مدرري ماما أنا مادخلت مع ملاك
أم فيصل: وهي وينها؟
راويه: تتسبح
أم فيصل: وش حكايتهم هالبنات كل ماسألت عن وحده تتسبح!
أم بندر: والله ما ألومهم الجو موت مره حار
أم فيصل: إيه والله مره الجو يقرف
أم بندر: متى قلتي للكوفيره تجي
أم فيصل: بعد نص ساعه
أم بندر: انتي متأكده إن شغلها كويس
أم فيصل: إيه كل اللي سألتهم عنها يمدحوها
أم بندر:الله يستر وماتاخذ وقت
أم خلود تبينا معها من بدري
أم فيصل: بس البنات كثير وأخاف مانخلص بسرعه
أم بندر: خلاص بقولها تصلحنا بعدين تتفضى للبنات
أم فيصل: إيه معاكي حق عشان أنا وانتي نروح وبعدين البنات يلحقون
أم بندر: الله يسهل
@؛@؛@؛@؛@؛@؛@
راويه: ملاك عندك إكسسوار لونه أحمر ؟
ملاك: مدري شوفي الشنطه
راويه فتحت الشنطه وبدت تقلب بالأغراض وفجأه لقيت الورده واستغربت لأنها
شافت ملاك ترميها من السياره أخذتها وقعدت تفكر.. سمعت ملاك خرجت من الحمام(الله يعزكم) ورجعت الورده وقفلت الشنطه
راويه( تصرف) : ملاك أي شنطه
ملاك: الشنطه السودا اللي عند الباب
راويه خافت تقول لها باللي شافته بس كانت خايفه من رد ملاك فاضطرت إنها تسكت وماتفتح الموضوع
ملاك: راويه ودي أقولك بسالفه وتكون بينا
راويه: إيه ملاك حتى أنا ابي أقولك بسالفه
وفجأه.. دخلت روان
روان:وش تسوي إنتي وياها
ملاك: نسولف
راويه: إيه ملاك كملي وريم وش صلحت
ملاك: بكت
راويه: مسكينه والله اللي صار لها مو شوي
دق جوال ملاك.....
ملاك: هلا وغلا والله الطيب عند ذكره
ريم: وش كنتوا تقولوا عني
ملاك: ههههههه كل خير
ريم: أشوى ههههه يعني إذا أنا اتصلت إنتي ماتتصلين
ملاك: والله انشغلت تعرفي العزايم والأسواق أخذت كل وقتي
ريم: وباقي في بيت عمك
ملاك: لا قبل يومين حصلنا شقه
ريم: ومتى ملكة ولد عمك؟
ملاك: اليوم
ريم: أكيد عطلتك ؟
ملاك: لا عادي إنتي على العين والراس
ريم: تسلمي ملاك والله اشتقت أشوفك
ملاك: وأنا أكثر بس شكلنا مطولين بالرياض
ريم: ماشا الله مابي أحسدكم
ملاك: أبوكي ماغير رايه؟
ريم: ويييييين يغير رايه أعمامي بكره بيجوا عندنا
ملاك: الله يعينكم
ريم: خلاص ما أطول عليكي مع السلامه
ملاك : مع السلامه
%%%%%%%
تركي كان توه واصل البيت
تركي: ساره وين عمتي؟
ساره: راحت المشغل
تركي: أوكي أنا طالع غرفتي
تركي طلع غرفته وقعد يفكر باللي صار بينه وبين ملاك وقعد يتذكر نظرة ملاك وابتسامتها حس انه ملك الدنيا ومافيها
قطعت حبل افكاره مكالمة من عمته ام سلطان كانت تبيه يجي الصاله عشان تبيه في كم شغله
وبعد دقايق دقت ساره الباب
تركي: ادخل
ساره: وين كنت؟ ليش ماترد على إتصالاتنا
تركي: كنت نايم
ساره: طيب أبيك توصلني عند البنات في الشقه
تركي: متى؟
ساره: الحين
تركي: لا ماقدر باقي باتسبح واكشخ وبعدين
ساره: على راحتك بس لاتزودها زي كل مره يكون فيها سهره
تركي: ابشري بس إنتي لاتسويلي قلق زي كل مره
ساره: أنتظرك
تركي: أوك ساعتين وأكون عندك
ساره: ها ها ها
تركي: ولا يهمك ثلاث ساعات كم ساره عندي؟
ساره: عشان خاطري خليها أربع
تركي: لا لا أخاف أصير قليل أدب
ساره: بسرعه خلصني بيروح الوقت
تركي: مو إنتي اللي تبينها ثلاث ساعات
ساره: أف ... وقفلت الخط
المهم ساره راحت عندهم وخلصوا البنات كلهم
الساعه 9 ونص بس باقي الميك أب
وعشان كذا أخذهم فيصل وتركي وودوهم المشغل
وطلعت أشكالهم مره حلوه خاصة ملاك كانت أحلى وحده
كان شعرها سمبل ولبسها سمبل
وحتى ماكياجها سمبل لفتت أنظار الكل

وصلوا القاعه ودخلوا البنات واستقبلتهم أم خلود اللي
بانت وكأنها في العشرينات
أم خلود: هلا والله ليش تأخرتوا
راويه: بسم الله عليكي خالتي مره تجنني
روان: إيه والله اللي يشوفك ع باله إنتي العروس
أم خلود: كافي مجاملات
ملاك: وأحلى من خلود بعد
أم خلود: والله إنتي الأحلى تفضلوا داخل حياكم
روان: راويه قومي أرقصي معاي
راويه: لا ما أبي
روان: قومي عاد لاتزوديها
راويه: ياكثرك
روان: عشان خاطري
راويه: أوكي رقصه وحده بس
روان: أخيرا
راويه: ملاك تجي معانا؟
ملاك: لا ما أقدر أحس رجلي تعورني شوي
راويه: على راحتك
بعد مارقصوا نادتهم أم خلود
أم خلود: حبايبي مين تقدر فيكم تشوف تنظيم البوفيه
تعرفوا ما أقدر أخلي الضيوف
روان: أوكي خالتي بروح أنا و راويه
راويه: خلاص أرتاح شوي وبعدين أروح معاك
أم خلود: لا ارتاحي حبيبتي خلاص روان تشوفه بسرعه وتجي
روان: بشوف ملاك يمكن تجي
أم خلود: على راحتك

روان: أرسلتني خالتي أم خلود أشوف البوفيه تجي معايه؟
ملاك: أوكي مشينا

عند باب الصالون اللي فيه البوفيه فتحت ملاك الباب
وما كان فيه أحد وشافت نافوره
شوكلاته شكلها يجنن (طبعا نافورة شوكلاته مو شي بسيط
يعني بدل الماي حطوا شوكلاته سايله تخيلوا المنظر!!!) ممممم
المهم
ملاك راحت عندها ركض وروان حاولت تنبها إن الباب الثاني مفتوح
لكن ( إذا فات الفوت ماعاد ينفع الصوت)
دخل تركي وفيصل وكانوا شايلين الكيكه اللي
حطمت الأرقام القياسيه بالطول
وكان فيصل داخل ومعطي ظهره لكن تركي العكس
ولما دخلوا كان تركي
في وجه ملاك وهي لاهيه بالشوكلاته وحالتها حاله
ناظرت على طول لقيته بوجهها ضحك على حالها
وفيصل مو داري شالسالفه قام ناظر وراه مالقي
أحد لأن ملاك قد حطت رجلها
فيصل: ههه الحمد لله والشكر
تركي: وشفيك؟
فيصل: إنت اللي وشفيك؟ تناظر وراي وتضحك
تركي: شفت مـــ.... لا لا مافي شي
فيصل: يازينك ساكت .. الحين وين نحط الكيكه

ملاك: روان يالتافهه ليش مانبهتيني
روان: أنبهك وإنتي راح تسمعيني والشوكلاته قدام عينك
ملاك: وااااو والفشله
روان: هههههههههه وربي شكلك يموت ضحك
ملاك: المشكله إني دايما أكون قدامه ههههههههههههه
روان: إمسحي وجهك بسرعه قبل أحد يشوفك كله شوكلاته
ملاك: حلفي
روان: هههههههههههه
ملاك: روان وين؟
روان: ياخسارة الميك أب
ملاك: روان لاتكذبي مو ناقصه
روان: هههههه أمزح شوي وتبكين
ملاك: والله رايقه
¤¤¤¤¤¤¤¤¤¤¤
المهم وقفوا عند مدخل الإستراحه عشان المرايات كانت
هناك وفيصل وتركي كانوا ورى باب الإستراحه
تركي أعجبه موقف ملاك وحس إنها مليانه براءه وهذا
اللي أعجبه فيها راح نادى حاتم وقاله بصوت واطي:
تركي: حاتم حبيبي أدخل وشوف مين واقف عند الباب
حاتم: تبيني أخلي الرجاجيل وأدخل عند الحريم
تركي: ههههههه لا رجال بسم الله عليك أكيد مايصير تدخل
وقاعد يحاول ويحاول فيه لين رضى يدخل
حاتم دخل وخرج
حاتم: أختي بس
تركي: أي وحده فيهم؟
حاتم: وانت وش عليك
تركي: اسأل بس
حاتم: الطويله الهبله
تركي: إي عرفتها
حاتم: مين؟
تركي: شوف حاتم أنا ما أحب الألغاز بتقولي ولا لأ
حاتم: لأ
تركي: أجل خلاص أنا زعلت منك وما عاد أبيك تكلمني
حاتم: ملاك اللي داخل
تركي: من جد؟
حاتم: إيه بس لاتزعل مني
تركي قطف ورده من عند الباب وأعطى حاتم يعطي ملاك بسرعه قبل تروح
ملاك: الله الورده هذي لي بس ليش قطفتها هذي مو لنا
حاتم: تركي اللي قطفها مو بنا
ملاك: تركي؟!!!
حاتم: الحريم شافوني يالله باي
ملاك أخذتها على طول وحطتها بشعرها وحست انه هذا الشي اللي
كان ناقصها (الورده ) وخاصه من تركي
تركي في الوقت هذا عرف ان ملاك مسامحته وفكر ياخذ
رقمها من عند فيصل عشان يتأكد وكان هذا كل همه
المهم..
ملاك كانت في أروع لحظات عمرها حست إنها بحلم
تحقق لها حست إن فيه أحد أخيرا مهتم فيها
وتقول في نفسها : والله لو ما أستحي من اللي
حولي كان صحت بأعلى صوتي

$ $$ $$ $$
$$ $ $$ $$ $$ $$
بعد ساعتين من السهره
خلود راحت مع بندر يتعشوا برا
خلود كانت مره مستحيه وخجلانه
بندر: خلود حياتي أنا الحين زوجك لاتستحي مني
خلود استحت أكثر ومو عارفه تقول شي
بندر: خلوده كلميني
خلود: .......
بندر: أموت أنا في اللي يستحون
خلود: خلاص بندر
بندر: يا نااااااس ارحموني بس
خلود: ............
بندر: حبيبتي وين مشتهيه تاكلي
خلود: على راحتك
بندر: راحتي من راحتك عمري
خلود بدلع : ههههه تسلملي

بندر وخلود عاشوا أحلى لحظات بعمرهم قبل مايرجعها
البيت الساعه ثلاث ونص بالليل بعدين رجع الشقه
فيصل: أخيرا رجعت يالعاشق الولهان
بندر: ماتصدق وش كثر فرحان
فيصل: اصبر لين يجونك عيال إن ماكرهت
اللحظه هذي ماأكون فيصل ولد حمد
بندر: شكلي أزعجتك وعطلتك عن فلمك بروح أنام أبركلي
فيصل: عدل الساعه على ثلاثه العصر الغدا مع حبيبة
القلب ولا أقول أنا و وجهي كيف أوصي حريص؟
بندر: إنت مو ملاحظت إنك ثقيل دم وملقوف
فيصل: أفااا بصراحه ما توقعتها منك يالعاشق الولهان
بندر: أقلب وجهك وكمل فلمك أخاف تجيك هستريا
فيصل: مقبوله منك
طبعا وعشانهم سهروا للصبح قاموا على صلاة العشا تقريبا
روان: اللللله ماعمري شبعت نوم مثل اليوم
راويه: أي نوم؟ شوفوا عيني وشلون صايره من حطيت راسي وانا أتقلب
ملاك مسرحه: آآآخ خساره ماكنت أبي أمس يروح كانت أحلى ليله بحياتي
راويه: ليش؟
ملاك: كان يوم ولا أي يوم يقدر يعوضني عنه
راويه؟ طيب ليش؟
ملاك: حبيت أمس أكثر من أي يوم مر بعمري
راويه: عرفنا بس لييييش؟
ملاك: هاه إنتي تكلميني؟
روان: راويه لازم تقدرين ظروف ملاك هاليومين
ملاك: أي ظروف إنتي وياها حرام الواحد يحلم
راويه: بس إنتي ماكنتي تتحلمين
ملاك: إلا كنت أحلم
راويه: أوكي أوكي على كيفك إحلمي مثل ماتبين
وشوي جت رساله على جوال ملاك
ملاك شافت الرساله وكانت من رقم غريب مكتوب فيها:
مساء الورد وآسف على الإزعاج
بس أكيد لسه قايمه من النوم صح؟
ملاك خافت واستغربت من الرساله وخاصه إنها
كانت من رقم غريب قعدت تفكر
وتتذكر مين أعطت رقمها بالملكه لكن مافي أحد أعطته
رقمها واللي خلاها تخاف أكثر
كيف هالشخص عرف إن توها قايمه من النوم! أسئله تدور
وتدور براسها لكن للأسف ما لقت لها أي جواب
سمر: ملاك فيصل يقول وش مشتهيه عشى؟
ملاك: أي شي أي شي
سمر: كيفك!
ملاك بنفسها تقول: ياربي مين هذا لايكون فيصل لا لا... فيصل
كل مايغير رقمه يخبرني
طيب مين أكيد فيصل إيه فيصل وحب يسوي مقلب
فيني أنا متأكده إنه هو بس أخاف أظلم الولد
خلاص أحسن شي أطنش ولا كن شي صار والرساله
هذي بأمسحها يمكن جتني غلط!
وبعد شوي جتها رساله ثانيه مكتوب فيها:
أعتذر إذا خوفتك أو حيرتك أو بالأحرى فاجأتك وأرجوا
تقبلي إعتذاري وآسف مره ثانيه إذا أزعجتك
هنا ملاك قلبها قاعد يرجف من الخوف وقعدت متردده
ترسله برساله عشان تعرف مين أو تطنش
تركي قاعد ينتظر رساله منها بس ماجته أي رساله
وقعد ينتظر وينتظر بس مافيه فايده وفكر يدق عشان يسمع صوتها
ودق جوال ملاك
ملاك: ياربي مين هذا اللي مزعجني أخاف وحده تعرفني
ومسويه مقلب فيني عشان تخوفني بس لو أعرف مين !

تركي حس إنه زودها شوي بس كل اللي كان همه تحس فيه لو برساله فاضيه

تركي دق جواله
تركي: هلا
فهد: وينك يالدب لا عاد تتصل ولا تسأل
تركي: حرام عليك حطيتني أنا إللي ما أتصل أو أسأل
فهد: ما أدري عنك نسيتنا مره وحده
تركي: ماعاش إللي ينساك
فهد: إنزين أنت فاضي الحين؟
تركي: آمرني
فهد: ضايق خلقي وودي أشم هوا وشرايك نخرج
تركي: أوكي أنتظرني على مابال أبدل وأمرك
فهد: أوكي أنتظرك

فهد وتركي راحوا مطعم يتعشوا وبعدين ركبوا
السياره وقعدوا يلفلوا بالشوارع ويتمشوا شوي
تركي: فهد أنا حبيت
فهد: كنت عارف إن مصيرك تعترف
تركي: مو مصدق وشلون قلت هالشي بس والله مو قادر
أخبي هالإحساس أنا فرحان فرحان
فهد:........
تركي: تصدق إن آخر شي كنت أفكر فيه هو الحب
بس بين يوم وليله صرت ضحيته
أحس الدنيا صارت تضحكلي تصدق صرت احسها
كل ماتشوفني تبتسم لي وتناديي
فهد: الحب يكون بفرح بس معاه حزن يكون
بسعاده بس لازم يكون فيه تعاسه
الحب مثل الهوا بأي نفخه يطير بس مانقدر نعيش من غيره
أهنيك ياتركي
تركي: على وشو؟
فهد: على طريق العذاب اللي بديته
تركي: وتهنيني؟
فهد: وإذا ماهنيتك أهني مين؟ههههههه
تركي: صدقني معها كل شي يهون
فهد: إنت ياتركي!!!! عمري ماتخيلتك في يوم من
الأيام تكلمني عن الحب بالذات
تركي: ولا أنا... بس هي مو حاسه فيني ولا داريه عني
وكل ماحاولت أقرب منها أحسن إني أبتعد أكثر
فهد : بسيطه يارجال الحل عندي
بس نفذ اللي أقولك بالحرف
تركي: متأكد؟
فهد: أفا عليك تشك فيني؟
تركي: ورينا يا قيس
فهد: معاك رقمها؟
تركي: أكيد معي
فهد: تعرف رقمك؟
تركي: ما أظن
فهد: أوكي.. إرسلها رساله على جوالها واكتب فيها:
ولا أقول خليها فاضيه
تركي: وليش فاضيه؟
فهد: إنت أرسل وبعدين بقول لك
تركي أرسل رساله فاضيه لملاك
ملاك:ياربي وش بيفكني الحين
¤¤¤¤¤¤¤¤¤
تركي:وش رايك أرسلها رساله ثانيه؟
فهد: لا يالخبل إنتظر شوي
تركي:ما ادري ليش حاس انك بتورطني بس وش تقصد بالرساله الفاضيه
فهد: مدري جت على بالي
تركي: جت على بالك ؟ طبعا مو إنت الخسران
فهد: مدري عنك وش منتظر للحين
تركي: وش تبيني أسوي؟
فهد: روح قولها إني أحبك عبرلها عن مشاعرك تصرف بس لاتعذبني معاك
تركي:......
فهد: إسمعني إنت تحبها من زمان وقاعد تعذب نفسك
والقهر! إنك ماتدري هي تحبك أو لأ واسمحلي أقولك
شي إنت غبي لأن المفروض من زمان قلتلها
تركي: أنا جربت وخبرتها بس هي موراضيه تحبني
فهد: جرب مره ثانيه وثالثه ورابعه حتى تقتنع
الحب مو سهل وماتحصل عليه من مره وحده
تركي: صعب يافهد
فهد: مافي شي صعب في الحب
تركي أرسل رساله لملاك وكتب فيها: ملاك أحبك أحبك وربي أموت فيك
ملاك أنا تركي وخلي كل الناس تعرف بس إنتي تحبيني ولا لأ

ملاك شافت الرساله وقالت لنفسها حتى متى أخبي... أنا بعد أحبه
وأرسلت رساله لتركي وكتبت فيها:
تركي من شفتك مافارقت تفكيري كيف ما تبيني أحبك

تركي: أنا في حلم أو علم هذا رقمها يافهد والله رقمها

صدق إن الحب عذاب ومايفرق بين صغير أو كبير
وعمره ماكان لناس معينين أو في زمن محدد
بدايته صعبه ونهايته أصعب
الحب يلعب بمشاعر صاحبه لين يكسبه أو يخسره
الحب يتحدى كل قلب يدخله عشان يشوف هو يتحمل أو لأ

ملاك ما كانت عارفه إن اللي سوته صح أو
غلط بس ماكان يهمها..
أهم شي إن تركي إعترف لها وهذا الشي يسوى
الدنيا ومافيها كان تفكيرها طول الوقت بتركي واللي صار
حتى تركي نسي نفسه واللي حوله لأن الشي
اللي يدور عليه من زمان تحقق أخيرا
ملاك تقول لنفسها: ياربي أنا وش سويت ليش أرسلت
وليش هو أرسل صحيح أنا حبيته من شفته بس مين الغلطان فينا؟
تركي رجع فهد بيته وقعد يفكر بالطريق: وأخيرا
ياملاك أخيرا قلتيها بس مو صدق حتى أشوف بعيني
تركي راح الشقه ودق على فيصل: فيصل أكيد توك قايم من النوم
فيصل: ياساحر كيف عرفت؟
تركي: أكيد ماتعشيت
فيصل: الحقيقه لأ
تركي: عازمك وعلى حسابي
فيصل: صاروخ أبدل وأكون عندك
تركي: ههههههه ياحبك للأكل وياليته يأثر فيك
فيصل: هههههه باي
تركي: باي
في السياره
فيصل: أشوفك فرحان شوي وتطير
تركي: اليوم غيييييير أحلى يوم بحياتي
فيصل: فرحني معاك
تركي: ودي لكن بخليها بقلبي لين يجي وقتها
فيصل: ومتى وقتها؟؟
تركي: قريب
فيصل: متى نوصل المطعم بطني بيتقطع من الجوع
تركي: فيصل ابسألك سؤال وجاوبني بصراحه
فيصل: أتعشى ويصير خير
تركي: على راحتك
فيصل:ههههههه آسف بس الجوع لاعب لعبه ببطني.. فيه شي مهم
تركي: لا بس شي صار لواحد من خوياي وحبيت أساعده
فيصل: شي مثل وش؟
تركي: يعني تقدر تقول شي شخصي
فيصل: إنزين تتوقع أقدر أحله يعني؟
تركي: أصلن إنت الكل بالكل في هالموضوع
فيصل: أنا !
تركي: لا لا إنت مالك شغل
فيصل: الحمد لله والشكر وشفيك.. إنت تعبان حاس بشي
تركي: تصدق والله ما أدري بايش أحس ودي أصارخ وأصارخ لين أصدق اللي صار
فيصل: طيب وش رايك أصكك بكف يمكن تصدق
تركي: مشكور أعرف إنك
ماتقصر
فيصل: العفو بس صدقني يبيلك كفوف مو كف واحد
تركي: قدامي بس لا يكثر بأسامحك هالمره لأني عارف بتملي بطنك وتروق
فيصل: هذا الكلام
¤¤¤¤¤¤¤¤
اليوم الثاني الساعه 7 المغرب
أم بندر: بندر وينك؟
بندر: هههه بعدين يمه بعدين
أم بندر: إيييييه قول كذا من يومها وانت مختفي ماعد نشوفك
بندر: ههههه تبين مني شي
أم بندر: ههههههه لا أخاف نزعجك
بندر: لا استغفر الله إنتي تامرين أمر
أم بندر: أبي سلامتك بس وانتبه لنفسك ولخلود انزين
بندر: وخلود توصيني فيها؟
أم بندر: الله يديمكم لبعض انشا الله
بندر: ويديمك لنا
أم بندر: ومتى بتردون؟
بندر: شوي ونرجع
أم بندر: أجل شوي شوي في الطريق
بندر: انشا الله
أم بندر: فمان الله
خلود: بندر وش رايك بكره نروح نختار كروت
بندر: حبيبتي رايي دايما من رايك إنتي المفروض بس تتأمرين
خلود: ههههه تسلم ياقلبي
بندر: أموت بهالضحكه
خلود حمر وجهها وماعاد عرفت ترد
المهم وبعد هالروووومنسيه رجعها البيت
وفي نفس الوقت دق فهد على تركي: ألو
تركي: هلا
فهد: مابغيت ترد
تركي: آمر
فهد: شكلك ناسي عزيمة الوالده
تركي: وش دعوه إنت على الراس والعين
فهد: حبيبي والله... وتراها بكره تجي إنت وأهلك ما
أوصيك الأهل كلهم والا إنت وش نبي فيك هههههههه
تركي: ههههههه إبشر ما عاد أوريك رقعة وجهي من اليوم ورايح
فهد: يكون أحسن على الأقل نشم شوية هوا أربعه
وعشرين ساعه مجاملني ههههههههه
تركي: ههههه هذا جزاتي صدق من قال حزاة المعروف سبعه كفوف
فهد: ههههههه أهم شي لا تنسى زي ماتفقنا بكره أوكي
تركي: أكيييييد اليوم أمك خبرت عمتي
فهد: هذا إذا مو الخبر عند عمتك من زمان
تركي: إيه والله وأنا آخر من يعلم
فهد: أفاااا ههههه
تركي: ههههههه
فهد: تبي شي
تركي: تسلم
فهد: إنزين فمان الله
تركي: فمان الله

في الوقت هذا تركي كان يفكر وشلون يكلم ملاك ويعبرلها عن مشاعره
لكن الرساله اللي جته قطعت حبل أفكاره وكانت من ملاك:
تركي أرجوا إنك ماتفهمني غلط على اللي صار

تركي أرسلها:
أفهمك غلط!! أنا ماصدقت توصلني منك
رساله بعدين إنتي ليش معتبره إن حبك لي غلط ؟
صدقيني ياملاك لو شاكه في حبي لك أنا
مستعد أسوي أي شي عشان تصدقين
وتعرفي إن اللي يحبك بيخاطر بكل شي عشانك
ملاك أنا أبيك وشاريك
صحيح استعجلت بس حبي لك أقوى من كل شي وكل ماشفتك
أحس إن عيوني ماتبي فرقاك لحظه وحده
أرجوك ياملاك لاتعذبين قلب طول عمره عاش
وحيد بإنك تحرمينه من الحب اللي تمناه طول حياته
وإنت حبه الأول والأخير
أنا عارف إن ودك تقولي اللي بقلبك بس مو قادره لأن
عيونك فاضحتك من شفتيني أول مره وهذا اللي خلاني أتأكد
ملاك وربي أحبك و مالي حياة بعيد عن لقياك

ملاك قرت الرساله وكتبت اللي بقلبها :
أحيانا مانشوف الدنيا مثل مانبي وكمان ماتكون مثل مانشوف
مثل الحب مايكون باليد لأن القلب هو اللي يختار
وأحيانا نتعذب لأجل الحب ونندم إن في يوم حبينا
تركي حبك الصادق لي خلاني أحبك فوق الحب اللي كان في قلبي لك
كل يوم يزيد حبك في قلبي وأحاول أخفيه وأنا متأكده إن قلبي مايبي غيرك

نظراتك ياملاك لي تسوى الدنيا ومافيها وكافي علي أحس بحبك وسط قلبي
ودي أهرب فيك لأبعد مكان وأبعدك عن عيون الناس عشان ماحد يشوفك
لأنك لي وبس وخليهم يقولوا عني أناني مايهمني أي شيئ دامي مجنونك

تأكدي ولد عمك غير كل هالناس
دامك بقربي ماراح تحتاجي لأي أحد

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 13
قديم(ـة) 07-01-2009, 09:53 PM
صورة عرفت الشوق الرمزية
عرفت الشوق عرفت الشوق غير متصل
©؛°¨غرامي مشارك¨°؛©
 
الافتراضي رد: كنت ابيها بس القدر كان اقوى


الله يعطيك العافيه ومشكووره
روعه هالروايه وكملي لنا الأجزاء
الله يسعدك

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 14
قديم(ـة) 07-01-2009, 10:06 PM
عآشقه من بعيد عآشقه من بعيد غير متصل
©؛°¨غرامي جديد¨°؛©
 
الافتراضي رد: كنت ابيها بس القدر كان اقوى


ربي يسلمك رائع ـه

لآنم ـل من قلم الفواح

سـلآمـ

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 15
قديم(ـة) 08-01-2009, 02:59 PM
سويت girle سويت girle غير متصل
©؛°¨غرامي جديد¨°؛©
 
الافتراضي رد: كنت ابيها بس القدر كان اقوى


(الجزء الخامس)
تعالي ننسى الماضي واللي كان
ننسى الزمن اللي الأحلام فيه أوهام ننسى دروب عشناها
من الأسى والحرمان تعالي نروح زمان الكل يحس فيه بالأمان
نشوف دنيا ثانيه ونودع أيام النكران نرمي
آلامنا عند ناس زرعوها فينا ونطلق صرخاتنا حتى نكون أحرار
نبني حياتنا بالحب بعيد عن الكتمان ونعيش غير هالناس
لا خوف لا يأس لاكره ولادموع الأمس
تعالي ندور مكان غير هالمكان فيه نكون بعيد عن هالعالم والناس
وفيه تكون حياتنا كلها مشاعر وإحساس نعيش لبكره ونحقق أمانينا ونودع ماضينا
لأن الحياة كلها يومين يوم فرح ويوم حزن ليش نقضيها كلها أحزان....


اليوم الثاني
دقت ساره على ملاك الساعه 5 العصر
ملاك: أهلين
ساره: أخبارك
ملاك: تمام
ساره: إنتوا طالعين مكان اليوم؟
ملاك: أكيد .. ليش؟
ساره: قولي غيرها
ملاك: إيه والله تبين شي
ساره: من أمس وعمتي تكلمني عن عزيمة صديق تركي وإن لازم أروحها
ملاك: طيب روحيها
ساره: مابي أروح لوحدي
ملاك: طيب كلمي سمر يمكن تروح وياكم
ساره: كلمتها بس طلعت خاينه رفضت تجي
ملاك: أوكي أكلمها وأقنعها وأتصل عليك
ساره: وإذا رفضت
ملاك: لا تستعجلي
ساره: أوكي باي
ملاك: باي

ملاك: هذا جزاة البنت تبيك معاها
سمر: ما أحب أروح عند ناس ما أعرفهم
ملاك: طيب روحي عشان خاطر ساره مسكينه ماتبي تكون وحدها
سمر: بابا وعدني اليوم يشتري لي موبايل جديد وأبي أختاره بنفسي
ملاك: سمر حرام عليكي الموبايل يتأجل
سمر: وليش ماتروحين إنتي معاها
ملاك: ساره تبيكي إنتي مو أنا
سمر: آسفه
ملاك: وش أقول للبنت الحين والله فشله
سمر: روحي إنتي وفكينا
ملاك: طيب ياسمر شغلك بعدين
سمر: هالشي بيني وبين ساره
ملاك: والله نذاله عيني عينك
سمر: موبايلك يدق
ملاك : أكيد هذي ساره ياربي وش أقول لها

ملاك: هلا ساره
ساره: بشري
ملاك: تقول إنها مررره تعبانه وهي صادقه كل شوي بالتواليت الله يعزك
ساره: لو قولتولها مشينا السوق
يروح تعبها
ملاك: هههههههه
ساره: أصلاً مو لازم تجي تعالي إنتي
ملاك: إبشري حبيبتي ما راح أردك وسمر شغلها معاي
ساره: تسلمي والله إنك حرمه
ملاك: ماصدقتي ههههههه مين بيوديكم
ساره: تركي
ملاك: والسواق؟
ساره: عمي مستلمه هاليومين
ملاك: أوكي أنتظركم
ساره: أوكي باي
ملاك: باي يا عسل
بشوف تركي واااااااااااي
بشوفه ياربي والله حبيته من جد
وقامت تغني هالأغنيه
حبيت أيامي بيك وبعشها ليك ولا عمري حبيت من
قبليك طيب أنسى ليه وأنا أد إيه كلمت نفسي عليك دنا ليك

سمر: هالكثر فرحانه
ملاك: بسم الله من وين طلعتي
المهم..
ملاك كلمت أبوها عشان تروح العزيمه و وافق لها
مروا عليها الساعه 8 بعد صلاة العشا
في السياره كان تركي كل شوي يناظر ملاك بس هي
ماكانت منتبهه أرسلها رساله مكتوب فيها:
عيونك أحلى عيون في الدنيا
ملاك ناظرت المرايه ولمى تقابلت عيونها
بعيون تركي إبتسم وغمزلها
طبعا إستحت وغطت عيونها بسرعه
(في بيت فهد) في مجلس الحريم
أم فهد تكلم بنتها: شوفي البنت اللي جت مع أم سلطان
(سميه أخت فهد الكبيره)
سميه: ماشاء الله تجنن
ام فهد: إسمها ملاك صح
سميه: إيه بأول كليه
أم فهد: وش تدرس؟
سميه: تقول إنها تدرس حاسب
أم فهد: ماشاء الله بس شكلها مو ساكنه في الرياض؟
سميه: ما أدري بروح أسألها

سميه: ياحيا الله ملاك منوره حبيبتي
ملاك: النور بوجودك
سميه: ماشا الله عليك تدخلين القلب بسرعه
ملاك: والله وإنتي كمان حبيتك من شفتك
سميه: تسلمين ياقلبي.. إلا إنتي ساكنه في الرياض
ملاك: لا في الشرقيه
سميه: في أي منطقه
ملاك: بالخبر
سميه: إييييه حبيت أسأل بس
ملاك: خذي راحتك
سميه: مشكوره ياقلبي
ملاك: العفو
سميه: إنتي أكبر وحده؟
ملاك: إيه
سميه: ماشا الله عندك أخوان صح
ملاك: إحنا ثلاث بنات وولدين
سميه: ماشا الله .... عن إذنك أمي تناديني
ملاك: إذنك معك

ساره: غريبه
ملاك: ليش؟
ساره: سميه ماتسأل هالأسئله إلا إذا عندها شي
ملاك: أحسه شي عادي
ساره: لا حبيبتي إنتي ماتعرفينها مثل ما أنا أعرفها
ملاك: ههههههه الله يستر والله خوفتيني


فهد: تركي ليش قاعد كذا
تركي: وشفيني؟
فهد: شي من الإثنين يا إما سرحان أو العشى مثقل عليك
تركي: والله ياطبيت طبه بالمفطح على كيف كيفك
فهد: هههههههه بالعافيه
تركي: الله يهداكم بس وش اللي بيقومني ألحين
فهد: والله لو ماوراك أهل توديهم البيت كان قلتلك نام عندنا
تركي: ماتقصر والله بس زي ما إنت عارف وراي دوام الصبح
فهد: الله يعينك

ملاك رجعت البيت من العزيمه حوالي الساعه وحده
وقعدت سهرانه كالعاده مع البنات للفجر صلوا
وناموا لكن ملاك ماجاها النوم
تركي كان ويا فيصل بالشقه الثانيه سهرانين على ألأفلام للساعه 9
وأبو فيصل وأبو بندر كانوا قايمين من النوم
عشان يروحون المزرعه عند أبو سلطان
أبو فيصل: أصبحنا وأصبح الملك لله
فيصل: مو كأن هذا صوت أبوي
تركي: إي والله صوت عمي
فيصل: والله إن جى بيسويلنا سالفه
تركي: طفي النور بسرعه كأننا نايمين
فيصل: جبتها والله

أبو فيصل دخل عليهم الغرفه وولع النور
أبو فيصل: فيصل تركي قوموا عشان تجون معانا
فيصل: .........
تركي: ..........
أبو بندر: خليهم يرتاحون شكلهم تعبوا من مشاويرهم أمس مع أهلهم
أبو فيصل: إيه والله بلاهم ماكان عرفنا شنسوي
أبو بندر: الله يوفقهم انشا الله

فيصل: هههههااااااااي مشت عليهم
تركي: هههههه والله إنك داهيه
فيصل: شوف الناس اللي تفكر
تركي: إنت تفكر!
فيصل: شوفوا مين اللي يتكلم
تركي: تكفى يا إنشتاين

ملاك دقت على فيصل
ملاك: فيصل إنت نايم ولا صاحي
فيصل: نايم
ملاك: ها ها سامج
فيصل: ما أدري عنك شوفي سؤالك بالأول
ملاك: خفت إنك تكون نايم وأزعجتك
فيصل: آمري
ملاك: جوعاااااااانه
فيصل: طيب شوي شوي لاتاكليني
ملاك: والله من جد أبي همبرقر
فيصل: إنتي صاحيه أي مطعم في هالوقت يبيع همبرقر؟
ملاك: أي بوفيه على الطريق تبيع
فيصل: روحي نامي أصرفلك
ملاك: همبرقر وبطلت جيب ساندويش جبنه
فيصل: بأطلع الحين أشتري تميس وقلابه تبين تاكلين ولا نامي جوعااااااانه
ملاك: عديم إحساس
فيصل: إحمدي ربك
ملاك: وأنا قلت شي الحين
فيصل: شوفي إذا تبين همبرقر حلي هاللغز
ملاك: أوووووف أنا الملقوفه اللي دقيت عليك
فيصل: زين يوم عرفتي نفسك
ملاك: ثقيل دم .. وقفلت الخط
فيصل: بنات آخر زمن

تركي: علامك على البنت
فيصل: أمش نروح نجيب فطور
تركي: كلها تميس وعلبة قلابه مو قادر تجيبهم وحدك
فيصل: هذا جزاتي إني خفت عليك تقعد بالشقه وحدك
تركي: تلايط بس


ملاك كانت مره جوعانه ومو قادره تصبر فكرت تتصل على فيصل
و تسأله ليش تأخر لكن فيصل كان ناسي جواله بالشقه
طبعا تركي إنتبه وشاف جوال فيصل لكن ماكان يبي يتدخل ويرد
لأن فيصل كان مسجل إسم ملاك بإسم ولد عشان إذا واحد
من خوياه فتح الجوال مايشوف إسم أخته
المهم دق الجوال مره ومرتين بس آخر مره قرر
يرد ويقول إن فيصل مو موجود
ملاك: فيصل وينك تأخرت
تركي: ......
ملاك: ألو... فيصل
تركي:..... ملاك
ملاك: لا خيالها فيصل بسرعه عاد مو قادره أصبر اكثر من كذا
تركي: فيصل نسي جواله وأنا تركي
ملاك: وانت وشلون ترد؟
تركي: لحظه ملاك لاتقفلي الخط
ملاك: ..........
تركي: ملاك مو ذنبي حبيتك
واليوم راح تشوفي وش بأسوي
ملاك: لاتزودها معاي
تركي: فديت هالصوت
ملاك: قفلت الخط
تركي: ياربي ماصدقت أكلمها ليش هي تسوي فيني كذا
ملاك: يارب استر والله
ما أستبعد عن تركي أي شي من عرفته وهو متهور ومجنون
ياربي هذا وش بيسوي؟



العصر كانت أم فهد تكلم فهد بموضوع الزواج
أم فهد: والله يافهد لقيت لك عروس تاخذ العقل
فهد: يمه خلاص إحنا تكلمنا في هالموضوع
أكثر مره وأنا شايل فكرة الزواج من راسي
أم فهد: ياوليدي إنت كبرت وصرت فاهم و
واعي وجى الوقت اللي لازم نفرح فيك
أنا مابي منك غير أشوفك مع زوجتك وعيالك قبل أموت
فهد: ليش تقولي كذا الله يعطيك طولة العمر
وتشوفين أولاد أولادي انشا الله بس لاتاخذي في خاطرك مني
صحيح جى الوقت اللي أتزوج فيه بس أنا الحين مو حاط هالفكره براسي أبد
أم فهد: بس إنت من تشوف هالبنت بتغير رايك وتقول أمي قالت
فهد: بس يمه حاولي تــ.....
أم فهد: لاتقول أي شي الوقت قدامك طويل وتقدر تفكر براحتك
فهد: خلاص يمه اللي يريحيك أنا بفكر وأحاول اتخذ القرار الصح
أم فهد: لا تحسب إني قاعده أثقل عليك صدقني
كل اللي أسويه في مصلحتك وإنت عارف هالشي
فهد: وربي مو مقصره معاي بشي ولو ألقى
بنت بنص موصفاتك والله أتزوجها بدون تردد
أم فهد: الله يخليك لي



العصر دقت أم فهد على أم سلطان عشان
تكلمها بموضوع زواج ولدها فهد
وإنها بتخطبله بنت أعجبتها وحبت تاخذ
راي أم سلطان خاصة إن لها علاقه
بالموضوع

أم فيصل: صراحه لميس معاها حق يحيى غلطان
أم بندر: إيه والله زودها مع سحر
أم فيصل: ياويلي شوفي أشكالهم ولبسهم
وأجسامهم ما ألوم رجالنا يوم ياخذون تركيات
أم بندر: من يوم عرضوا هالمسلسلات
وعيونهم تبققت ما كأننا مالين عيونهم
أم فيصل: إيه حبيبتي هذي تركيا وحريمها الله يستر بس

حاتم: مااااماااا
عبدالله: ماااااااااما
حاتم: ماما تعالي بسرعه
عبدالله: بسرررررعه ياماما

أم فيصل: ياربي وشفيهم يصارخون!!
أم بندر: الله يستر والله ما أدري


أم فيصل: وش فيه؟
أم بندر: وش صار ؟
حاتم: مافيه شي ماما
أم فيصل: وشلون مافيه شي والصراخ اللي كنتوا تصارخونه؟
أم بندر: عبودي تكلم وش صارلكم؟
عبدالله: كنت أتحدى أنا وحاتم عشان نشوف مين فيكم تجي أسرع
أم بندر: الللله يقطع بليسكم
أم فيصل: مو عيب عليكم
أم بندر: والله مايستحون الحين فاتنا المسلسل
أم فيصل: والله لو عدتوها مره ثانيه شوفوا وش راح أصلح فيكم



راويه: يا ألله مليت من هالحاله..
ليش صار كذا...طيب يا عبدالرحمن شوف وش بأسوي فيك..
.عبودي ليش تاخذ أغراضي....رواااااان ابعدي عني.. بندر ليش تزوجت


ملاك: ياربي هذي كل يوم على نفس الشي
روان: وتلوميني لما أبي يكون لي غرفه لوحدي بعيد عن هالمجنونه
سمر: شوفولها حل أبي أناااام
ملاك: إنتوا وش تسون فيها طول ماهي نايمه تخاصم وتهدد
روان: إسأليها يمكن تكون بالعه مسجل
ملاك: ههههههههههههههه
واااااااي شوفوا الساعه قوموا بسرررعه بابا دق علي أكثر من مره

كانوا رايحين يتمشوا مع أبو فيصل وأبو بندر في منتزه كبييير بداخله ملاهي

في السياره...
سمر: ألو
ساره: خير
سمر: أعصابك
ساره: وشتبين؟
سمر: وش دعوه
ساره: خلصينا مشغوله
سمر: ساره وش فيك؟
ساره: مو داريه يعني
سمر: لا
ساره: إذا تذكرتي وش سويتي دقي علي
سمر: على العموم دقيت عليك أبيك تجي معانا الملاهي
بس شكلي دقيت في وقت غلط مع السلامه
ساره: الملاهي!!!
سمر: إيه!
ساره: ومعاكم؟!!
سمر: إيه!
ساره: واااااااااو وناااسه
سمر: طيب و.......
ساره: استنوني الحين جايتكم باي
سمر: باي

ساره قالت لعمها واستأذنت عشان تروح معاهم مع السواق
لأن تركي كان مع فهد

المهم تركي عرف إنهم في الملاهي وراح لهم

ساره: سمر تعالي نلعب هالعبه
سمر: بس هذي تدوخ
ساره: يعني ماجت إلا على هاللعبه
ركبوها بس سمر حست إنها دايخه شوي وجا في بالهم من اللعبه
وهي تمشي رايحه تقعد على الجلسات حست إن الدوخه زادت
تركي كان داخل ومو عارف هم وين بس لما شاف سمر بطريقه سألها:
تركي: كيفك سمر؟
سمر: بخير انت كيفك؟
تركي: الحمد لله.... شكلك تعبانه
سمر: أبي أجلس
تركي: تعالي نروح هناك
بس سمر ما أمداها تجلس لأنها طاحت بوسط الطريق
تركي دق على فيصل بس ماكان يرد إنتبه للناس كانوا كلهم يناظرونهم
قام شالها ووداها السياره وحاول يقومها بس ما فيه فايده
واتصل مره ثانيه وثالثه وفي الأخير دق على ملاك
ملاك:......
تركي: ملاك اسمعيني
ملاك حست إنه كان متضايق وباين على صوته الخوف
ملاك: تبي شي
تركي: فيصل قريب منك
ملاك: لأ ليش
تركي: سمر أغمي عليها وأدق عليه مايرد
ملاك: وينها الحين!!
تركي: عندي بالسياره
ملاك: بدور فيصل وأجي الحين
تركي: بسرعه

ملاك دورت فيصل ودقت عليه بس ماكان يرد وكان المكان اللي هيه فيه بعيد
وماقدرت تروح عند أمها وتخبرها أو تخبر أحد فقررت تروح عند سمر

تركي: ملاك وين فيصل
ملاك: الحين وين سمر...
سمر حبيبتي قومي .. الله يخليك ردي علي..تركي سمر ماترد علي ودينا المستشفى
تركي: طيب طيب يلا إركبي السياره
في المستشفى.. في قسم الطوارئ
ملاك: وين تاخذونها
تركي: ملاك إصبري شوي
ملاك: أنا السبب أنا اللي ما اهتميت فيها لما جت تقول لي
تركي: ملاك خلاص اللي صار صار وانشا الله مايكون فيها شي
ملاك: انشا الله
وقعدت تبكي وتبكي وتركي يهدي فيها بس مارضيت تهدى
طلع الدكتور وكلمهم
الدكتور:إنت أخوها
ملاك: أنا أختها
الدكتور: لازم تتنوم عندنا في المستشفى
تركي: سمر وش فيها؟
ملاك: ليش؟؟
الدكتور: عندها مرض مزمن وخطير
ملاك: بس سمر ماكانت تشتكي من أي شي
الدكتور: يمكن كانت تعاني بس ماكانت تقول لأحد وهذا اللي خلى حالتها تدهور
تركي: والحين وش مطلوب منا
الدكتور: فيه أوراق لازم تعبيها
عشان الإجراءات

ملاك: ياربيييي وش أقول لأهلي الحين
تركي: خلاص ملاك خلينا نرجع البيت ونقول لهم
ملاك: إنت روح وأنا بانتظر فيصل يجي ياخذني
تركي: آسف والله نسيت
آخ ياملاك متى نكون مع بعض
ملاك:.......

تركي حب يخفف عنها بس ملاك طول الوقت تبكي وتتحسف
تركي: أنا ماراح اخليك حتى يجي فيصل
ملاك: لا روح كفايه تعبك معانا
تركي: تعبكم راحه
وشوي دق فيصل
تركي: هلا
فيصل: ياخي ملاك وسمر مالقيناهم
تركي: ملاك وسمر معاي
فيصل: معك؟؟
تركي: لما تجي راح أقول لك بالسالفه كلها واذا سألك أحد قول لهم إنك رجعتهم
فيصل: طيب وينكم الحين؟
تركي: في المستشفى
فيصل: أي مستشفى؟؟

المهم فيصل راح وأخذ ملاك ورجعها
ولمى عرفت أم فيصل بالسالفه ماصدقت وأغمى عليها
أبو فيصل راح للمستشفى وكلم الدكتور وبعدين خبر أم فيصل بالسالفه
وبرضه ماصدقت بس حاول يقنعها ويفهما إن كل شي مقدر ومكتوب
وانها لازم ترضى وتقتنع
في اليوم الثاني راحوا المستشفى عند سمر وتطمنوا عليها
تركي دق على فيصل لأنه حب يتطمن على سمر
وأهلها كانوا يتناوبون على النوم عندها
وكان كل يوم يجي الدور على وحده وأخيرا جى دور ملاك
ملاك جلست تتأمل الغرف كان كل شي فيها أبيض
حتى الأرض.. حست بالبروده والخوف في نفس الوقت
ماتسمع صوت غير صوت جهاز دقات قلب أختها
كانت تناظر سمر والدمعه على خدها وتذكرت وشلون
كانت سمر والضحكه اللي ماتفارقها
واشلون كانت ماليه البيت والحين على
هالكرسي وفي هالمكان البارد وحدها
والألم اللي سكن جوفها من زمان وماخبرت أحد عشان مايتضايق
آآه ياسمر وشلون قلبك كبير
وكيف تخلي الواحد يحبك وتدخلين قلبه من يشوفك
ليش ياسمر لييش.. حرام اللي سويتيه بنفسك وربي
حرام ليش تبين تحرمينا من شوفتك
ياليت اللي فيك فيني....

غفت ملاك بعد ليله سهرتها في دموع وحزن على إختها
وقامت على فتحة الباب الساعه 8 الصباح كانت الممرضه تبيي تشوف سمر
النيرس: قود مورننق
ملاك: قود مورننق
النيرس: آر يو سليب؟
ملاك: آي ترايد بت آي كانت
النيرس: أوو آي نو ذا باد اتز نو كامفارتبول
ملاك: آي ثنك
النيرس: إز سمر يور سستر؟
ملاك: يس
النيرس: آر يو هنقري؟ آر يو ونت بريك فاست؟
ملاك: نو ثانكس بت آم فري ثرستي
النيرس: أوكي جست ون ساكند
أوكي
ملاك: ثانكس
بعد ماجابت لها الماي سألتها عن فطور سمر وقالت لها بتجيبه ع الساعه 10
المهم صحت سمر ونادت ملاك
سمر: ملاك
ملاك: آمري
سمر: ملاك ماعد أحس برجلي
ملاك: حبيبتي إنتي باقي تعبانه نامي شوي
سمر: ملاك وربي ماعد أحس برجلي
ملاك: يمكن عشانك تعبانه إرتاحي ونامي ولما تقومي بتخفي أكيد
سمر: بس أنا ابي التواليت ومو قادره أقوم
ملاك: طيب حركي رجلك
سمر: مو قادره وربي مو قادره
ملاك خافت ودقت الجرس وجت اللي في الإستقبال
الممرضه: ناديتوني ؟
ملاك: ممكن تطلبي الدكتور؟
الممرضه: ابشري
وشوي جى الدكتور وكشف على سمر وسوى لها
أشعه واكتشف إن عندها شلل نصفي
لأن المرض جاها فجأه وكان قوي عشان كذا أثر عليها وانشلت

سمر: يعني خلاص ماعد أقدر أقوم على رجولي؟ كل شي راح حتى أحلامي ؟
طيب والمدرسه وصديقاتي ماعاد بشوفهم؟
ملاك مو مصدقه اللي صارلي أنا ماانشليت سمعتوني أنا بمشي وراح تشوفون كلكم
ملاك اخذت سمر بحضنها والدمعه بعينها كانت حزينه على اللي صار لاختها بس ماتقدر تسوي لها شي


سمر بعد اسبوع طلعت من المستشفى تحت الملاحظه لأنها مارضيت تقعد فيها
زواج بندر كان بعد اسبوعين والكل كان محتار بين حالة سمر وزواج بندر

سمر في البدايه ماقبلت بوضعها وحالتها النفسيه تدهورت أكثر
بس حاولوا يقنعوها باللي صار حتى أقتنعت
بعد اسبوع..
فيصل: ابيك ضروري بسالفه
ملاك:خير انشا الله
فيصل: بصراحه فيه سالفه محيرتني وابي اقول لك عليها
ملاك:اوكي شوي واجي لان سمر محتاجتني الحين
فيصل:اوكي

ملاك: وش السالفه اللي بغيتني فيها؟
فيصل: الموضوع اللي بقول لك عليه ابيه يكون بينا
ملاك:افااا سرك ببير
فيصل: ملاك انا احب.........
ملاك:غريبه!!!!! فيصل يحب!!!
فيصل: ليه ماعندي قلب
ملاك: هههههه امزح معاك وشفيك
فيصل: ابيك تساعديني
ملاك: انا؟؟!
فيصل: يعني امشي
ملاك: لحظه ماقصدت...بس مين اللي حبيتها
فيصل:روان
ملاك:روان؟!
فيصل: كنت حاسس انك راح تستغربي بس وربي احبها
ملاك: فيصل انت عارف ان روان اكبر منك
فيصل: بس احبها مهما يكون
ملاك: وش المطلوب مني
فيصل: ابيك تخبريها
ملاك: ما اقدر
فيصل: مشكوره ماقصرتي
ملاك: لحظـــــ...........
فيصل: على العموم ارجو انه يكون بينا
ملاك: فيصل انا لما رفضت مو قصدي ما اساعدك
قصدي تخبرها بنفسك
فيصل: ما قدرت اواجها طول عمري والحين تطلبي مني هالشي
ملاك: لازم تقول لها في يوم من الايام
فيصل: مستحيل هالشي يصير
ملاك:اذا انتظرها تفكر فيك
فيصل: طيب قوليلي وش اسوي والله تعبت
ملاك: كلمها
فيصل: ما اقدر
ملاك: اذا انتظر
فيصل: ملاك تكفين ساعديني
ملاك: اوكي بس بشرط
فيصل: آمري
ملاك: كل اللي اطلبه منك تنفذه
فيصل: ابشري كم ملاك عندي
ملاك: عشرة
فيصل:ههههههههه
ملاك: اوكيه اتفقنا
فيصل: اتفقنا

فهد كان مع تركي في كوفي دايما يروحون له
فهد: تصدق امي غاصبتني اتزوج
تركي: طيب تزوج
فهد: بس ماعمري فكرت في الزواج ولا ابي افكر فيه
تركي: يعني مو لاقي بنت الحلال
فهد: امي لقيت وحده عجبتها وتبي تخطبها لي
تركي:وليش متردد
فهد: ما ادري والله ما ارتحت للخطبه هذي
تركي: ياخي اتكل على الله... امك تبي لك الخير
فهد: يعني تنصحني اروح اشوفها
تركي: روح شوفها وانا متأكد انها راح تعجبك
فهد: على بركة الله
تركي:ههههه على بركة الله

ام فيصل وابو فيصل كانوا قلقانين على مستقبل سمر وخافوا انه يضيع
خاصة ان سمر باقي مصدومة فكروا يسافرون برا عشان يعالجونها
واذا كان فيه امل ترجع تمشي على رجولها ...ابو فيصل كلم الدكتور
بالموضوع وبرضه الدكتور اكد عليهم واعطاهم أمل كبير

بعد يومين الكل كان مشغول بحاله....
فيصل حاول يقرب من روان اكثر بس ماكانت حاسه فيه
وتركي كان يرسل لملاك رسايل يعبرلها عن حبه لها اللي يزيد
يوم عن يوم
وسمر باقي في همها والحال اللي هي فيه وتفكر كيف
حياتها بتكون وهي بالحاله هذي
وبندر مشغول بخلود وعرسه
وفهد كلم امه عشان تروح تخطب له ملاك
------------------------------------------
ام فهد كلمت ام سلطان عشان تكلم
ام فيصل وتشوف راي ملاك عشان تحدد
يوم الخطبه

في الوقت هذا كان تركي داخل من برا
وكانت ام سلطان باقي تكلم ام فهد
ولما خلصت مكالمه

تركي: احلا ياعمتي صرتي خطابه
ام سلطان: ايه هذي ام فهد
تركي:ولمين تخطبين؟
ام سلطان:تبيني أكلم ام فيصل عشان تخطب
لولدها فهد
تركي: وش دخل خالتي بالموضوع
ام سلطان: كيف وش دخلها وهي ام العروس
تركي: ومين اللي بيخطبها فهد
ام سلطان: ملاك
تركي: وشووووو؟ وخرج من البيت معصب
ودق على فهد عشان يفهم السالفه منه
في الطريق كان واصل حده ويقول لنفسه:
هالنذل مالقي غير ملاك وربي ان يندم



في بيت فهد ........
فهد:حياك تفضل
تركي:وش أتفضل هي كلمتين بقولهم
واروح
فهد:تركي شالسالفه
تركي:وانت خليت فيها سالفه
فهد: وربي مو فاهم ادخل خلينا نتفاهم
تركي:مو داخل واللي بقوله خليه حلقه
باذنك:(خليك بعيد عن ملاك)
فهد: مين ملاك؟
تركي: وتستهبل بعد (ولف ظهره عشان يروح)
فهد: تركي لحظه شوي خلنا نتفاهم
تركي ناظر فهد بنظرة احتقار ومشى وما سمع بعدها اي
كلمه من فهد وما رد على اي اتصال منه

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 16
قديم(ـة) 07-10-2010, 07:48 AM
صورة وفاء العمر الرمزية
وفاء العمر وفاء العمر غير متصل
©؛°¨غرامي فعال ¨°؛©
 
الافتراضي رد: كنت ابيها بس القدر كان اقوى


مشاء الله حلووووه الروايه يعطيك العافيه

  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 17
قديم(ـة) 25-10-2010, 05:13 AM
صورة الزعيـ A.8K ـمه الرمزية
الزعيـ A.8K ـمه الزعيـ A.8K ـمه غير متصل
δЯέαмş
مستشــ¸.·* غرام *·.¸ـــاري
 
الافتراضي رد: كنت ابيها بس القدر كان اقوى




,’






لـ تــــأخر الكاتبة




,’


كنت أبيها بس القدر كان أقوى / بقلمي

أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
ألا يا مطول صبري أذوق المر من كاسه / رواية من تأليفي عنونها أرشيف الروايات المغلقة - لعدم إكتمالها 126 08-10-2011 02:04 PM
ليلة القدر بــسمة الـــم ارشيف غرام 3 28-08-2010 11:15 PM

الساعة الآن +3: 10:49 PM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1