روح زايــــد مستشــ¸.·* غرام *·.¸ـــاري

روايه للكاتبه ş ά m ά;


..@@ الجــــزء الأول @@ ..











شخصياتــــي: (يمكن هالطريقة ماتعجب الكل بس عشان ترتب افكاركم مع الشخصيات)



أولا:عايلة خالد محمد ..... (ابو سعود)

ابو بمعنى الكلمة يقدر بناته الأربع وعنده بالدنيا بعكس العيال ،عايش حياة متوسطة بس موب

مقصر على زوجتـه وعيـاله بشي ..



ساره..(ام سعود)

معلمة وأم أقرب للمثالية تقدر عيالها الأولاد بقوووة على عكس يور فذر ^_^ >تعرفون الأمهات عاد

كلمتها ما تثنيها خصوصاً إذا كان هالشي يخص البنات وممكن تغير رايها كم مـره إذا كان شي يخص

العيــال ..



سعود.. الابن البكر وحبيب أمه أنسـان جدي ورجال بمعنى الكلمة ينقلب لشخص ثاني برفقة رفيق دربـهـ عمرة 25 داخل الـ 26 تقريباً يدرس بالخارج لبعثة جتة لتفوقه في دراسته

كان تخصصه هندسه أدوات طبية مصدر فخر لأمـه وأبــوه ..



رنا ..البنت الكبيرة 22 سنة خلصت الجامعة ما لها شهرين متزوجه ((زيد يقرب للعايلة من بعيد يعني ياخال ابوي حك ظهري على قولتهم )) رجــه وطيبه لأبعد الحدود واللي في قلبها على لسانها ما تعرف للكلام الحلو طريق << هههه ياحبي لها ..



التوأم المخالف >>موب اللي في MBC3 ههههه بيذبحــوني !

ريما وديما 19 سنة أول سنة بالجامعة قمة التناقض في الشخصيات ما يجمعم الا الشكل المتقارب والتألف الروحي القوي من أقرب النــاس لـي ...



ريهام..17 سنة ثاني ثانوي علمي انسانـه عملية جداً وانطوائيه الا من أهلها وربعها والناس اللي داخله معهم مره ..



راكان ..هذا عاد جاي في الوقت الأضافي مدري بدل الضاي على قولة ديما عمررره 6 سنوات وآخر العنقود عشقه في الحياة أبلة سلمى (استاذتة بالتمهيدي ) ودلوع الماما والبابا ما تنرد له كلمـه ..





نبدأعلى بركة الله ..((اعزائي ركاب رحلة بارتي الأول في طائرة روايتي استعدوا للاقلاع ونتمنى لكم قضاء امتع الاوقات برفقة خطوطنـا النجديـه ..كابتن الرحلة :أنـــــا ..))



شاهي قهووه (عربي تركيش اسبريسو....إلخ ) موويه حاااضرين للطيبين =)















..@@ الجـــزء الأول @@ ..









العطلة توها بادية وعنوانها الرئيسي "الطفـــــــش" كالعادة..





"هدوووووووووووووووووووووووء"



اطلقت صرختها للعنان في وسط الأزعاج اللي عام بيت جدتها كله من صجة البزران ..

الكل يناظر فيها بنص عين ..

ديما بصوت هادئ جداً: موب كنكم كاثــــرين اليوم ..؟!

الجدة:دووويييم ووجع وش ذا الصراخ سمي الناس في سفرة المغرب ..

وهي تقعد على الكنب: آه سوري بس والله أزعاااااج تقوليين في حضانة ..

لطيفة (الخاله): هههه حضانة من كثر بزارينا اللحين ..

ديما: فيهم الخيير تدرين خالتي لطيفة عيالك الواحد عن عشره ..!

لطيفة: قولي ما شاء الله لا إله إلا الله بتنظلهم ..

ديما: ما شاء الله تبارك الله ..

ساره تصرف ديما عن ازعاجها: ديما أمي جيبيلي كأس موية..

ديما: آآآمييييييييييييييييييييييينة >>الشغاااله ^^ كعادتنا حفظنا الله

ساره: قلت ديما..!!

ديما بضيق: ان شاء الله ..

ريما: يمة منيرة وين خالي طلال ..؟

الجدة: والله علمي به أمس بيطلع يخيم مدري أن جا اليوم وإلا الجمعه..

ريما: اللله يخييم ونااااااسـه ..

لطيفة : سارة رنا ميب جاية اليوم..؟

سارة :الا بعد العشا بتمر حمولتها اول..

الجدة: وولدك متى بيرجع جازت له بلاد الكفار..!!!!

ساره: هههه علمي به في اجازة الكريسميس..

الجدة : كرمس وش ذا؟؟؟

ساره: يمة كريسميس اجازتهم هنا زي العيد العيد عندنا ..

الجدة :الله لا يغضب علينا ..

ديما : هههههه يمه وش دخلك يغضب عليك..

الجدة : موب أخوك معهم ..







(( فاصل ونــــواصل ))







اليوم الخميس ويجتمعون في بيت أمهم منيرة ..

منيرة..ام سارة (ام سعود سبق التعرف عليها) ولطيفة لها بنتين وولدين ساره ولطيفه..

لطيفه ..28سنة أصغر من ساره وهي أختها الوحيدة متزوجه وعندها 3 عيال

محمد.. 10سنوات وصالح.. 8سنوات وساروونه.. 4ونص سنوات ..طيبة وحبوبة وأبدى ماعليها زوجها وعيالها والباقي ...



طلال.. 26 سنة آخر العنقود..عازب وعايش بالبيت الكبير مع أمه مارح أقول شي عنه شهادتي

فيه مجروحه رح تتعرفون عليه من أحداث الروايه



نتفق على لقب أمي منيره (منيره ) أو (أم عبد الرحمن لييه بعديين عشان ما نلخبط..أوكي ^^









((عدنـــا))







"سلااااااااااااااام"

دخلت عليهم رنا بعد صلاة العشا وسلمت على الكل فصخت عابيتها وقعدت..

رنا: وش اخباركم وش لونكم تزقحون من زمان عنكم؟؟؟

ريهام:شوي شوي إي وااحد نجاوب؟؟

رنا: يووووه ريهاموه ماشفتك ..وقامت تسلم عليها وردت منيره عن الكل..

منيره: بخييييييير يمه انتي وش أخبارك ورجلك عساك مرتاحه ...؟؟؟

رنا بابتسامة رضا : الحمد الله يمه بخييير وعافييية موب مقصر بشي ..

سارة: الله يوفقك ويسخر لك ياأمـي ..

رنا: يمه منيره .....؟؟؟

منيره: سمي ..

رنا : تسلم عليك مرت بن سليم شفتها عند خوالي..

منيره بفرحة: الله يسلمك ويسلمها من الشر وش الدنيا بها ؟؟؟؟..

رنا : طيبة..تسأل عنكم والله من الصغير للكبير ..

منيره: تسأل عنها العافيه ياربي ..



بينما الوضع عند ديما وريما متأزم متربعيين على الارض يدورون لهم شي يلهون به..

وريهام تقرى في رواية معها والبزارين حدث ولا حرج عايشين جو بالبيت..

ريما: ديما كلمتي دلال؟؟..

ديما: يوووه نسيت تقول ردوا علي وسفهتها..ياويلها من فيصل..

ريما: وش دخله؟؟

ديما: تقول يااااله اقنعته يوصلها عاد اذا كنسلت ياويلها ..

ريما: شوفي خالتي لطيفه استلمت رنا اكيد تلغاها على شكلها..

ديما: اختك بعد هذا شكل وحده عروس..

رنا من بعيد: اذني ترن تحشوون فيني..

ديما: رادار موب اذن ..

ريما: ههههه لا بس نتوقع التغيرات اللي بتجي اليوم..

(لطيفه عنها موهبة في القص والميك اب فمستلمة البنات كل شوي تغير شكل وحده)

لطيفة: اجل ذا شكل عرووس وين هدوم عرسك..

رنا: ههههههه لطوف(تمون) عندي بس بيت امي منيرة استجمام مالي خلق اكشخ ياخــتي ..

ديما: امحق استجمام..

ام طلال : لييية وش فيه بيتنا؟؟

ديما: يوسع الصدر الله يسلمك ..

ساره: عاد انتي لو ماتجيين بيت امك منيرة نبت في راسك نخله ..

ديما :هههههههههه حلوووة نخله مام بس لاتعيدينها..

ومر الوقت بسرعه بس السوالف والضحك وبهارات الحريم من قهوه وشاي ومكسرات وحركات ولا ما يصيرون حريم..





على الساعة10ونص دخل طلال ..

طلال:السلام عليكم..

الكل: وعليكم السلام .. حب راس امه وراح لساره: هلااااا واللله باختي الكبيرة هههه

سارة: هلا باخوي الصغير ..

بعدها لطيفه ورنا: اقول بيتنا منور العروس هون..

رنا : منور باهله..

طلال: تابريني بنت خيتووو(يتكلم سوري الاخ )

ووصل لديما: ياشين السرج على البقره..

نغزها من خصرها وطمرت تكـــره هالحركة :انا بقرة يالخايسة..

ديما: هههههههه لا ثور..

طلال: هههههههه الثور رجلك ..

ديما: ويييينة عادي ..

طلال: ههههه فارقي بس ..هلا الريم..

ريما : هلا بك ..

طلال: ماشاء الله مجتمعين اليــوم..

ام عبد الرحمن : من يومنا مجتمعين انت اللي وينك طاس..

طلال: مخيمين مع الشباب وجيت مانمت عشانك يالغالية..ريم الله يعافيك كاس موويه بااااااااارد..

ريما: ان شاء الله..

ديما: خالي طلال..

طلال بنفسة الله يستر من (خالي) اكييد وراها سالفه:هلاااا

ديما:نبي نخيم مع بعض ..

طلال : بــــس صملوا وابشروا ..

ديما: سواااليف..





في طرف الثاني رنا بالنيو لوك(قصه مدرجه مع لون شعرها المخصل والمكياج الهادي)) تكلم بتليفونها..

رنا: اهلييين

زيد(زوجها): هلا والله..

رنا: اخبارك..

زيد : طيب..

رنا: متى بتجي؟؟

زيد يستهبل: لييييييييه اشتقتي لي..

رنا داريه انه يستهبل >>بدلع: مرررررررره..

زيد : لااااا لاااه متاكدة انتي رنو مرتي؟؟

رنا: هههه اقول فارق بس متى بتجي؟؟>>هههههه اقول لكم ماعندها وقت ..

زيد: ههههههه ايه بعـــــدي هذي مرتي ..مدري ربع نص ساعه كذا..

رنا: اوكي دق علي اذا جيت ..

زيد:اوكــي بااي..

رنا :بااي ..وسكرت

لطيفة : من جدك تكلمينة كذا وفارق بعد..

رنا ببراءة: عااادي ترى حتى هــــو يعني تيكت ايزي..

لطيفة : حتى ولو انتي غيير كلمه ولو جبر خاطر..

رنا: لطوف والله عااادي ترى ياحبك للخرابيط ..

لطيفه:حبك برص قولي امييين ..

رنا:ههههههه بسم الله علـــي ياختي ..



نرجع لديما دخلت سارة بنت لطيفه المجلس وهي تصيح شالتها ديما وقعدت معها على الارض >>الارض مفروشه لاتحسبونهم يقعدون على البلااااط والسعوديين كانهم كلهم زينا يحطون كنب ويقعدون على الارض وخاصه القهوه <<المهم قعدت معها على الارض عند طلال:ليش سارونة ليش تصيحين؟؟..

ساره:محمد ما يخليني العب سوني..

ديما : طيب عادي انتي بنت ماتحبين السوني؟؟

ساره: بس انا احبه..

ديما متحمسة وطلال يراقبها:ولو لاتصيحين صيـــري قويـــــه وصــــــارخي عليهم الاااااااا غصب بلعب واذا ازعجتيهـــــم لعبوك((خراب))اوكي ؟؟..

طلال: لطيفة الحقي بنتك مستقبلها في خطــــر..

ديما: وش قصدك..؟؟

طلال: ههههههههه سلامتك بس خايف على بنت اختي قالك تنصحين اللحين..

ديما: بــكيفي ..

ريما : ديما كلمتي دلال ..

ديما: لا نسيت..

ريما بعصبية: متى يعني بكــــرة .كلميها لاتتوهق المسكينة ..

طلال : من دلال ؟؟

ديما : وهي تكلم : عن اللقافه..

ردت عليه ريما : بنت عمي عبدالله..



ديما: الوووووووووووو دليـــل ؟؟

روح زايــــد مستشــ¸.·* غرام *·.¸ـــاري

...@@الجــــزء الثاني@@...







" الوووو دليــل ؟؟؟" >للمعلومية ديما تكلم بنت عمها عبد الله اللي بنتعرف عليها قريب (دلال)..

دلال: لاتكلميني سامعه..

ديما:هههههههه ليييش..

دلال: كذااااااا..

ريما لديما :وش تقول ؟؟؟

ديما بضحكة : زعلاااانه..

ريما:هههههه حطي سبيكر ..

ديما تناظر طلال بنص عين وهو قاعد قريب ومركزعلى جواله :وذااا؟؟..

ريما: موب لمك بعدين ازعاج وقصري على الصوت لاتفضحك امي منيره..

ديما: اوكيه..

قصرت ديما على صوت الجوال وحطت على السبيكر بس اللي مومنتبهين له طلال اللي كان معهم على الخط(رادار)الا لقافه والله..

دلال: ويييييينك يالدبا سااااعه اقول بتدق بتدق ؟؟..

ديما: اماك تقولين لاتكلميني؟؟

دلال : ايه صح ذكرت ..

ديما وريما:هههههههههه..

ريما: هلا دلول ..

دلال : لاتكلموني انتوا الثنتين يالخايسات عنبوكم تواعدوني واقنع ابوي واتورط مع هتلر بعدين ترسل لي > وهي تتهزأ <بتجيي رنا بيت امي منيره وبنـــروح..

ريما: ههههه والله مادرينا الا الصبح وقايله لديموووه وما كلمتك ..

ديما: حطيها فيني..

ريما: احلفي اني ما قلت لك..

دلال: هيييييييييه لاسكرتوا تطاقوا..

ديما: هههههههه اوكي وش سوى فصيل..

دلال: وش ما سوى عطاني محاظرة وهزائني معطله اجتماعاته في البيت الابيض وانا مدري..

ديما:هههههه انتي ماقلتي ان عمي بيجيبك..

ريما:ايه والله..

دلال: هذا اول قلت بروح بدري اقعد مع بنات عمي بس ماااااالت..

ديما:ههه سوري ياقلبوو تعالي بكرة..

دلال:وكالة من دون بواب حبيبتي متى اقتنعت ابوي اني بجيكم بلحالي من دون امي وما فيني توهيقات..

تعالو انتو..

ريما:صعبه بيتكم عياال..

دلال: وانا مامليت عينك ياست ريما..

وطلال ما سك نفسه لايضحك وينكشف ..ريما: ههههه موب قصدي يالخايسة بس صعبه من دون امي وانا ثلاث وانتي وحده..

دلال: اييه علبالي بعد ..

ديما: اقول ماتلاحظون اني عطيتكم وجه رصيدي بيخلص..

دلال: بدييينا..يالله باااي بكرامتي احسن بس فاتكم فلم هندي كنت بجيبه معي ..

ريما:مدري متى بتعقلين..

ديما:يالله بااااي بينا الو اوكي

دلال: اوكي....لحظه تعالوا شلون تكلموني الثنتين حااااااطين سبيكــــــــــــــــر >توها تنتبه الحرمه <

ديما وريما:هههههههههه صباح الخييير..

دلال: هيييين مردوده من عندكم؟؟؟..

ديما: محد ياحبك للهذره يالله مع السلامه

دلال بحزن :يالله اجل سلااااام ..



وطلال ما خذ انطباع اولي عنها ..



نجي لدلال بنت بين اولاد والاحرى ولديين وتعتبر بنات عمها خوات زعلانة لانه خميس وماطلعوا مقررة تروح بيت عمها بس ما الله كتب..وخالتها موب مرره معهم خصوصا بعد سالفة فيصل..



((نبذه عن العائلة عبدالله محمد الاخ الاكبرلخالد ..

هدى زوجته ..ام فيصل

فيصل..الولد البكر لعبد الله 28 سنه عازب عصبي ومتعقد من العرس لحاجة في نفس ايوب <<نعرفها بعدين ..طول وعقل وملح وثقل >هههه معجبه <ورأي يعني مسيطرعلى الوضـــع بزياده(هتلر على قوله دلال)..



بندر 24ونص سنة قممة في الوناسة وساعة الصدر وماخذ الدنيا براااحة الله يستر منها ..الاقرب لسعود قبل سفره يملك من جاذبية امه الكثيير لدرجه انه يدخل القلب من نظره..



دلال ههههههه هذي شي 19 سنة صديقه بنات عمها التوأم وخصوصا ديما >>وافق شن طبقة ..

واخر العنقود طلباتها مجابة ..واللي فراسها بتسويه..مرره طيبه بطول متوسط وجمال غييير وشعر لنص ظهرها محتفظة بلونة الاسود مثل ماهو..))..



ام فيصل: وش يقولون بنات عمك..

دلال: رايحين لبيت جدتهم رنا عندهم..

ام فيصل: ما شاء الله الله يوفقها وش اخبارها؟؟

دلال: بخييير ..يممممممه

ام فيصل :نعم..

دلال: وش عندنا بكره..

ام فيصل: ما ادري والله ودي اروح اسلم على اخويتي بس ما ادري ..

دلال: وش عندك..

ام فيصل: ابوك بالمزرعه وفيصل انتي عارفه لو اموت ما وداني وبنيدر مدري وينه هايت مع اصدقاه..

دلال: الله يهديهم تدرين وش ودي يمه..

ام فيصل تعرف لبنتها:وش ودك الله يستر ..

دلال: ههههه وش دعوه ودي ازوج فصيل وحده من بنات عمي خالد..

ام فيصل: ودي بس انا عارفينه ما ودي اغربل بالبنت..

دلال:ههههه والله انك صادقه مدري وش فيه من تالي..

ام فيصل: الله يهديه وينساها..

دلال: ياربيييييييييييييييييييييييييييه..

ام فيصل:وش فيك؟؟

دلال: اليوم خميييس واللي مايطلع يخييس

ام فيصل: بدييييينا ..





.........





ديما: مااامي البابا بره..

ام سعود:ورى مادق علي..

ديما: عجبه الاسم ودق علــي ..

ام سعود:مااالت يالله قومي اخوك بالمجلس وركبيه..

ديما:طيب الله يصبرني ..

ام سعود:متى بتروحين يالطيفه..

لطيفه: يمكن انوم عند اهلي عبدالله مناوب اليوم..

ام سعود وهي تلبس عبايتها:وانتي رنا؟؟..

طلال:بطلع اسلم عليه..

رنا: هذا زيد يدق بطلع معكم ..وقامت تلبس عبايتها..

لبسوا البنات عباياتهم وطلعوا وركبوا السياره ونزل زيد يسلم على طلال وخاله ابو سعود وتوجه لخالته يوم طلعت من البيت ..



ديما: رييييييم..

ريما:هاااه..

ديما: شوفي زيود كنه سامن؟؟..

ريما: خبله انتي ما درت عنك رنا ..

ديما:هههه والله في العرس ضعيف استلمته اختنا ماشاء الله ..

ريما: ماشاء الله ..

تطل عليهم ريهام من السيت اللي ورى :وش عندكم اسرااار؟؟..

ديما: يس ..

ريهام:صادقه ديما مررررره سامن..ناظروها الثنتين بصدمة وعيونهم بتطلع من البرقع..

ديما: وشلون سمعتي؟؟

ريهام:ههههههه مصدقه انها اسرار ..

ريما:هههههه حلوووه ريهام ..

ديما: لاوالله..

ابوسعود يدخل مع امهم: وش فيهم بناتي..

ديما:يرضيك يابو سعود يتبلون علي..

ابو سعود :افاا مين اللي متبلي ؟؟

ديما:ريهاااااااااام..

ابو سعود:ايه ريهام عاااادي..

ضحك الكل عليها وهي معصبه من تهزيئة ابوها المبطنة>>مبطنه نجـــــوده ههههههه ^_* ..



ريما وديما روح في جسدين (توام للتذكيير) بالرغم من التناقض الكبير الا انك تلاحظ انسجامهم خصوصا في الشكل مررره يشبهون بعض ما يفرق بينها الا اللي يعرفهم مرره مربوعين بالطول وبشره بيضاء صافيه وملامح متشابهه مرره من وسع العين وطول الخشم للفم اللي يشوفهم يقول سبحان الخالق.. اما الشخصيات حدث ولا حرج ريما (الكبيره) هااااديه ورومانسيييييه لدرجه كبيره والكل في نظرها طيب واهم شي الثقل مو من البنات اللي مع الخيل ياشقرى لا..

ديما(الصغيره)_بينهم خمس دقايق _جريييئة وماتحب الهدوء ابد تعتبره كآبه رجه وشي يعني خبله على بلاطة ..ومستحيل يتفقون بيوم الابالشديد القوي ونادرا مايطول اتفاقهم اكبر قضيه للخلاف ان ريما الكبيره وديما الصغيره ..

>قضية الشرق الاوسط عندهم <

..............





بيوم الجمعه الصباح 11 في بيت ابو فيصل ..

ام فيصل وابو فيصل بالصاله ..

ودلال وبندر ناييمين وفيصل نازل من الدرج..

فيصل :السلام عليكم..

:وعليكم السلام ورحمة الله وبركاتة

ابو فيصل: وين اخوك.؟؟

فيصل :مريت عليه وقومته مدري عنه..

ابو فيصل: المسجد بيقيم وهو نايم وموب منه والله مارج الا الفجر ..

ام فيصل توقف:بروح اقومه..

ابو فيصل : هدى..

ام فيصل : سمي ..

ابو فيصل : ترى اخوي خالد عازمنا على الغدا اليووم..

ام فيصل برووعه: اليوووم ورى ما علمتنا ياابو فيصل متى بيمدينا نتجهز..

ابو فيصل ببرود: لييه بتروحون لعرس غدا ترى وراجعين..

ام فيصل تمشي: الله يهديك بس..

ابو فيصل يلتفت لفيصل اللي يزين غترته مدري شماغه (الاحمر) اتوقع شماغ ..

ابو فيصل :حتى انت بتروح سامع..

فيصل :ما اقدر..

ابو فيصل : ليييه ان شاء الله عاجبك حالك اللحين..

فيصل: عاجبني وش فيه؟؟..

ابو فيصل بعصبيه من حال عياله: مشكلتك .بس انا موب عاجبني سامع وبشوفك في بيت عمك..

وطلع من البيت..

فيصل بعصبيه: غصصصصب يعني والله حاله..



"صباح الخيير وش فيك تزاعق"

فيصل يقوم:ولا شي ويتوجه للباب يطلع ويلتفت لبندر : تراك معزوم على الغدا عند عمي..

بندر: صدددق وناااسة من زمان عن اكل خالتي ام سعود ..

فيصل عطاه نظرة وصقع بالباب ..

بندر : استنــــــــــــــى بروح معه سيارتي بارده(حرارتها) ..وطلع يلحقه..

والمحاولات دئوبة لتقويم دلال من النوم عشان العزيمة المفاجئة خصوصا ان الدنيا عطلة ..

:يالله وانا امتس..

دلال: يممممه بليييز بنوم..

ام فيصل : قومي بنروح لبيت عمك خالد..

دلال: نطت من السرير..قولي والله؟؟

ام فيصل :ههههههه تكذبيني يادليل..

دلال: لا والله شلون..

ام فيصل : وشلووون وانا امك بالسياره.

دلال: ههههههههه داريه يمه تنكتين..اقصد شلون نروح وظهر بعد

ام فيصل : عمك عازم ابوك على الغدا امس وما قال الا اليوم..

دلال: يسسسسسس يعني بنروح..

ام فيصل: قومي تسبحي واخلصي وبنروح ان شاء الله

دلال قايمة من السرير :دقايق ..

ام فيصل: شوي وشوي لاتخبطين..





.............









وفي بيت ابو سعودالحال موب احسن من بيت اخوه بس ما عنده اولاد يخاوونه للصلاه سعود وبرى وراكان وصغير على المسجد القى القنبلة على ام سعود انه عازم اخوه على الغدا وراح..

وسارة بتنهبل الظهر اذن وما صلحوا شي راحت المطبخ وقعدت مع الشغاله تزيين وتحوس للغدا لان الوجبة الرئيسية(الرز) من برا >مطعم <..ونست بناتها نايمين..



الساعه وحده دخلت ريهام المطبخ وتشوف الدهره غريبة وش عندهم..

صباح الخيير ..

ام سعود: قولي مسا..

ريهام: اوكي مساء الخيير ..

ام سعود:مسا النور وين خواتتك..

ريهام: نايميين يعني بيقومون اللحين..

ام سعود : يووه نسيت اقومهم للصلاه ..

ريهام:نسيتي يمه ما عليهم..

ام سعود: الثنتييين؟؟..

ريهام:ههههه تؤام..

ام سعود : قوميهم ولو عمانك بيجون يتغدون عندنا ..

ريهام مستغربه: عماني؟؟..

ام سعود: ايه عمك عبد الله .....يالله وش تناظرين قوميهم يساعدونا وخذي الدخون دخني البيت..

ريهام: ان شاء الله..

ام سعود: واخلصوا موب تلزقون لي فوق ما في الا مرة عمكم..

ريهام: انشاء الله..

ام سعود :ريهام ؟؟..

ترجع:هلا..

:دقي على رنا كانها بتجي مع رجلها

:طيب..



............



فتحت الستارة وولعت النور ..

"ريييييييييم ووجع"

ريهام: مسيكينه ذا الريم..قوموووووووا يالله انا ريهام ..

ريما وديما بغرفه وحده..وريهام وراكان بغرفه وسعود بغرفه والرئيسية لامهم وابوهم وصاله بالوسط هذا الدور الثاني..

:بسرررررررررعه..

ريما: خييير انتي ..

ريهام :عماني بيجون..

ديما: فارقي بسسس اليوم جمعة يالخبله طفي النووور بسرعه..

ريهام :ما الخبلة الا انتي بيجي عمي عبد الله وعياله ابوي عازمهم..

ريما تقعد: صدق والله ؟؟..

ريهام تقعد على طرف التسريحه وتطيح بعض الاطياب:والله وامي متوعده فيكم تقول انزلوا بسرعه..

ريما:هيييييه وخري عن الاطياب توني ماسحتهم..

ريهام:مالت بسرعه قوموا ترى بيجون اللحين وطلعت من الغرفة وخلت الباب مفتوح عشان تقهرهم..

ريما: ديما ديما قومي يالله..

ديما :قايمه ..

ريما: قومي ترى بتجي دلااال اللحين..

ديماتقعد: صادقه..

ريما تقوم : ايه يالله يمدينا ..

ديما تقوم بسرعه وتدخل الحمام وتضحك: سبقتك..

ريما: الحمد الله والشكر ..غسلوا لبسوا عادي تنانير جينز وتي شرتات بس اللون غيير ونزلوا..



........

ريهام :اشوه نزلتوا ديما دقي على رنا تقولها امي تجي للغدا نسيت..

ديما: الله يصبر ديما عليكم..

ريهام :لا والله ما ضفيتي حوسة راكان تحسين ..وريما سفهتهم وراحت لامها بالمطبخ..



"هاااااااااي رنو"

صوت رجولي:مرحبا..

ديما تلعثمت:اسـ..اسفه اخـ...ـوي غلط..ـا نـ غلطانه اخـوي..

زيد:ههههههه لحظه..

رنا: هلا..

ديما: لاهلا ولامرحبا انتي ورجلك روعني توي قايمه..

رنا:ههههههه وش دخل النوم..

ديما: خلينا اخبارك؟؟..

رنا: طيبه غريبه داقه تسألين والظهر بعد ..اعترفي خيتوو..

ديما:مالت موب حب لاتخافين امي تقول تعالي انتي وبعلك على الغدا عازمين عماني..

رنا: صدق كان علمتوني بدري طبخت غداي..

ديما: جيبيه..

رنا: بشوف بس يمكن امر العصر ..

ديما:يالله باااي الماما بتنده علي ..

رنا:هههه ياشين السرج على البقرة ..

ديما :البقرة انتي مع السلامة..

رنا: فمان الله..





"دييييييييييييييييما"

ديما: هلا جيــــت جيــــت يا امــــي جيـــت إليك مشتـــ.. (تغني)

ام سعود : عن الهذرة حطي الفاكهه في صحون ..

ديما: ان شاء الله..

VEN!CE يـآرب مآلـي ســـوآكـﮯ

’,’


الله يعطيك العافيه
كالعاده عذاب نقل مميز :)

شكلهـا فللله
موفقه ان شاء الله


,’,

روح زايــــد مستشــ¸.·* غرام *·.¸ـــاري

:
المشاركة الأساسية كتبها VEN!CE اقتباس :
’,’


الله يعطيك العافيه
كالعاده عذاب نقل مميز :)

شكلهـا فللله
موفقه ان شاء الله


,’,
منوره القصه حبيبتي

الزعيـ A.8K ـمه ©؛°¨غرامي ماسي ¨°؛©

’ ,

بســم الله

يعطيك العــافيه عذاب الليل

موفقــه إن شـاء الله بـ نقلك
’ ,


روح زايــــد مستشــ¸.·* غرام *·.¸ـــاري

المشاركة الأساسية كتبها الزعيمـــه8 اقتباس :
’ ,

بســم الله

يعطيك العــافيه عذاب الليل

موفقــه إن شـاء الله بـ نقلك
’ ,
منوره القصه حبوبه

سجينة حب ©؛°¨غرامي ذهبي¨°؛©

.,,.

يآهلآ فيك عزيزتي

موفقه بآذن آلله

منوره آلقسم من جديد ^،^

.,,.


ج ـرحــنـي وح ـبـيـتـه ©؛°¨غرامي فعال ¨°؛©

يسلموووووو يعطيك ربي العافية

روح زايــــد مستشــ¸.·* غرام *·.¸ـــاري

منورين القصه

روح زايــــد مستشــ¸.·* غرام *·.¸ـــاري

]...@@الجــــزء الثالث@@...















وصل عبدالله وعياله الساعه ثنتين تقريباً وكان مسحب فيصل وبندر كل واحد من فنيلته

ويالله وافقوا يجوون معـه >>>حركااات عيالنا الله يهديهم لو أنها استراحه مع العيال قام يطامر !



كل شي كان جاهز الرجال بمجلس الرجال اللي بمدخل بلحاله والحريم بالصاله..

ديما:هلا والله بدلول..

دلال:هلا وغلا شفتي دعائي ؟..

ديما:ادعي لي بالعرس يوم انه نفاذ

دلال:هههههههههه ما طلبتي أنا وياك بيوووم واااحد قولــي آآآميييين

ديما:ولك من بوك لباااااب السمــا ..

دلال:هههههههه من قلب

ديما:ههههههه افا عليك ..



سلمت على الكل وقعدوا سواليف وضحكـ ..



عند الرجال..الجو هادي شوي ابو فيصل واخوه يسولفون وبندر هادي موب العاده بس ما معه احد

وفيصل معصب لانه ما يبي يجي اصلاً..



"وش اخبار الشغل يافيصل"

فيصل: الحمد الله يا عمي ماشين ..

ابو سعود: وانت يا بندر لين اللحين تدرس ؟؟

بندر بابتسامة:ايه والله عم ندفش..

ابو سعود:ههههههه ما كنك طولت ..

ابو فيصل : الا خاااس..

بندر يغير السالفه: متى بيرجع سعود ياعمي له فقده الدب ..

ابوسعود: والله مدري وانا عمك على نهايه الاجازة ولابدايه الدراسه ..

ابوفيصل: شقت به ذا الدراسه وشوله دكتوراه كان استقر فيذا احس له..

ابو سعود:وش نسووي رغبته وما ابي ارده وانا اخوك..

ابو فيصل : الله يوفقه ويهدي اللي عندنا..

بندر:هههههههههه آمين ..





...........









وعلى هالحال لين وقت الغدا الرجال تغدوا بالمقلط وطلعوا لصلاة العصر بعدها

والحريم تغدوا وشالوا البنات الغدا مع الشغاله وطلعوا يصلون ..

رجع ابو فيصل من الصلاه مع اخوه :ونادى بنات اخوه يسلم عليهم قبل لايروح (لأن عياله راحوا طبعا زي منهم جاملوا للحين)

دخلوا ومعهم دلال تسلم على عمها اللي ما شافته..

ديما: حيا الله من جانا ..!

ابوفيصل : الله يحييك ويبقيك

ريما: وش اخبارك عمي؟؟

ابو فيصل : بخييير انتي ديما ؟؟

ريما: ههههههه لا ريما ..

ابو فيصل : الكبيره؟؟

ريما بحيا: اييه

ابو فيصل يناظرهم باعجاب.:ما شاء الله عليم كبروا بناتك يا ابو سعود وكل وحده تقول الزين عندي..

ابوسعود : الله يسلمك لك ان بغيتهم وعندك الخير والبركه ..

ابو فيصل: تسلم..دلال أبــوي نادي امك يالله بنمشي !..

ديما : عمي عبدالله؟

ابو فيصل :هلا يبه ..

ديما: ممكن اطلبك طلب..(مقررين عليه من اول)

ابوفيصل: سمي ..

ديما: سم الله عدوك والتفتت لريما بهمس ساعديني والثانية تصرفي

:ودنا بدلال تقعد عندنا..

ابو فيصل: وامها؟؟..

ريما: شاورنا خالتي تقول قولي لعمكم لاتحولنا على فيصل تكفي..

وحمر وجهها من اللي قالته وش دخل فيصل اللحين وخصوصا عند ابوها وعمها بس متعقده منه من دلال...

ابو فيصل: ههههههههه بتقعد تقعد عشانك والله ياريما ..

ديما:واناااااااا ؟؟

ابوفيصل: انتي الخير والبركة وعشانك أنتــي بعـد !

ديما: تسلم عمووو يالله دليل جتك الموافقه حركتات يمديك على بنات عمك ..

دلال:هههههههه لا والله تشوفيني قاعده مؤدبه أخاف يهوون

ديما:ههههههه ياعيني ع الأدب ..وقــاموا بيطلعـون

أبو فيصل :نادوا ام فيصل نمشي ..

ابو سعود: تونا تعتموا عندنا

ابو فيصل :ماعاد الا خيير والمعزبة تبي اختها..

او سعود:هههههه قل كذا من زمــان ..

ابو فيصل: لنا لقاء قريب إن شــاء الله (وفي نفسه شي قرره اللحين )

أبو سعود :إن شاء الله









.........









والبنات متشققين ما صدقوا ان عمهم وافق لدلال من كلمت ريما..

دلال:والله حركات ريما عندك واسطه عند ابوي..

ريما: اكيييييييد عمي بس والله اتفشلت منه !..

ديما ودلال :ليييييييييه ؟؟؟

ريما خافت تقولهم عن فيصل ويعلقون عليها: لا ولاشي ..

ديما:مالت وش تستحين عمك يالخبله..يالله وش تبون من البقاله؟؟..

دلال:ههههههه بقاله وينك فيه ؟ ..

ديما: وش نسوي الظروف ما في احد يودينا بنده وراحمنا ربي بذا البقاله اللي توصل..

ريما: اسالي امي و ريهام يمكن يبوون شي ..

ديما :طيب ..

دلال:رنا ميب جايه؟؟؟

ريما:مدري والله يمكن عاد رجلها سلطه

دلال:غريبه عاد شكله حبيب

ريما:حبيب بس مو على كيفها بكلش

دلال:ولييه تلقين اللحين رجــال على كيفك أصلا شينه في حقه لازم يصير له كلمته

ريما:أكيد أجل وشوله سموه رجــال بس يعني ما يطلع من البيت كثير

دلال:توهم معااااريس عاد بيمل وبيطلع

ريما:ههههه يمكن ..









............









في شقة رنا اللي ميب بعيده عن بيت اهلها في حدود الحارة قاعده تتقوى مع رجلها..

رنا:تصدق عن اهلي غداء اليوم

زيد: غــــــريبة ما رحتي اليوم ؟..

رنا: هذا جزاي سافهتهم..!

زيد مبتسم:عشاني يعني؟ ..

رنا:ماااالت الشرهه موب عليك على اللي يكلمك >>وتذكرت كلام لطيفه خالتها

رنـا :إيــه عشــانك عشان ميييين أجــل !..

زيد:متاكده انك رنا ؟؟..

رنا:لا خيالها ..

زيد:هههههههههه حلووووه

رنا :في شي يضحك..

زيد: انتي من قصتي شعرك وانت ولو ..!

رنا شالت الريموت لفت عنه بزعل:أحلف بس..

زيد: رنوووو

رنا:..........

زيد:رناااااااا

رنا :..........>>لارد

زيد:رنووووووووووو

رنا:خيير..!

زيد: محليتك القصه..

رنا بنص عين: متاكد انك زيد ؟..

زيد:ههههههه لا خياله ..

رنا: ماتضحك..

زيد:ههههههههه انا بروح الاستراحه تبين اذبك عن خوالي ؟..

رنا : وش اذبك قل اوصلك أحطك ..

زيد:طيب تبين انطلك عند خوالي ؟..

رنا:ههه العربجي عربجي لو غيير اسلوبه..

زيد:ههههههههههه مثل حلووو قل مفعول القصه

رنا:بدينا

زيد وقف:هههههه لا بتروحيين ؟؟

رنا : بدق عليهم عندهم احد رحت ما عندهم عندي غسيل بقعد ..

دق جوال زيد وارتبك استاذن وطلع بسرعه..



استغربت رنا وما خذت في بالها ودقت على اهلها وقالوا عندهم دلال قالت بروح من زمان عنها

وعن هبال اول..







..............









عند البنات ..على المغرب ..

"ما جت البقاله"

ديما:لا جعله المر ما جا..

دلال تستانس مع بنات عمها لانها تكون بسيطة بينهم بعكس بنات خوالها اللي رسميه برسميه..

ريما: دلول وش صااار على فلمك ؟؟..

دلال: فاتكم شيييييييي ..

ريما:هندي عاااد ما يعجبني هواية ديما ..

ديما: ياحبي لهم بسس من البطل؟؟

دلال: ذاااك وش اسمه ما ذكرتيه ..

ديما:لا عاااد ذكرته اي واحد؟؟

دلال: ابو عيون خضر

ديما:اي؟؟؟

دلال: اللي سكر سحابها >>في الفلم..

ديما:ايييييييييييييييييه عرفته

ريما:هههههههههه الحمد عرفتيه بالسحاب

دلال:علامة الجوده حبيبتي..

ريما:والله فاضيين رنا بتجي اللحين..

دلال:والله من زمان عنها ..

ريما:بتجي عشانك..

دلال :ياحبي لها..

دخلت ريهام بسرعه: ديما البقاله عند الباب

ديما: صدق وين راااكانوه

ريما: عند امي ..

ديما:خله يجـي تبين أطـلع له أنــا ..

ريهام:طيييب لاتصاارخين ..







.........







في بيت ابو فيصل الهدوء يعم البيت دلال الصوت اللي فيه في بيت عمها والعيال كالعاده ..

دخل فيصل بعد صلاه العشا ..

فيصل :السلااااااااااام عليكم ورحمة الله وبركاته

:وعليكم السلام..

فيصل: غريبة البيت هدوء وين بنتكم ؟؟..

ام فيصل : ياحبي لها عند عمك..

فيصل: بلحالها ؟؟..

ام فيصل : ايه بتنوم..

فيصل : ليييييه !غريبه يبه وافقت ؟..

ابوفيصل : عند عمها محد غريب وولده مسافر وطالبتها مني ريما وما ارضى اردها وهو يبتسم لولده..

فيصل الله يستر من هالابتسامه:انتى ادرى !وبندر وينه ؟؟..

ابوفيصل: بندر هايت مع اصديقاه مدري متى بيركد ذا الولد

ام فيصل :خله يوسع صـــدره ..

ابو فيصل : ما خربه الا دلعك..

ام فيصل :لا اله الا الله ..

فيصل:يمة ما فيه عشا مييييت من الجوووع ..

ام فيصل:بسم الله عليك الا فيـه كل خير خلني اقولها (الشغاله)..







............







"اشم ريحه خياااانة"



دلال:رنووووووووووو هلا والله

وقامت تسلم عليها وهي مشتاقة لها من تزوجت وهي ما تشوفها الا في المناسبات..

دلال: وش اخبارك من زمان عنك اعرستي وغطستي ؟؟..

رنا:ههههههه وش اسوي جامعه وبيت وجدري واللي تبين ..

دلال:ههههه ياحبي لك..

رنا تناظر خواتها اللي ماتحركوا من اماكنهم عند مبارة ومبين من ديما داخله جوو وريما قاعده تقشم حب

رنـا:ورى ما تقومون تسلمون يا عماتي ؟؟

ديما من دون ما تلتفت:امس عند امي منيره حلى هو >>السلاام ..

رنا:وجع استحي..

دلال:ما عليك منهم مافيهم خير أنـا ما أكفــي ؟

رنا ههههههه تكفين وزود شخبار عمي وخالتي ؟؟..

دلال :بخير والله طيبين..

دخل راكان متحمس :رناااااااااااا ؟؟

رنا:هلا يا بعد اهلي وجـــدانـي هو اللي معبرني بس

راكان:متى جيتي ؟؟

رنا :اللحين..

راكان :وين هذاك..>>هذاك زيد حاقد عليه لانه اخذها من عندهم..

رنا:راااااح بعيد

راكان: أبله سلمى تسلم عليك مرررره

رنا: الله يسلمها ويسلمك ياربي ..وتبوسه..

ديما:دلاااااااااال ؟؟

دلال: هلا

ديما :مافيه احد من اخوانك يجيب الفلم..

رنا :اي فلم ؟؟

دلال:هندي روووعه

رنا :للحين على حركاتكم !

ديما :لين بكرة تحسب العالم اعرسوا معها

رنا :انتي ووجهك بس من زمان عن فلم هندي خبري به بالثانوي..

دلال:مغبره انتي ..

ديما:هااااه فيه أحد يجيبه..؟؟

دلال:والله مدري اشوف بندرودقت عليه وما عطاها وقت اقل من ثانيتين..

دلال: يقول منيب فاضي يتابع مباراتهم في المقهى..

رنا: من الهلال ؟ ما الوم زيد صاجني..

ديما:عاااالمي ياختي وهتلـــر !!

دلال:هههههههه تنكتين فيصل يجيب لي فلم والله لو على موتي..

رنا : ههههههههه منهوو هتلر؟عسـى فيصــل !ههههه مسيكين..

ريما المتأثره:اييي مسكين انتي ما شفتي شي !..

دلال:صادقه..

رنا:والله اول وش حليله حتى معي بس اللي شافه موب سهل >>رنا تدري عن السالفه..

دلال :يمـــــكن !!ادق اجل ؟..

رنا: دقي ما ظنتي يعيي ...بروح عند امي وابوي شوي وطلعت ..

ودلال ماسكة الجوال وتسمي مسبب لها رعب..

ديما لهت مع المباراة وريما عندها متحمسه بس تخفي حماسها:

ريما:حطي سبيكر

دلال:لا والله عشان تضحكين علي ؟

ريما:هههههههه حرام عليك بسمع التهزئ بس..

دلال: لا والله ميب تخر فيها نقب

ريما:هههه اقول انتي وامثالك اللي مدري وش تبي دقي بس ..

دلال:بسم الله دقت وحطت سبيكر....

فيصــل :الووو

دلال :هلا فصولي..

فيصل:فصولي في عينك اصغر عيالك انا ؟>>ناظرت ريما وفي نفسها فاتحة خيير !

دلال: وش اصغرهم الله يهديك انت الخير والبركة..

فيصل: تصدقين ..استغربت تفاعله معهــا وجارته

دلال:وشو ؟؟

فيصل: البيت هدووووء من غيرك متى تعرسين بس ؟..

دلال:مااااالت..

فيصل:نعععععععععم؟؟

دلال: اقول اذا اعرست بعرس ..>>1-1 فاصل ^^

فيصل عصب:وش تبييين ؟؟

دلال خافت : ولاشي..

فيصل :ليييش داقه اجل ؟؟

دلال: هاااه...لا....اييه وريما ماسكة ضحكتها ..

ايه كنت ابيك كانك فاضي يعني تجيب شريط من الصاله بنات عمي ودهم يشوفونه ..

فيصل: ووش الشريط ان شاء الله..

دلال بتردد:....فلم هندي

فيصل:اقول فارقي انتي ووياهم فاضيين..

دلال:مشكووور

فيصل:باااي وسكـر في وجهها

ريما: ياربييه كذا دايم معكم الله يعينك دلال..

دلال:ايه والله من تالي والا اول وش حليله

ريما بفضول:لييييش ؟؟؟

دلال :هاااه لا بس مدري والله !..







"قوووووووووووووووول"





نطوا:وجع روعتينا..



>>كانت ديما متحمسة مع المبـــاراة ^_^..









...........









وعند بيت ابو فيصل فاتح مرته بالموضوع:وش قولك ؟؟..

ام فيصل:والله مدري بنات خالد والنعم فيهم بس ان عارف راي ولدك !..

ابو فيصل :لين متى بنطاوعه السنين تمر ولازم ينسى..

ام فيصل :الشور له ولك انا ما لي كلمة..

ابو فيصل :اذا موب برضااه يصيـــر غصب عنــــه ..



.............

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1