غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 111
قديم(ـة) 16-05-2012, 01:45 AM
صورة دكتوره بصمتي الرمزية
دكتوره بصمتي دكتوره بصمتي غير متصل
©؛°¨غرامي مشارك¨°؛©
 
الافتراضي رد: خذني على قد عقلي


عقب ما خلص العرس..دشيت السياره..وعقبها بفتره بسيطه دشت عقبي قصايد..
اللي ماحبيت اطالعها..خفت لا انصدم من شكلها شرات ذيج المره..
وكان أخوي سالم..يسوق السياره..
وكل مره يقول بصوت عالي :
شو رايكم نقحص شوي..؟!! ولا اشل على تايرين..؟!!


سمعت قصايد تقول من تحت الغشوه :
لا الله يخليك..ماحب هالحركات..

ضحك سالم وقال:
والله بس علشانج..ولا انت يا محمد..دواك عندي..مب اللحين..


سمعت قصايد تقول بصوت خفيف :
شو بلاه سالم..؟!!


ضحكت وقلت وأنا عيني على ايدي :
لا ولا شي..بس ..


قاطعني صوت سالم وهو يقول :
تراني اسمعكم يا جماعه..يعني اللي يبا يقول شي ولا شي..ولا شي..
يأجلها عقب..

طالعته وقلت:
حشى مب أذون هذي..؟!! إلا رادار..

ضحكنا كلنا في السياره..وشوي همست لقصايد :
حبيبتي..ليش الغريب ما يا..؟!!

سكتت شوي وعقبها قالت :
مادري..يمكن حضر وانت ما شفته..

( سكت..وتنهدت..وقلت بخاطري : يمكن ليش لا..تراه يني..وكل شي منه معقول.. )
قلت لها بصوت خفيف.. :
يمكن ..ليش لا..

صديت ويهي واخذت اطالع من الجامه المخفيه..على هالزفه اللي من حولي..
الكل فرحان..والشباب ما قصروا بهالزفه الحلوه..
وأول ما دشنا البيت..ودشينا غرفتي..دشوا الأهل يسلمون ويباركون..وكانت قصايد متغطيه بالعباه..ولما بقت أمي آخر وحده..طالعتها وقلت:
ماترومي ترقدي ويانا اليوم..؟!!


ضحكت أمي وهي تقول :
هيه عسب تروغني بنص الليل..لا حبيبي..الله يوفجكم أن شاء الله..
( وطالعت على قصايد ) ومبروك يا بنيتي.. والله يفتح ابواب الرزق لكم أن شاء الله..ويالله تصبحون على خير..


عقب ما سارت..أمي..تجدمت صوب الباب وصكيت بالمفتاح..ولصقت بالباب وما تحركت..( قلت بخاطري : حرااااااااام واللحين وشلون اتصرف..؟!! ابلع الكولوريكس..؟!! )
وفجأه يت فكره براسي وقلت وأنا اصك الكهربا اللي تتحكم بإضاءة نص الغرفه :
شو رايج بس نسهر بهالإضاءه الخفيفه..أحسن يكون جو شاعري..

( لما شفت السكوت هو الرد الوحيد عالمكان قلت بخاطري : لايكون انتحرت وسوتها مفاجأه..؟!! )
قلت بجرب..بزقرها بدون ما التفت وانصدم واشوفها..وقلت بصوت خفيف..لأني خايف تسمعني :
قصايد..؟!!

صدمتني وهي تجاوبني من مكانها وبكل حنيه :
آمر حبيبي..؟!!


( قلت بخاطري : خلاص يا ريال..هذا أمر الله..وما على حكم الله اعتراض.. )
تجدمت صوبها..وعيني عالأرض..وأول ما وقفت..شفت فستانها من تحت وااااااايد حلو..تبعت بعيوني..فستانها ابتداء من تحت إلين فوق..وأول ما شفتها..انصدمت وصعقت باللي شفته..

شفت وحده بقمة الجمااااااااااااااال واقفه تحت هالإضاءه الخفيفه..تبتسم وعينها عالأرض..
( قلت بخاطري : لايكون صج سويتها..وانتحرت..؟!! ولا يكون أنا ميت اللحين..وهذي حوريه..؟!!.. اوهووو ..اصلاً اللي ينتحر ما يشوف الجنه..قال حوريه قال ) قمت اركض بسرعه..ورحت صوب الكهربا..
وأول ما بطلتها..تجدمت صوبها..وما رمت انزل عيوني وقلت :
انتي منو..؟!! شكلج مغلطه..يالطيبه؟!!


ضحكت وقالت:
أنا قصايد ماعرفتني..؟!!


حلفت وأنا عيني لاصقه فيها :
لا والله انتي مب قصايد..


ضحكت وقالت بدون ما تطالعني :
والله اني قصايد..

تجدمت منها..وأخذت اطالعها بسكوت..وعقبها قلت :
يمكن لما تسبحتي استويتي حلوه..؟!!


قالت :
شو..؟!! ما سمعتك..

رديت اعدل كلامي المخبق :
اقصد..لما سويتي حمام مغربي..وهالشغلات..وهالمكياج..الغاوي..استويتي حلوه..


ضحكت وقالت وهي مستحيه :
ليش مب حلوه بدون مكياج..؟!!


أشرت وقلت عفوياً :
حشى..مب حلوه ولا شي..


طالعتني وقالت :
شوو؟؟!

ضحكت :
اقصد..انتي حلوة..بلا مكياج..والحلو حلو..


( أخذت ادقق فيها..عقب ابتعدت عنها )
وقلت : لا..انتي مب قصايد..؟!!
قصايد..شكلها مب جذي..والله ان حطت سطل مكياج..ماتتغير..,لا يعدل فيها شي...
انتي منو..؟!!
لا يكون ينيه..؟!!

سكتت وهي تبتسم ..عقبها قالت بهدوء :
لا تطمن..مب ينيه أنا قصايد..واللي شفتها أول مره..هذي بشكارة بيت جيرانا وهي ترمس إماراتي..وحفظتها شو تقولك في أول مقابله..تقابلها..
لكن كل طلعاتنا وسوالفنا هذي أنا..


أشرت بستغراب وكنت خايف اني اصحى من هالحلم الحلو وقلت لها :
ليش سويتي جذي..؟!!


ضحكت وهي تطالع علي بستحا :
قلت اشوفك..بتآخذني حتى لو اني شينه..؟!!


( هني فتحت ضروسي لأني حسيت كنت كبير بيعنها..عالرغم ماتعرف كم دعيت ربي اني اتقبل شكلها خخخخخخخخ ) وابتسمت وأنا اسوي عمري رومنسي :
وشو شفتيني..؟!!


ضحكت وهي تنزل عينها :
شفتك..ريال تشتري أخلاق..مب جمال..كبرت بعيني تبا الصج..


( كنت أطالع عليها لدرجة أن من حلاها..صدعت..ونسيت حزن هاليوم كله..وقلت بخاطري : والله صج خذيتك على قد عقلك يالغريب وربحت أحلى بنيه طاحت عليها عيوني )

طالعتها وضحكت:
وبشكارة جيرانكم..معرسه ولا لا..؟!!

طالعتني وضحكت..وهي تيلس على الكنب :
ليش تباني اخطبها حقك..؟!!

ضحكت وأنا ايلس حذاها :
لا وانتي الصاجه..بس علشان ارسل بطاقة مواساه ...


( ضحكت قصايدعلى الخفيف..وهي متجنبه تطالعني..
عقبها قلت بخاطري : صج صبرت ونلت..صج يالغريب..ما قصرت..بس لما اشوفك..بطلب منك..تسلم على رفيجك..اللي اختار لي احلى بنت والله انها صج تغطي الينيه اللي كان الغريب يمتحني ويقولي اتزوجها خخخخخخخخ )


**********************************************

(( قصايد ))

مرت الأيام..ونحن نتمشى..ونروح من مكان لمكان..وفوق هذا كله..كان سؤاله عن الغريب ما نقطع..
ولا مره..

كان يعاملني بكل رومنسيه..ولا شي بخاطري إلا يابه وسواه..
حسيته من قلبه يحبني..
والله اني احمد الله اني خذيته..صج..ربي عوضني خير..
ويستاهل الثمن..اللي دفعته علشان هالزواج..وهالإرتباط..
صج..ضحيت..بعالم الجن..بس لازم..
ابي اعيش حياتي الطبيعيه..شرات أي بنيه..مالي ذنب بالظروف اللي حدتني على اللي مالي يد فيه..

بس معقول صج..أن ابوي اليني..بينقطع عني خلاص..؟!!
آآآآه..
صج قويه علي..انهم يختفون..من حياتي..
لكن..كان لازم يصير اللي صار..لازم..ترجع الأمور لمحلها..الصحيح..


**********************************************

(( محمد))

رغم أن قصايد طلعت فوووووق الوصف..وحبي لها يكبر يوم عن يوم..
لدرجة أني اشتاق لها وهي حاضره اكثر من انها غايبه..
لكن الغريب ما راح عن بالي..

كنت اعد الأيام والثواني..حتى يمر الشهر اللي قاله الغريب..
وبالفعل..
أول ما يا الشهر ..رحت وتعدلت..ومن القلب..وكنت حيل فرحان..
تجدمت مني قصايد وهي بذاك الحلا وقالت :
حبيبي..على وين بتسير..؟!! ليش هالتكشخ كله..؟!!


ضحكت وقلت لها:
معزوم..عند واحد من الربع..ولما ارد..بخبرج منو..هالشخص..

ابتسمت وهي تقول :
عادي حبيبي خذ راحتك..بس المهم..لا تنساني..حتى وانت وياه..

قلت لها..وأنا اتعطر :
انسى من اكون ولا انسى من تكونين..انتي حياااااااااتي..وكل مافيها..واكثر..

ضحكت وقالت وهي مستحيه.. :
بس خلاص..والله استحي..من هالكلام..انزين حبيبي ابطلب منك طلب ممكن..؟!!

أشرت على عيوني :
من عيوني آآآآآآآمري..وكل اللي تبيه تحت امرج..

طالعتني وهي مستحيه :
بسير ازور بنات الجيران ويانورة وخالتي..؟!!


من فرحتي..لأني بشوف الغريب..قلت لها :
عادي حبيبتي..خذي راحتج..بس داااااااااري على عمرج عدل..

ابتسمت وقالت وهي تظهر من الغرفه :
أن شاااااااء الله حبيبي..فالك طيب..والله لايحرمني منك أن شاااااء الله..



تركت البيت بكبره..وأنا مستعيل..وسقت السياره..بشوووق للغريب..
وأول ما وصلت للمكان..
ظهرت من السياره..وفصخت نعولي كالمعتاد..ومشيت..لين مكاني المعتاد..
وترييت الغريب..
وكل مره اقول اللحين بيظهر..بس للأسف لا ظهر ولا شي..
على آخر شي..شفت الوقت بدأ يتأخر..وقصايد كله تتصل.. قمت وأنا صج..زعلان..وخايف لايكون الغريب..
راح..ولا بيرجع مره ثانيه.. بس يارب لاتخليني اخسره..صج..ماودي اخسره..
ولو يني..شو يعني بيآكلني؟؟!
آآآآآآآآه يارب..
جبرت بخاطري بقصايد..فجبر بخاطري بالغريب..لا تخليه يختفي من حياتي..

*********************************************

(( قصايد ))

مرت الأيام..وكل يوم محمد يتأخر..برع البيت وكل ما سألته..قاال ويا الربع..
رغم انه مب مقصر إلا أن مزاجه متعكر..

تجدمت منه وقلت :
محمد..شو بلاك..؟!! حبيبي فيك شي..؟!!


طالعني..لفتره عقبها سألني وقال:
بتخبرج عن الغريب..شفتيه..؟!!


طالعته وقلت:
لا ..وانت تعرف الثمن..اني لما اتزوجك..ارتباطي بعالم الجن..يختفي..ولا كأنهم كانوا بحياتي..
وحاربت هالشي..وماصدقت اني حققته..شو تبا بالغريب..؟!!

وقف وهو يبا يظهر من الغرفه:
بس هو وعدني ايي..

قلت له قبل لا يظهر :
يمكن ماحب يودعك..وماحب يخبرك أنه ما بيشوفك مره ثانيه..


طالعني بنظره وقال بعصبيه :
برايه يبا يرد يرد..وعندي أمل اني اشوفه مره ثانيه..مهما طالت المده..

********************************************

(( محمد ))

كنت كل يوم اروح للبحر..لنفس المكان..ونفس الوقت..لكن الغريب..
صج..ما يا..
رغم خوفي انه ما يي..إلا أملي بالله قوي..وثقتي فيه قويه..ومتأكد..
ان مصيره يرد لهني..


مرت الأسابيع..ومر الشهر الثاني والغريب..ماله حس ولا خبر..
وشغلت نفسي بأمور الحياة وبديت..انجح في المشاريع اللي قدمتها ولله الحمد...
وزياراتي للغالي الله يرحمه ما انقطعت ولو لمره وحده..وحتى علاقتي قويتها..مع جابر ..
وزياراتنا..شبه متبادله..سواء أنا وهو.. أو زيارات عائلية ..


رغم هذا كله..لا تتوقعون أن شخصية كالغريب ممكن اكون نسيتها..بالعكس..
حتى كل ما كنت اظهر لأي مكان..كنت اتوقع اشوفه ولو لصدفه..
ولين ما اليأس احتل بقلبي..وقلت بخاطري.. معقول..
يكون صج بيقطعني ..؟!!
بس ماعليه..ان نساني..أنا منساه..وببقى متأمل اشوفه صدفه شرات ما تعرفت عليه بصدفه..
وهذا حال الدنيا..بصدفة تلتقي..وبصدفه تفترق..
بس عسى الله لا نفترق أنا والغريب..ولو بالدعااااااء..

*********************************************

مرت الأيام..بحلوها ومرها..لكن في هذا اليوم..
كنا يالسين يميع في المقلط.. كل مره نضحك ونسولف ونعلق على بعض....وعقبها وقفت أختي ايمان تغني..وحروب الأثول يود هالصحن..وصدق عمره انه ميود طبل..ونورة تغني..اونهم..
شو قالوا فرقة ميامي خخخخخخخخخخ
من حبهم لهالفرقه..طار عقلهم..فيها..

( ابتسمت وقلت بخاطري :
آآآآآآآه ياقلبي..وين ذيج الأيام )

طالعت على أخوي سالم..وقلت له:
تعرف شو بخاطري اللحين..؟!!

أخذ يفكر شوي..عقبها قال :
تغني معاهم..؟؟!!


ضحكت وقلت :
ويا راسك..مب معاهم..لا..بخاطري اللحين..اسير وآخذ العود..وادق بهالأوتار ..واسرح بخيااااااااالي لبعيد..مع بروغه..وميحد..وابو نوره..
واغني ليـــــــــــــن..


قاطعني وهو يبا يسير عند نوره أونه اشتاق لها :
ليــــــــــــــن ما تطلع اللي فيك من ينانوه..سير ويا راسك..قال عود قال..
بسير عند حرمتي..وبشوفها..وحليلها..تعبانه بهالحمل..ما يسوى عليها والله..


( شفته وهو متجه لغرفته صوب حرمته..ابتسمت وقلت بخاطري : اللي ما يعرف الصقر يشويه ياسالم..وأنت شو يعرفك بالفن الأصيل..كل ثانيه وثانيه نوره ونوره..خلك بنورتك..وخل العود لأهله وناسه يا شيخ..
احسن اقوم..اللحين وسير على غرفتي..وآخذ هالعود..مالي واسير للبحر..والله محد ينشد معاي بالمواوييل غير هالليل وقمره..
قمت من مكاني ورحت صوب غرفتي..وعقب ما دشيتها.. غيرت ملابسي ولبست لبس الرياضه ..وعقبها مديت ايدي وخذيت هالكاب ..وأول ما كنت بظهر تذكرت العود..وأخذت ادور عليه شرات المينون..من مكان لمكان )

إلين ما دشت قصايد..اللي شافتني وقالت :
شو بلاك..؟!!


أشرت لها وأنا امبطل الخزانه :
شفتي العود مالي..؟!!

قالت مستغربه :
ليش شو تبابه..؟!!

ضحكت عليها :
والواحد شو يبا بالعود..؟؟! يسولف معاه مثلاًً..؟!!
بسير يا بعد عمري وبدق بهالعود..إلين ماروي مزاجي..

طالعتني وهي تأشر :
ماعرف صراحه..بس يمكن في المخزن سير شوفه..؟!!


وأول ما كنت بظهر..شفت قصايد ميوده ايدي وهي تقول :
حبيبي..بسير مع نورة للسوق ..قالت سالم بيآخذها..عسب تتشرى كم شغله..
وأنا ابي اسير معاها..لأنها طلبت مني اختار لها ملابس للياهل..شو قلت؟؟!!


طالعتها :
انزين ..حبيبتي سيري..معاهم..وبطلي الصندوق اللي هناك..بتلاقي فيه بيزات..
خذي اللي تحتاي منهن..وماعليج..


وأول ما كنت بظهر طالعتني وقالت وهي تبتسم :
بآآآآآآآآآخذهن كلهن..


أشرت :
والله يفدنج كل البيزات..اللي بالصندوق واللي بذمتي بعد..كم قصايد عندي..؟!! غير وحده متربعه بالقلب..

قالت وهي تبتسم لي :
من قلبك هالكلام..؟!! ولا يالس تقردني علشان ما آخذ كل البيزات..؟!!


تجدمت منها..وحطيت عيني بعينها.. وقلت بكل حنيه :
والله انتي قلبي ونبضه..وكلي على بعضي حلالج..مب البيزات وبس..وصدقيني..انتي تآآآآآمريني امر..
ماتعرفي وشلون غلاتج بقلبي..


نزلت عينها وهي تبا تبعد عني :
عيل سير سير..خلاص..ماروم على كلامك..الحلو..لا عقب اهون عن السوق واسير وياك..


ضحكت وقلت لها..وأنا مستانس :
تعالي معاي..عالأقل..الاقي حد اغنيله..


ابتسمت وهي تعطيني ظهرها :
مره ثانيه..أن شاء الله..


كنت احاول اقنعها :
انزين تعالي معاي..وأجلي مشوارج للسوق..وأنا اوديكم عقب..
تعالي صج فرصه..اراويج مكاني السري..اللي عمري ماتوالفت وياحد هناك..غير عمي الله يرحمه..والـ.. ( سكت..وعقبها تبسمت وكملت ) الغريب..
المهم..
شو قلتي بتين ولا..؟!!


التفتت صوبي وهي مبتسمه ..واحسها بكل ثانيه احلى عن قبل.. :
لا حبيبي..مره ثانيه..


( ما حبيت اضغط عليها..رغم قربها..وااااااااايد يريحني يمكن عالأقل.. انها من ريحة الغريب..ترخصت منها..
واتجهت للمخزن..وأخذت ادور واقلب هالبيت بكبره ومالقيت العود..ولما عيزت..سرت..صوب سيارتي وظهرت من البيت متجه للبحر..
وأول ما وصلت..فريت نعولي..لبعيد..واخذت اركض..واركض من قلبي..الطقس كان اشبه بالنسيم البارد..صج كان روووووووعه..
وعقب ما تعبت..
انسدحت.. على التراب..وغمضت عيني ..وشوي شفت شي ينطق براسي..بطلت عيني .. )
لقيت الغريب يمد لي العود ويقول :
هذا اللي تدور عليه..؟!!


قمت من مكاني..وصخيت..الله العاالم كم كانت المده..كنت خايف يكون حلم وانش..لكني سمعته يقول :
على وين وصلت يا محمد..؟!!

أشرت من صدمتي :
هني..بس وينك..؟!!

ضحك وقال وهو يعلق علي :
يا مطول الغيبات..؟؟!!


تجدمت منه وسلمت عليه :
جاااااااااب الغنايم..


طالعته لفتره..وما حبيت اخوز عيوني عنه وقلت له :
تصدق..؟!! كان خوفي الكبير ما اشوفك..


ضحك وهو يمد العود لي :
لا تخاف..قطو بسبعة ارواح خخخخخخخخ
خذ العود مالك..سمعت انك تدور عليه..

ضحكت وأنا آخذه منه :
ما بسألك منو قالك..بس أكيد الينانوه..تراكم انتوا متواجدين مع الأنس بكل بيت..


أشرلي وهو يبا ييلس عالتراب :
شخبار قصايد..؟!!


ابتسمت من قلبي وقلت كأني تذكرت شي :
صــــــــــــــــــــــــــــح..ليش سويتوا فيني ذيج الحركه..؟!! ياييبين بشكارة جيرانكم..ولبستوها لبس قصايد..وقلتوا انها هي..
حرااااااااااااام عليكم..تحلمت فيها إلين ما لالالالالالالالالالالالاعت جبدي..
كرهتني بالحريم..
خخخخخخخخخخخخخخخخ

( يلست حذاه..وأخذنا نسولف كل مره عن شي..وخبرته اني رحت للمكان..وشفته مهجور..وتبادلنا كل شي صغير وكبير إلين ما الوقت سرقنا.. )
عقبها قلت له :
صج ما قلتلك ظهرت وحده بنص جسمها وكانت تبا تآكل اخوي سلوم..؟!!


ضحك الغريب وهو يعلق علي :
وحد قالكم تسيرون هناك..هذي من الجن..وتظهر اكثر شي للمسافرين..وعاد لو كانوا عددهم قليل..احتمال يكونوا عشاها..
تراها مب من الينانوه الصالحين..


سكت وأنا اطالعه..عقب قلت :
ياليتك مب من الينانوه..عالأقل..كنت رفيجي الوحيد..


ضحك وهو يأشر لي :
ليش منو قالك أني من الجن..؟!!

وقفت بعصبيه :
انت قلتلي انك يني..

أشر وهو يوقف :
لالا..انت اللي فسرتها ..وارجع بذاكرتك..وبتعرف اني ما نطقتها..لما شفتك فسرت اني من الجن..قلت بخليك بتفكيرك..
حتى اني قلت لك اني مره رسلت واحد بدالي هني وطقك..تحيد هالشي ولا لا..؟!!

( رجعت لذاكرتي..وتأكدت أن كلامه صج..استانست اكثر عن قبل )
وقلت بفرحه كبيره.. :
الحمد لله انك مب منهم والله صج فرحان بس يالغريب كل شي وعرفته.. وسر هاللثام..
للحين ماعرفته..متى بتخبرني..؟!!


تجدم مني الغريب وحط عينه بعيني وقال :
تبا تشوفني يا محمد..؟!!


هزيت راسي بكل ثقه :
هيه..


كمل كلامه متجاهلني :
متأكد تبا تعرف منو أنا يا محمد..؟!!


طالعته بخووووووف شديد..اكثر عن قبل :
هيه ..


مد الغريب إيده صوب الثام وبطل ويهه..وانصدمت لما شفته..وهو يخوز هاللثام..عن ويهه وقال بصوته الحقيقي :
هذا أنا..


انصدمت وقلت له:
معقووووووووووووووول اللي يالس اشوفه..؟!!
معقول الغريب هو انتي يا قصايد..؟!! وشلون..؟!!


ضحكت وهي تبعد عنها الثام عن ويها :
قلت قبل.. أني اجيد التقليد بس انت منتبهت..
والأهم من هذا كله..
انت ركزت على كل شي..إلا مفتاح السر..تجاهلته..


طالعتها بستغراب :
أي مفتاح سر..؟!!


ضحكت وهي تبعد القفازات عن يدينها ..وأشرت بأصبعها وهي تبتسم :
المفتاح الوحيد..والسؤال المهم اللي انت ما سألته..
شو اسمي لما تزورت اوراقي لإسم ولد..؟!!


طالعتها وضربت على راسي :
ااووووووه..صح..والله شو اسمج لما زوروا اوراقج..؟!!

أشرت بفخر :
الغريب..


كنت ساكت..واطالعها بصدمه..وهي تكمل كلامها :
ولما ظهرت وياك..في ايام الخطوبه وسويت عمري دفشه..ومعرف المكياج..
مثلت عليك بكل شي..كنت بتأكد..إذا بتتحملني ولا لا..
وإذا بتستحق اني ارتبط فيك أو لا..
بس ماعرفت ان غلاك بقلب كبر..صج..كسبتك يا محمد..


كنت مصدوووووووووم ومبتسم بنفس الوقت.. وأشرت لها :
وشلون ييتي..؟!!

ضحكت وهي تأشر ببراءه..صوب السياره :
كنت بسير عالسوق..بس ترخصت من نوره..وخذيت هالملابس الجاكيت والقفازات..والثام..وخذيت العود..اللي كنت خاشنه فوق مكتبة الميلس..وعقبها انسحبت على الخفيف من الباب الخلفي..ودشيت دبت السياره..وشوي أنت ييت..ودشيت السياره..وأول ما وصلت لهالمكان..استغليت الفرصه لما شفتك انسدحت..وعقبها خذيت العود..وييتك.. ( وأخذت تعلق على كلامي ) وكملت .. كنت برقد خخخخخخخخخ


خوزت عيني عنها شوي..وعقبها طالعتها وأنا اضحك :
انتي دااااااااااااااااااااااااااهيه.. معقوووووووول الغريب وقصايد هم نفس الشخص..؟!!
معقوووووووول طووووووول هالفتره اكون متزوج بالغريب..؟!!


ضحكت وهي تتجدم مني :
ليش ندمان..؟!! ما ودك اطلع الغريب..؟!!

ابتسمت من كل قلبي :
لالالالالالالالالالا والله بالعكس عالأقل اضمن وجودج ووجود الغريب بنفس الوقت..بس لازم اتأقلم بالوضع هذا..



( سكت..وأخذت اطالع فيها..كنت مصدوووووووم حدي ما كنت مستوعب..معقووووووول..يعني قصايد هي الغريب..؟!! والغريب هو قصايد..؟!!
فرحتي بانت بويهي..لأني ادركت في الأخير أن الحسبه وحده..وأن قصايد والغريب دومهم معاي يعني ما يروم الغريب يودعني.. )


طالعتها وقلت وأنا اضحك :
أففففف...؟؟!!
علشان جذي..كنتي تتنكرين..؟!! وما تيلسي حذاي وايد..وعمرج ما سلمتي علي إلا عقب مرتبطت فيج..حتى وانتي لابسه قفازات..



طالعتني...والقذله بدت تنزل من تحت الشيله..وهي تبعدها بأصابعها الطويله والبيضا :
هي نعم..شو رايك فيني اللحين..؟!!


طالعتها وأنا ايلس عالتراب :
حبيتج اكثر عن قبل..ضميت حب الغريب لحبج..وصرت احبج ضعف هالكون..


( يلست حذاي..ويلست وحطت راسها على كتفي وقالت..وهي تحط العود عند ايدي :
ابيك تقول أي شي بصوتك يالله )


ضحكت وقلت:
ونعيد سالفة محمد والغريب...؟!!


ضغطت على ايدي وهي تضحك :
تروم تقول خذني على قد عقلي..


( وسهرنا تحت ضو هالقمر..ومع هالبحر..وجوه..وكأني في حلم..
أن طوووول هالأحداث اللي صارت..كانت مجرد..مغامرات..علاء الدين..لكن إيد قصايد اللي محاوطه ايدي ..وراسها اللي ساندته على كتفي..وقذلتها اللي تلمس خدي..حسستني إني لو كنت حتى في حلم ما ريد اصحى..اريد ابقى أنا وهي والغريب )


النهــــــــــــــــــايه


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 112
قديم(ـة) 16-05-2012, 01:48 AM
صورة دكتوره بصمتي الرمزية
دكتوره بصمتي دكتوره بصمتي غير متصل
©؛°¨غرامي مشارك¨°؛©
 
الافتراضي رد: خذني على قد عقلي


تمت الحمد الله


شكرا الك انات الرحيل لتواجدك معي


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 113
قديم(ـة) 16-05-2012, 11:59 AM
صورة Anaat Al R7eel الرمزية
Anaat Al R7eel Anaat Al R7eel غير متصل
©؛°¨غرامي مجتهد¨°؛©
 
الافتراضي رد: خذني على قد عقلي / الكاتبة : سراب العين , كاملة


السلام عليكم ورحمة الله وبركاته

الصراحة الكاتبة تجاوزت الحدود يوم دخلت لعالم الجن .. عالم احنا ما نعرفه غلط انها تدخله وتصور لنا اشياء يمكن اللي يقراها يصدقها ><

ما حبيت هالجزئية من الرواية .. واول مرة ما احب شيء فيها ><

بس حبيت ان احساسي كان فمحله ^^

هههههههههههه

تسلميلي فديتج لانج كملتي لي الراية للاخر ..

وربي يعطيج العافيه ...



الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 114
قديم(ـة) 17-05-2012, 04:55 PM
صورة Princess Reem الرمزية
Princess Reem Princess Reem غير متصل
©؛°¨غرامي نشيط¨°؛©
 
الافتراضي رد: خذني على قد عقلي / الكاتبة : سراب العين , كاملة


روايه روووووعه تسلم الأيادى يالغلا .
فى أنتظار جديدك تحياتى لك .


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 115
قديم(ـة) 20-05-2012, 06:57 AM
صورة امجاد جده الرمزية
امجاد جده امجاد جده غير متصل
©؛°¨غرامي متألق ¨°؛©
 
الافتراضي رد: خذني على قد عقلي / الكاتبة : سراب العين , كاملة


ابداااع
تسلمين الله يعطيك العافيه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 116
قديم(ـة) 06-07-2012, 01:38 PM
صورة لمسة خيال" الرمزية
لمسة خيال" لمسة خيال" غير متصل
©؛°¨غرامي مجتهد¨°؛©
 
الافتراضي رد: خذني على قد عقلي / الكاتبة : سراب العين , كاملة


أحــــــــــــــلى روايـــــــــــــــــــــه..

مافيها حب وغــزل وخرابيط..

بصراحه عشقـــــــــــــــــــــت الغريب + محمد ..يالباهم بسسسس ^^

بصراحه بشتآآآآآآآآآآآآآق لهم ...


تـــــــــشكـــرآآآآآآآآآآت ع النقل ..

ولاتحرمينا من جديدكـ,,

مودتي ~*

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 117
قديم(ـة) 13-01-2013, 05:55 PM
صورة الرومانسي منسي الرمزية
الرومانسي منسي الرومانسي منسي غير متصل
©؛°¨غرامي فعال ¨°؛©
 
الافتراضي رد: خذني على قد عقلي / الكاتبة : سراب العين , كاملة


الرواية حدها تينن

الرد باقتباس
إضافة رد

خذني على قد عقلي / الكاتبة : سراب العين , كاملة

الوسوم
الروايات , العالم , اروع , خذني , عقلي
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
الجلوكوما ( اللص الصامت ) آلنٌهَى صحة - طب بديل - تغذية - أعشاب - ريجيم 9 02-06-2008 05:21 PM
الأدلة الشرعية في العين من الكتاب والسنة قمرهن مواضيع إسلامية - فقه - عقيدة 12 18-05-2008 06:53 AM
أمراض العيون بقايا جسد صحة - طب بديل - تغذية - أعشاب - ريجيم 4 15-05-2006 11:43 AM
جفاف العين زهرة القمر صحة - طب بديل - تغذية - أعشاب - ريجيم 10 03-02-2005 02:39 AM
الفحص الدوري للعين في مرحلة الطفولة مهم للغاية . حايزالمجد الطفل - الرضاعة - التربية 4 27-01-2005 07:59 PM

الساعة الآن +3: 10:42 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


تصميم دريم تيم

SEO by vBSEO 3.6.1