رونق انثى ©؛°¨غرامي جديد¨°؛©

اخواتي الغاليات


حبيت اطرح لكم روايتي الجديده الي اتمنى من كل قلبي انها تعجبكم

واتمنى فعلا انكم ماتبخلون علي بردودكم وانتقاداتكم

شاكره ومقدره لكم قراءتكم للروايه

اختكم

رونق انثى

رونق انثى ©؛°¨غرامي جديد¨°؛©

:::::::::::::::::::::::::::::::::::::::::::::::::: :::::::::: ::::::::::::::::::::::::::::::::

الفصل الاول

كانت هاللحظه مؤلمه بالنسبه لها,لحظه تمنت انها تكون حلم او خيال, تمنت انها ماانخلقت ولا شافتهم في مثل هذا الوضع, وفي هاللحظه داست وبكل قوه على قلبها واقسمت بكل اصرار انها تنتقم منه راح تدمره مثل دمرها راح تحرق قلبه مثل ماحرق قلبها على
أمها وأبوها

هزها جدها بكل هدوء ودموعه تنهمر على وجهه الي كساه الحزن والقهر وبصوت ممزوج بعبره
...الجازي اسمعيني وانا ابوتس
حاولت تقوى وتكتم حزنها وحسرتها داخلها
...ماتت صح ؟؟؟؟؟؟؟؟لحقت ابوي
ماقدر يتكلم دموع الفراق كانت اقوى منه
مسحت بأصابعها المرتجفه دموعه
....لاتبكي يبه راحوا لمكان احسن واطهر من الدنيا راحوا عند رب العالمين الي صابهم تكفير يبه صدقني تكفير من رب العالمين
متأكد انها تكابر وتحاول تكون قويه ومتيقن ان الالم والعذاب والقهر والضيم يحرق قلبها حرق لايمكن لأي شي انه يطفيه
حظنها بكل قوته ومسح على راسها بكل حنان
.......ابكي وانا ابوتس ابكي لاتخلينها في قلبك

:::::::::::::::::::::::::::::::::::::::::::::::::: :::::::::: :::::::::::::::::::::::::::::::::

بعد 7 سنوات
بمستشفى العالي الطبي
بقسم المحاسبه والاداره العامه

جالسه على الكرسي بمكتبها وسط الغرفه الي تتشارك فيها مع زميلاتها شارده وسرحانه بأفكارها الجنونيه وذكرياتها الحزينه الي ماراح تتخلص منها الا اذا خذت بثأر امها وابوها
وشافت العذاب بعيونه
وقتها بس راح تعيش حياتها بسعاده مثل ماكانت قبل
بس متى بيجي هااليوم يا.......
انتبهت لنفسها وتنهدت بصوت عالي ورمت بعصبيه كاس المويه باالارض وتناثر القزاز بسهوله عليه
والله بكسرك مثله وانثرك متحطم مثله بالضبط ياحمود العالي مااكون الجازي الأيام بينا

....اقطع يدي يامنور هالبنت يامريضه نفسيا والا فيها علة او بلاء شفتي كيف تتصرف لنا سنه كامله معها ماعمرها سولفت أوضحكت معنا وكل كلامنا داخل حدود الشغل مادري هالبنت كيف عايشه
...احمدي ربك على الصحه والعافيه وقصرتي صوتك لاتسمعك بعدين بالطقاق الي يطقها جعلها ماتتكلم معنا ليوم الدين.اصلا هالشخصيات هذي مااحبها تجيب الهم والكآبه استغفر الله العظيم
..تصدقين منور يقولون الأذكياء مره كذا يصيرون منعزلين عن الي حولهم سمعت انها متخرجه من الجامعه معدلها 4,95 قسم محاسبه غير دبلوم الكمبيوتر الي دارسته
...بس الغريب انها توظفت هنا براتب قليل بالنسبه لشهادتها مع اني سمعت ان كذا بنك عارض عليها الشغل معهم بس رفضت
...اخخخخ يالقهر والله لو اني بدالها تركت المستشفى بأقرب فرصه بس تلوميني ان قلتلك انها معقده ومريضه الله يخلف علي بس

كل كلامهم وصل لمسامعها بكل وضوح ومع ذلك ماأثر ولا حرك فيها شعره بالنسبه لها شغلها بالمستشفى مسألة وقت لين مايصير الي تبيه وبعدها بتتركه بدون رجعه
.................................................. .......... ...........................................
في بيتهم الصغير ماتتجاوز مساحته الـ 350 متر
بالمطبخ
بصوتها الطفولي وببراءة وجهها : خاله ا لله يخليك العبي معي بابا سليمان نايم
بقلة صبر ردت عليها :سحووور بعدي عن وجهي مالي خلق ثقالة دمك ماتشوفيني مشغوله
بعفويه واصرار منها :بس شوي الله يعافيك
ماقدرت تتحملها اكثر من كذا وبصوت عالي: ماتسمعين صمخاء قلتلك لا يعني لا مخك تنك ماتستوعبين

قاطعها الصوت الي جاهم من بعيد

سحوووره حبيبتي روحي جيبي عروستك انا بلعب معك

طلعت تركض تضمها بفرحه : هياااااااا خالتي سوسو اخيرا احد بيلعب معاي
نزلت لنفس مستوى طولها وباستها على خدها وبابتسامه حنونه: في احد مايحب يلعب مع احلى بنت بالدنيا روحي بسرعه جيبي عروستك

راحت لأختها بالمطبخ وباانزعاج منها: صيته وش فيك على البنت حرام عليك تصرخين عليها ماتبين تلعبين معها بكيفك بس مهوب بهاالأسلوب ترى الاطفال احباب الله

باستهتار: وعليكم السلام يااختي! الناس يدخلون يسلمون مو يلقون محاضره على طول وبعدين معصبه بلاها ناشبه فيني العبي معي والعبي معي فاضيتلها انا خلقه راجعه من الجامعه حايمه كبدي وتعبانه وعل طول نصيت المطبخ اصلح الغدا مالي خلقها ترفع الضغط
...: بلى حركاتك معها ترفع الضغط حرام البنت يتيمه
صيته: لا ياشيخه احلفي! الي يشوفك الحين يقول جالسه اتقهوى مع امي وابوي والله حبيبتي كلنا ايتام مهيب هي لحالها هي على الأقل عندها ابوها المحترم خليه يلتفت لها ويهتم فيها شوي مهوب راميها علينا انا الي نتحملها و نهتم فيها
ساره:اولا ابوها زوجك قبل لايكون ولد عمك ثانيا اتذكري يااختي الكبيره انه ماقصر معنا بشي ومم...
قاطعتها صيته ببرود : خلاص خلاص لاتبدين اسطوانتك المعروفه عنه واذا كان معجبك وجايزلك لهاالدرجه خذيه حبيبتي متنازله فيه لك ماعندي مانع اكون مطلقه للمره الثانيه
ساره بعصبيه: هذا ردك عي صدق الكلام معك ضايع الا ابوي سليمان غريبه نايم ماتغدى..وبخوف.. لايكون بس تعبان
صيته: مافيه الا العافيه يقول اذا جت ساره من المدرسه نتغدى جميع روحي قوميه على مااجهز الغدا واحطه لكم
ساره بنص عين: وانتي؟؟؟
صيته: مااشتهيته الحين اذا رجعت الجازي من دوامها تغديت معها
.................................................. .......... ........................................

بالمستشفى
.... استاذه الجازي الدكتور محمد طالبك بمكتبه وطلب تجيبين معك كشف عن دخل قسم المحاسبه
عدلت نقابها وخذت الملف وطلعت وبدت ترسم ملامح الحب الوهميه بعيونها
وصلت لمكتبه
طق طق طق
... تفضل
وبصوتها الانثوي الي يعشقه:نعم دكتور طالبني؟
طالعها بنظرات عشق صادقه : الجازي وبعدين لين متى هالبرود الي محتويك ادق عليك امس وماتردين ليه مااشوف الا الجفا منك
الجازي:امس كنت مشغوله و...
قاطعها وقام من كرسيه وراح لها ووقف قبالها وبتنهيده طالعه من قلبه: انتي بس علميني وش تبين يا الجازي انا مالفيت ودرت عليك انا صارحتك بكل صدق بشعوري لك تدرين اني احبك وانتي بعد تحبيني ليه نعذب انفسنا اكثر من كذا قلتلك بخطبك من جدك بس رفضتي افهميني ابيك لي بالحلال ابي اشوف خلق ربي الحسن فيك بس بالحلال
بمشاعر كذابه رسمت بكل اتقان مشاعر الحب والعشق بعيونها: تدري اني احبك ليتني بس احبك يامحمد الا مكانك بقلبي تعدى الحب بس انت اصبر علي شوي عطني وقت لين تتحسن ظروفي عندنا كذا مشكله بالبيت متى ماانحلت صدقني انا الي بقولك يالله تعال اخطبني
ذاب من كلماتها له كل شي فيه يعشقها حس انه ماراح يقدر يمسك نفسه اكثر من كذا
........حبي روحي بحفظ الله لمكتبك وانتظري اليوم اتصالي
وباستغباء منها: طيب والكشف الدخل الي طلبته
راح لمكتب:مجرد عذر
فهمت حركته وطلعت طلعت والحقد بداخلها بدا يكبر ويكبر وبضحكة سخريه منها
هه ادري مالك ذنب يامحمد بس ذنبك الوحيد ابوك

وقفت فجاءه بعد مالفت نظرها من بعيد تأملته وهو يتكلم مع موظف بالقسم
واقف بشموخه وهيبته بمظهره اللي ينطق بكل معاني الرجوله والسلطه والسيطره
طويل و ملفت للنظر غير ملامحه الخشنه المعروف فيها
تدري وواثقه انه غير محمد اخوه هو بالنسبه لها العقبه الصعبه بطريقها تعرف انه من النوع الرجال الغامض الي تصعب معرفته ومعروف عنه انه مايحب ولايطيق استغفال غيره له

الدور جايك يافهد قريب صدقني قرب
:::::::::::::::::::::::::::::::::::::::::::::::::: :::::::::: :::::::::::::::::::::::::::::::..


حفيداته بالنسبه له روحه وحياته ودنيته تحمل فراق زوجته وعياله بس عشانهم عشان يبقى لهم ويحميهم ,غرقهم بحنانه وبعطفه وبكرمه عليهم صار بالنسبه لهم هو امهم وابوهم وصديقهم كل وحده فيهم تشكيله اسرارها يسمعهم بتفهم وباانصات عمره مابنى بينه وبينهم حاجز الخوف والرهبه منه
....جعل يدياتس وانا ابوتس ماتعرض على النار ماقصرتي على الغداء الزين بس كان ماتعبتي عمرتس وانا ابوتس جايه من جامعتس تعيبانه ترى لو تسويلي شي خفيف منيب اخالف عنه بااكله
باست يده و بحب كبيرله : ان ماتعبت لك اتعب لمين يبه اهم شي بس جازلك
باابتسامته الحنونه: وشلون مايجوزلي وانتي ياصيته الي مصلحته وين يجيتس الردى معه طالعه سنعه على امتس الله يرحمها
ساره تقاطعه بترجي : يبه سليمان خلاص لاتزعل انا بس الي قهرني ليه تدق عليك وش دخلها فيك انا حاطه عندهم رقم الجازي لا وتهددني تقول ترى بلغت جدك عن استهبالك بالفصل
ابوي سليمان بتفهم: انا مازعلت بس وانا ابوتس صرتي حرمه في التوجيهي مهيب زينه المشرفه تدق علي وتشتكي منتس
قربت من جدها :سلومي والله ماقدرت امسك نفسي من الضحك الفصل كله ضحك عليها انت بس تخيل الموقف معي التفتت ابلة التاريخ تكتب على السبوره وشفنا تنورتها من ورا منشقه فقالت لها وحده من البنات
استاذه دكانك طالع وبابه مفتوح جلسنا نضحك وهي طلعت من الفصل تبكي فنزلونا الاداره وخيرونا يانكتب تعهد او يتصلون بااهلنا انا قلت اتصلوا على بالي بيكلمون الجازي مهوب انت
حب انه يجننهم ويمزح معهم: والله وانا ابوتس عندي نيه اخطب مشرفتكم الي اتصلت علي ماشاءالله صوتن حلو شكلها مزيونه
صيته وساره بصوت واحد:لللللللللللللللللللللا
ساره مصدقه وخنقتها العبره: لاااااااااااه انت سوها بس والله لااموت نفس تبي تتزوج عشان تاخذك منا وبدت تصيح
صيته بجديه: اذا بتتزوج خذلها بيت لحالها مااتحمل اشوفك مع غيرنا بعدين لو لك نيه تتزوج المفروض اتزوجت من زمان مهوب الحين
ساره وهي تبكي: تبي تحضر عزاي وتوقف عند قبري تزوج
ابوي سليمان بضحكته الي ملت البيت:ههههههههه صدقتوا اني اعرس هههههههههههه اجل بتموتين ياسوير هههههههه
ساره ماصدقت: احلف انك تكذب علينا
ابوي سليمان: هههه والله العظيم مهبول انا اعرس ياحليلكم ههههههه
صيته باابتسامه : اشوى طاح قلبي
ساره وهي تحظنه: لاتفكر بس انك تبعد عنا ترى مالنا بالدنيا غيرك تبي تخلينا انت بعد
ابوي سليمان يمسح عل شعرها: انتي اعقلي بالمدرسه عشان مشرفتس المزيونه ماتتصل علي المره الجايه ماضمن نفسي الشيطان شاطر
صيته باانفعال:ييـــــــــــــــــــــــــــــــــــــــ ــــــــــ ـــه خلاص كل منك يا سوير انتي ساس البلا
ابوي سليمان: خلاص ياورداتي عشان دموعكم الغاليه علي ابعشيكم اليوم برا

:::::::::::::::::::::::::::::::::::::::::::::::::: :::::::::: :::::::::::::::::::::::::::::::::
واقف بسيارته برا المقبره تحت سورها الكبير متردد بخوله جوا ومستغرب اكثر كيف جاء معقوله فكر يجي قبرها ويسلم عليها ويدعي لها طبعا لا
جلس يتمتم بكلمات تعود سور المقبره انه يسمعها
خاينــــــــــــــــــــــــه خاينـــــــــــــــــــــــــــــــــه
رفع صوته اعلى واعلى بهاالكلمه يصاحبها تنهيده نابعه من اعماق نفسه مسح الدموع الي حاولت تنزل من عينه
كانت في ال20 سنه لما تزوجها منحته من حياتها سنتين عاشها معها بحب وسعاده وبغلطه منها غيرت حياته وحولته من رجال منح قلبه وعواطفه لها بدون تحفظ لرجال قاسي ماله قلب
وبوقفته عند المقبر تجدد غضبه وحقده القديم من تحت الرماد حامل معه ذكريات كان يعتقد انه دفنها من سنتين مروا على وفاتها ذكريات كانت ومازالت حيه في نفسه ومؤلمه بنفس الوقت
حرك سيارته بعد ماتعوذ من ابليس ورجع للبيت
بعد دقائق
وصل ودخل بهدوء مايبغى احد يحس فيه خصوصا بنته سحر
فأجاءه صوت من وراه
.....مشعل
جمد بمكانه لما سمع صوتها الناعم صوت يحاول يحمي اذنه منه
وبدون مايلتفت عليها وبصوت عنيف سبته ظهورها الي فأجأه
..نعم فيه شي
حاولت تمسك اعصابها من ردة فعله وبصوت حاولت يكون هادي
..ابوي سليمان سمع صوت باب الشارع يتسكر فعرف انه انت وقالي روحي ناديه
ومشت بمشية الشموخ والثقه الي معروفه فيها وتعدته عشان تطلع فوق وقبل ماتطلع لفت عليه وبنضره تستفز
وبصوت السخريه صاغيه فيه: على فكره ياابو سحر ياريت تهتم ببنتك شوي لاتتكل علينا حدنا انفسنا وابوي سليمان مو ناقصين غيرنا!!!!!!!!!!!!!!!!!!
:::::::::::::::::::::::::::::::::::::::::::::::::: :::::::::: ::::::::::::::::::::::::::::::::

شعـ((الحلوهـ))ــوله ©؛°¨غرامي مجتهد¨°؛©

بداايه مره مشوقه يالغلا تسلم اناملك ومنتظرين البارت الجاي بحماااااااااااااس
الجازي شكلها مره حاقده واحس انو فهد هو البطل اتوقع انو الجازي بتحبه >>خلي تواقعتك لك خخخ<<<
محمد مااظن تتزوجه الجازي شكلها تبي تخلي الاخوان يحبونها وتعذبهم الاثنين عشان تفرقهم وتقهر ابوهم
ياربــــــــــــــــــــــــــــ البارت الجاي يكون قريب بليز لاتتأخرين علينا يالغلا
واااااااااااااااااااااو احلى شي اني اول وحده ترد عليك

سجينة حب ©؛°¨غرامي ذهبي¨°؛©

.
.

يآهلآ فيك عزيزتي
بدآيه مشوقه وجميله
يسلم ديآتك يآرب
منوره آلقسم ^،^

في آنتظآر آلتتمّه :)

.
.

الزعيـ A.8K ـمه δЯέαмş
مستشــ¸.·* غرام *·.¸ـــاري

,’



بســم الله


يعطيك العــآفية
بدآية حلـوة
أتمنـــى لك التوفيق




لـ الجميع
http://forums.graaam.com/96290.html


,’

VEN!CE يـآرب مآلـي ســـوآكـﮯ

’,



<< يـاويله من انتقـام الانثـى
الله يعطـيك العافيه
ومنــورهـ القسم

موفقهـ



’,

~نيلٌوفر~ ©؛°¨غرامي مجتهد¨°؛©

بدايهـ حلوة موفقهـ إن شاء الله
مشكوووووورهـ حبيبتي

آلشقرآ .~ ©؛°¨غرامي ذهبي¨°؛©

..


بدآيه موفقه يارب

يعطيك العافيه ..

بالتوفيق


..

غريبة حالتي ©؛°¨غرامي مشارك¨°؛©

بداية مشوقة قلبي
أتمنى ماتقطعينها
وتكملينها

& أحــــــبــــــك & ©؛°¨غرامي مشارك¨°؛©

بداية موفقة ... ياالغلا

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1