بنت أبو ظبي ©؛°¨غرامي مبدع¨°؛©

الحلقــــــــــــــــــــة السادســــــــــة
ــــــــــــــــــــــــــــــــــــــــــــــــــ ـــــــــــــــــــــــــــ

طلبنا انا وعمر نفس الطلب ..وعلى بالي ما يي الطلب مسكت اعلان وقعدت اقراه ..وعمر لاهي بتلفونه .. فجأة رن موبايلي ..لقيته خالد ..
ماني راد عليه ..
مع إلحاح صوت التلفون ..طالعني عمر بانزعاج وقال ..
عمر: اشرايك ترد عليه ؟؟
بادلته النظرات وقلت بعناد ..
غيث: مابي ..
عمر: انزين صكه او حطه سيلانت ..ازعجني ..
حطيت الموبايل سيلانت ..ورديت للاعلان ..
هالمرة سمعت صوت مسج ..بطلتها ولقيت خالد دازلي ..
" مو وقته الزعل ..ابي اشوفك ضروري "
أففف ..وانا مابي اشوفك غصب ..
طنشت الرسالة ولو ان فيني فضول بس بطقاق ..
طالعني عمر وقال ..
عمر: ليش ما ترد على اخوك ؟
طالعته باستغراب ..
غيث: اشدراك انه اخوي ؟؟
ابتسم عمر واشر على ويهه وقال ..
عمر: من تعابير ويهك عرفت ..
غيث: ساحر مو بني آدم ..
ضحك عمر وقال ..
عمر: اسم الله علي ..قول ما شاء الله ..
ابتسمت وانا اقول ..
غيث: ما شاء الله ..
ورد التلفون يرن ..ورديت طنشته ..
بس عمر ..اخذ التلفون ورد عليه ..
عمر: هلا خالد ..انا عمر رفيج غيث ..ئي لحظة كاهو ..
ومد ايده بالتلفون وعطاني اياه ..
تنهدت بعصبية وطالعته بحقد ..واخذت التلفون ..وقلت ..
غيث: نعم ..
خالد : نعامة ترفسك ..سنة على بال ما ترد ؟؟
مارديت عليه ..فقال ..
خالد : يعني زعلان انت ويا ويهك؟؟
وهم ما رديت ..
خالد : خلاص آسفين وحقك علينا .. انت الحين وينك؟؟
قلت من غير نفس ..
غيث: بالمطعم ..
قال خالد وهو يقلد صوتي بطريقة خلتي ابتسم ..
خالد : بالمطعم؟؟!!
رد لصوته الطبيعي ..
خالد : انزين اسمع ..بعد ما تطلع من المطعم ابي اشوفك ضروري ..سامعني ؟؟
غيث: ان شاء الله ..
خالد : يلا اشوفك على خير ..
غيث: مع السلامة ..
والله اشتقت لك يا خالد ..
وصل الطلب وسمينا بالله وبدينا ناكل ..
من زمان ما كليت أكل مثل الأوادم ..
قال عمر ..
عم: الله ..يازين الأكل ..من زمان ما كليت أكل مثل هذا ..
هزيت راسي بايجاب وقلت مؤيد ..
غيث: ئي والله ..الله يعين العزاب تلقى كل يوم اكلهم جبن ولا بيض وشاي ..
عمر: قول عن نفسك لو سمحت ..
طالعته باستغراب وقلت .
غيث: وانت شنو عيل ؟؟
عمر: ارمل ..
قلت وانا اكمل على كلامه ..
غيث: يعني عازب ..
هز راسه بالنفي وقال ..
عمر: يفرق ..العازب اللي عمره ما تزوج بس انا تزوجت ..
طالعته باستخفاف وقلت اتنطز..
غيث: انت قلت من أي كلية متخرج ؟؟
عمر: كلية الشرطة ..
قلت ونفس التعابير على ويهي ..
غيث: يعني مو كلية الأداب قسم فلسفة ؟؟
ضحك عمر ..وقال ..
عمر : لأ للأسف كنت ابي ادخل بس اخواني شجعوني على كلية الشرطة ..
غيث : ليش جم نسبتك ؟؟
عمر :بالثانوية ..88 %
ما شاء الله ..فقال ..
عمر: وانت ؟
غيث: 91%
وقف عمر عن الأكل وطالعني بانبهار فقلت وانا امسك القفشة واتهرب من نظراته ..
غيث: ادري شنو بتقول ..صايع اكيد ما رح يهتم بدراسته ..
ابتسم عمر وقال ..
عمر : اشدراك ؟؟
قلت وانا اهز جتوفي علامة اللامبالاة ..
غيث: لأن كل اخوي وخواتي ما توقعوا مني هالنسبة..قالوا اكيد غاش ..
طالعني عمر بتشكك فقلت بسرعة ..
غيث: ما غشيت والله شاهد ..
سكتنا شوي وقال عمر يغير الموضوع ..
عمر: خلص بسرعة عشان بعدها بنروح نتمشى عالبحر ..
غيث: اخوي يبيني ..
هد عمر القفشة وقال باهتمام ..
عمر : تصدق ودي اشوف خالد اخوك ..
قلت بتعجب ..
غيث: ليش ؟؟
عمر: ما أدري احس انه غير عنك ..باشياء وايد ..
ردينا على المقارنة ..انا ما صدقت طلعت من بيتنا عشان لا تقارن مرت ابوي بيني وبين خالد الحين عمر ؟؟؟!!
قرى عمر الأستهجان الي على ويهي فقال ..
عمر: اشفيك ؟
قلت باقتضاب ..
غيث: ولا شي ..
طالعني عمر بتفحص وقال ..
عمر : انا قصدي انه غير عنك بالصفات ..انا لسة ما تعرفت عليه بس حسيت انكم عكس بعض ..بس بطريقة تخليكم ثنائي رائع ..انت تكمل خالد وخالد يكملك ..
طالعته بانبهار وقلت ..
غيث: ارسطو شنو يصير لك ؟؟
ضحكنا وانا وهو وطلعنا من المطعم ..مسكت تلفوني ودقيت على خالد ..وتواعدنا على البحر ..التفت لعمر اللي كان يشغل السيارة وقلت ..
غيث : ابسط يا عم ..كاهو انا وخالد متواعدين على البحر يلا قطني البحر ..
عمر: ان شاء الله عمي ...
تحركنا ..وبعد ربع ساعة وصلنا البحر ..طلعنا من السيارة وبدينا نتمشى ..الجو بارد حيل..قلت وانا ادفي روحي ..
غيث: انت اشلون طالع بقميص وبدون شي بعد ؟؟
قال عمر بتفاخر ..
عمر: حبيبي انا خريج كلية الشرطة مو هندسة اتصالات ..يعني بنية جسمي اقوى منك ..
بدا يتفلسف ..التفت عنه وقلت وانا احاجي روحي ..
غيث : شوازينيغر الأخ ..
فقال عمر وهو يلعب بموبايله ..
عمر: سمعتك ..
ضحكت وقلت انا ابعد خصلة من شعري ..
غيث: هب عفية اذن ..خفاش .
بعَد عمر عني وقال ..
عمر: انت شكلك بتصكني عين ..قول ماشاء الله ..
قلت
غيث: لا تخاف عيني مو حارة ..
بعدها بيَن خالد ..لابس جاكيت بني جلد ..وقميص حليبي وبنطلون جينز ..ونظارة شمسية سودة ..
بس انا اقولكم شي ..رح يلاحظ الفقر اللي انا عايشه وتشوفون ..
تعانقنا انا وخالد عناق طويل ..
ما اقص عليكم مشتاق له قد تراب الشاطئ اللي جدامنا ..
قال خالد .
خالد : يا ظالم ..عشرة ايام ما اشوفك ..ولا حتى تسأل ؟؟
غيث: انا ولا انت .. شوف منو السبب اول ؟
خالد : بس ..بس ..قلنا آسفين ..عاد اذا انت ما تفهم عربي هذا شي ثاني ..
طقيت على ذراعه بالخفيف ..وقلت
غيث: لا انا ثقافتي يوغسلافية تصدق ؟؟
فقال خالد بتعجب ..
خالد :واو ..يوغسلافية !! عيل اشرايك انا تشيكية ؟؟
ضحكت على خباله ..والتفت لعمر وقلت
غيث: هذا عمر رفيجي ..اللي قلتك عنه ..
سلم خالد على عمر وبدينا نتمشى ..ونسولف ..فقلت ..
غيث: تصدق خالد عمر وده يشوفك ..ما ادري شلي جذبه فيك ؟؟
ابتسم عمر فقال خالد ..
خالد : يا اخي الريال يحبني انت شكو ؟؟ يلا يلا مناك..
ودزني ووقف يم عمر ..
فقلت ..
غيث: اشرايك بعد تروح معاه البيت ؟؟
فقال عمر..
عمر: ياليت ..
قلت بصدمة ..
غيث: لا؟؟
ضحكنا كلنا ..بعدها استأذن منا عمر وراح البيت لأني قلت له مسبقا ان خالد يبيني ..
بقينا انا وخالد فقلت ..
غيث: هذا عمرو راح ..يلا تحج..
التفت لي خالد وشال النظارة وخلاها فوق ..قال ..
خالد : اول شي ..شهاللبس اللي انت لابسه ؟؟
مو قلت لكم رح يلاحظ الفرق
قلت
غيث: ما عندي فلوس اشتري لبس ..
خالد : نعم ؟؟ تستهبل انت؟؟ ومعاشك وين راح بالله ؟؟
اوووه شقوله الحين ..طحت بالفخ ..قلت بتلعثم ..
غيث: معاشي ..أحم ..أأ ..
طالعني خالد باستغراب وقال ..
خالد : اشفيك ؟؟
سكت شوي ..قلتها مرة وحدة ..
غيث: افصلوني من الشغل ..
انصدم خالد وظل لثواني يطالعني ..وانا نزلت عيني الأرض فقال خالد ..
خالد : افصلوك من الشغل ؟؟ من متى ؟؟وليش ؟
اشلون تبيني اجاوب على كل هالأسئلة مرة وحدة ..فقلت وانا اقعد على الكرسي ..
غيث: افصلوني ..لأن ..لأن ..
تنهدت وقلت وانا امرر ايدي على شعري بتوتر ..
غيث: لأنهم عرفوا عن سالفتي ..
طالعني خالد شوي بعدها قعد يمي وقال وهو يطالع الفراغ ..
خالد : منو متى ؟؟
غمضت عيوني ورديت بطلتهم وشاركت خالد تأمل الفراغ .
غيث : من عشرة ايام ..
التفت لي خالد وقال ..
خالد : وليش ما قلت لي ؟؟
طالعته كأني اقوله انت تعرف السبب فقال ..
خالد : أها ..عرفت عرفت ..
سكتنا شوي بعدها قال خالد ..
خالد : الحين شنو رح تسوي ؟؟
هزيت جتوفي وقلت
غيث: ما اردي ..
وبعدها خيم على السكوت ..
تصدقون ما ادري شنو رح اسوي ..لا شغل ولا مشغلة ..وقاعد علة على رفيجي ..ودي ارد البيت عند ايمان وسارة ..اتحمل ثقل دم مرت ابوي وسخافة هاجر بس ارد ..
صح ..تذكرت ..
التفت لخالد وقلت ..
غيث: انت قلت لي تبيني بموضوع مهم ..خير ؟؟
تنفس خالد بعمق وقال ..
خالد :امي ..
ماتت ؟؟ عسى ان شاء الله ..
استغفر الله شقاعد اقول ..
قلت..
غيث: اشفيها ؟؟
خالد : تبي تزوج سارة ..
تزوج سارة ؟؟؟ صج استخفت هاذي ..حمدلله والشكر ..
كمل خالد..
خالد : وحددت موعد الزواج ..بعد ما تخلص عدتها ..
يعني بعد ثلاثة شهور ..قلت بعدم تصديق..
غيث: سارة ؟؟ سارة عاد ..انزين خل تزوج هاجر ..هاذي مو ويه دراسة ..اما سارة مستحيل توافق ..
التفت لي خالد وقال بهدوء غريب ..
خالد : بس هي وافقت ..
انصدمت ..وافقت ؟؟؟
غيث: وافقت ؟؟ اشلون ..ودراستها ؟؟
سارة مستحيل تضيع مستقبلها ..
خالد : امي تقول ان عريس الغفلة مارح يمنعها من الدراسة ..
سكت شوي افكر واحلل اللي قاله خالد ..
سارة تتزوج ؟؟ ان عبالي سارة ما رح تتزوج إلا لما تصير بروفيسورة ..مو دكتورة بس ..
فقلت لخالد ..
غيث: وانت موافق ؟؟
خالد : مو مهم رايي المهم راي سارة..
معاك حق ..
فقلت ..
غيث: والحين ؟؟
خالد: الحين ..انا اقولك انك معزوم على عرس سارة بنت جابر..
يتبع <<<

بنت أبو ظبي ©؛°¨غرامي مبدع¨°؛©

الحلقــــــــــــــــــــــــــــــــــــــة السابعـــــــــــــــــة
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ

مر يومين على انتهاء عدة امي ..واليوم يوم الأسود ..يوم اللي رح اتزوج فيه ..
دخلت على كوافيرة ..وعدلت لي شعري ومكياجي ..
تقدرين تغيرين من شكلي بس كا تقدرين تغيرين من نفسيتي ..
سمعت طق على الباب وكانت امي ..
دخلت امي وهي مبتسمة ..وباستني على جبهتي وقالت
امي : صدقيني يا يما مارح تندمين ..
صح ما رح اندم ..واضح..
ابتسم بتصنع وقلت ..
سارة : ان شاءالله ما اندم..
دخلت بعدها نورة رفيجتي ..وقالت
نورة : يه يه ..شهالزين ..شهالحلاة ؟؟
بعدي عني نورة مالي خلقج ..
استأذنت امي وطلعت ولحظتها التفت لي نورة وقالت
نورة : انا ماادري شنو اسوي عشان انسيج همج ؟؟
قلت بعصبية ..
سارة: ولا شي ..لا تسوين شي ..
قعدت يمي وقالت بحنان .
نورة: خلاص يا سارة ..انسي ..وعيشي حياتج ..
تنهدت بضيق ..وبدت شفايفي ترتجف ..دموعي تنزل ..
نورة: لا سارة ..اليوم ملجتج ..
اليوم مماتي ..مو ملجتي ..
جففت دموعي لأني سمعت صوت الباب يتبطل ..وكانوا هاجر وايمان ..
دخلت هاجر ..وسلمت علي وعلى نورة ..وقالت
هاجر: يلا سارة مانتي نازلة ؟؟
سارة : ان شاء الله بنزل ..
ونزلنا يميع ..ورحنا صالة الحريم ..وسلمت على المعازيم واللي يباركلي واللي تسلم علي ..واللي تحظني ..
وانا ابتسم بتصنع والألم ..
وياه وقت الزواج الفعلي ..
طق خالد الباب وطلعت له هاجر ..بعدها طلبت مني هاجر اني اطلع لخالد ..وطلعت ..
كان خالد واقف على الباب بس بعيد شوي ..طالعت ايده كان ماسك كتاب ..وهذا اكيد الكاتب اللي رح اوقع فيه ..
طالعني خالد بحزن فقلت ..
سارة : عطني الكتاب ..
اخذت الكتاب ووقعت ..
وقعت على موتي ..
وقعت على دفني ..
باسني خالد بين عيوني ..وقال..
خالد : حتى لو تزوجتي بتظلين سارونه حبيبتي ..اي شي تحتاجينه انا موجود..
هزيت راسي بايجاب ..وانا وهو عارفين بعد هالموقف مارح اكون حرة طليقة كالسابق ..رح اكون على ذمة ريال ..
دخلت داخل وكملت سهرتي مع الباجين .. ليما ياني خالد مرة ثانية طلب مني اني اروح الصالة الثانية لأن جراح يبي يشوفني ..
تعدلت ..رحت الصالة الثانية ..
الحين انا زوجته ..
دخلت الصالة ..وكان موجود ..ما بينت ملامحه وايد ..قربت وقعدت على القنفة ..وانا منزلة راسي ..تنحنح ..جراح ..وقال
جراح: اشلونج ؟؟
زفت بعد ما صرت زوجتك ..
سارة : الحمدلله ..
شكله مرتبك ..طبعا ..ما شافني ..ولا عمره عرفني .اكيد بيرتبك ..
اما انا ..كنت مو مهتمة ..
جراح : امي قالت لي انج تدرسين برمجة ؟؟
هزيت راسي وقلت ..
سارة : ئي ..
جراح : الله يوفقج ..
سارة : اجمعين ..
كانت اجباتي مختصرة ..لأني ما أقدر اقعد اكثر من جذي ..
إلا الآن ما رفعت راسي وطالعته ..
جراح: انا ما رح امنعج عن دراستج ..
فيك خير سوها ..
هالمرة رفعت راسي ..
هو .. هو ..
اللي ..اللي كان يلاحقني من مكان لمكان ..وكان يغازل نص بنات الجامعة ..
وقفت مصدومة ..وقلت وانا اأشر عليه
سارة : انت ؟؟
طالعني ببلاهة ..
جراح: انا؟؟
تقدمت منه وقلت ..
سارة : مو انت اللي كنت تلاحقني من مكان لمكان؟؟
بطل عيونه على وسع وقال ..
جراح: انا؟؟
قلت بعصبية ..
سارة : لا انا .. مو انت اللي اخذت لا توب مالي وخليتني ادور عليه ..ولا فوق كل هذا تغازل نص بنات الجامعة ..
قال باندهاش كبير وهو يأشر على عمره ..
جراح: انا ؟؟
سارة : اشفيك معلق ..انا انا انا ..ئي انت عيل منو ؟؟
جراح: لحظة ..لحظة ..انا اصلا اول مرة اشوفج ..حتى اسمج عرفته من الوالدة ..اشلون اخذت لاب توب مالج بالله ؟؟
تقربت منه وقلت وانا اشر عليه بأصبعي ..
سارة : اسأل روحك .. ثانيا لا تستهبل علي ..انا عارفة شكلك عدل ..
جراح: والله العظيم انا اول مرة اشوفج ..
قلت والدموع على عيوني ..
سارة : مو كافي اني متزوجتك غصب ..بعد تطلع واحد مغازلجي ..
وطلعت من الغرفة ...


************************************************** *


ينت هاذي ؟؟
زوجوني وحدة مو صاحية ..
حمدلله والشكر ..
نسيت اعرفكم على روحي ..انا جراح ..عمري ..22 سنة ..طالب بجامعة الأمريكية ..قسم اداvة اعمال ..وهاذي آخر سنة لي ..
أففف ..
يا ليت ما سمعت كلام امي ..وتزوجت اصلا ..
رن موبايلي ..طلعت امي ..
جراح : هلا يما ..
امي: ها يما ما شبعت ؟؟
شبعت ؟؟؟ انا دققت فيها اساسا؟؟
جراح: كاني طالع ..
صكيت التلفون وطلعت من البيت ..
لقيت ابوي وفيصل اخوي وخالد اخو مرتي ..وواحد ما اعرفه ..مشيت لين وصلت لهم ..فقال ابوي ..
ابوي : كل هذا ؟؟ شنو تسوي عندها ؟؟
طالعت ساعتي ..قعدت عندها نص ساعة ..مرت بسرعة ..
جراح: ما حسيت بالوقت ..
قال فيصل ..
فيصل : اكيد ما حسيت بالوقت ..حبيبة القلب ..
طالعته بنظرة نارية ..جعمته ..فقال ابوي
ابوي : يلا يا يبا ..نستأذن احنا ..
خالد : حياك عمي ..
مديت ايدي وسلمت على خالد ..وبعدها عرفني على اخوه ..
خالد : هذا غيث اخوي ..
جراح: والنعم والله ..
وسلمت عليه ..بعدها استأذنت وركبت السيارة مع فيصل ..اما امي ركبت سيارة ابوي ..
وبالطريج ..
قال فيصل ..
فيصل : ها ..شلون لقيتها ؟؟
قلت
جراح: مني ؟؟
طالعني ببلاهة وقال ..
فيصل : امي ..منو يعني مرتك ؟؟
اها ..التفت وطالعت الشارع وقلت ..
جراح: زينة ..
قال فيصل بخبث ..
فيصل : حلوة ؟؟
طالعته وقلت ..
جراح: اشرايك اوصفها لك بعد ؟؟
فيصل : اشفيها ؟؟
طالعته بعين واسعة من الصدمة..وقلت
جراح: صج ما تستحي ..قلنا مغازلجي بس مو توصل لمرت اخوك ..
ضحك فيصل وقال ..
فيصل : اشفيك عصبت ؟؟ انا ما قلت شي .. انا ما رح اتزوجها فليش متضايق ؟
قلت له بضيق ..
جراح: فيصل ..اشرايك تسكت ؟؟
وسكتنا ..
بروحي مالي خلق احد ..
رنت بأذني جملتها الأخيرة ..
يعني هي متزوجة غصب عنها ...
هاذي اولها ..الله يستر تاليها ..
شغل فيصل الأغاني ..فالتفت ولقيته يرقص ..
حمدلله والشكر ..لا زوجة عدلة ولا اخ سنع ..
انا وفيصل توأم .. بس انا اكبرمنه بخمس دقايق .. وحيدين امنا وابونا ..
عكسي تماما ..
مغازلجي درجة اولى ..
خبل ومو صاحي ..
انا ماادري اشلون رح يتزوج هذا ؟؟
حتى دراسة مو مكمل ..
وصلنا البيت ..وصعدت داري ..
افكر بالبلوة اللي تزوجتها ..
الله يعيني ...
********************************************

دخلت الغرفة بعد ما خلصت ملجة سارة ...الحين مروا ثلاث شهور على اللي صار ..وصارلي اسبوع ما شفت فيصل ..
فجأة رن موبايلي ..وكان فيصل ..رفعت السماعة وقلت ..
هاجر: وين القاك؟؟
ضحك فيصل وقال ..
فيصل : تعجبيني ..تصدقين انتي الوحيدة اللي ارتاح معاها ..مطيعة وهادية ..
قاطعته وقلت ..
هاجر: بس ..بس وين القاك خلصني ؟؟
فيصل : عند صالة التزلج ..الساعة خمس ..وإذا ..
بهاللحظة فقدت حاسة السمع ..لأن اخوي خالد دخل علي وانا..وانا ماسكة التلفون ..
استمر فيصل بالكلام فقلت بارتباك ..
هاجر: لــ..لحظة..
وبعدت التلفون من اذوني وطالعت خالد ..عيونه مركزة علي ..وقال وهو يؤشر على التلفون..
خالد : شنو هذا ؟؟
ارتبكت وقلت ..
هاجر: تلفون ..
تقرب خالد مني وقال ..
خالد: ادري تلفون من وين يايبته؟؟
نزلت راسي الأرض وقلت ..
هاجر : امي شرت لي اياه ..
قال باستغراب ..
خالد : امي ؟؟
هزيت راسي بايجاب ..فسكت بعدها مد ايده وقال ..
خالد : عطيني اياه ..
طالعته بخوف وصدمة ..إذا خذاه رح يعرف عن سالفة فيصل ..فقلت وانا اهز راسي بالنفي ..
هاجر: لأ ..
طالعني باستغراب وقال ..
خالد : شنو ؟؟ اقولج عطيني اياه ..
رديت لورا وقلت ..
هاجر: الله يخليك لا تاخذه ..
خالد: شنو رح تسوين بالتلفون ..وانت لا تطلعين ولا تدخلين ؟؟
هاجر: فيه ارقام رفيجاتي ومابي ..ومابي اقاطعهم ..
خالد : بنت في سنج شنو تسوي بالتلفون قوليلي بالله ؟؟إذا على رفيجاتج يعرفون رقم البيت خل يدقون عليه ..
هزيت راسي بالنفي مرة ثانية ..وقلت ..
هاجر: مابي ..
خالد : هاجر بطلي دلع وعطيني التلفون ..انا بسنج ما كان عندي تلفون هالدور انتي ؟؟ عطيني اياه
قلت بعناد ..
هاجر : مابي ..
هالمرة صرخ علي خالد ..
خالد : هاجر..
كان ويهه يخرع ..مديت ايده وعطيته التلفون بعد ما صكيت بويه فيصل ..
خالد : التلفون هذا انسيه ..لما تدخلين الجامعة تاخذينه ..
وكمل وقال ..
خالد : انزلي تحت غيث عندنا
بغيت اتكلم ..بس خالد سبقني وقال ..
خالد : يا ويلج إذا ما نزلتي وسلمتي عليه ..وعلى فكرة إذا قطيتي عليه كلمة مو زينة لأدفنج مكان ما انت واقفة ..فاهمتني ولا اعيد؟؟
وطلع من الغرفة ..
يا ويلي الحين شسوي بالمصيبة اللي طاحت على راسي ؟؟
ساعدوني ؟؟
*****************************************

بنت أبو ظبي ©؛°¨غرامي مبدع¨°؛©

سلمت على عمي غيث ..من زمان ما شفته ..بس شكله متغير ..شعر طول وضعفان وايد ..
بس صاير احلى ...
قلت له وانا ابتسم ..
ايمان : تصدق عمي اشتقت لك وايد ..
مسح على راسي وقال ..
غيث: وانا بعد ..ها متى امتحاناتج ؟؟
ايمان : بعد اسبوعين ..
غيث: شدي حيلج ..
وبعدها نزلت هاجر ووراها سارة وابوي
طبعا مايحتاي اقولكم ان سارة طارت لحظن عمي ..باسها عمي بين عيونها وقال ..
غيث : مبروك ..
سارة : الله يبارك فيك ..
وطقته على جتفه عالخفيف وقالت ..
سارة : اربعة شهور ما اشوفك يا الظالم ؟؟
تنهدت عمي وقال ..
غيث: شسوي يا سارونه ؟؟ تبيني اقعد في البيت وامج بالعدة ؟؟
سارة: خلاص خلصت امي عدتها ..رد البيت ..
غيث: صعب ..
شلت عيني من عليهم وطاحت على هاجر عمتي ..لقيتها سرحانة ..فالتفت لها غيث وقال ..
غيث: اشلونج هاجر ؟؟
طالعته هاجر باشمئزاز وقالت ..
هاجر: الحمدلله ..
كان ابوي قاعد يمها فقرصها فعادت جملتها وهي تبتسم بتصنع ..
هاجر :الحمدلله ..انت اشلونك؟؟
ابتسم لها عمي وقال ..
غيث: انا الحمدلله .. يلا شدي حيلج انت ثانوية عامة ..نبي النسبة الزينة ..
ضحكني عمي ..نسبة زينة ..هاجر لو كانت مو بثانوية عامة بثانوية خاصة ما تدرس ..فكنا واللي يرحم والديك ..
قام بعدها عمي وقال ..
عمي :يلا انا استأذن ..
قامت عمتي سارة وقالت ..
سارة :وين تو الناس ؟؟
غيث: ما اقدر اقعد اكثر من جذي .. امج بتيي وانت تعرفين امج ما يحتاي اقولج ..
سلم علينا عمي وطلع ..
يحفظك ربي ان شاء الله ..
لهدرجة يدتي تكره عمي غيث ..
صعدت داري لأني بنام .. وهالأيام ما نتكلم انا وابوي ..حتى صعدت بدون ما امسيه بالخير ..
دخلت داري ..ولقيت ورقة على المكتب مالي ..فيها عنوان بيت امي ..فقلت بصوت عالي احاجي فيه روحي ..
ايمان : قريب بييج يا يما قريب ..
وانسدحت على السرير ونمت ...



يتبع <<<<

بنت أبو ظبي ©؛°¨غرامي مبدع¨°؛©

التكملـــــــــــــــــــــــــــــــــــــة "الحلقة السابعة "
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ

قمت على صوت المنبه ..طالعت الساعة لقيتها اربع ونص الفير ..سمعت صوت الأذان دخلت الحمام عزكم الله وتوضيت ..
وقفت جدام المرايا بعد ما انتهيت من الوضوء ..
قعدت اطالع روحي ..واتذكر كلام هالهبلة اللي تزوجتها .. معقولة تكون متزوجتني غصب ؟؟
ليش لأ ؟؟ يمكن اخوها ولا امها غصبوها على الزواج .. انا الصراحة ما ارضى اني اتزوج وحدة مغصوبة علي ولا فوق كل هذا تتهمني اني انا ملاحقها من مكان لمكان .. انا اصلا ما ادرس في كليتها ..حمدلله والشكر .. رح احاجي امي اني بطلقها ..واللي يصير يصير .
طلعت من الحمام وانا انشف ويهي وايديني ..لبست دشداشتي وطلعت من الغرفة .. وانا نازل من السلم شفت فيصل قاعد على القنفة وشكله يفكر بشي ..وانا الصراحة متأكد ان في داخل الجمجمة هاذي فراغ..
تجدمت منه وقلت وانا اطالع الساعة ..
جراح: شنو مقعدك لهالحزة؟؟
طالعني فيصل شوي بعدها قال بهدوء على غير العادة..
فيصل : وين رايح ؟؟
قلت وانا مستغرب من هدوءه ..
جراح: رايح الصلاة ..
سكتنا شوي فسمعت آذان الأقامة ..فقلت ..
جراح: بتيي وياي ؟؟
مارد علي في البداية بعدين قال وهو مرتبك..
فيصل : ها ؟؟ ئي ئي ..
طالعته وهو يقوم رايح الحمام اللي يم المطبخ ..مو صاحي .. لا اليوم فيصل مو صاحي ..
طلع من الحمام ومشينا طلعنا من البيت ..ركبنا السيارة ..ورحنا للمسيد الوحيد اللي في المنطقة ..
صلينا الفير ..طبعا بعد الصلاة اللي راح راح واللي قاعد يقرا قرآن ..توقعت فيصل يكون من المجموعة الأولى اللي ذكرتها بس ..اللي دهشني انه ما طلع .. قعد يمي يستغفر ..وانا قاعد اقرا قرآن ..
ماحسيت إلا بريول واقفة جدامي ..رفعت راسي فقليت واحد مشبه عليه ..
الريال : السلام عليكم ..
جراح : وعليكم السلام.
الريال : اشفيك ما عرفتني ؟؟
طالعته شوي لعلي اتذكر بس ..
الريال : شكلك ما تذكرني انا غيث اخو مرتك .
ابتسمت بحرج وقلت وانا امد ايدي اسلم عليه ..
جراح : حيا الله بو مطر اعذرني والله ما عرفتك ..
غيث : لا عادي ..اشلونك واشلون الأهل ؟؟
جراح : والله الحمدلله ..
قلت وانا ااشر على فصيل ..
جراح: ها هذا اخوي ..
طالعه غيث بعدين طالعني بانبهار وقال ..
غيث: انتوا توأم ؟؟
ابتسم وقلت وانا اهز راسي ..
جراح: ئي ..هذا اخوي فيصل ..
سلم فيصل على غيث ولو انه مرتبك ماادري ليش ..وطلعنا من المسيد ..وافترقنا .. ركبنا السيارة انا وفيصل .. وهو لسة على حاله ..ساكت ..
جراح: فصيل ..
التفت لي بدون مايرد ..
جراح: اشفيك ساكت ..مو العادة
قلب ويهه عني وقال ..
فيصل : ماكو شي ..
الله يستر اكيد مسوي مصيبة .. فقلت ..
جراح : فصيل ..تحج مسوي بلوة ؟؟
من يبت طاري البلوة ارتبك فيصل زيادة وقال..
فيصل : ها؟؟ لأ ..صدقني لأ ..
اشفيه هذا ؟؟
وصلنا البيت ..وصعد فيصل داره ..وانا بعد ..بس بدلت هدومي ولبست لبس السبورت ..وطلعت من البيت ..ورحت البحر ..وبديت اركض ..حوالي تقريب .. صورتها مو راضية تروح عن بالي ..صج انها حلوة ..بس بغيت ازنطها .. اففف الله يعيني إذا جذي قبل ما نعيش مع بعض اشلون بعدين ؟؟
خلصت رياضتي ..ورديت البيت ..وكانت الساعة 6 ونص .. لقيت امي قاعدة تصب القهوة حق ابوي ..
صبحت عليهم ..بغيت امشي بس امي قالت ..
امي: جراح يما ..ترى حددنا يوم العرس ..
حلو ..ياك الموت يا تارك الصلاة ..
قلت بصدمة..
جراح: مسرع ..
طالعتني امي باستغراب وقالت..
امي: شنو؟؟
اشقلت انا؟؟
جراح: اقصد ...يعني ..قبل يومين تزوجنا ..اشلون حددتوا جذي بسرعة ؟؟
ونزلت عيني الأرض ..اطالع القاع بحسرة..وهذا انا ابي اقول لأمي اني بطلقها ..مالت علي ..
امي: امس دقت علي ام خالد ..وقالت انه ماله داعي نأخر العرس وانا اقول بعد جذي ..فحددنا العرس الشهر الياي ..
شهر الياي ؟؟ قلت باندفاع ..
جراح: شهر الياي ؟؟ بس انا مو مستعد ..
طالعني ابوي هالمرة وقال ..
ابوي : اشلون يعني مو مستعد ؟؟
طحت بشر اعمالي .. اشقولهم الحين ؟؟؟
جراح: يعني ..ما استعديت نفسيا ..ما ..ما ...
وما كملت جملتي ..ما عرفت شقول ..إذا الكبار تحجوا اكيد بننجعم احنا ..قلت باستسلام ..
جراح: سو اللي تبونه ..
وصعدت داري .. رحت فيها ..رحت وطي ..الله يعيني على المفترسة ..إذا في بيتهم بغت تاكلني اشلون ببيت بروحنا ؟؟؟
*******************************************

يحليلهم ..توأم ..اول مرة ادري .. حلو يكون عندك اخ توأم.. يحس فيك ..ويعرف اشتبي .. بس الحمدلله على كل حال ..
الحين صارلي اربع شهور ونص بالظبط بدون شغل .. وقاعد علة على رفيجي ..صج انه ما اشتكى بس .. الواحد يستحي .. انا لازم ادبرلي وظيفة ان شاء اصير فراش ..
قمت من السرير ..وهالأفكار معشعشة في مخي .. رحت المطبخ ..بطلت الثلاجة ..وكالعادة فاضية ..اشتهي يوم ابطلها القى فيها اكل ..أففففففف ..صكيتها بقوة ..لدرجة انها بغت تطيح ..
طيحي مالت عليج ..ما ادري على شاريج عمر .. يا الله ..
يوعان ..مو قادر اصبر ..بطلت الثلاجة مرة ثانية .. ولقيت فيها بيض .. ماكو غيره بعد شنو نسوي ..
مع اني فيني حساسية من البيض ..بس لا للموت جوعا ..
طلعت المقلاة ..وحطيت فيها زيت ..وسويت بيض ..ولو انه مو مترقع ..بس يلا .. سميت بالرحمن وبديت اكل ..
مع انتهائي من الأكل ..طلع عمر ..قعد على الطاولة .. وقال ..
عمر: صباح الخير ..
قلت وانا زهقان من روحي ..
غيث : صباح النور ..
سحب عمر الصحن مني ..وقال ..
عمر: انت مو فيك حساسية منه ؟؟
هزيت راسي بايجاب ببرود وقلت ..
غيث: اعتقد ..
رديت اخذت الصحن وكليت ..تنهد عمر وقام ؤراح الثلاجة وقلت قبل لا يبطلها ..
غيث: ماكو شي بالثلاجة ..لا تتعب روحك.
مع نهاية جملتي رن موبايل بس مو مالي مال عمر ...اتجه عمرلتلفونه وابتسم ..رفع التلفون وقال..
عمر: هلا يا الغلا كله ..وعليكم السلام..اشلونج يما ؟؟ ها؟؟ ههههههههه لا والله انا اقدر استغني عنج؟؟ ..ان شاء الله ..بس زهبي لي غدا عدل ..تسلمين لي يا احلى ام .. مع السلامة ..
وصك التلفون ..
رنت باذني آخر جملة قالها ..
تسلمين لي يا أحلى ام ..
احلى ام !!!
نلزت راسي بأسى ..وهديت الخبزة اللي كنت ماسكها .. وقمت من الطاولة ..اخذت الصحن والجلاص وغسلتهم .. وطلعت من المطبخ وما انتبهت لعمر شنو كان يسوي ..
قعدت بالصالة ..وبطلت التلفزيون .. فريت لما مليت ..حذفت الروموت على القنفة وقعدت اطالع الجزيرة ..
بس بالي مو معاها ..
رديت لي الذاكرة لأيام الصبا ..والله الأيام عاد ..
ايام سودة ..مرت ابوي ورتني نجوم في عز الظهر ..
اتذكر يوم صكتني طراق يوم سالتها عن امي وانا بو 12 سنة
واتذكر يوم طردتني جدام كل يوم ملجة خالد ..لأني كتيت عليه الماي مثل ما كت على الماي ..
واذكر يوم علمت ابوي علي وقالت اني انا بقت الفلوس منه ..وانا ماسويت جذي ..وابوي طبعا ما قصَر
وهذا كان اول طراق اخذه من ابوي ..ابوي طقني وانا ريال عمري عشرين ..
تنهدت بظيق ..
ما اقول إلا حسبي الله ونعم الوكيل ..اثاريك يا عمر قلبت المواجع ..
" غيث ..غيوث"
هزني عمر ..وانتبهت له ..والتفت وقلت ..
غيث: ها ..
كان عمر قاعد على القنفة اللي يمي وقال باستغراب ..
عمر : ها ؟؟ يا حظي ..اشفيك صفنت ؟؟
غيث: سرحت شوي ..خير ؟؟
طالعني عمر باستغراب اكثر وقال ..
عمر: فيك شي غيث ؟؟
نزلت راسي وقلت بصوت خافت شوي ..
غيث: لأ ..
قام عمر وقعد يمي .. واخذ الروموت وقام يفر .. وقال وعيونه على التلفزيون ..
عمر : امي عازمتك على الغدا ..جهز روحك .
التفت له وقلت
غيث: وامك تعرفني ؟؟
طالعني بتعجب ..فقلت مصحح
غيث: اقصد امك اشدراها عني ؟؟
عمر: انا قلت لها ..امي تعرف كل صغيرة وجبيرة عني
قلت لها ؟؟!!! قلت باندفاع.
غيث: وو...
قاطعني وقال ..
عمر: لأ طبعا ..
طالعته بامتنان اما هو التفت لي وقال ..
عمر: انت امتني على اللي بقلبك ..وانا مو من اخلاقي اني اتكلم عليك وانت مو موجود ..
ابتسمت له وقلت ..
غيث: هذا العشم فيك ..
قال عمر
عمر : مو جنه قلبناها حملة راقي بأخلاقي ؟؟
ضحكت عليه ..بعض المرات تييه حالات ويكثر خباله ..
طالع عمر ساعته وقال ..
عمر: أخرتني ..الساعة سبع ونص ..
غيث : روح روح لا يفصلونك ..وتقعد يمي ما حنا ناقصين ..كافي واحد..
وقف عمر ..طالعني عمر ..بعدها شفت ايده وفيها فلوس ..
طالعته باستغراب ..
غيث: شنو هذا ؟؟
طالع عمر السما كأنه يفكر وقال ..
عمر: اعتقد انها فلوس ..
غيث: حق شنو؟؟
عمر: حقك ..
حقي ؟؟؟
وقفت طالعته بعصبية ..ومشيت عنه ..ورحت داري ..
ياه وراي يغى يتكلم فقلت وانا أأشر بثورة..
غيث: لأ يا عمر
عمر :ئي ليه عاد ؟؟
التفت له وقلت وانا أأشر على عمري
غيث: مو انا اللي ياخذ فلوس من أحد..
طالعني بنظرة كلها حزن وقال ..
عمر: الحين انا أي احد ؟؟
تنهدت بضيق وقلت ..
غيث: عمر واللي يسلمك انت تعرف معزتك بقلبي بس اخذ فلوس منك لأ ..
قعد عمر يمي ..
شكلها السالفة مارح تخلص ..
عمر: انزين انت الحين صارلك شهور تدور على شغل وما لقيت ..وبعدين يعني ؟
لفيت ويهي عنه وقلت ..
غيث: إذا انت متضايق مني من قعدتي عندك فأحب ...
قاطعني عمر وقال
عمر: ردينا على هالسالفة ؟؟؟
قلت باندفاع ..
غيث: عيل خلاص خلني قاعد هني ..ولا تعطيني فلوس ولا شي ..
سكتنا اثنينا وقعدنا نطالع بعض ..بعدها قال عمر بهدوء ..
عمر: انزين اسمع ..ليش ما تطلب نصيبك من ورث ابوك الله يرحمه ؟
بطلت عيني على وسع ..مصدوم ..اشقاعد يخربط هذا ؟؟
فقال عمر ..
عمر: لا تظن فيني ظن السوء ..طلب من اخوك نصيبك وشغلهم بالسوق ..
غيث: شيفهمني بالسوق بالله ؟
عمر: انت ييب الفلوس وانا اعرف واحد رح بعجبك ..متخصص بالسوق ..
تصدقون ..دخلها في بالي .. ليش لأ ؟؟ بدال هالفقر اللي عايش فيه ..اللي يشوفني يقول ياي من مجاعة افريقيا ..
****************************************

بنت أبو ظبي ©؛°¨غرامي مبدع¨°؛©

بدلت هدومي وطلعت من الدار بعد ما طفيت الليت وقفلت الباب ..لأني ما احب احد يدخل داري وانا مو موجود..
نزلت تحت ..وبالنص الطريج ..شفت ايمان طالعه من دراها ..
هاذي مو رايحة الدوام ؟؟
امس قلت لها اني ما اقدر اخذها ..لأن بودي سيارتي الكراج .. طالعتني ومشت ولا جنها شايفة احد جدامها ..فناديت عليها ..التفت لي ..فقلت ..
خالد : الساعة سبع ونص ..اشحقة ما رحتي المدرسة ؟؟
طالعتني بنظرة غريبة ..ما انكر اني كرهت اللحظة هاذي ..بنتي اللي تعبت اربيها واحاول انسيها النقص اللي هي تحس فيه ..بس شكله ماكو فايدة ..
قالت ..
ايمان : تعبانة شوي ..
خفت ..حطيت ايدي على راسها وجست حرارتها ..بس ماكو شي .. طالعتها ابي توضيح ..فقالت ..
ايمان: مافيني شي ..مالي خلق اروح ..
نعم!!نعم!!
ابتسمت على جملتها وقلت بعدم تصديق ..
خالد : مالج خلق تروحين؟؟ اذا كل ما ضاق خلقج مارحتي ..عز الله محد داوم ..
سكتت ماردت علي ..ونزلت راسها الأرض ..
حالها ابدا مو عاجبني .. ماأدري اشلون ارضيها ..اللي تفكر فيه هذا مستحيل يصير ..مستحيل ..
قطعت تفكيري ايمان ..وكانت تقول ..
ايمان: يبا ..انا ..
شفت الحيرة والقلق بويهها فقلت ..اشجعها ..
خالد: قولي يبا ..
قالت بسرعة ..
ايمان : ابي اروح عندي امي ..
ماسمعت جملتها ..بس كلمة امي ..وعرفت شنو تبي ..
ماقدرت امسك روحي وقلت بحدة وحزم..
خالد : وانا مابيج تروحين لها .. غصب ؟؟
تجدمت ايمان مني ومسكت ايدي تترجاني ..وقالت ..
ايمان : يبا ..واللي يخليك لي ..بس ازورها ..بس ..
قاطعتها وقلت بعصبية وانا اسحب ايدي من ايديها ..
خالد : لأ ..ان قلت لج الف مرة ماكو زيارة ..ولا حتى تشوفينها ..
تجمعت الدموع بعيون ايمان ..وقالت بصراخ وبجي ..
ايمان : عيل تبي تتزوج وتييب لي مرت ابو تحل مكان امي ..ها ؟؟ هذا اللي تبيه ؟؟
طالعتها بصدمة ..اتزوج ؟؟ اشقاعد تقول هاذي ؟؟ شكلها صج مريضة ..
خالد : اتزوج ؟؟ منو قال اني رح اتزوج؟؟
نزلت ايمان راسها والدموع على خدها ..
ايمان : امس سمعت يدتي ..تحاجي الخطابة عشان تختار لك مرأة ..
خطابة ؟؟ تخطب لك ؟؟ كلمات تدخلت لأذني بس مخي ما قدر يترجمها ..
خدرتني كلمات ايمان ..بس تلفوني صحاني ..رفعت التلفون لقيته غيوث ..
خالد : هلا غيث ..
قلتها بصوت مخنوق ..
بغت تمشي ايمان بس انا مسكتها واشرت لها تصبر ..قال غيث ..
غيث: هلا بو ايمان ..وينك ؟؟
خالد : بالبيت ..
غيث: خالد اشفيه صوتك ؟؟
نزلت راسي وقلت ..
خالد : ماكو شي .. بغيت شي غيث ؟؟
سكت غيث شوي بعدين قال ..
غيث: لأ سلامتك ..بس ابي اشوفك ..
خالد : اليوم ما اقدر ..بودي سيارتي الكراج ..
غيث: عيل باخذ سيارة عمر وامرك ..اشرايك بعد صلاة المغرب على البحر ؟؟
تبون الصج ؟؟ ما سمعت ولا كلمة من اللي قاله غيث ..كنت اطالع ويه ايمان اللي تغير ..صار ذبلان واصفر ..صج ان احنا ما صرنا نتحجى مع بعض من زمان من بعد اللي سوته بس انا سويت جذي عشان اعاقبها ..
غيث: خالد ..خالد ..وينك؟؟
انتبهت وقلت بسرعة .
خالد : معاك..خلاص الساعة بعد صلاة المغرب ..
وصكيت عنه ..طالعت ايمان وقلت ...
خالد : امشي معاي ..
مسكت ايدها ..ونزلنا تحت .. لقيت امي قاعدة تتريق ..فقلت بعد ما صبحت عليها ..
خالد : صج اللي قالته ايمان ؟؟
طالعتني امي باستغراب وقالت ..
امي : شنو قالت ايمان ؟؟
تنهدت وقلت ..
خالد : انج تدوريلي على زوجة ؟؟
ابتسمت امي وطالعت ايمان وقالت ..
امي : واي منج يا السوسة ..
انصدمت ..وقلت
خالد : يعني صج ؟؟
هزت امي راسها وقالت والأبتسامة لسة على ويهها ..
امي : ئي ..صج ..مبروك يا ولدي ..امس لقيت لك وحدة تقط الطير من السما ..
أي طير ..أي سما ؟؟ وقفت وقلت لها وكان كلامي موجه لهم اثنيناتهم ..
خالد : يما ..زواج ماني متزوج ..كافي اللي صارلي ..
وطلعت من البيت ...ركبت السيارة ..وقمت اطق السكان بقهر من زود الحرة ..
من وين احصلها ياربي ؟؟ من امي ولا ايمان ولا نوال ..آآه ..
حطيت راسي على السكان ..وبديت الذاكرة ترجع فيني لورا ..يوم زواجي ..يومي الأسود ..كان زواجنا نا نوال عادي ..يعني ماكو حب بينا من قبل ..امي شافتها واخطبتها لي ..ومن اول ليلة بعد زواجنا ..عرف طريقة تفكيرها ..مايهما إلا الموضة ..والعروس والمكياج ..السهرات ..بنتها ماتدري عنها ..ماتدري يوعانة ..تعبانة ..ليما ياه اليوم اللي خلاص فاض فيني ..وطلقتها ..طبعا الكل لامني ..بس انا ما يهمني ..وبالقوة اخذت منها ايمان ..وكان عمرها 12 سنة .. والحين مروا سنتين ورد لي شبح نوال مرة ثانية ..وفوق كل هذا امي تبي تزوجني ... الله يعين ..
حركت السيارة ..وطلعت من الحوش ومشيت ..حسيت اني مخنوق بطلت الدرايش مع ان الجو بارد وايد ..فتحت على الراديو ..ولقيته قرآن ..سرحت بالكلمات..نسيت شوي من همي ..
قطرات المطر الغزير اجبرتني اني اصك الدريشة ...وصلت الكراج وقطيت سيارتي عندهم .. بعدها اخذت تاكسي ..ورحت الجامعة ..
وصلت الجامعة متأخر عن المحاضرة ربع ساعة ..دخلت بسرعة وكنت مرتبك ..تفكيري مشتت ..الطلبة كانوا يطالعوني بنظرات غريبة .. زادت من ربكتي ..بس الحمدلله خلصت المحاضرة على خير ..مسكت جنطتي احط فيها اوراق المحاضرة ..حسيت ان في واحد جدامي رفعت راسي ليقتها طالبة اعرف ويهها بس اسمها لأ ..فقلت ..
خالد : أي خدمة ؟؟
البنت : استاذ ..انا كنت غايبة عن الأمتحان اسبوع اللي طاف ..
امتحان ..سألتها ..
خالد : اي امتحان ؟؟
طالعتني البنت بتعجب ..جنها تقول اشفيه المينون هذا ؟؟
وتذكر ..طقيت ايدي على راسي ..وقلت ..
خالد : آسف ..أأ ..بالي مو معاي ..عندج عذر ؟؟
عطتني العذر ..قريته بعدها طلعت دفتر الغياب ..وسالتها ..
خالد : اسمج لو سمحت ؟؟
البنت : ابرار..
دورت على الأسم ولقيته ..ولقيت يم اسمها حرمان ..فقلت
خالد : انت نازل لج حرمان ..
ابرار: حرمان ؟؟ بس انا ما غبت ولا مرة إلا يوم الحرمان
طالعتها بتجب ورديت طالعت الدفتر قلت
خالد: انت مو ابرار جاسم ؟؟
ابرار: ئي انا ..
رفعت عيني لها وقلت
خالد: ئي ..عيل انتي اللي نازلج حرمان ..غايبة اكثرمن 4 ساعات ..
طالعتني بكره وجنها تبي تذبحني وقالت ..
ابرار: يعني مارح تعيد لي الأمتحان ؟؟
بغيت اضحك على غبائها ..بس اكتفيت بإبتسامة وقلت ..
خالد : اشلون اعيد لج الأمتحان وانت نازلج حرمان ؟؟
طالعتني شوي باحتقار ..ومشت ..حمدلله والشكر ..مينونة هاذي ..
طالعت ساعتي ..لقيتها الساعة 11 ..طلعت من القاعة ..ورحت مكتبي .. بطلت الباب ودخلت ..قعدت على الكرسي ..طالعت اوراق الأمتحانات بملل ..ستين ورقة ..ولازم اخلصهم هالأسبوع .. أفففففف ..
مسكت اول ورقة ..وقعدت اصحح .. سمعت طق على الباب ..على بالي سراج الفراش ..فقلت ..
خالد : ادخل سراج ..
دخل اللي كان ورا الباب ووقف جدامي ..رفعت راسي له ..هي نفسها ..ياحول ..
ابرار: السلام عليكم ..
خالد : وعليكم السلام ..
ونزلت راسي وما قلت شي ..انطرها تتحجى .. قالت بترجي ..
ابرار: استاذ ..أأ ..مابي اعيد مادتك ..
واشتبيني اسوي يعني ؟؟
طالعتها ابي توضيح ...فقالت
ابرار: امتحاناتك صعبة الصراحة ..وانا حفظي بطيء ..
قلت ..
خالد: مادام حفظج بطيء اشحقة داخلة كلية الأداب .. ولا متخصصة بالفلسفة بعد ؟؟
تندهت البنت وقالت ..
ابرار: استاذ الله يخليك ..شيل عني الحرمان ..
تستهبل هاذي ؟؟؟
خالد : واشرايج بعد امتحن بدالج ؟؟
نزلت البنت راسها ..وشكلها كانت تبجي ..وطلعت من غرفتي ..
تندمت اني قلت جذي بس الحق حق ..بعدها ..سمعت صوت تلفون ..عبالي تلفوني ..ورفعته ..بغيت اتكلم بس ياني صوت ريال ..
الريال : هاجر ..والله آسف على اللي سويته ..انا ..انا متندم الصراحة ..
ماسمعت باجي الكلام لأني رفعت السماعة وطالعت التلفون اتأكد ..وكان تلفون هاجر ..
يتبع <<<

بنت أبو ظبي ©؛°¨غرامي مبدع¨°؛©

الحلقــــــــــــــــــــــــــــــــــة الثامنـــــة
ــــــــــــــــــــــــــــــــــــــــــــــــــ ــــــــــــــــــــــ

وصلت البيت بعد ما انهد حيلي بالمدرسة ..وكانت سارة هي اللي يابتني ..سلمت على امي ..وصعدت داري ابدل .. دخلت الغرفة ..فصخت حجابي ..
" حمدلله على السلامة "
تفاجأت من الصوت ..التفت ولقيته خالد ..طالتعه باستغراب ..اول مرة يدخل داري وانا موموجودة..
تجدمت منه وهو وقف..بغيت اتكلم ..بس ياني طراق ..طيحني على الأرض ..نزل خالد لمستواي ..ومسك شعري ..وبدا يهزني وهوماسك ايدي ولافها بطريقة تعور وانا اصرخ ..وهو معصب ..ما سمعت شنو يقول إلا ..
خالد : صج انج ما تستحين .. منو هذا اللي تحاجينه بالتلفون ..منو؟؟
كان يصرخ علي ..وهاذي اول مرة اشوفه معصب ..
ماكنت ..اقدر ارد ..لأنه ما خلى لي فرصة اتحجى ..كان يشد شعري حيل ..ويطقني ..لحد مايت امي وسارة ..امي مسكت خالد ..وسارة ماسكتني تحاول تبعدني عن خالد ..بس محال ..خالد كان مسكني حيل ..
هد شعري ..ومسك رقبتي من ورا ..وقال ..
خالد : ان ما ربيتج ما اكون خالد ..
امي : خالد ..اشفيك ..بس يا يما بس ..
مسكت امي ايد خالد ..وبعدته وطلعته من الغرفة ..اما انا كنت طايحة بحظن سارة ..اللي كانت تهديني
برة سمعت صوت صراخ خالد ..وبعدها سمعت صوت باب يتسكر ..واعتقد كانت غرفته .. لأن داره جدام داري ..
اكيد درا عن سالفتي ..شكلي ببات اليوم بالمقبرة ..خل اجهز كفني احسن .. سألتني سارة ..
سارة : شسويتي ؟؟
ما قدرت ارد عليها لأن ضربات خالد كانت تعورني ..مسحت الدم اللي طلع من فمي ..وخلتني سارة اروح الحمام عزكم الله ..أغسل ويهي ..
وانسدحت على السرير ومن التعب نمت ...
صحاني صوت امي وهي تصرخ ..خفت اطلع ..وطنشت ..بس زادت لما سمعت صوت سارة يقول ..
سارة : يعني وين تكون راحت ؟؟
منو؟؟ منو اللي راحت ؟؟
زادت صرخات امي وكانت اشبه بالعويل .. ماقدرت اتحمل ونزلت تحت ..شفت سارة ماسكة تلفونها وتحاجي احد ..وامي قاعدة على القفنة تبجي وتصرخ ..تجدمت منهم وسالت .
هاجر : اشفيكم ؟؟
طالعتني سارة وطنشتني ..اما امي فقالت ..
امي : ايمان ..ايمان ماندري وينهي ..
ايمان؟؟
تذكرت اليوم ماراحت المدرسة .. قعدت يم امي .. اواسيها ..وانا بأمس الحاجة للمواساة ..
سارة: غيث ..خالد ليش مايرد ؟؟
***********************************
خرعني اتصال سارة ..رقمها مخزن عندي من يوم الملجة بس عمري ما كلمتها فقلت ..
جراح: هلا سارة..
سارة : جراح واللي يسلمك ..ايمان بنت اخوي ما ندري وينهي ..وخالد وغيث طلعوا يدورونها ..واللي يخليك اطلع ساعدهم ..
كانت تتكلم بسرعة ..ما دققت وايد بكلامها بس المهم اني فهمت الزبدة ..فقلت
جراح : ان شاء الله سارة ..بس انت هدي ..وانا الحين ادق على خالد ..
سارة : خالد ما يرد دق على غيث ..
جراح: ان شاء الله ..بس انا ما اعرف رقمه
عطتني الرقم ..فقلت ..
جراح: انتوا لا تحاتون ..وبأذن الله نلقاها ..
اخذت سويج سيارتي ..وموبايلي ..ودقيت على غيث..وانا طالع من الغرفة فرد علي ..
غيث :الو..
جراح: السلام عليكم ..معاك جراح ..
غيث: هلا ..هلا جراح ..
جراح: سارة قالت لي عن السالفة ..انتوا وينكم فيه ؟؟
تلعثم غيث ..وقال ..
غيث: مانبي نتعبك ياجراح ..
قاطعته وقلت ..
جرحا: ولو ..احنا اهل ..ما قلت لي وينكم فيه ؟؟
غيث: احنا جريب الشويخ ..
جراح: خلاص الحين بييكم ..
وصكيت عنه ..
مريت غرفة فيصل ..وكالعادة مالقيته ..طلعت من البيت ..وركبت السيارة ..والمطر كل ماله ويزيد ..
مشيت قرابة نص ساعة ..بعدها لقيتهم واقفين بالشارع ..خالد وغيث..وواحد اول مرة اشوفه ..
سلمت عليهم .. وتعرفت على الشخص الثالث وكان عمر رفيج غيث ..بعد ما عرفت السالفة ..قلت ..
جراح: عيل ..كل اثنين مع بعض ..ونفترق ..انا وخالد ..وغيث ويا عمر ..
ووافقوا ..وافترقنا ..
ركبنا انا وخالد ..وكان مبين عليه الخوف .. مسكت جاكيتي..ولبسته لأن الجو ثلج ..
وحركنا ..درونا بكل مكان..وكل شوي خالد يدق على البيت او غيث ..سألته ..
جراح: خالد ..انت شاك ان ايمان راحت عند احد معين ؟؟
طالعني بضيق ..
خالد : مثل منو؟؟
هزيت جتوفي دلالة اني ما اعرف ..فقال ..
خالد : ايمان ما تطلع بدون ما تقولي ..
ومسك تلفونه ..كأنه يعلن نهاية الحديث ..
دق على البيت مرة ثانية ونفس النتيجة .. حذف خالد التلفون بعصبية ..ورد راسه لورا ..ومبين عليه التعب ..
طالعت ساعتي ..لقيته الساعة عشر .. صارلنا ثلاث ساعات نفتر بلا هدف او غاية .. طالعت الشارع ولقيت لافتة مكتوب عليها .الأحمدي
هاذي المحافظة جنوب الكويت ..طالعت خالد ولقيته نايم ..
حرام خايف على بنته ..الله يعينه ... دقت علي سارة ..بغيت اتكلم بس اسبقتني .
سارة : ها لقيتوها ؟؟
جراح: لأ ..بس ان شاء الله نلقاها ..
سارة : خالد وينه ؟؟
جراح: كاهو معاي ..بس نايم ..
سارة: مسكين تعب اكيد ..من الصبح وهو صاحي حتى غدا ما اكل ..من الظهر يدورها ..
جراح: خلاص الحين اوديه البيت ..
طلع عندي مكالمة ثانية .. فقلت
جراح: سارة ..عندي مكالمة ..
سارة : خلاص مع السلامة ..
طلع غيث .وكان يقول .
غيث: ها جراح ...لقيتوا شي ؟؟
تنهدت وقلت ..
جراح: لأ ..وانتوا ؟؟
غيث: ولا شي ..وينه خالد مايرد ..
جراح: نايم يمي ..
غيث: نايم؟؟ خلاص جراح وده البيت ..هو بروحه تعبان ..
جراح: ان شاء الله
وصكيت عنه ..ولفيت السيارة ..اطلع من الأحمدي ..وارد خالد البيت ..بعد ساعة من المشي ..صحى خالد ..التفت حواليه ..وبعدها طالع ساعته ..وكانت 11 ..فقال بتعب ..
خالد : محد دق ؟؟
جراح: سارة وغيث دقوا ..
رد لورا ومسك تلفونه ..وقال ..
خالد : خلص الشحن ...
وتنهد بضيق ..
وسكتنا ... مرينا على مطعم ..فقلت ..
جراح: تبي شي خالد ؟؟
خالد : لأ ..ما اشتهي ..
طالعته بعتاب ..
جراح: خالد سارة قالت لي ..انك من الصبح ما كليت شي ..لازم تاكل ..
رد علي وصوته تعبان من القلب ..
خالد : مابي..مااشتهي ..
عاندته وطلبت له ..حطيت الأكل بالكراسي اللي ورا ..وتذكرت ان احنا ماصلينا العشا ..استغفر الله ..
قلت ..
جراح: خالد ..صليت العشا ؟؟
طق خالد راسه وكأنه تذكر .. وقال
خالد : لأ ..
بغى ينزل خالد من السيارة بس ..رد قعد وشكله داخ ..تحركت له بسرعة ..ورفعت ريوله اللي كانت طالعة من السيارة ..وقلت ..
جراح: خالد ..حاس بشي ؟؟
قال بصوت واهن ..
خالد : دايخ ...الصداع ذابحني ..
رحت وفتحت الباب الوراني ..ومسكت واحد من الأكياس ..وطلعت عصير ..وحطيت فيه العود( الماصة) ..ورديت لخالد ...وقربت منه العصير ..رفض بالبداية بس بالأخير شرب ..رشفتين مثل مايقولون .. وبعدها رد راسه لورا بتعب وهو ماسكه ..يأن من الألم ..فقلت ..
جراح: خالد ..رح اوديك البيت ..شكله ياك هبوط ..
خالد : مافيني شي ..خل نكمل ندور ايمان ..
جراح: بس ..
قاطعني وقال يرفع راسه ويطالعني
خالد : جراح ..الله يخليك لا تضغط علي ..
ورد راسه لورا ...
انصعت لطلبه .. وحركت السيارة .. المطر لسه يصب ..التفت لخالد ولقيته مغمض عيونه ..
مرينا على البحر ..ووقت السيارة ..ونزلت بعد ما تأكدت ان خالد نايم ..ورحت لمكان مناسب عشان اصلي فيه ..وكان عبارة عن مظلة وقفت تحتها عشان المطر ..
بديت الصلاة .. ولما خلصت ..التفت عشان اقوم ..لقيت خالد يصلي هو بعد ..بعد ما خلص ..
جراح: تقبل الله ..
خالد : منا ومنك صالح الأعمال ..
وقفت وقلت وانا اطالع الساعة ..وكانت 12 ونص ..
جراح: نكمل؟؟
هز راسه بايجاب ..ووقف ..بس ترنح شوي وبغى يطيح ..فسندته وقلت ..
جراح: اسم الله عليك ..خالد لازم تروح البيت ترتاح ..
خالد : مابي ..لازم القى ايمان ..
جراح: بنلقاها ان شاء الله ..
هدني خالد ..ومشى للسيارة .. وانا وراه .. وكملنا فر .. بعد الحاح مني وافق خالد يروح البيت ..وصلته البيت ورحت انا اكمل فر ..
***********************************************

*pink* ©؛°¨غرامي مشارك¨°؛©

هلا اختي انا مابعد اقرءها بس شكلها رووعه ..

كملي ودربك خضر ..


جل حبي وتقدري اختك ..

بنت أبو ظبي ©؛°¨غرامي مبدع¨°؛©

علمني جراح ان ودا خالد البيت ..طالعت الساعة وكانت وحدة نص الليل ..والمطر يصب من الصبح ..ما وقف ..
سمعت صوت موبايلي ..وكانت سارة ..
سارة: مالقيتوها ؟؟
تندهت بضيق ..
غيث: لأ .. خالد عندج ؟؟
قالت ..
سارة : خالد ؟؟ لأ ..ليش مو معاكم؟؟
قلت بتعجب ..
غيث: جراح وصل خالد البيت ..تأكدي سارة ..
سارة: انا وامي وهاجر قاعدين بالصالة ومحد دخل البيت ..
اخترعت ..وين راح ؟؟
صكيت عن سارة .. والتفت لعمر ..
غيث: عمر ..خالد ما راح البيت ..ودني البيت اكيد ما بعَد وايد ..
دليت عمر البيت ..ووصلنا الفريج .. افترينا فيه ..وبالأماكن القريبة له .. بعد ربع ساعة ..يأست ..
مرينا على ممشى ..قريب من نهاية الفريج ..لمحت جسم بني آدم على الأرض ..قلت لعمر ..
غيث: عمر وقف وقف ..
وقفنا ..ونزلت بسرعة ..وركضت وانا اغطي راسي بايدي من المطر ..
وفعلا طلع خالد ..
غيث: خالد ..خالد ..
كان ممد على الأرض ..ومبلول من راسه لأخمص قدميه ..وما يتنفس ..
والمطر يصب ..بغزارة..

بنت أبو ظبي ©؛°¨غرامي مبدع¨°؛©

يتبع <<<
التكمـــــــــــــــــــــــــــــــــلة "الحلقة الثامنة"
ــــــــــــــــــــــــــــــــــــــــــــــــــ ـــــــــــــــــــــــــــــــ

للحين ما يانا خبر ..طالعت الساعة كانت 2 الفير ..تعبت من المحاتاة ..امي نايمة على القفنة وهاجر قاعدة على الأرض وسرحانة صارلها فترة .. دقيت للمرة الألف على غيث بس ما يرد .. التفت بضجر لهاجر وقلت ..
سارة: بدل قعدتج هاذي اللي مالها فايدة روحي سوي عشا حق امي ..
التفت لي هاجر وطالعتني شوي وقامت بهدوء ..
غريبة ...
يمكن الطق اللي كلته من خالد سنعها ..
رجعت بصري للتلفون ..لعل وعسى احد يدق ..
ياه على بالي اني ادق على جراح بس ..استحيت ..
بس هو خلاص صار زوجي ..يعني لازم يعرف كل صغيرة وجبيرة عني ..
تدرون انا إلى الآن مو مصدقة اني متزوجة ؟؟
ما احس اني متزوجة ابدا ..
لا يدق علي ولا انا ادق عليه ..
احسن .. شلي فيه ؟
قمت ورحت صعدت داري عشان اييب لحاف لأمي .. وطبعا مريت على غرفة ايمان .. ولقيت بابها مبطل ..وطرى على بالي اللي صار يوم اكتشف خالد ان ايمان مو موجودة ..
خالد: يعني شنو مو موجودة ؟؟
طالعني انا وامي ينطر منا الجواب ..فقالت امي ..
امي : ما ادري يا ولدي ..يمكن راحت عند وحدة من رفيجاتها ..
بعدها طالعتني امي بحيرة ..فقال خالد بعصبية وهو يطق الباب بقوة ..
خالد : تطلع هالحزة ؟؟ الساعة 2 الحين ..
حاول خالد يهدي عمره ..مرر ايده على شعره بتوتر ..وقال ..
خالد: لنفرض انها طلعت عند رفيجاتها .. ليش ما قالت لج او قالت لسارة او حتى دقت علي تستأذن ؟؟
ما عرفنا نجاوب ..لأن الصراحة ..مو لاقيين الجواب ..
قال خالد بنبرة تهديد ..لأول مرة اشوفه بهالحال ..
خالد : انا رح انطر ساعة بعد ..ولما تيي رح يكون لها معاي تصرف ثاني ..
ونزل تحت ..ينطرها بالصالة ..
ومرت الساعة ..ومايت .. دق خالد على غيث ..وطلعوا يدورونها ..
وها احنا للحين مو لاقيينها .. والله يستر ..
دخلت غرفة ايمان ..فضول لا اكثر ..قعدت على سريرها ..اتذكر ..ليش ما رحت المدرسة ..
معاملتها لخالد الأيام هاذي ما كانت طبيعية .. حتى الأكل ما كانت تاكل عدل ..
لحظة !!!
رحت بسرعة وبطلت كبتها ..
وتفاجأت ...
*************************************
قاعد على الكرسي انطر الطبيب لما يطلع من غرفة الفحص ..
منزل راسي وحاط ايدي عليه ..امنع قطرات الماي انها تنزل .مررت ايدي على شعري المبلول اكثر من مرة ..رجعت فيني الذاكرة لورا ..يوم لقيت خالد طابح على الأرض ..
قعدت بالشارع احول اصحي خالد قرابة الربع ساعة ..
وطبعا ..سويت كل الأسعافات الأولية المطلوبة ..
والحمدلله استجاب ..
وصحى خالد ..
بس رد وفقد وعيه .
طرنا فيه انا وعمر للمستشفى ..وهذا قعدتنا من اول ما يينا إلى الآن .
قعدت استغفر ربي بداخلي ..وادعي لخالد ..
هو سندي الوحيد بهالدنيا ..
سمعت صوت واحد اعرفه ..رفعت راسي ..لقيته جراح ..
جراح: ها بشر ؟؟
قلت بأسى ..
غيث: للحين ماطلع ..
سكتنا شوي بعدها سألت ..
غيث: منو اللي قالك ان احنا هني ؟؟
جراح: دقيت على سارة ما ترد ..ودقيت عليك انت هم ماترد ..فدقيت على عمر .. وقالي ..
ذكرني جراح على شي مهم ..فقلت
غيث: قلت لسارة ان احنا هني ؟؟
جراح: لأ طبعا .. لما نتأكد من حالة خالد ..
بعدها ظهر عمر ..وبأيده ..جلاصين ..سلم على جراح وعاطني الجلاص وكان قهوة ساخنة ..شربتها لعلها تدفيني ..
سمعت صك الباب وعرفت انه الدكتور ..قمت بسرعة ..وقلت ..
غيث : ها دكتور طمني ؟؟
الطبيب : انت تأربله ؟؟
هزيت راسي بأيجاب ..
غيث: انا اخوه ..
قال الطبيب وهويحط ايده على جتفي ..
الطبيب: والله يا ابني ..حالته صعبة شوي ..بس
قاطعته بخوف ..
غيث: يعني شنو ؟ اشفيه خالد ؟؟
مسكني عمر عشان اهدا شوي ..فقال الطبيب..
الطبيب: عنده انهيار عصبي .. وو..حالته النفسية متدهورة
غمضت عيوني بأسف على حاله ..فقال جراح..
جراح: انزين دكتور نقدر نشوفه ؟؟
لفيت انا عليه وقلت ..
غيث: اكيد لازم نشوفه ..
وتحركت لغرفته ..ودخلت ..وماهمني الطبيب ..دخل بعدي جراح وعمر .. وشافوني واقف ..منصدم من اللي قاعد اطالعه ..
هذا مستحيل يكون خالد ..
تقربت منه ودققت بويهه ..
ويهه اصفر ..وشعره متناثر على جبهته بعشوائية ..
والكمام على ويهه ..
والمغذي ملزقينه على ايده اليسار ..
مستحيل يكون هذا خالد ..
خالد الجبل ..اللي ما تأثر بوفاة ابوي ..
اللي تحمل مسؤولية اسرة ..بمشاكلها ..وغثاها ..
لمست ايده ..
لقيتها باردة...
بستها بحنان ..وبعدها بست راسه ..
نزلت دمعة من عيني..مسحتها بسرعة ..
استقرت ايدي على راسه ..وبديت امسح على شعره ..قلت بصوت مليان بجي ..
غيث: خالد ..خالد اصحى الله يخليك .. خالد لا تروح عني ..
حسيت بايد على جتفي ..وكان عمر ..
عمر : غيث.. ما يصلح جذي الله يهديك ..ادعيله الله يقومه بالسلامة ..
نزلت راسي ودموعي تنزل ..
حسرة على حاله ..
مسحتهم ..وسحبت كرسي وقعدت وقلت باصرار ..
غيث: انا رح اقعد هني ليما يصحى ..
طالعوا عمر وجراح بعض ..فقال جراح..
جراح: الطبيب قال انه مارح يصحى إلا باجر ..
قلت بعدم اهتمام ..
غيث: ما يهمني ..
سكتنا شوي ..فقلت كأني تذكرت شي ..
غيث: عمر ..انت صوتك حلو بالقرآن ..اقرى عليه ..
عمر : ان شاء الله ..
وتجدم لخالد وحط ايده على راسه ..بدا يقرا ..
قرايته تهدي النفوس ..
قرا عليه صورة الكهف كاملة ..
وانا وجراح نسمع ..وكأننا قاعدين بالحرم ..
انتهى عمر من القراية .. فدق تلفون جراح ..فمسكت ايده وقلت .
غيث: إذا سارة لا تقوليها عن أي شي ..
هز جراح راسه بايجاب وطلع ..
اما انا وعمر .. قعدنا يم خالد
عسى الله يقومه بالسلامة ..
*******************************************
رفعت تلفوني لأذني وقلت ..
جراح: هلا سارة ..
ياني صوته وكأنها تهمس ..
سارة : جراح انت وينك ؟؟
طالعت التلفون باستغراب ..كأني سمعت السؤال غلط فقلت ..
جراح: شنو؟؟
كررت ..
سارة: انت وينك ؟؟
جراح: انا؟؟ انا بالـ...
بغيت اكمل لولا اني تذكرت كلام غيث ..فقلت
جراح: انا عند غيث وعمر ..
سارة : انزين عطني غيث ..
استغربت من نبرة صوتها ..كلاني الفضول بس مسكت روحي وقلت ..
جراح: نطري ..دقيقة ..
وتجهت للغرفة بطلت الباب ووقفت عنده وما دخلت ..فانتبه علي عمر وغيث ..فأشرت لغيث انه يطلع ..وياني ..
وبرة ..قلت له وانا اعطيه التلفون ..
جراح: سارة تبيك ؟؟
طالعني بملل واخذ التلفون ..اما انا فدخلت داخل ..عند خالد وعمر ..
قعدت يم عمر ..بعدها بخمس دقايق ..دخل غيث الغرفة ويهه متغير .. شسالفة ؟؟ ماحبيت اتدخل في شي ما يعنيني ..
طالعت ساعتي ..لقيتها 3 الفير ..الوقت تأخر ..
استأذنت منهم وطلعت على اساس اني ايي باجر .. ركبت سيارتي ..ورن موبايلي ..وتقريبا هاذي مرة الألف .. تنهدت بتعب ..ومسكت التلفون ..لقيتها الوالدة ..طمنتها علي وقلتها اني بالطريج .. وحذت التلفون ورا ..ما لي خلق روحي ...نعسان ..ويوعان فوق هذا ... سمعت صوت تلفوني ..صرخت بعصبية ..منو هذا بعد؟؟
صفت السيارة على جنب ..ولفيت على ورا واخذت التلفون ..وكانت سارة ..
أففففففف ..هاذي ما ملت ؟؟
جراح: آلو ..
سارة : هلا جراح ..انت رايح البيت ؟؟
اشرايج ؟؟
تنهدت بضيق بسري ..وقلت ..
جراح: انا بالطريج للبيت ..ليش في شي ؟؟
سكتت سارة مترددة ..بعدها قالت بصوت كأنها مستحية ..
سارة : مشكور على اللي سويته ..
تصدقون لو اقولكم اني زين ما كنت اسوق ؟؟
يا حلاة صوتها .. ابتسمت وقلت ..
جراح: لا تقولين جذي ..انا واحد منكم صح ولا لأ ؟؟
شكلها استحت .. ما سمعت رد ..فقلت ..
جراح: سارة انت معاي ؟؟
قالت بتلعثم.
سارة : معاك ..معاك .. أأأ.. الحين اخليك ..ومشكور مرة ثانية ..
وصكت بويهي ..
طالعت التلفون ..وضحكت وانا بداخلي مستغرب .. مرة تكون شحلاتها تهبل ..ومرات تكون اعوذ بالله جنها وحش ..
ركبت سيارتي ورديت البيت .. وانا ادعي ربي انها ما تغير علي ..
******************************************

بنت أبو ظبي ©؛°¨غرامي مبدع¨°؛©

بطلت عيوني ..لقيت السقف جدامي ...
غمضت مرة ثانية ..وفتحت ..وهم نفس الشي ..
انا وين ؟؟
تلفت ببطء ..وعرفت انا وين .. رديت لوضعي الأولي ..اطالع الفراغ ..
الغرفة فاضية ..بس فيها كرسيين فاضيين ..كأن كان في احد بالغرفة ..
غمضت عيوني بتعب ..حاس ان راسي يفتر ..
تذكرت اللي صار ..
للحين مو مصدق اللي صار ..
اخاف صار فيها شي ..
لا ان شاء الله ..
انا بطلع من المستشفى وادور عليها ..وبأذن الله القاها ..
سمعت حركة بطلت عيوني .. لقيته غيث ..يفرش السيادة ..
الساعة جم الحين ؟؟
طالعت الدريشة ..لقيت الشمس طالعة ..
اذن الفير من زمان ..
نطرت غيث يخلص ..ولما خلص ..ناديته ..فالتفت حواليه ..كأنه سمع شي ..بعدها رد يستغفر..
ناديته مرة ثانية ..فقام وتقرب مني ..ولقني صاحي ..فقال بفرحة..
غيث: خالد..
ابتسمت له ..ومسكت ايده ..وهو حب راسي ..وقال بسعادة ..
غيث: حمدلله على السلامة ..
قلت ..
خالد : الله يسلمك ..
غيث: خرعتنا عليك يا ريال ..
تنهدت ..وقلت..
خالد : شسوي يا غيث ؟؟ بنتي ..هاذي .. ما تحملت فكرة انها تكون بعيدة عني .. ما اقدر اتخيل جذي ..
ما اقدر ..
غيث: هد روحك انت الحين ..وارتاح ..وان شاء الله خير ..
نبرة صوته تقول انه يعرف شي ..فسألته ..
خالد : غيث.. انت دورت عليها ؟؟
غيث: دورت معاك بس لما طحت علينا ..
هز راسه بالنفي ..
غمضت عيوني بأسف ..فسالني غيث ..
غيث: ليش ما قلت لي ان نوال ردت طلعت بحياتك؟؟
تفاجأت ..بطلت عيوني وطالعته وكأنه يقولي خلاص انا عرفت ..
خالد : ما يت مناسبة ..بعدين ماهي بشارة عشان اقولك ..
غيث : خالد ايمان بخير لا تخاف ..
طالعته باستغراب ..
خالد : اشدراك ؟؟
سكت غيث ..شكله مايبي يقولي ..فمسكت ايده احثه على الكلام..
خالد : غيث ..لا تلعب بأعصابي ..
سكت دقايق ..وقال ..
غيث: ايمان..عند نوال ..
طالعته بصدمة ..وعيوني مبطلهم على وسع ..من صجه هذا ؟؟
خالد : انت شقاعد تقول؟؟
آخر وحدة تمنيتها لأيمان..
غيث: امس سارة قالت ان ايمان خذت ملابسها ..وانها كانت تلح عليك تبي تروح لأمها ..بس انت كنت ترفض ..
قلت بعصبية ..
خالد : كنت ارفض ..لأني اعرف نوال ..ماتبي ايمان إلا لأنها تبي تحرني .. غيث انت يعني ما تعرف نوال؟؟ نوال هاذي اكبر جذابة ..
غيث: خالد هد عمرك ..وان..
قاطعته بصراخ وانا احاول اقوم من السرير..
خالد : واشلون تاخذها وهي اصلا متنازلة عنها ..
غيث: خالد ..مو جذي تنحل الأمور ..البنت عند امها .. مو عند احد غريب ..
نرفزتني كلمته..فقلت ..
خالد : لا عند احد غريب ..مدام هي عند نوال يعين عند احد غريب ..
كملت كلامي وانا اقوم من السرير..
خالد: انا لازم اروح عند نوال و...
قاطعني غيث ..وقال ..
غيث: نوال سافرت .. مع ايمان ..
تجمدت ريولي وما قدرت اتحرك .. التفت لغيث وطالعته كأني شايف يني ..وقلت بما ما تبقى لي من صوت
خالد : شنو؟؟
تنهدت غيث ومسح ويه وقال ..
غيث: نوال وايمان سافروا ..سافروا يا خالد خلاص انساهم ..
انساهم ؟؟؟ انسى عمري وحياتي ..بنتي ..اللي تعبت اربيها وادريها ..وهاذي الخاينة الخسيسة اللي حتى ما احترمتني ولا احترمت بنتها ..تاخذها مني بهالسهولة ؟؟
مسكني غيث ..وقال
غيث: خالد الحين خلاص الموضوع انتهى .. لازم تتأقلم مع اللي صار ..انا مثلك بعد انصدمت بس ..ما اقدر امنع البنت من امها ..
كان غيث يتحجى وكلماته ما كانت تدخل اذني ..كنت مثل لوح الخشب .. قعدني غيث على السرير ..ولحفني .. وانا لسة مو مستوعب اللي قاله ..
***********************************************
ادري شنو بتقولون قسيت عليه ..بس والله مو قصدي ..
بالنهاية رح يعرف ..
خل يعرف مني احسن ..
لحفته عدل ..وطالعته ..مسكين انصدم ..
قلت ..
غيث: خالد انا بنزل اييب لروحي اكل من الكفتييريا ..
وما اعتقد انه سمعني ..
طلعت من الغرفة متعمد عشان اخليه يختلي بروحه ..
نزلت للكفتيريا ..
طلعت تلفوني عشان ادق على عمر ..ياني صوته كله نوم ..
عمر : هلا غيث ..
غيث : ابشرك خالد صحى ..
عمر: والله .. حمدلله على سلامته ..
غيث:الله يسلمك..كنت نايم؟؟
عمر : ئي ..بس زين صحيتني عشان الدوام ..
غيث: احسن .. يلا مع السلامة ..
وصكيت عنه ..
ولما دخلت تلفوني بجيب الجاكيت ..بطلت باب الكفتيريا .. بس حسيت اني دعمت احد ..
غيث: اوه ..آسف ..
الممرضة : لا عادي ..
طالعت الممرضة ..جني شفت ويهها ..بس ما ادري وين ..
استنكرت الممرضة تصرفي وقالت ..
الممرضة : في شي ؟؟
انتبهت وقلت ..
غيث: ها؟؟ لا ..ماكو شي
ودخلت الكفتيريا .. ما ادري ليش ؟؟ حسيت اني اعرفها من زمان ..
اخذت طلبي ورديت صعدت فوق ..
دخلت الغرفة .. وسبحان الله ..لقيت نفس الممرضة عند خالد ..
بس هالمرة غضضت بصري ..حطيت الأكل على الكرسي ..وقعدت اراقب الممرضة شنو تسوي ..
بعد ما خلصت قلت ..
غيث: اشلونه الحين ؟؟
الممرضة : علاماته الحيوية ممتازة .. بس يحتاج للتغذية ..
الجملة الثانية فهمتها ...بس الأولى لأ.. شنو علاماته الحيوية؟؟
غيث: حمدلله ..
بغت تمشي ..بس وقفتها وقلت ..
غيث: لو سمحت ..
التفت لي ..
غيث: متى بترخصونه ؟؟
ابتسمت كأن سؤالي غبي .
الممرضة : امس بدخلينه ..اشلون تبيه يطلع اليوم؟؟ على العموم كلم الدكتور ..هو ادرى ..
واستأذنت ومشت ..
كل هذا صار وخالد ما نطق بكلمة .. طالعته وقلت ..
غيث: خالد..
مارد علي..
غيث: خالد صدقني هي بخير ..
هالمرة رد بس بجمود ..
خالد : لا مو بخير ..
رن موبايلي ..وكانت سارة ..
غيث: هلا سارة.
سارة : صباح الخير ..ها اشلونه خالد ؟؟
غيث: على حطت ايدج ..يحاتي ايمان ..
سارة : انت ما قلت له ؟؟
غيث: بلى ..ومصر يدورها ..سارة ..
سارة : نعم .
غيث: ترى ..خالد بالمستشفى ..
سكتت سارة ..من الصدمة اكيد ..
سارة: خير؟؟ ليش ؟؟
كملت كلامي وانا اطلع من الغرفة ..وشرحت لسارة تفاصيل اللي صار ..
وبعد ربع ساعة ..دخلت مرت ابوي وسارة وهاجر ..
طبعا مرت ابوي ..بدت بجيها ..وسارة مسكتني ..تستفسر ..اما عن هاجر كانت واقفة بعيد شوي ..
بعد ما خلصت سارة مني ..راحت لخالد وسلمت عليه ..وياه دور هاجر ..
مسكت هاجر ايد خالد بس خالد سحبها بقوة ..وخزها بنظرات خلت هاجر تنزل راسها ...
اشصاير ؟؟؟

يتبع <<<

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1