بنت أبو ظبي ©؛°¨غرامي مبدع¨°؛©

التكملــــــــــــــــة "الحلقة الواحد والعشرون"
ــــــــــــــــــــــــــــــــــــــــــــــــــ ــــــــــــــــــ

رديت البيت بعد ما خلصت الدوام .. عندي شغل لفوق راسي ... الله يعيني .. كنت ماسك اوراق ولاب توب مالي وعلبة الديسكات .. كل هذا معاه خرايط ...بطلت الباب بجتفي ودزيته ...تجدمت حطيت الأغراض لأقرب طاولة ..
وتنهدت بتعب ..ولأن الجو حار برة ومو حاس بالتكييف داخل البيت ..دورت على زر التكييف ولقيته شغال ..انزين ليش مو حاس فيه ؟؟؟
رديت قعدت على القنفة ابي ابرد شوي ... سندت راسي على القنفة وغمضت عيوني ..
رديت فيني الأفكار لليوم ..
الحمدلله بديت مشروعي بالــ750 الف مالتي لأنها حلال ..
تذكرت البيت اللي حنا قاعدين فيه الحين ..حتى هو حرام .. وفلوس هاجر وسارة بعد حرام ..
والمزرعة مالت خالد هم حرام ..
حرام عليك يا يبا كنت معيشنا بفلوس حرام ...
لو ما احترق المخزن ما كنت اكتشفت البلوة هاذي ..
وعسى ان تكرهوا شيئا وهو خير لكم ...
الحمدلله ...انا راضي ومقتنع باللي صار ...
لازم ادق على خالد واقوله السالفة ... بطلت عيوني وعدلت قعدتي ..وفركت عيوني ..
" صح النوم "
وخرت ايدي عن عيوني لقيت الهنوف تطالعني ..الله شحلاة اليوم لما تستقبل ويه تحبه بعد تعب ...
ابتسمت لها وقلت ..
غيث: ما كنت نايم ..كنت اريح شوي ..
قالت هي ..
الهنوف : كل هاذي واراقك ؟؟
قلت وانا اتنهد تذكرت اني بقعد عليهم اليوم ..
غيث: ئي ..
قاتل بتعجب ..
الهنوف : كل هذا ؟؟؟
ابتسمت على عفويتها وهزيت راسي بايجاب ..
فقالت هي ..
الهنوف : الله يعينك الصراحة .. تبيني اساعدك ؟؟
استغربت وقلت ..
غيث: اشلون ؟؟
الهنوف : لا تخاف اسرار شغلك في بير ..
قلت باهتمام ..
غيث: لا مو عن ..بس تعرفين اشلون يمشي الشغل ؟؟
قالت بمرح ..
الهنوف : اكيد ..ابوي الله يرحمه علمني كل صغيرة وكبيرة بالشغل .. وكنت بعض المرات اقعد وياه ونشتغل على الأوراق ..
انبهرت فيها ...ماشاء الله تتكلم وهي واثقة .. قالت هي
الهنوف :مو مصدقني ؟؟
قلت بسرعة .
غيث: لا محشومة عن الجذب .. بس اثبتي لي ..
قالت بتحدي ..
الهنوف : خلاص بعد العصر تلقاني عندك ..
ووقفت وقالت ..
الهنوف : والحين قوم الغدا جاهز ..
قمت معاها وانا منبهر ..كلامها اخذ عقلي ..
مو كافي انج ماخذة قلبي ...
وملخبطة كياني كله ...
آآآآآه بس لو اقدر اقولج ..
وتذكرت آخر مرة يوم اني ضعفت وبغيت اقولها بس هاجر قطعت علينا ..
تسبحت وبدلت هدومي ونزلت تحت .. لقيت بدر والهنوف وتوكله وهاجر قاعدة تطالع تلفزيون وتاكل ..
ما تبطل العادة هاذي ..
قعدت براس الطاولة .. وقلت
غيث: هجور جم مرة اقولج غلط تاكلين وانتي تطالعين ؟؟
التفتت لي هاجر وقالت بدلع يهال ..
هاجر: ابي اطلع الفيلم امس ما كملته ..وهاذي اعادته ..
وهزيت راسي رافض .بس شسوي .. متعبة البنت هاذي ..
قلت لها ..
غيث: آخر مرة ..
وبديت آكل .. نط فجأة بدر عندي وقال وهو واقف يمي ..
بدر : ابي آكل معاك ..
طالعته وابتسمت على شكله .. مبهدل هدومه ..قالت الهنوف بعصبية ..
الهنوف : بدر تعال هني ..
قال بعناد ..
بدر : لا لا ...ابي آكل مع غيثاني ..
غيثاني بعد !!!
قلت وانا اضحك ..
غيث: خلاص خلاص الهنوف وخليه ..تعال ..
مسكته وحطيته بحظني ...
الله ع اليهال ..اموت في شي اسمه يهال ..
تخيلوا قعدت نص ساعة اوكل بدر .. الأخ مو ياي ياكل ياي يلعب .. وانا المسكين ما كليت شي ..
غيث: بطل حلجك .. اشلون بتاكل بالله ؟؟
بدر : مابي ..
قلت بعصبية شوي عشان لا ياخذ و يعطي معاي وايد ..
غيث: بدور..
خاف حرام هو ..اول مرة اقسو عليه ..بطل حلجه بسرعة وقعدت اوكله .. لما خلص قلت له اراضيه ..
غيث: خلاص اليوم بليل بدويك الملاهي .. راضي ؟؟
باسني على خدي وحلجه كل دهن ..واااي ....وركض ..صرخت عليه ..
غيث: بدور طالع شسويت ؟؟
ويتني ضحكته .. عساه دوم هالضحكة ...
مديت نظري لنهاية الطاولة ..كنت ادور على كلينكس ..قمت آخذه ورديت مكاني حسيت ان في عيون تراقبني ..رفعت ويهي اشوف وفعلا كانت تراقبني ..كانت تطالعني بنظرات غريبة .. بعدين قامت ...
مسحت على خدي .. ورديت آكل .. بعد ما خلصت سمعت صوت الآذان ...
حسبي الله على بليسك يا بدر ..
طالعت الساعة لقيتها ثلاث ونص ..صعدت داري وغسلت ايدي بالحمام عزكم الله وتوضيت بسرعة ..
ولبست لبس رياضي ..ومعاه كاب ..
وطلعت من الغرفة ..ورحت غرفة بدر .. طقيت الباب ..محد رد ..لا يكون نام ..وانا معوده كل ما يأذن نصلي بالمسيد ..
اقتحمت الغرفة ..لقيت الهنوف قاعدة على السرير بدون حجاب..
بسرعة صكيت الباب ..صج اثول ..كنت نطرت لما ترد علي .. هديت مقبض الباب ونزلت تحت ..
موقف محرج الصراحة ..
يتني ضحكة .. بس كتمتها غصب ..
بعدها شفت بدر نازل .. ورحنا المسيد ..
لما ردينا ..مسكت الأوراق عشان اشغل نفسي عن النوم ...
كنت بنادي الهنوف بس بعد الموقف اللي صار ماا عتقد ..
" غشاش "
طالعت اللي واقف عند الباب ..
الهنوف : ليش ما قلت لي انك بتبدا الحين ؟؟
عدلت نظارتي الطبية وقلت ..
غيث: ما حبيت ازعجج ..
خلت الباب مفتوح وسحبت كرسي .. ومسكت قلم من الأقلام اللي بالعلبة وقالت ..
الهنوف : وين شغلك ؟؟
طالعته باستغراب وعطيتها ورقة من اوراق الحسابات ..
قالت بعد ما قرتها ..
الهنوف : توك فاتح مشروع انت ؟؟
هزيت راسي بايجاب ..وقلت اكمل على كلامها ..
غيث: وصكيت الشركة ..
شهقت هي وقالت بذهول ..
الهنوف : ليش ؟؟
قلت بعد ما تنهدت ..
غيث: بس اوعيديني انج ما تقولين لأحد ..
الهنوف : ان شاء الله ..
قلت لها السالفة كاملة وبعدها هي قالت..
الهنوف : احسن ..ريحت عمرك .. بس هذا الشي ما ينسكت عنه ..يعني لازم تقول لأخوانك عشان لا يعيشون في الحرام ..
هزيت راسي بايجاب وقلت ..
غيث: واليوم بحاجي خالد واقوله ..وبعده بكلم سارة وهاجر ..
مسكت ورقة من اوراق اللي جدامي ..وقلت بتحدي ..
غيث: شاطرة بالرياضيات ؟؟؟
طالعتني بتحدي اكبر وقالت ..
الهنوف : انا ام الرياضيات ..الخوارزمي متعلم مني ..
ابتسمت وقلت ..
غيث: يا واثقة ..عيل احسبي كل الأرقام هاذي ..
وخذت الورقة ..
وبدينا الشغل ..
الحمدلله نست السالفة ...والدليل انها تاخذ وتعطي معاي ..
وبين الشغل كنا نقط تعليقات على بعض .. ونضحك ونستانس ..
شكلها خذت علي ..
جان زين احساسي يطلع صح ..
شفنا الساعة لقيتها الساعة سبع ونص ..
شهقت وقلت ..
غيث: الصلاة!!!
يا الله نسيت وهي بعد ما ذكرتني .. شكلها هي ناسية بعد ..
قالت الهنوف ..
الهنوف : خلاص طافتك ..صلها بالبيت ..
صح طافتني ..قالت وهي تقوم ..
الهنوف :انا بعد بروح اصلي ..
وطلعت من الغرفة ..
صليت المغرب.. وطلعت من الغرفة عشان اشوف بدر صلاها ولا لأ ..
ماابيه يصير نفسي ..عشان جذي اشد معاه شوي بسالفة الصلاة والدين ..حتى افكر اشركه بحلقة تحفيظ قرآن ...على الأقل اخذ فيه اجر ..
دورته بالصالة مو موجود ..صعدت فوق لداره مو موجود ..
سمعت صوت ضحك بغرفة هاجر .. طقيت الباب وفتحته .. لقيت هاجر وبدر قاعدين يلعبون ..
قلت .
غيث: حمدلله والشكر .. شقاعدين تسوون ؟؟
وطالعت حولي الغرفة مبهدلة ..
قالت هاجر وهي تضحك ..
هاجر: بدر ذابحيني مو راضي يطلع من الغرفة ..
قال بدر وهو ينط على هاجر ..
بدر : انت اللي قلت لي العب ..
قلت انا ..
غيث : بدر ..تعال ..
ياني بدر وقلت ..
غيث: صليت ؟؟؟
هز راسه بالنفي ..فقلت ..
غيث: شاطر ...يلا قوم صل ..
بدر : ان شاء الله ..
بغيت اطلع فقال هو ..
بدر : غيث .. انت وعدتني انك تاخذني الملاهي اليوم ..
ملاهي !!!
اوووه نسيت ..
قلت ..
غيث: صل بالأول بعدين يصير خير ..
وبعد ما صلى حن فوق راسي لين وافقت ..
قلت لهاجر ..
غيث: بنروح الملاهي بدلي هدومج ..
قالت هاجر ..
هاجر : مابي ..راسي مصدع شوي ..
طالعته وقلت ..
غيث: توج تلعبين مع بدر اشزينج ..
هاجر: صدعت منه .. اخذ الهنوف وبدر معاك ..
قلت لها ببلاهة ..
غيث: لا والله !!! اخليج بروحج في البيت ؟؟ مستحيل ..
سكت شوي بعدين كملت وقلت ..
غيث: بعدين ما يصير انا اوالهنوف نقعد بروحنا ..وانت تدرين ..
قالت باستهبال ..
هاجر: تستحي منها ؟؟
التفت لها وعطيتها نظرة حادة فقالت هي بسرعة ..
هاجر: آسفة ..
وصعدت دارها ..
رحنا الملاهي ..ولعبت بدر لما تكسرت ضلوعي ..
اليهال ما يتعبون ابدا ..
ماا ذكر لما كنت بعمر بدر اني كنت اروح الملاهي ولا حتى الحديقة اللي جدام بيتنا ..
مابي اعكر مزاجي بالذكريات هاذي ..
تعشينا وصلينا العشا .. وردينا البيت ..
وعلى طول على السرير..لأني هلكان حدي ..
نمت بسرعة قياسية ..
صحيت على صوت المنبه ..
صليت الفير بالمسيد ومعاي بدر اللي بصعوبة صحى ..
وبالردة كنت شايله لأنه نام علي بالمسيد ..
وديته داره ورديت انا نمت ...
صحيت على الساعة سبع ..
ورحت الداوم ..
وانغمست بالشغل ..
يت السكرتيرة دلال اللي كانت من ضمن اللي وقفوا معاي ..وقالت..
دلال: استاذ غيث .. رئيس شركة المنافسة عندنا ..
الشركة المنافسة عندنا !!!
شلي يايبه اكيد مو عاجبه السعر ..
لأني سمعت عن مناقصة نازلة السوق سعرها وايد عالي ..
صج انه مو عاجبني بس تستاهل ..البضاعة وايد حلوة ..
ودوم هالشركة هاذي اول المنافسين لنا ..
غيث: دخليه ..
ورديت للكمبيوتر مالي ...
" السلام عليكم "
وقفت عن الكاتبة ..والتفت للريال ..
انصدمت صدمة عمري ..
صعقت ...صعقة قوية بغت توقف قلبي ..
حسيت ان الزمن واقف علينا حنا بس ...
وقفت وريولي مو شايلتني ...
وقلت بصوت مخنوق ...
غيث : مح....محـــــــمد


يتبع <<<

بنت أبو ظبي ©؛°¨غرامي مبدع¨°؛©

خلللللللللللللللللللللاص بوقف نذاله <<<<<<<<<ههههههههههه
تعبت
بينك يسلموا ع تفاعللك خخخخخخخخخخخ دخلتك بالكيمياء واه بس
هههههههههههههههههههههههههههههههههههههه

بنت أبو ظبي ©؛°¨غرامي مبدع¨°؛©

الحلقة الثانية والعشرون
ــــــــــــــــــــــــــــــــــــــــــــ

ابتسم في ويهي ببلادة وبرود .. وقال..
محمد: اشلونك غيث؟؟
ما سمعت جملته لأني مصدووم .. حاس ان الهوا ما يدخل صدري ابد ..
قعدت على الكرسي نزلت راسي وتنفست شوي شوي ..
ذكرى الحادث مرت جدامي بسرعة ..مع دخلة محمد احس ان النار دخلت وياه ..نار اللي اشوفها بحلمي اقصد بكابوسي اللي يلازمني من يومها ...
لما حسيت ان انفاسي انتظمت رفعت راسي وطالعته بحقد وقلت ..
غيث: اشتبي ؟؟
قال وابتسامته الخبيثة تزيد ..
محمد: جذي يضيفون الضيوف ؟؟
شكله يبي يلعب باعصابي ..اذا جذي تفكيرك يا محمد لك اللي تبي ..
ابتسمت ببرود وقلت له وانا ااشر على الكرسي ..
غيث: حياك ..تفضل ..
وانثبر قعد ..
قلت ..
غيث: شنو تشرب؟؟
قال ..
محمد: عصير برتقال..
وطالعني وقال ..
محمد: تذكر ؟؟
اذكر!!! طبعا اذكر ..اذكر انك تحب عصير البرتقال
وقلت وانا اقعد ..
غيث: اكيد اذكر ..
وطلبت له العصير ..
قال هو ..
محمد: شخبارك ؟؟ من زمان ما شفتك ؟؟
يا اللئيم .. من زمان ما شفتني ؟؟؟ وانا ابتعدت عنك اشحقة بالله ؟؟
غيث: مشاغل ..الدنيا مشاغل ..
ودخل الفراش ومعاه العصير .. اخذ محمد العصير وحطه على الطاولة ..فقلت انا ..
غيث: اشرب .. ولا ..
سكت شوي وطالعته بنظرات خبث بعدين قلت ..
غيث:خايف فيه سم ؟؟؟
طالعني شوي بعدين قال وهو يبتسم ابتسامة اللي دوم اكرهها ..
محمد : لا ما فكرت جذي ..
قلت بعصبية وقهر ..
غيث: لأنك عارف إذا بذبحك ما اذبحك بهالطريقة .. انا لو ابي اذبحك بذبحك بايدي ..
وقمت عنه وقعدت على مكتبي .. فقال هو .
محمد: انت للحين مانسيت السالفة ؟؟
مسكت قلم العب فيه وقلت ..
غيث: واللي سويته اقدر انساه ؟؟؟
قام محمد وقعد على الكرسي اللي جدام المكتب وقال ..
محمد: الحادث هذا صار عليه سنة تقريبا ..خلاص انسى ..
هديت القلم وطالعته شوي بعدين قلت ..
غيث: رح انسى ان شاء الله بس مو الحين .. لما انت تختفي من الدنيا ..
وابتسمت ..
فقال هو ..
محمد: ادري انك كارهني وحاقد علي بعد .. بس انا مو ياي اليوم عشان نفتح دفاتر قديمة انا ياي عشان شغل ..
في هاللحظة فكرت اني اقوم واطعنه بالقلم اللي جدامي ..بس قلت وانا احاول امسك اعصابي ..
غيث: وشنو طلبك ؟؟
قال ..
محمد: طبعا محد راضي على السعر اللي نزلت فيه المناقصة السوق ..كل الشركات الباجية انسحبت عن المناقصة بسبب سعرها الباهظ .. وما بقى غير شركتي وشركتك ..
قلت ببرود وانا اكتب على الكمبيوتر اكمل شغلي ..
غيث: وانت ياي عشان تعرض علي فلوس عشان اطلع من المناقصة.... صح ؟؟
والتفت له ..ابتسم في ويهي وقال ..
محمد: ذكي مثل ما اعرفك دوم...
بادلته الأبتسام وقلت ..
غيث: لو ذكي ما كنت رافجت واحد نذل مثلك ...
ورديت للكمبيوتر .. فقال هو ..
محمد: اشقلت ؟؟
ضغطت على زر الأدخال والتفت له وقلت ..
غيث: لأ ..
شكله تنرفز فقال ..
محمد: رح تخسر صدقني ..شركتك توها يديدة وما عندك راس مال جبير ..بتخسر كل شي ..
طالعته بتحدي وقلت ..
غيث: لأ ..
قام محمد بنبرة تهديد ..
محمد: لا تستهين فيني يا غيث ..تراني ماني سهل .
طالعته من فوق لين تحت وقلت باحتقار
غيث: ادري .. والدليل وقفتك جدامي الحين تترجاني اني اطلع من المناقصة ..
عصب محمد وقال ..
محمد: تراني ماسك اعصابي وانت تعديت حدودك..
وقفت انا وقلت بعصبية ..
غيث: لا والله ؟؟!!! خفت تصدق ؟؟ اللي ماتواصله بايدك واصله بريلك ..والحين برة ...
طالعني مصدوم ..وكملت بنبرة آمرة ..
غيث: برة ...
قال يتوعد ..
محمد: هين يا غيث.. شكله الدرس اللي عطيتك اياه ما تعلمت منه .. انا اوريك..
وطلع من المكتب .
صوتنا كان عالي لأني شفت الموظفين واقفين يطالعوني وانا داخل المكتب ..
قعدت وحطيت راسي على المكتب ...
حسبي الله ونعم الوكيل ..
مو كافي اللي ياني منك ؟؟؟
حسيت بصداع فظيع من السالفة ..
سمعت صوت دلال يقول ..
دلال : استاذ غيث ..فيك شي ؟؟
رفعت راسي وقلت ..
غيث:لأ ..
وقمت اخذت مفاتيح الخزنة والملفات ويمعت الأوراق اللي جدامي وقلت ..
غيث: دلال .. انا الحين بروح البيت ... باجر ان شاء الله رح يكون في اجتماع ضروري .. علمي قسم الحسابات ..
وطلعت من الشركة ..
حذفت الأوراق والملفات داخل السيارة .. وحركت رحت البيت ..
ماني غيث ولد ابوي ان ما ربيتك يا محمد ...
هاذي فرصة عشان ارد لك الصاع صاعين ..
وصلت البيت وشلت معاي الأوراق وصكيت السيارة ..
دخلت البيت ..
لقيت حريم داخل ...
مراة جبيرة بالعمر ووحدة شابة اللي غطت ويهها اول ما شافتني ..
منو هذول؟؟
استحيت ..ونزلت راسي وقلت ..
غيث: السلام عليكم ..
ردت علي المراة الجبيرة وقالت ..
المراة : وعليكم السلام ..اكيد انت غيث ...صح؟؟
تعرفني ؟؟
قلت وانا لسة منزل راسي ..
غيث: تعرفيني يا خالة ؟؟
المراة : اكيد مو انت ولد عمة الهنوف ؟؟؟ ..انا ام حمد زوجها ..
ام حمد ؟؟؟
انتبهت للكلمة الأخيرة ..
رفعت راسي بعصبية ..وخزيت المراة بنظرات حادة ..
تحركت من مكاني وقلت ..
غيث: حياج يا خالة ..
وشفت الهنوف طالعة من المطبخ ..صعدت انا فوق .. وبدلت هدومي وصليت الظهر وانحبست بغرفتي لين ما يروحون..
طالعت الساعة شفتها وحدة الحين بيطلع بدر من المدرسة ..
ولأني مابي اتعب عمري ويرتفع ضغطي طلعت من الباب الوراني ..ورحت يبت بدر ..
ورديت لغرفتي ..
حطيت راسي المخدة احاول انام شوي .. بس صورة محمد مو راضية تطلع من بالي...
اشلون قدر يجمع فلوس هاذي كلها في سنة وحدة ؟؟
ما استبعد ان سرق .. اكيد ..
فرصة انتقم من اللي دمر حياتي وشوه سمعتي ..
ويتني ذكرى وفاة ابوي ..
للحين حاس بتأنيب الضمير ..
صج ان ابوي عمره ما حسسني اني انا ولده ودوم نتناجر ..بس عمري ما توقعت اكون سبب في موته ..
لا اراديا تجمعت الدموع في عيوني ...
ونزلت دمعة قهر ..
دمعة اسى ...
سمعت طق على الباب ..
قمت ومسحت دموعي بسرعة ..وقلت ..
غيث: تفضل ..
انفتح الباب ..وكانت هاجر
هاجر: يلا غيوث غدا ..
كنت لاف ويهي عنها فقلت ..
غيث: ان شاء الله .. بس راحوا الضيوف ؟
هاجر : لأ بيتغدون معانا .. انت غداك بالمطبخ ..
مالي خلق انزل تحت ...قلت لها ..
غيث: يبيه هني ..
هاجر: ان شاء الله ..
صكت الباب هاجر ..
وانا قمت ورحت المنظرة اتأكد من ويهي ..
سمعت صوت تلفوني .. وكان عمر ..فقلت ..
غيث : السلام عليكم ..
عمر: وعليكم السلام ورحمة الله وبركاته .. يا القاطع يومين ما اشوفك ..
ابتسمت وقلت ..
غيث: والله ..
قاطعني وقال وهو يقلد صوتي ..
عمر: والله شغل ..
ورد لصوته الطبيعي وقال ..
عمر: كلنا عندنا اشغال .. بس ما نقطع ... اسمع اليوم ابي اشوفك ...سامعني..
ابتسمت اكثر وقلت ..
غيث: ان شاء الله .. جم عمور عندي ؟؟
قال مثل الأطفال ..
عمر: واحد ..انا ..
غيث: يا واثق ..
ودخلت هاجر ومعاه الصينية .. اشرت لها تحطها على المكتب ..وطلعت ..
قلت وانا ماسك خبز ..
غيث: يلا فارج بتغدا انا ..ولا تبي تغدا معاي ؟؟
قال هو ..
عمر: لأ ما بي تنسد نفسي ..كافي بشوفك اليوم ..
ضحكت انا وقلت ..
غيث: تصدق مو منك من اللي يعزمك اصلا ..
عمر: الله عاد والعزيمة ..قوزي وانا مادري ... يلا يلا ..لا تصدع راسي ولا تنسى موعدنا ..
وصك على طول ..
انا اوريك .. كتبت له رسالة ..
" مالت عليك"
وقعدت آكل ...
بعدها حسيت باقتحام ..شي مثل الصاروخ داخل علي..
وما كان هذا الشي إلا بدر ..
قال بسرعة وهو ماسك ايدي ..
بدر: يلا يلا بسرعة ..
قلت له ..
غيث: وين ؟؟
طالعني وقال وهو يبعد الصينية عني ..
بدر: ام حمد تبي تحاجيك .. والهنوف طرشتني اقولك .. يلا قوم ..
ما ادري قلبي ناغزني ...
رحت الحمام عزكم الله وغسلت ايدي ..تأكدن من منظري وطلعت من الغرفة ..ومعاي بدر ..
نزلت تحت ..وكانت ام حمد بروحها قاعدة ... غريبة وين الباجيين ..ولا تبي توحد فيني ؟؟؟
قعدت وبدر يمي ..
فقالت ام حمد لبدر ..
ام حمد : بدر حبيبي ..ممكن تخلينا بروحنا بكلم ولد عمتك شوي ؟؟
انصاع بدر للأمر وصعد فوق ..
وانا قلبي بدا يطق بسرعة ..ماادري حاس بشي غريب ..
بدت ام حمد وقالت ..
ام حمد : انت تدري يا ولدي يا غيث ان حمد والهنوف مخطوبين صارلهم اربع سنين ..
بدينا ... مو قلت لكم ؟؟
قلت بهدوء ..
غيث : ئي ادري ..
قالت ام حمد
ام حمد : حلو .. انزين ممكن اعرف سبب رفضك لحمد ؟؟
يبتيه لنفسج ...
قلت ..
غيث: حمد والهنوف ..صح مخطوبين صارلهم اربع سنين .. بس حمد مو مهيأ ان يتزوج الحين ..حمد ما صارله شهرين من ترك الشغل ..
بغيت اقول عندي بس تداركت الكلمة وقلت ..
غيث: معاي ..وتوه فتح مشروعه .. وعلى ما يكون نفسه يبيله سنين .. وانا ماني مستعد ازوج الهنوف لحمد وهو مو قادر يصرف عليها ..
قالت ام حمد..
ام حمد: هذا مو مبرر ..
كلماتها طريقة كلامها تدل انها متعلمة ..
مو مهم الحين متعلمة ولا لأ ..قلت ..
غيث: بالنسبة لي مبرر ودافع قوي يخليني ارفض الزواج هذا ..
ام حمد: انت بعد توك فاتح مشروعك ...والله سهلها عليك ووفقك ..
طالعتها باستهبال ..
غيث: بس انا ماني خاطب ..لا تقارنيني بحمد ولدج يا خالة ..
ام حمد : حمد مو لهدرجة ما يقدر يصرف على الهنوف احنا الحمدلله عايشين بنعمة .. صج ان مو واصلين مواصيلكم بس مقتنعين .. والقناعة كنز لا يفنى ..
شكلها تنرفزت من جملتي الأخيرة ..فقلت اهديها ..
غيث: لا تفهميني غلط يا خالة .. انا ما قصدت اللي فهمتيه .. انا رافض الزواج وقلت لج السبب ..
وقفت ام حمد وقالت واعصابها مشدودة ..
ام حمد : بس الهنوف تبي حمد ..
دقت جملتها ناقوس الخطر في مخي ..فرفعت راسي منصدم وقلت ..
غيث: شنو؟؟
كملت ام حمد وقالت ..
ام حمد: انا اخذت راي الهنوف وقالت لي موافقة ..فاشحقة واقف بطريج البنت ؟؟
انقبضت عضلاتي واعصابي بعد .. وقلت متصنع الهدوء ..
غيث: اشلون تاخذين رايها وانا وليها يا خالة ؟؟ وانا قلت لج انا ماني موافق على الزاوج ..
ام حمد : انت وكيلها وبس ..يعني وظيفتك تكون وكيل البنت مو مهم توافق ولا لأ ..
لا هاذي مصختها ...
وقفت وقلت بعصبية ..
غيث: خالة ..تراج في بيتي .. وانا لحد الحين محترمج .. لا تخليني اقل ادبي وتصير سالفة بعدين ..قلت لج ماني موافق ..
ام حمد : طبعا معلوم إذا انت مديت ايدك على ولدي ما رح تطردني ؟؟
أفففففففف ...يا صبر ايوب على بلواه ...
غيث: خالة ..
قاطعتني وقالت بعصبية..
ام حمد : اذا تبي الموضوع ينتهي ... خل حمد والهنوف يتزوجون ...
ضغطت على صدغي من الصداع اللي حاس فيه .. وقلت وانا صاك على اسناني ..
غيث: ام حمد .. اعتقد ان الموضوع منتهي .. قلت كلمتي وخلاص ..
صرخت ام حمد وقالت ..
ام حمد : الهنوف ... الهنوف ..
شتبي فيها ؟؟؟
قلت ..
غيث: اشتبين فيها ؟؟؟
ماردت علي ..بس شفت الهنوف ورفيجتها طالعين من المطبخ ... وكانت الهنوف ماسكة جنطة ..
قلت باستغراب ...
غيث: شنو هذا ؟؟
واشرت على الجنطة ...
قالت ام حمد ..
ام حمد : الهنوف بتروح معانا البيت وياها بدر .. وبتعيش معانا ...
طالعت ام حمد مذهول .. وقلت ..
غيث: شنو شنو؟؟ وانا شنو هني ؟؟ كرسي ولا طاولة ؟؟؟
التفتت ام حمد للهنوف وقالت ..
ام حمد : تحجي ..
نزلت راسها الهنوف وقالت
الهنوف : انا موافقة على حمد ..
وفقت نظزراتي عليها من الصدمة .. حسيت روحي بتطلع ..
شهالفوضى هاذي ؟؟
ورديت اطلعت ام حمد ..
غيث: وانت ياية عشان تاخذين الهنوف ؟؟
قالت بحزم..
ام حمد : ئي .. الهنوف مالها عيشة وياك .. بعدين ما يصير تعيش ويا واحد غريب ..
تنرفزت وقلت
غيث: يعني حمد اللي مو غريب ؟؟؟
ام حمد : حمد خطيبها واليوم بيتزوجون وذيج الساعة مالك حق تتكلم ...
يتزوجون !!!!
خلاص انا وصلت حدي ...قلت للهنوف ..
غيث: هدي الجنطة ..ماكو طلعة من هني ..
ام حمد: لأ في .. حمد بي الحين ومعاه الملا واليوم رح يتزوجون ..
ماادري شلي خلاني اسوي جذي ..بس الجنون وحده اللي دفعني .. تجربت من ام حمد وقلت ..
غيث: ماكو زواج .. واعلى مافي خيلج اركبيه ... والحين اخذي بنتج من غير مطرود ...
انصدمت ام حمد وبطلت عيونها على وسع ..
فقالت الهنوف باستنكار ..
الهنوف: غيث ..
التفت لها وقلت ..
غيث: سمعتيني شقلت الهنوف ؟؟
وقلت بصراخ ..
غيث: هدي الجنطة ...
يمكن من الخوف هدت الهنوف الجنطة بعدين التفت لأم حمد وقلت بتهديد ..
غيث: إذا شفتج انت ولا ولدج في بيتي ما تلومون إلا نفسكم ...يلا برة ...
قلت لكم الجنون وحده اللي دفعني لجذي ..
خذت ام حمد جنطتها وقالت لهنوف ..
ام حمد : راضية ؟؟
تكلمت انا وقلت ..
غيث: مالج كلام معاها ..
طالعتني بحقد وطلعت ووراها بنتها ..
لحقتهم الهنوف تحاول تهدي الوضع بس انا صكيت الباب وراهم ..
الهنوف: ليش ليش ... حرام عليك ..
كانت تقول هالكلام وهي تطقني على صدري ..ضرباتها ما كانت تعور بقدر كلماتها ..
هدتني وراحت للباب تبي تطلع ..بس انا مسكتها ...وقلت بعصبية الباقية لي ..
غيث : وين رايحة ؟؟؟ مينونة انتي ؟؟
انهارت الهنوف على الأرض تبجي ..
وكانت تقول ...
الهنوف : حرام عليك ... ليش تسوي فيني جذي ؟؟؟ ليش ؟؟؟
لهدرجة تحبهم ؟؟؟
مسكتها أوفقها..بس هي ما خلتني .. مسكت جتوفي وبدت تهزني وتقول ..
الهنوف : مابي اقعد عندك مابي ... ودني بيت ابوي ...وينك يا يبا وينك ؟؟
وردت طاحت على الأرض ..تولول ...
المشكلة مو في طريقة بجيها ..المشكلة ان الباب مبطل وصراخها واصل لأخر الشارع ...
مسكتها بقوة ودخلتها وصكيت الباب ...
سحبت ايدها مني وقالت بعصبية وعيونها تذرف دموع ..
الهنوف : انت من وين طلعت لي ..كانت حياتي ماشية بدونك ...ما ابيك يا بني آدم مابيك ..افهم ...مابي اقعد عندك مابي ...
كانت طريقة في البجي مبالغ فيها ... صراخها كان عالي لدرجة ان بدر وهاجر نزلوا تحت واقفين عند السلم ..
وزاد الطين بلة بجي بدر ... اسكت من ولا منو ؟؟؟
قلت بعصبية لهاجر ..
غيث: سكتي بدر وصعديه داره ...
كانت هاجر تطالع الهنوف مستغربة من بجيها ..فقلت
غيث: ما تسمعين ؟؟؟
اخترعت هاجر وخذت بدر فوق ..
وانا احاول اسكت الهنوف ..فقلت لها ..
غيث: الهنوف ..بس خلاص ..
وصوتي مايزيدها إلا بجي ونحيب ..
لا مو حالة هاذي ... مسكتها من ايدها ويريتها وراي اصعدها دارها ...
يمكن عبالها اني بسوي فيها شي ..
عشان جذي عضتني ..
هديتها بسرعة ومسكت ايدي اللي عورتني ..
وهي بعدت عني ...ركضت للباب ..
وانا بسرعة البرق ..لحقتها .. وصكيت الباب وقفلته ...
غيث: الهنوف ..انتي صاحية ..
قلت هالكلام بعصبية واستغراب ..
فقالت بهستيريا ...
الهنوف : اكرهك ..اكرهك ....
وردت للدوامة البجي ...
طبطبت على جتفها ...بس هي بعدت ايدي .. وقالت بصراخ بط اذني ..
الهنوف: ودني عند ابوي ...ودني عند ابوي ..
حطيت ايدي على اذني من صراخها ...
شسالفتها ؟؟؟
الصراحة خفت عليها ... قاعدة تدور في البيت وتنادري على ابوها ... ناسية انه ميت ؟؟؟
وانا وراها الحقها وين ما تروح ...آخر شي مسكتها بقوة وفريتها ناحيتي ...وقلت ..
غيث: بس ..بس ابوج ميت ..ميت ..شنو انتي ناسية انه ميت ؟؟؟
صرخت في ويهي بكلمات مو مفهومة ..بعدين مسكت تحفة من التحف اللي موزعة في البيت ...وبغت تطقني فيها ..بس انا مسكت ايدي وحررت التحفة.. وقلت ..
غيث: لا حالتج ما ينسكت عليها .. انت بتموتين من البجي ...
شكلها تعبت من البجي لأن صوتها بدا يختفي .. وفجأة طاحت بين ايديني ...
رفعتها وحطيتها على القنقة... وناديت على هاجر اللي انصدمت من المنظر ..
غيث:بروح اوديها المستشفى ديري بالج على بدر ..
ونزل بدر من فوق .. وكان لسة يبجي .. وقال ..
بدر : ما كلت دواها ..
نبهتي جملته وقلت..
غيث: خير ؟؟
رد قال ..
بدر: ما كلت دواها ... هي إذا ما كلت يصير فيها جذي ...
وتقرب منا ..ووقف عند الهنوف وقال ببجي ..
بدر: الهنوف ..اصحي ..انا الحين بعطيج دواج .. الله يخليج ..اصحي ..
بعدين راح فوق وانا اطالعه مثل الأهبل ومعاي هاجر .. وبعد دقايق يا ومعاه علبة دوا ..ووكلها بايده ...
والتف لنا وقال وهو يمسح دموعه..
بدر : بتصحى بعد ساعتين ...
وانا واقف مو فاهم شي ... مبطل عيوني وحلجي مثل المغفل ..
اشفيها الهنوف ؟؟؟
وليش صارفيها جذي ؟؟؟
ومن شنو ؟؟
وشنو سالفة الدوا اللي عطاها اياه بدر ؟؟؟
يتبع ؟؟؟

بنت أبو ظبي ©؛°¨غرامي مبدع¨°؛©

الحلقة الثالثة والعشرون
ـــــــــــــــــــــــــــــــــــــــــــــ ـــ


حبست روحي بغرفتي بعد اللي صار .. من الدوام للبيت من البيت للدوام ..بس هاجر تييني هي وبدر ..اما عن البني آدم الرابع الموجود معانا فما ادري عنه حتى ما شفت ويهه من ذيج السالفة ..
وقفت جدام الدريشة اتأمل الناس اللي رايح واللي راد .. رفعت راسي للسما اللي مغطيها الليل ...والنجوم
سمعت صوت الباب ..
هاجر: الهنوف ..يلا تعالي تعشي ..
قلت بدون ما التفت لها ..
الهنوف : مابي ..
سمعت صوت تنهيدتها ..وقالت ..
هاجر : وبعدين يعني !! الزعل ما رح يفيد بشي .. انت للحين زعلانة منه ؟؟
التفت لها وقلت ببرود..
الهنوف : منو؟؟
تجدمت وقعدت على السرير ..وقالت ..
هاجر: غيث ..ترى هو اللي طرشني يقولج تعالي تعشي ..
قلت بعناد ..
الهنوف: وانا اقول مابي ..
والتفت للدريشة انهي الحوار ...بس هاجر قالت ..
هاجر : حرام عليج تظلمينه .. ترى غيث طيب والله ..
قلت بدون اهتمام ..
الهنوف : ما يهمني ..
تفاجأت يوم شفت هاجر واقفة يمي تطالع الدريشة وكانت سرحانة .. وانا بعد رديت طالعت الدريشة معاها ..
قالت فجأة ..
هاجر: تدرين هو الوحيد اللي ستر علي ..
شنو ؟؟؟
قلت وانا اطالعها باستغراب ...فكملت هي وقالت ..
هاجر: اللي جدامج هاذي كانت انسانة ثانية .. ما كنت جذي ابدا .. كنت مستهترة غبية .. تركض ورا الموضة ..
نزلت راسها بحزن وتنهدت ..بعدين ردت كملت وقالت .
هاجر: غيث الوحيد اللي قدر يغيرني ..
والتفت لي وطالعتني وقالت ..
هاجر: كنت احاجي واحد ..
شهقت ..من صجها ؟؟؟
ابتسمت بحزن وقالت ..
هاجر: استغربتي ؟؟؟ معاج حق .. رح تستغربين اكثر يوم اقولج اني غلطت معاه .. و...
سكتت ...
فقلت بذهول ..
الهنوف: غلطتي معاه ؟؟
غمضت غيونها باسى وخذت نفس عميق بعدين قالت ..
هاجر: وحملت منه بعد ...
قالت هالجملة جنها قنبلة علي ..
كملت وعيونها على الدريشة ..
هاجر: غيث الوحيد اللي عرف في البداية ...وطبعا حبسني في الغرفة .. وقلب ليلي نهار ونهاري ليل ..
حياتي كانت جحيم تحت ايده ..بس مع هذا هو اللي ضمني بعد ما هدوني اهلي ..هو اللي حسسني اني لي قيمة في الحياة ...
ردت طالعتني وهي تبتسم ..
هاجر: تعرفين انه ما يطلع من البيت إلا لما يقولي .. وإذا تأخر هم يقولي ..ولما يرد البيت يسأل عني .. حتى يوم غلطت وغلطتي لا تغتفر .. هو اللي كان ملاذي الوحيد ..
وحطت ايدها على الدريشة وقالت ..
هاجر: قبل ما امي تمرض .. وخالد اخوي موجود هني .. كانت حياتي ولا شي .. امي همها الأسواق والعروس ..وخادل ويا غيث دايما ..وسارة مشغولة بدراستها .. وانا كنت ظايعة بالطوشة .. امي كانت تكره غيث وتحاول بشتى الطرق انها تهدم حياته .. وكانت تعديني بتصرفاتها .. وكنا انا وامي والزمن عليه .. كنت اكره بدون سبب .. صدقيني يوم اقولج اني حتى السلام ما كنت ارد عليه ولا يوم يمرض اروح ازوره ولا اتطمن عليه ...
قلت باستغراب ..
الهنوف: لهدرجة ؟؟؟
هاجر: والله .. حتى يوم سوى الحادث وتعب علينا .. ما زرته ولا سألت عنه ..
حادث !!!!!
الهنوف : أي حادث ؟؟
قالت ببساطة ..
هاجر: غيث دعم وتسبب في موت اللي دعمه او يمكن بعاهة مستديمة له ..ويانا البيت ..وسارة اختي كانت قاعدة تدرس .. طاح علينا ..واخوي خالد هو اللي كان قاعد يمه مع سارة وابوي .. اما انا وامي ولا درينا عنه ...
الله يعني طلع طيب الأخ ... ماادري حسيت ان قلبي بدا يدق .. ولله حرام كان مظلوم طول حياته .
قلت للهاجر..
الهنوف : امشي خلينا نتعشى ..
ارتاحت هاجر وابتسمت في ويهي ..ونزلنا ..
لما نزلنا .. شفت بدر على الطاولة ياكل بروحه .. وما شفت غيث ...
سألت هاجر بدر ..
هاجر: بدوري وينه غيث ؟؟
يانا صوته من المطبخ يقول ..
غيث: كاني ...
التفت له لقيته قاعد يصب الجاي بالمطارة .. حرام خليناه يشتغل ..من بعد ما حبست روحي اكلهم كله من المطعم ..لأني انا اللي كنت اطبخ وهاجر ما تعرف ...والخدامة ماخذة اجازة ..
ضحكني شكله بس مع ذلك كسر خاطري .. رابط لبس الطبخ عليه وجافس كم الدشداشة ..
دخلت هاجر على غيث وانا قعدت مع بدر .. سمعت حوارهم لأن المطبخ جريب من الصالة ..
هاجر: انزين يلا يلا ..سو العشا بسرعة ..
غيث: ئي معلوم خدامتكم اليديدة انا ...
ضحكت هاجر وقالت ..
هاجر: لا محشومة الخدامة عنك ..
قال غيث ,,
غيث: شنو ؟؟؟
ضحكت هاجر وطلعت من المطبخ وقعدت يمي ..
هاجر: مو قلت لج طيب .. استانس لما قلت له انج نازلة تعشين ..
ابتسمت في ويهها .. وقلت..
الهنوف : حرام عليج خليتيه يشتغل ..
ضحكت هاجر وقالت ..
هاجر: شسوي ما اعرف اطبخ ..
الهنوف : تعلمي .. شنو رح تسوين في بيت ريلج ؟؟
اختفت ابتسامة هاجر ...وعرفت وقلت باحراج..
الهنوف: آسفة ..
قالت تبتسم لي بهدوء ..
هاجر: لا عادي ... بس الهنوف الكلام اللي قلت اياه فوق مابي احد يعرفه ..اوكي ؟؟
هزيت راسي بايجاب وقلت ..
الهنوف : لا تخفين سرج في بير ..
وبعدها نادى غيث هاجر ..وانا التفت لبدر اللي قاعد يطالع تلفزيون ..
معقولة يكون هو ؟؟
المشكلة ما عندي دليل .. بس اللي اذكره شكل سيارته ولونها ...
سمعت صوت الباب طلعني من سرحاني ..
قام بدر وبطل الباب .. ولما شفت ظل ريال .. انسحبت داخل .. ومريت على المطبخ وكان غيث وهاجر يجهزون العشا .. ما ادري شلي خلاني ما اتكلم بس وقفت نظراتي على غيث.. احبه والله احبه ..
فجأةالتفت غيث ..ولما شافني ..وقف يطالعني .. انا انتبهت اخيرا له .. بغيت اتكلم بس ياه بدر وقال ..
بدر: غيثاني ...غيثاني ...
قال غيث اللي سحب نظراته مني ..
غيث: هلا حبيبي ..
بدر: واحد برة يبيك ...
استغرب وقال ..
غيث: واحد ؟؟؟
قالت هاجر ..
هاجر: منو هذا اللي ايينا الساعة عشر .. انت مواعد احد ؟؟
قال غيث وهو يشيل لبس الطبخ عنه وقال ..
غيث: لأ .. انا لو مواعد كنت قابلته بالديوانية مو هني ...
وتقرب من الباب..ومع هذا ما نزلت نظراتي .. والله ماادري شلي خلاني ما انزل نظراتي ..هو استحى ونزل راسه .. وقال ..
غيث: لو سمحتي ..
حسيت على روحي اني سادة الباب ...فبعدت وهو مر ..
شفته يبطل الباب ..وصرخ فجأة ...
غيث: خالــــــــــــــــد
وتعانقوا ... وهاجر لما سمعت الأسم ..طلعت بسرعة من المطبخ ..
خالد اخوهم ؟؟؟
نطت هاجر بحظن اخوها وتعلقت بحظنه ..
وقفت اطالع المشهد الدرامي اللي جدامي .. يستحق صورة الصراحة ..
شفت مرأة ورى خالد ووحدة تسند على عكاز ...
شفت هاجر تسلم على الحرمتين .. وياه غيث وباس على راس المراة العودة ..
استنتجت ان هاذي ام خالد ومرته ...
قعدوا كلهم بالصالة ..كل هذا صار وانا بدر واقفين نطالع ...
التفت لي غيث وقال وهو يبتسم ..
غيث:تعال بدر
تجدم ومسك بدر وشاله ..وقالي ..
غيث: نطري شوي افضي لج المكان ...
راح لهم غيث ..وقدم لهم بدر .. شفته يسلم على الكل ..بعدين رد لغيث ..فقال خالد ..
خالد : اشفيه جذي ؟؟
غيث: يستحي ..اول مرة يشوفكم..
وشاله وقعده بحظنه ..فقال خالد وهو يطالع بدر ..
خالد : جم عمره ؟؟
غيث: ست سنين ..
خالد : الله يخليه لأهله ..
قال غيث وهو يبوس بدر ..
غيث: انا اهله .. شكرا على الدعاء ..
فقال خالد ..
خالد : مالت عليك .. انا ادعي حق ابوه ..
قال بدر بعفوية ..
بدر : بابا مات ..
سكتوا كلهم ..وانا قلبي بدا ينزف .. ولأني مابي اسمع الباجي انسحبت بهدوء ..
وصعدت غرفتي ...
***********************************

"اشحقة ما قلت ان بنت خالك هني ؟؟"
قال خالد جذي وهو يغطي روحه بالبطانية ...
غيث: شسوي يعني انت ما قلت لي انك راد ..
قال خالد ..
خالد : وحتى ولو ..زين جذي... تدري اني ما احب انام الا بداري ..
نمت على الفراش وقلت ..
غيث: يعني انا معاك بعد ...اثنينا مطرودين .. انت عشان بنت خالي وانا عشان مرتك ..
خالد : بالله هاذي حالة انام بالديوانية ...بالله لو دخل علينا احد الحين ..ضيف مثلا .
التفت له وقلت ..
غيث: والضيف هذا ما ايي إلا الصبح .. ؟؟
وتلحفت ... فقال خالد بنبرة غريبة ..
خالد : من متى حبيبة القلب عندكم ؟؟؟
التفت له وقلت ..
غيث : أي حبيبة قلب ؟؟
طالعني بخبث وقال ..
خالد: بنت خالك ...
قلت ..
غيث: مخطوبة ..
بطل خالد عيونه على وسع وقال ..
خالد : والله ؟؟
هزيت راسي وقلت ..
غيث: من اربع سنين ..
وغطيت روحي باللحاف ..
خالد : واشفيك تقولها وانت زعلان ؟؟
قلت من تحت اللحاف ..
غيث: خلود ..اقول لا يكثر هرجك وخلني انام ..
ضحك هو ..بعدين قال
خالد: انزين خلاص ... اشلون عمر ؟؟
غيث: بخير .. إلا صح ما قلت لي ..
وشلت اللحاف والتفت له ..
غيث: الحين امك خلاص رح تظل جذي بالعكاز ؟؟
تنهد خالد وقال ..
خالد : اهون من كرسي المتحرك .. سوينا اكثر من عملية..واخروحدة كانت قبل شهر ..والحين الحمدلله على الأقل تقدر تمشي ..
نزلت راسي انا وقلت ..
غيث: الحمدلله على كل شي ..
قال خالد ..
خالد : تصدق انا ما توقعت اني ارجع بهالسرعة .. توقعت بقعد ست شهور سبعة يمكن حتى سنة ..مو اربعة بس ..
ابتسمت انا وقلت ..
غيث: ولا انا ..عبالي بفتك من ويهك سنتين ثلاث ..
حذفني بالمخدة وقال ..
خالد : مالت عليك .. منومني بالديوانية وتقولي هالكلام ..
فطست من الضحك على شكله ..سمعت دق تلفون .. وكان تلفون خالد ..
خالد : هلا ابرار .. ها ؟؟ لالا .. هههههههه لا حبيبتي والله .. انزين ..انزين قلنا .. والله بتلحف عدل ..
وانت من اهله ..
وصك عنها .. طالعته وحذفت عليه مخدته وقلت ..
غيث: اشلونك مع مرتك ؟؟
تنهد من القلب ..فقلت ..
غيث: لا تقولي مطلعة عينك..
ابتسم خالد وقال ..
خالد :لا تخاف .. مرتاح معاها .. تدري داقة علي تقولي تلحف عدل .. ولما كنا بأمريكا ما كانت تخلي امي ..مو شين الحلايا نوال..
ابتسمت على تعليقه وقلت ..
غيث: عيل الله يعين بنتك ..
قلته قاصد عشان اذكره ببنته...فقال وهو ينام ..
خالد : هي اللي اختارت ..تتحمل ..
وعطاني ظهره ...ونام ..
قمت انا وطفيت الليت ورديت لفراشي ونمت ..
قمت على صوت المنبه .. التفت حوالي لقيت خالد لسة نايم ..
صحيته ..وصلينا الفير وردينا نمنا ...
ولأن اليوم اجازة قمت متأخر .. بس لقيت مكان خالد فاضي ..
غسلت ويهي واسناني وطلعت من الديوانية ..وكانت الساعة عشر ونص ..
دقيت على تلفون خالد اللي رد علي وهو يضحك ..
خالد : هلا غيوث ..
غيث: في احد بالصالة ..
خالد : احد مثل منو ؟؟
بدا الأستعباط قلت ..
غيث : خلود ..
ضحك هو فقال ..
خالد : لأ مافي احد غيري انا وامي وبدر .. تعال ادخل ..
دخلت البيت .. وشفتهم قاعدين ..
نط علي بدر .. وقعدته بحظني...فقال خالد ..
خالد : شكله وايد متعلق فيك ..
ابستمت انا وقلت ..
غيث: وايد ..
قال خالد ..
خالد : يا ليت اخته بعد ..
طالعته مصدوم ولقيته يبتسم لي بخبث .. فقلت ..
غيث: البنت مخطوبة ..جم مرة اقولك ؟؟
قام هو وقال ..
خالد : ادري ..بس القلب وما يهوى ..شنو نسوي الحب اعمى ..
تنرفزت من طريقة كلامه ..وقعدت بدر يمي وقمت وانا اقول..
غيث: عمت عينك..
وضحك ..
خالد كاشفني مهما حاولت اخش مشاعري ..
اتجهت للمطبخ وبدر لحقني .. حطيت الماي على النار ..
وقعدت العب مع بدر .. يا حبه للعب ..
دخل علينا خالد .. وقال ..
خالد : بدر حبيبي ممكن تروح تصحي هاجر تيي تسوي لنا الريوق..
قلت انا بدون نفس ..
غيث: هاجر ما تعرف تطبخ ..ولا ما تدري ؟؟
طالعني باستغراب ..وبدر طلع ..
قال خالد ..
خالد : اشفيك ؟؟
قلت انا وافتح الثلاجة ..
غيث: ما كو شي ..
التفت لقيت خالد يطالعني بنظرات غريبة .. فقلت ..
غيث: اشفيك تطالعني جذي؟؟
كنت ماسك علية الجبن ..فتجدم خالد وسحبها مني وقال..
خالد : غيث ..يا ولد ابوي .. ما رح تطلع من المطبخ إلا وانت قايلي سالفتك مع بنت خالك ..
**********************************
صحاني بدر وعرفت منه ان الرياييل يبون ريوق ..طالعت الساعة لقيتها 11 إلا ثلث .. قمت غسلت ويهي واسناني .. ولبست عباتي وشليتي .. ناديت على بدر اللي كان طالع من غرفة هاجر ..
الهنوف : بدر .. روح شوف الطريج ؟؟
نزل بدر تحت بعدين رد لي وقال ..
بدر: مافي احد ..
نزلت تحت ..لقيت ام خالد قاعدة بروحها تسمع راديو ..
مريت على المطبخ ..بغيت ادخل بس سمعت صوت احد داخل ..
"من متى وانت تحبها ؟؟""
" من زمان "
عرفت من اصواتهم ان غيث واخوه ..
بغيت انسحب بس ..
خالد : انزين ما صارحتها ؟
غيث:لأ ..
خالد : انزين ..صارحها ..
ما كملت باجي الحوار لأني انسحبت ..
غيث يحب وحدة ؟؟؟
انصدمت الصراحة ..
ماادري ليش حسيت باحساس المغدور ..
كأني طعنة في القلب ..
يعني انا ..
ماادري ..ماادري ...
بس احس انه له مكانة في قلبي ..
وحمد ؟؟؟
حمد انا من زمان اعتبره مثل اخوي ..بس امه يوم يت عندنا اصرت وانا استحيت اقولها انا مابي ولدج ..وابوي الله يرحمه ويسامحه قطني عليه ..
بعد الكلام اللي سمعته من هاجر ...
احبه ..
ئي احبه ..
وودي لو اكون انا بدل البنت اللي يحبها ..
بس ..خلاص ..
هو يحب غيري ..يحب غيري..
نزلت مني دمعة .. ومسحتها بسرعة ..
الله يسامحك ياغيث .. لما توضحت مشاعري وفهمتها ..وعرفت اني احبك .. لقيتك تحب وحدة ثانية ..
الله يسامحك...

يتبع <<<

بنت أبو ظبي ©؛°¨غرامي مبدع¨°؛©

الحلقـــــــــــــــــــــة الرابعة والعشرون
ــــــــــــــــــــــــــــــــــــــــــــــــــ ــــــــــــــــ


صفت سيارتي بالموقف اللي جدام البيت .. ونزلت قفلت السيارة ودخلت البيت .. فصخت شيلتي .. وصعدت فوق .. دخلت الغرفة ..قعدت على السرير ... ابي ارتاح شوي .. طالعت بطني المنتفخة ..انا الحين بشهر السابع .. باجي شهرين ويشرف ولي العهد ...
ماكنت ابي احمل منه .. بس شسوي .. ماباليد حيلة .. لو بس تطلقت منه .. كنت عايشة في نعيم .. بس هو مو راضي يطلق .. المشكلة ما عندي دليل يثبت انه اكبر مغازلجي ..
تلفونه وفتشته ماكو ارقام بنات .. وسيارته هم فتشتها مافيها شي ..الكبت والخزانة ومكتبه ما فيها شي ..
ياه في بالي اللاب توب ماله ..فرصة هو مو هني .. بسرعة رحت نزلت تحت ودخلت مكتبه .. قعدت على الكرسي ..وبطلت اللاب توب ..لقيت جم ملف بطلتهم ..فيها ارقام واسهم ..عرفت انها للشركة .. وبطلت ملفات ثانية بس مافيها شي مهم ..
بس لفت نظري ملف اسمه فيصل .. حطيت الفارة عليه...
" شنو تسوين؟؟"
نقزت من الخوف .. التفت ببطء لأني عارفة صاحب الصوت .. لما طالعته كان ماسك مقبض الباب ..ويطالعني بملامح خالية من التعابير ...
تجدم وقال ..
جراح: اعتقد اني قاعد اتكلم عربي .. شنو تسوين ؟؟
ارتبكت وقلت بتلعثم ..
سارة: قاعدة ..قاعدة على الكمبيوتر ..
طالعني باستغراب ..وقال ..
جراح: انزين اشفيج خايفة ؟؟
اخذت نفس بعدين قلت ..
سارة: انت خرعتني ؟؟
ما اهتم وطلع .. أففففف مالت عليك وقف قلبي ..
حطيت ايدي على صدري من الخرعة لقيت قلبي طبول ...لفيت على اللاب توب .. وبغيت اضغط على الملف...
" سارة تلفون "
هذا صوت جراح .. قمت ..وطلعت من الغرفة .. رحت فوق .. لقيت جراح منسدح على السرير ..ومخلي تلفوني مبطل .. لقيت مكتوب غيث .. ابتسمت وقلت وانا احط التلفون على اذني ..
سارة : حيا الله هالصوت ..
غيث :الله يحيج ..يا القاطعة من زمان ما شفتج ..
قلت وانا اطالع جراح اللي مغمض عيونه ويحرك اصابع ريله .
سارة: والله شنو نسوي .. الدنيا مشاغل .. إلا انت ليش ما تدق ؟؟
غيث: الدنيا مشاغل ..
ضحكت وقلت ..
سارة : مالت عليك ..تقلدني ؟؟
غيث: لأ ..هذا رد منطقي ..
سارة: اقول لا تفلسف ..
ضحك غيث بعدين قال ..
غيث: المهم .. انا ترى عازمكم انتي وجراح ريلج بالشاليه ..
استغربت وقلت ..
سارة: وانت من متى عندك شاليه ؟؟
غيث: مو جنج اهنتيني ؟؟
ابتسمت فقال ..
غيث: عندي لج مفاجأة ..بس تعالي انتي ..باجر من الصبح ..اوكي ؟
سارة : شنهي المفاجأة ؟
غيث: سارة .. انا قلت مفاجأة ..تعرفين يعني شنو مفاجأة ؟؟
ضحكت عليه ..بعدها سلمت وصكيت عنه ..
يحليله غيث ..من اربعة اشهر ما شفته ..انشغلت بالجامعة والدراسة .. مايدري اني حامل .. التفت لجراح وقلت ..
سارة : باجر بنروح الشاليه غيث عازمنا .
ما لقيت رد .. التفت له وقلت ..
سارة: سمعتني ؟؟
قال وعيونه مغمضة ...
جراح: سمعت ..
مالت عليك .. لفيت عنه وقمت ..اخذت ملابسي ورحت عند الباب ابي اطلع ..سمعته يقول ..
جراح: لو سمحت مرة ثانية مابي اشوفج فاتحة الاب توب مالي ..
نرفزني والتفت له لقيته على وضعيته فقلت ..
سارة: ليش ؟؟
قال ..
جراح : والله ماني ملزوم اقولج السبب ..
تقدمت منه وقلت باستهزاء ابي اقهره ..
سارة: اكيد ..خاش عني بلاويك ..
بطل عيونه وقال ببرود ..
جراح: أي بلاوي ؟؟
طالعته باحتقار ..
سارة: صورك وياهم ..
طالعني متفاجأ وقال ..
جراح: صوري ؟؟
تخصرت وقلت ..
سارة : اكيد كل واحد مغازلجي له صور ويا عشيقاته ..
ماحسيت إلا بكف على ويهي ..
انصدمت منه ..اول مرة يمد ايده علي ...
قال جراح ...
جراح: هالمرة ياج طراق ..المرة الياية ما رح اتعب نفسي وامد ايدي ..بحذفج من الدريشة ...
وصرخ بويهي صرخة بطت اذني ..
جراح: ساااااامعة ؟؟
وطلع من الغرفة ..
عبالي انه ما يحس .. عبالي تعود على اسلوبي ...
دموعي نزلت من الهم والغثا اللي انا عايشة فيه .. خلاص .. مابي اقعد معاه ولا ثانية ..
قمت وريولي مو شايلتني .. بطلت الكبت وطلعت الملابس اللي فيه ..
خلاص انا كرهته اكثر من قبل ...
بتطلق منه يعني بتطلق منه ..
مسكت جنطة صغيرة وحطيت فيها الملابس اللي قدرت اني اجمعهم .. وصكيتها .. ومسطتها ونزلت تحت ..
عباتي لسة ما شلتها .. وعند الكرسي كانت شيلتي مقطوطة .. اخذتها وطلعت من البيت .. مافكرت اذا كان موجود ولا لأ ..بس اللي عرفته انه مو موجود لأن سيارته مو موجودة .. ركبت سيارتي ..وانا امسح دموعي .. اخذت نفس عميق ... وحركت السيارة ...
وصلت البيت صفت السيارة .. واتجهت بسرعة لباب البيت ..طقيت الباب ..طلع لي ياهل ..تذكرته هذا بدر .. ابتسمت له وقلت ..
سارة : السلام عليكم ..اشلونك بدر ؟؟
قال ببراءة ..
بدر: انتي منو؟؟
" سارة !!!!"
طالعت اللي ورا بدر لقيتها هاجر ..
تعانقنا .. وتفاجأت من بطني وقالت ..
هاجر : انتي حامل ؟؟!!!
هزيت راسي بايجاب بحزن وقلت ..
سارة : وبشهر السابع ..
قعدت على القنفة وبدينا سوالف .. ما فتحت الموضوع اللي صار بيني وبين الزفت .. وشاركتنا الهنوف وبدر ..
ومن بين السوالف قالت هاجر ..
هاجر: ما اشتقتي لأمي ؟؟
امي ؟؟؟؟ من اربعة اشهر ما شفتها منعني اروح عند اهلي مالت عليه .. قلت ..
سارة :امي مسافرة مع خالد ..
قالت الهنوف ..
الهنوف : لا رجعت .. موجودة ..
تفاجأت ...امي موجودة ؟؟ قلت وانا واقفة من المفاجأة ..
سارة: موجودة ؟؟؟ ليش ما قلتوا لي ؟؟؟
وبسرعة رحت لدارها .. دخلتها لقيتها نايمة وابرار يمها ..
سارة :يما
ونطيت على السرير .. فقالت ابرار ..
ابرار: اشلونج سارة ؟؟؟
التفت لها وقلت باحراج لأني ما سلمت عليها ..
سارة : الحمدلله .. انتي اشلونج ابرار ؟؟ شخبارج ؟؟
بغت ترد ابرار بس سمعت صوت هاجر عند الباب يقول ...
هاجر : سارة ترى خالد موجود ..
طلعت من الغرفة لان امي مو حاسة فينا .. وانا طالعة شفت الهنوف صاعدة فوق .. ورحت الصالة .. لقيت خالد قاعد يكلم غيث ..
صرخت وقلت ..
سارة : خاااالد ..
اخترع خالد وقطع كلامه والتتف لي وهو متفاجأ .. نسيت اني حامل وركضت عنده ونطيت بحظنه ..
بعدني عنه يشوف ويهي وابتسم وقال ..
خالد : سارونه .. اشلونج حبيبتي ؟؟
وحظني ..
دموعي نزلت ..اربعة شهور حرمني منهم النذل .. اربعة شهور ما حسيت بالأمان والأستقرار ..
قال غيث ..
غيث: ما يحوشني من الطيب نصيب يعني ؟؟؟
ابتسمت له وحظنته .. بعدها قعدنا فقال خالد ..
خالد : انتي بأي شهر ؟؟
التفت لي غيث وطالعني باستغراب .. وقال ..
غيث: انتي حامل ؟؟؟
قال خالد ..
خالد : ليش ما تدري ؟؟
التفت غيث لخالد وقال ....
غيث: من اول ما سافرت ما شفتها ..
والتفتوا اثنيناتهم لي ونظرات الشك بعيونهم .. بس دخول هاجر الصالة انقذني .. وهي تقول ..
هاجر: الحين ما شبعتوا من بعض يلا ..قوموا عشا ..
قمنا ...واتجهت انا للصالة اللي فوق ... شفت الهنوف قاعدة ترتب السماط .. وبعدها جهز العشا .. تعشينا وبين العشا كنا نسولف .. عرفت انه خالد رد من يومين .. الحمدلله ان محد للحين سألني عن الزفت ..
بعدها تجمعنا كلنا بالصالة .. كنا نضحك ونسولف ونتغشمر وخالد وغيث حاطين على بعض عاد يا زينهم يوم يعيبون بعض ..
غيث: الله عاد الحين كلش اللي سمعك يقول البنات يركضون وراك الحين ...
قال خالد ..
خالد : اشدعوة انت اللي تمشي والبنات وراك .. انت الحين بدل ما تعيب علي تزوج وفكنا ..صاك الخمسة وعشرين ومو متزوج ..انا بعمرك كان عندي ايمان وعمرها ثلاث سنين ..
قال غيث ..
غيث: لا تقارني فيك انا غير وانت غير ... بعدين توني صغير ..
ضحكت وقلت ..
سارة :صغير؟؟!! ..الله يا صغير .. اللي بعمرك الحين عندهم اثنين ثلاثة ..
قال غيث بتهرب من الموضوع ..
غيث: اقول ..ِخباركم ..اشلونكم ..عساكم بخير ..
ضحكنا كلنا ..
قال خالد ..
خالد : ئي ..ئي تهرب تهرب ..ياخي جدامك البنت ..
جدامه ؟؟؟ التتف لغيث اللي ويهه صار مثل الطماطة ..وقلت.
سارة: جدامك ؟؟؟ وين ؟؟
التفت غيث لخالد وقال بصوت واطي ..
غيث: انا اوريك ...
قلت بصوت عالي ..
سارة : افا غيث افا ..تحبها... كنت قلت لي ..
التف لي غيث منصدم وقال ..
غيث: احب منو؟؟
قلت بخبث ..
سارة: ماادري .. اسأل روحك
قال خالد ..
خالد : كنت اتغشمر معاه ...صدقتي انتي ؟؟
بغيت اتكلم ..بس شفت الهنوف توقف وبحظنها بدر النايم .. وصعدت فوق ..
قلت ..
سارة:حسابنا بعدين ..
وقفت وقلت ..
ساةر: بروح انام الحين .. تصبحون على خير ..
انسحبنا احنا الحريم وصعدنا ... محد سألني ليش بتباتين هني ..الزفت ما سأل ..
احسن ..
*******************************************

مسكت خالد من رقبته وزنطته ..وانا اقول..
غيث: زين جذي ؟؟ بغيت تفظحني ..
قال خالد وهو ماسك ايديني ويقول..
خالد : اول فج عني .. بقولك شي ..
فجيت عنه فقال ..
خالد : كنت ابي احطك جدام الأمر الواقع ..
غيث: انزين جدام مرتك وهاجر وسارة .. وفوق كل هذا جدامها هي ؟؟؟
طالعني بخبث وقال ..
خالد : يا خي البنت شكلها ميتة فيك ..اخطبها وفكنا ..ما شفت ويهها اشلون صاير يوم كنا حاطين عليك ؟
مسكت الجلاص اللي جدامي وقلت ..
غيث: خالد ..جربت مرة هذا عالراس .. ترى يقوي الذاكرة ..
ضحك وقام وقال ..
خالد : خلاص يبا ما تسوى علينا كلمة ... تصبح على خير .. بروح انام ..
تذكرت موضوع اللي كنت ابي اكلم خالد فيه من زمان .. وقفته وقلت ..
غيث: تعال بكلمك ..
التفت لي وهو يتثاوب وقال ..
خالد : خير ..
نزلت راسي وقلت بحذر ..
غيث: اممم .. خالد انا بغيت اقولك ان .. احم ..
ما عرفت شقول ..
فقال خالد ..
خالد : غيوث تحج تراني ميت نعس ..
قلت ..
غيث: ابوي الله يرحمه لما قسم الورث بينا .. ااا .. اكتشفت ان كل الفلوس حرام ..
وسكت ..أقرا تعابير اللي بويه خالد .. طالعني مذهول ..وقال .
خالد : شنو ؟؟ حرام ؟؟؟
غيث : قبل جم شهر احترق المخزن اللي فيها البضاعة اليديدة ..واكتشفت من رئيس المخازن ان ابوي كل صفقاته بالحرام ... ابتزازي وانتهازي ..
سكت خالد وحط ايده على ويهه من شدة الصدمة ..قلت اواسيه ..
غيث: خالد .. الفلوس تروح وترد .. اهم شي ما تزعل روحك .. وان شاء الله محلولة .. انا الحين بديت مشروع صغير وكاهو مع الأيام قاعد يكبر .. المهم ان المصدر يكون حلال .. وصدقني كلها سنة ونرد مثل اول واحسن ..
تنهد خالد بضيق وقال ..
خالد : ما توقعت ان ابوي يكون جذي ..ابوي ..
وتنهد مرة ثانية ..
خالد : علمت سارة وهاجر ..
قلت ..
غيث: لأ... قلت اعلمك بالأول وانت تقولهم ..
طالعني ببلاهة وقال ..
خالد : اشمعنه انا ؟؟
ابتسمت وقلت ..
غيث: انت احسن مني بهالأشياء ..
طالعني وقال ..
خالد : ادري تطنز بس مقبولة منك ..
وقام وقال ..
خالد : يلا قوم خل نروح ملجأنا جنا طراروة .. قاعدين بالديوانية ... قوم ..
ضحكت عليه ..صارلنا يومين ننام بالديوانية .. على بال ما خالد يلقى له شقة وانا القى لي بيت او حتى شقة صغيرة ..
يوم الثاني .. قمنا بدري وقعدنا نجهز روحنا للطلعة ..
وانا واقف عند سيارتي .. قلت بصوت عالي لسارة وهاجر ..
غيث: يلا ما صارت ..أففففف ..خست بالحر ..
شفت هاجر ياية ..ووراها الهنوف .. شوفتها بس تغير فيني كل شي .. بس صارلها جم يوم مو طبيعية .. ساكتة وهادية ..
ركبت السيارة ..الحين معاي هاجر وسارة والهنوف بدر .. وخالد معاه مرته وامه والخدامة وجم غرض ..
تحركنا للشاليه .. وبالطريج قلت لسارة ..
غيث: سارونه .. ريلج ما رح ايي ؟؟
قلت وعيونها برة ..
سارة : يمكن .. على حسب شغله ..
من الملل شغلت نشيدة لعل وعسى تخفف اللي فيني ..الهنوف قاعدة وراي بالضبط .. قالت هاجر ..
هاجر: ووع ..مو حلوة هاذي غيث.. حط شي عدل .. حط ..حط فرشي التراب ..
طالعته من الجامة اللي جدامي ..وقلت ..
غيث: رايحين نستانس وانتي تقولين فرشي التراب ؟؟
طلعت هاجر شي من جنطتها وقالت ..وهي تحطه داخل المسجل ..
هاجر: حط هذا احلى ..
شغلته وانا ماادري شنو هذا .. طلع مال سامي يوسف ..
وطول الطريج انا وهاجر وبدر نرقص على اغاني ..والهنوف تضحك علينا ..وسارة تبتسم ..
سمعت صوت تلفوني ..قصرت على المسجل .. وكان خالد ..
خالد : اركد فضحتنا ... الشارع كله يطالعك ...
ضحكت وقلت ..
غيث: مو مني من بدوري .
ونط بدر جدام وعلى على المسجل ... بط اذني ..وهو يضحك ويغني ..
صكيت عن خالد ..
وبعد نص ساعة وصلنا الشاليه ..فرغنا السيارة من الأغراض .. وبعدها وصل خالد ..
كنت مأجر شاليهين ..واحد للحريم وواحد للرياييل .. وكل شاليه فيه ثلاث غرف وحمامين ومطبخ ..
حطينا الأغراض داخل ..
الله يا حلاة البحر .. بالذات بالنهار .. بعد ما خلصت من تفريغ السيارة وترتيب الأغراض فيها .. وقفت جدام البحر .. ونسمات الهوا تمر علي ..مر جدامي شريط الأحداث اللي مريت فيها طول هالسنة ..
وطبعا الهنوف كانت محتلة اغلب افكاري ..
آآآه يا الهنوف ... متى بس الله يحنن قلبج علي .. حاسج غريبة هالأيام .. احسج تطالعني كأني مسوي شي .. احسج تراقبيني .. ليش انزين ؟؟؟ شايفة علي شي ؟؟؟ انتي لو تدرين اني احبج .. والله احبج .. بس لو نفتك من حمد والله احنا بخير .. كنت تزوجت ثاني يوم ..
انتبهت لصوت التفت لقيت هاجر والهنوف قاعدين على الرمل يسولفون ..وتذكرت الحالة الي يتها قبل جم اسبوع .. فرق الحين عن ذاك اليوم ... الحمدلله انها بخير هذا اهم شي ..
" البحر حلو .."
التفت لصاحب الصوت وكان خالد .. وقف يمي وعيونه على البحر ..
قلت ..
غيث: احلى شي البحر ..
خالد : حلو لما يكون معاك اللي تحبهم ..
بدينا .. فقلت ..
غيث: اهلك مثلا ..
قلت جذي عشان اعمم ..
خالد : دقيت على جراح ؟؟
التفت له وقلت ..
غيث: ليش ادق عليه ؟؟ سارة قالت انه يمكن ايي ..
خالد: سارة يايبة اغراضها ..ماني مطمن ..
غيث : قصدك على البارح؟؟ .. خلها على راحتها .. يمكن متزاعلين وان شاء الله يتراضون ..
هز خالد راسه بتفهم ..
ياني بدوري يبي يسبح .. وانا دخلت داخل مع خالد عشان لبس السباحة ..
دخلنا البحر انا وبدر وخالد ..
والحريم كانوا يتمشون وريولهم على البحر .. كان الوقت روعة .. فجأة لمحت سيارة تصفط جدام الشاليه ..
عصرت مخي اتذكر سيارة منو ..بس لما نزل صاحبها عرفته .. جراح ... الحمدلله يعني مو متزاعلين ..
لفيت اشوف ردة فعل سارة ..كانت عادية .. ولا اهتمت ..
طلعنا من البحر ودخلنا نتسبح عن الطين .. وبعدها استقبلنا جراح ..
قعدنا بالشاليه المخصص لنا ..
غيث: ليه تأخرت عبالي منت ياي ؟؟
جراح: الشغل هد حيلي ..جان اهرب من الشركة بدون ما يدري ابوي .. عشان جذي تأخرت ..
خالد : انزين غيوث دق على عمر خل ايي مرة وحدة ..
ابتسمت لما تذكرته .. وقلت ..
غيث: فكرة حلوة ..
وقمت من مكاني ورحت داخل في وحدة من الغرف وطلعت تلفوني ودقيت عليه .. ياني صوته ..
عمر: السلام عليكم ..
غيث: وعليكم السلام .. عمور شعندك الحين ؟؟
عمر: ما عندي شي .. ليش ؟؟
غيث: ما عندك دوام ؟؟
عمر: لأ .. باجر عندي مناوبة .. ليش ؟؟
غيث: حلو خلاص تعال عندنا احنا بالشاليه ؟؟
عمر: شاليه ؟؟ بروحكم ؟
غيث: لأ ويا الأهل ..
عمر : لا .. فشلة .. وين ايي واهلك موجودين ؟؟
غيث: عمور ..احنا بروح وهم بروح .. يلا ..
سكت عمور يفكر بعدين قال ..
عمر: خلاص ... عطني العنوان ..
عطيته العنوان ..
رديت مرة ثانية عندهم..
شفت الصالة فاضية .. وينهم ؟؟ طلعت برة ..لقيتهم فارشين وقاعدين يسولفون ...
رحت لعندهم ..والضحك واصل لعندي ...
قعدت يم هاجر اللي قاعدة يم الهنوف .. وخالد يطالعني بنظرات .. سويته له حركة ..كأني اقوله مالقيت مكان ثاني .. وابتسم لي بخبث .. وانا ضحكت ..
فقالت سارة ..
سارة: شلي يضحك ؟؟
قلت وانا اطالع خالد ..
غيث: سلامتج ..مهرج قاعد جدامي
قال خالد ..
خالد : مهرج بعينك .. مالت عليك ..
قال جراح..
جراح: إلا قولي غيث .. انتي الحين شنو مشروعك بالضبط ؟؟
نقلت بصري من خالد لجراح اللي قاعد يم سارة ..
غيث: نفس شغل الشركة قبل ..
جراح: يعني استيراد وتصدير ؟؟
غيث: ئي .. وانا بديت مشروع قبل جم شهر وشغال فيه الحين ..
هز جراح راسه بتفهم ..
قال خالد لجراح..
خالد : ان شاء بعد شهرين بيي ياهل .. شنو رح تسمونه ؟؟
قلت بقافة ..
غيث: غيث بلا منازع ..
طالعني الكل بنظرات استنكار .. فقلت ..
غيث: طبعا مو انا خاله ؟؟
فقال خالد ..
خالد : وانا بعد خاله .. ولا يكون انا عمه وانا مادري ؟؟
قال جراح ..
جراح : ما اتفقنا على الأسماء.. بس عن نفسي انا ودي اسميه ..على اسم الوالد حمد ..
قلت بسرعة بدون وعي ..
غيث:لأ..
التفتوا كلهم لي بنظرات استغراب .. فقلت ابرر..
غيث: اقصد يعني .. مو .. اسم حمد وايد كبير على الياهل
قال خالد ..
خالد : عيل اسم غيث اللي مو كبير؟؟
قالت هاجر..
هاجر: انتوا الحين اللي يسمعكم يقول الياهل ولد.. بالله طلعت بنت ..
قالت ابرار ..
ابرار: إذا بنت سموها ابرار..
قال خالد وهو يطالعها ..
خالد : احلى اسم ..
قلت انا اعانده ..
غيث: شنو احلى اسم ؟
والتفت لأبرار وقلت ..
غيث: اسمحي لي مرت اخوي .. بس انا حاجز الياهل ..إذا بنت بسميها غصون وإذا ولد نسميه غيث ..
ما حسيت إلا بطقة على راسي ..
مسكت راسي واللي حوالي يضحكون ..وقال خالد ..
خالد : انت الحين ويا راسك حاجز البنت شنو فندق هي ؟؟ بعدين منو سمح لك تحاجي مرتي ...
وقلد صوتي ..وضحكت عليه ...
الصراحة ليتنا طلعنا طلعة حلوة مثل هاذي من زمان ..
التفت للهنوف لقيتها تحاجي سارة ..
الله يا الهنوف ودي اقولج الحين اني احبج والله ..
بس الأيام كفيلة انها تثبت لج حسن نيتي ...

يتبع <<<

بنت أبو ظبي ©؛°¨غرامي مبدع¨°؛©

الحلقـــــــــــــــــــــة الخامسة والعشرون
ــــــــــــــــــــــــــــــــــــــــــــــــــ ــــــــــــــــ

كنت قاعد داخل الشاليه والصدمة ماليه ويهي ..
معقولة الحين اللي فيصل صور وياها تكون ..تكون ... اخت مرتي ...؟؟!!!!!
حطيت ايدي على راسي من هول الصدمة .. حسبي الله عليك يافيصل جانك فشلتني وفضحتني ..
من القهر الي فيني مسكت التلفون ودقيت عليه ..وعيوني على الباب لا احد يدخل علي ويسمعني ..
ياني صوته ..
فيصل : نعم ؟؟؟
قلت بعصبية ..
جراح: نعامة ترفسك يا النذل ...
فيصل : داق علي عشان تزفني ؟؟؟
قلت وانا اصرخ من القهر ..
جراح: الزف خسارة عليك بعد ... انت شنو ما تستحي ما تنتخي ..
فيصل: جراح لو سمحت مـــ....
قاطعته بصراخ اكبر ..
جراح: مالقيت إلا اخت مرتي تسوي فيها بلوتك ... يا الحقير ..
سكت فيصل بعدين قال ..
فيصل: انت عرفت ..
انصدمت يعني هو يعرف ..قلت بصوت مبحوح..
جراح:يعـ... يعني انت كنت تدري ان هاجر اخت مرتي ؟؟
فيصل :دريت بعد ما سوينا وخلصنا ..
غمضت عيوني من الصدمة .. قلت وروحي وشوي وتطلع ..
جراح: شسوي فيك الحين ؟؟ شسوي فيك ؟؟
قال ..
فيصل: عطني الصور وانا اريحك من الدليل ..
قلت بعصبية ..
جراح: تخسي اعطيك اياه .. عشان تلعب عليها وتفظحني انا والبنت صح ؟؟
قال فيصل ..
فيصل : ترى مردي باخذها ..
جراح: تهدد ويا ويهك ؟؟
فيصل : قلت لك من زمان عطني الصور ما رضيت ..يعني ايشتبيني اسوي ؟؟
قلت وانا اطق الباب بعصبية ..
جراح: تيي تصلح غلطتك وتخطب البنت ..
فيصل :نعم ؟؟
جراح: اللي سمعته ..
فيصل : اسمع عاد ..انا مادري شنو شارب وياي تقولي هالكلام بس اللي ابيك تعرفه انا ما رح اتزوج هاجر ..
جراح: انت مو قلت انك بتتزوج وحدة من خمتك ... خلاص هاجر كنت تكلمها تزوجها ..
فيصل : هاجر كانت حامل ..تدري يعني شنو حامل ؟؟
حامل ... كانت حامل ؟؟
كمل وقال ..
فيصل : تبيني اتزوج وحدة كانت حامل من واحد الله اعلم بالحلال ولا ...
وسكت ...
قال ..
فيصل : مع السلامة .. وفكر مرة ثانية بالموضوع ..
وصك عني ..
افتر راسي .. حسيت اني مو قادر اوقف ..
ما توقعت فيصل بهالنذالة هاذي .. الحين وين اودي ويهي من اهل مرتي ..
رفعت راسي فوق ادعي ربي ما تنكشف السالفة ...
الله يعيني ...
بعد ما هديت شوي طلعت اشارك الباجين .. وشفت عمر قاعد ويا خالد وغيث يلاعب بدر ..
قعدت يم خالد ...اللي شافني قال ..
خالد : هلا بو خالد ..
قال غيث ..
غيث: قصدك بو غيث ..
قال عمر ..
عمر: ليش بييك مولود ؟؟
هويت راسي بايجاب ..فقال عمر هو يبتسم ..
عمر: مبروك ...
رديت عليه وانا ابتسم ابتسامة مصطنعة ..
جراح : الله يبارك بحياتك ..
وطالعت البحر .. افكر بالبلوة اللي طاحت فوق راسي .. مو كافي اني عايش بجحيم سارة ... الحين شنو اللي يطلعني منها ..
طالعت غيث اللي يلعب بدر عند البحر .. مسكين مايدري ان اخته كانت حامل .. خل استر عليها ..الله ستر على بناتنا ..
كانت الشمس جربت تختفي ورا البحر معلنة انتهاء دورها وحلول الظلام ..
قمت وتقربت من البحر .. ولما وصلت حطيت ريولي بالماي يمكن تطفي من نار قلبي ..
تنفست بعمق ومر جدامي الموقف اللي صار امس ..
فقدت اعصابي ومديت ايدي عليها .. ما تحملت كلمتها ..
ليما متى يا ربي اتحملها .. خلاص فاض فيني ..
وهي احسن شي سوته انها ما بينت لأحد .. وانا ييت اليوم عشان اراضيها ونرد البيت ..
تلفت وراي ادورها ..لقيتها قاعدة على الكرسي ومرت خالد معاها .. تأملتها .. هي طيبة وحبوبة بس مو معاي ..مع غيري .. انزين ليش ؟؟؟
ليش تكرهني ؟؟
تتهمني اتهام باطل .. ولا فوق كل هذا تعيشني بجحيم ..
الله يسامحج يا سارة .. الله يسامحج ..
شفت مرت خالد قايمة فانتهزت الفرصة ورحت لسارة ..
كانت سرحانة وشيلتها مرخية وشعرها شوي باين ..
فقلت ..
جراح: شعرج طالع ..
طالعتني ببرود وعدلت شيلتها ...وردت تطالع البحر ..
قعدت يمها فهي قامت .. مسكت ايدها ..سحبتها .. قلت لها ..
جراح: اخوانج هني ..
مسكتها من نقطة ضعفها .. بس قالت ..
ساةر: وإذا ؟؟
جراح: ما اعتقد انج تبين تقولين لهم عن اللي صار ..
سارة: وانا اشحقة قاعدة عندهم ؟؟
جراح: لو تبين تعلمينهم كنت علمتيهم اول ما قعدت عندهم ...صح ؟؟
ماردت علي ولفت ويهها عني ..
قلت بصوت حنون يمكن يلينها شوي ..
جراح: سارة ..قعدي بحاجيج ..
قعدت وهي لافة ويهها عني ...
قلت ..
جراح: سارة ترى عيشتنا كلها مبنية على اتهام باطل صدقيني ..
لفت ويهها بحدة وقالت ..
سارة: اتهام باطل ؟؟؟ لو اتهام باطل ما كنت مديت ايدك علي لما قلت لك الصج ..
بغيت افقد اعصابي وقلت وانا امسك نفسي ..
جراح: أي صج ؟؟ اللي تقولينه هذا كله مو صج ..الصج اني انا مااعرف سوالف الشباب البطالية .. عمري ما كلمت بنت اساسا إلا انتي ..يوم تزوجنا ..بس ...
طالعتني والدموع بدت تتجمع بعيونها وتنزل وحدة وحدة .. كسرت خاطري فمديت ايدي ومسحت دموعها وقلت بحنان بس مكسور ..
جراح : سارة .. انتي تعيشين نفسج بوهم صدقيني .. والله العظيم احلف بشنو عشان تصدقيني اني ما اعرف وحدة قبلج ولاني مغازلجي مثل ما تقولين ..
طالعتني بدون ما تتكلم ..فكملت ..
جراح: خلينا نبدا صفحة جديدة الله يخليج .. وخلينا بعيد عن المشاكل .. ترى كافي اللي عشناه ..
ساكتة وماترد ..فقلت ..
جراح: سارة ..
رفعت راسها وطالعتني وقالت ..
سارة: حتى انا تعبت ..
ابتسمت يوم اعترفت وقلت ..
جراح: خلاص مثل ما قلت لج خلينا نبدا صفحة جديدة .. اتفقنا ؟؟
هزت راسها بايجاب فقلت ..
جراح: حلو .. الحين انسي اللي صار ..
استانست يوم شفت ابتسامتها ولو انها باهتة .. ارتحت ..
اخيرا .
********************************

بنت أبو ظبي ©؛°¨غرامي مبدع¨°؛©

لمينا قشنا وردينا البيت...قضينا احلى اسبوع في الشاليهات .. الله يازين البحر .. الله العالم اشكثر فرحت واشكثر تغيرت نفسيتي ...
سمعت صوت موبايلي وكان رقم حنان ..
الهنوف : هلاااا والله ..
حنان: يا القاطعة ..وينج ما سمعت حسج ؟؟
كنت مستحية منها من اللي سواه غيث ...
قلت ..
الهنوف : والله انتي اللي وينج ..من بعد ما تزوجتي نسيتينا ؟؟
قالت وهي تضحك ..
حنان: توني رادة من شهر العسل ...
الهنوف : وعساج استانستي ؟؟
تنهدت بفرح وقالت ..
حنان: الله يا الهنوف ... ما تتصورين اشكثر فرحانة ..
تخيلت نفسي مكانها .. مع اللي احبه .. بس ..هو يحب وحدة ثانية .. نزلت راسي امسح دمعة نزلت غصبن عني ..
حنان: الهنوف ...وينج ؟؟
انتبهت لصوتها فقلت ..
الهنوف : معاج معاج ..
قالت بخبث ..
حنان: اللي ماخذ عقلج يتهنا به ..
ذكرتني بموضوع لازم اكلم حمد فيه .. قلت لها ..
الهنوف : حمد يمج ؟؟
حنان: حمد ؟؟؟ لا انا في بيت ريلي .. بعدين تعالي انا موجودة ما اكفي ولا لازم حبيب القلب ؟
آسفة حنان رح اخذلج ..مااقدر اعيش مع واحد ما احبه واعتبره مثل اخوي ..
تنهدت وقلت ..
الهنوف : خلاص إذا رحتي بيتكم خل حمد يدق علي ..اوكي ؟؟
حنان: عشان تصير سالفة مثل ذيج المرة ...صح؟؟
اوووووه ..الحين شلي ياب طاري هالسالفة..
كملت هي وقالت ..
حنان: ولد عمتج هذا اقشر ..ما يتفاهم .. وماله مبرر يمنع زواجكم انتي وحمد بسبب تافه مثل هذا .. غيث الصراحة مخه رجعي ومتخلف ..
ماتحملت وقلت ..
الهنوف : حنان..ما اسمح لج ..هذا ولد عمتي وهو المسؤول عني..
سكتت حنان بعدين قالت بهدوء ..
حنان: انزين يبا كليتينا .. المهم ابي اشوفج ..
وين تشوفيني غيث ما يرضى ايبب طاريكم هالدور اروح لكم ؟؟!!!
قلت ..
الهنوف : نتقابل بمكان .. ولا اشرايج تيين عندي ؟؟
قالت بصراخ ..
حنان: نعم ؟؟؟ لا عيوني انا من بعد الطردة المحترمة اللي خذيتها ما اطب بيتكم مرة ثانية .. ولا انتي ناسية شلي سواه ولد عمتج المصون فينا ؟؟؟
مسكت اذني من صوتها وقلت ..
الهنوف : خلاص يبا ..ياكلمة ردي في محلج .. بل كليتيني .. انزين نتقابل مثل ما قلت لج في مكان عام ..حلو ؟؟
حنان: خلاص ..اليوم الساعة خمس ..اوكي ؟؟
طالعت الساعة وكانت ثلاث ونص ..
الهنوف : اشرايج في شاطئء الشويخ ؟؟؟
حنان: احلى ..ومن وين تعرفينه بعد شاطئ الشويخ ؟؟؟
الهنوف : تطنزين ؟
ضحكت وصكت عني ..
لبست شيلتي وعباتي اللي ما ادري لين متى بلبسهم ..وطلعت من الغرفة ..مريت على غرفة هاجر لقيت بابها مبطل .. تقربت وكانت هاجر قاعدة على الأرض وظهرها للباب طقيت الباب فهي التفت لي ..ابتسمت اول ما شافتني وقالت ..
هاجر: حياج الهنوف ..
دخلت وقلت ..
الهنوف : شنو تسوين ؟؟
شفت صور منثورة على الأرض قلت ..
الهنوف: صور منو ؟؟
قالت وهي تمسك وحدة من الصور ..
هاجر: صورنا ... قعدي شوفي معاي ..
قعدت يمها .. ومسكت وحدة من الصور .. شفت خالد ماسك وحدة عمرها تقريبا 10 او11 ..سألت ..
الهنوف : منو هاذي ؟؟
طالعت هاجر الصورة وقالت ..
هاجر: هاذي بنت خالد .. ايمان ..
خالد عنده بنت ؟؟ ما شاء الله تشابهه وايد.. كملت هي ..
هاجر: مسافرة عند امها...
هديت الصورة وتنقلت من صورة لصورة ..بعضها يضحك وبعضها اوقف اتأملها ..اغلبها لخالد وغيث ..
قالت هاجر ..
هاجر: انا بروح اشوف غيث رد من الدوام ولالأ ..
ونزلت تحت ..تأملت الصورة اللي بايدي ..كان غيث واقف ووراه سيارة وهو ساند عليها ويمه واحد ..
دققت بالصورة ..
نفس السيارة ... نفس الــ.... نفس الريال ..
ردت فيني الذاكرة ليوم الحادث ..
" إذا بتدخل السجن ادخل بروحك .."
مو معقولة ...مو معقولة ..هو ...هو...
نزلت مني دمعة ساخنة حرقت خدي .. لا يا ربي ..
" الهنوف .. ترى غيث لقى بيت واليوم بننتقل له .. جهزي اغراضج "
كانت هاذي هاجر.. وبسرعة دخلت الصورت داخل العباة ومسحت دموعي .. وقلت ..
الهنوف : ان شاء الله ...متى بنروح ؟؟
هاجر: اليوم ..بننتقل ..انا ماادري ليش يبيبنا ننتقل ...
طلعت من الغرفة وحبست روحي بداري .. وطلعت الصورة ..ادقق فيها اكثر الريال اللي يم غيث اعرفه ..اعرفه مثل نفسي ..
يارب يارب القاه وانتقم منه ..
************************************
اخيرا لقيت بيت على قدنا ..اشتريته بمبلغ حلو .. وخالد سكن بشقة مع امه ومرته .. قريب علينا..
رتبنا الأغراض وصعدنا فوق ..وهم وراي ..قلت لهم واحنا داخلين غرفة ..
غيث: منو يبي الغرفة هاذي ؟؟
قالت هاجر..
هاجر: انا .. مكانها حلو ..
غيث: خلاص ..
والتفت للهنوف ..لقيتها سرحانة ..فقلت انبهها ..
غيث : وانتي يا الهنوف ؟؟
التفت لي وطالعتني بنظرات غريبة وقالت ..
الهنوف: انا آخذ الغرفة اللي يمها ..
استقر نظري عليها .. شكلها زعلانة من شي .. شسالفة ؟؟
قلت وانا اطلع من الغرفة ..
غيث: هاذي غرفتج ..
ورحت لغرفتها وبطلتها .. وبدر وراي والهنوف ..
طالعتها ببلادة وبرود وقالت ..
الهنوف : مشكور..
ابتسمت لها مع اني مستغرب ..وقلت
غيث: العفو ..
وطالعت بدر وقلت وانا اشيله ..
غيث: وانت يا بطل ..رح تنام عندي ..
استانس الأخ ..وقال..
بدر: انا انام بالسرير وانت على الأرض ..
طالعته وقلت ..
غيث: طرار ويتشرط بعد ...
ودخلت غرفتنا .. كنت مجهزها حقه .. طبعا احتل الأخ السرير .. بس انا تعمدت اني اشتريه جبير ..
" غيث"
التفت ورا لقيت الهنوف واقفة عند الباب ..فقلت لها ..
غيث: هلا ..
قالت بجمود ..
الهنوف : انا متواعدة مع رفيجتي الساعة خمس..ممكن توديني ؟؟
اوديج ؟؟ بس اوديج .. انتي لو تطلبين مني ادويج المريخ اوديج ..جم الهنوف عندي؟؟
قلت ..
غيث: مو مشكلة ..بس وين بالضبط؟؟
بعد عشر دقايق كنا داخل السيارة بعد ما وصيت هاجر على بدر .. كانت الهنوف قاعدة ورا .. وعيونها لبرة .. ماادري شنو فيها .. لما كنا بالشاليهات كانت اشزينها ..
قلت ..
غيث: الهنوف ..
وطالعت من الجامة اللي جدامي .. لقيتها تطالعني بحدة ..اخترعت من نظراتها زين اني ما دعمت .. كأن نظراتها اخترقت الجامة وارتدت علي .. واصابت قلبي وهزته بعنف .. قلت وانا اطالع الطريج بارتباك ..
غيث: اا.. فيج شي ؟؟
قالت ..
الهنوف: لأ.. ليش ؟؟
ليش ؟؟؟ شوفي ويهج شلون صاير بعدين تعرفين ليش ..
قلت ..
غيث: ماادري احسج متضايقة .. مو مرتاحة للبيت اليديد ؟؟
الهنوف : لا مرتاحة ..
غيث: عيل ؟؟
وطالعتها من الجامة لقيتها تطالع برة .. اقسم لو هي طالعتني بنفس النظرة رح ادعم ..
قالت بدون اهتمام ..
الهنوف : بس تعبانة من الشغل ..
ما اعقبت على ردها ..وظلينا ساكتين ليما وصلنا .. نزلت هي وانا ظليت ليما شفتها تسلم على بنت ما عرفتها لأنها مغطية ويهها ..
حركت ومشيت ..
رحت لخالد لعل وعسى انسى شوي همومي ..
************************************

بنت أبو ظبي ©؛°¨غرامي مبدع¨°؛©

قعدنا على الكرسي .. وقالت حنان..
حنان: اشتقت لج ..
ابتسمت لها وقلت ..
الهنوف : وانا اكثر .. ها ..اشلون ريلج معاج ؟؟
حنان: واااي يا الهنوف ..اشكثر طيب معاي .. ويعاملني يا دهينة لا تنكتين ..
ابتسمت على تعليقها ..وقلت ..
الهنوف : الله يوفقكم ..
قالت هي ..
حنان: وانتي ..متى يحن قلبج على اخوي ؟
وهذا اللي يابني اليوم .. الله يستر شنو رح يسير .. مخي مشغول بمسألتين ..حمد والصورة اللي عندي ..
قلت ..
الهنوف : لما يحن قلب ولي امري ..
ونزلت راسي بحزن وخوف من المستقبل ..
خذتنا السوالف ليما بدت الدنيا تظلم ..
قالت حنان..
حنان: اخوي بيي الحين ..
طالعتها لقيتها تطالعني بنظرات خبث .. قلت لها .
الهنوف : انتي وين ريلج عنج ..؟
ضحكت وهي وانا مسكت تلفوني وكملت ..
الهنوف : خلاص بدق على غيث عشان اييني ..
وفعلا دقيت عليه وقالي بيي بعد ربع ساعة ..
" السلام عليكم "
اخترعت من الصوت .. كان حمد .. مسرع ياه ..
حمد : اشلونج الهنوف ؟
طالعته لقيته يطالعني وهو يبتسم ..
حلو شكله رايق .. خل اكلمه بالموضوع اللي فر مخي .. قلت ..
الهنوف : الحمدلله ..
التفت لحنان وقلت ..
الهنوف : حنان ممكن تخلينا شوي بروحنا ؟؟
قالت ..
حنان: اكيد ..
وبعدت شوي ..
التفت لحمد وقلت ..
الهنوف : انا بغيت اكلمك بموضوع .. ااا..
لما شاف حمد ارتباكي وقال ..
حمد : قولي الهنوف ..
قلت بارتباك اكثر
الهنوف: حمد انت ريال ونعم فيك .. و.. وانا افتخر في يوم اني عرفتك .. بـ.. بس انا ...انت الف وحدة تمناك ..
بدت ملامح الغريبة تغزو ويهه ..
غمضت عيوني واخذت نفس وقلت ..مرة وحدة .
الهنوف: انا اعتبرك مثل اخوي ..
وبطلتهم لما خلصت جملتي .. لقيته يطالعني منصدم .. معاه حق إلا قلته مو شوي ..
قال بصوت مبحوح بالكاد ينسمع ..
حمد : انتي ..انتي من صجج؟؟
نزلت راسي .. مسكين مو مستوعب اللي قلته لين الحين ..
قال بصراخ ..
حمد : ردي علي ..
غمضت عيوني جراء صرخته ..فكمل ..
حمد: انتي اكيد تغشمرين ؟؟
طالعته بحزن .. وهزيت راسي بالنفي .. غمض هو عيونه وبطلهم وبدا يتنفس بسرعة فقلت ابرر..
الهنوف: حمدالف وحدة تمناك انا ما استاهلك .. انا ..
صرخ هو وقال ..
حمد : بعد اربع سنين ... بعد اربع سنين ياية تقولين لي هالكلام؟؟
صراخه خل الناس تطالعنا .. قلت له بهدوء ..
الهنوف : حمد الناس تطالعنا ..
قال بجنون..
حمد: مالي شغل بالناس .. انا لي شغل بالكلام الفاضي اللي قلتيه ..
ومسك ايدي بقوة وهزني ..
حمد: ليش ؟؟ ليش ؟؟ بعد ما بنيت حلمي معاج .. آخرتها ياية بسهولة تهدمين اللي بينا .. مااسمح لج ..سامعة ما اسمح لج ..
دموعي نزلت وقلت اترجاه.
الهنوف :حمد ..خلاص ..الله يخليك ..
وهذا مازاده إلا عصبية وضغط اكبر على ايدي ليما قمت اتأوه ..قلت ..
الهنوف: آآي ..حمد هد ايدي ..
يت حنان .. وشافت الوضع اللي بينا ..فمسكت ايد اخوها وقالت.
حنان: حمد انت ينيت ..هد البنت..
صرخ حمد فيها ..وقال ..
حمد : مالج شغل انتي ..
والتفت لي وقال ..
حمد: نطرتيني اربع سنين ورضيت ..قعدتي عند ولد عمتج ورضيت .. انهنت بسبتج ورضيت .. وانطردت امي واختي بسبتج ورضيت .. اما الحين مارح ارضى باللي تسوينه ولا اللي تقوليه ..واصلا مايهمني .. باجر ليش باجر؟؟ ..الحين نروح نتزوج وتكونين لي ...فاهمة ؟؟؟ لي انا ...
فاض فيني وقلت بصراخ ..
الهنوف : انا مااحبك .. مااحبك .. مابيك ..
ماحسيت إلا بطراق طيحني على الأرض .. مسكني حمد من ذراعي بقوة وقومني وقال ..
حمد : انا مارح اخليج .. فاهمة ..مارح اخليج ..
كنت حاطة ايدي على خدي من الطقة .. وكنت اشاهق من البجي ..
" حمـــــد"
التفتنا كلنا لصاحب الصوت وكان غيث.. وضغط حمد على ذراعي وقال ..
حمد : اكيد هو اللي فر مخج صح ؟؟
صرخت من الألم .. فتجدم غيث وبعد ايد حمد ووقف بيني وبينه يعني انا الحين ورا غيث ..
غيث: شيل ايدك عنها ... انت من سمح لك تمد ايدك عليها ولا حتى تلمسها ؟؟
وبغى يتشابكون مرة ثانية بس انا وقفت بينهم ..وقلت لغيث..
الهنوف : لا لأ غيث .. حمد ما كان يبي شي .. انا السبب ..
ومسكت ايد غيث ويريته وراي وبعدته عنهم ووقفنا بعيد ..قال غيث لما شاف دموعي ..
غيث: شلي صاير؟؟ النذل هذا سوا فيج شي ؟؟
قلت وانا امسح دموعي ..
الهنوف: لأ .. انا تهاوشت مع اخته بس ..
قال ..
غيث: عيل ليش متدخل بالسالفة؟؟ ..واشقصده اني انا اللي فريت مخج ؟؟
نزلت راسي ومسحت دموعي .. وقلت ..
الهنوف : غيث ..خل نمشي الله يخليك ..
تنهد بعصبية وقالي ..
غيث: امشي ...
ومشى جدامي .. شكله معصب ...مابي مشاكل كافي اللي صار ..
دخلت السيارة وانا احاول اني امسك روحي عن البجي بس كل ما تذكرت اللي صار زادت دموعي ..
حطيت ايدي مكان الطراق .. وتحسسته ..
والله ما كان قصدي اجرحك ياحمد ..بس انا ..انا مابي اعيشك بوهم ..
" نزلي "
قالها غيث بنرفزة ..
نزلت ودخلت البيت .. صعدت داري وما سألت عن احد لا بدر ولا هاجر ..وقفلت الباب ..
قعدت على السرير وفرغت اللي فيني .. دفنت ويهي بالمخدة وبللتها بدموعي ..
حسيت بصداع فظيع .. فتحت الخانة ومسكت علية الدوا واخذت حبة واستلقيت على السرير ومغمضة عيوني ..
سمعت طق على الباب وجملة المعتادة ..
غيث: الهنوف انا غيث ..
مو وقتك ...
لبست الشيلة ورديت رتبت العباة علي .. وبطلت الباب ..
رديت انا لورا .. وهو وقف وسند ايده على مقبض الباب .. وقال ..
غيث: ممكن القى تفسير للي صار ؟؟
نزلت راسي ماابيه يعرف ..
قال بنفاد صبر ..
غيث: قاعد اكلمج انا ...
طالعته لقيت الشرر يتطايرمن عيونه .. خفت ..قلت بارتباك .
الهنوف : قلت لك اني تهاوشت مع اخته ..
غيث: انا مو قصدي على هالسالفة ..
الهنوف : عيل ؟؟
غيث: اشحقة رحتي لهم ..مو منعتج عنهم انا ؟؟
ما رديت عليه .. ما قدرت اصلا ..كان يكلمني بعصبية .
قال بصراخ ..
غيث: آخر مرة اسمح لج تستغفليني .. فاهمة ؟؟
غمضت عيوني ..حسيت بالذل .. بالضعف ..لو ابوي عايش ما تجرأ وصرخ بويهي ...
كمل هو وقال ..
غيث: والمشكلة اني انا وصلتج .. خليتيني اوصلج عندهم بنفسي !!!
رفع صبعه جدامي وقال وهو يهدد ..
غيث: اقسم يا الهنوف .. لو عرفت انج رحتي لهم ولا حتى حاجيتيهم لو بالتلفون رح اتصرف معاج تصرف ثاني ..
قلت ..
الهنوف : انا ما..
قاطعني وقال بصراخ مجنون ..
غيث: ولا كلمة .. مابي اسمع صوتج ...
بط اذني من صراخه .. الصراحة اول مرة اشوفه متنرفز جذي .. مرر ايده على شعره وقال وهو ايده منقبضة ..
غيث: وفوق كل هذا القاه ماسكج يوم ايي .. وين قاعدين احنا ؟؟ تبين تقنعيني انج تهاوشتي ويا اخته ؟؟
تراجعت لورا لأني خايفة يمد ايده علي ..
قال هو يخفض من صوته بس هم معصب ..
غيث: هاذي اول وآخر مرة اسمح لج تستهينين فيني ..لا تخليني اتهور واسوي شي انتي تندمين عليه بالنهاية .. وهذا تحذير وعقبه ما تلومين إلا نفسج ...
وهذا ماكان إلا تفريغ شحنة غضب كانت مكبوتة في صدر غيث ..
وانا كنت المسبب الأول لها ..
طلع وصفع الباب بقوة ...
وخلاني مثل العلبة المعصورة والمقطوطة بالزبالة ..
صراخه وعصبيته تخلي الواحد يخاف ..
يبته لنفسي .. استاهل ...

يتبع <<<

بنت أبو ظبي ©؛°¨غرامي مبدع¨°؛©

الحلقــــــــــــــــــــــــــــة السادسة والعشرون
ــــــــــــــــــــــــــــــــــــــــــــــــــ ــــــــــــــــــــــــــــ


قعدت على السرير متنرفز ... بغيت اذبحها .. طالعت ايدي اللي كانت رح تنمد عليها .. بس الحمدلله اني مسكت روحي .. خلتني اطلع من طوري ..
قمت من السرير وطلعت من الغرفة .. حاسس اني بختنق .. اففففففففف ...بس المشكلة ما اقدر اطلع واخليهم بروحهم..انثبرت قعدت بالكرسي اللي بالصالة.. ومسكت الريموت وقلبت بهالقنوات .. اخبار تبط الجبد ...مسلسلات تييب المرض .. اغاني رايحة فيها .. برامج تافهة ..
يا في بالي المنظر اللي شفتهم عليه يوم ييت اخذ الهنوف ... ماسك ذراعها .. زين مني اني ما ذبحته ..
آآآآخ يا القهر .. طفيت التلفزيون وحذفت الريموت ..ورحت المطبخ اشرب لي عصير ولا ماي بارد يطفي نار اللي بقلبي ...
بطلت الثلاجة لقيت فيها عصير اخذته وقعدت بالطاولة اللي بنص المطبخ .. وشربته دفعة وحدة .. وهم حسيت بالعطش .. رحت الثلاجة واخذت علبة ثانية .. وقعدت بالطاولة ...كنت احاول افتحه ..بس سمعت ..
" غيث "
التفت للباب .. وكانت الهنوف ..
بعد فيج عين تييني ؟؟؟
ما رديت عليها والتفت للعصير وبطلته وشربت شوي ...
قالت ..
الهنوف : آسفة ..
بس ؟؟ هذا اللي قدرتي عليه ؟؟
ماا هتميت لها ..ولا حتى حاولت اهتم ... شربت العصير كله ..وقمت قطيته بالزبالة .. وطلعت من المطبخ
ورديت للصالة ..
سمعتها تقول ..
الهنوف : ما كان قصدي اني اسوي جذي .. بس انا كنت ابي اكلم حمد...
ما خليتها تكمل جملتها .. التفت لها وقلت بعصبية ...اسم حمد كافي انه يثير فيني براكين خامدة...
غيث: لا تييبين طاريه ..
قالت هي بضعف ..
الهنوف : عيل شنو تبيني اقول ؟؟
غيث: لا تقولين شي .. انا اصلا مابي اسمع صوتج ..
وقعدت على القنفة .. منقهر ..
تجدمت هي وقالت ..
الهنوف : قلت لك آسفة ..حطيتك بموقف بايخ بس انا كنت ابي اقولك اني رايحة لهم بس ما تجرأت ..
قلت بدون ما التفت لها ولا اطالعها ..
غيث: الحمدلله ..زين انج عرفتي ..
دام السكوت بينا للحظات ..بعدين هي قالت ..
الهنوف : ماتبي تقبل اعتذاري كيفك ...
لهني وافلتت اعصابي مني .. التفت لها بعصبية وقلت ..
غيث: اكيد بكيفي عيل بكيفج ؟؟؟ احمدي ربج انا للحين ما ذبحتج ويا ..
وسكت ادور تعبير يليق فيه ..بعدين كملت بتوتر ..
غيث: ويا حمد..
مابي اخذ ذنبه فناديته باسمه مع انه يغثني ..
قالت هي بنبرة حزينة ..
الهنوف : انزين ما تبي تعرف انا ليش رحت لهم ؟؟
طالعتها بقهر وقلت ..
غيث: ما يهمني .. ما دامج ما اهتميتي باللي وصيتج عليه ..انا ما يهمني ..
طالعتني شوي بعدين قالت بهدوء قاتل ..
الهنوف : انت تعرف ان انا وحمد ...
طالعتها بنظرة نارية فصححت ..
الهنوف : اقصد ولد الييران في بيتنا القديم .. مخطوبين لبعض .. صارلنا اربع سنين ..
الإسطوانة المعهودة ..تأففت وقلت بضيق ..
غيث: درينا ..تبين احطها بالجرايد بعد ؟؟
جرحتها .. نزلت هي راسها وكملت ..
الهنوف : انا وحمد انفصلنا ...
بغيت اتكلم بهاللحظة لأني ما انتبهت لكلامها ..بس ...
شنو؟؟!!!!!!!
التفت لها وطالعتها مصدوم .. من صجها تكلم ؟؟؟
قالت هي ..
الهنوف : وهذا سبب الهوشة اللي صارت ...بس ..
ولفت عني وراحت فوق ...وخلتني مثل الصنم مصدوم من كلامها ...
عيل هي الحين مو...
غمضت عيوني وبطلتهم اتأكد اني مو في حلم .. يعني ذلف حمد ولا رح يرد ؟؟
امانة تكفووون قولولي صج اللي سمعته ؟؟؟
طرت فوق وطقيت وقلت جملتي المعتادة يوم اطق الباب عليها ..
بطلت الباب وقالت وهي زعلانة ..وقالت ..
الهنوف : خير ؟؟
نزلت راسي منحرج منها وقلت ..
غيث: اعتذارج مقبول يا بنت خالي ..
ورفعت راسي ..لقيتها تطالعني باستنكار وقالت ..
الهنوف : الحين انت المفروض تعتذر مو انا ؟؟؟
قلت ..
غيث: مو مهم ..المهم الحين صج اللي قلتيه تحت؟؟
طالعت الناحية الثانية يعني ان زعلانة ..انا المفروض ازعل مو انتي ...
قالت بغرور..
الهنوف : ئي ...صج ..
مثل الماي البارد انصب ردها علي وبرد قلبي .. الله ..اخيرا ..افتكينا من الهم ...
ابتسمت لا ارداديا .. وقلت ..
غيث: يعني ..حمد ما رح نشوفه مرة ثانية ؟؟
طالعتني شوي بعدين قالت ..
الهنوف : ممكن اسأل سؤال ؟؟
قلت وانا لسة احتفظ بابتسامتي ..
غيث: تفضلي ..
قالت وهي مركزة عيونها علي ...لدرجة اني بعدت نظري عنها ..
الهنوف : انت ليش تكره حمد؟؟
فاجأني سؤالها المباغت .. قلت بدون ما ارفع عيني ..
غيث: اقدر احتفظ بالأجابة لنفسي؟؟
وابتسمت في ويهها ومشيت ... الصراحة بغيت اقولها السبب بس حسيت انه مو وقته ..
دخلت داري وانا مستانس ..صج اني ما نسيت اللي صار بس خلاص المسامح كريم .. سمعت صوت موبايلي ...لقيته جراح ..غريبة !!!!
غيث: هلا ..جراح..
ياني صوته كأني يركض ... كان ياخذ نفس بين الكلمات ..
جراح: غيث ..سارة..سارة ..تولد ..
وقفت على ريولي ..قلت ..
غيث: تولد ؟؟؟ بس هي في الشهر السابع ..
جراح: ادري .. ما ...لحظة ..
وتكلم مع احد ..بعدها انقطع الخط...
ياويلي اشفيها سارة ؟؟؟
الحمدلله اني كنت مبدل هدومي .. بسرعة البرق اخذت الموبايل والمفتاح ..نزلت تحت وانا انادي هاجر والهنوف ..طلعت لي الهنوف ..شافتني مرتبك قالت ..
الهنوف : خير غيث؟؟
التفت لها وانا ماسك مقبض الباب وقلت ..
غيث: انا رايح مشوار ضروري وراد ان شاء الله .. دقي علي إذا صار شي اوكي ؟؟
وطلعت ما نطرت جوابها ..ركبت السيارة ..وبالطريج تذكرت ..أي مستشفى ؟؟؟ ما اخذت العنوان ..طقيت راسي ..
مالي إلا خالد ..دقيت عليه وسمعت ازعاج ..سألته ..
غيث: انت وينك فيه ؟؟
قال وهو يصرخ يبيني اسمعه ..
خالد : انا بالمستشفى .. تعال بسرعة ..
قلت وانا ابعد التلفون شوي عن اذني ..
غيث: ادري ..بس أي مستشفى ؟؟
قال خالد بعصبية ..
خالد : بالله عليك يعني الحريم إذا بيولدون وين يروحون ؟؟
استغربت ...اشفيه معصب؟؟
صكيت عنه ورحت للمستشفى الولادة المشهورة بالكويت .. بركنت السيارة ..وبسرعة رحت الأستعلامات وسالت عنها .. ودولوني .. لما وصلت شفت خالد واقف يم جراح وامه وابوه ..سلمت عليهم ..ووقفت يم خالد ..قلت بصوت واطي ..
غيث: اشلونها ؟؟
ما طالعني خالد وقال ..
خالد: حالتها صعبة شوي ..لا تنسى انها بشهر السابع ..
تنهدت مع منصدم .. سارة مو اول محدة تولد بالشهر السابع ..
طالعت جراح ..كان حاط راسه بين ايدينه .. وساكت ..
بعد ساعتين .. طلع الدكتور وقال وهو مبتسم ..
الدكتور : مبروك ..ولد ..
ابتسمت بفرحة .. طالعت جراح .. شفته مبتسم ابتسامة باهتة ..حرام شكله تعبان .. دخل جراح وامه ..وبقينا انا وخالد وابوه ..باركنا حق بعض .. وبعدها دخلنا لسارة ..إلا كانت صاحية ..
قلت ..
غيث: حمدلله على السلامة ..
قعدنا كلنا ..جراح كان عند راسها .. وامه يمه ..وانا وخالد عند طرف السرير .. وابوه يم خالد ..
بعد دقايق استأذن ابو جراح واخذم معاه مرته ..
قال خالد ..
خالد: ها شنو بتسمونه ؟؟
الفت جراح وقال ..
جراح: امممم..ماادري ..
ولف لسارة وقال ..
جراح: اشرايج ؟؟
طالعتني سارة وقالت ..
سارة: نسميه غيث ..
بطلت عيوني وقلت ..
غيث: شنو ؟؟؟
وابتسمت سارة في ويهي ابتسماة تأكيد .. قلت وانا اضحك ..
غيث: صدقتوا انتوا ؟؟؟ كنت امزح معاكم ذاك اليوم ..
قال خالد ..
خالد: حلو اسم غيث ..يمكن يطلع احسن من خاله .
وطالعني بخبث .. قلت باستنكار ..
غيث: ليش اشفيني انا مايطلع علي ؟؟
قالت سارة..
سارة: انا قلت لجراح إذا ولد بنسميه غيث ..وإذا بنت نسميها شريفة ..
طالعتهم مصدوم.. بعدين طالعت خالد لقيته مبتسم .. وجراح بعد ..
اسم امي كافي يثير فيني عواصف مالها حدود ..
نزلت راسي بألم ..وقلت وانا اقوم ..
غيث: اللي تشوفونه ..عن اذنكم ..
وطلعت .. سمعت صوت خالد يناديني ..التفت له وانا اجاهد دمعة لا تنزل مني سهوة .. قلت ..
غيث: نعم ؟؟
تجدم مني وقال ..
خالد: وين ؟؟
قلت اتحجج...
غيث: بروح البيت البنات بروحهم ..
خالد : انزين تو الناس ..
قلت مصر ..
غيث: لا خالد ..الساعة عشر ونص .. وين تبيني اخليهم وهم بروحهم ؟؟
طالعني خالد شوي ..بعدين قال ..
خالد : زعلت ؟؟
ناظرته .. وبعدين تنهدت بضيق .. وقلت وانا منزل راسي اكابد دمعتي ...
غيث: لا ..
مسك خالد ذقني وقال ..بحنان..
خالد : ماابيك تزعل من اييبون طاري امك .. تراك تطلع شين لما تزعل ..
طالعته ونزلت دمعة خفيفة على خدي ..مسحها خالد .. وقال وهو يضمني ...
خالد: تراني مااتحمل اشوف دمعة من عينيك ..
كلماته خلتني ادفن ويهي بصدره انشد الدفء.. رفعت راسي بعدها وقلت وانا مبتسم ..
غيث: امي حية يا خالد .. حية فيك .. لو الف الدنيا كلها ما القى اخ مثلك .. انت ابوي وامي وحياتي ..
ابتسم خالد وقال بمرح ..
خالد: ادري .. اعرف نفسي ..ماله داعي تعلمني ..
طقيته على كتفه ع الخفيف ..وقلت ..
غيث: يا شين الثقة ..
وسلمت عليه وطلعت من المستشفى ..وانا انسان غير ..صج اني تضايقت من سمعت اسم امي ..امي اللي احس بغربة لما اسمع اسمها ..او احد يتكلم عنها .. امي اللي ما شفتها إلا بالصور .. وعانيت المر بس عشان انا ولدها ..وهذا اللي خلاني اتعلق فيها مثل الصمغ .. ما اعتقد اني في يوم رح انسى اني ولد شريفة اللي هي بعد عانت اشد مني .. وانا ييت على هالدنيا اكمل اللي عانته .. بس الحمدلله حالتي الحين احسن ..
شغلت السيارة وتحركت وانا استغفر ربي واذكره واشكره بعد على هالنعمة اللي انا فيها ..
وصلت البيت .. لقيت الهنوف بالصالة وهاجر وياها ..وقفوا لما شافوني ..
غيث: السلام عليكم ..
الهنوف + هاجر : وعليكم السلام..
تجدمت مني هاجر ..وقالت ..
هاجر : وينك ..خرعتني اول مرة تطلع هالحزة ؟؟
ابتسمت بامتنان لله سبحانه اللي غير البنت هاذي 180 درجة .. قلت وانا احط ايدي على جتفها واقربها مني ..
غيث: افرحي صرتي خالة ..
طالعتني متفاجأة وقالت بعدم تصديق ..
هاجر: صج !!!!!
هزيت راسي بايجاب ..ففرحت وطارت للتلفون تكلم سارة.. تبعتها بنظري ..ياحليلها ..
"مبروك"
التفت للهنوف ..لقيتها تبتسم ..قلت وانا اتجدم واقعد على القنفة ..
غيث: الله يبارك بعمرج ..
قعدت هي ..وقالت ..
الهنوف : سموه ؟؟
غيث: ئي .. غيث ..
قالت وهي تبتسم وتطالع هاجر ..
الهنوف : اسم حلو ..
استانست ..خل استهبل عليها ..
غيث: والله ؟؟
انتبهت لي وطالعتني ..وقالت بجدية ..
الهنوف : الأسم حلو ..
قلت بغرور ..
غيث: ادري ان الأسم حلو ..مو انا صاحبه ؟؟
قالت وهي تقوم ..
الهنوف :ومن الغرور ما قتل ..
وراحت المطبخ ..ابتسمت ...الله يحنن قلبج علي يا بنت خالي ..
*****************************
مرت شهر الحين على ولادة غيث حبيبي .. الصراحة ماخذ من غيث وايد .. بياضه وشعره البني .. مسكت ايده الاعبه .. دش علي جراح وقال وهو يبتسم ..
جراح: السلام عليكم ..
وفسخ غترته ..
التفت له وانا ابتسم وقلت ..
سارة: وعليكم السلام ..
تجدم وقعد يمي واخذ غيث عنده وقال ..
جراح: اشلون غيوثي حبيبي ؟؟
ورفع غيث فوق ..وقلت انا ..
سارة: الحمدلله .. اشلون بو غيث ؟؟
التفت لي وقال ..
جراح: بو غيث بخير مدام شاف ام غيث ..
ابتسمت بخجل .. الصراحة بديت احبه .. الهدنة اللي بينا خلتنا نتقرب من بعض .. ومعاه حق ..انا ما عندي دليل واحد يثبت ان جراح كان له سوابق بسوالف الشباب البطالية .. الله يديم علينا الفرحة ...
قال جراح وهو يحط غيث على السرير ..
جراح: انا بروح اتسبح ..
والتفت لي وقال .
جراح:شنو الغدا ؟؟
خل استهبل عليه .. قلت وانا اسوي روحي منصدمة ..
سارة: غدا ؟؟؟
طالعني شوي يبي توضيح ..بعدين قال بتوسل ..
جراح: تكفين لا تقولين ماكو غدا ؟؟
شكله تحفة وهو يترجاني .. كافي اربعة اشهر الأولى من زاوجنا اكلنا من المطعم او الخدامة ..وجراح ما يحب لا هذا ولا ذاك .. بس المسكين تحمل ..
قلت وان اضحك على شكله ..
سارة: لا في في .. روح تسبح ..
طالعني بنص عين وقال ..
جراح: تقصين علي ها ؟؟ هين ..انا اوريج ..
واخذ الفوطة وفتح الكبت واخذ ملابس ودخل الحمام عزكم الله .. لفيت لغيث ابي اشيله بس لفت انتباهي صورة على الأرض .. تقربت منها وشلتها ..
مــ... مستحيل ...
هذا جراح وهــ....
هاذي هاجر ...
اختي هاجر ..
شنو تسوي مع جراح ؟؟؟
تجمعت الدموع في عيوني ... جراح وهاجر !!!!
ما ادري كم من الوقت مر وانا ..وانا اتأمل الصورة ..
سمعت صوت جراح يقول..
جراح: انتي لسة هني ؟؟
التفت له وكان ينشف شعره .. طالعني ولما شاف الدموع في عيوني ..قال ..
جراح: سارة ... اشفيج ؟؟
تجدمت منه بعصبية وحقد ..وقطيت عليه الورقة .. طاحت بالأرض ..طالعني باستناكر وغرابة وشال الصورة ولما دقق فيها انصدم .. بعدها طالعني .. فقلت بصراخ ..
سارة: يا الحقير .. يا النذل .. ما لقيت إلا اختي ؟؟
مد ايده يبي يحطها على جتفي فقلت وانا ابعدها بعصبية ..
سارة: وخر .. لا تلمسني .. انا الغبية اللي صدقتك .. يا الخسيس ..
وطحت على الأرض ابجي ..
المشكلة اني حبيته ... حبيته ... غطيت ويهي بايدني واطلقت لدموعي العنان .. نزل هو لمستواي وبعد ايدي بالغصب وقال وهو ماسك ذقني ..
جراح: سارة .. انا مــ...
دزيته بعيد عني .. وقلت ..
سارة: انت شنو؟؟ انت شنو ؟ ؟ انت واحد لعاب ومغازلجي تلعب على بنات الناس ...
راح صوتي فطلع ضعيف ..بس كملت ..
سارة: مالقيت اللي اختي حرام عليك ... حرام عليك ...
وصرخت بكل صوتي ..
سارة: طلقــــــــــــــني ..
انصدم جراح بس قال ..
جراح: سارة صدقني مو انا اللي بالصورة ..
قلت باستهزاء بس بعصبية ..
سارة: لا تقولي ركبوا ويهك بالصورة ..بالله عليك من له مصلحة يدمر اللي بينا ؟؟
سمعنا صوت غيث يبجي .. ومع بيجه صوت جرس الباب يدق ..
كملت .. وقلت ..
سارة: اصلا ما كان في شي بينا .. فلا تحاول تقص علي اكثر من جذي .. طلقيني بهدوء وانا رح اتستر عليك وما اعلم احد ..
قال يدافع عن نفسه ..
جراح: سارة ينيتي انتي؟؟ اي اقص عليج اي اتستر عليك .. مو انا اللي بالصورة صدقيني .. مو انا .. هذا ..
دخلت الخدامة وقالت ..
الخدامة : بابا .. هزا بابا فيصل يبي انت..
التفت له جراح بعصبية وقال ..
جراح: قولي له مابي اشوفه ..
الخدامة : بس هو قول يبي ضروري ..
تأفف جراح وطلع ...
قمت واتجهت للكبت وطلعت ملابسي وحطيتهم بالجنطة بعدها ناديت الخدامة وقلت لها اطلعهم من الباب الخلفي .. التفت لغيث وشلته وعطيته للخدامة الثانية .. وطلعت من الغرفة .. نزلت السلم .. سمعت صراخ .. اعتقد قاعدين يتهاوشون .. مريت يم الصالة والحمدلله الستارة تغطي بعدت شوي وشفت جراح واقف وجدامه فيصل ..
توأم!!!!!!
الحين عرفت .. فيصل هو اللي ...
بس صوت جراح قطع تفكيري ..
جراح: فلوس ما عندي .. انسى ...
كان فيصل شكله تعبان .. وماسك ايد جراح يترجاه ..وجراح يبعده ..
فيصل : تكفى يا خوي .. عطني وهاذي آخر مرة ايي عندك..
قال جراح بعصبية ..
جراح: قلت لك ولا فلس .. ارحم نفسك حرام عليك اللي تسويه فينا وفي روحك.. شوف المخدرات وين وصلتك ؟؟
مخدرات ؟؟؟
كمل جراح وقال ..
جراح: آسف فيصل ما اقدر اساعدك ..
والتف عنه ومشى ياي عندي .. بس .. شفت فيصل يتلفت حواليه .. واستقر على جرة تعتبر من تحف البيت ..مسكها ..وتجدم لجراح ..
صرخت بأعلى صوت ..
سارة: جراااااااااااااح..
طالعني جراح وتفاجأ مني ..لما شافني اطالع ورا التفت هو .. بس سبق السيف العذل .. هوى فيصل بالجرة على راس جراح اللي طاح على طول على الأرض دون حراك ...
رديت ورا من الصدمة ..وانا اشاهق .. جراح ...جراح ...
شافني فيصل .. وتجدم مني .. وشكله يبي فلوس ..ما قدر ياخذ من جراح يا عندي .. خفت انا ..وركضت بسرعة فوق وهو وراي .. دخلت الغرفة ابي اصك الباب بس هو كان اسرع ودفع الباب ..
الدفعة خلتني اطيح على الأرض .. زحفت لورا ..وهو دخل الغرفة ..
انا هني خلاص .. شكلي ميتة .. اكيد بيذبحني مثل ما ذبح جراح .. مسكني من ذراعي .. وانا انتفض ..
وقال بصوت مخيف ..
فيصل : وين تحطون فلوسكم؟؟
العادة جراح ما يحط فلوس في البيت .. الناس اصلا ماقامت تحط فلوسها في البيت ..
مو وقته افكر جذي ... هزني بقوة لما ما سمع ردي ..وقال ..
فيصل :وين فلوسكم ؟؟
قلت بخوف ..
سارة: ماادري ..ماادري ..
دزني بقوة وطحت على الأرض ..راح للكبت وبطله ..ونثر الملابس لما وصل لعلبة ذهبي ومجوهراتي ..
بطلها وطالع اللي داخل بعدها التفت لي وقال ..
فيصل :ماادري ها؟؟
غمضت عيوني وقلت ودموعي تنزل ..
سارة: خذ اللي تبي .. بس روح الله يخليك ..
تجدم مني وسحبني لعنده ..وقال بخبث ..
فيصل : بهالسهولة هاذي ؟؟
طالعته مو فاهمة قصده .. وابتسامته تزيد .. وقرب مني .. حاولت اسحب ايدي بس هو كان اقوى .. لما شفت ان خلاص رحت فيها .. صرخت باعلى صوتي .. بس اللي سمعته مو بس صراخي ..كان طيحة قوية ..
بطلت عيوني ..لقيت فيصل طايح ...وجراح واقف يتنفس بسرعة ... طالعني .. بعدها ..غمض عيونه ..وطاح .. طاح قلبي مع طيحته .. تجربت منه .. وهزيته بقوة .. ماكو رد ..
سارة: جراح الله يخليك ..رد علي ..جراح ...
طقيته بقوة اكبر ..ماكو جواب .. والمشكلة انه ينزف ..
الله يخليك جراح لا تروح ...
تزلزل قلبي هالفكرة .. وبسرعة البرق رحت للتلفون ودقيت على الأسعاف ...
وقعد يمه احاول اصحيه ودموعي على خدي ...
وادعي ربي انه ما يموت ...
وصل المسعفين واخذوه ..
*******************************


بنت أبو ظبي ©؛°¨غرامي مبدع¨°؛©

بطلت عيوني بتعب ... راسي يعورني .. جني داعم طوفة ...آآآخ... رديت غمضتهم من الألم ...حاولت احرك ايدي بس مو قادر شي مانعها ..بطلت عيوني والتفت لأيدي ببطء بقيت سارة ماسكتها ونايمة عليها ..
ناديتها بضعف ..
جراح: سارة..
بالكاد ينسمع صوتي ... وشكله ما رح تسمعه .. حركت ايدي من تحتها ببطء وهدوء ..بس هي حست ..قامت وطالعتني .. وابتسمت بفرح ..
سارة: صحيت ؟؟؟
ابتسمت لها وانا اسند راسي بالمخدة ..
جراح: ئي .. من متى وانا هني ؟؟
قامت هي وقعدت يمي على السرير وقالت ..
سارة : من اسبوع ...
بطلت عيوني ..من اسبوع !!!!!
كملت هي ..
سارة: حمدلله على السلامة ..
طالعتها وقلت بتعب ..
جراح: الله يسلمج ...
وسكتنا ... بعدها بغيت اقول بس قلنا بوقت واحد ..
جراح: آسف عـ....
سارة : راسك اشــ...
وسكتنا .. قلت لها وانا ابتسم..
جراح: اشبغيتي تقولين؟؟
ابتسمت هي وقالت..
سارة: راسك اشلونه الحين ..لسة يعورك ؟؟
قلت وانا احط ايدي على الشاش ..
جراح: يعورني بس بيخف ان شاء الله ..
طالعتني هي شوي ..او بالأحرى تتأملني .. بعدين قالت ..
سارة: امك وابوك كانوا هني قبل شوي ...بس راحوا ..
طالعتها وقعدت اتأملها ..بعدين قلت ..
جراح: وانت قاعدة بالبيت بروحج ؟؟
هزت راسها بالنفي وقالت ..
سارة: انا ما تحركت من هني ..
فاجأتني .. طالعتها منبهر .. هاذي سارة اللي تكرهني وما تطيق مني كلمة .. عيل بخلي فيصل يكفخني على راسي كل يوم ...
قلت لما تذكرت فيصل وانا منزل راسي ..
جراح: سارة .. آسف على اللي سواه فيصل ..هو..
قاطعتني وقالت ..
سارة: ليش ما قلت لي ان عندك توأم ؟؟
بطلت عيوني منصدم ..وقلت ..
جراح: ليش ما تدرين ان فيصل توأمي ؟؟
سارة: ادري ان عندك اخ بس ما ادري انه توأمك ...
كملت هي وقالت بصوت خافت ..
سارة: آسفة على الأتهامات اللي وجهتها لك بدون دليل .. لما شفت فيصل عرفت ان هو اللي ياني الجامعة واللي كان يغازل بناتها ..
بعدها التفت لي وقالت بعتاب ..
سارة: بس ليش ما قلت لي انه كان هو واختي ...
وسكتت .. نزلت راسي انا ..وقلت ..
جراح: ماقدرت .. افضح اخوي وافضح اختج .. خبيتهم عندي عشان اهدد فيصل فيهم ويترك السم اللي يشمه .. بس ها ما زاد الطين بلة ..
ابستمت هي وحطت راسها على صدري وقالت ..
سارة: ابي اقولك شي ..
قلت وانا امسح على راسها فوق الشيلة ..
جراح: قولي ..
بعدت راسها وقالت وهي تطالع عيوني ..
سارة: احبــــــــك


يتبع<<<


أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1