ريم القحطاني ©؛°¨غرامي جديد¨°؛©

ياليلها المجروح كل الطريق جروح
هاذي الرواية نسجتها من خيالي لا اقصد بها أشخاص معينين
أتمني تعجبكم أحداثها وتقرؤها من باب الاستمتاع
الجزاء الأول
عائله أو رانية :
سعود:أبو رانية متزوج من أم رانية اللي توفت من كم سنه إنسان بسيط كل حله وحلاله في محل سباكه
رانية:إنسانه جميله لدرجه إن كل من شافها يحسبها من أصل شامي تدرس في ألجامعه سنه ثالث علم نفس محبوبة من صديقتها ودكتوراتها وتعمل في مستشفي حكومي متدربه بعد ماتوسطت لها دكتوره مصريه تدرسها في الجامعه
في الصباح الساعه6:30
قامت رانيه ومثل كل يوم صلت الفجر وجهزت فطورها ونادت ابوها على الفطور
أبو رانيه: كيف الدراسة وانأ بوك
رانيه: تو مابيدينا يابوي بس انا مستعده وبقوه ان شاء الله مايصعب عليه شئ
أبو رانيه:الله يوقفك يارب
رانيه:داعواتك لي يابوي
ابو رانيه حبوب وطيب ويحب بنته ويبي يعوضها حنان إلام اللي فقدته
ابو رانيه:الله يوفقك ويسر أمرك
رانيه:أبوي فيك توصلني على المستشفي اليوم
ابو رانيه: طيب وأنا بوك جهزي أنتي
ــــــــــــــــــــــــــــــــــــــــــــــــــ ـــــــــــــــــــــــــــــــــــــ
في احد أحياء الرياض الراقية وسط أفخم القصور وداخل الغرفه نايم دقت عليه امه تصحيه من النوم وهو مايرد
سطام: نعم يامي تفضلي
دخلت العمه حنان تصحي سطام
حنان: قوم الفطور
سطام: بفطر بشركه
حنان: أي شركه قوم بس أبيك توصلني المستشفي ازور عزيزة مرقده بالمستشفي من يومين
سطام قام بسرعة:وش فيها أمي عزيزة
حنان:قوم ودني لها وفي الطريق أقول لك
عائله ابوسطام:
العم سعد:ابو سلطان وسميه وسطام وزوج العمه حنان وهو مدير الشركه إنسان جاد وحبوب وعلاقته مع الناس حلوه وقويه
العمه حنان: اسم ع مسمي إنسانه رائعة قلبها طيب حبوبه مدرسه في روضه
سلطان:متزوج من بنت عمه سارة وعنده ولد ويشتغل مهندس
سميه: عمرها22 تدرس أداره أعمال في الجامعه
سطام: عمره 26 خبره في السوق ومعروف انه ساعد ابو الايمين يميزه انه مملوح واسمر مخلي البنات طايحين عنده
عائله ابو سلمان :
سالم:الاخ الأكبر من سعد إنسان مغرور وشايف نفسه ومحد يلومه لانه من أغنياء الرياض
حصه: أخت حنان ومديره مدرسه إنسانه رائعة مثل أختها
سلمان: الابن الأكبر في العائلة واكبر من سلطان ولد عمه مو متزوج ويحس انه مافي احد فاهمه يعتبر حكيم العائلة ومعروف بأنه صارم وجميل علاقته مع سطام كلها مشاكل
سارة:الانسانه الرقيقة والناعمة زوجت سلطان تحب شئ اسمه سلطان وتموت عليه
سمير: مبدءاه في الحياة عيش يومك
العمه سهي<<وهي البنت الوحيد ه في العائلة أخت سعد وسالم
تزوجت وتوفي زوجها قبل عشر سنين وطلعت من الدنيا بـــــ
شذي:عمرها 25 تدرس طب وانسانه عاقله
لمى: عمرها 16 تدرس بثالث ثانوي ومعدها الا طنش تعش تنتعش<<بهدها تبتلش
ضاري: إنسان هاووي وصديق سطام روح الروح
ــــــــــــــــــــــــــــــــــــــــــــــــــ ـــــــــــــــــــــــــــــــــــ
تجمع الكل ع طاوله الفطور وكان سالم ع راس الطاوله وجنبه اخوه وزوجته وعيالهم<<<العائلة فررري يعني مع بعض
والكل مستغرب من سطام اللي اول مره يفطر معهم
سعد:غريبه وش عنك اليوم معنا
سطام: اقوم يعني ترى عادي
حنان:خلك بس ابوك يمزح بس
سطام يكلم أبوه:والله مرتك اليوم صحتني ماخلتني انام
سعد: وش عنك حنان
حنان:عزيزة في المستشفي
عزيزة<<<هي ام الكل في هالبيت والكل يحبها ويحترمها وجمايلها مغرقه سعد وسالم ويعزونها بمعزه امهم
سالم:افااااا عسى ماشر وش فيها
حصه:الشر مايجيك بس تعرف عزيزة كبرت وتبي احد يساعدها
سالم:باي مستشفي هي؟
حنان:حكومي قريب من بيتها
سعد:ننقلها لمستشفي ثاني وعلى حسابي ترى معزتها من معزتا لوالده اللعه يرحمها
فجاءه دخلت العمه سهي بيتها في الجهه الثانيه من القصر
سهي : السلام عليكم جميعا
سالم:هلا والله بام ضاري وين البنات؟
سهى :راحوا الدوم <<فجاءه تطالع العمه في سطام
سهي:لا مستحيل اليوم بصير شئ
سطام: حتى انتي ياعمه
سهي:وش عندك انت وضاري صاحيين هالصبح
سطام:حاس فيني ولدك قلت لكم تؤم روحي هالولد
في الحظه دخل سمير حالته حاله شاف عمته سهى قعد يدور ع شذي ماشافها
سمير:صباحوووو
سعد:لا والله وين احنا وعليكم السلام
سالم وهو مبتسم من دخلت سميرر
ويلتفت ع أخوه:يالله ياسعد ورنا شغل وإذا على عزيزة بنحاول نساعدها قدر الامكان نرد جامايل هالانسانه
في مكان ثاني
بيت احلى ثنائي في الروايه
ع السرير كانت تتقلب يمين ويسار وحاسه ان احد قاعد يحرك على وجهها شئ وفتحت عيونها تشوف
ساره:سلطان
سلطان:صباح الخير ياقلب سلطان
صلحت جلستها وهي تبتسم :وش عندك
سلطان:مشتاق لك
ساره حاطه يدها ع جبهه سلطان:حبيبي مسخن؟
سلطان نزل يدها وبسها : يمكن
ساره:ترى بتتاخر ع الدوام
سلطان:انتي دوامي اليوم
ساره:يالله سلطان ترى والله من جد اتكلم لا تستهبل
سلطان:ماستهبلت
ساره:طيب ابعد بروح اشوف فيصل
سلطان:وأنا بعد
ساره وهي تضحك:يالله
سلطان: وأنا بعد
ساره:وانت بعد وش؟
سلطان:اروح اشوف ولدي
ــــــــــــــــــــــــــــــــــــــــــــــــــ ـــــــــــــــــــــــــــــــــــــ
لبس سطا مبطلون جنز وتي شيرت بني وكان شعره طويل شوي قاصه بطريقه جنان<<طالع كانه المغني التركي تركان بس ع اسمر
واخذ مفتاح السياره وطلع شاف امه وخالته ينتظرونه
وهو رافع حواجبه يكلمهم:ماكنكم بدرت ماليوم
الخاله حصه:انت اللي متاخر الله يصلحك بقفلون الزياره وانت حضرتك باقي تكشخ
سطام بدلع:مامي شفي خالتو
حنان:وهي صادقه عجل
سطام: لاوالله صرت سواقكم وأنا مادري
ــــــــــــــــــــــــــــــــــــــــــــــــــ ــــــــــــــــــــــــــــــــ
عند البوبه المستشفي كان سعود واقف يدور موقف يبي ينزل بنته
فجاءه رجع ع وراي وصدم صدم خفيفه ع السياره اللي وراه
رانيه:أبوي صار شئ
سعود:ماصار شئ ان شاء الله خير
نزل سعود من السياره وكان سطام هو صاحب السياره اللي صدمها سعود
نزل سطام يتأكد من السيارة عسى ماصار فيها شئ
سمع صوت من وراه
سعود:أسف ياولدي مانتبهت

لف سطام ع سعود وكانت الصدمة يشوف إنسان مو غريب عليه ياربي وش هالشبه كانه أبوي
سعود:يالاخو
سطام قطع حبل افكاره:نعم تكلمني؟
سعود:عسى ماصار شئ
سطام:لا ماصار شئ
في السياره حنان وحصه مو مستوعبين شكل الرجال
حصه:تتوقعين هو؟
حنان:وش لامستحيل يقلون سافر من زمان
حصه:والله اني حاسه بشئ
حنان:مدري<<وفي داخلها متاكده ان هذا الشخص هو نفسه سعود
نزلت رانيه من السياره عند ابوها وسطام
رانيه:أبوي
لف عليها سعود وطاحت عين سطام عليها
سطام:وش ذا العيون اللي تذبح
رانيه:انا بدخل
سعود:خلاص دقي عليه متى ماخلصتي
سلم سعود ع سطام ومشى ودخل سطام وهوو مسطوول مو معقوله وش ذا الشبه في هالرجال
وش ذا العيون ع البنت ماشاء الله اصك الضعيفه عين الحين
حنان استعربت يوم شافت سطام ساكت من يوم مادخل السياره
حنان: وش فيك
سطام:مدري بس الرجال اللي تو صدمنا يشبه أبوي وعمي مرره
حنان وقلبها قابضها:يخلق من الشبه اربعيين
سطام: صح
وهو في داخله شعور غريب اتجاه هالرجال مو طبيعي
ــــــــــــــــــــــــــــــــــــــــــــــــــ ـــــــــــــــــــــــــــــــــــــ
دخلت رانيه وسلمت ع صحباتها وراحت لعند الدكتوره امال
د أمال :أزيك ياقمرر
رانيه:انا تمام بس تعرفين بداء الدوم ومضطرة ماداوم الا يومين في الاسبوع
د أمال: اوكيه مافيش مشكله ع فكره في مريضه في الدور التاني غرفه 13 مابتسجيب للعلاج أبدا فيا ليت
تروحي مع وحده من النيرس عشان تحاولي معها
رانيه: اوكيه
وطلعت رانيه لدور الثاني وراحت لعند الدكتور فؤاد اللي يشرف ع حالته
د فؤاد:أتوقع ان عزيزة عانت من الوحدة عشان كذا هي رافضه أي شئ تفكر ان الموت أحسن لها
رانيه: هي كبيره في السن؟
د فؤاد: عمرها حدود67
رانيه :فيني أشوفها الدكتورة أمال طلبت مني
طلع الدكتور فؤاد وطلعت معها رانيه راحوا لعند غرفه عزيزة وكان عندها سطام وحنان وحصه
سطام: ماشاء الله عليك يامي عزيزة قاعده تدلعيين
عزيزة وهي تتنهد:أي دلع ياوليدي شكلي اودع
سطام وهو يكره سالفت الموت: لا نشاء الله الله يخليكي لنا
حصه: سالم لازم علينا ترجعين عندنا
عزيزة:مابي اتعب احد ابي اموت في بيتي
حنان:وش ذا الاكلام ياخاله الله يطول في عمرك بعدين تعرفين سالم وطبعه تعالي عندنا وأنا مستعده ارجعك لو مارتحتي عندنا لبيتك
في هالحظه دق الباب وطلب الدكتور يشوف سطام طلع سطام من الغرفه وكان الدكتور فؤاد ورانيه براا واقفين مع سطام
كان سطام يقول في نفسه هاذي بنت الرجال اللي صدمني وهو يطالع في يدها شكل ذي شاميه مشاء الله وش ذا البياض<<الناس في وادي وهو في وادي
د فؤاد:انتوا اهلها
سطام:تقريبا
د فؤاد:كيف؟
سطام قعد يشرح وضع عزيزة بنسبه للعائلة ورانية كانت تسمع بوضوح وهي مركزه في سطام فجاءه حست انو جذاب مدري ليش بس يجنن بسم الله عليه
قاطعت رانيه سطام:يوم هي مريضه ليشخ ليتوها لوحدها
سطام فتح عيونه لا الكلام سعوووودي بحت :هي مو راضيه ترجع عندنا
د فؤاد: اوكيه رانيه عندك الحاله حاولي تقنعيها بلعلاج
انا رايح
سطام+رانيه:تفضل
دخلت رانيه ع عزيزة وحنان وحصه وسلمت عليهم
رانيه تسال عزيزة:هذولاء اهلك؟
عزيزة:هذولا اغلي من اهلي
رانيه:طيب قولي لهم انك رافضه شئ اسمه علاج
عزيزة ساكته
رانيه: حتى الاكل مو راضيه تاكل
حنان:خالتي مايصير
حصه:مو زين يام مشعل عليك
سطام:فينا ننقلها مستشفي ثاني؟
رانيه تناظر سطام: ماتوقع تفرق لو وديتوها علاجها بيدها بعدين ويش يفرق المستشفي هذا عن غيره؟
سطام<<وش ذي نافخه ريشها ع ايش؟
رانيه: ع العموم انا سمعت عادي تطلع لانو علاجها من الاساسي نفسي
طلع سطام من الغرفه
بقي في الغرفه حصه وحنان وعزيزه ورانيه
حنان وهي تسوي مفرش عزيزة طاحت عيونها فجاءه ع اسم رانيه
رانيه سعود العبد العزيز
حنان وكان مويه بارده انكبت عليها مو قادره تستوعب اللي الانسانه اللي قدامها تكون بنت بنت لا مستحيل
طلعت رانيه من الغرفه وسمعت احد ينادي من وراها
<<<<هاي انتي؟
رانيه لفت ع سطام:عفوا تكلمني؟
سطام طاحت عيونه ع اسم رانيه اللي معلقته
رانيه سعود العبد العزيز
وأنا سطام سعد العبد العزيز
رانيه:نعم
سطام مايقدر يركز:هاذا اسمك؟
رانيه وهي متنرفزه وتكره هالحركات: شف اذا قاعد تلعب روح العب بعيد عني انا بنت ناس
سطام بهدوء:اسم ابوك سعود محمد العبد العزيز؟
رانيه راحت عن سطام من دون جواب والبنات كانوا يناظرون رانيه
دلال:مين اللي كان يسولف معك؟
رانيه:واحد يسال عن وحده
دلال:يالبا قلبه جننن
رانيه: والله احلفي
سعاد:يابخت من يحبها
رانيه: الحمد الله
سطام وحنان ظلوا ساكتين عن اللي شافوه في المستشفي سطام من وقتها متغير والكل مستغرب وحنان مو قادره تستوعب أنها تكون بنت سعود وخافت أكثر ترجع المشاكل من أول وجديد


إنتظـآر ©؛°¨غرامي فعال ¨°؛©

بدااايه رااائعه
بإنتظاار التكمله

VEN!CE يـآرب مآلـي ســـوآكـﮯ

"



هلآ وغلآ نورتي
والله يعطيكِ آلعآفيه
بدآية حلووة

بآلتوفيق



"

غرامة الشوق ©؛°¨غرامي جديد¨°؛©

بدايه اكثر من روووووووووووعه

نتظر البارت القادم ليت تحددين موعده

ريم القحطاني ©؛°¨غرامي جديد¨°؛©

الجزاء الثاني
بعد اسبوع من اللي صار في المستشفي فضلت حنان وسطام يسكتون ع اللي شافوه حنان خايفه من المشاكل وسطام يبي يعرف وش السالفه بس مو عارف مين يسأل
كان عند العائله مناسبه كبيره وكان سعد جالس جنب اخوه سالم
قام سالم وجلس سعد لوحده مع ابو جاسم
سعد:والله المشاريع الجديده تطلب مزانيه كبيره وحنا يالله نلحق ع المشاريع اللي عندنا
ابو جاسم: الله يعين بس قلت لك جلك من الشركه وكمل دراستك في القانون مارضيت وانا اخوك
سعد رجع لذاكرته للوراء يوم انه كان يتنمى يكمل في مجال القانون بس الظروف الي مروا فيها واختفاء سعود خلاها يمسك الشركه بدل اخوه
ابو جاسم قطع افكار سعد:سعد ابو سلطان
سعد: هلا ياخوك
ابو جاسم :وين رحت
سعد:قريب ماطلعت من الباب
ابو جاسم: ابو سلطان عند لك سؤال
سعد:تفضل
ابو جاسم: انت عندك اخو اسمه سعود
سعد جمد دمه في عروقه يوم قالها ابو جاسم مايدري ويش يقول
سعد:ليش؟؟؟
ابو جاسم: تعرف وانا اخوك انتهيت من عمارتي وابي ادوري لي سباكه زينه دلوني ع محل سباكه زين صحيح انه صغيرر مو ذاك الشئ بس شغل يعجبك
دخلت وسلمت ع صاحب المحل وقال انه اسمه سعود محمد العبد العزيز
سعد وهو يتذكر سعود قدامه وهو ينطرد من البيت هو وزوجته
ابو جاسم:سعد
سعد تنهد :انت يابو جاسم عزيز عليه واكثر من صديق بس صدقني بقول لك كل شئ بس مو اللحين بعدين
ابو جاسم حس ان سعد تغير حاله يوم جاء طاري سعود
ــــــــــــــــــــــــــــــــــــــــــــــــــ ـــــــــــــــــــــــــــــــــــــ
في الساحه الخلفيه من القصر كانت سميه جالسه عايشه جوها مع راشد الماجد
على كثر السنين اللي عرفتك ماعرفتك زين .. تمنيت إني ماشفتك ! ولا لحظه ولا شويه
حسبت إنت وأنا نبقى حبايب نبقى أحلى إثنين .. حسبتك تبقى لي طول العمر مخلص وفيّ ليا
وأثاري حبنا كذبه نسيت العشره في يومين زرعت الشوك أنا بنفسي .. غرست الهم بيديا
أنا ماكنت أظن اللي يحبّ .. يحب له شخصين على بالي أنا لحالي وحبيبي يموت بس فيه
على النيه مشيت وماعرفت أمشي معاه لوين إلين الوقت بيّن لي نوايا غدر مخفيّه
تعال وشوف وش كثر الدموع إللي تخون العين .. كثر ماخانني حظي وعرفتك وإنت مو ليه
أنا شاللي يصبرني على همي معاك للحين .. خلاص إبعد .. وأنا ببعد ولاتسأل أبد فيه
وإذا قصدك تبيع وتشتري قلبي أنا بحرفين أبمحي الحب من قلبي .. وأعيشك ذكرى منسيه
أناني مثل ما إنت ولا يفرق معاك البين .. وأنا ماعاد تعني لي وخساره فيك ماضيه

ضاري دخل وقاطعها :انتي وش تسوين هنا
سميه مو معبرته وداخله في جوها اكتشف ضاري انها مركبه سماعات البنت مو معاه <<ياربي هاذي البنت متى تحس فيني؟
دقها من على كتفها عشان تنتبه
سميه لفت عليه: اووه ضاري هنا سوري مانتبهت لك
ضاري وهو رافع حاجب ومنزل حاجب:انتي وش تسوين هنا
سميه:عفوا ليش السؤال؟
ضاري: مدري
سميه: اجل مالك دخل لا تسال مره ثانيه
ضاري: طيب
سميه وهي مستغربه من هدواء ضاري: ضاري فيك شئ
ضاري بس سمع سميه تساله هالسؤال حس والاول مره انها انتبهت له ونسي التعب للي فيه: ابدا بس شوي تعبان من الشغل
سميه: خلي سطام يساعدك شوي
ضاري: مايقصر بو عبد العزيز بس هاذا شغلي وانا مسؤال عنه
فجاءه تطب عليهم لمى :طحت عليكم وش قاعدين تسوون
ضاري يناظر اخته وده يجره من شعرها بس شعرها ماينجر مقصقصه مثل الصبيان شعري اطول من شعرها حاقد عليها لانها قاطعتهم
ضاري: وجع مانسوي شئ
سميه تضحك: هلا وغلا تعالي اسمعي شريط راشد الجديد مرره خيال
لمى هاتي السماعات احطها بأذني وانتوا كملوا سوالفكم وتغمز لضاري
سميه ماتت من الضحك: من جد انتي خايسه يادوبا
اما ضاري عصب وقام بيروح
سميه: وين رايح
ضاري: تبين اقعد ترى عادي
سميه: براحتك حبيت تفضفض لي
ضاري يغمزلها: بعدين
هنا فكت لمى السماعات طحت عليكم وش تقلون
ضاري انا برتكب فيك جريمه لااشوفك لمده 3 ايام
سميه ماتت من الضحك
ضاري يحترم سميه ويحبها بس مايدري هي تبادله نفس الشعور او لا يحس انه حب من طرف واحدفي نفس الوقت سميه تحترم ضاري وتحب سواليفه وترتاح لما تتكلم معاه بس ماتدري هي تحبه لا
ــــــــــــــــــــــــــــــــــــــــــــــــــ ــــــــــــ
كانت تكنس غرفتها دخل ابوها وراحت تجيب العشاء
رانيه:اشوفك مبسوط اليوم؟
سعود:مرره وانا ابوك الحمد الله اليوم جاني واحد وتعاقدت معها بمبلغ محترمم
رانيه:الحمد الله والله يابوي انك طيب وتستاهل كل خيررر
سعودكان يناظر بنته وخايف عليها مين بيكون لها بعد موته مين يحميها ويساعدها لازم يامن لها مستقبلها قبل مايروح وخليها تتعذب مثل ماتعذب هو
رانيه قاطعت حبل افكاره:يبه وش فيك تعشى
سعود وهو يبتسم لبنته: بسم الله
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــ
ـفي القصر وبتحديد داخل مكتب سالم
اشتد الكلام بين سعد وسالم والكل قاعد يسمع هواش الاثنين
سالم: انت وش قاعد تقول
سعد: اقول لك ابو جاسم شافه اليوم
سالم:هاذا واحد عاصي عصى كلام ابوه وتزوج وحده تطمع فينا
سعد:استهدي بالله ياخوي هذا اخونا
سالم :انا ماعندي اخو باع اهله عشان وحده
سطام كان حاضر السالفه من البدايه والكل ملاحظ ان سطام متغيرر من اسبوع قرر انه يدخل ويعلم اهله بالي شافه
عمي+ابوي: انتوا تعرفون واحد اسمه سعود؟
سالم : وانت وش دخلك ؟
سطام سفه عمه لانه عارف انه بيطرده وراح عند ابوه:ابوي انا عندي عم اسمه سعود محمد العبد العزيز
سعد استجمع قوته وقف قدام اخوه وقالها بكل ثقه: ايه عندك
سالم لف وجه ع الشباك وسعد طلع من المكتب والكل كان يسمع الهواش ولما طلع سعد رجعوا اغرفهم
سطام كان واقف مو مستوعب عندي عم ثاني هاذا وينه عنا وليش مختفي؟
طلع من الغرفه وهو نازل الدرج تذكر رانيه: مستحيل رانيه تصير بنت عمي
اروح اسال عنها في المستشفي بس وش اقول لها؟
اقولها هي بنت عمي؟
طيب شلون؟ يعني كيف تستوعب انحن نعرف بعض ؟
طيب اروح وش بينقص مني
طلع سطام ع المستشفي وسال عن رانيه
وهو في الطريق دق عليه سميرر
سمير: وينك ياخي السهره بدت
سطام: انا مشغول اذا فضيت جيتكم
قفل سطام الجوال وسمير ع الخط سمير حس ان ولد عمه مو طبيعي
وليد: وين بو عزوز
سمير: مدري وين ذلف
نزل سطام المستشفي يسال عنها قالوا انها ماداومت من اسبوع دوامها مو ثابت
وهو في السياره يفكر روانا وش هامني بكره اوبعده بينكشف كل شئ ليش انط ع البنت من الحين وسال اخليها الحين يمكن يصير شئ بعدين
ــــــــــــــــــــــــــــــــــــــــــــــــــ ـــــــــــــــ
الاوضاع مستتبه من اسبوعين سطام ماشاف أي تحرك من عمه او ابوه اتجاه عمه وبنته
السالفه انتشرت بين بعض افراد العائله والكل صار اغلب حديثهم عنها
ساره: معقوله يطلع لنا عم فجاءه؟
سلطان: كنت عارف انو عندنا عم بس عمري ماسالت نفسي وين يكون هذا العم
ساره تشهق بصوت عالي: وماتقول لي
سلطان:والله ابوي محلفني ماقول لاحد
سارهاخذت فراشها وطلعت
سلطان يلحقها: وين رايحه
ساره : انا مو أي احد انا زوجتك
وطلعت وسكرت الباب وراها
سلطان : انا الله وشلون افهمها الحين ياربي الله يعيني بس
ــــــــــــــــــــــــــــــــــــــــــــــــــ ـــــــــــــــ
في الصباح راحت رانيه للمستشفي وارح سعود لمحله وكان الهندي يفتح المحل قبل لا يجي سعود
دخل سعود وشاف واحد قاعد عند كرسي المكتب
سعود: السلام عليكم
سعود ماصار يشوف زين ولا يميز بين الملامح زين
سعد كان متفاجاء من سعود كيف صار شكله سعود اللي كان معروف بجماله وسامته شلوم صاير شكله عمره في الستين وظهره منحني وكان شايل عليه هموم الدنيا
سعد: وعليكم السلام
سعود رفع راسه يبي يعرف صاحب الصوت وشاف الشكل اللي موغريب عليه معقوله: سعد
سعد: ايوه انا انا اخوك سعد انا سعد ياسعود
قام سعد وخضن سعود بقوه حضن اخوه اللي ماشافه من سنين وانحرم من شوفته فرقتهم الدنيا وهم شباب وجتمعوا بعد العمر الطويل
اما سعود كان حاضن سعد بقوه مو مصدق من وين طلع وكيف عرف مكانه
الهندي واللي رايح واللي جاي على المحل قعدو يناظرون فيهم مو فاهمين وش قاعد يصير مايدرون وش سبب البكاء اللي هم او ليش هالسلام الحار بينهم
ــــــــــــــــــــــــــــــــــــــــــــــــــ ـــــــــــــــ
نجئ الحين عند حكيم العائله سلمان يدخل في قصتنا بدخله حلوه
يقرر سلمان يزور عزيزه في المستشفي وهاذي ثالث مره تدخل عزيزه فيها المستشفي من بدايه الروايه
دخل سلمان غرفت عزيزه بهدوء من دون ماحد يحس سمع صوت انثوي رقيق طالع من الغرفه طل بشوي شوي
وكانت رانيه تقراء اذاكر الصباح لعزيزه وعزيزه ترددها سلمان ماقدر يدخل ولا اقدار طاحت عينه ع رانيه وقلبه بداء يدق بقوه يرجع بس مادري البنت هاذي مين تكون ياربي وش فيني ماقدر حتى اتحرك ابي اجلس اناظر فيها
رجع لوراء ودق الباب صلحت رانيه حجابها ودخل وسلم ع عزيزه ورانيه ردت رانيه السلام بصوت واطئ
وراحت بتطلع من الغرفه بس فجاءه دخل سطام عليهم وقف قدام رانيه



وش تتوقعون يسوي سطام؟؟


ريم القحطاني ©؛°¨غرامي جديد¨°؛©

حيا الله من قراءه روايتي
وربي تحمست يوم قريت الردود
ان شاء الله بنزل الروايه كل سبت واربعاء
بس ان شاء تكون واضحه وحلوه تعجبكم

وردة الزيزفون
✿ إدارة الإقسام ✿

مشكورة يالغلا على الرواية عن جد حلوة من اول بارت محمسة بس ياليت ماتطولين لانو رمضان قريب وما راح يمدينا نتابعها ...

اممممممم ماادري شنو ردة فعل سطام بس اتوقع انو راح يقول لها انها بنت عمه وراح يتفاجأ سلما بهذا الشي

يالله ياقلبي لاتتأخرين

إنتظـآر ©؛°¨غرامي فعال ¨°؛©

البااااااارت حلووو
بإنتظاارك يالغلا...

بسمه روح تع‘َـِـِآبير أن‘َــِـِـِثويهِِ |~

بداية حلوه يعطيك العافية بإنتظار البارت يوم الاربعاء

MarOoOmy ©؛°¨غرامي مشارك¨°؛©

لا طولينـ علينا يالغلا نستناكـ

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1