بنت أبو ظبي ©؛°¨غرامي مبدع¨°؛©

راشد .... ادري ان سعيد .. يلوم عمره ع اللي استوى في عمر .. وادري انه ما بيسامح نفسه لو عمر كان لا سمح الله اليوم مب ويانا .. لكن انا .. كنت بعتبر نفسي احد الاسباب ... لان اول صدمة تلقاها عمر .. وخلته يعتبر نفسه فشل في تحمل مسؤوليتنا كلنا .. مني انا ومن سالفتيه .. لكن الحمدلله .. الواحد ما يقول غير الحمدلله ع كل حال .. وعمر اليوم بيننا .. وكل شي تصلّح ...

هند: حووووه ؟
راشد: هلا
هند: تسوق وانته سرحان .. بدّعم فينا ..
راشد: بسم الله عليج
هند: بسم الله عليه .. يوم انك سرحان هيه
راشد ( ابتسم ): آسف
هند: ما عليه ما عليه ..
راشد: يالله وصلنا
هند: ما بتنزل يعني
راشد: وايد مستعيله
هند: لان عفرا وعمر ظاهرين من البيت من وقت وايد من وقت .. رمستها قالت لي انهم هني
راشد: عمر مستعيل ع عبدالعزيز
هند: حليله ...
راشد: وبعدين تعالي .. محد قالج تقولين ابا ابات بيت ابويه .. امس !
هند: يالله ذليتني راشد
راشد: اول وآخر مره
هند: كنت مشتاقة حق بيتنا
راشد: والله !
هند: هيه ... مشتاقه حق شبريتيه ...
راشد: بيتج هني استوى ... من سنين
هند: انزين خلاص آسفة ولا تزعل وحقك عليه
راشد: وتخلين ابوج يرمسني .. اتفشل من ابوج انا ..
هند: ليش عادي ؟
راشد: مب لـ شي ... استحي ارد له طلب
هند: الللله .. معلومة يديدة .. عيل كل ما ابا منك شي .. وانته تقولي لا.. بقول حق ابويه يرمسك
راشد ( اطالعها راشد بنظرة ): جربيها ويايه
هند: اماااااايه تهديد
راشد: هههههه لا .. ادري بج ما تسوينها وتستغليني بأسوأ الطرق
هند: نعم نعم ...

سعيد: راشد وصل
عمران :خل يحطون الغدا عيل
راشد: السلام عليكم
عبدالعزيز: اهلاااااااااااااااااااااا
عمر: وايد مشتاقين له ؟
عمران :هيه والله
هند: مرحبا
عفرا: اهلا ..
هند: افتقدتوني ادري
عبدالعزيز: هيه والله وايد .. جيه سرتوا امس ؟
راشد: اسأل المتحمسة وهي تقول افتقدتوني .. !
عفرا: هههههههااااااي .. والله حلوة .. حلوة .. ع كيفها
عمر: وانتي بعد وايد متحمسة اشوفج !
عفرا : اوه آسفة
هند: ههههههه
راشد: هذا بلاه ؟
عمران: منوه ؟
راشد: مروان
سعيد: يبكي على الاطلال
مروان: محد يرمسني
راشد: شوه فيك ؟
هند: ما ردوا علينا ؟
راشد: انتي بلاج ؟ مسويه عمرج وياهم ؟
هند: اقصد يعني عليه .. حرام هو عايش ويانا لازم يعني نفكر في موضوعه
مروان: والله محد فاهمني غيرج يا حرمة اخويه
هند: افا عليك انته بس .. انا بتصل بهم وبقول شوه السالفه .. تبون ولدنا والا ما تبونه .. لا تخلونه يحاتي هالكثر .. واذا رفضتوه تراكم ما بتحصلون شراته .. ماه وجاه وجمال .. وانتوا الخسرانين
مروان: بتسوينها يعني ؟
هند: اسويها وانا هند حرمت راشد .. اللي اخوه مروان .. ليش ما اسويها !

يلس راشد .. وحط ايده ع خده .. وكلهم ظحكوا ...

مــا نســينا يا ضميـري فضلهم و الله عــلينا
لــو تــدور بيـن اللّــيالي مــا نـسينا فــضلهم
كــم دعــينا ربــنا يبقــي عطــاهم كـم دعينا
مــا طمــعنا بـ العــطا حتــى عـطــايانا لــهم
كــم بـــكو لمــا بكينا كم حنـــو لــما شــكينا
و ان مــرضنا اللّــيل كــله شــاغلــين بــالهم
كــم سعو حــتى نكــون لو تحركنا و سعــينا
مــا قد تــردّى حــالنا لــو انــسقوه بـ حـالهم
كــم نهــلنا مــن عــذوب الحب لمّــا مـا درينا
مـرت ايـــام صــعـيـبــه او حــوانــا حــبـهــم
حتى التراب اللي حضن اقدامهم لا ما نسينا
نعـشقه عـشق المعنّى في هواه و لاجلهم


أحمد & آمنة

احمد: قولي احب بابا اكثر
آمنة: لا قولي ماما
ميثا: الحين منوه اقول ؟
احمد: ما بشتري لج ألعاب
آمنة: وانا ما بشتري لج احلى البدل ع ذوقي ..
ميثا: خلاص احبكم انتوا الاثنين اكثر شي
احمد: لا لازم واحد اكثر
ميثا: امممممم
آمنة: قولي ماما
احمد: تحلمين اطلعج العصر اليوم واوديج بيت عمي يوسف
ميثا: خلاص خلاص .. احبكم اثنينتكم اكثر .. بس بابا شوية كبر حبة الرمل احبه اكثر
آمنة :انزييين ما عليه .. اصبري .. ما عليييه
ميثا: ماماااااا
آمنة: اصبرييييي يا ميثا
احمد: هههههههه حليلج يا امون انكسرت قاعدة الثقة بالنفس اللي عندج
ميثا: ماماتييييييييي

وسارت ميثا حضنت امها .. وتمت تبوسها

ميثا: ماما والله والله احبج
آمنة: قومي عنيييييييي
احمد: ايييه اغار انا
ميثا: ماما والللللله والللله .. احبج ..
آمنة: ههههههه انزين خلاص ذبحتيني
احمد: عقب وين اسير ادوّر لي حرمة بعد حلوة تخسرني ع الميكب !....


طارق & سلامة

سلامة: عاااااااااااااااااااااااااامر
عامر: هههههههه ما سويت شي
سلامة: ما سويت شي وهذا كله شوه ؟
عامر: بشلهم والله كله بشلهم ..
سلامة: اصبر انته ... طااااااااارق
عامر: الحين جيه تزقرين ابويه ؟
سلامة: بزقره وبتشوف .. طااااارق
طارق: نعم نعم يييت وصلت !... أي دور واصل منوه قالك تلعب بدوني ؟
عامر: توني بادي ..
سلامة: ط والله !.. زاقرتنك عسب تلعب ؟
طارق: شوه تبين ؟
سلامة: انا زاقرتنك عسب تهزبه ع اللي مسونه
طارق: شوه مسوي ؟
سلامة: مفرفر كل هالسيديات وتقول شوه مسوي
عامر: عاديييييي والله عادي بشلهم ..
طارق: بيشلهم يقولج
سلامة: الله يعيني انا
عامر: على ؟
سلامة: عليك ...!
طارق: كنتوا تعلقون ع سالم .. الحين شوفي ولدج غدا سالم يوم كبر
سلامة: هيه والله !
عامر: سالم ربيعي ما ارضى عليه ..
طارق: القدوة المثلى .. ما يرضى عليه ... !

حصة & علي

علي: جيه يلبسون الجوتي ؟
عليا : عيل كيف ؟
علي: فتحيه مره ثانية ..
عليا: how I don’t know ..
علي: كيف ما تعرفين
عليا: بابا ما اعرف ...
علي: انزين بربط لج اياه وتعلمي
عليا: كل يوم تقولي جيه
علي: وكل يوم ما تتعلمين ..
حصة: خلصتوا ؟
عليا: بابا ما يخلصني ..
علي: انا اللي ما اخلصج الحين !.. والا انتي متأخرة ؟
حصة: بتبدأون الحين !..
عليا: بخبر يدي
علي: يا سلام !..
حصة: ههههههه الله ياخذ عدوك يا سالم شوه معلّم اليهال
علي: هو دمّر الدنيا وخلص وكبر .. الحين معلم الغير ..
حصة: هيه والله
علي: الا ميثا بنت احمد تعيبني .. ما تسمع رمسته وترد عليه بطريقة .. تفشله ! ...
عليا: يالله انزين نسييييير ... بسرعه
حصة: مستعيله شوه عندج ؟
علي: تبا تسير هناك .. تشوف ربعها
حصة: يالله عيل ...
عليا: lets go
علي: والله العظيم .. ع قولت سالم .. بنت مس حصة صدق !...

شمسة & صالح

سالم : مستفعلن فاعلن مستفعلن فعولن افعال مفاعيل ومفاليع
صالح: في البحور بعد في مفاليع ؟
سالم: اصلا كل البحور مفلوعة .. واللي حاطين هالمنهج مفاليع
صالح: انزين .. يوم بييون هني البيت .. وبيشلونك .. انا ما يخصني .. بقول هالولد انا متبري منه
سالم: هههه انزين شوه قلتوا عن سالفة امريكا ؟
صالح: وين تسير امريكا ؟
سالم: انا وعبدالعزيز بنسير
صالح: ع كيفكم !
سالم: هيه ع كيفنا عيل ع كيف منوه ؟
شمسة: عباديييييي .. حبيبي قوم عني
سالم: بنخلي دياية امه ييلس عندكم ..انا بسير .. اخاف الوباء ينتشر .. واستوي دياية شرات هاللي مظهرينه ..
صالح: تعال عبدالله تعال
عبدالله: ما ابا
سالم ( يقلد اخوه ) : ما ابا ! .. يا ربييي خاطريه ازخه واكسر رقبته .. دلووووووووووووع
صالح: اكسر رقبته .. بكسر راسك
سالم: والله شوفه كيف يقهر
شمسة: انته خلصت مذاكرة ؟
سالم: هيه
صالح: هيه .. خلص .. هذا اصلا من زمان مخلص ..
سالم: ما شاء الله عليه شاطر ..
شمسة: لان امايه اتصلت تقول ما ييتوا !
سالم: هيه صح .. سيروا سيروا .. نزلوني بيت عمي يوسف
صالح: هيييهأ .. قبل بيت يدي بو هزاع ويدوه عذيجة .. الحين استوى بيت عمي يوسف !
سالم: اطورنا يا بو سالم اطورنا شوه نسوي ؟ .. كل شعبنا ساروا هناك .. لازم نسير هناك بعد نحن !... ما سامع بالحكمة اللي تقول .. هكونا متاتا .. حكمة نغمها لزيييييييييز



بيت بو هزاع


بدر: هههههه اصلا ما خلانا نرقد جيه رقدنا ؟
ثاني: يعني انا كنت مسوي حشرة ؟
هزاع: هيه نور الشاشه كان ظارب في عيوني
ثاني: عن الخرط عاد
زايد: انا بسير البيت وعقب بسير بيت عمي يوسف ..
هزاع: ليش ؟
ثاني: قاصين ع اخويه مخلينه يرقد هني
هزاع: ما يخصني انا امايه قالت ..
بدر: هههههه حليلك يا زايد
عذيجة: يا شباب
بدر: هلا خالوه
هزاع: امايه قبل ما تقولين اللي عندج .. ثره زايد بيرد بيتهم
عذيجة: ليش ؟
زايد: عموه بسير البيت اسبح وابدل
ثاني: هيه والله انا حتى
عذيجة: عيل وصلني في دربك بيت يوسف
هزاع: الحين انا اقولها عسب ما تخليهم وتقولهم سيروا ووصلوني !
زايد: هههههه عادي انا اصلا قلت لهم برد البيت اسبح وبسير بيت عمي يوسف ..
بدر: عيل دام انه جيه السالفه .. نسير كلنا
هزاع: شوركم ؟
عذيجة: هيه هيه .. يالله نشوا عيل ..
بدر: بس بسير البيت اسبح وابدل ..
عذيجة: جيه ما تييب اغراضك هني .. دام ان ابوك وامك مسافرين !
هزاع: قلت له .. لكن رفض اقتراحي
بدر: هههه ما عليه خالوه .. اصلا البيت فاضي ولازم اسير
عذيجة: كل عصر مر البيت ...
ثاني: انتوا شكلكم مطولين .. يالله انا ساير ..


قصــص الــحيـاة كــثيرة ،، و مــشــاهــد للناظرين
منــها سـأهـدي حــكمة ،، فـيـهـا مـنـافع قـد تعين
ليــسـت الـدّنـيـا مــظـاهـر ،، إنــها خـلــق و ديــن
و الجـمال فــي الـمـظاهر ،، يـنتهي لـو بـعـد حين
و اجــعل الـقـلـب جـواهر ،، و هـي أعـمـال تـبـيـن
و ابني صـرحاً مـن مـفاخر ،، و هـي مـن نورٍ مبين
هـل يـا ترى نحن نرى ،، قمرين في هذي السنين
هـم أغـلى مـن كـل الورى ،، هـم نـبع حب وحنين
هُــم قِـصّـةٌ لا تـُـشـتـرى،، هـم والــدين الـطـيـبين
والـبر واجــب مـنـبرا ،، هــو حـقـهـم يــا سـامـعين
الشـرع قـد وضـع الاصول ،، و الـناس فـيه عارفين
فـ لنمضي في نهج الرسول ،، منهاج صدق ويقين
و لــننــشر الــخير نــقول ،، لــلـناس قـولا فيه لين
فيــه الــنصيحة للعــقول ،، كــنــز و يهـدى للثمين
كــم كــان شــخصٌ حــولـنا ،، و الـيوم عنا راحلين
مــن فــينا يــبقى هــا هنا ،، هل فينا قوم خالدين
هــي هــكذا اعــمــارنا ،، عـدد و مــحدود السنين
فلــنصحــو مــن احــلامنا ،، و لــنجعل العمر معين
هــو شاهد على حالنا ،، فــي يوم حشر العالمين
و الله نــدعــو ربــنــا ،، لــطـفــاً بــ حال المسلمين



انسحبت الخيوط الذّهبية بـ هدوء .. لتترك في سمانا نور وهج يشع برونقه النقي فـ يبهر كل من رأى الأثر الطيب والذكرى الخالدة ..

لتنسج قصة من نوع فريد تحكي لنا معنى التضحية والوفاء ..

بالرّغم من أن أحداثها قد استمدت من وحي الخيال .. إلاّ أنّ أبطالها قد وجدوا على أرض الواقع ...!

تحابوا .. فحفتهم الفرحة ..
وتفارقوا .. فانسكبت الدمعة ..

ولكن نبقى ويبقون محفورين فالقلوب .. ننقش ذكرنا فالنفوس ...

ف _ هُــم قِـصّـةٌ لا تـُـشـتـرى

روحيـ تناديكـ ©؛°¨غرامي جديد¨°؛©

يسلموووووووووووووووو

بنت أبو ظبي ©؛°¨غرامي مبدع¨°؛©

المشاركة الأساسية كتبها روحيـ تناديكـ اقتباس :
يسلموووووووووووووووو

M!$s_Smile ©؛°¨غرامي مشارك¨°؛©

صرآآحه القصه رهييييييييييبه
مشكووره ع الطرح مآتقصيرين
يعطييش العآفيه ..

بنت أبو ظبي ©؛°¨غرامي مبدع¨°؛©

المشاركة الأساسية كتبها M!$s_Smile اقتباس :
صرآآحه القصه رهييييييييييبه
مشكووره ع الطرح مآتقصيرين
يعطييش العآفيه ..

دلوعة والسبب ابوها ©؛°¨غرامي مشارك¨°؛©

يعطيك العافيه

غموض الجليد ©؛°¨غرامي مشارك¨°؛©

شكرًا على الرواية الرائعة

عاشقة ياسمين ©؛°¨غرامي متألق ¨°؛©

راااااااااااااااااائعه

ابداااااااااااااااع

ما شاء الله

اوتار2018 ©؛°¨غرامي جديد¨°؛©

رواية راااااااائعه

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1