~خيآل الواقعْ ©؛°¨غرامي جديد¨°؛©

* مـع غروب الشمس لا يغرب الحب * أحلى رواية حب رومانسية كاملة
بقلم: ~؟ خيـ~آلـ ـواقعْ ؟~.!
السلااااام عليكم ورحمة الله وبركاته
كيف الحال والعيال؟ خخخ
بدون مقدمات حبدأ روايتي الأولى الي أتمنى إذا نالت إعجابكم ورضاكم إنها تتبعها سلسله من رواياتي
ماأفضل إني أبدأ بذكر شخصيات القصه وفي كل مكان تظهر شخصيه حشرحها لكم
بسم الله نبدأ
1
2
3
انطلااااااااااااااااااااااق
رواية * مـع غروب الشمس لا يغرب الحب *
الجـــــــ الأول ــــــــزء
في إحدى الاحياء الراقية بجده وداخل منزل فخم نطلع في الدرج لغرفه بابها لونه وردي داخل الغرفه الستاره مفتوحه وضوء الشمس منورها لان الوقت كان عصر قدام تسريحة الغرفه جلست روضه وهيا لابسه تنوره بني غامق لتحت ركبتها وفي نهاية التنوره فراشه زرقا صغيره معطيه التنوره شكل حلوو والبلوزه بيضه والأكمام سماويه طبعا مع الإكسسوارات سار اللبس كامل وشياكه مسكت روضه بيدها البيضه الناعمه القلوس فتحته ومررته على فمها الصغير غطت القلوس ورجعته مكانه وهنا دق التفون حق غرفتها راحت لعنده ورفعت السماعه وبصوتها النعومي خلقه: ألوو
أمها ( أم ماجد ): رودي حبيبي يلا أنزلي يادوب نلحق الوقت، الناس بيتهم مو قريب
روضه: أوكي مامي دقايق وأنا عندك
أم ماجد: يلا أستناكي مع السلامه
قفلت روضه ورجعت للمرايا فتحت شعرها الأسود على بني كان شعرها مقصقص من ورا وباين إنه غزيرعندها غره من قدام وقفت بطولها وجسمها الي يجننو: وااو شكلي جناااان ياحظ الي بياخذني هههههههههههه
وبسرعه أخذت عبايتها ونزلت للصاله مكان ماتنتظرها امها وعلى طول راحوا السياره مع السواق لبيت أحد من اهل أمها.
في بيت مو بعيد عن بيت روضه بس لفه وحده كانت شهد جالسه مع أخوها فارس قدام التلفزيون يتابعوا فيلم أمريكي بس فارس ماكان مندمج مع الفلم عكس شهد الي كانت كلها مع الفلم كان كل شويا يطلع جواله ويلعب فيه بس لمن قربت النهايه سار مره مندمج مع الفلم لانه حمااس شويه خلص الفلم ومن الطفش رمت شهد الرموت: أفف طفش والله حتى الشنطه لسا مامسكتها
فارس بهدوء: لسا بدري وإذا طفشانه كلمي روضه
شهد: كلمتها طبعا بس تقول خارجه عند أحد من اهل أمها مدري ايش وبعدين هيا رودي مو روضه معرووف
فارس: يوووه إيش(يقولها بدلع) رودي ،، أنا أبغا أقول روضه حرر وخلاص سكي الموضوع ... قومي امسكي كتبك وذاكري لازم تشدي حيلك انتي توجيهي يعني خلاص آآآخر سنه
شهد: عارفه والله عارفه وانت ماعندك شئ؟ ماشالله كأنك في قسم إقتصاد منزلي مو هندسه ماعمري شفتك تذاكر هههههههه
فارس: أقول خليكي في حالك انتي الي ماتشوفي مو انا الي ما أذاكر
شهد: خخخ بااين ( سكتت شويه وفجأه قالت) : فروسي
فارس طل فيها يعرفها ماتدلعه إلا لمصلحه
شهد ابتسمت بخبث: إش رايك نسوي في ليان مقلب بدل محنا جالسين كدا
فارس ضحك على رجة أخته: ياامجرمه مقلب ولمين لليان اختك الصغيره الي لسا اول سنه لها في المدرسه/
شهد: بسس مقلب واحد ابغا افجعها والله نفسي اشوف شكلها وهيا مفجوعه هههههههههههههههههههههه
فارس: هههههههههههه لا قولي مقلبين أحسن ! ايش هوا يا ام الدواهي ؟؟؟
شهد: انت روح عندها في غرفتها وكلمها عادي حاول انك تخلي ظهرها على الباب وانا أروح اجيب كاسة مويه باارده ووقت ماانت تكلمها اكب المويه عليها ( غمزت لفارس) ها اش رايك وانا اختك؟
فارس: ههههههههههههههه فكره خطيره أوووكي يلا انا قايم بس بسرعه لا تتأخري
شهد: خخخخ لاتوصي حريص
فارس: الله يستــر منك ّ
راح لغرفة ليان لقاها جالسه على السرير وتلون فرحت لمن شافت فارس قامت ونطت عليه ضمته : فرووووووووس حبيبي
فارس ضحك في قلبه مسكينه ليان مي عارفه اش حيسير لها دحين: هلا والله (مسكها من يدها ولفها عليه عشان ماتشوف شهد لمن تدخل) تعالي هنا .. اش تسوي؟
ليان فررحت: جالسه الون شوف دي الصفحات كلها انا لونتها
فارس يشوف تلوين ليان الي كله طالع على برى والرسمه مي باينه بس قال: واااو من جد دا تلوينك؟
ليان: إيوا والله ودحين جالسه ألون دي البسه تبغا تلون معايا؟
فارس: إيوا ياليت تعلميني أسوي زيك
ليان ماصدقت: طيب من عيووني أمسك اللون الرصاصي ولون هنا
فارس: أووكي
هنا دخلت شهد وهيا تمشي على أطراف اصابعها ومعاها كاسة المويه طبعا أول مادخلت شافها فارس لأنه طويل ماشالله ابتسم ورجع نزل راسه يكمل، قربت شهد من ليان رفعت يدها و كبت المويه على راس ليان /////

ليان: آآآآآآآآآآآآآآآآآآآآ ( طلت وراها ولمن شافت شهد نطت عليها) هبله انتي والله لأوريكي ( بكيت) والله لأقول لماما تشوفي انا اوريكي

فارس جلس يطل فيهم بدون مايتدخل وهوا يضحك ع شكلهم وهما فوق بعض بالذات ليان مبلله بالمويه ومقهووره تسب شهد وتضربها بكل ما أوتيت من قوه ^__^
شهد تستغيث: فآآرس سآآعدني أرفعها من فوقي
فارس: ههههههههـ أحلفي لكي وجه كمان.. تستاهلي
ليان بعد ماهديت شويه وبعدت عنها: أحسن تاني مره ماتعيديها
شهد تلم نفسها وطلت في فارس بقهر: لا ياشيخ مسوي برئ ... طلت في ليان ـ ترى حتى هوا كان عارف عشان كدا جا لغرفتك وسوى نفسو يلون معاكي
ليان صرخت فيهم الاتنين : اطلعوو برا غرفتي ممنوع تدخلوها مره تانيه
فارس وشهد قامو بسرعه وهما يضحكوو قلك خايفين منها ههههه}

نبذه عن الأشخاص الي ذكرتهم
1. روضه:عمرها 18 سنه ثالث ثنوي دلوعة أمها وأبوها لأنها البنت الوحيده فيها جمال رباني يسحر الواحد بيضه عيونها واسعه وفيها لمعه غريبه حلوه خشمها دقيق فمها صغير بشرتها ناعمه طولها وجسمها متناسقين ،دائما ينادوها رودي.
2. أم ماجد: أم من جد تعرف حقوقها اش لها واش عليها تحب بنتها روضه وتتمنى لها من قلبها كلل خير وتخاف عليها مره.
3. شهد:عمرها 18 سنه ثالث ثنوي بنت عم روضه مره يحبوا بعض حللوه وفيها شوية رجه عندها دفتر من سنه خامس تكتب فيه كل شئ في قلبها.
4. فارس:عمره23 سنة رابع جامعه قسم هندسه شاب وسييييم وجذاب بكل معنى الكلمه طويل وعريض جسمه حلو كأنه لاعب رياضي، غامض يكتم دائما في قلبه مايحب يفضفض لأحد هوايته التصوير يحب يصور أي منظر حلو، إذا كان رايق تكون شخصيته مررحه ودمه خفييف.
5. ليان:عمرها 7سنين سنة أولى ابتدائي هاديه ولزوزه عندها أخو أصغر منها اسمو عبدالعزيز (عزوز) عمرو 3 سنين وهوا آخر العنقوود
’.’.’.’.’.’.’.’.’.’.’.’.’.’.’.’
في بيت روضه كان وقت غدا العائلة ( أبو ماجد- أم ماجد- مهند- روضه) للتوضيح = ماجد متزوج من بنت عمه (هيفاء) أخت شهد وعندهم لمى
أم ماجد تنادي عليهم: يلا الكل اليوم معزووم ع الغدا اتفضلوو
مهند رايق: يااسلاام مافي احلى من غدا امي وعزايمها
أم ماجد: احم ياليت بعض الناس يتعلمو
أبو ماجد: مين تقصدي؟؟ روضه ولا ماجد
أم ماجد: ههههههـ واللبيب بالإشارة يفهم
روضه وهيا نازله من الدرج: امم رائحة شهيه *_*
أبو ماجد: هلا ومرحبا بأحلى بنت في الكون
روضه: هلا في أحلى أبو ماجد ههههه
مهند: يااعيني .. يلا رودي معزوومه اليوم
روضه: خخخ آآي نوو كل يوم معزومين ماشالله
أم ماجد: أكيد وفي أحلى من عزايمي على غدا أرقى طباخه
روضه: لااا طبعا
|| خلصوا الغدا الحمدالله وأكلوا الحلا بعدها جلسوا في الصاله الكبيره الداخليه ||
دق جوال مهند ع نغمة ’’ فارس فارس.فارس الأحلاآآم ’’ << النغمة على صوت مهند وتأليفو طبعا هع
قام بسرعه ورد على طول
مهند : هلاا والله
فارس: سلاآآم يا ولد عمي ههههه
مهند:ههههههه أما ولد عمك.. وعليكم السلاام 
فارس: كيف الحال عساك بخير
مهند: الخير فيك الله يسلمك
فارس: تسلم .. أقولك اليوم عندك شئ؟
مهند: لاا ماعندي غير كم طلب أدانا هوا الدكتور بس مو مستعجل عليه
فارس: حلوو لأني طفشان قلت نروح البحر نمشي هناك وتكلم سامي يجي معانا
مهند: طيب مافي مانع مع انو حر ورطوبه لكن أحسن من البيت .. خلاص اتصل ع سامي دحين ونمر عليك
فارس: خلاص أستناكم.. مع السلامه
مهند: مع السلامه
ـ اتصل مهند على سامي الي يقرب لو ولد خالو يعني أم ماجد ( أم مهند ) وأبو سامي أخوان وقاله أوكي ماعندي شئ –
مهند يكلم أمه وأبوه: يلا أنا رايح مع فارس وسامي البحر
أم ماجد: ايش رايكم أكلم أم فارس ونروح كلنا عوائل للبحر
روضه: إيوا إيوا نبغا نروح نغير جو
وهنا رن التلفون ردت أم ماجد : ألو
...... : السلام عليكم
أم ماجد: هلاا أم فارس الطيب عند ذكره
أم فارس: ماشالله إيش كنتو تقولو؟
أم ماجد: كنت أقول لهم ايش رايكم أكلم أم فارس نروح البحر مع بعض
أم فارس: ههههههه سبحان الله نفس الكلام الي اتصلت عشانو
أم ماجد: يلا على بركة الله نتجهز ونروح
أم فارس: أوكي نشوفكم هناك ، مع السلامة
أم ماجد: مع السلامه
’.’.’.’.’.’.’.’.’.’.’.’.’.’.’.’

أنتظـر آرائكم للتكملة

دمعة الحزن ©؛°¨غرامي فعال ¨°؛©

مشكورة بارت روعة موفقة

روح أنثى ©؛°¨غرامي مشارك¨°؛©

بدااااية حلووووه

موفقه ..

الاسم تحت الانشاء ©؛°¨غرامي مشارك¨°؛©

يسلمو البارات روعه

~خيآل الواقعْ ©؛°¨غرامي جديد¨°؛©

هلا والله فيكم.. دمعة الحزن ,, روح أنثى ،، الاسم تحت الانشاء.. منوريين بطلتكم الحلوة

ولعيونكم دحين أنزل الجزء الثاني والثالث ^_^

~خيآل الواقعْ ©؛°¨غرامي جديد¨°؛©

الجـــــــ الثاني ــــــــزء
نروح لحي ثاني في بيت فخم
أبو سامي ( أخو أم ماجد ) كان يشرب شاهي ويقرأ جريده في حديقة البيت
سمع صوت سمر بنته : باابا عمة رضيه (أم ماجد) ورودي حيروحوا البحر مع بيت عمهم ايش رايك نروح معاهم؟
أبو سامي: اممم مدري على كيف أمك أنا عن نفسي مشغول اليوم حبيبتي
سمر عوجت فمها: ماما ماأتوقع إنها توافق
أبو سامي رفع عينه من الجريده: إذا انها ماتبغا تروح هيا روحي إنتي وسهى مع سامي
سمر بحزن: إن شالله
راحت لأمها الي كانت جالسه قدام التلفزيون وفي يدها فصفص _ طلبت منها الطلب_
أمها وهيا تطالع التلفزيون: تعرفي جوابي انا ماابغا اروح دبري نفسك
سمر: طيب حروح انا وسهى مع سامي
طلعت سمر فوق لغرفتها تغير ملابسها بدون رد من أمها

نبذه عن الأشخاص الي ذكرتهم:
1. أبو ماجد: أبو حنون على أولاده يشتغل في نفس الشركه هوا وأخوه ( أبو فارس)
2. مهند:عمره 22 أخو روضه أنييييق يدرس في الطب سنه رابع جامعه ناوي يتخصص طب عام يعني في النهايه يكون دكتور في طب العائله أعز أصحابه فارس وبعده على طول سامي ورائد الي يعرفو من المتوسطه ، يلبس نظاره مره كشخه، يحب الاختلاط في الناس بحكم شغله الطبي عكس فارس .
3. رائد:عمره 22 رائد صاحب مهند من التوسطه شخصيه حبوبه ومرحه حلو عنده نغزات في خدينه محليته مرره أعز أصحابه مهند وعنده أخت اسمها رهف
4. ماجد: أكبر أخوانه متزوج من بنت عمه أبو فارس واسمها هيفاء عنده بنت اسمها لمى << عائلة فرعية صغيره ^__^

5. أبو سامي: مهتم بالشغل لأن شغله يبغاله انسان متفرغ هوا يشتغل في شركه غير عن أبو ماجد وأبو فارس بس بالرغم من كدا يحاول يعطي وقت لاولاده.

6. أم سامي: شخصيتها ترجع لأهلها من النوع القوي والمتسلط بس أبو سامي مايسمح لها تفرض رأيها عليه.
7. سامي:عمره 20 ولد خال مهند شخصيه اتكيت حلو ورزين قسم علوم سنه 2 جامعه الي يشوفه يحسه شخصيه مهمه لأنه دائما جلسته معتدله طويل يعني بالعربي منمق.
8. سمر:عمرها 18 بنت خال روضه وأحلى شئ فيها عيونها تحاول تخلي الي حولها دائما فرحانين حتى لو كان على سبيل زعلها هيا، تزعل مره إذا شافت أحد متضايق.
9. سهى:عمرها 16 سنه أولى ثنوي لونها برونزي ذكيه أعز صحباتها رهف تعرفها من المدرسه وطبعا مرام بنت خالتها.
( بيت أبو سامي كلهم بحرف السين سامي وسمر وسهى)
’.’.’.’.’.’.’.’.’.’.’.’.’.’.’.’
في البحر ... وآه ياحبي للبحر يكفيني أجلس وأطالع فيه أحس إني أرمي كل همومي بداخله ..’
على مكان مخصص لجلوس العوائل انفرشت بساطين بعيدين عن بعضهم شويه وحده للرجال والثانيه للحريم أول شئ نروح لعند الحريم كان في أم ماجد وأم فارس البنات شهد وروضه وسمر وسهى وليان (للتوضيح) = ليان وعزوز أخوان شهد وفارس
ليان: ماما فين عزوز
أم فارس: مع أبوكي ليه؟
ليان: اممم بس اسأل ابغا العب معاه طفشت وانا جالسه مع دول ( وتأشر على البنات)
شهد: اقول احمدي ربك اننا جلسناكي معانا
سمر (تضرب شهد على كتفها): حرام عليكي يادبه، تعالي ليون انا وانتي نتكلم ونلعب مع بعض.
ليان: هييييييي (تمد لسانها لشهد) اححسن
روضه تمسح على شعر ليان وتطالع في شهد بعتب: كيف مانجلسها معانا دي ليوون دلوعتنا
شهد: اووكي اسحب كلامي أكلتووني
البنات: ههههههههههههه
سهى: بنات ذكرتوني جبت كتشينه ( باشته , باصره ) معايا ايش رايكم نلعب؟
روضه: حلوو كويس اتذكرتي,, يلا نلعب العاديه في البدايه وانا وليان فريق
شهد وسمر: أوكي يلا

عند الرجال .. كان في أبو ماجد وأبو فارس الشباب مهند وفارس وسامي ومعاهم عزوز
أبو ماجد: عاش من شافك يا أبو فارس إنت والشباب
أبو فارس: الله يسلمك وانت زمان عنك حتى في الشركه مانتقابل دواماتنا مختلفه
أبو ماجد: الحمدالله على كل حال وأهم شئ اننا تجمعنا اليوم وشفنا بعض
أبو فارس: صحيح وبالذات في البحر يااسلاام
سامي: مهند وفارس اش رايكم نمشي
فارس: طيب يلا عن إذنكم
أبو ماجد وأبو فارس: الله معاكم
أبو فارس: شويه ونقوم حتى احنا نمشي لاتحسبون ان احنا شيبان
مهند: هههههههههههههـ لا افا عليك يا عمي انتو في عز شبابكم
أبو ماجد: ههههههـ في عز شبابنا ... مايحتاج الكلمة الأول في شبابنا وخلاص
فارس وسامي: الله يطول في أعماركم
الكل: آمين في طاعته
سامي: يلا قمنا
مهند: توكلنا على الله
قامو الثلاثه وعزوز معاهم
في وسط كلامهم.. فارس: مشتهي آيس كريم مين يبغا؟
سامي: مشكور مو مشتهي
مهند: ولا انا تسلم
فارس: الله يسلمكم .. وراح لمحل الآيسكريم وهما واقفين بعيد شويه يستنوه
(للتوضيح) = البنات دائما يكشفوا وجوههم وإذا غطوها اتلثموا يعني نص الوجه مكشوف..
في هذه الأثناء عند الحريم كلام في كلام عاد بالذات الحريم كلامهم ما يخلص. << خخخ
روضه: محتاره أشتري ذرة ولا آيسكريم
سمر: مايحتاج حيره محنا في باريس تاخذي لك شئ حار يادوبك مع الجو تاخذي لك آيسكريم
شهد: هههههههههههـ من جد
سهى: حتى أناا مشتهية آيسكريم فانيلا وشوكلاته
روضه: أوكي يلا تعالي معايا في أحد كمان يبغا؟
سمر وشهد: لا شكرا
نطت ليان: إلا أنا أبغا
مسكت يدها روضه: إنتي ياقموره تعالي طبعا
أم ماجد: لالا ليان ممنوع الآيسكريم حبيبي إنتي مزكمة
ليان زعلت: ليييه عادي
سهى جلست: خلاص حتى أنا ماابغا آيسكريم بس روضه لأنها كبيره ( وغمزت لروضه)
& طبعا روضه فهمت انو تروح تشتري الآيسكريم لها ولسهى بس بدون ماتشوف ليان
راحت روضه ووقفت عند المحل وكانت متلثمة لأنه مافي أحد معاها من البنات
روضه: أعطيني اثنين آيس كريم بالشوكلاته والفانيليا.
البائع: تيب
فارس كان واقف جمبها بس باين انها مانتبهت له قرر يضحك عليها
وهوا واقف قرب منها هيا حست وبدون ماتطالع فيه بعدت شويه لمن بعدت قرب منها مرره مسافة1 سم بينهم تقريا
روضه عصبت مرره ورفعت راسها: وجعع إنت ماتس
سكتت ماقدرت تكمل جملتها لأنها شافت فارس وهوا يضضحك وهنا جا البائع واعطى فارس الآيس كريم وراح فارس في وسط صدمة روضه ووسط ضحك فارس ’’’’
هيا كان نفسها تعطيه كف على الحركه الي سواها أخذت الايس كريمين ورجعت
جلست جمب امها وقالت لها في إذنها صوتها كان واضح انه فيها شئ كأنها تبغا تبكي: ماما ابغا ارجع البيت
أم ماجد وهيا مفجوعه على بنتها: بسم الله عليكي اشبك
روضه: مافيا شئ بس ابغا ارجع البيت حاسه بالم في راسي
ام ماجد: سلامتك تحتاجي نوديكي الدكتور؟
روضه: لا مايحتاج بس ابغا ارجع البيت
أم ماجد: خلاص دحين أتصل على أبوكي
بعد 10 دقائق تقريبا كانت روضه في سريرها تفكر في الموقف الي مع فارس: والله إنه مدري كيف يرضى يقرب مني لدي الدرجة حتى لو إني بنت عمه مهما كان لازم يكون بيننا حدود آآخ منه قهررني بالله أنا دحين ليش شاغلة فكري في واحد مايستحي؟ خليني أنام أحسن لي وراحت في سابع نومة
نبذه عن الأشخاص الي ذكرتهم
أبو فارس: أبو يعتمد على ولده فارس في أمور كثيره ويثق فيه ويحبه من قلبه يحسه ساعده الأيمن يهتم بعائلته.
أم فارس: تشبه لشخصية أم ماجد كثير، حنونه.
’.’.’.’.’.’.’.’.’.’.’.’.’.’.’.’

بداية يوم جديد... في الصبااح
كل واحد من الأفراد آباء و بنات وأولاد الي راح للمدرسه والي للجامعه والي راح لشغله اما الأمهات صلوا الفجر ورجعوا ناموا هما والصغار الي لسا في سن الحضانه *_* ...

طلع فارس لسيارته شغلها بضغطة الزر والمفتاح في جيبه قبل مايحرك السياره طلع جواله ودق على مهند
مهند: هلا والله صباح الخير
فارس: صباح النور والإحساس والطيبه
مهند: الله يديم الرواقة !!
فارس: ههههههه انا دحين في السياره رايح للجامعه امر عليك ولا لسا مو دحين تبدأ محاضرتك؟
مهند: الا بعد نص ساعه حتبدأ مسافة الطريق يعني
فارس: طيب يلا تراني في السياره بسرعه أنزل
مهند: اصلا انا جاهز،، استناك
فارس:أوكي مع السلامه
قفل من مهند وحرك السياره لبيت عمه القريب من بيتهم مافي دقيقه الا ومهند راكب جمبه
مهند: السلااام عليكم
فارس: اهلين وعليكم السلام
مهند: ياخي ابتسم رحب اكثر طول الوقت وانت ملامحك جديه
فارس: ههههههههههههههه اوكي.. ياهلا ومرحبا ومسهلا واهلين ومرحبتين و اش في كمان ولا كفايه؟
مهند: هههههههههههههههههههه ايوا كدا
هنا وقفوا عند الإشاره وكانت حمرا وقف جمبهم باص بنات في المتوسطه
البنات لما شافوا فارس بعضهم جوا عند الطاقه يأشروا له ويضحكوا .. فارس عجبه الوضع
شغل المسجل بصوت عالي وكانت أغنية نانسي إحساس جديد ... فتح الطاقه وجالس يغني مع نانسي بشفايفه ويأشر على البنات << من صباح الله هههه
البنات ساروا مبسوطيين واتجمعوا أكثر عند الطاقه بعضهم كاشفين وبعضهم مغطيين
مهند:هههههههههههههههههههه خف عليهم ترى مايصدقوا تعطيهم وجه بزران
فارس مطنش ويغني مع نانسي << مندمج خخخ
ولعت الإشاره خضرا فارس مشي طولي والباص لف يسار والبنات باين عليهم الحزن الي نزلت يدها بقهر والي تقول افف
مهند قفل المسجل: رجيتناا
فارس: ههههههههههههههههه قلت خليني اونسهم شويا مساكين حيروحوا للمدرسه والهم والنكد
مهند: لا ماشالله نيتك سليمه وماقصدك يعني تغازل ولا شئ
فارس يضحك: لالا أبدا .. ( رفع ظهره وعدل ياقته) بس بالله اش رايك؟ البنات بيتجننوا عليّ
مهند كأنه يكلم نفسه: مشكلة الوثوق بالنفس لدرجه عاليه مشكله كبييره
فارس: ههههههههههههه أمووت على الي يغاروو
’.’.’.’.’.’.’.’.’.’.’.’.’.’.’.’
سامي وسمر وسهى عندهم خاله (أم خالد) أبو خالد عنده خالد ورغد و مرام
نبذه عن الشخصيات الي ذكرتهم
أبو خالد: شخصيته انقياديه كأنه حرمه يعني مو رجال رجال تعتبر زوجته هيا ولية الأمر.
أم خالد: شخصيه متسلطه تأمر وتنهى شديده تعز (أختها) أم سامي كثير لانها تحس إنه طباعهم تتشابه بس بنتها رغد غير دلوعتها.
خالد:في عمر سامي 20 سنة ونفس القسم علوم ثاني سنه ولد يختلف عن عائلته حبوب وحلو وطيييب يحب يرمي الهموم وراه مايفكر إلا في الحاضر أعز أصحابه سامي ولد خالته،، خاطب بنت خالته سمر من فترة _ يعني حاجزها_.
رغد:عمرها 18 سنة ثالث ثنوي بنت دلوعة أمها ملامحها حلوه بس الي يزيدها جمال دلعها دائما الي في راسها يمشي،، مغرورة وماتعتبر من النوع الاجتماعي.
مرام:عمرها 16 سنة أولى ثنوي قد سهى بنت خالتها هيا وخالد متوافقين مع بعض دائما ملامحها مايله للجمال ومايعجبها دلع رغد أختها الزايد بس شعرها حلو اسود سواد الليل وطويل وناعم.
’.’.’.’.’.’.’.’.’.’.’.’.’.’.’.’
[ أبو ماجد+أبو فارس= أخوان ،،أم فارس+ أبو سامي = أخوان ،، أم سامي+ أم خالد = أخوات]
*يعني ماجد ومهند وروضه أولاد عم فارس وشهد وليان وعزوز
* فارس وشهد وليان وعزوز أولاد عمة سامي وسمر وسهى
* سامي وسمر وسهى أولاد خالة خالد ورغد ومرام

’.’.’.’.’.’.’.’.’.’.’.’.’.’.’.’

~خيآل الواقعْ ©؛°¨غرامي جديد¨°؛©

الجـــــــ الثالث ــــــــزء
في هذه الأثناء في الجامعه كانوا سامي وخالد مع بعض لأن عندهم بريك ومعاهم اصحابهم نادر وفهد ورامي (للتوضيح) = خالد وسامي قسم علوم جدولهم زي بعض//
سامي جلس على الكرسي بتعب ورمى كتبه على الطاولة: أوه بااقي آخر محاضرة ونخلص
خالد: يا شيبه لدي الدرجه تعبان ترى احنا علوم مو طب
نادر: ومين قال العلوم سهل إذا مايتعّب الجسم يتعّب العقل
سامي: تمام عليك عقلي مقفل مليان معلومات
رامي: يالله هونوها وتهون.. مين يجي معايا الكوفي نشتري شئ؟
فهد: أشتري لي معاك كراوسان وبيره
خالد: يلا أنا اجي معاك اشوف ايش اشتري في احد يبغا شئ غير فهد؟
سامي ونادر: لا شكرا
راحوا خالد ورامي للكوفي ....
فهد: أقول اش رايكم نروح المجمع نتمشى إذا رجعوا
نادر: نو بروبلم
سامي: طيب بس كلوا اول شئ ولازم نرجع بعد نص ساعه لأن محاضرتنا حتبدأ
فهد: يسير خير
بعد مارجعوا الشباب وأكلوا راحوا السوق وهناك دق جوال فهد
فهد بابتسامة: شباب عن إذنكم اتصال من وحده حلوه
نادر: يووه مابطلت من المكالمات!
فهد وهوا ماسك الجوال: ماأقدر أتخلى عنهم .. هلا حياتي
سامي بأسف: الله يهديه.
’.’.’.’.’.’.’.’.’.’.’.’.’.’.’.’
بعد الموقف الي سار بين فارس وروضه طبعا روضه زعلت منو كيف يقرب منها وقررت ماتسكت لو وتبين لو إنو هيا كبيره وفاهمه هيا في آخر سنه في المدرسه مو أول سنه
حاولت تفكر في شئ يقهروا بس ماحصلت لأنها ماتعرفو زي الناس مو دائما تشوفوا وبالتالي ماتعرف ايش الشئ الي ينقهر منو،، عشان كدا قالت خليني اتصل على شهد مبدئيا واواعدها اني اروح بيتها وهناك إذا شفته كان بهااا
اتصلت على شهد وقالت لها أوكي لأنو شهد جالسه في البيت طبيعي في وسط الأسبوع (( ملاحظه: احنا في الترم الثاني باقي شهر ويخلص ))
طلعت روضه لغرفتها ولبست تايير عادي وفتحت شعرها بعد مافرقتوا من النص وحطت على كل جمب توكه صغيره سار شكلها راايق ولززوز
نزلت لتحت ونادت ع السواق جاء فتح لها الباب ركبت السيارة وأول ماركبت اتصلت على شهد
روضه: ألو شهد
شهد: هلا رودي وينك؟
روضه: يلا أنا تحت البيت افتحيلي
شهد: أوكي بايوو
’.’.’.’.’.’.’.’.’.’.’.’.’.’.’.’
دق الجرس في بيت أبو فارس
ليان وعزوز جري على الباب وطبعا سبقوا شهد
فتحوه لقوا روضه
روضه: أهلييين كيفكم يا حلوين
ليان: وااو رودي
عزوز: وحثتيني
روضه: هههههه وإنتو أكثر والله
هنا جات شهد: هههههههههههه كيف الإستقبال بس
روضه: ولا فندق 5 نجوم ّّ
شهد: ههههههه إيوا والله تحمدي ربك ليان وعزوز يستقبلوكي
روضه: ههههه أكيد وأنا قلت شئ غلط
شهد: ماتقدري تقولي قلبك مايقوى..
روضه وهيا تبوسهم: وأنا اشهد
شهد: أمشي على الغرفه
روضه: لاخلينا نجلس في الصاله مافي أحد
شهد: إيوا والله صح ماما وبابا نايمين، لازم وقت العصر
روضه: ههههه نفس حالنا
راحوا جلسوا في الصاله
روضه: قرأت طريقة أكله لزييزه اليوم ناويه أعملها لكم
شهد: ايش المقادير
روضه: لا مقاديرها متوفره عندكم متأكده بس خليني أسويها وإذا عجبتكم أفكر أقول لك الطريقه ولا لا
شهد: يا لطييف ليش ماحتقوليها يعني
روضه بغرور: عشان كل ماتشتهيها تجي لعندي وأسويها لكي
شهد: هههههههههههههههههه طيب يلا أنا حطلع أستحم وإنتي سويها
روضه: طيب بس لاتطولي فاهمه؟
شهد: لالا 10 دقايق وأنا عندك إن شالله
روضه: إن شالله
طلعت شهد فوق وراحت روضه للمطبخ وليان وعزوز يلعبوا كل واحد بالقيم بوي حقه في غرفتهم

أول مادخلت روضه أخذت كاسه وصبت لها مويه جلست على الكرسي ولسا توها تبغا ترفع يدها عشان تشرب... دخل فارس للمطبخ وشكله اتفاجأ إنو روضه هنا .. أما روضه ارتبكت من زمان ماشافها وهيا كدا بطولها بدون عبايه ولاحاجه
فارس وهوا يحط مفاتيحه ومحفظته وجواله على الطاوله وبدون مايطل فيها: أوو روضه عندنا كيفك؟
روضه: الحمدالله (وباستغراب) مين روضه؟
فارس بعد ماصب له كاسة المويه وجلس قبالها طل فيها مباشرة: إنتي يعني مين
روضه نزلت عينها اتربكت من نظرته: أناا (وبدلعها) رودي
فارس سكت وبعد شويه: وين شهد،ليش جالسه في المطبخ لوحدك!؟
روضه وقفت وفتحت الثلاجه: شهد فوق في الحمام تستحم وأنا عندي أكله لزيزه حعملها
أخذت لبن زبادي و صكت الثلاجه لفت لقت فارس وراها مباشرة لو مارجعت لورى بسرعه كان صدمت فيه رفعت راسها وطلت فيه يعني خير؟
بس فارس مد يده وأخذ اللبن منها وفتح الثلاجه: لا دا خالي من الدسم (أخذ لبن تاني) خدي دا كامل الدسم
روضه(كأنها بدون نفس): إيوا صح
رجع فارس للطاوله وأخذ أشياؤه: يلا سلام أنا رايح لغرفتي ولا تنسي تذوقيني من أكلتك
سكتت ماحبت ترد عليه
خرج فارس من المطبخ وكملت أكلتها دخلتها الفرن ورجعت للصاله تستنى شهد وهيا في الصاله كانت تفكر: والله مدري إشبو دا الولد فارس يحسبني بيبي ولا ايش، ثاني مره يقرب مني أصلا خلاص لازم مايدخل إلا وأنا محجبه محنا صغار بدل ما يستحي على دمه ويخرج من المطبخ يتكلم عادي ولا كأني قدامه بنت بطولي أفف غبي وانا الأغبى وين خطتي اني أقهروا وأبين لو إنو مايسير الحركه الي سوااها .. صراحة لازم أعترف لنفسي ماأقدر أواجهو بدا الكلام في وجهو مستحيل مره ارتبك،، طيب كيييف؟
قطعت أفكارها شهد: سلملم
روضه طلت في شهد بسرعه كأنها مفجوعه وعلى طول اتداركت نفسها وطلت في ساعتها: هاذي 10 دقايق ماشالله !
شهد: ههههههاي نسيت أقول لك 10 دقايق + 5 دقايق
روضه: لاوالله؟ تنكتي إنتي ووجهك
شهد: أقول أخبار أكلتك؟
روضه وقفت: أوو ذكرتيني رايحه أشوفها
راحت وجات شهد معاها فتحت الفرن لقتها خلاص استوت طلعتها
شهد: إمممم ريحتها تفتح النفس
روضه: وطعمها أحلى
شهد: بسرعه أقطعي لي ماأقدر أتحمل
قطعوا لهم وصلتين وجلسوا ياكلوا
شهد: وااااو خطيييره والله يا روضه
روضه: من جد مرره لزيزه .. على فكره فارس قال يبغا يذوقها
شهد باستغراب: فارس في البيت؟
روضه: إيوا جا لمن كنتي في الحمام
شهد: غريبه .. يلا أقطعي له (وبصوت عالي) فاااارس لياااان عزووووز
ليان وعزوز: هااا
شهد: تعالوا وعلى طريقكم جيبوا فارس معاكم
روضه: لااا خلينا أحسن نودي لفارس صحنه بلاش هوا يجي
شهد بتطنيش: لااا خليه يجي بنفسه
دقيقه وكانوا الثلاثه في المطبخ
فارس: وااو الريحه تجنن
ليان وعزوز: نبغا
قطعت لهم روضه بس جلست تطل في ليان وعزوز تبغا رأيهم
فارس: تسلم يدك والله
روضه: الله يسلمك.. وإنتو ليان وعزوز كيف؟
عزوز: مره طعمه إنتي سويتيها ولا من مطعم؟
فارس يستهبل: أكيد من مطعم
شهد تكلم روضه: موو أقول لك دي الأشكال ماتقدر الشيفات
روضه في البدايه مافهمت لشيفات بس اول ماحللتها وفهمتها: ههههههههه شيفات حراام عليكي ترى أكره الطبخ
ليان: لالالا حلوو طبخك
عزوز: أصلن كنت عارف إنو رودي ثوتو
فارس ضربوا على راسو من ورا بشويش: أجل ليش تسأل .. (وقف): يلا أنا خارج (طل في روضه) تسلم يدك
روضه بابتسامه حلوه:بالعافيه

وأول ماخرج
روضه: أفف منك طيب إذا مادخلتك على مهند
شهد: لاياشيخه دحين زعلانه هاا ترى حافظ شكلك
روضه قامت: ماينفع معاكي الكلام
’.’.’.’.’.’.’.’.’.’.’.’.’.’.’.’
كانت سمر جالسه في غرفتها تحاول تقرأ لها كلمتين من الكتاب بكره عندها اختبار وخصوصا انهم في ثالث ثنوي يعني يحاولوا يجيبوا نسبة حلوه ع الأقل التتقدير ممتاز
سمعت بابها يندق وهيا منسدحه في السرير: اتفضل
دخلت أمها: سمر ايش تسوي؟
سمر جلست ع السرير ومستغربه ايش تبغا امها منها .. رفعت لها الكتاب الي في يدها: أذاكر
أم سامي: طيب كويس اتجهزي بعد المغرب رايحين بيت ستك وحيجوا بيت خالتك ( أم خالد)
سمر عارفه إنو دا مجرد خبر مافي مجال للمناقشه: طيب
خرجت أم سامي ورجعت سمر لوضعها السابق انسدحت وهيا تفكر: حتجي رغد يعني .. فجأه حست قلبها وقف .. ويمكن خالد الي هوا خطيبي يجي امم على حسب سامي بس مااتوقع انهم يجلسوا في بيت ستوو آآآه يا خلوودي وحشتني من زمان ماشفتك والله عارفه إنك تفكر فيا و تحبني ترى الي بيننا شعووور متبادل ....
حست انها موو مع الكتاب تفكيرها مع خاالد زوجها المستقبلي الكل عارف دا الشئ رمت الكتاب ودخلت الحمام تستحم وتتكشخ يمكن تقابلوا صدفه مابقي ع المغرب غير ساع هالا ربع

في غرفة سهى أختها ماسكة جوالها وتكلم بنت خالتها مرام
سهى: هههههههههـ أقول لك ترى بعد ساعة تقريبا حنتقابل في بيت ستو خلينا نقفل ونروح نلبس
مرام: خخخخ من جد الله يعينني على مقابلة وجهك
سهى: هاهاها تتمني انتي اعطيكي وجه اصلا.. على فكرة أختك رغد دلوعة الماما جاية؟
مرام: أفف منها أكيد وهيا تقدر تفوت زيارة لبيت ستو
سهى: الحمدالله انك انتي الي قدي مو هيا والله يعين سمووره عليها
مرام: من جد أجل اش تقولي علي انا معايا 24 ساعه
سهى: بس بس لاتبكي يلا أشوفك هناك باااي
مرام: بااي

بعـــد المغرب كانوا بيت أبو سامي في بيت ستهم (سيدهم متوفي عشان كدا يسموه بيت ستو) أما بيت أبو خالد لسا ماوصلوا
ستهم "علية" من النوع الي تميز أحد من أحفادها وتفضله ع الكل والحفيده هيا ..||| سمـــر |||..
ستهم علية: كيف حالك يابنتي سمر ؟؟ تعالي اجلسي جمبي فقدتك
سمر وهيا مبتسمة راحتوجلست جمبها: والله حتى انتي ياستو وحشتيني كيف صحتك؟
ستهم علية: الله يخليكي ليا.. إلا كيف حال زوجك خالد
هنا سمر وجهها سار طمااطم ومااعرفت بإيش ترد
أم سامي: أمي الله يهديكي سمر لسا مااتزوجتوو بس خطووبه
ستهم علية: طيب خطوبه يعني خلاص زوجها المهم الله يوفقهم
سهى ضحكت وكملت مع ستها: آمين
سمر طلت في سهى نظره يعني أنا أوريكي مزح طبعا
وهنا دخلوا عليهم أم خالد ورغد ومرام
أم خالد: السلااام عليكم
أم سامي: يا هلا يا هلا تو مانورت الفيلا
مرام تقرص سهى: كيفك يا وحشه؟
سهى: أح أحد يسلم كدا
مرام : يااي يارقيقه.. (تسلم على سمر) أهلن أهلن .. وبصوت واطي.. يا مرت أخويا
سمر انحرجت زياده: إيييـ بايخة
مرام: هههههههه ياحليلك انحرجتي
رغد تسلم على سمر بعد ماسلمت على سهى من أطراف أصابعها: كيفك
سمر ايتسمت: بخير
بعد ماجلسوا كلهم طبعا أم خالد وأم سامي مع بعض في الزاويه متكين وماخذين راحتهم في الكلام عن الناس وخصوصا الحريم و البنات أهم الأخبار عندهم ..
أما سهى ومرام مبسوطيين مع بعض يتكلموا ويتحكوا ويرسلوا لبعض بلوتوث في الجوال
رغد وسمر جالسين شويه بعيدين عن بعض
رغد: تعالي سمر ليش جالسة بعيد
سمر ماحبت تطولها صح انو هيا جايه قبل بس قالت مافيها شئ عادي وراحت جلست جمبها: كيفك؟
رغد بدلع: كويسه
سمرابتسمت: الحمدالله
رغد: امم حلوه قصتك وصبغتك متى سويتيهم ماشالله؟
سمر: تسلمي.. سويتهم قبل أسبوعين تقريبا تغيير
رغد: آهاا لأنو حتى أنا أفكر أقص وأصبغ
سمر: روحي لمشغل (..........) خطير في الشعر << ماأسوي دعايات هههههـ
رغد: إيوا أعرفوا حتى صحبتي نصحتني فيه ،، سكتت شويه بعدين قالت كأنها اتذكرت.. إيوا صح نسيت أقول لك
سمر: إيـش
رغد: خالد يسلم عليكي
سمر اررتبكت خصوصا إنو الي يبلغها السلام رغد وهما مابينهم شئ: الله يسلمك
’.’.’.’.’.’.’.’.’.’.’.’.’.’.’.’

آلشقرآ .~ ©؛°¨غرامي ذهبي¨°؛©

.,

ياهلا والله وغلا
يعطيك العافيه
بالتوفيق


~خيآل الواقعْ ©؛°¨غرامي جديد¨°؛©

هلا بيكي آلشقرآ .~ منوورة ^_^

~خيآل الواقعْ ©؛°¨غرامي جديد¨°؛©

الجـــــــ الرابع ــــــــزء

اليوم الثاني في المدرسة (للتوضيح: روضة وشهد وسمر في نفس المدرسة )
كانوا الثلاثي جالسين ع العشب وقت الفسحة لوحدهم مو مع شلتهم
روضة: عاارفين يا بنات باقي تقريبا 3 أسابيع ويومين ونتخرج من المدرسه كلها هههههه
سمر: اللله متى يجي آخر يوم بس أهم أيام دي الأيام
شهد: طبعا أيام المراجعه يعني حنحضر أتوقع ألين يوم الأحد الجاي وبعدها نغيب ونبدأ نذاكر للاختبارات النهائية
سمر: آآه الله يعيننا مع النظام التراكمي دا
روضه: من جـد مدري اش فايدتو
شهد: إنو ينزل درجاتنا بس !
سمر: خخخخ فائده خطييره
دق الجرس معلنًا نهاية الفسحة
روضة: لااا ياخسارة
شهد وسمر وقفوا و مسكوا يد يعض << يعني لأنهم في فصل واحد يبغوا يقهروا روضه
روضه: ههههههه عادي حروح لناديه وأمسك يدها
شهد وسمر: هههههههههه
سمر: لالا ولو مانقدر نزعل الأموره روودي
روضه تسوي نفسها زعلانه: بعد ايش؟
شهد: خلاص ايش الي يرضيكي؟
روضه تفكر: اممم لقيتهااا
سمر وشهد: ايش؟
روضه: إنك تخليني أقرأ مفكرتك الي تكتبي فيها الي تحسيه في قلبك يا شهد
شهد: احلفي. ماقيتي غير دا أجل خليكي زعلانة أحسن ،، وراحت عنهم
روضة وسمر طلوا في بعض وهما مستغربين مااتوقعوها حتزعل!!
’.’.’.’.’.’.’.’.’.’.’.’.’.’.’.’
طبـعا الشباب يختبروا الإختبارات النهائية قبل المدارس فكانت دي الفتره هيا أيام إختباراتهم .. خلونا نشوف أحوالهم ونبدأ بـ سامي وخالد بما إنهم في نفس القسم.. طبعا هما آخر سنة لهم ويتخرجوا لأنو العلوم 4 سنين عشان كدا شادين حيلهم يبغوا وظائف
في بيت سامي كانو مجتمعين ويذاكروا مع بعض اختبارهم الي بعد بكره
خالد: أفف تعبت الماده هذي بالذات خايف منها
سامي يشجعوا: أبو سلمان استهدي بالله انا عارف انو الماده صعبه بس انا وانت كملنا اوراقنا يعني ان شالله نجيب نتيجه حلوه
خالد: إيش رايك ناخذ استراحة
سامي: هههههههه ماشاالهت استراحاتنا اكثر من مذاركتنا
خالد: ههههههه اصلا الاختبار بعد بكره
سامي: بس باقي لنا يومين ونأجز آآه ونرتاح من الهم
خالد: يلا قوم شوف لنا طريق ولا ترى أتصل على سمووره أقول لها سوي لنا كابتشينوا من إيدك
سامي يقاطعوا بمخده على وجهوا: أشوفك صدقت تراها أختي
خالد: ههههههههـ عاارف
سامي: أستنى شويه أروح أشوف وينهم

خرج سامي للصاله بس ماقى أحد: أكيد إنو كل واحد في غرفتو
دخل مره ثانيه عند خالد في الصالون: اتفضل يا سي خالد خلينا نخرج للحديقه نغير جو
خالد: يلا
خرجوا برا وجالسين يمشوا في الحديقه
خالد: ممكن كاسة مويه
سامي: أحلى يالأدب .. لو إني حتى أنا مو عطشان كان قلت لك دقها كعابي على أقرب سوبر ماركت
خالد: ههههههـ أعرفك وأعرف معدنك الطيب
سامي طنشه ودخل البيت وأول مامشي أول خطوه شاف قفا بنت جالسه ع الكنبة وفاتحه شعرها الي يوصل لنص ضهرها
طبعا هيا أول ماسمعت الباب لفت وجهها واتفاجئت بسامي الي كان وااقف مكانه موو مصدق
في دي اللحظه دخلت سمر : شهد .. سكتت لما شافت سامي.. ساامي!!! ايش تسوي واقف؟
سامي يجاوب على سؤالها وعينه على شهد: أبغا كاستين مويه
سمر: طيب طيب انت اخرج وانا اجيب لك هيا
سامي بسرعه: لالا لاتخرجي في خالد برا
سمر بلعت ريقها: أوكي حدق الباب حق الحديقه
سامي: طيب
وخرج أخيرا
شهد اتنفست بقوة وغمضت عينها
سمر: ههههههههه الي يشوفك يقول شفتي وحش موو إنسان
شهد: أخوكي ما بغاا يخرج
سمر تغمز: موو قادر يقاوم الجمال
شهد سكتت وطلت في الأرض ححست إنها اشتاقت له وانو بس بشوفته قبل شويه رجع لها ذكرياتها معاه
سمر: شهد ويينك
شهد رفعت راسها: هناا يعني وين
سمر: صدقتك .. اسمعي انا رايحه اجيب لهم كاسة الموية وانتي حاولي تكتبي المعادلات الصعبة في ورقة
شهد بهدوء: طيب
’.’.’.’.’.’.’.’.’.’.’.’.’.’.’.’
أما بالنسبة لفارس كان جالس في غرفتو على الطاولة ومشغل الأبجورة على الورقة الي جالس يرسم عليها تصميم بيت والطاولة كلها مراسيم بمقاييس مختلفة ومسطرة ومثلث هندسه حجم كبير يعني الي يشوفوا يعرف انو مهندس
سمع الباب يندق قال بصوت واطي: اتفضل
بس شكلوا الي برا ماسمعوا فاندق الباب مره ثانية وطلع صوت امو: فاارس موجود
فارس قام من الكرسي وفتح الباب: إيوا موجود
أم فارس: ها كيف المذاكره\
فارس: أحتاج دعواتك بكره عندي كويز
أم فارس: والله اني ادعي لك الله يوفقك .. مدت يدها واعطتوا الصحن الي فيه أكل .. لازم تاكل
فارس: الله يخليكي لنا .. ابتسم.. مدري مين حيهتم فيني لو جاتني البعثة
أم فارس: لالا بلا بعثه بلا سفر أجلس عندي وكمل دراستك هنا
فارس وهوا يحط الصحن على الطاولة: انتي عارفة اني ان شالله لو سافرت ماحطول سنتين او سنة وومكن اقل 6 شهور بس
أم فارس: مااقول غير الله يهديك ويختار لك الي فيه خير
فارس: آآمين
’.’.’.’.’.’.’.’.’.’.’.’.’.’.’.’
طبعا مهند اختباراتوا فيها تجارب عملية غير الأقسام الثانية لأنو طب
كان في الجامعه وبالتحديد في المعمل الي فيه اختلاط بنات وأولاد بس الي مريحوا إنو صاحبو رائد معاه من المتوسط وبحوثاتهم دائما مع بعض
،، كانت في وحده لبنانيه اسمها ناهد فيها جمال متعوده إنو الكل يعجب فيها بس حست إنه مهند مو معطيها وجه مره حتى رائد صاحبو ممكن ياخذ ويعطي معاها شوية فقررت إنها هيا الي تتقرب منه
مهند: رائد معاك قلم؟
رائد جالس يدور في جيبه بس
ناهد بابتسامه: اتفزل دكتور مهند
مهند أخذه منها: شكرا
كمل شغله عادي
ناهد: أنا حعمل لي نسكافيه حدا بدو اعمل لو معايا؟
وحده من البنات: إيوا انا لو سمحتي ناهد
ناهد: وإنت دكتور مهند؟
مهند استغرب من بين كل الطلاب تناديه هوا بالذات بس ماحب يكسفها قال لها : لو سمحتي
ناهد: من عيوني
مهند كان مستغرب بس قال أنا دخلت خلاص هذا القسم وكنت عارف إني حختلط مع بنات لازم اتعود وأخلي الوضع طبيعي،،
جات ناهد ومعاها كوبين نسكافيه راحت أعطت للبنت وبعدين راحت لمهند
ناهد وهيا تمد يدها: إن شالله بيعجبك
مهند مبتسم: اكيد تسلمي
ناهد ترد ابتسامته: ولو الله يسلمك
’.’.’.’.’.’.’.’.’.’.’.’.’.’.’.’
يوم جديد.. الساعه 12 ليلة السبت وليلة أول يوم في الإختبارات النهائية للمدارس كانت رغد فاتحة الماسنجر حقها تكلم صحبتها نهى

رغد(₪,,دلوعة أمهاا,,₪) .. نهى (ஐღ ღفقدتك ياأعـــز الناس ஐღ ღ)
(للتوضيح)= رغد ونهى اتعرفوا على بعض في معهد للغة الانجليزية وساروا مره صحبات << وحنعرف السبب لأنو رغد مغروره وماهي اجتماعية
ஐღ ღفقدتك ياأعـــز الناس ஐღ ღ:
أهلييييييين نووور المسن والله
₪,,دلوعة أمهاا,,₪):
بوجودك
ஐღ ღفقدتك ياأعـــز الناس ஐღ ღ:
كيفك ياقمر؟
₪,,دلوعة أمهاا,,₪):
تمام ماشي الحال .. وإنتي أخبارك؟
ஐღ ღفقدتك ياأعـــز الناس ஐღ ღ:
بخير بشوفتك
₪,,دلوعة أمهاا,,₪):
تسلمي .. ايوا مين الي فقدتيه
ஐღ ღفقدتك ياأعـــز الناس ஐღ ღ:
أكييد انتي فقدتك من جد (وجه مخنوق العبره)
₪,,دلوعة أمهاا,,₪):
(وجه مكسوف) تسلمي ياقلبي حتى أناا
ஐღ ღفقدتك ياأعـــز الناس ஐღ ღ:
الله يسلمك .. وإن شالله بس السنة تخلص نتقابل
وجلسوا يتكلموا الين الساعه تقريبا 3

نبذه عن الأشخاص الي ذكرتهم
رهف: صحبة سهى في المدرسة عمرها 16 رهف بنت ملامحها ناعمه و فيها جاذبيه في حركاتها وكلامها تحبب الي حولها فيها أعز صحباتها سهى ومرام هوايتها الطبخ وشغل البيت أخت رائد.
نهى:عمرها 19 هيا بنت بس حركاتها وكلامها يشبه الأولاد وحتى شعرها قصير أعز صحباتها وأحبهم رغد لأنها تحس فيها الصفات الي ناقصتها الدلع والأنوثه ولمن كانوا يمشوا مع بعض في المركز كان شكلهم غلط . << عرفتوا السبب طبعا

’.’.’.’.’.’.’.’.’.’.’.’.’.’.’.’

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1