منتديات غرام منتديات إدارية - يُمنع طرح اقتراحات ارشيف غرام رواية أخاف بيوم تغيب شمسك عن دنيتي / للكاتبة مذهلة زمانها
احسآس طفلة ©؛°¨غرامي جديد¨°؛©

السلام عليكم
اخباركوووووووم كلكووووم
انشاء الله بخيييير
بنقل لكم رواية حلووووه
ابي منكم تشجيع في اول موضوع لي
وبنقلهاا لكم نصاً بكلام الكاتبة وبيصير نقل الرواية بالخط الأسود وتعليقاتي المضافه إليها بلون مخالف
يالله نبدأ والله الله بالتشجييييييييييييييييييعااات
وعاد اني اعرفكووووم اعضاء غرام كريمين في الردود
تفضلووووو بعد
بسم الله الرحمن الرحيم





رواية أخاف بيوم تغيب شمسك عن دنيتي .. بقلمي
الكاتبة((خيالة متلثمة بشماغ عاشقها))((مذهله زمانها))


اتمنى تنال على أعجابكم وإنشالله تكون مشوقة..







البارت الأول..
دق الجوال بصوت هادي .. ياحلوة المزايين اصحي وانتي في عز الرقادِ .. طل الصباح وهاجرت نجوم الليالي.. انهضي باالله وشوفي من جاك ينادي .. واقري من عيوني كلامي وردي على سؤالي.. مسكت الجوال وهي نعسانة وفي راسها النوم ماودها تقوم ولغت المنبه..قعدت ونفضت شعرها وهي مو قادرة تفتح عينها من النعس ..ردت حطت راسها على المخدة وغمضت عينها لكن تذكرت إن وراها اختبار وعلى طول قامت .. دخلت تاخد دوش وطلعت نشفت شعرها ولبست المريول وفتحت الكبت محتارة وش تلبس على المريول>>لأن الجو كان برد
وآخيراً قررت تلبس صخمة جلد وردية وفيها قبعة وتحتها بلوزة بيضة كم .. وكان اللبس مرة حلو على جسمها الرشيق .. ولبست لفاف وردي وكبوس وردي وصارت كنها أمريكيا من جمالها..
نزلت تحت وكان أخوها فهد قاعد :: صح النوم يالبطة
مايا: يااي أنا بطة أجل إنت شنو ؟؟
فهد: أنا ولاشي من أنواع الحيوانات
مايا: آها يعني إنت أكيد من أنواع الجماد
فهد يقهر مايا: جماد ولاحيوان
مايا: مالت عليك
فهد: الله على الي ماعندهم كلام يردون
مايا ترمي عليه المخدة: لا احلف أنا لو أبي أرد كان رديت
فهد: طيب من مسكك وقالك لاتردي ياالله ردي
مايا: مزاجي ماابي أرد ألحين
فهد: تبي تجهز كلام ههآآي
مايا عصبت: أنا ماأتابعك لأن مالي خلقك
فهد يقلد عليها: ياااي
مايا: لااا يعيني أبد مايليق
فهد: بس عليك يليق
مايا بدلع: تبعاً
فهد يصخر: تبعاً لأي دولة ههآآي
مايا: يالخبل يعني طبعاً
فهد: تفكريني مهستر مثلك ولا ماأفهم سوالف الدلع حقكم
مايا: ظنيتك بهيم
فهد: وأنا ظنيتك صخلة..
وتقطع عليهم أمهم: شصاير فزعتونا عاد من الصبح
مايا: هو إلي بدا
فهد: صحيح يابريئة
الأم: والله كنكم أطفال ههههههه
مايا: فهيد اعقل
فهد: ليه أنا مجنون
مايا: اعتقد
فهد: كل من يرا العاقل بعين طبعه
مايا: يما يما شوفيه يعني قصده إني مجنونة
فهد: بل والله وطلع عندك حاسة والتي هم بالإشارة يفهمون
أم خالد: ههههههههههه خلاص مايا حبيبتي روحي مدرستك قبل لايخترع لك حاسة جديدة
فهد : خلاص ولاتزعلين انتي ميوشة القمر >>يقص على مين
مايا: اي قص علي بكم كلمة
فهد: شدعوة انتي اختي الغالية>>كثر منها يشيخ
مايا: ادري اني اختك الغالية وانك تمزح معي بس انت ماتدري انك غالي عندي واحبك
فهد: طبعاً أدري ياالله لاتتأخرين عالمدرسة>>انصح نفسك أول
مايا: أوكي .. وسلمت على أمها وطلعت ..
فهد: أنا ألحين بروح أخد دوش وأروح أتونس مع الربع ونسحب عالجامعة اليوم بعد
أم خالد: اي وشنو بعد كمل
فهد نسي ان امه موجودة ولف وشافها وقام يحك راسه: ها>>تو الناس
أم خالد: لمتى بتعقل عن اهمالك للدراسة يفهيد
فهد(وليه محاضرة من الصبح هذي تغني عن محاضرة الجامعة خخخ): انشاالله يما بحاول أبرمج عقلي عالجامعة >>والله كمبيوتر .. ياالله عن أذنك..
وراح فهد لدورة المياه(كرمكم الله)
أم خالد: الله يهديك بس يدلوع أمك مشكلتي مااقدر اقول لأبوك ويعصب عليك
نزل بو خالد وولده خالد وهم متجهزين بيروحون العمل
بو خالد: السلام عليكم
أم خالد: وعليكم السلام
خالد وهو يبوس راس أمه: شلونك يما؟؟
أم خالد: هلا يما
بوخالد : وينه داهية البيت؟؟
أم خالد: منو؟؟
بو خالد: من غيره فهيد
أم خالد: في دورة المياه يتروش
بو خالد: وعاد هو لما يدخل يتروش يقعد مليون ساعة كنه صار له سنة ماتروش
أم خالد: بعد تعرف يبو خالد الشباب كلهم كذا>>دوم تدافع عنه
بو خالد: اي بس هذا يأخره عن الجامعة
خالد: عادي عنده يتأخر أصلاً هو متى راح بدري
أم خالد: خلاص يبو خالد انتو روحو لاتتأخرو عالدوام
بو خالد: ولدك ذا بيجنني
خالد: ماعليك يبا مصيره بيعقل
أم خالد: مثل ماقال خالد مصيره بيعقل
بو خالد: ياالله يخالد تأخرنا . مع السلامة يأم خالد
أم خالد: في حفظ الباري
طلع بو خالد وخالد من البيت..
أم خالد: شسوي فيك يفهيد ..
راحت أم خالد تغسل يدها صوب دورة المياه وهي تسمع صوت فهد يغني وبكل برود..
من الي حط هالفكره في بالك
يا روحي لا يصور لك خيالك
لاني اقدر انسى الحب وابعد
وربي هو الذي خالقني ما اقدر..
ترررا ترررا...
أم خالد: والله إنه فاضي يذبحني بروده
فهد يفتح الباب ويلاقي أمه قدامه: أحم أحم أكيد أعجبتي بصوتي وجيتي تسمعي تتخيلي نفسك داخلة حفلة ..
أم خالد: يبرودة أعصابك
فهد: بس أنا ماحطيتها بالثلاجة>>عصير مو أعصاب
أم خالد: بايخ
فهد: ههآآآي مقبولة منك يالغالية
ومشا ببرود وهو يكمل الأغنية..
حبيبي يا حبيبي





حياتي يا حياتي




حبيبي يا حياتي


أم خالد: والله ماني بقادرة عليك يفهيد شسوي معاك..
فهد بداره قاعد يلبس ويتكشخ وعبا نفسه بالعطر من فوق لتحت ولبس نظارته وأخد كتبه ونزل..
فهد: ها يما تبين شي؟؟
أم خالد: على وين؟؟
فهد: الجامعة
أم خالد: لايكون الشاليه تحول لجامعة وأنا مدري
فهد: واااو شحلاتها أمي وهي تنكت
أم خالد: اخلص وين رايح؟؟
فهد: رايح الجامعة ياالله سلام
وطلع فهد من البيت..
.................................................. ............................................
في المدرسة البنات قاعدين في الفصل يحلون مسألة التطبيق للرياضيات ..
سناء: ميوش قولي شنو الحل؟؟
مايا: اصبري خليني أكمل وأقولك
سناء: ياالله لاتطولي
المعلمة: سناء حلي
سناء: كاني أحل
المعلمة: ليه تكلمين زميلتك؟؟
سناء: أبي قلم رصاص>>رصاص ولا قنابل خخخ
المعلمة: طيب ياالله حلي ووريني
سناء: طيب..
مايا: ياالله شوفي بسرعة
سناء قاعدة تنقش الحل من مايا..
سارة: سنوأ حلي بروحك ولا ماراح تفهمي الدرس
سناء: أنا ألحين أحلها من ميوش وفي البيت أفهم ماعليك
المعلمة: سناء أنا شقلت
سناء: لا بس كنت محتاجة شغلة..
مايا: أبلة خلصت
جت المعلمة تشوف حل مايا : ممتازة يمايا هذا دليل على إنك كنتي مركزة معي
سناء: أبلة حتى أنا خلصت
جت المعلمة وخدت دفتر سناء تشوف الحل: حلو يسناء ماخليتي شي من دفتر مايا مانقشتيه حتى الضرب الجانبي سويتيه مثلها
مايا بصوت واطي تكلم فرح: هههههههه الخبلة حتى الضرب الجانبي الي سويته عشان اتأكد كتبته
فرح: طول عمرها مفهية أكيد مانامت وسهرانة على فلم كالعادة
سناء: لالا أبلة هذا حلي
المعلمة: سناء آخر مرة تغشين من غيرك فاهمة
سناء: أبلة أنا ماغشيت هذا أنا حليته بقلمي الرصاص
المعلمة: ليش انا سألتك بشنو حليتي
سناء: ولا حطيت ليه دوف 1 في 3
البنات: هههههههههههههههه
المعلمة: وش جيب دوف في الموضوع
سناء: ها لا بس تخيلته قدامي
سارة وسمر: ههههههه البنت هسترت فيها النوم
المعلمة: سناء هالمرة نامي زين
سناء: لاتوصي حريص تراني نايمة من الساعة فمان للساعة فلاف>>تفلت صواريخ
مايا:فمان وفلاف بعد ههههههه هزلت هذا اثبات خروج العقل من الراس
الكل: هههههههههههه
ضحكت المعلمة ورجعت تحل المسألة مع الطالبات..
.................................................. ..............................
في بيت أبو سيف ..
لمياء قاعدة تشاهد تلفزيون وتفرفر في هالمحطات مو ملاقية شي تندمج معاه.. بالآخير رمت الريموت عالأرض وقامت راحت دارها..
قعدت على فراشها تصفح مجلة وهي تحس بالملل
قامت وراحت دار ختها رهف وكانت رهف نايمة .. قعدت لمياء على سرير رهف وشالت عنها البطانية: رهفووو قومي
رهف بصوت نزيييل مغطيه النوم: خييييير جيبي بطانيتي ياأذبحك
لمياء: رهفوو قومي قعدي معي مليييت
رهف: وأنا ماغبت عن المدرسة عشان أقعد معك يالمتفرغة خليني أكمل شغلي
لمياء جتها ضحكة بس مسكتها: أي شغل يالخبلة..
رهف: قطعتي علي مشوار حلمتي مع وجهك وأنا غايبة عن المدرسة بس عشان أكملها اليوم لأني زهقت كل يوم أكمل فيها
لمياء بصوت عالي: ههآآآآي هذي مو حلمة أكيد رواية هههههه
رهف ترمي المخدة على لمياء: انتي ماتفهمين روحي ياالله برا على دارك لو سمحتي
لمياء: طيحتي وجهي الله يغربلك
رهف: مو مشكلة شيليه وهالمرة ركبي له مسامير زين عشان مايطيح مرة ثانية
لمياء: خخخخخخخ
رهف: غاصة بعظم عما بعينك
لمياء ترمي عليها البطانية: صحيح مامنك فايدة
قامت لمياء طلعت من غرفة رهف..
رهف رجعت حطت راسها عالمخدة وحظنت بطانيتها: وعدت إليك من جديد ياعالم أحلامي بعد أن قطعت علي المشوار خبلة المنزلٍ>>أحلى يالأشعار إلي كذا.. لمياء وهي تدور في البيت: يحظك يرهفو مدري شلون تنامين كثيير وأنا ساعتين بالكثير ساعة وأقعد ولا دراسة ولا شغل ولا شي شسوي بحياتي ياربي حتى النت مالي خلق أفتحه ..
جت الخدامة : لمياء هذا رهف متى يقعد من نوم عسان أنا يرتب غرفة وفي خلاس وأنا بعد يبغى راحة سوية مو بس رهف حتى أنا يبغى نوم مو بس رهف
لمياء: رتبي دارها لما تقعد من النوم طيب
الخدامة: كيف هي ألحين نايم ومن سوي جت نبهت أنا من نوم عسان رتب غرفة
لمياء وهي تضحك: على ماأظن إنها مرت عليك وهي في مشوار أحلامها
الخدامة: أسو أنا مايفهم إنتي سيقول
لمياء: ولا راح تفهمي ياالله روحي رتبي البيت لين ماتقعد رهيف ورتبي غرفتها
الخدام تتحيطم: إنالله ياربي هذا بيت كلو مجنون
ومشت الخدامة..
لمياء: أي والله هذا بيت كلو مجنون بس انتي عاقل ههههه
آخيراً قررت لمياء إنها تفتح لابتبها وتكتب خاطرة جديدة وتحطها بالنت..
.................................................. ............................
فهد مع ربعه بالشاليه عافسين الدنيا والشباب اذا اجتمعو تطلع منهم مصايب ..
دق جوال مهند..
فهد: أقول ياشباب اجتمعو هذي معجبة هههههه
مهند: صبرو شوي بحطه سبيكر..
البنت بمياعة: ألوو
مهند يقلد عليها: ألوو مين معاي؟؟>>يتميع بعد
البنت: يااي تقلد علي بموت أنا
مهند بنفس صوتها: موتي مين ماسكك
البنت: ياربي شدعوة جامل شوي
مهند: ياويلي مشكلتي صريح مرة
البنت: آه ياقلبي تخقق
مهند: صحيح توني أدري
البنت: مهند أنا أحبك
مهند يقلد صوتها بمصخرة: واااي لالاتكفين استحي
البنت: لاتصخر تكلم معي جد
مهند: لا بس شرقت شوي لأنك أخجلتي تواضعي واحمر وجهي..
سيف يهمس لفهد: انعل شكله مهندو لاعبها صح هههههه
البنت: أنا إلي مو مصدقة عمري اني قاعدة أكلمك الحين
مهند بمياعة يقلدها: خلاص بغطي وجهي أنا مقدر عالغزل
البنت: مهند كلمني جد
مهند: أقول اخلصي علي شتبين؟؟
البنت: شدعوة عطينا وجه شوي
مهند: غصب هي وجهي حلالي مابي أعطيه أحد
فهد: طيب سلف ههآآآي
البنت: معك أحد؟؟؟
مهند: لا
البنت: أجل مين ذا؟؟
مهند: الجني حقي ياالله ظفي وجهك وانسي هالرقم
البنت: يامهند ارحمني
مهند:لا طيحتي دموعي كافي .. ياالله الحقي أمك
وصك التيلفون..
سيف: والله أنك مو هين يمهندو لعبتها صح هههههههه
مهند: أنا أصلاً ماارد عليهم بس اليوم مزاجي رايق قلت أتسلى
فهد: بس انعل شكلك في النهاية حطمت نفسيتها
مهند: يامكثر العمال خلها تدور لها واحد يبنيها
الجميع: هههههههههه
سيف: أقول مهندو عطني وحدة من الي يدقون عليك أنا مايدقون علي
مهند: سوي لك عملية تجميل ويدقون عليك
سيف: اعقل لاتعيب على شكلي تراني مو كديش مرة
فهد: شكله مقبول يعني>>مقبول ولا جيد خخخ
مهند: خلاص امسك هذا رقم وحدة كل تدق علي ومااعطيها وجه دق عليها من جوالك شوف يمكن يكون لك بالطيب نصيب
أخد سيف الرقم وعلى طول دق ..
سيف: ألوووو
البنت: خير شبغيت
سيف يهمس لفهد: قولي شقول ؟؟
فهد: قولها كيفك قلبي؟؟
سيف: وآآل هذا كلام أنا أخاف أقوله
فهد: ليه تخاف؟؟
سيف: أحسها من اختراعك
مهند: ههههههههه اخلص البنت تنتظر
سيف: كيفك قلبي؟؟
البنت: ومن متى صرت قلبك عسا قلبك العما قول آمين
سيف: لاتعصبين علي بعدين العين إلي تعمى مو القلب
البنت: شكلك واحد من هالمهابيل الي بالشوارع
سيف: أي لكن أنا بالشاليه مع الربع
البنت: انقلع
سيف: على وين أنقلع في مية مكان قدامي>>يتعيبط بعد انعل شكله
توت توت صكت البنت التيلفون..
سيف: بل صكتها بوجهي..
مهند: ههآآي انعل شكلك وانت تتعيبط عليها
سيف: شدراني أول مرة أكلم بنات أحس الكلام يطلع من بلعومي
فهد: اقعد مع فوفو ويعرفك على خت لصخلة الي عنده ههههههههههه
مهند: على طاري فوفو ماتدرون عنه شمسوي مع الشوكلاتة حقته؟؟
سيف تحمس للموضوع: لاشسوى معاها؟؟
مهند: جاب لها صابونة من بودي شوب لتفتيح الجسم وعطاها إياها وقالها امسكي هذي يوم عن يوم بتفتح بشرتك يتلعب عليها المسكينة ..
قامت أخدت الصابونة وتفرك في ذاك الجسم بقوة نتفت نفسها وتعبى جسمها كل حرار من الفرك وكلمته تبكي ..
قالها أنا قلت لك يوم ورا يوم بيفتح بشرتك معنه ماظنتي بشرتك لها حل بس انتي فركتي نفسك كنك تفركي صدام سيارة وأنا مو ذنبي..
الكل: ههآآآآآآآآآآآآآآآآآآآآآآآآآآآآآآآآآآآي
دخل فؤاد..:بل ضحككم للشارع شعندكم؟؟
مهند وهو يضحك: لابس كنا نحش فيك ههههههههه
فهد: الله يغربلك مع الصابونة هههههههههه
فؤاد: وآآآل وصلك الخبر تصدق إني فركت فيها وجه حمار أسود صار أبيض وجسمها مو راضي يفتح الله يغربلها كنها بويا
سيف: ههههههههههههههههههههههههههههههه
فهد: على فكرة سيف يبي دروس منك
مهند: طبعاً إنت مابتقصر معاه
فؤاد وهو يضرب على صدره: أفاا عليك أنا لها..
ياالله قوم
سيف: وين؟؟
فؤاد: ماله داعي للتأخير بنبتدي في الدرس من ألحين
فهد: دق الحديد وهو حامي ههههههه
مهند: ياالله فهيد قوم أنا وياك نلفلف شوي وسيف يروح مع فوفو ياخد الدرس الأول هههههههه
فؤاد: ليه ماتروحون معنا؟؟
فهد: لعلمك احنا البنات يتراكضون ورانا بس يبون إشارة بس مانعطيهم وجه
مهند: أبلشونا من التيلفونات والمسجات..
فؤاد: خلاص عندي لكم حل حولوهم علي ومايصير خاطرهم إلا طيب..
سيف: بعدين يحولوهم عليك ياالله ياالله نمشي
مهند يضرب سيف على ضهره: مستعجل الأخ
فهد: بس فوفو بيطلعك امتياز وان مافهمت الدرس زين الله يعينك ههههههه
..
طلعو الجميع .. سيف راح مع فؤاد ومهند وفهد راحو يلفلفون..
.................................................. ......................
وحشتِني إنت وكل مافيكـ وحتى عينيكـ وأياديكـ..
وحشتِني إنت كلكـ وحشتني أيامكـ وحشتني لياليكـ..
ولهان أنا وشوقي يجرني لعند بابكـ وقلبي وده يجيكـ..
كل مابي ينده بإسمكـ كل خلايا جسمي تبيكـ..


,,,,,,,,,,,,,,,,,,,,,,,,,,,,,,,,,,,,,,,,,
ياترا بيجي يوم ونجتمع أنا وإنتي ؟؟ ياترا الأيام بتجمعنا؟؟ مدري كيف سرقتي قلبي وعقلي .. ومدري شلون انغرمت فيك رغم إني ماأؤمن بسوالف الحب بس كيف وشلون أتأكد من المشاعر إلي بقلبي لك شلون؟؟
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,,,,,,,,,,,,,,,,,,,,,,,,
طلعو البنات من المدرسة وطلعو مايا وفرح وسناء وسمر وسارة مع بعض..
مايا: ياالله هذا وقته ماجا السواق هالهبل شسوي ألحين
فرح: تعالي معي أوصلك
مايا: لالا طريقي مو على طريقك ماأبي أعطلك
سارة: شرايكم نروح مشي نتونس طريقنا ألحين واحد وعند التقاطع بنفترق
مايا: أوكي
والبنات كانو يمشون مرت عليهم سيارة فيها شباب مغازلجيين وكل يوم تدور عند المدرسة تتحرش بالبنات..
مرت السيارة صوب مايا وشلتها وفتح واحد النافذة: ياويلي تدرين إنك حلوة
سكتو البنات
الشاب: عطيني وجه عاد
سناء: امش من هنا ياألم عليك الناس كلها..
الشاب: لاوالله بنت نافخة نفسها والله انك تذبحين كذا طيب واذا مامشيت ياالله وريني شراح تسوين..
مايا: استحي على وجهك تراك ماتدري شراح يصير فيك اذا مامشيت من هنا..
الشاب: ههآآآي أنا بنات يهددوني لاوالله ماهقيتو وعناد لكم ماراح أمشي وياالله وروني شراح تسوون
سارة: قلالة أدب ماعليكم منه يبنات امشو
الشاب: تعالي ربيني شرايك..
سمر: والله ماينفع معك إلا عقال أبوي أتلعب فيه على ضهرك
الشاب: والله أنكم خوش بنات رزة
فرح: رز الله راسك بمسامير قول آمين..
الشاب: لاتخلوني أغلط عليكم
مشو البنات ومشا وراهم
سناء: ياالله يبنات همتكم
وقامو البنات يضربونه بشنطهم والتمت الناس..
.....................................
فهد: مهند شوف شوف هناك شهاللمة أكيد في هوشة
مهند: خلينا نروح نشوف..
وجنب مهند ونزلو من السيارة وشافو البنات يضربون الشباب بشنطهم والشباب يضحكون..
مهند وفهد راحو يركضون ..
مسك مهند الشاب إلي تحرش في البنات: هي إنت من تكون عشان تتعرض لبناات الناس بالشارع
الشاب وهو يدز مهند: وإنت شعليك
مهند وهو ماسكه من بلوزته: اسمع لاتحط راسك براسي تراك مو بقدي فاهم
تباعدو البنات ..
مايا رمت على الشاب حجرة وطالت جبهته وسال دمه: عشان تعرف ان حنا مو بهينين ياحقير
ناظرها مهند وش هالملاك إلي قدامه والله إنها بنت قوية وعندها شخصية..
الشاب: شيل يدك عني..
فهد: اذا انت رجال قول وفعل شيلها بنفسك خلنا نشوف..
الشاب : أنا رجال قبل لاأشوفكم
مهند: وهو يسطر له: رجال ها رجال.. رجال ولا حمار شوارع ..
ورماه مهند عالأرض..
وجا فهد وحط رجله فوقه: تراك بعدك ماعرفت انت قاعد تلعب مع منو
التمت الناس عليهم وحاولوا انهم يخلصوه من يد مهند وفهد بس ماقدرو
مهند: والله مانخليه أجل يتعرض لبنات الناس قدام عينا والله لأكسره وألعب فيه واخليه عبرة لغيره مايطلع من تحت يدي سالم..
مايا: خلاص صلو على محمد
لف مهند وشاف ملاك قدامه وماعرف شيقول: أي بس هو أداكم
مايا: خلاص عليكم فيه كسروه بس أنا قصدي إن عشان لايضركم
فهد: مايو روحي البيت مايقدر يمد يده علينا لنكسرها له
مايا: طيب .. وراحت..
وطقوه مهند وفهد طق سنة بساعة وبعدين مسكوهم الناس.
الشاب : اتركوني عليه ليه ماخليتوني أذبحه
مهند: ألحين يهدوك علي ها وانت تحت يدي مو عارف حتى تخلص نفسك
فهد: شوف نفسك كيف مكسر بعدين قول هدوني عليه..
وهجم عليه مهند وطق راسه بالسيارة ورماه على فهد وفهد بقس له ..
لين انحاش من يدهم وهو يركض بالشارع..
ندى: ريوم تعالي شوفي هذا مهند إلي ميتة عليه وااو والله انه راعي فزعات..
ريم: ياويلي أنا بس مو حاس فيني شسوي
ندى: الصراحة هو والي معه عذااااب..
ريم: هذا الي معه أخو مايا..
فهد: صج والله إي مايو تشبهه كثيير كربونه
التمو البنات يناظرون فهد ومهند لأن هم من يشوفوهم يمرون عن المدرسة على طول يسوو اخباريات ويلتمو لأن فهد ومهند مرة حلوين وكشخة وشخصيتهم قوية..
وألف بنت تتمناهم بس هم مو معبرين أحد..
.................................................. .........................
دخلت مايا البيت ورمت جنطتها وعبايتها عالكنبة..
مايا: يمآآآآ.. مامي..
جت أم خالد: خير خير يمآ شفيك؟؟
مآيا: ياي ييما شحلوك تجننين بنت 20 سنة
أم خالد: مالت عليك لاتجاملين قولي شفيك؟؟
مايا: والله ماأجامل..
أم خالد: طيب قولي شعندك..
مايا: أممم هو مو شي مهم يعني بس بقولك فهد اليوم تهاوش
أم خالد تضرب على صدرها: شنو؟؟ تهاوش عسا ماصار فيه شي ليش تهاوش.؟؟
مايا: أعصابك يما لاتفحط >>امسكي بريك
تعالي أخبرك وش صار وليش تهاوش..
وراحت مايا مع أمها وخبرتها الي صار..
أم خالد: بعد قلبي فهود راعي فزعات ومايرضى بالغلط وشخصيته قوية حتى لو تهيبل
مايا: إي كل شي ولا فهيد عاد بعدين حتى أنا شخصيتي قوية رميت لك ذيك الحجرة على جبهته وسيلت دمه قدام الناس
أم خالد: كفو بنتي زين ماسويتي عشان لايفكر بحياته يتعرض لبنات الناس
وهم مهند ماشاء الله عليه راعي حشيمة وذوق..
مايا: إي ماشاء الله ماعطوه فرصة يتكلم علموه إن الله حق..
أممم مامي صاحباتي اليوم بيتعشون معي تعرفي الليلة خميس
أم خالد: البيت بيتهم بأي وقت يشرفو..
مايا: نطلب من المطعم والله نخلي الطباخة تطبخ؟؟
أم خالد: سوي إلي يعجبك يما وقومي دقي على أبوك يجيب كيك وحلويات بطريقه
مايا: أوكي مامي..
.................................................. ................................
في بيت أبو مهند ..
كانت توها داخلة البيت راجعة من الدوام تعبانة قعدت عالكنبة تريح شوي.. إلا بدخلة مهند البيت..
أم مهند: مهند حبيبي راجع بدري اليوم غريب شفيك يما شفيها يدك؟؟
مهند: ابد يما بس تهاوشت وانشقت يدي لما انحكت بباب السيارة
أم مهند: وانت ماتترك عنك الهوشات ييما؟؟
مهند: شسوي يما مااعرف اسكت
أم مهند: أدري فيك راعي فزعات بس ليش الهوشة.؟؟
خبر مهند أمه بالسالفة
أم مهند: ويي زي ماسويتو فيه جليل الحيا يستاهل زود.. وانت يما للحين يدك توجعك؟؟
مهند: لاآلام بسيطة عادية بس كان ودي مااخليه يمشي إلا مقتول بس فاتتني هالمرة
أم مهند: الحمدالله عدت على خير والله سلمه والله هو طايح بيد مهند وفهد كان راح فيها بس الله كاتب له عمر
مهند: شقصدك يما يعني يعني الي يطيح بيدنا مايطلع إلا ميت
أم مهند: مادري والله هههههههه
نزلت رميس من فوق..
رميس: مهند سمعت بإلي صار اليوم بالمدرسة؟؟ توهم البنات علموني..
يقولو إنك تخقق وهم بدون شي البناات ميتين عليك وعلى صاحبك ..
أم مهند: من حقهم يموتون عليهم جمال وكمال وشخصية وش ناقصهم الكامل الله..
مهند: أحم أحم شتبيني أقول أمي قالت الجواب..
الجميع: ههههههههههه
قام مهند ..
أم مهند: على وين؟؟
مهند: بروح أنام شوي..
أم مهند: وإنت هذي حياتك نوم وطلعة بس واحنا مانشوفك
رميس: تتلقف: إي والله احنا مانشوفك
مهند: وانتي وش رمى وجهك بالوسط ولاتجوزين عن اللقافة..
أم مهند: مسكينة ماقالت شي
رميس: إنت بعد ملقوف
مهند: لكل لقافة حدود
رميس: لاوالله احلف
مهند: ماني بحالف وش بتسوين يعني
أم مهند: تهاوشو قدامي بعد أحسن..
مهند: خليها تترك عنها اللقافة تراه طبع مو بزين
رميس: إذا تركته قولي أتركه بعدك
مهند: ههآي أنا أتلقف بس إنتي ماتتلقفين
رميس: لاوالله
مهند: إي والله للولد حقوق ليس للفتاة مثلها
رميس: طالع من قام يقول أمثال حكيم زمانه
مهند: حكيم زمانه أحسن من صخلة زمانها
رميس: مهند لاتغلط
مهند: بعدي ماغلطت>>كل هذا ولا غلط
رميس: إي ما غلطت بعدك هذا مدري شنو..
مهند: خلاص اذا عرفتي هذا شنو تعالي نتناقش خخخخ
أم مهند: ههههههههههههههه والله تمام وانتو تتناجرون وحشتني نجرتكم
مهند: شسوي بخبلة البيت وظم اخته لصدره..
اذا رجعت البيت وانتي وابوي مشغولين ماعندي غيرها
رميس: وانا بعد ماعندي غيره الله يخليه لي..
مهند: وآآل اول مرة احد يدعي لي
أم مهند تضرب ولدها: ههههههه الله يغربل بليسك ودعواتي..
مهند: أي ذكرت على مااظن سقطت سهواً
الجميع: هههههههههههه
.................................................. ..............
سيف وفؤاد واقفين في المجمع مستندين عالطوف ورافعين رجل ..
فؤاد: اسمع زين روح وقف هناك عند الطوف إلي قبالي واذا مرت هالبنت سو نفسك تكلمني وقول عاد ياخوك عطني وجه وهات رقمك فهمت؟؟
سيف:أي بس الي بتمر بنت مو ولد شلون أقول ياخوي
فؤاد يطق سيف على راسه: بدينا بالإستعباط ولهبال أنا كم مرة أفهمك أقولك انت بتسوي نفسك تكلمني لكنك انت بتطالع فيها تعنيها يعني فاهم
سيف : آهاا إي فاااهم
فؤاد: ياالله بسرعة روح
راح سيف ووقف عند الطوف الي قبال فؤاد ولما مرة البنت رفع سيف الجوال: وش فيك انت يالخبل جيب رقمك والله..
طالعت فيه البنت وضحكت..
سيف: هالضحكة لي أنا؟؟
البنت: لا اضحك للطوف مو بلك
تفشل سيف وسكت
مشت البنت وجا فؤاد جنبه وقام يطقه: انت خبل وعمرك مابتفهم امشي بس امشي
.................................................. ............................................


وآخيراً رهف تفرغت وقعدت من النوم وكانت االساعة 3 الضهر.. قامت تمشي وهي تتخبط من النعس >>كل هذا نوم وماكفاها
طلعت من دارها ونزلت تحت شافت لمياء: لموية حياتي وش الغدا؟؟
لمياء: رهوفة قلبي إنشاالله انتهى المشوار؟؟
رهف وهي تعرك عينها: ها إي بالياالله خلص أداني
لمياء(البنت رايحة عليها ههههه): إي في غدا وعلى فكرة دقت عليك مايا
رهف: وش قلتي لها؟؟
لمياء: قلت لها عندها رحلة على طيران الخليج إذا رجعت بخبرها هههههههه
رهف ترمي على لمياء المخدة: مالت عليك
لمياء: ههههه أفاا ليش
رهف: كان قلتي لها عندها جولة حول العالم تتفحص أحول الرعية>>كملت
لمياء: لا صج ووش شفتي بأحوال الرعية
رهف كان مخبطة حدها: أصدرت قرارات إن يخلو المرأة تسوق وانحلت المشاكل بحمد الله..
لمياء: هههههههههههههههههههه والحين الرعية كلها ماعندها مشاكل إلا عدم قيادة المرأة لسيارة في السعودية أقول روحي غسلي وتروشي لاتفلتين صوارخ اكثر..
رهف: لالا صواريخي خلصت ألحين مابقى غير صندوق القنابل تبي وحدة؟؟
لمياء: جنت البنت ههههههههه روحي أقول لاتفجرينا هههههههه
رهف: براحتك ..
وراحت رهف تتروش..
لمياء: الله يخلف عليك يرهفو من تقعد من النوم تصير كنها شاربة شي تفهي كثيير ههههههه
.................................................. ............................................
راح نشوف باقي التطورات في البارت الثاني إنشاالله
أتمنى إن هذا البارت نال على إعجابكم..


احسآس طفلة ©؛°¨غرامي جديد¨°؛©

وهذا البارت الثاني لعيونكمـ بس







البارت الثاني


..........................



في بيت أبو خالد مايا جمعت صاحباتها ببيتهم وستانسو ..وبعد العشا قعدو سوالف بس فرح كانت متكدرة شوي وكانو ملاحظين إن بالها مو معاهم وانها بعالم ثاااني مررة ..



وفجأة قامت تغني وهي تلعب بخصال شعرها وماسكة جوالها بيدها الثانية .. والكل قاممو يناظروها ويناظرون بعض بإستغراب.



شفت إتصالك .. شفت إتصالك ..



كلمتني مرتين شفت إتصالك..



شلي جرا لك.. شلي جرا لك..



صحيتني من النوم .. شلي جرا لك..



..



فكرت فيني ألحين يالكنت ناسي .. تدري بصدودك كيف فجعت راسي..



يالي مليت الروح هم ومآسي.. ماعاد بعد اليوم ينفع وصالك..



..



شفت إتصالك .. شفت إتصالك ..



كلمتني مرتين شفت إتصالك..



شلي جرا لك.. شلي جرا لك..



صحيتني من النوم .. شلي جرا لك..



..



قامت مايا وقعدت جنبها وقامت تحوس بشعرها وفرح كانت سرحانة وتغني: أقول فروح قلبي منو إلي شفتي إتصاله؟؟



فرح توها منتبهة لصوت مايا: ها ..



مايا تعدل قعدتها : فروح منو إلي شفتي اتصاله؟؟



فرح نزلت راسها بالأرض(فضحت نفسي بس شسوي كل منه ماقدرت أتحمل ريتك تدري يميوش شفيني ودي أقولك كل إلي في قلبي وأرتاح) ونزلت دمعة من عيونها وبسرعة مسحتها.. طالعت فيها مايا باستغراب ماتدري وش صاير فيها: فروح قلبي مارديتي علي؟؟



فرح: ولا شي ولاشي...



البنات استغربو منها وشلون انقلب حالها كذا فجأة لكن ماحبو إنهم يسألونها أكثر ويثقلون عليها..



رهف: خلاص بنات لاتثقلون عليها هي اذا بغت تتكلم بتقول لنا بنفسها وهي عارفة ان قلوبنا مفتوحة لها .. وناظرت فرح وابتسمت.. صح فرح؟؟



فرح ردت لها الإبتسامة وهزت راسها بإي..



سارة حبت تلطف الجو شوي..: شوفو يبنات بما إنا أحنا صديقات وعايلة وحدة وش رايكم نقترح على الأهل بكرة نروح شاليه عمي بو خالد؟؟>>طبعاً هم بنات عم<<



سناء: وااااي وناااسة الشاليه من زمان مارحنا



سمر: أي فكرة حلوة .. وطالعت فرح إلي كانت سرحانة .. ولا شرايك انتي يفرح؟؟



فرح: ها.. أي أي فكرة حلوة..



مايا: فروح قومي رقصي عاد من زمان ماشفنا رقصك ياالله



فرح: لالا مالي خلق والله



مايا بإصرار عشان تبي تطلعها من حالتها: ياالله عشاني فروح قومي



سمر تطالع مايا إلي أشرت لها عشان هي بعد تصر عليها: ياالله فروح خلنا نستانس قومي



فرح: خلوها مرة ثانية والله إني مالي خلق..



رهف مسكتها من يدها: ماتقدرين تصرين أكثر بترقصي يعني بترقصي..



فرح ناظرت في مايا نظرات ترجي كيف لا ومايا بنت عمها هي أقرب وحدة منها وفاهمتها عدل وهي صاحبتها من الطفولة..



سارة: مافي بترقصي يعني بترقصي ..



يالله ميوش الأغنية على ذوقك..



مايا: أحلى أغنية لأحلى فرووووح..



شغلت مايا الأغنية وقامو كلهم مسكو يد فرح ورقصو معاها عشان يطلعوها من حالتها إلي هي فيها وهم مايدرون وش سر إنقلابها فجأة..



بــلا حــب بــلا وجـــع قـــلب وش جــانــا مــن ورى هالحـــب



غـــير الألـــم غـــير التعـــب وش جــانـــا




يـا نــاس أنـا مـابــي دفــا قــلبـي مــن الحــب اكـتفــى



ويــن العـشـــق ويــن الـوفـــا ودانـــا




يـا قــلبـي يكــفـي مـاجــرى الجــرح تــوه مـابـــرى



مـاجـانــا مـن الـدنيــا تــرى كـفــانــا



جربــت فـي مــره الهـــوى وأخلــصت أنــا وقـــلبي ســـوى



وفجـــأه كـــذا الغــالـــي نـــوى ينســـانـــا




يـا شـــوق خـــذ مـــني وعـــد مـاعـــاد نشــــتاق لأحـــد



إرحـــل بدربـــك للأبــــد وإنســانــــا



مـاعـــاد يغــرينـــا العـشــــق مـاصـرنـــا ويــاه نتـفـــق



والحــظ مـاعـمـــره صــدق ويــانـــا




.................................................. ................................................




فؤاد وسيف في الكورنيش يقزون الرايح والجاي.. فؤاد سيف روح لهذيك البنت ووريني قدراتك والله ان جبت راسها بعطيك إلي تبي..



سيف: متأكد بتعطيني إلي أبيه؟؟



فؤاد: أي روح بسرعة



سيف: أخاف خلود ولد عمي يشوفني ويخبر علي



فؤاد يدزه: وش يجيب خلود ولد عمك هنا ياالله روح



سيف: طيب لاتدز



وراح يمشي باتجاه البنت وهو يقول في خاطره.. وليه والله دروس الغزل أصعب من دروس الجامعة ياربيييي>>طبعاً سيف دللللخ<<



راح بجنبها وقرب منها وماتكلم وماقال شي بس يطالعها ويبتسم ولما تدور راسها يبحلس عليها..



واالله حالة شسوي فيها هذي والله ابتلينا مالي إلا أرفسها رفسة عشان تكلمني .. ياالله خلني أنفذ العملية وآخد إلي أبي من فوفو..



رفس البنت بقوة على رجلها وضحك: ههآآآآآآآآآآآآآي



البنت: مالت عليك وش تبي يالهبل..



سيف: لا بس كنت جاي للقطوة ورفستك بالغلط>>يعني هي القطوة..



فؤاد شاف الموقف من بعيد وقال هذا دللللخ ومابيتعلم ومشا عنه..



البنت: لاوالله ماني بشايفة قطاورة هنا



سيف: مرت بسرعة البرق



البنت: هي هي هي تنكت حضرتك..



سيف وليه وش اسوي مع هذي الحين مو براضية تفهم إن هي القطوة: زين ياالله سلام



البنت: تعال ماقلت لي ليه رفستني؟؟



سيف: قلت لك برفس القطوة واذا هنا مافي قطاوة يعني شنو؟؟.. ((أنا الدلللخ فهمتها))



ومشا عنها وهي بقهرها فهمت ان هو يعنيها هي القطوة..



سيف: اوووووه وينه فوفو قاعد ينصب علي.. لالا أكيد راح يجيب لي الي قالي عنه لأن عجبه إلي سويته .. وظل ينتظر ماجا له وقال أقرب بيت هنا بيت مهند إلي كان قدام البحر .. كان مو بيت إلا قصر من كبره وفخامته..



راح سيف يمشي لبيت مهند.. وبالياالله وصل ودق الجرس وفتح الحارس..



سيف: واااال حارسهم حركات>>الي يشوفه ماشاف حارس بعمره



الحارس: نعم مين يبغى..



سيف: هلا كيف حالك وشفيك ياخوك عطنا وجه>>صحيح دلللخ



الحارس ستانس واحد عاطيه وجه قام يفخم روحه: اخلص انت ايس يبغى بسرعة أنا مشغول مافي فاضي حق انت



سيف عطيته وجه الغبي صدق نفسه يرفع صوته في وجهي أنا سيف ولد عبدالله ياالله خليني أظهر رجولتي عليه: شوف روح نادي مهند ياألطخك كف ألحين أنزل لك وجهك بالقاع..



الحارس: انساالله..



جا مهند وشاف سيف وضحك: هاااااا سيف لايكون اليوم البروفة بالبحر؟؟



سيف: هلا أخوك كيف حالك إي والله لبروفة اليوم عند البحر..



مهند : طيب وين فوفو راح



سيف: مدري عنه رفست البنت كان أرجع وماشوفه



مهند يضحك بقوة: هههههههآآآآآآآآآآآآآآي



سيف: أي وأنا قلت مالي إلا مهند صاحبي العزيز



مهند: أي حياك هههههههههه ودخله مهند ودخل البيت الكبير الضخم وقام يتأمله من كل صوووب..



سيف: هذا قصر مو بيت



مهند: أي هذا قصر وش تفكر



سيف: صج؟؟ إي أنا شفت فلة ماشفت قصر



مهند: هههههههههههههههههههههههه



قعدو عالكراسي في الحديقة وعلمه سيف وش سوا مع البنت ومهند ضحك ضحك المسكين



.................................................. ........................................



كانو يتمشون بالسيارة يلفون من مكان لمكان مو عارفين وين يروحون وبالآخير قررو يروحون الكوفي شوب..



خالد: أقول أبو الفوارس كنه اليوم صاير زفت حددده



فارس: إي والله اليوم لاحقنا الزهق لايكون احد مسوي لنا سحر



خالد: هي انت مسخن ولا فيك شي لايكون تؤمن بسوالف السحر والخرابيط



فارس طالع خالد: ههههههههههههههههههه



وش رايك ناخد عبود ومحمد اولاد عمي معنا ودام ان فروحو في بيتكم معناها السهرة الليلة في بيتكم



والبنات هناك فرصتنا نجننهم وعمتك ولاء بتجي بعد..



خالد: أي والله فكرة نسهر الليلة فهالجو العليل



فارس: لكن لازم أمر على دانو أخدها ولا تذبحني ان درت ان سهرنا بدونها هههههه



خالد: بل لالا لاتذبحك بعدين أنا أموت زهق



فارس: احم ادري مالك غنا عني هههههههههه..



خالد: لاتوثق في نفسك كثييير.. وطلع جواله ودق على عبدالله ولد عمه..



: ألووو



عبداالله: هلا والله



خالد: الليلة السهرة في بيتنا تعال انت وحمود وسيف والشلة كلها الليلة البنات متجمعين في البيت ومرو على باقي البنات وقول لسيف يجيب معه لومي لاتظل بروحها



عبدالله: صار ماطلبت شي ألحين أجهز كل شي وأجي..



.................................................. ..................................................



البنات قاعدين في الحديقة وحاطين لهم بساط جنب البركة وقاعدين يسولفون وياكلون وطربانين وكل مرة على وحدة تغني والي تغني هي الي تختار الي ترقص على أغنيتها وطبعاً بتنفذ بالغصب عنها..



ياالله دور مايا تغني ياالله ميوشة غني..



مايا: أمممم أوكي بس إلي ترقص على اغنيتي سارونة



سناء تحط يدها على خصرها: مالت عليكم انتو الثنتين



سارة: بدت تغار بنت العم



سناء: عمعم الله راسك>>أحلى يالدعوات إلي كذا



مايا بدلع: أنا إلي بغني واختار بكيفي وأنا اخترت سارونة وماابي غيرها ياالله سارونة قومي..



سارة قامت وهي تناظر سناء وهي في بالها تقهرها..



بدت مايا تغني بصوتها الناعم الحلو وبملامحها الجذابة وشعرها الأشقر إلي كان يتلاعب فيه الهوا وعينها الزرقة وبشرتها البيضة وكشختها ورشاقتها كانت غاية في الجمال وهي تغني وسارة ترقص..



سلام العشق وأعماقه ...



يضم القلب وأشواقه ..



تجيك الروح مشتاقه ...



وتهديك القصيد ألوان ...




على درب الهوى جينا ..



من أول ما تلاقينا ...



تغير كل ما فينا ....



وعشنا فرحة الأزمان



سلام العشق وأعماقه ...



يضم القلب وأشواقه ..



تجيك الروح مشتاقه ...



وتهديك القصيد ألوان ...



...




عرفنا الحب وأسراره ..



وكتبنا أجمل أشعاره ..



وغنينا على أوتاره ...



وذبنا بالغرام ألحان



...



سلام العشق وأعماقه ...



يضم القلب وأشواقه ..



تجيك الروح مشتاقه ...



وتهديك القصيد ألوان ...




نسينا كل مواجعنا ...



وبقينا اثنين ما معنا ..



سوى الأشواق تجمعنا ..



بلا هجر وبلا حرمان



...



سلام العشق وأعماقه ...



يضم القلب وأشواقه ..



تجيك الروح مشتاقه ...



وتهديك القصيد ألوان ...




ألا يا حبي السامي ..



لقيتك بأول أيامي..



تعال وجدد أحلامي ...



ترى قلب الهوى سهران



..



سلام العشق وأعماقه ...



يضم القلب وأشواقه ..



تجيك الروح مشتاقه ...



وتهديك القصيد ألوان ...




شربت الحب من كاسك ..



وطعم الورد بانفاسك ..



لأنك عذب باحساسك ..



وانا مغرم بك وولهان



..



سلام العشق وأعماقه ...



يضم القلب وأشواقه ..



تجيك الروح مشتاقه ...



وتهديك القصيد ألوان ...




حبيبي كان ما تدري ..



ترى حبك بدا يسري ...



بدمي وانت يا عمري ...



سكنت بداخل الشريان



..



سلام العشق وأعماقه ...



يضم القلب وأشواقه ..



تجيك الروح مشتاقه ...



وتهديك القصيد ألوان ...




قطعنا الحب ودروبه ...



وصغنا روعة اسلوبه ...



حكاية عشق مكتوبه ...



وصرنا للهوى عنوان




سلام العشق وأعماقه ...



يضم القلب وأشواقه ..



تجيك الروح مشتاقه ...



وتهديك القصيد ألوان ...



..





بعد ماانتهت مايا من الأغنية صفقو لها الكل لكن تفاجئت من الصوت إلي جاها..



: يااااااربي والله وعليك صوت يعذب يميوش




احسآس طفلة ©؛°¨غرامي جديد¨°؛©

تاااااااااابع البارت الثاني



مايا بعادتها دلوعة وأهلها يحبوها كثيير : ياااي فهود صج صوتي عجبك؟؟



فهد قعد جنبها: أفااا صوت ميوش ومايعجبني كنك صخلة منتفة



مايا زعلت ونزلت راسها بالأرض والبنات ماتو من الضحك



لكن هي جرحتها هاالكلمة وماردت عليه معقولة اخوها ينظر لها على إنها صخلة



فهد يطالع وجهها إلي ذبل بعد ماقال هالكلمة وهو كان يمزح لأن فعلاً صوت اخته كان يجنن مثل هديل الحمام لكن يحب يمزح ولسانه يفلت: شفيه القمر زعل من أخوه؟؟



مايا صدته ونزلت دمعتها على خدها..



رهف وهي تناظرها وماهان عليها حال بنت عمها وحست انها تضايقت من هالكلمة كثيير ومايا تتحسس من كل شي بنت بهالرقة وبهالنعومة وبهالصوت الجميل المفروض ماينقال لها كذا ولو عن مزح..:يؤؤؤؤ



سناء: عاااادي تعيشين وتاكلين غيرها هههههه>>على نياتها هالبنت



مايا إلي زعلها انه قالها هاالكلام قدام أولاد عمها إلي جو معاه وبالذات سيف إلي يحب يمسك عليها الكلام ويعايرها..: خلاص ماني بزعلانة لأني واثقة من نفسي وان صوتي حلو



فهد: والله إن صوتك عذآآآآآآآآآآآآآآآآآآآآآآآآآآآآآآآآب



فارس: صحيح ميوش صوتك حلو وأنا أول من يشهد



سيف إلي يحب يحرها دوووم رغم غلاتها عنده وانه يعتبرها مثل اخته رهف ..: وآآآآع أصلاً صوتها يخوف وماضاق من طعم الحلاة..



مايا تطالعه بطرف عينها وبكل ثقة ودلع: عالأقل حتى لو مو حلو أحلى من صوتك إلي كأنه خنزير يلعلع



الكل: هههههههههههههههههههههههههههههههههه



ساعتها انحرج سيف من هالكلمة..



عبداالله: أويلي ماظنتي سيف ينحرج هههههههههه



سمر: أقول عبود أخوي حبيبي تبي حلا؟؟



عبداالله: لاياقلبي ماابي..



>>طبعاً هم بس يتحجبون مايتغطون حتى اذا طلعو من البيت مايتغطون<<



أما فرح من شافته وهي رجعت مثل ماكانت وسرحت وهي تطالع فيه.. أما هو ناظرها بنظرات الندم والحسافة ويبيها بس تفهم السبب بإلي صار لكنها معنده وتقول إنها تكرهه رغم إنها تموت فيه..



خالد إلي يطالع محمد سرحان ويلوح له بيده: هي هي ياأخ من إلي آخد عقلك



محمد: أويلي على إلي ماخد عقلي أنا..



فهد: الله الله شكلهم إلي عندنا صار عندهم مرض الحب بس تصدقون سمعت إنه أعظم من فلونزا الطيورههههههههههههههه



محمد: مالت عليك أنا ماأحب..ويطالع في فرح.. وشلي بالحب وعذابه



الكل بصوت واحد عدا فرح ومحمد: إييييي وااااضح



بهاللحظة طاحت عيونه بعيونها وابتعدت عيونهم عن بعض بسرعة حتى لايحسون عليهم..



مايا : أقول فروحة ياقلبي قولي لي نكتة



فرح: شقولك يعني هذا في واحد قرا صار بقرة



فهد: ههههههههههههههههه خلاص أجل أنا مابروح الجامعة عشان لاأقرا وأصير بقرة



سناء: وانت عاد مايبي لك شي وعلى طووووول تسحب عالجامعة هالمسكينة من شافت وجهك وهي خسرانة مقعد على طالب مايحب العلم خخخخخخ



فهد: أقول انتي نقطينا بسكوتك



سناء: شلون أنقطك ماعندي قلم



الكل: ههههههههههههههههههههههههههههه



خالد: إي عاد فهد بس مايبي له شي عشان مايروح الجامعة على طووووووول



مايا: بس قولو له روح الشاليه طيران



فارس: عاد تصدقون ان أنا وخالد مشتاقين لأيام لهبال والدراسة هههههه



عبداالله: إي والله كبرتو الحين



خالد يطالعه بطرف عينه وبغرور: بعدي شباب



سارة: إي والله بعدهم شباب بس قربو للكهولة هههههههههههههههههههه



فارس وخالد انقهرو..



سناء: واااااي كهولة بعدين شياب وش يبي لها ذي



مايا : مايبي لها شي بس خطوتين هههههههههههه



دق جوال مايا .. رفعته وهي تناظر الكل بطرف عينها وبغرور..: يااااااربي وحشتنننننني هلا بعمري هلا بحياتي هلا بالغالي هلا بخلف عيالي هههههههههههههههههههههه



سناء تقرب منها: شوف الضبعة وتعيب عليهم تقول ماباقي إلا خطوتين إلا مجربة عندك انقلابات من الشباب للشياب على طووول بدون ماتدخلين الكهولة يعني تنطي ههههههههههههه



رد عليها: هلا بقلبي وروحي هلا ببعد عمري هلا بإلي وحشني صوتها الحلو وشكلها وهي تغني



مايا وهي تطنش سناء وتبعدها عنها: فديييييييييييييييييييييييييييييتك متى أشوفك متى؟؟



سمر وفهد يناظرون مايا بإستغراب من تكلم ذي عشان كل هالكلام الحلو والغزل..



وبعد ماخلصت مايا مكالمة حطت الجوال ولقت أنظار الكل عليها بنظرات تساؤل .. ضحكت وبصوت عالي: ههآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آآآي ههههههههههههههههههههههههههه



خالد: ليه الضحك هذا كله كنك عنزة هاربة..



مايا بثقة: أنا واثقة من جمالي يعني لاني بصخلة ولاني بعنزة الكل يشهد لي بالجمال واسأل إلي قدامك..



خالد: هههههههههههههههه وأنا أول من يشهد فديت أختي أنا ياالله قولي كنتي تكلمين منو؟؟



مايا: تتوقعوووون؟؟



سمر: أنا محتااااااااارة



سناء وهي بجنبها وتقهرها: أنا محتارة بحبك محتارة هههههههههههههههه



سمر: مالت عليك



رهف: هي سناءو كافي تمشين وتحرجين البنات



سناء: واااو باقي انتي شلون طفتيني لازم أسويها فيك



سارة: الله يعديها شرك هههههههههههههههه



مايا: هههههههههههههههههههههههه هذا نصوري حبيبي ويسلم عليكم



فارس: الله يسلمه واخبار الدراسة معاه؟؟



مايا: الحمدالله ماشية عال العال



عبداالله: الله يوفقه ويرجع بالسلامة



خالد: أي والله له وحشة الملعون البيت بدونه خالي ههههههههه



مايا: هذا أخوي الدكتور



سارة:خد عاد ألحين كنه مافي في الدنيا دكتور غير ناصر أخو مايا هههههههه



سمر: خليها تعبر عن شعورها هههههه



سناء: والله طفلة هي هههههههههههههه



أما فرح إلي أبد مسافررررة بعيد عنهم ولااااكأنها موجودة معاهم هي قاعدة معاهم بس روحها معاه وعيونها بعيونهم هي تحبه بس ماتقدر تسامحه بعد إلي سواه صعب عليها .. رغم ندمه وحالته ألحين والتغيرات والذبول إلي بانت عليه إلا إنها ماتقدر ترجع بقرارها ماتقدر..



محمد: وش رايكم أغني لكم أغنية؟؟



كلهم استغربو وناظرو فيه بعدين ناظرو بعض بإستغراب توه من شوي متضايق ومايكلم أحد وألحين يبي يغني..!!



أما فهد وسيف على طول دخلو خشمهم بالوسط: ووش الطاري؟؟



محمد: لابس جت براسي وقلت بغني..



فرح ناظرته ونزلت راسها وكان مبين عليها الحزن هي فهمت إنه يبي يغني أغنية يقصدها فيها لكن قوت نفسها وماعملت له اعتبار..



مايا لاحظت نظرات فرح ومحمد وشكت إن في شي بينها وبين محمد وهو سبب تغيرها وسرحانها وقررت إنها تقعد معها بروحهم وتسألها..



خالد: غني أطربنا يشيخ ترا أنا وفارس ملانين



فارس: حددددد الدعسسسسسة



عبداالله: حد البنزين هههههههههههههه



سناء: سكتو عاد اثنينكم بايخين



سيف: وهذي دايم تقط وجها بالوسطة



سناء تقهره: وجهي ملكي ماارميه وين ماجا مثل بعض الناس..



سارة: هههههههههه عاشو بدينا



وصل وائل أخو سناء ومعاه مالك أخو سارة ومعاهم عمتهم ولاء وبنتها لصغيرة غنى ودانة خت فرح ولمياء اخت رهف ..



وائل: ها كني سمعت إنه في أحد بيغني؟؟



سناء: بل عندك حاسة سادسة انت



الكل: هههههههههههههههههههههههههههههههه



سارة: حتى أخوها تحسده



مالك: الله يعينكم عليها بس هههههههههههه



مايا حطت راسها على سناء: اتركو سنوأ ماعليكم منها



دانة أكيد ماعلينا منها لأن انتي وهي الحال واحد هههههه



مايا بثقة ودلع: أنا أسوي حالي مثل ماأبي إلي يعجبني أسويه



لمياء: أي مو هذا إلي مخبلك هههههههههه



رهف: أقول سيفو



سيف: نعم وش تبين



رهف: وخر بتجي عمتي ولاء وغنى بيقعدون جنبي أبرك من وجهك



ولاء: ههههههههههههه خليه قاعد المكان واسع ماشاء الله



رهف: لاأنا أبيك تقعدين بجنبي طيب



ولاء : طيب ياالله استاذ سيف قوم



سيف وهو يقوم ويناظر اخته: شوفي أصحاب الذوق والإحترام وتعلمي منهم



رهف: اسكت عاد علم نفسك أول



سناء: عااااااااشو



سمر وسارة: وهذي ماعندها غير التشجيع



فهد وهو يصرخ: بسسسسسسسسسسسسسسسسسسسسسسسسسسسسسسسسسسسسسسسس



كلهم قامو يناظروه مستغربين وش فيه..



مايا من الخلعة: فهود حبيبي فيك شي؟؟



فهد: هههههههههههههههههه لا بس محمد باح صوته وهو يسألكم يغني ولالا بس انتو ماتسمعوه بسبب إزعاجكم فحبيت أسهل له الطريق



الكل: مااااااالت عللللليك خرعتنا....



فارس: من زمان يحمود قلنا لك غني ياالله غني..



وائل: ياالله سمعنا يقولون حمود صوته حلو



خالد: انت تقول يقولون طيب خليه هو يثبت لك..



وائل: ياالله أثبت لي



مالك:اثبت المعادلة التالية



فهد: شكلك متعقد من الفيزياء هههههههههههههههههه



سناء: محمدو غني اخلص علينا والله تبينا نترجاك ونراضيك و...



قطع عليها صوت مايا : بسسسس راسي صدع منك خلاص..



سارة: غني محمد



سمر: ترا أنا فيني طرب



رهف: ياالله محمد تكفا..



لمياء: طيب اسكتو عشان يغني



محمد يطالع فرح إلي دارت براسها عنه وكابرت على قلبها.. بدا يغني وهو يناظرها والشوق ذابحه..




ودي أشرح لك عن اللي بي وأقول إنك أغلى من نصخ روحي علّي



وإنك أغلى وإنك أغلى ياخجول يمكن أغلى من الغلا نفسه شوي



ودي أشرح عن تفاصيل الدهور عن متاعب سقته



صرت لي خامس جهات اربع فصول ماتموت فصول عمري وانت حي





ماطلبت إلا انتريا بالنزول وماتكون إلا لذاك الضي ضي



وماحويت إلا من الصعب الحلول كلك انت حب والاحساس لي



صابني من بارد احساسك خمول والملا ضاقت من احساسي بفي



قلت كل ماجيتك ادور لي قبول واكتشف إني أنا ما اطلع بشي




كل ما قاولوا غرامك مايطول قلت بس لحظه علي صبروا شوي



عيدي لي خامس جهات لأربع فصول ماتموت فصول عمري وانت حي





الكل قام يصفق له وبقوة وهم يصرخون: هووووووووو هووووووووووووو



سمر: عاااااش حمودي عاش اخوووي



سناء: عااااااااش حمووووود والله عليك صوت يطيح إبليس بالنار



الكل: هههههههههههههههههههههه



أما فرح صفقت له ببرود على شان لحد يحس انه في شي بينها وبينه..



أما مايا كشفت الموضوع خلاص وقررت إنها لازم تعرف السالفة كلها..



فهد: والله وتعرف تغني..



سيف: أي ماشاء الله عليك ياخوك صوتك حلوووو مرة ياالله عقبال ماتخطب وتغنيه لمرتك



محمد تنهد وطالع فرح: يااااااااريت



خالد: وش الي ماسككك



فارس: أكيد في وحدة ساكنة بالبال ورابطته ربط



فهد: بأي نوع من أنواع لحبال ربطته هههههههههههههه



سيف: أكيد قوي خايفة يهرب أكيد حبل يربطون فيه الحمير



فهد وسيف: هههههههههههههههههههههههههههههههههه



عبداالله: صج انكم ماتستحون..مسكين يحمود



لمياء: لا ماشاء الله عليه محمد مبدددددددع



رهف: أي يأم الإبداع ياالله سمعينا صوتم



لمياء: لا تكفين عاد



دانة: ياالله عاد بدينا تعليق بس مدري وش فيها فروح اختي صايمة عن الكلام..



سمر: أي والله صايرة كل ساكتة..



ولاء: فوفو قلبوووو فيك شي قولي لي انا عمتك..



فرح تتصنع البسمة وهي تناظر فرح بنظرات حزن: لا عمتووو مافيني شي



ولاء: أكييييد؟؟



فرح بنفس الإبتسامة: أكيد



ولاء ماصدقت: إنشاالله يكون كلامك صحيح..



وائل: صراحة ودي أسمع أغنية من صوت أختي سنوأ..



سناء تشهق: هآآآآآآآآآآآآآآآآآآآآآآآآآآآآآآآآآ أنا لالا



البنات: ياالله بسرعة



سارة: قومي خلينا نضحك ياالله غني ياأذبحك مو بس قاعدة تتصيدين فينا..



سناء: تكفى لاتوقعني بينهم



مايا: ههههههههههههه ماكو فكة بتغنين يعني بتغنين>>تراها دائماَ تصر ودوم عنيدة



مالك: ياالله سناء ليه تغبين صوتك ترا مابنسرقه ههههههههه



خالد: سناء تغني مااتخيل ويضحكون هو وفارس هههههههههههههههههه



عبداالله: عاااادي جداً..>>هذا دووم بارد



فهد: لامو عادي جداً هذي وجها مو وجه رومانسية ههههههههههههه



دانة: ماعليك منهم سوسو ياالله سمعينا صوتك الحلو



لمياء: حتى أنا أبي أسمع ياالله ولك مني هدية..



سناء نطت على لمياء: صج لومي بتعطيني هدية؟؟



لمياء وهي تضحك: أي صج بس خليني أحكم على صوتك أول..



مايا تضحك: أجل من ألحين أعطيك إياها دام فيها حكم عالصوت يعني مافي هدية ههههههههههههههههههههه



رهف: هههههههههههههههههههههه



سناء بكل ثقة بدت تغني والكل استغرب منها سناء المربوشة الي كل تصخر وتضحك وتسوي مقالب عندها كل هالمشاعر والأحاسييس الجميلة إلي بانت عليها وهي تغني..




فمان الله يا مسافـــــــــر



عسى الله يسمح دروبك



وترجع بالسلامـــــــــــه




اذا بتطول الغيبـــــــــــه



امانه لا تقاطعنـــــــــــــا



ودوم ابعث سلامــــــــه



فمان الله ..




معاك ايام عشناهـــــــــا



لها بقلوبنا ذكــــــــــرى



ولها شوق وهيامـــــــه



فمان الله ..




اذا انت تنام في الغربـــه



ومتهني في منامــــــــك



انا ليلي ما انامــــــــــــه



فمان الله ..




انا بيني وبين نفســـــي



اطلب من الله وادعــــي



يردك بالسلامـــــــــــــه



فمان الله ..





....



الكل: وآآآآآآآآآآآآآآآآآآآآآآآآآآآآآآآآآآآآآآآآآآآآآآآآآ آو



سارة: صرااااااحة عليك صوت ذبآآآآآح



خالد: سنوأ من وين لك هالموهبة وخاشتها؟؟



سناء: أغبيها للمستقبل



فارس: هههههههههههه قصدها لزوج المستقبل ههههههههه



وائل: أي خلوها تتهنى انتو شعليكم منها صح سوسو؟؟



سناء: صح خيوووووووو انت الوحيد إلي فاهم خيتك



مالك يهمس لوائل: من متى هي تقول عنك فاهمها



وائل ومالك: هههههههههههههههههههه



رهف: الصراحة لومي سنوأ تستحق الهدية اعطيها إياها..



مالك: سويرة عاد ضيفي أخوك شاهي..



سارة: طيب مو مشكلة بس هاتي 10 ريال تفكر بلاش



مالك: بل كل هذا جعصين



سمر: لاتقول جعصين قول بخيلين بس هذا حقنا مو بخل هههههههههه



سارة: خلاص خد هالمرة ببلاش لأنه ضيافة بس مرة ثانية بتدفع سمعت ياأخي العزيز؟؟



مالك وهو ياخد الشاهي من يدها: إنشاالله هههههههههههه



مايا بعناد: لالا لاتعطيه إلا بفلوس احنا حتى ضيافتنا بفلوس



وائل: مايا طول عمرها بخيلة ههههههه



سناء: سكتو انتو خلوني آخد هديتي بالأول



ولاء: ياالله اعطيها الهدية يلومي وش فيك



دانة: صبري عمتووو خلينا نشوف



مايا قامت قعدت جنب لمياء: ياالله لومي ترا حتى أنا تحمست أشوفها ههههه



لمياء طلعت من جنطتها علبة مغلفة: وهذي أحلى هدية الأحلى سنوأ



سناء ظمتها بقوووووة: فديييييت لومي أنا



مايا : أجل خلاص سوي معها عقد كل يوم تغني لها اغنية عليها هدية ههههههههههه



ولاء: أكيد سناء موافقة ألحين



دانة: مايبي لها كلا م ههههههههههههه



سارة: يعني فازت سناء الحين



سمر: تو الناس عليك هههههههههههههههه



وائل: شفت وان اختي عندها صوت مرهف



رهف: هي انت وش جيب رهف في صوت اختك



الكل: هههههههههههههههههههههههههه



خالد : دانة أخبار الطب معك؟؟



دانة: وللله تمااام المهم ان الواحد عنده رغبة وخلاص



خالد: انشاالله عقبال التخرج



سناء: أي الله يسمع منك



دانة تضربها: وانتي شعليك يالملقوفة



مايا تطالع سناء ودانة : الله يخلف بس ههههههههههه



فارس: خلود امش نروح نشاهد فلم..



سارة وسمر: حتى احنا بنشاهد



سيف: غثثثثثثثثثثثثثثثثثثثثثثثة



فهد: من زمااان مو شي جديد



سارة: مالت عليكم



مالك: ماعليكم من اختي بتشاهد



مايا: وانا تبوني لولا؟؟



خالد: أكيد نبيك



فارس: وهو في أحد مايبي ميوش



سناء: ياالله عاد الحين



مالك: ماعليك ميوشة هي بس غيرانة منك ههههههههه



طبعاً كلنا بنشاهد ياالله قومو..



قامو البنات كلهم



أما..



فرح ماقدرت تتحمل أكثر وقامت دخلت داخل بدون ماتتكلم أي كلمة وقامت وراها مايا ..



ولاء: أموت وأعرف شفيها؟؟



سيف: طيب واذا قلت لك شفيها بتموتين عمتوووو؟؟



ولاء: مالت عليك تبي الفكة مني



الكل: هههههههههههههههههههههههه



سارة: طبعاً حنا كلنا بننام هنا عند مايا الليلة



فهد: بل راح بيتنا بيتفجر ههههههههههههههه



وائل: عادي كل مرة كذا مو جديد



عبداالله: خليهم يستانسون



خالد: أي يستانسون مو مشكلة ههههههههههههههه



مالك: يستانسون بخراب والله حالة



فارس: أكبر مدمرين في العالم هم حتى أعتقد غلبو إسرائيل ههههههههههههههه



سناء: هيييي أشوف قمتو علينا



سمر: ترا بكرة عيد ميلاد مايا وبما إنا بننام عندها لازم نسوي لها مفاجئة حلوة وش رايكم نتفق؟؟



فهد وسيف: أي كل شي ولا ميوش



والتمو كلهم يتفقون عالمفاجئة إلي بيسوونها لمايا..



ومحمد كان يفكر فيها ليه قامت كذا لهالدرجة وجوده ضايقها.. حس ان المكان ضايق فيه وانه ماوده يظل اكثر..



.................................................. ...................



في مكان ثاني مايا حاظنة فرح وفرح تبكي بحرقة..



مايا مو قادرة تشوف بنت عمها وصاحبتها واختها بهالحال على طول بكت معها: حبيبتي فرح قولي شفيك؟؟



فرح: شقول وش أخلي



مايا: قولي كل إلي بقلبك فضفضي لي لاتغبين شي صدقيني ما يطلع لأحد شي مني



فرح: أنا ومحمد نحب بعض من فترررة يمايا لكنه خاني



وترد تحط راسها بحظن مايا..



مايا: خلاص حبيبتي خلاص مو لازم يكون مثل إلي بتفكيرك انتي اسأليه وشوفي وش إلي بينهم



فرح: ماله داعي أسأل كل شي واضح



حاولت مايا تهدي فرح لين مانامت وجو باقي البنات ووتوزعو كل ثنتين في غرفة بعد مااتفقو على المفاجئة إلي بيسووها لمايا بكرة..



نامو الكل إلا مايا ظلت سهرانة تفكر شلي صار وخلى فرح تقول عن محمد خاين؟؟



.................................................. ...................






توقعآآآآآتكم؟؟



وش المفاجئة إلي بيسووها لمايا؟؟



وش إلي بين فرح ومحمد؟؟



وباااقي الأشياء في البارت الثالث إنشااءاالله.....


احسآس طفلة ©؛°¨غرامي جديد¨°؛©

ونسييييييت اقول لكم شيئ إن كل اربعاء راح انزل بارت

ششنطهـ فوششيهـ~ ©؛°¨غرامي جديد¨°؛©

.
.
.

يِجيْ " الروَآيَأإ خطِيرأإ ,
< متَآبعتِكْ :)
بَس مو كَأإنو من رَبوع لربُوع مُدَّه طويلا حَق بَأإرت وبَأإرت !!



احسآس طفلة ©؛°¨غرامي جديد¨°؛©

ههههههه حبيبتي شنوووووته
تسلمي علي على مرورك الحلووو
اني لو اتباعكم كل يوم تبون بارت
مثلاُ يومين في الأسبووع قولي لي ويش هم

احسآس طفلة ©؛°¨غرامي جديد¨°؛©

للأسف ماراح اقدر اواصل إذا كان بس هذا حد التشجيييع
اني ماخذه عنكم نظرة عكس هذي النظرة وما ابي اغيرهاا


احسآس طفلة ©؛°¨غرامي جديد¨°؛©

؟؟؟؟؟؟؟؟؟؟؟
يعني ما عجبتكم الرواية؟؟؟

الزعيـ A.8K ـمه ©؛°¨غرامي ماسي ¨°؛©

,’


بسم الله


يعطيك العــآفية ‘ و عُذراً
مُكـــررهـ


https://forums.graaam.com/176321.html



ننتظــر جديــدك


,’


أدوات الموضوع
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1