وفاي دمر دنياي ©؛°¨غرامي مشارك¨°؛©

بسم الله الرحمن الرحيم
اليوم انشالله بنزل لكم روايتي الاولى
واتمنى تعجبكم والاقي تفاعل منكم



وروايتي باسم(((((((ماتت فرحتي يوم شفتك))))








الجزء الاول


الشخصيات,,,,,,,,
ابو مازن ((عبدالله))
ام مازن ((نوره))
عيالهم مازن26يشتغل مدرس
وائل 24ظابط في الشرطه
هوازن 21 اخرسنه قسم لغه انجليزيه
وتين 18سنه ثالث ثانوي علمي
هيا 14 ثاني متوسط
وليد 9 سنين
وسن اخر العنقود 5 سنين


ابو هشام(( سعد))
ام هشام(((عليا))
هشام 27يشتغل مع ابوه وعمامه بالشركه
هتان 24 يدرس بامريكا ادارة اعمال
هتون 21سنه ثالث جامعه قسم حاسب الي وهي صديقة هوازن الروح بالروح
هاشم 20 سنه ثاني جامعه قسم تربيه بدنيه
هيله 17 سنه ثاني ثانوي وهي متعقده من اسمها لانه على اسم جدتها وهي دلوعة ابوها لان امها طولت ماجابت عليها وبعدين حملت وجابت هناء بعد 10 سنين



العمه هناء
ابوسالم ((ماجد)) ولد عم ابو مازن وابو هشام
العمه هناء ام سالم
سالم 26 سنه يشتغل بشركة خواله مع ابوه
اكرم 24 يدرس مع هتان بامريكا
سمر 18 سنه دايم مع بنات خالها
سميه 14 سنه دايم مع هيا


العم خالد 35 سنه
يشتغل مع اخوانه بالشركه
وفاء زوجته معلمة انجليزي 29 سنه
وليد 10 سنين
لمى 8 سنين
عبدالله 4 سنين



الجزء الاول

هوازن:وتين دقي على هتون خليها تجي بدري موتتأخر زي عادتها
وتين :والله ادق عليها من الظهرماترد مدري اشفيها
هوازن:ابوي وينه واخواني
وتين:بالله تستهبلين انتي اليوم زواج هشام شي طبيعي انهم بيكونون عندبيت عمي
وتين :مدري ليه احس اني مو مرتاحه
هوازن:بديتي عاد بالوسوسه ياشيخه فكينا اصلا انت من عرفتك وانت مو مرتاحه
ياشيخه تعوذي من ابليس ترا مو حلو كذا التشاؤم
وتين :تهقين
هوازن:اهقى ونص بعد اقول خلك من الكلام اللي ماله داعي تدرين فيني زار رقص مو طبيعي
اليوم انشالله بمتر الزواج وبرقص الين ادووووخ
وتين:هههههههههه ماشبعت انتي وهتون لكم اسبوع ماغير تهزون فشلتونا تقول محد تزوج بهالدنيا مثل اخوها اللي هو ولد عمك






في بيت العم سعد

(((الكـــــــــــــــارثه))


........: لاحول ولا قوة الا بالله والسواة الحين

العم سعد:والله مدري ايش اسوي ياعبدالله
المشكله مالقى ينتقم الا بولدي
الحين ايش اقول للناس وكيف اخبر ولدي
خالد::اذكر الله ياابو هشام وانشالله مايصير الا الخير
ابو مازن :خالد ماعليك امر ناد لي هشام
....طلع خالد وبقى ابو هشام وابو مازن

ابو مازن:ولا تزعل ياخوي ولا تشيل في خاطرك ولدك بيتزوج اليوم
وبنتهم بتقعد معلقه عشان يعرفون ان الله حق
ابو هشام باستغراب:كيف يتزوج ياعبدالله اقولك ابوها رافع قضيه
النذل وانت تقول يتزوج
ابو مازن:وبناتي وين راحوا طب وتنقى كلهم يرخصون لك ياخوي
ابوهشام:لا ياعبدالله مو انا اللي اخرب على بناتي بناتك هم بناتي وماارضى ان عرسهم يصير بهالطريقه
وبعدين يمكن مايوافقون
ابو مازن :بناتي مايعصوني ابد




وفي مكان قريب لكن محد يدري بالكارثه والتخطيط اللي يصير داخل
جالس هشام وبجنبه الشباب فرحانين بزواجه وكل واحد يرمي تعليق عليه وهو الفرحه مو سايعته انه بيرتبط بشريكة حياته وحبيبته ((مي))
اكرم:هتان خلصت الحجوزات واكدت عليها
هتان :يس ماي براذر
مازن:بدا خراط الامريكان بالله انتم احد لاعب عليكم وقال محد يعرف انجلش غيركم
صجيتونا ترا
اكرم :اقول اسكت بس يالمدرس انت اللي يسمعك يقـــ.....
قطع عليه كلامه عمهم خالد وهو مقبل ووجهه متجهم

العم خالد بكل رسميه :
هشام كلم ابوك وعمك يبونك داخل
اكرم:::لايكون الشيبان يبون يوصونه مسوين مثل البنات
هتان:لا يمكن بيسوون فيها امهاته وبيقرون عليه من العين
هشام وبكل اريحيه وهو مبتسم على تعليقاتهم:اقول انت وياه ازعجتونا من الهياط حقكم ذا متى بس ترجعون امريكا وتفكونا
سالم:لو بتطاوع ذيلا وهو يأشر عليهم ماراح تخلص روح بس لابوك وعمك
العم خالد بنفاذ صبر:وبعدين يعني يالله بسرعه ياهشام
هشام دق قلبه ونغزه حس ان عمه موطبيعي
هشام :خير عمي فيه شي
العم:مافيه شي بس يالله قدامي



(((صدمــــــــــــــــــــــه)))

في المجلس
دخل هشام وهو حاس ان في مصيبه وجه ابوه وعمه مايبشر بالخير ابد

ابو هشام:تعال ياولدي ابيك في موضوع
هشام:سم يبه امر
ابو هشام:انت متى اخر مره كلمت زوجتك فيه
هشام :ليه يبه هالسؤال وايش فايدته
ابوهشام:ريحني وجاوب
هشام:تقريبا من شهر
ابوهشام:ليه من شهر
هشام:مدري هي تقول عشان نشتاق لبعض بس يبه فهمني ليه تسأل
ابو هشام وهو يحاول يضبط اعصابه:اسمعني ياولدي وخلني اخلص كلامي ولا تقاطعني
هشام :سم يبه اللي تامر فيه
ابو هشام:ياولدي من حوالي عشر سنين كان عمك دايم يحقد علينا وتصير بيننا مشاكل علشان المناقصات اللي ترسي علينا
وبسبب ان حنا اكثر خبره منه كان مره من المرات فيه مناقصه قويه ورست علينا
وهو في ذاك الوقت لامنا لانه خسر تقريبا اغلب امواله عليها
وكان دايم يتوعد انه ينتقم منا ولما جاني قبل ثلاث سنين ووطد علاقته فيني قلت انه اكيد تغير وانه نسى خلاص
بس((قالها وهو يتنهد))
الظاهر انت الضحيه ياولدي
هشام وهو مصدوم ومتفاجئ:كيف انا الضحيه
ابو هشام:ابو مي لعبها صح خلانا نروح ونجي عندهم وخلاك تحب بنته والحين...
وسكت وهو يطالع هشام اللي مو قادر يتكلم وخايف من اللي بيقوله ابوه::ابو مي ياهشام رافع قضية خلع عليك
ويبيك تطلق بنته
هشام فتح عيونه على وسعهم من الصدمه ووقف :ايش الخرابيط ذي والكلام اللي ماله معنى
ايش دخلنا حنا في مشاكلكم مي تبيني وانا ابيها
ابو هشام وصدمه صدمه ثانيه:من قالك انها تبيك البنت لعبت عليك مع ابوها
هشام من الصدمه جلس بعد ماكان واقف:لا مستحيل
اللي يصير لي مستحيل
طلع جواله من جيبه ودق على زوجته اللي عاش معها اروع فترة خطوبه وجلس يدق ويدق الين ردت عليه
مي ومن غير نفس :خير
هشام:مي صحيح الكلام اللي سمعته
مي:اي كلام
هشام :ابوك رافع قضية خلع علي
مي:ايوه وانت اسمع هذي المفاجأه اللي قلتلك عليها
واشرب المقلب ياحلو انت وابوك الحرامي
هشام .....:قفل السماعه بوجهها من غير لايسمع الكلام الباقي
اللي جاه اليوم يكفي يهد جبال خلاص مو قادر يتحمل اللي جاه

ابو مازن وبكل صرامه جا ووقف قبال هشام ووقفه معاه:مو ولد سعد السعد اللي يطيح راسه وينكسر ارفع راسك وانت رجال والحمدلله انك عرفتهم قبل لاترتبط ببنتهم
لكن هم ماعرفوا يلعبون مع من وحنا بنوريهم
والحين انت بتتزوج وخل بنتهم تقعد عند ابوها معلقه
هشام فتح عينه على كبرها:اتزوج انت ايش تقول ياعم من اللي بترضى تتزوج بيوم وليله كذا
من غير مهر ولا تجهيز
وانا اساسا نفسي مو مقادر اتحمل الصدمه كيف هي
ابو مازن:انت رجال والكل يشهد باخلاقك وتربيتك والف بنت تتمناك
وبناتي كلهم تحت امرك طب واختار
خذ هوازن
هشام بصدمه وهو عارف ان سالم يبي هوازن: لا ياعمي حنا مو في مزاد وانا خلاص عفت العرس وسنينه
ابو مازن بغضب:وتخلي ابو مي يتشمت فينا يخسي الا هو
العرس بيتم اليوم يعني يتم
العم خالد:هشام ياولدي البنت بنت عمك وهي سترك وغطاك خذها
ولاتطيح وجيهنا وخل الكلب يعرف ان الدنيا ماتوقف عند بنته وبس
هشام وهو خلاص افكاره انشلت وماعاد فيه تفكير قال:
اللي تشوفونه بس بشرط: انا ماابي هوازن
ابــــــــــــــــــي
وتين

ابو مازن:جاتك ياولدي
تقدم ابو هشام من اخوه وباس راسه:والله ياخوي لو اسوي ايش مااسوي مااقدر اوفيلك الجميل
ابومازن:روح بس جيب الملاك وخلنا نملك
ابو هشام: واهلك منت معلمهم
ابومازن : خلنا نملك ويصير خير






(( الـــــــــــــــــــــم ))
هوازن: وين رايحه الساعه 3 العصر
وتين:رايحه اسبح وسن وبشرب لي كوب مويا
هوازن : اجل جيبي لي عصير على مااخذ شاور
وتين : اوكي
طلعت وتين من جناحها هي واختها
وهي طالعه صادفت وائل اخوها:اهلين بالشباب ايش فيك مستعجل كذا
ناظرها وائل بكل الم:هاه
وتين:ايش فيك مو على بعضك
وائل:هاه ايه لا مافيني شي بس مستعجل
وصح ابوي يبيك تحت








ايش بيصير وهل وتين بترضى
والا بترفض
ومن الشخصيات اللي بيكون لها دور بالروايه
اتمنى القى تفاعل من الكل



























:



بيبي الشقية ©؛°¨غرامي مجتهد¨°؛©

واااااااااااااااااو روعة البارت


وبانتظارك

القناصهـ ©؛°¨غرامي مشارك¨°؛©

وآآآآآآو ..

آلبدآيه ختيــــــــــرهـ ..

يثــــــــلموو يآعثــــــل ..

بآنتظـــــــــــــآرك ..


cherry m ©؛°¨غرامي متألق ¨°؛©

يسلمووووووو شكلها الرواية
رائعة
،،،،،،،،،،،،ننتظرك

MarOoOmy ©؛°¨غرامي مشارك¨°؛©

حماااااااااااااااااااس
كمليها يالغلا .

البنوتة الخجولة ©؛°¨غرامي جديد¨°؛©

مرحباااااا .. الرواية باين عليها رووووووعة وخيال ..
ياريت تكملينها بأسرع وقت ؛؛ وأبغي بارت طووووويل (( أمووووون صح ))
وياريت الاحداث بين وتين وهشام >> ألي كسروااا خاطري ..
وننتظرك بفارغ الصبر ...!!! >> بس لا طولين علينا ..

**جروح ©؛°¨غرامي جديد¨°؛©



حياتي لا تتأخرين علينا بالبارت ننتظرك يالغلا ويعطيك العافيه على القصه بدايتها تشويق
تقبلي مروري .........جروح

أقوى شي ©؛°¨غرامي فعال ¨°؛©

بدايه موفقه خيتووو
والروايه روعه وحماااس
بليييز كمليهااا

غلا ksa ©؛°¨غرامي فعال ¨°؛©

موفقه يالغلااااا
بدايه رااائعه
بنتظاااارك


D?L0O ^.^ B?L0O ©؛°¨غرامي متألق ¨°؛©

البداية مرة حماس
ومشكورة على الرواية
وبليزز كمليها ومتى البارت الجاي؟^^**

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1