منتديات غرام ترفيه غرام نكت - ضحك - وناسة - فرفشة فضفضه لاتخلو من بربسه للسعوديين فقط +18
!! مـ ع ــزوفة حـزن !! ©؛°¨غرامي فضي¨°؛©

فضفضه لاتخلو من بربسه للسعوديين فقط +18

يافتاح ياعليم يارزاق ياكريم (ايقونة صعيديه رايحه الغيط )

لمعرفتي بكم لابارك الله في عدوكم بترجم لكم العنوان ادري انكم داجين ولاتفقهون شي لكن الله بلاني بحبكم لابوكم لابو من حبكم <~ والله ماعرفناك انتي تسبين والا تمدحين

فضفضه = هذه الكلمه مشتقه من فضفاض وهو منتج انتشر في الاسواق منذو مده ليست بالشويه والا بالكثيره هه هه <~ يعني متوسطه
وهذا المنتج يتم بخه على الملابس لكي تتخلص من الكهرباء الساكنه ولا تلتصق لكن هالمنتج مااثبت جدارته مثل الاانتي ستاتيك حيث ان الاخير اطلق منه ولا هوب حوله <~ ومير ينبرش عليها شمالي ومعه توليبتي ويصكونها بصبوره على هالفصحى اللي حاست امن جابتها
عشان كذا فضفضه ماهيب مشتقه من فضفاض خلونا نبدأ من جديد
فضفضه = تعبت وانا اشرح عمركم مافهمتوها جايتن افضفض انا والا اشرح
لاتخلو = كلمه لاهي منا ولا من ثوبنا ولا من عاداتنا ولا من تقاليدنا ولا يتشدق بها الا المتفلسفون والذين بالفصحى يتباهون ان شفت احد قايلها علقته على باب الفرفشه
من = حرف مجرور جره المتفلسفون والذين بالفصحى يهايطون تحت شعار جلدآ ماهو جلدك جره على الشوك <~ نست الموضوع وراحت تسمع اغنية راشد الفارس
بربسه = هذه الكلمه مكونه من شقين الشق الاول هو :
بر : وهو الارض القاحله التى ان بغينا نكشت قشينا عفشنا وطسينا لها تشوينا شمسها وتحرقنا رمالها وتلفحنا سمومها ورياحها حتى نتفل العافيه ثم نرجع الى بيتنا سالمين غانمين وجلودنا محترقه وقد تضاعف سمارها حتى اصبحت حالكتن كلون الليل البهيم ان لم تكن اشد حلكه
وهذه النعمه محروم منها المستبحرون وهم من لديهم بحر كـ اهل الغربيه واهل الشرقيه وكذالك المتجبلون وهم من لديهم جبال تعانق السحاب كــ اهل الجنوبيه اي ان هذه النعمه حصريه لــ اهل الوسطى وبعض من الشماليه <~ ومير يطمر شمالي ويقول لاتعلمين بأسم زوجتي
الشق الثاني من الكلمه هو
بسه : ومن منا لايعرف البسه هذا الكائن الجميل الذي يغرد بأعذب الالحان مياو مياو وقد تغنى فيه كبار الشعراء كقولهم ياقطو ياللي منسدح في البراميل
وبكذا يكون معنى الكلمه البر للبسه ولكن من شفاحة البشر تقاطو مع البسه حتى بالبر حقها
وفي رواية اخرى بربسه تعني التدخل في مالايعنيك واحيانآ قد يغيبك ورى الشمس

قبل لا ابدأ بموضوعي <~ كل هذا ومابعد بديتي

اللي توه دارس كتاب الوطنيه لايجيني مدرعم ومطفي النور ويتطاق معي من الحين اقوله تراني سعوديه يعني يقضب ارضه لا احوسه

وهذا جوازي للي مو مصدق



لا اشوف احد طامر بحلقي يقول جوازنا لونه اخضر بقوله على شحم هذك اول اما الحين حرصآ من حكومتنا الرشيده على راحة المواطن ورفاهيته
وانبساطه وانشكاحه كل مواطن يختار لون جوازه اللي يحبه بأستثناء اللون الوردي والازق كــ مساهمه منها في الحد من الحروب السحلاويه التمساحيه

حلقتنا اليوم تتكلم عن محورين رئيسيين

المحور الاول : الاشاعات وما ادراك مالاشاعات
ينقسم الشعب السعودي الى قسمين القسم الاول يبتكر الشائعات والقسم الثاني يروجها وكل القسمين يصدقونها غربل الله بليسكم يالسعوديين ولابارك الله في من عاداكم
مايمر شهر الا وهم مطلعين اشاعه وسالفة المكاين خير شاهد
خلوكم من سالفة المكاين عفى الله عما سلف
مايجي رمضان والا العيد الا وتطلع اشاعه ان الراتب دبل هالشهر والخبول اللي مثلي وشرواي يصدقون ويطيرون على الصرافه يدورون الراتب الدبل
بعد مايكونون نشروها وبشرو كل اللي حولهم
واللي بيقولي مايسويها ولا عمره سمع بــ هالشي بقوله يطس يبحث بشجرة العائله اكيد بيحصل ان فيه عرق بعائلته ماهو سعودي صافي
وكله كوم واللي يجيك يقولك العقار يبي ينخفض هالشهر ويجيك هالمسيكين اللي قضى عمره يجمع فلوس بيت والا ارض يصدقها ويهون لايشتري واخرتها تطير تحويشت عمره ويشيب وهالاشاعه مابعد تحققت الا كل يوم يزيد العقار ازود
واخر مااتحفونا فيه الاسبوع اللي فات مادريت الا شلة القراده صديقاتي متصلين علي يقولون ياعزف زف لاتداومين يوم السبت ترى اجازه
وانا اللي انهبل وتقطر سعبولتي من زود الفرحه ولما سألتهم وش المناسبه خبري باليوم الوطني انه قضى من زمان
قالوا لا السبت اجازه بمناسبة رجوع الامير سلطان بالسلامه
ومير اطير وافرش سجادتي واصلي ركعتين وادعيله وعقب ماقضيت تذكرة اني مانيب على وضوء ماعلينا المهم النيه
واطس ابشر كل من مر بطريقي او غدر فيه حظه وكلمني هذيك الساعه
حتى موسى الهندي اللي في البقاله بغيت اروح ابشره لولا تدخل اخواني في الوقت المناسب
من الجمعه العصر حتى منتصف الليل وانا مسنتره عند التلفزيون انتظر هالخبر عشان اصحى على الواقع المرير انها اشاعه وانا اكلتها ياسعوديه ابآ عن جد بكل جداره
وعلى بالكم بنتوب لا قصم كل يوم بنطلع اشاعه وكل يوم بنروجها وكل يوم بنصدقها
العالم ماعندهم الا ابريل يطلعون فيه كذبه والا اشاعه واحنا كل شهورنا ابريل
مو بعيده بكره يقولون لنا اليوم الفلاني اجازه والا زياده في الرواتب بمناسبة ان الامير فلان جاله ولد عقب 9 بنات وهذا وجهي ان ماصدقناها

المحور الثاني : المقاطعات وماادراك مالمقاطعات
الشعوب عندها مظاهرات واحنا عندنا مقاطعات فديت تراب ديرتنا ماهي تحب التجمعات ابد
مافيه شي ماطلعنا عليه مقاطعه والا حمله
خلوها تصدي <~ مقاطعة السيارات
اللي محيرني انه في عز الحمله وثلاثة ارباع اللي مقاطعين مرتزين اربعه وعشرين ساعه بالمعارض ووكالات السيارات
الحين احد يفهمني هي مقاطعه والا مساهمه في ترويج هالسيارات وزيادة مبيعاتها
وكله كوم وحملة خلوها تعنس كوم ثاني
شوف عيني محد قالي اخوي يرسلها لــ اصدقائه بالاميل وهو متزوج وعنده 4 عيال وياكثرهم اللي كذا
الحين يالخبل الله رزقك واعرست وشفنا انتاجك من زينك انت وهالانتاج حاسد هالغلابا اللي مابعد اعرسو ليه
ماتخاف يجيك خبل يصدق مقاطعتكم ويطيح بتسبد اهله ومايعرس وتكون الضحيه سحليتن مثلي وشرواي تعنس واخرتها تعرس على هندي والا اسباني <~ قصم ان كان بيجيني الاخير لا انضم لحملتكم بس ياخوفي انه مو جاي
ماراح اتكلم عن مقاطعة المنتجات الدنمركيه والامريكيه والا ماكدونالدز وكنتاكي وحملة خلوها تخيس للالبان وغيرها وغيرها
خلونا بالجديد اللي هو



يعني شلون خلوها تطيش زياده مفيش
يعني اروح اشتري علبة بيبسي بريال ونص ثم ارجها وارجها الين احوس مريرها وافتحها عشان تطيش
طيب وان وسخت الكنب والسجاده وملابسي هذيك الساعه من بينظفهم <~ تشابكت اسلاك مخها
المصيبه ان اللي ماكان يشرب بيبسي الحين صار يشربه لما زادو سعره
اذا السوبر ماركت اللي عندنا لما سمع بالزياده ماصار يجيب الا كولا على باله مافيه احد بيشتري بيبسي
يحلف لــ اخوي انهم نشبو بحلقه وزاد الطلب على البيبسي اكثر
ليه ماادري واذا قلت لــ احد لاتشربه اشرب كولا نفس الطعم قالك وش فرقت كله نص ريال
مو حنا ماضيعنا الا ريال ونص ريال الين ماطار الراتب كله
طبعآ خبلتكم اللي هي انا اطال الله بعمري على طاعته ماكنت اعترف بأي مشروب من تعبئة الجميح ومن ارتفع السعر صرت اشرب شاني ابشركم
يعني سعوديه 100%

بتقولون يالخبله يالمزيونه عزف زف وش سالفة موضوعك اللي ماعرفنا له رأس من بنكرياس لا هو نقاش ولا هو عامه والا فرفشه
قصم ان معكم حق كنت اتسدح في اميلي واشوف من هالمقاطعات ومير اطس افتح الورد وينولد معي هالموضوع
طسيت فيه للعامه ومير تشوتني تق تق رحت فيه للنقاش وماامداني بحط موضوعي ونحاش الا وصايدتني رذاذ وتحذفني انا وموضوعي بالمحذوفات
عاد مايحتاج اقولكم من لقيت هناك هتلر بكبره متربع فيه قالي قشي موضوعك وطسي حتى هنا مالك مكان رحت لــ هتلره اشكيلها هتلر ومير تكمل الناقص
قلت مالي الا خبول وخبلات فرفشتي يالبى قلوبهم ماهم مسويين لي شي واذا على خياليتي وترتر مايدرن وين الله حاطهن <~ الله يستر وين بتطير هالمره هي وموضوعها

مايستفاد

1- فديت ديرتي وشعبها بأشاعاتها ومقاطعاتها <~ تدهن سيركم لا تشوتونها
2- اللي بخاطره يطلع اشاعه جديده لا يرده الا لسانه ويبشر باللي ينشرها له
3- + 18 اللي بالموضوع لا محل لها من الاعراب
4- كل من ذكرت اسمائهم بالموضوع لاتزعلون مني فديتكم
5- خياليتي احبتس ... ترتر الله يرجعك لنا بالسلامه ياغلاي

!! أنـثـى الـ خ ـيـآلـ !! حَرمٌ رآإشدُ إلمآجٌدٍ

هههههههههههههههههههه
هههههههههههههههههههههههه
هههههههههههههههههههههههههه
دقيقه وقصم بضحك
في كلمه عجبتني
<~ ميته ضحك ودها تقول الكلمه بس تخاف تنشنق

بسم الله نبدا <~ والله انها سمت يعني بتعقل

+18
هئ حتى الصعايده انحرفو
غربل الله عدوك من بنت يوم إنك حاطه إشاره و رقم
وانا احسب إن عندك شي واخذ اللاب واركض لغرفتي واقول لامي لاحد يصحيني
<~ وش تحسين فيه

(ايقونة صعيديه رايحه الغيط )
ههههههههههههههههههههه
ههههههههههههههههههههههههه
حسيتها تشبه مدري مين
<~ ومير تنشات

هذه الكلمه مشتقه من فضفاض
هههههههههههههههههه
ههههههههههههههههه
<~ ابد ما تخيلت شكل تمصاح بثوب ابوه
غربل الله عدوك لا عاد تقولين كلمات ملغمه

بربسه = هذه الكلمه مكونه من شقين
ههههههههههههههههههههه
ههههههههههههههههههههههه
هههههههههههههههههههههههه
<~ اغمن عليها
كم مره اقولك انتي لا تترجمين الكلام
حبي وقصم تكسبين اجر لو كتبتي بالابيض
يعني لو مشاورتني بالكلمه وش صار
كان وقصم قلت لتس كم معلومه تسذا بس اوب + 18
<~ والله ما بيتلسب احد غيرك

واحيانآ قد يغيبك ورى الشمس
<~ تفتح عينها وتنتف رميشاتها تحت شعار ×عز الله راحت فيها عزف زف×

عز الله إنهم لقو النفره المناسبه للجواز المناسب
لعنبو ابليسك إنتي متى بتهجدين وبتعقلين
غربل الله عدوك حتى الوزاره مراسليني امس يقولون قولي لمعزوفه بنطيرها ورى الشمس
قلت حشى والله ما تروح لحالها رجلي على رجلها
<~كثر الله خيرك

كل مواطن يختار لون جوازه اللي يحبه بأستثناء اللون الوردي والازق كــ مساهمه منها في الحد من الحروب السحلاويه التمساحيه
ههههههههههههههههههههه
يا التسذوب و بكل ثقه رازه الوجه و تتفلسفين
هئ .. وانا اقول ليه الوليد بن طلال حارق جوالي اتصالات
غربل الله عدوه طلع يبي يطقم معي بالون <~

وعقب ماقضيت تذكرة اني مانيب على وضوء ماعلينا المهم النيه
ههههههههههههههههههههه
ههههههههههههههههههههههه
ههههههههههههههههههههههههه
هذا وانا اللي دايم شاده الظهر فيك
واقول لامي عزيف دايم متوضيه
حتى يوم تقوم من النوم ما يبيلها وضوء
<~ اثاريها من شعب الاشعات هالدلخه

واحنا كل شهورنا ابريل

لااااااااااااع
شوفي ابريلنا انا وانتي غير حنا ابريلنا ابيض
هم اباريلهم سوداء <~ تخزها الزعيمه تقولها الوعد بالمسن

بمناسبة ان الامير فلان جاله ولد عقب 9 بنات وهذا وجهي ان ماصدقناها
ههههههههههههههههههههههه
هههههههههههههههههههههههه
لحظه قاعده افكر
<~ ومير ترجع تضحك
يالخبله وقصم تصير الاجازه بس قولي متى
معيزيف: متى
انا: إذا حنا اللي ولدنا مرته
<~ عز الله طلع البزر

وكله كوم وحملة خلوها تعنس كوم ثاني
شوف عيني محد قالي اخوي يرسلها لــ اصدقائه بالاميل وهو متزوج وعنده 4 عيال وياكثرهم اللي كذا
الحين يالخبل الله رزقك واعرست وشفنا انتاجك من زينك انت وهالانتاج حاسد هالغلابا اللي مابعد اعرسو ليه
هههههههههههههههههههههههههه
هههههههههههههههههههههههههههههه
من صرت اختكم وهم كانو بخبله صارو بخبلتين
ماينلام يوم إنه ارسل الايميل وقصم

علبة بيبسي بريال ونص
<~ تقوطر دميعاتها
من قمت اشوف حرف (نص)
وانا ابلع ريقي وامد اصابعي واعد
لو ابي 5 علابيب بيبسي كم بدفع
<~ والله من الطفره الله يرحم حالك

ماعرفنا له رأس من بنكرياس
<~ ترفع اصبعها تقول انا عرفت
سرته <~ مدري تنقال تسذا ولا تسذا ~> صرته
وش فيكم تناظرون كذا
ايه اصلا هذا الشي يكون بالبطن يعني بعز السالفه يعني بالنص <~ وتدمع عينها على رقم (نص)

واذا على خياليتي وترتر مايدرن وين الله حاطهن
ها
<~ والله ماكذبت الخبله يوم قالت ما تدرين وين الله قاطك

5- خياليتي احبتس
<~ تربعت تقول وشلون يعني
<~ هذا اللي هامك تبين الشرح انتي
وانا بعد احبك يا روح و قلبي ودنيتي
عزيفه المزيونه
والملغبه بالصعيديه
واللي لسانها طويل غربل الله عدوها
بما انك التحدئه الرسميه بإسم وزارة الداخليه وتصريف المياه
يُحلق موضوعك في سماء الفرفشه ، عسى الله يكثر من امثالك <~
الله لا يحرمني من خبالك وبربستك <~ ومير تتربع وتسمع التعريف هع
احبك
/

أســيل ©؛°¨غرامي متألق ¨°؛©

يسلموووووووووووو

تراتيل فرح ღ مُتعلقة بحبَالِ الرّجَاءْ ღ

<-- من شآفت آلعنوآن وهي تحمد ربهآ

يآخيتيّ آتركي عنتس بس ,

فضفضه لاتخلو من بربسه للسعوديين فقط +18
فضفضه = مشتقه من لقب فآضي ليل

لآتخلو = لآ آلنآهيه و تخلو [ تخ ] بمعنى آترك , [ لو ] بمعنى يآليت ~

من = حرف جزم ونصب

بربسه = برب [ للمآسنجر ] ~ [ سه ] و تعني بآب بآلتركيه

+18 = فتح خميس مشيط


/


<~ شآفت آلجوآز و صرقته و رآحت تحوس فيه بآلفوتو وتحط آسمهآ

ينعن شكل آبليستس يآبنت ,
آلحين فآضحتنآ بكل مكآن ~ كم مره آقولتس لآ تروحين للسفآره مآيقبلون يغيرون جنسيتس آلآفغآنيه لـ سعوديه
آلآ بقروش وآنآ وآبوتس نتعب فيهم
لآبوتس لآبو من جآبتس هنـآ

مدري شسوي في هآلبنت ..؟!

<~ هذآ آلي يقول كذبت آلكذبه وصدقتهآ






حلقتنا اليوم تتكلم عن محورين رئيسيين


<~ شآتت رآس خيآليه برجلهآ عشآن تشوف



ينقسم الشعب السعودي الى قسمين القسم الاول يبتكر الشائعات والقسم الثاني يروجها وكل القسمين يصدقونها غربل الله بليسكم يالسعوديين ولابارك الله في من عاداكم
<~ تتذكر يوم يقولهآ دحيم آنه ولد نعمه <~



وعلى بالكم بنتوب لا قصم كل يوم بنطلع اشاعه وكل يوم بنروجها وكل يوم بنصدقها

<~ تفكر بموضوع آلـ تعيين آشرآفي <~ كف من رذآذ




2- اللي بخاطره يطلع اشاعه جديده لا يرده الا لسانه ويبشر باللي ينشرها له
صرت مديرهـ


/

عزفزف

آلله يستر عليتس بس ,
ويرزقتس بولد آلحلآل آلي يقدر هآلنعمـه آلي عنده

<~ مصتآنصه ردت قبل مآتعدل خيآليه ردهآ خخخخخخخخخخخخخخخخخخ
تحيتي
/

لحن الروند ©؛°¨غرامي مبدع¨°؛©

يا لبى قلبي يا عزف زف

تهت همن تهت في الموضوع

بس ستلمييييييييين

حلا بنات ©؛°¨غرامي نشيط¨°؛©

هههههههههههههههههههههه
حلللللللللللللللوه
يسلمووووووووووووووووو ياالغلا

بنت حساسة مثل الألماسة ©؛°¨غرامي فعال ¨°؛©

ههههههههههههه
تسلمي عالموضوع الحلوا..
ومادام فيه إشاعات وما إشاعات..
حقلكم إشاعة ولد خالتوا<< أحلواا...

استعدوا..

بم بم بم بم بم << صوت القنبلة..

الملك عبدالله الله يحفظه .. راح يهرب من السعودية بسبب سيول جدة..
وترا قبل شوية أتصل عليه قلي جهزي الطيارة.. عشان كاذ أقولكم أهربوا .. بسرعة..
ولا راح تروحون في البايباي..

هـــــيـــــام «● يگفيـنـﮯ وجۈدگ ●»

يسلموووووووووووووووووووو

{ ترآإآنيم آلشوق ..~ ©؛°¨غرامي فضي¨°؛©

حجززز يآلصعيديه ..~

الزعيـ A.8K ـمه δЯέαмş
مستشــ¸.·* غرام *·.¸ـــاري

,’



رآجعه لك يـ الصعيدية


’،



و عليكم السلآم و الرحمــة
<~ أتخيل إنك سلمتــي

أحد قآلك قبلـــي إنك خبلة رسمـــي ؟!!

لو تشوف توليب هالإعرآب تتقآعد


المحور الاول : الاشاعات وما ادراك مالاشاعات
و إنتي الصآدقة ‘ ليش نصدق أي شيء حتى وحنآ ندري إنه مستحيل !!
مثل اللي يقول رآتب رمضآن و العيد دبل



المحور الثاني : المقاطعات وماادراك مالمقاطعات
مآ قد فكرت أقآطع شيء أحبه ‘ مهمــآ كآن السبب
مآ أحب أبدل شيء بـ شيء اقل منه إذآ مو مقتنعة
أمآ البيبسي قآطعته من 6 شهور تقريبـــاً إجبآري و اللحين تعودت على هالشيء

ليه ماادري واذا قلت لــ احد لاتشربه اشرب كولا نفس الطعم قالك وش فرقت كله نص ريال
الإسبوع المآضي كلمت عمتي البقآلة يجيب بيبسي للعشــآء ‘ قآل : هذآ ريآل و نوص <~ !!!
قالت جدتي أحسن لآ تطلبين مو لآزم ( تبي الفكه منه )
قآلن البنآت لو بـ 10 هآته وش يعني الـ ( نوص ) على قولته !!!




عاد مايحتاج اقولكم من لقيت هناك هتلر بكبره متربع فيه قالي قشي موضوعك وطسي حتى هنا مالك مكان رحت لــ هتلره اشكيلها هتلر ومير تكمل الناقص
خلآص هونت .. قررت بـ التشآور مع هتلر إن نرسله لـ المتميــزة



زف زوفتـــي ... يآ بعدهم إنتــي
موضوعك يجنن مثلك و متميـــز
<~ تري نصي نآيم ع الجهآز :(




و ننتظـــرك هنــــآك





,’




أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1