منتديات غرام روايات غرام أرشيف الروايات المغلقة - لعدم إكتمالها يوم الأمل ماجت ع ميعادها ويوم الألم جتني ع ميعادها / بقلمي
قويت ©؛°¨غرامي فعال ¨°؛©





احبتي اعضاء منتديات غرام
اقدم لكم روايتي العذبه بعنوان : يوم الامل ماجت ع ميعادها ويوم الالم جتني ع ميعادها
اهداء الى قلبي فقط

تنبيه : الروايه مختلفه نوعا ما عما يطرح من الروايات كتبت بالعاميه البسيطه لاتحوي ع شخصيات كثيره تحاكي صراع العقل والروح
كتبت بايام الفراق والروايه ديباجتها استطراديه من الاخر للاول يعني فصولها عكسيه تحكي قصه حب وفراق وعشره سنين وصراع بين الالم والامل
وياليت ماتستعجلون علي بطرح البارتات خلوني ع راحتي الله يخليكم وواوعدكم مابخل عليكم باي بارت اول مايخلص راح اطرحه لكم فورا .

الروايه : حصريه
الحقوق محفوظه بموقع غرام

الكاتب : اخوكم قويت - جمره غضى .


البارت الاول

قويت : هلا صباح الخير يمه
امي : هلا قويت صباح الخير ياوليدي
شلونك يمه عساك طيبه
اوف يمه ياكرهي لهالدوام كرهاه ماحبه ماطيقه كاره الشغل كله
يمه خلاص مليت من الروحه والجيه اووف كل يوم موديني بديره وكل يوم بمحل اووف يارب ريحني
والله يمه لولا قوله الناس اني عاطل باطل لاترك هالشغل باللي فيه جزعت روحي منه ولاني ناقص همومه
امي : لا اله الا الله اذكر الله ياوليدي
كل الناس تشتغل وتداوم مهوب انت لحالك
وشفيك الله يهديك طقيت الباب عليك ياوليدي الساعه 8 اصحيك مارديت علي احسبك منتب رايح
قويت : لايمه وشلون ماروح لازم اروح انواع الحوسه والقلق عندي بالمكتب
بس منب اعرف ارقد بالليل زين ابد ابد حلومي كلها جواثيم وروعات
منب اتهنا بالنوم ابد وحتى القومه تتعبني يمه انام مفزوع واقوم مفزوع
امي : وراه ياوليدي ماترقد بسم الله عليك
يمه راحت الي تصحيني وتنومني !!
كانت تدق علي كل هالسنين تقومني وتنومني !!
امي : هاو وش تقول انت ؟!
رجعنا لخرابيطك الاوله
شف القهوه والتمر عندك تعال تقهو قبل لاتروح بس
شبلاك الله يهديك ماعاد صرت اشوفك لاتغدا ولاتعشى ولاتجي من الدوام الا مصيف
وكل يوم مسافر تجي وتروح مدري عنك الا انت مكلمني مرتن بتبوك مرتن باابها واقعد بالايام ماشوفك وشفيك ياوليدي ؟
قويت : يمه امل راحت ومن عقبها لاعاد لي نفس لابراح ولابمستراح ولو يحصلي تركت هالرياض كلها باهلها
امي : هاوو وش فيك بسم الله عليك امل في بيت هلها والحين تلقاها بجامعتها ماعاد بقى لها الا هالترم وتخلص الله يتمم لكم ع خير
قويت : لايمه امل بطلت ماعاد تدرس خلاص خلاص ماعاد تدرس حتى دراستها حرموها منها !
امي : وشو
ياوليدي شبلاك منتب صاحي
وش تخربط أنت وش تقول ؟؟
قويت : يمه خلاص امل راحت راحت راحت وماعاد هي راجعه ابد
امي : لاحول ولاقوة الا بالله انا لله وانا اليه راجعون
ياوليدي انت وشفيك ترا من عقب الملكه واحوالك مهيب عاجبتني
وشفيك وانا امك وشفيها امل وشقصتك تهذري ؟؟
اماك تقول منب ماخذها الا لين تخلص دراستها وتخرج من الجامعه
وشلون تقول انها راحت وماعاد تدرس ؟؟
ولا عجلن ع رزقك اصبر ياوليدي
الحين معيي لاتاخذها اول ماخطبناها لك اول مادخلت الجامعه قبل 4 سنين والحين تهذريبها خلاص ماعاد بقى الا شهر وتاخذها
قويت : يمه خلاص لاتطرين هالاسم عندي اكره اسمها لاعاد تنطقونه عندي اشوفه واسمعه بكل محل بعقلي وبروحي بالبيت بالشارع حتى بلوحه السيارات اشوفه والادويه مابي اسمعه ابد ابد
ماحبه ماحبه ماحبه يمه خلاص كافي عذاب
ليتني اموت يمه اكره العرس واكره امل واكره الدنيا واكره الناس واكره نفسي ليتني اموت وارتاح
امي : لاحول ولا قوه الا بالله
ياوليدي شبلاك وشفيها امل ؟
وشزينها كنها البخت مملوحه وعاقله وكل مواصفاتك اللي انت تبيها فيها حتى شعرها مسيكنيه موذيها تبي تقصه ومعييه امها عليها كله بسببك
جمال وكمال ودين واخلاق وحبيبه وطيبه وحياويه ولاكلمتها قامت تنافض وتخربط من الحيا
قل امين ياوليدي عسى الله يهدي سرك ويرزقك الذريه الصالحه منها ويوفقكم ويتمم لكم ع خير
قويت : يمه خلاص البنت مافيها شي ولالها دخل باي شي بالعكس ست البنات بس يمه امل غير
والله غير يمه هي راحت وربي يسعدها ويوفقها بس املي غير املكم ومابي اظلمها انتم ظلمتوني وامل ظلموها والضلم عذاب يمه عذاب يمه .
انا وشلون اسوي مدري والمشكله مهيب فيني في قلبي وعقلي ااااه يمه ليتكم تحسون فيني وبعذابي .
بقوم اروح الدوام ابرك لي يمه استغفر الله العلي العظيم واتوب اليه ياربي لاتواخذني ياربي سامحني
امي : لاحول ولاقوه الا بالله ايه وانا امك اذكر ربك واستغفر ترا لاهم الا هم العرس ولاوجع الا وجع الضرس ماتنلام ياوليدي قاعدن تخربط ع هالصبح
قويت : على رايك يمه لاهم الا هم الفراق ولا وجع الا وجع الساق
امي : بسم الله عليك ولا رجعت من الدوام ابيك بكلمك بموضوع حالك مهوب عاجبني ابد ابد
قويت : ع خير يمه يالله فمان الله دعواتك يمه والله اني كارهن نفسي وكل شي حولي واحس روحي بتجزع من اللي انا فيه ..


يتبع >>

مع اروع امنياتي للجميع
محبكم : قويت جمرة غضى



الزعيـ A.8K ـمه ©؛°¨غرامي ماسي ¨°؛©

,’



بسم الله


يعطيك العــافية
موفق إن شـــاء الله


https://forums.graaam.com/238622.html


,’


قويت ©؛°¨غرامي فعال ¨°؛©

الزعيمه
ربي يوفقك ويخليك
تم الاطلاع مسبقا شاكر لك اطلالتك الكريمه في صفحتي المتواضعه

؛؛همس الروح؛؛ [®]همس الحروف[®]
مستشــ¸.·* غرام *·.¸ـــاري

فى البدايه عجبتى الأم ومدى صبرها ودعمها لولدها


ولكن للأسف


كثيراً ما تكون رغبه الأهل ضد الأبناء فى إختيار شريك/ شريكه الحياه


وهذا ما يسبب الإكتئاب و تدمير النفس والفشل فى الحياه الزوجيه وإرتفاع نسبه مستوى الطلاق



قويت


جميل البارت الأول بالرغم من كم الحزن والضغط النفسى فيها


إلا إنها سردت بشكل تلقائى وسهل



أتمنى فى البارت الثانى أن يتبدل حظ قويت



ويحظى بالسعادة وراحه البال



فى إنتظار البقيه





إحترامى

soumia f ©؛°¨غرامي فعال ¨°؛©

السلام عليكم
بداية ولا اروع اخي البطل قويت يعيش ماضيه او هكذا اتوقع فامل زوجته انتظرها لسنوات ثم يقول بانها ذهبت للابد ولا اظن انها ماتت لانهم اوقفوها من الدراسة لابد ان الموضوع خطير فان يترك زوج زوجته قبل العرس بعد ان كانت كل شيء في حياته وحالته بعدها و كيفية حديثه مع امه اكدت انها تركت اثرا كبيرا في نفسه فقويت كره نفسه و حياته ومحيطه
يتكلم عن ظلم لحق امل لكن من ظلمها هل هم اهلها وهو معهم ام ناس اخرون
الرواية مشوقة ننتظر القادم منها
تقبل مروري
موفق باذن الله

قويت ©؛°¨غرامي فعال ¨°؛©

المشاركة الأساسية كتبها ؛؛همس الروح؛؛ اقتباس :
فى البدايه عجبتى الأم ومدى صبرها ودعمها لولدها


ولكن للأسف


كثيراً ما تكون رغبه الأهل ضد الأبناء فى إختيار شريك/ شريكه الحياه


وهذا ما يسبب الإكتئاب و تدمير النفس والفشل فى الحياه الزوجيه وإرتفاع نسبه مستوى الطلاق



قويت


جميل البارت الأول بالرغم من كم الحزن والضغط النفسى فيها


إلا إنها سردت بشكل تلقائى وسهل



أتمنى فى البارت الثانى أن يتبدل حظ قويت



ويحظى بالسعادة وراحه البال



فى إنتظار البقيه





إحترامى
الله كريم
همس الروح
شاكر اطلالتك الكريمه في صفحتي المتواضعه

قويت ©؛°¨غرامي فعال ¨°؛©

المشاركة الأساسية كتبها soumia f اقتباس :
السلام عليكم
بداية ولا اروع اخي البطل قويت يعيش ماضيه او هكذا اتوقع فامل زوجته انتظرها لسنوات ثم يقول بانها ذهبت للابد ولا اظن انها ماتت لانهم اوقفوها من الدراسة لابد ان الموضوع خطير فان يترك زوج زوجته قبل العرس بعد ان كانت كل شيء في حياته وحالته بعدها و كيفية حديثه مع امه اكدت انها تركت اثرا كبيرا في نفسه فقويت كره نفسه و حياته ومحيطه
يتكلم عن ظلم لحق امل لكن من ظلمها هل هم اهلها وهو معهم ام ناس اخرون
الرواية مشوقة ننتظر القادم منها
تقبل مروري
موفق باذن الله
عليكم السلام بروعه حضورك والمساله مزدوجه ومعقده بنفس الوقت !
راح تبان الازدواجيه فيها .. فيما بعد
دعواتكم اقدر اكملها لحد النهايه
شاكر لك اطلالتك العذبه ولاتحرمينا من مرورك العذب

قويت ©؛°¨غرامي فعال ¨°؛©

البارت الثاني


يمه ، أنا في عالم الحب مرسال ... تكـــــفين من نار العذاب ادركيني

صمتي قتـــــل في داخلي كل الآمال ... وتبـــــــخرت أحلام أول تجيني

كنت أحسب الـــــدنيا قصيدة وموال ... موالها فــرح ، وفرحها هجيني

لكن نـغمها ماطرالــــي على البال ... ان اللـــــــــيالي بطبعها تكتفيني

يمه ، جهلت اسنين ، وسنين أطوال ... أمشي وتصفق في هواها يديني

يمه .. أنا مالي في هالزرع مقيال ... يمــــه ربيع الكون ماهو بعيني

ماشاقني طفلٍ وأنا صرت رجال ... وأطلقت بـــــــالأيام مهرة سنيني

يمه رضيت بكل مايرضي الحال ... بس الزمــن بــالحيل يلوي يميني

نوّخت فكري لــلتواضع ولا زال ... وجعلت فـــــي وكر الكرامه جبيني

ومديت كفينـــي عطا تشعل اشعال ... أصابعي شمـــــع لمن هو يبيني

وجعلت فــي قلبي للأحباب منزال ... وسكنتهم رغــــــم علي عاذليني

طبعي كذا ، ماخالطه خبث واهبال ... أشـري الذي في خاطره يشتريني

كنت أذكر البسمـه على شفاة الأطفال ... كانت تحرك كل الأفراح فيني

أطرد سراب وداخل الأرض زلزال ... آه الـــــــظما يقتل سنابل حنيني

يمه كفوف البرد ماتدفي الشال ... أرمـــي الزمان وبالحنان احضنيني

يمه شكيت ومابغيت أشكي الحال ... صوت انهتف في داخلي سامحيني



ابوي : هيشش ياولد !
امي : هلا هلا بو حمد
ابوي : راح قويت للدوام ؟ولالا
امي: ايه بسم الله عليه توه رايح من شوي
ابوي : زين انه راح
امي : الا بسالك يابوحمد
ابوي : خير ان شاء الله وش عندك
امي : قبل الملكه قويت ظهروا له امل وسلم عليها ولالا ؟
ابوي : ايه شافها قبل لايسافر انتدابه حايل .
امي : متى ؟
ابوي : يوم اروح انا وياه يوم الخميس هما ابو عبدالرحمن عازمنا نتقهوا عنده
وكان قصدنا يشوفون بعض قبل الملكه وفاضت علينا بالمجلس بسم الله ماشاء الله عليها
كنها البخت الله يعينها ع ولدك وغرابيله !
امي :ماشاء الله عليها
ابوي : وش حلوها تهبل الله يالدنيا اذكرها وهي صغيره دلوعه ابوها
وتحب الكاكاوات تصدقين يام حمد ان ابوها يبديها ع خوانها وخواتها بكل شي مدللها ومدلعها وبسم الله عليها
عقلها بالدنيا كله على ان توها بزر بس بسم الله عليها .
امي : ايه بسم الله عليها طالعه ع امها الخالق الناطق جاذبتها بكل شي .
ابوي : ايه ماشاء الله عليهم حمران عطران وجدي لو الزمن راجعن بي ورى بس !
امي : ايه وش كان يابوحمد خير ان شاء الله لو رجعبك الزمن ورى وشكنت سويت
ابوي : ههههههههههههه وش بسوي يعني ياام حمد
امي : ايه هذولا انتم يالرجاجيل زمامكم ضايع
ابوي : هههههههههههه الله يهديك بس يام حمد مابدلك لو اعيش عمري مرتين انتي الغاليه
امي : ايه قص علي يابو حمد
امي : المهم يابو حمد حسبي الله علي ابليسك نسيتني وش بقول !
ابوي : خير ان شاء الله وش فيك يام حمد
امي : انت تقول ان امل دخلت عليكم يومنكم عند ابوها
ابوي : ايه وسلمت علي وحبت راسي وقعدتها جنبي
امي : طيب وقويت وش سوى سلم عليها ناظرها كلمها قال شي علمني!!
ابوي : الله الله وشبلاك ايه سلم عليها .
امي : بس !!!!!!!!!
ابوي : ايه بس وش تبينه يسوي بعد يقوم يحبها ويتحضنها !! هذا اللي ناقص بعد !
امي : هاو وش هالحكي لاقصدي قويت ناظرها ؟ شافها ؟ تمقل فيها ؟ وامل شافته تمقلت فيه ؟
شلون قعدوا ؟؟ قعدوا قبال بعض ولا جنب ولاوشلون
ابوي : يام حمد البنيه ماكلها حياها مارفعت راسها من الارض ابد ولاطولت خير شر
امي : طيب وقويت !!
ابوي : وشفيه قويت بعد ياه الولد اللي مغربلني !!
يحمد ربه ويحب رجله ويده انهم موافقين عليه خير ان شاء الله ياام حمد
بدينا بالخنبقه والتخقق !!
امل لقويت وقويت لاامل وانا متفقن مع ابوها قبل 20 سنه اول مانولدت اتركينا عن الخربطه والكلام
الفاضي .
والرجال سايقن بنته للولد سووق وشارينا شري ولو يدور الف بنت وحموله مايلقى مثلهم
وبعدين تعالي
قويت وشهو قايل هالولد متعبني مدري وشقصته مطلع النخل براسي ع هالموضوع؟؟
امي : هاو وشفيك ماقال شي ابد
ابوي : اجل وش هالخنبقه والله ثم والله يام حمد لو اسمعه او ادري انه يتخقق مايبي البنت اني لاتبرا منه
الى يوم الدين وانتي بعد تحرمين علي دنيا واخره فاهمه ولالا بنات الناس مهوب لعبه عنده .
امي : ع هونك يابوحمد انا وش انا قايله هبيت فيني والله اني احب امل واهلها
واتمنى هالبنت انها تكون نصيب وليدي وانت خابرني لاعمري خطبت له ولادورت
مثل باقي اخوانه ومنتهي الموضوع عندي من زمان !
مار ياقلبي ياقويت ماعمره طرا لي خطبه ولاعرس ولاعمره طرالي العرس خير شر
ويام صحت عليه من يوم هو بو 20 سنه ابيه يعرس وابي اخطب له والمح له ولاعنده ماعند جدتي
كل ماطريت له طاري قال يمه العرس لاهله !
ابوي : ايه لو هو رجال وعنده شكيمه ماغفل عن العرس
امي : عاد حدك يابوحمد قويت ولدي رجال من ظهر رجال كل المرجله والحميه والكرم عنده والله اني
مابعد شفت بعيالي مثل طيبه وعقله وادبه وصبره وحزمه وكرمه لوهي اللقمه ياقليبي مايتهنى فيها وماياكلها
الا واخواته واخوانه عنده هذا ولدي اعرفه زين مكرم الغريب قبل القريب
اخبره زين زين مربيته رجال من يوم هو صغير ولاهنا قصور باخوانه بس هو غيرر
ابوي : ايه ماقلنا شي وهذا اللي ذابحني كلن يمدح فيه ويثني عليه بس مدري وشخبطته مايحس مايغار
من عيال عمومته اخوانه الحين كل منهم بزرانهم يمشون قدامهم الاهو والله ان قلبي ياكلني عليه يام حمد
وياام حمد قويت كبر خلاص وماشي بال30 الحين ولانب دايمن له
ابي افرح به واشوف عياله قبل لاتزل رجلي عن الدنيا .
امي : الله يطول بعمرك يابوحمد ويخليك لنا
ابوي : ام حمد وش صاير وشهاللغوه كلها قويت وشفيه وشهو قايل عسى مهوب مسوي شي مسودن وجيهنا
مع الناس ؟
امي : لالا بسم الله عليه مافيه الا العافيه بس قلت انشدك اشوف ابي اتطمن عليه .
ابوي : اشوا
اسمعي يام حمد
قويت لو مازوجته مهوب متزوج ابد اعرفه مدري شقصته الولد مافيه شفقه ع العرس ابد ابد
وانا خاطب له امل من زمان ولاابيه يقطع وجهي لاعندها ولاعند ابوها .
امي : طيب وش قال يوم شافها ؟ قالك شي
ابوي : واحدن يحصله امل ويقول شي !!
جمال ودلال وتوها صغيره وبنت عز متعلمه ودارسه وراعيه بيت وش يبي اكثر من كذا .
امي : والله مدري يابوحمد الولد مدري وشفيه قلبي كاسر قلبي.
ابوي : عمى يعميه وشفيه ؟!!
امي : بسم الله عليه لاتدعي عليه تكفا يكفي اللي فيه !
يابوحمد قويت فيه شي كاتمه بقلبه كاسره كسر
مدري وش اقولك هذا وليدي واعرفه فيه بلى !
اشوف الدمع يفيض بعيونه !
واشوف العبره تخنق بلعومه !
ياقلبي ياقويت الله يهدي سرك
ابوي : لاحول ولاقوه الا بالله انا لله وانا اليه راجعون
انا وش اسوي وش مقصرن فيه والله اني شايلن همه من بد اخوانه واغليه يام حمد
اااه يام حمد وش هالدبره من هالعيال ماجاني منهم الا الشيب وعمى العين !
ام حمد :انا خااايفه حيل على ولدي
اخاف ان حنا ظلمناه وغصبناه ع العرس وحديناه حد ع البنيه !
ابوي : لاحول ردينا ع طير ياللي !!
ابوي : المهم انا بروح للمزرعه الحين عندي عمال وحوسه
تامرين شي ياام حمد
امي : ااااااه يارب اشرح صدر وليدي وفك ضيقته
ابوي : وشو شفيك
امي : هاو وشفيني ادعي لوليدي ابد مانبي شي سلامتك ورضاك وانبته لعمرك
ابوي : فمان الله
امي : فمان الكريم



يتبع >>>


؛؛همس الروح؛؛ [®]همس الحروف[®]
مستشــ¸.·* غرام *·.¸ـــاري

قويت

سلمت على البارت الثانى


فى إنتظار البقيه

إحترامى

قويت ©؛°¨غرامي فعال ¨°؛©

المشاركة الأساسية كتبها ؛؛همس الروح؛؛ اقتباس :
قويت

سلمت على البارت الثانى


فى إنتظار البقيه

إحترامى
تسلم روحك هموسه

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1