منتديات غرام روايات غرام أرشيف الروايات المغلقة - لعدم إكتمالها رواية ضقت من دنياي و أيامي لذا صرت أفرح كلما القلب إنجرح / بقلمي
نورحياتي ©؛°¨غرامي جديد¨°؛©


بسم الله الرحمن الرحيم
والسلام عليكم ورحمة الله وبركاته


هموم تمر بأيامنا تصبح الدنيا ضيقه رغم وسعها وكبرها
ولاكنها تضيق بأعيننا......
كثير من يرسم ابتسامه ألم والكثير من يخفي آلامه أمام أبتسامه باهته لامعنى لها.....
دمــــــوعنا..... نعبر عنها بطريقة أخرى غير سقوطها نضحك ونضحك ونضحك لأخفاء ملاين من الدمعات....
*
*
*
حياة أبطالي مؤلمه سأتعايشها وانا أسردها لكم وتتعايشون معهم عند قرائتها.....
الآم هل ستنتهي يومآ.......
منهم من كانت ضحيه لجبروت وقساوة قلب أب كونها البنت الخامسه.....

منهم من صعب عليه العيش وصعب عليه أيجاد لقمه يسد بها جوعه ورزقه الله بطفلتين واحده تركت عند باب جامع ضحية الفقر والأخرى تعيش بين يدين والديها لتصارع الجوع معهم.......

منهم من دافع عن الحق ووقف مع المظلوم ضد ظالم هو أبيه فكان نتيجة دفعاعه عن الحق وخوفآ من عقاب ربه العيش وحده أرضائآ لرغبة والده......

منهم من أحب ووصل لمرحلة العشق الجنوني وفترقا بسبب حقد وغيره غيرهم وقلوب ضعيفه ســـــوداء......

لن أسلسل لكم جميع احداث روايتي ولاكن هاذه أهمها
سأترك لكم الغوس في عالمهم والتعايش وسطعم وفتح المجال لخيالاتكم لرسم أشكالهم وعيشتهم وألآمهم.....
*
*
*
يمكن تكون روايتي الاولى (كـــــبرتني ياهم) اكثر جرئه ولم تناسبكم لأنها بدوله عربيه تركيــا مع انها بالنسبه لي اكثر تشويق واللي ماساعدني بأكمالها قلة الردود اللي ضليت انتظرها لأيام ......
هذا روايتي الثانيه واتمنى تكون افضل من الأولى وبدولتنا السعوديه هتكون مناسبه بما انها بمحيط مجتمعنا .....
وانشااالله انتهي منها ارجع واتابع سرد الروايه الاولى
لاتحرموني من ردودكم لانها مصدر لثقتي واتمام كتابتي..


ضـــقت من دنيــــاي ويــــامي لذا صـرت اضحك كلما القلــــــــب انجرح.....

للكاتبه:نور حياتي
*
*
*



احلام مــــزعجه...

بمنتصف الليل آه آه آه رفعت يديني على صدري اللي يتصاعد بكل سرعه ودقات قلبي اللي اسمعها بأذني مررت يديني بين شعري أعوذ بالله من الشيطان الرجيم وش هالحلم اللي مو مخليني بحالي رفعت كاس الماي شربت وبديت اهدى شوي شوي انسدحت على جنبي اليمين وبديت اقرى المعوذات لين رجعت غفيت من جديد......
*
*
*


زهره ذابــــله ....
عندما تطفأ المصابيح فى الشارع الضيق الطويل ، وتبدأ بشائر الصباح فى الحى ، ومع أول شعاع للشمس ، تكثر الحركة فى الطريق ، ويبدأ الفتية والفتيان فى ساعة معينة من النهار ، لا يتأخرون عنها ولا يتقدمون ، يتوجهون إلى مراكز تحصيل العلم ..
لم يكن نهار اليوم ككل الأيام ، كان شديد البرودة ، برودة لا تحتمل ، كان البرد الشديد يسقط من السماء ، ويتصاعد من الأرض ، ويهب من كل جانب ..
وجسدها كله على الأرض الباردة ، وظهرها يلاصق الجدار ، وفوق جسدها الضئيل ، الغطاء الصوفى الثقيل ، ممزق الأطراف ، ملوث الجوانب .. وقد ضمته على صدرها لتحس بالدفء فى يوم بدا شديد البرودة ..
ولباسها الأحمر يكسبها جمالا فوق جمالها وحسنها ، فإذا انزلق الغطاء عن رأسها ، انسدل الشعر على جانبى الوجه ..
على الرغم من تعب الحياة ونكد العيش ، فإن جسمها ووجهها احتفظا بنضارتهما وعافيتهما ، كل ما يغيرها عن الأخريات من لداتها اللاتى يعشن فى مثل سنها ، ولكنهن لسن فى مثل بؤسها ، وجهها الجميل كان دائما حزينا ..
وضعت فى يدها النقود نظرت إليك بعينين فرحتين ، وعلى شفتيها الرقيقتين ابتسامة ..
ترى الفتيات فى مثل سنها يسرن فى طريقهن إلى المدرسة ، كانت تنظر إليهن وقلبها يتمزق ، ونفسها تحترق ، ويغشاها سحب الهم، فتغض طرفها وتنكس رأسها وتنحنى بجسمها على الأوراق وتديم النظر وبصرها سادر كأنها تتخيل وتتصور وتحلم ، غير مدركة لما يدور حولها ، وترسم بالقلم دوائر وخطوطا أوسع من دائرة حياتها الشقيه
*
*
*
الفصل الاول......
تدلل آمر وانا ابوك وش بغيت
عدل جلسته ورفع حاجبه بغرور \ماعليك امر يبا سياره جديده داخله بهالراس ابيها
سالم\ماطلبت لك اللي تبيه
تكلمت بقهر\بس يايبا سيارته مالها سنه من شراها
سالم بعصبيه\اوس ولاكلمه تفهمين قوموا عن وجهي لابارك الله فيكم
قاموا البنات كلهم على فوق واجتمعوا بغرفه اختهم الكبيره.....
هيفا\وربي هاذي مب حاله سامي بعده صغير على كل هالاشياء
هاجر\لابارك الله فيه ولابولده
هيفا ضربتها بخفه\وش هالكلام هاذا ابوك
هدى دمعتها بطرف عينها\أي ابو واللي يرحم والدينك اللي حرمنا من اختنا يعني جات عليها المسكينه
قامت هاجر بسرعه وسكت الباب\اووووس لايسمعك والله يذبحك
هدى\خليه يذبحني وربي ابرك لي من هالعيشه
خرجت ودفت الباب بقوتها .....
هيفا\آآآآه تصدقون ودي اشوفها
هناء\انتي ولاانا بموت وشوفها وامي الله يهديها مب راضيه تدلنا على مكانها
هاجر\لاتلومونها هذا كله خوف من ابوي والله لو يدري انها تدل طريقها كان حرمها من الطلعه
هيفا\الحين وصلت ل19 سنه صح
هناء\اي اصغر من هدى بسنه بقوم اشوفها
خرجت هناء قامت هاجر وسكت الباب قربت من اختها ومسكتها من يدينها\هاااا فكرتي
هيفا\يووووه ياهاجر الكل ينسى الا انتي مابي اعرس
هاجر تصطنع الزعل\ليه ماتبين تفرحينا لمتى يعني بتقعدين كذا
هيفا\قصدك لمتى بقعد عانس انا راضيه مابي زوج يطلع لي مثل ابوي ولا اخص
هاجر\هيفا اصابع يدينك مب سوى
هيفا\بس هالخطيب لاتنسن انه من طرف ابوي اكيد من طينته هذا انتي رحتي ورديتي
هاجر بألم\اآآآآآآف خليني ساكته ابرك
*
*
*


بوحده من القــــــرى القريبه من منطقة الــــــــرياض......
البرد ذابحني يما
مريم تعطيها البطانيه الصوف اللي عليها \خذيها بس لاتزعجيني
طيب جوعانه
مريم\يوووه ياعنود خلاص سكي حلقك من وين اجيب لك سكتي بطنك بهالتمر اللي قدامك
عنود\اف وش هالحال ياربي
عيسى اللي كان منشغل بتصليح نظارته\استغفري ربك يابنت
عنود بملل\استغفر الله العظيم بس انا زهقت والله
مريم\قومي روحي لبيت الجيران ريحي راسي
عنود بجديه\تصدقين يما اليوم من صحيت وانا احس بألم برجليني يعني مدري شلون اوصف لك يعني فيني ومو فيني
عيسى\خبله انتي
عنود\يووو لايبا امممم مدري شلون اوصل لكم احساسي بس محد فهمني غير حنين تقول هي تحس بهالشي لو اختها حلا صار لها شي تدرين هم توم ويحسون ببعض بس انا ماعندي توم غريبه والله
طاح فنجان القهوه اللي بين يدين مريم على جسمها من رجفة يدينها
وتسارعت دقات قلبها رمشت بسرعه وعينها على زوجها.....
عنود قامت بسرعه \يمه بسم االله عليك بروح اجيب ماي بارد
عيسى مو اقل توتر منها لبس نظاراته والتفت \مريم واللي يرحم والدينك لاتحسسين البنت بشي اللي فيني كافيني
مريم نزلت دمعتها\الله يسامحك حرمتني من بنتي وهاذي هي الثانيه بدت تحس فيها
عيسى مرر يدينه بوجهه \مريم لاتعيدين وتزيدين بهالكلام اللي صار صار احنا وحده ماقدرنا نأمن لها اكلها ولبسها وشلون لو كانوا اثنين
جتهم عنود وحطت الماي بجسم امها وباست يدينها\يألمك يما
مسحت مريم على شعرها بحنان وضمتها\لا ياعيون امك انتي
*
*
*

سلام
الكل التفت ناحية الباب\وعليكم السلام
حياه ببتسامه\تعال وانا امك اقعد ويانا
فؤاد التفت لهم وحس بقرف من هالوجيه وطلع لغرفته.....
حياه ضربت خدها و نزلت دمعتها\هاذا مو ولدي اللي ربيته فيه شي قلبي قابضني عليه
سماح\اي ونتي الصادقه يما تصرفاته كلش مو طبيعيه
مها\من بعد ماترك زوجته وهاذي حالته
حياه\حسبي الله على اللي كان السبب اللي مبعد ولدي عني حسبي الله ونعم الوكيل عليه
سماح\بس يايمه انشاالله مافيه الا كل خير يمكن عشان طلاقه هو وزوجته فتره وتعدي انشاالله
مها\الا هو ليه مطلقها
حياه بقهر\خلها تولي لو هي سبب اللي فيه
سماح\حرام عليك يما انتي تدرين هاجر لايمكن تضره
حياه ضربت رجليها ونطقت بعصبيه\اجل وش اللي موصله لهالحال من بعد ماتركها وهذا هو حاله الله لايكافيها
مها\بس يايما لاتدعين وتظلمينها
*
*
*
رفعت جسمها بصعوبه عن الارض وقامت تمشي بخطوات بطيئه بانكسار من وضعها مرت من احدى المطاعم ووقفت تتأمل الداخل بيدين فارغه وخارج بأكياس مليئه بوجبه دسمه ورائحتها تفوح بكل ارجاء الشارع دخلت يدينها بجيبها تشوف اللي حصلته اليوم ماتعدى الثلاثون ريال ماتقدر تتصرف فيهم ولاهتلقى الويل مشت متابعه طريقها للمنزل او للسجن اللي رافقته بطفولتها وحتى سن مراهقتها الان فتحت الباب واستقبلها جيش من الاطفال الصغار عقدت حواجبي بأنزعاج من هالحال اللي القاه كل يوم بعدتهم عني بصعوبه من تعلقهم بجسمي قبل لدخل غرفتي الضيقه التفت على صوتها وهي تنادي اسمي الشي الوحيد اللي اعرفه عن اهلي انه وصوها تناديني بهالاسم هنـــــــــوف
شفت نظراتها المرعبه اللي للآن ماتعودت عليها رغم طول السنين اللي عشتها معاها ...........
فوزيه بحده\وين الفلوس والله لو نقصتي منهم ريال ماتلومين الا حالك
قربت منها وعطيتها الفلوس وانا ارجف عدتهم وتكلمت
فوزيه\روحي للمطبخ خذي عشاك وانخمدي
توجهت للمطبخ ووقفت وعلى شفاتي نصف ابتسامه بالله هذا تسمينه عشا نص خبز بالجبنه الحمدالله على كل حال خذيتها ودخلت لغرفتي وقفلت الباب تكيت على الجدار ولفيت جسمي بالبطانيه الصوف اللي سنين مرافقتني طرت ببالي مره كبيره تجي لهنا بالسنه مره تجيب اغراض لي بس ما اتهنى فيها كلها تروح لفوزيه وعيالهاحسيت بشوق لها ارتاح كثير من اشوفها آآآآآه ياقلبي لمتى لمتى هتم على هالوضع اذا كنت بالاول صغيره واخاف اتعثر بأي خطوه اخطيها الحين ماعدت هنوف اللي تمشي على رغباتك يافوزيه هنوف ملت من هالوضع نفظت يديني من بقايا الخبز وتفكيري كله ببكره على امل اني اكون اقوى....
*
*
*


نورحياتي ©؛°¨غرامي جديد¨°؛©


*
*

*
يوم جديد على امل يكون اجمل من الامس فتحت عيني على ازعاج التنبيه وقمت بصعوبه خذيت شور ينشطني توجهت لغرفتها قربت منهاوعيني تشوغ بقايا دموع جافه بخدها تنهدت بألم من ألمها اكثر وحده كانت فرحانه بجية اختنا اللي فقدناها بلحظه هي
حركتها شوي وقامت .....
هيفا\يالله هدى مابقى شي على محاضرتك
هدى مسحت عينها بيدينها ورفعت جسمها وقبل ماتقوم هيفا رجعت جلستها\هيوف حلمت بهنوف
هيفا\آآآه ياقلبي لأنك تفكرين فيها خلاص انسي شيليها من راسك لاتتعبين عمرك
هدى امتلت الدموع بعينها\لامهنسى ووهنوف هترجع لنا مشتاقه لها
ضمتها هيفا ومسحت على ظهرها \بس ياهدى لاتعورين قلبي بهالصبح تعوذي من الشيطان ادعي انها تكون بخير انشاالله هذا اهم شي وادعي ربك يجمعنها فيها لو مو بالدنيا بالآخره
بعدت هدى عن هيفا ووقففت\اكره ابوي اكررررهه
دخلت للحمام وقامت هيفا لغرفتها وقلبها ينزف من وضع اختها...
*
*
*
قلت لكم مابغى ارررروح
سعد\طيب ليه تصارخين انتي اللي لك كم يوم تشكين من رجلينك
شروق\يما خلاص خليها براحتها هذا من خوفنا عليك يما مابي الالم يزيد عليك ومابقى شي على عرسك
عبير قربت من امها وضمتها\لاتخافين علي يما انا بخير
سعد\طيب ناقصك شي
عبير\لا بس لاتنسى اليوم العصر نروح وناخذ فستاني
سعد\تامرين امر ياالله يما عن اذنكم بروح لشغلي
خرج من هنا رفعت عبير راسها\تصدقين يما مشتاقه للبنات ودي اروح لهناء
شروق\كلميها
عبير\لالا خليها على 11 بروح للصالون ابيها تجي وياي
شروق\الله يوفقك يما قولي امين
عبير تنهدت وبتسمت بخجل\امين
*
*
*
بالجــــــــامعه الساعه 11 الصبح.....
آآآآف ساعتين محاضره ومن هالدكتور بجد بجد ملل
مها\باقي محاضره بعد الظهر
جيهان\وش رايكم نطلع نروح لأي مجمع نضيع وقت لين قبل المحاضره
هدى\لاياقلبي تبين ابوي يذبحني
مها\وهو وش عرفه
هدى\الرادار سامي اربع وعشرين ساعه بهالمجمعات
مها\بصراحه هدهد بدون زعل اخوك مره خربان
هدى\ههههه داريه كله من دلال ابوي
جيهان\ليه مايدرس
هدى\يدرس بثاني ثانوي بس ضامن حبيبتي عشان كذا يوم يداوم وعشره لا
جيهان\اجل الله يعينه على حاله
قطع عليهم صوت جهاز جيهان فتحت الشنطه وسحبته شافت الأسم نطت بفرحه\جـــــــواد
( إشتقت لّي ) !


ولهت لوْ شويّ علي ؟!


ما اكذب عليك


أنا " كثير " إشتقت لك


عمري أحسه من غيرك خَلي


لا أرضي أرض ولا نجوم تزيّن الليل بـ سماي و تعتلي


ضايع و ينقصني انتماء لاني لأحد .. ولاني لي!


أنا كثير اشتقت لك


( ماشتقت لّي ) !


التفت مها بسرعه وتسارعت دقات قلبها وعينها على شفاة جيهان وهي تتكلم بحماس.......
جيهان\وانت اكثر يااالله متى ترد وتريحني
جواد بجديه\مو راد الحين لين ابوي يطلبني
جيهان\لاعاد تعال هو بس يشوفك يغير رايه
جواد\ماعليك المهم امي بخير
جيهان\اي الحمدالله ومشتاقه لك
جواد\اوك الحين لازم اقفل سلمي لي عليها كثير وانتبهي على حالك وزوري بنات عمي ماعليكي بكلام ابوي
جيهان\لاتخاف ياحبي لبنات عمي وهاذي مهاوي عندي
جواد\اهاااا حلو اوك بس تشوفي عمي وعمتي سلمي عليهم وسلمي على مها يااالله باي
جيهان \يوصل باي
التفتت وضربت مها بخفه\يسلم عليك
مها تخفي توترها وفرحتها\الله يسلمك ويسلمه مب راجع
جيهان تنهدت\ماظن
هدى تطلع كروت من شنطتها\خذوا قبل ما انسى هذي كروت عرس عبير صديقة هناء
مها\اهاااا عرفتها ماشاالله مبروك عليها
هدى\الله يبارك فيك عقبالك
جيهان\بس انا معرفها ليه معطيتني دعوه
هدى\هي عطتني عشر كروت اعطيها لصديقاتي تدرين علاقتها بهناء مره قويه صارت مثل اختنا
جيهان\اهاااا انشااالله احضر وشوف هالعبير
*
*
*
بأحدى المستشفيــــات.....
بغرفه الممرضات دخلت بهدوء وحطت الملف على الطاوله قعدت على الكرسي وانتبهت للمخلوق السرحان قدامها ابتسمت قربت منها بهدوء وصفت ....
هههههههههههههههههه
هيفا يدينها على قلبها\اعوذ باالله منك طيحتي قلبي
سماح\اللي واخذ عقلك
هيفا بجديه\بفكر بالخطيب اللي جايبه لي ابوي
سماح قعدت بطرف مكتبها\يعني في امل توافقين
هيفا\ ودي اوافق وافتح المجال لخواتي بنفس الوقت خايفه لانه من طرف ابوي اكيد فاهمه علي
سماح\اممم طيب ياقلبي وش اللي تعرفينه عنه
هيفا\امي تقول يعني عمره بالثلاثين عسكري
سماح \حلو وش بعد
هيفا\عنده اخو واخت وامه متوفيه وبس معرف غير هالاشياء
سماح\طيب وش اللي يخوف بهالموضوع
هيفا\والله مدري
سماح حطت يدينها فوق يدها \استخيري وربك وياك
هيفا\اخاف ابوي يجبرني
سماح\لا انشااالله
*
*
*
بأحدى الصالونات الســــاعه 1 الظهر.....
انتهت من تنظيف جسمها قامت من على الكرسي بعد ماضبطت لها حاجبها التفتت لأغلى الناس على قلبها \هااااا هناء حلوه
هناء تركت المجله اللي بين يديننها\ميه ميه رسمتها حلوه
قامت عبير من الكرسي وقعدت جنبها على الكنب تهمز رجلينها\آآآآه
هناء\انتي للحين بهالأم
عبير طنشت سؤالها لأنها تنزعج منه ومدت لها جهازها\المهم خذي دقي على السايق يجي تجين تتغدين عندنا بالبيت
هناء\اممم اوك ابوي مايجي غير العصر
عبير\اوك عشان تساعديني بلبسي اليوم عزوز جاي عندي
هناء تقلد صوتها الناعم\عزوز جاي عندي خلاص امنعيه وش باقي على عرسك كلها امممم ثلاث اسابيع تقريبآ
عبير توردت خدودها \خلاص هاذي اخر مره ياالله دقي
هناء\اي العبي علي من شهر وانتي تقولين اخر مره
*
*
*
بيوت متلاصقه جدرانها بلون واحد لون الطوب الرمادي اطفال صغار يلعبون بكل مكان ونساء بفرشتهن ودلال القهوه عند حدود منازلهم......
خرجت من بيتهم ودخلت البيت اللي بجنبه رمت العبايه والطرحه وقعدت \آآآآآف
ههههه الحين اللي يشوفك يقول مشيتي خمسين كيلو كلها شبر
عنود بملل\ماحب العباه افهموني
حلا تاكل حب\خلاص لاتلبسينها تعالي جري بدون شي
عنود\تصدقين فكره
حنين عدلت قعدتها\بنات اليوم سمعت ام صفيه تكلم امي تقول لها ان في شغله بالرياض بصالون اذا نبي نروح انا وحلا
عنود بحماس\ايوه وبعدين
حنين\حاولت مع امي عيت
حلا\ليه كل البنات يروحون للرياض بباص خالد ويرجعون وش فيها
عنود\تعرفين مخ امهاتنا
حنين\والله انا ودي اروح وربي زهقت
حلا\وانا بعد
حنين\انتي تنطقين من يقعد ويا امي
حلا\حاتم ايووه نزوجه عنود وهم يقعدون عند امي واحنا نروح
عنود ضربتها\من قال انا ابيه انا دخلت براسي هالشغله وبقنع امي وبروح وانتم اقعدوا وخمجوا بهالديره
حنين\تف فال الله ولافالك ابي اشوف ناس غير ابي اشوف اسواق غير غير بسطة ام سعيد اللي ادوشونا فيها ابي اروح سوسر ماركت
حلا ضربت الارض\ههههههههههه سوبر ياخبله
حنين \المهم سوبر ماركت غير هالبقاله الخمه اللي عندنا وفرحانين هالبزران فيها مافيها غير بسكوت ابو ولد وسنتوب وريكو والربيع
عنود\هههههههههههه فش فاش لاتنسينه
حلا\ههههههههههه
حنين\ههههههههه ايوه وامممم ابي ابي اشوف بنات كشخه لابسات كعب مو هالزنوبات اللي كلنا سوى لو ضاعت حقتي اموت مالقيتها كل بنات الديره عندهم مثلها
عنود مسكت بطنها\هههههههههههههه الله يرجك بس اسكتي
حلا ضربت الاض وانضرب صحن قشر الحب وتناثر كله على الارض\هههههههههههه والله تومي رهيبه
*
*
*
الســـــاعه 3 العصر...
دخل البيت وشماغه على اكتافه توجه وقعد للصاله ابتسمت حياه بفرحه وأخيرآ عبرهم
فؤاد عينه على التلفاز\بكره بتزوج
شهقت حياة وحطت يدينها على صدرها والتفت على زوجها مصدومه......
ثنى علي جريدته وعدل قعدته وعقد حاجبه\نعم وش قلت
فؤاد وتكلم بهدوء \بك ره بت زو ج
علي وقف بقهر\انت وبعدين معك طلقت زوجتك بدون اي سبب وهي اللي مافي مثلها قلنا معليه هم ادرى مطنش الكل ومضيق خلق امك قلنا نفسيته تعبانه والحين جاي تقول بتتزوج بكره جدار انا وامك بهالبيت
وقف فؤاد ورفع اصبعه السبابه\بكره بتزوج واللي مو عاجبه يطق راسه باللي وراه
طلع من البيت وصقع الباب بكل قوه ......
قعد علي على الكنب وهو يفتح ثوبه ويتنفس بصعوبه....
حياة بخوف\يما مها قومي جيب ماي وابرة السكر
مها اللي ما استوعبت ولاشي من اللي صار قدام عيونها وتركت المجال لدموعها جرت للمطبخ وجابت الابره والماي شربت ابوها.....
حياة\عطيه الابره
مها يدينها ترجف\معرف يما سماح اللي تعطيه مب انا
سحبت حياة الابره وسمت بالله وعطته ماتدري صح ولا لا المهم ان تنفسه ابتدى يهدى شوي شوي
*
*
*
يوووووه ياجيهان قلت لك ابوك عنيد وجواد اعند منه مافي
جيهان\اااااف طيب يعني لمتى
عايشه\هذا ابوك جاي اوس ولاكلمه
جيهان \لابقوله
دخل على صوتها وقعد\ آآه وش اللي بتقولينه
جيهان بخوف وتردد\يبا امممم متى تخلي جواد يرد للبيت
وقف عمر وصرخ بأعلى صوته\لابارك الله فيه من ولد عاص خليه يولي مب راضي لا عليه ولا على اللي سواه فيني انا يوقف ضدي فرحان لأنه محامي جاي يثبت جدارته علي
جيهان وقفت وتكلمت برجفه\بس هو ما غلط
عمر\اوووس ولاكلمه انتي الثانيه لايجيك ماجه اطلعي لفوق وهالموضوع مابي اسمعه ثاني
طلعت جيهنا بجري لفوق.....
قعد علي وتنفسه زايد\حسبي الله عليه من ولد حسبي الله عليه الله لايوفقه
عايشه حطت يدينها على أذونها\بس لاتدعي عليه قدامي هذا ولدك لاتنسى
عمر بقهر\وانا تبـــريت منه
تركت عايشه الصوف اللي بين يدينها وقامت بألم طلعت لغرفة بنتها المنهاره قربت منها وضمتها\بس يايما خلاص
جيهان\ليه ابوي كذا يكرهني فيه
عايشه\اوووس لاتقولين هالكلام ثاني هذا ابوك هو وولده يتخالصون
*
*
*
طيب طيب الحين بنزل ياالله باي
عبير\بتروحين
هناء\إي هيفا تنتظرني تحت توها طالعه من المشفى
عبير وقفت\اهاااا خلاص شكلي تمام
هناء\تمام التمام مثل ماقلت لك خلاص اثقلي وخليها اخر مره
عبير باستها بخدها\انشاالله تسلمين ماقصرتي
هناء\ياالله امشي وياي شوفي الدرب
عبير انسدحت\مافيني حيل باخذ لي غفوه روحي مافي احد سعد مايرد غير على اربع
رفعت هناء ساعتها 3 ونص طفت لها النور وخرجت ......
وصلت لنص الدرج وصنمت بمكانها ومو عارفه شلون تتصرف وهو نفس الشي وقف من الجمال اللي يشوفه هو كان حاطها براسها من تعلق عبير فيها بس ماتوقعها بهالجمال مرت من جنبه بسرعه وقفت عند الباب ولبست العباه بيدين راجفه وطلعت اول مادخلت السياره رمت راسها فوق هيفا.....
هيفا بخوف\بسم الله هناء وش فيك
هناء رفعت راسها بسرعه ونطقت بقهر\غبي هو ولا حمار ولايستهبل يعني يرضاها على اخته احد يقعد يتمقل فيها لا ولا تحرك واقف يتأمل هو ووجه يعني كيف انتظره يتحرك ولا حركه هو ووجه غبي
هيفا فهمت ان سعد شافها\ههههههههههههههههههههههههههه خلاص خلاص كل هذا لأنه شافك
هناء قربت من الشباك وركزت بالطريق\حركته بايخه
هيفا ببتسامه\لاتلومينه من الجمال اللي شافه صنم
لفت هناء عليها بسرعه ......
هيفا \هههههههه خلاص توبه


نورحياتي ©؛°¨غرامي جديد¨°؛©


*
*

*
بخت من عطرها المفضل وخذت نفس وهي تسمع صوت اخوها ينادي عليها خرجت ونزلت راسها بحيا من تصفير اخوها....
عبير مسكت يدين امها بدلع\يماااااااا شوفيه
سعد\لالا ماشاالله اليوم عبدالعزيز مب طالع الا يدك بيده
قربت منه وضربته\سعــــــد
سعد\ههههه ياالله امش من اول ينتظرك
مسك يدينها بحب للعلاقه اللي تجمعهم يوم وصلوا عند باب المجلس تردد يسألها\اممم اليوم العصر هناء اللي كانت عندك
عنود بستغراب\ايه لاااااااااااا لاتقول شفتها
ابتسم سعد
عبير\ياويلي منها واكيد فتحت هالفم
سعد\ههههه من يشوف كل جمالها ومايفتح فمه على كثر ماتسولفين عنها ماقلتي انها حلوه
ضربته بكتفه\ياسلام ترضى مثلا تروح وتوصفني عند اخوها
يااااااااااهو اللي عند الباب
عبير شهقت\لايكون سمعنا
سعد\هههههههه لامعتقد ياالله ادخلي وقوليله اليوم اخر مره يجيك فيها لين يوم عرسك
عبير\طيب طيب فهمنا بالاول هناء والحين انت
سعد بلهفه\وش فيها هناء
عبير دفته ودخلت بحيا.....
*
*
*
هايمه وش قلتي
مريم\قلت لا
عنود\يبه كلمها
عيسى\خلها تروح وتجيب رزقها وياها
مريم\وانا قلت لا
عنود\يايما وش فيها يعني كل البنات يرحون بالباص جات علي يعني
مريم\يوووه ياعنود زن زن مثل الذباب خليني بحالي قلت لا وهذا كله خوفآ عليكي
عنود\وش بيصير يعني ولا من نحاسة حظي بيقوم يصير شي يماااااا
تركت مريم اللي بين يدينها وقامت\بروح للجاره
خرجت التفت عنود على ابوها وعقدت حاجبها\يبااااااا
عيسى ببتسامه وهو يحرك يدينه بالهوى\هش هش ياذبان
فطست ضحك على شكل ابوها وهو يمزح وبدت تفكر بالموضوع بجد شلون هتتحمل تبعد عنهم لو لأيام قامت ودخلت لغرفتها......
رفع عيسى يدينه لربه وهو يدري رغبة بنته بالشغل عشان توفر لهم اللي هو ماقدر يوفره\يارب ياعلي ياكريم تسعد لي هالبنت وتحفظها لي وامنتك ببنتي الثانيه تسعدها وين ماكانت وتسامحني ياربي
نزلت دمعه خانته تلومه بتفريطه ببنته مايدري ان كل مولود يولد ورزقه معاه........
*
*
*
طيب احــــــبك
توردت خدود عبير وضغطت على يدينه\الله لايحرمني منك
عزوز\ولامنك ها حبيبي ناقصك شي عيوني لك
عبير\لاتسلم بس خليك دايم بدنياي
عزوز\وانا انجنيت حتى اخليك انتي حب طفولتي وحب عمري
عبير\اممم خلاص اليوم اخر يوم تشوفني لين يوم العرس
عزوز\لااااا
عبير\والله جد
عزوز\هشتاق لك بس حلو يوم يزيد الشوق
عبير\الله يجمعنا على خير
عزوز\امين يارب
*
*
*

آآه اشتقت اليك ..

كدت اجن من بعدي عنك ..
لا احتمل اكثر ..


اريد ان ارتمي عليك ..
اريد ان اضمك لجسدي ..

كي انام وانسى الغمام ..
اريد ان اعانقك واناااام ..

اود ان اشعر بحنانك ولمساتك ..
وانسى الحقيقه التي آلمتني
وادخل عالم الاحلام ..


بمنتص ليل هاليــــوم مررت يدينها على الصوره اللي جمعتهم بيوم زواجهم آحلى يوم بعمرها رفعتها على شفاتها وباستها برجفه غطت وجهها بيدينها وانهارت ذبحها الشوق له ......
قبل ترجع لغرفتها سمعت صوت شهقاتها حطت كاس الماي على الطاوله ودخلت قفلت الباب وقربت منها بخوف وهي تمسح على شعرها بسم الله الرحمن الرحيم
هيفا\هاجر وش فيك تعوذي من الشيطان
هاجر زادت دموعها رمت راسها فوق رجلين اختها وضمت رجلينها\تعبت ياهيفا كل ماغمضت عيني اشوفه مقدر انساه مقدر
هيفا مسحت على شعرها وتتعوذ من الشيطان\والله مايستاهل اللي تسويه بنفسك
هاجر\لاتقولين كذا فــــــؤاد يحبني متأكده يحبني
هيفا بحده \يحبك وباعك شلون تدخل هالعقل شلون يحبك وقدر يطلقك بدون سبب
هاجر\وهذا اللي واجع قلبي بدون سبب لو داريه وش في كان ارتحت آآآآآآآآآآه ياربي ريحني
هيفا\قومي توضي وصلي هذا كله شيطان وهاتي هالالبوم اللي مجننك ياالله قومي
رفعت هاجر راسها ببطئ حست بغثيان قامت بسرعه للحمام خرجت بعد دقايق وهي متوضيه ووجهها وعينها حمر......
هيفا قربت منها\فيك شي
هاجر\لا بصلي ونام تعبانه
سحبت هيفا الالبوم والصوره باستها براسها وخرجت.....
لفت الطرحه براسها وصلت ركعتين لله سلمت ورفعت يدينها لربها يارب تريح لي قلبي وتزيل همي يارب ترجع لي زوجي يارب حسبي الله ونعم الوكيل يارب تنتقم من اللي فرقنا يارب
*
*
*


الزعيـ A.8K ـمه ©؛°¨غرامي ماسي ¨°؛©

,’




بسم الله



كملـــي الرواية الأولـــى و إرجعي إفتحــي الرواية هذي
https://forums.graaam.com/302600.html





المشاركة الأساسية كتبها الزعيـ A.8K ـمه اقتباس :
3 / إغلآق الموآضيع :

لا يُسمح بـ طرح أكثر من روايتين في وقتٍ واحد ‘ و سيتم إغلاق إحداهن لـ حين إكتمال الثانية <~ قرار جديد يُنفذ من تاريخ التعديل
https://forums.graaam.com/238622.html#post8561372







,’


أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1