نجفية ©؛°¨غرامي جديد¨°؛©

صباحكم فللللللل..قصة جديدة من قصصي إلي مانشرتها..أبي رايكم فيها بكللللللللللل صراحة..
قرائة ممتعة انشاالله..

الشخصيات:-
بيت بو حسين:-

زينه: بنت عمرها 23 سنة..طالبة دورات خاصة تخصص تصميم جرافيكي..شقرة..متبتبة..مسوية جو في البيت..وتحب أهلها ومتعلقة بشكل كبييييييييير بأمها..اخت روحها رهف..نزلوا تحت عشان تتعرفون عليها..

حسين: أخو زينه..عمره 24 سنة..مزيون ويسمونه المزيون لأنه مزيون بكل شي..يدرس هندسة في جامعة اكسفورد في بريطانيا..شاب طموح..يحب الدراسة..والشغل العملي..له هيبه مثل أبوه..

هدى:الأم..طيبة وحنونة..عمرها ماعلت صوتها على عيالها حتى لو غلطوا..عندها التفاهم بداية حل كل المشاكل..

علي: الأب..الطيب كله منه..له هيبة وهيبة إهيه إلي فارضه احترامه ع الناس..كل الناس تحبه وتحترمه وكلمته وحده دام قالها يعني محد يرادد..في البيت والشركة..عصبي لكن مايفرض رايه على عياله..طويل حنطاوي حواجبه مكسوره.. ماياخذ ويعطي وايد بالكلام و مايبين لأحد إذا كان زعلان ولا متضايق..لأنه يخاف يبين جرحه وانكساره..

بيت بو ناصر:-

ناصر: عمره 31 سنة..المسؤول عن كل شي بعد وفاة أبوه..مايستغنى عن عمه بو حسين..شخصيته قوية الكل يخاف منه..حتى خواته..محد يكسر كلامه إلا أمه بس بوقت اللزوم واخته رهف آخر العنقود..إن قال لأ يعني لأ وإن قال إي يعني إي..بس مع هذا ينحب..ودمه خفيف..بس هااا لا تمصخها معاه..طبعاً ورى كل هذا قصة..حتى أهوه..

رانيا: الوسطية عمرها 25 سنة..تكره ناصر وماتحبه..من خلال أحداث القصة بتعرفون ليش..

حور: عمرها 23 سنة..تشبه زينه..إلي يشوفهم يقول خوات..مع زينه بالمعهد..ناصر يموووووووت فيها لأنها مرت بضروف صعبة..ولأن أبوه موصيه عليها..

بيت بو عبدالله:-

أحمد: الأب..مهندس متقاعد..أخو بوحسين..عنده شركة مقاولات..ترك الشغل بعد أزمة قلبية عدت على خير..

مريم: الأم..على عصبيتها إلا إن قلبها أبيض..اجتماعية..الجمعات دايماُ عندها..ماتحب تشوف بيتها خالي..

عبدالله: الكبير..عمره 27 سنة..ماسك شركة أوبه ويديره..بس مافي ولا مناقصة ولا صفقة ولا ورقة تمر بالشركة إلا بعد ماياخذ راي أبوه..أبوه معطيه كل الثقة..لأنه قدها..

محمد: الكل يحبه..شخصية حلوة راح تحبونه مثل ما أنا حبيته..وقت الجد جد وقت الضحك ضحك..حنون وعطوف مع الكل..راح نتعرف على شخصيته أكثر من خلال القصة..عمره 26 سنة..حلو..حنطاوي..عيونه سود..خشمه سلة سيف..شعره أسود..

رهف: 22 سنة..بنت نعوووووومة..يسمونها أم دميعة..ملهية نفسها بالدراسةهندسة كمبيوتر..تحب حسين واهوه بعد يحبها..ومحد يدري بهالشي إلا زينه..مع انها أكبر منها..بس تحس بالراحة لما تتكلم معاها..

بيت بو فيصل:-

فيصل: منافس ناصر..مع ان ناصر أصغر منه بس أشطر منه..هذا شغله كله بالغش..وفلوسه حرام..
عدنان: لازق لزقة بزينه..يحبها ويبي يتزوجها بس اهيه مو معطيته ويه..لأنه مليق وماينعطى ويه ودمه ثقيييييييل..الله لا يبلي أحد..

سارة: مع زينه بالمعهد..من النوع إلي يعجبون في البنات..مع انها كبيرة بس تفكيرها تفكير مراهقات..من كثر ماتكلمت عن زينه عدنانو حبها..وكان يتعمد يوصل اخته عشان يشوفها..

Part 1
الجزء الأول

الكويت ساعة 7 الصبح..طبعاً الدوام يبدي ساعة 8 بس زينه تتعمد تروح مبجر عشان ماتصبح بويه اللزقة..(عرفتوه؟) كافي انها بتصبح بويه اخته..
زينه: صباح الخير يما..
هدى: صباح الورد..تعالي تريقي يمه..
زينه: لا يمه مو جوعانه..تانييييي..وين القهوة..
هدى: والله موزين قهوة والمعده فاضية..
تاني: فدلي (تفضلي)..
زينه: شكراً..عشان تضبط الراس..بس وعد إذا جعت آكل بالمعهد..يله أنا رايحة تبين شي؟
هدى: لا حبيبتي..سلامتج..بس ديري بالج على نفسج..
زينه: الله يسلمج..مع السلامه..خلنتحرش شوي..
لندن..ساعة 4 الفجر..رن التلفون..
حسين: خبله..الحمدالله والشكر..نعم يالمزعجه..أكو أحد يدق هالوقت..
زينه: أوووه المزيون قاعد..
حسين: إي قاعد أدرس عندي امتحان..بعد تدرين آخر كورس وأتخرج..
زينه: يله عاد تخرج وخلص عشان تقدر تشوف حبايب القلب..
حسين: زينووووووه يالمليقه..
زينه: يحليلك تستحي..بذمتك ما اشتقت لها؟
حسين: زينووووه استحي على ويهج..
زينه: زين..
حسين: شلونها؟
زينه: حسينووووو استحي على ويهك..
حسين: مالت عليج..
زينه: أغصان الجنه يارب..
حسين: لاجد..شلونها..شمسويه بدراستها؟
زينه: لا تخاف..رهف قدها..ذابحة روحها بالدراسة عشانك..
حسين: حياتي..
زينه: هيهي نحن هنا..
حسين: تعالي..شخبار خطيبج؟
زينه: منو خطيبي؟
حسين: عدنان..أفااااا أكو وحده تنسى خطيبها..
زينه: حسينوووووووووووو مالت عليك مالقيت غير هذا..أنا كل يوم قاعده أروح مبجر عشان ما أشوفه..
حسين: هههههههههههه لهالدرجه ماتحبينه..شمسوي لج..
زينه: مليق كريه بايخ وسخيف..كافي ان فلوسهم حرام..
حسين: شدراج؟
زينه: اخته ماتخلي شي ماتقوله..تخر الأكو والماكو..على أساس انها معجبه فيني..هبلة مو صاحية..
حسين: ههههههههههه الحمدالله والشكر..
زينه: ايه حسون اشتقلت متى تخلص يله عاد..
حسين: هانت مابقى شي كلها شهرين ونرتاح..
زينه: الله كريم..بالتوفيق يارب..ساعة جم امتحانك؟
حسين: عندنا 8..يعني عندكم ساعة 11..
زينه: بالتوفيق..شد حيلك..يله المزيون أخليك تكمل دراسة..تامرني بشي؟غير إني أسلم على رهف..
حسين: هههههههههههههه..الله يسلمج..سلمي على أمي وأبوي والكل..وديري بالج عليهم..
زينه: يوصل حبيبي..أخليك تكمل دراستك..دير بالك على نفسك..
حسين: انشاالله..وانتي بعد..باي..
زينه: أخيراً وصلت..ياربييييييييييييييييي..الظاهر ماراح أخلص منهم..أحسن شي ألبس النظارة وأمشي بسرعة..
سارة: زينه زينه..
زينه: هلا سارة..
سارة: نطريني بصعد معاج بس أجيب كتبي من السيارة..
سارة: يله..
وفي المعهد:-
سارة: زينه..تعالي الكفتيريا بكلمج بموضوع..
زينه: تفضلي..هذا احنا في الكفتيريا..
سارة: تاكلين شي؟
زينه: لا شكراً..
سارة:بصراحة..أنا بخطبج لأخوي عدنان..
زينه: الظاهر مافي فايدة..سمعي سارة..سبق وخطبتوني مليون مرة وقلت لأ..وبرد أقولها لأ..
سارة: إي ليش؟أخوي فيه شي؟سامعه عنه شي؟
زينه: لا أخوج ملاك مشاالله عليه..مايعرف العيب ولا يدل طريج الحرام..بس أنا ما أفكر بالزواج..رجاااااااااااااااءً لا تحنين فوق راسي..
سارة: بس أخوي يحبج..
زينه: سارة حبيبتي انتي..لا تحاولين ولا تحنين..
سارة: الله يخليج أنا ودي انتي تكونين جنتنا..
زينه: سارة ترى مللتيني..وأنا ما أحب الحنة..
سارة: خلاص خلاص..
وقبل نهاية الدوام استأذنت زينه..وشافت:-
زينه: ماشاالله عليه شينة الحلايا وايد حريص على اخته ويخاف عليها..أول واحد مرتز عند الباب..
حمادة: لو سمحتي..ورأة الإستإزان (ورقة الإستإذان..نظام المعاهد عندنا نفس نظام المدرسة لازم ورقة إذا استأذنتي قبل نهاية الدوام)
زينه: تفضل..
ووقفها شينة الحلايا عند الباب:-
عدنان: لو سمحتي..
طبعاً اهيه طنشت..بس مافي فايدة:-
عدنان: زينه..
زينه..بنفسية طبعاً: نعم..
عدنان: شلونج؟..
زينه: خير في شي؟
وبخوف: لا بس أسلم..
زينه: ليش أعرفك..تعرفني..
عدنان: قريب إنشاالله..
زينه: ولا في الأحلام..بالإذن..
عدنان: إذنج معاج ياقلبي..
زينه: ترى واااااايد مصختوها انت واختك..اسمع والله لو خلت الدنيا من الرياجيل ومابقى إلا انت ما آخذك..ورجاءً ابعد عني انت واختك ترى كرهتوني عيشتي..ومرة ثانية ان كلمتني ماتلوم إلا نفسك..
ووفي البيت:-
زينه: أفف شنو هالناس..مايستحون..
هدى: زينه! شفيج؟ ليش رادة مبجر؟!
زينه: ساروه..من صباح الله خير حنه..
هدى: خطبتج مرة مليون وواحد..
زينه: ههههههههههههه إي..واي يمه ضحكتيني وأنا مالي خلق..لا وإلي زادها أخوها..مرتز عند باب المعهد يعني خايف على اخته من الوقفة بالشمس..زفيته زف يمه بردت جبدي..
هدى: يمه لا تعطينهم ويه..خليهم يكلمون نفسهم..
زينه: يما شسوي نرفزوني..تدرين المليق شقال..(وتقلده) اذنج معاج ياقلبي..مسكين وايد مصدق نفسه..
هدى: هدي حبيبتي..مايستاهلون تحرقين أعصابج عشانهم..
زينه: إي والله..إي صج..اليوم الصبح كلمت حسين..يسلم عليج..
هدى: حبيبي اشتقتله..دقي عليه أبي أسمع صوته..
زينه: لايمه الحين بالامتحان..بس بدق رنة عشان إذا طلع يشوف ويدق..
وصار وقت الطلعة من الدوامات:-
علي: هااا..زازو(دلع زينه)راده مبجر..
زينه: إي يبه استأذنت ورجعت ساعة 11..
تاني:Zena..your phone
زينه: شكراً..يماااااااااااااااااا..هذا حسين..هلا حسون شتبي داق..مو كافي اليوم مصبح بصوتي الشجي..
حسين: أقول لا تغترين بنفسج وبعدين إنتي إلي مصبحة بصوتي الشجي لأنج إنتي إلي داقه..يعني إنتي إلي شتبين..
زينه: ياملقك..شسويت بالإمتحان؟
حسين: أكيد زين..أخوج شاطر وذكي وماينخاف عليه..
زينه: كفو والله طالع على اختك..
حسين: يصير خير..
هدى: حسون حبيبي..
حسين: هلا يمه..هلا بحلوة اللبن..شلونج جنتي؟ (حسين يسمي امه جنتي)
هدى: هلا حبيبي..شلونك يا نظر عيني؟
حسين: تمام بسماع صوتج جنتي؟
هدى: تاكل عدل؟ تنام عدل؟ مرتاح؟
حسين: مرتاح يمه مو ناقصني غير شوفتج..
هدى: يله حبيبي متى ترد ولهت عليك..
حسين: يمه إذا بتقلبينها مناحة أهد كل شي وأرجع..
هدى: لا حبيبي خلاص..
حسين: جنتي..أبوي يمج؟
هدى: إي حبيبي..
حسين: أبي أكلمه بعد اذنج..
علي: هلا بوليدي..هلا بالمهندس..
حسين: هلا بو حسين..هلا بتاج الراس..شلونك يبه؟وشلون الشركه؟ عساك بخير؟
علي: بخير ياوليدي..مو ناقصني غير شوفتك وبيدك الشهادة..
حسين: لا تحاتي يبه ماراح أرجع إلا والشهادة معاي..كلها شهرين ونرتاح..
علي: الله يوفقك ياوليدي..
حسين: يله يبه أنا لازم أسكر..عندي محاضرة..تامرني بشي؟
علي: لا يبه سلامتك..بس كلم أمك تبي توصيك وصاياها العشر..
هدى: يمه حسين..تغطى عدل لما تنام..واكل عدل..ألزم ماعليك صحتك..دير بالك على نفسك وعلى دراستك..لا تخلي شي يلهيك..شد حيلك نبي نفرح فيك..
حسين: لا توصين حريص يمه..يمه ميخالف أكلم زيون؟
زينه: خير شتبي؟
حسين: يمه منج..شدراج؟
زينه: فاتحه السبيكر..وسكرته (حست ان بيقولها شي)
حسين: سمعي بقولج شي بس لا تردين إلا بانشاالله وحاضر ومن هالكلام..
زينه: أوكي..
حسين: أنا آخر هالشهر راجع..ما أبي أحد يدري..بسويها مفاجأه..وقولي حق رهف تزهب نفسها حق الخطبة..
زينه: من هالعين قبل هالعين..وهالعين وهالعين..
حسين: ليش جم عين عندج؟
زينه: أربع عيون..عشان لابسة نظارة..
حسين: الحمدالله والشكر..هبلة..زين زيزو ما أطول عليج..بروح أزهب أوراقي..لزوم التخرج..تامريني بشي؟
زينه: سلامتك حبيبي..
حسين: الله يسلمج..مع السلامه..
وبآخر الشهر:-
زينه:...
حسين: قبل لاتتكلمين سوي روحج تكلمين صديقتج..
زينه: هلا فطوم..شلونج حبيبتي؟
حسين: سمعي أنا ساعة 8 بتوقيت الكويت راح أوصل..كلمت محمد ووصيته يخليها سر..راح يوصل مع رهف ساعة سبع ياخذونج وتروحون المطار..
زينه: أوكي حبيبتي ساعة سبع أكون عندج ولا يهمج..
حسين: يله سلام..
زينه: عليكم السلام..
هدى: شنو بتروحين عند فاطمه؟ يعني ماراح تروحين معانه بيت عمج؟
زينه: بلى يمه..بس موصيتني على شي..بعدين أنا ألحقكم..انتوا ساعة جم بتطلعون؟
هدى: سبع..
زينه: أوكي..
وراحت بعيد عن أمها:-
زينه: ألو رهفو..تعالوا سبع وربع..
رهف: ليش؟
زينه: لأن أمي وأبوي راح يطلعون من البيت ساعة سبعة..
رهف: أوكي..
زينه: قولي لمحمد..
رهف: أكيد..يله باي..
في المطار:-
زينه: أفففف..وينه؟ تأخر؟
محمد: دقايق انشاالله وتشوفينه طالع من الباب لا تحاتين..(وبقلبه) حبيبتي..
زينه: انشاالله..(وبهمس) جنتنا شلون أعصابج؟
رهف: طالعي الباب وانتي ساكته..
زينه: كاهوووووووووو..وصل..
محمد: وينه؟
زينه: داخل قاعد ياخذ أغراضه..
رهف: بل..شلون شفتيه؟!
زينه: شفايدة الأربع عيون..كاهوووووو..
وراحت له ركض:-
زينه: أخوي حبيبي الحمدالله على سلامتك..
حسين: زينوووو اشتقت لج يالخايسة..
محمد: هلا والله هلا بالدكتور..نورت الديرة..الحمدالله ع السلامه..
حسين: هلا بوجسوم..منورة بنورك..الله يسلمك..
رهف: الحمدالله ع السلامه حسين..
حسين(يهمس لزينه): فديت هالصوت وراعيته..شحلاته اسمي على لسانها..
زينه: أقول استحي على ويهك أخوها موجود..(وبقلبها)فديت أخوها..
طبعاً محمد وزينه يحبون بعض بس محد يدري عن الثاني..
حسين: شلون الخطة..
زينه: ماشية مثل ماتبي..الكل مجتمع في بيت عمي بو عبدالله ومايدرون عن شي..
حسين: عيل يله مشينا..
وطول الطريج سوالف عن بريطانيا..هذا حال الشباب..أما البنات:-
زينه: رهيف بعترف لج بشي..
رهف: واااايد يالدفشه..الناس يقولون رهوفه..رورو..مو رهيف..خير قولي..
زينه: عناد فيج رهيف..بس مو الحين يالخبلة..في البيت..بقنع أمي أنام عندكم وأقولج على كل شي..
حسين: أفاااااا..تنامين عندهم وأنا توني راد..
زينه: وانت بله يالمزيون شتبي قاط اذنك عندنا..
حسين: أخاف تحشون فيني..
زينه: من زينك نحش فيك..بعدين يالخبل محد يحش بأحد جدامه أشكره..آيييييييي..(جاها كوع أصلي)
وطول الطريج سوالف وضحك ومناجر:-
محمد: يله تفضلوا..
حسين: مااتفقنا شبنسوي..
زينه: ولا يهمك..الحين بيدش محمد واحنا وراه..وبيقول في ضيف معاي..وانت بتدش وراه..
محمد: أوكي..يله..
حسين: يله..
ودشوا البيت:-
محمد: سلام عليكم..
الكل: عليكم السلام..
محمد: معانه ضيف..
بوعبدالله: هلا فيه..خليه يتفضل..
محمد: تفضل..
حسين: متجمعين عند النبي حبايب ألبي..
وطبعاً صارت هوسه الكل على صريخ وبجي ونواح وصدمه..
بوعبدالله: الحمدالله على السلامه..
حسين: الله يسلمك عمي..
بو حسين: بشر يوليدي..
حسين: أبشر يبه..تخرجت والشهادة معاي..
بوحسين: موقلت بعد شهرين التخرج..
حسين: إي يبه..كنت مخطط من زمان..أبيها مفاجأة..
بوعبدالله: قرة عينك يا بوحسين..وانشاالله تفرحون فيه معرس..
بو حسين: تسلم يا خوي..
حسين (يهمس لأبوه): يبه أبيك بموضوع..
بوحسين: قول..
حسين: بتزوج..
بوحسين: بسم الله توك راد..خذ نفس بعدين يصير خير..
حسين: لايبه..أنا أبي الحين..
بوحسين: مولازم تكلم أمك بالموضوع أول عشان تدورلك على عروس..
حسين: العروس موجوده..
بوحسين: منو؟
حسين: رهف..
بوحسين: رهف..والله رهف خوش بنت..مشاالله جمال ودلال وأخلاق وعلم..ماشي بعد العشى أكلم عمك ويصير خير..
حسين: إلي تشوفه يبه..بروح أكلم أمي..
وعند الحريم:-
حسين: يالله..
هدى: تفضل..
حسين: سلام عليكم..
الحريم: عليكم السلام..
طبعاً كل الحريم والبنات إلي قاعدين حطوا عينهم عليه..
حسين: يمه..ممكن شوي أبيج بموضوع..
هدى: إي تفضل..
حسين: أبيج تخطبيلي رهف..أنا كلمت أبوي وقال بعد العشا بيكلم عمي..
هدى: هذي الساعة المباركة بس..
حسين: يمه تكفين..أنا ناطر اليوم إلي أخلص فيه عشان أخطبها..
هدى: خلاص بعد العشا أكلم مرة عمك..
حسين: ياالله هالعشا متى يخلص..
هدى: عيب..اركد شوي..وبعدين مو حلوة أكلمها جدام الحريم..
حسين: إلي تشوفينه..بس تكفين بسرعة..
رهف: تفضلوا العشا جاهز..خالتي هدى..العشى جاهز..
وسحبته:-
زينه: كلمتهم؟
حسين: إي..وقالوا بعد العشا..
زينه: يله روح تعشى..حجية..تجهزي بأي لحظة بتصيرين خطيبة اخوي..
رهف: سكتي فضحتينا..
حور: زينه..ممكن شوي..
زينه: إي حبيبتي..(وتهمس لرهف) يالهبلة تصرفي عادي عشان محد يشك بشي..تفضلي حبيبتي..
حور: بصراحة مادري شقول لج..
زينه: قولي حبيبتي لا تستحين..
حور: بصراحة أنا معجبة بأخوج..
زينه: من متى؟
حور: من زمان..
زينه: أممممم..شوفي حبيبتي..أنا بقول لج شي بس أبيج توعديني إنج ما تزعلين ولا تتضايقين..
حور: أوعدج..
زينه: بصراحة..حسين حاط عينه على وحده..ويبي يخطبها..
حور: رهف؟
زينه: إي! شدراج!!
حور: حسيت بهالشي من عيونها..الله يوفقهم..
ودمعت عينها..
زينه: حوره حبيبتي..انتي وعدتيني..
حور: إي..بس الموضوع مو سهل علي..
زينه: أدري..بس عشاني..لا تبينين شي لأحد..وأبيج تنسين هالموضوع..لأن كل شي قسمه ونصيب..أدري النسيان مو سهل بس حاولي..
حور: خلاص أوعدج بحاول..
زينه: حور مابي علاقتج برهف تخترب..
حور: لا تطمني..هذا نصيبي وأنا راضيه فيه..
زينه بابتسامة: يله نروح نتعشى..
وبعد العشى:-
حسين: يبه يله..
بوحسين: يالحنان..بو عبدالله..
بوعبدالله: آمر..
بوحسين: بغيتك بموضوع بيني وبينك..
بوعبدالله: آمرني..
بوحسين:بصراحة..يشرفني أخطب بنتك رهف لولدي حسين..
بوعبدالله: والله هذي الساعة المباركة..حسين رجال والنعم فيه وماعليه كلام..ومن ناحيتي مااااعندي أييييي مانع..بس عطني مهله جم يوم أشاور البنت وأردلك خبر..
بوحسين: ثلاث أيام تكفي؟
حسين: لايبه وايد..
بوحسين: اسكت يالمطفوق..
وطبعاً بوعبدالله سمع:-
يوعبدالله: هههههههههههه إي تكفي وزيادة..
ونفس الشي عند الحريم:-
هدى: مريم..يشرفني أخطب بنتج رهف لولدي حسين..
مريم: والله يا هدى هذي الساعة المباركة..واحنا لنا أشرف أكثر لما ننسابكم..
وتمت الخطبة وصار الكلللللللللوش العرس..ثاني يوم عرس:-
زينه: اتمخطري ياحلوه يا زينه..
حسين: ليش تتمخطر أخاف تتعب..
وشالها..ورهف مييييييييييييييته من الفشيلة والحيا..والإخت زينه ماصدقت على طول صورتهم..
زينه: وااااااااااااي شحلاتكم جنكم طيور الحب..وبهذه المناسبة السعيدة انتوا معزومين ع العشا..على حساب حسوني..
حسين: صج ماتستحين هم تعزمين وهم على حسابي..
زينه: حسوني شفيك مافي أحد غريب..أنا وانت وماما وبابا وحرمك المصون..
حسين: غلطااااانه حبيبتي..أنا وحرمي المصون وماما وبابا وانتي..
زينه: مالت عليك..
حسين: أغصان الجنه يارب (يقلدها)..يله نزلوا تحت أنا أروح ألبس وألحقكم..
وبس راح:-
رهف: تعالي..تعالي..حسونج هاااا..
وقامت تطقها بالكوشية..
زينه: بدينا غيره..ماما ترى أنا اخته..
رهف: انشاالله مادري منو..هذا حبيبي..بس أنا أقوله حسوني..فهمتي..
زينه: فهمت فهمت..بس ديري بالج لا تطقين حسوني إلي وراج..
رهف: موقلت لج لا تقوليــ...
حسين: شنو قلتي..
رهف: أأأأ..أنا بروح أتريق..
الجزء الثاني:-
رهف: أأأأ..أنا بروح أتريق..
حسين: نطريني..
زينه: واي يافرحتي..أخيراً فرحت بأخوي..
تحت:-
رهف: صباح الخير خالتي..
حسين: صباح الخير يمه..
هدى: هلا والله بالعرسان..صباح النور حبايبي..
رهف: عنج خالتي..
هدى: ارتاحي..انتي عروس..مايصير تسوين شي..
رهف: خالتي مافيهاشي..
وتحط إيدها على راسها:-
هدى:....
رهف: خالتي فيج شي؟!
هدى: لا حبيبتي..بس يمكن لأني مانمت زين أمس..آآآه
رهف: خالتي..خالتي..حسييييييييين..زينه..يا زينه..
حسين: شصاير؟..يمه..
هدى: لا تحاتون مافيني شي..بس ودوني غرفتي..
حسين: يمه..الله يهداج..زينه..روحي شغلي السيارة..رهف بسرعة صعدي جيبي بطاقة المستشفى..موجوده بالبوك على التسريحة..
وخلال دقايق كانوا بالمستشفى..وفي غرفة الأشعة:-
هدى: دكتور..لا تعب نفسك..أنا أدري بمرضي..
أمجد: ليه يا حجه..هوه انتي بتشتكي من إيه؟
هدى: أنا معاي سرطان بالمخ..وحالتي متأخره..يعني مافي فايده..
أمجد: لا حول ولا قوة إلا بالله..من إيمته؟ (من متى)
هدى: صارلي خمس شهور..يعني دريت بالمرض من خمس شهور..وماقلت لأحد..لأن ولدي كان يدرس بره وماحبيت أخوفه..تكفه دكتور أمنتك بالله ما أبيك تقول لأحد..قول لهم أي شي..ولدي معرس وما أبي أخرب فرحته..
أمجد: زي منتي عاوزة (مثل ماتبين) بس..
هدى: أنا قاعده آخذ أدويتي بانتظام عشان عيالي مايحسون بشي..تطمن..
أمجد: طيب..أنا حروح لهم..عن إزنك..
هدى: دكتور..شكثر باقيلي؟
أمجد: الأعمار بيد الله يا حجه..
هدى: والنعم بالله..بس إلي بمثل حالتي شكثر يعيشون..بصراحة..
أمجد: مش كتير..أربع شهور..بالإزن..
وبره:-
زينه: وااااااي طولوا داخل..الله يستر..
حسين: أنا بروح أشوف شالسالفة..دكتور..بشر..
أمجد: ماتخافوش يا جماعة..شوية إرهاق..
حسين: يعني مو محتاجه أدوية شي؟
أمجد: لأ..بس محتاجة راحه..
زينه: أنا بدش عند أمي..
وداخل:-
هدى: شكراً..
زينه: سلامتج يالغالية..ماتشوفين شر..
هدى: الله يسلمج حبيبتي..قلت لكم مافيني شي ماصدقتوني..حسين يمه قلتوا لأبوكم شي؟
حسين: لا يمه ماقلنا شي..
وفي غرفتهم:-
رهف: حسين..ترى قلبي ناغزني..أنا حاسه ان خالتي مو بخير..فيها شي..
حسين: مثل شنو؟
رهف: مادري..شوف وجها شلون أصفر..
حسين: بس الدكتور قال مجرد تعب..
رهف: مادري..بس أنا مو مرتاحة..
زينه: ممكن أدش يا حلوين..
حسين: تفضلي حبيبتي..
زينه: عمتي رهف أهلج تحت..معرسنا..انزل يبون يسلمون عليك..
حسين: رهوفه حبيبتي..انتي سبقيني أنا شوي ونازل..
رهف: أوكي..
حسين: زينه..نطري..
زينه: خير..
حسين: بالأيام إلي فاتت مالاحظتي على أمي شي؟ يعني أكلها خف مثلاُ..وايد تتعب..
زينه: بلى أكلها خف شوي عن قبل..بس التعب لأ..ليش في شي؟!
حسين: لا حبيبتي مافي شي..يله خلننزل..
ومر اليوم على خير:-
زينه: يمه أنا رايحه أنام تامريني بشي؟
هدى: لا حبيبتي سلامتج..بس باجر بعد صلاة المغرب و العشا راح تزورنا خالتج أم عبدالله معاها حريم يبون يباركون لنا زواج حسين..جهزي نفسج..
زينه: ضروري يعني..
هدى: إي ضروري..
زينه: انشاالله..تصبحون على خير..
رهف: وأنا بعد رايحه أنام..تآمريني بشي خالتي؟
هدى: سلامتج حبيبتي..بس رهوفه ممكن طلب..
رهف: آمري خالتي..
هدى: مايآمر عليج ظالم..انتي بحسبة بنتي زينة عشان جذي ما أبيج تناديني خالتي..ناديني يمه..
رهف: تامرين أمر يمه..(وباستها على راسها) تصبحين على خير..
السبت..ساعة 9 الصبح..تحديداً بغرفة:-
زينه: أففففف..مالي خلق..لازم أروح الصالون..خلأشوف رهف..
رهف: صباح الخير يا حلوه..
زينه: بيييييي قديمه أدري اني حلوة من زاااااااان..صباح النور..متى بتروحين الصالون؟
رهف: فديت الواثق..أنا ناطرتج تقعدين عشان نتفق..
زينه: أممممممم.شرايج ساعة ست؟
رهف: أوكي..بس انشاالله مانتأخر..
زينه: لا حبيبتي بوديج صالون يديد توه فاتح شغلهم روووووووووووووعه..والأهم مو زحمه ومافيه حريم وايد..
رهف: أهم شي..
زينه: طبعاً..مالي خلق مخازز..
هدى: صباح الخير..
زينه + رهف: صباح النور يمه..
هدى: هههههههههههه جنكم بمدرسة..
زينه: هذي ملقوفة..
رهف: انتي الملقوفة..
زينه: لا انتي..
رهف: انتي..أششششش لا تقعدين حسين..
حسين من وراها: فديت إلي يخاف على راحتي..
وطبعاً عروستنا ويها صار طماااااااطه..
زينه: حسون..ساعة خمس ونص بنروح الصالون..تقدر تودينا؟
حسين: أوكي..خمس وربع انتوا جاهزين..ما أنطر سنة..
رهف: موقلنا ست..
زينه: يالهبلة..ست نكون هناك..
حسين: هبلة انتي..ماأرضى على مرتي..
رهف: حرررررررررره
ومر على الوقت طبعاً نصه مناجر..(الله يخليهم لبعض)
حسين: زينوووووووووووووووووووووه.يله بسرعة..دقيقة ونمشي..
زينه: وااااااااي ع الحنه..كاني نازلة..
وشرفوا الضيوف:-
هدى: هلا والله ..هلا وغلا..حياالله من يانه..
أم عبدالله: الله يحييج حبيبتي..
عند البنات:-
رهف: وااااي زينوه بسرعة تأخرنا عليهم..إلي يشوفج يقول انتي العروس مو أنا على هالتأخير..
وبكل دفاشه دشت:-
زينه: صبري يالدفشة..
رهف: أمبييييي زينوه..تهبلين..
زينه: قولي مشاالله بسرعة قولي..
رهف: مشاالله مشالله..
زينه كانت لابسة نفنوف أسود طويل..وع الخصر حزام على شكل ورده لونه أحمر ونازل من الورده شريطتين طوال..ومسويه شعرها بف خفيف وحاطه ورده حمره على جنب..طبعاً بدون مكياج..وطالعه كيوت..والإخت رهف..بما انها عروس لابسة نفنوف أبيض كت فوق الركبة بشوي..وصوب الصدر فيه حزام (ستراس = شوارفسكي ) ونفس الشي عند الخصر..ومسويه تسريحه عروس خفيفة مع مكياج خفيف..
زينه: عبالي بعد..
رهف: والله ماينلام شينة الحلايا يوم حبج..
زينه: جب..
رهف: إي صج تذكرت..زينووه..تذكرين يوم رجع حسين من السفر؟
زينه: إي أذكر..
رهف: يومها كنتي بتعترفين لي بشي..شنو أهوه..
زينه: بصراحه..أنا أحب واحد..
رهف: منو أهوه؟ ووين شفتيه؟ وشلون؟ ومنو البدا؟ قولي كل شي..
زينه: واااااي بسم الله الرحمن الرحيم شوي شوي..أول شي أهوه حب من طرف واحد..وين شفته في بيتكم..منو أهوه..أخوج محمد..
رهف: حلللللللللفي..الله ونااااااااسه..ومنو قالج من طرف واحد..حمود بعد يحبج..
زينه: أهوه قالج؟
رهف: لأ..بس عيونه فاضحته لأنها وسيعة..
زينه: قولي مشاالله (مع طراق خفيف بس شوي يعور)..لا تحسدين أخوج..
رهف: آيييييي..دفشه..لا تحسدين أخوج ولا لا تحسدين حبيبي..
زينه: مالت عليج..(وراحت تضبط نفسها)
تحت:-
أم يوسف: إلا وين عروستنا يا أم حسين..نبي نبارك لها..
هدى: عن اذنكم أناديها..
فوق:-
هدى: يابنات..بعدكم ماخلصتوا الحريم يبون يسلمون عليكم..
زينه: بلى يمه خلصنا..
نزلوا تحت:-
زينه + رهف: سلام عليكم..
الكل: عليكم السلام..
أم يوسف: هلا بعروستنا..مبروك حبيبتي..وانشاالله نفرح بعيالكم..تفضلي حبيبتي..
رهف: هلا فيج خالتي..تسلمين ماتقصرين..ليش متعبه نافسج..شوفتكم تكفي..
أم يوسف: والله وعرفتي تختارين يا أم حسين..رهف مشاالله عليها كامله مكمله والكامل الله..الله يهنيكم فيها..
هدى: تسلمين يا أم يوسف..
أم يوسف: ماعرفتينا ع الحلوة..
هدى: هذي بنتي زينه..
أم يوسف: هلا بالزين كله..مشاالله جنهم خوات..مشاالله قمر..
طبعاَ أم عبدالله لما شافت زينه حطت عينها عليها لواحد من عيالها وتحسفت ليش قالت لأم يوسف عنها..
زينه: تسلمين خالتي..
هدى: زينه يمه اخذي البنات وروحوا قعدوا بالصالة الثانية..
زينه: انشاالله يمه..يله بنات تفضلوا..

نتعرف شوي على عائلة أم يوسف الكريمة:-

أم يوسف: عمرها 44 سنة..أرملة..درسة علوم متقاعده..عندها 4 بنات و4 شباب..كلهم يقولون للقمر فز بنقعد مكانك..بس البنات شايفين نفسهم بس كل وحده على مستوى..

فاتن: البنت الكبيرة..26 سنة..شايفه نفسها على ولا شي..صج حلوة..بس مخها فاضي..مو مخلصة الثانوية..

غاده: الوسطيه..25 سنة..هم شايفه نفسها..بس محترمة نفسها..يعني ماتقلل من شأن غيرها..دارسه هندسة ديكور..

رغد: 24 سنة..تدرس طب..شايفه نفسها..مثل اختها الكبيرة..

قمر: آخر العنقود..23 سنة..أحلاهم وأنعمهم وأبسطهم..الكل يحبها..خصوصاً أخوانها يموتووووووون فيها..في غرور بس غرور محترم..يسمونها ملكة جمال الجامعة.. والبيت..تدرس تاريخ..خاتمة الإسلامي..والحين معاصر..

زينه: حياالله من يانه..
قمر: الله يحييج..
زينه: تفضلوا استريحوا..بنات اخذوا راحتكم ترى البيت بيتكم..
فاتن: تسلمين..
طبعاً زينه انصدمت من جلافتها ودفاشتها فابتسمت لها..
قمر: زينه..انتي تدرسين صح؟
زينه: إي دورات خاصة..تصميم جرافيكي..
قمر: أهاا..بالتوفيق انشاالله..حلو خوش تخصص..
زينه: وانتي؟
قمر: أنا أدرس تاريخ..ختمت الإسلامي..وداشه المعاصر..
زينه: مشاالله..كان حلمي أصير مدرسة تاريخ بس ماحصلت المجموع إلي يدخلني الجامعة..
قمر: هذا نصيبج..
زينه (مع ابتسامة بينت غمازتها الوحيدة على خدها اليمين): الحمدالله..عن إذنكم شوي..
الكل: اذنج معاج..
ماعدا قمر: حبيبتي..
بالمطبخ:-
زينه: واااااااي..
رهف: شفيج؟
زينه: يخوفون..واااااايد شايفين نفسهم خصوصاً هذي فاتن..بس قمر فديتها عسووووووله اسم على مسمى..
رهف: إي هذيل وايد شايفين نفسهم..ماشفتيهم بالعرس شلون قاعدين جنهم مو شايفين أحد..هاج اخذي العصير وديه..
زينه: ليش ماضيفوهم ليلحين؟
رهف: لأ..الحجية أم فيصل قالت تبي تشربه من إيدج..
زينه: أهااااااا..وراها شي..نتباحث بعدين..روحي قعدي مع البنات بعدين يقولون راحت تحش فينا..
رهف: ههههههههه..أوكي أنا راح أودي هذا حق البنات..

نشوفكم على خير بالجزء الثالث من البارت الأول..

ملاحظة: دمجت جزئين مع بعض..هالله هالله بالردود..مانبي شكراً ومشكورة ويعطيج العافية..أبي رايكم بكل صراحة..


ريمــ غلا جابر ــاس ©؛°¨غرامي جديد¨°؛©

يسعدني أكون اول وحدة ارد عليج
الرواية روعة ... ننطرج بالبارت اليديد :)

حمودالشمري ♫♪ , Bouгboп

""
‏ ‏ ""
‏ ‏ بسم الله..

يعطيك العافية..
بداية موفقه..
تحياتي:::
حمووووووووودي..
‏ ‏
‏ ‏ ""
‏"‏"


نجفية ©؛°¨غرامي جديد¨°؛©

ريمــ غلا جابر ــاس: مرورج الأروع حياتي تسلمين..

حمودالشمري: الله يعافيك أخوي.. تسلم..

الزعيـ A.8K ـمه ©؛°¨غرامي ماسي ¨°؛©

,’



بسم الله



يعطيك العــافية
موفقة إن شــاء الله


https://forums.graaam.com/238622.html



,’


حمودالشمري ♫♪ , Bouгboп

يسلمك ربي من كل شر.. متى البارت؟؟..
بإنتظارك خيتو..
دمتي بود..
حمووووووودي..


نجفية ©؛°¨غرامي جديد¨°؛©

مشكور أخوي للمتابعة..
البارت انشاالله باجر راح أنزله وراح يكون طوييييييييييل لأن هالأسبوع راح أبدي امتحانات..


P!nk rose ©؛°¨غرامي مشارك¨°؛©

الرواااااااااية وااايد اتجنن
و بدااااااية موفقة

نجفية ©؛°¨غرامي جديد¨°؛©

مشكورة حبيبتي P!nk rose ونستيني بمرورج الحلو


الجزء الثالث


رهف: ههههههههه..أوكي أنا راح أودي هذا حق البنات..
عند الحريم..بعد ماخلصت زينه من توزيع العصير:-
زينه: عن إذنكم..
أم يوسف: زينه حبيبتي..قعدي معانه شوي..حابة أتعرف عليج أكثر..
طبعاً زينه قعدت مع ابتسامة..
أم يوسف: إي زينه ماقلتيلي..انتي جم عمرج؟وين تدرسين؟شنو حابة تسوين بعد التخرج؟
زينه: عمري 23 سنة..أدرس دورات خاصة..تصميم جرافيكي..
أم يوسف: شنو تسوون يعني؟
زينه: يعنييييي..نصمم دعايات واعلانات..
أم يوسف: يعني هالتخصص مطلوب؟
زينه: واااايد وبكل مكان..بالجرايد والشركات والتلفزيون..
أم يوسف: وانتي تبين تشتغلين عقب التخرج؟
زينه: أكييد..شالفايدة من الدراسة إذا مااشتغلت..
أم يوسف: أمممم..
زينه: تآمروني بشي..بروح أقعد مع البنات حرام بروحهم..
أم يوسف: سلامتج حبيبتي..
وعقب ماراحت:-
أم يوسف: مشاالله عليها تينن..خوش بنت يابخت إلي بياخذها..الله يخليها لكم..
عند البنات:-
زينه: آسفة بنات تأخرت عليكم..
قمر: لا حبيبتي عادي..
شوي شوي بدوا البنات يتعودون على بعض..ماعدا فاتن..
زينه: تشوفون عليا؟
غاده: شنو هذا؟
زينه: المسلسل التركي..
غاده:إيييييي..متابعينه..
زينه: رهف..شغلي التلفزيون..
وأهمه يقلبون بالقنوات:-
رهف: سمعوا خبر عاجل..انفجار كبير في سوق شعبي في بغداد أسفر عن مقتل عدد كبير من الضحايا وجرح خمسون شخصاً بينهم ثلاثة أطفال..حرااام..
فاتن: أحسن..انشاالله كلهم يموتون ونفتك منهم..
زينه: حرام عليج..ليش؟
فاتن: مو كافي إلي سووه فينا بالغزو..
زينه: حبيبتي..هذاك صدام إلي غزا الكويت..مو هالأطفال إلي انجرحوا..
فاتن: بس كلهم عراقيين..
زينه: الحين احنا كويتيين صح؟
فاتن: صح..
زينه: كلنا أبرياء نظاف ماعندنا سوالف مخدرات واختلاسات..يعني كلنا صالحين..بكل مكان وبكل زمان في الصالح والطالح..الحين كل يوم قاعدين نقرا بالجرايد أخبار جرايم تشيب الراس..اغتصاب..قتل..وغيره وغيره..هذا معناته ان كل الكويتيين مو زينين..لا حبيبتي مو كل أصابع إيدج سوا..
فاتن: الحين بتشبهين الكويتيين بهذيل القتلة..
زينه: صدام قاتل ومجرم أكيد..وإلي حرقت خسمة عرس الجهرا..مجرمة ولا لأ؟
فاتن:....
زينه: شفتي شلون..أنا معاج..بس إلي أذانا مو الشعب..حزب البعث إلي أهوه صدام وزبانيته..يعني ما يصير أكره طفل توه مولود لأنه عراقي..هذا غلط..شلون تبون الغرب يحترمونا ويحترمونا دينا ونبينا عليه أفضل الصلاة والسلام..لازم احنا نصفي قلوبنا ونبيض صورتنا..
فاتن: وأبوي..إلي راح دمه هدر..وعمي..إلي اختفا وماشفناه من يومها..ميت ولا حي..
زينه: أبوج ماراح دمه هدر ولا حتى عمج..هذا ربج جازاه..طلعوه مثل الفار من حفرته..حبيبتي احنا شفنا الضيم منه ما أقول لأ..بس أبيج تعرفين شي احنا عانينا سبع شهور..بس أهمه ثلاثيييييين سنه..يعني تخيلي تعيشين ثلاثين سنة كلما تبين تطلعين من البيت تقرين الفاتحة على نفسج وعلى أهلج..وتودعينهم جنج بعد ماراح ترجعين..هذا كان حالهم وليلحين..كانوا يخافون يتكلمون عن شي لأن صدام كان زارع الرعب بينهم..ماكان عندهم شي اسمه حرية فكرية..وتعبير عن الرأي..كل حياتهم حزب البعث..بكتب المدرسة..الكتب والقصص إلي تنباع بالمكتبات والجرايد..
فاتن:....
زينه: أنا كنت مثلج..كنت أفكر بهالطريقه..
قمر:وشلي غيرج؟
زينه: معاي وحده بالمعهد عراقية..اهيه إلي غيرت فكرتي..
رغد: يعني غسلت مخج!!
زينه: لا ما غسلت مخي..أنا في البداية مااقتنعت بكلامها..بس لما فكرت عدل..اقتنعت..تخيلت نفسي مكانها..شلون راح يكون موقفي..وشنو راح اسوي..احنا الكويتيين مو الكل البعض..عنصريين..مايعجبنا لا الهندي والمصري ولا غيره..والدليل روحي المدارس وعيشي بين الطلاب وشوفي كلامهم..مثلاً لما كنت بالثانوية بعض البنات ينزعون حجابهم بالمدرسة وتتمشى عادي حتى لو كان الحارس موجود ولا عامل هندي موجود..وإذا كلمتيها تقولج عادي هندي ولا مصري مو ريال..هذا شيسمونه بله؟..الناس إلي بره ماخذين عنه فكرة حلوة..ان احنا شعب متفتح واعي مثقف وأنا ما أقول لأ شبابنا وبناتنا مشاالله عليهم الله يحفظهم يثبتون هالشي..أبونا جابر الله يرحمه ماقصر..ولا أبونا صباح الله يحفظه ويطول بعمره..بس في ناس ماتستاهل كل هذا..قاعدين يزرعون الفتنة والطائفية..وبعض شبابنا الله يهديهم مايصدقون على طول شيعي وسني..ليش الحين طلعت سالفة الشيعي والسني؟ ليش ماطلعت بالغزو ولا قبل الغزو؟ وأكبر مثال أبطال المقاومة..بيت القرين..سيد هادي العلوي وجماعته..كانوا سنة وشيعة ماقالوا لأ انت سني ولا انت شيعي..حطوا إيدهم بإيد بعض وقاوموا العدو..
هدى: يله يا بنات العشى جاهز..تفضلوا..
ومر الوقت على ضحك ووناسة:-
أم يوسف: بصراحة أم حسين قعدتكم ماتنمل..وانشاالله نزوركم مرة ثانية عن قريب..
هدى: تسلمين..انشاالله..
رهف (بهمس): حجية..شامة ريحة طبخه..
زينه: أكيد الشغالة..
رهف: يالهبلة..أم يوسف ناوية على شي..
زينه: الهبلة انتي..أدري..موقلت لج نتباحث بعدين..
أم عبدالله: يله أم يوسف..مع السلامه هدى..مع السلامه بنات..
رهف: مع السلامه يمه..ديري بالج على نفسج..
أم عبدالله: وانتي بعد حبيبتي..ديري بالج على نفسج وعلى ريلج وأهله..
رهف: لا توصين حريص يمه..بعيوني..
رن تلفونها..(قلبك يتصل بك):-
رهف: عن أذنكم..مع السلامه خالتي..
أم يوسف: الله يسلمج..
وكلن راح على بيته..بالسيارة:-
أم يوسف: ها يا بنات شرايكم فيها؟
فاتن: بمنو؟
أم يوسف: بزينه؟
قمر: مشاالله عليها يمه تينن..,الله ياريت يصير نصيب وياخذها أخوي..
فاتن: لا ويع..ماتعرف تلبس..شايفة نفسها على ولا شي..وايد تتفلسف..
رغد: بالعكس مشاالله عليها..
وفي بيت بو حسين:-
علي: ها أم حسين..شلون كانت القعدة..
هدى: والله استانسنا واااايد..بس تدري أنا حاسه انها مو بس تبارك زواج حسين..في شي ثاني..
علي: مثل شنو؟
هدى: تبي تخطب زينه لواحد من عيالها..المره ماشالت عينها عن زينه..
علي: شلون شفتيهم؟ يعني زينين؟ أخلاقهم حلوة؟
هدى: مشاالله عليهم..زينين خوش ناس..عندها ثمانية..أربع بنات وأربع شباب..كلهم بين محامي..ومهندس..ودكتور.. وكابتن طيارة..والبنات الكبيره مو مخلصة الثانوية..والوسطية مهندسة ديكور..والثالثة تدرس طب..والصغيرة تدرس تاريخ..خاتمة الإسلامي..والحين معاصر..
علي: مشاالله..الله يخليهم لها ولأبوهم..
هدى: أبوهم شهيد..من عقب ما استشهد..أم يوسف شالت عيالها على راسها..ربتهم بروحها..وكبرتهم..رفضت كل إلي خطبوها عشان عيالها..
وعند البنات:-
رهف: تفضلي يا شارلوك هولمز زمانج..
زينه: إي..شوفي..عندي احساس كبير والله أعلم ان أم يوسف تبي تخطبني..
رهف: حتى أنا..وفرضاً كان احساسنا صحيح..شراح تسوين..
زينه: ولا شي..أنا أساساً ما أفكر بالزواج الحين..
رهف: متى يعني تبين تتزوجين؟
زينه: يعنييييييي بعد سنتين ثلاث..
رهف (من طرف عين): خو قولي لما محمد يتخرج..
زينه: يالهبلة..مو أنا إلي أقول هالشي..أهو..منوووو
حسين (من ورى الباب): أنا أخوج الحلو حبيبج..
زينه: خير يالواثق؟
حسين: أبي مرتي..
زينه: مرتك رهينه عندي..
حسين: على كيفج..أفا عليج مرتي الحين أحررج..
وبكل دفاشة دش وشالها:-
رهف: حسين تكفه نزلني..
حسين: ماكو..
رهف: أيي معاك والله..
حسين: good night زيزو..
وداخل غرفة معاريسنا:-
رهف: حسين..الله يخليك نزلني..
حسين: آسف..
رهف: انزين..احنا الحين بالغرفة وانت قفلت الباب وشلت المفتاح يعني ماراح أقدر أطلع..
حسين: sorry..
رهف: حسين حبيبي الله يخليك..
حسين: دام جذي بنزلج..
رهف: أخيراً..
حسين: بس عيدي الكلمة إلي بالنص ..
رهف: حبيبي..
حسين: تفضلي..
رهف: شكراً..
ثاني يوم:-
زينه: صباح الخير..
الكل: صباح النور..
زينه: أفففففففففففف
هدى: شفيج؟
زينه: اليوم دوام..
هدى: وشنو يعني؟
حسين: اليوم موعدها يمه..
علي: موعد شنو؟
حسين: شينة الحلايا..
علي: هههههههههههههه..ماخلصتي منه؟
زينه: لايبه..تدرون شلون..ماراح أدوام..أقعد مع المزيون ومرته أحسن من شينة الحلايا واخته..
علي: إلا صج..شصار على شهر العسل؟
حسين: بعد يومين انشاالله..
زينه: وين ناويين تروحون؟
حسين: لندن..
زينه: الله ونااااسة..يصير أجي معاكم؟
حسين: أقول استريحي مكانج..
وصار وقت السفر:-
حسين: يمه ماله داعي الدموع..كلها شهر وراجعين..
هدى: ماشبعت من شوفتك ياوليدي..(طبعاً اهيه قصدها شي ثاني)
حسين: يمه كلها شهر..
هدى: يمه رهف حبيبتي..ديري بالج على حسين..
رهف: خالتي لا توصين حريص حسين بعيوني..
وقعدت الحجية توصي الجنة..كالعادة..بس حسين خذاها على كتر:-
حسين: زينه..أي شي يصير دقي على طول..ماوصيج..حطي عينج عليها..
زينه: أفااا توصيني على أمي على الغالية..بس حسون..أنا حاسة في شي وخاشينه عني..في شي؟!
حسين: لا حبيبتي مافي شي..بس تدرين أمنا كبرت ولازم ندير بالنا عليها أكثر من قبل..
زينه: انشاالله..
وسافروا المعاريس..لمدينة الضباب (إلي ولا مرة زرتها وأتمنى أزورها)..
حسين: انشاالله مستانسة حبيبتي..
رهف: دام إني معاك أنا أسعد انسانه بالكون..
حسين: انشاالله دووووم يا حياتي..أقول رهوف..انتي ولا مرة زايرة لندن صح؟
رهف: صح..
حسين: أفااا عليج..دام حسون معاج ماراح أخلي مكان إلا وأخليج تشوفينه..حبيبتي أي شي يعجبج لا تستحين إنتي بس أشري..
رهف: تسلم حبيبي ما أبي غير سلامتك..يكفيني وجودك معاي..
حسين: الله يخليج لي ولا يحرمني منج..(آمين..الله يزرقنا وإياكم واحد مثل حسون)
رهف: اليوم وين بنروج؟
حسين: أمممممم..راح أوديج كل مكان..أول شي بنروح كاتدرائية سانت باول..
رهف: يعني كنيسة..
حسين: تقريباً..أما شنو كنيسة تطير العقل..
رهف: مو ممنوع مسلمين يدخلون هالأماكن..
حسين: أفا عليج خلي هالموضوع علي..
وراحوا الكاتدرائية..بما ان حسين كان يدرس في لندن معارفه وايد..وعن طريقه يقدر يروح المكان إلي يبيه..بعد ماطلعوا من الكاتدرائية راحوا يتمشون بمبدان بيكاديللي..وصارت 4 العصر بتوقيت غرينتش راحوا تغدوا بمطعم من المطاعم.. عقبها ردوا البيت:-
حسين: آآآآآه يا ريولي..تعبت من المشي..
رهف: سلامتك ريولك حبيبي..
حسين: شرايج بالطلعة؟
رهف: عجييييييييبه..صج وناااااسة..حبيبي..
حسين: عيونه..
رهف: شرايك باجر نطلع من الصبح..لأن أنا حابة أشتري شوية هدايا..
حسين: والله فكرة..مرة وحده تفتكين..يله روحي صلي المغرب والعشا الحين..عشان نتعشى وننام..
رهف: أوكي..
بعد الصلاة:-
حسين: رهوفه شنو تحبين تتعشين؟
رهف: أنا مو جوعانه حبيبي..
حسين: أحسن بعد عشان ننام مرتاحين ورانا طلعه الصبح..
وصار الصبح..تحديداً ساعة 7 بتوقيت غرنتش:-
رهف: صباح الخير حبيبي..
حسين: صباح النور..تحبين نتريق أول ولا نطلع؟
رهف: براحتك حبيبي..
حسين: نتمشى شوي بعدين أنا عازمج على مطعم خطييييييييييرنتريق هناك..
رهف: أوكي..
راحوا أول شي الهايد بارك (سامحوني ما أقدر أوصف شي لكم لأني مو شايفتهم) بعدين وداها باترسي بارك..عقبها تريقوا بالمطعم..بعدين راحوا محلات هارودز..ماخلا شي ماشراه لها..كلما تأشر على شي وتقول حلو شراه..بهالطلعه شرت كل إلي تحتاجه..وظلوا يتمشون:-
رهف: شرايك نرجع الفندق نرتاح شوي..
حسين: خلينا شوي بيطق مطر..
وطق المطر..وظلوا يتمشون تحته..طبعاً أغراضهم بالسيارة..ساعة 11 أهمه بالفندق:-
حسين: حياتي زهبي نفسج بسرعة عشان بعد الصلاة بنتغدى تحت وبعدها بنطلع..
رهف: أوكي..
بعد الغدا:-
حسين: تحبين المتاحف؟
رهف: واااااايد..
حسين: امشي عيل..
وداها متحف الفن الحديث ومتحف التاريخ الطبيعي والمتحف البريطاني ماخلا متحف والاخت طايحتله تصوير ماخلت شي ماصورته..وبليل ساعة 8 وداها مسرح البلاط الملكي بالفندق:-
حسين: حبيبتي روحي بدلي..
رهف: ليش؟ تونا راجعين..
حسين: صيري شاطره وسمعي الكلام..
رهف: انشاالله..
خلال 5 دقايق خلصت..كانت ساعة 11 و 55 دقيقة مساءً بتوقيت غرينتش:-
حسين: تعالي..
وسكر عيونها بخام ستان أحمر..
رهف: هههههههه حسين شصاير؟
حسين: مو صاير شي..بس عندي لج مفاجأة..
تتوقعون وين وداها..وداها سطح الفندق:-
حسين: أوقفي هني لا تتحركين..أعد لي الثلاثه عقبها فتحي..
رهف: أوكي..
حسين: واحد..اثنين..ثلاث
ولما فتحت شافت دنيا ثانية..المكان مزين بورد أحمر وبلونات وشموع وكان في فرقة تعزف أغنية
to you) (Happy birthday
حسين: الحين صارت ثنعش (12) بالضبط..كل عام وانتي بخير حبيبتي..
رهف: وانت بخير وصحة وسلامة..
وبعد ماطفت الشموع وقصت الكيكة كل الموجودين صفقوا لهم (الأخ متفق مع مدير المطعم وعازمه وعازم بعض ستاف الفندق) وكلمن راح على شغله:-
حسين: تفضلي هديتج حبيبتي..
الهدية كانت طقم ألماس..كان عاجبها بس أهوه قص عاليها قالها ما أقدر أشتريه غالي..ومر شهر العسل على خير:-
حسين: كل شي حطيناه بالجنطه..موناسيين شي..
رهف: إي حبيبي..
حسين: خل أجيك آخر مره..أوكي كل شي تمام..يله حبيبتي..
ورجعوا لأرض الوطن سالمين غانمين..بالمطار:-
علي: الحمدالله على السلامة..
في البيت:-
رهف: أما شو لندن..صج صج استانست..
هدى: روحوا ارتاحوا..لاحقين ع السوالف..
حسين: صح كلام أمي..يله رهوف..
ثاني يوم..أول وحدة قاعده زينه حق السوالف:-
حسين: صباح الخير..هاا زييونه قاعده مبجر عجيبه..
هدى: حق السوالف..
رهف: صبح الخير..
الكل: صباح النور..
زينه: تعالي كملي السالفة..
هدى: بسم الله خل تتريق البنية..
وبعد الريوق:-
رهف: عن اذنكم..
راحت يابت الهدايا وعطت كل واحد هديته..حتى حسين:-
حسين (بهمس): زينه..شلونها أمي؟
زينه: والله مادري شقولك يا خوي..أنا حاسه انها مو بخير..شوف وجهها شلون أصفر..
حسين: ليش ماوديتوها الطبيب؟
زينه: كلمتها مليون مرة بس ماكو فايد..مو راضية..
حسين: يمه..عسى ماشر..ويهج ليش أصفر؟
هدى: هاا..من فراقكم يمه..
حسين: لا يمه من من فراقنا..أنا من أول مارجعت لا حظت انج متغيرة..يمه قومي أوديج الطبيب..
هدى: لا حبيبي ما يحتاج أنا بخيـــ..
وقبل لاتكمل الجملة طاحت..وبأسرع وقت نقلوها المستشفى:-
أمجد: بصراحة..الموضوع ماينفعش يتخبى أكتر من كده..
حسين: خير يادكتور شصاير؟!
أمجد: بصراحة الحاجة عندها سرطان بالدماغ ووضعها حرج أوي..
زينه: شنو؟ من متى؟ وليش؟ ليش أمي؟
وقامت تبجي..
أمجد: ماينفعش كده..لازم تأوو (تقوون) ألوبكو (قلوبكم) هي دلوأتي محتاجه دعائكو..
حسين: والحين دكتور شلونها؟
أمجد: زي ما أولت أبل شويه (مثل ماقلت قبل شوي)..وضعها حرج..مبآش كتير..
حسين: وليش ماقلت لنا من قبل؟
أمجد: دي رغبتها..
طلعت الممرضة:-
منى: دكتور..الحق..بسرعة..
ومرت ربع ساعة:-
رهف: ياربي تأخروا:-
أمجد: البأية فحياتكو..
عند هالكلمة وصل الأبو..وفهم كل شي..
صارت سنة على وفاة الأم:-
علي: زينه..
زينه: هلا يبه..
علي: روحي نادي أخوج ومرته..
والتم الشمل:-
علي: سمعوا يا عيال..بقول لكم شي..أنا قبل لا أتزوج أمكم..كنت متزوج..بس لضروف ما أحب أذكرها تطلقنا وتزوجت أمكم..بس..
حسين: بس الحين تبي ترجعها؟
علي: أنا رجعتها..
حسين: عيل ليش جاي تقولنا..
علي: عشان لاتتفاجأون..
حسين: ما انت تزوجتها وخلاص..
زينه: وين بتسكنها؟
علي: في هالبيت..
زينه: يعني بغرفة أمي؟
علي: عيل وين بغرفة المخزن..
حسين: لايبه احنا موراضيين..
علي: سمعوا ما أبي أسمع راي أحد..أنا تزوجتها وخلاص واهيه موجوده هني..كل إلي ابيه انكم تحترمونها وتعاملونها مثل أمكم..
زينه: لأ..ماحد مثل أمنا..ولا أحد بياخذ مكانها..
علي: مو انتوا إلي تقررون..أنا ريال البيت والكلمة كلمتي..تهاني تعالي سلمي ع العيال..
ونزلت ست الحسن والجمال:-
علي: هذا حسين ومرته رهف..وهذي بنتي زينه..
طبعاً الكل طلع غرفته:-
علي: ميخالف حبيبتي..مع الأيام بيتعودون..
تهاني اهيه جرح وانكسار بو حسين..بعد مارجعلها كل شي تحسن..عنده..



برب عن اذنكم..نراكم في الجزء الرابع بعد الامتحانات انشاالله..يعني بعد تاريخ 9 - 6 - 2010

قراءة ممتعة..


نجفية ©؛°¨غرامي جديد¨°؛©

شدعوة عاد..145 مشاهد بس 3 ولا 4 إلي ردوا..كلش ماكو تشجيع..منتهى الإحباط..

أدوات الموضوع البحث بهذا الموضوع
البحث بهذا الموضوع:

بحث متقدم
طريقة العرض

موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1