غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 21
قديم(ـة) 03-07-2010, 07:23 AM
صورة ஐ றάℓόỠόķά ஐ الرمزية
ஐ றάℓόỠόķά ஐ ஐ றάℓόỠόķά ஐ غير متصل
©؛°¨غرامي مجتهد¨°؛©
 
الافتراضي رد: يمسح الدمعة بشكوى / للكاتبة : هدوئي









* الجزء الثالث *




























* مها *





جلست بجنب امي بعد ماراحوا الحريم



مها بفرح = مبروك يمه ...



ام فهد وهي تضحك = الله يبارك فيك يابنتي عقبالك ... والله يوفق اخوك وام عمر





مها بابتسامة = آمين ... اظن ماراح يسوي شهر عسل .. اشوفه على طول راح لعنيزة



ام فهد = هههههههههه وش شهر عسل انتي بعد ... عبد العزيز وام عمر اعقل من هالخرافات ذي



سكتت عن امي وانا اتذكر عمر ... ماجا لفرح امه ... على صغر العزيمة .. ماعزمنا الا الجيران وفوق هذا عمر ماجا



لكن كبرت بعيني ام معاذ وبناتها .. عبد العزيز وعايلته كلهم جوا



مسكينه ام عمر .. زعلت يوم شافت ان عمر ماجا يسلم عليها مع ابوي ومعاذ ومصعب وسعود .. كلهم دخلوا يسلمون عليها الا عمر ..



ماجا للعزيمة اصلا ... لاحظت على ام عمر كيف تضايقت وهي تدور بعيونها على ولدها



والصراحة ماعرفت كيف اخفف عليها ... جيت ابتصل على الحمار عمر بس غيرت رايي باخر لحظة ... ان ماجا من كيفه ماراح يجي



انتبهت على امي يوم قامت



مها مستغربة = على وين يمه



ام فهد = تعبانة .. ابروح انام



وراحت



برطمت بزعل ... افففففففففف الى متى هذا حالي ... ماحد يسهر معي ... مليت من حياتي



ياليت لي اخت ... اسولف معها ونتهاوش ونمزح مع بعض ... ياااااااااحظها اللي لها اخت



مو مثلي مالت علي ... قمت رايحة لغرفتي مالي الا صديقاتي اللي تعرفت عليهن في النت



فتحت الاب توب وقعدت احتريه يكمل تشغيل وبالي مشغول بشي افكر فيه لي يومين



حياتي ممله .. كلها نوم وانترنت واكل نوم انترنت اكل نوم انترنت اكل



ليه ماصير سيدة اعمال هاااه ؟



وش ناقصني ... ودي اصير سيدة اعمال .. نفسي افتح مشغل .. واجيب عاملات



واعطي هذي راتب واعاقب هذي ... واخصم من هذي .. واكافئ هذي .. واروح واجي ويصير لي قيمة في المجتمع



فتحت الانترنت ودخلت موضوع يتكلم عن بنك التسليف



ابوي على قد حاله ... واخواني عبد العزيز وفهد كل واحد عنده كومة اوادم يصرف عليهم ما احد بيساعدني بفلوس افتح فيها مشروع اشغل حياتي فيه



مالي الا بنك التسليف .. يقولون مايحتاج كفيل ويقدر اللي مو متوظف زي حلاتي ياخذ منهم قرض



خلاااااااص قررت افتح مشروع مشغل واصير ( ونفخت صدري )



سيدة الاعمال مهااااااااااااااااا





* رايد *



الجمعة .. العصر



قلت لدانة تنادي على مريم وجلست احتريها بالملحق



افففففف مريم بصعوبة اشوفها واتكلم معها



واذا جت تجيب غداي او أي شي لي تروح بسرعة ... ودي اعلمها عن اللي قاله لي مصعب



ان شاء الله اقدر امشي مرة ثانية ان شاء الله ياااارب



شوي ودخلت مريم



مريم = آآآآآآآه واخيرا خلصت الشغل ( وتمددت على سريري بتعب )



نزلت راسي منقهر باللي يسوونه بمريم والمشكلة ماقدر اسوي شي وانا ما امشي الا بعكازات



ان شاء الله ابتشافى واخلصك منهم يامريم ... رفعت راسي وابتسمت



رايد = مريم فيه واحد اليوم كلمني يقول فيه أمل أمشي بدون عكازات ... مريم انا راح امشي ونطلع من هنا ( وابتسمت اكثر فرحان )



جلست مريم وتربعت وهي فوق سريري



مريم بفرح = صدق .. وشلون ؟



رايد = يقول بالمستشفيات يسوون علاج طبيعي ... يقول جلسات وتدريب وكذا وبعدين امشي ان شاء الله



مريم = طيب وش تحتري ليش ماتروح للمستشفى ؟



رايد = مو هنا المشكلة يقول لازم اجيب اول تقارير حالتي .. والتقارير عند عمي .. ابيك تجيبين التقارير من عمي ... تكفييييييين



مريم = طبعا اكيد اجيبهم ... واليوم الجمعة وبكرة السبت ... وش نحتري اجل .. ابروح لعمي الحين



وقامت بسرعة وطلعت



ضحكت مستانس ... ماخلت لي فرصة اقول لها ان مصعب مايقدر يوديني الا الاحد ... اخيرا يارب يارب اشفني .. ودي امشي ونطلع من هنا



جلست احتري مريم على نار بس طولت ... وين راحت هذي



اخذت عكازاتي وقمت رايح للحوش ... افففف وين راحت كل هذا على عشان تقارير



مرت خمس دقايق وانا احتري ... رحت للمجلس يمكن اشوف بندر والا دانه والا شهد ينادون لي مريم ... المشكلة ماقدر ادخل البيت الا بستئذان عشان بنات عمي اللي يتغطن عني



فجأة سمعت اصواتهم مريم وعمي عاليه .. شهقت بخوف شسالفة ؟



قربت عند الباب احاول اسمع .. فجاءة طلع لي ولد عمي الصغير بندر



بندر = مريم وابوي يتهاوشون ( وفتح لي الباب ) ادخل بسرررررعة



رايد لخوف = بندر وش فيكم ؟



ولا احتريت منه رد .. دخلت البيت وشفت مريم هي وعمي واقفين عند الدرج ومريم تبكي وتصارخ



ومرت عمي وبناتها واقفين بالصاله يوم شافوني دخلت اندسن بدور ونوف ورا الجدار و مرت عمي تغطت بشيلتها



التفت لي عمي يوم شافني وصارخ بوجهي



عمي = هييييه انت وش مدخلك البيت ... بنات عمك موجودات يالهيس الاربد... اطلع برااا طلعت روحك انت واخواتك ويريحني منكم اطلع



مريم وهي تبكي = اخذت راتب ابوي واخذت بيتنا والحين حتى تقارير راايد رميتهم ...



شهقت منصدم .. وش تقاريري ؟



مريم بصراخ = ليييييييييش ... وش فيها اذا احتفظت بالتقارير ... الحين وشلون يتعالج راااايد .. حسبي الله علييييك



مرة عمي بعصبية = هذي وشفيها شبت علينا ... هييييه انتي وش شايفه نفسك



التفتت مريم على مرت عمي معصبة وهي تبكي = ابي تقارير رااااايد ... خليه يطلعها خليه يطلعهاااااااا ... مابي منكم شي ابي تقارير رااااااااااااااااايد



فجاة شفت يد عمي ترتفع وضرب مريم على قفاها طيحتها الارض



عمي بعصبية = تعلين صوتك علينا ياقليلة الخاتمة .. قومي ( ورفس مريم برجله ) قومي فارقي عن وجهي قومي لا بارك الله فيك وبالساعة اللي جبتك عندي



والتفت لي ..



عمي معصب = وانت يالمعوق لا بارك الله فيك ... اذا شفتك تدخل البيت وبنات عمك فيه ... لتشوف شي ماشفته



تصلبت بمكاني منصدم .. رمى تقاريري ... معوق ... مايكفي حارمنا من الدراسة ... احس بالاهانة ... اشوف مريم قدامي طايحة بالارض ويرفسها عمي ... ويهيني ولا قادر اسوي شي بسبب اعاقني ...



نزلت نظري لمريم احاول اشوفها بس دموعي منعت عني الرؤية ... انا من لمسة اطيح ... وشلون ادافع عن نفسي وعن اختي



راتب ابوي وبيتنا وملفاتنا حتى تقاريري ما احتفظ فيهم



قامت مريم وهي تمسح دموعها وتبكي بصوت مسموع وطلعت تركض باتجاه الملحق



وقفت اطالع عمي منقهر ... ودموعي على خدي ..



وشلون ابي التقارير ... وش اقول لمصعب ... كيف ابروح للمستشفى واتعالج ... كيف ابطلع من هنا انا واخواتي ... كيف نرجع لبيتنا ... ابي اكمل دراستي ... يضرب مريم قدامي ولاني قادر اسوي شي



بصعوبة طلعت مني الكلمة



رايد بقهر = هيّن



مرت عمي بصراخ = هيه انت وش تحتري .. تحسب نفسك بزر تطلع وتدخل على كيفك ...



مشيت وانا احس بصدري نار من القهر ومن منظر مريم قدامي



فتح بندر الباب لي وطلعت رايح لمريم



شفتها منسدحة على سريري ومغطيه وجهها على مخدتي و تبكي بصوت مسموع



طلعت لباب الشارع وجلست على العتبة ونزلت راسي على ركبي وبكيت اكثر







* عمر *



دخلت البيت ولقيت كل لمباته طافية ووقفت بمكاني اتأمل البيت بعد امي ... من يوم الاربعاء ماطبيت البيت وما انام الا باستراحة الشباب ومطنش كل اتصالات امي ... حتى امس مارحت للعزيمة واللي كنت خايف منه صار



وتلفتت بعيوني على البيت ... باااارد كئيب .. هنا كانت امي تجلس واول مادخل البيت تناديني تعاااال ياعمر ... ليش تأخرت ياعمر ... وين كنت ياعمر



هذا انا دخلت البيت ليش ماحد يناديني ... ليش ما اسمع شي



شغلت الانوار .. ورحت فوق ودخلت غرفة امي وجلست على سريرها بحزن



اكره الوحدة ... وقبل متضايق لأن ماعندي اخوان ولا اخوات



الحين ماعندي اخوان ولا اخوات ولا ام ولا اب



قمت ورحت عند التلفزيون وشغلته ... راح اصير طول عمري اتفرج لحالي واتغدى واتعشى لحالي .. ياحظهم مصعب ومعاذ اخوان توأم وقليل يتفرقون ولهم اخوات ولهم اخو ثالث سعود وعندهم امهم ... وفوق هذا اخذوا امي



حسيت دموعي بتطلع ... مابي ابكي ... ما احد يستاهل ... ما احد يستاهل







* ابو فهد *





زفرت معصب من هالولد ... والتفتت على خاله ابو سعد



ابو فهد منحرج = والله مادري وش اقولك يابو سعد .. من يوم علمناه عن موضوع امه تغير علينا



ابو سعد = وش السوات معه ... بتخلي عمر بالبيت لحاله ... انا بنفسي من يوم جيت من الدمام ماشفته ولا سلم علي ... حتى بعزيمة امه ماجا ... هذا كلام يابو فهد



لا حول ولا قوة الا بالله ... الله يهديك ياعمر .. خالك ماسلمت عليه وهو جاي من سفر وجاي عشان من ... عشان امك ... مو عشان احد غريب



التفتت على ابو سعد معصب من هالولد



ابو قهد = قم معي يابو سعد ( وقمت واقف )



ابو سعد مستغرب = وين ؟



ابو فهد متضايق = بنروح لعمر الحين



وطلعنا انا وخاله بعد ماتصلت على صديقه مشعل وعلمنا انه ببيته .. انا مابي اتصل على عمر ... نبي نجيه وهو مايدري



شفت بالشارع رايد جالس على عتبه بيتهم ومنزل راسه على ركبه



الصراحة ودي اروح اشوف وش فيه ... يمكن محتاج شي هالمسكين .. بس المشكلة معي ابو سعد وهو مستعجل يبي يسافر للدمام قبل مغيب الشمس .. وما مأخرنا الا عمر ومشاكله



ركبنا سيارتي ووصلنا بيت عمر وضربنا الجرس



شوي وفتحلنا عمر الباب .. واستغربت من شكله ... شكله حزين .. او متضايق مدري وش فيه



تفاجأ عمر منا .. والتفت على خاله



عمر = هلا خال .. وشلونك ( وسلم على راسه )



قلت معصب على هالحفيد



ابو فهد معصب = توك تسلم على خالك .... له يومين عندكم بالبيت ... وين كنت فيه ؟



ابو سعد = حصل خير يابو فهد .. انا بس بغيت اشوف عمر واسلم عليه قبل ارجع للدمام .. من زمان عنه ( والتفت على عمر ) وشلونك ياولدي .. كنت ابي اشوفك واسولف معك



نزل عمر راسه وسكت



ابو سعد = بتجلس بالبيت لحالك ياعمر والا وش بتسوي



ابو فهد = لا يابو سعد بيسكن عندي



رفع عمر راسه لنا معصب



عمر بصراخ = نعم نعم ... ومن قال اني بسكن عند احد ... انا طووووول عمري وحيد ... واخذتوا الشخص الوحيد اللي كان معي ... وش تبون بعد ؟



ابو سعد = ياولدي اسكن مع جدك احسن من جلوسك لحالك هنا ... والبيت اجره تستفيد منه



عمر معصب = لأ ... ماني ساكن عند احد



تنهدت متضايق من عناد عمر وعصبيته ... حتى عصبيته اعمته اننا شيبان واقفين قدام البيت ..



ابو فهد بترجي = عمر ياولدي .. مافيه بالبيت الا انا وعمتك وجدتك ... تعوذ من الشيطان وتعال اسكن عندنا ... حنا نبيك ياولدي



سكت عمر شوي وهو يطالعني



عمر متضايق = انتوا ماتبون الا راحتم وبس ... وغيركم بالطقاق ( وسكت شوي ) متى مابغيتوني اجي جيت .. اما سكن ماني ساكن عندكم ... كذا مزاااااااج



نزلت راسي اتحوقل احاول اهدي نفسي



ابو فهد = لا حول ولا قوة الا بالله ... ( ورفعت راسي له ) طيب .. ليه ماتغديت عندنا اليوم ؟



لف عمر وجهه عني ومارد علي



ابو فهد = عشاك اليوم عندي تفهم ..



عمر = طيب .. ( وفسح الطريق لنا ) مانتوا داخلين البيت .. ترا ماعرف اسوي قهوة وشاهي ..



طالعنا بعض انا وابو سعد وابتسمنا .. مهما يكون ولدنا وش نسوي














الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 22
قديم(ـة) 03-07-2010, 07:24 AM
صورة ஐ றάℓόỠόķά ஐ الرمزية
ஐ றάℓόỠόķά ஐ ஐ றάℓόỠόķά ஐ غير متصل
©؛°¨غرامي مجتهد¨°؛©
 
الافتراضي رد: يمسح الدمعة بشكوى / للكاتبة : هدوئي






قرآءة ممتعه ...






الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 23
قديم(ـة) 03-07-2010, 09:35 AM
صورة البنت الذي كويسة الرمزية
البنت الذي كويسة البنت الذي كويسة غير متصل
©؛°¨غرامي نشيط¨°؛©
 
الافتراضي رد: يمسح الدمعة بشكوى / للكاتبة : هدوئي


... تسلمين ع البارت
ماقصرتي~

يالله ممكن ابو فهد
يقدر ينقذ رائد
من اللي هم فيه

ماادري عندي احساس
رائد بالمستقبل بيصير له مكانه بالمجتمع ض1


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 24
قديم(ـة) 03-07-2010, 11:22 AM
إحساس مخدر! إحساس مخدر! غير متصل
©؛°¨غرامي جديد¨°؛©
 
الافتراضي رد: يمسح الدمعة بشكوى / للكاتبة : هدوئي


وا عمري على رئودي
قسسم أنو مقطع قلبي المسكين
ومريوم
فديتها تتحمل لي متى الله يصبرها على العدو~~>عمها ^^
عممر
يحزن لكن ما كانو مكبر الموضوع
ووبس

مشكوووووووه على النقل الموفق بانتظار باقي البارتات
قود لاك^^

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 25
قديم(ـة) 09-07-2010, 07:41 PM
صورة ஐ றάℓόỠόķά ஐ الرمزية
ஐ றάℓόỠόķά ஐ ஐ றάℓόỠόķά ஐ غير متصل
©؛°¨غرامي مجتهد¨°؛©
 
الافتراضي رد: يمسح الدمعة بشكوى / للكاتبة : هدوئي




* الجزء الرابع *



















* مها *





جلست متضايقة ... امس كلمت ابوي افكر اخذ قرض وافتح مشروع صغير اتسلى فيه



بس ابوي عيا وبقوة يقول انتي مانتي محتاجه شي .. وشوله تدوخين راسك باشياء مالها داعي



طيب انا مليت ودي باي شي يشغلني



واللي زاد الطين بله امي كلمتها عشان تقنع ابوي بس امي بنفسها ماقتنعت



ودي اصير سيدة اعمال ... بأيش احسن مني سيدات الاعمال



وانا ماطلبت شي كلها مشغل صغير افففففففففففففف



بس ماراح استسلم ابرجع واقنع ابوي مرة ثانية وان شااااااااااء الله يوافق



امس الحمد الله جانا عمر بعد زواج امه ... صح كان شكله يوم يتعشى عندنا امس كأنه زعلان والدليل ان امي باركت له على زواج عمه وامه بس هو مارد على امي .. بس عادي يسولف معنا بالامور الثانية



واليوم بيجي مصعب ومعاذ وسعود يتعشون عندنا وابوي لزم على عمر يجي بعد ويتعشى عندنا



الله يستر يتهاوش عمر معهم هو خلقه عصبي وشلون الحين اذا التقى مع مصعب ومعاذ اللي باعتقاده اخذوا امه منه



بس ان شاء الله الليلة تعدي على خير ومايتهاوش عمر معهم ... ياااااااااااارب





المغرب



وانا جالسة مع امي وابوي بالصالة دخلوا علينا الثنائي المرح معاذ ومصعب



مصعب ومعاذ = السلام عليكم



الجميع = هلا وعليكم السلام



تلفتت ادور سعود وليلى وليان



مها = هييييييه انت واياه أين البقية ؟



ابو فهد = وين سعود .. قال بيجي



مصعب وهو يجلس = انحشنا عنه



قطبت حواجبي مستغربة ...



امي = وليه ان شاء الله .. سعود هو اميركم



معاذ = خليه ياجده ... تدرين تراه امس هرب من مدرسته منحاااااش



مصعب = ولأن العقاب من جنس العمل ... انحشنا عنه ..



معاذ = نعم عظة وعبره لغيره



ضحكت عليهم ... استانس اذا جو عندي ... شكلهم حلو ... كل واحد يكمل كلام الثاني ... حتى اشكالهم يتشابهون مرة ... بس واحد عليه نظارات والثاني لا ... وفيه اختلاف بسيط بينهم بس ماينتبه له الا اللي يقرب عندهم والناس مقربين لهم



ابو فهد = طيب وليه ماجبتوا ليلى وليان معكم .. منحاشين بعد ؟



مصعب = لا .. بس نسيت اقول لليلى هي تبي تجي والا لا



التفت ابوي لمعاذ = وانت ليه ماقلتلها يوم شفت اخوك نسى



معاذ = تضامنا معه نسيت ( وابتسم ابتسامة كبيرة )



ضحكت عليه ... واضح من شكله انه مانسى ...



مها = هههههههههههههههههه ايه صح متضامن وبقوه





بعد صلاة العشا بفترة



دخل علينا عمر وحنا بالصالة جالسن بالارض نضحك ونسولف



انا عن نفسي سكتت اول ماشفته ... وحسيته تفاجأ من وجود مصعب ومعاذ



قرب مصعب راسه مني وهمس باذني



مصعب = عمه وش جابه هذا ؟ ذيك المرة كسر نظارتي هالمرة وش بيكسر



قربت راسي من مصعب



مها = لا تحارشونه وماراح يقول شي



ابعد مصعب عني معصب



مصعب = وش قصدك .. ذيك المرة هو اللي بدا مب انا ... ليش مانتوا مصدقين



حركت يدي له يعني خلاص اسكت والتفتت لامي اللي ماسكه يد عمر وتحاول فيه يسكن عندنا



عمر = جدتي بس انا ابي اصير بالبيت لحالي ...



امي = لا حول ولا قوة الا بالله



ابو فهد = خلاص اتركيه بكيفه ( والتفت على عمر ) بس يابوك كل يوم تمرنا تتغدى وتتعشى ... هناك مافيه احد يطبخلك



شفت معاذ يقوم وراح داخل البيت لاحد الغرف وجا وجلس بجنب مصعب



الغرفة اللي دخلها قبل شوي مافيه شي يخص معاذ .. بس سكتت يوم حسيت انه روحته للغرفة عذر عشان يقوم و يجلس بجنب اخوه



فجأة تكلم معاذ بصوت عالي شوي



معاذ = فااااااااتكم اليوم نص عمركم ... ( والتفتت لامي وابوي ) جدي جدتي وش هذا ماشاء الله على طبخ عمتي ام عمر ... شي شيييي طبخها ... تصدقون عجزت اشبع منه



فتحت عيوني مستغربه من معاذ ... مو هذا اسلوبه ... اصلا معاذ معصلك من متى يهتم بالاكل



معاذ = واليوم العصر نزلت هي عند امي ... وماشاء الله عليهن تقولون اخوات ..



ابتسموا امي وابوي مستانسين



ابو فهد = ام عمر طول عمرها عاقله



معاذ = أي والله ياجدي ... جلستها ماتنمل ( والتفت لاخوه ) صح مصعب .. وش رايك فيها ... تدري وشلون ابقولها تطبخ لنا بكرة ... وبنجي عندها فوق نتغدى ... عمتي ام عمر تونننننننننس



مصعب مستغرب من اخوه = آآآ .. ايه صح ( والتفت لعمر وبعدها التفت لامي وابوي ) ايه حتى اخواتي حبوها



ضحكوا امي وابوي مستانسين وفرحانين لعبد العزيز



بس انا بديت اشم ريحة نذاله ... التفتت لعمر .. ولقيته متركي وعيونه على فنجاله وساكت



امي = الله يبارك فيها ويوفقها تستاهلونها



الصراحة ابغاهم يسكرون على الموضوع .. بس المشكلة مدري وش اقول عشان اغير السالفة



التفتت لمعاذ بسرعة



مها = آآآ .. معاذ ماقلتوا لنا ليش سعود انحاش من مدرسته ؟



مصعب = الخبل يقول فيه مــ



وقاطعه معاذ



معاذ = اكيييييييييييد يبي يلحق على فطور عمتي ام عمر ... اكلها لا يقاااااااوم



اخذت نفس معصبه من معاذ .. زودها الصراحة



مها معصبة = معاااااذ



عمر بهمس = فيه عشا والا اروح



التفتت لعمر بزعل ... هالمره هم الغلطانين مب هو



امي = لا وانا جدتك وين تروح بدري



قربت راسي من مصعب اللي جالس بنجبي



مها = وش فيه معاذ اليوم ... انهبل ؟



قرب مصعب راسه مني



مصعب = يبي يحر عمر ...



مها بعصبية = ادري خله يسكت .. خل تعدي الليلة هذي على خير



اخذنا ربع ساعة نسولف بامور عادية .. و بعدها رحت للمطبخ اجيب العشا لاهلي



واستغليت الفرصة يوم شفت معاذ جاي يساعدني .. واستلمته اهاوشه وحنا بالمطبخ



مها معصبة = وش فيك انت اليوم على عمر



معاذ = وش سويت ؟



مها = لا والله ماتدري وش سويت ... وش اسلوب البزارين هذا



معاذ = يستاهل ... ذيك المرة ضرب مصعب وكسر نظارته .. انا ماضربته ولا شي .. ساكت عنه



مها بعصبية = ايه واضح انك ساكت ... معاذ عمر يكفيه اللي فيه ... يكفي ان ماعنده احد بالبيت يونسه ... يكفي انه ماهو راضي بزواج امه



طنشني معاذ واخذ الحاجات وراح





* عمر *



طلعت من بيت جدي وركبت سيارتي وانا كاره نفسي ... بسيطة يامعاذ



نزلت راسي على الدركسون يوم تذكرت كلمته ( جلستها ماتنمل )



ليه يمه ... رحتي عند ناس مو محتاجينك اصلا .. وخليتيني ... يمه البيت كرهته بعدك ... صاير كئيب ...



رفعت راسي وحركت السيارة رايح لاستراحة الشباب ... كل مابغيت اروح للبيت اتذكر ان مافيه احد واغير رايي .. بصعوبة ادخل البيت اخذ ملابسي و اتسبح وعلى طول اطلع





الاحد



كنت بالجامعة باحد المحاظرات وسرحان افكر بطريقة ارد الصاع صاعين لمعاذوووووه



ودي اذيه مثل ما اذاني امس بس وشلووووون



انا ومعاذ ومصعب ومشعل خويي كلنا ندرس بنفس الجامعة وكل واحد له تخصصه



خلصت المحاضرة اخيرا وطلعت لمواقف السيارات ادور سيارة معاذ بس مالقيتها مع زحمة السيارات



اتصلت على مشعل عشان يجيني .. مالي غنى عن مشعل ابيه يدور معي قبل يخلص الدوام



شوي وجا مشعل



مشعل = وش ناوي عليه



عمر = شف .. دور معي سيارة معاذ واذا لقيتها راح نحتريه عندها





مشعل مستغرب = طيب وبعدين ؟



عمر بابتسامة = وبعدين انا ابندس ورا السيارة اللي بجنبها وانت تشغل معاذ عني



مشعل = ليه وش تبي تسوي ؟



عمر = ولا شي ... بس ابشق وحدة من الكفر



مشعل منصدم = تشقها ؟.. قصدك تنسمها



عمر بابتسامة = لا اشقها



مشعل = وشلون تشقها .. لا يكون معك آآآ



عمر = ايه معي سكينه



شهق مشعل بخوف = انجنيت جايب سكينه للجامعة ... صاحي انت .. وبعدين تعال عيال عمك يعرفوني اني خويك ... على طول بيعرفون ان انت اللي شق الكفرة



عمر = عادي خلهم يعرفون ... خايف منهم يعني



ورحت ادور سيارة معاذ



اخذنا عشر دقايق وحنا ندور ... اخر شي اقترحت على مشعل يوقف عند البوابة يحتري معاذ ويراقبه لين يروح لسيارته وانا وقفت بعيد شوي عن مشعل و اشوفه من بعيد واقف عند البوابة والجوال بيننا



على الساعة 10 اتصل علي مشعل



عمر = الووووو ... هاااه شفته ؟



مشعل = ايه هذا هو يمشي قدامي ... تشوفه انت من بعيد ؟



حاولت اركز من بعيد بالشخص اللي يمشي قدام مشعل والجوال باذني



وقطبت حواجبي بقهر يوم ميزت الشخص ... هذا مصعب مو معاذ



عمر بقهر = مشعل هذا مصعب



مشعل = صدق ؟ ... يتشابهون حسبته معاذ ..



عمر = كم مرة اعيد عليك اللي عليه نظارات مصعب



مشعل = انا وش عرفني بعيال عمك ... طيب سيارتهم وحدة ؟



عمر = لا كل واحد يجي بسيارته ... كل واحد دوامه يختلف عن الثاني



مشعل = طيب خلاص ابرجع للبوابة احتري معاذ



عمر = لا لا لا ... احرقتنا الشمس وحنا نحتري



مشعل بفرح = يعني هونت .. احسن بعد



عمر = تعال تعال ... من قالك اني هونت .. سعيّد اخو مسعود ... ابشق كفرة سيارة مصعب ... اشغله عني انت ( وسكرت بوجهه )



ورحت امشي بسرعة واحاول اقرب عند مصعب من دون مايشوفني



شفت مشعل ينادي مصعب قبل يوصل عند سيارته ...



تلثمت ورحت امشي ورا السيارات لين وصلت عند سيارة مصعبوه



و قبل اسوي أي شي شفت اللوحة عشان اتأكد ان السيارة لمصعب



عملت عملتي و رحت من بين السيارات لين ابعدت عنهم واتصلت على مشعل اعلمه ان المهمة انتهت



شوي وجاني مشعل



مشعل = ياخي علمني وش سوا مصعب عشان تشق كفرة سيارته



عمر = شك بشي .؟



مشعل = لا ... يوم رحت عنه ركب بسيارته و مشى شوي بس وقف على طول يوم انتبه على الكفرة .. عاد انا عشان مايشك فيني رحت اشوفه احط نفسي مادري عن شي .. والحين قاعد يغير الكفرة بهالشمس هههههههههههههههههه



عمر = هههههههههههههههه





* رايد *





وين راح مصعب ... تأخر ... هو قالي يوم الاحد ماعليه الا محاظرة وحدة وتخلص الساعة 10 ... والحين قرب يذن الظهر وهو ماجا



جلست على عتبه باب بيت عمي احتري مصعب ... لا يكون مصعب يضحك علي



نزلت راسي بيأس اكيد نسى موعدنا ... اكيد بينساه انا لاني اخوه ولا قريبه



يافرحة ماتمت ... بس وشلون ينسى وانا امس المغرب شفته بالمسجد عندنا وعلمته ان عمي ضيع تقاريري وطمني مصعب اننا نقدر نسوي تحاليل جديدة ويشوفون حالتي من جديد



رفعت راسي يوم سمعت سيارة دخلت الحارة بس خاب ظني يوم شفت سيارة ثانية ماهي سيارة مصعب ... اووووووه وين راح انا متأكد انه وعدني وقال على الساعة 10 ونص وهو جاي



سمعت صوت سيارة تدخل الحارة مرة ثانية وطالعته بلهفة وفرحت لما شفت سيارة مصعب .. وقمت بصعوبة متوجه له وانا فرحان



وتفاجأت من شكله يديه و ثيابه وسخة ... هذا شكل واحد جاي من جامعة ؟



نزل مصعب من سيارته وجا عندي



مصعب = معليش تأخرت عليك



لاني ماقدر اقول شي .. هو كثر خيره انه جاي متعني ولمصلحتي ..



رايد = لا عادي



مصعب = لقيت واحد شاق كفرة سيارتي



طيرت عيوني



رايد = واحد .. تعرفه ؟



مصعب = انا ماشفته ... بس شاك بواحد .. المهم ابدخل بيت جدي اغسل واجيك على طول ... اركب السيارة



وراح بسرعة ودخل بيت جده





بالمستشفى وبعد معاينة الدكتور وبعض الفحوصات طلب مصعب من الدكتور علاج طبيعي وبعد ساعتين من الفحوصات والاجراءات عطاني موعد واوقات لكل جلسه



التفت لمصعب وحنا عند الدكتور



رايد بصوت هامس = مصعب الاوقات ماتناسبي



مصعب مستغرب = ليه ؟



نزلت راسي بحزن



رايد = وشلون اروح ماعندي سيارة وعمي اعرفه ماراح يعطيني سيارته



نزل مصعب راسه يفكر شوي



مصعب = اممممم ... يحلها الله يارجال



هزيت راسي والتفتت للدكتور بلهفة



رايد بلهفة = دكتور متى ابدأ الجلسات ... ابي امشي بسرعه



ضحكوا مصعب والدكتور على حماسي















بعد مرور شهرين





ماتخلفت عن أي جلسه ... احيان يوصلني مصعب واحيان يوصلني جده وبعض الاحيان اروح اوقف بالطريق واشر على أي سيارة توصلني ... المهم ما اغيب عن أي جلسه



رغبتي في المشي واصراري على أي صعوبة في التدريب او المواصلات .. صح كنت ايأس واتعب من التدريب بس ماستسلمت .. كل ماتذكرت هدفي قمت اتدرب واسوي كل شي قالي عليه الدكتور ... هدفي امشي واطلع من بيت عمي ... هذا همي الوحيد ... ارجع للرياض ... نرجع لبيتنا ... اخذ حقنا ... ارتاح انا و ترتاح مريم ودانه



وماقدر ارجع لبيتنا الا اذا مشيت



وبالبيت ولأني دايما فاضي ... استغل وقتي في التدريب ... اروح ادور حول بيت عمي مشي ...



شوي شوي بديت امشي بمساندة الجدار ... شوي شوي بديت امشي على عكاز واحد



شوي شوي بديت امشي لحالي خطوات بسيطة بس اتعب بسرعة ... لين الحمد الله مشيت ... وقرر الدكتور يخفف الجلسات وصار ثلاث جلسات شهريا .. ومنعني عن الركض على الاقل ثلاث شهور



بس التدريب بالبيت ماخليته



و طوال الشهرين اللي فاتوا عمي لا مبالي بنا متنا او عشنا ما هو مهم عنده وزوجته كانت متسلطة



تسب وتضرب وتشتم .. واكثر الاحيان انام و انا جوعان ... ومريم يمر اليومين والثلاث ايام ماشوفها ... ودانه اشوفها تلعب مع بندر وشهد بس كعادة البزارين لازم يتهاوشون وشي طبيعي يتهاوشون وقت اللعب ...



بس اللي يقهر اذا بكى بندر او شهد ضربوا دانه على بالهم ان بكاء بندر وشهد بسببها



واذا بكت دانه باللعب ماحد يلتفت لها .. والمسكينة دانه تنسى وترجع تلعب



وانا ومريم مانقدر نقول شي ... بالبداية قبل نعرفهم كانت مريم تدافع عن دانه بس مرة عمي وعمي مابقلوبهم رحمة ...



مع الوقت مريم اذا شافتهم يضربون دانه تبكي من القهر لان مابيدها شي ...



وانا احط حرتي بالتدريب او اطلع من البيت ومن الجو المكهرب



وراح الشهرين كله ضرب وشتم وطرد ... ايه تميزت عن اخواتي صار عمي يطردني وارجع بنفس اليوم لسببين الاول مادري وين اروح ووين انام ومابي مصعب يشوفني



والسبب الثاني اخواتي لازم ماخليهم .. لازم يطلعون من بيت عمي ... انا اقدر اطلع باي وقت بس دانه ومريم لازم يطلعون ... بس كيف مدري



مريم شايله همي حتى احس نفسيتها تعبت

هي اكثر واحد منا عانا من بيت عمي دايما يشغلونها في البيت تطبخ وتغسل وتكنس ومرة عمي ماتخلي لها مجال مع ان لها بنات ...



واذا طردني عمي لاي سبب اخذ ساعة ساعتين برا البيت وارجع الملحق ... اغصب نفسي على الرجعة بس عشان مريم ودانه ...















الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 26
قديم(ـة) 12-07-2010, 06:24 AM
صورة ♫ معزوفة حنين ♫ الرمزية
♫ معزوفة حنين ♫ ♫ معزوفة حنين ♫ غير متصل
©؛°¨غرامي فضي¨°؛©
 
الافتراضي رد: يمسح الدمعة بشكوى / للكاتبة : هدوئي





معــآإذ تصرف بـ نذآإلـــة ..
مهمـآ سوى له عمر مآيقهره وينرفزه بهالطريقـة ..

رحمت عمر المسكين كثيييييييييييييير ، توه يحس بالوحدة ..
مآ حس فيهــآ لمـآ كآن يترك آمه لحآلهــآ بالبيت تحآتيه ..

فررحت لـ رآيـــد كثير ..
عقبــآإل مآ آفرح بـ تخلصه من عمه النذل ..


~


عوآإفي ملووووووكة ..




الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 27
قديم(ـة) 20-07-2010, 07:33 PM
صورة ஐ றάℓόỠόķά ஐ الرمزية
ஐ றάℓόỠόķά ஐ ஐ றάℓόỠόķά ஐ غير متصل
©؛°¨غرامي مجتهد¨°؛©
 
الافتراضي رد: يمسح الدمعة بشكوى / للكاتبة : هدوئي






* الجـزء الخامـس *





















* عمر *





كنت جالس بالبيت يقالي اذاكر ... اقلب المذكرة بين يدي ومالي نفس اذاكر .... افففف حتى جوعان والمشكلة متأخر بالمذاكرة



وطلعت جوالي اشوف الساعة



12



افففف 12 اخر الليل وانا ماخلصت من المذكرة الا صفحتين كلش مالي نفس



وجوعان مافيه وقت اسوي لي شي ابلعه



جت ببالي امي .. وابتسمت على ذكراها



امي من يوم تزوجت تجي كل بعد اسبوعين تنظف بيتي وتملي الثلاجة مالذ وطاب وتروح لعنيزة



ولأني مااجلس بالبيت ابد .. اكثر وقتي بالاستراحة ... نومي واكلي وسهرتي مع الشباب كلها بالاستراحة



الشباب اذا انتهت السهرة كل واحد يروح لبيته الا انا ... انام بالاستراحة



وعشان مايخرب الاكل اللي امي تجيبه ... اخذ كيس واحط كل شي جابته امي واوديه للاستراحة لي وللشباب هناك



مساكين الشباب ماخذين مقلب على بالهم اني كريم كل اسبوعين جايب لهم من هالاكل



وضحكت لما تذكرت انهم اعفوني عن قطة اجار الاستراحة .. هالشهر كلهم قطوا الا انا يقولون عمر عليه الاكل ويملي الثلاجة والباقي يتقاطون بالاجار



افففف جوعان ... والمشكلة الثلاجة فاضية الحين ليتني ما وديت كل الاكل الاخير اللي جابته امي .. ماجا ببالي اني ابقعد بالبيت اذاكر



والحين مالي نفس ادخل المطبخ اصلا مافيه شي وما فيه وقت لازم اذاكر وفوق هذا الوقت متأخر مافيه مطاعم او بوفيات فاتحة هالوقت ... ياليت امي هنا



رفعت راسي عن المذكرة ورحت اتلفت على البيت بعيوني



البيت صاير موحش



والصراحة خفت لما شفت الغرفة اللي قبالي مضلمة



سكوووووون ... مافيه اصوااااات ... ظلاااام



ماني قادر اصبر راح انجن اذا بقيت على هالحال



قمت وشغلت انوار الدور الارضي كلهاا



كذا احسن ...







الاثنين .. الساعة 12 الظهر



طلعت من الجامعة وانا متضايق من امتحاني



اختباري زفت زفت زفت



ركبت السيارة واول ماشغلتها رن جوالي والقيت نظرة عليه



Maha يتصل بك



اوووووووه هذي عمتي مها ... اكيد ماتصلت علي الا تبي شي



عمر = الووووو



مها = السلام عليكم



عمر = عليكم السلام



مها = امي تقول تعال تغدى عندنا



رفعت حواجبي مستغرب ... من يوم تزوجت امي وانا اتغدى عندهم من دون مايتصلون علي الا بعض الاحيان



عمر = طيب انا كل يوم اتغدى عندكم ... اكيد تبين شي ؟



مها = الصراحة ايه ... ابيك العصر توصلني لعنيزة ... ابي اروح عند عبد العزيز استانس العصر شوي عندهم .. قل تم ...



اففففف عند معاذ .. انا اروح عند معاذ



عمر بعصبية = قولي لمعاذ والا مصعب ... اكيد هم ببريدة الحين ... وش لي اروح هناك



مها = لك امك ماتبي تشوفها ؟



عمر = من اسبوع كانت عندي ... خلاص شفتها مايحتاج اروح



مها = يلااااا عاد عمر ... انا ابي اروح ... والله طفشانه



افففففففف عمتي نشبة صدق



عمر = الحين خلينا نتغدى ويصير خير



سكتت عمتي شوي



مها = طيب احترييييييييك



وسكرت عنها وانا اقول تبطين عظم ... ناوي من اتغدى اتسلل واطلع من بيت جدي وهي ماتدري



وش قالت قالت عنيزة ... انا اروح لبيت عمي ... ولا .. يمكن اشوف وجيه النحس معاذ ومصعب



وحركت السيارة متوجه لبيت جدي



لما وصلت عند الحارة اللي قبل حارة جدي شفت الولد اللي مرة وصله مشعل



دققت النظر فيه مستغرب لين تعديته



طالعت المراية الامامية اشوفه وهو يمشي ورا سيارتي



الا هو نفس الولد ... غريب مو كان يمشي بعكازات .... الحين اشوفه يمشي عادي



الصراحة ماعرفه الولد هذا حتى نسيت اسمه ... مادري بايش ناداه مشعل ذاك اليوم



اللي اعرفه انه من نفس حارة جدي وخويي مشعل .. بس مين ولده ووين بيته مدري









* رايد *





كنت امشي بالشارع سرحان ... توني جاي من المستشفى ماخذ جلسة ... وطوال الطريق من المستشفى وانا سرحان بهمي وافكر ... مدري وشلون اخذ حقي من عمي ... ابي اخذ راتب ابوي واسأله عن بيتنا



احس بالقهر وانا اشوفه يصرف على عياله ولا يعطيني ريال واحد واذا طلبت منه بصعوبة يعطيني عشرة او عشرين .. احس ابي اعيش زي الناس ... صح مالي اصدقاء هنا ... بس ابي مثل أي واحد بسني ... انا محروم من كل شي ... حتى الاكل يوم اتعشى ويوم لا ... محروم حتى من الدراسة



دانة يوم تلعب اشوفها اقل من شهد وبندر ... اشوفهم كل واحد معه لعبته الا هي .. تتبعهم وتلعب معهم بالعابهم ... واذا اشفقت عليها مرة عمي شرت لها دمية ومو على رغبة دانة ... ارخص دمية بالسوق تشتريه لها وعيالها كل واحد له لعبيتن ثلاث



ومريم الله اعلم بحالها ... قليل اشوفها بسبب بنات عمي الكبار ... ماقدر ادخل البيت الا نادر جدا



ماشوفها الا وقت ماتجيب لي عشاي ... مريم تغيرت مرة



مدري صارت كأنها خبله ... اذا كلمتها ماتنتبه على كلامي ... غير اعيد لها الكلام مرة ثانية ... اشوفها تسرح وانا اكلمها .. صايره كأنها بلها



صارت بس ساكتها .. قبل كانت تعصب اذا جتها دانه تشتكي ... الحين دانه تبكي قدامها ولا يحرك منها شعره ... تطالع دانه وهي تبكي وتروح تكمل شغلها ولا كأن احد قدامها



ماني قادر اتحمل وانا اشوف حالي وحال اخواتي



مدري وش اسوي ... ماعرف شي ... مادري وشلون اتصرف .. كنت معتمد على مريم لأنها اكبر مني ... بس مريم تغيرت تغيرت واجد ...



لازم اخذ راتب ابوي من عمي بس مدري وشلون اخذه اذا عيا.. وين لازم اروح



المشكلة يمكن ماحد يعطيني وجه اذا شافوا عمري 15 ... ياربي وش اسوي



وصلت الحارة وشفت بندر جاي من الجهة الثانية من الحارة جاي من مدرسته ... اول ماشافني جا يركض وشنطته على ظهره



دخلنا البيت انا واياه وقلت له ينادي ابوه للمجلس



اخذت ربع ساعة وانا احتري عمي بالمجلس وانا ادعي الله انه مايركب راسه ويعاند



واخيرا جا عمي للمجلس



ابو بندر = وش بغيت ؟



قلت بدون مقدمات



رايد = عمي وين راتب ابوي ؟



سكتت عمي ومارد علي وقعد يطالعني



سألته مرة ثانية



رايد = عمي وين راتب ابوي ؟



مادريت الا بكف ضاربني فيه



ابو بندر بعصبية = ياقليل الخاتمة عايشين ببيتي وتبي فلوس



لكني ماسكتت له جادلته وانا حاط يدي على خده من صفعته



رايد بصراخ = ابي راتب ابوي انا محتاج واخواتي محتاجين ونبي الراتب



ابو بندر بصراخ = وش تبي فيه ماكل وشارب انت خواتك تحمدون ربكم اني ضافكم ببيتي



فجأة جت مرة عمي على اصواتنا وهي متغطيه ووراها بندر وشهد



وبعد ماعلمها عمي بسبب هواشنا قالت له ببساطة



مرة عمي = يكفي متحمله اخواتك وتبي مصروف



طلعت دموعي خايف منهم وانا اشوفهم يصارخون علي



رايد بصوت باكي = نبي نروح لبيتنا ... وش تبون فينا طيب



ابو بندر بصراخ = ماعندي بنات يجلسون بالبيت لحالهم



مسحت دموعي بيدي عشان اشوف



رايد = ماهم لحالهم انا معهم



ابو بندر بعصبية = انت بزر ... وش يقولون عني الناس مخلي بنات اخوه مع بزر



رايد بصراخ = ماعلي منكم ابي راتب ابوووووووي



التفتت مرة عمي لعمي = اطرده وفكنا منه .. ( والتفتت لي ) واذا عرف فضلنا عليه رجع



ابو بندر بعصبية = اذا سمعتك تجيب هالطاري طردك برا بيتي .. تفهم ؟



رايد منقهر = لا مافهم .. انا ماطلبت منك شي ... انا طلبت حقي



التفت عمي لمرته معصب = روحي هاتي العصا



شهقت بخوف .. وشفت مرة عمي طلعت من المجلس



ركضت وطلعت من المجلس بسرعة وفريت بجلدي وطلعت من البيت مقهور



خلاص ماله داعي ارجع البيت ... انا ماني بزر ... عمي هو البزر



هين يشوف ... انا رجال واباخذ حقي منه ... انا ماني بزر



رحت لبيت مشعل وقبل اضرب الجرس مسحت وجهي عن اثار الدموع .. انا رجال



هين اباخذ حقي



انا ماعرف بالحارة الا مشعل مع انه اكبر مني واجد .. بس مدري كيف عرفته



طلع لي مشعل وعلمته ان عمي طردني من بيتي



فكر مشعل شوي .. حسيته تورط فيني .. متفشل منه خاصة اننا الظهر .. وقت مو مناسب ابد



مشعل = تدري وشلون .. لنا استراحة مستاجرينها شهري .. كلهم شباب تقدر تاخذ راحتك فيها



سكتت مارديت عليه وهزيت راسي بايه وانا اجاهد دمعتي عشان ماتطلع قدامه



ركبت سيارته ورحنا للاستراحة وكانت فاضية



مشاني مشعل يعرفني عليها شوي وبعدها التفت لي



مشعل = اتوقع راح تاخذ راحتك فيها على الاخر .. الشباب مايجون هنا الا بعد المغرب واكثرهم مايجي الا من الساعة 9 وورا ويرجعون لبيوتهم الساعة 4 او 5 الفجر ( وكأنه تذكر شي ) ايه صح ... فيه واحد دايم وهو بالاستراحة .. هو تقريبا وحيد عشان كذا اكثر وقته هنا ... اسمه عمر اعرفك عليه بعدين



هزيت راسي بايه وانا بالي مو معه اصلا



تلفت مشعل على الاستراحة مستغرب



مشعل = غريب الصراحة عمر بالعادة يقيّل الظهر هنا ... كان ودي اعرفكم على بعض قبل اروح للبيت ...



هزيت راسي بايه ورحت لاحدى الغرف وتركت مشعل من دون مارد عليه وانسدحت على الكنبة بتعب نفسي ونمت







* عمر *





دخلت الاستراحة وانا اضحك على عمتي مها ... طوال الطريق هي تتصل علي منقهرة مني لاني طلعت من البيت من دون ماتدري



وانا اعطيها مشغول عشان اقهرها اكثر والحين ارسلت رساله



نصها



( اوريك ياعمير )



ضحكت على رسالتها وش بتسوي يعني



دخلت المطبخ واخذت بيبسي ورحت لاحدى الغرف اللي فيها التلفزيون



ووقفت بمكاني منصدم من اللي شفته



بسم الله الرحمن الرحين .. هذا نفس الولد اللي شفته قبل شوي وش جابه هنا



كان يمشي متوجه لحارة جدي .. وشلون جا هنا وكيف



شهقت لايكون هذا جني يشبه الولد اللي قبل شوي



طلعت من الغرفة ورجعت لها مرة ثانية اتأكد



وش جاب هالبزر باستراحتنا ... كلنا شباب بالجامعة ... شكله هالبزر مضيع



قربت منه ... منسدح على الكنبة وشكله توه باكي



من اللي دله هنا .. امممم اكيد مشعل مافيه غيره يعرفه



رفعت رجلي وضربت رجل الكنبة بقوة عشان الولد يفزع من النوم
















الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 28
قديم(ـة) 21-07-2010, 02:43 PM
جافيني النوم جافيني النوم غير متصل
عضو موقوف من الإداره
 
الافتراضي رد: يمسح الدمعة بشكوى / للكاتبة : هدوئي


مشكوره حياتي بس احس البارت ناقص ما ادري اشلون بعلق عليه
وماتوقعت انتهى على بالي له تكمله
بعدين كيف تكتب الكاتبه من اسبوع لاسبوع والبارت بهذا القصر
يسلمووو عزيزتي
يعطيك الف عافيه

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 29
قديم(ـة) 28-07-2010, 04:33 AM
صورة سرمديــہ الرمزية
سرمديــہ سرمديــہ غير متصل
♥––––•«أُنْثَى مُشْتَــــعِلة إِحْتـــــــرَاقاً»•––––♥
 
رد: يمسح الدمعة بشكوى / للكاتبة : هدوئي


السلام عليكم ورحمة الله وبركاتة...

مشكوره يائلبـــــــي على الروايه الحلوووووه وآآآآآآآآآو انا طايره من الفرح حدي مستانسه من زمان ادور رواية تدور احداثها بديرتي قلبي بريــدة وآآو بعد طول انتضار لقيت وربي ماتتخيلين وناستي لدرجة اني اقراء وعقلي كأنه مجنون يصورلي الأحداث بحذافيره واتخيل الأبطال بحيناهههههههههههههههههههههه ماقلتلك حالتي مستعصيه ........
عمــر: حبيته حسيته ياويلي مثل خالد في القصه الأولى مش فاهم نفسه ولا لاقي احد يفهمه احس مع مرور الوقت راح يحن لرايد ومادري احس راح يحب ويتزوج مريم........


ننتضرك يالغلا وترى فيه بارت مانزلتيه يائلبي البارت الـ6 ومشكوره مره ثانيه ...................مودتي<<


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 30
قديم(ـة) 28-07-2010, 06:11 PM
صورة ஐ றάℓόỠόķά ஐ الرمزية
ஐ றάℓόỠόķά ஐ ஐ றάℓόỠόķά ஐ غير متصل
©؛°¨غرامي مجتهد¨°؛©
 
الافتراضي رد: يمسح الدمعة بشكوى / للكاتبة : هدوئي


* الجـزء السـادس *




















* عمر *

رفعت رجلي وضربت رجل الكنبة بقوة عشان الولد يفزع من النوم



قام الولد مفزوع و لا شعوريا تمسك بثوبي عشان مايطيح من الكنبة



يعني لو ابعد عن الكنبة يمكن يطيح



اخذ شوي عشان يستوعب بعدها ترك ثوبي واعتدل على الكنبة ورفع راسه لي مستغرب



عمر = هييييه انت ... وش تسوي هنا ؟



نزل الولد رجوله على الارض بعد ماكان ممدد رجوله واعتدل على الكنبة جالس



= ماسوي شي ( ورفع راسه لي مرة ثانية ) انت عمر ؟ مشعل قالي بيجي واحد بعد شوي اسمه عمر



رحت وجلست على الكنبة اللي مقابلته ونزلت شماغي



عمر = ايه انا عمر ... ذكرني باسمك ووش قاعد تسوي هنا ؟



= رايد ( وسكت )



احتريته يجاوب على سؤالي الثاني بس مو كأنه مطنشه



عمر = وش قاعد تسوي هنا ؟



رايد = ماسوي شي



عمر = خبل انت ؟ ادري انك الحين ماتسوي شي ... بس اقصد وش اللي جابك هنا



طالعني شوي وهو ساكت وبعدها نزل راسه



ابتسمت واضح ان ابوه طارده



حطيت رجل على رجل وشربت شوي من البيبسي اللي معي وانا اطالعه



عمر = لك اخوان ؟



الصراحة مدري ليه سألته هالسؤال .. اكيد له اخوان ... اصلا كل الناس لهم اخوان الا انا



هز رايد راسه بايه وهو ساكت



التفتت متضايق ... انا ادري ... ماعمري سألت احد وقال لا مالي اخوان



التفتت له مرة ثانية



عمر = ليش طردك ابوك اكيد مسوي مصيبة ؟ ( وابتسمت يوم شفته رفع راسه لي وكأنه منصدم من سؤالي )



وقعد يطالعني وهو ساكت



عمر بابتسامة = عادي عادي قل ... وش سرقت .. والا لا يكون ضاربلك احد الجيران وهاج من ابوك ؟



رايد بزعل = مالك دخل



رفعت حواجبي مستنكر ( واشرت له باصبعي بتقليل قيمة )



عمر = انت يالبزر تقولي مالي دخل



رايد معصب = انت وعمي البزارين ماهو انا ...



قطبت حواجبي مستغرب .. وش دخلني بعمه ... لحظة انا مدري من ولده هذا ... اللي اعرفه انه من نفس حارة جدي ... اذكر يوم يوصله مشعل وانا معه بس مانتبهت يومها وين نزل بالضبط



المهم عندي انه عصب ... استانس لما اشوف اللي قدامي يعصب



عمر بابتسامة = قم ولع التلفزيون



التفت رايد للتلفزيون وبعدها التفت لي



رايد = ولعه انت



عمر بابتسامه = شف حبيبي ترا اقدر اطردك من الاستراحة مثل ماطردك ابوك الشباب هنا كلهم يقطون ... اسمع الكلام وقم ولع التلفزيون .. يله ياشاطر



قعد يطالعني وهو معصب وساكت



ضحكت اغيضه



عمر =لا تطالعني كذا يابابا... يله قم يا ( وسكت شوي مبتسم ) يا .. يا بزر



قام رايد بصمت



بس بدل مايتوجه للتلفزيون توجه لي



استغربت واشرت له على التلفزيون



عمر مستغرب = التلفزيون من هنا



وصل عندي ووقف قدامي وفجأة اخذ البيبسي من يدي



وبحركة فاجأتني كب البيبسي فوق راسي



قمت مفزوع وعصبت من حركته



عمر معصب = ياحمااااااااااااااااااااااااار



رفع رايد راسه لي وهو معصب ... انا اطول منه واكبر منه سن



رايد بصراخ = لا تقولي بزر مرة ثانية ....



عصبت اكثر منه ورفعت يدي وعطيته كف طرحه بالارض وانحنيت عليه معصب ولويت يده



عمر بصراخ = امي وهي امي ماعمرها رفعت صوتها علي ... تجي انت يالبزر وترفع صوتك بوجهي ( واعتدلت واقف وركلته برجلي على خفيف ) هنا تبلع لسانك وتسكت



متمدد على الارض بسبب الطيحة ومغطي وجهه بذراعه ويبكي بصوت مسموع



استغربت ... الحمد الله والشكر يبكي ... صدق انه بزر



طلعت من الغرفة ورحت للمسبح



تسبحت شوي عن اثار البيبسي وطلعت واتصلت بمشعل اسأله عن سالفة هالبزر



عمر = الوووووو



مشعل بصوت نعسان = الوووو ... عمر فيه احد يتصل الظهر



عمر = الشباب يجيبون للاستراحة غدا ... عشا ... وانت تجيب للاستراحة ولد



مشعل = ههههههههههههههههههههههههههههههههه .. تقصد رايد هذا جارنا



عمر = وش سالفته ؟



مشعل = عمه طارده من بيته



عمر مستغرب = عمه ؟ ليه وين ابوه ؟



مشعل = الولد يتيم ... ماله لا ام ولا ابو .... على فكرة جدك يعرفه



سكتت ... انا من اليوم اضحك عليه احسب ابوه طارده



مشعل = الووووووو



انتبهت لمشعل



عمر = خلاص خلاص ... كمل نومك ( وسكرت بوجهه )



رحت للغرفة اللي فيها رايد ولقيته متمدد على الكنبة اللي كان نايم عليها .. قربت منه ولقيته نايم



حركت اكتافي لا مباله ... يولّي مو بس هو اليتيم



رحت للكنبة ونمت عليها ... تعبان من طلعتي من الجامعة مانمت





المغرب





قمت من النوم واحس جسمي متكسر من الكنبة المتعبة





التفتت لمكان الكنبة اللي كان فيها رايد ولقيتها فاضية



طلعت من الغرفة ولقيت رايد جالس بنص العشب معطيني ظهره ومنحني على شي وهو جالس



رحت له اشوف وش يسوي



التفت لي رايد يوم حس بخطواتي



لقيت الاخ ياكل من الفواكه اللي جبتها من بيتي



عمر = وش تسوي ؟



رايد = امس ماتعشيت واليوم مافطرت ولا تغديت و مالقيت بالثلاجة الا فواكه وبباسي وحلى بس ... مافيه شي اكله جوعان مرة



عمر = شي مثل وش ؟



رايد = أي شي ... رز .. سندويش .. فطاير... أي شي



عمر = لا يكون على بالك جالس ببيت ابوك ... انت جالس باستراحة ... تبي غدا رح للمطعم



نزل رايد راسه = مامعي فلوس اشتري



ابتسمت احرجه



عمر = لا تحاول ماني معطيك شي



انحرج رايد ونزل راسه وكمل اكله



رحت عنه اصلي الصلوات اللي فاتتني ... العصر والمغرب



دايم اجمع الصلوات اذا كنت نايم حاولت عدة مرات اترك هالعادة بس مافيه فايدة اذا نمت خلاص مافيه أي قوة تقومني





صليت ورجعت لغرفة التلفزيون وبطريقي شفت رايد الى الحين على وضعه





وطوال الوقت ماحد كلم الثاني ... لا انا كلمته ولا هو كلمني .. هو بحوش الاستراحة وانا بالغرفة



ساعة ... ساعتين واجتمعوا الشباب للسهرة



جلست مع الشباب على العشب ضحك ووناسة واغاني ورقص



من يوم جوا الشباب نسيت موضوع رايد .. ومدري وينه اصلا اول ماجوا الشباب اختفى



شفت مشعل يقوم من عندنا وراح لاحد الغرف شوي وجا وجلس بجنبي



وصاح باعلى صوته عشان الشباب يهدون عن الازعاج شوي



مشعل بصراخ = شبااااااااااااااااااااااااااااااااب اسمعونيييييييييييييييييييي



وقعد يكررها لين اسكتوا اخيرا



مشعل = شباب ... ودي اعرفكم على رايد ... ولد اصغر منا بواجد ... عمه طارده وماله احد يروح عنده ... اذا ماعندكم مانع نبيه يجلس بالاستراحة لين يدبر عمره .. وش قلتوا ؟



منصور = كم عمره يعني ؟



مشعل = صغير ... توه متخرج من المتوسط ... هو مايدرس الحين ... يعني المفروض باولى ثانوي



عبد الله = معقول ماله خوال شي ؟



مشعل = له ... بس ماهم ببريدة .. مدري وين بالضبط ... وهو مايبي يسافر لهم ... يقول عشان اخواته



قال احد الشباب بوقاحة = خله يعرفنا على اخواته وابد ماله الا اللي يسره



مشعل بضيق = اهاا بس



منصور = عادي خله يجلس .. هو الولد اللي شفته اول مادخلت الاستراحة ( وقعد يتلفت ) اختفى مدري وين راح



مشعل = بالغرفة هذيك ... بس شباب تراه مفلس ماعنده شي ... مانبيه يقط شي ... اوكي شباب ؟



التفت سعد ونايف لبعض وبعدها التفتوا لنا



سعد = زين ... بس ترا بنستخدمه ؟



استغربت



عمر = كيف يعني تستخدمه ؟



سعد = الصراحة صارت العين علينا انا ونايف ... مانقدر نجيب اللي نبيه من البنقاليه



سعد ونايف يجيبون من البنقالية خمر يسهرون عليه ... ياما حذرناهم مايجيبون هالشراب ... بس مافيه فايدة منهم ... هالاثنين يوم من الايام راح يجيبون لنا مصيبة



مشعل مسغرب = يعني تبون رايد يجيبه لكم ؟



نايف = ايه ... خل رايد يجي نبي نشوفه



التفت منصور معصب على نايف وسعد



منصور معصب = ماحد بيودينا بداهية الا انتم ... بسببكم الهيئة بدت تشك باستراحتنا



طلع رايد من الغرفة متوجه لنا .. يقدم رجل ويوخرها .. متردد مدري خايف منا مدري مستحي



مشعل = تعال رايد تعال



فجأة جت رساله على جوالي



طلعت الجوال ولقيت الرساله من عمتي مها وشهقت منصدم



( مبرووووووووووووووووووك قريب بتصير اخو

الف الف مبرووووك ياعمر )



وش ... رفعت راسي ماني مصدق .. كيف يعني ... وشهقت يوم استوعبت امي حامل



وشلون .. ماتوقعت انها تحمل ... هه انا بيصير لي اخو



حطيت يدي على راسي احاول استوعب



كيف ... مالها الا شهرين ونص متزوجة ..



انا ابصير اخو ... اكيد عمتي تسوي علي مقلب ... لأني سحبت عليها اليوم ... الا اكيد



قمت ورحت لغرفة التلفزيون



ابتصل على امي اتأكد ... بعد ماصار عمري 20 يصير لي اخو .. معقول



واول ماضغطت على اسم امي ويدخل رايد علي بالغرفة



فصلت الاتصال والتفتت على رايد



عمر = وش جابك عندي ؟



رايد متردد = ابي اجلس معك ... ماعرف احد



عمر = اطلع بس ابكلم



رايد = مدري وين اروح ... ماعرف احد هنا ومشعل يقول بيروح

عمر بعصبية = خايف يكلونك الشباب ... رح بس



نزل رايد راسه وطلع



واتصلت على امي وفعلا اكدت على استحياء كلام مها



ضحكت مستانس



عمر = ههههههههههههه ماني مصدق يمه ... انا بيصير لي اخو



امي بهمس = الحمد الله



سكتت امي شوي



امي = اول مرة تتصل علي بعد ماتزوجت



سكتت ومارديت



امي = لا تقطعني وانا امك ...



عمر = يمه انا مليت من الوحدة ... كرهت البيت



امي = قلتلك تعال عيش معي ... انت مانت عند غريب ... عند عمك اخو ابوك



عمر = ماتعودت اسكن عند احد ( وابتسمت لما تذكرت اخوي اللي بالطريق ) يمه ترا انا اللي بسميه



ضحكت امي



امي = هههههههههههههههه فرحتك عندي بالدنيا كلها ...



عمر بابتسامة = طيب يمه ابخليك الحين ... ترا ابمرك بكرة



سكت امي شوي بعدها ردت مستانسة



امي = يعني بتتغدا عندي ؟



الصراحة ماكنت ناوي اتغدى ... بس يوم شفت فرحتها ماحبيت اردها



عمر = ايه ... ان شاء الله



امي بفرح = خلاص احتريك ... لا تبطي علي ... ولا تسرع



عمر = ان شاء الله ... مع السلامة



قعدت افكر باخوي الجديد ... او اختي



واااااااااااااااااو اول مرة انطق كلمة اخوي



وقعدت اكررها عدة مرات مستانس عليها ...



فجأة جت رساله بجوالي فتحتها ولقيتها من عمتي مها



نصها ( صح ترا البشارة لي )



ضحكت مستانس وردت عليها برساله



( لك اللي تبين )



شوي وجتني رساله منها



( ابي مية ريال على كل واو في كلمة مبروك بالرساله الاولى )



سكتت مستغرب ورجعت على رسالتها الاولى وشهقت



مالت عليها ... امحق عمه





الثلاثاء



كنت بكفتريا الجامعة جالس لحالي احتري مشعل ومعي كوب قهوة



سرحان وافكر بحياتي ... اللي صدق مليت منها ... الصراحة الصراحة ودي اتزوج ودي شي يملي علي حياتي



حتى اخوي اللي فرحت فيه وهو بعده ماجا ... ماراح يسكن عندي ... شي طبيعي يسكن عند ابوه ... ماراح استفيد شي



ياربي افاتح امي والا جدي ... بس وشلون ماني متوظف



لا لا صح ... عندي مكافأتي وراتب ابوي ... وش يمنعني اجل



والا اقول لعمتي مها تقول لجدي ... لا لا ... مها مرجوجة راح ترجني وترج جدي وجد جدي



انتبهت من سرحاني لما شفت معاذ دخل الكفتيريا



ابتسمت .. صح هذا يصير اخو اخوي بعد ..



اووووه صح اخوي يصير ولد عمي .. ضحكت على اخوي وولد عمي بنفس الوقت



شفت معاذ اخذ طلبه وجا متوجه لي ومعه كوب القهوة وجلس قدامي



معاذ = ماشاء الله جالس لحالك ... وين ذراعك اليمين مشيعيل



رديت على اخو اخوي بابتسامة ... مدري وش فيني اليوم صاير مسالم



عمر بابتسامة = ماشاء الله اشوفك لحالك ... وين نصفك الثاني مصيعيب



سكت معاذ شوي



معاذ = مر شهرين على سالفة كفرة سيارة مصعب ... نشوفك ماذيتنا بشي غيره ...



ابتسمت



عمر = قل انك خايف مني



معاذ = لا والله ماني خايف منك ... قسم بالله باردها لك ياعمر ... لولا ابوي كان خليتك تغير كفراتك الاربع مو كفرة وحدة



عمر مستغرب = لولا ابوك ؟



معاذ بعصبية = ابردها لك ... صدقني ابردها



ضحكت اغيضه شكل عمي مهاوشه عن شي و الله اعلم وش ...



سكت معاذ معصب شوي



معاذ = انت ماتسوي شي الا من ورانا ... خوّاف مانت رجال وعمرك ماراح تصير رجال



سكتت وبعدها نزلت نظري لكوبه وبسرعه مديت يدي واخذت الكوب وكبيت القهوة على ثوبه



قام معاذ متفاجأ وشهق متعور من حرارة القهوة



يوم شفته وقف قمت واقف مثله



عمر بعصبية = نشوف الحين من الرجال



عصب معاذ ومد يده واخذ كوبي بسرعة بس مسكت يده اللي ماسكه الكوب امنعه يكبه علي



تجمعوا الشباب الشويين اللي بالكفتريا وفرقونا



معاذ بصراخ = اوريك ياعمر ... اوريك ... قسم بالله ماراح اسكت عنك



وطلع معصب



ناظرت كم يدي اللي جاها شوي من القهوة



وطلعت من الكفتريا بصمت ... سمعت احد الشباب وانا طالع يقول



= المشكلة عيال عم





طلعت من الجامعة ... ابطنش المحاظرات .. مالي خلق لشي





العصر



رجعت للاستراحة بعد ماتغديت عند امي مثل ماوعدتها



وتوني جاي من عنيزة



دخلت غرفة التلفزيون وانسدحت على الكنبة ابي انام



شوي ودخل رايد ووقف عند الباب



عمر بنعاس = وش تبي تطالعني ؟



رايد = عمر ابي سيارتك شوي



قطبت حواجبي مستغرب



عمر = ليه ؟



رايد = تكفى بس شوي



رديت عليه وانا اتثاوب



عمر = لا



رايد = تكفى والله جوعان مرة



قطبت حواجبي وبعدها عصبت عليه



عمر بعصبية = تلعب علي انت ... وش دخل الجوع بسيارتي ياخبل



رايد = ابروح للمطعم والا بوفيه او أي شي



ايه صح المطاعم والبوفيات بعيدة عن استراحتنا



عمر = انت من امس ماكلت شي ؟



رايد = اكلت الفواكه اللي بالمطبخ الباقي حلى وبباسي .. وامس الشباب اشوفهم ماتعشوا ... انتم دايم ماتتعشون ؟



ضحكت بالعادة يتبرع احد الشباب بعشى الا امس صدفة ماشتهينا شي ... ولا احد طلب اصلا ... على حظ رايد



عمر = طيب انت تقول ماعندك فلوس وشلون بتشتري



رايد = مشعل عطاني ... تكفى ابي سيارتك شوي



طلعت المفتاح من جيبي ومديته له



عمر = نص ساعة بس وترجع



ابتسم رايد بفرح واخذ المفتاح مني



رايد = طيب



وطلع بسرعة



صارخت بصوت عالي عشان يسمعني



عمر = اذا تأخرت ياااااااااااااااااااااااااااويلك



سمعت رايد يرد علي من بعيد



رايد = طيييييييييييييييييييييييب



ونمت



المغرب



قمت من النوم وطلعت من الغرفة وانا مكسل



تلفتت ادور رايد ... اذكره قبل انام اخذ سيارتي



دورته بالاستراحة كلها ولا لقيته



طلعت برا وماشفت سيارتي



طيرت عيوني مستغرب ... الله من يوم اخذ سيارتي ماجا .. قلت نص ساعة بس ... اخذت نفس معصب ... هيّن يارايدووووه اوريك



وجلست احتريه معصب



ربع ساعة وشرّف الاخ



عمر بصراخ = وين كنت ؟ ماقلت لك نص ساعة وتعال



رايد بخوف = رجعت بعد نص ساعة والله ... بس يوم شفتك نايم رحت لحارتنا شوي



قمت معصب وتوجهت له ولويت يده



عمر بعصبية = مدامك شفتني نايم ليه تطلع فيها مرة ثانية بدون استئذان



وسحبت المفتاح منه



رايد بخوف = رحت شوي لحارتنا كنت ابي اشوف اخواني .. ماطولت والله



عمر بصراخ = ابلع لسانك واسكت



سكت رايد وسكتت



اخذت شوي وسألته



عمر = شفت اخوانك ؟



هز رايد راسه بلا



عمر = ليه ؟



رايد بحزن = عمي بالبيت



سألته وانا عارف الجواب



عمر = انت تدرس ؟



رايد = لا



عمر = ليه ؟



رفع رايد راسه لي



رايد = انت قلتلي ابلع لسانك واسكت .. ليه تكلمني الحين ؟



مالت عليك ... الشرهة على اللي يكلمك



رحت لغرفة التلفزيون وخليته

الرد باقتباس
إضافة رد

يمسح الدمعة بشكوى / الكاتبة : هدوئي ، كاملة

الوسوم
أنصآف , الأجمل , الجمعة , بشكوى , يمسح , يصلي , غموض خالد , [ لـ تحميل الرواية كاملة على ملفي وورد & تكست صفــ19ــحة / حنوو ] , هدونى
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الأولى : أبي أنام بحضنك و أصحيك بنص الليل و أقول ما كفاني حضنك ضمني لك حيل / كاملة ازهار الليل روايات كامله - يتم نقل الرواية هنا بعد اكتمالها 6838 08-08-2019 05:51 AM
رواية يمسح الدمعة بشكوى / للكاتبة : هدوئي ودي آطير ارشيف غرام 3 09-08-2010 10:07 PM
مجلس الروايات للإستفسارات و الطلبات ؛ الزعيـ A.8K ـمه روايات - طويلة 2042 24-02-2010 04:37 AM
لا تبكي الميت اذا مات؟ وابكي يوم الجمعة اذا فات حور الجنان مواضيع إسلامية - فقه - عقيدة 10 26-10-2007 10:16 PM
يوم الجمعة عطر الألماس مواضيع إسلامية - فقه - عقيدة 9 23-01-2007 03:34 PM

الساعة الآن +3: 03:51 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1