منتديات غرام روايات غرام أرشيف الروايات المغلقة - لعدم إكتمالها بعد ما عافك الخاطر تجي و تقول سامحني ؟ / بقلمي
ـآلممَ..! ©؛°¨غرامي فعال ¨°؛©

البارت الأول
السلام عليكم ورحمة الله وبركاته
حبايبي الاعضاء هذي اول قصه لي واتمنى تعجبكم ووانا كاتبتها من سنتيين لكن ماحصل ونزلتها وهي جاهزه اللحين عندي واتمنى منكم الردووود والمتابعه والتعليقات واهم شي انهــــــــا تعجبكم
"الشخصيات"
أبو بندر: الأب عنده 3أولاد و5 بنات
أم بندر: شيخه الأم
بندر:الكبير 31 سنه متزوج عنده ولدين نواف ومحمد وبنت اللي هي شيخه
غلا:زوجــــة بندر 29
البتول:29سنه متزوجه عندها ولدين محمد ونواف
فيصل:زوج البتول 31 سنه
الدانه:27 سنه متزوجه عندها بنت اسمها شيخه
العنود:25سنه بدايه زوااج يعني توها متزوجه
ماجد:25سنه زوج العنود
الريم:23سنه مخطوبه
البندري:21سنه
تركي:17 سنه
فهد:15سنه
الباقي في الروايه بيرد ذكرهم واتمنى من كل قلبي تعجبكم
نبدأ>>بســـــــم الله
أبو بندر في الصاله يفكر مشغول بشي له فتره على هذي الحاله وتدخل ام بندر عليه
أم بندر: يابو بندر الغدا جاهز
أبو بندر:ــــــــــــــــــــــــــــــ
أم بندر:أبو بندر أكلمك علامك ماترد أقولك الغدا جااااااااهز
أبو بندر انتبه:هلا يلــــــــــه قايم هذيني جاي
ام بندر:وش فيك هذي الايام كله تسرح منت موجود معنا
أبو بندر يستهبل:أبد والله مير اني قاعد أفكر بمرتي الجديده قررت أعرس
أم بندر حطت يدها على صدرها:ياويلي تفكر بمرتك الجديد هوانا هنا
أبو بندر:ههههههههههههه أمزح معتس أنت الغاليه من يقدر ياخذ غيرتس؟ والا أفكر بغيرتس
من ورى الباب البندري وريم يضحكون
البندري:أيـــــــه أمي وأبوي طايحين حب وغرام ومخلينا جوعانين
الريم:هذا اللي همتس بطنتس وماشاءالله تاكلين ولا تشبعين ولا يبين فييتس بعد!
البندري:قوولي ماشاءالله عينتس حاره أخاف تصيب يالبيـــه شوفي أمي بس كيف مستحيه
الريم:ياحليل أبوي يعرف يغازل بمرته أكثر من بندر مالت علييه بس طعععس
بندر وغلا كانوا واقفين وراهم وسمعوهم
بندر وهو شابك يدينه ورى ظهره:اجل بوي يعرف يتغزل اكثر مني وانا طعس
الريم بدون ماتنتبه للصوت وتلف:إني صادقه بعد تبون تزعلون
يوووووم انتبهت هي والبندري وهن اللي يركضن على فوووق ماتشوفن الا غبرتهن
بندر يصارخ عشان يسمعونه:هيــــــــــن أنتِ وياها شغلكن بعدين
>>الغـــــــــدا>>
نزلن وجلسن على السفره من غير مايناظرن شي وريم بالغلط جت عينها على بندر ولقته يخزها وشرقت قامت البندري تضربها وغلا ميته ضحك عليهن
تركي بهبال :هيه هيه محنا ناقصين قبل عرستس بكم يوم تموتين والاتدخلين المستشفى ونأجل العرس بليز يعني ركزي وانت ِ تاكلين
البندري:أنت هييـــــه وش هالفال؟اعوذ بالله مافيها الا العافيه
أم بندر:ترووك عن الكلام اللي مثل كذا بسم الله على بنتي شرقت اسم الله عليييتس يمه
بعدها ريم استاذنت هي والبندري وطلعن
فيصل والبتول
البتول:حبيبي وش رايك نطللـــع؟
فيصل بعصبيه:وأنتِ كل همتس الطلعه أنت ليه ماتفهميني عندددي شغل كثييييير قد شعر راسي هذي الأيام (وحط يده على راسها) والا هنا مافيه عقل الظاهر ومايفهم
البتول زعلت وتغارقت عيونها:خلاص طيب
(وتطلع ويكمل شغله ولا كنه سوى شي)
المغرب>بيت أبو بندر>الصاله
البندري:والله ماني مصدقه بتروحين عني بعد يومين وتخليييني
الريم:ولا أنا بعد يالله اهئ
هن الثنتين قريبات من بعض
تركي يقهرهن:أحسسســــــــن! تفكينا من شرتس شوووي ونرتااح ويكون بعد افضل لا
البندري:اسكت اسكت بس عارفه الشريط يكون بعد أحسن لا راحت البندري وراتس تريحنا انتن الثنتين
فهد يايده:أيــــــــــــــه والله كلامه صدق
البندري:أيــــــــــه مستانسين ببقى لحالي أواجــــــــه هالعصابه عصابة الرداء الأبيض
>>سبب التسميه لانهم دايم يلبسون السروال والتي شيرت الأبيض
أم بندر:أقوول أنتم اعقلوا احسن لكم وبعدين رييم ناقصتس شي
ريم:خلينا نكمل هواش آخر مره أتهاوش
تركي :ايه يمه خليها أخر مره تتهاوش
الريم:انا لسى ماكملت آخر مره اتهاوش وأنـا
فتاه بعدين بتهاوش وانا مره وعاد اورييك
أم بندر:رييم بلا هبال تراتس على وجه زواج اعقلي وانتِ يالبندري ناقصتس شي
البندري:لاء الحمدالله اغراضي جاهزه
تركي:وحنا طيب ماراح تسألينا والا عيال البطه السودا مدري وش يقولون؟
أم بندر:والله انتم شباب وتقدرون تصرفون نفسكم ماعندكم اغراض مثل البنات
ليلة قبل العرس>>
البنات في غرفة البندري
البندري وهي رافعه اصبعينها السبابه:حتى في غرفتي غاثييييني اعوذ بالله منكن
العنود:حااااصـــــــلتس نقعد في الغرفه وتقولين لا البندري خصّرت:لااااااااء ياشششيخـــــــــــه
الريم تستهبل :هيه وش فيتس هذي العنود مو أمي كم مره افهمتس يعني؟ أمي هي شيخه؟
البندري تقلدها:هيه وش فيتس هذي العنود مو أمي كم مره أفهمتس يعني ؟أمي هي شيخه؟
(وحطت يدها على بطنها وقالت)هاهاها ضحكتيني صرااحه حيل حيل
الريم:أدري ادري انتِ بس مجرد تشوفيني تضحكين كيف عاد لا تكلمت؟ وش يصير فييتس؟
البندري:لاء زيين معترفه انتس مهرررررج
ههههههههههههههههههاي
الريم:العنود امسكيها لا أقوم اتوطا في بطنها اللحين
البندري:يلا يلا يلا أتحداااااتـــــس!إذا أنتِ بنت نواف تقومين والا أقول إذا أنتِ مرة مشعل قومي
الريم:آها أجل فيها تحدي ! جنـــــــت على نفسها مراااقــــــــــــــــش تحملي مايجيتس
العنود:لحظـــــــــه لحظـــــــــــه اوقفن عدل واستعدلن (نفذن كلامها)يلا التقين واقضين على بعض>>اخس ياللغه العربيه
وبدى الهواش والمضارب وأنا أقوى وشد الشعر ومراكض ومنقز على السرير والعنود جالسـه
متربعه وتشرب البيبسي وماسكه الجوال على انه مايك وتعلق اليــــــــن دخل عليهن بنــــــــــــدر
وشوفن عاد الهـــــــــــــــــدوء العجيب الثنتين جلسن مسويات فيها محترمات وهاديات وبنــــدر الا الآن واقف ويقول:لااء كان كملتن عاادي بالله هذي وحده عرسها بكرى الحمدالله يارب الله يعين من ابتلا؟
غلا تطل من وراه وتقول:ماعليــــــــــه خلهن يستانسن آخر يوم لها تودع العزوبيه والرجه ههاي
ريــــــم توعد غلا في داخلها والعنود ماسكه ضحكتها والبندري تحترم بندر منزله راسها وساكته
بندر: امي تناديكن تقول الحنايه وصلت وقلت اناديهن بنفسي
ريم:الله يهديك بندر ليه تعبت نفسك كان دقيت وننزل؟لالا صراحه ماكان عندك حق يوم تجي >>تطنز
بندر:والله قلت بكرى عرسها خلني أشووفها لالا انا أبي اتعب نفسي ماعليتس أهم شي رااحتتس>>يرفع ضغطها >يلا تحت
الكل:طيــــــــــــــــــــــب
ونزلن تحت وكل وحده تقول كله منتس وبندر يترأسهن ودخلن البتول بس شافت أشكالهن وهن يمش نورى بندر بانتظام فقعت ضحك شرقت بالشاي هي ودانه وريم منقهههره وتتوعد فيهن بس بندر جالس مخرب عليها ماراح الا يوم دخلت الحنايه وهههه وبدت فيها بعد لانها العروس وانتهى الليل ونامن كلهن بالصاله
الصبح>>الساعه8
اول وحده قامت أم بندر وشافت الساعه تذمرت الصلاه وموعد الكوافير الحجز قامت ووقووومت في الباقي اليين يالله قامن الكل راح يتجهز وكانت آخر وحده قامت الريم وطبعا البندري لازم تخرب عليها
ولان البزران آخر ناس قامت معها قالت: ياسبحان الله كانتس بزر تقومين مع البزران والله حنا غلطاانيـــــن يوم زوجناتس بس الشكوى لله أبووي وانت وافقتِ
ريم ساااااااااكته غير العاده عطتها بس نظره لانها اللحين تفكر بشي ثاني"خلاص بروح من بيت أبوي بروح عند مشعــــل يووه بروح عند رجال ثاني كيف بجس وياه يمـــه! لا شكلي ماني رايحـــــــه عرسي وأفشل مشعل!وهو ينتظرني من زمان لاء حراام وأبوي افشله لا استغفر الله شلي هالافكار من راستس في الأخير نهاية كل بنت الزواااج ويوم ناظرت البندري قالت حتى هي بتتزووج ياحظها اللحين ماهي بموقفي بس والله لا اوريها يوم زواجها"
البندري خافت من سكوتها ونظراتها:ريم وش فيتس؟أكلمتس ماتردين علي؟ خوفتيني
ريم:لااء بس سرحـــــــت شوي!
أم بندر تمزح معها:اللي ماخذ عقلتس يتهنى به
يوووه ريم حمّر وجهها والبندري فاطسه ضحك الين أم بندر هزأتها عشان تروح تروش وتتجهز وقامن كلهن يتروشن وبعد ساعه خلصن وخذن اغراضهن وراحن الكوافير
>طبعا المتزوجات كل وحده خذها زوجها>ايه وش فايدتهن والا يبن أبو بندر يتعب
وصلن المشغل وتزينن وكشخن وخلصن وجت الساعه 5 العصر الكل جاهز الا العروس مايخلص برنامجها الا الساعه 8طبعا اللي صار راحن البنات القاعه الساعه 6ونص ولانها بعيده شوي والأم جلست مع ريم بالكوافير وقامت كل وحده تعدل في شكلها ووقفن عند الباب والبتول تسأل جبتن كل شي الاهداءات والعطورات والبخور ماناقص شي وأنت ليتي جبت ملابس العيال كلهم
ليتي:ايه ماما كل سي موجود
البندري كانت جالسه عالكرسي تفكر جت غلا عندها:اللي ماخذ عقلتس..
البندري تستهبل:وينــه؟ليته ماخذه؟بس مافيه؟ غلا:يله انشاءالله يخطبونتس الحريم اليوووم وتلقين بكرى الرياجيل صافين طابور عند الباب قولي آميين
البندري رافعه يدها:آميييييييييييييين
غلا:البندري ووجع يوجع عدوتس ماتستحيين
البندري لفت يمين يسار:بيني وبينتس ليه لاء أبي أجرب شعور الحب هذا اللي يتكلمون عنه هذا بعد اذا حسيت فييه تتعرفيني..مايحتاج اقول اكيــــــــــــــــــد
>>قصدها ان البندري بارده عاطفيا وهذا معروف عند هم
غلا:أيــــــــــــــــــــــــه يالله مايحتاج أعرفتس
البتول:وش تكلمن عنه؟ليكون عني؟
البندري وهي راصه على اسنانها وتبتسم: من زينتس نتكلم عنتس
غلا ضحكــــــــــت عليها
البتول:ترى سمعــــــــــــت بس بعديها عشان اليوم عرس ريم بسس
البندري بحزن:ياحياتي ياريم والله بفقدها من يستهبل معي ويهذر من بيجنن في البيت معي؟آآه بس ليت ربي ماكتب لحظة وداااع
البتول:اسكتي بس اللي يسمعتس يقول هي في بلد وأنتِ في بلدواليوم بتسافر له اسكتي اسكتي بــــــــس
غلا:حرام علييتس لييه تكلمينها كذا وتسكتينها؟
البندري:خليها لو تحس ماقالت كذا ماعلي منها كل واحد واحساسه عاد
البتول:أنتِ احساستس مييييييت مو تقولين كذا غريبــــــــــــــه اللحين حس سبحــــــــان الله
البندري:ايه انا اقوول كذا آآآف
قامت وراحت عند العنود وكانت تستقبل الطقاقات ووقفت معها
غلا:لييه يالبتول قلت لها كذا حرااام؟
البتول:أبيها تحس شفتِ كيف ردة فعلها؟أبي تقول اللي بخاطرها تفضفض تتكلم كلله كتوومه كلله كتوومه مااايصير يوجعها صدرها أكثر من ماهو موجعها
غلا:ايه بس مو كذا.أنتِ اصلا معصبه من يوم كنا في الكوافير وبنمشي!الصبح وش زينتس والا يعني وصلتس حبيب الألب وزعلتس بكلمه.ترى انا مثلتس في الهوى سوى متزوجات ونفهم بعض
البتول:تبين الصراحه أيــــــــــه يقول لي أنت مو راضيه تفهميني ليه لاني قلت بس خلنا نطلع
غلا:طيب!مافيها شي يزعل مو راضيه تفهميني لاء فصيل مايزعلتس بهذي الكلمه
البتول:اسمعي اللي وراها>وتقلده>كل همتس الطلعه ماتفهمين ان عندي شغل والا هنا وحط يدها على راسي مافيه عقل قهرني ياغلا قهرررني ولاء هذا والسالفه لها يومين صايرهوكلل ماشفته أعصصب زياده واتذكر كلامه آآآآه يالقههر
غلا:طيب تطلعين حرتس في البندري والله حرام مالها دخل.لاء وهذا ولها يومين كيف لو جايه على طووول كان رحنا فيها الله يهديك يافصيل بس مابغيت تغلط الا قبل يومين من العرس والمصيبه جت على بنو
البتول:أقوول لا يكثر بس ترى ماقلت شي غلط والا قوي كلام عادي كبرتي الموضوع
غلا:بس حسيت كانتس زودتيها وجرحتيها يوم تقولين لها أنت ِ احساستس مييت
البتول:وانا صادقه خلالاص خلينا نسكر الموضوع ونروح عند الطقاقه يلا
وبدى الطق والرقص والمعزيم بدت تجي والساعه 9ونص جت أم بندر وريم من الكوافيييييير
جابهن بندر وهو يساعدها في النزله ودخلها داخل من الباب الخلفي للقاعه وبدى العرس والبندري طلبت اغنية من قال ان نواف ذليل؟ وكل البنات قامن رقصن عليها حمااااااس مع ان البندري ماتحب الرقص كثييير والطقاقه صراحه كان طقها حلو الين ماجت الزفه وتغطن الحريم ودخل مشعل مع أبوه وأبو بندر واخوانه وعمامه وعمامها وخوالها وطبعا دخلوا على( يامرحبا بالمقبلين)وبعد كم اغنيه طلعوا الرجال مابقى الا اللي يحلون على ريم وتنطفي الأنوار وينفتح الباب وطلع الدخان الكثيييف وطلعت ريييييم منه وهي طالعه جناااااااان والله الكل ماشال عينه منها أولهم مشعـــــــــــــل وآآه يامشعل وش سوى طلع عيونه قدام وأبوه ماسكه يقوله:اهجد واركد ومشت على نغمة تيتانيك وقصيده كاتبتها لها وحده من خوياتها رووووعه وخلت واحد من المتخصصين بالكمبيوتر يحطه صوت رجال عذاب عذاااب اسم القصيده((حـــــــــــــلاك ياريــــــــم))
حــــــــــلاك ياريم ماتركني أشوف عيوبـــك
حلاك ياريم غطى على حلا غيـــــــــــــــــــــــــرك
حتــــــى كلمه ياهــــــــلا منك تقطر حــــــــــــلا
مدري انا بس اللي أحس أو حتى اللي حولينك
ياريـــــــــــــــم من شاف اليوم حـــــــــــــــــــلاك
ناظـــــــــــــر نفســـــــــه وقال وينـــــــــي؟وينــــــــك؟
مشكلتك متواضعــــــــه تقولين مافيني حـــــــــــــلا
وانا أقـــــــــــول ليتك شخص ثاني وتناظرين بـــــس عينــــــــــــــــــــــــــــــــــــــــك!
عينــــــــــــــك اللي لا رمشت قلت يارب عونـــــك
كيــــــــف لو بقـــــــــول باقي تواصيفـــــــــــــــــــك
الريـــــــــــم اليوم نوت يامشعــــــل عليك وجابت راســـــــــــــــــــــــــــــــــــــــك
ما أقول الا الله ياعريسنــــــــــــــــــــــا يعينــــــــــــــــــك
هذا جزء منها الكل كان عاجبته الزفه هي بس وصلت ومسك يدها مشعل وهو يقول في خاطره أخيرا ياريم صرتِ لي اخيرا وجلسها وحب راسها وهيي في عاااااااااااالم ثاااني عالم الخووووف والربكه وطبعا قبل لا تجلس حبت راس ابوهاوعمها ورقصوا الرياجيل شوي ثم طلعوا وطبعا غلا نقطت على نواف وعيالها ورقصت وياها والبنات على ابوهن ورقصن معه وبعدها طلعوا المعاريس وراحوا الفندق والساعه 12 حطوا العشاء والساعه 3 الكل طلع
انتهـــــــــــــــــــــــــــــــــــى البارت الأول أتمنى عجبكم
بانتظار تعليقاتكم وردوودكم
تبوني اكمل كملت ماتبوني اعتبروا ماشفتوا شي
والجاي أروووع
وتكفوووووووووون الردوود
بقلمي/bad booy style


яαzу¢ ©؛°¨غرامي مشارك¨°؛©

كملي وان شاء الله اكون معك ..

ننتظرك ..

صمت المشآعر ©؛°¨غرامي مشارك¨°؛©

بدايه رائعه
عوافي يالغلاا

كااافي لاقاالواا كوويتيه ©؛°¨غرامي فعال ¨°؛©

يعطييييج العاافيه حبوبه

بإنتظااارج

ـآلممَ..! ©؛°¨غرامي فعال ¨°؛©

crazy
صمت المشاعر
كافي لا قالوا كويتيه
مشكورين عالدعم بس تمنيييت ردوود اكثر يلا ماعليه مع الوقت
بنزل بارت

ـآلممَ..! ©؛°¨غرامي فعال ¨°؛©

البارت الثاني
الفجــــــر>>البتول وفيصل
البتول جالسه على التسريحه تفك شعرها ودخل فيصل الغرفه :حطيت العيال في الفراش
راح الحمـام(الله يكرمكم) وطلع ولا فيه رد من البتول
فيصل:ياهوه أكلمتس..وينِ رحتِ؟
البتول:.............>تفتح شعرها
فيصل:البتول حبي أكلمتس...
البتول:...........>سففط
فيصل عصب:البتول أكلّم جدارأنا؟أتكلّم معتس ترى
البتول أخيرا نطقت:إذا أنا ماأفهم كيف أسمعك والا بمعنى إذا أنا ماعندي عقل كيييف أسمعك؟
فيصل:وش دخل هذا في هذا بالله؟
البتول:..............
فيصل من سكوتها فهم انها لسى زعلانه على الكلام اللي قاله ولانه هوماجا يراضيها فضحــك وراح عندها ومسك يدها اللي على شعرهاوشالتها بسسرعه
فيصل:اللـــــه وش دعوه انا فيصل فصولتس
البتول من قهرها:ويعنـــــي من فيصل؟!
فيصل انصدم:آفاا لهالدرجه زعلانه مني؟ماتوّقعت كذا
البتول:مدري اسأل نفسك...
قام يفتح ويشل اللي بشعرها:بسأل يمكن أعرف..
البتول:تــدري لا تتعب يدك بشعري ولا نفسك وتسأله ابعــــــــــــد عني(قامت)
الا هو ساحـــب يدها اليمين وخلاها مقابله وجهه تسمع أنفاسه ونزلت راسها
فيصل:البتـول ناظري فيني
البتول:......>لارد
فيصل رفع وجهها بيده وشاف عيونها بتدمع:والله ثم والله لو أدري بتزعلين كـــذا كان قصيت لساني قبل
لا أتكــلم تبيني أقصه اللحين عادي بس لا تزعلين>>
هـو يلطف الجو طبعا
البتول بطفوليه:أيــــــه!زييين
فيصل:طيييب
راح عند المكتب وجاب المقص ووقف قدامها وحطه على لسانها:بســــــــم الله هذيني أموت عشانتس
البتول خافـــت يسويها:يامجنووون خلاص ووووقف
فيصل:تبيني اوقفقولي انا راضيه علييك
البتول:.............
فيصل:أووكي بقـــص يالله بسم الله..!
البتول راحت ركض عنده وسحبــت المقص وحذفته بعيد:وش تبي تسوي فينــــي؟
فيصل مسك خصرها:أخلييتس تعرفين قدر حبي لتس ناظرت في الارض وطاحت دموعها فيصل ماتحمّل سحبها وضمها لصدره بقوووه وهي كنه تبيها ضمته
فيصل:آســـف ياكل الغلا بس أنتِ جيتِ وأنا معصّب و مشغوووول حدي وطلعت حرتي فييتس
البتول:.........
وخر وجهها عنه شووي وصار مقابل وجهه:هــاه رضيتِ والا بعــــــد..؟
البتول بدلع:أيــــــــــه..
فيصل ابتسم:يالبيـــــــــــه
^_*
بيت أبو بندر>>البندري>الغرفه
البندري تفك شعرها ولفت على الباب لانها سمعت صووت لقته تركي
البندري: هلا تركي حبيبي بغيت شي مني؟
تركي:لاء بس متعود الريم الريم تجي عندي قبل لاتنام تسولف معنا
البندري حست فييه:واللـــه حتى أنا آي آي
جا تركي وساعدها في فتح شعرها
تركي:والله ياني مشتااااق لها حيييل من اللحين
البندري في خاطرها وانا أكثر:يوووه تركي توها متزوجه واشتقت لها كيف يعـــدين؟
تركي:متعوود عليها وش أسوووي بعــــد؟
دخل فهـــد
البندري:حلـــــــو كملت!!
فهد:آآآهـ وين ريي مناقصتنا والله
البندري حبت تلطف الجو:اييه اللحين تستقوون علي فريقي تم فقد عضو منه أما أنتوا ماشاءالله بس أحذركم تراني عن ميــــة رجال..!
تركي وفهد يضحكون تركي:مدري وش بنسوي لا رحتِ أنت ِ بعد؟
البندري ضمتهن ودخلت الأم عليهن
أم بندر:مانمتوا يلا عالفرااش بلا هذره زاايده خلوها بعديين والا تدرون بعد الصلاه انتظروها ثم ناموا
الكل:انشـــاءالله يمه
الفندق>>المعاريس>>لازم قطة الوجــه
أول ماصلوا الفندق ودخلوا السويت حقهم جلست عالسرير وجلس هو جنبها وهي منزله راسها وهو مسك يدها وباسها وبعدين رفع وجهها وناظروا بعض
نظراتهم تغني عن أي كلااام بدا مشعل يستوعب انه قدام مرته مرتــــــه خـــــــــلاص.!
مشعل:الريــــــــم..
الريم:هـــــــــــلا..
مشعل:بسالتس سؤال؟
الريم:تفضــــل
مشعل: زاد فضلتس..ليه قبلتِ فيني؟رغم اللي خطبوتس قبـــــــــلي؟
الريم:.........لارد
مشعل:كــــــــذا أبي أعرف ممكن؟
الريم بحيـــــا:لانـــي أحبــــــــــــك..
مشعل طار من الفرحه وهو أصلا عارف بس يستغبي وينسيها الخوف"طيـــب كيف حبيتيني؟
ريم بدلــع:مشعاااال خلاااااص
مشعل:ياعيون مشعل أنتِ خلاص بوقف
طلع عشان تلبس وما امداه تطلع الا هي على قولتهن تنفست الصعداء قامت لبست قميص نوم وردي باهت طويل خيوط من فوق وعليه روب ربط وفتحت شعرها بعدين مدري وش اللي جاها وقررت تدق على البندري>>استهبلت البنت>>الساعه 1ونص أكيد في القاعه ودقت الا البندري ترد بعد ما دقت عليها مرتين
البندري:رييم فييتس شي؟صار لكم شي؟
ريم:هدي هدي بس حبيت أكلمتس
البندري:حسبي الله على عدووتس هذا وقتــه تدقين سكري سكري قال ايش قال حبت تكلمني
ريم عصبت:طيب يلا مع السلام هجا مشعل
البندري: مو انتِ غلطانه تدثين علي هاللحيين
ريم:لاني خايفــــــــه...
البندري طلعت من الصاله وراحت غرفة التصوير:ياريم الله يهديييتس مشعل ماراح يسوي لتس شي وش منه تخافين اذكري الله ياريم وسكري لا يجي مشعل ويشوووفتس تكلمين وتطيحين من عينه ويطلقتس وترووحين فييها عاد من أول ليله
ريم تخرعت:وجـــــــع!وش هالفال؟أعووذ بالله منقهره لاني تزووجت يعنـــــــــــي..!
البندري:أيــــــــه منقهره زيــــــــــن
ريم:يلا يلا مع السلامــــه
البندري:مع السلامـــــه ووو ..بالتوفيق..(سكرت )
إلا بدخله مشعل يوووه ترتجف في مكانها قد مشعل غير ملابسه وجا وجلس على ركبته قدامها
مشعل حس بخوفها:ريييوم والله ماراح أسويلتس شي ليه خايفــــــــــــــــه؟ مني؟
ريم: من قـــال إنـــي خايفــــــــه؟...*_^
الصبح>>10>>بيت أبو بندر
الريم توها طالعه من البت مودعتهم بيسافرون مصر ثم الأردن
البندري:يالله والله بغيت أبكي يوم تسلم علي والله بشتاق لهـــــــا يمه من اللحيــــــــن
أم بندر:والله الكل بيشتاق لها
البندري:أيـــــه بس أنا غيييير
غلا حبت تغير الموضوع وتهدّيهم:يمه وش تبيني اطبخ اليوم؟>غلا عادي تناديها عمتي وساعات يمه
أم بندر: والله كل شي من يدتس حلــــــــو
البندري:تكفيـــــــــن اطبخي جريـــــــــــش
غلا:تـــــــــــم لعيووونتس
البندري:تسلملي مرة أخوووي والله
وقامت بتروح المطبخ وسمعت صوت بندر تتبّعت الصوت لقته في المكتب حق أبوه وواضح يتكلم معه في شي هام وسمعته يقوول
بندر:يبـــــه والله مقدر ارووح معك الرياض شغلي كلــــــه هنا ونسيت غلا واهلها ماني ناقص
أبو بندر:خلاص طيـــــب بس المشكله كيف أقنعهم إلا كيف أقوول لهم عن هذا الموضوع؟هو الروحه رايحين الرياض رايحين وبنجلس فيها
بندر:أيـــه الله يعين..اجل أنا استأذن تبي شي يبه
أبو بندر:لاء سلامتك..
بندر:اجل انا استاذن ..
أبو بندر:اذنك معك
وتررركض للمطبخ قبل مايطلع وخمس دقايق الا هو داخل
بندر:غلووووي سالت أمي عنتس قالت لي في المطبخ وجيتتس
غلا وعيونها شوي وتدمع من اللي سمعته قبل شوي: ايه أطبـــــخ الغدا اليوم أنا أسوويه والا نسييت
بندر واقف وراها:طيب وش بتسوين؟مع ان كل شي من يدتس حلوووووو ياحلووه
غلا خنقتها العبره:أأأ..ي شي تبي...بي...تبيه
بندر شافها كذا لفها عليه ولقاها تبكي
بندر:غلا وش فيييتـــس؟
غلا:سمعت كلامك مع أبوي قبل شوي من ما أقصد والله بس اني ماره وسمعتــــــه
بندر:وش فهمتِ؟
غلا:هم بينقلون وحنا بنجلس
بندر:وهــذا مضايقتـــــس؟
غلا:اكيييد من بيجلس معي أبقى لحالي ولاء بعد البندري من يجلس معها لا راحت هناك وخصوصا تو رييم رايحه عنها كيف تبيني ما اتضايق
بندر ضمها بقووه:هدي كل شي بنحل انشاءالله
غلا:ليـــه كذا يصير؟حرااام والله
بندر:يؤ يؤ استغفري ربتس هذا المكتووب ..
غلا:استغفر الله
بندر:طلبتتتس لا تقوليين لهن
غلا زاد بكيها:هو انا أقدر اتكلم في هذا الموضوع
البندري دخلت المطبخ
البندري :غلوووو تبين.....يوه يوه دخلت غلط سوري
ماانتبهــــــت كملوا (وطلعت) (ضحكوا عليها)
مر شهر عادي وبارد باحداثه إلا انّ العنود حامل أخيرا والريم رجعت من السفر
بيت أبو بندر
ريم تنزل من السياره وتكلم مشعل
ريم:حبيبي تعالي بعد صلاة العشاء
مشعل:طيييب حياتي
ريم:متأكد ماتبي تنزل اللحيــــــن وتسلم
مشعل:لااااء ماعلييه مره ثانيه لان عندي شغل ضروري اللحين يلا المره الجايه
ريم:براحتــــــــك يلا سلام
وتدخل البيت وتدخل الصاله لقت الكل مجتمعين اخوانها وخواتها وابوها وامها وغلا واووول وحده نطت عندها البندري وام بندر تلوولش من الفرحه
أبو بندر بعد السلام التباريك:عسى استانستِ بالسفره
ريم:ايييه والله يبه والله وناسه مصر شفت الاهرامات ونهر النيل أخيررا شفته والاردن روووعه اووصفها لكم بالفيديو اللي صورته وجبت لكم كلكم أغراض من مصر والاردن ونااااااسسه
ابو بندر:الحمدالله على كل حال أهم شي عندنا رجعتتس بالسلامه
الكل:الحمدالله يارب
ابو بندر تكلم:بما ان الكل مجتمع اللحين عندي شي لازم أقوووله لكم ضروووري
الكل:تكلم يبه حنا نسمع>>كل واحد متقطع يقوله
أبو بندر فجّرها على طوول بدون مقدمات: الشغل طلب مني انقل الرياض بعد شهر ولازم ننقل أنا وأم بندر والعيـــــــال
الهـــــــــــــــــــــــــــــدوووء سيد الموقف الكل منصدم الا غلا وبندر لانهم عارفين
البندري تكلمت:طيــــب وانا ؟كليتي وخوياتي وخواتي وعيالهم كيف؟
أبو بندر:ننقلك هناك قسمك موجود وحنا كل اجازه جاينهم والا هم يجونا ويزرونا
أم بندر:بهالسهوله ننقل ماعندنا بيت هناك وهذا البيت وين يرووح يعني؟من يجلس فييه؟لاتقول بتبيعه؟
ابو بندر بكل هدوء:خويي هناك اشترى لنا بيت مأثث الله يجزاه خير وبتتعرفون على عايلته وبالبنسبه لهذا البيت بندر جالس مع مرته ماراح يرووح عشان شغله بعــــد
البندري وقفت:حلــــــــــــو!يعني محد معي بلحاااالي
وتطلع من الصاله ركض فووووق وتبكي على حظها اللي ماعمره اصطلح والا ركّز معها...
من بعدها الكل انسحب وطلع ومر الشهر الثاني قاعدين يجهزوون ويقشوون اغراضهم ولا احد زار أحد هدووووء غرييب والبندري تقووول أبوي يمكنه يمزح ولكنه للآسف صــدق
مشعل والريم>>
ريم تبكي اليوم بيمشوون ريم راح عندها وحطها على كتفه:هاااه يالغلا ماتبين تروحين تودعينهم؟
ريم:لاءلاءمااابي أروووح أشووفهم
مشعل:متأكده ريوووم؟
ريم:ايه متاكده>وتكمل بكي على كتفه
ابو بندر مشى ماحد جا يسلم عليه من بناته ماغير بندر وغلا وصراحه أبو بندر زعل وشال بخاطره علييهم حتى أم بندر البندري ماهمها الموضوع ولا حتى تروك وفهود ومشوا في الطريق البندري حاطه الآي بود ماتسمع ششي وبعدها نامت تروك وفهود يسولفون شوي عن الوضع اللي هم فييه ثم ناموا والشغاله نامتمابقى الا أم بندر وأبوبندر وبعد 5ساعات متعبه ومتقطعه في المحطات وصلوا الرياض الكل صحصح وأبو بندر دق على خوييه أبو حمد وتقابلا عند المحطه والبندري تخز السياره كانت جيب لكزس مظلل ونزل منه رجال باين انه كبير في العمر يعني عمر ابووي بس الشهاده لله مزيووون ويسلم على ابوها واخوانها ثم ركبوا السياره يدليهم على البيت ووصلوا البيت طبعا البيت كان يبعد عن بيت أبو حمد 3شوارع ولفتين البندري أول ماشافته من برى استانســــــت كيف من داخل؟نست شوي الضيقه اللي فيها دخلوا من الكراج وينزلون فييه ممر عشان تمشين عليه من الكراج الى الباب الرئيسي ويمر على الحديقه وباب الخروج طبعا ويدخلون البيت وام بندر تقرا المعوذات وتتعوذ وتسمي ويدخلون على يمينك يصير مجلس الرجال اللي كان زي استديو تشوفين اللي داخل مايشوفك اللي برى من الشباك طبعا لهشباك داخل البيت حلو نظامه تدخلين عليه وله حمام خاص تدخلينه من داخل المجلس وكان كبير ماخذ مساحه كبيره وفي الوسط المطبخ والصاله المفتوحه وحمامها وعلى ياسرك مجلس الحريم نفس ستايل مجلس الرجال وفي الوسط بعد الدرج الملتف عشان اللي يدخل البيت مايشوف المطبخ والصاله ومجلس الرجال والرحيم طبعا لهم أبواب خاصه من برى تدخلون عليها غير اللي من داخل والدور الثاني في الوسط الصاله المفتوحه واسعه حلوه أوسع من اللي تحت وحمامها خاص بعد وعلى اليمين جناح
خااص يصير لابوبندر وعلى اليسار غرف النوووم البندري خذت الغرفه اللي تصير مقابله مجلس الرجال بالضبط يعني تطل من الدرابزين تشوفهم وجنبها اخوانها والشغاله غرفتها بلحالها اكيد
طبعا قعدوا يرتبون في البيت وينظفون ويعدلونه رغم انه عدل بس أم بندر لها نظافتها الخاصه ورتبوا الاغراض تعب>>انا مجربه>على الساعه2الليل خلصوا وناموا اخيرا ريحوا
أبي ردووود
تتوقعوون وش دوور ابو حمد بالقصه
هل هو نقل خير عليهم؟
اللي في الشرقيه وش بيصير لهم
وعلى فكره لسى ماطلعت كل الشخصيات

كااافي لاقاالواا كوويتيه ©؛°¨غرامي فعال ¨°؛©

يعطييج العاافيه

بانتظار الباااارت الثااالث

ـآلممَ..! ©؛°¨غرامي فعال ¨°؛©

البارت الثالث
الشرقيه>بيت بندر>فيصل مع زوجته عندهم
بندر:حيا الله أبوناصر.كيف الحال وش مسوي؟
فيصل:الله يحييك تمام والله نسأل عنك وش مسووي مع أختي؟
بندر يناظر في غلا على جنب ويغمز لفيصل:واللـــه أختك ماش هالأيام زعلاان منها
غلاطلعت عيونها:نعـــــــم!خييير ياكذبك كذباه تووك قبل مايجوون تقولي ما أزعل منك وتحط يدها على عينها والله انك كذووووب
البتول:لاء لاتقولين عن أخوي كذووب شوفي أخووك قبل...
فيصل لف عليها:اللحين أنا و انتِ مالنا دخل ولييه تدخليني في الموضوع أصلا ووش سوويت عشان تشووفني متى كذبت بالله؟
البتول:لااااء ماشاءالله عليييك مؤددب حدك
غلا:أنا اشهد ان ....الادب يمر من عنده يقول غبي أوقف عندك انا؟؟
غلا والبتول ضحكن عليه فيصل يقال فيها معصّب:ثنتينكن علي هاه بنـــدر ادعمني ياخي والا صداقه بلاااش.هذا وانت اللي فاتح الموضوع وطاحت براسي
بندر يبي يكحلها عماها:لاء فيصل مؤدب طول حياته مره بس اللي شفته قليل أدب يوم تهاوش مع المعلم ويغلط علييه ويوديه عند المدير
الكل ضحـــــك عليييه يوم قال كذا
فيصل:أمحـــــــــق دعم هذا اللي قدرك ربي علييه
بندر:وش أسوووي هذا اللي طلع معي والا تبيني أطلع الفضايح صدق اللحين..
فيصل:لاء لاء خللك سااكت واللي يرحم والديك
البتول:لااء قول قوول وش تكفى؟
بندر:ولاشي بس كذا بعدين مالتس دخل لقااافه أعوذ بالله ماتخلنّها الله يعيينك عليها ياشييخ
فيصل يرد لها الحركه:ايه والله شفت كييف متحمّلها؟لســـى ماشفت شي....
البتول:أنا!!طيييييييب يافيصل شغلك في البيت>بضحكه قالتها عارفه انه يمزح
وكملوا سوالف وضحك
***>بندر وفيصل رفاقه بقووه من الطفوله جيران بعض في الشرقيه وقرروا مع بعض اذا كبروا ياخذون خوات بعض واذا وحده رفضت هذا المكتووب مايزعلوون على بعض لانهم كانوا عارفين خواتهم ماكانوا يطيقوون بعض في الكليه ولكن يوم تخرجن وخطبوهم شـــي غريـــب نزل على البنات ووافقن وتم الزواج وصارن الثنتين خويات بعض سبحااان مغير الأحواااال
الريــــــــــاض>>بيت أبو بندر>مجلس الرياجيل
البندري قاعده ترتب المجلس وتبخره وتدوور وطبعــاً هي كانت متكششخه عالآخر فاتحه قدلتها وحاطه مكياج خفيف ولامه الشعر على فوق وحاطه شبكات ولابسه تنوره جينز غامقه وبدي أحمر غامق عليه كلام بالانقليزي لونه رمادي طالعه حلوووه وحاطه اكسسورات طبعاَ المهم تبخر المجلس وتحط البخور على الطاوله وتشغل التكييف وتسكر الباب وتروح المطبخ الا أم بندر تسألها
أم بندر:هاه؟بخرتي المجلس؟
البندري:اييه يمه حتى صدري اختنق
أكم بندر:ياحيااتي بس ماعندي احد غييرتس
البندري:عاادي عااادي يعني وش بيفرق يوم كنا في الشرقيه والحريم يجن انا اللي اسوييه لا تعبت بخلييه لا تخافين علي
أم بندر: طيييب يلا قومي ودي القهوه أبووك يقول بيدخلون اللحين هم عند الباب يلا ودييها بسررعه (طلعت)
البندري:طيييييييب..آف زهقت
طبعا ماراحت على طوول جلست تاكل من الحلا اللي جايبه أبوها وحلا أمها مسويته مع الستروول امها بعد مسوييته كانت بتخلص الصواني
الييين أم بندر رجعت مره ثانيه
أم بندر حطت يدهاعلى صدرها:مارحتي للحين!!يلله أقوولك هم عند الباب بيجوون
االبندري تخرعت:طييب خرعتييني يمه لا عاد تدخلين فجآه كذا وربي تخررعت هذيني رايحه
وتشيل القهوه وهي تأفف وراحت المجلس وتدخل وتحط الصينيه وترجع المطبخ تاخذ صواني الحلا وترجع الا تلقى باب الخارجي مفتوح ولقت واحد عند التلفزيون نفس رزة تركي أخوها طووويل مره ونفس شكله من ورى لا لبس الثووب ومعطيها ظهرها يشغّل التلفزيوون ودخلت وحطت صواني الحلا وتاخذ البخوور وتوقف عنده وهي على بالها ترووك
البندري:ترييك.....ترووك ماتبي تتبخر حراام أقط الباقي يلا تبخر عشان تطلع رزززه زياده ويقولوون عنك خطيير ياخطيير انت والله
تركي:.........>لارد
البندري حطت يدها على كتفه:ترووك ووجع أكلمك ياخي عطني وجه
لف الشخص عليها بعد ماحطت يدها وانصدمت ماهو ترووك وااحد غريييب ولا تقول ابو حمد لاااء بعد أصلا أبو حمد ببين من شكله شوي الكبر لكن هذا شباااب يووم انتبهت فييه وهي اللي ماتشوفون غيير غبرتها وتسكر الباب معها ويوم وصلت المطبخ عند امها تشاهق وتاخذ نفس
أم بندر:بسم الله علييتس يمه وش فييتس شكل البخوور عوّر صدرتس........والله اللي يشووفتس يقوول جايه من صحراء الغرب....البندري وش فييتس ماتردين..اهئ ليكوون من البخوور صدق؟
البندري:.........لارد
أم بندر:ياويييلي بنتي بندوور وش فييتس
البندري:مافيني شي بس كذا استهبل
أم بندر:ماتخلييين حركات الهبال هذي..خرعتيني علييتس..طييب يلا شلي هذي الصينيه وديها مجلس الحريم ترى جن اهل أبو حمد
وتشيلها وهي ماركزت في كلام امها ويوم دخلت انصدمت في الحريم الجالسات "متى دخلن؟"تذكرت كلام أمها قبل شوي "ترى جن أهل ابو حمد"وتحط القهوه وتسلم عليهن وكانن اربع أم حمد الكبيره وواضح عليها و3بنات حلوات ودخلت أم بندر بالحلا وتجلس عند البنات وتعرف عليهن
البندري: هلا والله فيكن في بيتنا تو نووور بس ماتعرفنا...انا البندري بنت نواف أبوبندر
الأولى:هلااا فييتس اكييد نتعرف انا نوره أكبرهن من البنات طبعا
البندري:عاشت الأسامي...
نوره:عاشت أيامتس وهذي اختي تغريد وعندها توام ولد
البندري:عاشت الأسامي
تغريد:عاشت أيامتس يالغلا...خلاص انا بعرفها هذي اختنا الصغيره رهف
البندري ابتسمت:ماشاءالله عليها باين الصغيره عاشت الأسامي
رهف:عاشت أيامتس ياحلوه
تغريد:الا أنتِ وش تدرسين يالبندري؟
البندري:ادرس ادارة أعمال رايحه سنه رابعه
تغريد فرحت:واللـــــه!!الله أنتِ معي بنفس القسم والعمر بتدرسين في جامعة سعوود صح؟
نوره:اكيييد ياغبيه يعني كم جامعه فيها هذا التخصص؟
البندري:هههههه عادي انا توقعت فيه اكثر من وحده لاني جدييده ما اعرف ترى يعني كنت بجاوب ايه على ان فيه غيرها..بس زيين الحمدالله فييه احد معي والله ونااسه
تغرييد:اييه آفا علييتس لاتخااافين دامي معتس باخلييتس تشوفين الجامعه كلها واعرفتس علييها
نوره:بس عاد لاتصدقيين نفستس واجد(لفت على رهف)شكلها تبي تسحبها علينا
رهف:اييه والله هذا الظاهر تغرييدووه تراها مو لتس هااه
البندري ضحكت عليهن شكلهن فلله:الا يانوره أي سنه تدرسيين؟
نوره ابتسمت:لا انا خلصت ...انتظر الفرج وتجيني الوظيفه..
البندري:يالله يارب تجييتس..وانت يارهف وش تدرسين؟
رهف:أنا أدرس في المتوسط رايحه ثالث
البندري:اممم نفس أخووي فهد رايح ثالث
وقعدن يسولفن مع بعض وتكلمن عن اخوانهن
البندري:والله انا عندي ثلاث اخوان بندر كبيرنا متزوج وعنده ثلاث عيال ولدين وبنت ماجا معنا لشغله مايقدر يخليه وتروك و فهد وخواتي اربع متزوجات كلهن البتول كبيرتنا عليها ولدين ودانه بعدها عليها بنت والعنود توها حامل والريم تو لها شهرين متزوجه وطبعا كلهن في الشرقيه مابقى الا انا واخواني الاثنين بقيت بلحالي ماعندي احد هنا
تغريد:ياحياااااااتي حنا خواتتتس خلااص وبعدين انا متاكد مع جمالتس هذا بجي نصيبتس صدقييني بجي نصييبتس صراحه انتِ حلووه
البندري:تسلميين عيونتس الحلوه
نوره:والله حنا عندنا ثلاث اخوان حمد كبيرنا وسعود توام تغريد وونايف الصغير وطبعا ماحد متزووج
وكملن سوالف وام بندر خذتها سوالف واندماج مع ام حمد وتقهون وبعدها حطن العشاء وتعشن وخلصن وجلسن مره ثانيه وسولفن عن اللاب والاغاني واشيـــاء ثانيه
البندري:أنا عندي لاب توبي فيه اغنيه حلووه حق جيمس موريسن كان تعرفونه أحبها موووت
تغريد :سامعه باسمه بس ما اعرف اغانيه
البندري:أجيبه لكنّ تسمعونها(طرت على بالها فكره تخليهن يجن فووق عشان لا طلعن تسألهن لا مرن على المجلس من هو هذاك؟)والا تدرن قومن معي لغرفتي..يلا
تغريد:لاءلاء فشـــله..
البندري:أقووول قومن بس وين الفشله؟
رهف:امي ماراح توافق...
البندري:أخليها توافق..خاله خاله يمه بنروح انا والبنات فووق غرفتي برويهن لابي طييب؟
أم حمد:لاء لاء يابنتي خلتس مرتاحه هنا
أم بندر تدخلت:لاء ماعليه البيت بيتكن روحن يمه عادي
البندري استغربت توقعت امها ترفض الفكره كالعاده يوم في الشرقيه والا يعني في الرياض عادي:اوكي(لفت على البنات)شفتن كيف انا واسطه قويه
ويقومن ويطلعن ومثل ماقلت سابقا مجلس الرجال يقابل مجلس الحريم يوم طلعن
تغريد:الله مجلسكم للرياجيل كاشف...
البندري:شفتِ كيف نشوفهم مايشوفونا..تعالن أوريكن اخوااني..
وراحن عند مجلس الرياجيل عند الشباك وورتهن اخوانها وابوها وشافت هذاك المزيون شبيه اخوها وفز قلبها
تغريد:هذولي اخواني اللي جنب ابووي الكبير اسمه حمد
البندري"يالبيـــــــــه هذا المزيون اسمه حمد"
تغريد:واللي جنبه توامي سعود وآخر واحد نايف اصغرنا
البندري:ماشــــاءالله اخوانكم كلهم مزايين>>تلمّح الاخت
نوره:والله اخوااانك المزااايين صدق
البندري:تامرين عليهم ههههههههههه
ويروحن فوووق وهي مرتاحه خلاص عرفت اسمه ودخلتهن غرفتها وعجبتهن ويجلسن عالكنب وتفتح اللاب وتشغلها وسمعتهن اشياء ثانيه وصوور وعطتهن ايميلها وخذت ايميلاتهن بما ان هي فاتحه حقها طبعا يعني لا شبكت بتضيفهن والا هي اللحين ماعندها وايرلس>>حراام
وخذتهن السواااالف ليين مشن وطبعا خذت ارقامهن البندري ارتاحت وياهن
البندري تكلم امها:صراحه ارتحت وياهن
أم بندر:اييه والله حتى انا ارتحت مع ام حمد ناسِ طيبه
في السياره حمد وخواته
تغريد:صراااحه وناااسه مع البندري بنتهن والله كان ودي اجلس بعد لوما العيب كان نمت بعد
نوره:انتس صااادقه وناااسه ليت نايمات عندها
رهف:مو بس عسسل الا قمر ماشاءالله والله لو ابوي وامي يوافقون كان نمنا تصيير فلله وش رايكن نفضي يووم ونسويها
حمد:ماشــــــاءالله تخططن لاشياء على كيفكن بعدين من هذي البندري؟>>فضووول
نوره:هذي بنت أبوبندر البندري ياحراام هي اللي جايه بس من خواتها والباقي في الشرقيه
طبعا حمد عرف انها هي اللي مسكت كتفه
حمد:طيب ليه الباقي ماجن معها؟
تغريد:البقره مافهمتك زيين لانهن متزوجااات
حمد:آهــــــــــا طييب لهاالدرجه عاجبتكن؟
تغريد:يووه وأكثر ياحظ اللي بياخذها>تلمح الأخت عشان يخطبها >لانها ناظرت فيه بالمرايه هو فهم وعطاها نظره تسكّت
(ماشاءالله علييتس ياغروود تبين تخطبين على طوول)
سيارة أبوحمد مع العيال والأم
أبوحمد:هاه يام حمد ارتحتِ معهن؟
ام حمد:ايه والله يابوحمد الأم وبنتها ماعليهن كلام روعه
ابوحمد:الحمدالله والله قايل من البدايه هو عسل وعياله عسل بس ماتصدقن الا لمن تشوووفن بعيونكن ونفسكن
سعود:انا اشهد ان عياله محترمين وعسل باين عليهم
نايف:اييه فهد صار خويي خلاااص
سعود:ماشـــاءالله على طوول خويييك
نايف:اييه اكييد
أم حمد: والله محترمات الأم وبنتها.ايـه يابنتها ماشاءالله جمال واخلاق وادب وروعه
أبو حمد:عســــى البنات تعرفن عليها؟
أم حمد:ايييييه اكييد وودتهن غرفتها بعد خلالاص صارن خويات
أبوحمد:الحمدالله وانا بالذات بنت أبو بندر دامها جايه بلحالها بدوون خواتها بخلي البنات يزرونها وقت ماحبن....الكل في السياره استغرب العاده مايحب الزيارات سبحان مغير الأحوااال
الشرقيه>>بيت مشعل>>الريم
زهقت مالقت شي تتسلى فييه مشعل برى مواعد خوييه وعبير اخته طلعت عند خالاتها قالت لها تجي بس هي رفضت مستحييه اللحين ندمت على انها رفضت ودقت على خوياتها محد رد ودقت على وحده قالت لها زوجي عندي
ريم:والله الشرهه على اللي يدق علييتس خلني ادق على البندري
دقت بعد الرنه الثالثه ردت
البندري:هـــــــــلا والله
ريم:هلا فيييتس
البندري:زيين طرينا على بالتس
ريم:يالنصببـــــــــه!توني داقه العصر
البندري:اييه صح ...بلىمن اللي صااار لي اليووم
ريم بفضول:ليـــــه وش صاار؟
البندري:اسمعي بس واضحكي..
وتقوول لها وش صار مع حمد وخواته وكلل شي قالته لها
ريم:والله هبله ماتخليين الصرقعه والرجه والهبال
البندري:وش أسوي على انه ترووك؟
ريم:يعني لهالدرجه مزيوووون؟ ويشبه تروك؟
البندري:مدري كيـــــف اوصفه لتس؟طوييل علييه عيوون واااسعه مرسوومه عدل وحواجب بعد مرسوومه عدل خشم حاااااد طوييل وشفايف عذااب وسكسوووكه خفيفه خطييره علييه آآآهـ وش اقووول وش اخلي؟
ريم متخرعه:اللــــــــــــه!!بنيييدر ووجع كل هذا بقززه وحده وجع
البندري:ماشاءالله علي والله انتِ خابرتني مع المزايين وبعدين ياحبيبتي هذا عن قرررب قز عدل
ريم:أيييه أكييد أنا اللي معلمتتس تقزيين طبخي
البندري:اقووول لايكثثر بس اللحين ماتقولين لي وين رجلتس عنتس؟
ريم:آآفــ زهق برى مع خوياه
البندري:آمحـــــــــق رجاااال!يخلي مرته بداية عرسه
ريم:يالله على هالعرس اللي مر عليه شهرين وتقول بداية عرس انقلعي بعدين انا اذنت له
البندري:هههههههههههه لييه دجاجه الاخ؟يستاذن؟
رييم:هييييييييييه عن الغلط....بس قالي مايهون علي ارووح واخلييتس قلت رح انت من زماان عنهم
البندري:اللــــــــــــه على الرومنسييه هذي مقدر..
وسووولفن الييين ماشبعن سوااالف وسكرن من بعض وعلى طوول نامت البندري
ريم انسدحت على السرير وتفكر وش تسوي؟زهقاانه؟ الين نامت بدون ماتحس دخل مشعل عالساعه 11وشافها نايمه بدون غطا وترتجف من البرد وشلها وغطاها وهي مع تخدير النوم تقوله شكرا
مشعل:نامي ياقلبي ناامي شكلتس مرهقه
>> هع نامت من غيير ماتقوولها>بتذبحني
9الصبح>بيت محمد ودانه
دانه تبخر البيت من على الصبح وشيووخ بنتها للحين نايمه ومحمد طلع من بدررري وماقال وين؟
وتغني آخر الآخبار خلي مايبيني ..علموني الناس بينة خصامه (مندمجه مع الاغنيه)
خلصت تبخيير جلست بالصاله وشغلت التلفزيون وقامت تغير الا تسمع صووت لقتها شيوخ داخله توها قايمه من النوم تحك عيونها وشعرها مفتوح
دانه:شيووخ ماما ليه قمتِ اللحين؟
شيوخ:ماما حلمت حلم مو حلو..
دانه تخرعت وخافت عليها وجابتها عندها وضمتها:بسم الله علييتس يمه اذا مو حلو لا تقولينه
شيووخ:لاء ماما خليني أقوووله
دانه :لاء حبيبتي الحلو يقولونه مو حلو مايقولونه بعدين يصير يعني يتحقق يله ماما تعوذي من الشيطان دايما لاشفتِ حلم مو حلو تعوذي من الشيطان هذا يلعب بعقلتس زيين ماما ويلا اللحين قومي اغسلي وجهتس وفرشي اسناتس وتعالي عشان احط الفطوور زيين
رااحت سمعت كلامها وهي خايفه من حلمها>ياعمري انا تخرعت عليها
الريــــــــــــاض
((يوووه والله انها مزيوووونه حييييييييل عيت لا تروح عن بالي عيونها ماتفارق خيالي نظرتها كلامها هو مو بس عيونها الا جسمها كله يوه استغفر الله يارب استغفر الله يارب وش هالكلام اللي اقووله وش هالأفكااار؟معقــــــــوله معقوله تعلقت فيها شيلها من عقلك وش فيييك خييييـــــر على طوول قررت اخطبها حمد وش هالكلام اللي تقوووله اركــــــــــــــد شوي وحده شفتها مره تروح تخطبها صحيح ابوها رجال والنعم بس اركد شف راي امك لكـــــــــن انا انا ماني مستعد من بعد ....يووه شيل هالأفكار من راسك يالثووور لا توديك بداهيــــــــــه واعرف اللي كاتبه ربي بيصير))
الصاله>> تغريد ونوره
تغريد: النوري وش رايتس بالبندري؟
نوره:والله ياغروود الصدق عسسل
تغريد:انا صراحه دخلت عقلي
نوره: والله حتى انا بعد دخلت عقلي بس لييه السوال هذا؟
تغريد بخبث:بعديـــــــــن أقوولتس...
نوره:والله أشك فييتس وفي أفكارتس
تغريد:لاء لاء مو هذي المره صدقيني الا قوولي لي بس كم بقى على بداية الشقــــــــى؟
نوره تضحك:هههههههههههه أربعه أياام بس ولو حسبت اليووم خمسسه
تغريد:ييييييييييه الوقت مر بسررعه اللــــه يعينا بس
الشرقيييه>>بيت ماجد والعنود>>الغرفه
ماجد جالس على الكنب والعنود جالسه جنبه وهو حاط يده عليها وهي حاطه راسها على كتفه
ماجد :العنود قلبي وش تبين تسميينه؟
العنود:والله على كيفك..بس أتوقع لازم على أبوك
ماجد بعصبيه:يخســــــــي!!مايستاهل أرفع راسه واسمّي عليه
العنود:مهما كان يامجوودي هذا أبووك ولازم تسمي علييه انت ولده الوحيد
ماجد:مقدر ياعنادي مقدر
العنود:الا تقدر بس حـــــــــــاول...!
ماجد:وانسى اللي سواه فينا بهالسهوله هو أصلا جا يعتذر جاء قال انا أرفع راسي فييك والا جاء قال لامي اعتذر عن كل اللي سوييته فييتس والا جاء واعالنا وصرف علينا والا سأل عنا هذي السنييين لاااء ياعنادي اسمحي لي مقدر(قام)
العنود خافت انها ضيقت صدره:مجودي حبيبي وين رايح؟زعلت؟
ماجد:ماني رايح مكان ياحياتي بس كنت بجيب شي والا تدرين خلالاص خليها بعديين(جلس مره ثانيه)
العنود:خلاص طيب وش رايك باسم عزام؟احسه كذا له هيبه
ماجد:يووه عزاام مدري احسه كبيير عليه
العنود:يوه وش دعووه هو بيكبر بيكبر؟
ماجد:طيب لييه مانسمي على أبووتس؟
العنود بسررعه:لالالالا كافي بندر من كثر النوافات لاء
ماجد:طييب قلبو لاكانت بنت بسميها على امي علياء اوكي
العنود بابتسامه:اوووكي
((اللي ماتعرفوونه ابو ماجد كان أبدا مايهتم في العايله رغم منصبه الكبير كان راعي خرابيط وسفرات وشررب ودعاره وكله ضرب في الأم وفييه يومه صغير الين مره ماجد اكتفى باللي يصير حوله راح وعلّم الشرطه كآخر حل له على أبوه من ظلمه وطبعا الأبو هرب قبل لايصيدونه والأبو توعد ماجد انه بيرجع يووم وياخذ حقه(شفتوا حقارة الأبو كييف؟وربي حقير)والى الآن مالقووه!مشتبهين علييه مسافر برى الحدود بدون جواز سفر ومو قادر يرجع يعني مهرب بعد برى السعوديه واللحين ماجد يكرهه من اللي سواه فييه وهو صغيير واللي سواه في أمه(مالومه والله عقده)ويكــــــــره طاريه وماخذ الحيطه ومجهّز عنده سلاااح مرخّص لان الشرطه معطته اياه الين يمسكون الأبو
انتهــــــــــــــــــى البارت
توقعاتكم؟؟؟
وش حلم شيوووخ المزعج ؟
وش خطة تغرييد؟
حمــــــــد ودووره وهل صحيح الي يفكر فيه؟
البندري وأفكارها اللي تجيبها وتوديها؟
الابو هل بيخلييه بلحاله؟



بلييييييييييييييييييييز ابي ردوووووووووووود عطووني تشجييع


الجوهرة المكنونة ©؛°¨غرامي جديد¨°؛©

صراحه الروايه بنسبه للبدايه رائعه لكن البنات اغلبهم ما يحبون يقرون روايه مو مكلتمله وان أقرو شوي ويطفشون لان بعض الكاتبات يطوولون فيطفشون فأنا من وجهة نظري انك تنزلين الروايه كامله مو لازم هالفتره لكن بعدين تكتبيها كلها عندكـ وتنزلين كل يوم على اربع او ثالث بارتات وكذا راح تشوفين الردود الي ترضي تعبكـ بكتابة الروايه واتمنى انكـ تستمعين لنصيحتي لاني ابغى مصلحتكـ قلبو
وارجع واقول الرايه خطيييييره تقبلي مروري








الحوهرة المكنونة !_!

m!ss memo ©؛°¨غرامي فعال ¨°؛©

تسلم قلبى على الدعوه واتمنى تعتبرنى من متابعيك

أدوات الموضوع
طريقة العرض

موقع غرام موقع سعودي خليجي عربي يحترم كافة الطوائف والأديان ومختلف الجنسيات
جميع الحقوق محفوظة منتديات غرام
iTraidnt by ROMYO
جميع الحقوق محفوظة منتديات غرام
iTraidnt by ROMYO

SEO by vBSEO 3.6.1