غرام
اكتب بريدك ثم اضغط على اشتراك ليصلك جديد غرام
بحث مخصص من محرك البحث العالمي قوقل للبحث في غرام
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 1
قديم(ـة) 18-07-2010, 12:32 AM
مليت أحبك مليت أحبك غير متصل
©؛°¨غرامي مشارك¨°؛©
 
الافتراضي خليجيات في الإمارات / الكاتبة : يتيمة زايد ، كاملة


ღღ خليجيات في الإمارات ღღ
للكاتبهـ : يتيمة زايد
ღღღ
ღღ

حينما تتداخل نصوص الشعر ببعضها .. هل لنا أن نفسرها ..؟؟
حينما تتداخل خيوط الحياكه ببعضها هل لنا أن نفكها ..؟؟
حينما تتداخل مشاكل مجتمعنا ببعضها .. هل لنا أن نحلها ..؟؟
ربما نستطيع .. ، ولكن يصعب علينا الأمر ..............
ولكن حينما تختلط أحاسيس فتيات مراهقات في سن الزهور .. هل لنا أن نحكيها ..؟؟
..... نعـــم وبالتأكيد ..
اليوم .. و في ...
ღღღ
خليجيات في الامارات ..
ღღღست فتيات .. لهن ماضيهن ... ولهن أطباعهن ..... ولكل منهن اسلوبها ورؤيتها ..
و عالم خااص بها .. يحمل أفرااحها ، أحزانها ، طموحاتها ، ذكرياتها .. منها الجميل ومنها المؤلم ..
جمعت الحياااه بينهن .. في ظروف قاسيه .. وقهر دنيا ..
فـ تشاركن في همومهن افكارهن ومشاعرهن ..
عنوانهن في الحياه ..
لا طعم للحياه بدونك فأنتي أختي صديقتي وتؤام روحي ..
اليوم اجتمع نبض هؤلاء الفتيات ليكون حكايهـ ..
حكايه واحده ولكن ......... ست فتيات .. ولكل فتاه حكايه .. وظرووووف ..
فـ هل سيقضي على هذه الظروف أحلاام مراهقاات سادها اللون الوردي .. لـ تتفتح الورود في البساتين .. و تهل الأمطاار على الأشجار .. ويعم النور بين شواارع المدن ..
وهل لـ جرح كل فتاه منهن طبيب ............؟؟
هنا السؤال هل لـ جرحي من يداويه ..؟؟ هل لأحلامي من يحققها ..؟؟ هل هنااك من يخرجني من هذه الدوامه .. ؟؟ متى سـ يُفكـ أسري وأصبح حره كـ الفراشه أرفرف وأطير ..؟؟
متى ومتى ومتى ........؟؟؟ احترت ولم أعرف الاجابه بعد ....؟؟
سـ أنتظر ...
نعم سـ أنتظر ...
انني اليوم أمسك قلمي ... وأحتضن هذا الدفتر الأبيض .. الذي سطرت بين أوراقه .. حياتي بكلمات وجمل قصيره .. تحمل معاني كبيره .. تحمل أحزاني وذكرياتي .. تحمل مأساتي ... تحمل كل ما يجوب في قلبي ومخيلتي ...
ولكن من سيحرق هذه المذكرات .. ويخرجني من هذه الدوامه ..

>>>>>>>>>>
ست بنات خليجيات .. طبعا ما يحتااج نذكر من وين هن ..؟؟ لأن الكل يعرف دول مجلس التعاون .. ست دول بشبه الجزيره العربيه .. الحمدلله رب العالمين .. الأمان عام هذي الدول .. نختلف ببعض الأشياء لكن يظل ديينا وأصلنا ولغتنا .. وتاريخنا ... كل هذا يربطنا مهما افترقنا أو اختلفنا في بعض وجهات النظر ..
....
مـــلاك : من دولة الامارات العربيه المتحده عمري 21 سنه .. أدرس تمريض عايشه في دبي مع أخوي لأن أبوي وأمي متوفين الله يرحمهم .. أخوي طيب والحمدلله معوضني عن كل شي .. بس مستحيل يعوضني عن حنان وعطف الأب والأم .. طبعي قاسيه كثير مع اللي حولي وأتعامل مع الكل بطريقه دبلوماسيه .. شعاري لا للحب والعطف .. يمكن لأني أنا فقدت الحنان .. عشان جذا يصعب علي اني أعطيه لغيري ..
ღღღ
أريج : من سلطنة عمان عمري 21 سنه .. أدرس تمريض .. أكيد كثير استغربو مني ويقولو عمانيه وفي دبي .. أقول ايوا لأني مقيمه في دبي و عمان ما تبعد كثير عن الامارات .. كان حلم حياتي أني أدرس في دبي وأعيش فيها .. واليوم تحقق حلمي.. عايشه مع الوالده في شقه .. أبوي متوفي من سنين .. من وأنا صغيره .. من كذا واحد من عمامي عايش في الامارات .. وجابنا لـ هنا .. ويصرف علينا .. طبعي حساسه كثير .. أخذ الأمور وأفكر بها بقلبي .. و مش من عقلي .. يعني العاطفه عندي تسود كل شي ..
ღღღ
نور : من المملكه العربيه السعوديه عمري 21 سنه .. أدرس تمريض .. عايشه في دبي مع خالتي .. خالتي سعوديه وماخذه واحد كويتي .. بس أنا أمي سعوديه وأبوي سعودي .. الله يرحمهم .. من توفو جيت عشت مع خالتي وزوجها اللي له تجاره بالامارات .. يحبوني وأحبهم كثير .. أنا فااقده حنان الأم والأب من وأنا صغيره .. من كذا أحاول أعوض اللي حولي وأعطيهم اللي أقدر عليه عشان يبادلوني الحنان والحب اللي فقدته .. يعني حبوبه ..
ღღღ
شوق : من دولة الكويت عمري 21 سنه .. أدرس تمريض في دبي .. ما أنكر انه التمريض دخلته غصب لأنه بنت خالتي نور قالت بتدخل تمريض فـ قلت .. اش حقه ما أدش وياها ونحن بكل صغيره وكبيره مع بعض يت ع التخصص .. بس بيني وبينكم .. آنا أحب الجكجكه .. ( التصوير ) يا معوده اش هي الجكجكه ههههه .. لكن لجل عيون نور دخلت تمريض .. ابوي يابنا للامارات بالتسعينيات لأنه جدي عنده فرع من معرض السيارات اهني في دبي .. ويوم جدي توفا .. طلع الفرع اللي هنا من نصيب أبوي .. يعني ورثه .. وتركنا ديرتنا ويينا لديرتنا الثانيه اللي هي الامارات .. طبعي مزوحه .. مرحه .. أخذ الأمور ببساطه .. مهمله نوعا ما ..
ღღღ
روان : من مملكة البحرين عمري 21 سنه أدرس تمريض .. أمي أجنبيه .. عندها أشغال كثيره في الامارات .. وأبوي بحريني هم عنده أشغال .. بس اهوه يوم بالبحرين ويوم بالامارات ... ماكو مكان محدد .. بس أمي بالامارات .. وتحديدا في دبي لأنها تروق للأجانب أكثر من مكان ثااني .. آنــــــــــــه بطبعي حساسه ودلوعه لأني البنوته الصغيرونه والوحيده بالبيت .. غير ان أبوي وأمي لاهين بشغلهم .. فـ يوفرون لي كل شي .. لكن في شي نسوو يوفرونه لي .. اللي هو الحنان ... شكلي يوحي بأني برستيج وهالشي يخلي اللي حولي يعتقدون اني مغروره بسبب شكلي أو فلوسي .. بس العكس أنا جدا متواضعه مع اللي أعرفهم .. واللي ما أعرفهم .. ما أنكر اني أغتر عندهم بعض الوقت ..
ღღღ
بدور : من دولة قطر عمري 21 سنه .. أدرس تمريض عايشه مع أختي بالامارات .. أختي زوجها اماراتي من دبي .. أما نحن قطريين .. الوالد والوالده وهم أخواني بالبدايه رفضو أعيش بالامارات مع أختي .. بس أنا من يوم خلصت الثانويه بـ قطر وأقنعهم الا أكمل بالامارات.. وحبيت أكمل اهني .. وداام أختي عايشه اهني ما بتغرب .. يعني مع أهلي ... ووافقو اني أدرس في دبي .. الين ما أخلص دراسه .. وارجع لقطر .. طبعي عنجهيه أحب اتفلسف .. من الابتدائي وأنا النابغه بالصف .. حياااتي كلها أكشن أفلاام رعب ..

>>>>>>>


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 2
قديم(ـة) 18-07-2010, 12:33 AM
مليت أحبك مليت أحبك غير متصل
©؛°¨غرامي مشارك¨°؛©
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


ღالحلقه الأولىღ



في احدى فلل دبي الراقيه .. فله تسودها الأمان والتفاهم بين أهلها ..
يوم الأربعا الساعه تسع الصبح نزلت ملاك رشت أخر رشه من العطر اللي تهوا ريحته .. وشافت شكلها في المرايه .. : ياربي اليوم شكلي صاير شاحب .. بس أنا من ذكائي نمت متأخر أمس ..

توجهت ملاك للباب وطلعت من الحجره .. شافت الممر فاضي .. : أوووف هذا ميووود صدق يذل الواحد .. أرووح أوعيه أحسن لي ..

ملاك وهي متجهه لحجرة أخوها مايد .. دقت الباب : ميود .. ميوود أخوي قوم بسك رقااد .. الساعه تسع ..

مايد : لا رد ..

ملاك : ميوود فديته قوم .. بتتأخر ع دوامك ..

مايد : لا رد ..

ملاك وقفت يدام البااب ودقته بقوه .. وقالت بصوت عالي : بتتأخر وعقب بتقول ملاك جييه ما وعيتيني ..

ثواني الا وينفتح الباب بدفاشه : قـــــــــمــــــــــت ..

ملاك تنط وهي رااجعه لورا : بسم الله .. انزين شوي شوي ياخي ..

مايد يضحك : هذي انتي اللي تقومين بدفاشه .. تعلمي الرقه ..

ملاك بأسلوبها : والله أنا ما أحب حركات بنات هاليومين ماال المياعه .. وانت تعرف طبعي ..

مايد : زين زين .. عرفنا يالمغروره..

ملاك : زين انك عرفت هههه .. بس مغروره ما أسمح لك تراني متواضعه

مايد : مداح نفسه .. يباله .....................

ملاك تسبقه وتقول : يباله بوسه .. ههههههههههههه

مايد يضحك : دبه ... يلا سيري خل الدريول يوصلج ..

ملاك : لا أبااك انته ههههه

مايد : بتأخر أنا .. هب ناقص تتأخرين ع الجامعه ..

ملاك : أوكي بسير مع الدريول ..

مايد : تريقتي ..؟؟

ملاك : لأأ وانته ..؟؟؟

مايد : توني نااش من الرقاد اش هالسؤال الغبي ..؟؟ هههه

ملاك تضحك : ههههه شفرت .. تتريق وياااي ..؟؟

مايد : لأأأ بتريق في الدوام ..

ملاك : أز يو لاايك براذر ..

مايد : يلا بروح بتسبح ..

ملاك : نعيما مقدما .. وأنا رايحه اتريق ..

مايد : عندج بيزات ولا ...؟؟

ملاك : حرام عليك تونا بدايه الشهر ما صرفت واايد هههه

مايد : الحمدلله .. نعمه .. أول مره ملااكوه ما تصرف هههه

ملاك : لا بس التهيت مع ربيعاتي وجذا ..

مايد : أوكي عاد بلا هذره زايده .. سيري وخليني اتجهز عسب لا اتأخر ع الدوام ..

ملاك : هههه أوكي أوكي .. ريلاااكس ..

مايد ابتسم : اجلبي ويهج يلا ..

ملاك : هههه على أي صفحه ..

مايد : بلا سخافه ملاك ..

ملاك : أوكي مع السلامه ...

مايد : الرب لج حافظ ..

ملاك نزلت من ع الدري وهي تركض .. الين وصلت تحت وبصوت عالي : أمي فااطمه .. أمي فااطمه ..

فاطمه مره كبيره بالسن .. بالأول زوجها كان يشتغل عند ابو مايد .. بس يوم توفا زوجها .. ابو مايد قال الا تيي فاطمه مع عيالها لـ بيتهم ويسكنون بالملحق .. بس فاطمه رفضت .. لأنها بتكون عااال عليهم .. وابو مايد عطاها فكره انها تطبخ لهم وتسوي بعض الأشيا مثل انها تتحكم بالخدم وكذا غير انها تشوف مايد وملاك يوم هم صغار وبالمقابل سكنها يكون عندهم ومصرفها هي وعيالها على ابو مايد .. ع اساااس انها وحده منهم وفيهم .. ويوم ابو مايد وأم مايد توفو .. فاطمه ربت ملاك ومايد ..... مايد يوم كبر شاال فاطمه على عينه وراسه لأنها ربتهم وبمثابة الوالده لهم ..

فاطمه : نعم بنتي .. يايه يايه ..

ملاك تضحك : وينج ..؟؟

فاطمه : موجوده .. بس يالسه أناازع بالخدامه اليديده .. غربلااتها حتى العسل ما تعرفه ..

ملاك تطالع طاولة الريوق : أمي متعبه روحج مسويه وايد أكل ..

فاطمه : هي ... بنيتيه ..

ملاك تيلس ع الطاوله : بس خساره ما أروم أكله مسويه ريجيم ..

فاطمه : واش لج بنتي بالرجيم ..

ملاك تضحك : ماما عسب ما أمتن .. واستوي متينه ..

فاطمه تضحك : الله يهديكن يالبناات ..

ملاك تضحك : امييين

فاطمه : شو مسويه بروحج ..؟؟

ملاك تطلع شعرها من الشيله : حلو لونه ..

فاطمه : جنج اسده هههه

ملاك تبوز : زعلتيني ماما ..

فاطمه : لا ولا يهمج .. بس مب جنه واايد فااتج اللون

ملاك ترفع شعرها : لا أماايه ها النيو لوك مالي

فاطمه : الحينه هذا اللي يسمونه نيو لوووك

ملاك تضحك : هي امييه هذا ..

فاطمه : عاده ما نبااه خلااص هالنيو لووك ..

ملاك : ههههه فديتج مال أول صدق .... صح اش حال بنتج موزي ..؟؟

فاطمه : بخير الحمدلله .. فالعين مع ريلها ..

ملاك : ما بييون هالأسبوع ..؟؟

فاطمه : لأأأ ..

ملاك : زين ربي رزقج بنيه .. الأولاد ما منهم فايده هههههه هكو ولدج راشد محد

فاطمه : وين حليلهم ما في أحسن من الأولاد ..

ملاك وهي تضحك : اماايه صح ولدج رااشد مب نااوي يرجع من المانيا..

فاطمه : ترااه بيستوي دكتور وهذي أخر سنه له ..

ملاك : هي ماشالله صاار له عشر سنين متغرب عن البلاد ..

فاطمه : هاانت مب بااجي شي .. وبيرجع معااه الشهاده ..

ملاك : هي بستوي خقاااق عقب ..

فاطمه : وين .. لا انشالله يكون متواضع .. من تواضع لله رفعه ..

ملاك : اذكر قبل عشر سنين يوم راشد تخرج من الثانويه كان عمري 11 سنه وقتها يوديني الدكان ويااه ..

فاطمه : هيييييييه الله يرحم اياام أول .. الحين كلكم كبرتو وبتيبون عياال بعد ..

ملاك تضحك : لا تفاولين عليه ماما ههههه

فاطمه : ومن اللي يفاول ع بنته يا بنتي ...؟؟ هههه

ملاك : مامااااي .. لاحظتي ان انتي عندج ولد وبنت ونحن بعد ولد وبنت هههههه

فاطمه : هي ههههه

ملاك وهي توقف وتشرب العصير .. : يلا عاد بروووح تأخرت ع الكليه ..

فاطمه : ما كليتي شي ..؟؟

ملاك وهي تركض ومعاها في يدها البلاك بيري والكتب : بااكل فالجامعه مامايه .. يلا بااايو ..

فاطمه : شوي شوي بنتي .. الله يحفظج ..

ملاك تلبس نظارتها وهي تنزل من ع الدري بسرعه وتصرخ : عمرااااااااااااااااااااااااااان ..

عمرااان من عند البااب قاام بسرعه وقااال : نعم ..

ملااك : ييب السياره عمران .. حرقتني ع الشمس ..

عمراان بسرعه يروح صوب السياره ويحركها لأنها أوريدي كاانت شغاله .. ويتجدم بها للفله .. ويوقف السياره وينزل .. يفتح البااب لملااك ..

ملاك تتدخل وتقول : شكرا ..

عمران يروح ويركب السياره ..

ملاك تطالع شكلها فالجامه .. وتعدل بالجحال .. وتقول : جييه متأخر اليوم ..

عمران يحرك السياره : سوري مس .. بس هادا نفراات خدامه جديد واايد في قرقر مع ماما فاتمه ..

ملاك تضحك : زين سوق سوق .. وطالع دربك ..

عمران بطبعه حبوب ودريول جديم قاال : شغل يالتااكسي .. سوق سوق .. روووه يمين ..

ملاك تضحك : لا شو اصبحنا واصبح الملك لله ... اشو يا التاكسي بعد ههههه ..

عمران يضحك : هادا غنيه واااجد هلوو ..

ملاك تضحك : ترااك تشبه السواق مال التاكسي هههه

عمران : مس مره تانيه انتي في سوي تلفون عشان أنا في يجهز سياره بدري ..

ملاك : أوكي .. مر ع بيت بدور ..

عمران : هادي اللي في ساكنه جميره ..

ملاك : لا لا .. اللي عند البيوت العربيه ..

عمران : بس هادي بنيه في شويه باقل ( مينويه ) مس ..

ملاك تضحك : عنلاااتك لا ترمس ع ربيعاتيه ..

عمران : هيه في كل مره يقول انته لااازم في يلبس كندوره انته قديم داخل هذا بلااد ..

ملاك تضحك : عنلااتها حتى انت تتفلسف عليك

عمران : شو مس ..؟؟

ملاك : ماشي يلا بسررررعه .. هههه

عمران : أوكي الهين في يروووه سااروخ ..

ملاك تضحك : عن تذبحنا بس ..
/
.
/
في فله أخرى من فلل دبي .. الكل قاااعد على طاولة الطعااام يتريق ما عدا طلاب المدارس لأنهم في المدرسه ..

ام عبدالعزيز : يما شوق وينها بنت خالتج نور ..

شوق : يما نور بدارها ..

أم عبدالعزيز : هو ما تبي تتريق ..؟؟

شوق : امبلى بس تتجهز بتيي ..

بو عبد العزيز وهو ينزل من ع الدري : صباح الخير يا عياال ..

الكل : صبااح النور ..

بو عبدالعزيز : وينها نور ..؟؟ غريبه مب ويااكم ..؟؟

شوق : بدارها يبا .. تتجهز وبتيي ..

بو عبدالعزيز : أم عبدالعزيز .. لما عبدالعزيز يقوم من النوم قولي له ييني المعرض ..

أم عبدالعزيز : انشالله

بو عبدالعزيز ابتسم : اش فيج ...؟؟

شوق ماده بوزها : عبدالعزيز أمس يقول لي ماكو طلعه هالويك اند مع البنات ..

بو عبدالعزيز : ما عليج منه .. أنا ابووج ..

شوق تبتسم وتبوسه ع راسه : يا أحلى ابو انته ..

بو عبدالعزيز : يعل ربي يحفظج ..

أم عبدالعزيز : يا بو عبدالعزيز .. ترا بنتك الهنوف وضعها كلش مو عاجبني هاليومين ..

بو عبدالعزيز : خير انشالله ..شـ مسويه بعد ..؟؟

أم عبدالعزيز : قاامت تطول لسانها على الفقيره نور ..

بو عبدالعزيز : تشوفينها تغاار ..

أم عبدالعزيز : حتى ولو بس ما تطول لسانها ع البنيه .. بروحها يتيمة ..

بو عبدالعزيز : أنا بحاجيها وبخلي الثنتين يجتمعن ..

أم عبدالعزيز : تسو خير ..

شوق تبتسم : قـــــــــوه ..

نور : الله يقويج ..

بو عبدالعزيز : هلا بنتي .. تعالي كلي ..

نور تطالع ساعتها : وااجد تأخرنا ع الجامعه عمي ..

بو عبدالعزيز : ما فيها شي بنتي .. اكلو وروحو ..

نور : ما فيني بتفوتني المحاضرات .. وحنا على أخر السنه .. مش بااقي شي ..

بو عبدالعزيز يطالع أم عبدالعزيز : هالبنيه ودي أعرف كيف عايشه ..

أم عبدالعزيز تضحك : خلها ع راحتها ..

نور تضحك : هههه ع المويه عمي ..

بو عبدالعزيز : ههه يلا الله يحفظكن روحن لا تتأخرن ع المحاضره

شوق توقف وتبوس راس ابوها : بااايو مامي دادي ..

نور تبتسم : امشي بسرعه يا شيخه بلا مامي وداادي ..

شوق تمشي : زين يا معوده .. لا يحوشج جنون البقر بس هههه

نور تعقد حياتها : يا سخفك يا شوق ..

شوق : هو اش فيج من صبااح الله خير زعلانه .. ؟؟؟

نور : بعدين بخبرك بالجامعه يلا ..

شوق باستعبااط : تبين مويه ..؟؟

نور تتخصر : تتمسخري حضرتك ..؟؟

شوق : كلاامج غريب ههههههههههه

نور : يا شيخه رحي زين .. يعني انتي اللي كلامك حلو ..

شوق : كلنا عرب ولا فرق بيننا ..

نور : زين انك عرفتي لحالك هههه يلا امشي لا نتأخر أكثر ..

شوق : سؤال قبل لا نركب السياره ..

نور توقف وتطالع فوق : ياربي هالبنت ودها تذبحني ..

شوق تضحك : هو اش فيج شبيتي ..

نور : منك .. أعوذ بالله اسألي لا نتأخر ..

شوق : البنات كلهم بييون ولا ..؟؟

نور : اي كلهم بيجون .. ما حد بيغيب ..

شوق : ايه زين ..

نور : وليييش بلا ..؟؟

شوق : يعني لو وحده بتغيب .. بغيب أنا الثانيه وبروح بنخمد ..

نور : ايوا وااجد عليكي .. اقوول يلا اركبي لا نتأخر أكثر .. كل يوم حنا على هالحال ..
/
.
/
في احدى البيوت من البيوت العربيه

بدور : اقووول حميدااان وش ذي الخربطه اللي مسويها ..

حمدان يمد بوزه : بخبر باباتي عليج ..

بدور : رح زين يا ريااال .. ميره تعاالي شيلي ولدج عني لأدوسه وأنا ماشيه ..

ميره تيي من المطبخ : شـ مسوي بعد ..؟؟

بدور : طاالعي شو مسوي بأوراقي ..

ميره تشيل حمدان : أنا كم مره قلت لك لا تلعب بأغراض خاله ..

حمدان يصيح : بخبر باباتي عليكم ..

ميره : انا اللي بخبره عن سواد وجهك .. لاعب بأوراق أختي ..

حمدان : ما أهبها ما أهــــــــبها .. هادا بيتنا ..

بدور تضحك : ايــه انت بس تعاال لـ قطر ان ما ذليتك وخليتك تبوس ريولي ..

ميره : هههه يلا تجهزي بروح بقول لـ معضد يوديج الكليه ..

بدور : الا ما يحتاااج اليوم ملاك بتمرني ..

ميره : أحسن ههه بتوفرين ع ريلي المسكين ..

بدور : هي منا عينكم ارجع قطر وتفتكون مني ... هههه

ميره : روحي لا تأخرين ملااك ..

بدور تطالع فونها : هذي وصلت ..

حمدان يصيح : وديني وياااج ..

بدور تطلع لسانها : مو هذا بيتكم .. هذيج سيارة رفيجتي ماكو تيي ويانا ..

حمدان يصيح : بلوووووووووووووح ..

بدور تطلع وهي تضحك على حمداان ..

حمدان يصيح : ما ودتني ..

ميره : ترااك قطعت أوراقها ..

حمدان : ما بقطعهم ..

ميره : انت قطعتهم وخلاااص .. ماشي فاايده ..

حمدان : ابا ارووووح ..

ميره : بروووح بقوم ابوووك أحسن لي من حشرتك ..

ميره تلف وتشوف معضد جدامها .. تبتسم : زين قمت بروحك ..

معضد يبتسم : صبااح الخير ..

ميره : صبااح النور والنوير ..

معضد : شـ السالفه من صباح الله خير صيااح وحاله ..

ميره : هذا ولدك مقطع أوراق الكليه مال بدور ..

معضد : قلت لها مليووون مره لا تحطهم ع الأرض ..

ميره : شـ تسوي المسكينه طول الليل تذااكر ..

معضد يضحك : هي بااين .. الكتب بصوب وهي يداام ام بي سي أكشن ..

ميره تضحك : ما علينا .. تتريق ..

معضد : لا بدور بتتأخر ع الكليه .. بوصلها وبااكل برع ..

ميره : بدور رااحت ..

معضد مستغرب : روحت ......؟؟

ميره : ايــه مع رفيجتها ملاك ..

معضد : ولييش ..؟؟ كنت بوصلها ..

ميره : هذي مب أول مره معضد وبعدين عادي ..

معضد : قلت لج كذا مره البنيه ما تطلع مع ربيعاتها كل يوم ..

ميره : عادي وأنا أعرف رفيجاتها ..

معضد : هلج موصينا عليها ونحن مخلينها ع راحتها .. وبعدين ربيعاتها قولي يمكن ثنتين منهن بس ماااشي حالهن والبجيه الله يستر عليهن ..

ميره تبتسم : يلا انشالله كلها كم شهر وبترجع قطر ونفتك هههه

معضد : بس بعد هذي أمانه عندنا ..

حمدااان ميت صياااح : ودوووووووووني ..

معضد يلف مبتسم : هذا بعده على نفس الحاال ..

ميره : يخربط بأغراضها ويشتمها ويقول هذا بيتنا وأخر شي يزعل يوم تطلع ..

معضد : يحبها هههه

ميره : بس بعد موبس حمدان المينون .. بدور هم دبل عن حمدان .. حاطه دوبها بدوبه .. وتحب تطفر فيه ..

معضد : ميرووه لا ترمسين واايد طلعي لي ريوق ..

ميره تضحك : أوكي الحين بروووح ..

حمدان ايي عند ابووه ويقوول : بابا ودنا كتر ..

معضد يضحك : بوديك كتر هههه بس ليييش تبا تروح ..؟؟

حمدان : بدور كل يوم تروح كتر عند يدي ونحن ما تودينا ..

معضد يضحك : حبيبي بدور ما تروح قطر بدور تروح الجامعه وترجع ..

حمدان يعاند : لاأأ لأأأ لأأأ ابا اروووووح كتر عند يدي ..
/
.
/
تطلع من المسبح .. وتروح تقعد ع الكرسي ... وتبدا تشرب العصير البارد .. ثواني الا ويرن موبايلها .. تبتسم وترد بروووح ..

روان : هلا والله بالغوالي ...

اريج : هلا فيج ..

روان : اشلونج ....؟؟

اريج : زينه انتي ويش أخبارج ..؟؟

روان : نشكر الله ..

اريج : تأخرتي كثير .. تعاالي بسرعه ..

روان : هههه الحين طلعت من المسبح ..

اريج : ونحن قلنا للبنات انه بنروح الجامعه بدري اليوم ..

روان : ربج ما كتب .. ههه وبعدين كان ودي اليوم اتسبح ..

اريج : انزين بسرعه غيري ومريني ..

روان : هههه بس اشرب العصير وأتأمل شكل المسبح وبييي ...

اريج : لا تتأخري واجد ..

روان : ايـــه انشالله ما بتأخر .. انتي جاهزه ..؟؟

اريج : ايوا صاار لي ساعه واقفه انتظرج ..

روان : خلاااص مسافة الطريج وأنا عندج ..

اريج : انتظرج

روان : اتصلي بـ ملاك خبريها ان بنتأخر ..

اريج : خلااص أنا بتصل فيها وانتي تجهزي ..

روان : أوكيك .. يلا بااايو ..

اريج : باااي ..

روان بعد ما قفلت ... قالت بصوت عاالي : ستريـــــــــــــا جهزي لي الحمام باتسبح ..

أم روان ( صوفيا ) يايه من بعيد : Good morning my daughter ( صباح الخير بنتي )

روان : Good morning mam ( صباح الخير أمايه )

صوفيا : What happens rawan ( شو صاير روان )

روان تطالع أمها وهي تشرب العصير : No thing mam ( ولا شي أمايه )

صوفيا : You are too late ( انتي متأخره وايد )

روان : Yes’ I too late ( هي وايــــد متأخره )

صوفيا : Go to college ( يلا روحي للكليه )

روان : After five minute ( عقب خمس دقايق )

صوفيا : Dear I’ll go to the company ( انزين حبوبه بروح الشركه انا )

روان : I am also go to college ( وأنا بعد بروح الكليه )

صوفيا : bye

روان : bye mam

روان تقوم من ع الكرسي .. وتمشي بسرعه لحجرتها .. أول ما تدخل .. تصرخ بصوت عــــــــــاالي ..

روان : ســـــــــــــــــــــــــوزي .. جيت أب .. طولـــــــــــتي بالنومه يلا بيبي ..

سوزي تتحرك بالفرو اللي عليها .. روان تروح تشيلها وتقول : ما بسبحج اليوم خلي الخدامه تحممج .. لأني متأخره .. أوكي بيبي .. هههههه
/
.
/
في شقه من الشقق في دبي ..

اريج تبوس راس أمها : ها أما .. تاكلي شي .. أجيب لج ..

أم أريج .. ( خاله أمينه ) لا بنتي .. كليت ما أبغي بس انتي جهزي حالش عشان تروحي الكليه ..

اريج : انشالله يالغاليه ..

أم اريج : من بيوديش ..؟؟

اريج : هذي صديقتي روان بتمرني ..

أم اريج : فيها الخير والله .. من دخلتي هالكليه وهي معااش ..؟؟

اريج : ايوا .. يلا أمي أنا بروح بلبس عبايتي وبنزل ..

أم اريج : الله وياااش بنتي ..

اريج تبتسم : تبغي اجيب لج شي من برع ..

أم اريج : لا سلامتج بنتي ..

اريج تروح صوب حيرتها وتااخذ العبااه وتلبسها بسرعه وتلف الشيله وتاخد دفتر المحاضرات والموبايل وتظهر وهي تربع ..

خاله أمينه : شوي شوي بنتي لا تطيحي ..

اريج تضحك : انشالله ماما ...

تطلع اريج من الشقه وتمشي بسرعه من ع الدري .. تسمع صوت واااحد ..

.............. : الناس مخترعين المصعد بس بعده شي نااس فقر ما يعرفون له ..

اريج سوت له طاف ومشت .. ثواني الا وايي يدامها فجأه ويقول بعصبيه : لما أكلمج تردين عليه سمعتيني ..

اريج تطالعه باستحقار وتقول : اترك يدي لو سمحت ..

محمد : لما أكلمج تردين علي ..

اريج تسحب يدها بقوه وتقول : والله ان ما تركتني بحاالي شوف ايش بسوي فيك ..

محمد يبتسم ويسند ع اليدار : شو بتسوين يا حلوه ..

اريج تمشي بسرعه وتقول : صدق ناس فاضيه ..

اريج توصل لتحت البنايه وتوقف تطالع الباركنات .. وتطالع ساعتها : أووووووف وينها هذي تأخرت كثير ..

ترفع راسها ولا تطالع روان تنزل الجامه وتقول : هللللللللللللللللو دير ..

اريج تبتسم وتروح للسياره : هلأأأ .. زين جيتي ..

روان : حياج أختي حياااج ... اش حقه معصبه يالحبيبه ..

اريج تبتسم : كالعاده حمووود اللي ما أطيق اشوووف وجهو طلع بوجهي اليوم ..

روان تبتسم : ههههه هذا لو يقدر يبوس التراب اللي تمشين عليه ..

اريج : لا شكرا ما ابغا ..

روان تضحك : تببيييين ادري .. انج تبييين هههه

اريج : رواني اللي فيني مكفيني .. جيتي تزيدي علي ..

روان تضحك : خلااص ولا يهمج .. بقفل حلجي الحين هههههه

اريج : قولي له يسوق بسرعه عشان نوصل الكليه من وقت ..

روان : لا خليه يسوق على رواااق ع قولتهم هههه عشان ابي اسولف معااج يالدبه ..

اريج : وش جديدج ..؟؟

روان : لا والله .. من صجج تتكلمين ..

اريج : ولا شو قالو لج ..؟؟

روان : يختي أمس شفنا بعض هههه ما يبي له نسأل عن أحوال بعض ..

اريج : اتصلي بـ ملاك سأليها وينهم ...

روان : تقول مرو على مطعم خذو لنا ريوق ..

اريج : زين سوت والله اني جوعـــــــــــانه موووت ..

روان : مجاعه أعوذ بالله هههههه

اريج : لا .. أمي قالت افطري بس ما اشتهيت .. يعني أكل بروحي .. فـ ما اشتهي ..

روان : ايــه وأنا بعد ..

اريج : أقـــول بابو شخبارك اليوم ..

روان تضربها ع يدها وتقول : عشرين ألف مره قلت لج اسمه مو بابو ..

اريج تضحك : يختي عاجبني الاسم هههه

روان : سمي ولدج بهالاسم عـــــــــــــاد ..

اريج : لا لا بسمي هذا دريولج .. ولدي ما بسميه بابو ههههه

روان : عشرين مره قلت لج اسمه جيري ..

اريج : هههههههه يا بنت .. والله ضحكتيني .. ذكرتيني بتوم وجيري ..

روان : خربت اسم الدريول المسكين هههههه

إڷـےٍ آڷلْقٍــآءْ فٍـےٍٍٍ آڷحًـڷقْهٍـ آڷقًــآدٍمْـهٍـ ..


موعدنا كل أحد وأربعاء ..

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 3
قديم(ـة) 18-07-2010, 12:34 AM
ملامح أنثى ملامح أنثى غير متصل
عضو موقوف من الإداره
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


بداية موفقهـ .. جزاك الله خيراً ..
متى تنزلي البارت؟

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 4
قديم(ـة) 18-07-2010, 01:06 AM
مليت أحبك مليت أحبك غير متصل
©؛°¨غرامي مشارك¨°؛©
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


يعطيج ألف عافيه غاليتي ..
الأربعاء ان شاء الله ..
نورتي غاليتي ..

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 5
قديم(ـة) 18-07-2010, 01:32 AM
صورة لـيــل الرمزية
لـيــل لـيــل غير متصل
©؛°¨غرامي جديد¨°؛©
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


بدآيـہ {موفقـــة ..
وشخصيآت القصــة رآئعة //..
استمـــري عزيزتي للآمــآم..~
وبانتظـــارج الأربعآء القـآدم بإذن الله..}~
محبتي لـيــــل^^


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 6
قديم(ـة) 18-07-2010, 11:53 PM
مليت أحبك مليت أحبك غير متصل
©؛°¨غرامي مشارك¨°؛©
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


شكرا ع المرور غاليتي
مرورج الأروع
أسعدني تواجدج

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 7
قديم(ـة) 20-07-2010, 01:11 PM
صورة كـــايـــد الـــريـــم الرمزية
كـــايـــد الـــريـــم كـــايـــد الـــريـــم غير متصل
شـــلــة الــزعــيــم
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


ياهلا وغلا



بداية جملية مسار الرواية لحد الحين ماتحدد


اتمني نشوف حياة كل شخصية بشكل اوضح مع الحلقات الجاية


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 8
قديم(ـة) 20-07-2010, 11:25 PM
مليت أحبك مليت أحبك غير متصل
©؛°¨غرامي مشارك¨°؛©
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


شكرا ع المرور الرائع ..
ان شاء الله مع الأيام كل شئ يتضح ..

الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 9
قديم(ـة) 20-07-2010, 11:26 PM
مليت أحبك مليت أحبك غير متصل
©؛°¨غرامي مشارك¨°؛©
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


ღ الحلقه الثانيه ღ


>>>>>>>>

في سيارة ملاك .. ملاك وبدور يالسات ورا ..

ملاك : خير انشالله شاقه الحلج من صبااح الله خير ..

بدور : هههه حرام الواحد يستانس ..

ملاك : لا بس فرحينا ويااج ..

بدور : الله يسلمج حمدان مقطع لي أورااق الجامعه .. وتضاربت ويااه .. والحين يوم طالعه يبي ايي ويااي وغير جذي يقول هذا بيتنا مو بيتكم هههه .. اقول له بس تعاال قطر وبنشووف من بيبوس ريلي ..

ملاك تضحك : ههههه الله يحفظه اشتقت له وااايد ..

بدور : اتصلتي بالبنات ..

ملاك : لااأأ أمس بليل بس كلمت روان ..

بدور : اش قاالت ..؟؟

ملاك : اهيه واريج بييون الجامعه بدري .. أما نور وشوق الله يستر لو شوق ما انخمدت ع قولتها ههههههه

بدور : هي هذي حياتها هالشكل .. طول الوقت نوم ..

ملاك تضحك : لا تسمعج وتغلس عليج .. وتخليج تطلعين من طورج .. خخخ

بدور : ع طااري التغليس .. لحضه شوي ..

ملاك : ليكون ..................

بدور تقاطعها .. وتشغل الفون وتحطه ع التسجيل وتقول : السلام عليكم عمران .....

عمران ما صدق عطووه فيس : وأليكم سلاام ..

بدور : كيساااهي ..؟؟

عمران : زين الهمد لله .. انتي كيف أحوالك ..؟؟

بدور فيها الضحكه : مب أنـــــا قايله لك تلبس الكندوره ..

عمران : ما أندي ..

بدور : بفصل لك وحده بس تلبس سمعتني ..

عمران : انشالله ..

بدور تطفي التسجيل : بحطه كله لما بروح قطر بسمعه للبنات ههه .. في واايد تسجيلات تموت ضحك هههه

ملاك : حتى هذا المسكين ما سلم منج .. هههه

بدور : سكتي سكتي الدوريه وااقفه عسا خير ..

ملاك : اوووووف لااازم يعطلونا ..

بدور : صدقج روحنا متأخرين يجون يأخرونا زياده بتفاهاتهم ..

ملاك : ما عليج السياره ما عليها لا مخالفات ولاشي .. حتى عمران ليسنه تونا مجددينه ..

بدور : زين ...

توقف سيارة ملاك .. ويي دورهم لما يوصلون صوب التفتيش .. عمران ينزل الجامه ..

الشرطي : السلام عليكم ..

عمران : وعليكم السلام ..

الشرطي : الليسن والملكيه ..

عمران يطلع الليسن من البوك ويعطيه للشرطي .. الشرطي يطالع الليسن ويقول الملكيه ..

عمران يمد يده للطبلون عسب يطلع الملكيه .. بس ما يحصلها ويقول : مس ملاااك ملكيه ما في هني ..

ملاك مستغربه : عيل وينها ..؟؟

عمران : ما أعرف ..

الشرطي بتكبر : خلصونا بسرعه ورانا شغل واذا مب وياكم خذ السايد اليمين والشرطي هنااك بيرمسك ...

ملاك من طرف عينها : هب ويانا أكيد دام ما حصله ..

الشرطي : انزين خذو السايد اليمين الشرطي هنااك بيرمسكم ..

ملاك ترمس الشرطي : اكتب مخالفه وخلااص .. يلا فكنا .. ورانا كليه ..

الشرطي يطالع ملاك باستحقار .. ويكتب المخالفه .. ملاك تطالع بدور وتبتسم .. وترد تطالع برع من طرف عينها ..

الشرطي يعطي المخالفه لـ عمران ويقول : سددوها بأقرب وقت ..

عمران يحرك السياره .. ملاك تقول : عمراان وين الملكيه ..؟؟

عمران : سياره مال انتي هاداك اليوم بابا مايد في يروح وياها ابوظبي .. يمكن طلع ملكيه ..

ملااك : صاار خير ..

بدور : زين سويتي فيه ..

ملاك تبتسم ابتسامه شيطانيه : لا يغرج ترا الشرطه يرمسون باحتراام مافي شرطي يرمس بهـالأسلوب..

بدور : وهذا لييش يتكلم بهالأسلوب ..؟؟

ملاك : ما عرفتيه ...؟؟

بدور : لأأأ ما عرفته ..

ملاك : هذا حميد مباارك الـ .................

بدور تفتح عيونها : ولد عمج .......؟؟

ملاك : هي .. وعلى فكره اهو مب مفتش .. ملاازم بس يوم شاف سيارتنا يااه صوبنا ..

بدور : صج ما يستحي ..

ملاك : ع بااله بشيله على رااسي .. ما درا لا هو ولا عشره أمثااله ييبون رااسي ..

بدور تضحك : والنعم ... ( تطالع عمران وتقول ) شو أخر فلم هندي ناازل ..

عمران يهز راسه : ما في يأرف .. أنا ما يرووه سينما ..

بدور : يتني فكره ...

ملاك تلف وتبتسم : وش هي فكرته بعد هههههه

بدور : نروح السينما اليوم بليل ونااخذ ويانا عمران ونلبسه كندوره ونخليه يودينا ..

ملاك ضحكت وقاالت : ههههه عنلاااتج ..

بدور : ترا والله من صدقي ..

ملاك تضحك : بنشوووف عقب بنرمس البنات ..

عمران يشق الحلج : تودوني سينما ..

ملاك تضحك : الا هو ثلاااثين درهم تذكرة الدخول .. سير بأي وقت روحك ..

عمران : مافي يعرف كيف يدخل ..

ملاك : هي عااد هذي حاله ثااانيه ههههه

بدور : جد عجبتني الفكره .. ناخذه معانا ..

ملاك : عاد لاازم ندش نشوف فلم هندي ..

بدور : ايـــه حلاته الهندي لو كان أكشن ..

ملاك تضحك : ويدي ماال أول ..

بدور : دخلت أمس ع موقع القرااند سينما وقعدت اشوووف شو من افلام هالأسبوع ..

ملاك : عسا طلعتي بشي زين ..؟؟

بدور : اهوه مو زين زين .. بس في فلم هندي اسمه شابيت .. عاد رحت يمين ويساار لما عرفت اسم البطله كايا والبطل أمان ..

ملاك : اساامي عجيبه هههه

بدور : سمي عيالج خخخخ

ملاك : سيري لاااه هههه

بدور : بس شكله الفلم روعه .. لأنه رعب ويتكلم عن اللعنه اللي تحل ع العايله ..

ملاك : بنشوووف اذا بنظهر اليوم ولا لأ ..

بدور : وترا الفلم غير يعني .. مقلدين الأجانب مش مثل الأفلاام الباقيه .. يطلع شرير ويااخذ البطله .. لا هذا شي مثل .....................

ملاك تقاطعها : عرفنا أكشن ههههه ..

بدور : بس المشكله ان الفلم بااجر ..

ملاك : هي باجر بنروح من قال اليوم .. اصلا اليوم الأربعا يالذكيه ..

بدور : هي صح كيف راحت عن بااالي ..

ملاك : ياربي متى ايي باجر ونتيمع شرات العالم والناس لا هم دراسه ولا كليه ..
/
.
/
دخل الشركه وكله هيبه .. شااف الموظفين وقاال : السلام عليكم ..

الكل وقف وقال : وعليكم السلام ..

مايد قال للسكرتير: يوسف ارسل بو سالم مكتبي ..

يوسف : طال عمرك بو سالم بعده ما يا ..

مايد يعقد حياته : خير فيه شي ..

يوسف : ما أدري والله طال عمرك ..

مايد : انزين شكرا .. بس لا يا قول له يدش مكتبي

يوسف : انشالله ..

مايد دخل مكتبه .. ورااح للمكتب ويلس .. ما عصب ليش بو سالم متأخر لأنه بوسالم يعتبر مثل الوالد وكبير فالسن .. ومايد يشاروه ببعض الأشغال في الشركه ..

ثواني الا والباب يندق .. مايد : ادخل ...

يدخل يوسف ويقول : طال عمرك الأستاذ بوسالم يا ..

مايد : دخله المكتب ..

يوسف : انشالله .. تبغي شي ثااني طال عمرك ..

مايد : لا شكرا ..

يطلع يوسف وثواني الا ويدش بو سالم .. بو سالم ابتسم وقاال : صباح الخير ..

مايد وقف ورااح يبوس راسه : صباح النور عمي ..

بو سالم يروح للكرسي ويقعد ويقول : اش حالك ولدي ..

مايد : بخير الحمدلله ومن صوبك عمي ..؟؟

بوسالم : بخير ولدي .. اسمح لي عاد تأخرت ..

مايد : مسموح وبالحل .. الشركه شركتك وتامر وتنهي ع كيفك ..

بو سالم : تسلم ولدي اصيل والله على أبوك ..

مايد : الله يرحمه ويغمد روحه الجنه ..

بوسالم : آمييين ..

مايد : خير عمي انت متصل بي امس الساعه عشر بليل وأنا كنت راقد ..

بو سالم : كل خير يا ولدي ..

مايد : شو السالفه عاد عمي ..

بوسالم : ولدي بغيت اقول لك اني اسبوعين ما بيي الشركه ..

مايد مستغرب : اسبوعين .............؟؟

بوسالم : اسمح لي عااد ..

مايد : مسموح عمي .. الشغل براايه .. بس صااير شي عندكم .. سالم ولا سعاد صاار بهم شي ..

بو سالم : لا ما فيهم الا كل خير .. بس بنتي سعاد بتتزوج انشالله ..

مايد انصدم من كلام بو سالم بس اخفى ملامح الحزن وقاال : سعاد .............؟؟

بو سالم ابتسم : هي أختك سعاد بتتزوج انشالله .. تبي تشتري أغرااض لعرسها والعرس انشالله بيكون قريب بعدنا ما حددناه..

مايد حس بضيج .. ابتسم وقاال : ع البركه عمي ..

بوسالم : الله يبارك في حياتك يا ولدي .. عقبالك ..

مايد ابتسم بحزن وقاال : ما أظن انني بتزوج عمي ..

بوسالم مستغرب : ولييش يا ولدي ..

مايد تمالك أعصابه وقاال : امزح عمي .. بس أنا وين والزواج وين .. الشغل مب مخلي فيني خير ..

بو سالم : هي .. وترا الزواج يعني انك تكمل نص دينك .. تزوج أحسن لك ههههه

مايد : لا عمي كل شي بوقته حلو ..

بوسالم يمزح : بااجر بيبيض شعر راسك وبتتحسف و بتقول عمي بو سالم قال لي .. هههه

مايد يضحك : هههه لا بتزوج قبل انشالله ..

بوسالم : يلا عيل ولدي سعاد وسالم فالسياره يتريوني بوديهم ويااي السوق ..

مايد : عمي ارتاح انت بطرش الدريول ..

بوسالم : سعاد تقول الا أختار لها أشيا ع ذوقي ههه .. عاد تعرف البنات انت ..

مايد يضحك : هههه .. عمي لو قاصركم شي ولا شي .. خبروني أنا حاضر وأنا بمثابة ولدك ..

بوسالم : لا ولدي الحمدلله كل شي متوفر ..

مايد : سلوم ويااك ..؟؟

بوسالم : هي هذا أبد ما يفارقني ..

مايد : عيد ميلاده بعد شهر ...؟؟

بو سالم : هي هههه بيدش ثلتعش سنه ..

مايد : غريبه اليوم غاايب عن المدرسه ..

بوسالم : مريض شوي .. وخذيت له غياب ..

مايد : الله يشفيه انشالله ..

بوسالم : يلا عاد ولدي بسـتأذن أنا

مايد : تو الناس عمي ماشربت لا جااي ولا اقهوى ..؟؟

بوسالم : العيال في السياره ولدي

مايد : عيل الله وياك ..

بوسالم : مع السلامه

مايد : مع السلامه عمي

بعد ما يظهر بو سالم مايد يفتح المعاقم مال الكندوره ويرجع راسه لورا الكرسي ويااخذ نفس طويـــل ..... ويقول في خاطره .. راااحت راااااااحــــــــــت اللي كنت أتمناها .. راحت اللي كنت أحلم فيها .. خـــلاص يا مايد مالك أحد في هالدنيا .. قلت يمكن هذيل بيصيرون عيلتك بس للأسف خذوها عنك .. خذوووها ياماايد .. بس لأأأأ سعاد لي أنا .. هي سعاد لي .. من وأنا صغير كنت أحلم فيها .. لا يمكن أخلي غيري ياخذها .. وبنشوووف هالأسبوع شو بيصير ..؟؟ والله لأخليــه يندم اللي فكر فيها مجرد تفكير مب بس اللي بيلمسها .. والبادي أظلم .. بنشوووف يا سعاد بتكونين لـ مين ..؟؟

يندق الباب ويدخل يوسف : طاالع عمرك في أوراق يبونك توقع عليها ..

مايد يرفع راسه ويقول بعصبيه : ماباا أوقـــع ....... أجل كل شي ..

يوسف ينزل راسه ويقول : بس طال عمـــــــرك ..........................

مايد يقاطعه بعصبيه : قلت لك مابــــــــــــــــا أوقع ..

يوسف ينزل راسه ويظهر .. عرف انه مايد لا يمكن بيسوي شي في شي مضايجه يعني اليوم الله يعين الموظفين وكافة الشركه .. لأنه مايد أعصاابه لما تضرب ما يعرف شو يسوي ..

مايد لف نظره شااف التلفون يرن .. ضغط على زر الاغلااق وقاال : الله يلعنها من ساااعه ..

سحب درج الطاوله وطلع سيجاه وولعها .. وبدا يدخن .. شفط كميه كبيره ترييا .. وطلع كمية دخان أكبر بسرعه اللي يشوفه يعرف انه معصب ..

قال بشيطانيه : بنشوووف يا سعاد انتي لـ من ...؟؟
............................
دخلت الكليه وهي تمشي بغنج ودلال .. شافت البنات من ظرف عينها .. هذا طبعها .. تجدمت عن الكرسي وفرت الدفتر ويلست ..

بدور يايه وهي تمشي بطريقة ممثل عجبتها مشيته فالمسلسل أمس .. وابتسمت لـ ملاك .. قالت : اش رااايج ..؟؟

ملاك تضحك : جنج الا بقره تمشي .. هاااع ..

بدور تمد بوزها : مووووولت .. اصلا انتي ما تعرفين ..

ملاك : شو هالمشيه .. تقولين ناقه ههه

بدور : هذي سواها أمس الممثل الأجنبي فالفلم ..

ملاك : قولي من اول متأثره ..

بدور تقعد يمب ملاك : تصدقين ............................

ملاك تقاطعها : أدري أدري .. ما طالعت الفلم ولا أعرفه ..

بدور : بس والله عجيب ههههه ليييش انتي جذي ..

ملاك : أنا لا مع التلفزيون ولا مع النت .. وااقعيه ياماما هههه

بدور : بس أفلام ما يخاالف يا ماما هههههه

ملاك : ماأحب شي اسمه افلام مسلسلات شو ماشي شغل .. اصلا من صغيره متعوده ما اشوف ..

بدور : بصراحه .. انتو على كثر فلوسكم بس تربيتكم غريبه تصدقين ..

ملاك تضحك : ولييش انشالله ..؟؟ ههههه

بدور : عندج تلفزيون بالحجره .. وعندج لاب توب وجهاز حتى البلاك بيري بعد بس بعد ما تقربين صوبهم ..

ملاك : شفتي كيف هههه

بدور : بس لااحظت هالشي عند وااايد نااس ..

ملاك : ما قمت أدش النت واايد الا يوم ابا شي .. أخذه .. واطلع خلااص ..

بدور : بس المسلسلات والأفلاام .....................

ملاك تقاطعها : بدريه سكتي .. ههههههه ما أحب والله ما أحب ..

بدور تطالعها بطرف عينها : بدريه بعينج هههه

ملاك : هكو قووم نور وشوق وصلن ..

شوق تمشي .. واحد اثنين وتتدور .. وتبتسم مع غمازتها .. والكل يطالع صوبها ..

بدور توقف وتقول : وااحد اثنين ..

نور بهمس لشوق : استحي ع وجهك فضحتينا ..

شوق بصوت عالي : وأنا اش لي فيهم .. مو بس كليتهم .. حتى نحن لنا رب ..

ملاك تطالع بعيد .. وتقول بصوت وااطي : أنا ما أعرفها صدقوني ما أعرفها ..

بدور تدز ملاك : اش فيج .. ترا عاادي ..

شوق تركض وتيي صوب البناات : اوبـــــــــــــــــــــــــــــــــــــس ..

ملاك : اعقلي يا حرمه ..

شوق تقلد ملاك ( ترمس اماراتي ) : ياريااله ودري هالسوالف صيري شرااتي ..

ملاك تضحك : مرررره هب رااكب ..

نور : السلام عليكم ..

ملاك : وعليكم السلام هلا نواري ..

نور : كيفكم ..؟؟

بدور وملاك : بخير وانتي ..؟؟

نور : الحمدلله .. ( تضرب شوق بخفه ) وجع فضحتينا ..

شوق : اش سويت يعني .. لا هو حرام ولاهو عيب ..

نور : بلا عيب ..

شوق : لأأأ ماهو عيب ..

ملاك : خلاااااااااااااص بنااات .. وشوقاني بلاها هالحركات ..

شوق : أدري .. بتقولون .. شلتنا معروفه بالبرستيج والاتيكيت وووووووووووو ... تراني والله تعبت من هالرسميات ..

ملاك : ما يخالف سوي اللي تبين بس يدامنا ..

شوق : بس أنا طبعي هالشكل .. أحب أسوي حركاات

بدور : خلاااص .. يعني بتتضاربون ع سالفه ما تسوى ..

نور : ايه قفلو ع الموضوع لأني ابي أتكلم معاكم بشي ..

ملاك : خير انشالله ..

نور : لحظه البناات كلهم يجو .. بعدين ..

بدور : اتصلي اتصلي ..

شوق : ايه ملاكو اتصلي .. خل يييون ما فيني استحمل من أمس وهي باطه جبدي وما تتحجى .. شي مهم وشي مهم .. بيصيبني جنون البقر والسبه نوروووه ..

ملاك تضحك : هههه ابد ما يتوزين عن سوالفج .. الحين بتصل بـ روان واريج اشوف وينهن ..

شوق : ايه عجلي دخيلج..

ثواني الا واريج وروان يدخلن .. شوق بصوت عالي : ما بغيتو ...

نور تقرصها : اسكتي ..

بدور : تعالو بسرعه ..

ملاك : بدوروووه عن الفضاايح ..

روان تبتسم وتيي هي ومعاها اريج .. الين وصلن .. روان : هااااااااي قاااااااااااايز ..

بدور تسوي حركات أجانب : هااااااااااااي

نور بهمس : اسكتي ...

ملاك : فضيحه هذي وشوقاني ههههه

اريج : وأخيرررررررا وصلنا ..

نور : ايــه ما بغيتو ههههه

اريج : وش درااني .. اسألو هذي اللي جالسه تتسبج فالمسبح اليوم ..

روان ابتسمت : يعني فخااطري محد يقدر يمنعني .. ههههه

ملاك : انزين يلا نرووح الحديقه قبل لا تبتدا المحاضره ..

روان : ايـــه لأنه حدي أبي أعرف شـ اللي شااغل باال نور ..

نور تبتسم : يلا نروح الباارك ..

ملاك : ترييو شوي بقول للعامله تييب الريوق ..

شوق تتخصر : لا والله تشتغل عندج .. شيليه بروحج ..

ملاك : برستيجي ما يسمح لي ههه .. وبعدين دام تبين انتي شيليه ..هههه

شوق : لا لا خليها تييبه .. حتى أنا برستيجي ما يسمح لي .. هههه

بدور : تبوني أمط شعري .. يلا ع الباارك بسرررعه .. الفضول ذابحني ..

نور مبتسمه : يلا عشاان اخبركم ..
/
.
/
بو سالم : وين تبون تروحون بعد .........؟؟

سعاد مبتسمه : نبا نروح العربي سنتر بااخذ لي شوية شغلااات ...

سالم يمد بوزه : طاعو قاالت العربي سنتر ..

سعاد : هي .. ما فيني ارووح مكان ثااني ..

سالم : النااس تتزهب من أمااكن ثانيه ونااس من بلااد برع ..

سعاد : بس أنا ابا الشغلات منه ..

سالم : جاان تقولين دبي مول ..

سعاد : ما عندي فلووس واايد .. يوم تشتغل ييب لي وفالك طيب كل شي باخذه من دبي مول ..

بوسالم : عيب يا عيال وانت سالم .. لا تكلم أختك جذا ..

سالم : هي اللي تقهر .. تقول العربي سنتر .. ودنا مكان ثااني أبويه ..

سعاد : بس ميزانيتي ما تسمح ..

بو سالم : صج تقول أختك .. ويوم ثااني بطلعك مكان ثااني ..

سالم : تقولون بس ما تطلعوني ..

بو سالم : ماايد دوم يطلعك ..

سعاد من سمعت اسمه ملامحها تغيرت .. بو سالم قاال : مو صح سعااد ..؟؟

سعاد هزت راسها وبابتسامه باهته : صح ابويه ..

سالم : والله ميوود أحسن عنكم كل مكان يوديني ..

بو سالم : انزين اطلع ويااه وخلك ساكت الحين ههه ..

سالم : ملاك من زمان ما شفناها ..

سعاد عشان تنسى : هي صح ابويه ملااك من فتره ما يت عندنا ..

بو سالم : أكييد بتيي يوم بتدري انج انخطبتي ..

سعاد : هي خل تيي .. لأني عقب يمكن ما بشوفها ..

بو سالم : لا انشالله تشوفينها دوم ..

سعاد : انشالله ابويه

سالم : ملاك مستويه دبه ههههههههه

سعاد : قول جذا يدامها بتاكلك هههه قامت تسوي ريجيم قاسي أونها .. معنه جسمها واايد حلو ..

سالم : يوم بكبر بتزوج من وحده تشبه ملاك هههههههه

بو سالم : وقرر يتزوج الرياال هههه

سالم : احلم ابويه هههه

بوسالم : زين انك تعرف ههه .. اهتم بدراستك أحسن لك ..

سعاد سرحت بفكرها لـ بعيــــــــــــــــــد ... أحبج سعاااد أحبج ... سعاد أنا اباج زوجه لي .. كلام داار بيني وبين مايد قبل عدة سنوات .. قبل اربع سنين .. كان عمري وقتها ستعش سنه .. واهو كان عمره بالنسبه لي كبير .. كان وقتها عمره اربع وعشرين سنه ... قاال لي اوعديني ما تاخذين غيري .. بس أنا خنته .. واافقت على غيره .. غصب عني مجبوووره .. ايـــه مجبوره .. اشيا كثيره تصير بالحياه ونحن مب راضين عنها وغضب عنا نرضا ونتأقلم معاها .. لكن هذي الحياه .. يوم حلوه ويوم مره ولازم نعيشها بكل الحالات .. ~

وعاها من فكرها صوت ابوها وهو يقول : شو تشربين بنتي ...؟؟
/
.
/
ملاك ابتسمت وصرخت بأعلى صوتها : أووووووووووووه ماااااااااااااي جااااااااااااد ..

شوق : هيييييييييييييه متى صاار ..؟؟

البنات كلهن ابتسمن ... نور بدت تصيح ...... ملاااك مسكت نور وقاالت : اش فيج نواري ...؟؟؟

اريج : نوري حبيبي لييش الصيااح ..؟؟؟

نور تضم ويهها ليدينها : محد رااضي يفهمني ...

ملاك : دااامج حصلتي البعثه لييش تصيحين ...

نور : ما أقدر أترككم ...

بدور : بس مستقبلج أهم مننا يا نور ..

روان : ايــه انتي سافري وأنا بعد بكلم الوالد يسفرني ..

نور : أنا وانتي وملاك بنسافر .. بس شوق عندها أهل واريج ما تقدر تترك أمها وبدور أخوانها ما رضو انها تجي الامارات الا بعد اقنااع يعني بيخلوها تروح لألمانيا ..

شوق هزت راسها : ايــه من هالناحيه صح ..

ملاك : مستقبلج أهم عننا يا نور ..

نور : بس انتو حيااتي .. مقدر اترككم .. تعودت عليكم خلااص ..

روان : مثل ما تعودتي علينا تقدرين تنسينا .. وهذي دراستج ..

نور : بس أنا مابي .. ابي أقعد هنا وعندكم ..

بدور : سؤاال ...؟؟ الحين يوم انج بتسافرين بتستفيدين ..؟؟

نور : أيــه أكيييد .. بس أنا مابي اروح اتغرب أكثر من ما أنا متغربه ..

روان : لا تقولين جذي .. انتي بين أهلج نور ..

نور تصيح : أهلي وينهم عني تركوني لحالي وراحو ..

ملاك : لا تقولين جذي نور .. ونحن وين رحنا ..

اريج : خــلاااص لا تسافرين نور ..

نور : ايـــه ما بسافر ..

شوق : هيييييييييييييييييه .. يعني ما بنفترق ..

نور تمسح دموعها : لا انشالله ما نفترق ..

بدور تتراقص : هي وهي وهي ... شلتنا بتضل كامله الحمدلله هههههههه

نور تبتسم : أدري شفتي الحركه بفلم ههههههههه

البنات كلهن : ههههههههههههههههه

اريج تبتسم : يلا نروووح نااكل ..

روان : هذي من الصبح تبي تااكل .. يلا نااكل قبل لا تموت علينا ههه

نور : أنا كمان جوعانه ما فطرت بسبب هالموضوع ..

بدور : بااكل بيتزا اليوم هههه

نور : هاذي كمان شافتها بالمسلسل ههههه عشان كذا تبي تااكل بيتزا هههه

شوق : ايــه هههه .. أنا ودي أتريق مره ثاانيه .. شوي وبنفجر ههههه

ملاك : يلا قمنا عيل يا حلوووات لأني أنا بعد ميته يوووع هههه

اريج تسحب الكرسي وتييبه للطاوله وتقعد .. : أنا حجزت لي مقعد ..

بدور : وأنا بعد ..

روان : يلا الكل يسحب له كرسي عشان نكون مع بعض ..

ملااك : هي انتي ... انتي ................................

العامله تبتسم : وااات ..

ملاك : تعاالي خذي الكام وصورينا هههه

العامله ما صدقت .. ملاك عطتها الكام وقاالت : اضغطي على هذا الزر ..

العامله صورتهم وكل وحده معها سكينه وشوكه واللي معاها الكابتشينو واللي الكرواسون ........... الــــــــــــخ

بعد التصوير .. روان : يلا اكلو بسرررعه لا تبدا المحاضره ههههههه

شوق : ايــه ما فيني بطني يصوصو بعد اليوم ههههه

بدور : فاضحتنا شوق .. اربع وعشرين ساعه بطنها يصوصو .. كله يوعانه هههه

شوق : شسوي ربج خلقني جذي هههه

اريج : سمو وكلو .. لأني ميته جوووع ..
/
.
/
الساعه ثنتين الظهر .. الكل في بيته ما عدا ... الـ 666666666666666666

مايد دخل الفله وهو هلكان وأعصابه بروحها ضاربه .. ما يقدر يستوعب أي شي أكثر .. اللي فيه مكفيه ..

دخل الصاله وقاال : السلام عليكم ..

فاطمه : وعليكم السلام ولدي ..

مايد حبها ع راسها وقاال : بروح برقد أمي ..

فاطمه : ما بتاكل ولدي ..

مايد : لا أمي .. هب مشتهي .. بروح برقد وبتغدا العصر ..

فاطمه : ع رااحتك وليدي ..

مايد : وينها ملااك ..؟؟

فاطمه : مع ربيعاتها برع .. بتتغدا في المول ع قولتها ..

مايد : أووووف ..

فاطمه استغربت ليييش سوا جذي .. مايد ما يعصب على ملااك لأنه هم أصلا تربيتهم كانت جذي .. كل وااحد يمشي بشوره .. غير انه ماايد يعرف ربيعات ملاك ..

فاطمه : ولدي صااير شي ..

مايد هز راسه وقاال : لا مب صااير شي ..

فاطمه : تعباان ..؟؟

مايد : لا .. لا تحاتين أمي ..

مايد صعد ع الدري ورااح لحجرته ... فر الغتره والعقاال ع السرير ورمى روحه .. تنهد .. وقاال : الله يلعن الساعه اللي افترقنا فيها .. بس والله براااويج .. ان محد يستحقج غيري ..

رن تلفون ماايد .. بدون ما يطاالعه .. قفل في ويه اللي يتصل فيه ... ثواني الا ويرجع التلفون يرن .. مايد يطالع التلفون ويرميه بعصبيه ع الأرض ويقول : مب ناااااااااقصنك انت الثااني ..
/
.
/
قاعدين يتغدون ...

حمدان : بابا بتوديني كتر ..

معضد يضحك : هي بوديك بس لا تزعل ..

حمدان : هي عشاان بدور لاااحت كتر وبعدها ما رجعت ..

معضد يعقد حياته ويقول : ميره ..

ميره من المطبخ : هلا معضد ..

معضد : تعاالي ...

ميره : لحظه بس اييب المااي ..

معضد : أوكي بسررعه ..

ميره تطلع ومعاها الأكواب والمااي وتحطهم وتيلس .. وتطلع لـ معضد وحمدان فالصحون ..

معضد : بدور ما رجعت ..؟؟

ميره : لا بعدها ..

معضد : وينها ..؟؟

ميره : مع رفيجاتها بتتغدى برع ..

معضد مستغرب : وكيف تخلينها ..؟؟

ميره : يعني يوميا ع نفس الموال .. يا معضد البنيه مع رفيجاتها ما فيها شي ...

معضد : بس مو حلوه كل يوم البنيه محد .. وما ترجع الا ع اذان العشا .. تراها بنيه فكري بهالشي .. حتى الأولاد يرجعون الظهر ..

ميره : ما يصير الا كل خير .. والحمدلله الدنيا أمان عاد مو لذيج الدرجه ضاايعه ..

معضد : بنشوووف شو أخرتها ..

ميره تبتسم : اكل انت اكل .. لا تشيل هم ..

معضد : بسم الله ..

ميره : وانت حمداانوه اكل ..

حمدان : بتودوني كتر ...؟؟

معضد يضحك : بنوديك يا بابا بنوديك .. بس انت كل ..

حمدان : قولو والله بتودوني بااكل كل هالأكل ..

ميره تضحك : جااااان زين والله .. هههههه
/
.
/
في مول الامارات وتحديدا ردهة المطاعم .. البناات يالسات ثلااث يدااام ثلاااث ..

ملاااك : والله هالبيتزا شي شي بمعنى الكلمه ..

روان : ايــه تراكم يوميا طالبين لي من ماكدونالدز .. خلونا نغير ..

شوق : أحس روحي بمتن والسبب انتو ههههه

بدور : ايـــه يوميا جانك فود .. أخر شي بنصير بو تمبه وما نقدر ندخل من بااب المول بعد هههه

نور : الحمدلله شبعت ...

ملاك : توج يا حرمه .. ما كليتي شي ..

نور : لا أكلت كثير .. يلا شوق نرجع البيت ..

شوق : بااكل بعد ..

نور : هههه يا شيخه كليتي الصحن كلو يلا قومي .. عمي بيتصل فينا بعد شويه ..

شوق وهي ماسكه قطعة البيتزا : يلا سي يا بنااات ..

البنات : سي يووو ...



إڷـےٍ آڷلْقٍــآءْ فٍـےٍٍٍ آڷحًـڷقْهٍـ آڷقًــآدٍمْـهٍـ ..


الرد باقتباس
  {[ وَإِذْ تَأَذَّنَ رَبُّكُمْ لَئِن شَكَرْتُمْ لأَزِيدَنَّكُمْ وَلَئِن كَفَرْتُمْ إِنَّ عَذَابِي لَشَدِيدٌ - إلهي لكـ الحمد والشكر نستغفركـ ياعفو ياغفور ]} 10
قديم(ـة) 20-07-2010, 11:28 PM
ملامح أنثى ملامح أنثى غير متصل
عضو موقوف من الإداره
 
الافتراضي رد: خــــــليـــــــــــــجـــــــيات في الإمـــــــــــــــارات ../ للكاتبه يتــيمة زايــد


ثانكيو .. ياحلوه

دحين باقراء البارت

الرد باقتباس
إضافة رد

خليجيات في الإمارات / الكاتبة : يتيمة زايد ، كاملة

الوسوم
رواية روعه
أدوات الموضوع
طريقة العرض
مواضيع مشابهة
الموضوع الكاتب المنتدى الردود آخر مشاركة
روايتي الأولى : أبي أنام بحضنك و أصحيك بنص الليل و أقول ما كفاني حضنك ضمني لك حيل / كاملة ازهار الليل روايات كامله - يتم نقل الرواية هنا بعد اكتمالها 6838 08-08-2019 05:51 AM
قصة جبتها ع الجرح / الكاتبة : أمنيه حنيني ، كاملة بنت سمهرم روايات كامله - يتم نقل الرواية هنا بعد اكتمالها 58 23-07-2017 08:34 PM
رواية تؤام روحي تعاني جروحي / الكاتبة : كحيله بكاها ، كاملة تؤام روحي تداوي جروحي روايات كامله - يتم نقل الرواية هنا بعد اكتمالها 122 31-12-2015 07:45 AM
و اني أحبك / الكاتبة : امازيغية الهوى ، كاملة النجمة القطبية روايات كامله - يتم نقل الرواية هنا بعد اكتمالها 76 28-07-2013 11:12 PM

الساعة الآن +3: 02:25 AM.
موقع غرام موقع سعودي خليجي عربي يحترم كافة الطوائف والأديان ومختلف الجنسيات


youtube

SEO by vBSEO 3.6.1