منتديات غرام

منتديات غرام (/)
-   أرشيف الروايات المغلقة - لعدم إكتمالها (https://forums.graaam.com/157/)
-   -   أهل عز في دنيا الخيانة / بقلمي (https://forums.graaam.com/328902.html)

rmad.ro7 31-07-2010 09:47 PM

أهل عز في دنيا الخيانة / بقلمي
 


بسم الله الرحمن الرحيم




راح ابتدي و اسرد لكم بعض من تفاصيل حياتي .. بس اتمنى تفهموني وتدعون لي بظهر الغيب والله محتاجه دعواتكم لي ...
طبعا كتبت الحروف بنفسي .. اسلوبي سهل وبسيط بس الشخصيات شكلها كثيره شوي .. ان شاء الله تستووعبون معي ..
شخصيتي وهميه .. من البدايه حتى النهايه يتخللها بعد من الواقعيه ..
راح يكون موضح لكم الاوقات اللي بدديت اكتب فيها ..









انا ميرال عمري 19 سنه .. متخرجه من الثانوي .. الثالثه بين اخواني والثانيه من البنات .. عندي اخت و اخ اكبر مني ف الجامعه واخت اصغر مني ف الابتدائي .. قصتي ابتدت قبل كم سنه لما تخرجت من احد السنوات الدراسيه .. وطبعا ك عادتي انجح بالترفيع .. مو عيب فيني لكن فسقه .. ذيك السنه محد توقع اني انجح .. جابوا لي مدرسات .. وحده داخله والثانيه طالعه .. وانا اسولف معهم واسلك لهم .. ماكنت احب الدراسه .. مع اني كنت مدلله لاخر حد والوحيده بين اخواني اللي ابوي يوصلني بنفسه للمدرسه .. طبعا ابوي متزوج قبل امي وعنده 7 بنات و ولد .. ماعلينا .. مره كنت مع ابوي ف السياره رايحن للزفت المدرسه وكان يلقي محاضرته المعتاده .. شدي حيلك و ادرسي عشان تنجحين ........الخ .. حسيت فيه مستبعد نجاحي .. وقتها لمعت في راسي فكره وقلت ..



ميرال / طيب اذا نجحت تجيب لي لابتوب؟
ابوي / انجحي ويصير خير اجيب لك اللي تبين ..
ميرال / خلاص اعتبرني من الحين ناجحه ..



ونزلت لانو وصلنا .. المهم بدت الاختبارات وانا مطنشه .. بس قبل انام اقرا الكتاب واحفظ كم معلومه وعليها للصباح .. كنت سريعه الحفظ و ذكيه وهالشغلات تخدمني .. جت الاختبارات وخلصت .. طلعت نتيجتي ناجحه بس ك العاده مرفعه .. المهم اني نجحت واللاب ينتظرني ..



ميرال / يبه وين اللاب اللي قلت لي؟ .. تراني ناجحه
ابوي / وانا عند وعدي بس قلت لاخوك وللحين ما رد لي
ميرال / خذ هذي 3 الاف قيمة اللاب بس بسرعه يبه مليت ترا ..
ابوي / رجعي فلوسك انا ماقصرت عليك بشي ولا محتاجها
ميرال / لا يبه انا ابي احس ان لي حاجه بفلوسي وانت الله يطولي بعمرك ماتقصر
ابوي / خير ان شاء الله ..



فعلا بعد كم اسبوع جاني اللاب بس بعد الموت .. لان اخوي العزيز يومه سنه .. ولا جابه الا بعد ما هاوشه ابوي .. اخذت اللاب وبديت احوس فيه وكان بكره خالتي جاين عندنا الرياض لان بعده فيه زواج ولازم نحضره .. الكلام هذا كان المغرب اخذت التليفون ودقيت على بيت اخوي ...



ميرال / الووووووو ..
الشغاله / نئم ..
ميرال / وين البنات؟
الشغاله / هدا مافي ماما روه وبنت فيه نوم
ميرال / روحي قومي تهاني وقولي لها تدق على عمه ميرال زين
الشغاله / اوكي مام ..



" تهاني هذي بنت اخوي ريان .. اخر العنقود زي مابيقولو .. عمرها 15 سنه ثالث متوسط .. قبلها اخ و اخت كلهم ف الجامعه .. ذكيه ونبيهه بس احيان احس انها بزر .. كثير تشبه اختي ميار في شخصيتها "



مدري وش احس فيه وانا اقول عمه المهم كنت مستعجله وابيها ضروري .. قفلت من الشغاله واخذت جوالي كان وقت الدمعه الله يذكره بالخير .. دقيت على اخت بنت خالتي " اختها من ابوها " بنت خالتي تعرف بس تقلق ليه ومالي دخل ومدري وش المهم ..



ميرال / هااااي يا عسسل كيفك؟
بيشو / اهلين هلا وغلا تمام يا قمر كيفك انتي ..
ميرال / بخير ربي يسلمك .. المهم اسمعيني .. انا شريت لاب وابي احمل المسن كيف؟
بيشو / مبروووووك يا الدباااا .. زين ادخلي قوقو بعدين منتديات " ......" سوي بحث عن المسن وحمليه .. بعدها اعادة تشغيل .. بس يبقى لك ايميل عشان تشتغلين ع المسن ..
ميرال / ايه مو مشكل بنت اخوي اليوم تصلح لي ولا يهمك ..
بيشو / ههههههه يا الشيطانه مصلحه وضعك .. خلاص حملي وشوفي اذا ما صلح دقي علي ..
ميرال / اوكي باااااي
بيشو / بايااااات ..



" بيشو هذي اخت خلود بنت خالتي .. اكبر مني ب ثلاث سنين .. باقي لها سنه لها بالكليه والغريب انها تدرس دين .. اكبر اخوانها.. وبعدها اخو واحدفي ثالث ثانوي "



عملت اللي قالت وضبط معي و اموري تمام .. ارسلت لبنت اخوي مسج ..



" اهلين يا زفت ليه ما تردين اقرفتني شغالتكم .. المهم صلحي لي ايميل بسرعه ابيه اليوم .. انتظرك "



تم الارسال وتركت الجوال .. بديت ادخل قوقل و احوس بالمنتديات .. اللي قهرني اغلبها يبي تسجيل بايميل وانا ماعندي .. سويت اضافه للمفضله وقفلت اللاب وفتحت التلفزيون .. جت على الساعه 12 الزفته توها ترد لي المسج ..





" اهلين عمه وش اخبارك؟ .. معليش بس كنت نايمه .. سمي هذا الايميل .. " r o 7 @msn.com ....... " الباس " .......... " السموحه كان تأخرت عليك .. انا بسوي لك اضافه اقبليها هذا ايميلي miss........@hotmail.com "




طارت عيوني من الوناسه رجعت لبست نظارتي " كنت البسها وقت ما اتابع التلفزيون واشتغل على اللاب " .. فتحت اللاب دخلت المسن وبديت اكتب البيانات .. سجل دخول وحصلت اضافه قبلتها وجالست متنحه ساعه خبركم قرويه ما اعرف شي .. مادريت بسم الله الا ذا اللي نطت علي ..




استغفر الله العظيم واتوب اليه :
ولكمووووووووو
انا :
هاه .. هلا .. من انتي؟
استغفر الله العظيم .... :
هههههههههه يا حليلك انا تهاني وش فيك
انا :
مدري عنك هبلتيني يا حماره وش عرفني انا نسيت
استغفر الله ....... :
ههههههههههههه طيب ماعليه .. شوفي برسلك ايميلات خواتي وانتي ضيفيهم لاني ما ادخل كثير ..
انا :
وشلون اضيفهم بس علميني ما اعرف
استغفر الله العظيم ...... :
سهله يا عمه .. طيب شوفي فوق يمين فيه ..............الخ ..




بدت تشرح لي كيف اضيف وكيف اعمل توبيك وكيف يعني حوسات كثيره .. سويت الاضافات وحطيت ظهور دون اتصال " بدينا الخباثه هع " .. ارسلت ل بيشو ايميلي بالجوال .. شوي الا هي ضايفتني .. قبلت وجلسنا نسولف .. مادريت الا بنات خالتي مسوين اضافات وفليناها ..



دخلت المنتديات وسجلت وحطيت ايميلي تحت في التوقيع .. خبركم كنت بزر وطايشه .. ولا لو تعرفون بس لقبي .. والله انه مفارقني هههههههه .. المهم دخلت منتدى غير الباقي كان رسمي اكثر .. سجلت ب أسم رسمي و محترم حتى انه قوي .. بس ماربي فكني من الايميل اللي بالتوقيع .. لفيت شوي مع كم مشاركه بعدين دخت .. قفلت النت و رحت انام ..



دخلت بكره المنتدى الرسمي .. لقيت رساله خاصه !



ميرال / ياحبيبي بدينا بالتميلح من اولها .. والله اني قويه من اولها مشرف وانا امس مسجله .. يلا رزق المهبل على المجانين ..



بصراحه الرجال كان محترم لابعد حد ولا قال شي كل الموضوع انه ينبهني بخصوص الايميل .. شلته ولا رديت ع الخاص .. بس الولد دخل مزاجي مدري ليه بس كذا ! .. حتى اني مابحثت عن مواضيعه ولا شي .. بس طلعت من المنتدى وهو في بالي .. فتحت لي على روايه وجلست اقرا فيها .. لحد ما وصلت خالتي وبناتها ..



قفلت اللاب ورحت افتح الباب بعد مادقت علي خالتي .. تغدينا وبعد العصر طلعنا للسوق ناخذ باقي الكماليات .. رجعنا ودقيت للكوفيره ااكد عليها لا تنكبنا و اروح فيها بكره .. صلحت اموري جلسنا نسولف ونضحك لين 1 .. بعدها الكل راح ينام .. دخلت انا وبنت خالتي الغرفه .. فتحت اللاب وهي راحت الحمام الله يكرمكم .. استغليت الفرصه ودخلت المنتدى الرسمي شيكت على الخاص ماحصلت شي .. والله اني غبيه .. يعني اي رساله اللي انتظرها بس؟ ..



دخلت قسم شاعر المليون و رديت على كم موضوع .. دخلت القسم العام ورديت شوي الا بنت خالتي طالعه .. قفلت المنتدى بسرعه وجلست اطالع الشاشه فاضيه ! " هذا اللي يسوي الغلط خواف " .. سولفنا للفجر صلينا ونمنا ..



جا بكره صحيت بدري ونزلت تحت لقيت امي وخالتي قهوه وفطور حاجه تفتح النفس .. جلست معهم للظهر قامت اختي ..




" اختي ميار عمرها 21 .. تدرس في جامعة الملك سعود.. هاديه شوي وذكيه تحب تصلح الالكترونيات .. عشقها التلفزيون ماتحب الطلعات ابد دايما مع امي ف البيت "




ميار / خير انتي اخيرا نزلتي من شريتي اللاب ماشفناك
ميرال / بعد قلبي اختي مشتاقه لي ادري .. بس وش اسوي اشغال يالغاليه مافضيت .. حتى الحين بطلع اجهز فستاني واتحمم .. بدك شي؟
ميار / ياربي لك الحمد مصدقه عمرك انتي .. فارقيني بس ولا يكثر
جتنا امي / ميرال روحي قومي خلود تغدوا ونامي لك شوي انتي امس مانمتي الا الفجر
ميرال / مافيني نوم يمه بروح اقوم بنت اختك .. الا خالتي وضحى متى تجي؟ .. ادق عليها ما ردت لي " والله من الكذب "
امي / مدري يمكن العصر لا تزعجيني بس ..
ميرال / والله حاله الناس هذي مدري كيف صايره ..




رحت اصحي خلود بنت خالتي و طيرت عقلي عشان تقوم اختنا ف الله على ما فتحت و افطرت جلست انا على النت ..




خلود تمدد يدينها / ميرال خلاص وش ذا النت 24 ساعه عليه مليت ترا
ميرال / روحي تحممي وانزلي ميار وامك تحت اجلسي معهم شوي بخلص واتحمم واجيك
خلود / لا يا شيخه مابي انزل لحالي افرضي شافني اخوك ولا ابوك؟
ميرال / من زين وجهك الحين .. ابوي شايب ما يفرق .. و رياض طالع ما يمك احد روحي بس ..
خلود / لا مابي ننزل مع بعض ولا مافيه
ميرال / طيري بس
خلود / الا متى تجي الكوفيره لا تسحب علينا بعد وناكلها
ميرال / شوفي جوالي على التسريحه دقي عليها شوفي وينها انا قلت لها اول العصر تجي لنا
خلود / اوووووووووكي ..




" خلود هذي اقرب بنات خالتي لي .. بنفس عمري كملت دراستها على جامعة الملك عبدالعزيز .. وتخصصها انجليزي لكن انتساب .. انسانه فرفوشه وماتحب تسكت ابد .. تعشق النوم بجنون اقدر اقول عنها لحوحه شوي انا وياها نفهم بعض بشكل لنا هاوايات مشتركه كثير "




انشغلت خلود و رجع الهدوووء ارتحت شوي .. دخلت منتدى شرقاوي عادي كله حوسه ترقيم ومغازل المدير براسه حمار .. كان فيه موضوع حلو اعجبني .. يعني يتكلم عن الاعجاب .. بالمشاهير او غيرهم يتكلم انو ليه ما ينفع نعبر عن اعجابنا باللي حولنا اذا كا بس كلام من بعيد .. المهم سويت له نسخ و نزلته في المنتدى الرسمي .. سكرت النت و رحت اتحمم خلود ك العاده ذا الزوله نامت ..




خلصت نشفت شعري وحطيت كريم على جسمي ورحت اقومها من جديد .. سمعت صراخ ميار اختي من تحت كانت تبي الجوال لانه مشترك بينا .. سحبت خلود مع يدها ونزلت اركض ..





ميرال / بس بس يا طول لسانك
ميار / كلي تبن لك يومين مختفيه فيه
ميرال / طيب طيب خلاص هذا هو عندك فكيني من لسانك
خالتي هند جت معها فستان خلود / يمه هذا اللي تبينه ولا الفيروزي؟
خلود يالله فتحت عيونها / لا ابي هذا نفس فستان يارا
ميرال / هههههههههههههههههههههه يا عمري انا بس
خلود طالعتني بنظره وهي نعسانه / كلي تبن ولا يكثر .. يماه وين راح طلال ابيه يودي فستاني للغسال
خالتي هند / مدري عنه طلع مع رجل خالتك من الصبح .. قولي ل رياض يوديه
ميرال / ههههههههههههههههه ايه طيب والله ما يعطيها وجه .. اصلا هو برا البيت من امس
امي / وانتي وش دراك غاطسه عن العالم كله .. رياض ما طلع الا من ربع ساعه راح يشوف الكيك اللي وصيتي عليه حضرتك
ميرال / ياااااااي من قدي والله اخيرا تكرم طويل العمر
خلود / طييييييييب وبعدين يعني من يودي فستاني
ميار / مالك الا مراد راعي الفزعات يوديه ويرجعه لك
ميرال / وعععع مرندا ذا يا طول لسانه .. واتحداك لو لقيتيه اهل ابوك ما يخلونه
امي / لا ماعليك تلقينه تونا الظهر وين يروحون .. ميار دقي عليه خليه يحي بس
ميار / ان شاء الله يمه
خلود حبت راس امي / الله لا يحرمني منك يا احلى خاله
ميرال / والله المصلحجيه
خلود / انتي انطمي مالك دخل فيني
ميرال / طيب خلاص هاه سكتنا .. الا تعالي جو اهل ابوك
خلود كشرت / وانا وش دراني عنهم يجون ولا ما يجون ماعليك من احد انتي خليك بحالك ولابك ازين لك
ميرال / يمه منك بسم الله علي خلاص خلاص طيب بسكت هفففففف
ميار / يلا خلود السواق عند الباب عطيه اغراضك خليه يلحق يوديها .. عشان ترجع لك بدري ..
خلود / بروح معه
خالتي هند / لا مافيه وين تروحين مع الظهر .. بعدين خالتك وضحى بتجي العصر انطقي
خلود طالعتني بملل كنها تقول ساعديني .. تدخلت وانا كاتمه ضحكتي على شكلها اللي يكسر الخاطر
ميرال / خالتي بروح اصلح حواجبي بعدين نجيب عصير ونرجع ما نتأخر شويات بس والله طفش ..
خالتي هند / يوووووه انتي وياها لا تزعجوني ماعلي منكم خلاص ..
خلود / يمه منك الحين ماعليك منا وقبل شوي كلتيني
خالتي هند / ايه ماتروحين لحالك وانتي ماتعرفين شي .. ولا معك جوال بعد
خلود / والله هذي مشكلتكم انتم ماطلعتوا لي جوال
ميرال / بس بس بس الجوال عندي واحنا رايحين اطلع لك واحد يلا بس مشينا ..



طلعت انا و خلود نلبس عباياتنا وناخذ شناطنا .. مريت على المطبخ وانا طالعه .. فتحت الثلاجه واخذت مويه ..



ميرال / يمه بروح المشغل انا و خلود شوي وارجعين تبين شي
امي / لا تتاخرين خالتك على وصول
ميرال / ايه طيب .. بااااااي ..




رحنا حطينا ثوب ميار عند مغاسل الرهدن .. بعدين رحنا لمشغل داليا .. قصيت شعري شوي درجته وصلحت حواجبي واظافري و خلود ركبت وصله ل شعرها لانه قصير وهي تبي تطلع نفس يارا اليوم " تحلم هع " .. بعدين مرينا المملكه لفينا شوي ورجعنا البيت .. واحنا ف الطريق دقيت على الكوفيره ماردت .. دقيت عليها ثانيه قالت شوي واجي .. وصلنا البيت لقيت خالتي وضحى جايه وكرشتها تسبقها .. جلسنا معها ضحك وفله .. ونسيت الكوفيره .. على المغرب دقت علي قالت افتحي الباب .. فتحت لها ودقيت للسواق يجيب فستان خلود ...




طلعتها فوق ف غرفه بين جنانحي انا و ميار .. كانوا ثنتين وحده شعر والثانيه مكياج .. بدت في بنت خالتي اللي كانت بشرتها حنطيه شوي صلحت مكياجها خلصت خلود .. وجا دوري كان فستاني ليموني فيه ورود فوشيه وفيروزيه مدري كيف اوصفه بس والله حلو " توهقت هع " صدق كان فخم حتى اكمامه طويله وقصتها واسعه وفتحت الصدر والظهر نفس الشي على جنب بس متعاكسه كان مخصر ومن تحت طويل .. حطت لي مكياج مناسب وصار وقت الشعر خلصت بس باقي ميار لان شعرها طويل شوي .. كنت جوعانه نزلت للمطبخ ادور حاجه اكلها لقيت اخوي رياض قدامي ...




اخوي رياض / خير خير وش ذا كله على وين ان شاء الله
ميرال / بروح للزواج اليوم اصلا كلنا بنروح
اخوي رياض / داري بس ليه المكياج هذا كله شوفي ميار ضبطت حالها
ميرال / كل واحد حر بحاله .. لاتصدعني تراني جوعانه بعد
اخوي رياض / يا ربي لك الحمد .. والله انك خبله لا تنسين الاذكار ولا مافي روحه
ميرال / ان شاء الله ..




" اخوي رياض عمره 24 يدرس ادارة اعمال باقي له سنه ونص خلود تسميه ابو 44 عقده معها حق والله احس انه معقد بحياته ..انسان رسمي وعملي كثير .. ابوي يعتمد عليه مره مع انه دلوع مامي .. يحب الكشخ بشكل غير طبيعي "



اخذت لي تمر و مويه وطلعت اشوف خلود .. لقيت امي ف الصاله تكوي عبايتها ...




ميرال / ها يمه وش رايك فيني؟ .. اهبل صح
امي / لا تنسين الاذكار ترا اذا جاك شي ما علي منك .. بعدين ترا مرت ابوك هناك ما ناقصنا مشاكل
ميرال / اللي ما يتعرض لي ما اقربه وانتي عارفتني .. انا رايحه اوسع صدري مالي شغل ف احد .. بس لا اشوفك مسلمه عليها ..
طلعت خالتي وضحى / مدري ليه ذا كله وش ناويه عليه؟
ميرال / ولا شي! بس انا كذا من يوم يومي وانا كشخه ومميزه ما احب اطلع عاديه مثل غيري .. يلا عن اذنكم بروح اشوف خلود ..
امي / الله يستر عليك و يحفضك
خالتي وضحى / شكل بنتك ناويه على شي الله يستر منها!
امي / ماعليكي هذا طبعها.. انتي بس لبسي ولدك خليه يروح مع الريجيل لا يروحون و يخلونه انا قلت ل رياض ينتبه له
خالتي وضحى / ان شاء الله ..




ميار كانت ف غرفة امي تصلح مكياجها وتستشور شعرها ملامحها ناعمه .. غير عني انا ملامحي حاده وجريئه اكثر .. مريت عليها
ميرال / هاه وش رايك فيني؟؟؟
ميار / والله انك مجنونه وش تبين فيهم؟ من زينهم عشان تكشخين لهم ! والله ماتستفيدين شي الا يحسدونك وبس
ميرال / لا ماعليك انتي كملي شغلك انا بروح اشوف خلود واجيب عبايتي .. تبين شي انتي؟
ميار / لا اخلصي انتي بس
ميرال / طيب طيب خلاص ..




دخلت على خلود وانصدمت فيها المكياج كان فاشل لابعد حد .. ملامحها طفوليه والكوفيره ماعرفت لها .. قلت لها تغسله وتصلحه من جديد راحت خلود و الكوفيره تتحلطم وقفت عليها اعلمها وش المطلوب بالضبط .. خلصت من خلود كان مكياجها هادي اكثر من قبل .. والشغل كله ف شعرها اللي خدمها طوله ...




عكسي انا اللي كان مكياجي فخم اكثر وشعري هادي كان مبروم من قدام بهدوء ونازل من تحت كيرلي خفيف .. حاولت تبرز حدت ملامحي و سعت عيوني بلونها الرمادي كان مكياج خليجي بحت والكحل السايل مع الروج الفوشي الصارخ .. فكرت البس عدسات فيروزيه .. بس الرمادي كان مميز اكثر ...



طلعت للصاله لقيت امي وخالاتي جالسين على القهوه .. وخالتي وضحى ترسم ل ميار كحلها ...




ميرال / يمممماه ابي البخور وين حطيتيه
خالتي هند / ماشاء الله تبارك الله لا اله الا الله .. بسم الله عليك يا خاله قريتي الاذاكر؟
ميرال / لا يا خاله تو الناس
خالتي هند / تعالي اقرا عليك شكل ماعندك نيه تقرين
ميرال / طيب يا خاله ابي البخور
امي / شوفي الشغاله حاطته ف الصاله تحت
ميرال / حلوووو ..




جلست عند خالتي وبدت تقرا علي .. شوي حسيت بنعاس وبديت اتثاوب .. ميرال / خلاص يا خاله ما اقدر اكمل .. قمت عنها بسرعه قبل تعترض ...





دخلت غرفتي وحطيته الكريم لبست شبشبي " الله يكرمكم " و رفعت ثوبي ل ركبي ونزلت ع الدرج اركض .. كان الدرج مفتوح على الصاله جيت انا داعسه شفت البخور على الطاوله ونسيت اللي حولي .. رفعت عيوني الا اطالع واحد جالس لابس ثوب ابيض معطيني ظهره .. شرقت انا من كثر البخور اللي مركز على خشمي وبديت اكح .. لف علي اللي معطيني ظهره وقال / صحه صحه بسم الله عليك وش جاك انتي ...




رفعت عيوني للسقف وبديت ارمش بعيوني لا تنزل دموعي ويخرب مكياجي .. جاني يركض رفع يديني ومشكها نزل ثوبي وغطى رجولي ابعد البخور ومسك وجهي ببين يديه / هي هي طالعيني هنا خلاص ..

ماكنت مستوعبه كلامه ابي اتنفس وبس .. رجع ثبت راسي بيديه اكثر وصرخ فيني

طلال / اقولك طالعيني هنا يا مجنونه وش فيك ..

طالعت عيونه كان متوتر وباين الخوف فيها ..




ابتسمت له / خلاص بعد عني لا يشوفك احد ويفضحني ..
تجاهلني وضم راسي ل صدره / بسم الله عليك يا الغاليه .. ما همني احد دامك بخير .. سكتنا شوي
قال بهمس / وش الحلى هذا كله .. لمين كاشخه ..
رفعت راسي وطالعته قلت بهمس هادي / لك يا غلاي
طلال تسارعت انفاسه / وربي انك مجنونه بعدي عني بس .. قفلت عيوني وعلى شفايفي ابتسامه / ليه مليت مني بسرعه كذا
طلال عصب / ميرال بعدي عني احسن لك .. تراها واصله معي
ميرال / ههههههههههه طيب خلاص هاه خلاص
ابعدت عنه ومسكت البخور قربته له و رفعت اطراف شماغه .. / تبخر تراني اعشقه على الرجال
طلال / طيب عطيني وابعدي عنه لا تموتين
ميرال / همست له ف اذنه وانا ابخر شماغه / يعني خايف علي حياتي
طلال / ميرال ابعدي ولا قسم بالله ماتطلعين مكان اليوم
ميرال فزت كنها مقروصه / لا مابي مكياجي يروح على الفاضي باي
طلال / ههههههههههههه تعالي يا الخبله عطي البخور جدتي اكيد انها حايسه مثلك تدوره
ميرال / خلاص حطه عندك اذا رحت اجي اخذته
طلال / بالله عليك توك كنتي ف حضني وش اللي صار
ميرال / خلاص ماعليك مني رح وانا اخذه بعدين
طلال / ههههههههههههه طيب طيب انا رايح



" طلال عمره 29 عسكري درجه اولى ماكنت اشوفه الا ف الاجازات .. انسان رومنسي وجذاب كثير جريء ولا يهمه احد.. شايل اهله بعد ماتطلقوا امه وابوه .. ابوي يعتبره من عياله وهو قريب من رياض حيل "



نزلت خلود تلعب ف شعرها والضحكه ما فارقتها ...




rmad.ro7 31-07-2010 10:01 PM

رد: اهل عز في دنيا الخيانه .. [ اول كتاباتي ] .. Rmad Ro7
 



[ 14 : 8 م ]




ميرال / صاحيه انتي تضحكين على خيبتك يا بعدي
خلود / وش فيك انتي علي .. ماسويت لك شي تراني
ميرال / تدرين ان اللي مركبته ف شعرك حرام " وجلستها تو مع طلال حلال يعني ! "
خلود / يوه لا تذكريني بكره بقصه بس الله يستر لا يدري طلال
ميرال / اي عاد اخوك ما عنده لعب على طول يذبحك
خلود / وش عرفك فيه انتي
ميرال / باين من عيونه
خلود / مدري ليه احس انه هنا عطره باقي منتشر ب المكان
ميرال / مافي احد يمكن كان مار و الا جالس هنا محد حولك الحين
خلود / ياليت الله يسمع منك عشان ما اروح وطي
ميرال / لا ماعليك انتي بس روحي جيبي المبخره والحقيني جدتي تبيه
خلود / ليه ماتجيبينه انتي .. اصلا وش مجلسك هنا؟
ميرال / ماعليك مني انا دايخه مافيني حيل امشي زود .. بطلع فوق عجلي
خلود / طيب طيب روحي انتي بس ماعليك ..





طلعت ل غرفتي حصلت عبايتي مرتبه مكويه و مجهزه .. مسكتها ف يدي وطلعت اشوف ميار وخالتي وضحى وهند وجدتي .. طلعت من غرفتي لقيتهم مجتمعين كلهم ينتظرون احد يجي ياخذنا للقاعه ..




ميرال / يمه جاهزين كلكم
امي / اي خلصتي انتي
ميرال / اكييييد بس من يوصلنا؟
خالتي هند / مافيه الا رياض ولا طلال .. نشوف من فاضي فيهم
ميرال " الله يستر " / اها طيب يلا اجل انا لابسه عبايتي و نازله تحت
الجده / خذيني معك يمه انا بعد خالصه مالي لزمه هنيا
ميرال / ان شاء الله يا جدتي .. ميار خالصه انتي؟
ميار / اي يلا خاله وضحى .. انتي انزلي من الجهه الثانيه .. امي و خالتي هند ينزلون شوي ..
خالتي وضحى / طيب ..




نزلت انا وجدتي تبخرنا وبخرت لها العباة وطلعنا الا طلال عند الباب ..



ميرال / حسبي الله عليك يا سكني ما يفوتك شي



سندت جدتي و وصلتها للباب جيت ابي افتحه سبقني طلال وصارت يدي على يده .. ابعدت يدي عنه بسرعه .. فتح ل جدتي الباب ركبها و رجع مسك يدي




طلال / ليه ابعدتي عني ما حولك احد
ميرال / طلال ابعد عني يا ويلك من جدتي لو درت عنك تفضحك قدام العالم كلهم
طلال ابتسم / فديت جدتي انا .. قلت لك من قبل محد يهمني غيرك
الجده / طليييييل وش تحوس عندك هاه
طلال همس / خيبه .. هلا جدتي هلا جايك جايك بس الباب هنا ما تقفل ..
فتح لي الباب لحد ماركبت وقفله ..
طلال / ها يلا الحين مضبوط .. حياك الله طال عمرك .. نورتي سيارتي يا قمر " الاولى للجده والثانيه ل ميرال هع "
الجده / والله مدري عنك انت و وجهك ماش وش ذا الحلاقه هماني قلت لك لاتحلق كذا
طلال / ههههههههههههه يا جده انا مابي كذا بس هذي الموضه .. صح ميرال؟
ميرال / هاه مدري
الجده / و البنيه وش يدريها عن حركاتكم يا السرابيت هاه
طلال / ول افا يا جده انتي تشوفيني كذا
الجده / انت ما تشوف عمرك
طلال / هههههههههههه لا مغمض .. يلا بس مشينا لا تبلشنا خلود الحين



حرك بسرعه قبل يسمع اي اعتراض من احد ...




ميرال / هي انت باقي خالاتي وامي واختي واختك
طلال ركز المرايه على ميرال / ماعليك منهم رياض يجيبهم انا سيارتي ماتتحمل اكثر
ميرال / لا والله
طلال / مثل ماتشوفين
ميرال / ما اشوف شي عيوني مغمضه
طلال / هههههههههههههههههههههههههههههههههههه
الجده / هها لاتزعجوني انت وياها .. انتي استحي على وجهك واسكتي وانت ركز لا تذبحنا
طلال + ميرال / ان شاء الله يا جدتي




مرت دقايق هاديه الا من اهتزاز وانوار جوالي .. سويت رفض وقلبت جوالي .. مثل ماتوقعت رجع يهتز من جديد اعرفها خلود مزعجه لابعد حد الا ارد عليها ولا مافيه امل تسكن ..





ميرال / هففففففففف تفضل استاذ طلال هذي اختك المصون بدت تزعجني
طلال / عادي قفلي جوالك
ميرال / خير صاحي انت ناوي على موتي الظاهر
طلال / بسم الله عليك .. اقولك قفليه ومالك شغل .. ابيها تتصل فيني ..





فتحت رمز القفل وسويت اغلاق للجهاز .. ومديت الجهاز ل طلال عشان افتك ويكون لي عذر .. طبعا طلال مافوتها عليه مسك يدي وقرب فمه .. مرر لسانه بهدوء بدل ما يبوسني ويطلع صوت عشان ماتفضحه جدتي .. بحركه لا إراديه لقيت حالي اعمل نفس حركته على نفس المكان .. رفعت راسي لقيته يغمز لي و هو يبتسم على جنب ..




ميرال / حماااااااااار
الجده / بسم الله عليك يمه وش فيك
ميرال / يمه فيه قطو هنا خوفني
الجده / سمي ب الرحمن يمه ترا القطو مسكون يمكن يضر
ميرال / ههههههههههه بسم الله منه يمه بسم الله علي منه
طلال/ يلا يا جدتي وصلنا .. شوفي الباب من الجهه هذي
نزلت اركض و رحت افتح الباب ل جدتي عشان اسندها .. قبل يسبقني طلال .. مسكت يد جدتي ولفيت راجعه الا طلال طلع ف وجهي استغل الفرصه مثل العاده بس هالمره اقرفني بجد
طلال / هلا هلا .. يا حلوك يا قمر
الجده / والله انك منتب صاحي الله يعين اهلك عليك بس



انا ماقدرت احافظ على توازني اكثر



طلال كتم ضحكته وسندها عليه / بسم الله بسم الله ياجده بنت خالتي وش فيها دايخه هي مانمت ولا وش سالفتها
الجده / والله مدري عنها يا وليدي
طلال همس لي / حبيبي تماسكي وحافضي على طولك والوعد اذا رجعتي ما اتركك الا تنامين
ميرال / بعد عني انت طيب
طلال / اشششش خلاص وصلنا



وصلنا طلال للباب و راح للمقهى مع الشباب .. غير اخوي رياض اللي راح جاب باقي اهلي وطلع للاستراحه يسبح ...



اول مادخلت نزلت طرحتي وعباتي وجلست على اقرب كرسسي .. وجهي كان احمر ومكتومه حدي ابي اتنفس ب اي شكل ...

rmad.ro7 31-07-2010 10:10 PM

رد: اهل عز في دنيا الخيانه .. [ اول كتاباتي ] .. Rmad Ro7
 
.. 09:05:32 ص ..







جدتي استقبلوها اهل العروس عند الباب و راحت عني هذا الشي الوحيد اللي كنت محتاجه له بذاك الوقت .. كنت احس بعيون تطالعني مستغربين يمكن من جلستي بس الاكيد مايدرون وش صار لي .. جتني الحرمه اللي واقفه تاخذ العبايات ...





الحرمه / مدام اجيب لك شي تشربينه
ميرال / لا شكرا بس خذي العبايه عني مافيني حيل اقوم
الحرمه / دقيقه بس بجيب لك كاس مويه على الاقل
اكتفيت ب ابتسامه صفرا مافيني حيل ارد عليها




جتني ساره اخت العروس وهي تطالعني من فوق ل تحت ...




ساره / ميرال؟
ميرال / هلا هلا
ساره / متغيره يا ملعونه ماعرفتك الا من عيونك وش فيك تعبانه وش صاير لك انتي
ميرال / الله يسلمك .. هاه لا ولا شي بس مانمت عدل البارح .. و لو ماهو زواج اختك ماكنت جيت اصلا
ساره / بلا تكبر عاد وامشي شوفي البنات داخل يسألون عنك اذا جيتي ولا باقي
ميرال / شوي بس اخذ نفس على بال ماتجي خلود وندخل سوى .. انتي عارفه بنت خالك تفضحني لو اروح واتركها
ساره / هههههههههههههههههههههههه اجل الله يعينك لا تبطين بس
ميرال / ان شاء الله




راحت ساره و انا جلست سرحانه .. بعد ربع ساعه بس سمعت صراخ خلود وهي داخله ...




خلود / ميار يا زفت بشويش على ثوبي كافي اختك اللي سحبت علي لا تكملينها انتي بعد
ميرال / الله يعني عليك يا بنت خالتي المصون .. هلا يا دوبا اهلين .. وين ابطيتوا علي ليه؟
خلود / انتي ولا كلمه يا الساحبه ليه تروحين وتخليني وقافله جوالك بعد
ميرال / والله عاد قولي لأخوك انا مالي شغل .. حتى جوالي معه
خلود / غبيه انتي طلال اخوي مجنون تفتيش جوالات
ميرال / عادي اصلا جوالي مافيه شي بعدين لا تخافين تراه مقفل
خالتي وضحى / ميرال وش فيك يا خاله وجهك مو عاجبني صاير لك شي؟
ميرال / لا يا خاله مافيني شي بس مو نايمه عدل البارح
امي / قلت لك نامي لك ساعتين على الاقل ماسمعتي كلامي
ميرال / يووه يمه مو وقته الحين خلاص اللي راح راح
ميار / طيب يلا ندخل الناس تطالعنا
ميرال / عادي من جلست وهم يخزون فيني ماعليك انتي




راحت امي و خالاتي و ميار .. باقي انا و خلود اللي جالسه تصلح شعرها ...




خلود / ها يلا ندخل؟
ميرال / يلا ترا ساره جتني تقول البنات دخل ينتظرونا
خلود / يووووووه هذي بيشو تدق علي مالي خلقها هفففف
ميرال / عطيني ارد عليها طيب
خلود / لا بدز لها مسج احسن امشي انتي بس
ميرال / بكيفك انتي ابخص




دخلنا وسلمنا على اللي نعرف واللي مانعرف بس يسحبوني و خلود وراي .. بعدها رحنا جلسنا عند اهلي ...




ميار / يا خبله من ذا اللي سلمتي عليهم؟
ميرال / وش دراني عنهم هم اللي يسحبون فيني وبنت خالتك السبهه وراي
ميار / زين قومي معي بروح اسلم على خواتي
ميرال / طيري بس يرحم امك خليني رايقه احسن لي مالي خلق احد خلاص كافي
ميار / براحتك انتي حره




جلسنا شوي نعلق على اللي يرقصون واللي يستعرضون ضحك وهمس الا جت بيشو و خواتها ...




بيشو / اهلين اهلين كيفك يا قمر
ميرال / هلا والله وغلا .. تمام انتي كيفك يا قلبي
بيشو / بخير ربي يسلمك يا غلاي .. وش هالحلا غطيتي علينا
ميرال / ههههههه عيونك الحلوين يا عمري كلك ذوق
خلود / اقول انثبري انتي وياها كنكم اول مره تشوفون بعض
ميرال / انتي وش عليك فينا خليكي بحالك .. الا تعالي بيشو من قالك انو احنا هنا
بيشو / مايحتاج عيونك قالت لي
ميرال / هههههههههههههههه اذكري الله بس




جلسنا سوالف وضحك وقهوه وتعليقات .. خلود وبيشو ما خلوا اغنيه الا رادحين عليها وانا جالسه اطالع من بعيد .. بعدها حطوا شوط خاص و غنوا ف ابوي .. طبعا بنات ابوي هم اللي طالبين الشي هذا .. رحت انا و ميار .. ميار وقفت مع خواتي شوي يقالها ترقص .. وانا طلعت للمنصه ووقفت اصفق ل ميار بس .. خلصت ميار و نزلنا بعد كم اغنيه جتني نوره اخت العروس ...




نوره / تعالي امي تقول خلوها تجي تبيك شوي
ميرال / يلا ان شاء الله اسبقيني وانا وراك
نوره / لا الحين بسرعه
ميرال / اوكي يلا




طلعنا لأم العروس على المنصه وكانت مسويه شوط خاص لي .. كنت ابي ميار معي بس ام العروس قالت لي تبيني انا لحالي على المنصه حتى اللي كانوا واقفين حولها نزلوا .. بدت الاغنيه وبديت اهز معها اول ماخلصت الا اسمع تصفيق البنات من تحت .. ابتسمت برضى و رحت ابوس راس ام العروس اول ما اقبلت عليها الا هي تذكر الله وتسمي ب الرحمن ضحكت لها ونزلت ...




امي / مجنونه انتي ماقلت لك لا ترقصين؟
ميرال / وش اسوي طيب ام العروس حالفه علي
خالتي وضحى / والله انك خبله كان رقصتي مع خواتك وريحتي
ميرال / لا يا قلبي غلطانه مو حركاتي هذي
ميار / ماشفتي مرت ابوك وبناتها كيف يطالعونك
ميرال / ياشيخه بحريقه اكبر همي عاد والله مادريت عنهم
امي / الله يستر عليك بس
خالتي هند وخالتي وضحى / امـــــين




شربت العصير وانا احس بصداع مدري يمكن لان الاغاني صوتها عالي .. بعد عشر دقايق جتني خلود ...




خلود / ميرال ميرال
ميرال / هاه هاه خير وش تبين
خلود / قومي نرقص انا طالبه الاغنيه هذي
ميرال / يوووه والله اني مصدعه رايقه انتي
خلود / اقول اخلصي علي بس
ميرال / طيب بس مانبي مدح ولا شوط خاص خليني اضيع بين البنات
بيشو / يلا طيب قومي والبسي عبايتك اجل وتغطي
ميرال / وش الاغنيه طيب؟
خلود / يا اهل السامري .. يلاااااا
ميرال / طيب كلنا نلبس عباياتنا عشان مايميزوني بينكم
بيشو / عيونك بتفضحك
ميرال / لا ماعليك بتغطى ب الطرحه
خلود / طيب يلا امشي




رحنا جبنا عباياتنا ولبسناها .. البنات تلثموا وانا غطيت وجهي كله بالطرحه .. بدت تغني والناس ترقص .. في نص الاغنيه بديت افقد توازني والحمدلله كانت جنبي مروى اخت العروس .. اسندت جسمي عليها وهي توقعت اني استهبل .. رجعت وقفتني ماقدرت .. مسكوني البنات ونزلنا وانا للحين متغطيه .. مرينا من عند اهل ابوي عشان نبعد عن المنصه ...




مرت ابوي / ول عليها هذي ميرال اعرفها لو تكفنت
وحده من خواتي / وراها نزلت طيب رقصها حلو
مرت ابوي / مدري عنها روحي انشديها




لفت عليهم خلود بعد ماسمعت كلامهم .. وفكت لثمتها ...




خلود / حرام عليك اذكري ربك ماتخافين على بناتك انتي ربي بكره يعاقبك ويبلاك فيهم




مرت ابوي طنشتها وخلود ماكانت تنتظر منها رد كملنا مشي بس انا قلت لهم نبي نطلع عند المرايات عشان نرجع العبايات بعد .. رجععنا وخلصنا الا هم يدخلون الحريم على العشا .. شوي تجيني ساره ...




ساره / ميرال .. امي تقول خوذي هذي المويه اغسلي فيها وجهك واشربيها
ميرال / لا يع مابي .. مايحتاج اصلا
خلود / مو على كيفك هاتي ساره




خذت خلود من ساره وبدت ترش فيني وانا اصرخ عليها عشان شعري والمكياج .. طلبت لي بيشو عصير .. وحطت لي خلود من المويه داخله وشربته .. بيشو نادتها امها و راحت .. وانا وخلود دخلناجناح العروس لاني كنت دايخه ...




ميرال / خلود وين جوالك
خلود / امسكي بس ليه
ميرال / لا ولاشي هاتي بس




اخذته وجلست ادور اغنيه محدده مالقيت ...




ميرال / ماعندك اغاني تفتح النفس
خلود / اقول هاتي بس اذكري ربك منتي ناقصه




شوي دخلت بيشو و مروى و ساره .. جلسوا يسولفون مع خلود وانا نمت ماحسيت الا بيشو تصرخ فيني ...




بيشو / ميرال قومي ترا بخلي طلال يدخل يشيلك




فزيت كني مقروصه وطلعت من الغرفه وهي تلحقني ...



بيشو / تعالي ميرال وين رايحه مافيه احد تو الناس
ميرال / بلاك حماره ليش تقوميني
بيشو / ههههههههه مدري مروى تقول قوميها عشان تاكل




شوي جتنا نوره و خلود ...



خلود / صح النوم كان ما قمتي
بيشو / ولا طراها الا يوم قلت ان طلال بيدخل يشيلك فزت كنها مقروصه
خلود / طلال هذا مسبب لها رعب مدري ليه
ميرال / اقول روقونا بس ابي مويه عطشانه
خلود / من جيتي وانتي تشربين من ذا المويه
ميرال / اذكري ربك بس لاتوطاك الحين
خلود + نوره / لا اله الا الله





دخلنا على العشا و كان بوفيه .. جلست على اقرب طاوله وانا ما اشوف زين من النوم .. الا لمحت بنت عم العروس جايه عندي ...




امال / سلامات سلامات خبصتي العالم عليك
ميرال / افا عليك انا ميرال مو حي الله
امال / انا اشهد .. ياشيخه حتى امي قامت تدعي لك
ميرال / الله يسسلمها .. وينها عمتي ماشفتها اليوم
امال / خلصي اكل ونطلع لها
ميرال / لا مابي انا جايه اخذ مويه وبطلع
امال / تحلمين .. امك قبل تطلع وصتني عليك .. تدري انك ماترديني
ميرال / امال والله تعبانه
امال قربتني ل حضنها / سلامتك حبيبتي .. كلي لك شي عشان تركزين




" امال هذي بنت عمة امي .. عمرها 32 مدرسه مع وقف التنفيذ هع .. كانت مملكه على ولد عمتي بس تركوا .. من كنت صغيره وانا معها .. انسانه حنوونه كثير "



جتنا خلود و بيشو يضحكون علي ...




خلود / وش جايك انتي اليوم كل العالم تحضن فيك
امال / الله لا يلومهم والله
خلود / اقول اوص بس لا تكبرين راسها علينا ترا محنا ناقصين
امال خذت الصحن من خلود / اقول سوقيها بس
خلود / مابي قاعده على قلبك




بدت تأكلني امال وانا اكل مره وعشر لا .. خلصنا وقمنا طالعين .. الا بنات اختها داخلين ...




اريج / خير خير سلامات وش جاك انتي؟
ميرال / لا ابد سلامتك بس مانمت زين
اميره / والله ماعرفناك الا يوم طحتي على مروى
ميرال / هههههههههههه الشكوى لله اسهرتني خلود ولا كنت ناويه انام من العشاء
خلود / انا ولا ذا النت اللي عبادته حضرتك
ميرال / اووص
اميره / حلووو مبروك اللاب
ميرال / الله يسلمك
اريج / عندك ايمل؟
ميرال / اي اكيد عندي
اميره / خلاص ارسليه لنا عشان نضيفك
ميرال / اوكي بس ماعندي ارقامكم
اريج / خذيها من امال
ميرال / حتى امال ماعندي رقمها
خلود / كل ذا الرومنسيه ولا عندك رقمها العبي غيرها
ميرال / كلي تبن انتي مالك خص فيني
امال / خلاص بنات يوصلكم ان شاء الله .. يلا حنا طالعين نشوفكم على الطاوله عند امي
اريج + اميره / اوكي سلام




" اميره و اريج .. بنات مشاعل اخت امال .. ابوهم مات منتحر بس مافرق معهم .. مخربينها لابعد حد .. اميره 28 مطلقه من ولد خالتها اللي اخذته عن قصة حب .. وعندها بنت و ولد ... اريج 23 خلصت ثانوي وجالسه ف البيت .. كل شباب الجماعه يتمنون تعطيهم وجه .. بس مافيه امل تكلم واحد من العايله < قناعه عندها > "




رحنا ل عمة امي وسلمت عليها وجلست جنبها .. طول الوقت وهي ماسكه يدي وتسمي ب الرحمن وتذكر الله ...




ميرال / ها يا عمه ترجعين معي انا و خلود ل البيت
العمه / لا يا عمتي ابوك عندكم عيب علينا نروح عنده
ميرال / افا يا عمتي انا وحده من بناتك ماني غريبه .. قولي تم بس
العمه / الله يشهد انك اغلى من بناتي بعد .. بس مدري شاوري البنات وشوفي وش يريحهم
ميرال / اجل خلاص ترا رياض بيجي يرجعنا
العمه / الله يسهل
ميرال / خلود دقي على خالتي هند خليها ترسل جوالي مع السايق تراه مع اخوك
خلود / من قالك ان اخوي عند امي .. تراه ف المقهى
ميرال / خلي بيشو تكلمه يجيبه طيب
خلود / اوكي
امال / ميرال صاحيه انتي
ميرال / لا مجنونه فيك
امال / لا صدق وشلون نروح معكم وبنات مشاعل اختي عندنا
ميرال / هذا المطلوب تروحون كلكم .. ترا ولد عمتي مشتكيكم عندي .. يقول كاتمين على صدري .. مايقدر ياخذ راحته الرجال في بيته
امال / اقول روقينا اصلا ولد عمتك اللي تقولين مسافر
ميرال / عاد مالي دخل تجون معي يعني تجون
امال / طيب وعيال اميره طيف وعبدالمجيد
ميرال / تتحملهم شوي ماتخرب الدنيا .. بعيدن هناك فيه شغاله تمسكهم .. و رياض جاي ب الجمس يكفي
امال / على هواك اجل
بيشو / ميرال .. روحي جيبي جوالك طلال عند الباب
ميرال / يوووه مافيني حيل اجيب عبايتي
خلود / مالي دخل فيك لا تطالعيني كذا
ميرال / طيب خلاص لا تذليني




طلعت عند المرايات اخذت عطري وتعطرت وطلعت .. الدنيا ظلام محد راح يركز فيني .. وقفت عند الباب الا هذا طلال اشرت له بيدي وعرفني من خاتمي وجا بسرعه .. انصدم فيني يوم شافني بدون عبايه ...




طلال / ميرال وش ذا صاحيه انتي كيف طالعه بدون عبايه ولا طرحه
ميرال / محد منتبه لي لاني ماراح اطول




طلال ابعد عيونه حوله شاف اخوان اميره و اريج واقفين مع عيال عمته ويطالعونه .. فصخ غترته وهو معصب وحطها على راسي .. وحط الجوال ف يدي ...




طلال / يلا ادخلي بسرعه
ميرال / طيب لا تنافخ




نواف / شباب من تتوقعون بنته؟
خالد / يمكن اخته !
سعود / لا ماهي بنت خالي هذي عيونها ملونه ! .. بنت خالي حنطيه
خالد / اجل يمكن وحده فيها عرق اجنبي
نواف / ماهو هين طلال يشبك من ورانا
سعود / اوص اوص هذا هو جاي
خالد / ها طلال وش عندك هناك
طلال / ابد والله رحت ادخل اغراض للبنات موصين عليها
سعود / الا وين راح شماغك
طلال / يقولون عبدالمجيد يصيح داخل مضيع شماغه وعطيته حقي
نواف / وش ذا الخيانه طلالوه تشبك من ورانا
طلال / من متى وانا راعي بنات !
نواف / اجل من بنته اللي طلعت لك
طلال / بنت عمامك وتاج راسك يا لوح




راح طلال ل الاستراحه عند رياض وهو متضايق مني ليش اني طلعت بدون عبايتي ...



اخوي رياض / هلا بالشيخ
طلال / هلا بك
اخوي رياض / وش بلاك يا رجال
طلال / يا شيخ البنات جننوني عين يطلعن من ذا العرس رحت و خليتهم
اخوي رياض / ماعليك الحين بروح اجيبهم .. دقت علي ميرال تقول عمتي ام مشاعل بتجي معها واكيد بناتها وبنات بناتها
طلال / الله يعينك
اخوي رياض / الله يفرجها .. الا معك موتر يشيلهم
طلال / هذا مفتاح سيارتي تلقى ف الدرج اللي قدام مفاتيح الموتر اللي واقف له شهر عند الباب
اخوي رياض / هذا الوالد الله يهديه مدري وش قصده
طلال / الا ماقلت لي وين الشباب عنك
اخوي رياض / ماعندي سهره اليوم ابي ارتاح وشكل مافيه امل
طلال / ههههههههههههههههههههههههههههههههههههههه
اخوي رياض / يلا سلام




جا رياض ياخذنا مثل ماوصيته .. واتصل علي عشان نطلع له عند الباب ...



ميرال / يلا بنات هذا رياض عند الباب خلونا نطلع لا يعصب علينا



اسندت انا و امال عمتي وطلعنا .. جانا رياض ومسك عمتي و ركبها قدام و انا و امال ركبنا ورى ...



امال / السلام عليكم
اخوي رياض / وعليكم السلام .. وين الباقي
ميرال / يلبسون ويجون
اخوي رياض / لا يتأخرون هناك طلال ل حاله ف الاستراحه ابي الحق عليه لا يجمع لي السلنتح حقينه
ميرال / لا هذا هم جاين
اخوي رياض / وش اخبارك عمتي عساك بخير
العمه ام مشاعل / الله يسلمك بخير دامك بخير .. وش اخبارك وش اخبار ابوك عسى اموره تمام
اخوي رياض / ابشرك بخير .. ويسلم عليك
العمه ام مشاعل / الله يسلمه




دخلت خلود والبنات ميبسين من الخوف ...

خلود / اهلين ابن خالتي
اخوي رياض / كان ما طلعتي انسه خلود .. اثاري ماجنن اخوك الا انتي وهو يقول البنات ..
خلود / ايه حتى انه ما وداني ل الزواج .. بس اخذ جدتي و......



ضربتها بكوعي عشان ما تفضحني و ربي ستر ...



خلود / .... وخلاني اجي معك
اخوي رياض / ليه ما عجبتك انسه خلود
خلود / لا محشوم بس اعلمك انه جحده
اخوي رياض / طيب خلاص لا تزعجيني ابي اعرف اسوق والشوارع زحمه كلها سكارى ومحششين
خلود / طيب خلاص لا تدف هاه سكتنا




وصلنا ل بيتنا ودخل رياض السياره للكراج .. ونزلنا داخلين للفله اللي كانت ثلاث ادوار .. الدور الاول مجالس ومطبخ وصالات استقبال وبلكونات حولها حدايق وملعب قولف ومسبحين مع بيت شعر ... الدور الثاني كان جناح ابوي وامي .. جناح رياض وجناح ميار وجناحي مع صاله كبيره وبلكونه مفتوحه .. الدور الثالث كان مخصص ل الضيوف وفيه غرفتين للخدم ب حمامها مع غرفة الغسيل ...



طلعت انا والبنات الدور الثالث دخلتهم الغرف ودليتهم على الحاجات الاساسيه .. وكان فيه مطبخ تحضيري في طرف الصاله وثلاجه صغيره .. دخلت على جدتي لقيتها تصلي الفجر .. سلمت وبدت تستغفر .. جيت حطيت راسي على حضنها ..




ميرال / جده ابي انام تعبانه ماجاني النوم يا جده
جدتي / نامي يابنيتي نامي



بدت تهدني بيدها وانا دايخه ما اشوف .. شوي الا رن جوالي وكانت خلود ..



رديت / همممم
خلود / و وجع تعالي وين رحتي طفشنا نحتريك
ميرال / طيب بنزل ابدل واجي عندكم خلاص روحي انتي
خلود / طيب لا تبطين بس


[ لحد هنا اسمحوا لي اوقف .. باقي ماخلصت الروايه لكن بنتظر انطباعكم عنها ]

الزعيـ A.8K ـمه 01-08-2010 01:55 AM

رد: أهل عز في دنيا الخيانة / بقلمي
 
,’



بسم الله
و عليكم الســلام و الرحمة



يعطيك العـــافية
موفقة إن شـــاء الله




https://forums.graaam.com/238622.html


,’

rmad.ro7 02-08-2010 05:26 AM

رد: أهل عز في دنيا الخيانة / بقلمي
 
-

حيآآكي الله ويآآ هلآلآ بكي

تم الآطلآع و ب إذن الله جآآري الآلتزآآم

ششرفتي يآآ أميره


.....


اكممل ولآلآ أبططل .. وشش رآآيكمم

A6L8 NFRH 02-08-2010 06:43 PM

رد: أهل عز في دنيا الخيانة / بقلمي
 
كنه قريبه للواقع شوي .. كملي ليش وقفتي !
ماعليك من الردود ترا الكل متابع بس مايبي يقول !

ميرال و ميار اسماء جديده علي !
الله يديم افراحهم يا رب <~ متأثره هع

لا جد واصلي واصلي عشاني انا متابعه بقووووه !

A6L8 NFRH 03-08-2010 12:58 AM

رد: أهل عز في دنيا الخيانة / بقلمي
 
حبيبتي وينك .. يلا نزلي الباقي والله متحمسه
غير كذا احس اسلوبك موب غريب علي
انتظرك لا تتاخرين

بنات بليز تفاعلوا معها عشان تنزل الباقي والله حرام

شقاوة طفله* 03-08-2010 01:03 AM

رد: أهل عز في دنيا الخيانة / بقلمي
 
يسلموووووو على هيك بارت
ننتضر الجديد

sTaR - giLr 03-08-2010 01:19 AM

رد: أهل عز في دنيا الخيانة / بقلمي
 
يسـلمو قلبو روايه رووووعه
كملي تجنن ...

rmad.ro7 05-08-2010 02:04 PM

رد: أهل عز في دنيا الخيانة / بقلمي
 
اقتباس:

atl8 nfrh
هلآآآبكي

أسعدني توآآآجدكي .. ان شآآآء الله اكمل ل عيونكي ومن تابعني

حيآآآكي


الساعة الآن +3: 02:45 PM.


موقع و منتديات غرام موقع سعودي خليجي عربي يحترم كافة الطوائف والأديان ومختلف الجنسيات


SEO by vBSEO 3.6.1